<a href="https://kyzylorda-news.kz/">Kyzylorda-news.kz</a>&nbsp; Баршаның назарына!«Жер-2025» республикалық командалық-штабтық оқу-жаттығуын өткізу кезінде 2025 жылғы 24 шілдеде 10 сағат 00 минутта Қызылорда облысының аумағында «Баршаның назарына!» сигналы бойынша облыстық азаматтық қорғаныстың құлақтандыру жүйесі тексеріледі.Оқу-жаттығу барысында сабыр сақтауларыңызды және үрейге бой алдырмауларыңызды сұраймыз!

«Жер-2025» республикалық командалық-штабтық оқу-жаттығуы өткізіледі

<a href="https://kyzylorda-news.kz/">Kyzylorda-news.kz</a> Қызылорданың көп бейінді қалалық ауруханасында жыл сайын тізе және жамбас буындарын алмастыру бойынша 100-ге жуық ота жасалады. Хирургиялық араласудан бастап медициналық оңалтуға дейінгі барлық емдеу кезеңдері МӘМС жүйесі арқылы сақтандырылған азаматтарға тегін қолжетімді.Қызылорда қаласының тұрғыны Айнагүл Қунарова тізе буындарының ауырсынуынан он жыл бойы зардап шеккен. Диагноз – &nbsp;остеоартроз. МӘМС аясында пациентке жоспарлы түрде тізе буынына эндопротездеу отасы жасалды.<blockquote>– Ауруханаға Емдеуге&nbsp;жатқызу бюросы порталы арқылы түстім. Сол аяқтың тізе буыны алмастырылды. Ауырсыну&nbsp;басылды, жағдайым жақсы. Қазір оңалтудан тегін өтіп жатырмын, алда – екінші кезеңі. Баршаға МӘМС жүйесінде сақтандырылуға кеңес беремін, барлық медициналық көмек қолжетімді болады, – деді Айнагүл Қунарова.</blockquote>Эндопротездеу – ең жиі жасалатын ортопедиялық оталардың бірі. Бұл отада зақымдалған буын жасанды имплантпен алмастырылады. Аталған жоғары технологиялық оталар Әлеуметтік медициналық сақтандыру қорының қаражаты есебінен қаржыландырылады.<blockquote>– Біздің ауруханада жыл сайын МӘМС аясында осындай 100-ге жуық ота жасалады. Бір отаның құны – шамамен 1,6 млн теңге. Отадан кейін пациенттер стационарлық оңалтудан өтеді. Бұл қызметтердің барлығы МӘМС жүйесі арқылы тегін қолжетімді, – деп атап өтті көп бейінді қалалық аурухананың травматолог-дәрігері Еркебұлан Молданазаров.</blockquote><img src="https://knadmin.beoblood.kz/uploads/osms_2_61e86169ba.jpg" alt="осмс (2).jpg">

Буындарды эндопротездеу – МӘМС арқылы тегін

<a href="https://kyzylorda-news.kz/">Kyzylorda-news.kz</a> ҚР Парламенті Сенатының депутаты, “AMANAT” партиясының мүшесі Руслан Рүстемов, партияның облыстық филиалының төрағасы Алмасбек Есмаханов жұмыс сапары барысында Жаңақорған аудандық көп бейінді орталық аурухана ғимаратына блок толықтыра отырып қайта жаңғырту жұмыстарын зерделеді.Көп бейінді орталық аурухана ғимаратына блок толықтыра отырып қайта жаңғырту жұмыстары басталып қазіргі таңда екінші қабатын көтеріліп жабу кезеңіне келді. 2025 жыл қазан-қараша айына құрылыс жобасы толық аяқталып, 1 қабатында МРТ және Ангиограф құрылғысы орнатылса, 2 қабатында 9 төсек орынды инсультті бөлімшесін орналастыру жоспарлануда. Қазіргі таңда аурухананың құрал-жабдықтармен жабдықталуы 90.0% құрап отыр.Депутат мердігер ұйым өкілдерімен, денсаулық сақтау мекемесінің басшылығымен және медицина қызметкерлерімен тілдесіп, жобаның іске асу барысын талқылады. Құрылыс қарқыны мен сапасына ерекше назар аударылды.Сенатор өз сөзінде медициналық инфрақұрылымды жақсарту — халықтың өмір сүру сапасын арттырудағы басты факторлардың бірі екенін атап өтіп, мемлекет тарапынан денсаулық сақтау саласына тұрақты қолдау көрсетілетінін жеткізді.

Сенат депутаты аудандық көп бейінді орталық ауруханадағы қайта жаңғырту жұмыстарымен танысты

<a href="https://kyzylorda-news.kz/">Kyzylorda-news.kz</a> Мемлекет басшысының, Үкіметтің тұрақты қолдауы және облыс әкімінің үйлестіруімен қала қарқынды құрылыс алаңына айналып, жаңа нысандар мен тұрғын үй кешендері, демалыс орындары мен саябақтар тұрғындар игілігіне берілуде.Ауқымды жобалардың бірі Қорқыт ата мемориалды аллеясында да жүріп жатыр. 2002 жылы ашылған саябақтың жалпы аумағы – 38 мың шаршы метрден асады. Мұнда жоба аясында кеспетас төселіп, жасыл желектер отырғызылып, субұрқақ, жарық шамдар, ойын және спорт алаңдары салынуда.&nbsp;Бүгінде жаңғырту жұмыстарының 65 пайызы аяқталған.

«Қорқыт ата» мемориалды аллеясы жаңғыртылуда

<a href="https://kyzylorda-news.kz/">Kyzylorda-news.kz</a> &nbsp;Президенттің туристік аймақтарды дамыту және ретке келтіру жөніндегі тапсырмасын жүзеге асыру мақсатында Арал ауданы бойынша бірқатар іс-шаралар қолға алынды. Аудандық кәсіпкерлік бөлімі ауданның жұмысшы тобымен бірлесе отырып, жол бойындағы сервистік қызмет көрсету нысандарына кешенді рейдтік шара ұйымдастырды.Рейд құрамында Санитариялық-эпидемиологиялық қызмет, Полиция, Тұрғын үй-коммуналдық шаруашылығы, Туризм, Кәсіпкерлік және Архитектура бөлімдерінің мамандары болды. Тексеру барысында 555, 444, Qazaq Oil, Rabiya, Айжұлдыз, Gasenergy, Шымкент, Саяхат секілді бірқатар нысандардың қызмет көрсету сапасы мен сыртқы келбетіне назар аударылды.Шара барысында нысандардың аумағын таза ұстау, архитектуралық қасбетін заманауи талапқа сәйкестендіру, санитариялық тораптардың жағдайын дұрыстау сынды мәселелер бойынша ескертулер беріліп, тиісті уақыт ішінде ретке келтіру міндеттелді. Сонымен қатар, Аралқұм ауылдық округіндегі жол бойындағы сауда орындары тексеріліп, заңсыз сауданың алдын алу мақсатында түсіндіру жұмыстары жүргізілді.Бұл жұмыстар аудан аумағындағы сервистік қызмет сапасын арттыруға, туристер мен тұрғындар үшін қолайлы жағдай жасауға бағытталған. Алдағы уақытта да мұндай рейдтер жалғасып, талапқа сай келмейтін нысандар бойынша шаралар қабылданатын болады.Фото: Арал ауданы әкімдігі

Арал ауданында туристік аймақтарды ретке келтіру жұмыстары күшейтілді

<a href="https://kyzylorda-news.kz/">Kyzylorda-news.kz</a> «Atamnyn amanaty» қоғамдық бірлестігі «Ұлы Отан соғысындағы Жеңістің 80 жылдығына» орай Ұлы Отан соғысы кезінде қайтыс болған қазақстандық жауынгерлердің тізімін, сондай-ақ әскери тұтқындардың тізімін жасады.Тізімде көрсетілген қазақстандық жауынгерлердің туыстарын анықтау үшін «Atamnyn amanaty» қоғамдық бірлестігі ҚР Қорғаныс министрлігіне жүгінді.Осыған байланысты қазіргі таңда Қызылорда қаласының қорғаныс істері жөніндегі басқармасында тізімде көрсетілген жауынгерлердің туыстарының мекен-жайын анықтау, іздестіру жұмыстары ұйымдастырылуда.Төменде көрсетілген тізімдегі жауынгерлердің туған-туыстары табылған жағдайда мына мекен-жайға келулеріңізді сұраймыз. Қызылорда қаласы, Шүкіров көшесі 101 А, &nbsp;Қызылорда қаласының қорғаныс істері жөніндегі басқармасы, Байланыс тел: 8778-072-68-31.Фото: egemen.kz<a href="https://knadmin.beoblood.kz/uploads/tablicza_bfa5b87487.pdf">Тізімде көрсетілген кестемен мына сілтеме арқылы таныса саласыз.&nbsp;</a>&nbsp;

«ATAMNYN AMANATY»: Әскери тұтқындардың тізімін жасады

<a href="https://kyzylorda-news.kz/">Kyzylorda-news.kz</a> Сырдария ауданы әкімі Берік Сәрменбаевтың қатысуымен «Мерейлі отбасы» ұлттық байқауының аудандық кезең жеңімпаздары марапатталды.Салтанатты іс-шарада отбасы құндылықтарын дәріптеген, шаңырақтың шырайын кіргізіп, түтінін түзу ұшырған өнегелі отбасылар марапат биігінен көрінді.Аудан басшысы жеңімпаздарды мерейлі марапатпен құттықтап, елімізде түп-тамырын ұлттық құндылықтардан алатын отбасы институтының орны ерекше екенін айтты.<blockquote>– Мемлекет басшысы Қасым-Жомарт Кемелұлы Тоқаев «Халқымыз қай заманда отбасы дәстүрін берік ұстанып, қадірлей білген. «Үлкенге құрмет, кішіге ізет» біздің қанымызға сіңген қасиет. Әке-шешесінің, ата-әжесінің тәрбиесін көріп, үлкендерден тағылым алып өскен бала есейгенде отаншыл, білімпаз, еңбекқор азаматқа айналады. Берекелі әрі бақытты отбасы – қуатты елдің тірегі. Сондықтан мемлекет әр шаңырақтың әл-ауқатын арттырып, әр азаматтың өсіп өркендеуі үшін барлық жағдайды жасайды» деп атап өтті.Ата-бабамыз «Отан – отбасынан басталады» деп бекер айтпаған. Қазақ халқы ежелден отбасы ішіндегі сыйластықты, үлкенге құрмет, кішіге ізеттілікті басты ұстаным етіп келген. Сол игі дәстүр бүгінгі таңда да өз маңызын жойған жоқ. Керісінше, жаһандану кезеңінде ұлттық тәрбиемізді сақтап қалудың, жастарымызды елге, жерге, ата-анаға деген құрметке тәрбиелеудің тиімді жолы – осындай байқаулар арқылы өріс алып отыр. «Мерейлі отбасы» байқауы – ұрпақтар сабақтастығын жалғап келе жатқан өнегелі отбасылардың озық үлгісін көрсететін бірегей алаң. Бұл байқауға қатысып жатқан әрбір отбасы – еңбекқорлығымен, ауызбіршілігімен, тәрбиелі ұрпақ өсіріп отырған үлгілі шаңырағымен елге өнеге. Сіздердің өмірлік тәжірибелеріңіз, адами болмыстарыңыз, татулық пен келісімге негізделген отбасы тіршілігі – барша қауым үшін үлкен тәрбие мектебі.Биылғы байқауда қатысып, жүлдегер атанған отбасыларымыз – нағыз мақтанышымыз! Сіздер арқылы ауданымыздың рухани бейнесі мен бірлікке толы өмір сүру салты тағы да айшықтала түсті. Ауданда өткізіліп отырған мерейлі іс-шараға қатысуға ниет білдірушілер жылдан-жылға артып келе жатқаны қуантады. Биыл байқауға ауданнан 17 отбасы қатысты. Олардың барлығы – нағыз жеңімпаз жанұялар, – деді Берік Әбдіғаппарұлы.</blockquote>«Мерейлі отбасы» ұлттық конкурсының аудандық іріктеу кезеңінің қорытындысы бойынша Шаған ауылынан Бөжековтер және Бесарық ауылынан Құлмағанбетовтер отбасы 3 орынды, Шіркейлі ауылынан Әбсадықовтар отбасы 2 орынды иеленсе, Аманкелді ауылынан Жансейітовтер отбасы 1 орынды жеңіп алды.Сондай-ақ, басқа да өнегелі отбасылар арнайы номинациялармен марапатталды.Аудандық кезең нәтижесімен облыстық кезеңге қатысуға Жансейітовтер және Әбсадықовтар отбасы жолдама алды.Фото: Сырдария ауданы

«Мерейлі отбасылар» марапат төрінде

<a href="https://kyzylorda-news.kz/">Kyzylorda-news.kz</a> Қалам мен қағазды серік етіп, журналистік жолда шыңдалған Балтабайдың ақындығы барын көпшілік біледі, жазушылық қыры мен қабілетінен де оқырман хабардар. Көркем әдебиет жанрын жанына серік етіп, өмірде көрген, білген, естіген әңгімесіне қиял қосып қуаттап, сюжетін келтіріп жазу қалам ұстағанның бәрінің қолынан келе бермейді. Әріптесіміз, Қазақстан Журналистер одағының мүшесі Балтабай Аябекұлы өзінің тырнақалды туындысын жарыққа шығарды. «Руханият орталығында» «Әке – қорғаным» атты кітаптың тұсаукесер салтанаты өтті.Өзі жақсы адамның жанына ізгі жақсы жолдас болмақ. Өзі көпшіл Балтабайдың сыйласатын ортасы да көп екенін кешегі кеш дәлелдеп бергендей. Руханият ордасына айналған орталықтың залына лық толған оқырман жаңа кітапты қолға алып, парақтауға асыққаны аян.Салтанатты іс-шараға аудандық арда­герлер кеңесінің төрағасы Мұса Келдібаев, облыстық мәслихат депутаты Жұмабек Ембергенов, «Сыр медиа» ЖШС бас директоры Марат Аралбаев, республикалық «Халық» газетінің бас редакторы Нұржан Әбжанұлы, аудандық редакция ұжымы мен ардагерлері, зиялы қауым өкілдері мен әріптесіміздің жақын-жуық, туған-туысы, анасы арнайы қатысты.<img src="https://knadmin.beoblood.kz/uploads/5_2e4f67f2b7.jpeg" alt="5.jpeg">Жаңа кітаптың тұсаукесері әке мен бала арасындағы салмақты, мазмұнды әңгімеге, өсиетке негізделген прологпен бастау алды. Туындының тұсаукесерін Қазақстан Жазушылар және Журналистер одағының мүшесі Ақтөре Ибрагимұлы жүргізіп отырды.<blockquote>– Ата-бабаларымыз «Жақсылықты бөліссең көбейеді, қайғыны бөліссең азая­ды» деп бекер айтпаған. Біз бірліктің ақ туын биік ұстап, ынтымақтың ырысты жолымен қай кезде де жақсылыққа болысып, игі істерге ұмтылған, жұдырықтай жұмылған, ал сынақ келсе бірге еңсеріп, қайғы келсе қатар көтерген текті ұлттың ұрпағымыз. Осы ретте жастайынан жақ­сыларға жанасып, жаратылысынан жанашырлықты жанына серік еткен, әкенің тәлімімен, ананың тәрбиесімен ізгі азамат болып қалыптасып, бүгінде еңбекке араласып, елге жақсы қырынан танылып жүрген қаламдас бауырымыз, Қазақстан Журналистер одағының мүшесі, Сырдария аудандық «Тіршілік тынысы» газеті бас редакторының орынбасары, «Өрлеу» жастар сыйлығының иегері Балтабай ініміздің орны бөлек. Ізетті ініміздің бағындырған әр биігіне қуанамыз, талабы мен талантын ұштап, сәттілік тілейміз. Ал былтыр ардақты әкесі Аябек ағамыз келместің кемесіне мініп кете барғанда қатар тұрып егіліп, бір отбасына ғана емес бүтін бір әулетке, қаумалаған ағайынға ортақ қайғыны жүрекпен қабылдағанбыз. Бәріне уақыт емші екен... Міне, бір жылға жуық уақыт өткенде әке өсиетінен, ана өнегесінен нәр алған бауырымыз «Әке – қорғаным» атты кітабын шығарып, жаңа туынды оқырман қауымға жол тартқалы тұр, – деді Ақтөре Ибрагимұлы.</blockquote>Одан кейін кезек «Әке – қорғаным» атты кітаптың тұсауын кесу, лентасын қию рәсіміне берілді. Ақ ниетті, ақ тілеулес жандар жаңа кітаптың тұсауын кесіп, оқырманның олжасына айна­луын тілек етті. Ақ тілегін арнау үшін сөз кезегі аудандық ардагерлер кеңесінің төрағасы Мұса Алпысбайұлына берілді.<blockquote>– Бүгін мәні мен мағынасы жарасқан, тағылымы мол іс-шараға куә болып отырмыз. Жаңа өздеріңіз көрініске куә болдыңыздар. Әкеге махаббат деген осындай болса керек. Мен Балтабайдың әкесін, оның ар жағында аталарын, арғы тарихты білемін. Аталары атақты адамдар болған. Сонау заманнан Қазақ көшесінде тұрды. Бүгін сол қарашаңырақтың түтінін Балтабай ұлымыз түтетіп отыр. Әкелері, аталары қандай жақсы адамдар еді! Балтабай да сол ізгілердің тұяғы. Әрдайым жолың ашық болсын. Тағылымды туынды көпшіліктің сүйікті кітабына айналсын. Әсіресе әкеге деген махаббатың, сый-құрметің кейінгі буынға үлгі болмақ. Құтты, оң болсын!, – деді Мұса Келдібаев.</blockquote>Одан кейін ақ тілектер мен ізгі лебіздерді «Сыр медиа» ЖШС бас директоры Марат Жайылханұлы, об­лыстық мәслихат депутаты Жұмабек Әшімұлы, мәдениет саласының үздігі Жантемір Айсин, ардагер-журналист Шаһарбек Нұрсейіт, қоғамдық кеңес төрағасы Марат Еспенбетов, Қорқыт ата атындағы университеттің аға оқытушысы Аякөз Әбдіразақова, «Халық» газетінің бас редакторы Нұржан Әбжанұлы, меценат Мақсұт Әбдіғаппарұлы, ардагер-ұстаз Ұлмекен Жанәлиева жалғастырды. Одан кейін ағайын-туыстары мен әкесінің көзін көрген жандар тілектер легін жалғады.Жаңа туынды «Әке – қорғаным» деп аталып, оған әңгімелер, мақа­лалар мен мөлтек сырлар, қысқа әңгімелер енгізілген. Жас қаламгердің тырнақалды әңгімелері көбіне өмірден алынған. Кітап материалдары «Тіршілік тынысы» газетінің редакциясында теріліп, беттеліп, «ЖК Сыр медиа» бас­па­ханасынан басылып шыққан. Төл туындының алғысөзін Қазақстан Журналистер одағының мүшесі, ардагер-журналист Сәуле Ерімбет, Қазақстан Журналистер одағының мүшесі, халықаралық «Қазақ тілі қоғамы» Сырдария аудандық филиалының төрағасы Шаһарбек Нұрсейіт, Қорқыт ата атындағы Қызылорда университетінің аға оқытушысы, автордың ұстазы Аягөз Әбдіразақова және Қазақстан Жазушылар және Журналистер одағының мүшесі Ақтөре Ибрагимұлы жазып, жас жазушыға сәт-сапар тілеген. Кітап 5 бөлімнен тұрады. «Дала дүбірі», «Сезім сиқыры», «Перзенттік парыз», «Ең қысқа әңгімелер», «Өмір иірімдері» секілді тың тақырыптарды арқау еткен бөлімдерге автор өмірден алынған әңгімелерін топтастырады. Кітаптың техникалық редакторы – Ердос Сәрсенбекұлы.&nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp;<img src="https://knadmin.beoblood.kz/uploads/6_63edc0a364.jpeg" alt="6.jpeg"> &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp;<a href="https://tirshilik-tynysy.kz/uploads/posts/2025-07/1752903700_63bdfd55-3f1b-4934-88a7-1c3ccf389373.jpeg"><img src="https://tirshilik-tynysy.kz/uploads/posts/2025-07/medium/1752903700_63bdfd55-3f1b-4934-88a7-1c3ccf389373.jpeg" alt=""></a>&nbsp; &nbsp;<blockquote>– Кітапқа тақырып таңдарда ұзақ ойландым. Осыған дейінгі уақытта талай ұстаздың алдынан өтсем де, нағыз өмірдегі ұстазым әкем екен. Барлық өмірдің парқын түсіндіріп кеткен әкенің орнын ешкім баса алмасы анық. Кез келген бастамаға қолдау көрсетіп отыратын жанашыр жанның алыстап кете барғаны өкінішті. Бұл – кітап жалпы оқырман үшін арналған. Өмірден теперіш көрген жандардың ғұмыры суреттеледі. Лирикалық әңгімелерді оқып, өзгеше хикаяларға қанығасыз. Сонымен қатар жазық даладағы небір тосын оқиға оқырманға жол тартады. «Ең қысқа әңгіме» бөлімінде айтатын ойымызды қысқа ғана қайырамыз. Ата-ана алдындағы перзенттік парызымызды арнайы бөлім арқылы жеткіземіз. Сонымен қатар «Бітер істің басына, жақсы келер қасына» демекші, кітаптың шығуына демеушілік көрсеткен меценат, белгілі кәсіпкер Әбілдаев Мақсұт Әбдіғаппарұлына шынайы алғысымды білдіремін, – дейді кітап авторы Балтабай Аябекұлы.</blockquote>Салтанатты іс-шара барысында аудан өнерпаздары әншашуын ұсынды. Жаңа кітапты оқуға асығып келген ойлы оқырманға сиясы кеппеген кітап үлестірілді. Кітаптың шығуына атсалысқан азаматтарға Аябеков­тер әулетінің атынан сый-құрмет көр­сетілді. Бала үшін әкеден асқан ұлы тұлға жоқ. Тұсаукесер рәсімімен бірге Аябек Ордабекұлының рухына Құран бағышталды. <img src="https://knadmin.beoblood.kz/uploads/7_373b3acb89.jpeg" alt="7.jpeg">Аружан МҰХАНБЕТҚАЛИ

Ойлы оқырман олжасына жаңа кітап жарыққа шықты

<a href="https://kyzylorda-news.kz/">Kyzylorda-news.kz</a> &nbsp;«Панабек» ЖШС – ерлі-зайыпты Амангелді Панабеков пен Айнұр Исмаилованың отбасылық кәсібі.Бүгінде өңірдегі жиһаз өндірісі бойынша көшбасшы компанияның осыдан 20 жылдан астам уақыт бұрын шағын шеберхана болып ашылғанын көпшілігі біле бермейді.<blockquote>«Алғаш 18 жасымда қыз жасауына қажет сандық жасап шықтым. Одан әрі үйіме ас үй жиһазын әзірледім. Жұмысымның нәтижесін жеке компания өкілдері көріп, жақсы бағалады. Осылайша жеке сектордан алғашқы тапсырыстарды қабылдай бастадым. 2003 жылы үйімнен 50 шаршы метр жерде шағын шеберхана аштым. Кәсібіміз осылай басталды», - дейді Амангелді Панабеков.</blockquote><img src="https://knadmin.beoblood.kz/uploads/1_yzylordaly_k_sipkerdi_50_sharshy_metrden_bastal_an_biznesi_67952c6655.jpg" alt="1 Қызылордалық кәсіпкердің 50 шаршы метрден басталған бизнесі.jpg">2020 жылдан компания облысқа қарасты Арал, Қазалы, Қармақшы, Шиелі және Жаңақорған аудандарында салынған мектептерді жиһазбен қамтамасыз еткен.«Жайлы мектеп» жобасы аясында Қызылорда қаласының Сол жағалауында салынған 900 орындық мектептің жиһазын да «Панабек» ЖШС-ның мамандары әзірлеп шықты. Одан өзге қаладағы 3 мектеп, оның ішінде Арай мөлтек ауданындағы ең үлкен 1500 орындық мектепті де техникамен, жиһазбен жабдықтау аталған компанияға жүктелген.<img src="https://knadmin.beoblood.kz/uploads/2_yzylordaly_k_sipkerdi_50_sharshy_metrden_bastal_an_biznesi_95944d4c86.jpg" alt="2 Қызылордалық кәсіпкердің 50 шаршы метрден басталған бизнесі.jpg"><blockquote>«Сұраныстың артуы, әрі Мемлекет басшысының тапсырмасымен елімізде жүзеге асырылып жатқан «Жайлы мектеп» жобасына қатысуымыз цехымыздың ауқымын кеңейту қажет екенін көрсетті. Жаңа &nbsp;өндірістің жай ғана жиһаз шығаратын орын емес, оның сан түрін көрсететін көрмесімен болғанын қаладым. Былтыр қала әкімдігі мен «Самұрық-Қазына» АҚ-ның қолдауымен жиһаз өндірістік кешенін салуды бастап кеттім», - дейді кәсіпкер.</blockquote>Көлемі 5000 шаршы метрден астам аумақты алып жатқан жаңа өндірістік кешеннің 1000 шаршы метрінде көрме-шоурум орналасса, қалған аумағында жиһаздың сан түрі жасалмақ.<img src="https://knadmin.beoblood.kz/uploads/4_yzylordaly_k_sipkerdi_50_sharshy_metrden_bastal_an_biznesi_960c1535e7.jpg" alt="4 Қызылордалық кәсіпкердің 50 шаршы метрден басталған бизнесі.jpg"><blockquote>«Қазір бұл кешеннің көрме аумағы ғана толықтыруды қажет етеді. Бүгінде жиһаздың 40-қа жуық түрін шығарамыз. Айына тұрақты 2000-нан 3000-ға дейін өнім өндірудеміз. Қолымызда бар жабдықтармен үлгермей жатырмыз. Осылайша қосымша құралдар алу қажет болды. Жан-жақтан сұрастырып, қаржы институттарының талаптарын салыстыра бастадық. Жергілікті «Қызылорда» Өңірлік инвестициялық орталығының өндірісті қолдайтынын естіп, өтінім бердік», - дейді Амангелді Панабеков.</blockquote>Кәсіпкердің өтініші қолдау тауып, Өңірлік орталық 5 жылға 6 пайызбен 59 млн теңге несие береді.<blockquote>«Бұл қаржыға өнімділікті арттыратын құралдар алдық. Соның ішінде Қытайдан алдырған робот-станокты ерекше атап өткім келеді. Жұмысымызға жаңа серпін берері сөзсіз. Қалған жабдықтарды шетелдік компаниялардың еліміздегі ресми өкілдері арқылы алдырдық», - дейді кәсіпкер.<img src="https://knadmin.beoblood.kz/uploads/5_yzylordaly_k_sipkerdi_50_sharshy_metrden_bastal_an_biznesi_8f48a20b95.jpg" alt="5 Қызылордалық кәсіпкердің 50 шаршы метрден басталған бизнесі.jpg"></blockquote>Бүгінде «Панабек» ЖШС-де 60-қа жуық қызылордалық жұмыс істейді. Компания өнімдеріне тапсырыс тек облыс көлемінде ғана емес, сондай-ақ Алматы, Астана, Шымкент, Ақтау, Тараз, Орал қалаларынан да жиі түседі. Алдағы уақытта кәсіпкер шетел нарығына шығуды да жоспарлауда.Фото: «Қызылорда» Өңірлік инвестициялық орталығының баспасөз қызметі

Қызылордалық кәсіпкердің 50 шаршы метрден басталған бизнесі

<a href="https://kyzylorda-news.kz/">Kyzylorda-news.kz</a> Сыр еліне Жамбыл облысының ресми делегациясы іссапармен келді. Сапардың мақсаты – өңіраралық әріптестікті нығайту, тәжірибе алмасу және өзара тиімді байланыстар орнату.Қонақтарды облыс әкімінің бірінші орынбасары Данияр Жаналинов қабылдады. Кездесуде тараптар әлеуметтік және экономикалық бағыттар бойынша пікір алмасып, бірлескен жобаларды жүзеге асыру мүмкіндіктерін талқылады.Сапар аясында делегация өңірдегі ірі инфрақұрылымдық жобалармен танысты. Ең алдымен жаңғыртудан өткен қаланың орталық алаңын аралап көрді. Тұрғындар көп жиналатын бұл орынға заманауи субұрқақтар орнатылып, көпжылдық жасыл желектер мен газондар егілген. Шағын архитектуралық формалар, жаңа үлгідегі орындықтар мен жарықшамдар, сондай-ақ балаларға арналған ойын алаңы қойылған.<img src="https://knadmin.beoblood.kz/uploads/2_440f990bde.jpg" alt="2.jpg">Әрі қарай жамбылдықтар қалалық демалыс саябағына барып, «Қызылорда Саз М» ЖШС жаңа кірпіш зауытының жұмысымен танысты. Жақында ашылған өндіріс орнына мемлекеттік қолдау ретінде 7 гектар жер телімі берілген. Зауыттың басты ерекшелігі – толық автоматтандырылған өндіріс процесі және экологиялық тиімділігі. Мұнда көмір қолданылмайды, яғни ауаны ластамайды. Жылына 90 миллион дана кірпішөндіруге қауқарлы кәсіпорын толық қуатымен жұмыс істеген кезде 70 адамды тұрақты жұмыспен қамтиды.Делегация мүшелері жаңа жылу-электр орталығының құрылысын, қайта жаңғыртудан өткен Тәуелсіздіктің 25 жылдығы даңғылы мен Сырдария өзенінің жағалауын аралап көрді. Бейбарыс сұлтан көшесінен Әбілқайыр хан көшесіне дейінгі аралықтағы 6,7 шақырым жол толық жаңартылып, бұрынғы екі жолақты жол төрт жолаққа кеңейтілген. Ені 14 метрге жеткен жаңа жол бойында балалар ойын алаңдары мен спорттық құрал-жабдықтар орнатылып, тұрғындарға жайлы орта қалыптастырылған.<img src="https://knadmin.beoblood.kz/uploads/3_63db1865e7.jpg" alt="3.jpg">Жамбылдық делегация Сырдария өзенінің сол жағалауындағы 11 мың орындық стадионды, физика-математика бағытындағы «Білім-инновация» лицей-интернатын да көрді. Білім ордасы 400 оқушыға арналған, заманауи жаңа технологиялармен жабдықталған. Мұнда зертханалар, робототехника және STEAM кабинеттері бар, олар оқушыларға ғылыми және техникалық дағдыларды терең меңгеруге мүмкіндік береді. Сондай-ақ, физика, математика және информатика пәндері ағылшын тілінде оқытылады.Қонақтарға жаңа автовокзал, тарихи-өлкетану музейі, «Сыр жұлдыздары» шығармашылық-инновациялық академиясы, «Анаға тағзым», “Қорқыт ата” әуежайы, Президент саябағы,арнаулы әлеуметтік қызметтер көрсету, онкология,еңбек мобильділігі орталықтары, бірқатар емдеу мекемесінің жұмыс барысы да таныстырылды.Сапар аясында екі өңірдің сала мамандары арнаулы әлеуметтік қызметтер көрсету, атаулы әлеуметтік көмек тағайындау, отбасы институтын нығайту және халықты жұмыспен қамту мәселелері бойынша кеңейтілген мәжіліс өткізді. Жиында әлеуметтік қолдау жүйесін жетілдіру, осал топтарға көрсетілетін қызметтердің сапасын арттыру және еңбек нарығындағы тиімді тәжірибелерді бөлісу мәселелері талқыланды.Кездесу қорытындысымен екі тарап алдағы уақытта да өзара тығыз байланыс орнатып, нәтижелі жұмыстар жүргізуге ниетті екенін білдірді.Фото: Қызылорда облысы әкімінің баспасөз қызметі

 Жамбыл облысының делегациясы Сыр өңірінің әлеуметтік-экономикалық даму барысымен танысты

<a href="https://kyzylorda-news.kz/">Kyzylorda-news.kz</a> Қызылорда облысында кәсіпкерлік саласының өркендеуіне жол ашу, нарықтағы әділ бәсекелестік пен ашықтықты қамтамасыз ету бағытында жүйелі жұмыстар жүргізілуде. Әсіресе, әлеуметтік маңызы бар азық-түлік, құрылыс, отын-энергетика секілді негізгі салалар тұрақты бақылауда. Бұл туралы Өңірлік коммуникациялар қызметінің ақпарат алаңында Бәсекелестікті қорғау және дамыту агенттігінің Қызылорда облысы бойынша департаменті басшысының орынбасары Еркін Қазығұлов мәлімдеді.<blockquote>– Өңірде бәсекелестікті қорғау және дамыту бойынша нақты жұмыстар атқарылуда. 2025 жылдың бірінші жартыжылдығында нарық субъектілерінің заңнама талаптарын сақтауына қатысты бірқатар хабарламалар мен нұсқамалар берілді. Сондай-ақ, 3 тергеп-тексеру жұмысы жүргізілуде. Оның ішінде иодталған тұз өндіру, авиакеросинді бөлшек саудада өткізу, мемлекеттік кәсіпорындардың қызмет аясын кеңейту секілді бағыттар қамтылған. Бұдан бөлек, жыл басынан бері 20 мемлекеттік кәсіпорын мен заңды тұлғаның қызметіне мониторинг жасалып, олардың кейбір қызмет түрлерін монополияға қарсы органның келісімінсіз жүзеге асыру фактілері анықталды. Әкімшілік кедергілерді азайту бойынша арнайы Кеңесте 7 мәселе қаралып, орталық агенттікке ұсыныстар жолданды. Біздің мақсат – өңірде әділ әрі ашық нарықтық қатынасты қалыптастырып, кәсіпкерліктің дамуына қолайлы жағдай жасау, – деді Еркін Қожахметұлы.</blockquote>Кедергілер жөніндегі кеңес төрағасы Тілеулиев Бейбітәлі әділ нарық қалыптастыру - тұтынушы мен кәсіпкер құқығын қорғаудың кепілі екенін атап өтті.<blockquote>– Қазіргі уақытта кәсіпкерлерге ең керегі – ашық әрі әділ бәсекелестік орта. Бизнестің дамуына жол ашу үшін алдымен олардың алдынан шығатын тосқауылдарды жоюымыз керек. Біз кедергілер жөніндегі кеңесте осы бағытта жұмыс істеп, кәсіпкерлерден келіп түскен ұсыныстар мен өтініштерді жинақтаймыз. Әр мәселені талдап, оның шешу жолдарын ұсынып, орталық агенттікке жолдап отырамыз. Өңірімізде бәсекелестікті дамыту үшін ең алдымен бизнесті шектейтін әкімшілік кедергілерді азайту маңызды. Кәсіпкерлер неғұрлым еркін жұмыс істесе, экономика да соғұрлым қарқынды дамиды. Сондықтан бұл бағыттағы жұмыстар алдағы уақытта да жүйелі түрде жалғасын табады, – деді Бейбітәлі Дербісәліұлы.</blockquote><img src="https://knadmin.beoblood.kz/uploads/1_545431d2a2.jpg" alt="1.jpg">Фото: Freepik

Архив