<a href="https://kyzylorda-news.kz/">Kyzylorda-news.kz</a> Қызылордалық қыз-келіншектерге арналған «Level Up» білім бағдарламасына өтінім қабылдау басталды.&nbsp;Level Up − бұл STEAM (science, tech, engineering, art, math) бағыттары бойынша қыздарды қолдауға арналған Біріккен ұлттар ұйымы, Балалар қорының (ЮНИСЕФ) Қазақстандағы өкілдігі бағдарламасы аясында GameLab KBTU оқытушылары әзірлеген бағдарлама. Қатысушылар ойын дизайнЫ, әзірлеу және геймификация негізінде басты дағдыларға ие болады және нөлден бастап өз ойындарын жасауды үйренеді.Бағдарлама Kyzylorda Hub бизнес-инкубаторында орналасқан GameDev орталықтарында өтеді.Бұл бағдарламада:- Бейне ойын индустриясына шолу, ойындарды дамытудағы процестер мен рөлдер;- Ойын дизайны негіздері, күрделі ойындар мен геймификация, ойын қозғалтқыштары;- Толықтырылған және виртуалды шындық құру;- Midjourney және Chat GPT қолданбаларында бейне ойындар жасауға қатысты дағдылар үйретіледі. Өтінім беру 10 маусымға дейін жалғасады.Айта кетейік, &nbsp;Қызылорда өңірлік хабында ресми түрде «GameDev» орталығы ашылды. Онда ойын дамыту әлеміне еніп, шығармашылық идеяларды жүзеге асу мүмкіндігі қарастырылған. Алғашқы іс-шаралар ретінде ұйымдастырушылар орталық негізінде UNICEF және GameLab KBTU қолдауымен Level Up бағдарламасын іске қосуда.Бұл іс-шара өңірдегі қыз-келіншектерге арналған алғашқы курс емес. Бүгінге дейін бизнес-инкубатор &nbsp;«She Commerce» бағдарламасын ұйымдастырды. 12 семинардан тұратын тегін курс аясында қызылордалық қыздар «Google workplace» бағдарламасы, «Интернет саудадағы No Code әзірлеу», «Графикалық дизайн» секілді тақырыптар бойынша дағдыларын арттырды.&nbsp;«She Commerce» – Қазақстан аумағының барлық өңіріндегі нәзік жандарды ақпараттық технологиясы саласы бойынша оқыту, дағдыларын арттыру, кәсіпкерлікке баулу, түрлі қосымшалар мен маркетплейс әзірлеуге және цифрлық экономиканы үйретуге бағытталған бағдарлама. Тегін курс барысында 18 бен 30 жас аралығындағы жастар қамтылды.&nbsp;Сондай-ақ, Қорқыт ата атындағы Қызылорда университетінің Студенттер сарайында «Тechnowomen kyzylorda: keys to succeed» атты аймақтық форум өткенін хабарлаған болатынбыз. Форумды "TechnoWomen" коммерциялық емес ұйымы, кәсіпкерлік пен бизнес-ортаны дамыту жөніндегі USAID жобасы аясында ҚР Президенті жанындағы Әйелдер істері және отбасылық-демографиялық саясат жөніндегі Ұлттық комиссия және ҚР Ғылым және жоғары білім, өнеркәсіп және құрылыс министрліктері Қорқыт ата атындағы Қызылорда университетімен бірігіп ұйымдастырды.Іс-шара әйелдерді технологиялық индустрияларға тартуға, әйел кәсіпкерлерді цифрлық трансформация және электрондық коммерция, сондай-ақ, стартап-қозғалыс мәселелері бойынша ақпараттандыруға бағытталған шабыттандыратын шеберлік сыныптары мен білім беру тренингтерін ұйымдастыру мақсатын &nbsp;көздейді.Форумның кіріспе сөзін сөйлеген «TechnoWomen» ұйымының Басқарма төрағасы, «Цифрлық трансформация» қоғамдық қорының негізін қалаушы - Азиза Шужеева:<blockquote>«Бүгін біз жаңа мүмкіндіктер, жаңа иновациялар мен технологиялар туралы айтатын боламыз. Форумға қатысушы әйелдер қауымына қорықпай іс бастауға, жаңа &nbsp;идеяларды ортаға қою жолында белсенді болуға шақырамыз» - деді.&nbsp;</blockquote>Одан әрі Қорқыт ата атындағы Қызылорда университетінің Академиялық мәселелер бойынша Басқарма мүшесі – проректор Абдрашева Дана Мейрамқызы форумға қатысушылар мен спикерлерге келгендері үшін рақмет айтып, оқу орнының &nbsp;IT саласындағы базалық мүмкіндіктерін ауқымды баяндап берді. &nbsp;Спикерлер қатарынан орын алған &nbsp;Сеул Ұлттық Ғылым және технология университетінің профессоры, LUPIC жобасының директоры Джесу Ким жастарға арналған жасанды интеллект туралы ақпарат беріп өтсе, «MacDent» ЖШС IT-компаниясының бас директоры және негізін қалаушы Мақпал Оразқызы табысты стартаптың құру жолдарын түсіндірді.Өз кезегінде сөз алған Қазақ ұлттық қыздар педагогикалық университеті әйелдер көшбасшылығы және кәсіпкерлік орталығының басшысы Гүлзира Бекқалиеваның баяндамасы әйелдердің көшбасшылық дағдыларын дамытуға бағытталды. &nbsp;Сондай-ақ, «TechnoWomen» ұйымының Басқарма мүшелері Бикеш Құрманғалиева жасанды интеллект саласының болашақ мамандықтарына шолу жүргізсе, Алуа Көрпебаева бизнес бастауға қажетті қадамдарды мысалдармен түсіндірді. Аталмыш ұйымның мүшесі, «FORTENUR CONSULTING» негізін қалаушы-Нұргүл Бексұлтанова қаржылық сауаттылық жайлы кеңес берді. &nbsp;Қорқыт Ата атындағы Қызылорда университетінің Жасанды интеллект институтының директоры Нұрлан Құлмұрзаев пен Kyzylorda Hub бизнес-инкубаторының басшысы Жанарыс Тубекбаев та спикерлер қатарынан табылып, қызықты да пайдалы ақпараттармен бөлісті.Форумда танымдық ақпарат, қажетті кеңестермен қатар, қатысушылар арасында сұрақ-жауап ойыны ойнатылып, сыйлық таратылды.Бұл іс-шара аясында барлық өңір қамтылуда. Мәселен, елордада&nbsp;«TechnoWomen» КЕҰ ұйымдастыруымен «TechnoWomen Central ASIA: AI FUTURE» халықаралық форумы өтті.&nbsp;Форумның басты тақырыбы − жасанды интеллект. Форумда Орталық Азия елдерінде технологиялық тәуелсіздікке және ЖИ қолдануда көшбасшылыққа қол жеткізу бойынша сарапшылардың кәсіби салалық қоғамдастығын қалыптастыру мәселелері талқыланды. Сондай-ақ саланың бүгінгі жай-күйіне баға беріліп және жеке тұлғаның, бизнестің, отбасы мен қоғамның дамуына әсер ететін сын-қатерлері аталды, қазіргі заманғы міндеттерді тиімді шешу үшін технологияларды қолданудың үздік тәжірибелері сараланды.Халықаралық форумда IT саласында жүрген қыздар білімдері мен тәжірибелерін бөлісіп қана қоймай, бір-бірінен жаңа жобаларды, шешімдерді жүзеге асыруға мотивация ала алады. Шара аясында «TechnoWomen Leaders 2023» байқауының марапаттау рәсімі, «technowomen» мен «sulture Tech» жобаларының тәлімгерлік бағдарламасының тұсаукесері, шеберлік сыныптары өтті. Форум Цифрлық даму және аэрокомика өнеркәсібі министрлігінің, Халықаралық Электр байланысы одағының (МӘС), ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның және т.б. қолдауымен ұйымдастырылған.Ал Алматыда Satbayev University-де «TechnoWomen» тренингі ұйымдастырылды.&nbsp;Конференцияға 250-ден астам қыз, мектеп оқушылары мен студенттер, стартап-жобалардың негізін қалаушылар мен табысты бизнесвумендер келді.Ұйымдастырушылардың бірі «Techno Women» коммерциялық емес ұйымы цифрлық әлемде барлық қыздар мен әйелдерге жаңа мүмкіндіктер ашуүшін жұмыс істейді. Techno Women мақсаты – технологиялық индустрияларда жұмыс істейтін қыздар мен әйелдердің санын көбейту, Орталық Азиядағы әйелдер кәсіпкерлігін дамытуға және прогрессивті әйелдердің жаңа класын қалыптастыруға ықпал ету.«Techno Women» коммерциялық емес ұйымы 2022 жылғы 6 мамырда «Астана» халықаралық қаржы орталығында тіркелген. TECHNOWOMEN пайымы – қоғамның трансформациясына, гендерлік теңдікті, адал бәсекелестікті ілгерілетуге, озық технологияларды қолдануға, цифрлық мәдениетті дамытуға және жоғары білімді, рухани бай және әлеуметтік жауапты жаңа ұрпақты тәрбиелеуге ықпал ететін Орталық Азиядағы прогрессивті әйелдер қауымдастығының халықаралық желісін дамыту.Techno Women Миссиясы – цифрлық әлемде барлық қыздар мен әйелдерге жаңа мүмкіндіктер ашу, қоғамның трансформациясына, гендерлік теңдікті, адал бәсекелестікті ілгерілетуге, озық технологияларды қолдануға, цифрлық мәдениетті дамытуға және жоғары білімді, рухани бай және әлеуметтік жауапты жаңа ұрпақты тәрбиелеуге ықпал ететін Орталық Азиядағы прогрессивті әйелдер қауымдастығының Халықаралық желісін дамыту, технологиялық индустрияларда жұмыс істейтін қыздар мен әйелдердің санын көбейту, Орталық Азиядағы әйелдер кәсіпкерлігін дамытуға және прогрессивті әйелдердің жаңа класын қалыптастыруға ықпал ету. Бұл ұйым технологиялық салаларда жұмыс істейтін әйелдердің кәсіби қауымдастығын дамыту,&nbsp;қыздардың STEAM пәндерін, бағдарламалау, робототехника бойынша білім алуына ықпал ету және ғылыми қызметке тарту, әйелдердің жеке және кәсіби өсуін арттыруға бағытталған бағдарламалар мен жобаларды әзірлеу және іске асыру, технологиялық салаларда әйелдер start up қозғалысын дамытуға ықпал ету және қазақстандық жобаларды халықаралық деңгейде ілгерілету, әйелдерді цифрлық экономикада өзін-өзі жүзеге асыруға ынталандыру, сондай-ақ ғылым мен озық салаларда қыздар мен әйелдерді ілгерілету үшін ақпараттық-түсіндіру жұмыстарын жүргізу, ғылым мен технологиялық салаларда гендерлік теңдікке қол жеткізу үшін диалог алаңын құру, технологиялық индустрияларға инвестициялар тарту және Қазақстанда және шетелде әйелдер жобаларын көбейтуге ықпал етуде жұмыс істейді.«Techno Women» коммерциялық емес ұйымы IT, digital, телеком, жаңа &nbsp;медиа, Fintech, Edutech, Healthtech, Biotech, Ecotech, Nanotech, Robotics, ғарыш және басқа да жоғары технологиялық салаларда жұмыс істейтін әйелдерді біріктіреді, цифрлық әлемде барлық қыздар мен әйелдерге жаңа мүмкіндіктер ашу, технологиялық индустрияларда жұмыс істейтін қыздар мен әйелдердің санын көбейту, Орталық Азиядағы әйелдер кәсіпкерлігін дамытуға және прогрессивті әйелдердің жаңа класын қалыптастыруға ықпал етеді.&nbsp;А.Текебай Фото: Kyzylordа Hub орталығы

Қызылордада «Level Up» бағдарламасы іске қосылды

<a href="https://kyzylorda-news.kz/">Kyzylorda-news.kz</a> &nbsp; Ел Президенті Қасым-Жомарт Кемелұлы Тоқаев бүгінгі күнге дейін халыққа арнап алты Жолдау жариялаған болатын. Президент алғашқы Жолдауында «Шағын және орта бизнес – қала мен ауылды дамытудың төте жолы» десе, екінші Жолдауында «Кәсіпкерлікті дамытпай, бәсекеге қабілетті экономика құру мүмкін емес» деп атап өткен еді. Расында да шағын және орта кәсіпкерлік – ел дамуының негізі саналады.Тереңөзектік Айбол Смайлов бүгінде кәсіп­кер­лік саласына бетбұрыс жасап, «Терең­өзек сабыны» брендімен өнім өнді­руде. Ол – «Кірсабын шығаратын цех ашу» жобасы бойынша қайтарымсыз грант иеленген. Өз кәсібін былтыр бастаған азамат қазірдің өзінде тұрақты тұтынушылары қалыптасқанын, сұра­ныстың бар екенін айта кету керек.<blockquote>– Кәсіптен несібе табу оңай жұмыс еместігі мәлім. Алғашында қорқыныш та, жүрексіну де болды. Бірақ бизнес жоспарды әзірлей бастағанда көңілімізге сенім ұялады. Сөйтіп арнайы курс оқығаннан кейін жобамды комиссия алдында қорғадым. Нәтижесінде 1 380 000 теңге көле­мінде қайтарымсыз грант алып, оған қажетті техника мен шикізаттық өнім алған болатынмын. Атап айтқанда, кір сабын шығаруға арналған 1 аппарат пен сабынның пайыздық мөлшерін көрсететін мөр алуға мүмкіндік туды. Сонымен қатар перфоратор мен миксерді де қол­данамыз. Күніне 700-800 данаға дейін сабын өндіре аламыз. Өнімнің сыртында «Тереңөзек сабыны» деген жазу бар. Бұл тапсырыс берушілер мен тұрақты тұтынушыларға ұнады. Алдағы уақытта кәсіпті кеңейту, тың бағыт бойынша жаңашылдық енгізу ойда бар, – дейді Айбол Сағындықұлы.</blockquote>Кәсіпкер тапсырыстың басым көпшілігі жеке отбасылардан түсетінін айтады. Мұнан бөлек, бірқатар дүкенде де жергілікті өнім сатылуда. Алғашында мекеме, үй аралап, жарнамасын таныстырған кездері де болған. Кәсіпкердің сабынын алып, пайдаға жарат­қандардың айтуынша, сапасы жақсы және бағасы да қолжетімді екен. Көп көлемде тапсырыс бергендерге 170 теңгеден болса, даналап алатындарға 200 теңгеден сатылады.<blockquote>– Жергілікті өнім туралы әріптестерімнен естідім. Сатып алып, пайдаланып көрдім. Көңілімнен шықты. Негізі жергілікті кәсіп­керлердің жобасын, бастамасын қолда­ға­нымыз дұрыс. Ауданымызда кәсіптің басқа да түрлері кең қанат жайса деп ойлаймыз. Халқымызда «Кәсіп түбі – береке» деп бекер айтылмаған. Бизнес жоспарын әзірлеп, сәтті қорғап, қайтарымсыз грант иеленген Айбол Смайловтың кәсібі өркендей берсін деп тілек қосқым келеді, – дейді кент тұрғыны Рита Сәрсенбаева.</blockquote>Кәсіпкер өзі өндіріп жатқан сабынның бетіне «Тереңөзек сабыны» деп жазу арқылы ауданның атын шығаруды мақсат тұтқанын айтады. Сондай-ақ жақында ғана облыстық жұмыспен қамтуды үйлестіру және әлеуметтік бағдарламалар басқармасының басшысы Ғ.Жаңабаевтың арнайы алғыс хатына ие болғанын көрсетті. Алғыс «Жетістіктер алаңы» жобасына белсене қатысқаны үшін беріліпті. Тереңөзек кентіндегі «Көркем», «Шархан», «Лидер», «Жазира», «Престиж» секілді дүкендерде сатылып жатқан сабынды алдағы уақытта көршілес аудандар мен облыс орталығында да сату жоспарлануда. Ал сабын өндіруге қажетті шикізат Алматы қаласынан және өзіміздің ауданнан алынуда.Шағын және орта бизнес қарқынды да­мыған елдерде «Кәсіпті бастағыңыз келсе, ерте бастаңыз» деген қанатты қағида бар екен. Былтыр ғана өз кәсібін бастаған Айбол Смайлов биылдың өзінде өз тұтынушыларын қалыптастырып үлгерді.Ақтөре ИБРАГИМҰЛЫ

Тереңөзекте жеке кәсіпкер сабын шығаруда

<a href="https://kyzylorda-news.kz/">Kyzylorda-news.kz</a> Етікшілік кәсіп – шынайы жан қалауым. Нағашы әжем мен өз әжем он саусағынан өнер тамған шеберлер еді. Текпен келген қасиет текке жатқызбайды екен, – деп бастады шебер Айдос Үмбетов бізбен әңгімесін.Айтуынша, алғаш жұмысын Алматыда бастаған. Кейін Қызылордаға ауысып, осында жалғастырып жатыр. Қасында көмекші жігіттері бар. Табысына қарай жалақысын алады. Бір аяқ киімді 3-10 күн аралығында тігеді. Қажетті материалды Ресейден, Алматыдан алдырып отыр. Мемлекет тарапынан көмек болса деген тілегі де бар.Шебер бұл кәсіпті 2010 жылдан бастап игерген. Қазір шеберхана әр мезгілге арналған аяқ киімдер топтамасын тігіп, тұтынушыларға ұсынып отыр.&nbsp;<blockquote>– Тапсырысты тұтынушы сұранысына сай тігіп береміз. Кәсібімді кеңейтсем деген жоспарым бар. Алғашында әрине, бірден игеріп кеттім десем, артық айтқандық болар. Уақыт өте келе толыққанды меңгеріп, қазір сүйікті кәсібіме айналды. Осы уақытқа дейін жасаған жұмысыма шағым айтқандар жоқ, – дейді ол.</blockquote>Елімізде мыңдаған мамандық болса, ішінде ілгеріден бері келе жатқан атакәсіп – етікшілік. Бізі мен жібін жанынан тастамайтын етікшілер еңбегін былайғы жұрт біле бермейді. Бүгінде олардың көмегіне жүгінетіндер қатары аз емес. Оған дүкен мен базардағы аяқ киімнің сапасыздығы себеп.Сапалы тері өнімдерінен түрлі аяқ киім жасап, көпшілікке ұсына бастаған «Shoes service» шеберханасы өз жұмысын 2017 жылы бастаған.<blockquote>– Аяқ киім жасауға тігін машинасын, станоктарды пайдаланамыз. Арнайы қалыптарымыз бар. Тек таза былғарыдан тігіледі. Дизайны, үлгісі тапсырысқа қарай дайындалады. Ерлерге, әйелдерге және балаларға арналып тігіледі. Бұдан бөлек, тазалау және қалпына келтіру сынды жұмыстарды да атқарамыз, – деді шебер. Кәсіптің қыр-сырын меңгерген маманның жоспары – шағын шеберхана ашып, талапкер жастарды тәрбиелеу.</blockquote>Тұрар Бекмырзаев

Етік тігіп, отандық өндірісті дамытып отырған кәсіпкер

Ас тұзы Қызылорданың кәмпит, балығы сияқты бренд қатарында. Облыс орталығындағы «Алтын орда» ЖШС – осы өндіріс бағытындағы жетекші компаниялардың бірі.Ширек ғасырдан астам тарихы бар компания барлық талапқа және сапа стандарттарына сәйкес тұз шығаруды 2016 жылы қолға алды. Тұз екі түрлі зауытта өндіріледі. Алғашқысы 2016 жылы іске қосылды, ол кезде қуаттылығы сағатына 3 тоннадан аспайтын.Кәсіпорын директоры Нариман Абжанов бастапқыда саннан гөрі сапаға көбірек мән берілгенін, тұтынушы қауіпсіздігі мен денсаулығы қай уақытта да басты назарда екенін айтып отыр.– Екінші зауыт алдыңғы жылы пайдалануға берілді. Оған сағатына 10 тоннаға дейін тұз өндіруге қабілетті цех орнатылды. Сапа менеджменті жүйесі арқылы шикізат пен материалдар сапасы 100 пайыз қадағаланады. «Ас-соль», «Сафия» деген бренд қаптамадағы өнім Қызылордадан басқа елдің барлық облысында қолжетімді, – деді серіктестік басшысы.Ал сырт елдерден Ресей, Беларусь, Грузия, Қырғызстан, Моңғолия мен Балтық елдеріне экспортталып жүр. Мамыр айының басында аспанасты елінің де нарығына алғаш болып жол тартты. Алдағы уақытта осылайша өнімнің таралу географиясын біртіндеп кеңейту жоспарда бар.Кәсіпорында маңдай терін төгіп жүрген жұмысшылардың саны 150-ден асады. Оның басым бөлігі – жергілікті тұрғындар. Компания басшылығы өңір адамдарының еңбекпен қамтылуына әрдайым басымдық беріп отырады. «Алтын орда» ЖШС «Халыққа арналған тауарларды шығаратын үздік кәсіпорын» номинациясы бойынша «Шағын кәсіпкерлік субъектісі» санатында 2021 жылы «Алтын сапа» сыйлығын иеленді. Ал өткен жылы республикадағы «Ұлы дала елі» бірыңғай брендін пайдалану құқығын беруге арналған конкурстың жеңімпазы атанды.Ал былтыр Сыр өңіріне ресми сапармен келген Президент Қасым-Жомарт Тоқаев тұз өндіретін зауыттың жұмысымен танысып, кәсіпорын қызметін жоғары бағалаған болатын. Бұл іргелі өндіріс орнының жұмысына серпін берді. Ендігі мақсат – үшінші зауытты іске қосып, елдің азық-түлік өндірісін дамытуға үлес қосу.Назерке Саниязова

Қызылордалық кәсіпкер ас тұзын шет елге экспорттауда

<a href="https://kyzylorda-news.kz/">Kyzylorda-news.kz</a>&nbsp; Қаржылық білімнің аздығы мен халықтың берешегі – көптеген елдің, соның ішінде Қазақстанның арпалысып келе жатқан күрделі проблемасының бірі. Бүгінде еліміздің 85% халқының ұлттық банкке төленбеген берешегі бар. Сонымен қатар тұтынушылық несие өзінің рекордтық деңгейіне жетті.Мемлекет басшысы Қасым-Жомарт Тоқаевтың уәкілеттілігі негізінде мәселені шешу үшін ауыр жағдайға тап болған және банкроттық жариялаған жандардың несиесі кешірілді. Десек те мемлекетке берешек жандардың қатары азаймай тұр. Осы мәселені қолға алып, қарызсыз қоғам қалыптастыруды мақсат еткен AMANAT партиясы Halyk банкпен бірігіп, азаматтардың қаржылық сауаттылық деңгейін арттыру және жеке қаржыны басқаруына қолдау көрсету мақсатында «Қарызсыз қоғам» жобасын өткен жылдан бастап іске қосты. Бұл бағдарлама арқылы әрбір азамат қаржысын тиімді пайдаланып, экономикалық тұрақты қоғам құруға үлес қосады.<h2 style="text-align:justify;">Жобаның мақсаты неде?</h2>Қаладағы халық үшін ақшаны басқару курстары қолжетімді, алайда ауыл аймақтағы азаматтарға ақшаның құны, оның маңыздылығы мен басқару туралы ақпарат жеткіліксіз. Соның салдарынан елімізде лудомания, займ және несие алу мәселелері дендеп тұр. Ал «Қарызсыз қоғамның» көздегені – азаматтарды қаржылық жоспарлау, бюджеттеу және қарыздарды басқару негіздеріне оқыту. Бұл саладағы білім адамдарға қаржылық шешімдер қабылдауға және қажетсіз қарыздардан аулақ болуға көмектеседі. Жоба халық арасында берешек деңгейін төмендетуге бағытталған. Сондай-ақ қаржылық қиындықтарды жеңу және қарыз тұзақтарынан шығу жолдарын табуға көмектесетін тегін кеңес беру қызметін ұсынады.<h2 style="text-align:justify;">«Қарызсыз қоғам» қандай әдіс қолдану арқылы білім беруде?</h2>Жобаның негізгі құрамдас бөліктерінің бірі – қаржылық білім беру бағдарламасы. Олар бірнеше әдіс бойынша жұмыс жасайды. Мәселен, тренинг-семинарлар. Қаржы сарапшылары қатысушыларға қаржылық жоспарлау, бюджеттеу және қарызды басқару негіздерін түсінуге көмектесетін түрлі оқу іс-шараларын өткізеді. Тренинг офлайн және онлайн форматта ұйымдастырылады. Вебинар, яғни кең аудиторияға қолжетімді онлайн дәріс пен курс жеке қаржыны тиімді басқару, қарыздан аулақ болу және бюджетті жоспарлау туралы ақпарат береді. Сонымен қатар ақпараттық материалдарды да әзірлейді, олар жеке қаржыны басқару бойынша пайдалы кеңестермен қамтылған. Бұл материалдар баспа және электронды түрде қолжетімді. «Қарызсыз қоғам» жобасы тегін консультациялық қызметтерді ұсынады. Оларға жеке кеңес беру, құқықтық мен психологиялық қолдау көрсету жатады. Жеке консультация арқылы мамандар азаматтарға жеке қаржылық жоспар құруға, қарыздарды қайта құрылымдауға және несие тарихын жақсартуға көмектеседі. Берілетін кеңестер легі әр адамның нақты қаржылық мәселелерін шешуге бағытталған және қаржыны басқару бойынша практикалық нұсқаулықтар қамтылады. Құқықтық қолдау адамдарға несиелік келісімшарт пен басқа да қаржылық міндеттемелерге қатысты өз құқықтары мен міндеттерін түсінуге ықпал етеді. Қаржылық мәселелер көбінесе стресс пен уайым секілді ауыр эмоциялармен қатар жүреді. Жоба адамдарға қаржылық қиындықтардың эмоционалды салдарымен күресуге және стресстік жағдайлардан шығудың жолдарын табуға көмектесетін психологиялық ұсыныстар береді.<h2 style="text-align:justify;">Қанша адам білім алды?</h2>Өткен жылдың қорытындысы бойынша 65 мың адам жоба аясында білім алды. Естеріңізге сала кетейік, 2023 жылы бастау алған пилоттық жоба 8 өңірде іске қосылған болатын. Атап айтқанда Алматы, Ақтөбе, Атырау, Батыс Қазақстан, Солтүстік Қазақстан, Түркістан, Жамбыл және Маңғыстау облыстарында. Биыл аталған жоба Мемлекет басшысының Қазақстан халқына Жолдауындағы тапсырмасына сәйкес 5 ақпанынан бастап еліміздің барлық өңірінде қолға алынды. Осы кезге дейін облыс бойынша 12 ауысым болды, 3342 адамға сертификат табысталды. Өткен сенбінің нәтижесінде қала бойынша 677 адам дәріс алса, жыл соңына дейін 1620 адамды оқыту көзделіп отыр. 1 адам 5 күн оқып, сертификат алады. Жобаға қатысушылардың 75%- ы әйелдер, басым бөлігі көп балалы аналар. Партия оларға арнайы жағдайды қарастыратынын айтты. Мамыр айының нәтижесі бойынша республика көлемінде қаржылық сауаттылыққа қатысты білім алғандардың 81%-ы ауыл тұрғындары. 2024 жылы қазақстандықтардың 200 мыңнан астамы қаражатты қалай басқару керегін үйренеді деп күтілуде. Сондай-ақ мектеп, колледж және жоғары оқу орнына арналған оқу құралдары дайындалмақ. Қосымша 100 мың студент, 450 мың жоғары сынып оқушысы қамтылады. Жалпы 750 мыңнан астам қазақстандық қаржылық сауаттылығын арттырады деп күтілуде<blockquote>– Биылдан бастап бұл жоба Қазақстанның барлық өңірінде жұмыс істейді. Республика көлемінде 150 қаржы жөніндегі сарапшы халыққа қызмет көрсетеді. Жобаға кез келген азамат қатыса алады. Қатысу үшін тұрғылықты жер бойынша әкімдікке немесе AMANAT партиясының филиалына өтініш білдіру керек. Сондай-ақ qogamfin.kz сайты арқылы да тіркелуге болады. Қатысу ерікті түрде және ақысыз. Қатысушылардың қаржылық сауаттылық деңгейін білу үшін қаржы сарапшысы түрлі тәсіл қолданады. Мәселен, мен бір жылдық шығын туралы ақпарат сұраймын. Қатысушылар табыс тапқанымен, шығыстың көп екендігіне мән бермейді. Осы салғырттық әсерінен қалай «минусқа» кіргенін бейхабар болады. Алайда мен ұсынған әдіс арқылы расымен шығын көп екендігіне көз жеткізеді һәм оны болдырмауға тырысады. Келген пайда көзін әр ай сайын дұрыс бағдарлап, есептеп жазып отырмасаңыз, әрине, қаражат жинау мүмкін болмайды. Осы орайда бұл жоба нені ескеру керек, жеке және отбасылық бюджетті қалай жүргізу қажеттілігі туралы ұтымды бағыт-бағдар береміз. Несие немесе депозитты қалай таңдау керектігі, олардың ерекшеліктері туралы ақпараттандыратын боламыз. Сондай-ақ «несиеге байланысты қарыздары бар азаматтар қалай несие жүктемесін азайтуға болады, егер қазір төлем қабілеті болса, оны қандай тәсілдермен жеңілдетуге болады?» деген сияқты салмақты сауалдарға жауап ала алады. Жоба аясында білім алғанын дәлелдеу үшін арнайы сертификат табысталады. Ол тек барлық дәріске толық қатысып, біліктілігін жетілдірген жандарға бұйырады. Биыл облыс көлемінде 8 мыңнан астам адамды оқыту жоспарлануда. Қаржы сарапшыларының саны – бесеу. Ақпаннан мамыр айына дейін Жаңақорған, Шиелі, Жалағаш, Сырдария аудандарын және қаладағы оқуға ниет білдірген жандардың бәріне дәріс өтілді. Қазір Арал және Қазалы аудандарында сабақ берудеміз. Шілде айында Қармақшы, Байқоңыр аудандарын қамтымақпыз. Тағы да айта кететін жайт, оқудың соңғы кезеңінде табыстарды арттыру үшін кәсіп ашу жолдарын түсіндіреміз. Мемлекеттік бағдарламаларға қатысу шарттарын үйретеміз. «Қарызсыз қоғамның» қаржы сарапшылары қалай таңдалғанына келетін болсақ, былтырғы желтоқсан айында арнайы талапқа сай мамандарды іріктеу жұмыстары жүрді. Алғашқы кезеңнен өткендер үшін Астана қаласында арнайы қаржы саласының маманы, профессор 3 күн сабақ берді. Арнайы тест тапсырдық, сондай-ақ сұхбаттасу кезеңінен де өттік. Тек жақсы нәтиже көрсете білген мамандарды сарапшы болуға лайық деп танып, жобаға үлес қосуға мүмкіндік берді. Іріктеу жұмыстары өте мұқият және қатаң түрде бақылауда болды, – дейді «Қарызсыз қоғам» жобасының Қызылорда облысындағы қаржы сарапшысы Балдырған Мәмен.</blockquote>Түйін. Мемлекет экономикалық нарықтағы жағдайды жақсарту үшін көптеген жүйелі жобаны жүзеге асыруда. Соның ішінде «Қарызсыз қоғамның» да жүгі ауыр. Қаржылық білімнің аздығы халқымыздың өсіп-өнуіне бірден бір кедергі, ал осы орайда қаржылық білімнің бір ізді болғаны дұрыс. Бұл жоба Қазақстандағы экономикалық тұрақтылықты нығайтып, қаржылық сауатты қоғам құруға елеулі үлес қосады деген ойдамыз.&nbsp;&nbsp;Қорлан САРЫФото: dksokol.ru

Балдырған Мәмен: Биыл облыс көлемінде 8000 астам адамды оқыту жоспарлануда

<a href="https://kyzylorda-news.kz/">Kyzylorda-news.kz</a>&nbsp; Қала іргесінде қоныс тепкен Қарауылтөбе ауылдық округі талай шеберді шыңдаған мекен. Ынтымағы жарасқан ауыл халқымыздың салт-дәстүрін, ұлттық өнерін берік ұстанған. Ата дәстүрді жалғастырушы ұлттық өнерді ұлықтаушы тұрғынның бірі – Мөлдір Түлебаев.&nbsp;Қазақы тәрбиені бойына сіңірген кейіпкеріміз қолөнерге бала кезден жақын болған екен. Себебі анасы тігіншілікпен айналысып, бала Мөлдірді шеберлікке шыңдаған. Соның жемісі болар бүгінде кейіпкеріміз Қарауылтөбе ауылындағы сұранысқа ие қолөнершінің бірі.&nbsp;– Бала кезден тігінге қызықтым. Ол кезде қуыршаққа киім тігетін едім. Негізі ісмерлік қасиет анамнан дарыған. Үлкен апам тұрмысқа шыққанда анам оның жасауын өзі тікті. Сол кезде қасында қарап отыратынмын. Көрпе көктеуді де анамнан үйрендім. Сөйтіп, карантин кезінде тігін тігуді қайта қолға алдым. Содан бері төрт жылға жуық уақыт болды. Бүгінде өз тұтынушыларым бар. Қаладан да, ауылдан да, әлеуметтік желідегі па-рақшам арқылы да тапсырыс беріп жатады. Қыз жасауын, бесік жабдығын тігемін, – дейді қолөнер иесі бізбен әңгімесінде.Қазіргі таңда Мөлдір Түлебаева бүгінде отбасымен жұмысты және жеке кәсібін қатар алып жүрген жан. Оған қоса төрт баланың анасы. Ауылдағы балабақшада жұмыс істейді. Осындай жауапты қызметтеріне қарамастан жеке кәсіпті де дөңгелетіп, бос уақытын текке өткізбей нәпақасын тауып жүрген жайы бар. Үй ішінен тігіншілікке арнайы бөлмесі бар. Онда қазақы нақышта тігілген көрпешелер, жастықтар, төсек жапқыштарды орналастырған. Одан бөлек тұтынушылардың тапсырыстары бар.&nbsp;Басынан орамалы түспеген кейіпкеріміздің қолөнер шебері екенін түр-тұрпатынан да аңғару қиын емес. Үнемі қазақы, ұлттық нақышта киінетін Мөлдір тек кәсіп жүргізіп қана қоймай, ұлттық құндылықтарды да осылай дәріптеп келеді.А.Әлім

Қарауылтөбедегі қолөнерші

<a href="https://kyzylorda-news.kz/">Kyzylorda-news.kz</a>Тәуелсіз мемлекетіміз жыл санап көптеген жетістікке жетіп, қарқынды даму үстінде. Соның арқасында халықтың әл-ауқаты едәуір жақсарған. Мемлекет тіршілік етемін деген жанға мол мүмкіндік беруде. Жаңа дәуірге қадам басқан ел тұрғындары қолдан келген кәсібінің игілігін көруде. Осыған орай, аудан көлемінде де өз ісін ашып, кәсібінің нәсібін көргендер саны артуда. Тақырыбымызға тұздық болғалы отырған шағын кәсіпкерлік нысанның бірі – Ақай ауылдық округіндегі тігін цехы.Қолына ине-жіп алып, іс тігетін қазақ әйелі аз емес. Қастерлі өнердің әйел затының бойында болуы да сұлулық пен әдемілік әлеміне бастайды. Бала жастан қолөнерге қызығып, қызығушылықты кәсіпке айналдырған Айгүл Медетова – бүгінде жеке кәсіпкер. Оның тігін цехы 2018 жылдан бері жұмыс істеуде. Кәсіпке деген алғашқы қадамын «Бастау Бизнес» бағдарламасы арқылы бастаған. Бүгінге дейін мемлекеттен екі рет қаржылай қолдау алып, кәсібін дөңгелетуде. Оның ісмерлігі, өзінің айтуы бойынша әжесі мен анасынан дарыған. Олар киіз басудың шебері болыпты. Еңбегінің берекесін тігіншілік өнерден тапқан Айгүл ісмерлігінің арқасында көптің алғысын алуда.Айгүлдің әдемі әлемі нәзіктік пен ерекше сұлулыққа толы. Оның қолынан шыққан көрпеше, жастық, көрпелері өзгеше оюларымен көз тартады. Ал қазақы қамзол мен кішкентайларға арналған тұсаукесер жиынтығы қызықпасыңа қоймайды. Бөлме іші тиісті құрал-жабдықтармен қамтылған. Сондай-ақ, дайын бұйымдар мен киімдер әдемі жинақталып, реттелген. Бұдан тігіншінің ұқыптылығы мен тиянақтылығы айқын аңғарылды. Өз ісінің маманы бір тігіншіні жұмыспен қамтып отыр.Тапсырыс берушінің қандай болса да тапсырысын қабылдап, көңілінен шығардай етіп уақытылы дайындауға тырысамыз. Егер ол тұтынушы көңілінен шықса, еңбегіміздің ақталғаны деп біз де қуанамыз. Өз қолыңнан шыққан әрбір бұйым қастерлі, ыстық болады екен. Өйткені ол бар ынтамыз бен шынайы сүйіспеншілігімізден жасалады, – дейді кәсіп иесі. Расында да, өз жұмысыңды махаббатпен жасамасаң, нәтижесі көңіл көншітпейді емес пе? Ал біздің кейіпкер өнерін өмірімен өрбіте отырып, бар күш-жігерін салуда.Сондай-ақ, шеберханада қолөнермен қатар, шалбардың балағын қысқарту, киімді тарылту, тапсырыспен киім тігу секілді қосымша қызметтер де көрсетіледі. Соңғы уақытта қыз жасауын ерекше үлгіде берушілер қатары көбеюде. Осы тұрғыда тігіншілерге артылар жауапкершілік те мол. Сол себепті олар әрдайым ізденіс үстінде жүретінін де жасырмады.<blockquote>– Қазіргі дамыған заманда үйренем деушілерге мүмкіндік көп. Ғаламтор мен жүрген жерімізде ерекше үлгілер мен ою-өрнектерге көз қырын салып жүреміз. Өйткені халық жаңашыл үлгідегі ерекше дүниелерді ұнатады. Ал тұтынушы көңілінен шығу – біздің басты мақсатымыз, – дейді ісмер.</blockquote>Тігін цехының жұмысына ақайлықтар дән риза. Ол тапсырыс берушілер қатары да көбейе түскенін тілге тиек етті. Нәпақасын адал еңбекпен табуды мақсат еткен кейіпкеріміз мемлекеттен қолдау алып, кәсіпкерлік жолын таңдауына сеп болған кәсіпкерлік палата мен бөлім жұмысына да алғысын жеткізді.<blockquote>– Кәсіп ашуға мүмкіндік көп. Тек ниетің мен мақсатың айқын болса. Шағын және орта бизнесті дамытуда елде бірқатар бағдарлама мен жоба жүзеге асырылуда. Жеке кәсіп иесі болғанның тиімді тұстары көп. Өзім үш ұлдың анасымын. Ұлдарыма да жеке кәсіптің қолайлылығын айтып отырамын. Былтырғы жылы кіші ұлым «Жас кәсіпкер» бағдарламасы бойынша грантқа ие болды. Енді осы мекенде жүн түту цехын ашпақ ниетте. Баламның бұл бастамасын қолдаймын және жас буынға демеу болып, дамуына үлес қосқан мемлекетке алғысым шексіз. Ал өзім алдағы уақытта цех ауқымын кеңейтіп, үлкен көлемде ашқым келеді. Әрине, бұл уақыттың еншісінде, – дейді А.Медетова.</blockquote>Тігіншіліктің тілін түсінген шебердің бұл бастамасы қолдауға тұрарлық. «Қолыңнан келсе, қонышынан бас» демекші, икемі бар істі игеріп әкету де көпке үлгі, әрі өнеге. Сүйікті ісіңізді кәсіп көзіне айналдырып, табысты болу өз қолыңызда.Ардақ СӘКЕНҚЫЗЫ

 Қармақшы: Тігіннің тілін шебер түсінеді

<a href="https://kyzylorda-news.kz/">Kyzylorda-news.kz</a> Ел өміріне нарықтық реформа талабы дендеп енген жылдары, әр өңірден кәсіпкерлікке бейімі бар жандар бас көтеріп, өз істерін қолға ала бастады. Осылайша, олар қалың қауымның тұтынушылық әлеуетінің жақсаруына шама-шарқынша лайықты үлесін қосты. Тәуелсіздік тұсындағы бұл саланың Қазалы ауданындағы тұңғыш көшбасшылары қатарында Талғат Оңдалыұлы Кітабалиевтің де есімі жиі тілге тиек болып, алқалы жиында мақтанышпен аталып жатады.Қазалы ауданындағы қазіргі Бекарыстан би ауылында 1957 жылдың 22 қарашасында кіндік қаны тамған Талғат №24 орта мектебінен жеті класты аяқтап, №88 білім шаңырағынан кәмелеттік аттестатын алып шыққан. Бірқатар достарымен бірге өндіріске араласып, шаруашылықтағы әртүрлі жұмыстың жанынан табылған. Арасында ПМК №1604 құрылыс мекемесі құрамында жаңа нысандар салуға араласқан, қысқа мерзімді курста оқып, жүргізушілікті меңгерген. 1976-1978 жылдары әскери борышын да өтеп қайтқан.&nbsp;Ауыр еңбектің дәмін татып, өмір белесіне бетбұрған жігерлі жігіт 1979-1984 жылдары Жамбыл жеңіл және тамақ өнеркәсібі технологиялық институтында оқып, білімін жетілдірді. Тігін бұйымдарының технологы мамандығы бойынша диплом иемденген. Жоғары оқу орнын бітірген мезгілдің тамылжыған тамызында аудандық тұрмыс қажетін өтеу комбинатының басшысы Базарбай Нағыманов жаңа маманды жұмысқа қабылдады. Ателье меңгерушісі орта жасты алқымдаған Өрік Есмолдаева апасы Талғатқа көп нәрселерді мәлімдеп, мұндағылардың тыныс-тіршілігінен хабардар еткен. Оңаша қалғанында ой сүзгісіне салып, жүйелі жоспар жасады. Институт аудиториясында тыңдаған дәрістен ұққандарын, шынайы өндірісте жүзеге асырудың тетіктерін қарастырған.&nbsp;Технологтың мойнындағы жүк жетіп артылады. Ертелі-кеш бос уақыт дейтін жоқтың қасы. Қашан да, қайда да асығыс, қарбалас құшағында жүретін. Тігіншілер арасында тапсырыс арқылы түсетін бұйымдардың матасының түсі мен беріктігі, қолайлылығы талқыланады. Қандай тауардың өтімді, өтімсіздігі сұралады. Өңіне қарай киімді қалай сыру керектігі, сән түрін көбейту мәселелері тігінші, ателье меңгерушісін қатыстырып, үнемі ақылдасылады. Ұсыныс-пікірлер ескеріліп, қайткенде тұтынушы талғамынан шығудың мәні назарда ұсталады. Электр қуаты көзімен іс атқаратындардың техникалық қауіпсіздігіне айрықша бақылау орнатылады. Тағысын-тағылар...&nbsp;Халыққа қызмет – мерейлі міндет. Жеті жүзге жуық адам нәпақасын айырған комбинатта екі тігін ательесі, аяқ-киім тігу цехтары, шаштараз, фотосалон, екі тұрмыстық үй, киімді химиялық жолмен тазалайтын орын, он алты ауылда қабылдау пункті, «Ветерок» павильоны және күріш ақтайтын, үй жиһаздары мен есік-терезе соғатын цехтар тоқтаусыз істеді. Іргелі мекемеге қарасты нысандарға күнделікті келушілер толастамай, қалаған қажеттіліктері шеберлер және ісмерлер қолымен мінсіз орындалып жатады.&nbsp;<blockquote>– Кіммен де ебін тауып тілдесе білетін Талғат, тігін ательесіне басшылық жасайтын Өрік Есмолдаева, киім пішуші Айжамал Үмбетбаева, тігіншілер Шара Сералиева, Бағдагүл Досақова, тағы басқаларымен аралас-құраластығын арттырады. Сонымен бірге комбинат экономисі Сапар Әлиев, Қазалы қаласындағы тігін ательесінің басшысы Эмма Энгель, «Ветерок» тігін павильонының меңгерушісі Өтебике Сағидуллаева, киімді химиялық жолмен тазалау цехының меңгерушісі Мария Криковамен ізетті сыйластығын үзбейді. Кездесе қалған қиын-түйінді шаруаларды бірлесе бітіру тәсілдерін қарастыратын. Апаларымен ақылдасып, кішілеріне білгенін үйретіп, көппен бітетін тірліктің кежегесін кейін кетірмеудің қамын жасады, – дейді журналист, ҚР Еңбек сіңірген қызметкері, «Еңбек ардагері» медалінің иегері Сахи Қапар.&nbsp;</blockquote>Оның айтуынша, 1985-1989 жылдары аудандық тұрмыс қажетін өтеу комбинатының директорлығына Болатбек Пұсырманов келген. Оқығаны мен тоқығаны жеткілікті басшы қарамағындағы мамандардың қабілет қарымын саралап, бірқатар өзгерістер жасады. Талғатты 1987 жылғы қоңыр күзде «Ветерок» павильонына меңгерушілікке тағайындады. Кенттің солтүстік беткейіндегі бесінші кварталда тұратын тұрғындар аз емес. Осы күнгі кәсіптік-техникалық жоғарғы колледжінің батыс бетінен орын тепкен «Ветерокқа» жиырма тігінші, бір қабылдаушы, екі шаштараз, бір-бірден фотограф пен етікші, тазалықшы, екі күзетші бөлінген. Сондағы шаруа мен тәртіп барысын бақылап, үйлесімділікке келтіру, әрбірінің отбасылық жайларын да зерттеп қою меңгерушіге жүктелген. Жоғарыдағы жайтты естен шығарып, жүрдім-бардымшылыққа салынсаң, басшылық абыройыңа нұқсан тағылады. Ардан аттап, алшаң басқанды жаны қаламайтын Тәкең бұрынғы ұқыптылық үрдісінен ауытқымады. Түсінбестіктен туған кикілжіңді өршітпей, өзара келісімге келтіреді. Айналасына мейірбандықпен қарап, татулық пен бірлікке үндейтін деген естелігімен бөлісті журналист, ҚР Еңбек сіңірген қызметкері, «Еңбек ардагері» медалінің иегері Сахи Бахиұлы.&nbsp;Ынтымақ жүрген жерде, ырыс жүреді. Мамандығын мейлінше жетік меңгерген Кеңескүл Орынбекова, Айнаш Айниязова, Әлия Мамбетова, Марал Орынбекова, Бекзада Мамбетова, Бекзия Ибрашевалар кез келген тапсырысты жедел орындайтын. Және де талғам-талап үдесінен шығарлықтай сапалы, жарасымды болып атқарылуына барлық күш-мүмкіндікті жұмсайтын. Белгілі кәсіпорынға бұдан бұрынғы аты аталған ел ағаларының ізін ала бере Жұмат Ерқожаев, Әлимуса Қожағұлов басшылық жасады. Бұлар да алға қойылған ілкімді іске ұйтқы білдіруден аянып қалмауға тырысты. Ж.Ерқожаевтың тұсында Талғат ұжымдастар ұйғарымына сәйкес тері өңдеу цехына жіберіліп, жаңа ортадағы жөн-жосығы таңсық тірліктің басынан ұстады. Кентегі Жанқожа батыр көшесінің күнбатыс жағалауындағы киімді химиялық жолмен тазалау орнына бейімделе соғылған үй еңселі де кең. Сәулетті ғимараттың жартысына жуығына орналасқан тері өңдеу цехында күнбе-күн тынымсыз қарбалас. Тон тігуге қажетті қойдың терісі аудан орталығындағы мал сою бөлімшесі мен шаруашылықтардан жиналады. Сонымен қоса құлақшын тігуге керекті ондатр, қаракөл елтірісі де жеке адамдардан алынатын. Бояу, химиялық қоспалар мен тігіске тұтынылатын жіп тәріздес заттар Жамбыл, Шымкент қалаларынан, кейде Ресейден тасымалданады. Ірі фабрикалармен келісім шарт бекітіліп, кедергісіз жетуіне мүмкіндік жасалынған.Берілген тапсырманы мұқият бітіріп, тері дайындауда Өмірсерік Айталиев, Шеген Оразалиев, Асанхан Мақсатбаев, Серік Оразалиев, Ғалымжан Орынбасарұлы алғы шептен табылады. Тон пішуші Бақытгүл Мұзатова мен тігіншілер: Қаламқас Кенжебаева, Дариға Әпшаева, Айнагүл Байтөреева берілген тапсырысты белгіленген мөлшерге сай сәнді де, қонымды ете тігіп, халықтың риясыз алғысын арқалады. Бұдан басқа, Байқоңыр қаласындағы әскерилерге қаракөлден бас киім, арасында киік терісінен көктем мен күзге ыңғайланған күртешелер де дайындалады. Көптің сұранысын өтеген тері өңдеу цехы тәуелсіздіктің елең-алаңындағы тоқырауға ұшырап, қарқынын бәсеңдетті. Себебі, бұйымға пайдаланылатын тауарлар жетіспеді. Колхоз, совхоздар тарап, кәсіпорындардың өнімі азайды. Жоғарыдан &nbsp;берілген тәртіп аясында жаңа құрылымдауға көшіп, 1992 жылдың көктемінде «Игілік» ұжымдық меншіктегі шағын кәсіпорынға айналған.&nbsp;Онан соң «Химчистка» ғимаратын жеке меншікке алып, 1998 жылы «Қайрат» жауапкершілігі шектеулі серіктестігі боп құрылған. Кент орталығындағы колхоз базарын жекешелендірген Құдайберген Мусаев екеуі алғашқылар қатарында кәсіпкерлік куәлігін алады. Серіктестікте алдымен, тұтынушы арасындағы санитарлық-эпидемиологиялық талаптарды көтеру бағытында, мал базары мен қасапхана ұйымдастырылады. Осының арқасында заң талаптары орнығып, көпшілік арасында жұқпалы аурулар таратылмауына ықпал етіледі. Ет өнімдеріне бақылау орнатылып, жұртшылық арнайы белгіленген дүкеннен ала бастайды. Кәсіпкерлік құрылым жанынан техника жөндеу шеберханасы, вулканизация, темір дәнекерлеу мен тігін цехы, шаштараз, асхана, монша, мал дәрігерлік дәріханасы ашылып, халықты түрлі қызметпен қамтуға қолайлылық жасалынады.&nbsp;Сонымен қоса, ауыр көліктер арқылы аудан тұрғындарына керекті мал азығындық жем, басқа да тауарлар жеткізіліп, мұқтаждықтары өтеледі. Мекеме тынысының ашылып, соны серпіліс әкелуде директордың орынбасары Әсет Шаттықұлы, қасапхана мен мал базарын қадағалайтын бригадир Жайықбай Мыңжасаров, шофер Өмірбек Айталиев, және басқалар іскерлік байқатқан. Айтылған мамандар ұжым басшысының сенімді көмекшісіне айналып, белгіленген тапсырманы кешіктірмеуге дағдыланған.Талғат Оңдалыұлы жұмыс барысында мақтау-марапат пен мансапқа көп қызығушылық танытпайтын. Онан гөрі жауапкершілігіне алған міндетті ұқыпты орындап, жұртшылықтың қадесіне жарайтын шаруаны тындырумен әуестенетін. Әйтсе де, басқарған ұжымын уыздай ұйытып, ортақ іске жұмылдыра білген еңбекқор маман-басшыға уақытында аудандық, облыстық және салалық басшылар тарапынан «Алғыс хат», грамоталар берілді. Ақшалай-заттай сыйлықтарға да қол жеткізілген.Талғат отбасында Құдай қосқан қосағы Алмагүл екеуі қыздары мен ұлдарын тәлімді де тәртіпті етіп тәрбиеледі. Бәрі де тәуелсіз еліміздің кемел болашағына белсенді атсалысып жүр.Атап айтсақ, Көркем Әйтеке би кентіндегі №170 орта мектепте жоғары категориялы зерттеуші мұғалім, Әсем «Гигиенист VII» жауапкершілігі шектеулі серіктестігінің директоры, Қайрат аудандық полиция бөлімінде аға жедел кезекші инспекторлығында, &nbsp;полиция майоры, келіншегі Салтанат Е.Бозғұлов атындағы №249 мектеп-лицейде бастауыш пән мұғалімі, кенже ұлы Мархабат Ақтөбе қаласындағы М.Құрманғалиева атындағы №32 гимназияда алғашқы әскери және технологиялық дайындық пәнінің мұғалімдігін абыройлы атқаруда.Қызылорда қаласының тұрғыны, Қазалы ауданының Құрметті азаматы Малкайдар Дүйсенұлымен пікірлескенімізде: «Мен Талғаттың әкесі, еңбек және соғыс ардагері Оңдалы ағамен мал шаруашылығында бірге істедім. 1995 жылы Қазалы ауданы әкімінің бірінші орынбасары қызметіне келгенімде Талғат ауданға белгілі іскер, ізденімпаз кәсіпкер екен. Сонда аудан, облыс көлеміндегі ауқымды іс-шараларға, жетім балалар үйіне қаржылай демеушілік көрсетуден тыс қалмайтын», ‒ деген ыстық ықыласын ортаға салды.Білікті кәсіпкер, ардақты азаматтың ерен еңбегі мен адамдық болмысы кейінгі толқын жастарға өшпес өнеге болып қала берері сөзсіз.Фото:almaty-akhamy.kz<img src="https://knadmin.beoblood.kz/uploads/e75676b4_a226_4025_9c70_4fe2c16439e5_274152cf59.jpg" alt="e75676b4-a226-4025-9c70-4fe2c16439e5.jpg">

Кәсіпкерлікті дамытқан іскер көшбасшы

<a href="https://kyzylorda-news.kz/">Kyzylorda-news.kz</a> Өңірдегі кәсіпкерліктің дамуы сан қырынан көрініс табуда. Қолдағы барды мол табыс көзіне айналдырып, ел игілігіне еңбек ету қазіргі кәсіпкердің басты ұраны. Аймақ кейінгі жылдары кез келген сала бойынша алдыңғы қатарда. Әсіресе, кәсіпкерлік саласындағы өсу өңір экономикасының әлеуетін арттыруда. Жаңа жобалар жалғасын тапты. Жұмыс орындары ашылып жатыр.Қармақшыда сервистік көлік жөндеу орталығының бірі – «АНС».&nbsp;Аудан орталығындағы көлік жөндеу шеберханасын ашқан жас кәсіпкер Бауыржан Алпысбайұлы бүгінде тұрақты тұтынушыларын жинап үлгерген.&nbsp;Ол басшылық ететін орын 2018 жылы қайта жөндеуден өткен. Алғашқыда кәсіпкер көлік жуу &nbsp;орталығын ашады. Алайда көлік жөндейтін орын аз екенін ойлана келе жаңа кәсіптің көзін ашуды мақсат етеді. «Бизнестің жол картасы – 2020» бағдарламасы арқылы 6 млн. теңге көлемінде несие алады. Қолға тиген қаржыға қажетті құрал-жабдығын алып, нысанға күрделі жөндеу жұмысын жүргізеді.<blockquote>– Орталықта орналасқан соң мұнда көлік жиі келеді. Себебі бұрынғыдай емес, қазір көлік тізгіндеушілердің қатары көбейген. Кейде шеберлер үлгермейді. Десе де олар – өз ісінің маманы, – дейді Бауыржан Алпысбайұлы.</blockquote>Қазірде мұнда&nbsp;көлік жөндеу шеберханасында шина-құрсымды жөндеу, дөңгелек теңгеру, көтергіш секілді жаңа құрылғылар жұмыс жасап тұр. Мұнда заматында екі көлікке дейін қабылдайтын мотор қозғалғыш бөлшектерді жөндеп, байқастау мен ірілі-ұсақты жұмыстар істеледі.<blockquote>– Табыс табамын деушіге жұмыс көп.&nbsp;Бос жатқаннан еңбек ету керек. Ал сол еңбек ащы тер шығарса, соңында тәтті жемісін береді. Тек мемлекет тарапынан көрсетілген қолдауды тиімді пайдаланса болғаны. Тұтынушылар көлігіне қосалқы бөлшектерін өзімен қоса алып келеді. Алдағы уақытта осы шеберханадан дүкен ашып, оны келушіге өзіміз ұсынсақ деген ойымыз бар. Сервис ашу бұрыннан жоспарда болған.&nbsp;Қазір бес жыл уақыт болып қалыпты, – дейді жас кәсіпкер.</blockquote>

Қармақшыдағы сұранысқа ие сервистік орталық

<a href="https://kyzylorda-news.kz/">Kyzylorda-news.kz</a> &nbsp;Байқоңыр қаласының кәсіпкері Сейфулла Ажмолдаев басқаратын «Техносервис» мекемесі кәсіптің түр-түрімен айналыса отырып, өңір тұрғындарына сапалы қызмет көрсетіп келе жатқан ауданымыздағы бірден-бір ірі кәсіпкерлік нысан.Мекеме өңір тұрғындарын таза фильтрленген ауыз сумен қамтамасыз етеді және пластик есік-терезе, оны құрумен айналысады. Сондай-ақ Байқоңыр қаласы мен ауданның көлік жүргізушілерін түрлі жанар-жағармаймен қамтамасыз етеді.Міне елге сапалы кәсіпкерлік қызметін көрсетіп, құрметке бөленіп отырған осындай мекеменің тарихына зер салсақ, ол 1996 жылы жанармай құю бекеті арқылы қызметін бастаған. Кәсіпкерлік мекемесі әрі қарай көліктерге техникалық қызмет көрсету және көлік жуу орталығымен байқоңырлықтар тарапынан түскен сұраныс бойынша қызметін жалғастырады.– Мекеме «МИР-2001» жауапкершілігі шектеулі серіктестігі болып құрылды. Осы жылы Төретам стансасында&nbsp;№2 жанармай құю бекетін іске қосты. Сонымен қатар 2003 жылы кәсіпкерлік нысанның өрісі кеңейіп, Жосалы кентінен тағы бір жанар-жағармай құю бекеті жұмысын бастады. Осы жылы қала орталығынан «Автобөлшектер» дүкенін ашып, өңір тұрғындарының қажетін өтеді. Сондай-ақ тұрғындарды күміс иондарымен байытылған, өңір халқына «TS Water» сауда маркасымен танылып жүрген таза фильтрленген 19 литрлік пластик бөтелкедегі ауыз сумен қамтамасыз етуді бастадық, – дейді кәсіпкер бізбен әңгімесінде.Ел игілігіне арнаған қызметін одан әрі дамыту мақсатындағы жұмысын мұнымен тоқтатпаған кәсіпкер 2014 жылы бетоннан құйылған түрлі плитка мен бордюр сынды құрылыс материалдарын өндіретін шағын зауытты іске қосты.Бүгінде Сейфулла Ажмолдаев басшылық ететін шағын зауыт аймақ бойынша құрылысқа қажетті сапалы өнімдер өндіріп отырған бірден-бір кәсіпорын.<blockquote>– 2016 жылы мекемеміз аудан бойынша оператор статусын алғаннан бастап, біздер өңірге қарасты мекемелерді жанар-жағармаймен қамтамасыз етіп келеміз. Жосалы кенті аймағында орналасқан бетон зауытымыз үшін негізгі шикізат көзіне айналған «Ордазы» құм жинау аймағын игілігімізге жаратып отырмыз. Онда түрлі қалыптағы бордюр, қиыршық тас өндіріп, оны өзге кәсіпорындарға жіберудеміз. Өңір тұрғындарының демалысына үлесімізді қосуда «Даму» кәсіпкерлікті дамыту қоры арқылы қаражат алып, Ақай ауылынан «WATER HOUSE» атты монша-сауықтыру кешенін Байқоңыр, Төретам және Ақай елді мекендері тұрғындарының игілігіне пайдалануға бердік. Бүгінде жаңашыл бағытта салынған кешен өңір тұрғындарына сапалы қызмет көрсетуде, – дейді сан түрлі кәсіптің тізгінін ұстап отырған Сейфулла Ажмолдаев.</blockquote>«Оң қолың бергенді сол қолың көрмесін» деген тәмсіл бар қазақ даналығында. Әрине, «Адамның адамдығы адалдығымен және төккен термен бағаланады» дегендей, кәсібінен береке тапқан белгілі азамат көмекке зәру көптеген жанға көмек қолын созудан тартынып қалмайды. «Өсіп, өркендегіңіз келсе, айналаңа жәрдем беріп, тапқан табысыңмен бөлісіп отыруыңыз керек. Сонда ғана ісіңіз өрге басып, елдің алғысына бөленесіз» дейді ол сөз соңында.

Байқоңырлық Сейфулла сан кәсіпті игеріп отыр

<a href="https://kyzylorda-news.kz/">Kyzylorda-news.kz</a> “Zhas Project” жобасы жастарға үлкен мүмкіндік. Себебі, ойда жүрген кәсіпті немесе әлеуметтік жобаларды осы жоба арқылы іске асыра алады. Бүгінде жастардың қызығушылығы да айтарлықтай артып келеді. Бұл жобаға қатысуға биыл облыс бойынша 331 өтініш келіп түссе, 86 өтінім техникалық іріктеуден өткен. Жүзден жүйрік, мыңнан тұлпар атанған 14 жастың жобасы жеңімпазы атанды. Байқаудың барысы жайында Өңірлік коммуникациялар қызметінің ақпарат алаңында жобаның облыс бойынша тәлімгері Әкімбек Әлібек пен жоба жеңімпазы Фарида Төлеш айтып берді.<blockquote>– «ZHAS PROJECT» жобасы - жергілікті қоғамдастықтың әлеуметтік проблемаларын шешуге бағытталғанын атап өткен жөн. Тиісінше, ғылыми зерттеулер жүргізу, тұрғын үй, жер учаскесі және автокөлікті сатып алу немесе жалға алу және байқау шарттарына теріс әсер етуі мүмкін жобалар қабылданбайды. Көптеген жобалардың ішінде үздік атанған 14 жоба өздерінің әлеуметтік жобасын іске асыру үшін 1 млн теңге көлемінде шағын грант алды”, - деді Әкімбек Мұратбекұлы.</blockquote>Ал Фарида Төлешті байқау жеңімпазы қылған жартылай фабрикат шығару жобасы. Брифингте ол осы бағыт бойынша жұмысын жалғастыратынын жеткізді.<blockquote>– Жобадан алған әсерім шексіз. Жеңімпаз атанған 14 үміткердің қатарынан табылғаныма қуаныштымын. Байқау қорытындысы шығам дегенше күн өтпей қойды. Жақсы жаңалықтан үміт үзбедім. Үздік деп танылғанымды мақтан тұтамын. Мен негізі медицина саласының қызметкерімін. Бірақ қазірде мамандық бойынша жұмыс жасамаймын. Осы жартылай фабрикат шығару жобасын одан әрмен жалғастыру жоспарымда бар”,- деді Фарида Бақытжанқызы.</blockquote>Фото: Қызылорда облысының Өңірлік коммуникациялар қызметі

Жастарға бағытталған жобаның жемісі 

<a href="https://kyzylorda-news.kz/">Kyzylorda-news.kz</a> Қызылорда облысы бойынша&nbsp;мемлекеттік кірістер департаментінің&nbsp;түсіндіру жұмыстары және&nbsp;байланыс орталығы басқармасы дара кәсіпкерлер қызметін тоқтатудың &nbsp;басты&nbsp;тәртібін ұсынады.Дара кәсіпкер (әрі қарай – ДК) жекелеген санаттарының қызметін оңайлатылған тәртіппен тоқтатуҚызметті тоқтату туралы салық өтінішін беру сәтіне бір мезгілде талап қоюдың ескіру мерзімі ішінде мынадай шарттарға сәйкес келетін ДК жатады:1) тіркелмеген ҚҚС төлеуші ретінде есепке алу;2) бірлескен кәсіпкерлік нысанында қызметті жүзеге асырмайтындар;3) жекелеген қызмет түрлерін жүзеге асырмайтын;4) тәуекелдерді бағалау жүйесі іс–шараларының нәтижелері бойынша іріктемелі салықтық тексерулер тізімінде жоқ не тәуекел дәрежесін бағалау негізінде Ерекше тәртіп бойынша жүргізілетін салықтық тексерулердің жартыжылдық кестесінде жоқ, сондай–ақ тәуекел дәрежесін бағалау негізінде мерзімді салықтық тексерулер;5) салықтық берешегі, әлеуметтік төлемдер бойынша берешегі жоқ;6) тәуекелдерді басқару жүйесі бойынша тәуекелдердің жоғары деңгейі жоқ.ДК өзінің орналасқан жері бойынша салық органына бір мезгілде ұсынады:1) Қызметін тоқтату туралы салықтық өтініш;2) Тарату салық есептілігін;3) БКМ есептен шығару туралы салықтық өтініш (бар болса).Салық органы салық міндеттемесі орындалған күннен бастап үш жұмыс күнінен кешіктірмей ДК–ны тіркеу есебінен шығаруды жүзеге асырады және ДК–ны тіркеу есебінен шығару туралы ақпаратты уәкілетті органның интернет–ресурсында орналастырады.ДК мәртебесін салық төлеушінің өз кабинетінде, «e–salyq Business» мобильді қосымшасында немесе ҚР ҚМ МКК ресми интернет–ресурсында дербес нақтылауға болады (www.kgd.gov.kz) «Электрондық сервистер» / «Бизнеске көмек» / «Салық төлеушілерді іздеу» бөлімінде.Қызметті тоқтату кезінде дара кәсіпкерлердің жекелеген санаттарының салық міндеттемесін орындау ерекшеліктеріне тоқталып өтсек.Осы бап қызметін тоқтататын, бір мезгілде мынадай шарттарға сәйкес келетін ДК салық міндеттемесін орындау ерекшеліктерін белгілейді:1)&nbsp;регламентке қойылған күннен бастап Қаржы–шаруашылық қызметті жүзеге асырмайтын ҚҚС төлеушілер болып табылады. ҚҚС бойынша есепке алу немесе ҚҚС төлеушілер болып табылмайды;2) тәуекелдерді бағалау жүйесі іс–шараларының нәтижелері бойынша іріктемелі салықтық тексерулер тізіміне енгізілмеген не тәуекел дәрежесін бағалау негізінде Ерекше тәртіп бойынша жүргізілетін салықтық тексерулердің, сондай–ақ тәуекел дәрежесін бағалау негізінде мерзімді салықтық тексерулердің жартыжылдық кестесіне енгізілмеген.ДК қызметін тоқтату туралы шешім қабылданған жағдайда орналасқан жері бойынша салық органына бір мезгілде ұсынады:1) Қызметін тоқтату туралы салықтық өтініш;2) Рұқсаттар және хабарламалар саласындағы уәкілетті орган бекіткен нысан бойынша жекелеген қызмет түрлерін жүзеге асыратын салық төлеуші ретінде қызметтің басталғаны немесе тоқтатылғаны туралы хабарлама;3) Тарату салық есептілігін;4) бақылау–касса машинасын есептен шығару туралы салықтық өтініш (ол болған кезде).Бұл ретте, ДК–ге қатысты камералдық бақылау нәтижелері бойынша хабарлама орындалмаған жағдайда, Салық кодексінің 18–тарауында көзделген тәртіппен салықтық тексеру жүргізіледі.Бұл ретте салықтық тексеру осындай хабарламаны орындау мерзімі өткеннен және (немесе) анықталған бұзушылықтар бойынша келіспеу туралы түсініктеме алғаннан кейін он жұмыс күнінен кешіктірілмей басталуы тиіс.ДК–ді тіркеу есебінен шығару туралы ақпарат ДК тіркеу есебінен шығарылған күннен бастап үш жұмыс күні ішінде уәкілетті органның интернет–ресурсында орналастырылады.&nbsp;Дина АлиеваҚызылорда қаласы бойынша МКБ бас маманы.

Қазақстан және Қызылорда облысының жаңалықтары: Кәсіпкерлік