<a href="https://kyzylorda-news.kz/">Kyzylorda-news.kz.</a>&nbsp; Қызылордада 22 жастағы азаматдүние жүзінде әлі емі табыла қоймаған «Хираяма» ауруына шалдыққан. Айықпас дерт әлемде тек 800-дей ғана адамның бойын билеген. Бауыр еті баласы үшін барын беруге даяр ата-анаcы ем іздеп, түрлі қарекетке барады.&nbsp;<blockquote>Екі жыл бұрын үлкен ұлымыздың «Хираяма» ауруына шалдыққаны отбасымызға қайғы бұлттарын үйді. Түнде ұйқыдан, күндізкүлкіденайырылдық. Баламыздың бойына жабысқан дерт тоқтаусыз өрши берді.&nbsp; Сырын ішіне бүккен бұл бәлекет аурудың емін іздеп, түрлі медициналық-зерттеу институттары мен орталықтарға жүгіндік. Алайда, айтарлықтай күткен нәтиже бола қоймағасын, Израиль мен Германия еліндегі дәрігерлерге апару ойға келді. Дегенмен,«Ұлттық нейрохирургия орталығында да білікті мамандар бар» деген кеңеске құлақ асып, баламызды Астана қаласына апардық,-деді Жаңагүл Сейділдаева.</blockquote>Анасының айтуынша,медицинада бұл дерттен толық айығып шығудың төте жолы табылмаған. Тек мойын омыртқаларына ота жасау әдісі ғанакөңілге медет сыйлайды.&nbsp;<blockquote>&nbsp;Бізге ота өте күрделі өтетінін айтты. Мойын омыртқаларының бір бөлігін кесу барысында омыртқа ішіндегі жұлынды зақымдап алмауымыз қажет деді. Егер абайсыздан жұлын зақымданған жағдайда, тұла бойы тұңғышымыздың арбаға танылып, қимыл-қозғалысы тежеліп қалуы бек мүмкін. Бар үмітімізді тағдырдың жазуына артып, Алланың сынақ-сыйына көнуден басқа амалымыз қалмады. Тәуекел етіп, ота жасатуға келісім беруге бел будық,-деді анасы Жаңагүл.&nbsp;</blockquote>Отандық дәрігелер біліктілігін тағы бір рет дәлелдеп, бойларына үміт пен күдік ұялаған отбасыға ерекше қуаныш сыйлады. Тәжірибелі дәрігер-нерохирург Алейников Виктор Григорьевич бастаған дәрігерлер тобы балаға 4 сағаттан астам уақыт ота жасап, оны іліксіз өткізді. Аналық сезімін жасыра алмаған Жаңагүл редакцияға хабарласып, дәрігерлерге алғысын жеткізуді өтінді.&nbsp;Қазір баланың жағдайы бірқалыпты. Дегенмен, бұл аурудан толық айықты деген сөз емес. Бастапқыда қолы жансызданып, қимыл-әрекетті сезінбей қалған баланың көз жанары оянып, ата-анасын қуанышқа бөледі.&nbsp;&nbsp;&nbsp;

Дәрігерлер әлемде сирек кездесетін аурумен ауыратын қызылордалық балаға үміт сыйлады

<a href="https://kyzylorda-news.kz/">Kyzylorda-news.kz.</a> Бүгінде медицина саласына үңілсеңіз мың мамандықты қамтиды. Бәрініңде бәсі бар, жауапкершілігі жоғары. Соның ішінде хирургия саласының жүгі ауыр. Олай дейтініміз терең білім мен теориядан өзге бұл сала қызметкерлерінде жәрдем беру қасиеті өте маңызды. Адам жанымен күресіп, өмір мен өлім арасында араша болуда алдыңғы шептен табылады.Мақаламызды түсінгеніңіздей медицина саласына арнадық. Соның ішінде Байқоңыр қалалық көпбейінді ауруханасының хирургия бөлімін елге таныстыруды жөн көрдік. Атаулы бөлім 2019 жылы желтоқсан айында ашылыпты. Алғаш бөлім меңгерушісі болып Қарасай Ердешұлы келсе, 2021 жылдан бастап бөлімде Шахмарат Оспанов басшылық етуде. Бастапқыда отаның жеңіл түрін жасаған хирургия қазіргі таңда өкпе, сүт безі, қалқанша без, бүйрек, тік ішек, тоқ ішек, грыжа тағы басқа ауруларға күрделі ота жасап жүр.<blockquote>«Хирургия – медицинада күрделі әрі қиын сала. Бұл мамандықты меңгерген маманның бойында берік жүйке, шыдамдылық, ұстамдылық, сабырлылық, төтенше жағдай туындаған сәтте де жағдайды бақылауда ұстай білетін қасиеттер болуы керек. Адамның қанын көру, онымен жұмыс жасау кез келген адамның қолынан келе бермейді. Сондықтан ота жүргізетін дәрігер ретінде күйзеліске төзімді, жылдам ойлай алатын маман болған жөн. Отаны жеңіл, ауыр деп бөлмейміз. Бәрі де жауапкершілікті талап етеді. Кейде жеңіл отаның өзі ұзаққа созылып кетуі мүмкін», – дейді бөлім меңгерушісі Шахмарат Есенжолұлы.</blockquote>Бүгінде хирургия бөлімінде 20 қызметкер жұмыс істейді. Олар – 3 хирург, 1 бөлім меңгеруші, 1 аға медбике, 1 шаруа иесі, 5 тазалықшы, 5 палата, 1 таңып байлау, 1 ем-шара мейірбикесі және 1 ас таратушы. Сонымен қатар науқастарға 20 орын қарастырылған. Шахмарат Оспанов – жоғары санаттағы хирург дәрігер, хирург-онколог. Ал Темірхан Мұратов – нейрохирург, Жаналы Олжас – хирург дәрігер, Ерболат Ізбасханов – хирург дәрігер, пластикалық хирург. Сонымен қатар Лаура Ұзақбайқызы – аға медбике. Мұндағы дәрігерлердің міндеті науқастарды қабылдап, тексеріп, ем тағайындайды. Арнайы мамандандырылған мамандарға немесе ем қабылдауға жатқызуға жолдама береді. Ауырғандығын растайтын медициналық тексеру картасын толтырады. Кезекшілікте тұрған хирург-дәрігер тәуліктің қай мезгілі болмасын ота жасауға дайын.&nbsp;<blockquote>«Жалпы хирургия бөлімшесінің қызметі – аурухананың айнасы. Хирургиясы жақсы аурухана жақсы көрсеткіштерге ие болады демекші, біздегі мамандар біліктілігі жоғары білімді дәрігерлер. Қалған қызметкерлеріміз де өз ісіне тиянақты жауапты жандар. Мейірбикелеріміз науқастарға жылы қабақпен қарап, тез сауығып кетуіне ықпал жасайды. Міне, осындай қиын да күрделі салада абыроймен ауызбіршілікпен елге қызмет көрсетіп келеміз», – дейді дәрігер хирург Шахмарат Оспанов.</blockquote>

Қармақшылық ақ халаттылар алдыңғы шепте жүр

<a href="https://kyzylorda-news.kz/">Kyzylorda-news.kz.</a> Адамды танып, тұлға туралы көзқарасты қалыптастыру үшін ат шаптырып алысқа барып, том-том кітап оқудың қажеті жоқ. Айналасындағы адамдардың пікіріне құлақ түрсеңіз жетіп жатыр. Өйткені қоғам таразы, халық сыншы. Әдетте сын дегенде біз кемшілік айту деп түсінеміз. Негізінде сын – турасын айту, жөнін айту. Мұны түсінген абзал. Ойды ой қуады. Бұл ойға біз әйгілі дәрігер, саналы ғұмырын адам жанының арашасы болуға арнаған Қарасай Нұров жайында зерделеу барысында көз жеткіздік. Қалай дейсіз ғой? Алда дәрігерлер күні келеді. Осы орайда өңіріміздегі білікті, танымал дәрігер, ақ халатты абзал жан туралы мақала жазуды көздегенбіз. Сұрастыру кезінде кімнің қаншалықты елге пайдасы тиіп жүргенін білдік. Нәтижесінде бізді Қарасай ағамызға қоғам пікірі жетеледі.Білікті дәрігер Арал ауданына қарасты Ақшатау ауылының тумасы. Ол сөз басында бұл мамандықпен ауылы байланыстырғанын айтады. Себебі бала кезінде үйдің төбесінде ойнап жүрген Қарасай жоғарыдан құлап аяғын сындырып алады. Содан аурухана ұзақ жатып шығып, одан ауырып емделіп жүргенінде жеті жыл уақыт өтеді. Осыдан бастап жанына батқан сырқаты медицинаға келуіне сеп болады.<blockquote>«Мектепті жақсыға бітіріп тұрып, оқуға түсе алмадым. Менің әкем мектептің директоры болды. Осыдан кейін намыстанып ауылға баруға ыңғайсыздандым. 1973 жылы Қызылорда қаласындағы ауыл шаруашылық техникумында мал дәрігерін үш жыл оқып, оны бітіргесін үш жыл жұмыс істедім. Одан кейін Целиноградтағы &nbsp;мемлекеттік медицина институтының емдеу факультетіне қайтадан оқуға тапсырып, түсіп, оны 1986 жылы бітірген соң бір жыл Қызылорда облыстық ауруханасында хирург, ортопед-травматолог мамандығы бойынша интернатураны аяқтадым. Сөйтіп 1987 жылы жас маман болып Ленинск, қазіргі Байқоңыр қалалық ауруханасында дәрігер-ординатор болып еңбек жолымды бастадым. Кейін осында хирургия бөлімінің, Ресей Федералдық медициналық-биологиялық агенттігінің №1 медициналық бөлімшесінің хирургия және травмотология бөлімінің меңгерушісі, сонымен қатар Төретам кентіндегі емханада хирург дәрігер қызметтерін абыроймен атқардым», – дейді дәрігер.</blockquote>Былайғы жұрт хирургты – медицина саласында ең экстремальды болып саналатын мамандықтың бірі екенін біледі. Осы тұста Қарасай Нұров өзінің жұмысын жетік меңгеру үшін тек хирургия саласын терең зерттеп, елге танымал мықты профессор дәрігерлерден білім алған. Алматы, Астана, Шымкент, Мәскеу, Курган, Волгоград және Минск қалаларының жетекші клиникаларында бірнеше рет біліктілігін арттырып, хирургиялық және травматологиялық операциялардың жоғары технологиялық әдістерін меңгерген. Қызмет барысында адам өмірін құтқару – ол үшін күнделікті әдетке айналған. Бүгінгі күнге дейін он мыңға жуық науқасқа ота жасаған. Қызметте адамға ерекше шабыт сыйлап, мерейін үстем ететін ол – алғыс, яғни емделушінің алғысы екенін айтады.<blockquote>«Осы салаға келгеннен кейін науқастарға түрлі ота жасадым. Соған лайық алғысын да алдық. Бір жылы Байқоңырда наурыз мерекесі тойланды. Орталық алаңда жүргенімде бір орыс жігіт келіп амандасып «Мені таныдыңыз ба?» деді. Мен «жоқ» дедім. Ол, «Маған ота жасап өлім аузынан алып қалғансыз, рақмет» деп біраз жыл өтіп кеткен сәтті еске түсіріп, танып келіп тұр екен. Осылай көшеде кездескен пациентің жылы жүзбен сәлем беріп, алғысын айтса көңілденіп қаламыз», – дейді ол ағынан жарылып. &nbsp;&nbsp;</blockquote>Антына адал дәрігер 2016 жылы облыстық медицина орталығының Байқоңыр қаласындағы филиалын басқарып, 2019 жылы зейнетке шыққан. Алайда еңбек демалысындамын демей Байқоңыр қаласындағы көпсалалы аурухананың жалпы хирургия бөлімінің меңгеруші қызметін атқарған. Қазіргі таңда осы жерде кеңестік-диагностикалық бөлімінде меңгеруші. Байқоңыр қаласындағы медицина қызметкерлері ардагерлер кеңесінің төрағасы. Қоғамдық жұмыстарға белсене қатысып, атсалысып жүрген жан.Бүгінде білікті дәрігердің еңбегі бағаланып, әр жылдары Байқоңыр қаласындағы медицина саласына қосқан үлесі үшін Құрмет грамоталарымен, сондай-ақ «Қазақстан Республикасы денсаулық сақтау ісінің үздігі» төсбелгісімен, басқа да көптеген мерекелік медальдармен марапатталған. Жақында дәрігерлер күні қарсаңында денсаулық сақтау саласының майталманы ретінде Байқоңыр қаласының тарихында қазақ дәрігерлері арасынан «Байқоңыр қаласының құрметті азаматы» атағын алды.

Байқоңырлық байсалды дәрігер

<a href="https://kyzylorda-news.kz/">Kyzylorda-news.kz.</a> Бүгін Қызылорда қаласы әкімінің орынбасары Дінмұхамед Ермеков «Шырақ» клиникасы жаңа ғимаратының ашылу рәсіміне қатысты.<blockquote>«Кез келген мемлекеттің ең басты байлығы, бұл – адами капиталы. Біздің басты мақсатымыз да, халықтың әлеуметтік жағдайымен қатар рухани және денсаулық жағдайын жақсарту. Өздеріңіз білесіздер, соңғы жылдары өңірімізде жергілікті инвесторлардың қолдауымен мемлекеттік-жекеменшік әріптестік аясында қала халқына қажетті түрлі әлеуметтік нысандар салынуда. Оны бүгініміз бен болашағымызға бей-жай қарамаған азаматтардың туған жерге деген ыстық ықыластарының көрінісі деп ұққанымыз жөн. Облыс орталығында осындай денсаулық сақтау нысанының аясын кеңейткен «Шырақ» клиникасының басшылығына риясыз алғысымды білдіремін және жаңа бастамаларына табыс тілеймін. Жаңа ғимарат құтты болып, халықтың игілігі үшін қызмет етсін», - деп жүрекжарды лебізін білдірді Дінмұхамед Ермеков.</blockquote>«Ұлт саулығы жақсы болса ғана, қоғам орнықты дамиды» - деген ел Президенті Қасым-Жомарт Кемелұлы Тоқаев өз Жолдауында медициналық инфрақұрылымды кешенді түрде жақсартуға баса назар аударып, бұл ретте мемлекет пен жекеменшіктің серіктестігін тиімді пайдалану тұрғысында сөз қозғаған болатын.Осы орайда, аймақта 10 жылдан астам уақыттан бері халыққа сапалы қызмет көрсетіп келе жатқан «Шырақ» клиникасының орны ерекше. Шағын офтальмологиялық орталықтан бастау алып, көздің микрохирургиясы бойынша ота жасау деңгейіне көтерілген клиника қанатын кеңге жайды.Клиника басшылығы өз қаражаты есебінен 200 миллион теңге инвестиция құйып, «Даму» кәсіпкерлікті дамыту қоры арқылы 40 миллион теңге несиемен емдеу орнының керегесін кеңейтті. Бүгінде жаңа ғимаратта 20-дан астам жергілікті маман жұмыспен қамтылып, еңбек етуде.Бұл күндері Қызылорда облысына ғана емес, республикаға танымал, аймақта баламасы жоқ «Шырақ» клиникасының дәл осындай заманауи құралдармен жабдықталған жаңа ғимаратқа көшуі, ұлт саулығы жолындағы жаңа биіктерге ұмтылуы деп білеміз.

Клиника «Даму» кәсіпкерлікті дамыту қоры арқылы керегесін кеңейтті

<a href="https://kyzylorda-news.kz/ru">Kyzylorda-news.kz.</a>&nbsp; Қазақстанда ауылдық елді мекендерде халықтың 38%-ы тұрады. Олардың басым бөлігі ресми жұмыс істеп, МӘМС-ке жалақыдан аударымдар мен жарналар төлейді. Кейбір азаматтар дербес төлеуші ретінде (айына 3500 теңгеден төлеп) сақтандырылған. Біреуге БЖТ қолайлы және ол жеке табыс салығын, әлеуметтік аударымдарды, зейнетақы төлемдерін және МӘМС жарналарын қоса алғанда, ай сайын небәрі 1 725 теңге (0,5 АЕК) төлейді.&nbsp;Барлық сақтандырылған азаматтар төлеген жарна мөлшеріне қарамастан МӘМС тізіміне кіретін медициналық көмектің қажетті көлеміне алуға құқылы.Әлеуметтік медициналық сақтандыру қорының Қызылорда облысы бойынша филиалының директоры Бақыт Исмаханбетов ауруды диагностикалау, дәрігер кеңесі немесе қымбат ота қажет болса ауыл тұрғындары &nbsp;қайда жүгіну керектігін айтып берді.Ауыл тұрғындарына медициналық қызмет көрсетушілер&nbsp;Әлеуметтік медициналық сақтандыру қоры 2023 жылы 228 медициналық ұйыммен алғашқы медициналық-санитарлық көмек (аудандық емханалар) көрсетуге шарт жасасты, оның 46-сы жеке меншік. Қызылорда облысында ауыл тұрғындарына АМСК-тың қызметтерін 9 медициналық ұйым көрсетеді, оның 2-і жеке меншік. ҚР - дағы ауылдағы стационар қызметін 233 клиника көрсетеді, оның ішінде 182 – мемлекеттік және 51 – жекеменшік. Өңірде стационарлық емдеу 8 медициналық ұйымда жүргізіледі, оның 7 - і мемлекеттік және 1-і жеке меншік.Барлығы учаскелік дәрігерден басталады ... &nbsp;Ауылдық елді мекендердің тұрғындары медициналық көмек алу үшін алдымен жергілікті дәрігерге бару керек. Әр елді мекенде дәрігерлік амбулатория немесе медициналық пункт болады. &nbsp; «Қандай да бір ауырсыну болса, пациент алдымен жергілікті дәрігерге баруы керек. Дәрігер оның жағдайын бақылап, ем тағайындайды немесе бейінді маманның кеңесін алуға аудандық ауруханаға жолдама береді. Шұғыл жағдайда тұрғынды ауруханаға жедел жәрдеммен жібереді», – дейді Бақыт Исмаханбетов.Бейінді дәрігерге қалай жазылуға болады? &nbsp;Пациент гастроэнтерологке жолдама алды делік. Енді ол дәрігер кеңесіне аудандық аурухананың тіркеу орнына қоңырау шалу арқылы немесе оның медициналық ұйымына енгізілген медициналық ақпараттық жүйенің мобильді қосымшасы арқылы жазыла алады. Қарияларға бұл жағдайда ауылдық медбике көмектесе алады. &nbsp; Егер пациент МӘМС жүйесіндегі медициналық қызметтерді тұтынушы болса, қабылдауға жазылып, ары қарай диагностикадан өтеді. Оның қорытындысы бойынша, ем тағайындалып, қажет болса, отаға жіберіледі. Бұл жағдайда қажет тексерілулер кешені жүргізіледі. Дәрігер пациентті Емдеуге жатқызу бюросы арқылы тіркеп, ота жасалатын күн таңдалады.Аудандық ауруханада қажетті медициналық қызмет болмаса не істеу керек?Қандай да бір бейінді маман немесе қажетті диагностикалық қызмет болмаған жағдайда пациентті қалаға, аурухамен бірлесіп орындау шарты бойынша жұмыс істейтін медициналық ұйымға жібереді. Сондай-ақ, азаматтар Қордың деректер базасында тұратын және МӘМС бойынша көрсетілетін керек қызметтерді, клиниканы өздігінен таңдай алады.&nbsp; &nbsp;Бұл ретте оған шарттың жоқтығына сілтеме жасай отырып, жолдама беруден бас тартуға құқығы жоқ. Себебі шарт жазбаша жолдама мен көрсетілген қызмет негізінде автоматты түрде толтырылады. Қор сарапшысының айтуынша, аудандардың орталық ауруханалары мен емханалары әдетте ультрадыбыстық және рентгендік жабдықтармен толық жабдықталған, толыққанды зертханалар жұмыс істейді. КТ және МРТ аппараттары &nbsp;қалалық клиникаларда ғана бар, сондықтан ауыл тұрғындары бұл тексерулерге қалаға жіберіледі. Пациент жолдама алған соң, қажетті клиникаға қоңырау шалып, МӘМС аясында диагностикаға жазылады.Жүкті әйелдерді бақылау қалай жүргізіледі?Дәрігерлік амбулаториялар мен фельдшерлік-акушерлік пункттерде &nbsp; &nbsp; зертханалар жұмыс істейді. Жүкті әйелдер онда барып анализдер тапсыра алады. Олар жергілікті акушердің бақылауында болады. Ал акушер болмаған жағдайда, аяғы ауыр әйелдер ай сайын аудандық ауруханаға жоспарлы түрде барып, қажетті тексерулерден өтеді. Егер шұғыл медициналық көмек керек болса, әйел жедел медициналық көмекті шақырады. Олар қажет деп тапса, аудандық ауруханаға жеткізеді.&nbsp; Стоматологиялық қызметтер ауыл тұрғындарына қол жетімді ме? Иә, 18 жасқа дейінгі балалар мен жүкті әйелдер стоматологиялық қызметтерді жоспарлы түрде ала алады. &nbsp;Шұғыл стоматологиялық қызметтер халықтың 10 санаты үшін қолжетімді: 18 жасқа дейінгі балалар; жүкті әйелдер; Ұлы Отан соғысының ардагерлері; мүгедектер; "Алтын алқа", "Күміс алка" алқаларымен марапатталған көп балалы аналар; жасы бойынша зейнеткерлер; атаулы әлеуметтік көмек алушылар; айналасындағыларға қауіп төндіретін инфекциялық, әлеуметтік маңызы бар аурулары бар пациенттер; мүгедек балаға күтім жасайтын жұмыссыздар; I топтағы мүгедекке күтім жасайтын жұмыссыздар. Бұл азаматтардың барлығы сақтандырылған мәртебесі болу керек, өйткені стоматологиялық қызметтер МӘМС тізіміне кіреді.Қазір көптеген стоматология Қормен шарт жасасып, аудан орталықтары мен ірі кенттерде қызмет көрсетеді. Айта кету керек, стоматологкқа бару үшін жергілікті дәрігердің жолдамасы қажет емес. Сондықтан тиісті санаттағы ауыл тұрғыны МӘМС аясында пациенттерді қабылдайтын стоматологияны өз бетінше таңдай алады (клиникалардың тізбесін Қордың сайтында "Медициналық көмекті сатып алу" - "Консультативно-диагностикалық қызмет жеткізушілері" бөлімінен көруге болады: https://fms.kz/kz/zakupki/postavshchiki-kdu-uslug/), және қажет емге жазыла алады. &nbsp;Оңалтудан қалай өтуге болады?Оңалту курсын реабилитолог маманы немесе реабилитациялық комиссия тағайындайды. Аудандық ауруханаларда күндізгі стационар деңгейінде оңалтудың үшінші кезеңі жүргізілуде. Оған емдік дене шынықтыру, физиотерапия, массаж кіреді. Дегенмен, пациенттің қалауы бойынша кез-келген қалада оңалту емін алуға болады. Алдымен оңалту орталығы таңдаған мүмкіндіктер мен кестені нақтылау маңызды. «Оңалту қызметтері міндетті әлеуметтік медициналық сақтандыру есебінен көрсетілетіні көпшілікке мәлім. Бұл ауыл тұрғындарының өмір сүру сапасын жақсартуға оң әсер етті. Отадан кейін әркім өз қалтасынан жүздеген мың теңгеге оңалтудан өте алмайды, ал көптеген адамдар жыл сайын бірнеше оңалту курсынан өтуі керек. Ал МӘМС есебінен қабілеттерін қалпына келтіріп, өмір сүру сапасын тегін арттыруға болады», – деп атап өтті Бақыт Исмаханбетов. &nbsp; &nbsp;Профилактикалық тексеру жұмыстары қалай атқарылып жатыр?Әдетте, аудан әкімдіктері мен емхана меңгерушілері бұл жұмысты жыл басында бекітілген кесте бойынша жергілікті тұрғындарды медициналық тексеруден өткізу туралы бұйрыққа сәйкес жүзеге асырады. &nbsp;Осылайша, жергілікті халықтың денсаулық жағдайына мониторинг жүргізіледі.&nbsp; «Профилактикалық тексерулер бүкіл ел бойынша жүргізіліп жатыр. Ол жүрек-тамыр жүйесі, несеп жүйесі &nbsp;ауруларының, қант диабетінің, асқазан мен бүйректің, созылмалы ауруларының ерте кезеңдерін анықтауға бағытталған. Онкологиялық скринингтер жүргізіледі. Сондай-ақ, мектеп медицинасын жүзеге асыру аясында балаларды профилактикалық тексеру қарастырылған», – деді Бақыт Исмаханбетов.&nbsp; Бұдан бөлек, ауыл халқын қолжетімді медициналық көмекпен қамтамасыз етуде көлік медицинасын дамытуға үлкен көңіл бөлініп, жылжымалы медициналық кешендер, «Денсаулық пойыздары», санитарлық авиация халыққа қызмет көрсетеді. Бұл жергілікті азаматтардың ешқайда шықпай, бір жерде бірнеше бейінді дәрігердің қабылдауына кіруге мүмкіндік береді.&nbsp;Егер медициналық көмек алу бойынша тағы сұрақтарыңыз болса, өз емханаңыздағы « Пациенттерді қолдау» қызметіне жүгіне аласыз. &nbsp;&nbsp; Келесі байланыс арналары арқылы Әлеуметтік медициналық сақтандыру қорына өтініш қалдырып, «сақтандырылған» мәртебесін тексеруге болады: &nbsp;• &nbsp; fms.kz ресми сайты, • &nbsp; 1414 байланыс орталығы, • &nbsp; &nbsp;Qoldau 24/7мобильді қосымшасы • Telegram-дағы SaqtandyryBot.Сондай-ақ, ҚР egov.kz электрондық үкіметінің сайтында "Денсаулық сақтау" бөлімінде "Міндетті әлеуметтік медициналық сақтандыру жүйесіне медициналық көрсетілетін қызметті тұтынушы ретінде қатысу туралы және аударымдардың және (немесе) жарналардың аударылған сомалары туралы ақпарат ұсыну" мемлекеттік қызметі арқылы медициналық сақтандыру жүйесіндегі өз мәртебеңізді тексеруге және жүргізілген төлемдер туралы білуге болады.&nbsp; &nbsp;

Ауыл тұрғынының бағдары: МӘМС аясында медициналық көмекті қалай алуға болады?  

<a href="https://kyzylorda-news.kz/">Kyzylorda-news.kz.</a> Маусым айындағы қалалық мәслихаттың кезекті сессиясында «Қызылорда қаласында мүгедектігі бар балаларды әлеуметтік және медициналық-педагогикалық түзету арқылы қолдау туралы» мәселесі негізгі мәселе ретінде қаралады.&nbsp;Осыған орай, бүгін 15 маусым күні қалалық мәслихат депутаттары балаларға медициналық, әлеуметтік, педагогикалық қолдау көрсету орталықтарының жұмысымен танысып, Ұлттық балаларды оңалту орталығына қарасты «University Medical Center» корпоративтік қорының Қызылорда филиалы мәжіліс залында сала мамандарының қатысуымен күн тәртібіндегі мәселені талқылады.&nbsp;Қазіргі таңда, көпбейінді облыстық балалар ауруханасы жанындағы «Қамқорлық» оңалту орталығы 2 жастан 14 жасқа дейінгі балаларға ем жүргізеді. Орталық ерекше балаларды оңалтудың жүйелі және кешенді тәсілін көздейтін халықаралық модель бойынша жұмыс істейді.&nbsp;Депутаттар аралау барысында №278 мектеп жанындағы Психологиялық-педагогикалық түзету кабинетінің (ППТК) жұмысымен танысты.&nbsp;Қызылорда қаласында ерекше білім алуға қажеттілігі бар балаларды тәрбиелеу және оқыту мәселелері бойынша кеңестік көмек көрсету, олардың жалпы білім беру немесе арнайы білім беру ұйымдарында білім алу бағдарламасы түрін анықтау, мүмкіндіктері шектеулі балалардың есебін жүргізу, олардың арнайы түзету, оңалту және әлеуметтік қызметке мұқтаждығын анықтау мақсатында 2 психологиялық-дәрігерлік-педагогикалық консультация және 2 психологиялық-педагогикалық түзету кабинеттері (әрі қарай: ППТК №278, 12 мектепте орналасқан) жұмыс жасайды.&nbsp;Сонымен қатар, Талсуат ауылындағы Оңалту орталығы ғимаратында Ұлттық балаларды оңалту орталығына қарасты «University Medical Center» корпоративтік қорының Қызылорда филиалы жұмыс жасайды.&nbsp;Орталық жұмысының негізгі бағыты 1 - 18 жас аралығындағы жүйке жүйесінің ауруларымен науқастанған балаларға кешенді мамандандырылған, медициналық, психологиялық-педагогикалық, әлеуметтік салада баланы қоғамда толыққанды өмір суруге бейімдеуге арналған оңалту көмегін көрсету болып табылады.&nbsp;Аталған іс-шараға қалалық мәслихат төрағасы И.Құттықожаев, депутаттар, қала әкімінің орынбасары Ж.Сейілов, облыстық денсаулық сақтау басқармасы басшысының орынбасары М.Мирзанова, облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары А.Ибраева, облыстық білім басқармасының бөлім басшысы Ш.Жүнісова, облыстық бала құқықтары жөніндегі уәкілі, «Альтаир бөбек" қоғамдық қорының төрайымы Ж.Ұзақбаева, «Қызылорда облысының мүгедектер қоғамы» төрағасы С. Қуанышбайұлы, Ұлттық Оңалту орталығына қарасты «University Medical Center» корпоративтік қорының Қызылорда филиалының директоры Г.Айтымбетова қатысып, күн тәртібіндегі мәселеге қатысты өз ұсыныстарын жеткізді.&nbsp;Отырыста көтерілген ұсыныстар мен пікірлер биылғы жылдың 20 маусымында өтетін қалалық мәслихаттың кезекті сессиясына шығарылатын болады.Талқылау отырысына мүгедектігі бар балаларды әлеуметтік және медициналық-педагогикалық түзету арқылы қолдау туралы мәселесіне орай құрылған уақытша комиссия жетекшісі, депутат А.Мұсабаева төрағалық етті.

Ерекше балалар мәселесі мәслихат қарауында

<a href="https://kyzylorda-news.kz/">Kyzylorda-news.kz.</a> Есбосынова Дина Жұбанышқызы «Азамат» ЖШС-нің құрылтайшысы қалалық ауруханада офтальмолог дәрігер болып қызмет атқарды.1996 жылы өзінің кәсібін бастауға шешім қабылдап, алдымен ем алушыларға өзі жалғыз медициналық қызметін көрсетті. Бір жыл жұмыс істегеннен кейін мамандарды жинап, ғимаратты жалға алып, медициналық қызмет көрсету бойынша «Атлант» клиникасын ашты.&nbsp;Клиниканың жергілікті тұрғындар арасында танымалдығы тез арада артып, 2002 жылы кәсіпкер жинақтаған қаражатына жалға алып өзі жұмыс жасап жүрген ғимаратын сатып алды, кейін клиника штатын ұлғайтып, қызмет көрсету аясын кеңейтті.Бүгінгі таңда «Атлант» клиникасы нарықта орташа бағамен сапалы қызмет көрсететін көпсалалы медициналық мекеме болып табылады. Клиника жоғары білікті мамандар, заманауи жабдықтар мен жаңа диагностикалық және емдік технологиялар есебінен Қызылорда өңірі үшін денсаулық сақтау саласында сапалы қызмет ұсынуда.2022 жылы &nbsp;2021-2025 жылдарға арналған кәсіпкерлікті дамыту жөніндегі ұлттық жоба шеңберінде «Даму» Қорының субсидия және кепілдік құралдарын қолдана отырып, клиниканы қайта құру, яғни клиника ауданын ұлғайту жұмыстарын жүргізді.

«Атлант» клиникасы қызылордалықтарға қызмет көрсетеді

<a href="https://kyzylorda-news.kz/">Kyzylorda-news.kz.</a> Операция үстелі - өмір мен өлімнің арпалысқан мекені. Осы жерде дәрігерлер адам өміріне тіршілік нәрін беремін деп жанталасып жатады. Солардың шипалы қолдарының арқасында өмірден күдерін үзген науқас адамдар аман-есен жарық дүниеге қайта оралады.Үмiтке үмiт жалғап, ғұмырдың ұзақтығын сабақтастырып жататын да осы ақ халатты абзал жандар. Осындай бiлiм мен мейiрiмдiлiктi ұштастыра бiлген ақ халатты абзал жандардың бірі – Тлеулеев Болат Қожабайұлы.&nbsp;Болат Кожабайұлы 21 тамыз 1968 жылы дүниеге келген. 1993 жылы Асфендияров атындағы Алматы мемлекеттік медицина институтын «Емдеу ісі» бойынша тәмәмдаған. 1993-1995 жылдары №3 қалалық емханада хирург, 1995-1997 жылдары Темір жол ауруханасында хирург болып жұмыс жасаған. 1997 жылдан бастап Облыстық онкология орталығында "Хирургия" бөлімінің онкохирургы болып абыроймен қызмет атқарып келеді. Шет елдерде, Корея, Сеул, Минск, Москва, Белоруссияда ғылыми конференцияларға қатысып тәжірибе алмасып, алған білімімен орталықтың мамандарымен бөлісіп тәжірибе барысында пайдаланып келеді. Оның көп жылғы еңбегі елеусіз қалмай Облыстық денсаулық сақтау басқармасынан, Облыстық онкология орталығы тарапынан бірнеше рет Алғыс хаттар мен Құрмет грамотасымен марапаттталған!Сырқат жанның дертіне дауа, еміне шипа таба білген жан бүкіл саналы ғұмырын халық денсаулығын сақтап, салауатты өмір салтын қалыптастыруға арнаған. «Денсаулық – басты байлық» ұстанымын жүрегіне бекітіп, емдеу саласында жемісті еңбек еткен Болат Кожабайұлын жұртшылық «алтын қолды дәрігер» деп те атайды. Тіпті, тағдыр салған тауқыметтен енді құтылмаспын деп, үмітін үзген жандардың өзін емдеп, дертін жазған білікті дәрігерлерді антына адал, абыройлы жан десек, артық айтқандық емес.Қатерлі дерттің құрсауына іліккен жанның әп-сәтте өмірінің астан-кестен болатыны анық. Мұндай да Болат Қожабайұлы сынды білікті де білімді ақ халатты дәрігерлердің алтын қолы, жылы сөзі мен мейірім шапағаты әрбір науқасқа дем берері сөзсіз.&nbsp;

Алтын қолды дәрігер

<a href="https://kyzylorda-news.kz/ru">Kyzylorda-news.kz.</a> Дәрігер болу жігер мен табандылықты қажет етеді. Үздіксіз ізденіс, жан-жақты білім ғана мамандықтың қыр-сырын үйренуге жол ашады. Бүгінгі кейіпкер Айнұр Тоқшылықова да аталған сынақтан сүрінбей өтіп, медицина саласының білгіріне айналғандардың бірі. Бүгінде М.Оспанов атындағы Батыс Қазақстан медицина университетінің аға оқытушысы, дәрігер-реаниматолог сан науқастың дертіне дауа табуына септесіп келеді.Айнұр бала кезінен дәрігер болуды армандаған. Бала арманы нақты мақсатқа айналып, көп өтпей саланы жан-жақтан зерттеуге көшкен. Қосымша мәліметтен бөлек, өмірлік жағдай да аталған бағытқа жақындата түскен секілді. Ата-анасы сырқаттанған шақта алғашқы көмек, науқасқа күтім жасау секілді дағдыларды үйрене бастады. Салалық әдебиеттер, оқулықтармен де ерте танысты. Мектепті үздік бітірген соң дәрігер атану мақсатында М.Оспанов атындағы Батыс Қазақстан медицина университетіне оқуға түседі. Айнұрдың өзі өмірдің бұл белесін былайша еске алады:<blockquote>— Медицина академиясын таңдағаныма өкінбеймін. Алғашында мемлекеттік білім гранты есебінен оқуға ниеттенген едім. Алайда қажетті балл жинай алмаған соң ақылы бөлімге оқуға түсуге тура келді. Табандылық пен іздену нәтижесінде 2-курстан бастап тегін оқуға қол жеткіздім. Осылайша оқуды үздік аяқтап, сала маманына айналдым. Тек жұмыспен шектелмей, оқуымды жалғастыру да назардан тыс қалмады. Себебі мамандық салғырттықты көтермейді. Науқастардың өмірі мен денсаулығына жауапты болудың жүгін сезінудемін, – дейді ол.</blockquote>Айнұрдың еңбек жолы медицина саласының қайнаған қызу тіршілігіне тым жақын. Мәселен, оның алғашқы қызметі – учаскелік дәрігер. Ол түнгі ауысымда жұмыс істеп, шыдамды шыңдай түсті. Тіпті, осы аралықта резиден¬тураға оқуға тапсырып, анестезиолог-реаниматолог дәрігер болып жұмыс істеді. Сондай-ақ білген дағды, игерген білімін кейінгіге үйретуді де мақсат тұтты. Осы оймен өзі білім алған университетте сабақ беруге де уақыт тапты.<blockquote>– Жұмыстың ауырынан қашқаным жоқ. Түнгі ауысымда қызмет істегенім де рас. Сонда да білімімді жалғастыруды мақсат еттім. Жан-жақты ізденіп, науқас дертін емдеудің жолын зерттеуге қадам жасадым. Қазіргі таңда Марат Оспанов атындағы Батыс Қазақстан медицина университеті анестезиология және реаниматолог кафедрасының аға оқытушысы және ауруханада дәрігер-реаниматолог болып қызмет істеймін. Дәрігер болған соң уақытпен санасу деген түсінік жоқ. 24 сағат жұмыс істеуге дайын болу керек. Кейде науқастар беймезгіл уақытта мазалайтын жағдайлар кездеседі. Бәріне үлгеруге, көмектесуге тырысамын. Бұл артық жүктеме, шектен тыс жұмыс істеу емес. Бар болғаны мамандыққа адалдық, науқастарға көмектесуге деген құлшыныс, – дейді дәрігер.</blockquote>Салаға салғырт қарамау, мамандыққа жан-тәніңмен берілу – табысқа жетелейтін қадам. Айнұрдың бойынан аталған қасиеттің бәрін көруге болады. Халық саулығын қадағалау жолында еңбек еткен мұндай маман қандай құрметке болсын лайық екені сөзсіз.

Қызылордалық дәрігер-реаниматолог науқастың дертіне дауа табуда

<a href="https://kyzylorda-news.kz/ru">Kyzylorda-news.kz.</a> Денсаулық пен өмірдің егіз ұғымдай қосарланып жүретіні ақиқат. Өйткені, ұзақ өмір сүріп, көп жасау үшін өн бойда жігер байқалып, тән мен жанда аурушаңдық болмауы тиіс. Сондықтан, денсаулыққа келгенде қолды бір сілтемей, дәрігер қабылдауына жазылған дұрыс. Алдын ала емделгеннің артықтық етпейтіні анық. Сандық толы сары алтын, қолда бума-бума ақша, асып-тасыған байлық болғанымен оның өзі ажалмен айқаста араша бола алмайды. Американдық өнертапқыш Стив Джобс «төсек тартып ауырып қалған кезде өз-өзіме есеп бердім. Атақ та, байлық та өлімнің алдында дәрменсіз екенін ұғындым» деген. Тағы бір философиялық ойында «Сіз ақшаға автокөлігіңізді айдайтын адамды да, сіздің орныңызға жұмыс істейтін қызметшіні де жалдай аласыз. Бірақ, бар қаражатыңызды құйсаңыз да, сіздің орныңызға ауырып жан кешетін адамды таппайсыз» деген екен. Дүйім жұрт денсаулықтың қадірін жетік біледі. Осы ретте, денсаулықты – қоғам байлығы десек, дені сау ұлт – мемлекет тірегі. Билік басшылары да халықтың хәл-жағдайын алдыңғы орынға қойып, медициналық қызметтер сапасын жақсартуды көздеген. Төрт бағытты қамтитын ұлттық жобаны бекіткені де содан.Аталған жобаның нәтижесінде әрбір азаматтың өмір сүру ұзақтығы ұлғайып, халық қажетті тексерістен өткізіліп, ем-шараларын қабылдап, медицина және оңалту орталықтарының жағдайы жандануы тиіс. Сондай-ақ, көпшіліктің тілегі – кадр жетіспеушілігі түйінін тарқатып, білікті маманмен толыққаны игі. Сайып келгенде, ақ халаттылардың тынымсыз тірлігі тәжірибемен ұштасып, аурудан айықтырудың амалы артатыны сөзсіз. Бүгінде, облысымызда жоба өз деңгейінде жүзеге асып келеді. Тұрғындар көмек алып, әлі де толық қамтамасыз етілуі басты назарда.Өткен жылы облыстағы бастапқы медициналық санитариялық көмек көрсету ұйымдарына 807 753 тұрғын тіркелген еді. Оларға медициналық көмекті 18 стационарлық, 22 амбулаториялық-емханалық медицина ұйымдары көрсетті. Тұрғындардың бастапқы медициналық көмек көрсету ұйымдарына қолжетімділігін арттыру мақсатында Орталық қалалық емханасы қолданысқа беріліп, соның негізінде №1, №3 және №6 қалалық емханалардың жүктемесі азайып, денсаулық сақтау желісі нормативке сәйкестендірілді. Мұның өзі жоба аясындағы кезекті жетістік.&nbsp;Жалпы, бөлінген қаржылардың қорытындысында есебі шығып, игілікке жұмсалғаны қажет-ақ. Осы ретте, облыстық денсаулық сақтау басқармасы керекті аппараттар мен құрал жабдықтарды сатып алудан сырт қалған емес. Мәселен, дистрибьютор тізіміне енгізілген 5 және өзге де 7 дана медициналық бұйымдарға «СК-Фармация» ЖШС-і арқылы сатып алу жұмыстары жүргізілген болатын. Сондай-ақ, қаржы желге ұшып, бей-берекет жұмсалмай, керісінше әр емхананың жағдайын түзеп, жабдықпен қамтамасыз етілуі көңіл қуантты. Басқарма мәліметі бойынша, қалалық орталық емханасына компьютер, облыстық психикалық денсаулық орталығына ассенизатор және автобус автокөлігі, облыстық перинаталдық орталығына қазандық жабдықтарына, транформаторлық қосалқы станциясына, бактериологиялық анализатор аппаратына, облыстық қан орталығына иммунохимиялық анализатор аппаратына бюджет есібінен қаржы бөлінді. Аудан ауруханаларының да кемшін тұсы кесе-көлденең шыға бермей, онда да жағдайды реттеу мақсатында тиісті шаралар атқарылуда. Сырдария ауданы Шіркейлі дәрігерлік амбулаториясына күрделі жөндеу жұмыстарын жүргізу үшін де қаражат қарастырылып, бұл денсаулық саласының қалыпты дамуы үшін жасалған негізгі қадамдардың бірі болды. Қарқынды құрылысы аяқталып, көптің қуанышын еселеген емханалар әлі де бар. Өткен жылы Жаңақорған ауданында Жаңарық елді мекенінде дәрігерлік амбулатория құрылысы аяқталып, іске қосылды. Арал, Қазалы, Шиелі аудандарында 6 медициналық бекет қолданысқа берілді. Одан бөлек, Орталық қалалық емханасы және Қазалы аудандық емханасы халық игілігіне ұсынылды.&nbsp;Бас ауырып, балтыр сыздағанның бәріне ақ халаттылардың көмегі керек. Яғни, тұрғындар жедел жәрдем қажет кезде аурухана іздеп сабылмай, дертіне дер кезінде ем қабылдауы керек. Әйтпегенде ауруы асқынып, көз жұмғандар жетерлік. Бұл мәселенің де шешімі табылып, шалғай медициналық ғимараты жоқ елді мекендерде Арал ауданы Тастүбек, Қазалы ауданы Жұбан ауылдарында 2 медициналық бекет іске қосылды. Сонымен қатар, «Ауыл-Ел бесігі» бағдарламасы шеңберінде Жалағаш ауданы Таң ауылында іске асырылып жатқан 1 дәрігерлік амбулатория құрылысын маусым айының аяғында аяқталады деп күтілуде. Сондай-ақ, облысымыздағы алыс шалғай елді мекендердегі халыққа медициналық көмек көрсету үшін 5 жылжымалы медициналық кешен ұйымдастырылған.&nbsp;Жоғарыда айтып өткенімдей, білікті мамандардың жетіспеушілігі жарға жығады. Дәл осы ақ халаттылардың антына адал болу мәселесіне келгенде науқастардың айтатын назы көп. Иә, кадр тапшылығының өңірімізде белең алған. Десек те, ұлттық жобаның негізгі бағыттары бойынша атқарылған ауқымды шаралар мен қарышты қадамдар бұл тапшылықтың да орнын толтырады деген сенімдеміз. Өңірде мамандар тапшылығын азайту мақсатында біршама жоспарлы жұмыстар атқарылуда. Өткен жылы жылы 84 дәрігер жұмысқа қабылданып, олардың 24-і елді мекендерге жолданған болатын. Сонымен қатар 2016 жылдан бастап өңірге аса қажетті медицина мамандықтары бойынша 111 резидентке облыс әкімінің гранты тағайындалып, қазіргі таңда 47 жас түлек емдеу ұйымдарында қызмет атқаруда. Ал, биыл өңірге 33 &nbsp;резидент келеді деп күтілуде. Үрдіс жалғасын тауып, 2022 жылы 20 резидентті тапшы мамандықтар бойынша даярлауға қаржы қарастырылып отыр. Асылында, жүргізілетін жүйелі жүмыстар кез келген келеңсіздікті тап басып, олқылықтың орнын толтыруға негіз болатыны белгілі. Олай болса, табандап тұрып алған мәселенің түйіні шешілсе, халықтың бөркін аспанға атып қуанатын сәті жақында. Сонда халық пен медицина байланысы беки түспек.&nbsp;Айта кетейік, 2017-2021 жылдар аралығында медицина саласында сұранысқа ие жалпы тәжірибелік дәрігерлерді даярлауға 127 облыс әкімінің гранты бөлінді Бұл шаралар өз кезегінде 2024 жылдан бастап аймақтық саланы дәрігерлермен толық қамтамасыз етуге мүмкіндік бермек.&nbsp;Сонымен, халықтың әл-ауқатын жақсарту үшін шаралардың шектеулі болғаны жарамайды. Керісінше, арнайы тексерістерден жиі өтіп, деннің саулығына көз жеткізген абзал. Бүгінде халықтың нысаналы топтарына скринингтік тексерулер 6 нозология бойынша жүргізіледі. Жіктеп айтар болсақ, қанайналым жүйесі аурулары, қант диабеті, глаукома, сүт безі, жатыр мойны және тоқ ішек, тік ішек қатерлі ісіктері. Яғни, Облыс көлемінде скринингтік тексеруге жас шамалары бойынша жоспарланған тұрғындар саны – 264 027.&nbsp;Қорыта келгенде «Дені сау ұлт» ұлттық жобасының аясында жүргізілген жұмыстардың бұл жіпке тізгендегі жартысы. Алдағы жылы да жобаны жылы жауып қоймай, жандандыра түссе Сыр елінде серпілістің күшейе түсетіні сөзсіз. Түптеп келгенде, облысымыздың медицина саласы дамудың даңғыл жолына түсіп, өз ісін жетік білетін абзал жандардың адал еңбегін талай мәрте көретін боламыз. Сондай-ақ, түрлі жайсыздықтардан тыныш, ауру-сырқаудан аман болатынымыз анық.

Аймақтағы айшықты істер

<a href="https://kyzylorda-news.kz/">Kyzylorda-news.kz.</a> 14 маусым – Дүниежүзілік донорлар күні. Қан құю арқылы ауыр халдегі науқастардың өмірін аман сақтап қалуға болады. Сондықтан Дүниежүзілік денсаулық сақтау ұйымдары барлық елде сапалы қанның қорын қамтамасыз етуді көздейді.&nbsp;Донорлыққа тарту, адам өмірін сақтау мақсатында жыл сайын 14 маусым – Донорлар күні аталып өтеді. Бұл үрдіс біздің облыста да дәстүрге айналған. Себебі, бүгінде қан және қан өнімдеріне халықаралық деңгейде сұраныс артқан. Сондықтан әлем елдерінің медицина мамандары осындай қан қорын жинақтап, сақтауды қолға алуда.&nbsp;Осы орайда, облыстық қан орталығында «Қан тапсыр, плазма тапсыр, адамдарға өмір сыйла және мұны жиі жаса» ұранымен акция ұйымдастырылды. Акция жиынында облыстық денсаулық сақтау басқармасының бөлім басшысы Раушан Сейтқасымқызы мен облыстық қан орталығының бас дәрігері Серік Қуандықұлы донорларды мерекемен құттықтап, арнайы Алғыс хаттармен марапаттады.&nbsp;Мереке қарсаңында тұрақты түрде донорлықпен айналысып жүрген 70-тен аса ерікті қан тапсырды. Оның ішінде, түрлі сала мамандары, ерікті жастар, &nbsp;медицина қызметкерлері, сондай-ақ «АMANAT» &nbsp;партиясы қалалық филиалы өкілдері, облыстық қоғамдық даму басқармасының «Қоғамдық келісім» КММ қызметкерлері, «Ассамблея жастар» ұйымы мен этномәдени бірлестіктердің өкілдері де бар.&nbsp;<blockquote>«Мен бүгін адамдардың өмірін сақтап қалу ниетінде алғашқы рет қан тапсырдым. Біздің Лалуевтар отбасының барлық мүшелері де қан доноры. Ағам, тәтем барлығымыз бірге бүгінгі акцияға қатыстық», - дейді «Вайнах» облыстық шешен-ингуш этномәдени бірлестігінің белсендісі Дени Лалуев.&nbsp;</blockquote><blockquote>«Донор болу арқылы біз түрлі жағдайға тап болған жандардың өмірін сақтап қалуға үлес қосамыз. Сіздерді акцияға белсене қатысып, сауапты іс жасап, адам өмірін сақтап қалуға шақырамыз! Бұндай акциялар алдағы уақытта өз жалғасын табады», - деді «Қоғамдық келісім» КММ аға сарапшысы Нұргүл Ақсақалова.</blockquote>Облыстық қан орталығының бас дәрігері Серік Қуандықұлының айтуынша, соңғы бес айда аймақта қан тапсыруға 5 мыңнан аса тұрғын ниет білдірген. Ал, жалпы қан тапсырғандар саны – 4 мыңнан асады. Атап айтқанда, қан доноры – 3922 адам, плазма доноры – 15адам, тромбоцит доноры – 499 адамды құрайды.<img src="https://knadmin.beoblood.kz/uploads/354021126_3515180592134429_526137295889782558_n_e2fad829d4.jpg" alt="354021126_3515180592134429_526137295889782558_n.jpg">

Қызылордада донорлар акциясы ұйымдастырылды

<a href="https://kyzylorda-news.kz/">Kyzylorda-news.kz.</a>&nbsp;– Аралкүл ағеден жан, үнемі күліп жүреді. Көшеден кезіктіре қалса, хал-жағдайымды сұрап, апалап тұрады, – деді алпысты алқымдаған ақ жаулықты ана қасындағы замандасына.– Иә, өзі бір жақсы бала. Дәрігер болсаң, осындай бол, –десті қос кейуананың орташа бойлы, белі ауырғандықтан болар сәл бүгіліңкіреп жүретін қара шарқаттысы.Олар айтып келе жатқан басты кейіпкер – қаладағы дәрігер Аралкүл Ашықбаева. Оның мейірімділігі мен өз ісіне деген сүйіспеншілігін сөз етіп келеді. Расында да Қазалы қаласының халқы бұл дәрігерді ақкөңіл, елгезек, жылы шырайлы, нұрлы жүзді, кішіпейл деп жақсы сөздерге теліп отырады.Аралкүл Ашықбайқызы Арал ауданының Қаратерең аулында туған. 1981 жылы орта мектепті бітіріп, дәрігер болсам деген бала күнгі арманын жүзеге асырмақ ниетпен Ақтөбе медициналық институтына оқуға түсті. Дәрігер мамандығын меңгеріп шыққан жас еңбек жолын Қазалы қаласындағы емханадан бастайды. Міне содан бері ақ халатындай ақ көңілімен емделушілердің жүрегінен жол тауып келеді.&nbsp;Отбасында жолдасы Серғазымен өмірге төрт бала әкеліп, өсіріп, тәрбиелеп отырған ата-ана. Ұл-қызынан өрген он немеренің сүйікті әжесі.Көмек сұрағанға қол ұшын созуға әзір тұратын Аралкүл Ашықбайқызы әріптестері ортасында сыйлы басшы. Ұжымды өзінің сыпайлығымен ұйыстыра білген дәрігер үшін ең бастысы – уақытылы әрі жауапты жұмыс істеу. Ол: «Әр адам өзіне ұқыпты болып, дер кезінде орындай білсе, жұмыс жүйелі жүреді» деген ұстанымда.<blockquote>«Емхана болғандықтан күніне қанша адам келеді. Олардың басым көпшілігі науқастанып тұрады. Ауырып тұрған адам белгілі, мазасықашып, мең-зеңболып, кейбіріашушаңкеледі. Дәрігерлік ем өз алдына, адами тұрғыда жақсы сөзбен демеп, жылы қабағыңмен қарсы алып, шығарып салсаң, ауырып тұрған жанға күш сыйлайды», – деген дәрігер жұмыс барысындағы кез келген мәселені сабырлықпен шешуге тырысатындығын жеткізді.</blockquote>Аралкүл дәрігер туралы тұрғындардың да пікірі теріс емес.&nbsp;<blockquote>«Ауыра қалсаң, әуелі Алла содан кейін дәрігерлерден жәрдем сұраймыз. Қаладағы емханаға барсақ, аққұбаша келген Аралкүл күлімдеп қарсы алып, жаныңа жалау болатын сөздерімен жабырқау жаныңды жылытады. Оның отбасында алған тәрбиесі іс-әрекеті мен адамдарға деген қарым-қатынасынан көрініп-ақ тұрады. Емхана іші де жаңаланып, жақсарып келеді. Қызметкерлердің де қызметі көңілден шығады», – дейді қала тұрғыны.</blockquote>Алғыс арқалаған Аралкүл Ашықбайқызы аудандық, облыстық деңгейдегі марапаттардың иегері. Адам жанының арашасына айнала білген ақ халатты абзал жан халыққа қалқысыз қызмет ету – міндетім, мамандығыма деген жауапкершілігім деп біледі. Кейінгі толқын жастарға білгенін айтып, ақыл-кеңесін беруден жалықпайтын жан өзі де үнем ізденіс үстінде жүреді. Адал еңбек – елге сыйлы етеді деген осы болар. Бүгінде қарапайым халық дәрігеріне дән риза.

Қазақстан және Қызылорда облысының жаңалықтары: Денсаулық