<a href="https://kyzylorda-news.kz/">Kyzylorda-news.kz.</a>&nbsp; Ұзақ еңбек демалысы кезеңінде медициналық сақтандыру үшін аударуға міндетті ме? Егер кәсіпкердің табысы болмаса МӘМС жүйесіне жарна төлеуі керек пе? Оқырмандардың осы және басқа да сұрақтарына Әлеуметтік медициналық сақтандыру қорының Қызылорда облысы бойынша филиалының бас сарапшысы Айгүл Аханова жауап берді2024 жылдан бастап БЖТ болмайды деген ақпарат рас па?Бірыңғай жиынтық төлемін алып тастау Әлеуметтік медициналық сақтандыру қорының шешімі емес. БЖТ жеке кәсіпкер ретінде тіркелмеген өзін өзі жұмыспен қамтыған азаматтар үшін 5 жылға (2019 жылдың 1 қаңтарынан 2023 жылдың 1 қаңтарына дейін) уақытша енгізілген еді әрі оны тек басқа жеке тұлғаларға жеке қосалқы шаруашылық өнімдерін сататын және қызметтер көрсететін жылдық табысы 1175 айлық есептік көрсеткіштен аспаса төлей алады. 2024 жылы сақтандырылған мәртебесін жоғалтпау үшін азаматтар жеке кәсіпкер ретінде тіркеліп немесе дербес төлеуші ретінде жарна төлейді. Егер БЖТ төлеушілердің өткен 1 жылға төлемі болса, 2024 жылдан бастап әр ай сайын дербес төлеуші ретінде төлем жасай алады (2023 жылы – 3 500 теңге). Азаматтардың сақтандырылған мәртебесі болуы үшін, МӘМС туралы заңға сәйкес, 12 айға төлемі болуға тиіс.Ресми түрде жұмыссыз, «Еңбек» мемлекеттік бағдарламасы аясында жеке ұйымдардың бірінде уақытша жұмыс істеймін. Жұмыс беруші мен үшін МӘМС аударымдары мен жарналарын төлеуі керек пе?«МӘМС туралы» Заңның 26-бабына сәйкес азаматтардың 15 жеңілдік санатына жұмыссыз ретінде тіркелген адамдар кіреді. Бірақ егер Сіз жұмысқа турып қызметкер болсаңыз, онда Заңның 14-бабына сәйкес жұмыс беруші Сіз үшін ай сайын МӘМС-ке аударымдар мен жарналарды төлеуге міндетті.2023 жылы жұмыс берушілердің жұмыскерлер үшін аударымдары 3% - ы құрайды, аударымдардың ең жоғары сомасы 21 000 теңгеден аспауы тиіс. Бұл 10 айлық есептік көрсеткішінің 3% - і болып саналады. Азаматтық-құқықтық сипаттағы шарт бойынша жұмыс істейтін қызметкерлер мен жеке тұлғалардың жарналары 2023 жылы табыстарының 2% құрайды. Жарнаның ең жоғары сомасы 14 000 теңгені құрайды. Бұл 10 айлық есептік көрсеткішінің 2% - і болып саналады.Егер кәсіпкердің табысы болмаса, ол нөлдік кіріс тапсырады. Бұл жағдайда қалай болады?Егер жеке кәсіпкер нөлдік декларацияны тапсырса, ол өзі үшін жарналарды төлеуге міндетті, себебі мемлекеттік кіріс органдарында жеке кәсіпкер ретінде тіркеу есебінде тұр.«МӘМС туралы» Заңның 28-бабының 5-тармағына сәйкес ЖК, ШҚ иелерінің, жеке практикамен айналысатын адамдардың ай сайынғы төлем мөлшері 2023 жылы 4900 теңгені (1,4 ЕТЖ-дан 5%) құрайды.«МӘМС туралы» Заңның 31-бабына, 1-тармағына сәйкес, жеке кәсіпкерлер мен жұмыс берушілер төлем жасамаған жағдайда төлем жасалған күнді қоса алғанда, әрбір кешіктірілген күн үшін төленбеген соманың 1,25% мөлшерінде айыппұл салынады.Егер жеке кәсіпкер, оның қызметкерлері зейнеткерлер, студенттер, мүгедектер, көп балалы аналар, тиісті марапаттары бар болса, өзі және жұмыскерлері үшін жарна төлемейді. Барлық басқа жағдайларда, тіпті ЖК басқа жеңілдікті санаттарға кіретін болса да, жарналарды төлеу қажет.Тиісінше, егер жеке кәсіпкер салық органдарымен қызметін және салық есептілігін тоқтатқан болса, жұмыс істемесе және кіріс ала алмаса, бірақ сонымен бірге жеке тұлға бола тұра, үш жасқа толғанға дейін бала күту немесе бала күтімі бойынша демалыста болса, онда бұл адам міндетті медициналық сақтандыру үшін жарна төлеуден босатылады.Ресми түрде жұмыс істейтін адам 56 күндік ұзақ демалысқа шықты. «Сақтандыру» мәртебесін сақтап қалу үшін МӘМС-ке жарнаныі қалай төлейді?&nbsp;Сіздің жұмыс берушіңіз міндетті медициналық сақтандыру төлемдерін дұрыс бөлуі қажет. Егер демалыс бірнеше кезеңді (бір айдан астам) қамтитын болса, онда міндетті медициналық сақтандыру төлемдерін кезеңдерге бөлуі тиіс. Мысалы, сіз тамыз және қыркүйек айларында демалыста болды делік. &nbsp;Бұл жағдайда есепші төлемдерді бір сомада емес, екі түрлі кезеңге (тамыз және қыркүйек) есептеуі керек.Егер сізде қосымша сұрақтар туындаған жағдайда, сіз емхананың анықтама қызметіне немесе өзіңізге ыңғайлы байланыс арнасы арқылы Әлеуметтік медициналық сақтандыру қорына жүгіне аласыз: fms.kz ресми сайты, 1414 байланыс орталығы, Qoldau 24/7 мобильді қосымшасы және Telegram-дағы SaqtandyryBot.&nbsp;

Еңбек демалысы кезінде МӘМС үшін жарна аударуға міндетті ме?

<a href="https://kyzylorda-news.kz/">Kyzylorda-news.kz.</a> Бүгінде «бала тілі – бал» дейтін қазақ, баласының тілі уақытында шықпай, қатарынан қалып бара жатса, алаңдайтыны рас. Айналамыздан «балам дұрыс сөйлемейді», «тілі анық емес», «жақсы логопед маманы керек» деген пікірді жиі естиміз. Бұрын &nbsp;шет елдерде тіл мүкістігі мен ерекше балалардың сөйлеу дамуының тежелуін көп еститінбіз. Ал соңғы жылдарда балалар арасында өзекті мәселеге айналды. Сондай-ақ логопед-дефектолог маманына сұраныс артуда. Оған не себеп? Ата-ана нені ескеруі керек? Осы орайда облыстық балалар ауруханасындағы оңалту бөлімінің логопед-дефектолог маманы Қарлығаш Мәдібекқызымен сұхбаттасқан едік.&nbsp;– Қарлығаш Мәдібекқызы, маман ретінде дефектолог пен логопедтің айырмашылығын айтсаңыз?&nbsp;– &nbsp;Дефектология негізінде үлкен сала, ол &nbsp;логопед-дефектолог, логопед-сурдология, логопед-тифлопедагог, логопед-олигофренопедагог болып бөлінеді. Оның ішіндегі дефектология – табиғи ерекшелігі бар баланың түсінігін қалыптастырып, әлеуметтік ортаға бейімдеу арқылы зейінін тұрақтандыруды мақсат етеді. Ал логопед - сөздік &nbsp;қоры арқылы тілдің мүкістігін, оның бұзылу себептерін жан-жақты жүйелі түрде баланың сөйлеу тіліндегі ақауын зерттеп, оның анық сөйлеуін, дыбыстың дұрыс шығуын қалпына келтіреді. Жалпы, бала өздігінен, ересек адамның ықпалынсыз сөйлеуді үйренбейді, себебі оның жүйке жүйесі &nbsp;жанындағы адамның сөйлеуі арқылы дамиды. Логопед-дефектолог мамандығы бір-бірімен тығыз байланыста.&nbsp;&nbsp;– Бұрын логопед-дефектолог маманы туралы жиі айтыла бермейтін. Қазір бұл мамандық сұранысқа ие. Сондай-ақ логопед-дефектолог саласын &nbsp;қысқа мерзімді курс арқылы оқу жеткілікті саналатын. Бұған не айтасыз?– &nbsp;Иә, бұрын логопед-дефектолог маманы туралы айтыла бермейтін. Соңғы 2 жылда аталған мамандар сұранысқа ие. Оған себеп құрсақта жатқан кезінен баланың дұрыс дамымай, витаминдердің жетіспеуі, балаға көңіл бөлінбеуі, цифрлық гаджетті бала қолына ұстатуы, тұқым қуалау әсерінен тілінде күрмеуі бар және ерекше балалар саны артуда. Өкінішке қарай елімізде бала денсаулығына қатысты күрмеулі мәселе күн санап артып келеді. Бұл тұрғыда логопед маманы курсын оқу жеткіліксіз. Егер балаға шынайы көмектесемін дейтін маман болса, ол жан-жақты ізденіп, оқып, заман талабына сай түрлі әдіс - тәсілдерді үйреніп, дамып отыруы керек. Себебі жыл сайын бала тілін дұрыстауға, зейінін ашуға түрлі құрылғылар шығуда. &nbsp;&nbsp;– Баланың сөйлеу қабілетіндегі бұзылыстар неден пайда болады, оны қалай анықтаймыз?– &nbsp;Баланың сөйлеу қабілетіндегі бұзылыстар сыртқы және ішкі факторға байланысты. Сыртқы себептері: экология, жүйке жүйесінің бұзылысы, қарым-қатынас ортасы, селқостық, цифрлық гаджет, шулы орта. Ал ішкі себептері: анасының жүктілік кезі, босану, генетикалық аурудың берілуі, көру-есту жұмысының бұзылуы, соматикалық ауру, бас миының зақымдануы, гипербелсенділік, жанындағы адамның темекі шегуі, кесар тілігі сияқты құбылыстар баланың тіл күрмеуі мен аутизм болып тууына зиянын тигізеді. Боз баланы емдемес бұрын ең бірінші ата-ананың танымын кеңейтеміз. Себебі әлеуметтік өмірде &nbsp;ата-аналар қателікке бой алдырады. Оны өздері де байқамайды. Үй тіршілігінде бала мазасын алса, сәби кезінен бастап көп жылайтын болса, есімін айтып шақырғанда қарамаса ата-ана дабыл қағу керек. Яғни дәрігерге барып, бала денсаулығын зерттеу керек.&nbsp;Ал тіл кемшілігін сәби кезінен байқауға болады, яғни тілдің жереншегі қысқа болса ана сүтін еме алмайды. Сондай-ақ бала 1 жасқа келіп, тілі шығып сөздерді айта бастағанда бізге логопед-дефектологка көрсету керек. Біз баланың денесін, бұлшық етін тексереміз. Егер бала табанындағы тепе-теңдікті сақтай алмаса, дұрыс сөйлей алмайды және қисық сөйлейді. Осы арқылы тіл ақауын ертерек анықтап, алдын-ала ем жүргіземіз. Бірақ көп ата-аналар баласындағы ақауды 3 жастан асқанда біледі. Себебі үй тіршілігінде жүрген ата-ана баласы жыласа көбіне планшет, ұялы телефон немесе интернеттегі жасына сай емес &nbsp;мультфильмді &nbsp;қосып беріп, &nbsp;уақыт шектеуліктерін қоймайды. Әрине, заманауи құрылғыларды пайдаланған дұрыс, бірақ ол бала тілінің күрмеуіне алып келеді. &nbsp;&nbsp;– Балалардың сөйлеу қабілетін жақсартуда қандай ем-шара қолданылады? Толық сөйлеп, тілі түзелу үшін қанша уақыт қажет?– &nbsp;Әр баланың түсінігі түрліше қалыптасады. Кейбіреуі бір айда, енді бірі деңгейіне қарай 1 жылда қабылдайды. Егерде алдымызға келген баланың түсінігі қалыптаспаған болса, ол кезде соматикалық және проприоцептивті сенсорлық жүйесін, яғни бұлшықет-буын сезімінің анализаторын бастаймыз. Ал түсінігі қалыптасқан, тек сөйлеуінде қана ақау болса шешу жолы интерактивтік тақта, &nbsp;магнитафон арқылы жұмыс, микрафонмен қайталау сияқты заттарды пайдалана отырып, жеке &nbsp;жұмыс дыбыстық ойын түрлерін, &nbsp;сурет бойынша әңгімелеу, ұсақ моторика ойындарын жүргіземін. Негізі баланы қоршаған ортадан алыстатпай, еркіндікке жіберу керек. Бұрын балалар құммен ойнап, талға өрмелеп, балалармен асық, футбол секілді түрлі дала ойындарын ойнаса, қазіргі бүлдіршіндер телефон қарап отырады. Мәселенің бар себебі осында. &nbsp;– &nbsp;Сіздің қабылдауыңызға келетін балалардың көбі қанша жастағы өрендер?– Менің қабылдауыма 2 жастан бастап 9 сынып оқитын тіл мүкістігі мен мүлдем сөйлемейтін балалар келеді. Бір ата-ана, мектеп оқитын, сөйлеп жүрген баласының кейін мүлдем сөйлемей қалғанын айтып келді. Ол баланы зерттеу барысында оның планшет, телефон арқылы мутацияға ұшырағанын байқап, Астана қаласына жібердім. Сонымен қатар жиналыс барысында елімізде мутацияға ұшыраған жастардың бар екені, көбейіп жатқаны айтылды. Бұл да ата-ана үшін ойланатын жағдай. &nbsp; &nbsp;– &nbsp;Жалпы тілдегі ақауды жою үшін жас ерекшелігі маңызды ма?– Бұрын тілдегі ақауды &nbsp;кетіруге 3-4 жас аралықтағы баланы қарайтынбыз. Қазіргі таңда 1 жарым жастан бастап қараймыз. Айтып өткендей барлығы баланың түсінігіне, санасына және науқастың ауру деңгейіне қарай жұмыс жасаймыз. Мысалы, ерекше балаларды біз толық адам қатарына қосылады деп айта алмаймыз, бірақ өзге әлемнен шығарып, қоршаған ортаға бейімдейміз. Ал саналы балаға түрлі жаттығуды қолдану арқылы дұрыс сөйлеуді үйретеміз. &nbsp;&nbsp;– Маман ретінде ата-аналарға қандай кеңес берер едіңіз? Балада тіл кемістігі болмаса да жасалатын күнделікті қандай жаттығу түрін айтасыз?– Ата-анаға айтар кеңесім баланы бесікке бөлеу керек, ойнау керек, өлең, ертегі айту керек. Планшет, телефон беріп немесе қосып қоюға болмайды. Балаға 3 жасқа дейін көңіл бөліп, жануарларды көрсетіп, оның дауысын салу керек. Сөйлей алмайтын баланың тіл шығуына жануарлар, сиыр, жылқы қой, қоян тағы басқа қоршаған ортадағы тірі нәрсені көзбен көрсету-сенсорика. &nbsp;Сенсорика – бұл заттардың сыртқы қасиетін, олардың пішіні, түсі, көлемі, кеңістіктегі орналасуы, сонымен қатар иісі, дәмін сезу. Баланың сөйлеп кетуі үшін ата-ана баласымен мәміле жасап, сөйлесу керек. Мысалы, «қазір мына киімді киеміз, қонаққа барамыз» деген сияқты түрлі сөздерді кішкентай сәби кезінен естісе балада тіл күрмеуі болмайды. Ал ерекше баланы айтатын болсам, алдымен ата-ана баласының кемістігін мойындау керек. Олардың ерекшелігін өз қатарластарымен ойнамай, шыңғырып, айқайлауынан тағы да басқа түрлі іс-қимылдары арқылы байқауға болады. Осыны байқаған ата-ана дефектологка жүгінуі керек. Осы тұрғыда тіл мүкістігі мен балалардың сөйлеуін дамытуға логопед маманы ғана емес ата-ана да бірге бірлесіп жұмыс істесе, берілген тапсырма мен жаттығуды орындаса, нәтиже болатыны хақ.– Сұхбатыңызға рахмет.&nbsp;

Қарлығаш Мәдібекқызы, логопед-дефектолог: Баламен байланыста сөйлесу маңызды

<a href="https://kyzylorda-news.kz/ru">Kyzylorda-news.</a> Тәуелсіздік жылдарының басында көптеген саланың жұмысы тұралап қалғаны белгілі. Бірақ ел болашағының жарқын болуы үшін жасалған ең әуелгі әрі батыл қадамдардың барлығы дерлік бүгінде нәтижесін беріп жатыр десек, артық айтқанымыз болмас. Әсіресе медицина саласына көрсетілген қолдау жемісін беріп, саланың дамуына үлкен септігін тигізуде.&nbsp;Медицина халық саулығының негізі екенін ескерсек, салаға бағытталған қаржы мен қолдаудың әрқашан өз нәтижесін бергеніне және алдағы уақытта да нәтижелі жұмыстарға жол ашатынына күмән жоқ. Бұл қолдаудың арқасында елдің сапалы медициналық қызметке қолы жеткенін аңғару қиын емес. Бір сөзбен айтқанда, сала қызметкерлерінің жұмысының оңтайлануына үлкен қолғабыс болып отыр.Жалағаш ауданындағы аудандық емханаға жолыңыз түсіп бара қалсаңыз, жүзі жылы, мейірімді дәрігерлердің науқастарға асқан ыждағаттылықпен хал-жағдайын біліп, ақыл-кеңесін айтып жатқанын көресіз. Дәрігерге керегі де осы қасиет, мейірімділік қой. Ал көзінде күн күлімдеген ақхалатты абзал жандардың алдына келген жанды жылы жүзбен қарсы алуы кәсіби біліктіліктерімен қатар, адами тұр-ғысынан да мәдениеті жоғары екенін айқын аңғартып тұр.&nbsp;Негізі медицина саласында ақхалатты абзал жандардың дертке шалдыққан жанды емдеуінің айқын үш жолы бар екені баршамызға мәлім. Біріншісі сөзбен. Екіншісі шөппен, яғни дәрі-дәрмекпен. Үшіншісі пышақпен, яғни ауру асқынып, жоғарыдағы екеуінен көмек болмағанда, көрсеткішіне қарай хирургиялық жолмен емдеу қажет. Осы емдеу жолының алғашқы екеуін ұштастыра білген маман нағыз өз мамандығына дөп келген жандар деп айта аламыз. Таңдаған мамандығына жауапкершілікпен қарайтын, өз ісінің маманы деуге тұрарлықтай ақхалаттылардың қатарынан Жалағаш аудандық емханасының егу медбикесі Айжан Кенбаеваның есімін ерекше атауға болады. Жалағаш жерінде туып-өскен Айжан Бостанқызы – тәуелсіздіктің төл құрдасы. Нағыз еркіндік салтанат құрған кезеңде дүние есігін ашқан бақытты ұрпақ. 1991 жылдың 22 желтоқсанында жарық дүниеге келген кейіпкеріміз отбасы үшін де ерекше перзент, ата-анасының қуанышын еселеген қыз.&nbsp;– Шүкір, қызым – бүгінде медицина саласының қызметкері. Өз жұмысын жауапкершілікпен алып жүруге әркез тырысады. Қай кезде де, кез келген уақытта жұмысын бірінші орынға қояды. Жұмысы ширақ, жүйелі болса, елдің алғысында болады ғой қашанда. Бүгінде осы қызым бір шаңырақтың аяулы келіні, екі баланың анасы атанып отыр. Ата-ана үшін баласымен мақтанғанға не жетсін, – дейді ақхалатты абзал жанның анасы Маржан Омарова.Иә, Маржан апайдың бізбен қуанышын бөлісетіндей жөні бар, «Бала жаман болса, ата-анасын түйе үстінен ит қабады» дейді. Ал өзіңнен үлгі-өнеге алып, жолыңды қуып, халыққа адал қызмет етіп, тек елдің алғысын алса, ата-ана да оның қуанышына марқайып отырады. Бүгінгі кейіпкеріміздің анасының сөзінен осыны ұқтық. Аудан орталығындағы №201 мектеп-лицейін тәмамдап, кейіннен Қызылорда медициналық колледжінде мамандығы бойынша білім алған Айжан Бостанқызы алғашқы еңбек жолын аудандық емхананың жалпы тәжірибелік медбикесі болып бастаған. 2021 жылдан бері емханада егу медбикесінің міндетін атқарады.&nbsp;– Несін жасырайын, медицина саласына аяқасты келе салмадым. Ақхалатты абзал жан атану бала күнгі арманым болатын. Мамандық таңдауда қателеспеу керек дегендей, мен өмір бойы жасайтын жұмысымды таңдауда өзімнің қарым-қабілетіме, ынта-жігеріме сендім. Емханада қызмет ету, алдыңа келген әрбір науқастың саған қарап-ақ жүзіне күлкі үйірілуі міне, біздің «абзал жан» атына лайықты болғанымыздың дәлелі деп білемін. Көптеген үлкен кісілер алғысын айтып, батасын беріп жатады. Бұл мен үшін ең үлкен жетістік деп есептеймін, – дейді кейіпкеріміз.&nbsp;Өз қызметі жайында бір-ақ ауыз сөзбен жауап қатқан Айжан өзінің нағыз маман екенін сөзбен емес, іспен дәлелдейтінін де байқадық. Қиын болсын, қызықты болсын барлығына шыдамдылықпен қарауға дайынмын деген Айжан Кенбаева азын-аулақ әңгімеден соң жұмысына кірісіп кетті.&nbsp;Дұрыс қой, есік алдына адамды үйіріп қойып, жайбарақат әңгімелесіп отыру ақхалатты абзал жандарға тән емес. Біз де мұнан әрі Айжанға қолбайлау болмай, жұмысын сырттай бақылап көрдік. «мейірбике деген аты айтып тұрғандай, дәл осындай жүзі жылы, мейірімді болмаушы ма еді» деп іштей кейіпкеріміздің тыңғылықты ісіне, нәзік болмысына қайран қалдық. Расымен дертке дауа, емге шипа бере алатын тек осы ақхалатты абзал жандар ғана. Біздің ең қымбат байлығымыз – өміріміз осы сала қызметкерлерінің кәсібиліктеріне байланысты. Сондықтан да бұл сала иелеріне үлкен жауапкершілік жүктеледі. Олардың көмегімен ауруымыздан айығып, ертеңімізге үмітпен қараймыз. Алдына барған әр науқасқа ерекше мейіріммен қарап, жылы сөзімен көңіліңді көтеріп, өмірге деген құлшынысыңды арттыратын да осы асыл маман иелері. Жалағаш аудандық емханасындағы Айжан сынды білікті мамандар ендігі жерде халықтың денсаулығын жақсарту жолында аянбай еңбек ете береді деп сенеміз.

Тұрғындар алғысын алған жалағаштық абзал жан

<a href="https://egemen.kz/article/318151-darigerler-auyldardy-aralap-dgur">ФОТО</a><a href="https://kyzylorda-news.kz/">Kyzylorda-news.kz.</a> Қызылорда облысында биылғы жылдың 6 айының қорытындысымен облыс көлемінде жіті ішек инфекциясының 531 жағдайы тіркеліпті. Ол өткен жылдың осы мерзімімен салыстырғанда 3,5 есеге төмен.Аймақ көлемінде тіркелген жұқпалы жіті ішек ауруларының 95 пайызы Қызылорда қаласы тұрғындарынан анықталған. Олардың 87 пайызы 14 жасқа дейінгі балалар арасында тіркелген. Мәселен, жұқпалы жіті ішек ауруларының ұшырағандардың 68 пайызы 2 жасқа дейінгі балалар үлесіне тиеді.<blockquote>«Жаз айларында жұқпалы жіті ішек аурулары мерзімінен ерте піскен бақша өнімдері мен жеміс-жидектермен байланыстырады. Эпиданамнез жинау барысында 31 тұрғын мерзімінен ерте піскен жеміс-жидек пен қауын-қарбызды жегеннен кейін өздерін жайсыз сезінген. Әдетте қарбыздар маусым айында сауда сөрелерінде пайда бола бастайды. Бұл уақытта өнімдер анағұрлым қауіпті, яғни нитратпен улану деңгейі жоғары. Бұдан бөлек, гербицид, пестицидтердің мөлшерден тыс болуы да денсаулыққа кері әсер етеді» деп хабарлады Қызылорда облысы санитарлық-эпидемиологиялық бақылау департаменті.</blockquote>

Қызылордада жіті ішек ауруларына ұшырағандардың басым бөлігін балалар құрайды

<a href="https://kyzylorda-news.kz/">Kyzylorda-news.kz.</a>&nbsp; Сырдария ауданының медицинасының даму қарқыны бәсеңдемейтіні рас. Себебі, медицина саласының жұмысын ілгерілету – маңызды рөл ойнайды. Жалпы, денсаулық сақтау саласын барынша жандандырып, тұрғындарға қолайлы ота қалыптастыруда өзекті. Бұл ретте, &nbsp;бүгін аудан әкімі Берік Сәрменбаев аудандық емхана қызметкерлерімен кездесіп, дәрігерлердің ұсыныс-пікірлерін тыңдаған болатын.Кездесу барысында ауданның бас дәрігері Жалғасбек Үсенов аудандық емхана бойынша атқарылып жатқан жұмыстарға тоқталып өтті. Аудан басшысы кездесуден кейін емхана жұмысымен танысып, күндізгі стационарлық ем қабылдап жатқан науқастардың жағдайын білді.<blockquote>– Аудан медицинасына жергілікті халықтың көзқарасы ұдайы жақсы болуы үшін басшылық тарапынан жүйелі жоспар жасалуы керек. Науқастардың жағдайын жақсарту мақсатында заманауи аппараттар алу керектігін көпшілік айтып жүр. Әрине, медицина саласының мамандарының атқарар қызметі ауыр. Олардың күні-түні жасайтын жұмысын бағалауымыз керек. Себебі, кәсіби мамандар халықтың жағдайын тікелей бақылап, барынша ем-шара жасау күш салады. Бүгін аудандық емхананың базасын көріп шықтым. Дәрігерлер уақытылы көпшілікті қабылдау үстінде. Негізінен, медицина саласы ұдайы назарымызда болуы тиіс. Есепте тұратын науқастарға дәрі- &nbsp;дәрмекті уақытылы беру керектігін ескерген жөн. Сонымен бірге арушаңдық деңгейін темендетіп, &nbsp;жасы ұлғайған жандарға дәрігер бақылауы күйшелтілуі керек, – аудан басшысы. &nbsp;</blockquote>Жалпы ауданда 110 төсектік аурухана, ауысымына 250 адам қабылдайтын емхана, 10 дәрігерлік амбулатория, 2 фельдшерлік-акушерлік және бір медициналық бекет халыққа қызмет көрсетеді. Биыл облыстық бюджеттен 182 млн теңгеден астам қаржы бөлініп, Іңкәрдария, А.Тоқмағанбетов пен Қалжан ахун ауылындағы фельдшерлік-акушерлік бекет күрделі жөндеуден өтуде. Сонымен қатар, республикалық бюджеттен 405 млн теңгеге Нағи Ілиясов ауылында амбулатория құрылысы жүргізілмек.

Сырдария ауданының әкімі емхана жұмысымен танысты

<a href="https://kyzylorda-news.kz/">Kyzylorda-news.kz.</a>&nbsp; Мемлекеттік бюджет есебінен ұсталатын ұйымдардың медициналық қызметкерлерінің жалақысы артады. 2023 жылғы 1 қыркүйектен бастап олардың лауазымдық еңбекақысына түзету коэффициенттері көтеріледі.Тиісті қаулы жобасы <a href="https://legalacts.egov.kz/npa/view?id=14631410">"Ашық НҚА"</a> сайтында жарияланды және 28 шілдеге дейін қоғам талқысына шығарылған.Жоба үкіметтің "Азаматтық қызметшілерге, мемлекеттік бюджет қаражаты есебінен ұсталатын ұйымдардың қызметкерлеріне, қазыналық кәсіпорындардың қызметкерлеріне еңбекақы төлеу жүйесі туралы" қаулысына өзгеріс енгізуді көздейді.1 қыркүйектен бюджеттік ұйымдардың дәрігерлерінің еңбекақысына түзету коэффициенті 2,73-тен 3,42-ге дейін, орта деңгейдегі медқызметкерлерде 2,05-тен 2,34-ке дейін өседі.2023-2025 жылдарда мемлекеттік бюджеттен 22 мың қызметкер үшін 36,11 млрд теңге қажет:2023 жылы – 5 млрд теңге,2024 жылы – 15 млрд теңге,2025 жылы – 15,7 теңге шамасында.

Мемлекеттік емханаларда істейтін дәрігерлердің жалақысы 1 қыркүйектен бастап өседі

<a href="https://kyzylorda-news.kz/">Kyzylorda-news.kz.</a>&nbsp; Емханаға жүгінгенде келеңсіз жағдайлар қаншалықты жиі орын алады және олардың көбін сол жерде шешуге болатынын білесіз бе? Әлеуметтік медициналық сақтандыру қорының Қызылорда облысы бойынша филиалының директоры Бақыт Исмаханбетов мәселе шешілмесе не істеу керектігін және пациенттер жиі қандай жағдайларға тап болатынын айтып берді.1-ЖАҒДАЙМӘМС жүйесіндегі мәртебеңіз «Сақтандырылған», бірақ емханада сізге сақтандырылмағансыз дейді. Осы кезде уайымға салынбау керек. &nbsp;Техникалық ақау орын алып жатады немесе сіздің мәртебеңіз туралы мәліметтер емхананың медициналық ақпараттық жүйесінде жаңартылмаған болуы мүмкін.Осындай жағдайда не істеу керек?• Қордың ресми ресурстарының бірі - Telegram-дағы @Saqtandyrybot, Qoldau 24/7 мобильді қосымшасын ашыңыз немесе eGov.kz-тегі жеке кабинетке кіріңіз&nbsp; • Өз ЖСН-іңізді теріңіз • МӘМС жүйесіне соңғы 12 айда төленген жарналардың көшірмесін аласыз Егер барлық төлемдер болыа, сіздің мәртебеңіз «сақтандырылған» болса, Пациенттерді қолдау қызметіне хабарласыңыз. Қолыңызда болған жағдайда, төлем түбіртектерін көрсетуге болады. Сондай-ақ, мәртебені тексеру үшін 1414 Бірыңғай байланыс орталығына жүгіне аласыз. &nbsp;Егер соңғы 1 жылда төленбеген кезеңдер болса, мәртебеңізді қалпына келтіру үшін өткізіп алған барлық айларға жарналарды төлеңіз. Жарналар бойынша берешек төленгеннен кейін мәртебе 3 жұмыс күні ішінде жаңартылады. Яғни дәрігердің қабылдауына бірден жазыла алмайсыз, қабылдауды басқа күнге ауыстыру қажет.2-ЖАҒДАЙСіз сақтандырылғансыз және МӘМС жарналарын үзбей төлейсіз, бірақ сізге &nbsp;бейінді мамандардың қабылдауына және/немесе тексерулерге жолдамалар берілмейді.Не істеу керек?Бұл жолдаманы алу үшін сізде медициналық көрсеткіш болмауы мүмкін. Дәрігер пациентті консультациялық-диагностикалық қызметтерге жіберу туралы шешімді &nbsp; диагноз белгілері негізінде және клиникалық хаттамаларды ескере отырып қабылдайды.Егер сізде медициналық көрсеткіштер бола тұра &nbsp;жолдама берілмесе, емханадағы Пациенттерді қолдау қызметіне жүгініңіз. Егер жағдай шешілмесе, сіз 1414 нөміріне қоңырау шалып, шағым қалдыра аласыз. &nbsp;3-ЖАҒДАЙСізге тексерілуге немесе бейінді маманның кеңесіне жолдама берілді, бірақ жақын арада ол жерге жазылу мүмкін емес. Нәтижесінде күте тұруыңызды сұрайды. &nbsp;Не істеу керек?Бұрын пациенттер өзінің тіркелген емханаларында ғана медициналық қызмет ала алатын немесе белгілі бір диагностикалық орталықта қымбат тексеруден өту үшін квотаны күтетін. Қазір емханада жоспарлы медициналық көмекті екі апта ішінде ұсына алмаса, пациентті қажетті консультациялық-диагностикалық көмек алу үшін бірлесіп орындау шарты бойынша жұмыс істейтін басқа медициналық ұйымға жолдамамен жіберуі тиіс.Егер дәрігер жолдама беруден бас тартса, &nbsp;Пациенттерді қолдау қызметіне немесе бас дәрігердің емдеу ісі жөніндегі орынбасарына жүгіну керек. &nbsp;Мәселені сол жерде шешу мүмкін болмаса Медициналық сақтандыру қорының ресми кері байланыс арналары Qoldau 24/7 мобильді қосымшасы, 1414 бірыңғай байланыс орталығына қоңырау шалу арқылы немесе fms.kz сайтының «сұраныс жіберу» бөлімінде өтініш қалдыра аласыз.4-ЖАҒДАЙСізге тегін медициналық көмектің кепілдік берілген көлемі немесе МӘМС пакетінде көзделген медициналық қызметтер үшін ақы төлеңіз дейді. Мысалы, КТ/МРТ нәтижелері жазылған диск пен пленканы сатып алуды &nbsp;және алдағы айға жазыла алмауына байланысты ақылы негізде ультрадыбыстық тексеруден өтуді &nbsp;және т. б. сұрайды.Не істеу керек?Мұндай жағдайларда бірден Пациенттерді қолдау қызметіне немесе бас дәрігердің емдеу бөлімі бойынша орынбасарына жүгініп, не себепті медициналық қызмет көрсетуден бас тартқанын сұрау қажет.Егер мәселе шешілмесе, Сіз Қорға шағым жіберіп, ресми жауап күте аласыз. Әдетте бұл мәселенің күрделілігіне және жоспардан тыс мониторинг жүргізу қажеттілігіне байланысты 1-ден 5 жұмыс күніне дейін созылады.Егер сіз төлем жасап қойсаңыз, ақылы қызметтерді алуға келіскендігіңізді білдіреді. Сондықтан сіз қаражатыңызды қайтара алмайсыз. Бұндай жағдайда медициналық ұйымға тиісті түсіндіру жұмыстарын жүргізуге және алда &nbsp;осындай келеңсіздіктерге жол бермеу үшін Қорға хабарласу керек. &nbsp; &nbsp;5-ЖАҒДАЙМедициналық қызметтерге бөлінген қаражат лимиті таусылды, келесі айда келіңіз. Сіз осындай сипаттағы медициналық көмектен бас тарту жағдайына қаншалықты жиі ұшырайсыз?Медициналық көмекке лимит жоқ. Егер тексеруден өтуге немесе бейінді маманның консультациясын алуға медициналық көрсеткіштер болса, сіздің учаскелік дәрігеріңіз өз емханаңыздың мамандарына жолдама беруі немесе бірлесіп орындау шарты бойынша басқа медициналық ұйымға жолдамамен жіберуі тиіс.6-ЖАҒДАЙСіз емханаға қатты ауырып бардыңыз делік. Созылмалы аурудың өршуімен, жарақатпен немесе ЖРВИ белгілерімен жүгінсеңіз де, МӘМС жүйесінде мәртебеңіздің жоқ деп сізге медициналық көмек көрсетуден бас тартады.Мұндай жағдайда не істеу керек?Алғашқы шұғыл медициналық көмек қажет болған кезде пациенттің тіркелген медициналық ұйымның орналасқан жері де, МӘМС жүйесіндегі сақтандырылған мәртебесі де маңызды емес. Пациент жақын жердегі емхананың фильтр кабинетіне &nbsp; жүгіне алады немесе жедел медициналық көмек бригадасын үйге шақыра алады. Сондай-ақ, жақын жердегі ургентті клиниканың травматологиялық пунктіне немесе қабылдау бөлмесіне бара алады. Мұндай клиникалар туралы ақпаратты 103 нөміріне қоңырау шалып, сұрап алуға болады.7-ЖАҒДАЙСіз әлеуметтік маңызы бар немесе созылмалы аурумен Д есепте тұрсыз, бірақ &nbsp;сақтандырылған мәртебеңіздің жоқтығына байланысты олар сізді қараудан және басқа салалық мамандардың кеңесіне жіберуден бас тартады.Мұндай жағдайда не істеу керек?&nbsp; Д-есепте тұрған созылмалы немесе әлеуметтік маңызы бар аурулары бар пациенттер &nbsp;мәртебесінің бар-жоғына қарамастан, ауру түрі және клиникалық хаттаманың ұсынымдарына сәйкес тегін дәрі-дәрмекпен қамтамасыз етуді қоса алғанда, барлық қажетті медициналық көмекті ала алады.Басқа жағдайлар мен аурулар бойынша жоспарлы медициналық көмек алу үшін сақтандырылған мәртебесінің болуы қажет.Егер сіз Д-есепте тұрмасаңыз, тексерулерден өтіп, диагнозды бейінді мамандармен растау үшін мәртебе керек болады. Барлық жоспарлы консультациялық-диагностикалық көмек МӘМС есебінен көрсетіледі.8-ЖАҒДАЙДәрігер сізге «Сақтандырылған» мәртебесі керек екенін және бұл үшін 2020 жылдан бастап МӘМС жарналарын төлеу қажет деп айтты.Не істеу керек?Сақтандырылған мәртебесін алу үшін алдағы 12 айға немесе тұрақты төлем жасамаған болсаңыз, соңғы бір жылдағы берешек айларға төлем жасап шығу керек. &nbsp;Айта кету керек, егер МӘМС жарналарын бұрын-соңды төлемеген болсаңыз, өткен жылғы қарызды төлемеуіңізге болады. Оның орнына, ағымдағы айды қоса алғанда, алдағы 12 айға жарналарды төлеген абзал. Мәртебе 3 жұмыс күні ішінде беріледі.9-ЖАҒДАЙСақтандырылған мәртебесінің жоқтығына байланысты сізге скринингтер жасаудан бас тартады.Не істеу керек?&nbsp; Кейбір онкологиялық ауруларды ерте анықтау мақсатында скринингтен өту үшін сізде сақтандырылған мәртебесі болу керек.Бірақ 30-70 жас аралығындағы сақтандырылмаған пациенттер үшін скринингтік тексерулер бар. Оған Маклаков көзішілік қысымды өлшеу немесе байланыссыз пневмотонометрия бойынша, жалпы холестерин мен глюкозаны анықтау, ЭКГ, сонымен қатар нәтижелерді түсіндіру үшін терапевтің қабылдауы кіреді. &nbsp;10-ЖАҒДАЙСіз МӘМС жарналарын мемлекет төлейтін азаматтардың жеңілдетілген санатына кіресіз, бірақ жүйеде сізге мәртебе берілмеген.Не істеу керек?Жеңілдік мәртебесі азаматтарды тиісті реестрлер мен базаларға енгізу негізінде беріледі. Мұның бәрі төлеушінің санатына байланысты. Мысалы, күндізгі бөлімде оқитын студенттерді Ұлттық білім беру базасына, ал жүкті әйелдер жүкті және фертильді жастағы әйелдер тізіліміне қосылуы керек. Егер пациенттің деректері тиісті базаларда болмаса және Қор мемлекеттік органдардың ақпараттық жүйелерінен мәлімет алмаса, онда олар жеңілдік санатына кіре алмайды. Мұндай жағдайда студенттер өздерінің оқу орнының деканатына жүгінуі тиіс, ал әйелдер жүктілік бойынша есепке тұруы керек.Егер сізде қосымша сұрақтар туындаса немесе егжей-тегжейлі кеңес қажет болса, &nbsp;1414 бірыңғай байланыс орталығына &nbsp;қоңырау шалыңыз. &nbsp; &nbsp;

Емханаға барғанда жиі кездесетін 10 жағдай 

<a href="https://kyzylorda-news.kz/">Kyzylorda-news.kz.</a> Арал ауданының әкімі Серік Сермағамбетов Райым ауылдық округі, Қызылжар елді мекенінде болып, жаңадан салынып жатқан дәрігерлік амбулаторияның құрылысымен танысты. &nbsp;Ауылдықтардың ұзақ жылдан бері көтеріп келе жатқан өзекті деген мәселесі биыл шешімін тапты. Жалпы сомасы 400 млн. теңгеге жуық қаржы құрайтын бұл жоба осы жылдың қазан айында аяқталады деп жоспарлануда. Жаңа үлгідегі замануаи нысан іске қосылғанда &nbsp;мұнда аптекалық бекет, қабылдау және оқшаулау бөлмесі, лабаратория, физиотерапиялық емдеу мен күндізгі емдеу кабинеттері жұмыс істейтін болады. Амбулатория бір мезгілде 20 адамды қабылдап, 14 тұрғынға &nbsp;стационарлық ем қабылдауына лайықталған.Құрылысты &nbsp;«Астана сервис Ltd» жауапкершілігі шектеулі серіктестігі &nbsp;жасауда. &nbsp;Қазіргі уақытта ғимараттың іргетасын қалау жұмыстары жүргізілуде. Аталған ғимараттың құрылысына бірнеше ауыл тұрғындары жұмысқа тартылған. Алдағы уақытта тағы қосымша 10-ға жуық ауыл азаматтары еңбекпен қамтылмақ.&nbsp;Мұнан соң аудан әкімінің жұмыс сапары Бөген ауылдық округінде жалғасты. Елді мекенде типтік жобадағы дәрігерлік амбулаторияның іргетасы қаланып қауырт жұмыс жүруде. 2 мыңға жуық тұрғыны бар ауылға арналған ғимараттың құрылысы қазан айының соңына дейін аяқтау көзделуде. Мердігер мекеме «Аман-Құрылыс» ЖШС-нің мамандары нысанды белгіленген мерзімде аяқтау үшін қажетті қолдаулар бар екендігін жеткізді. &nbsp;&nbsp;Өз кезегінде аудан әкімі Серік Сағитжанұлы халық игілігі үшін салынып жатқан денсаулық нысанының &nbsp;сапалы әрі уақытылы аяқталуы үшін жергілікті әкімдер мен мердігер мекеме бірлесе жұмыс жасау қажеттігін айтты. Сондай-ақ жауапты бөлімге құрылысты орындау барысын ұдайы бақылауда ұстау керектігін тапсырды.<figure class="image"><img src="https://knadmin.beoblood.kz/uploads/01565a5e_0d59_46ea_a030_47a5456e7e76_9c9bb990e1.jpg" alt="01565a5e-0d59-46ea-a030-47a5456e7e76.jpg"></figure>

Арал ауданында дәрігерлік амбулатория құрылысы басталды

<a href="https://kyzylorda-news.kz/">Kyzylorda-news.kz.</a>&nbsp; Көбінесе жұмыс берушілер немесе азаматтардың өздері барлық жарналар мен аударымдарды төлемейді. Бұл МӘМС медициналық қызметтеріне қолжетімділіктің болмауына себеп болады. Барлық жарналар жасалғанын мұқият тексеру қажет. Мәртебе «сақтандырылған» болуы үшін жетіспейтін төлемдерді төлеу керек. 2023 жылы аударымдар мен жарналарды кім және қалай жасау керектігін Әлеуметтік медициналық сақтандыру қорының Қызылорда облысы бойынша филиалының бөлім басшысы Ғалымжан Салықов түсіндірді.Егер сіз сақтандырылмаған болсаңыз, төлеушінің санатына қарай МӘМС үшін ай сайынғы төлем мөлшерін анықтаңыз:15 жеңілдік санатына кіретін азаматтар. Жарналарды мемлекет өз тарапынан өтейді.Жалдамалы жұмысшылар. Төлемді жұмыс берушінің есеп бөлімі жүзеге асырады. Жұмыс берушілердің жұмыскерлер үшін аударымдары 3% құрайды (төлем тағайындау коды – 121), аударымдардың ең жоғары сомасы 21 000 теңгеден аспауы тиіс.&nbsp;Азаматтық-құқықтық сипаттағы шарт (АҚС) бойынша жұмыс істейтін қызметкерлер мен жеке тұлғалардың жарналары 2023 жылы табыстарының 2% құрады (ТТК-122). Жарнаның ең жоғары сомасы 14 000 теңгені құрайды.&nbsp;Өзін-өзі жұмыспен қамтығандар (жұмыскерлері жоқ және жеке кәсіпкерлерді тіркеусіз қызмет көрсететін тұлғалар) – БЖТ төлеушілер – республикалық және облыстық маңызы бар қалалар үшін 1 АЕК (3 450 теңге), басқа елді мекендер үшін - 0,5 АЕК (1 725 теңге). Дербес төлеушілер - 1 ЕТЖ - дан 5% (2023 жылы 3 500 теңге).Сақтандыру мәртебесі үшін жарналарды 12 ай бойы үздіксіз төлеуі қажет. Мысалы, егер 2022 жылы 2-3 ай төленбесе, онда барлық 12 ай үшін төлемдер болуы үшін оларды дербес төлеуші ретінде төлеген дұрыс Егер 2022 жылы төлем мүлдем болмаса, онда &nbsp;бір жыл бұрын жарналар салған тиімді. Медициналық көмекке жүгіну кезеңінен бастап. БЖТ төлеушілер үшін - соңғы 3 ай қатарынан (медициналық көмекке жүгінген кезде).МӘМС жүйесіндегі мәртебеңізді бірнеше жолмен тексеруге болады: fms.kz ресми сайты, Qoldau 24/7 мобильді қосымшасы, Telegram-дағы SaqtandyryBot, Egov.kz электрондық үкімет порталы арқылы. &nbsp;

 МӘМС жүйесінде сақтандыру мәртебесін алу мүмкіндіктері қандай?

<a href="https://kyzylorda-news.kz/">Kyzylorda-news.kz.</a>&nbsp; Байқоңыр қаласының Төретам кенті мен Ақай ауылдық округінен арнайы келген дәрігерлер мен акушерлер туу жасындағы әйелдерге шұғыл акушерлік-гинекологиялық көмек көрсетуді шыңдау мақсатында облыстық перинаталдық орталығына келді. Ондағы мақсат тәжірибе алмасып, білімін шыңдау болды.&nbsp;Келген мамандар алдымен гинекология бөлімінің жұмысымен танысты Одан кейін оқу орталығында облыстық денсаулық сақтау басқармасының штаттан тыс бас акушері Г.Ж.Жұмабековамен акушериядағы шұғыл жағдайлар бойынша рөлдік ойындар ойнатылды. Одан соң аға акушер А.К. Әбішева босанудан кейінгі ІІ акушерлік бөлімнің жұмысымен таныстырды.Айта кетейік, облыстық перинаталдық орталығы ана мен бала денсаулығын қорғау жөнінде облыс көлеміндегі медицина ұйымдардың басты ұйымдастыру-әдістемелік орталығы болып табылады. Айта кеткен жөн, бүгінде аймақта ана мен бала денсаулығын қорғау және перинатальды қызметтің сапасын арттыру мақсатында жоспарлы жұмыстар жүргізілуде.&nbsp;Қазір облыс халқының 93 пайыз – акушер-гинекологпен, анестезиолог-реаниматологпен – 70 пайыз, неонатологтармен – 90,3 пайызға қамтылған.

Байқоңырлық дәрігерлер мен акушерлер Облыстық перинаталдық орталық базасында тәжірибе алмасты

<a href="https://kyzylorda-news.kz/">Kyzylorda-news.kz.</a> Мүгедектіктің құрығына түсіп, жарымжандықтың тақсіретін тартып, тауқыметін мойнына іліп жүрген жандар қаншама?! Әрине, әркім өзіне тиесілі тағдырды таңдап алмайды. Қоғамда қанша адам болса, сонша тағдыр иесі бар. Кейбіреулері арбаға таңылып, қос аяғынан айырылып жатса, енді біреулері жанарынан, қолынан, я болмаса өзге де дене жарақаттарын алып жатады. Бірақ айналамызда 12 мүшесі сау болса да мүмкіндігі шектеулі жандай қаннен-қаперсіз жүретін адамдар да жоқ емес. Осындай да қайсысының нағыз мүмкіндігі шектеулі екен деп ойланып қаласың. Себебі өз еркімен жүріп-тұра алмайтын адамдардың әрқашан тырысып, жетістікке жетуге талпынып жатқанын жиі байқаймыз. Ал тепсе темір үзетін, денсаулығында бір кінәраты жоқ кей &nbsp;кісілердің өмірге деген талпынысын сезінудің &nbsp;өзі қиын. Сондықтан болар қазір қандай жұмыс атқарылатын болса да, мүгедектікі бар жандарды да ескерусіз қалдырмай келеді. Тіпті арнайы топ өкілдеріне арнап әртүрлі спорттық шаралар, концерттер мен байқаулар да ұйымдастырылуда. Бұл да кедергісіз қоғам қалыптастыруға талпыныс.&nbsp;Әлгінде айтқанымыздай, өмірдің бір сарынды немесе бір түсті болуы мүмкін емес. Ақ пен қара бірге жүретін секілді, адамдардың арасында да әртүрлі жағдай болып жатады. Мәселен, Шиелі ауданында 2382 мүмкіндігі шектеулі адам тіркелгенімен, оның барлығын бірдей жұмысқа жарамсыз, яки төсекке таңылып жатып қалған деуге болмайды. Олардың өзі ішінара бірнеше топқа бөлініп, өздеріне тән кәсіппен, хоббимен айналысып келеді. Тіпті арасында 124 адам еңбекке қабілетті. Жылдың басынан бері оның 36-ы ақылы қоғамдық жұмыспен айналысса, үшеуі әлеуметтік жұмыс орындарына, бесеуі жастар практикасынан өтуге уақытша жұмысқа жолдама алған. &nbsp;Демек аты мен анықтамасы ғана мүмкіндігі шектеулі демесеңіз, өзгерелер сияқты олар да қоғаммен тығыз байланыста болып, ел қатарлы жұмыс істеуге қауқары жетеді. Қуаныштысы, олардың арасында «Мен арбаға таңылдым, яки мүгедекпін. Маған барлығы көмектесуге міндетті» деп алақан жайып отырған ешкім жоқ. Керісінше, білсем, көрсем, үйренсем деген талпыныстарын тез-ақ аңғаруға болады. Мысалы, мүмкіндігі шектеулі азаматтардың арасында 79-ы қазіргі кезде «Бастау-Бизнес» кәсіпркерлік негізінде оқыту курстарын онлайн түрде оқып, сертификат иегері атанған. Олардың ішінде 12-не қайтарымсыз грант тағайындалып үлгерді. Кәсіп ашамын деген жанның қолдаушысы бар екеніне бұл да бір дәлел. &nbsp;Бұдан бөлек 4 мекемеге 4 азамат тұрақты жұмысқа орналасқан.&nbsp;Онсызда тағдыр шекесінен тартып, шаңышқысын шалт қадаған жандарды қоғам кеудесінен кері итермеуі керек. Иә, кейде айналамыз қатігезденіп денсаулығында кінәраты бар адамдарды қолын шошайтып көрсетіп, көңіліне тиер ауыр сөздерді де айтып жатады. Бірақ қазір мүмкіндіктер заманы. Технология қарыштап дамыған заманда «Мүмкін емес» деген сөзді айтуға болмайды. Тіпті мемлекеттің өзі тағдырдың сынына ұшыраған жандарды ерекше қамқорлығына алып, олар үшін кедергісіз орта қалыптастыруға тырысып келеді. Мысалы, Шиелі ауданында «Үміт» мүгедектер қоғамдық қорымен келісім жасалып, жыл басынан бері үздіксіз әлеуметтік такси қызметі көрсетілуде. Сондай-ақ «AMANAT» партиясының «Өзгерістер жолы: Әр азаматқа лайықты өмір» атты сайлауалды бағдарламасын іске асыру мақсатында ерекше қажеттілігі бар адамдар үшін ғимараттарды пандустармен, бейімделген лифтілермен, дәретхана және көзі көрмейтіндерге арналған бағыттаушы белгілермен қамтамасыз етіп, инфрақұрылымды жақсарту бойынша жұмыстар атқарылуда. Бұған қоса, 33 объектіні стандартқа сәйкес жөндеу де кезек күттірмейтін іс. &nbsp;Мемлекет басшысы Қасым-Жомарт Тоқаев «Қазақстан ешкімнің құқығын шектемеу керек» деп ерекше күтімді қажет ететін жандарға ыңғайлы орта қалыптастыру керегін тапсырған. Әрине, мүгедектерді жұмыспен қамту я болмаса кәсібін әрмен қарай дөңгелетіп алып кету оңай емес. Бірақ дамыған елдердің бәрінде еңбекке жарамды мүмкіндігі шектеулі жандар қысылмастан жұмыс істейді. Бұл мемлекет үшін де, мүгедектер үшін де, қоғам үшін де тиімді. Алайда кейбір жұмыс берушілер мүмкіндігі шектеулі десе бұрылып қарағысы да келмейді. Осыдан кейін олардың сағы сынып, өмірге деген құлшынысы құлдырайды. Сондықтан алдағы уақытта елімізде бұл мәселеге баса назар аударылып, әрбір жан үшін кедергісіз орта қалыптастыруға тырысу керек. Себебі олар мейірімді, көзқарасы, ой-тұжырымы, түйсігі бөлек жандар. Бойындағы күш-жігер, іштегі бұлқынысы оларды өмірді ынта-шынтасымен сүюге жетелейді. Ал қоғам сол жандардың жарық дүниеге деген махаббатын сөндірмей, керісінше серпін беруі керек.

Шиелі ауданында 2382 мүмкіндігі шектеулі жан тіркелген

<a href="https://kyzylorda-news.kz/">Kyzylorda-news.kz.</a>&nbsp; Өңірдегі жедел – жәрдем станциясының материалдық-техникалық жағдайын жақсарту, мамандардың тапшылығын жою секілді мәселелер бүгін «AMANAT» партиясы облыстық филиалы жанындағы Білім және денсаулық сақтау мәселелері жөніндегі аймақтық Кеңес отырысында қаралды.Жедел – жәрдем қызметіне көпшліктің көңілі толмай жатады. Бұған себеп те көп. Алайда бүгінгі күні облыстық медициналық жедел жәрдем стансасы бойынша өте күрделі қаржылық қиындықтар қалыптасқан. Яғни, стансаның тапқан қаржысы жалақы қорының өзін жабуға жетпегендіктен ағымдағы жылдың 1 қаңтарына 564,0 млн теңге кредиторлық берешек қалыптасқан.&nbsp;Облыстық денсаулық басқармасы басшысының орынбасары Ерділдә Нұртазаұлының айтынша станса бойынша қаржының жеткіліксіздігі 2018 жылдан бері тұрақты түрде орын алып келеді, дегенмен жыл сайын аймақтық коэффициенттерді жоғарылату есебінен реттеліп, қосымша қаржылар бөлініп келген.&nbsp;<blockquote>«2020 жылы бұйрықпен бекітілген аймақтық коэффициент жыл басында 1,167 болса жыл ішінде өзгерістер жасалып 1,3444-ке артты. Ал 2021 жылы 1,1670 –ден 1,4852-ге өсті. Биылдан бастап аймақтық коэффициент мүлдем алынып тасталып, станса өзінің қызметін толық атқарғанымен тарифтің өте төмендігінің салдарынан қаралған қаражатты толық ала алмай қарызға әбден батып, тығырыққа тіреліп отыр. Қазіргі таңда, мамыр айының жалақысы төленгенімен сәуір айынан бері міндетті салықтық төлемдері мен жарналары төленбей келеді. Бүгінгі күні қызметкерлерге шілде, тамыз айыларының жалақысын төлеу мәселесі қиындық тудырып отыр»,- дейді облыстық денсаулық басқармасы басшысының орынбасары.</blockquote>Атап өту керек, станса құрамындағы 4 қалалық және 9 аудандық барлығы 13 бөлімшеде 50 бригада және 7 аудан мен Қызылорда қаласына медициналық авиация бөлімшесі мен оперативті бөлім жұмыс жасайды.Кеңесте мәселені шешудің жолдары талқыланып, облыстық мәслихат пен тиісті органдарға нақты ұсыныстар жолданатын болды.&nbsp; Жиын барысында күн тәртібіндегі екінші мәселеге орай өңірдегі үш ауысымды, апатты жағдайдағы білім беру нысандарының мәселесін шешу бойынша атқарылып жатқан жұмыстар мен арнайы және мектеп-интернаттарында оқитын балалардың оқуы мен тұруына жасалған жағдайларда қаралды.&nbsp;<blockquote>Қазіргі таңда аймақта 6 апаттық және Қызылорда қаласында үш ауысымда оқытатын 6 мектеп бар. Бұл мәселені шешу «AMANAT» партиясының сайлауалды бағдарламасында да қамтылған. 2025 жылы толық шешіледі деп жоспарланып отыр. Нақты жұмыстарға тоқталсақ, «Жайлы мектеп» ұлттық жобасы аясында өңірде салынатын 21 мектеп есебінен апаттық мектептердің 4-еуінің мәселесі шешімін табатын болады. Олар Қазалы ауданындағы №94-ші, Қармақшы ауданындағы №105, 108 мектеп және Шиелі ауданындағы №45 мектеп. Арал ауданы Тоқабай елді мекеніндегі апатты мектептің құрылысы жеке демеуші есебінен жүргізілуде. Нысан биылғы жылы пайдалануға берілмек. Ал, Шиелі ауданы Жансейіт елді мекеніндегі 100 орындық мектептің құрылысын «Білім беру инфрақұрылымын қолдау қоры» есебінен қаржыландыруға ұсынылған.&nbsp;Ал үш ауысымда оқытатын білім беру ұйымдары мәселесін шешу мақсатында облыс орталығындағы 4 мектептің жанынан 1850 орынға лайықталған қосымша ғимарат құрылысы жүргізілуде. Қалған 2 білім нысаны биыл пайдалануға берілетін Жезқазған трассасы бойындағы 600 орындық жаңа мектеп есебінен шешіледі. Бұдан бөлек, аудандардағы орын тапшылығын шешу мақсатында осы жылы Жаңақорған ауданында 300 орындық, Шиелі ауданы 250, Қазалы ауданы, Әйтеке би кентінде 250 жаңа 3 мектеп пайдалануға беріледі. Осылайша биылғы жылы үш ауысымда оқыту мәселесі толық шешімін табады»,- дейді атқарылған жұмыстар жөнінде хабарлама жасаған облыстық білім басқармасы басшысының орынбасары Бағдат Бердәулетов.</blockquote>

Қазақстан және Қызылорда облысының жаңалықтары: Денсаулық