&nbsp;<a href="https://kyzylorda-news.kz/">Kyzylorda-news.kz</a>&nbsp; &nbsp;Мемлекеттік тіл – ұлттың ұлылығын айшықтайтын, бірлік пен татулықтың берік кепілі. Қазақы қаймағы бұзылмаған Сыр өңірінде мемлекеттік тіліміз – қазақ тілі ешқашан құндылығын жоғалтқан емес. Осы орайда, биыл Сыр елінде «Руханият жылы» болып жарияланған болатын. Соның аясында 3-30 сәуір аралығында «Тіл – руханият өзегі» атты жастар арасында мемлекеттік тілді дәріптеудің арнайы тіл айлығы жарияланды. Бұл туралы Өңірлік коммуникациялар қызметінің ақпарат алаңында облыстық қоғамдық даму басқармасы басшысының орынбасары Артур Қамбаров хабарлады. – Мемлекеттік тіл – Тәуелсіз еліміздің басты ұлттық коды. Қандай ел болмасын, мемлекеттік тілдің мәртебесі – тілді қолданушыларға тікелей байланысты. Осыған орай, өңіріміздегі жастар арасында мемлекеттік тілдің қолданысын кеңейту мақсатында бір ай көлемінде «Тіл – руханият өзегі» атты тіл айлығы жарияланды. Іс-шара жоспарына сәйкес, 4-19 сәуірде «Тіл тазалығы» акциясы, 8 сәуірден бастап «Тіл – ұлттың жаны» атты студенттер арасында байқау, 9 сәуірде «Тіл және жастар» тақырыбында дебат ойыны, 12 сәуір күні «KAZAKH TIL QUIZ» интеллектуалды сайысы ұйымдастырылады. Ал, 15 сәуір – «Қозы Көрпеш-Баян сұлу» күніне орай жоғары және арнаулы орта оқу орындарының жастары арасында қазақтың ұлттық киімін кию күні болып белгіленді. 16 сәуірде ардагерлер мен жастар арасында «BIR TOLQYNDA» диалог алаңы өткізілсе, 18 сәуірде ұлттық құндылықтарды насихаттауға арналған «Этно QUIZ» ұлттық-танымдық интеллектуалды сайысы болады. Шара тізбегі бойынша 23 сәуір күні «Оян, қазақ!» кинофильмін жастар арасында көрсетіліп, талқыланады. Ал жарияланған айлық 30 сәуір күні филолог ғалымдардың, тіл жанашырларының және жастар ұйымдарының қатысуымен «Ұлттық рухтың негізі - ана тілі» атты дөңгелек үстелмен қорытындыланады, - деді Артур Раушанбекұлы.&nbsp; Брифинг барысында Халықаралық «Қазақ тілі» қоғамы облыстық филиалының төрағасы, тіл жанашыры Сәдуақас Аңсат мемлекеттік тілдің маңыздылығына тоқталып, өз пікірін ортаға салды. – &nbsp;Мемлекет басшысы Атырауда өткен Ұлттық құрылтайда мемлекеттік тілге қатысты өзекті мәселе көтерді. Біздің Сыр елі таза қазақша сөйлетін, тұрғындары да ұлттық тілді қолдайтын аймақ ретінде көпке белгілі. Десе де, кейінгі жас буынға мемлекеттік тілді дұрыс дәріптеуіміз қажет. Жастар ертеңгі болашағымыз десек, қоғам болып мемлекеттік тілдің мәртебесін көтеруіміз тиіс. Бұдан бөлек, мемлекеттік мекемелерде де ана тіліміз кейінге ысырылып қалмауын қадағалауымыз керек. Себебі, баршаңызға белгілі, көптеген мемлекеттік мекемелер қазақ тілімен бірге орысша құжат беруін талап етеді. Сондықтан да өз ана тіліміздің мәртебесін көтеріп, ұлт жанының бір бөлшегі саналатын мемлекеттік тілді құрметтейік, - деді Сәдуақас Әбдіқадырұлы. Сондай-ақ, облыстық Жастар ресурстық орталығында да тіл айлығы түрлі бағыттағы іс-шаралардың ұйымдастырылуымен айшықталмақ. Толығырақ облыстық Жастар ресурстық орталығы КММ директорының орынбасары Қорған Өтегенов баяндады. –Сәуір айының 3-нен бастап жастар арасында мемлекеттік тілді дәріптеу бойынша 12 тармақтан тұратын тіл айлығы жарияланды. Бекітілген жоспарға сәйкес, облыс көлеміндегі жастар арасында түрлі іс-шаралар ұйымдастырылады. Атап айтқанда, интелектуалдық сайыстар, дебат ойындары және дөңгелек үстелдер өткізіледі. Аталмыш шаралардың басым көпшілігі – облыстық Жастар ресурстық орталығында өтеді деп жоспарлануда, - деді Қорған Өтегенов. Фото: Қызылорда облысының Өңірлік коммуникациялар қызметі &nbsp;

«Тіл – руханият өзегі» атты тіл айлығы жарияланды

<a href="https://kyzylorda-news.kz/">Kyzylorda-news.kz</a>&nbsp;«Кітап оқитындар теледидар көретіндерді басқарады», – деген Ф.Жанлистің сөзін естімеген адам кемде-кем.&nbsp;Ғалымдар ақыл-ойды ұзақ уақыт сақтап қалу үшін: миды жаттықтырып отыру керек дейді.Мидың қорегі – кітап. Әлеуметтік зерттеулер нәтижесінде ғалымдар кітап оқу ақыл-ойды ғана емес, жан мен тәннің саулығын да арттырады деген қорытындыға келді. Әсіресе кітап оқудың күйзелістен арылтуға ықпалы зор екен. Америка ғалымдары кітапты көп оқитын бір топ адамның миын магнитті-серпінді бақылаудан өткізген. Нәтижесінде адам миының қабылдауға жауапты бөліктерінің белсенді әрекет ететіні анықталды. Мұндай нәтиже теледидар қарағанда немесе компьютерлік ойын ойнағанда да байқалмайтын көрінеді. «Түрлі шығармалардың ішіне ойша ену адамның елестету, қиялдау мүмкіндігін арттырады, яғни адамның физикалық және психикалық жай-күйі жақсарады», – дейді ғалымдар.Ақпарат пен технологиялар ағынын бойлап бара жатқан қоғам мәселесінің бірі – балаларды кітап оқуға баулу.&nbsp;Компьютерлік ойынға құмартқан жасөспірімнің смартфонға үңілуіне онлайн сабақ та себеп. Балаға қалай кітап оқытамыз? Қандай тәсілдер бар? Жаңа ұрпақтың тәрбиесіне алаңдайтын ұстаз бен әдеби блогердің, баспа саласындағы тәжірибелі маманның пікірін білген едік.Зәуре Батаева, аудармашы, әдеби блогер:<blockquote>– Біз бәрін смартфон заманынан көреміз.&nbsp;Бірақ балаға қай заманда болсын кітап оқыту оңай шаруа емес. Сондықтан стратегия мен тактиканы саналы түрде ерте құрған дұрыс екен. Менің әкем ол жағынан жақсы айла тапқан. Жас ата-аналарға пайдасы тиіп қалар, айта кетейін. Ол кісінің қолданған стратегиясы қызық: ес білгелі көргеніміз – әр бөлмеде сөре-сөре кітап, қап-қап газет-журнал. Сапардан келсе, кем дегенде 5-6 кітап көтеріп келетін. Сөйте тұра, бізге мынаны оқы, ананы оқы деп бұйырған емес. Сұрақ қойсаң: «Бәленбай кітапты қара, бәленбай энциклопедияның осындай деген әріпін қара, бұл кітаптың бәрі сендер үшін», – деп жауап беретін.Самсап тұрған кітапты көріп өскен бала күндердің бірінде сөрені жағалап, кітапқа үңіліп, қопара бастайды.&nbsp;Бірден оқып кетпесе де, бойында кітапқа деген ынтызарлық қалыптасады. Тәжірибелі ата-аналардың айтуынша, жеке өзіне арнап алынған кітаптың, тіпті, кітап сөресінің де маңызы зор көрінеді.Осының бәрін ескеріп, ініме арнайы «Батудың басынан кешкендері» мен «Гарри Поттердің» қазақшасы, ал әлем ертегілері мен аңыздарынан «Мың бір түннің» балаларға арналған нұсқасы, Румидің мысалдары, «Алиса» мен «Винни Пух» кітаптарын жиып қойдым.</blockquote>Ержеңіс Әбдиев, балалар ақыны, ұстаз:<blockquote>– Балаларды қалай кітапқа қызықтырамыз деген ой бұрыннан мазалайтын.&nbsp;Өзім балалар әдебиетінен ойып тұрып орын алдым деп айта алмаймын. Біріншіден – ұстаз­бын. “Ержеңістің ерекше есептері” деген жинағым шықты. Яғни өлең арқылы берілген логикалық есептер, жұмбақтар жинағы. Туындының таралымы жақсы болды. Тапсырыс берген оқырмандарым кітап оқымайтын балалардың өзі аулада жиналып, кешкілік бірігіп осы жұмбақтарды шешіп жатқанына куә болдық деп, суреттерін маған жолдап отырды. Балалардың кітапқа қызығушылығын арттыруға осындай бір ерекшеліктер керек шығар деп түйдім.Ұстаз болғандықтан, кейде оқушымен пікірлесіп, қандай кітап оқып жатқандарын, кітапқа деген көзқарасын сұраймын.&nbsp;Қазақтың классиктерін, қазіргі жазушыларын айтсам, көбісі танымайды. Оқушымның біразы шетел әдебиетін оқиды екен. Әлем әдебиетінен аударылған фантастика жанрындағы шығармалардың орысша нұсқасын көп қарайды. Қазақта фантастика жоқ емес. Осы жанрды дамытып, ертегі, шағын проза жазуымыз керек. Балалардың әдебиетке қана емес, жалпы, білімге деген қызығушылығына кедергі – телефондағы түрлі ойынның, қызықты бағдарламалардың қолжетімділігі. Қазір секунд сайын жаңа ақпарат алатын жағдайдамыз. Ақпараттың көптігі мен жылдамдығы балалардың мектепте беріліп жатқан білімді қабылдауына кедергі келтіреді.Қазір кітапханаларда, қосымша оқыту орталықтарында «coworking» деген бөлім ашылды. Соның аясында апта көлемінде, кейде екі немесе үш апта сайын балаларға проза оқуға тапсырма береміз. Оқып келген соң шығарманы бірге талдаймыз. Мәселен, топта 20 оқушы болса, соның кемі оны оқып келеді. Көбіне оқып келген балалармен кітап талдау барысында басқа балалардың қызығушылығы артып, талдауға қосылып жатады.</blockquote>Раиса Қадыр, баспагер:<blockquote>– Балалардың жас ерекшелігін де назарға алу керек.&nbsp;Мысалы, кішкене балалардың ертегілер, суреттері көп кітаптарды оқуға құмарлығы басым. Бастауыш сынып оқушыларына табиғат туралы кітаптарды көп ұсынады. Қоршаған ортаны қорғауды, экологияны наисхаттайтын кітаптар отандық баспаларда көптеп шығып жатыр. Солардың бірнешеуін балаға алып беруге болады. Жасөспірім балалар комикс кітаптарды көбірек сұрайды. Әрбір ата-ананың ең үлкен мәселесі – баланы планшеттен алшақ ұстау. Әсіресе ковид заманында балалар қашықтан оқуға кетіп, телефон, компьютерге телміріп отырып қалды ғой. Енді оларды технологиядан алшақ ұстау бұрынғыдан да қиындай түсті. Ендеше балаларды кітаппен қалай достастырамыз? Тамаша комикс кітаптар, иллюстрациялы еңбектер бар, соларды балаға ұсынып көруге болады. Өз балам комикс кітаптарды өте қызығып оқып жүр. Планшеттен басқаға көңіл аударғысы келмеу мәселесі менің баламда да бар еді. Сол кезде суретті, көркем безендірілген, ұл балаларға арналған (арасында болмайтын, тіпті дөрекі сөздері де бар) кітапты ұсынып көріп едім, бас алмай оқып шықты. Меніңше, бала планшетпен дос болғанша, кітаппен дос болғаны дұрыс. Осындай түрлі жанрдағы кітаптардан басталған достық мазмұнды, басқа да кітаптармен достыққа алмасатынына сенімдімін.Балаға кітап оқуға бергенде ата-ана өзіне де кітап алса деймін. Себебі, бала үлкендерге қарап бой түзейді. Ата-ана кітап оқып жүрсе бала да кішкентайынан кітап оқуға құмар келеді.</blockquote>&nbsp;Фото: freepik.com

Жасөспірім балалар комикс кітаптарды көбірек сұрайды

<a href="https://kyzylorda-news.kz/">Kyzylorda-news.kz</a> Ұлт сауатты болу үшін, білім сапалы болуы тиіс. Бүгін білектінің емес, білімдінің сайран құрған заманы екенін ескерсек, білім беру жүйесі осал елдің «болашағы бар» деп айту асылық болар. Өткен 2023 жыл Шиелі аудандық білім саласында несімен есте қалды? Саралап көрелік.САН МЕН САПАҰрпаққа сапалы білім беру – әрбір ұстаздың парызы. Ал білім беру жүйесі – қай кезеңде болмасын қызығы мен қиындығы мол күрделі сала. Оқушыларға жүйелі білім беріп, білікті азамат етіп шығару ұстаздар тарапынан үлкен ізденіс пен қажырлықты талап етеді. Шәкірттерге сапалы білім беру үшін Шиелі ауданының мектептерінде мейлінше жағдай жасалуда. Шиелі аудандық әдістемелік орталық арқылы мұғалімдердің шығармашылық ізденістерін дамыту, кәсіби біліктіліктерін жетілдіру, өзара тәжірибе алмасу бағытында кәсіби байқаулар, конференциялар, педагогикалық оқулар және дарынды оқушылармен жұмыстар ұйымдастыру, оларды анықтау, танымдық деңгейлерін көтеру, шығармашылық жұмыстарға баулу бағытында танымдық шаралар өткізіліп, мектеп бітірушілерді ұлттық бірыңғай тестіге дайындықты жетілдіру мақсатында әдістемелік көмектер ұйымдастырылуда. Осындай жүйелі жұмыстардың арқасында ауданда білім сапасы жылдан жылға көтеріле түсуде. Нақтырақ айтқанда, 2023-2024 оқу жылы І тоқсан қорытындысымен барлық білім беру мекемелері бойынша білім сапасы 55,1 пайыз, үлгерім 99,93 пайызды көрсеткен.&nbsp;Шиелінің ауданының білім бөліміне қарасты 38 мектепте 18 462 оқушы бар. Оның&nbsp;1606-сы мемлекеттік мектептерге 1-сыныпқа қабылданса, ал 122-сі жеке мектептердің (Самғау скулл, Зияткер) табалдырығын аттаған.&nbsp;665 БАЛА ИНКЛЮЗИВТІ БІЛІМ&nbsp;АЛАДЫҚазіргі таңда барлық әлем жұртшылығының назарын аударып отырған мәселе&nbsp;–&nbsp;балалардың жеке сұраныстары мен ерекшеліктеріне ортаның, отбасының қатысуымен инклюзивті білім беру. Компьютерлік технологияның арқасында көптеген мүмкіндік пайда болғанын ешкім жоққа шығара алмайды. Баланы оқыту қызметін ынталандыру жағдайында оның ықпалы орасан. Сондай-ақ инклюзивті білім беру инновациялық әдістермен, оның ішінде компьютерлік технология, интерактивті тақта сияқты білім беруге қажетті жаңа ақпараттық технологияларымен қамтамасыз етілсе, келешекте мүмкіндігі шектеулі балаларға білім беру жүйесіндегі кедергілер азаяды деген сөз. Кемтар балалардың ата-аналары көмекшіге немесе арнайы мектептерге, арнайы интернаттарға, балабақшаға баласын бергісі келмесе, инклюзивті білім беретін мектептерге апаруға бүгінде толық құқылы. Шиелі ауданында инклюзивті білімді қажет ететін балалардың жай-күйін білмекке Шиелі аудандық білім бөлімінің басшысы Жібек Баймұратоваға хабарласып, сұрадық.<blockquote>– Ерекше білім беруді қажет ететін балалар үшін инклюзивті ортаны қалыптастыру бойынша қазіргі таңда педагогикалық-психологиялық кабинеттің қорытындысына сәйкес, ауданда 665 ерекше білім беруді қажет ететін балаларға оңтайлы жағдайлар жасалынды. Жалпы ауданда инклюзивті біліммен қамтылған мектептер үлесі – 87,5 пайыз. Оқу үдерісін сапалы ұйымдастыруды қамтамасыз ету мақсатында жылма-жыл жаңа модификациялы пән кабинеттерімен толықтырылуда. Мәселен, 2021 жылы жаңа модификациялы 5 пән кабинеті және 10 мектепке инклюзив кабинеттері алынса, 2022 жылы 5 мектепке инлюзив қолдау кабинеттері алынып, 6 мектепке дейінгі білім беру ұйымдарына 6 логопункт кабинеті ашылды. Онда логопед, психолог, әлеуметтік педагог мамандары жұмыс жүргізеді. Кабинетте баланың психикалық дамуын жетілдіру, әлеуметтік бейімделуін қамтамасыз ету, танымдық процестерін дамыту үшін арнайы құрал-жабдықтармен жабдықталған,&nbsp;– деді.</blockquote>БАЛАЛАР ҮЙІРМЕГЕ ҮЙІРБаланың жан-жақты сауатты, салауатты, өнерлі де талапты болып қалыптасуына үйірменің үйретері көп. Қолы қалт еткенде пайдалы іспен шұғылданса, өзі үшін де, ата-анасы үшін де маңыздыт. Бұл ретте Шиелі&nbsp;ауданында 2 мектептен тыс қосымша білім беру ұйымдары жұмыс істейді. Оған екі мыңға жуық бала қатысып, білім нәрімен сусындауда. Ал мектеп жанындағы спорттық секциялар мен үйірмелерге ынтасы ашылып, тіркелген 16 мыңнан астам жеткіншек бар екен. Қоса кеткен жөн, барлық білім беру ұйымында жүргізілетін «Ұлттық пікірсайыс қозғалысы», «Мектеп парламенті», «Оқуға құштар мектеп», «Мектеп және театр» жобалары бойынша бірқатар жоғары нәтижелерге қол жеткізген. Креативті жобалардың есебінен ынталы оқушылардың саны артып, қазіргі уақытта құрамындағы балалар саны 9 мыңнан асып жығылады. 5-7 сынып оқушылар арасында өтетін республикалық «Зерде» конкурсының облыстық кезеңіне 13 оқушы қатысып, оның үшеуі ІІ орын, 6 оқушы ІІІ орын, төртеуі грамота алған. 9-11 сыныптарға арналған республикалық олимпиаданың облыстық кезеңіне 25 оқушы қатысқан. Оның 4 оқушысы ІІІ орын, 1 оқушы ІІ орын, тағы біреуі І орын, ал қалған төртеуі алғыс хатпен марапатталған.БАҚЫЛАУ КҮШЕЙГЕН«Мектепте балалар өздерін қай жағынан да жайлы сезінуі керек. Бөгде адамдардың мектепке кіруіне жол беруге болмайды. Сондықтан, білім ошақтарының бәріне дабыл қағу, бейнебақылау жүйесі орнатылады. Көп жыл бұрын салынған ескі мектептер талапқа сай емес. Министрлік әкімдіктермен бірлесіп, мектептердің қауіпсіздігін толық тексеруі керек. Сондай-ақ, жаңа мектептердің жобасын жасағанда бұл мәселе мұқият ескерілуге тиіс». Бұл Мемлекет басшысы Қасым-Жомарт Тоқаевтың сөзі. Иә, бүгінде оқушылардың қауіпсіздігін қамтамасыз ету мемлекеттің аса маңызды міндеттерінің біріне айналып отыр. Әлгінде айтқан ел Президентінің тапсырмасына сәйкес, қазіргі таңда білім беру ұйымдарында бейнебақылау жүйесі күшейтілуде.&nbsp;Тиісінше аудан мектептерінде балалардың қауіпсіздігін қамтамасыз ету бойынша жүйелі жұмыстар атқарылуда. Оны біз білім бөлімінің басшысы Жібек Орынбайқызымен тілдескенде естідік.<blockquote>– Білім беру ұйымдарының қауіпсіздігін қамтамасыз ету мәселесі басты назарда болуы тиіс. Ол үшін ең алдымен күшейтілген режимде аудандық полиция бөлімшесімен бірлескен шараларды жүзеге асырудамыз. Білім және ғылым министрінің бұйрығымен бекітілген білім беру объектілерін қорғауды ұйымдастыру жөніндегі нұсқаулық бойынша 40 білім беру ұйымының 14-де бейнебақылау камерасы полиция бөлімдеріне қосылса, 16 мектепке турникет орнатылды. 2023 жылға 30 білім беру ұйымдарына дабыл түймесін орнатуға қаржы бөлініп сатып алу жұмыстары жүргізілді, – деді.</blockquote>Қалай болғанда да, ауданның білім сапасын көтеріп, саналы да тәрбиелі ұрпақ тәрбиелеп шығару қажет. Ол үшін ата-ана, мұғалім, оқушы болып тығыз байланыста жұмыс істеген игі. Себебі үштік одақ біріксе, мыңды жығады.

Шиеліде 665 бала инклюзивті білім алады

<a href="https://kyzylorda-news.kz/">Kyzylorda-news.kz</a> Қазақстан мен Оңтүстік Кореяның жоғары білім беру саласындағы ынтымақтастығын нығайтуда маңызды оқиға орын алды. Қазақстан Республикасының Ғылым және жоғары білім министрі Саясат Нұрбек Сеул Ұлттық Ғылым және Технологиялар Университетінің (SeoulTech) президентімен кездесті.Министрмен бірге кездесуге Кореядағы Қазақстан республикасының Елшісі Нұрғали Арыстанов, Қорқыт ата атындағы Қызылорда университетінің Басқарма төрағасы-Ректор Бейбіткүл Каримова қатысты.Жиын барысында ақпараттық технологиялар мен жасанды интеллект саласындағы ынтымақтастық туралы келісті. Келісім, студенттердің алдымен Коркыт ата атындағы Қызылорда университетінде SeoulTech бағдарламасы бойынша оқытылып, одан кейін оқуларын Кореяда жалғастырып, екі жақты диплом алу мүмкіндігін қарастырады. Бұл келісім LUPIC жобасының жалғасы ретінде, онда екі университет жасанды интеллект және зерттеу бағдарламаларын дамыту жөнінде ынтымақтастықты көздейді. Сондай-ақ Қазақстан студенттеріне Оңтүстік Кореяның көшбасшы университетінде сапалы білім алуға және жасанды интеллект саласында жоғары білікті маман болуға мүмкіндік береді.Сапар барысында SeoulTech университетінің IT мамандықтары департаменттерінің басшыларымен кездесулер өткізілді. Осы кездесулерде ынтымақтастықтың болашақ перспективалары талқыланды, бұл әріптестікті кеңейтуге және екі жақты білім беру бағдарламаларын дамытуға мүмкіндік береді.Екі оқу орны студенттердің практикалық дағдыларын дамытуға басымдық береді, бұл жоба аясында тағылымдама мен тәжірибе алмасуды белсенді қолданады. Сонымен қатар, Global Korea Scholarship бағдарламасы аясындағы студенттер мен магистранттарды қолдауға ерекше көңіл бөлінеді, бұл екі ел арасындағы академиялық және ғылыми байланыстарды нығайтуға ықпал етеді.Сонымен қатар, тараптар академиялық ұтқырлық желісі бойынша ынтымақтастықты, Қазақстанның жоғары оқу орындарында корей тілін оқыту курстарын ашуды, «Болашақ» халықаралық стипендиясы және «500 ғалым» ғылыми тағылымдамалар бағдарламасы аясындағы ынтымақтастықты кеңейтуді талқылады.Естеріңізге сала кетейік, өткен жылы Корея университеттерімен ынтымақтастықты дамыту жобасы бойынша Қорқыт ата атындағы Қызылорда университетінде Сеул университетінің SeoulTech жасанды интеллект мектебі ашылды. Нәтижесінде, өңірде IT технологиялар, киберқауіпсіздік және компьютерлік ғылым бойынша білім беретін болады. Бірлескен бағдарламалар тіркеліп, инженерлік мамандарды даярлауды бастады.Қазіргі уақытта университет 200-ге жуық шетелдік оқу орны, мәдени және ғылыми орталықтармен ынтымақтастық байланыста екенін атап өтті. Бұл елдердің ішінде Корея Республикасы ерекше орын алады. Сеул ұлттық ғылым және технологиялар университетімен бірлесіп жұмыс жүргізу Қызылорда облысының және жалпы еліміздің экономикалық және цифрлық дамуына үлкен үлес қосады.<img src="https://knadmin.beoblood.kz/uploads/435109703_959624442573755_4968655980233285361_n_61906a675e.jpg" alt="435109703_959624442573755_4968655980233285361_n.jpg">&nbsp;<figure class="image"><img src="https://knadmin.beoblood.kz/uploads/432210749_959624522573747_3876366436535320771_n_e9b51b92fb.jpg" alt="432210749_959624522573747_3876366436535320771_n.jpg"></figure>

Корея Республикасымен қос дипломды білім беру бағдарламасын енгізуге келісім жүргізілді

Мұғалімдерді аттестациядан өткізу тәртібі қандай?

<a href="https://kyzylorda-news.kz/">Kyzylorda-news.kz</a>&nbsp; &nbsp;Сыр елінің топырағынан талай талант пен небір дүлдүлдер түлеген. Қасиет тұнған қойнауынан аты әлемге әйгілі Қорқыт бабадан бастап, батыр Жанқожа мен Бұқарбай, ғұлама Тұрмағанбет, ақын Әбділдә мен Нартай, Әбдіжәміл мен Қалтай, көмейіне бұлбұл ұялаған Роза мен Мәдиналар қанатын қомдаған. Қазіргі жас таланттар да сол ұлылардың ізін жалғап, Сыр елінің мәртебесін асқақтатып келеді.&nbsp; Арамызда жас болса да, қарым-қабілетімен биіктерді бағындырып, көпке танылып жүрген жас өрендер аз емес. Солардың бірі Қызылорда қаласының тумасы, жас талант – Айсана Айдосқызы. Айсана бала кезінен өте зерек, жан-жақты, өнерге де ерекше ықыласты болып өсті. Білімге жаны құштар, көпшіл әрі ақылдылығымен ортада ерекшеленіп тұрады. Жақында ғана Айсана өзінің алғырлығының арқасында балаларға арналған басты телевизиялық арна «Балапанның» жас зияткерлер бағдарламасы «IBARS»-та арнайы қонақ болды.&nbsp; Қызылорда қаласындағы ағылшын тілі тереңдетілген «YOUR ENGLISH SCNOOL» бастауыш мектебінің мектеп алды даярлық тобында оқып жүрген ол мәнерлеп оқуға ерекше қызығушылық танытқан. Осы қабілетінің арқасында телевизиялық шоу кастингіне қатысып, еліміздің түкпір-түкпірінен бақ сынаған 710 баланың ішінен топ жарды. Бағдарламаға қатысып, бүгінде қанжығасына арнайы алғыс хат пен ерекше сәтті еншілеп қайтты. – Бағдарламаға қатысу маған ерекше қуаныш сыйлады. Арнайы студияда, өзім секілді оқушылардың қатысуымен білім додасына түстік. Түрлі сұрақтар қойылып, оларға біз жауап бердік. Қызықты ойындар, суретті сұрақтар қойылып, тартысты ойын көрсеттік, - дейді Айсана бізге берген сұхбатында.

Зияткер шәкірт «Іbars»-та

<a href="https://kyzylorda-news.kz/">Kyzylorda-news.kz</a>&nbsp; &nbsp;Бүгін «Тәрбие, спорт және қосымша білім беру» орталығының жұмыс жоспарына сәйкес, Сырдария ауданы бойынша білім бөлімінің ұйымдастыруымен №129 Ә.Жәмішов атындағы мектеп-лицей базасында педагог-психолог мамандарына арналған «TEDx Syrdarya: Жаңа мүмкіндіктерге жол аш» тақырыбында облыстық семинар өткізілді.Семинарда «Отбасы және отбасылық қарым-қатынас психологиясы» тақырыбында «Сенімен болашақ» РҚБ психологі С.Абдрахманова және «Буллинг физиологиялық және психологиялық жарақат» тақырыбында №135 Асқар Тоқмағамбетов атындағы орта мектептің психологі Н.Омарова №36 Әбділда Тәжібаев атындағы мектеп-лицей психологі Т.Садақбаев TEDx форматта жұмыстар көрсетті. «Шебер сынып, Арт терапия» «Қазақтың жазылмаған психологиясы» №191 орта мектептің психологі Ж.Шахаева,«Мен сені көріп тұрмын» №147 мектеп психологі А. Кыдырова,«Ашу-ыза мен мазасыздықтан арылу техникалары» №37 мектеп-лицей психологі А.Байсалбаева сабақ көрсетті. «Ұйымшыл және тату» тақырыбында №129 Әбірәш Жәмішов атындағы мектеп-лицей психологі Қ.Сарсеналиева, №131 Талғат Қозыбаев атындағы орта мектеп психологі Б.Махашева, №210 орта мектеп психологі А. Алжанова, №42&nbsp;Қ.Баймағанбетов атындағы&nbsp;мектеп-лицейі психологі И.Жұмаділдаева TEAM BUILDING форматта жұмыстар көрсетті.Семинарды қорытындылай келе жұмыс көрсеткен мамандар «Тәрбие, спорт және қосымша білім беру» орталығының «Алғыс хаттарымен марапатталды.

Сырдариялық ұстаздар облыстық семинарда сабақ көрсетті 

<a href="https://kyzylorda-news.kz/">Kyzylorda-news.kz</a>&nbsp; &nbsp;Қызылорда қалалық орталықтандырылған кітапханалар жүйесіне қарасты №13 балалар кітапханасының ұйымдастыруымен 2 сәуір–Халықаралық балалар кітабы күніне Ә.Тыныбаев атындағы №11 мектеп-лицейінің кітапханасында 3 сынып оқушыларының қатысуымен «Кітап - сарқылмас қазына» атты әдеби кеш өткізілді. Мұндай шараны ұйымдастырудағы мақсат – оқушыларға кітаптың адам өміріндегі маңызды, кітаптың және балалар кітап күнінің шығу тарихымен таныстыру, кітапқа деген қызығушылығын арттыру, білімге деген құштарлығын ояту, кітапты сүюге, таза ұстауға тәрбиелеу.Шараға 3 сынып оқушылары мен жетекшілері, кітапхана меңгерушісі Шолпан Байымбетова, А.Құлмағамбетова қатысып, кітап туралы келелі әңгімелер айтты. Кітапхананың белсенді оқырмандары Б. Абайқызы, Ж. Ерболат, Н. Бақытжан, Н. Құрбанқызы, Ш. Сағидулла, Р. Ерқуат, Ә. Рахымша, А. Сейілхан, М. Қайрат, Ж. Ерболат, А. Ашығалы, К. Алмасқызы, А. Бекмұрат, Н. Бақытжан, Н. Мұратбай, Б. Абайқызы, қазақ ақындарының кітапқа арнау өлеңдерін жатқа айтты.Сонымен бірге олар жергілікті балалар жазушы Танаш Дәуренбековтың «Кітаптар мұңы» атты әңгімесінен көрініс көрсетті.Жас оқырмандар хормен «Құпия кітап» әнін жанды дауыспен айтып, қойылған сұрақтарға жауап берді. «Кітап - ғажайып қазына» атты кітап көрмесі ұйымдастырылып, балаларға оқуға қазақ, әлем жазушыларының қызықты кітаптарымен қатар, ертегілер ұсынылды.&nbsp;

Қызылордада халықаралық балалар кітабы күні аталып өтті

<a href="https://kyzylorda-news.kz/">Kyzylorda-news.kz</a>&nbsp; Бүгінде екінің бірі заңгер немесе банкир боламын деп кеуде қағады. Десе де, маман жетіспейтін салаларды да ескеру қажет. Өзінің сүйікті ісімен айналысқан адам ғана өмірде бақытты бола алады. Жақында осы мақсатта Қармақшы аудандық аграрлы-техникалық колледжде «Мамандығым – мақтанышым» атты студенттер арасында сайыс өтті. Жастар үшін маңызы зор бұл сайысты аудандық «АMANAT» партиясы, аудандық жастар ресурстық орталығы және колледж ұжымы ұйымдастырды. Ондағы мақсат – колледждегі жұмысшы мамандықтарда білім алып жатқан жастарға қолдау көрсету, жастар арасындағы ынтымақтастықты нығайту, болашаққа бағыт-бағдар беру. Білім беру ұйымында ерекше дарынды және кәсіби қабілетті білім алушыларды және өз ісінің шеберін анықтау, оқытумен қатар кәсіби шеберлігі бағытында практикалық жұмыстардың жүргізілуін жетілдіру.Студенттер арасындағы бұл сынды партияның аудандық филиалының төрағасы Әділ Қошалақов ашып, қатысушыларға сәттілік тіледі.&nbsp;<blockquote>– Мамандық таңдау да өмірлік жар секілді маңызды қадам. Себебі ол сенімен өмір бойы бірге жүреді, табыс та әкеледі. Егер өз ісіңнің шебері атансаң, табысың молаяды және абырой-бедел де әкеледі. Сіздер білім алып отырған аграрлы-техникалық колледж жастарға үлкен өмірге қадам жасайтын алғашқы орын. Мұнда адам өміріне ең қажетті деген мамандықтар бар. Мектепте білім мен тәрбиені меңгертсе, колледж білім-тәрбиемен қатар белгілі бір мамандыққа да баулиды. Бұл мамандықты меңгерген соң, әрі қарай жоғары оқу орныy оқуға да немесе алған білімдеріңіз бойынша жұмысқа орналасуға да болады. «АMANAT» партиясының сайлауалды бағдарламасында да жастарды қолдауға басымдық берілген. Соның ішінде жас мамандарға мемлекет тарапынан түрлі бағдарлама қарастырылған. Барлық қатысушыға сәттілік тілеймін. Болашақта білікті маман иесі болып, ауданның әлеуметтік-экономикалық дамуына зор үлес қосар ел азаматы болатындарыңызға сенім білдіремін, – деді Әділ Үсенұлы.</blockquote>Сондай-ақ аталған іс-шараға арнайы Жосалы кенті ардагерлер кеңесінің төрағасы Ерболат Ұзақбаев, партия ардагері Гүлжауһар Раева қатысып, студенттерге жылы лебізін білдірді.&nbsp;Сайыста колледждің «Автомобиль көлігіне техникалық қызмет көрсету жөндеу және пайдалану», «Ауыл шаруашылығын механикаландыру», «Тамақтандыруды ұйымдастыру», «Тігін өндірісі және киімдерді үлгілеу», «Электр жабдықтары» (түрлері салалары бойынша) мамандықтары бойынша студенттер тәжірибе алаңында бақ сынасты. Колледж ұстаздарынан құралған сарапшы топ қатысушылардың жұмысына баға беріп, сайыс нәтижесін шығарды. Қорытынды бойынша, Нұрдәулет Алтыруов, Бағдәулет Әбутәліпұлы, Гүлбейне Тұрғанбайқызы, Гүлістан Алтынбекқызы, Бекзат Алпысбаевтар өз саласының үздіктері атанды. Жеңімпаздарға ұйымдастырушылар атынан арнайы сыйлықтар мен дипломдар табысталды.&nbsp; &nbsp;

Қармақшылық студенттер мамандық бойынша сынға түсті

<a href="https://kyzylorda-news.kz/">Kyzylorda-news.kz</a>&nbsp;&nbsp; Ол жастайынан арманшыл, мақсатшыл болып өсті. Айналасындағылардың жақсы ісі мен қасиетін алуға тырысатын. Отбасындағы игі тәрбие де оның болашағына оң әсерін тигізді. Онымен қоса, мектептегі ұстаздарына еліктеп, солардай болсам деп ойлады. Сол алға қоя білген мақсаты оны тек қана биікке жетектеп, талай мәрте төрден көрінді. Иә ол төр – білім биігі болатын.Сөз етіп отырған білімді де білікті жасымыз қармақшылық – Нұрай Айтбайқызы бүгінде 24 жаста. Жосалы кенті орталығындағы Шоқан Уәлиханов атындағы №26 орта мектептің түлегі. Ол бастауыш сыныптардың өзінде-ақ бірнеше байқау мен пәндік олимпиадаға қатысып, жүлделі орындарды иеленген. Дарынды оқушы мектепке дейін-ақ жазу-сызуды үйреніп алады. Осылайша қатарына қарағанда көш ілгері болып мектеп табалдырығын аттаған бүлдіршіннің қабілетін ұлағатты ұстазы Ханымша Сүлейменова бірден-ақ жазбай таниды. Белсенді шәкірт жоғары сыныптарда да &nbsp;ізденісі мен қабілетін одан әрі шыңдап, түрлі байқауларға қатысып жүреді. Келешекте қазақ тілі мен әдебиет пәнінің мұғалімі мамандығын өмірлік таңдауы еткен Н.Айтбаева сол саладағы байқау-сайыстарға қатысып, бағын сынайды. Атап айтар болсақ, республикалық «Жарқын болашақ», «Ақберен» және осы деңгейде өтетін ғылыми жобалар конкурсы, «Яссауитану» білімділік байқауларында жүлделі орындарды иеленіп, мектебінің ғана емес, Сыр елінің мерейін тасытты. Мысалы ол 8-сыныпта оқып жүрген кезінде Алматы қаласындағы Қазақ туризм академиясының грантын иеленді. Мектеп бітірерде Ы.Алтынсарин атындағы республикалық олимпиаданың 1-інші орнын жеңіп алып, Қазақ Ұлттық Қыздар педагогикалық университетінің 100 пайыздық грантына қол жеткізеді. Сөйтіп, мектепті «Алтын белгіге» аяқтаған үздік түлек осы жоғары оқу орнының студенті атанады.&nbsp;Нұрайдың студенттік жылдары да жетістікке толы десек, артық емес. Онда да университеттің белсендісі атанып, «Студенттік омбутсмен» ұйымдарының төрайымдық қызметін атқарған. Білім алудағы ерекше жетістіктері үшін университет ректорының «Үздік студент – 2019» сыйлығымен марапатталып, сол жылы Астанада республикамыздың үздік студенттері қатарынан ойып орын алған. Сондай-ақ «Үздік студент» төсбелгісімен мадақталып, «Жас дарын» дарынды жастар жинағына есімі енгізілген. 2021 жылы жас ғалымдар арасындағы республикалық ғылыми жұмыстар байқауынан да оза шауып, білім министрінің грамотасына ие болған. Осы жылы «Алаш аруы» республикалық байқауының іріктеу кезеңінен сүрінбей өтіп, байқау жеңімпазы атанды.&nbsp;Ол аталған білім ордасын 2021 жылы «Үздік дипломмен» аяқтап, Алматыда бірнеше мектепке мұғалімдік қызметке шақырту алған. Дегенмен білімін әрі қарай жетілдіру үшін ол магистратураға грантқа оқуға түсіп, педагогика ғылымдарының магистрі атағын қорғап шығады. Білім бере жүріп, білім алуды көздеген жас маман бірнеше ғылыми мақаланың авторы. Өткен жылы Түркияда ғылыми іс-тәжірибеден өтіп, білімін тағы да шыңдап келді.Қазірде Нұрай Алматыдағы республикалық дарынды балаларға арналған қазақ тілі мен әдебиетін тереңдете оқытатын орта мектеп-интернатында ұстаздық етуде. «Темірді кеннен ізде, бақытты терден ізде» дегендей, шәкірт күнінде бірнеше республикалық байқаулардың биігін бағындырған жас маманның &nbsp;шәкірттері де республикалық Мәшhүр Жүсіп, Әбіш Кекілбаев оқулары, республикалық жалпы білім беретін пәндер бойынша ғылыми жобалар, Қ.Бітібаева, республикалық пәндік олимпиада, «Жарқын болашақ», «Ақберен» байқауларының бірнеше дүркін жеңімпазы. Ал өзі болса, ұстаздық еңбегінде «Дарынды балаларға – талантты ұстаз», «Педстарт» байқауларының жеңімпазы.&nbsp;Ұлт руханиятының ұстаханасына айналған Абай мектебінде еңбек ете жүріп, республикалық «Абайтану», «Мен жастарға сенемін» ақындар айтысы, «Абай әлемі», «Ділмар» шешендік өнер байқауларының ұйымдастырушыларының бірі. Мемлекеттік тілді дамытумен қатар, ұлттық құндылықтарды да дәріптеп жүрген жас ұстаз жуырда республикалық «Дарын» практикалық орталығы директорының Алғыс хатымен марапатталып, қазақстандық салалық білім және ғылым қызметкерлері кәсіподағының Алматы қалалық ұйымының «Үздік мұғалім» номинациясымен марапатталып отыр.&nbsp; – Білім мен ғылым – адамзат баласы ақыл-ойының еңбір жоғары сатысы саналады. Мені тәрбиелі де білімді болуға бағыттаған ата-анама, бауырларыма, мектептегі, жоғары оқу орнындағы &nbsp;ұстаздарыма айтар алғысым шексіз. Алғаш рет 3 жасымда қолыма әліппе ұстатып, әріп үйреткен марқұм әкеме деген ризашылығымды сөзбен айтып жеткізе алмаймын.&nbsp;Мамандығыма келер болсам, жас та болсам, бар ықыласымды, жүрегімді балаларға арнағанмын. Бірақ ғылым мен шығармашылықтан да алыстамаймын деп ойлаймын. Ұстаздық шын мәнінде мамандық емес, ұстаздық – сен дүние есігін ашқанда-ақ жаратушының пешенеңе жазып қоятын таңдауы іспетті. Сол таңдаудың ұстаздық мамандығына түскеніне өте қуаныштымын. Себебі, мамандығымды шын жаныммен сүйемін, – дейді кейіпкеріміз. &nbsp;

Дарынымен дараланған қармақшылық жас ұстаз

<a href="https://kyzylorda-news.kz/">Kyzylorda-news.kz</a>&nbsp; Ілімге деген ізденіс, білімге деген бағыт үлкен қызығушылық пен құмарлықтан туады. Білім мен ғылым жолындағы үлкен ізденістің арқасында «500 ғалым» жобасына қатысып, әлемнің үздік ғылыми орталықтарында тағылымдамадан өткен қызылордалық жас ғалымның бірі - Қорқыт ата атындағы Қызылорда университетінің оқытушысы, техника ғылымдарының кандидаты Гүлнұр Далдабаева ауыз су сапасын жақсарту мақсатында өзінің арнайы жобасын әзірлеген. Осыған орай, Өңірлік коммуникациялар қызметінің ақпарат алаңында жас ғалым БАҚ өкілдеріне өз жобасын толығырақ баяндап берді.<blockquote>Біз бұл тағылымдамаға 1 жыл бұрын дайындалған едік. Үлкен конкурстардан іріктелдік. Осының арқасында Қорқыт ата атындағы Қызылорда университетінің 14 оқытушысы шет мемлекеттерге тағылымдамадан өтуге мүмкіндік алды. Соның ішінде университет оқытушысы Эльмира Елеуова екеуміз Швейцария елі, Солтүстік –Батыс Швейцария қолданбалы ғылымдар және өнер университетінде үш ай көлемінде тәжірбие жинақтадық. "Білгенім бір тоғыз, білмегенім тоқсан тоғыз" дегендей, шет мемлекеттегі оқытушылардан үйренгеніміз көп болды. Жалпы әлемде су тапшылығы мәселесі күннен күнге күрделеніп барады. Осыған орай, былтыр университетінің ғалымдары мақсатты қаржыландыру бағдарламасы бойынша «Қызылорда облысында су тапшылығы жағдайында мал азықтық дақылдары мен ағаш екпелерін суару үшін сарқынды суларды қауіпсіз утилизациялау технологиясын әзірлеу» тақырыбындағы гранттық жобаны ұтып алды. Қазіргі таңда зерттеу жұмыстары жүргізілуде. Бұл бағыттағы жұмыстар өз жалғасын табатын болады, - деді Гүлнұр Төреханқызы.</blockquote>Тағылымдаманың басты мақсаты - агроөнеркәсіп кешені саласындағы ауыз су құрамын зерттеу.&nbsp;<blockquote>Өздеріңіз білетіндей, қазіргі уақытта су мәселесі барлық әлемді алаңдатып отыр. Осы бағытта ағынды сулар мен химиялық қоспаларды көптеп зерттедік. Әрине, шет мемлекеттегі озық тәжірбиелерді ғылыми жоба барысында пайдалану үлкен жұмысты талап етеді. Дегенмен, су сапасын жақсарту және оны қайта пайдалану жағын қарастырып көрмекпіз. Алдағы уақытта осы бағыттағы жұмысымызды жүйелеп, Тәжікстан астанасы Душанбені бетке алып, осы сынды және бір жобаға дайындықты бастаймыз,- деді Қорқыт ата атындағы Қызылорда университетінің аға оқытушысы, ауыл шаруашылығы ғылымдарының кандидаты Эльмира Шорақызы.</blockquote>Фото: Өңірлік коммуникациялар қызметі&nbsp;

Қызылордалық ғалым ауыз су сапасын жақсарту үшін арнайы жоба әзірледі 

<a href="https://kyzylorda-news.kz/">Kyzylorda-news.kz</a>&nbsp; &nbsp;Қызылордада А.С.Пушкин атындағы орталық кітапхананың ұйымдастыруы, Сейхун колледжінің 2 курс студенттерінің қатысуымен сатирик, Қазақстан жазушылар және журналистер одақтарының мүшесі, Қазақстан журналистер одағы сыйлығының лауреаты, «Ләммим», «Аһүһ» кітаптарының, «Ымжым», «Тойда жолығайық», «Қалай болса – солай» атты бірнеше өлең жинақтарының авторы Толымбек Әлімбекұлының мерейтойына арналған «Күлкі –жанның шипасы» атты мерекелік іс-шара өтті.Жиын 1 сәуір – күлкі күніне орай өткізілді. Шара барысында оқырмандарымыз сықақшы Толымбек Әлімбекұлының заманның лебі мен адамның демі арасындағы келеңсіз жайлар, өлеңдеріндегі ащы сатира, өткір сарказм және жеңіл әзілмен құралған шығармаларымен танысты.Сонымен қатар сатирик шығармаларында тіл, саясат, әлеуметтік мәселелер, ұлттық тақырыптарда кеңірек қамтылғанын саралады.Сейхун колледжінің бастауыш білім беру педагогикасы мен әдістемесі бөлімінің пән мұғалімі Шырманбаева Ақбота шараға қатысушыларға атақты сатирик Сейіт Кенжеахметұлының «Күлдіре білу — өнер, күле білу — өмір, күлкі болу – &nbsp;өлім» деген сөздерін айтып, әрдайым шынайы күліп жүріңіздер деп жылы лебізін білдірді.

Қазақстан және Қызылорда облысының жаңалықтары: Білім