<a href="https://kyzylorda-news.kz/">Kyzylorda-news.kz</a> Мемлекет басшысы Екінші дүниежүзілік соғыстағы және жапон басқыншылығына қарсы күрестегі Жеңістің 80 жылдығына орай Бейжіңдегі Тяньаньмэнь алаңында өткен әскери парадты тамашалады.Қасым-Жомарт Тоқаев және ҚХР Төрағасы Си Цзиньпинмен бірге мінберде Еуропа, Азия, Африка, Латын Америкасы елдерінің жиырмадан астам мемлекет, сондай-ақ үкімет басшылары болды.Парадқа &nbsp;10 мыңнан астам жауынгерді қамтыған Қытай халық азаттық армиясының 45 әскери құрылымы қатысты.Салтанатты шеруде құрлықта, теңізде және әуеде қолданылатын стратегиялық жаңа қару-жарақ түрлері алғаш рет көрсетілді.&nbsp;Сонымен қатар 4-ші буын қаруының жаңа түрлері, ұшқышсыз ұшатын және ұшқышсыз аппараттарға қарсы қолданатын қорғаныс техникалары, бағытталған энергия қаруы мен басқа да ұрыс құралдары таныстырылды.

Президент Қасым-Жомарт Тоқаев Екінші дүниежүзілік соғыстағы Жеңістің 80 жылдығына арналған әскери парадқа барды

<a href="https://kyzylorda-news.kz/">Kyzylorda-news.kz</a> Қызылорда облысында күзгі мерзімді әскери қызметке шақыру жұмыстары басталды. Биыл қыркүйек пен желтоқсан айлары аралығында өңірден 900-ге жуық 18–27 жас аралығындағы азамат әскер қатарына шақырылып, Қарулы Күштерде, Ұлттық ұланда, Шекара қызметінде және басқа да әскери құрылымдарда борышын өтейді. Жас сарбаздарға әлеуметтік қолдау шаралары қарастырылған: несие төлемдері уақытша тоқтатылады, сондай-ақ білім алуда жеңілдіктер беріледі. Аймақ жастары ел қорғау міндетін абыроймен атқарып, мемлекет тарапынан қолдауға ие болмақ. Бұл туралы бүгін Өңірлік коммуникациялар қызметінің ақпарат алаңында Қызылорда облысы Қорғаныс істері жөніндегі департаменті бастығының орынбасары Нұрлыбек Сейітханов мәлімдеді.<blockquote>-&nbsp;⁠Күзгі&nbsp;мерзімді&nbsp;әскери қызметке шақыру науқаны – жас ұрпақтың ел алдындағы ең басты борышын орындауының айқын көрінісі. Бүгінгі таңда Қызылорда облысынан 900-ге жуық азамат әскер қатарына аттануға дайындық үстінде. Олардың әрқайсысы Қазақстан Республикасының Қарулы Күштерінде, Ұлттық ұланда, Шекара қызметінде және өзге де әскери құрылымдарда борышын өтейді. Бұл - жас сарбаздарымыздың шыңдалып, нағыз азамат болып қалыптасуына үлкен мүмкіндік. Әскерге шақырылған жастарға мемлекет тарапынан жан-жақты қолдау көрсетілуде. Мәселен, мерзімді қызметке барған сарбаздардың несие төлемдері бір жылға тоқтатылады. Сондай-ақ, білім беру саласында жеңілдіктер қарастырылған. Ұлттық бірыңғай тестілеусіз-ақ жоғары оқу орындарына түсу мүмкіндігі бар. Биылдың өзінде Қызылорда облысынан 61 жас мемлекеттік білім грантын иеленді. Бұл жастарымыздың білім алуға деген ынтасын арттырып, болашағына сеніммен қарауына жол ашады. Сонымен бірге, азаматтарды әскерге шақыру барысы заманауи әдістермен жүзеге асырылуда. Арнайы 1414 сервисі арқылы SMS-хабарламалар жіберу пилоттық режимде енгізілді. Бұл шақырылушыларға уақытылы ақпарат жеткізіп, олардың әскери бөлімдерге белгіленген мерзімде келуін қамтамасыз етуге мүмкіндік береді. Әскер қатарына шақырылған әрбір жас - еліміздің болашағы, ел қорғауға дайын азамат. Сондықтан біз олардың денсаулығына, білім деңгейіне, моральдық-психологиялық дайындығына ерекше көңіл бөліп отырмыз. Қатарымыздан тек елін сүйетін, жауапкершілікті сезіне білетін азаматтар әскер сапына қосылады. Жас сарбаздардың борышын абыроймен өтеп, тәжірибе жинап, Отан алдындағы парызын адал атқаратынына сенімдіміз. Әскерде алған тәрбие мен шынығу олардың азамат ретінде қалыптасуына үлкен серпін беріп, болашақ өміріне жол ашатыны анық, - деді Нұрлыбек Қалыбекұлы.</blockquote>Фото: Қызылорда облысының Өңірлік коммуникациялар қызметі

Қызылорда облысында күзгі мерзімді әскерге шақыру науқаны басталды

<a href="https://kyzylorda-news.kz/">Kyzylorda-news.kz</a>&nbsp; Облыс әкімі Нұрлыбек Нәлібаевтың төрағалығымен жиналыс өтіп, оған жауапты сала басшылары мен зиялы қауым өкілдері қатысты.Басқосуда аймақ башысы бірқатар азаматқа Президент Жарлығымен мемлекеттігіміздің қалыптасуына, ел егемендігінің нығаюы мен әлеуметтік-экономикалық дамуына қосқан елеулі үлесі үшін берілген «Қазақстан Республикасының Конституциясына 30 жыл» мерекелік медалін табыстады.«Биыл Ата Заңымыздың 30 жылдығы кең көлемде аталып өтуде. Облыстық комиссияның шешімімен мерейтойлық медальмен марапаттауға ел ағалары, мемлекеттік қызметшілер ұсынылып, қолдау тапты.Баршаңыз Мемлекет басшымыздың «Заң мен Тәртіп» қағидатын сақтап, мемлекетіміздің даму жолында адал қызмет жасап келесіздер. Тәуелсіз Қазақстанымыздың гүлденуіне кезінде ел үшін қызмет атқарған ардагерлеріміз орасан зор еңбек сіңірді. Бақберген Сәрсенұлы мен Мұрат Бақтиярұлы Парламент Сенатының екі шақырылымында депутат болған кезеңде Конституцияның сақталуына, халықтың әл-ауқатын жақсартуға бағытталған заңдардың қабылдануына үлес қосты. Біз ағаларымыздың еңбегін мақтанышпен айтамыз, құрметпен қараймыз.Конституциямыздың үстемдігін қамтамасыз ету, еліміздің Тәуелсіздігін нығайту, қоғамдық келісім мен тұрақтылықты сақтау әрі дамыту жолында еңбек еткен ел ағалары мен азаматтар марапат төрінен көрінуде.Марапаттарыңыз құтты болсын! Бұл барлығымыздың бірлесіп атқарған жұмысымыздың лайықты бағасы деп білемін», – деді Н.Нәлібаев.Жиында мемлекет және қоғам қайраткері Бақберген Досманбетов көрсетілген құрметке алғысын білдіріп, мерекеге орай құттықтауын жеткізді.<img src="https://knadmin.beoblood.kz/uploads/R_1_2c2aedc043.jpg" alt="ҚР 1.jpg"><img src="https://knadmin.beoblood.kz/uploads/R_2_b4fe42282c.jpg" alt="ҚР 2.jpg"><img src="https://knadmin.beoblood.kz/uploads/r_R_2_7d8dbfabbf.jpg" alt="ҚрР 2.jpg"><img src="https://knadmin.beoblood.kz/uploads/R_3_a7c09cbd06.jpg" alt="ҚР 3.jpg">Фото: Қызылорда облысы әкімінің баспасөз қызметі

«Қазақстан Республикасының Конституциясына 30 жыл» медалі табысталды

<a href="https://kyzylorda-news.kz/">Kyzylorda-news.kz</a> Қызылорда облысы бойынша көліктік бақылау инспекциясы 2025 жылдың алғашқы жартыжылдығында көлік саласында бірқатар нәтижелерге қол жеткізді. Автомобиль, теміржол және су көліктерін бақылау бағытында заң бұзушылықтар анықталып, айыппұлдар өндірілді, сонымен бірге заңсыз тасымалдаумен күрес күшейтілді. Сондай-ақ, көлік қауіпсіздігін қамтамасыз ету және көрсетілетін мемлекеттік қызметтердің сапасын арттыру бойынша жүйелі шаралар атқарылды. Бұл туралы бүгін Өңірлік коммуникациялар қызметінің ақпарат алаңында Қызылорда облысы бойынша көліктік бақылау инспекциясы басшысының орынбасары Бақытжан Бекмұратов мәлімдеді.<blockquote>- Мемлекет басшысы Қасым-Жомарт Тоқаев өзінің Жолдауында еліміздің әлеуметтік-экономикалық дамуы үшін көлік саласының маңыздылығына ерекше тоқталған болатын. Осы орайда, Қызылорда облысы бойынша көліктік бақылау инспекциясы заңдылықты қамтамасыз ету, азаматтардың қауіпсіздігін қорғау, сондай-ақ мемлекеттік бюджетке түсетін түсімдерді толық әрі уақытылы орындау бағытында жүйелі жұмыс жүргізіп келеді. Ағымдағы жылдың алғашқы жартыжылдығында инспекция мамандары көлік саласының үш бағыты - автомобиль, теміржол және су көлігін бақылау жұмыстарын атқарды. Автомобиль жолдарының ұзындығы облыс бойынша 3418 шақырымды құрайды. Бұл жолдарда біздің 12 маман екі жылжымалы көліктік бақылау бекеті арқылы тәулік сайын тексерулер жүргізіп келеді. Алты айда 422 құқық бұзушылық анықталып, 23,6 миллион теңге айыппұл салынды. Сонымен бірге, автокөлік құралдарының жүріп өтуіне байланысты алым жоспары 26 пайызға артығымен орындалып, республикалық бюджетке 212 миллион теңгеден астам қаражат түсті. Бұл - тек облыс үшін ғана емес, тұтас ел экономикасы үшін маңызды көрсеткіш. Жүк тасымалы саласында да нақты жұмыстар атқарылды. Шиелі мен Жаңақорған аудандарында тас тасымалдаушыларға қатысты 297 әкімшілік іс қозғалды, оның ішінде артық салмақпен жүру деректеріне байланысты 57 іс бойынша жауапкершілікке тарту шаралары қабылданды. Алдағы уақытта Самара–Шымкент тас жолының Бірқазан елді мекені маңына автоматтандырылған өлшеу станциясын орнату жоспарланып отыр. Бұл заманауи құрал көліктердің артық салмақпен қозғалысын автоматты түрде тіркеп, заң бұзушылықтың алдын алуға мүмкіндік береді. Сонымен қатар, жолаушыларды заңсыз тасымалдаумен күрес ерекше назарда тұр. Жергілікті полиция қызметі, әкімдік, кірістер департаменті және өзге де мемлекеттік органдармен бірлескен «Заңсыз тасымалдаушы» акциясы тұрақты түрде өткізілді. Осы іс-шара барысында 90-нан астам көлік тексеріліп, 16 тасымалдаушы әкімшілік жауапкершілікке тартылды. Жолаушыларды лицензиясыз тасымалдаған фактілер бойынша әкімшілік сот шешімдері шығарылып, айыппұлдар салынды. Бұл жұмыстар заңсыз қызметтің азаюына ықпал етуде. Техникалық байқау орталықтарының жұмысына да бақылау күшейтілді. Облыста 43 орталық тіркелген, қазіргі таңда 44 стационарлық және 9 мобильді желі қызмет көрсетуде. Су көлігі саласында 1300-ден астам шағын көлемді кеме тіркелген. Биылғы жарты жылда 79 кеме тексеріліп, 34 құқық бұзушыға айыппұл салынды. Әсіресе Арал және Қазалы аудандарында балық аулау мақсатында пайдаланылатын кемелердің қауіпсіздігіне ерекше көңіл бөлінуде. Бұл бағытта төтенше жағдайлар департаментімен бірлескен бақылау және түсіндіру жұмыстары тұрақты жүргізіліп келеді. Мемлекеттік қызмет көрсету сапасы да бақылауда. 2025 жылдың алты айында көлік саласы бойынша 3229 мемлекеттік қызмет көрсетілді. Оның ішінде кейбір өтінімдердің кері қайтарылуына құжаттардың толық болмауы немесе төлемнің жасалмауы себеп болды. Бүгінде барлық қызмет түрлері электронды форматта көрсетіледі, бұл ашықтық пен қолжетімділікті қамтамасыз етеді. Қорыта айтқанда, Қызылорда облысы бойынша көліктік бақылау инспекциясы заңдылықты сақтау, көлік қозғалысы қауіпсіздігін арттыру және халыққа сапалы қызмет көрсету бағытында жоспарлы әрі нәтижелі жұмыстарды жалғастырып келеді. Алдағы уақытта да бұл жұмыстарды күшейтіп, көлік саласының тұрақты дамуына барынша үлес қосатын боламыз, -деді Бақытжан Алтынбекұлы.</blockquote>Фото: Қызылорда облысының Өңірлік коммуникациялар қызметі

Көлік саласындағы бақылау-қадағалау жұмыстары нәтижелі жүргізілуде

<a href="https://kyzylorda-news.kz/">Kyzylorda-news.kz</a> Қазақстан азаматтары банк қызметкері, құқық қорғау органдарының өкілі атынан қоңырау шалатын жалған хабарламаларға немесе «картаңыз бұғатталды» деген SMS-терге үйреніп қалған. Алайда алаяқтар бір орында тұрған жоқ: олардың әдістері барған сайын күрделене түсуде. Бүгінде SMS-кодты тікелей сұраудың орнына қашықтан қол жеткізу технологиялары қолданылуда. Fingramota.kz жаңа схемалар туралы және олардан қалай қорғану керектігін түсіндіреді.Қауіпті технологияларҚазір қылмыскерлер SMS-кодты тікелей айтуды сұрамайды. Олар жәбірленушіні экранды көрсетуге немесе AnyDesk, TeamViewer сияқты қашықтан басқару бағдарламаларын орнатуға иландырады.Сылтаулары әртүрлі болуы мүмкін: «құрылғыны тексеру», «өтінішті толтыруға көмектесу», «техникалық ақауды жою». Жәбірленуші келісіп, қосылым орнатқаннан кейін оның телефонына мемлекеттік қызметтер порталына кіру немесе операцияны растау үшін код келеді. Адам кодты ауызша айтпаса да, алаяқтар экраннан көріп, оны ақша аудару немесе өзге де заңсыз әрекеттер үшін пайдаланады.Бұл әдістің қауіптілігі – жәбірленуші өз құрылғысын толық бақылауды қылмыскерлерге беріп қойғанын аңғармай қалады. Осы сәтте алаяқтар банк картасының деректерін, жеке кабинеттерге кіруді, қосымшалардағы мәліметтерді көре алады.Бейнеқоңыраулар арқылы жасалатын схемалар да кең таралуда. Жәбірленушіге мессенджерде «курьер» немесе «оператор» болып хабарласады, сенім ұялату үшін бейнеқоңырау ашады. Сол уақытта бейнежазба жасап, қашықтан қол жеткізуге немесе экранды жазуға рұқсат сұрайды.Алынған кодтар мен деректерден бөлек, жазбаларды да кейін жәбірленушінің туыстары мен таныстарын алдау үшін қолданады. Бұл үшін алаяқтар «deepfake» технологиясын пайдаланып, өзін шынайы адам ретінде көрсетеді.Ескі, бірақ әлі де өзекті тәсілдерЖалған интернет-дүкендер мен онлайн-сауалнамалар өзекті болып қала беруде. Адамдарға арзан бағада тауар ұсынады да, алдын ала төлем алғаннан кейін жоғалып кетеді. Кейде «сыйлық береміз» деп анкета толтыруды сұрайды, бірақ карта деректері мен CVV-кодты енгізуді талап етеді. Бұл деректердің өзі-ақ шотты босатуға жеткілікті.Классикалық әлеуметтік инженерия әдістері де танымал: жалған сайттар арқылы фишинг, зиянды ресурстарға апаратын QR-кодтар, нөмірді ауыстырып қоңырау шалу, белгілі тұлғаның бейнесін көрсетіп, ақша салуға шақыратын дипфейктер.Сондай-ақ «қайтадан алдау» тәсілі де жиі кездеседі: бұрын зардап шеккендерге «ақшаны қайтарып береміз» деп хабарласып, сенімге кіреді. Нәтижесінде бұл жаңа алдау әрекетіне айналады.Әдістер әртүрлі болғанымен, мақсат ортақ: адамды сендіріп, өз қолымен алаяқтарға қаржылық ресурстарға жол ашу.Қалай қорғануға болады?Негізгі қорғаныс құралы – сыни ойлау және сақтық.Бейтаныс адамдардың өтініші бойынша телефонға немесе компьютерге ешқашан қосымша бағдарлама орнатпаңыз. Егер қоңырау шалушы өзін банк немесе мемлекеттік орган қызметкері ретінде таныстырса да, есте сақтаңыз: ресми ұйымдар экран көрсетуді немесе қашықтан басқару бағдарламасын орнатуды талап етпейді. Бейтаныс интернет-дүкендерден тауар сатып алмас бұрын немесе сауалнамаға қатыспас бұрын ақпарат көзін мұқият тексеріңіз. Шынайы компаниялар тек ресми сайттар мен сенімді төлем жүйелерін пайдаланады. CVV-кодты енгізу немесе SMS жіберуді сұрау – алаяқтықтың айқын белгісі. Жақындарыңызға, әсіресе егде жастағыларға ескертіңіз: полиция да, банк те, мемлекеттік орган да ешқашан «қауіпсіз шотқа» ақша аударуды талап етпейді. Күмәнді қоңырау алсаңыз, бірден тұтқаны қойып, ұйымның ресми сайтындағы байланыс нөміріне өзіңіз қоңырау шалыңыз. Қосымша қорғаныс ретінде цифрлық құралдарды пайдаланыңыз: екі факторлы аутентификация, транзакциялар бойынша push-хабарламалар, күрделі құпиясөздер. Бұл әдістер күдікті әрекеттерді дер кезінде байқап, алаяқтарды тоқтатуға мүмкіндік береді. Ең бастысы: егер сіз алаяқтардың құрбаны болсаңыз, уақыт жоғалтпаңыз. Банкке және полицияға неғұрлым тез хабарлассаңыз, қаражатты тоқтатуға немесе ізін кесуге мүмкіндік жоғары болады.<img src="https://knadmin.beoblood.kz/uploads/infographics_1211_2_bc704716d2.png" alt="infographics-1211-2.png">Жаңа алаяқтық схемаларын бақылап отырыңыз, олардан қорғану жолдарын біліңіз және Fingramota.kz-пен бірге қаржылық сауаттылығыңызды арттырыңыз!Фото: fingramota.kz

Бір схема – түрлі сценарийлер: алаяқтардың жаңа айлалары 

<a href="https://kyzylorda-news.kz/">Kyzylorda-news.kz</a>&nbsp; 2025 жылғы 1 қыркүйек - 10 қазан аралығында мерзімді әскери қызметке көктемгі шақырылым аясында ҚР МКҚ өкілдері барлық облыс орталықтары мен республикалық маңызы бар қалаларда үміткерлерді таңдау және зерделеу жүргізеді. Үміткерлерге келесі талаптар қойылады: жасы 18-27 арасында, бойы 180 см-ден төмен емес, орта мектеп, колледж немесе университет бітірген, денсаулығы жақсы. Жоғары білімді, спорттық жетістіктері мен разряды бар шақырылушыларға басымдық беріледі.ҚР МКҚ қатарына өткен шақырылушылар мерзімді қызметін Астана және Алматы қалаларындағы 0112 және 0111 әскери бөлімдерінде атқарады.ҚР Мемлекеттік күзет қызметі қатарында мерзімді қызмет сарбаздары Қазақстан Республикасы Президентінің және басқа да күзетілетін адамдардың қауіпсіздігін қорғау, рәсімдік және протоколдық іс-шараларға қатысу, ҚР Мемлекеттік Туы мен ҚР Мемлекеттік Елтаңбасы эталондарын күзету секілді айрықша міндеттерді атқарады.ҚР МКҚ әскери бөлімдерінде мерзімді қызмет атқару барысында жас сарбаздар тәжірибелі нұсқаушылық құрамның жетекшілігімен әскери іске үйренеді, жауынгерлік және арнайы даярлық сабақтарында әскери мамандықтарды меңгереді.КР МКҚ мерзімді қызмет сарбаздарының әрі қарай кадрлық тұрғыдан өсуге мүмкіндігі бар. Мерзімді қызмет аяқталған соң олар өз қалауы бойынша келісімшарт бойынша әскери қызметті жалғастыра алады, одан әрі арнаулы мемлекеттік органның қызметкері және офицері болып, күзетілетін адамдар мен объектілердің қауіпсіздігін қамтамасыз ету бойынша міндеттерді атқара алады.ҚР МКҚ мерзімді қызмет сарбаздары үшін Қазақстан Республикасында мерзімді әскери қызмет атқарған азаматтарды әлеуметтік қолдау бойынша белгіленген барлық жеңілдіктер қолданылады.<img src="https://knadmin.beoblood.kz/uploads/aza_stan_Respublikasyny_Memlekettik_k_zet_yzmeti_atarynda_y_merzimdi_skeri_yzmetke_sha_yrylushylardy_irikteu_bastaldy_612211eb81.jpeg" alt="Қазақстан Республикасының Мемлекеттік күзет қызметі қатарындағы мерзімді әскери қызметке шақырылушыларды іріктеу басталды.jpeg">Фото: Gov.kz

Қазақстан Республикасының Мемлекеттік күзет қызметі қатарындағы мерзімді әскери қызметке шақырылушыларды іріктеу басталды

<a href="https://kyzylorda-news.kz/">Kyzylorda-news.kz</a> Облыс әкімінің тапсырмасына сәйкес Қызылорда облысындағы қалалар мен елді-мекендердің аумақтарын абаттандыру, жер және құрылыс саласындағы кейбір мәселелерді реттеу үшін арнайы жұмысшы топ құрылды.Аталған тапсырмаға сәйкес, облыс аумағында жалпы 555 құрылысы жүріп жатқан (Қызылорда Қызылорда қаласы – 158, Арал ауданы – 72, Қазалы ауданы – 65, Қармақшы ауданы – 35, Жалағаш ауданы – 29, Сырдария ауданы – 36, Шиелі ауданы – 72, Жаңақорған ауданы - 88) кәсіпкерлік нысандар бойынша зерделеу жұмыстар жүргізілуде.Бүгінгі күнге дейін 216 нысан заңдастырылды (Қызылорда қаласы – 98, Арал – 23, Қазалы – 7, Қармақшы - 4, Сырдария – 5, Шиелі – 3, Жаңақорған – 76), &nbsp;ал 94 нысан заңсыз салынғаны анықталып, олардың меншік иелеріне жалпы 250 хаттама толтырылып (Қызылорда қаласы – 37/91, Арал ауданы – 13/30, Қазалы ауданы – 10/30, Қармақшы ауданы – 1/3, Жалағаш ауданы – 6/18, Сырдария ауданы – 11/33, Шиелі ауданы – 6/18, Жаңақорған ауданы – 10/28), 101 776 840 теңге айыппұл салынды. &nbsp;Әліп Мәди Раманқұлұлы,Қызылорда облысының мемлекеттік сәулет-құрылыс&nbsp;бақылауы басқармасы басшысының орынбасары&nbsp;

Заңсыз салынған ғимараттар бойынша жүргізілген жұмыстардың нәтижесі

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаевтың қатысуымен егін жинауға әзірлік, Ұлттық ауыл шаруашылығы санағын жүргізу мәселелері талқыланған жиналыс өтті. Оған облыстық басқарма басшылары, селекторлық режимде аудан әкімдері және жауапты мекеме басшылары қатысты.Облыс әкімі жауапты науқан алдында бірқатар тапсырма жүктеді.<blockquote>«Биыл өңіріміздегі вегетациялық кезең өте күрделі жағдайда өтті. Мемлекет басшымыздың, Үкіметтің қолдауымен көршілес мемлекеттермен нәтижелі келіссөздер жүргізіліп, вегетациялық кезеңді шығынсыз өткеруге бар жағдай жасалды.Президентіміздің тапсырмасына сәйкес Үкімет басшысы бастаған делегация өңірімізге арнайы жұмыс сапармен келіп, шаруалардың жағдайымен, егістің жай-күйімен танысты.Одан бөлек, Су ресурстары, Ауыл шаруашылығы министрлері бірнеше рет арнайы келіп, су тапшылығын болдырмау жолдарын жан-жақты пысықтады.Төтенше жағдайлар министрлігі еліміздің барлық өңірінен 139 қызметкерден құралған жеке құрам мен 25 насос қондырғысын жеткізіп, екі ай бойы шаруалар игілігі үшін қызмет жасады.Қолда бар мүмкіндіктерді тиімді пайдаланып, егінді ысырапсыз, мерзімінде жинауды қатаң бақылауға алыңыздар.Ауыл шаруашылығы – экономикамыздың негізгі салаларының бірі. Санақ жұмыстарының нақтылығы мен сапалы жүргізілуі біз үшін өте маңызды.Қала, аудан әкімдері санақ жүргізушілерге жан-жақты қолдау көрсетіп, статистика департаменті, ветеринария, ауыл шаруашылығы басқармаларымен бірлесіп, тиісті жұмыс жүргізіңіздер», – деді Н.Нәлібаев.</blockquote>Жиында жауапты департамент, басқарма басшылары Ұлттық ауыл шаруашылығы санағының өту барысы туралы баяндама жасады.Биыл облыс бойынша 189 600 гектарға ауыл шаруашылығы дақылдары, Үкімет бекіткен Жол картасына сәйкес 80 900 гектарға күріш егілді. Суды аз қажет ететін мал азықтық, майлы дақылдардың көлемі ұлғайтылуда. Күні ертең егінге алғашқы орақ түседі.Жиналыста тұрғын үйлерді пайдалануға беру, шағын өнеркәсіптік аймақтағы кәсіпорындардың іске қосылуын қамтамасыз ету, коммуналдық базарға кәсіпкерлерді орналастыруды тез арада аяқтау бойынша да тапсырмалар берілді.Фото: Қызылорда облысы әкімінің баспасөз қызметі

Жиын-терімге әзірлік және Ұлттық ауыл шаруашылығы санағын өткізу мәселелері талқыланды

<a href="https://kyzylorda-news.kz/">Kyzylorda-news.kz</a> Қазақстанда банк карталарын пайдалану ережелері өзгерді, енді банкоматтан ақшаны&nbsp;карта иесі ғана шеше алады. Бұл туралы <a href="https://stan.kz/endi-bankomattan-tek-karta-iesi-gana-aksha-sheshe-aladi-422851/">Stan.kz</a> ақпарат&nbsp;агенттігі хабарлады.Тіпті жұбайы немесе жақын туыстары да ақша&nbsp;шеше алмайды. Бұл туралы қаржы нарығын реттеу және дамыту агенттігінің төрайымы Мадина Әбілқасымова мәлімдеді.<blockquote>"Әйелі күйеуінің картасынан ақша ала алмай қалған жағдайлар тіркелді, бұл жаңа талаптарға&nbsp;байланысты", – деді Әбілқасымова.</blockquote>Агенттік басшысы жаңа ережелердің алаяқтармен және карталарын&nbsp;қылмыскерлерге беретіндермен күресуге арналғанын атап өтті.<blockquote>"Бұл карта пайдаланушысының өзі екендігін тексеру және картаны пайдалану талаптарының қатаңдатылуымен&nbsp;байланысты. Жалпы алғанда, төлем картасын сол карта&nbsp;шығарылған адамның қолданатынын&nbsp;тексеру дұрыс бастама", – дейді&nbsp;Мадина Әбілқасымова.</blockquote>Оның айтуынша, бұл тәсіл қаржыға заңсыз қол жеткізу қаупін азайтады.Фото: freepik.com

Енді банкоматтан карта иесі ғана ақша шеше алады: Қазақстанда банк карталарын пайдалану ережелері өзгерді

<a href="https://kyzylorda-news.kz/">Kyzylorda-news.kz</a> Арал ауданында «Ауыл аманаты» жобасы аясында жаңа кәсіпорын өз жұмысын бастады. Жергілікті кәсіпкер, 25 жылдан астам уақыт ағаш өңдеу ісімен айналысып келе жатқан &nbsp;Серік Бақбергенов "Ауыл аманаты" жобасы аясында 4,5 миллион теңге қаражат алып, ағаш өңдеу шеберханасын ашты.Шеберхана заманауи құрал-жабдықтармен қамтамасыз етілген. Қазіргі уақытта мұнда Қытай зауыттарынан әкелінген жаңа үлгідегі 6 аппарат орнатылған. Олардың көмегімен ағашты жону, бұрыштарын өңдеу және бір деңгейлі шығару жұмыстары сапалы әрі тиімді орындалады.Жаңа кәсіпорын іске қосылғаннан бері аудан аумағынан тапсырыс көбейген. Әсіресе балабақшалар мен мейрамханаларға қажетті жиһаздарға, тұрғын үйлердің баспалдақтарына сұраныс жоғары.Кәсіпкер алдағы уақытта өндірісті кеңейтіп, жұмыс орындарын арттыруды жоспарлап отыр. Оның айтуынша, негізгі мақсат – жергілікті халықты қолжетімді әрі сапалы ағаш бұйымдарымен қамтамасыз етіп, аудан экономикасының дамуына үлес қосу.«Ауыл аманаты» жобасы ауыл тұрғындарына кәсіп ашуға мүмкіндік беріп, жаңа жұмыс орындарының ашылуына жол ашуда. Бақбергенов Серік Шұхманұлының шеберханасы – осы бастаманың нақты нәтижесі.<img src="https://knadmin.beoblood.kz/uploads/1_Auyl_amanaty_zhobasy_ayasynda_a_ash_sheberhanasy_ashyldy_419b4ac88d.jpg" alt="1 «Ауыл аманаты» жобасы аясында ағаш шеберханасы ашылды.jpg"><img src="https://knadmin.beoblood.kz/uploads/2_Auyl_amanaty_zhobasy_ayasynda_a_ash_sheberhanasy_ashyldy_7d29fdb950.jpg" alt="2 «Ауыл аманаты» жобасы аясында ағаш шеберханасы ашылды.jpg">

«Ауыл аманаты» жобасы аясында ағаш шеберханасы ашылды

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде 30 тамыз – Қазақстан Республикасының Конституциясы күні мен 1 қыркүйек – Білім күніне арналған салтанатты іс-шара өтті.Мерекелік жиын барысында университеттің Басқарма Төрағасы – Ректор Бейбіткүл Каримова еліміздің Ата Заңы – мемлекеттің тұрақты дамуы мен қоғамдағы азаматтық татулықтың басты тірегі екенін атап өтті. Сонымен қатар, жаңа оқу жылының басталуымен профессор-оқытушылар құрамы мен студенттерді құттықтап, сәттілік тіледі.<blockquote>«Университетіміз әлемдік білім беру жүйесіндегі орнын жылдан-жылға нығайтып, бірқатар беделді рейтингтерде жоғары нәтижелерге қол жеткізіп келеді. Атап айтсақ, QS WUR-2025 нәтижесі бойынша әлемдегі ең үздік университеттердің ТОП-1400+ қатарына, ал QS Asia University Rankings-2025 көрсеткіші бойынша Азиядағы үздік университеттердің ТОП-541-560 тобына ендік. 2024 жылы алғаш рет әлемнің 107 елінен 1744 жоғары оқу орны арасынан QS тұрақты даму рейтингіне ендік. Сонымен қатар, Times Higher Education рейтингіндегі Global University Impact Rankings-2025 индикаторы бойынша БҰҰ Тұрақты даму мақсаттарының бірнеше бағыты аясында университетіміз әлемдік үздік оқу орындарының ТОП-1501+ қатарына орналасты. GreenMetric World University Rankings-2024 халықаралық рейтингінде 1160-орыннан көріндік. Қазақстан Республикасы ЖОО-на деген сұраныстың тәуелсіз рейтингі-2024 (АРТА) қорытындысы бойынша еліміздегі жоғары оқу орындарының Бас рейтингінің ТОП-20 қатарына еніп, 7-орынды иелендік. Сонымен бірге, университеттің 25 білім беру бағдарламасы қазақстандық білім беру қызметтері нарығындағы үздік үштікке кірді. Жақында ғана Британдық QS Stars Rating System халықаралық жүйесінде 4 жұлдыз дәрежесін иелендік. Әрине, мұндай жоғары көрсеткіштер өзінен-өзі келген жоқ. Бұл – ұжым болып атқарған кешенді әрі жүйелі еңбегіміздің нәтижесі, – деді ректор.</blockquote>Университет биыл өзінің 89-шы оқу жылын бастады. 2025–2026 оқу жылында 4 252 студент қабылданып, өткен жылдармен салыстырғанда рекордтық өсім көрсетті. Қабылданғандардың 33,3%-ы – мемлекеттік грант иегерлері. Салыстыра айтқанда, 2020–2021 оқу жылында 2 525 адам қабылданған болатын. Яғни соңғы бес жылда студенттер саны 68,4%-ға артқан.Салтанатты шарада оқу орнының дамуына үлес қосып жүрген профессор-оқытушылар құрамы мен қызметкерлерге Қазақстан Республикасы Ғылым және жоғары білім министрлігінің, сондай-ақ университет атынан арнайы марапаттар табысталды.Жиында Қазақстан Республикасының Ұлттық ғылым академиясының академигі, Қазақстанның еңбек сіңірген қайраткері, техника ғылымдарының докторы, профессор Қылышбай Бисенов, Қызылорда қаласының Құрметті азаматы, техника ғылымдарының докторы, профессор Серікбай Қошқаров, университет түлегі, «Болашақ» халықаралық стипендиясының иегері, Ұлыбританияның Глазго университетінің Медиа менеджмент мамандығы бойынша магистрі, 24KZ телеарнасының Брюссель қаласындағы меншікті тілшісі Ғалымжан Бәйімбет құттықтау сөз сөйледі.Сондай-ақ оқуға қабылданған студенттер атынан мектепті «Алтын белгімен» бітіріп, Ұлттық бірыңғай тестілеуден 135 балл жинаған Мөлдір Нұрланқызы сөз сөйлеп, өз әсерімен бөлісті.Іс-шараға зиялы қауым өкілдері, университет ардагерлері, оқытушы-профессорлар құрамы, университет түлектері мен білім алушылар қатысты. Салтанатты жиын мерекелік концерттік бағдарламаға ұласты.Сонымен қатар, шараға арнайы Кореядан Сеул ұлттық ғылым және технология университетінің (SeoulTech) делегациясы да келді. Олардың қатарында Халықаралық байланыстар жөніндегі проректор Чи Хонг Хван, Global IT Convergence кафедрасының профессоры Хи Дже Пак және Халықаралық байланыстар бөлімінің менеджері Мисс Санъёнг Хван болды.Айта кетейік, Қорқыт ата атындағы Қызылорда университеті мен Сеул ұлттық ғылым және технология университеті (SeoulTech) арасындағы ынтымақтастық жылдан жылға нығайып келеді. 2024 жылдың 12 маусымында екіжақты келісімге қол қойылып, қос дипломды «AI архитектор» және «Деректерді басқару» білім беру бағдарламалары бойынша кадрлар даярлау ісі басталды. Биылғы оқу жылында аталмыш бағдарламаға 40 талапкер қабылданды.Кореялық делегацияның университетке келу мақсаты – осы қос дипломды бағдарлама аясында білім алатын студенттермен кездесу.

Архив