<a href="https://kyzylorda-news.kz/">Kyzylorda-news.kz</a> ҚР денсаулық сақтау министрі Ақмарал Шәріпбайқызы Сыр өңіріне жұмыс сапарымен келіп, «Достық үйінде» тұрғындармен кездесу өткізді. Онда медицина саласының жұмыс барасымен алдағы жоспары және тұрғындардың мәселесі тыңдалды.Алдымен облыс әкімінің орынбасары Данияр Жаналиев сөз сөйлеп, денсаулық сақтау мининстрі Ақмарал Әлназароваға алдағы жұмысына сәттілік тілеп, сөз кезегін берді.<blockquote>– Халыққа медициналық көмектің сапасы мен қолжетімділігін жақсарту мақсатында Министрлік халықтың ұсыныс-пікірлерiне талдау жүргізiп, ұдайы жұмыс жасап келедi.&nbsp;Мәселен, біз қолданыстағы анықтамалардың 27 түрін 2 есеге, яғни 10-12 анықтамаға дейін қысқарту жұмыстарын жүргізіп жатырмыз. Пациенттерге ыңғайлы болу үшін жоспарлы емдеуге жатқызуға арналған талдаулардың тізбесі жалпы жиынтықта 42 зерттеуге қысқартылады және олардың қолданылу мерзімі 6 айға дейін ұлғайтылады. Сондай-ақ тегін амбулаториялық дәрі-дәрмектердің тізімдері және оларды алу тетіктері қайта қаралуда, – деді Ақмарал Әлназарова.</blockquote>Бүгінгі күні&nbsp;еліміздің 7 өңірінде яғни Астана, Алматы, Шымкент, Қызылорда, Ақтөбе, Түркістан және Қарағанды облыстары бойынша жаңа пилоттық жоба іске асуда. Бұл «Бір күндік клиника» жобасы жүкті әйелдерге пренаталдық диагностиканың инновациялық әдістерін жүргізуге және патологиясы бар баланың туу қаупін уақтылы анықтауға мүмкіндік береді.Сондай-ақ Қызылорда облысының тұрғындарына медициналық көмек көрсету үшін 19,7 млрд. теңге бөлінген. Бұл өткен жылмен &nbsp;жылмен салыстырғанда 9%-ға өскен. Ал тұрғындарды дәрі-дәрмекпен қамтамасыз ету бойынша биыл 17,6 млрд.теңге бөлінген. Оның 9,6 млрд теңгесі &nbsp;стационарлық деңгейге арналса, қалған 8 млрд &nbsp;теңгесі амбулаториялық деңгейге бөлінген.&nbsp;Денсаулық сақтау минстрінің айтуынша, Қызылорда облысына медициналық техниканы сатып алуға 8,6 млрд.теңге қаражат бөлінген. Себебі осы арқылы медициналық көмектің қолжетімділігін қамтамасыз ету үшін денсаулық сақтау жүйесінің инфрақұрылымын дамыту бойынша жұмыстар жүргізілуде.&nbsp;Сонымен қатар, «Ауылдық денсаулық сақтауды жаңғырту» ұлттық жобасын іске асыру аясында өңірдегі 27 ауылға медициналық-санитариялық алғашқы көмек нысанын салу жоспарланған. Нақтырақ айтатын болсақ ауылдарға медициналық және фельдшерлік-акушерлік пункттер мен дәрігерлік амбулаториялар салынбақ.&nbsp; – Ұлттық жобада Шиелі, Қазалы, Жаңақорған және Арал аудандық ауруханаларына күрделі жөндеу жүргізу және медициналық жабдықтармен жарақтандыру арқылы жаңғыртужұмыстары көзделіп отыр. Алдағы уақытта медициналық көмектің сапасы мен қолжетімділігін жақсарту жөніндегі іс-шаралар белгілі бір уақыт пен ресурстарды талап етеді. Деседе біз медицина қызметін халыққа сапалы әрі қол жетімді болуы үшін тиісті жұмыстар атқарамыз, – дедi Ақмарал Әлназарова.&nbsp; &nbsp; Мұнан соң сөз кезегі аймақтың бас дәрігері Олжас Ысқаковқа берілді. Ол өңiрдегi медицина саласында атқарылып жатқан жұмыстарды баяндады.<blockquote>– &nbsp; Бүгінгі күні облыс халқына 25 стационарлық, 26 амбулаториялық емхана және 100 дәрігерлік амбулатория, 25 фельдшерлік- акушерлік бекет пен 97 медициналық бекет қызмет көрсетіп келеді. Жалпы облысымызда 3000-ға жуық &nbsp;дәрігер мен 12 мыңға жуық орта мамандар қызмет еуде. Республика бойынша дәрігерлермен қамтамасыз ету бойынша 7 орында болсақ, орта буын мамандарымен қамтамасыз ету бойынша бірінші орындамыз. Деседе тәжірибелі дәрігерлер &nbsp;жетіспеушілігі тек қана қалада орын алып отыр. Осы дәрігерлердің тапшылығын азайту мақсатында, мамандармен тікелей өзімен сөйлесіп, 2 жылдық немесе соңғы оқу жылы болсада соны қарастыра отырып, өзімізге шақырамыз. Одан бөлек өңірдегі қызметкерлеріміздің біліктілігін арттыру үшін 144,9 млн теңге бөлінген болатын. Олар Түркі елінде 2 апта білімін жетілдіріп, мамырдың басында 10&nbsp;раениматолог пен 5 &nbsp;кардиолог мамандарымыз келді. Деседе биыл мамандардың арнайы шетелде біліктілігін арттыруға бөлек 55 млн қаражат бөлінді,&nbsp;– деді Олжас Ысқаков.</blockquote>Сондай-ақ аймақтың бас дәрігері облыстағы медицина саласы бойынша жүргізілген құрылыс нысандарын айтып өтті.Сонан соң тұрғындар &nbsp;медициналық кеңес пен медициналық көмектің қолжетімділігі, тегін дәрі-дәрмекпен қамтамасыз ету, медициналық кадрларды даярлау туралы және тағы да басқа өзек мәселелер бойынша сұрақтарына жауап алды.Жиын соңында медицина саласының ардагері Тұрғанбай Маханұлы денсаулық сақтау министрінің жаңа қызметiне сәттiлiк тiлеп, ақ батасын бердi.Шара аяқталған соң денсаулық сақтау министрі тұрғындарды жеке мәселелері бойынша қабылдады.Н.Мұқатаева

Денсаулық сақтау министрі Ақмарал Әлназарова қызылордалықтармен кездесті 

Медицинада зертхана саласы өзіндік күрделілігімен ерекшеленеді. Науқасқа дұрыс диагноз қойылуына себепкер атанатын сынама нәтижесін шығарғуға атсалысатын Лиза Бодыбаеваның ұжымда беделі биік. Шымкент қаласындағы медициналық училищеде фельдшер-лаборант мамандығын игерген медбикені 33 жылдық жұмыс өтілі қалыптасқан. Жоғарғы санатты медбике 1991 жылы аудандық ауруханаға фельдшер-лаборант болып қызметке орналасады. Ал 2008 жылы «Лаборатория» бөлімшесіне аға лаборант болып бекітілген тәжірибелі маманның жұмысы таңнан басталып, кешке дейін жалғасады. &nbsp;<blockquote>– Тәжірибелі басшы Сара Мұхамбетқалиқызы жетекшілік ететін бөлімшеде сан түрлі сынамалардың нәтижесін шығарамыз. Әрине, сырқатына дауа іздеген емделушінің бойындағы кінәратты анықтау барысында біздің қосатын үлесіміз жеткілікті. Жылдар бойы бір салада жүріп, әріптестер арасындағы мызғымас бірлікті, ынтымақты сақтауды, жұмыс көзін үйлестіруді &nbsp;мақсат тұттық. Әрбір адам үшін жұмыс орны екінші үйі секілді. Біз бір отбасының мүшелері сияқты ортақ тіл табысып кеткенбіз, – деді сала маманы.</blockquote>Қазіргі таңда Лиза Бодыбаева жолдасы Ерлан Косбармахов екеуі 3 қыз тәрбиелеп отыр.

Сынама нәтижелерін шығаруда ұқыптылық танытатын маман

<a href="https://kyzylorda-news.kz/">Kyzylorda-news.kz</a> Үкіметтің кеңейтілген отырысында Мемлекет басшысы Қасым-Жомарт Тоқаев&nbsp; ана мен бала денсаулығының мыңызы туралы айтқан болатын. Иә, ана мен бала денсаулығы – бүгінгі қоғамның басты байлығы. Ол әрбір аяғы ауыр әйелдің өмірге дені сау ұрпақты аман-есен әкелуі үшін 40 жылдан артық ғұмырын арнады. Еңбек еткен жылдары ішінде талай қиындық пен қызыққа толы күндерді бастан өткерді. Сонда өз кәсібін шексіз сүйіп, шын берілген еңбек адамы екендігін дәлелдей білді. Біз «Денсаулық сақтау саласының үздігі» акушер-гинеколог Гүлмайрам Нұрмағамбетованы бүгінгі мақалаға арқау етпекпіз.Ол Арал қаласының тумасы. Бала кезден медицина саласының қыр-сырын меңгеруді арманына айналдырға ару мектеп бітірген соң 1980 жылы Қызылорда медициналық учелицесіне акушер бөліміне оқуға түседі. Еңбек жолы 1983 жылы Қызылорда облыстық ауруханасында ранимация бөлімінде бастайды. 1985 жылы Арал қаласына ауысып, жедел жәрдемде акушер бөлімінде жұмыс істейді.<blockquote>– 1993 жылдан бастап әйелдерге кеңес беру ісі бойынша еңбек етіп келемін. 2022 жылы ауданның бас акушері болып тағайындалдым. Әрине, белгілі бір мамандықты меңгеріп еңбек ете бастаған соң, өз қызметінде жетістікке жетуді армандайды. Мен өзім таңдап алған саламда саналы ғұмырымды арнай жүріп мол тәжірибе жинақтадым. Және кейінгі жастарға өз білгенімді үйретуден жалыққан жоқпын. Ең бастысы халықтың алғысына алдым, - дейді ол.</blockquote>Гүлмайрам Нұрмағамбетқызы әр жылдары кәсіби мереке мен айтулы күндері облыс, аудан әкімінің алғыс хатымен, басшылықтың мақтау қағаздарымен марапатталып жүр. 2017 жылы «Денсаулық сақтау саласының үздігі» төсбелгісін кеудеде жарқыратты. Бұл оның халық саулығын сақтау жолында еткен еңбегіне берілген лайықты баға еді. Ал өзі үшін дертіне шипа іздеген жандардың шынайы жүрегінен төгілген алғысын әлі күнге ұмытпаған.<blockquote>– Қай жылдар екендігі нақты есімде жоқ. Аралға алғаш келген уақытым болуы керек. Шәкірат Дәрмағамбетов ақсақал қарақұрт шағып алып ауыр жағдайда ауруханаға жеткізілді. Ронимация бөлімінің дәрігері босамай қалып, мен алғашқы медициналық көмек көрсеткен болатынмын. Сонда аға шынайы ризашылықпен батасын берген. Қазақ үшін батадан артық баға жоқ. Талай аузы дуалы, елге белгілі ағалардың жанын сақтап қалғаным үшін батасын алдым. Шүкір деймін. Мерейіміз өсіп отырғаны сол жандардың ақ жүрекпен айтқан тілектерінің арқасы шығар, – деді Гүлмайрам Нұрмағамбетқызы.</blockquote>Ол еңбек жолында талай қызық та, қиын шақтарды бастан өткерді. Әсіресе бір кездері үйде босанып қалған әйелдер көп болған көрінеді. Олардың кіндік шешесі атанып, есімін қою мәртебесі Гүлмайрам Нұрмағамбетқызына беріліпті.<blockquote>– Бірде Арал қаласында аяғы ауыр келіншектің жедел жәрдем шақыртуымен бардық. Толғақ қысқан әйел ауруханаға барудан бас тартып, үйде босанамын деп қиғылық салды. Тексеріп қарасам, бала шығып келеді екен. Осылай үйде босандырып алуға тура келді. Кейін білдім әйелдің бұған дейінгі 3-4 баласы перзентханада босану сәтінде шетінеп кете берген екен. Көзі қорқып, көңілі қайтып қалған әйел осы перзентін үйде босануға шешім қабылдапты. Мұндай жағдай Шижаға елдімекенінде кездесті. Көптен бала көтермеген келіншек перзентханаға жетпей үйде босанып қалды, - деген акушер-гиниколог сол жылдарды еске алып өткенге саяхат жасады.</blockquote>Бір қызығы өзі босандырып алған балаларға ер бала болса «Серік» деп жолдасының, ал қыз болса «Майра» деп өз атын қойып кеткен екен.Ол еңбекте табысты болумен қатар тағдыр тоғыстырған жолдасы Серік Нұрмағамбетовпен жарасымды шаңырақ құрып, өмірге екі перзент әкелді. Қазір үйлі-баранды болған балалары өз мамандықтары бойынша елге қызмет етіп жүр. Міне, тындырымды тірлігімен, жауапкершілігінің арқасында әріптестерінің құрметіне бөленген кейіпкеріміз болашақ ананың өмірге аман-есен ұрпақ әкелуі жолында саналы ғұмырын арнаған ардақты жан бүгінде зейнет демалысына шығып отыр.Фото: Нұрболат Нұржаубай

Гүлмайрам Нұрмағамбетова: Кейінгі жастарға өз білгенімді үйретуден жалыққан жоқпын

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаев Сыр өңіріне арнайы жұмыс сапарымен келген ҚР Денсаулық сақтау министрі Ақмарал Әлназаровамен кездесті. Аймақ басшысы денсаулық сақтау саласының негізгі көрсеткіштері, өзекті мәселелері туралы айтты.<blockquote>«Мемлекет басшысының, Үкіметтің тапсырмасына сәйкес біз денсаулық сақтау саласының дамуына, медицина ұйымдарының материалдық-техникалық базасының нығаюына, олардың қажетті медициналық құрал-жабдықтармен қамтамасыз етілуіне, тапшы кадрларды даярлауға ерекше көңіл бөліп келеміз. Заманауи жаңа ғимараттарды ел игілігіне табыстап, медицина қызметкерлерінің жылы да жайлы жұмыс орнында халыққа сапалы қызмет етуі үшін барлық жағдай жасалуда. Нәтиже жаман емес. Жалпы өлім-жітім көрсеткіші өткен жылмен салыстырғанда бір деңгейде сақталса, ана өлімі 5,7 есе, сәби өлімі 13,4%-ға төмендеді. 2023 жылдың қорытындысымен 3 негізгі медико-демографиялық көрсеткіштің нысаналы индикаторына қол жетті. Президентіміздің, Үкіметтің Сыр өңірін ерекше қолдауының арқасында аймағымызда нәтижелі жұмыстар жүргізілуде. Өткен жылы республикалық және жергілікті бюджеттен 52,1 млрд. теңге қаралып, 23 медициналық нысан салынды. Оның 17-нің құрылысы аяқталды. Биыл 5,5 млрд. теңге қаржы бөлініп, 5 нысан құрылысы жүргізілуде, оның 2-еуі пайдалануға берілді. Бұдан бөлек, "Ауылдық денсаулық сақтауды жаңғырту" ұлттық жобасы аясында 11 нысан құрылысына сатып алу конкурсы жарияланды. Мердігерлер анықталғаннан кейін тездетіп құрылысты бастаймыз. Нысандар жыл соңына дейін ел игілігіне табысталады», - деді Нұрлыбек Машбекұлы.</blockquote>Сонымен қатар, облыс әкімі Қызылорда қаласы мен аудандарда салынуы тиіс бірқатар медициналық нысан құрылысына қажетті қаржы бөлу мәселесіне ықпал етуді сұрады. Мәселен, Қызылорда қаласындағы №4 және №5 қалалық емханалардың құрылысы шешімін таппай келеді. Облыстық медициналық жедел жәрдем стансасының бөлімшелеріне модульдік жедел жәрдем станциясын салу қажет.Ақмарал Шәріпбайқызы Қызылорда облысының медицина саласындағы жетістіктерді атап өтіп, аймақ басшысы көтерген мәселелер зерттеліп, шешу жолдары қарастырылатынын жеткізді.Айта кетейік, Сыр өңіріне сапары барысында Денсаулық сақтау министрі Жаңақорған, Шиелі аудандарына барды. Әрі қарай ведомство басшысы БАҚ өкілдеріне брифинг өткізіп, көпбейінді облыстық ауруханада сала қызметкерлерімен, "Достық үйінде" облыс халқымен кездеседі. Сонымен қатар, азаматтарды жеке қабылдайды деп жоспарлануда.<img src="https://knadmin.beoblood.kz/uploads/441147094_739080245079889_8433765372219068891_n_c5b87d7023.jpg" alt="441147094_739080245079889_8433765372219068891_n.jpg">

Облыс әкімі Денсаулық сақтау министрімен кездесті

<a href="https://kyzylorda-news.kz/">Kyzylorda-news.kz</a> «Дені сау адам – табиғаттың ең қымбат жемісі» деген тәмсіл бар. Кез келген адам денсаулығы сыр берсе, ақ халатты абзал жандардың көмегіне жүгінері хақ. Біздің кейіпкеріміз – Зәру Қаниева 36 жыл бойы алтын қолды дәрігерлермен қатар иық теңестіре еңбек етуде. 21 жасында «Жан сақтау» бөлімшесінде қызметтік жолы басталған маман адамның бақытты болуының негізгі себебі – денсаулыққа байланысты екенін айқын сезінген.Сала маманы «Жан сақтау» бөлімшесінен кейін «Жұқпалы аурулар», «Туберкулезге қарсы диспансерлік», аудандық емхананың «Жалпы тәжірибелік» бөлімінде аға аяжан қызметтерін абыроймен атқарады. Қазіргі уақытта білікті маман «Мамандарылған» бөлімнің профильді медбикесі ретінде жұмыс жасауда.Әріптестеріне сыйлы, отбасында үлгілі отнасы атана білген Зәру Әбіләкімқызы ардақты жолдасы Ғалымжан Маханғалиевпен бірге 34 жыл бойы ұзақ ғұмыр кешуде. Үнемі жұптары жазылмайтын ерлі-зайыпты 2 перзент тәрбиелеп, 5 немеренің сүйікті ата-әжесіне айналған.<blockquote>– Медицинада біз біле бермейтін тың жаңалықтар күнде жарыққа шығады. Сондықтан сала маманы ретінде заман ағымынан қалыс қалмауға ұмтыламыз. Күнделікті жұмыс барысында сан алуан жағдайды бастан өткеріп, емделуші үшін қолайлы қызметті ұйымдастырамыз. Еңбек еткен бөлімшелерде көптеген қызықты және қиындыққа толы кездер орын алды. Мықты маман болу мақсатында аға буынға қарап, бой түзедік, – деді Зәру Әбіләкімқызы.</blockquote>

Бірнеше бөлімнің қызметін оңтайлы үйлестіре білген медбике 

<a href="https://kyzylorda-news.kz/">Kyzylorda-news.kz</a> Үнемі адам өмірін аман алып қалуда сан түрлі оқиғаға тап болатын «Жан сақтау» бөлімшесінде сала мамандары дамылсыз қызмет етуге дағдыланған. Бөлімшедегі кез келген дәрігер мен медбике үшін әрбір минут өз құндылығын жоймайды. Осындай жауапкершілікті көтере білген аға аяжан Гүлзат Рахметова әрқашан жұмысты ұтымды үйлестіре біледі.Сәкен Сейфуллин ауылының тумасы Гүлзат Тұрмағанбетқызының қызметтік жолы Сырдария аудандық ауруханасына қарасты «Балалар» бөлімшесінен бастау алған. Араға 1 жыл салып жас маман «Жан сақтау» бөлімшесіне қызмет ауыстырады. Осы сәттен бастап ауыр жағдайдағы науқастарға ем-шара жасауда асқан ыждағаттылық танытады. Күнделікті аға аяжанға жүктелген жұмысты еңсеріп, басшылықтан келіп түскен тапсырманы мүлтіксіз орындауға тырысады.<blockquote>– Мен, өз мамандығымды жақсы көретін жанның бірі саналамын. Алғаш Қызылорда медициналық жоғарғы колледжіне оқуға түскенімде денсаулық сақтау саласы бойынша білімімді жетілдіріп, медбике білуге тиісті барлық дүниені меңгеруге тырыстым. Әрбір жұмыстың өзіне тән қиындығы болады. Сондықтан аға аяжан ретінде бөлімшедегі қызметімді кемшіліксіз жасауға ұмтыламын. Еңбек ете білген жан қай кезде де абырой биігінде болады. Жас маман болып келген кезімде білмегенімді үйрете білген, әркез жол көрсеткен Райса Анасова бастаған аяулы жандарға шынайы алғысымды жеткіземін, – деді аға аяжан.</blockquote>

Дамылсыз қызмет етуге дағдыланған аға аяжан

<a href="https://kyzylorda-news.kz/">Kyzylorda-news.kz</a> &nbsp;«Перзентхана» бөлімшесінде жаңа туған сәбиге күтім жасайтын медбикенің еңбегі ерекше бағаланғаны абзал. Әркез нәрестенің денсаулығына жауапкершілікпен қарайтын Әлия Бегманова жөнінде қалам тербемекпіз. Осыған дейін көптеген баланың күтіміне жауапты болған Әлия Өтепбайқызы мамандығын мақтанышы санайды.Негізінен, аяулы жан №131 Талғат Қозыбаев атындағы орта мектепті бітіргеннен кейін Түркістан қаласындағы медицина колледжіне оқуға түседі. 2008 жылы балалар медбикесі ретінде «Перзентхана» бөлімшесіне жұмысқа орналасқан мейірімді жанның еңбегін ерекше атап өткен жөн. Ана мен баланың бар жағдайын бақылайтын медбике 16 жылда еңбегінің жемісін көруде. Өз кезегінде оның мамандығына деген адалдықты табан аудармастан бір бөлімшеде қызмет етуінен аңғаруға болады.<blockquote>– Алғаш медицина саласында қызмет ете бастаған жылдары бойымызда қобалжу болатын. Кейіннен, аталған мамандықты тереңнен меңгеруге тырыстық. Баланың бабын тауып, жаңа туған анасымен қауыштырдық. Күнделікті қарбаласқа толы бөлімшеде жұмыс жасау – зор мәртебе, – дейді білікті медбике.</blockquote>Бүгінде Әлия Өтепбайқызы – 3 перзенттің асыл анасы. Бөлімшеде бала бабын тапса, отбасында отағасының сүйікті жары.

Сәби күтіміне ыждағаттылықпен қарайтын медбике

<a href="https://kyzylorda-news.kz/">Kyzylorda-news.kz</a> Медицина саласында адам жанына араша түсетін ақ халатты жандардың еңбегі ерекше екені даусыз. Тынымсыз еңбекпен алғаусыз алғысқа бөленетін орта буын қызметкерлері әрбір бөлімшедегі ауыртпалықты көтере біледі. Шын мәнінде, медбикенің табандылығы мен қажырлығының арқасында медицина саласының сан бағыттағы жұмысы өнімді болары сөзсіз. Бұл ретте, соңғы 36 жылда аудандық ауруханада қызмет етіп келе жатқан Гүлшара Байкенжеева қашанда әріптестері арасында сый-құрметке ие.Негізінен, Гүлшара Жолдасбекқызы осыдан 56 жыл бұрын Сырдария ауданында дүниеге келген. Алғашқы еңбек жолы Семей қаласында бастау алған медбике араға 1 жыл салып туған жерге оралады. Ең алдымен, басшылық жас медбикені «Жан сақтау» бөлімшесінде жұмысқа орналастырады. Ауыр хәлдегі науқастарды емдеп-жазуға үлесін қосқан Гүлшара Жолдасбекқызы сол кезде 20 жастағы бойжеткен болатын.<blockquote>– Мендицина саласы қашанда адамға асқан төзімділікті, мықтылықты қажет етеді. 17 жыл бойы «Жан сақтау» бөлімшесінде қызмет еткен сәтте үлкен буынның ақылын тыңдап, тәжірибе жинақтай білген едік. Кейіннен «Хирургия» бөлімшесіне ауысып, күрделі жұмыста барынша дағдылана алдық. Әрбір науқастың жағдайын саралап, диагнозына байланысты ем-шара жүргізу – маңызды рөл ойнайды. Әріптестеріммен бірге аудан медицинасының жұмысын ілгерілетуге барымды саламын, – деді тәжірибелі медбике.</blockquote>Бүгінде біздің кейіпкеріміз – жолдасымен бірге 1 қыз, 2 ұлдан 6 немере сүйіп отырған ардақты ана, аяулы әже.

Күрделі қызметте тәжірибесі толысқан медбике

<a href="https://kyzylorda-news.kz/">Kyzylorda-news.kz</a>&nbsp; Білікті маман, тәжірибелі медбике Гүлжан Жаппасбаеваның аудан медицинасында өзіндік қолтаңбасы қалыптасқан. 25-жылға жуық аудандық ауруханада қызмет етіп келе жатқан сала маманы өзінен кейінгі жас буынға үлгі болып келеді. Шындығында, 2000 жылы ақ халатты жан Қызылорда қаласында фельдшер мамандығын меңгеріп шығады. Жалағаштық бойжеткен оқу бітірегеннен кейін тереңөзектік Нұрмағанбет Алпысбаевпен отандасады.Негізінен, Гүлжан Жаппасбайқызы «Гинекология» бөлімшесінде қызмет ете жүріп, медицинаса саласының қыр-сырына қанығады. Нәзік жандылардың денсаулығына бей-жай қарамай әйел затының күтіміне мұқият көңіл бөледі. Бірнеше буын өкілімен әріптес атанған медбике өмірден көргені мен түйгені көп. 4 перзенттің анасы отбасындағы келіндік міндетті лайықты түрде атқарып, жұмысына да, адалдық танытуда.– Медицина саласында маман ретінде қалыптасуыма сапалы білім мен көптеген тәжірибе себепкер атанды. Осы жылдың наурыз айынан бастап «Балалар» бөлімшесінде аға аяжан қызметіндемін. Әрине, қандай жұмыс болмасын тиісті деңгейде атқаруға тырысамыз. Науқастардың еміне көңіл бөліп, бөлімшедегі медбикелердің қызметін бағытын үйлестіремін. Өзім таңдаған күрделі саланы қос қызым таңдады. Қыздарыма қай кезде де, ақыл-кеңесімді айтып, жұмыста жауапкершілік таныту керектігін жеткізіп келемін, – деді аға аяжан.

Гүлжан Жаппасбаева: Өзім қалаған күрделі саланы қос қызым таңдады

<a href="https://kyzylorda-news.kz/">Kyzylorda-news.kz</a>&nbsp; Бүгінде Қызылорда облысында конго-қырым геморрагиялық қызбасының эпидемиологиялық ахуалы тұрақсыз деп бағалануда.&nbsp;Сәйкесінше, жыл басынан бері 108 адам кене шағу жағдайымен медициналық көмекке жүгінген. Оның ішінде конго-қырым геморрагиялық қызбасына 2 күдікті жағдай анықталып, 1 дерек зертханалық жолмен нақтыланды. Бұл жөнінде Өңірлік коммуникациялар қызметінің ақпарат алаңында облыстық санитариялық-эпидемиологиялық бақылау департаментінің басшысы Әлия Мүтәліпқызы хабарлады.<blockquote>–&nbsp;Еліміздің оңтүстік бөлігінде орналасқан 4 аймақ Конго-Қырым геморрагиялық қызбасынан табиғи ошағы болып саналады. Бұған аталған өңірлердің климаттық жағдайы кененің көбеюіне қолайлы болуы. Қазіргі таңда кенеге қарсы залалсыздандыру жұмыстары белсенді түрде жүргізілуде. Бұдан бөлек, наурыз айынан бастап зоопаразитологиялық топпен бірге кене жинау шаралары басталған болатын. Тиісінше, бүгінгі күнге дейін 11 979 дана кене жиналып, оның 1331-не сынама жасалды. Нәтижесінде, 13 кенеден оң нәтиже анықталды. Сондықтан облыс тұрғындары далалық аймақтарда, мал қорлары жанында жүргенде барынша сақтық шараларын сақтау қажет. Ал, конго-қырым геморрагиялық қызбасының ауру белгілері анықталған жағдайда дереу медициналық көмекке жүгінген абзал,&nbsp;– деді Әлия Мүтәліпқызы.</blockquote>Конго-Қырым геморрагиялық қызбасының жасырын кезеңі – 2-14 күн аралығында.<blockquote>&nbsp; – Негізгі клиникалық белгілері: адамның дене қызуы 39-40 градусқа дейін көтеріліп, қатты бас ауруы, көздің қызаруы болады.&nbsp;Сондай-ақ, мойын, арқа, бел ауруы, жүрек айну немесе құсу, іштің ауруы сынды белгілер орын алады. Жалпы былтыр 1332 адам кене шағу дерегімен медициналық көмекке жүгінсе, биыл 108 жағдай тіркелді. Аталған аурудың алдын алу мақсатында арнайы вирусқа қарсы иммундық плазма кеңінен қолданылады. Осы медициналық ем арқылы ауруды жеңуге мүмкіндік болады, - деді облыстық денсаулық сақтау басқармасы басшысының орынбасары Жаныл Исаева.</blockquote>Биыл аймақта 115 елді мекен қолайсыз деп танылды. Осыған сәйкес, 9 сәуірден бастап кенеге қарсы залалсыздандыру жұмыстарының бірінші кезеңі Шиелі, Жаңақорған, Қызылорда қаласында жүргізілді.<blockquote>– Өңірде кенеге қарсы залалсыздандыру жұмыстары 9 сәуір мен 8 маусым аралығында жүргізіледі. Сондай-ақ, арнайы «ЦИПЭК-10%» препараты қолданылатын болады. Қазіргі таңда Сырдария ауданында залалсыздандыру жұмыстары жалғасуда. Бұдан бөлек, кенеге қарсы залалсыздандыру шараларының сапасы мен тиімділігін бақылайтын арнайы жұмыс топтары құрылды. Барлық жағдай тікелей бақылауда, – деді облыстық жұмылдыру дайындығы басқармасының басшысы Марат Ердәулетұлы .</blockquote>Қолайсыз деп танылған елді мекендерде 763 мың бас ауыл шаруашылығы жануарлары бар.– Ал қора, суат, шаңлақтардың жалпы көлемі – 2,9 млн шаршы метр.&nbsp;Жалпы аурудың алдын алудың негізгі жолы - уақ малдарды тоғыту болып табылады. Бүгінде облыс бойынша барлығы 85 мал тоғыту ваннасы болса, оның 54-і типтік үлгіде болса, қалған 31-і қарапайым түрде. Қазір 60 ванна мал тоғытуға дайын, – деді облыстық ветеринария басқармасының бөлім басшысы Ерік Қылышбаев. &nbsp; &nbsp;&nbsp;&nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp;&nbsp;<img src="https://knadmin.beoblood.kz/uploads/441024213_1997535053975330_670543535142671980_n_121278ccf8.jpg" alt="441024213_1997535053975330_670543535142671980_n.jpg">Фото: &nbsp;freepik.com&nbsp;

Конго-қырым геморрагиялық қызбасының алдын алу шаралары белсенді жүргізілуде

<a href="https://kyzylorda-news.kz/">Kyzylorda-news.kz</a> Халықтың медициналық қызметтердің сапасына шағымдарын төмендету мәселелері облыстық денсаулық сақтау басқармасының және Әлеуметтік медициналық сақтандыру қорының Қызылорда облысы бойынша филиалының бірлескен селекторлық отырысында қаралды.Талқылауға Қормен шарт жасасқан аймақтың медициналық ұйымдарының басшылары қатысты.ӘМСҚ облыстық филиалының директоры Бақыт Исмаханбетовтың ақпараты бойынша, азаматтардан өтініштер келесі байланыс арналары арқылы келіп түседі: Qoldau 24/7 мобильдік қосымшасы, 1414 байланыс орталығы, Е – Өтініш ақпараттық жүйесі. Ағымдағы жылдың бірінші тоқсанында Қызылорда облысының тұрғындарынан 200-жүзден астам шағым қабылданды. Көбіне медициналық көмектің сапасына қанағаттанбау, медициналық көмек көрсетуден бас тарту, медициналық қызметтерді ұзақ күту және т.б. Медициналық қызметтердің сапасын, медициналық ұйымдардың менеджмент деңгейін арттыру үшін өзекті мәселелерді шешуде өзара іс-қимыл жасау қажеттігі атап өтілді.Мәселен, медициналық ұйымдар басшыларының рейтингін енгізу, олардың функционалдық міндеттеріне шағымданған пациенттер үшін жауапкершілікті енгізу ұсынылды. Сондай-ақ медициналық ұйымдарда халықтың барлық шағымдарын жедел шешу бойынша тиімді шаралар қабылдайтын жұмыс топтарын қалыптастыру. &nbsp;

Медициналық қызметтердің сапасына шағымдарды азайту шаралары талқыланды

<a href="https://kyzylorda-news.kz/">Kyzylorda-news.kz</a> &nbsp;Сырдария аудандық ауруханасына қарасты «Хирургия» бөлімшесінде науқастарға отадан кейін немесе сан түрлі дертіне байланысты ем-шара жүргізу – қатаң бақылауда болады. Соңғы 20 жылда аталған бөлімшеде қызмет етіп келе жатқан Гүлмира Тоқсейітова бар мақтауға лайық. Қазіргі уақытта аға аяжан ретінде әр іске ыждағаттылық танытатын жанды көпшілік өз ісінің білгірі санайды.Талай жыл хирургия саласының майталман дәрігерлерінің сенім үдесінен шыққан Гүлмира Сәндібекқызы ешқашан салғырттықа жол бермейді. Үлкеннен тәлім алып, емделушінің бабын тауып, өзі ұстанған бағыттан таймайды. Қызылорда медициналық училищесінде 1988-1991 жылдар аралығында білімін жетілдірген маман «Терапия», «Жедел жәрдем», «Транфузиология» кабинетінде өлшеусіз қызмет етеді.<blockquote>– Біздің бөлімшеде кәсіби біліктілігі жоғары мамандардың шоғыры қалыптасқан. Қай кезде де, емделушінің алғаусыз алғысын естігінде ерекше марқайып қаламыз. 30 жылдан аса уақытта медицина саласында жергілікті халықтың ризашылығына бөленіп келеміз. Бөлімшеде ауыр жарақат алған, дене мүшесі зақымдалған жандар жатқызылады. Сондықтан біз ұқыптылықты, тиянақтылықты – басты қағидамыз ретінде санаймыз. Күні-түні науқастың жағдайына бақылау жасаймыз. Отбасымда жолдасым мен балаларым үнемі қолдау көрсетіп отырады, – дейді Гүлмира Сәндібекқызы.</blockquote>Фото: Нұрболат Нұржаубай

Қазақстан және Қызылорда облысының жаңалықтары: Денсаулық