<a href="https://kyzylorda-news.kz/">Kyzylorda-news.kz.</a> Жалағаш ауданындағы дарынды балаларды тәрбиелеп, шәкірттерді үздік жетістіктерге жетелеуде Темірбек Жүргенов атындағы №123 мектеп-лицейдің алатын орны айрықша. Әрине шәкірттің үздік болуы білікті ұстазға байланысты екені анық. Қазіргі уақытта мектептің дамуында, оқушылардың үлкен дәрежеде көрінуінде, жалпы аудан білімін жоғары деңгейде көрсетуде мектептің қазақ тілі мен әдебиеті және ағылшын тілі пәні мұғалімі Салтанат Орынтайқызының ерең еңбегін ерекше айтуға болады. &nbsp;Салтанат Қосжанова 1983 жылы 28 маусымда Жалағаш ауданында дүниеге келіп, 2000 жылы бүгінде өзі оқушыларына білім беріп жатқан Темірбек Жүргенов атындағы №123 мектепті тәмәмдаған. 2000-2005 жылдары аралығында «Қорқыт ата» атындағы мемлекеттік университеттің үздік түлегі атанып, сол жылдан бастап өз мамандығын жақсы көрген ұстазға айналған.Ұстаздық жолын сонау 2005 жылы Астана қаласынан &nbsp;бастаған &nbsp;Салтанат Орынтайқызы қазіргі таңда Темірбек Жүргенов атындағы №123 мектеп-лицей директорының тәрбие ісі жөніндегі орынбасары қызметін атқаруда. Осы жылға дейін өзінің ізденімпаздығы мен еңбекқорлығының арқасында тек қазақ тілі мен әдебиеті пәнінің мұғалімі ғана емес, сонымен қоса ағылшын пәнінің де мұғалімі қызметін атқарған. Иә, расында мұғалімге жеті өнер де аз! Осы ұранды ұстанған ұстазымыз Салтанат Қосжанова қандай жетістіктерге жеткенін білесіз бе?Он сегіз жыл бойы қаншама шәкірттің бойындағы шамын жаққан, шәкірттерін қаншама жетістікке жеткізген ұстазымыздың да жетістіктері аз емес. Атап айтсақ, «Педагогикалық идеялар фестивалі – 2020» республикалық байқауының жеңімпазы, 2020 жылдың қорытындысы бойынша облыс әкімі тағайындаған &nbsp;«Қызылорда облысының білім беру саласын дамытудағы еңбегі үшін» төсбелгісімен марапатталған.2021 жылы шығармашыл мұғалімдердің облыстық тәжірибе алаңында көрсеткен үздік жұмыстары мен жоғары кәсіби шеберлігі үшін Қызылорда облысы педагогтерінің біліктілігін арттыру орталығының «Құрмет» &nbsp;грамотасымен, «Пәндік олимпиада – дарындылар додасы, ғылымның алғашқы баспалдағы» тақырыбында облысқа шебер сынып көрсеткені үшін Қызылорда облыстық оқу орталығының сертификатымен, 24-31 наурыз аралығында Анталия қаласында өткен халықаралық семинарға «Қазақстан педагогтар қауымдастығы» атынан қатысып, Trends in the development of Turkish – Kazak modern education» атты халықаралық конференцияда баяндама жасап, арнайы сертификатын, Ы.Алтынсарин атындағы ұлттық білім академиясы мен Шымкент қаласы білім басқармасы ұйымдастырған «Заманауи білім беру парадигмасындағы Алтынсарин ілімі» атты аймақтық форумда «Ы.Алтынсарин шығармаларындағы рухани-мәдени құндылықтар» тақырыбында баяндама жасап, алғыс хатпен, Халықаралық қазақ тілі қоғамының Құрмет грамотасымен, Қазақстан Республикасының Оқу-ағарту министрлігі ұсынған «Арман-ПВ» баспасынан шыққан жалпы білім беретін мектептің 8,10,11 сыныптарға арналған «Абайтану» кешенді оқулықтары авторының бірі болып, &nbsp;осынша марапат иесі атанып, жыл соңын &nbsp;«Үздік педагог – 2022» атағының иегері дәрежесін алып, 3 млн теңге сыйақымен марапатталды.Сонымен бірге, аудан әкімінің «Жыл ұстазы 2022» номинациясының иегері атағымен 2022 жылды үздік нәтижеде аяқтады.Биыл Қызылорда облысының тілдерді оқыту орталығының алғысымен, Жалпы білім беретін пәндер бойынша облыстық олимпиада жеңімпазын дайындағаны үшін облыстық білім басқармасы басшысының алғысымен, жалпы білім беретін пәндер бойынша республикалық &nbsp;олимпиада жеңімпазын дайындағаны үшін облыстық білім басқармасы басшысының алғысымен, «Үздіксіз ізденіс жаңашылдыққа жетелейді» тақырыбында қазақ әдебиетінің классигі Ғабит Мүсіреповтің 120 жылдығына орай өткен облыстық семинарда шебер сынып көрсетіп, арнайы сертификатпен марапатталған. Астана қаласында өткен қазақ тілі мен әдебиеті пәні мұғалімдерінің республикалық тұңғыш сьезінің қатысушысы атанды. Сонымен қатар &nbsp;жақында ғана аудан педагогтары ішінде ең алғашқы «педагог-шебер» санатындағы ұстаз атағын иеленді.Осы орайда Әзілхан Нұршайықовтың «Егер ертең шәкірттеріңе үлгілі ұстаз боламын десеңдер, еңбекшіл болыңдар» деген сөзі еріксіз еске түседі. Білікті мұғалімнен білімді оқушы шығары анық. Ахмет атамыз секілді ұлт ұстазы бола білген, Ыбырай Алтынсарин секілді балаларды оқуға шақырып, Мағжан секілді жастарға сенген Салтанат Орынтайқызы ұстаздарға өз ойын жеткізді.&nbsp;<blockquote>– Ең бірінші, әрбір мұғалімнің бойында ыстық қайрат, нұрлы ақыл жылы жүрек болуы керек. Екіншіден, кез келген мұғалім ізденісте жүрсе, &nbsp;өз білімін үздіксіз дамуда ұстап, жетілдіріп отырса ғана нағыз шыңдалған, кәсіби мұғалім болып шығары анық. Бірақ &nbsp;ең маңыздысы, әр адам өз мамандығын жақсы көруі тиіс. &nbsp;Маған мамандығым қатты ұнағаны сонша үйде жатқан кезде емес, оқушыларға сабақ беру кезінде демаламын. Нағыз ұстаз уақытпен санаспай, күндіз-түні еңбектенсе ғана ол мұғалімнен нәтиже шығады. Қазақта «ауруын жасырған өледі» деген сөз бар, қазір қоғамда кітап оқитын оқушылар да, тіпті ұстаздар да жоқтың қасы. Абай атамыздың керемет бір сөзі бар, артық білім кітапта, ерінбе оқып көруге. &nbsp;Ұстаздарға айтар ақыл-кеңесім кітап оқитын ұрпақ тәрбиелеу қажет. Ал ол үшін мұғалімнің өзі кітап оқуы керек. Ауданда оқырмандар конференциясын ұйымдастыруды ұсынар едім. Сол арқылы ұстаздардың да, оушылардың да, жалпы қоғамның кітап оқуға деген махаббатын аша алатын секілдіміз, – деді Салтанат Қосжанова.&nbsp;</blockquote>Тоқсан ауыз сөздің тобықтай түйіні, ұстаз – ұлы есім. Ұлт ұстазы болған Ахмет Байтұрсынов та «мектептің жаны – мұғалім. Мұғалім қандай болса, мектеп сондай болмақ. Яғни мұғалім білімді болса, ол мектептен балалар көбірек білім алып шығады. Солай болған соң ең әуелі мектепке керегі – білімді, педагогика, методикадан хабардар, жақсы оқыта білетін мұғалім» дейді. Адамның адамшылдығы жақсы ұстаздан, батыр да, ақын да, басшы да, қосшы да осы ұстаздан тәлім-тәрбие алады. Әрбір ісіңіз жеңіске жетіп жатса, оның артында ұстаздың бір тамшы болса да еңбегі барын есте сақтаңыз.&nbsp;

Жалағаштық ұстаз дарынды балаларды тәрбиелеуде

<a href="https://kyzylorda-news.kz/">Kyzylorda-news.kz.</a> Қазіргі таңда ауылшаруашылығына көңіл бөлу басты назарда. Ол туралы мемлекет басшысы Қасым-Жомарт Тоқаев «Әділетті Қазақстанның экономикалық бағдары» атты Қазақстан халқына Жолдауында: «Ет, сүт, астық өнімдерін терең өңдеу және өндірістік жылыжай шаруашылықтарын дамыту сияқты біз үшін болашағы зор бағыттарға басымдық берген абзал» деп айрықша атап өткен болатын. Осы бағытта жылыжай салу жұмыстары қаламыздағы білім ордаларында да жалғасын тапқан. Сол жылыжайлардың бірі – Ж.Әбдірашев атындағы №62 мектеп-лицейіндегі жылыжай.Жалпы мектеп тарихы 1986 жылдан бастау алады. Сол уақыттан бері мектеп ішінде өз жұмысын жасап келген жылыжай тоқырау жылдарында өз жұмысын тоқтатқан болатын. Оған сол бір қиын шақта жылудың, жарықтың жетіспеушілігінен апаттық жағдайға түскендігі себеп болған. Дегенмен сол бір жұрнағы бар жылыжайды қайта дамыту ісінің биылғы жыл басында сәті түскен. Осылайша аудандық білім бөлімінің басшысы Санира Нұрқожақызының бастамасымен мектеп оқушыларының экология, биология сабақтарындағы теориялық білімін жетілдіруге әрі оларды еңбексүйгіштікке, табиғат қорғаны болуға баулу мақсатында жоба қолға алынды.Жобаға облыстық Білім басқармасынан 8 миллионға жуық қаржы бөлініп, мамыр айында мемлекеттік сатып алу жұмыстары өтті. Нәтижесінде 5млн. 300 мың теңге көлемінде жергілікті кәсіпкер Мұстафаева Құндыз жеңімпаз атанып, жобаны иеленді. Жоба жұмыстары маусым айында басталып, шілде айында өз мәресіне жетті. Дегенмен ауа-райының ыстық әрі құрғақ болуы себепті ол уақытта жылыжайды пайдалану мүмкіндігі болмады. Шілде-тамыз айлары толықтай дәнді дақылдарды өңдеп, күтумен кетіп, қыркүйек айында алғаш рет жылыжайға егу жұмыстары жүргізілді.<blockquote>– Қыркүйек айында алғашқы жұмыстар басталды. Оған оқушылар, мұғалімдер мен техникалық қызметкерлер атсалысты. Қазіргі таңда жылыжайда қияр, қызанақ, асқабақ, сарымсақ, саңырауқұлақ салат жапырақтары, аскөк сынды көкөністер мен құлпынай жемісі және түймедақ пен раушан гүлдері өседі. Сонымен қатар биология сабағындағы практикалық жұмыстар жүргізіліп отыр. Өткен аптада алғаш рет жылыжайда өскен аскөк пен салат жапырақтарынан бастауыш сынып оқушылары мен ыстық тамақпен қамтамасыз етілген оқушылар мектеп асханасынан дәм татты. Алдағы уақытта мектеп жылыжайынан алған көкеністерді де асханаға пайдалану ойда бар, – деді мектеп директоры Жасұлан Маханбетұлы.</blockquote>Бүгінде жылыжайдағы көкөністерді, гүлдерді баптау, егу, арам шөптен тазалау жұмыстары Аида Қыпшақбайқызының мойнында.<blockquote>– Өзім жастайымнан ата-анамның гүл баптағанын, жеміс өсіргенін көріп өскем. Сондықтан бұл жұмыстар маған қиындық тудырмайды. Қыркүйек айынан бері апта сайынғы тазалық жұмыстарын жүргіземін. Жылыжайда тамшылатып суару жүйесі жұмыс жасайды әрі жылыжай іші ылғалды. Сол себептен өте күтімді қажет ететін өнімдерді өсіру де оңайырақ. Бүгінде балалардың сабақ үлгеріміне, табиғатты қорғау мақсатында жұмыстар жүргізіліп отыр. Күзгі демалыс күндерінде №260, №13 орта мектеп оқушыларына да арнайы экскурсия ұйымдастырылған болатын. Солардың бәрі мен үшін қуаныш. Алдағы уақытта жыл аяғына дейін тағы бір мәрте егу жұмыстарын жүргізетін боламыз, – дейді маман сұхбат барысында.</blockquote>

Аралдағы мектеп жанындағы жылыжайда өсірілген көкөністер мектеп асханасын қамтамасыз етіп отыр

<a href="https://kyzylorda-news.kz/">Kyzylorda-news.kz</a> Білім беру жүйесінің негізгі мақсаты – шығармашыл, белсенді, интеллектісі жоғары, білімді және кәсіби сауатты жастарды қалыптастыру. Осы мақсатта Жаңақорған ауданы бойынша білім бөлімінің ұйымдастыруымен “Жас ұрпақты ұлттық құндылықтар негізінде тәрбиелеуде мектеп пен отбасының ынтымақтастығы” тақырыбында Құттықожа ауылындағы №164 орта мектебінде облыстық семинар өтті.Халық тәрбиесі – ғасырлар бойы сараланып сан сыннан өткен, сол халықтың ой-арманымен, тіршілік тынысымен, шаруашылық кәсібімен, ұлттық тәлім-тәрбие дәстүрімен тығыз байланыста туып, өсіп-өркендеп, дамып және ұрпақтан-ұрпаққа жалғасып жеткен тарихи және мәдени мұрасы. Әр халықтың ұрпақ тәрбиелеудегі сан ғасырларға созылған өзіндік тарихын ұмыт қалдырмай ұрпақ санасына сіңіру бүгінгі күннің басты талабы. Осы мақсатта ұйымдастырылған семинарға облыстық «Тәрбие, спорт және қосымша білім беру» орталығының директоры Фархат Досаев аудандық білім бөлімі басшысының міндетін атқарушы Есенбаев Бекжан Шахизатұлы жылы лебіздерін білдіріп, өскелең ұрпақты қазақы мінезбен, ұлттық құндылықпен тәрбиелеу әрбір ұстаздың басты ұстанымы болуы тиіс. Бүгінгі жаһандану үрдісі жүріп жатқан жағдайда ұлттық мүдде, ұлттық тәрбие, ұлттық рухты сақтап қалу – үлкен міндет екенін атап өтті.Семинардың мақсаты – оқушы тәрбиесіндегі ұлттық құндылықтар мен жалпыадамзаттық құндылықтарды насихаттау барысында өзекті негіздері, тілі мен діні, тарихы мен салт-дәстүріне, рухани мәдениетке тәрбиелей отырып, ұлттық рухының кемелденуіне бағдар беру, тәжірибе алмасуды негіз етіп алыпты.Семинарда аудандық білім бөлімінің әдістемелік кабинет меңгерушісі Нұргүл Аширова, аудандық білім бөлімінің әдіскері Жанна Нұрмұхамбетова мен мектеп директорының міндетін атқарушы Меруерт Камалова сөз алды.<blockquote>– Мұғалімдер – үнемі ізденіс үстінде болатын, жаңашылдыққа жаны құмар жандар. Әлемде білім саласында көптеген жаңалықтар орын алып жатыр. Біздің ұстаздарымыз да осындай жаңалықтан құр қалмай, өзара тәжірибе алмасып, тынбай еңбек етуде. Өскелең ұрпақтың бойына ұлттық құндылықтарымызды сіңіруде мектептің алар орны ерекше. Бұл ретте, балалардың жеке басының қалыптасуы мен дамуы сол бағытта педагогтардың түрлі тәсілдерді қолдана білу сауаттылығына байланысты екені даусыз. Осындай ауқымды басқосулар жаңа заман баласының бойына ұлттық құндылықтарымызды сіңіре отырып, еліміздің патриот жастарын тәрбиелеуге даңғыл жол ашады деп есептеймін, – деп ұстаздарға орайы келгенде ойындағысын жеткізді.</blockquote>Семинарға мектеп директорларының оқу ісі жөніндегі орынбасарлары қатысты. Семинар жұмысы критериалды бағалау жүйесін практикада қолдана білу дағдыларының қалыптасуына ықпал жасау, әрі оқыту сапасын жақсарту үшін критериалды бағалау жүргізудің маңыздылығын ұғындыру, тиімділігін көрсетуді негіз етіп алыпты.Семинардың барысы мектептің білікті маманы, қолөнер шебері Ә.Айдаровтың шығармашылығынан жасалған көрмеден бастау алды. Одан бөлек, «Аналар» клубының ұйымдастыруымен семинар қатысушылары мектеп тарихы мен қалыптасқан дәстүрлер туралы терең түсінік алды. «Мектеп жұмысы мен оқушы жетістігі – мектептің бейнесі» тақырыбындағы көрмемен таныстырылым мектептің екінші қабатында жалғасын тапты. Көрмеге жиынтық бағалау кестелері, модерация хаттамалары, пән мұғалімдері жасаған жиынтық бағалау жұмыстары, формативті бағалаудың әртүрлі әдістері қойылды.«Көңілі көтеріңкі ұстаздың еңбегі де жемісті» тақырыбында Бүрлібаева Балжан тренинг өткізсе, Данембаева Гүлназ «Критериалды бағалау – сапалы білім өлшемі» тақырыбында коучинг ұйымдастырылып, қатысушыларды төрт топқа бөлінді. Бөлінген топтар семинар жұмысында «Түбір мен қосымшаның жазылуы. 40-43 жаттығулар» тақырыбында қазақ тілі пәнінен Дүйсенбаева Ақмарал Әбдіғаппарқызы, «Денелердің электрленуі, электр заряды, өткізгіштер мен диэлектриктер» тақырыбында физика пәнінен Әкімбаев Бауыржан Әбдіқадырұлы, «Бүйрек және зәр шығару жүйесінің аурулары. Зәр шығару жүйесінің гигиенасы» тақырыбында биология пәнінен Қаржауова Нәзипа Сенбекқызы, «Тарихи сауаттылыққа негізделген критериалды бағалау» тақырыбында тарих пәнінен Ереханова Зейнеш Төреханқызы ҰБТ-ға байланысты кірістірілген сабақтарын өткізді.Соңында тарих пәні үйірмесінің жетекшісі А.Әбсаттарованың ұйымдастыруымен «Жусан иісі» шығармасынан театрландырылған қойылымды үйірме мүшелері сахналады. Семинар барысында мұғалімдер әрбір сабаққа кері байланыс жасап, өз пікірлерін айтып отырды. Тәжірибелі ұстаздардың осындай семинар өткізуі жас мамандар үшін таптырмас асыл қазына болмақ. Себебі, өздері ұстаздық қызметін жаңадан бастап жатқан жас ұстаздарымыз осындай семинарларға қатысу арқылы қашықтықтан оқыту кезінде абдырап қалмай, білікті мамандардың тәжірибесіне сүйеніп, білім көшін қиналмай алға жылжытуына мүмкіндік туады.Ұстаздар басқосуының негізгі міндеті – мұғалімдердің құзіреттілігін арттырып, оқушылардың мүмкіндігін кеңейту негіз болып отыр. Оқу жылында тәрбие үдерісінде ерекше қолға алынып жатқан бағыттардың бірі – ата-аналарды педагогикалық қолдау орталықтарының жұмысының ұйымдастырылуы.Семинар барысында мектепте "Ата-аналарды педагогикалық қолдау" сыныбын облыстық тәрбие, спорт және қосымша білім беру орталығының директоры Фархад Лиясұлы мен аудандық ардагерлер ұйымының төрағасы Аллаберген Сахымбекұлы салтанатты түрде ашып, ізгі тілектерін білдірді. Семинардың қоржыны бастауыш сынып бірлестігі ұйымдастырған "Ата дәстүрі – асыл қазына" атты даналық мектебінің көрінісімен толықты десек қателеспейміз. Одан әрі "Ата-аналарды педагогикалық қолдау" орталығының "Сен жанбасаң лапылдап" тақырыбында Құрбаназарова Дариға, "Балаға үйрету: ақылыңды мейірімге орап бер" тақырыбында Кеңесқызы Жайдар, "Атадан өсиет – анадан қасиет" тақырыбында Әшімбекова Нұргүл ұстаздардың өткізген сабақтарымен жалғасты. Сонымен қатар, оқушыларға ұлттық құндылықтар негізіндетәрбие беруді көздейтін жобалар бойынша "Айтыс - қазақтың төл өнері" тақырыбында Жетпісова Гүлмира, "Асық ойыны ұрпаққа аманат" тақырыбында Ермаханова Гүлназ, "Отбасылық дәстүрлер" тақырыбында Утжанова Жазира жүргізген сынып сағаттары шараның шырайын аша түсті.Қорытынды кезеңінде семинарға қатысушылар ойпікірлерін ортаға салды әрі мектептің "Таңшолпан" театры әннен шашу шашып, оқушылар мың бұрала билеп, «Көлеңке» театры ерекше қойылымды ұсынып, «Үкілі домбыра» ансамблі күмбірлеген күйлерімен шараның көркін келтіріп, оқушылардың жан-жақты, өнерлі қырларын көрсете білді.Бүгінгі мектеп партасындағы әрбір бала – ертеңгі болашақтың иесі. Сондықтан алдымызда отырған оқушыларға алғашқы күннен бастап-ақ сапалы білім, саналы тәрбие беріп, білімнің нәрлі қайнарымен сусындату үшін ұстаздар қауымы педагогикалық шеберліктің, тәжірибенің негіздерін дұрыс қолдана білуі тиіс. Оқушылардың шығармашылық бағытын жанжақты дамыту әрі ұлттық құндылық дәнін себу – бүгінгі күннің басты талабы екенін атаулы семинарда жан-жақты талқылады.Қорытынды кезеңінде семинарға қатысушылар жылы лебіздерін білдіріп, ойпікірлерін ортаға салды. Бүгінгі мектеп партасындағы әрбір бала – ертеңгі болашақтың иесі. Сондықтан алдымызда отырған оқушыларға алғашқы күннен бастап-ақ сапалы білім, саналы тәрбие беріп, білімнің нәрлі қайнарымен сусындату үшін ұстаздар қауымы педагогикалық шеберліктің, тәжірибенің негіздерін дұрыс қолдана білуі тиіс. Оқушылардың шығармашылық бағытын жанжақты дамыту – бүгінгі күннің басты талабы.

Жаңақорғанда ұлттық құндылықтармен үндескен семинар өтті

<a href="https://kyzylorda-news.kz/ru">Kyzylorda-news.kz</a> Жас буынның тіл тағдырына бейжай қарамайтыны қуантады.&nbsp;Жақында Назарбаев Зияткерлік мектебінің 11-сынып оқушылары Алуа Едігеева мен Азиза Жақыпбек қазақ тілін үйренушілер мен тереңірек танығысы келгендерге арнап ««Naqyl söz» қосымшасын ойлап тапты. Жоба жетекшісі – Қызылорда қаласындағы Назарбаев Зияткерлік мектебінің информатика пәнінің мұғалімі Әділжан Науан.Құрастырушылардың сөзінше, мобильді қосымша үш бағытты қамтиды. Олар – қазақ елінің ұлы тұлғаларының қанатты сөздері, халық арасында кең қолданыстағы мақал-мәтелдер және тұрақты тіркестер.&nbsp; «Қанатты сөздер» топтамасына нақыл сөздер енгізіліп, авторлары бойынша жіктелген. Ал «Мақал-мәтелдер» бағыты тақырыптық топтарға бөлінген. Мәселен, қолданбада Отан, табиғат, білім, отбасы және тағы басқа тақырыптар бойынша қазақ тіліндегі мақал-мәтелдер жинақталып тұр. «Тұрақты тіркестер» бөліміндегі сөздер әліппе реттілігі бойынша орналасып, әр сөздің түсіндірмесі, екі тілге (орыс, ағылшын тілі) аудармасы және аудио жазбасымен қоса ұсынылған.<blockquote>– Қазақ тілі – ұлттың рухани-мәдени байлығының қайнар көзі және ата-бабалардан ұрпағына мұра боп қалған баға жетпес қазына. Қазақстанда тілдің шұбарлану мәселесі бүгінге дейін жалғасын табуда. Ұлттың жаны тілінде десек,&nbsp; қоғам арасында ана тілдің мәртебесін көтеру, оның қолдану аясын кеңейту өзекті. Жасөспірімдер үшін тұрақты тіркестер, әдеби кұралдар түсініксіз, тіпті беймәлім күйінде қалуда. «Naqyl söz»&nbsp; – қолданушыларға тілді меңгеріп қана қоймай, қазақ халқының мәдени ерекшеліктері мен ұлттық құндылықтарын тереңірек түсінуге мүмкіндік беретін қосымша. Ол сөздік қорымызға түрлі тұрақты тіркестерді, көркемдегіш құралдарды, қанатты сөздерді енгізудің тиімді жолдарын ұсынады. Жобамыз қазақ тіліне терең лингвистикалық талдау жүргізіп, яғни материалдарды жинауға ғана емес, сонымен қатар олардың колдану аясын, этимологиясын зерттеп, қолданушыға қазақ тілін тереңірек меңгеруге мүмкіндік береді. Мобильді қосымша толық жұмыс атқаруға қабілетті, алайда қолданбаның дерекқорын одан әрі кеңейту мақсатында оны жалпыға ортақ қолданысқа ие кеңістіктерге жүктеу мүмкіндігі тумай тұр. Алдағы уақытта «Naqyl söz»-ді әрбір адам өз смартфонына Play Market, AppStore электронды дүкендері арқылы жүктей алатын болады, – дейді Алуа Едігеева.</blockquote>Қосымшаны құрастырушылар өткен жылы ғылыми жобалар конкурсында жеңімпаз атанып, demo нұсқасын мектеп оқушылары пайдаланып көрген екен.<blockquote>– Ал толық нұсқасын бірінші болып оқушылар, студенттер немесе қызылордалықтар ғана емес, жалпы қазақ тілін меңгерушілер пайдаланады деп сенеміз. Жас мөлшері мен әлеуметтік статусына қарамастан қазақстандық әрбір азамат қосымшаны қолдану мүмкіндігіне ие болмақ. Ұсынылған контент қолданушыларының арасында жас ерекшеліктері шектелмеген. Себебі мақсатты аудитория қазақ тілін енді үйреніп жүргендерден бастап, халық нақылдары арқылы сөздік қорын байытқысы келетіндерге дейін қамтылған. Қосымшаны дамыту бағытында алдағы уақытта Play Market және App- Store электронды дүкендеріне қолданбаны жүктеп, авторлық құқық алсақ деген мақсатымыз бар. Жастардың көп сөздердің мән-мағынасын ұғына бермеуі – жобаны қолға алуға түрткі болған себептің бірі. Сонымен қатар қазақ тілін үйренуге арналған мобильді қосымшаларды талдау нәтижесі бойынша әдеби көркемдік тұрғыдан оқытуға арналған электронды контенттің жоқтығы да себеп болып отыр, – дейді Азиза Жақыпбек.</blockquote>Айта кетейік, қосымшаның әр бағыты бойынша ұсынылған мақал-мәтел, тұрақты тіркес, ұлағатты сөздердің барлығын аудио нұсқада да тыңдау мүмкіндігі бар. Әрі орыс сыныбының оқушылары өздері сынды күнделікті өмірде бірнеше тілді қатар қолданатын адамдарға арнап орыс және ағылшын тіліндегі аударма нұсқаларын да ұсынып отыр.&nbsp;&nbsp;

Зияткер оқушылар жаңа туынды ойлап шығарды

Жаңақорғанда жеке мектептердің жұмысы жүйелі

Kyzylorda-news.kz. Қызылордада ҚМДБ “Зекет және қайырымдылық” қорына қарасты Zeket Hub орталығы ашылды.Игі шараға Бас мүфти кеңесшісі Кенжетай Байкемелұлы, қор директоры Мақсатбек Мақсотұлы, Сыр өңірінің бас имамы Дастан Жанасұлы бастаған дін қызметкерлері қатысты.Орталықтың негізгі қызметі жұмыссыз немесе жаңа кәсіп үйренгісі келетін қыз-келіншектерге, мүмкіндігі шектеулі жандарға арналған тігін, кілт жасауды үйрету курстарын ұйымдастыру болып табылады.Сонымен қатар ашылу рәсімінен соң Zeket Hub орталығы мен облыстық Отбасыны қорғау орталығы өзара меморандумға отырды.Алдағы уақытта осы меморандум аясында жаңа мамандық меңгерген сырбойылықтардың мемлекеттік грантқа қатысып, кәсіп бастап кетуілеріне толықтай көмек көрсетілетін болады.<img src="https://knadmin.beoblood.kz/uploads/FB_IMG_1710052360825_c4175e278e.jpg" alt="FB_IMG_1710052360825.jpg"><img src="https://knadmin.beoblood.kz/uploads/FB_IMG_1710052376259_35872997fa.jpg" alt="FB_IMG_1710052376259.jpg">

Ерекше кәсіп: Қызылордада Zeket Hub орталығы ашылды

Ұяда көрген тәрбие ұстамдылыққа жетелейді

&nbsp;<a href="https://kyzylorda-news.kz/">Kyzylorda-news.kz</a>Мемлекеттің басты байлығы – адам. Елімізде балаларға қамқорлық көрсетуге бағытталған кешенді ойластырылған ауқымды жоба жетерлік. Жалпы білім беретін барлық мекемеде ерекше балаға жан-жақты қолдау көрсетуге көптеген мүмкіндік қарастырылған. Яғни, жасөспірімді әлеуметтендіру бағытында ұлағат ұясы атанған әрбір білім ошағында «Психологиялық-педагогикалық қолдау көрсету» кабинеті ашылған. Осы бағытта жүйелі қызмет етіп келе жатқан Сырдария ауданы №35 Иса Тоқтыбаев атындағы мектеп-лицейдің арнайы педагогы Айнұр Нұржакиева күрделі сала жөнінде бізге кеңінен тарқатып айтып берді.Негізінен, білімнің қарашаңырағы саналатын №35 Иса Тоқтыбаев атындағы мектеп-лицейде ерекше білім беру қажеттілігі бар оқушы саны – 18. Оның ішінде, үйден оқытылатын балалар да бар. Денсаулығында кінәраты бар және оқу үлгерімі төмен білім алушыны жан-жақты тәрбиелеу асқан ыждағаттылықты қажет етеді. Арнайы кабинет базасы жасақталған мектеп-лицейде инклюзияны қолдау мақсатында жоспар бойынша бекітілген сабақ өткізіледі. Тақырыптық сабақтың мазмұнын аша түсетін кез келген көрнекілік құрал-жабдық бала зейінін дамытуға септігін тигізеді. Олардың ойын анық жеткізуіне, түсінікті тілде сөйлеуіне дағдылау – арнайы педагогтың тікелей міндеті.– Шын мәнінде, ерекше бала және ата-анамен тығыз қарым-қатынаста болу үлкен жауапкершілікті жүктейді. Баланы түзету-дамыту бойынша жасалатын оқу бағдары арнайы бекітіліп, кезең-кезеңімен жүзеге асырылады. Жалпы, арнайы педагогтың мақсаты – ПМПК қорытындысы мен ұсыныстарына және мектеп кеңесінің шешіміне сәйкес, білім алуда ерекше қажеттілігі бар мектеп оқушысына арнайы педагогикалық қолдау көрсету. Сонымен қатар ЕББҚ бар оқушыларды мектепішілік жекелеген іс-шараға қатыстырып, барынша ашылуына ортаға бейімделуіне ықпал жасау екенін айта кетейін. Қашанда ұяңдығы басым көпшіліктің ішкі сырына үңіліп, баласына қамқорлық жасауға құқылымыз. Әрқашан келешек елдің тұтқасын ұстайтын жастарды тәрбиелеуге ерік-жігерімізді арнаймыз, – дейді Айнұр Серуенбекқызы.Күнделікті арнайы педагогтың қызметі қауырт келеді.&nbsp;Ата-ана мен бала арасында берік байланыс орнатып, сан түрлі іс-шара ұйымдастырылады. Жас жеткіншекті өнерге, спортқа, шығармашылық бағытқа баулып, олардың қабілетін ашу мақсатында арнайы педагогтың біліктілігі сараланады. Әрине, баланың тілін таба біліп, білімге құштар ету – ұстаздың өлшеусіз еңбегі.– Кей жағдайда тілінде мүкістігі бар балалар көпшілік ортада сөйлеуге зерттеп-зерделеп, оларға көмекке келеміз. Семинар-тренинг барысында арнайы бағалау қымсынады және қысылады. Сонымен қатар әрбір ойлаған дүниесін анық жеткізуге тырысатын балалар өзгелерден жасқанады. Осындайда баланың барлық психологиялық тұрғыдан даму жүйесін жүйесімен баланы ынталандырамыз. Оның денсаулығына кері әсер ететін оғаш айла-амалды анықтап, оның күн сайын дамуына ықпал етеміз, – дейді арнайы педагог.

Сырдариялық ұстаз ерекше балалардың тілін табуда

<a href="https://kyzylorda-news.kz/">Kyzylorda-news.kz.</a> Биылғы оқу жылын 414 түлек бітіреді. Оның 401-і ҰБТ-ға қатысуға ниетті. Қазіргі таңда олар ұстаздарымен бірге қызу дайындық үстінде. Биыл ҰБТ-ға қандай өзгерістер енгізілетіні туралы толығырақ тарқатайық...&nbsp;– 2024 жылғы ҰБТ форматында негізінен өзгеріс жоқ, 2017 жылы енгізілген формат қазіргі уақытта сақталып отыр. Жалпы талапкерлер 5 пәннен тест тапсырады. Оның 3-еуі – негізгі пәндер. Яғни оқу сауаттылығы, математика сауаттылығы және қазақстан тарихы. Мұнан бөлек екеуі бейінді пән. Бұл талапкердің өзінің келешекте оқитын мамандығына тікелей қатысты.&nbsp;Мәселен, медицина мамандығына баратын болса, биология-химия пәнін таңдайды. Ал инженерлік мамандыққа баратын болса, математика-физика сынды пәннен тест тапсырады. Биыл өзгеріс тек сұрақтардың санына байланысты болып отыр. Егер оқу сауаттылығы мен математика сауаттылық бойынша бұған дейін 15 сұрақ болса, биыл оның саны 10 сұраққа дейін қысқарған. Керісінше бейінді пәндердің, яғни талапкердің келешекте тікелей мамандығына қатысты сұрақ саны 35-тен 40-қа көбейіп, 50 баллды құрады.&nbsp;ҰБТ-да жалпы сұрақтың саны өзгеріссіз 120 болып қалды. Максималды балл – 140. «Тапсырманың саны мен ең жоғары ұпай саны неге сәйкес келмейді?» деген сауал туындауы мүмкін. Берілетін балл сұрақ санына қарағанда әлдеқайда көбірек. Себебі бейінді пәннің соңғы 10 сұрағы 2 баллдық сұрақтар, – деді Ұлттық тестілеу орталығының директоры Руслан Емелбаев.Айта кетейік, талапкерлер бұрынғы қағаз форматындағыдай 1 рет қана емес, биыл 5 рет ҰБТ тапсыру мүмкіндігіне ие. 15 қаңтар 10 ақпан аралығында алғашқы қаңтар ҰБТ-сы өтті. Оған жалпы республика бойынша 136 000-ға жуық талапкер қатысқан. Ал аудан бойынша &nbsp;401 түлек бақ сынады. Биыл талапкерлердің басым көпшілігі педагогикалық мамандықтарға басымдық берген. Кешегі қаңтардағы ҰБТ-да аудан бойынша Т.Жүргенов ауылындағы №117 орта мектептің түлегі Қоңтай Ақнұр 124 балл жинаған. Ал ең төменгі баллды Бұқарбай батыр ауылына қарасты №33 мектеп түлегі алған. Орташа балл – 70.4.&nbsp;– Таңдау пәнім – қазақ тілі мен әдебиеті. Кішкентай кезімнен осы пәндер бойынша пәндік олимпиада мен түрлі жарыстарға қатысып, жүлделі орындар иелендім. Былтырдан бастап ҰБТ-ға қызу дайындық үстіндемін. Мектеп бағдарламасынан бөлек қосымша курстар оқып, ізденіс үстінде жүрмін, – дейді №117 орта мектептің түлегі, «Алтын белгіге» үміткер Ақнұр Ерболқызы.&nbsp;Өткен айда тапсырған қаңтар ҰБТ-сы мен алдағы уақытта тапсыратын наурыз, тамыз ҰБТ-сының сертификаттары тек жоғары оқу орындарындағы ақылы оқу бөліміне ғана жарайды. Ал енді негізгі ҰБТ мамыр мен маусым айларында өтеді. Яғни талапкерлерге 2 мүмкіндік беріледі және сол ҰБТ-ның сертификаттары ғана грант конкурсына жарамды болмақ.&nbsp;ҰБТ-ның пәндері ішінде ең жоғары көрсеткіш оқу сауаттылығында болып тұр, былтыр негізгі тестілеу кезінде жалпы 162 мыңға жуық талапкер ҰБТ тапсырды, сондағы оқу сауаттылығы бойынша келген сұрақтардың 81 пайызына дұрыс жауап берілген. Ең төменгі көрсеткіш химия мен физикада.Былтырғы қорытынды көрсеткішке қарасақ, грант конкурсында ең жоғары бәсеке педагогикалық мамандықтарда екен. Мысалы, 2023 жылы 94 мыңға жуық талапкер грант конкурсына құжат тапсырған. Оның 23 500-і, яғни әр 4-үміткер педагогикалық мамандықты таңдаған. Сұранысқа сай бәсеке де, шекті ұпай көрсеткіші де артты. Айталық, былтыр «Математика пәні мұғалімі» мамандығына грантқа түсудің ең төменгі ұпайы 123 ұпай болған. Сонда 122 ұпай жинаған талапкер аталған мамандыққа грантқа үміткер бола алмады.Осыдан 3 жыл бұрын министрлік тарапынан өте маңызды шешім қабылданды. Яғни ерекше білім беру қажеттілігі бар оқушыларға құрдастарымен бірдей ҰБТ тапсыру мүмкіндігі қарастырылды. Осы ретте соңғы жылдары ҰБТ-ны тапсырып жатқан ерекше талапкерлердің қатары үш есеге артқан.&nbsp;Айта кетейік, тестілеуге мектеп формасымен келу де талап етілмейді, яғни талапкерлер еркін, ыңғайлы формада келе алады. Сондай-ақ ҰБТ-ға берілетін уақыт та өзгеріссіз қалды, яғни 4 сағат.&nbsp;Фото: Нұрболат Нұржаубай

Биыл жалағаштық 401 түлек ҰБТ-ға қатысады

<a href="https://kyzylorda-news.kz/">Kyzylorda-news.kz.</a> Алматының білім басқармасы мектепте есінен танып&nbsp;қалған&nbsp;оқушы қызға қатысты ақпаратқа қатысты пікір білдірді. Бұл туралы <a href="https://stan.kz/">Stan.kz</a> ақпарат агенттігі хабарлайды.Әлеуметтік желіде Алматы мектептерінің бірінің оқушысы белгілі әлдебір қоспаның&nbsp;артық мөлшерінен уланып қалып,&nbsp;есін жоғалтты деген ақпарат тарады.Алматы қалалық білім басқармасы бұл ақпаратты жоққа шығарды. Ведомствоның мәліметінше, мектеп оқушысы әлсіздіктен&nbsp;есінен танып қалған."Жасөспірімге келген жедел жәрдем барлық қажетті көмекті көрсетті", –&nbsp;деп хабарлады білім басқармасының өкілдері.Фото:&nbsp;pixabay.com

Алматыда есінен танып қалған оқушыға қатысты білім басқармасы түсінік берді

<a href="https://kyzylorda-news.kz/">Kyzylorda-news.kz.</a> Қазіргі нарық заманында, жасыратыны жоқ, &nbsp;әуелгі орында ақша тұрады. Оны әркім әрқалай жолмен табады. Әсіресе, орта білім беру саласында да ақша табудың амалын іздегендер қатары көбейді. Ол қалай дейсіздер ғой?Педагогтерден құралған арнайы мекемелер ұстаздарға төсбелгілер мен сертификаттар береді. Тек мұғалімнің санаты мен еңбек өтілі жетсе болғаны. Кейбірінің арнайы журналдары бар. Оған жазылып, материалдарын ұсынып отырады. Бірақ марапат тегін берілмейді. Өз қалталарынан қаржы шығарып, талаптарын орындауы керек. Сол кезде ғана түрлі номинация мен төсбелгі иегері боласыз да шығасыз.«Ғасыр ұстазы», «Ұлт ұстазы», «Ұлы дала ұстазы», «Алаш ұстазы» және басқа қаптаған медаль, алғыс хат сияқты марапаттар да &nbsp;бар. «Ұлт ұстазы» деп Ахмет Байтұрсыновты айтушы едік, қазір ақшаңыз жетіп тұрса, сіз де осы атаққа ие бола аласыз.Жалпы алғыс хат, төсбелгі, сертификаттар мен медальдар мұғалімдердің категория алуына әсерін тигізеді. Қаптаған мұндай орталықтардың атынан шатасасың. Берген сертификаттары мен орталықтың атаулары да әжептәуір, кейбірінің атынан ат үркитіндей.Өкінішке қарай, саудадағы сертификат оқушыларды да айналып өтпеді. Қазір оқушылар арасындағы байқаулардың бірсыпырасы ақылы. Қандай да бір сайысқа қатысқыңыз келсе, бұрынғыдай жол жүріп шаршамайсыз. Себебі, олардың көпшілігі электронды түрде жүргізіліп келеді. Алдымен ақысын төлеп, қатысатын оқушы жайлы және байқауға қатысты мәліметтерді дайындап, пошта арқылы жіберсе, жетіп жатыр. Нәтижесінде жүлделі орын алмаған жағдайдың өзінде, әйтеуір бір номинациямен марапатталады. Ал жүлделі орындардың бірі қажет болса, қосымша ақы төлетеді. Бұл ретте, бір тапсырыс көлемінде бірден &nbsp;5 немесе одан көп оқушы дайындаған пән мұғалімдері де алғыс хатсыз қалмайды. Байқау ақылы болғандықтан, ынтаңыз зор болса да, қалтаңыз көтермесе қатыса алмайсыз. &nbsp;Ең ұнамсыз тұсы – ақша жүрген жерде орындар да саудаға түсетіні анық. Бір таңғаларлығы, бүгінгі күні мұндай &nbsp;жарыстарға деген оқушылардың ынтасы басым. Бірақ айналып келгенде, барлық салмақ ата-анаға келіп түседі. Қарызданып-қауғаланса да, баласының жұрттан қалмай қатысқанын жақсы көріп, соңғы тиынына дейін беретіні – бәріне шындық. Баласының қалауын орындағанды қай ата-ана жек көрсін?!Бұл жайында бұрын да айтылған…Иә, бұрын министр болып тұрған кезінде Асхат Аймағамбетов білім саласындағы жалған әрі ақылы олимпиадалар мен конкурстардың марапаттарына шектеу қою керектігін министрліктің аппарат отырысында баса айтқан болатын.<blockquote>− Осы мәселе бойынша түсіндіру жұмысын жүргізу қажет. Сатып алатын марапат – марапат емес. Біз әрине, кейбір жағдайда әртүрлі қоғамдық марапаттар болатынын түсінеміз. Бірақ олар ақылы болмауы керек. Егер қоғамдық марапат ақылы болса, оның еш қасиеті, құндылығы жоқ. Кейбір әріптестеріміз түсінбей, осындай әрекеттерге барып жатқандар бар. Өйткені, бұл мәселені көтермесек болмайды. Мектептерде әртүрлі ақылы конкурстар мен олимпиадалар болмауы керек. Ол түсінікті шығар. Біз тегін конкурстардың санын көбейтеміз, − деген еді А. Аймағамбетов.&nbsp;</blockquote>Содан бері бірнеше жыл өтті. Байқаулар әлі де жалғасуда, дизайны да, аты да ресми бекітілген марапаттарға әбден жақындатылған әртүрлі ақылы сертификаттардың саны артпаса азаймады.Десе де жуырда Оқу-ағарту министрлігі ресми аккаунтында мұғалімдерді марапаттауға қатысты маңызды мәлімдеме жариялады. Министрлік білім беру саласының педагогтері мен қызметкерлерін көтермелеу жүйесіне «Оқу-ағарту министрінің Алғысы», «Оқу-ағарту министрінің Құрмет грамотасы», «Мектепке дейінгі тәрбие мен оқытудың үздігі», «Орта білім беру ісінің үздігі», «Қосымша білім берудің үздігі», «Техникалық және кәсіптік білім беру ісінің үздігі», &nbsp;«Оқу-ағарту министрлігінің еңбек сіңірген қызметкері» &nbsp;құрметті дипломдары, «Ы.Алтынсарин» және «Білім беру ісінің құрметті қызметкері» &nbsp;төсбелгілері мен «Мейірім – әлемге махаббат», «Еңбек ардагері» медальдары кіретінін айтты.<blockquote>− Көтермелеуге кандидаттардың құжаттары салалық көтермелеу жүйесінің 6-қосымшасына, жұмыс көрсеткіштеріне сәйкес қаралады: жұмыс тәжірибесі, біліктілігі, педагог пен оның оқушыларының жетістіктері және т.б. марапаттау балдарды есептеу негізінде жүзеге асырылады. Материалдарды қарау нәтижелері бойынша министрлік комиссиясы ашық дауыс беру арқылы шешім қабылдайды. Әрбір көтермелеудің сәйкестендіру нөмірі болады. ҚР Оқу-ағарту министрінің мөрімен және қолымен бекітіледі. Осылайша, көтермелеудің өзге түрлері ҚР Оқу-ағарту министрлігінің ведомстволық наградаларына жатпайды, − делінген хабарламада.</blockquote>Бұл дегеніңіз, өзге марапаттардың ендігі жерде салмағы жоқ екенін көрсетеді.Марапат мұғалімді табуы керекҚазіргі күні елімізде ақылы байқауларды ұйымдастырып жүрген орталықтардың бірі − «MediaBilim» және республикалық «Өрлеу» педагогикалық шеберлікті дамыту орталығы. Бұл орталықтармен байланысқа шығып, сұрастырып көрдік. Сертификат жөнінде ақпарат берсе де, төсбелгінің тек 15000 теңгеден басталатынын ғана айтты. Орталықтардың өткізуімен болатын әдеби-шығармашылық байқаулар әрбір атаулы күндерге қарсы өткізіледі. Мәселен, «Үш бәйтерек», «Мұқағали – мұзбалақ ақын», «Абай оқулары» сияқты тақырыптары жер жарады. Қатысушылар міндетті түрде диплом алады. Ал жетекшілері 5 қатысушыдан жоғары қатыстыратын болса, «Үздік педагог», «Үздік тәрбиеші», «М.Жұмабаев – 130 жыл» төсбелгісімен марапатталады. Егер де қатысушының видеосы әлеуметтік желіде көп қаралым жинайтын болса, «Жас дарын» атағын алады. Сондай-ақ жоғарыда аталған орталықтың әлеуметтік желісіне 10 адам тіркетсеңіз, «Құрмет грамотасын» иеленіп шыға келесіз.Бір қызығы, күмәнді ақылы конкурстарға қатысу нәтижесінде алынған наградалар мен дипломдар педагогтерді аттестаттаудан өткізу кезінде ескерілмейтіні осы уақытқа дейін де айтылды. Тіпті 2019 жылдан бастап мұндай құжаттар автоматты түрде жетістіктер қатарынан алынып қалды. Себебі, лицензиясы бар ұйымдар берсе де, ол қағаздың заңды күші жоқ. Соның өзінде ұстаздардың ақылы дүниеге қызығушылығы жоғары.<blockquote>− ҚР Оқу-ағарту министрлігі тарапынан мұғалімдерді аттестациядан өткізу ережелері дайындалып жатыр. Әлі толық бекітілмеді. Дегенмен мұғалім марапаттың артынан жүгірмеуі керек, керісінше марапат мұғалімді іздеуі тиіс. Бізде өкінішке қарай көрсеткішке жетсін-жетпесін ондай дүниелер портфолиомызда толып тұрады. Ендігі жерде үздік нәтиже көрсеткен ұстаздарға ғана баға беретін боламыз. Ал жеке байқауларды жеке кәсіпкерлер ұйымдастырады. Оларға заңмен ешқандай тыйым салынбаған. Әрине, ол ата-ананың қалтасына ауыр тиюі мүмкін. Бірақ екінші жағын да ұмытпауымыз керек. Өйткені мұндай конкурстар баланың ашылуына, дамуына себеп болады. Қазіргі күні білім беру ұйымдарына түсіндірме жұмыстарын жасап жатырмыз. Жылтыр дүниеден мейлінше аулақ болуға, жалған атаққа әуес болмауға… Қайдан не алсаңыз да, ол жоғары көрсеткіш болмайды. Мұғалімнің басты көрсеткіші – шәкіртінің жетістігі, − деді облыстық білім басқармасының басшысы Асқарбек Есжанов.</blockquote>Осы ретте әңгімемізге тұздық ретінде мектеп директоры және мұғаліммен сөйлескен болатынбыз. Қ.Баймағанбетов атындағы №42 мектеп-лицей директоры Зейнұр Жаманқұлов заңда көрсетілген байқауларға қатысқаннан абзалы жоқ екенін тілге тиек етті.<blockquote>– Білім орталықтарынан қатынас қағазы келеді. Барлығына бірдей қатысуға міндетті емес. Біздің тараптан ешқандай мәжбүрлік жоқ. Мұғалімдердің де, оқушылардың да өз еркі. Жеке басым ақылы түрде болатын байқауларға қарсымын. Себебі, мұндай білім бәйгесінің қорытындысы бойынша бірнеше бірінші және &nbsp;екінші орындардың берілгенін көргенмін. Бұл дұрыс емес, бірі өзі еңбектеніп алса, енді бір оқушы ата-ана көмегімен жетеді. Соған сәйкес өзіме келген қоғамдық қорларды көбіне саралаймын. Қазіргі уақытта өзіңіз айтқандай, сертификат пен медальға бай орталық көп. Олардан алғанды өзіңіз бен сатқан адам ғана біледі. Егер өзгелер сенің еңбегіңнің еленгенін көрмесе, ұжымыңыз куә болмаса, оның қажеті қанша? Одан ұстаздың мәртебесі көтерілмейді. Ондай дүниеге маңдай теріңмен, қажырлы еңбегіңмен жету керек. Сондай-ақ ҚР &nbsp;«Білім туралы» Заңының №514 бұйрығында көрсетілген тізім бойынша байқауларға қатысқан дұрыс, − дейді ол.</blockquote>Ал қазақ тілі &nbsp;мен әдебиеті пәнінің мұғалімі (Аты-жөні және қай мектепте жұмыс істейтіні өз сұрауы бойынша жазылмады):<blockquote>– Түрлі бағыттағы байқау өте көп. Өздері қолдан медаль мен төсбелгі жасайды. Бұл да − табыс табудың бір көзі. Десе де кейбір ақылы байқаулар бар, білім бөлімімен арнайы меморандумға отырады. Одан алынған сертификаттар мұғалім категориясына &nbsp;пайдалы. Заңды толық білмейтіндіктен болар, көбіне ұстаздар төсбелгі дегенге қызығып қатысады. Айналып келгенде, ол байқаулардың еш &nbsp;салмағы болмайды, − деді.</blockquote>Түйін сөз. Иә, түрлі сертификат пен медаль бергіш мекемелер өздерінің алған қаржысын жарнапұлға жатқызады, яғни, мекеменің өзін-өзі қаржыландыруы деп түсіндіреді. Дегенмен, бұл көңілге қонымсыз. Өйткені қашықтан оқыту бойынша ұйымдастырылатын байқаулар 1000 теңгеден басталса, шығармашылық бағыттағы сайыстарға 1000-5000 теңге көлемінде ақы төлейсіз. Ал біліктілігін арттыруға қатысып, тиісті білімді игерген &nbsp;ұстаздар сертификатты 10000 теңгеге алады. Төсбелгі алғың келсе, 15000-70000 теңгедей қаржың болуы керек екен.Білім мен біліктілікті пұлдау арқылы өсіп келе жатқан жастардың санасына «білімді сатып алуға болады» деген қасаң пікір қалыптастыратынымыз сөзсіз. Бізді алаңдататын да осы мәселе. Сондықтан қу құлқынның қамы үшін бір күндік өмірді ойлайтын мұндай мекемелерге тоқтам жасайтын уақыт келген секілді. Сіз қалай ойлайсыз? &nbsp;Фото: Нұрболат Нұржаубай

Білім мен біліктілік қалай бағаланады?

&nbsp; <a href="https://kyzylorda-news.kz/">Kyzylorda-news.kz</a>&nbsp; Биыл 11 сыныпты тәмәмдайтын Асылжан еліміздегі екі бірдей еңселі жоғарғы оқу орнының грантын жеңіп алған. Оның бірі – Қорқыт ата атындағы Қызылорда университетінің 50 пайыздық гранты болса, ал екіншісі – Астанадағы ІТ университетінің толық гранты.&nbsp; &nbsp; &nbsp;Мектеп табалдырығында оқып жүріп жоғарғы оқу орнының грантын жеңіп алу үшін оқушыдан жан-жақты дарын, талап, ізденіс, терең ой талап етіледі. Асылжан да сондай оқушылардың бірі де бірегейі. Ол жас та болса бірнеше жобада қатар жұмыс жасап, өз замандастарынан оза шауып келеді. Бұндай озат оқушылар университетті емес, керісінше, жоғарғы оқу орны осындай дарынды оқушыларды таңдайды. Бұл екінің біріне бұйыра бермейтін жетістік.&nbsp; &nbsp; &nbsp;Асылжан Абдуллаев кішкентай кезінен тіл үйренуге, жаңаша дүниелер ойлап табуға әуес. Білімін №210 Оспан Әбілпаттаев атындағы мектепте жетілдіріп жүрген ол – биылғы жас түлек. Асылжан мектеп бағдарламасымен ғана шектеліп қалмайды. Түрлі бағыттарда ізденіп, соның арқасында бүгінде талай шыңды бағындырып үлгерген. Нақтылап айтатын болсақ, Асылжан – «Kyzylorda Hub» алғашқы Қызылордалық бизнес инкубатор, Қызылорда өңірінің стартап жобалар мен инновациялық технологияларды дамытушы орталығының резиденті. Ол өзінің «Тарихнама» жобасымен көпшілік арасында өте жақсы танылып үлгерген.&nbsp; &nbsp; &nbsp;– Жобаның негізгі мақсаты – Сыр жастарына ғана емес, республика, әлем деңгейінде тарихты насихаттау. Жобада тек Қазақстан тарихы ғана емес, сонымен қоса әлем тарихы қамтылады. Себебі, аудиторияның сұранысына орай барлығын қамтуға тырыстық. Қазіргі таңда медиа саласы өте танымал. Адамдар кітап оқуға уақыт таппаса да, ұялы телефон арқылы ақпараттануға әуес. «Заманына қарай адамы» дегендей, «кітап оқылмайды» деп қарап отыруға болмайды. Заман адамы үшін не сұраныста, сол нәрсені жандандыру қажет. «Тарихнама» – медиа алаң. Біз жоба аясында әлеуметтік желілерде арнайы парақшалар жүргізіп, халық арасында тарихымызды насихаттаймыз, – дейді дарынды оқушы.&nbsp; &nbsp; &nbsp;Асылжанның жұмыстарымен танысу барысында біз де әлеуметтік парақшаларға тіркелдік. Шынында, жобаның тиімділігін аталған парақшаларға тіркелушілер санынан-ақ аңғаруға болады. Асылжанның айтуынша, ТікТок желісіндегі аккаунтқа бір жылдың ішінде екі жүз мыңға жуық тіркелуші тіркеліп, 50 миллионға жуық қаралым жиналған екен. Бір айта кетерлігі, жоба тек Қазақстанда емес, Орталық Азия, Еуропа, Батыс Еуропа мемлекеттерін қызықтырып, сұраныс артуда. Тіпті Түркия елінен бірлесіп жұмыс жасауға ұсыныс та түскен екен. «Алдағы уақытта халықаралық деңгейде бейнеконтент жасау ойда бар» дейді жас талапкер. Жобаның негізгі мақсаты – қысқа дерек пен фото, видео арқылы көп мағлұмат беру. Ал негізгі дереккөз – тарихи кітаптар мен еңбектер.&nbsp; &nbsp; &nbsp;Асылжанның бұл бір ғана қыры. «Жігітке жеті өнер де аз» дегенді талапты өренге қарап айтуымызға толық негіз бар. Мектеп өмірінен бөлек, қоғамдық іс-шаралар мен түрлі сайыстарда бақ сынап жүрген ол қай бағытта жұмыс жасаса да үлкен жетістікке жетіп келеді. Ол ең алдымен Асылжанның мұқияттылығы мен қай іске де үлкен ынтамен, жауапкершілікпен, тиянақтылықпен кірісетіндігінен. Асылжан Абдуллаев тарих пәнінен түрлі деңгейдегі ғылыми жобаларға қатысып, жүлделі орындарға ие болып келеді. Сонымен қоса «Қазақстан балалары – шексіз әлемде» балалар киносы бойынша республикалық фестивалінің облыстық кезең жеңімпазы. Осы ретте айта кету керек. Асылжан «Orda studio» студиясымен бірлесе жұмыс жасап, әлемдік деңгейдегі мультфильмдерді қазақшаға аударады.&nbsp; &nbsp; &nbsp;Тек мектептің ғана емес, аудан, облыстың мақтанышына айналып үлгерген дарынды оқушы инновациялық идеялар фестивалінің «Контент және медиа» секциясы бойынша жоба қорғап 300 000 теңге жеңіп алса, «Digital Almaty – 2023» халықаралық цифрлық форумында өзінің «Тарихнама» жобасын таныс­тырып, «Тик Токтың» Батыс Европа «Head of Global Business Solutions» директоры Анастасия Панинамен кездесу мәртебесіне ие болған. Сондай-ақ «Enactus Kazakhstan» студенттер мен оқушылар арасындағы халықаралық жарысында жүлделі II орынды жеңіп алғаны және бар. «ЖасStar» халықаралық фестиваліне қатысып, «Маралсай» демалыс орнына бес күндік демалысқа жолдама ұтып алған жан-жақты талапкер облыстық «Тәуелсіздік ұрпақтары» байқауында «Media» бағыты бойынша жеңімпаз атанып, үш жүз мың теңге сыйақы алған. Жас түлек «Іnnofest Qyzylorda» облыстық инновациялық жобалар фестивалінде де жүлделі орын мен қомақты қаржылай сыйақыға ие болған. Айта кетейік, Асылжан Абдуллаев аудан әкімінің «Өрлеу» жастар сыйлығының ІТ саласы бойынша жеңімпазы атанды. Бұл да бір үлкен жетістік.&nbsp; &nbsp; &nbsp; Жеті қырлы бір сырлы дарынды жаспен білім ордасы мен ата-анасы ғана емес, түгел аудан, тіпті облыс мақтанады. «Бүгінгі өскелең ұрпақ нағыз білімді, жан-жақты дамыған, бірнеше тілді меңгерген, өз елін сүйетін, ұлтжанды азамат болуы тиіс». Иә, солай болуы шартты да.

Қазақстан және Қызылорда облысының жаңалықтары: Білім