<a href="https://kyzylorda-news.kz/">Kyzylorda-news.kz</a> Әлемде қанша мамандық болса, олардың әрбірінің адам үшін маңызы зор. Әйтсе де, адам жанының арашасы болған ақ халатты абзал жандардың, оның ішінде мейіргерлердің орны ерекше екені рас.Бүгін антына адал жандар мерекесі, яғни «12 мамыр – Халықаралық мейірбикелер күніне» орай, облыстық денсаулық сақтау басқармасының ұйымдастыруымен«Достық үйiнде» мерекелік шара болып өтті.Салтанатты шараға облыстық денсаулық сақтау басқармасының басшысы Искаков Олжас Ермекұлы және медицина ұйымдарының бас дәрігерлері мен өңірдің барша мейіргерлері қатысты.Алдымен аймақтың бас дәрігері Олжас Ермекұлы барша мейіргерлерді төл мерекелерімен құттықтап, өзінің жүрекжарды лебізін білдірді.Аймақтың бас дәрігері өз құттықтау сөзінде «Дертке шипа, денге саулық сыйлайтын барша мейірімді маман иелерін бүгінгі кәсіби мерекелерімен шын жүректен құттықтаймын!Осы ретте өңір халқының денсаулығын жақсарту бағытында аянбай еңбек етіп жүрген барша мейіргерлерге зор ризашылығымды білдіремін.Ұлт саулығы - мемлекеттің негізгі капиталы десек, сол баға жетпес қазынаны қызғыштай қорып жүрген Сіздердің еңбектеріңіз қашанда жоғары бағаланады.Мереке тұсында баршаңызға мықты денсаулық, қажымас қайрат, отбасыларыңызға амандық, құт-береке тілеймін!Ел игілігі жолындағы еңбектеріңіз әрқашан нәтижелі болсын», - деп ізгі лебізін білдірді.Одан соң бірқатар саламызға еңбегін сіңірген білікті маман иелерін Қазақстан Республикасы Денсаулық сақтау министрлігінің «Денсаулық сақтау ісінің үздігі», «Денсаулық сақтау ісіне қосқан үлесі үшін» төсбелгісімен, ҚР Денсаулық сақтау министрлігінің «Құрмет» грамотасы, «Алғыс хатымен», облыс, қала әкімінің «Алғыс хаты», «Амаnат» партиясының Қызылорда облыстық филиалының «Алғыс хаты», Қазақстан Республикасының жедел медициналық жәрдем қауыдастығының «Үздік қызметкер» төсбелгісі, «Мейірбике ісіне қосқан үлесі үшін» Мейіргерлер ісі ассоциациясының медалі, «SENIM» Денсаулық сақтау жүйесі жұмыскерлерінің салалық кәсіптік одағы» Республикалық қоғамдық бірлестігінің «Кәсіподақ ұйымының үздігі» төсбелгісі, «SENIM» Денсаулық сақтау жүйесі жұмыскерлерінің салалық кәсіптік одағы» қоғамдық бірлестігінің «Құрмет» грамотасы, «Алғыс» хатымен және «12 мамыр – Халықаралық Мейірбикелер күні» кәсіби мерекесіне орай өткізілген «Үздік маман - 2024» кәсіби конкурсының үздіктері сертификаттармен марапатталды.Мерекелік шара одан әрі концерттік бағдарламаға ұласты.Халықтың денсаулығы жолындағы күресте облыс халқына бүгінде 11335 жуық орта буын мамандары қызмет көрсетеді.

Мәңгілік мейiрiмнiң символы - мейіргер

<a href="https://kyzylorda-news.kz/">Kyzylorda-news.kz.</a> Сырдариялық қыз-келіншектердің сырласына айналған меббике Гүлзина Ақжайларованы өз ісінің білгірі ретінде жақсы білеміз. Қай кезде де, ақжарқын, жайдарлы мінезімен адам көңіліне шуақ сыйлайтын сала маманын әріптестері ерекше құрметтейді.Шындығында, Гүлзина Серікбайқызының еңбек жолы «Жан сақтау» бөлімшесінде басталып, «Гинекология» бөлімшесінде жалғасын тапты. 2008 жылдан бері аталған бөлімшенің аға аяжаны қызметін атқаруда. Басшылық тарапынан келіп түскен әрбір тапсырманы мүлтікісіз орындайтын сала маманы – өз жұмысына мығым саналады. Ол – 1997-2000 жылдары арасында Қызылорда қаласындағы медицина колледжінде білім алады.– Ел болашағына бей-жай қарамайтын баланы дүиеге әкелетін ана денсаулығы – қашанда басты назарымызда. Дәрігерлермен кеңесіп, олардың тағайындаған емін сапалы жүргізуге тырысамыз. Бүгінде нәзік жандылар күйбең тірліктің жетегінде жүріп, өз денсаулығына немқұрайлы қарайды. Сондықтан әрбір ананың денсаулығына қатысты сан түрлі фактордың орын алуы – жағдайыды күрделі етері анық. Осыған дейінгі қызметімізге көпшілік қанық. «Бір қолымен әлемді, бір қолымен бесікті тербеткен» аяулы жандардың амандығын тілейміз, – деді сала маманы.Айта кетейік, Гүлзина Серікбайқызы жолдасы Серікбол Баймаханмен бірге 2 бойжеткеннің ата-анасы атанып отыр.

Гүлзина Серікбайқызы: Ана денсаулығы – басты назарда

<a href="https://kyzylorda-news.kz/">Kyzylorda-news.kz.</a> Соңғы 18 жылда Сырдария аудандық ауруханасына қарасты «Балалар» бөлімшесінде ем алған әрбір бүлдіршін мен жеткіншек тәжірибелі медбике Шарапат Айтанның мейірімді шапағатын көргені мәлім. Үнемі шапшаң қимылымен жұмысты ұтымды үйлестіре білетін сала маманы – көптеген ата-ананың алғысын арқалаған.Негізінен, Шарапат Шайзадақызы Ақжарма ауылында 1970 жылы дүниеге келген. Ауылдағы мектептен білім алған ол – мейіргерлік мамандықты киелі Түркістан қаласындағы оқу орнынан меңгерген. Ең алғаш еңбек кітапшасына «Жан сақтау» бөлімшесінің медбикесі деген басшылықтың пәрмені таңбаланады. Міне, 1992 жылдан бері білікті медбике аудан медицинасында абырой биігінен көрінуде.<blockquote>– Шын мәнінде, бала денсаулығына байланысты көптеген тұжырым бар. Сәби күнінен аурушаң келетін науқасқа күтім жасауда ұқыптылық керек. Жауапкершілікті сезінген адам бала күтіміне бей-жай қарамайды. Бұл ретте, кәсіби мереке қарсаңында барша әріптесті қуанышты сәтпен құттықтаймын! Ұжымда тек жақсылық атаулы көп болып, өскелең ұрпақ ауырмаса екен, – деді сала маманы.</blockquote>Жалпы, Шарапат Айтан 1993 жылы ауыл шаруашылығы саласының маманы Есенкелді Маханбетжановқа тұрмысқа шыққан. Бүгінде ерлі-зайыптының 4 перзенті жоғарғы білім алып, ата-ана үмітін ақтауда.

Мейірім-шапағаты – балаға

<a href="https://kyzylorda-news.kz/">Kyzylorda-news.kz.</a> Сырдария аудандық ауруханасының бас дәрігері Жалғасбек Үсенов «12 мамыр – Халықаралық медбикелер күні» қарсаңында сала ардагерлерін кәсіби мерекемен құттықтады.Талай жыл емдеу мекемелерінде табан аудармастан еңбек ете білген бірнеше ардагердің қарашаңырағына барған бас дәрігер аяулы жандарға зор ілтипат көрсетті. Әрине, жылдар бойы науқастың жанынан табылып, қажыр-қайратымен танылған медбикелер бар құрметке лайық. Бұл ретте, саланың қыр-сырына қаныққан ардақты жандар жұмыс барысындағы орын алған оқиғаларымен, есті естелігімен бөлісті. Ізінен ерген жастарға ақылын айтты. Салалық кәсіподақ ұйымының төрағасы Серік Маханбетов, білікті дәрігер Сара Ермағанбетова ардагерлерге амандық-саулық тіледі. Мереке мезіретін сезінген ардагерлерге сый-сияпат ұсынылды.<blockquote>– Біз қашанда ардақты ардагерлерімізді құрмет тұта білуіміз керек. Мереке аясында аяулы жандарды мерейлі сәтімен құттықтап, ақ батасын алу – негізгі мақсатымыз. Осы ретте, сала ардагерлері қызмет еткен жылдары халық денсаулығын жақсартуға бағытталған тәжірибелерімен бөлісті. Медицинаның әр саласында қолтаңбасы қалған жандарға айтар алғысымыз шексіз, – деді бас дәрігер.</blockquote>

Сала ардагерлері мереке мезіретін сезінді

<a href="https://kyzylorda-news.kz/">Kyzylorda-news.kz</a> Күн жылт етіп жылынып, көктем шыға бастасымен аса қауіпті жұқпалы аурулар тобына жататын Конго-Қырым геморрагиялық қызбасы ауруының эпидемиологиялық маусымы да келеді. Яғни, осы кезде табиғатта кенелер саны тез көбейіп, олардың ішіндегі ауру тасымалдаушы кенелер адам денсаулығына қауіп туғызады. Олар кеміргіштердің індерінен жер бетіне шығып, жануарлар &nbsp;мен адамдарға шабуыл жасай бастайды.Адамдарға бұл вирус кененің тікелей шағуы, малдарды кенеден қолмен тазарту, жүнін қырқу кезінде және Конго-Қырым геморрагиялық қызбасымен ауырған адамды күту барысында жұғады. Конго-Қырым геморрагиялық қызбасы ауруы немесе көкала – табиғи ошақтық аса қауіпті жұқпалы вирусты инфекция. Бұл аурудың аса қауіптілігі өлім-жітім көрсеткішінің өте жоғары болуында – 30-70 пайыз аралығында. Ауруды қоздырушы вирустың табиғат пен жануарлар арасында айналысқа түсуіне байланысты медицинада қазіргі таңда ауруды мүлде жойып жіберу мүмкін болмай отыр. Алдын алатын вакцина да жоқ .Қазалы ауданының халқы негізінен, мал шаруашылығымен шұғылданатындықтан, Конго-Қырым геморрагиялық қызбасының табиғи ошақтары бар елді-мекендерде аурудың кездесу ықтималдығы да өте жоғары болып саналады.<blockquote>– Кене шаққанда өзінің сілекейімен арнайы фермент бөледі. Сол себепті көпшілік жағдайда кененің шаққаны білінбейді. Денеге жабысқан кенені байқаған кезде жақын орналасқан емхана немесе ауруханаға медкөмекке жүгіну керек. Қорғалмаған қолмен кенені ұстау қауіпті екенін есте сақтаңыз. Кенені жалаң қолмен және бірден жұлып алуға болмайды, өйткені, кененің тұмсығы қалып қойып, орны іріңдеп, жара болуы мүмкін. Дүниежүзілік денсаулық сақтау ұйымының ұсынысы бойынша, кенені қарапайым медициналық қысқышпен немесе резина қолғап киіп, тұмсығына жақын жай қысып ұстап, шайқамай, бұрамай тарту керек, езіп алмау керек. Ал, қысқыш болмаған жағдайда қарапайым жіппен тұмсығының түбінен орап, жәймендеп, тартып алу керек . Шаққан орнын иод ерітіндісімен немесе спиртпен залалсыздандыру қажет. Кенені шыны ыдысқа салып, медициналық мекемеге өзімен бірге апару керек немесе Ұлттық сараптама орталығының Қызылорда облыстық филиалына тапсырып, ақылы түрде зерттеуге болады, – дейді ҚР ДСМ СЭБК «Ұлттық сараптама орталығы» ШЖҚ РМК Қызылорда облысы бойынша филиалының Қазалы аудандық санэпидемиологиялық қызмет маманы П.Әбдиева.</blockquote>Бүгінгі күні Қазалы ауданы бойынша белсенді табиғи ошақтары бар елді-мекендерде &nbsp;осы аурудың алдын-алу шаралары жыл сайын жүйелі түрде қолға алынуда. Конго-Қырым геморрагиялық қызбасына қолайсыз елді-мекендерде мал бастарына және малдың қора-жайларына кенеге қарсы өңдеу жүргізіліп, сондай-ақ, Конго-Қырым геморрагиялық қызбасы бойынша қолайсыз елдi-мекендердiң айналасына санитариялық-қорғау аймақтарын құру арқылы жүзеге асырылуда.Конго-Қырым геморрагиялық қызбасы ауруының алдын-алу мақсатында атқарылатын басты іс-шаралар &nbsp;мыналар болып табылады: біріншіден, вирусты кенеден адамға жұқтырмау шарасы, оған кене шақпау үшін сақтандыру киімін қолдану (жеңі ұзын жейде, шалбар); кенені тез табылуға көмек беретін ақшыл түсті киімді кию; кенеге қарсы препаратты қолдану; кененің бар екенін тексеріп өзді-өздерін қарау; малдардың кенеленбеуін қарастыру, кенеге қарсы препараттарды қолдану; кенесі көп аудандарға кенелердің өте белсенділігі кезінде негізсіз бармау шаралары.Екіншіден, малдан адамға жұқтырмау шараларын қарастыру, оған жануарларға күтім жасағанда (баққан, сауған кезде және тағы басқа), жануарларды мүшелеген, сойған, тасымалдаған және өткізген кезде олардың қанымен, терісімен, ұлпаларымен жанасқанда сақтандыру киімдерін пайдалану.Үшіншіден, адамнан адамға жұғу қаупін азайту, оған науқаспен қатынаста болған жеке адамдардың және медицина қызметкерлері тарапынан жұтырмау шаралары қарастыру, ауру күткенде арнайы медициналық киімдерді пайдалану, жеке басының гигиенасын сақтау болып табылады. Кене шағып алғанда немесе кенемен жанасқанда, жануарларға күтім жасағандажануарларды мүшелеген, сойған, тасымалдаған және өткізген кезде олардың қанымен, терісімен, ұлпаларымен жанасқанда, ашық аумақта болғанда, қансыраған науқас адаммен жанасқанда ауру жұқтыру қаупі көбейеді.Ал, егер жоғарыда көрсетілген жағдайдан кейін адам өз-өзін нашар сезінгенде және дененің қызуы көтерілгенде, кем дегенде бас және бұлшық еттер ауырғанда, жүрек айнығанда, лоқсу сезімі пайда болғанда, іш ауырғанда, немесе іш өткенде, яғни, аурудың алғашқы белгілері кезінде дереу медицина мекемелеріне қаралуы қажет.Алдын алсаңыз, аурудың да, қаупі азаяды. Сондықтан сақтанып жүрейік дегенді алға тартады ҚР ДСМ СЭБК «Ұлттық сараптама орталығы» ШЖҚ РМК Қызылорда облысы бойынша филиалының Қазалы аудандық санэпидемиологиялық қызмет маманы П.Әбдиева.Фото: freepik.com

Қазалы: Конго-қырым геморрагиялық қызбасы ауруының алдын алу шаралары жалғасуда

<a href="https://kyzylorda-news.kz/">Kyzylorda-news.kz</a> Сырдария аудандық ауруханасында «12 мамыр – Халықаралық медбикелер күні» шеңберінде «Менің мамандығым – менің мақтанышым» тақырыбында «Үздік мейіргер – 2024» аудандық байқауы өткізілді. Негізінен, сайыс 3 кезеңнен тұрды.Сала қызметкерлерінің кәсіби біліктілігін шыңдау мақсатында жүзеге асырылған сайыста мейіргерлер алғашқы кезеңде өздерін таныстырды. Сондай-ақ екінші кезеңде портфолио бойынша бағалау жұмысы жүргізілді. Ал үшінші кезеңде оларға арнайы медицина саласықатысты жан-жақты сауал қойылып, тапсырмалар жүктелді.Сайыста «Жан сақтау» бөлімшесінің медағасы Абылай Сәбитов, «Қабылдау бөлімшесінің медбикесі Гүлжан Исмалова, «Терапия» бөлімшесінің медбикесі Таңшолпан Байтүгілова, «Оңалту және паллиативтік көмек» бөлімшесінің мебдикесі Әйгерім Майрашова, «Жалпы тәжірибелік» бөлімнің медбикесі Айдана Жақсылықова, «Профилактика» бөлімшесінің медбикесі Алтынай Ибрагим, «Жұқпалы аурулар» бөлімшесінің медбикесі Ақмарал Мырзабекова бақ сынады. Олардың кәсіби біліктілігіне бас дәрігердің БМСК жөніндегі орынбасары Жанар Жұмабаева, бас дәрігердің емдеу ісі жөніндегі орынбасары Еркін Жаңабайұлы, эпидемиолог-дәрігер Гүлзат Баджанова, акушер-гинеколог Маралхан Ноғайбекова, бас мейіргер Райса Анасова, мейірбике ісінің сарапшысы Нұргүл Мұхамеджан төрелік етті.Әділ қазылар шешімімен жүлделі І орынды Абылай Сәбитов, ІІ орынды Әйгерім Майрашова, ІІІ орынды Айдана Жақсылықова еншіледі. Сырдария аудандық ауруханасының бас дәрігері Жалғасбек Үсенов сала мамандарын марапаттап, бағалы сыйлықтар тапсырды.

Мереке қарсаңында мейіргерлер сайысқа түсті

<a href="https://kyzylorda-news.kz/">Kyzylorda-news.kz.</a> Мейірбике ісі – медицина саласында өзіндік орны бар ерекше мамандық болып саналады. Жанына шипа іздеп келген науқастың дәрігерден кейін ем-домын жасайтын олардың еңбегі қашанда өлшеусіз. Осындай мерейлі мамандық иесінің бірі, 12 жылдық еңбек өтілі бар Қызылорда облыстық онкология орталығының госпитальді фармация бөлімшесінің аға мейіргері -Айтмұратова Арайлым Оспанқызы.Қызылорда қаласында дүниеге келген Арайлымның мейірбике болу бала күнгі арманы еді. Ол 2008 жылы мектеп бітіргеннен соң жоғары медицина колледжіне оқуға түсіп, осы оқу ордасын «мейіргер ісі» мамандығы бойынша тәмамдайды. Ал алғашқы еңбек жолын 2012 жылы №1 қалалық емханада «Егу бөлмесінің» мейіргерлік қызметінен бастайды. Бұдан кейін кейіпкеріміз 2019 жылы облыстық онкология орталығының «кеңес беру» бөлімінде, химиотерапия бөлімінің ішіндегі «химия еріту» бөлімінде қызмет атқарады.Жауапкершілігі зор қызметті атқара жүрсе де алдына мақсат қоя білген Арайлым Оспанқызы білім жетілдіруді көздейд. Осы мақсатта 2019 жылдар аралығында Қызылорда жоғарғы медицина колледжінде оқуға тапсырып, 2021 жылы бакалавр дәрежесін алады. Ал 2023 жылы «Госпитальді фармация бөліміне» ауыстырылып, аға мейіргер міндеттін атқарып келеді.Бүгінде ел алғысына бөленіп, өзіне міндеттелген жауапкершілікті абыроймен атқарып жүрген кейіпкеріміз аймақ медицинасында өзіндік орны бар мейірбике.

Ісіне адал Арайлым

<a href="https://kyzylorda-news.kz/">Kyzylorda-news.kz.</a> Медбике, мейірбике, мейіргер... Қалай атаса да – ол науқасқа мейірімін төгуші болып қалады. Медбике науқастың емделу барысындағы жай-күйін бақылайды. Сондықтанда мейірбикелік күтім маманның кәсіби дайындығын, оның науқасқа қамқоршы болуын міндеттейді. Бір сөзбен айтқанда, мейірбике – мерейлі мамандық.Әрбір берген дәріні «ем болсын» деп табыстап, науқасқа күлімдеп тұрып, көмек көрсетіп, еммен ғана емес, сөзбен де шуақ сыйлай білу – нағыз кәсіби медбикенің ісі, сондай мерейлі медбикенің бірі – Косыгина Лидия Маратқызы.Косыгина Лидия Маратқызы 1979 жылы 28 тамызда Қызылорда қаласында дүние келген. Қызылорда медициналық колледжіне 1996 жылы түсіп «Мебдике ісі» мамандығын бітіріп шыққан. Еңбек жолын 2001 жылы психоневралогиялық ауруханада мебдике қызметінен бастаған ол 2009 жылы қалалық ауруханада қызмет етті. Кейін 2012 жылдары «Сенім» емханасында мейірбике қызметін атқарып, 2018 жылы облыстық онкология орталығының паллиативті күтім бөліміне ауыстырылып бүгінгі күнге дейін ұжымда абыроймен қызмет атқарып келеді.Дәрігер науқасты тексеріп, тағайындауын жазып берген соң, әрі қарай бар жұмысты медбике орындайды. Егуін жасайды, дәрісін уақытылы береді, төсек-орын, ас-ауқаты, хал-ахуалын күні-түні бақылап, науқасқа қарайтын Косыгина Лидия – бұл қызметті де тез меңгеріп, дертіне шипа іздеп келген жандарға өз көмегін аямай жасап, алғысына бөленіп келеді.Бүгінде 24 жылға жуық бір салада еңбек етіп келе жатқан кейіпкеріміздің жетістіктері де бір төбе. Ол бірнеше рет салалық басшылық тарапынан және аудандық, облыстық марапаттар мен алғыс хат иегері. Өз ісіне жауапкершілікпен қарайтын Лидия Маратқызының әріптестірінің арасындағы беделі де биік.Бала кезден медицина саласында еңбек етуді армандаған ол өз ісінің маманы. Дертіне дауа іздеген жандардың сүйікті мейірбикесі.

Мерейлі мамандық иесі - Лидия

Жыл сайын мамыр айының 12-інші жұл­­ды­зында халық­аралық мейірбикелер күні ата­лып өті­леді.&nbsp;Бүгін дәрі­гер­дің се­німді се­рігі болған мед­бике жайлы қалам тербемекпіз.&nbsp;<a href="https://kyzylorda-news.kz/">Kyzylorda-news.kz.</a> Менің кейіпкерім Алтынкүл Тасбергенова 38 жыл маңызы мен жауапкершілігі мол медицина саласында аянбай еңбек етіп келе жатқан тәжірибелі мейірбике. Осынша жыл Асқар Тоқмағанбетов ауылының тұрғындарына қалтқысыз қызмет етіп келе жатқан ол адамның басты байлығы – денсаулық екенін айтады.Бала кезінен адам жанының жанашыры болып, ақ халат киюді армандаған Алтынкүл Смағұлқызы 1963 жылы Шаған ауы­лында дүниеге келген. Гиппократ антына адал мейірбике 1980 жылы №37 мектепті тәмәмдайды. Мектеп бітірген соң үш жыл құрылыс саласында «Жастар бригадасында» жұмыс жасайды. Бала күнгі арманының орындалу жолында 1983 жылы Қызылорда қаласындағы медициналық колледжге акушерка мамандығына түседі.<blockquote>– Алғашқы еңбек жолымды 1986 жылдан бастап ауданға қарасты Іңкәрдария ауылында акушерка болып бастадым. Сонан кейін төрт айдан соң Асқар Тоқмағанбетов ауылына ауыстырды. 2001 жылдан бастап жалпы тәжірибелі мейірбике болып жұмыс жасап келемін. Өмірлік жолдасым Нұрлан Бәйтәжиевті осы ауылдан жолықтырып, бірге шаңырақ көтердік. Бүгінде 3 баланың анасымын. Отбасымыздың тірегі, балаларымның әкесі ерте өмірден қайтты. Мен үшін ауыр соққы болды. Бірақ балаларымның келешегі үшін өз-өзімді қолға алдым, – дейді инесімен талай жанның дертіне дауа, еміне шипа сыйлаған медбике А.Тасбергенова.</blockquote>Бүгінде жергілікті халықтың денсаулығына алаңдап жүретін мейірімді мейірбикеге ауыл тұрғындары ұдайы алғыстарын білдіріп жатады. Алғыс арқалаған аяжанның еңбегі еленіп, әр жылдары арнайы марапатқа ие болды. Атап айтар болсақ, Қызылорда облысы әкімінің «Алғыс хатымен», Сырдария ауданы әкімінің «Алғыс хатымен», ауыл әкімінің «Алғыс хатымен» марапатталуы – ақ халатты абзал жанның адал қызметінің жемісі.<blockquote>– Жауапкершілігі мол саланың қызық­шылығымен қатар өзіндік қиындығы бар. Акушерка болып жүрген жылдары бір әйелді үйден босандырып алған кезім әлі есімнен кетпейді. Ол кезде қыс мезгілі болатын. Күн қатты аяз, жер тайғақ, көлігіміз күннің суығынан оталмай қалған болатын. Сол кезде ана мен баланың денсаулығына алаңдап, қорқыныш сезімі бойымды билеп алған болатын. Аллаға шүкір, ана мен баланы аудандық перзентханаға аман-есен жеткіздік. Халыққа қалтқысыз қызмет көрсету, антқа адал болу біздің адами және қызметтік парызымыз, – дейді өз ісінің майталман маманы.</blockquote>Дертіне шипа іздеген нау­қастың ден­саулығына дә­рігермен бір­дей жауап­кершілікпен қарайтын ден­саулық жана­шырының бірі – мейірбике екені даусыз. Өз ісінің маманы, талай жанның дертіне шипа бола білген Алтынкүл Тасбергенованы жұмысына сәттілік тілеп, мерекесімен құттықтаймыз!

Мейірімді медбике

<a href="https://kyzylorda-news.kz/">Kyzylorda-news.kz.</a> Денсаулық сақтау саласында 42 жылдан бері қызмет етіп, антына адалдық танытқан медбике – Маралкүл Қожақ. &nbsp;Денсаулық сақшысы ұзақ жыл саланың ауыр жүгін арқалап, бүгінде зейнет демалысына абыроймен жетіп отыр. Тәжірибелі медбике осынау жылдар аралығында міндеттелген жұмысына жауапкершілікпен қарап, абыройға кенелді.Адам жанының арашашысы, денсаулық сақтау ісіне төзімділік танытқан медбике Маралкүл Өмірзаққызы Арал ауданы Мергенжай ауылының тумасы. Ауыл мектебін бітірген соң Қызылорда қаласындағы медициналық колледжге оқуға түсіп, медбике мамандығын алған соң, 1982 жылы Сырдария ауданындағы ауруханада еңбек жолын бастады. Тіркеу орынында медбике болып, әрбір құжаттың дұрыс толтырылуына жауапкершілікпен қарады.<blockquote>– Алғашқы еңбек жолым басталғанда медбике қызметіне деген жауапкершілікті сезіндім. Былайынша сырт көзге қиын жұмыс екені білінбейді. Бірақ медбике науқастың денсаулығына дәрігерден кем жауап бермейтінін түсіндім. Медбикелер дәрігер тағайындаған ем-шараны жасайды, дәрісін уақытылы береді, күні-түні бақылауда ұстап, сауығуына жәрдемдеседі. Осындай жауапты жұмысты медбике бар ынтасымен атқарғанда ғана абыройға, алғысқа кенеледі, – дейді кейіпкеріміз.</blockquote>Өмірін денсаулық сақтау саласына арнаған медбике кенттегі №1 балабақшада он жыл қызмет етті. Сонан соң тәжірибесі толысқан медбике ең күрделі де, жауапты жұмыс аймақтық бала­лар мейірбикесі қызметін де абыроймен атқарды.Бүгінде медбике белгіленген учаскесіндегі жаңа туған сәбиден бастап, жас жеткіншектердің аты-жөндерін жақсы білсе, тұрғындарда өз медбикесімен тығыз байланыста болады. Қалып­тасқан дағдымен балаларды уақытылы егу науқанына шақыруды тыңғылықты атқарып, балалар арасындағы аурудың алдын алу бойынша үй аралауға жауапкершілікпен қарады. Білікті маман осы күні емханада тіркеу орнының медбикесі қызметінен зейнеткерлікке шығып отыр. Емханаға келген әрбір науқастың дәрігерге көрінуіне және сауығып кетуіне атсалысқанын айту керек.&nbsp;<blockquote>– Халықпен жұмыс істеу қызық, әрі қиын. Бұрын жаппай екпе алуға шақырғанда аналар емханаға ағылатын. Қазір жас ата-аналар баласына екпе салғызуға асықпайды. Сондықтан біздер екпенің қажет екенін айтып, үй-үйді аралап түсіндіреміз. Бұл жауапкершілігі жоғары жұмыс. Өзім таңдап, жүрек қалауыммен келген қызметіме адалдық танытып, абыройға, алғысқа кенелдім. Медбикенің жұмысының арғы жағында тұрғындардың денсаулығы, тағыдыры, өмірі тұр. Сондықтан бейқамдық танытуға болмайды. Мамандыққа деген адалдық бірінші орында. Ұзақ жылдан бері денсаулық сақтау саласында еңбек етіп, зейнетке жеткеніме қуаныштымын. Әріптестеріме алғыс айтамын, жас мамандарға да біздің жолымызды беріп, халық денсаулығын сақтауға үлесін қоса беруіне тілекшімін, – дейді абыроймен зейнет демалысына шыққан Маралкүл Өмірзаққызы.</blockquote>Еңбегінен қуаныш пен бақыт таба білген мейірімді медбике Маралкүл апа жұбайы Ғабдуллинмен бірге Фархад пен Феруза есімді ұл-қыз өсірді. 3 немеренің ата-әжесі атанды. Феруза анасының жолын жалғастырып, Қызылорда қаласындағы №4 емханада аймақтық медбике болып қызмет атқарады.Ауырып келген науқас жанды риясыз көңілмен, мейірімді жүрекпен қарсы алып, алғаусыз алғыс алған ақ халатты абзал жан осылайша құрмет төріне шығып, биікке жетті.

Маралкүл Қожақ: Халықпен жұмыс істеу қызық, әрі қиын 

<a href="https://kyzylorda-news.kz/">Kyzylorda-news.kz.</a> Бас ауырып, балтыр сыздаған мезетте ақ халатты абзал жандардың көмегіне зәру болып, дертімізге шипа іздеп, аурухана жағалап кететініміз белгілі. Осы тұста адам жанына араша түсіп, науқастың денсаулығына дәрігерден артық қарамаса кем қарамайтын денсаулық жанашырлары – медбикелердің еңбегі өлшеусіз. «Денсаулық – зор байлық, адам бақытының бастауы» деген дана халқымыз әу бастан-ақ денсаулықтың қадірін жақсы білген.Зинарап Сейделова – Сырдария аудандық ауруханасының гинекология бөлімшесінің тәжірибелі мейірбикесі. Шеберлігі мен білімін қатар ұштастыра білген білікті маман – Сәкен Сейфуллин ауылының тумасы. 1966 жылдың 9 сәуірінде дүниеге келген ол С.Сейфуллин ауылдық округіндегі №137 орта мектепте білім алып, 1981 жылы ойдағыдай тәмәмдаған. Зинарап Тынымқызы жауапты саланың қыр-сырын меңгерген маманның бірі. Ауызбіршілігі мол, өнегелі әрі толыққанды отбасында тәрбиеленіп өскен медбикенің салаға деген қызығушылығы бала кезінен басталған. Осы саланың қыр-сырын меңгеруді және болашақта білікті маман болуды сол кезден бастап арман еткен. Асқақ арманына жетелеп, бір қадам жақындап Зинарап Сейделова 1981 жылы Түркістан қаласындағы медициналық училищеге оқуға түседі. Бала күнгі аңсаған асқақ арманы мен ата-анасының үмітін ақтай білген ол 1985 жылы «фельдшер» мамандығын меңгеріп шығады.Мәртебелі мамандық иесі өзінің жұмысына үлкен жауапкершілікпен қарайды. Адалдық пен тазалықты жанына ту еткен медбике алғашқы еңбек жолын 1985 жылы Қызылорда қалалық ауруханасының «Жан сақтау» бөлімшесінің мейірбикесі болып бас­тап күні бүгінге дейін медицина саласында абыройлы еңбек етіп келеді. Өз ісінің білікті маманы өзі жұмыс істейтін іргелі ұжымдағы әріптестерінің ортасында сыйлы да құрметті. Кейіпкеріміз 1987 жылы Сырдария аудандық ауруханасының терапия бөлімшесіне кезекші мейірбике болып орналасып тәжірибе жинақтап, кейіннен 1996 жылы гинекология бөлімшесіне ауысады. Міне сол уақыттан қазірге дейін осы бөлімшенің ыстығында да суығында да адал еңбек етіп келеді. Зинарап Тынымқызының мерейлі медбике қызметін атқарып, халық игілігі үшін уақытпен санаспай еңбек етіп келе жатқанына биыл 39 жыл. Өз ісіне үлкен жауапкершілікпен қарайтын кейіпкеріміз қызметтік саласы мен отбасындағы міндеттерін қатар үйлестіріп, алып жүрген жанның бірі.Мейірбан медбике Зинарап Сейделова өмірлік жарымен бірге 2 ұл, 1 қыз тәрбиелеп өсіріп, қазіргі таңда 4 немеренің қызығына тоймай бағып-қағып отырған бақытты ата-әже. Халық игілігі үшін игілікті іс атқарып жүрген білікті маман бүгінде аудан халқының ыстық ықыласына бөленіп келеді.<blockquote>– Бір қарағанда сырт көзге медбике қызметі аса ауыр болып көрінбейді. Алайда медбике науқастың денсаулығы мен өміріне дәрігерден кем жауап бермейді. Дәрігер науқасты тексеріп, тағайындау жазып бергеннен кейін, әрмен қарай бар жұмысты мейірбике атқарады. Екпе егіп, уақытылы дәрісін беріп, науқастың жағдайын күні түні бақылауда ұстайтын – медбикелер. «Батпандап кірген ауру мысқалдап шығады», – деп дана халқымыз текке айтпаса керек. Себебі батпандап кірген індет адамға тез жабысып, құлан-таза айыққанға дейін біраз табандап жатып алады. Өмір болған соң қызмет барысында түрлі адам кездеседі. Ауруханаға жанына дауа іздеп келген әрбір науқаспен дұрыс байланыс орнатып, қалай сөйлесу керектігін білу маңызды. Жанына шипа іздеген жанның денсаулығына дәрігерден кем қарамайтын денсаулық жанашырлары саналатын медбикенің арқалаған жүгі ауыр, атқарар рөлі зор, міндеттелген жұмысы көп. Қажырлы еңбек етіп, игілікті іс атқарып жүрген әріптестерім – медбикелер бар құрметке лайық деп ойлаймын, – дейді кейіпкеріміз.</blockquote>39 жыл аталған салада абыроймен қызмет етіп келе жатқан медбикенің еңбегі бағаланып аудан, облыс көлемінде Құрмет грамоталарымен, алғыс хаттармен марапатталған. Мейірбике еңбегінің жемісін күнде көріп отырады деуге болады. Себебі ауруынан сауығып, ауруханадан шығып бара жатқан жандардың жүректен шыққан жылы сөздері мен ыстық лебіздері олар үшін кез келген марапаттан артық екені сөзсіз.Жүгі ауыр, жауапкершілігі мол салада қалтқысыз қызмет етіп, мейірімділік пен жылылықтың символына айналып, игі қызмет жасап жүрген медбике ісі қай кезде де сый-құрметке лайықты. Себебі, әрбір жанға көмек көрсетуде дәрігермен қоса, медбикенің атқарар рөлі зор екенін тағы айтып өткеніміз жөн. Мейірбике мамандары денсаулық сақтау ісінің ажырамас бір бөлігі. Кәсіби мереке қарсаңында денсаулық жаршысына айналған мерейлі маман иелерін келіп жеткен төл мерекесімен шын жүректен құттықтап, жұмысына табыс тілейміз.

Зинарап Сейделова: Медбике науқастың денсаулығы мен өміріне дәрігерден кем жауап бермейді 

<a href="https://kyzylorda-news.kz/">Kyzylorda-news.kz.</a> Қашанда жүгі ауыр, жауапкершілігі мол салада еңбек етуге 20 жасында келген Жанат Сманова өзінен үлкендерге қарап бой түзеп келеді. Тереңөзек кентіне іргелес жатқан Асқар Тоқмағамбетов ауылында дүниеге келген жас маман осыдан 12 жыл бұрын Қызылорда медицина колледжін тәмамдайды.&nbsp;Алғашқы жылдары «Жұқпалы аурулар» бөлімшесіне жұмысқа қабылданған Жанат Әнуарбекқызы аға аяжан ретінде өзі қалаған мамандықтың ыстық-суығына көндігеді. Ұжымның жұмысын ыждағаттылықпен атқарып, қоғамдық қызметте де, белсенділік танытады. Сала маманы 2020 жылы жаңадан ашылған «Амбулаториялық медициналық оңалту және қалпына келтіру емі» бөлімшесіне ауысады. Бүгінде аға аяжан атанған Жанат Әнуарбекқызы басшылық артқан сенім үдесінен шығуда.&nbsp;<blockquote>– Біздің бөлімшеде сала мамандары науқастарды сырқатына байланысты оңалтуға күш жұмсайды. Дәрігер жолдамасы негізінде сан түрлі ем-шараны қолданамыз. Наусқастар жан-жақты ем қабылдап, кәсіби біліктілігі жоғары әріптестерімнің көмегіне жүгінеді. Әрине, осындай жауапкершілігі мол жұмыста жетістікке жетуіме жолдасым мен балаларым қолдау көрсетіп отырады. Бұр ретте, нағыз көрінбейтін майданда жүретін медбикелерді мерекемен құттықтаймын, – дейді Жанат Сманова.</blockquote>

Қазақстан және Қызылорда облысының жаңалықтары: Денсаулық