<a href="https://kyzylorda-news.kz/">Kyzylorda-news.kz.</a> «Қазақстан халқына» қоғамдық қорының білім беру гранттары» қайырымдылық бағдарламасын жүзеге асыру аясында гранттар мен шәкіртақылар беруге конкурс жариялайды.
Бұл туралы Өңірлік коммуникациялар қызметінде Қорқыт ата атындағы Қызылорда университетінің әлеуметтік және тәрбие жұмыстары жөніндегі проректоры Жандос Базартай мен қабылдау комиссиясының жауапты хатшысы Марат Абжаевтың қатысуымен өткен брифингте білгілі болды.
Бағдарлама 2022-2023 оқу жылында жүзеге асырылады. «Қазақстан халқына» қоғамдық қорының гранттары мен шәкіртақысына үміткерлер өзі таңдаған жоғары оқу орнының қабылдау комиссиясына 10-17 тамыз аралығында өтінім береді.
Қорқыт ата атындағы Қызылорда университетін таңдаған талапкерлер университеттің қабылдау комиссиясына келіп өтінім беруі тиіс.
Қабылдау комиссиясының мекен-жайы: Нұрсұлтан Назарбаев даңғылы 15, №5 оқу ғимараты. Байланыс телфондары: 87242 23-53-92, 87757968970.
Үміткер өтінімді өз бетінше береді және осы үдеріс үшін жауапкершілікті өз мойнына алады, бұл ретте ҰБТ-ға қойылатын талаптар жыл сайын өзгеруі мүмкін екенін ескергені жөн, сондықтан бұл ақпаратты қабылдаушы жоғары оқу орнынан алдын ала нақтылауы қажет.
Бағдарлама туралы толық ақпаратты «Қазақстан халқына» қоғамдық қорының: qazaqstanhalqyna.kz сайтынан табуға болады.
Сондай-ақ, «Қазақстан халқына» қоры ақылы бөлімде оқитын студенттерге білім грантын беруге конкурс жариялайды.
Конкурстан өткен студенттерге Қордың қаражаты есебінен оқуын жалғастыруға, шәкіртақы алуға мүмкіндік береді.
?️Бағдарламаға кімдер қатыса алады?
<ul>
<li>мүмкіндіктері шектеулі, мүгедектігі бар студенттер;</li>
<li>жетім бала санатына жататын және кәмелеттік жасқа дейін ата-анасының қамқорлығынсыз қалған студенттер;</li>
<li>ауылдық жерлердегі жағдайы төмен отбасылардан шыққан студенттер;</li>
<li>толық емес отбасыдан шққан студенттер; 
– 1 және 2 топтағы мүгедек балаларды тәрбилеп жүрген отбасыдан шыққан студенттер; 
– ата-анасы немесе ата-анасының бірі 1 және 2 топ мүгедектігі студенттер. 
Айта кетейік, үміткер студенттер өздігінен 1-15 тамыз аралығында «Taiburyl» ҚБ-ң taiburyl.kz сайтына онлайн-өтінім береді.</li>
</ul>

«Қазақстан халқына»: Білім беру гранттарына конкурс жарияланады

<a href="https://kyzylorda-news.kz/">Kyzylorda-news.kz.</a> Жаз – жарқын мезгіл. Бұл балалардың демалып, уақыттарын қызықты әрі көңілді өткізетін кезең. Оқу жылы аяқталысымен жазғы тынығу лагерлеріне асыққан оқушылардың лагерлердегі демалысы бүгінде төртінші маусымға қадам басты.
Аймағымыздағы 10 қала сыртындағы лагер жұмыс істеуде. Жалпы 7 ауысымда қала сыртындағы лагерлерде 8 960 оқушыны жазғы тынығумен қамту жоспарланған. Бүгінгі күні төрт ауысым бойынша 4 мыңнан астам бала тынығуда.
Биылғы жылы балалардың жазғы демалысын ұйымдастыру «Қазақстан балалары – жазды қуанышқа толтырайық!» тұжырымдамасының негізінде жүргізілуде. Тұжырымдамаға сәйкес барлық лагерьлер жанынан үйірмелер мен секциялардың жұмысы ұйымдастырылып, туристік бағыттағы экскурсиялар, тарихи танымдық саяхаттар қарастырылған. Сонымен қатар балалардың қауіпсіздігін қамтамасыз ету үшін қала сыртындағы лагерьлер бейнебақылау жүйелерімен толық жабдықталған. Барлық лагерлер санитарлық-эпидемиологиялық сәйкестігі туралы қорытынды алып жұмыс жасауда.
Мысалы, Арал ауданындағы “Қамбаш” олимпиадалар және қосымша білім беру орталығында балалар демалыстарын көңілді өткізуде. Төрт корпустан тұратын лагерь ғимаратында жайлы жатын бөлмелер мен 5 уақыт тамақ мәзірі, көптеген үйірме қарастырылған. Мұнда жыл бойы мектеп партасынан шаршаған балалардың көңілді демалуына және сауығуына барлық жағдай жасалған. Лагерьде спорттық (тренажер мен фитнес) залдар және бассейн бар. Орталықтың тағы бір ерекшелігі – мектеп оқушылары педагогтердің қатысуымен Ұлттық бірыңғай тестілеуге, пәндік олимпиадалар мен ғылыми жобаларға дайындала алады.
Ал Жаңақорған ауданы, Талап ауылында орналасқан облыстық олимпиада және қосымша білім беру орталығы енді жыл бойы жұмыс істейтін болады. Облыс әкімінің қолдауымен мұнда балалар демалып қана қоймай, жылдың басқа уақыттарында ҰБТ мен пәндік олимпиадаларға дайындалады. Демыс орнында бес мезгіл тамақтанатын заманауи асхана мен екі спорт алаңы, бассейн және монша қарастырылған. Орталықта ұлттық тәрбие клубы да жұмыс істейді. Оқушылар үшін Қаратау тауларына, Бесарық өзеніне, Қостөбе және Сауран ежелгі қалаларына экскурсиялар ұйымдастырылады. Сонымен қатар мұнда Саураннан табылған ыдыс-аяқ пен тұрмыстық заттардан құралған ашық аспан астындағы мұражай балалар игілігі үшін жұмыс жасауда.
Балалар жылына орай лагерлерде әр ауысым үшін әртүрлі тақырыптық бағыттар мен атаулар қарастырылған. Тақырыптық бағыттар аясында қала сыртындағы және мектеп жанындағы лагерьлерде 55 800 баланы қамтитын 1860 шара ұйымдастырылады. Олар әр баланың қабілеттерін ашуға, жасөспірімдерде патриотизм мен азаматтықты тәрбиелеуге бағытталған.
Маусым айында лагерьлердің жұмысы азаматтық-патриоттық, отбасылық, рухани-адамгершілік бағытта ұйымдастырылды. Балалар арасында отбасылық, рухани-адамгершілік құндылықтарды насихаттауды мақсат еткен шығармашылық байқаулар, зияткерлік ойындары мен шеберлік сағаттары өткізілді. Сонымен қатар, азаматтық-патриоттық бағытта Мемлекеттік рәміздер күніне арналған патриоттық акциялар ұйымдастырылды.
Шілде айындағы шаралар тарихи-мәдени, спорттық, көркемдік-эстетикалық бағытта ұйымдастырылуда. Атап айтқанда, барлық лагерьлерде 6 шілде – Елорда күніне арналған «Асқақтай бер, Елордам» мерекелік концерттері, «Еңселі Елорда» сурет салу, ән айту байқаулары, сондай-ақ «Біздің жеңімпаз команда» шағын футболдан турнирі, спорттық эстафеталары, шахмат, дойбы, үстел теннисі, ұлттық спорт түрлерінен сайыстар ұйымдастырылды.
Тамыз айында лагерь жұмыстары тарихи-өлкетану, волонтерлік тәрбие бағытына арналмақ. Мысалы, балалар үшін тарихи-мәдени орындарға экскурсиялар ұйымдастырылып, музейлерде презентациялар мен танымдық көрмелер өткізіледі.
Айта кетейік, облыс бойынша лагерлердің жұмысы тамыз айының соңында аяқталып, балалардың сауықтыру демалысын жоғары деңгейде ұйымдастыруға жұмылдырылған педагогтер үшін «Балалар демалысын ұйымдастырудың үздік бағдарламасы», «Жазғы педагогикалық идеялар-2022», «Жыл тәлімгері» арнайы конкурстары өткізіледі. Сондай-ақ, жазғы маусым қорытындысымен лагерьлерде белсенді жұмыс жасаған педагогтер, тәрбиешілер марапатталатын болады.

Қызылорда облысында жазғы лагерлердің жұмысы қалыпты жүргізілуде

<a href="https://kyzylorda-news.kz/">Kyzylorda-news.kz.</a>&nbsp; Тамыз айында өтетін ҰБТ-ға қатысу үшін өтініш қабылдау басталды. Өтінім қабылдау 25 шілдеде басталып, 30 шілдеге дейін жалғасады. ҰБТ-ға тіркелу Ұлттық тестілеу орталығының сайтында жүргізіледі. Тестілеудің өзі 10-13 тамыз аралығында өтеді, деп хабарлайды ҚазАқпарат.
Тамыздағы ҰБТ шекті балл жинай алмаған талапкерлердің тестілеуден қайта өтіп, ЖОО-ға ақылы негізде түсу мүмкіндігі болуы үшін өткізіледі.
Естеріңізге сала кетсек, осы ҰБТ-ға биылғы және өткен жылдардың мектеп түлектері, колледж түлектері мен шетелдік мектепте білім алғандар қатыса алады.
Негізгі ҰБТ секілді тамыздағы тестілеу электронды форматта 10-13 тамыз аралығында өтеді.
Тіркелу кезінде тестіленушілер емтихан өткізілетін орынды, күнді және уақытты өздері таңдайды.
Негізгі ҰБТ-ға қатысқан талапкерлер бейіндік пәндер комбинациясын тамыз тестілеуінде өзгерте алатындығын айта кеткен жөн.
<blockquote>
 Қаңтар-шілде аралығында өткен ҰБТ-да кей талапкерлер шекті балл жинай алмады. Шекті балсыз олар еліміздің жоғары оқу орындарына түсе алмайды. Біз осы балалардың ақылы бөлімге түсу мүмкіндігі болуы үшін, тамыз айында қайта тестілеуден өтуге жағдай жасадық. Оқуға түсу үшін шектік балл және әр пәннен кемінде 5 балл жинау қажет», –деді Ұлттық тестілеу орталығының директоры Руслан Емелбаев.
</blockquote>
Сонымен қатар ЖОО-да ақылы негізде өз мамандығы бойынша оқуды жалғастыруды жоспарлап отырған колледж түлектері әңгімелесу қорытындысы бойынша оқуға қабылданады.

ҰБТ-да шекті балл жинай алмаған талапкерлер тестілеуден қайта өте алады

Kyzylorda-news.kz. Облыс бойынша 2022-2023 жаңа оқу жылында 1 сыныпқа 18 мыңға жуық бала қабылданады деп күтілуде. Осыған сәйкес аймақта 4 350 орынға арналған 9 мектептің құрылысы жүргізілуде.
Бұл білім ордалары жаңа оқу жылына орай пайдалануға берілмек. Ал өңірде мектепке дейінгі білім беру ұйымдарының үлесі 73 пайызды құрайды. Аталған ұйымдар өткен жылдан бастап мемлекеттік тапсырыс негізінде меншік нысанына қарамастан жан басына қаржыландыру әдістемесі бойынша бірдей көлемде қаржыландырылуда. Бұл туралы Өңірлік коммуникациялар қызметінде өткен брифингте облыстық білім басқармасы басшысының міндетін атқарушы Бағдат Бердаулетов хабарлады.
<blockquote>
 Мектепке дейінгі ұйымдарда білім беру ісін жаңа сапалық деңгейге көтеру міндеті бүгінгі күннің өзекті мәселесі. Бүгінде өңірдегі 439 жекеменшік балабақшада 29 868 бала тәрбиеленуде. Аталған ұйымдардың 52 пайызы ауылдық жерде орналасса, 48 пайызы қалалық және аудан орталықтарында жұмыс істеуде. Жоғарыда аталған сандық мәліметтерден-ақ облыстағы 1-6 жас аралығындағы балаларды мектепке дейінгі ұйыммен қамтуда жекеменшік балабақшалардың үлесінің айтарлықтай екендігін көруге болады. Биыл бір балаға арналған мемлекеттік тапсырыс көлемі қалалық жерде 9 сағаттық топтар үшін – 47,4 мың теңге төленеді. Сонымен қатар жаңа оқу жылында облыстағы 311 мектепте 180 мыңнан астам оқушы білім алады деп жоспарлануда. Оқушылар саны өткен жылмен салыстырғанда 4 087-ге артатын болады, – деді облыстық білім басқармасы басшысының міндетін атқарушы Б.Бердаулетов.
</blockquote>
Брифинг барысында облыстық білім саласында сапаны қамтамасыз ету департаментінің басшысы Ғалия Дәулетова мектепке дейінгі білім беру ұйымдарын лицензиялауға байланысты бірқатар мәселелерді түсіндірді. Айтуынша, лицензия алу кезінде мектепке дейінгі ұйымдар мемлекеттік, сондай-ақ жеке меншік ұйымдар үшін бірыңғай ең төменгі біліктілік талаптарына сәйкестігін растауы тиіс.
Оқу-ағарту министрлігі мектепке дейінгі ұйымдарда лицензиялауды енгізу бойынша тиісті жұмыстарды бастады. Ең алдымен заңнамада белгіленген тәртіппен енгізілетін лицензиялаудың талаптарына талдау жүргізіледі, содан кейін тиісті заң жобасы әзірленеді. Яғни, лицензиялауға қойылатын бастапқы талаптар нарықтың нақты шарттары мен мүмкіндіктерін ескеретін болады. Қазіргі уақытта басты мәселе – мектепке дейінгі білім беру сапасы. Әрине, лицензиялау сапаны қамтамасыз етудің жалғыз жолы емес. Министрлік сапаны қамтамасыз ету бойынша бірқатар шаралар кешенін қабылдауда және лицензиялау – сол шаралардың бірі. Қазіргі таңда мектепке дейінгі білім беруді кезең-кезеңімен лицензиялау жоспарлануда.

Қызылордада 18 мыңға жуық бала 1 сыныпқа барады

&nbsp;*<a href="https://kyzylorda-news.kz/">Kyzylorda-news.kz.</a> «Қазақстан халқына» қоры «Қазақстан халқына» қоғамдық қорының білім беру гранттары» қайырымдылық бағдарламасын жүзеге асыру бойынша гранттар мен шәкіртақылар беруге конкурс жариялайды. Байқауға мектеп бітіруші түлектер мен ақылы негізде білім алатын Қорқыт ата атындағы Қызылорда университетінің студенттері қатысады.*
Бағдарлама 2022-2023 оқу жылында жүзеге асырылады.
Қор бакалавриат бағдарламалары бойынша жоғары білім алу ақысын төлеу үшін мемлекеттік немесе өзге грант ала алмаған, ауылдық жерлердегі жағдайы төмен отбасылардан шыққан түлектерге, жетім балаларға және мүгедектігі бар балаларға шәкіртақы төленетін гранттар береді.
«Қазақстан халқына» қоғамдық қорының гранттары мен шәкіртақысына үміткерлер (түлектер) өзі таңдаған жоғары және жоғары оқу орнынан кейінгі білімнің білім беру бағдарламаларын iске асыратын бiлiм беру ұйымдарының (бұдан әрі – ЖЖОКБҰ) қабылдау комиссиясына 10 тамыздан бастап 17 тамыз аралығында өтінім береді.
Маңызды: үміткер өтінімді өз бетінше береді және осы үдеріс үшін жауапкершілікті өз мойнына алады, бұл ретте ҰБТ-ға қойылатын талаптар жыл сайын өзгеруі мүмкін екенін ескергені жөн, сондықтан бұл ақпаратты қабылдаушы ЖЖОКБҰ-дан алдын ала нақтылауы қажет.
Бағдарлама туралы толық ақпаратты «Қазақстан халқына» қоғамдық қорының <a href="https://qazaqstanhalqyna.kz/ru/programs.html">сайтынан</a> табуға болады.
Қор ЖЖОКБҰ-на қабылдауға қатысты мәселелер бойынша кеңестер мен ақпарат бермейді. Осы сұрақтар бойынша ЖЖОКБҰ-ның қабылдау комиссиясына хабарласуы тиіс.
Сондай-ақ Қор ЖЖОКБҰ-ң ақылы бөлімдерде оқитын студенттеріне Қордың қаражаты есебінен оқуын жалғастыруға мүмкіндік береді. «Қазақстан халқына» қоғамдық қорынан грант пен шәкіртақы алу үшін студенттер 1 тамыздан бастап 15 тамыз аралығында «Taiburyl» ҚБ-ң <a href="https://www.taiburyl.kz/">сайтына</a> онлайн-өтінім береді.
КАЗГЮУ студенттері «Эндаумент КАЗГЮУ» корпоративтік <a href="https://endowment.kazguu.kz/ru/">қорының сайтында</a> өтінім береді
«Taiburyl» ҚБ мен «Эндаумент КАЗГЮУ» КҚ студенттерден (ЖЖОКБҰ ақылы бөлімінде оқитындар және Қор қаражаты есебінен оқуын жалғастырғысы келетіндер) өтінімдерді қабылдау және оларды өңдеу үшін өтеусіз техникалық алаңдарын ұсынады, яғни «Қазақстан халқына» ҚҚ білім беру гранттары» қайырымдылық бағдарламасын іске асыруда «Қазақстан халқына» қорына көмек көрсетіп, жобаның техникалық әріптестері болып табылады.
Қор бөлетін гранттар өтеусіз көмек болып табылады. Сома қайтарылмайды және грант алушы оқуын аяқтағаннан кейін оның оқуына жұмсалған қаражатты «өтеуге» міндетті емес.
Айта кету керек, конкурс туралы толық ақпаратты Қорқыт ата атындағы Қызылорда университеті <a href="https://korkyt.edu.kz/article/141">сайтының</a> хабарландыру бөлімінен де біле аласыз.

«Қазақстан халқына» қоры талапкерлер мен студенттерге грант пен шәкіртақы тағайындау бойынша байқау өткізеді

<a href="https://kyzylorda-news.kz/">Kyzylorda-news.kz.</a> ҚР ДСМ инфекциялық ауруларды эпидемологиялық бақылау басқармасының басшысы Роза Қожапова мектептерді қашықтан оқыту форматына көшіру мүмкіндігіне пікір білдірді, деп хабарлайды ҚазАқпарат.
<blockquote>
 «Мектептерді немесе қандай да бір білім мекемесін қашықтан немесе жартылай қашықтан оқыту форматына көшіру оқу жылы басталуға жақын қалған кездегі жағдайға байланысты қаралады. Бұған дейінгі уақытта науқастанудың артуы әртүрлі ұзақтықта болды. Бізде вирустың соңғы өршіген кезі – 20 маусым. Қазіргі уақытта дәл қыркүйек айында жағдайдың қалай өрбитінін айта алмаймыз», – деді ол орталық коммуникациялар қызметіндегі баспасөз мәслихатында БАҚ өкілдерінің сауалына орай.
</blockquote>
Оның атап өтуінше, коронавирустың өршіген кезі 2 аптадан 2 айға дейінгі мерзімді қамтыған кезең болды.
<blockquote>
 «Ал оқыту қандай форматта өтетінін шамамен тамыз айының екінші жартысына қарай ғана айта аламыз. Бірақ, жағдай сол уақытта балалардың арасында аурудың қаншалықты таралуына байланысты болады», – деді Роза Қожапова.
</blockquote>

Қашықтан оқыту:  Жағдай сол уақытта балалардың арасында аурудың таралуына байланысты

<a href="https://kyzylorda-news.kz/">Kyzylorda-news.kz.</a> Аккредиттеу және рейтингтің тәуелсіз агенттігі (АРТА) жүргізетін ҚР-2022 жоғары оқу орындарының қажеттілігінің тәуелсіз рейтингісінің қорытындысы бойынша Қазақстанның үздік жоғары оқу орындары анықталды.
Рейтингке көпсалалы, техникалық, гуманитарлық-экономикалық, медициналық және педагогикалық бағыттағы жоғары оқу орындары, сондай-ақ өнер жоғары оқу орындары қатысты. Саралау қорытындысы бойынша Қорқыт ата атындағы Қызылорда университеті 8-орынға ие болып, ҚР жоғары оқу орындарының бас рейтингісінің ТОП-20 қатарына енді.

ТОП-20: Қорқыт ата атындағы университет 8-орында

<a href="https://kyzylorda-news.kz/">Kyzylorda-news.kz.</a> ҚР Ғылым және жоғары білім министрі Саясат Нұрбек dialog.egov.kz электронды үкімет порталындағы «Ашық үкімет» алаңында жеке блог ашты.
<blockquote>
 “Мен «Ашық үкімет» алаңында отандық ғылымды дамыту және жоғары оқу орындарындағы білім беру қызметінің сапасын арттыруға қатысты кез келген ұсыныстар мен пікірлерді тыңдауға дайынмын. Барлық арыз, өтініш, ұсыныстарды мұқият оқып шығып, қажет деген жағдайда тиісті шара қолдануға әзірміз”, – деді Саясат Нұрбек порталдағы алғашқы хабарламасында.
</blockquote>
Ғылым және жоғары білім министрі бұл блог министрлік қызметкерлеріне еліміздің жоғары оқу орындары мен ғылыми ұйымдарының мәселелерін шешуде бірлесіп жұмыс істеуге мүмкіндік беретініне сенім білдірді. Осы орайда Саясат Нұрбек қазақстандықтарды өзгелерге үлгі боларлық оң істер туралы айтуды да ұмытпауға шақырды.
Порталдың негізгі мақсаты – азаматтардың мемлекеттік органдардың жұмысына қатысты ойларын білу. Портал арқылы кез келген адам нақты бір мемлекеттік органға немесе жергілікті әкімшілікке тікелей өтініш білдіруге және ұсыныс жасауға, әлеуметтік маңызды сауалнамаларға қатысуға мүмкіндік алады.

ҚР Ғылым және жоғары білім министрі Нұрбек Саясат  ашық диалогқа шақырады

Kyzylorda-news.kz. «Жас маман» – білікті мамандарды даярлауда теңдессіз тәжірибе әрі жүйелі жоба. Жобаның мақсаты – сұранысқа ие өнеркәсіптік және сервистік мамандықтарды жаңғырту, практика арқылы білікті мамандарды дайындау.
Халықаралық тәжірибе 2021 жылдан бастап жүзеге асты. Жоба аясында 180 колледж және 20 жоғары оқу орнының базасы жаңа материалдық-техникалық құралдармен жабдықталды. Бұл өз кезегінде қажетті мамандарды дайындауға мол септігін тигізді.
Жалағаш индустриалды-аграрлық колледжі де ауқымды жобаның демеуін көріп отыр. Оқу ордасына өткен жылы «Фермер шаруашылығы» және «Тамақтандыруды ұйымдастыру» мамандықтары бойынша соңғы үлгідегі техникалар алынды. Бүгінде осы біліктілікте 100-ге жуық студент оқып жатыр. Расында да, жоба білім алушылардың кәсіби дамуына мүмкіндік берді.
Ауыл шаруашылығындағы басты техника – трактор, айналмалы соқа, экскаватор тиегіш секілді соңғы үлгідегі заманауи көліктер агро мамандардың шеберліктері мен қабілеттерін арттырды.
Аспазға арналған құрал-жабдықтар да студенттердің білікті маман болып қалыптасуына оң септігін тигізді. Колледжге ас дайындайтын арнайы пештер, қажетті құрылғылар алынды. Бүгінде білім алушылар саланың қыр-сырын үйреніп, түрлі тағамдарды дайындауда.
Жалағаш индустриалды-аграрлық колледжі ауыл шаруашылығы мамандарын даярлайтын іргелі оқу орын. Оқу орнында бүгінде 500-ге жуық студент 6 мамандық, 10 біліктілік бойынша білім алады. 
Қарашаңырақ сапалы әрі кәсіби біліктілігі жоғары кадр дайындауды мақсат тұтады.
<img src="https://kyzylorda-news.kz/wp-content/uploads/2022/07/fb_img_1658303972658.jpg" alt="" />

«Жас маман» — кәсіби дамудың негізі

<a href="https://kyzylorda-news.kz/">Kyzylorda-news.kz.</a> Елімізде 13 шілдеден бастап мемлекеттік грант байқауына құжаттар қабылдау науқаны басталды. Қазіргі уақытта Қорқыт ата атындағы Қызылорда университетінің №5 оқу ғимаратында қабылдау комиссиясы демалыссыз жұмыс істеуде. Бұл туралы Өңірлік коммуникациялар қызметінде өткен брифингте Қорқыт ата атындағы Қызылорда университетінің әлеуметтік және тәрбие жұмыстары жөніндегі проректоры Жандос Базартай хабарлады.
Құжат тапсыруға келетін талапкерлер легін қабылдауға Қорқыт ата атындағы Қызылорда университетінің мамандары толықтай дайын. Керекті құрал-жабдықтармен қамтылған кеңесшілер, техникалық хатшылар талапкерлерге ақпарат беріп, жан-жақты қолдау көрсетуде.
<blockquote>
 &nbsp;«Бүгінде университет бойынша 24 техникалық хатшы жұмыс жасайды, оның ішінде 8 техникалық хатшы қосымша виртуалды қабылдау жұмысын атқарады.
 Ал, оқуға түсушілерге кеңес беру мақсатында университеттің профессор-оқытушылар құрамы жұмыс істейді», – деді Жандос Нұртайұлы.
</blockquote>
Қабылдау комиссиясында талапкерлердің өз-өзіне қызмет көрсету бұрышы 10 дербес компьютермен жабдықталған.
Университеттің ресми сайтында және әлеуметтік желілердегі парақшаларында қабылдау жұмысына қатысты барлық ақпараттар жүйелі түрде жариялануда.
Биыл жоғары оқу орындары виртуалды кеңселерін қайта ашты және қабылдау комиссиялары алғашқы жұмыс күндерінен бастап өтініштерді оффлайн және онлайн қабылдауда. Мұнда университет қызметкерлері кеңес береді және бейне байланыс арқылы құжаттарды қабылдайды.
Университеттер мен виртуалды қабылдау комиссиялары үшін барлық қажетті ақпараттар Ұлттық тестілеу орталығының&nbsp;<a href="https://l.facebook.com/l.php?u=http%3A%2F%2Fwww.testcenter.kz%2F%3Ffbclid%3DIwAR1Gw-t58ch2kGHn35gyOV7K04bLH3GkJrDNO_4yXwV9tuMxxKx6XiP18ZQ&h=AT1kNxDfai0RxA_sfav_0hu0LQlTwtSHg3aoQemtznQh-AHllQbqM_Q16dGB_NRVk8HOA_VDtIxO8wt8fBemuT1B8OAfWrapY7f5YnLZeBWPdbeZsX2wJN1QgoP45DiEB-hA&__tn__=-UK-R&c%5b0%5d=AT3GCOq35aI6Jjsw5Qd5n-jpypDKGG8-u9zdXLnjlNiGE1r5YKPD5YOVR1cdZgEFr3WRn4lP71yjLghr-UaZBCyu-A2OC11n7_i4yS8xuUjDVGfbdCrc4bV22ak1GHh064NRgQ9PD2IeHumZtgj7vhoBo__oNyUfrj3gpmSsyuPwvxg_Sc_5z4q43c5qnK61khQo9uLlY_PMidRppGOmp29WCB-N-20iMq0">www.testcenter.kz</a>&nbsp;сайтында орналасқан.
Сонымен қатар, №5 оқу ғимаратының аумағы шатырмен және орындықтармен жабдықталып, келушілерге барлық жағдай жасалды. Қазіргі уақытта &nbsp;талапкерлер мен ата-аналар үшін «Жігер» мейрамханасы және екі асхана жұмыс істеуде. Кезекте тұрған келушілерге арнап университеттің өнерпаздары әннен шашу шашып, жиналған қауымның ықыласына бөленді.
Айта кету керек, қабылдау комиссиясы 20 шілдеге дейін жұмыс істейді.
Брифингте қабылдау комиссиясының жауапты хатшысы Марат Абжаев осы кезге дейін, яғни 19 шілде, сағат 15.00-ге дейін талапкерлерден 3622 өтініш келіп түскенін атап өтті.
2021-2022 оқу жылының қорытындысы бойынша 11- сыныпты бітірген 7506 түлектің 6452-сі ҰБТ-ға қатысты. Оның 6036-ы шекті деңгейден өтті. (416 түлек шекті деңгейден өтпеген)
Талапкерлер оқуға түсуге қатысты барлық сұрақтар бойынша төмендегі номерлерге хабарласа алады: 8 7242 23-53-92, Call center 8 702 922 44 58, Watsapp: 8 776 538 88 99;
Инстаграм: @korkyt_ata_university.
Қабылдау комиссиясының мекен-жайы: Нұрсұлтан Назарбаев даңғылы 15, № 5 оқу ғимараты.
Қазіргі таңда Қорқыт ата атындағы Қызылорда университетінде 8 мыңға жуық білім алушы бар. Биылғы оқу жылын 2159 түлек бітіріп, оның 200-ге жуығы үздік диплом иегері атанды.&nbsp;
Университетте 62 бакалавр,&nbsp; 36 магистратура және 13 докторантура білім беру бағдарламалары бойынша мамандар даярланады. Білім алушылардың жан-жақты дамып, өз саласының үздігі атану үшін оқу орны тарапынан мол мүмкіндік берілген.

Мемлекеттік білім беру гранты: Қызылордада құжат қабылданып жатыр

<a href="https://kyzylorda-news.kz/">Kyzylorda-news.kz.</a> Бірінші кезекте жаңадан ашылған балабақшалар лицензиялаудан өтеді. Тек содан кейін қазір жұмыс істеп тұрған мектепке дейінгі білім беретін ұйымдар лицензияланады. Бұл туралы Оқу-ағарту вице-министрі Шолпан Қаринова өзінің <a href="https://www.facebook.com/100019837397965/posts/pfbid0ZHcDMfT5cj6Rmds9WGowrTZ8rqqvP66b6ci4MoG4EwS7enccTea7nWuvR1xosmzAl/?d=n&mibextid=GYD0Dy">Facebook</a> -тегі парақшасында мәлімдеді.
<blockquote>
 «Бүгінде әлеуметтік желілерде балабақшаларды лицензиялау мәселесі белсенді талқылануда. Бірі балабақшаларды тез арада лицензиялау керек десе, енді бірі лицензиялауды енгізу мектепке дейінгі білім берумен айналысатын жеке бизнестің дамуына кедергі келтіреді, деп санайды. Лицензиялау балаларға қатысты зорлық-зомбылықтың жиілеуіне байланысты енгізілуде деген дұрыс емес. Мұны барлық ата-аналар мен қоғам түсініп отыр. Мемлекет балабақшаларды жабу міндетін қойып отырған жоқ. Лицензиялау керісінше мемлекеттік және жеке мектепке дейінгі ұйымдардың дамуына жағдай жасайды. Тек биылғы жылы мемлекеттік қолдау шараларының арқасында 300-ден астам балабақша ашылып жатыр. Олардың жартысынан көбі жеке балабақшалар», – деп жазды вице-министр. Шолпан Қаринованың мәліметінше, лицензиялау талаптары аз болады.
</blockquote>
Балабақша тарапынан педагогтердің және оқу материалдарының жеткілікті болуы, орнатылған бейнекамералар, санитариялық және өрт қауіпсіздігі нормаларының сақталуы мен меншікті немесе жалға алынған ғимараттың болуы сұралады.
<blockquote>
 «Лицензиялау кезең-кезеңмен жүзеге асырылады деп жоспарлануда. Алдымен заңдарға және басқа да актілерге өзгерістер енгізіледі. Бірінші кезекте жаңадан ашылған мектепке дейінгі ұйымдар лицензиялаудан өтеді. Яғни, жылына шамамен 200 жаңа балабақша. Содан кейін лицензиялаудан бүгінде жұмыс істеп тұрған мектепке дейінгі мекемелер өтеді. Олардың да саны аз. Жылына 10-15 балабақша. Балабақшаларға бармай-ақ, тәуекелді жағдайлар Ұлттық білім беру деректер қоры арқылы автоматтандырылған негізде анықталатын болады» – деп мәлім Шолпан Қаринова.
</blockquote>

Елімізде балабақшаларды лицензиялау қалай жүргізіледі?

<a href="https://kyzylorda-news.kz/ru/">Kyzylorda-news.kz.</a> Облыстық жастар ресурстық орталығында РФ Президенті жанындағы Ресей халық шаруашылығы және Мемлекеттік қызмет академиясында білімін жетілдірген аймақ энергетиктеріне диплом беру салтанаты өтті. Іс-шараға академия өкілдері мен «Қызылорда жарығы» холдингі қызметкерлері қатысты.
2018 жылы Қызылорда қаласында РФ Президенті жанындағы Ресей халық шаруашылығы және Мемлекеттік қызмет академиясы корпоративтік басқарудың жоғары мектебінің (ВШКУ РАНХиГС) филиалы ашылған. Оқу орны барлық саланы, оның ішінде менеджмент, экономика, маркетинг секілді салаларды тереңдетіп оқытады.
Оқу орнының аймағымыздағы алғашқы түлектері 2020 жылы бітіріп шықты. Биыл да облысымыздың мемлекеттік қызметшілері, мұнай-газ, энергетика, құрылыс салаларының қызметкерлерінен құралған екі топ оқуын аяқтап шықты. Олардың қатарында «Қызылорда жарығы» холдингінің 7 қызметкері бар.
Салтанатты шарада холдинг қызметкерлеріне дипломдарын облыс мамандарының осы оқу орнында білімін жетілдіруіне бастамашы болған ВШКУ РАНХиГС Қамқоршылық кеңесі мүшесі Жомарт Көшербаев табыстады.
<blockquote>
 Облыс энергетиктері 2009 жылдан бері Ресей халық шаруашылығы және Мемлекеттік қызмет академиясымен тығыз байланыста. Осы уақыт ішінде «Қызылорда жарығы» холдингінің 34 қызметкері осы оқудан өтті. Оның ішінде 24 қызметкер МВА дәрежесін, 5 қызметкер іскерлік-әкімшілік басқару докторы дәрежесін алды, – деді Жомарт Көшербаев.
</blockquote>
Іскерлік-әкімшілік басқарудың шебері (МВА) дәрежесі –&nbsp; бизнесте, мемлекеттік қызметте және муниципалдық басқаруда тиімді жұмыс жүргізуге машықтандыратын бірден-бір бағдарлама. Сондықтан оған сұраныс жоғары. Айталық, көрші Ресейде жоғары лауазымға тағайындау үшін мемлекеттік қызметкердің МВА дәрежесі болуы – негізгі талаптардың бірі.
Айта кетейік, «Қызылорда жарығы» холдингі өңіріміздегі энергия нарығындағы құрылымдарды топтастырып отыр. Атап айтқанда, құрамына аймақты электр энергиясымен қамтамасыз ету бағытында қызмет көрсететін «Дәулетэнерго», «Шиелі жарығы» және «Энергосервис» ЖШС секілді компаниялар кіреді. Холдинг қызмет көрсету нарығын кеңейту, сапасын арттыру бағытында жұмыс жүргізуде. Сондай-ақ, қызметкерлерінің біліктілігін ұдайы жетілдіріп отыру – холдингтің басты ұстанымдарының бірі.

Қазақстан және Қызылорда облысының жаңалықтары: Білім