<a href="https://kyzylorda-news.kz/">Kyzylorda-news.kz.</a>&nbsp;Қазір «Алтын дәндік» диқандарды ауылдан таппайсыз. Еркеккіндікті түгел қырда. Егіс науқаны қызған. Көктем жер еміп, дән сепкен еңбеккерлердің жарғақ құлағы жастыққа тимейтін мезгіл. Яғни, ауылдағы екі кісінің басы қосылса, әңгіме – егіс жайы. Еңбек адамдарының айтуынша, биыл ауа райы егістікке қолайлы.&nbsp;Атақты диқан, екі мәрте Социалистік Еңбек Ері Ыбырай Жақаев атындағы ауылда атакәсіпті өркендетіп келе жатқан ірі құрылымның бірі – «Алтын дән-Шиелі» шаруа қожалығы. Егістік алқабының ана шеті атшаптырым «Ыбырай Түбегінде» болса, мына шеті көз ұшындағы «Ашаға» орналасқан шаруа қожалық бастапқыда етек-жеңін бірден жиып ала қойған жоқ. Сонау қаһарлы кеңес үкіметі тарап, еліміздегі жекешелендіру саясатының пайдасы мен зиянын қатар көргендердің бірі еді. Дала академигі ұйытып іс істеген Ы.Жақаев колхозы әп-сәтте тоз-тоз болып, Жер-Ана бөліске түскенін көпшілік әлі ұмыта қойған жоқ. Әлемдік рекордтың көшін бастаған колхоздың бір емес бірнеше майда қожалыққа бөлініп, тарыдай шашылғаны еңбек адамдарына да сын болды. Сол мезеттерде өзінің шағын ғана «Егін» шаруа қожалығын дөңгелетіп жүрген Асқар Бердібаев майда шаруа қожалықтарды біріктіріп кооператив құруды ойластырады. Осылайша, даңқты баба рухын қайта көтеріп, 2010 жылы 10 мамырда шаруаларды қосып, жұмыстың ауқымын да кеңейтеді. Тырмысып тіршілік қылған жігіт ағасы бұл күндері «Алтын дән» шаруа қожалығының төрағасы.«Көктемнің әр күні жылға азық» екенін жадына мықтап тоқыған ырыздық жорығының жампоздары жауапты жұмысқа жан-жақты дайындалған. Өткен жылы 1100 гектар жерге Сыр маржанын еккен. Ал биыл 1600 гектар жерге күріш егіп, 1400 гектарға жоңышқа себуде. Дән жерге сіңгенше, Асқар ағамызда да дамыл жоғы белгілі.&nbsp;<blockquote>«Диқан қауым әр жыл сайын көктемде үміт етеді емес пе? – дейді Асқар Бердібаев. – Агротехникалық шараларды талапқа сай уақытылы атқару міндетіміз. Тыңайтқыштарды да сіңіру қажет. Алайда жаздың аптап ыстық болғандығы белгілі. Ендігі бар үміт астық сапасының жақсылығында», – дейді ол.</blockquote>Алғашқыда 5 адам болып, Ы.Жақаев егістік алқабын ақ күрішпен жайнатқан ұжым қазір 60-қа жуық диқанды тұрақты жұмыспен қамтып отыр. Биыл Асқар Бердібаев күріштің 2 түрін яғни, «Лидер» мен «Маршалды» өсіруді қолға алыпты. Ең алғаш 2002 жылы небәрі 100 гектар жерге күріш егіп бастаған «Алтын дән-Шиелі» шаруа қожалығында жыл сайын жұмыс күші жетік, ауқымы да кеңейіп келеді. 13 жылға жуық еңбек етіп келе жатқан ұжым жетекшісі берекенің еңбекке байлаулы екендігін жыр қылып айтады. Егер жаңа технологияны батыл енгізіп, жұмыс істейтұғын болса, құнары мол жер де иіп сала бермек.&nbsp;Дала ерлеріне барлық жағдай жасалған. Еңбекақылары да толымды. Қажетті техниканың бәрі сақадай-сай. Биыл жаңадан 2 «CLAAS» трактор, 4 лазер нұрымен басқарылатын тегістегіш, дискатор алынған. Көктемгі және күзгі науқандық жұмыс кезінде қауырт қимылдап, жақсы нәтиже көрсеткен еңбеккерлер тұп-тура біржылдық табыстарын таба алады. Уақыттан ұту үшін түскі және кешкі астары алқап басына жеткізіліп беруде. Егіс алқаптарындағы тракторлар күндіз-түні тынған емес. «Жаздың бір күні қыстың мың күнін асырайды» деген тәмсілді тоқып алған олар, уақытты текке кетіріп алсақ, есіл ырзық рәсуа болмақ деп отыр.Асқар Бердібаев – нағыз еңбек адамы. Кейіпкеріміз басқарған қожалық тек егінмен айналыспайды. Төраға алқапта ақ маржанды жайқалтып, кең даланың төсінде ірі қараның санын арттыруды жоспарлап отыр. Бүгінгі таңда мал шаруашылығын өркендетіп, асыл тұқымды іріқара «ангус» бұқасының санын арттыруда. Кейіпкеріміз тек іскер азамат қана емес, меценат екенін де еске сала кетейік. Ауыл тұрғындарының қажетін шамалап, қолдан келгенше қаржылай қолдау танытатын А.Бердібаев жер үлесі бар ауыл тұрғындарына бақшалық жер беруді де жолға қойған. «Елде болса, ерінге тиеді» демекші, шаруашылық басшысы өнімнің бір бөлігін тыл ардагерлері мен қазыналы қарттарға және тұрмысы төмен отбасыларға үлестіруді мақсат тұтқан. Тіршілігі үйлесім тапқан Жақаевшылардың молшылықтың шуағына бөленіп, қуаныштың құшағына кенелуін тілейміз.

«Алтын дәннен» ескен леп

<a href="https://kyzylorda-news.kz/">Kyzylorda-news.kz.</a> Қазір құрылыс саласының материалдары нарықта үлкен сұранысқа ие. Өзге өңірді айтпағанда, біздің ауданның өзінде тапсырыс тым көп. Әсіресе, маусымдық кезеңде көлемі артып, тауар айналымы тұтынушылар талғамына сай түрленіп тұрады. Бірақ, соған сай баға да өсіп барады. Бағаны нарық реттейді, бәсекелестік күшейген ортада құрлылыс материалдарының жаңаруын жыл сайын көріп келеміз. Мәселен, үй қабырғасын тұрғызу үшін бүгінге дейін қызыл кірпіш, шлакоблок, пеноблок бренд болса, енді полистеролбетонды тұтыну трендке айналуы мүмкін. Мұндай өнім шығаруды Жаңақорғанда бірінші болып Сәкен Сыздықов ағамыз қолға алды. Жақсыны көрмекке Жаңаауылға жол тарттық.Дара кәсіпкер «Өркен» деп аталатын кәсіп иесі былтыр шағын цехын іске қосып, өнім шығарды. Тек қаржы тапшылығынан, оның үстінен тапсырыстың аздығынан кешегі күнге дейін нарықтың үлкен айналымына толық ене алмаған. Енді тұтынушылардың талғамына, ұсынысына сай өнімнің өрісін кеңейтуде.<blockquote>«Бұл кәсіпті ашу туралы ой өзім үй құрылысын бастағаннан соң келді. Бастапқыда қызыл кірпіштен қабырғаны тұрғызуға ниет қылдым. Бірақ, интернет арқылы осы өнімге назарым ауып, сатып алуға бел байладым. Алайда, Алматы қаласынан тапсырыс беру уақыты 1-2 жыл көлемі болғандықтан, техникалық-экономикалық жағдайын зерттей келе өзіміз қолға алуды ұйғардық. 2020 жылдан бастап зерделей бастадым, алдымен елдегі өндірістердің әлуетін байқадым. Сөйтіп, интернет арқылы ресейлік мамандармен байланысып, қазақстандық кәсіпкер блогерлермен де кеңесіп көрдім. Тәжірибе жинақтаған соң Ресейдің Пермь каласынан шағын зауыт алдырдық. Оның ішінде шикізатты өнімге айналдыратын құрылғылар мен бетон қалыптары келді. Зауыт қызм еткерлерімен кез келген уақытта қоңырау шалып, білмеген тұстарымды сұрап отырдым», – деді кәсіп иесі.</blockquote>Тиісті сынақ-тест барысын ағамыз бағамдап көрген. Жылу сақтағыштығы, ауыр заттармен ұрып-соғу, 5 метр биіктіктен бетон бетіне тастау, суға батырып қою, от пен күйдіру, шеге қағу, қол арамен қырқу, қамаз автокөлігімен басу сынды сынақтан өткеннен кейін полистеролбетон блоктары басқа материалдарға қарағанда оқ бойы озып шыққан екен. Біздің білетініміз бұл құрылыс материалы көбіне ірі құрылыстарға, яғни, екі-үш қабатты нысандар салуға қолданады. Енді үйдің құрылысын салуға да жұмсала бастады. Сәкен ағамыздың бастамасын ұлы Өркен қоштап, қазір күніне екі мезгіл, тапсырыс аз кезінде бір уақыт шикізаттан өнім шығарып отырады.<blockquote>«Жұмыс жүгі кесек құйып, шлакоблок өндіруден әлдеқайда жеңіл, тек қалып¬ты құрып, қайта жинау уақыт алады демесеңіз, барлығын техника жасайды. Өнім иленіп дайын болған кезде қалыпқа арнайы құбыр арқылы құйып отыру ғана қолды ұстайды. Бұл маусымдық жұмыс емес, қысы-жазы шығаратын бола¬мыз. Өйткені, шағын цехымызда барлық жағдай жасалынған», – деді жас жігіт.</blockquote>Иә, Сәкен ағамыз келешекте бұл кәсіптің көкжиегін кеңейтіп, қосымша жұмыс күшін көбейтуді ойлап отыр. Әзірге сәл қаржы мен тапсырыс көбірек келсе болғаны, жастарды жұмыс жұмылдыруға дайын. Қазір 4 қызметкер бар, еңбекақысы күнделікті. Жазда цех іші салқын, қыста жылы болады. Ішінде, жуынатын бөлме, аяқ су мен ауыз, газ кіргізілген.<blockquote>«Бұл жобаға аз қаражат кеткен жоқ. Бұйырса «Атамекен» кәсіпкерлік палатасы арқылы 6 проценттік несие арқылы 5 млн қаржы алып, ісімді кеңейткім келеді. Құжаттарды өткізіп қойдық, бұйырса жақын арада қаржы аламыз деген ниеттеміз. Шыны керек, бұл жай ғана құрылыс заты емес. Бұның тиімді тұсы өте көп, үй жағдайында жаздай ыстықты өткізбесе, қыста жылы температура ұстайды. Мәселен, полистеролбетонды жалпағынан қалайтын болсаңыз, қақаған аязда 1 күн от жақпасаңызда үйдің температурасы сақталады. Тек 1 градус төмен түсуі мүмкін. Әрі, 2 метр кірпіштің жылылғымен бірдей, яғни кірпіштің қалыңдығымен есептегенде, екі метр кірпішті қатар өргенмен тең. Ал, тік өрсеңіз, онда 1,5 метр кірпіштің қалыңдығымен пара-пар. Оған көзім анық жеткен соң, тәуекелге барып, кәсіпті бастап кеттім».</blockquote>– Бағасы қолжетімді ме?«Әр данасы 1200 теңгеден. Көбісі қымбатсынатын, алайда биылдан бастап сатып алушылар қатары көбейіп келеді. Айына 3000 дана шығарудамыз, жалпы көлемі 600×300×200 болады. Ал, құрамына келетін болсаңыз, қоспасы аз емес. Бірақ, адамзатқа зиянды қоспа құрамда болмайды.Полистиролбетон – жеңіл және ауыр бетонды араластыру технологиясы арқылы түйіршіктелген кеуек пенопласт пен цементті қолдана отырып дайындалады. Пенопласт өнімге жылу айырғыш қасиеттер берсе, бетондық негіз оның беріктігін сақтайды. Мұндай құрылыс блоктары суыққа төзімді, дыбыс айырғыш және оттан сақтайтын қасиеттерге ие. Олар кәдуілгі кірпіштерден біршама жеңіл болады. Сондай-ақ, жарамдылық мерзімі де ұзақ. Полистиролбетон алғаш рет Германияда пайда болған, кейінірек Ресей мен Кореяда дамып, бүгінде Алматы, Қарағанды қалаларында қолға алына бастады.Бүгінде цехқа қажетті гипсті Самархандтан, химия қоспаларын Қытайдан, мрамор ұнтағын Алматыдан, қағаз қабын Шымкенттен арнайы тапсырыспен алдыруда. Ал өңдеуші арнайы құрылғыны шетелдік технологияға қарап жергілікті мамандарға тапсырыс беріп, арнайы жасатады.Бұрын аудан тұрғындары мұндай материалдарды көршілес қалалардан жеткізіп отырған. Ал өнімнің жергілікті жерден шыққаны жаңақорғандықтар үшін қолайлы болмақ. Өйткені базар бағасынан 40 пайызға дейін арзан алуға болады. Мәселен, тас еден желімінің бағасы базарда 1450 теңге болса, мұнда 950 теңге. Бүгінде 4 жұмысшы тұрақты нәпақасын осы жерден тауып отыр. Алда инновациялық жоба ретінде қаржылай қолдауға ие болып жатса, кәсіпорынды кеңейтіп, жұмысшылар санын арттыруды көздейді.Жаңақорған аудандық кәсіпкерлік, өнеркәсіп және туризм бөлімінің басшысы Қаржыбек Бүркітбаев:<blockquote>«Ауданда жаңа өндіріс ошағын ашып, құрылысқа қажетті материалдарды шығаруды жолға қойған Мұхтар Мұзаппарұлының тың идеясы көңіл қуантады. Жаңа өндіріс орындары ішкі нарықты отандық тауарлармен қамтамасыз етуге айтарлықтай әсер етеді. Осылайша түрлі салалар бойынша отандық өнім өндіріс көлемінің кеңеюі күтілуде. Бұл импорттың ғана емес, сонымен бірге экспорттық әлеуеттің кеңеюіне ықпал етеді», – деді.</blockquote>Кез келген істі бастау әрине қиындық тудырады. Оның үстіне, бұл кәсіп аудан өндірісінде тәжірибеде болмаған. Отандық өндірісті дамытып, ел игілігіне қызмет етуді көздейтін кәсіпкер болашақта цехына жер берілсе, ісін кеңейтіп, өнімділікті арттыруға ниетті.Нарықтағы бәсекелестікке төтеп беріп, брендтік өнім қалыптастыруда жаңа мүмкiндiктердi iздеу, заманауи технологияны пайдалану, капиталды жұмсаудың тың салаларын iздеуді мұрат еткен Мұхтар Тойымбетовтың осы бағыттағы ізденісі қуантты. Бұл – Жаңақорған ауданында өнім өндіру ісі дамитынының бастамасы екеніне сенеміз.Полистиролбетон экологиялық жағынан қауіпсіз, биологиялық әсерге ұшырамайды, керемет кесіледі, оған шегелер мен өзге де бекіту құралдары жақсы кіреді. Полистиролбетон өзінің сапалық және бағалық сипаттамалары жағынан кеуек блоктардан және тіпті газобетоннан асып кетеді, ал тым аз жылу өткізгіштігіне орай қазіргі коммуналдық тарифтердің шарықтаған кезінде ерекше көзге түседі. Кәсіпкердің өнімі Д-500 деп аталады, бұл жеңіл түрі, бірақ сапасы өте жоғары. Ал, құрамын біз толық ашпадық, егер қызығып, толық мәлімет аламын немесе құрылысыма жаратуға ниеттімін десеңіздер мекен-жай Жаңақорған кенті, Жаңаауыл аумағы, М.Түйменұлы көшесінде орналасқан. Біз зерделедік, мүмкіндігінше мағлұмат беруге тырыстық.

Жаңақорғанда полистеролбетон нарыққа жол тартты

<a href="https://kyzylorda-news.kz/">Kyzylorda-news.kz.</a> Ерекше балалардың қоғаммен біте қайнасып, ақыл-ойын дамытуына, салауатты өмір салтын ұстанып, тұлға ретінде жан-жақты дамуына мемлекет тарапынан жасалып жатқан қолдау көп. Әсіресе, мұндай балалардың арасында түрлі спорттық додалар өтіп тұрады. Сол сияқты 1-3 маусым аралығында Елордада Жақсылық Үшкемпіров атындағы жекпе-жек сарайында паралимпиадалық спорт түрі боччадан респуликалық турир өтті.Аталған жарыста еліміздің барлық өңірлерінен 47 спортшы бақ сынаған. Олардың қатарында аралдық жас өрендер де бар. Нәтижесінде Арал ауданының жастары айқын басымдық көрсетіп жеңіс тұғырынан көріне білді.Атап айтар болсақ, айтулы додада сайысқа түскен, №83 орта мектебінің 9 сынып оқушылары Қанатбек Жанарыс ВСМ1 класс бойынша, Торыбаева Нұрсауле ВСМ5 класс бойынша I орынды, №220 орта мектебінің 9 сынып оқушысы Шаханова Жаңгүл мен 3 сынып оқушысы Аманжол Аянат ВСМ5 класс бойынша ІІІ орынды иеленді. Ал Арал көпсалалы колледжінің 1 курс студенті Аманқосова Қымбат ВСМ5 класс бойынша жүлделі ІІ орынды қанжығалады.Жалпы бочча - бұл Қазақстандағы ең жас паралимпиадалық спорт түрі. Бұл тірек-қимыл аппаратының ауыр бұзылулары бар адамдарға арналған дәлдікпен ойналатын ойын.Аталған додаға қатысып аудан мерейін көтерген жасөспірімдерді аудан әкімдігі құттықтап, ыстық ілтипатын білдіріп, құрмет көрсетті. Сондай-ақ, жас спортшыларға талаптарына сәттілік тілеп, алдағы уақытта да биік белестерді бағындыруға тілектестік білдірді.

Аралдық жас спортшылар жеңіспен оралды

<a href="https://kyzylorda-news.kz/">Kyzylorda-news.kz.</a> ХХІ ғасыр ғылым мен білімнің қарқын алып, техниканың қарыштап дамыған заманы десек, жас ұрпақтың соған лайық сапалы білім алуы, бәсекеге қабілеттілігін қалыптастыруы бүгінгі күннің басты талабы. Бұл – сала жаңа өзгерістер мен тың бастамалардың ортасы. Сондықтан қазір мектептер көштен қалмай, заман талабына сай білім беру үрдісін қалыптастыруда.&nbsp;Бүгінде білім аламын деген балаға жол ашық. Білім ордаларында да баланы оқуға ынталандыруда барынша жағдай жасалған. Тек 45 минут сабақ оқу емес, үзіліс кезінде де босқа уақыт құртпай танымын кеңейтуге, оқушылардың бір-бірімен білгенімен бөлісуіне мүмкіндік бар. Дәл мұндай мүмкіндік алаңы қаладағы К.Қаракөзов атындағы №235 мектебінде де қарастырылған.Ширек ғасырлық тарихы бар бұл мектеп ескі ғимаратта орналасқан. Осынша жыл ішінде күрделі жөндеу көрмеген білім ордасына бұл кедергі емес. Бастысы, ұжымның ауызбірлігі мен басшының көшбасшылық қасиеті. Соның нәтижесінде мектеп ұжымы білім ошағын замануи үлгіде жабдықтапты. Есіктен кірген бойда орналасқан ұзын дәліздің екі жағы да тәрбиелік мәні зор, тағылымды, танымдық дүниелермен безендірілген. Десе де оның бір бөлігі ерекше балаларға арналып жасалған екен.&nbsp;<blockquote>«Бұл ұжымға басшылыққа келгеніме 1 жылдан асты. Мектеп ғимараты ескі. Күрделі жөндеуді қажет етеді. Десе де басшылық қызметке келгенде алғаш қолға алғаным мектептің өз қаржысы есебінен ғимаратты жөндеу болды. Осылайша қолдан келгенше мектептің 1 қабатына жөндеу жүргіздік», &nbsp;– дейді мектеп директоры Роза Жадиева.&nbsp;</blockquote>Басшылыққа келген білікті маман, тәжірибелі ұстаз Роза Жәдиева тәртіп мен тәрбие болмаған жерде сапалы білім болмайтынын айтады. Сондықтан алдымен бала тәрбиесіне басымдық беруді көздейді. Бұл ретте оқушы мен ұстаз емес, оның ата-анасы, отбасы да маңызды рөлге ие. Үштік байланысты нығайту мақсатында мектепте ұлттық жобалардан бөлек «Отбасылық тәрбие мектебі» жоба жүзеге асырылуда. Бұл жобада «Кимешек» әжелер мектебі, «Данышпан» аталар, «Тірек» әкелер, «Мейірім» аналар мектебі қалыптасқан. Осы аталған жоба бойынша балалардың ата-анасымен байланыс орнатып түрлі мектепішілік іс шаралар өткізіледі. Сонымен қатар ата-аналардың «Ынтымақ» кабинеті жұмыс істейді.&nbsp;<blockquote>«Алғашқы безендіруді үздіктер ағашын жасаудан бастағанмын. Мұнда бастауыш сынып оқушылары арасында олимпиада, ғылыми жоба жеңімпаздарының, сондай-ақ түрлі іс-шараларға белсенді қатысқан оқушылардың суреті ілінеді. Бұл өз кезегінде баланың оқуға, қоғамдық шараларға деген қызығушылығын арттырады. Бұдан бөлек ата-ана-бала-ұстаз үштігін нығайтуда «Отбасылық тәрбие мектебі» жобасы бар. Соның аясында ата-аналарды шақырып, оқушылармен бірге семинар-тренингтер өткізіледі. Сонымен қатар «Оқуға құштар мектеп» ұлттық жобасы аясында оқушының ата-анасымен бірге кітап оқуы ұйымдастырылады. Жалпы мұнда оқушылардың үзіліс кезінде кітап оқуына болады. Соның нәтижесінде олардың оқыған кітаптарынан макет жасап, арнайы бұрыш дайындадық. Бұл да балалардың кітап оқуға деген ынтасын арттырып, өзара ой алмасуына мүмкіндік берді», – дейді білікті басшы.</blockquote>Өз кезегінде мектепте әкелердің рөлін арттыруға да басымдық берілген. Бұл ретте сынып старосталарынан бастап ата-аналар комитеті, қамқорлық кеңес жеткшілігіне ер азаматтарды белгіленген.&nbsp;Бүгінде оқушылардың жан-жақты әрі толыққанды білім алуына, бос уақытын тиімді өткізуіне, қарым-қабілетін ашып, өзін-өзі тануына барынша мүмкіндік жасалған.&nbsp;Білікті басшы мен ұстаздар ұжымы білім мен тәрбиені осылайша ұштастыру арқылы өскелең ұрпақтың сауатты, салиқалы азамат ретінде қалыптасуына сеп болмақ.&nbsp;Білім ордасының елу жылдығы қарсаңында мұнда «Ынтымақ» кабинеті ашылған. Ол «Отбасылық тәрбие мектебі» жобасы аясында жүзеге асырылды. Кабинет қабырғасында тағылымды, тәрбиелік мәндегі ережелер ілінген. Үй ережесі аталатын бұл кестеде отбасында баланың, ата-ананың не істеу керегі жазылған. Сондай-ақ қыз баласы мен ер балаға арналған тәрбиелік нақыл сөздер де бар. Бұл кабинетте ата-аналар қыздарымен бірге тігін тігіп, ою ойса, ер балалар ағаш бұйымдарымен жұмыс істейді. Сонымен қатар мұнда ата-аналардың бала тәрбиесі жөнінде психологиялық кітаптар оқуы үшін кітап қоры да жасақталған.&nbsp;Ерекше балаларға қамқорлықБұл білім ордасы басымдық берген тағы бір бағыт – ерекше балаларға қолдау көрсету. Әрине, оларды оқытып-тоқытудың өзіндік әдіс-тәсілі бар. Мұғалім мұны да меңгеруі қажет. Сондықтан алдымен оларға сабақ беретін ұстаздың баланың жан-дүниесін түсініп, олармен өз деңгейінде қарым-қатынас жасай алуы негізге алынған. Мұнда 9 ерекше бала білім алады. &nbsp;Олардың әрқайсысына жеке педагог-ассистент белгіленген. Осындай ерекше балаларды қолдауда білім ошағында «Нұрлы бала» жобасы жұмыс істейді.&nbsp;«Мектеп дәлізінің оң жақ бөлігінде ерекше балалардың сыныбы орналасқан. Соған сәйкес үзіліс кезінде олардың да ой-өрісін дамытуға жағдай жасадық. Сыныптан шыға бере олар түрлі танымдық ойындар ойнап, аквариумдгі балықтардың тіршілігін бақылай алады. Сонымен қатар тордағы құстардың дауысы да олардың көңіл-күйіне оң әсер ететінін байқадық. Мүмкіндігі шектеулі балаларға білім беруде оң нәтиже барын атап өткім келеді. Ата-анаға мұндай баланы оқыту қиынға соғады. Кейде қаланың алыс шетінен келіп, ерекше баласының біздің мектептен білім алғанын қалайтын ата-аналар бар. Сондай сәтте еңбектің еш кетпегенін түсінесің», – дейді Роза Тағыбергенқызы.Ерекше балаларға арналған тағы бір тиімді әдістің бірі – «Армандар ағашы». Білікті ұстаз Роза Тағыбергенқызы мұндай балалардың ерекше қабілетін ашу мақсатында олардың арманын жазуына мүмкіндік берген. Нәтижесі де жаман емес. Бүгінде арманын жазудың арқасында мүмкіндігі шектеулі балалар арасында математик, суретшілер шығуда.&nbsp; &nbsp; Білікті ұстаз білімді шәкіртЕлу жылдық тарихы &nbsp;бар оқу ордасында бүгінгі күні 1077 оқушы тәлім алуда. Ал оларды білім нәрімен сусындатуда 136 мұғалім қызмет етеді. Оның ішінде 131-і жоғары білімді. Ұстаздық деңгейіне байланысты 25 педагог-зерттеуші, 31 педагог-сарапшы, 30 педагог-модератор бар. Сонымен бірге мұғалімдер арасында әдістемелік құрал, авторлық жоба авторы да бар. Мектеп басшысы Роза Жадиеваның ұстаздар қауымына қояр талабы да осы. Ұстаз жаңа заманға сай білімді, білікті, ізденімпаз болу. «Ұстазы мықтының ұстамы мықты» деп бекер айтылмаған. Білікті мұғалімнен білім алған шәкірттері де оқуда озат, озық ойлы өрендер.&nbsp;Қазір мүмкіндіктер заманы. Әсіресе мектеп оқушылары үшін кез келген бағыттағы жол ашық. Әр баланың өзіндік ерекшелігін, қабілетін ескере отырып оқыту бүгінгі күні жақсы дамып келеді. Мәселен, мектепте биология пәніне қызығатын өрендер үшін бұл сабақ барысында оқығанын тәжірибе ретінде сынап көруіне мүмкіндік бар. Ол үшін арнайы бөлмеде түрлі өсімдіктер отырғызылып, оны күтіп-баптау оқушыларға жүктелген. &nbsp;Олар сол арқылы биологиялық әлемді жіті зерттеп, тани алады.&nbsp;Ұстаздың оқушыға білім берудегі өзіндік тәсілі, олармен қарым-қатынас жасаудағы ерекшелігі бүгінгі күні жоғары бағаланады. Себебі оқушымен мұғалім арасындағы тығыз байланыс білімнің сапалы болуына да ықпал ететін көрінеді. Білім ошағында ұжым мақтанышына, шәкірттерінің сүйікті ұстазына айналған мамандар жетерлік. Соның бірі – информатика пәні мұғалімі Асқар Қарасайұлы. Оның сабақ берудегі ерекше әдісі, әрбір оқушының жүрегіне жол таба білуі өзгелерге үлгі боларлықтай. Себебі білікті ұстазы бар мектептің оқушылары да информатика пәніне қызығушылық танытып, ІТ саласын игеруді көздеп отыр.&nbsp;Сапалы білім беруде ұстаздар қауымына қойылатын талап жоғары. Ал ұстаздар қауымы бұл үдеден шығуда. Мәселен «Үздік авторлық бағдарлама-2023» байқауында Гүлнар Асайбулдаева І орын алса, «Үздік жас маман-2022» байқауында АӘД пәні мұғалімі Р.Әлібеков ІІ орынды иеленді. Бұдан бөлек пән мұғалімдері де қалалық, облыстық деңгейде марапат иелері атанған. Білікті ұстаз шәкірттері де білімді. Мұнда түрлі ғылыми жоба, пәндік олимпиада жеңімпаздары тәлім алуда.Биыл мектепте бітіруші түлектер арасында Бағдат &nbsp;Смағамбет және Нұрдәулет Төлеген «Алтын белгіге», &nbsp;Ақниет Рүстемқызы «Үздік аттестат» үміткері. Бүгінде мектеп мақтанышына айналған «Алтын белгіге» үміткер Төлеген Нұрдәулет ҰБТ-ның бірінші кезеңін де аймақ бойынша ең жоғары балл жинап, мектеп абыройын көтерді.Мектеп басшысы Роза Тағыбергенқызы алдағы уақытта білім ғимаратын күрделі жөндеуден өткізіп, білім сапасын одан әрі арттыруды көздейді. Сондай-ақ «Отбасылық тәрбие мектебі» жобасын республикалық деңгейге жеткізсем деген ниетте.Балалар қауіпсіздігі басты назардаБүгінде жасөспірімдер арасындағы құқықбұзушылық әрекеттерінің алдын алу күн тәртібіндегі өзекті мәселеге айналды. Сондықтан мектептердегі қауіпсіздік жүйесі қатаң бақылауға алынуда.&nbsp;«Білім беру ұйымдарына және олардың аумақтарына әкелуге тыйым салынған, оларда пайдаланылуы шектелген нәрселер мен заттардың тізбесін бекіту туралы» Қазақстан Республикасы Білім және ғылым министрлігінің 2021 жылғы 25 мамырдағы № 235 бұйрығының талаптарын орындау қазір мектеп директорларына қатаң тапсырылған. Бұл бағытта қазіргі таңда нақты іс шаралар қолға алынып, тұрақты жұмыс жүргізілуде.&nbsp;Қоғамда жасөспірімдер мен балалардың өміріне қауіп төндіретін түрлі жағдайлар орын алуда. Бұл туралы күнделікті әлеуметтік желі, ақпарат құралдары хабарлауда. Балалардың өміріне қауіп төнбес үшін қазір барлық білім ордаларында қауіпсіздік күшейтілген. Соның аясында оқушыларда мектепке және сол аумаққа әкелуге тыйым салынған заттардың бар-жоғын мамандырылған күзет қызметкері арнайы темір іздегіш құралмен тексереді. &nbsp;Сондай-ақ білім ошағының тәрбие орынбасарлары және сынып жетекшілері, психолог мамандарымен &nbsp;күнделікті тексеру жұмыстары күшейтілген түрде жүргізіледі.&nbsp;Бұдан бөлек ата-аналар арасында «Бала қауіпсіздігі-баршаға ортақ» тақырыбында қалалық полиция басқармасының мамандарымен кездесу ұйымдастырылып, балаларға далада жатқан белгісіз &nbsp;заттарды алмау керектігі туралы түсіндірме жұмыстары тұрақты жүргізілуде. Сонымен қатар ата-аналарға мектепке әкелуге тыйым &nbsp;салынған &nbsp;заттар &nbsp;тізімі &nbsp;таныстырылып, тиісті ақпарат берілген. &nbsp; Қазіргі таңда балалар жазғы демалысқа шықты. Десе де олардың демалыс уақытында ата-аналарының қараусыз көшеде жүрмеуі ескертілген.&nbsp;Ал жаңа оқу жылында мектептегі қауіпсіздік шарасы қайта күшейеді.

Тәрбиемен ұштастырып білімді

Жаңақорғанда жарық жүйесі жаңаруда

<a href="https://kyzylorda-news.kz/">Kyzylorda-news.kz.</a>&nbsp;Өткен жылы қаңтар мен сәуір айы аралығында республика бойынша 5680 отбасы ажырасты. Оның 4600-і қала тұрғындарының ажырасу көрсеткіші болса, екі мыңдай отбасы ауылдық жерде екіге кетіпті. Ал 2021 жылы 50 мыңға жуық отбасы ажырасқан. Ажырасқандардың көбі жас отбасылар. Сонда дәм-тұз жараспауының себебі неде?Шаңырақтың шайқалып, отбасыдағы сенімнің сетінеуі – әлеуметтік мәселе. Өмірде отау құрып, алайда белгілі бір себеппен отбасының ойраны шығып, өкініш өзегін тіліп, жігерін жасытқан, тіпті тіршіліктен түңілудің аз-ақ алдында тұрған жастармен тілдессеңіз, ажырасудың негізгі себебі – мінез-құлықтың жараспауын алға тартады. Екіншісі, әлеуметтік-тұрмыстық жайт.&nbsp;Психологтардың пайымдауынша, жастардың бойында отбасына деген жауапкершілік аз. Олар тұрмыстың қиыншылығынан қашады. Тіпті кеше ғана дүниеге келген сәбиді кім бағады, сенің ата-анаң ба, әлде менің ата-анам ба деген сауалдың өзі тығырыққа тірейтіні тағы бар. Одан соң уақтылы баспаналы бола алмау, сәбилерін балабақшаға орналастыра алмау, жалақының аздығы, табысы мол жұмыс таппау, сайып келгенде қаражаттан қиналуы, осының барлығы ошақтың отын сөндіретін өмірдің өкпек желі. Осыған қатысты Зейнеп Ахметованың түйдек-түйдек ойларын ортаға тастығымыз келіп отыр.Қазір ажырасу өте көп. Оның әртүрлі себебі бар. Біріншісі – жастардың бүгін таныса салып, ертең үйленетіндігі. Бірін-бірі жете танымайды, алдағы күндерінің қалай болатынын ойланып жатпайды. Жастар лезде үйленетін болғандықтан ата-аналары да амалсыздан асығыс тойын жасайды. Тойдың үстінде бірін-бірі жаңа танып жататындар бар. Екінші себеп – пендешілік, екі жастың арасына заттың түсуі. Қыздың жасауына ананы әкелесің, мынаны әкелесің деп шарт қояды.Қазіргі заманның тағы бір үлкен трагедиясы – несие алып той жасау. Тойдан түскен ақшамен оны жауып тастаймын деп ойлайды. Олай болмайды. Ешкім уыстап ақша әкелмейді, әркім шама-шарқына қарай апарады. Сөйтіп тойдың шығыны өтелмейді. Содан баласына «сен үшін несие алып той жасадым, сен төле» дейді ата-анасы. Жастар бір жаққа барғысы келеді, киім алып кигісі келеді. Содан реніш басталып, жастардың арасына сызат түседі. «Сенің әке-шешең, менің әке-шешем, сенің кредитің, менің кредитім» деп тартысып, таласады. Оған шыдай алмай келін төркініне кетеді. Анасы болса «ішіме сыйған балам сыртыма да сияды, ондай жарымаған жерге бармай-ақ қойғаның дұрыс» деп қызын үйге кіргізіп алады.«Тасын ала берсе, тау да таусылады». Біз бір-ақ күнде құрыған жоқпыз. Аз-аздан ұлттық құндылықтарымыздан айрыла бастадық. Батыс келіп жалаңаштандырды, шығыс келіп тұмшалады. Қазақ қайда қалды сонда? Қадір-қасиетіміз қайда кетті? Қазақта бәрі болды: тәлім-тәрбие, салт-дәстүр, әдет-ғұрып, дала заңы. Осының бәрінде имандылықты тірек етті. Қазіргі діншілдер келінге сәлем салуға болмайды, ол құдайға серік қосу дейді. Ата-бабамыз «Жаманға жалынба, адамға табынба» деген.Қазақ ешқашан адамға табынбаған. Алайда келін сәлем салу арқылы келген жеріне құрмет көрсетеді. Шариғаттың қай жерінде келін құрмет көретпесін деп жазылып тұр? Сондықтан айтқан сөздің бәріне көзсіз сене беруге болмайды. Бір жаратушы күштің бары рас. Ол алдымен адамның жүрегінде болуы керек. Жүрегіңде иманың болса сені жаман іске жібермейді, арам нәрсеге қол созғызбайды. Асыра діншілдер дінді ұлттың үстіне шығарғысы келеді. Онда ұлт жойылады. Олардың арманы сол. Оларда дәстүр, заңнан бұрын дін басым. Шариғатпен ұстағысы келеді. Екі сөздерінің бірі о дүние, қит етсе, күнәһар боласың дегенді алға тартады. О дүниені ойлай беретін болсақ, не үшін өмірге келдік? Құдай не үшін жаратты? Бізді жер бетіне көбейсін, өсіп-өнсін деп жіберді. Олардың сөзіне қарасаң анау болмайды, мынау болмайды. Барлығынан тосқауыл. Біз олардың тосқауылдарымен жүрер болсақ, өз жолымыздан жаңыламыз. Қазақ өзінің тәрбие жолын қалыпатастырған дана, текті, рухты, тағдырлы халық. Алып бәйтерек сияқты тамыры тереңге кеткен, шайқалса да құлауы қиын. Халқымыздың басынан не өтпеген? Ұлттық қадір-қасиетіміз мықты болмаса осы күнге жетпейтін едік. «Бас кеспек болса да тіл кеспек жоқ» деп, айтатынын айтып қалады қазақ. Ақиқатына жетеді. Бір ауыз сөзге тоқтам жасайды.ТҮЙІН. Отбасы құндылығы Адам ата Хауа анадан бастап, ғасырлар бойы жалғасып келе жатқан кең ауқымды, құнды, құпиялы, нәзік те, айтулы, ұлағатты құндылық. Отбасы құндылығы – баға жетпес қазына. Жас ұрпаққа жанды тәрбие, өмір бойы өзекті өнеге екенін әрбір ұлтым дейтін есті ата-ана, өскелең ұрпақ, естен шығармай шыңдай түсуіміз ләзім. Отбасында үнемі тазалық, тәртіп, ар-ұят, сыйластық, үлкенге құрмет, кішіге мейірім, әрбір мүшеге ынтымақты береке, бірлік ауадай қажет. Қазақ ұлтының салт-дәстүрі мен отбасы құндылығы, жан-жақты тәрбиесімен бір дәуірлік ұрпақ қана емес, тұтас ұлт өмір бойы ұстанатын қағида.

Ажырасу саны артпасын

<a href="https://kyzylorda-news.kz/">Kyzylorda-news.kz.</a> Жаңақорган ауданындағы бірнеше айға созылған, "ТazaLike" жобасының қорытындысына арналған шара өтті. Бұл шараның негізгі мақсаты, кентте тазалық мәдениетін қалыптастырудыды негізге алып отыр. Өйткені, табалдырығынан бастап төріне дейін таза болуды ұрпағына өнеге еткен текті ұрпақтанбыз. Шүкір, соңғы жылдары кент келбеті келісті көріне бастады, әсіресе көшелер көркі кіріп, мұнтаздай тазалыққа тұрғындар сергек қарап, сәнін келтіре бастады. Алайда, мұнымен таза болып кеттік демейміз, бұл мәселеге қырын қарайтындар көп.Жобаның ұйтқысы болған аудандық "AMANAT" партиясы Жаңақорған аудандық филиалы және партия филиалына қарасты бастауыш партия ұйымдары ұйымдастырды. Мақсаты: көршілердің ауызбірлігін, туған өлкені аялауды насихаттаушы нағыз қазіргі күнде қажеттілікті үндеуші. Аталған шараға Аудандық маслихат хатшысы Сопбеков Ғалымжан Жарқынбекұлы, Аудан әкімінің орынбасары Нуридинов Бектас, кент әкімі Ибрагимов Абдрасил, "AMANAT" партиясының Атқарушы хатшысы Мажитов Арман Әбілпейсұлы және аудан тұрғындары қатысты.Халқымыз әрқашан тату көршілікті жоғары бағалаған. Жақсы және жаман күндерде біз көршілерімізбен бірге иық тіресіп еңсеріп келгенбіз. Сондықтан «Алыстағы туыстан жақындағы көрші артық» және «Үй сатып алма, көрші сатып ал» - деген мақал-мәтелдер туындады. Қазақ халқы «Көршіні Құдай қосады» - дейді. Жаңа орынға көшіп келісімен ерулік беріп, қоныс тойын жасау дәстүрінде де ең әуелгі ниет – көрші қолаңдармен танысу болған. «Адам күні – адаммен» демекші, күнделікті өмірде әркім-ақ көршіні қажетсінеді. Өйткені, бір іс туып қинала қалғанда да, бір нәрсе қажет болғанда да, ең алдымен, көршілерден көмек сұрап жатамыз.Көршімен сыйластық – елдің сыйластығын, көршімен татулық – қоғамның татулығын ұқтыратындықтан, Ислам діні көршімен жарасымды сыйластықта болуға шақырады. Ұзақ жылдар бойы тұрып, бір-біріне жақын болған көршілер біртіндеп туыс болып кетеді. Тіпті тұрғылықты жері өзгерген кезде де, сүйіспеншілік байланысын үзбеуге тырысады. Нәтижесінде басқа іс түссе, қысылтаяң шақта, алыс-берісте, көмек пен жәрдем, қуаныш пен қайғыда, тіпті атқан таң мен батқан кеште бірінші куәгер болатын да көрші. Демек, жақсы көрші бола білу көңілдің әрін, тіршіліктің нәрін, өмірдің сәнін келтіріп, адам жанына шуақты сезім ұялатады.Міне осы мақсатта аудандық «АMANAT» партиясы көршілер арасында ел-жұртпен жарасымды сыйластық өмір сүруге деген құштарлықты арттыруда «ТazaLike» жобасын ұйымдастырды. Жобаның мақсаты көршілер арасындағы татулық құт екенін, жақсы көрші тынысың екенін насихаттау. Ендеше бүгін осы жоба аясында байқауға қатысуға ұсыныс білдірген 10 көше арасындағы тартысты бәсеке өз мәресіне жетті.Жобаға қатысушы көшелердің мұқтаждығына қарай марапаты бар, тың идеяларды белге буып, тәуекел етуші бастама, ауызбірлікке, көршінің татулығына, еңбекке баулуға, салауатты өмірді шын көрсетуші жобаларды толық қуаттайды, әрі қолдауға дайын!!!қорытынды күннің бағдарламасында: - таза көше; - көгалды көше; - ұйымшыл көше; номинациялары бойынша ерекше мотивация қойылып отырған жоба.Расымен де, осындай игі жобалардың дәстүрлі түрде өтіп тұруы керек-ақ. Өйткені, адам – табиғаттың төл перзенті. Міне, көктем де келді.Табиғаттың оянуы қардың еруімен, құстардың жылы жақтан ұшып келуімен және бәйшешектердің алғашқы гүлдеуімен жалғасады. Осы кезде қыстың аяқталғанын білдіргендей қардың астынан қыс бойы жиналған қоқыс қылаң беріп, кенттің сәнін кетіреді. Сондықтан да көктемнің алғашы айларында тазалық жұмыстары кеңінен жүргізіледі.«Тазалық – саулық негізі, саулық – байлық негізі» деген тәмсілдің астарында қаншама мән-мағына бар десеңізші. Тек, ісіміз бен сөзіміздің үйлеспей тұрғаны көңілге қаяу салады. Өткен жұма күні Қорасан ата көшесін бойлап келе жатып, шашылған қоқыстарды, желмен ұшып жүрген қызылды-жасылды пакеттерді көзім шалды. Ұяласың! Сенбі күні қайта орталыққа бет алып едім, айнала мұнтаздай тап-таза, көз сүйсінеді. Өйткені кентте кезекті сенбілік өтті. Аудан көлемінде жүргізілген қызу тазалық жұмысына барлық мекеме қызметкерлері жұмылдырылды. Бұл – керекақ! Бірақ тазалық кент тұрғындарына емес, мемлекеттік қызметкерлерге ғана керек сынды. Осы сенбілікте көкейге осындай ой қонды. Апта сайын өткізілетін сенбілік шарасы тұрғындардың табиғатқа деген жанашыр қарым-қатынасын қалыптастыруға және кенттің санитарлық жағдайын жақсартуға бағытталып-ақ келеді. Себебі қоршаған ортаның тазалығына жауапкершілікпен қарау – әрбір азаматтың басты міндеті. Тазалық табалдырықтан басталады десек, кенттің келісті келбетінің ажарын ашатын тек сәулетті ғимараттар мен жасыл-желек жамылған гүлзарлар ғана емес, бірінші кезекте, оның тазалығы. Шыны керек, ала жаздай қоқыспен алысып, күзде қайта ластанған кейіпке енетініміз рас. Оның міндеті мен ауыртпалығын тазалық мекемесі мен жауапты қызметкерлерге ысырып тастау қисынға келмейді. Әрине олардың бұл тікелей міндеті шығар, бірақ әрбір тұрғын туған өлкеге жанашырлық танытуы тиіс емес пе? Ортақ істе бөле-жарылмай, міндетті жауаптыларға ғана арқалатпай, кент тазалығына тұрғындар болып ортақтасатын кез келді. Еш болмаса үй сырты мен аула тазалығына мән берсек, мүмкін болса көшеге де көз қиығын тастап қою нағыз азаматтық іс болар еді. Бұл сөзімізді кент әкімінің орынбасары Жасұлан Бейсенбиев те қуаттай түсті: – Кенттің тазалығын ұдайы қадағалап, тиісті жерлерге жауапты адамдарды белгілеп, тұрғындарды бір кісідей тазалықты сақтауға шақыру керек. Осындай нақты іске көшетін болсақ, ауданымыз көркейе береді. Ол үшін мекеме мамандары мен көше комитеттері бірлесе жұмыс істесе деген тілегіміз бар. Өздеріңіз де білесіздер, кент келбеті көркейіп, көшелер кеңейтіліп, орташа жөндеуден өтіп, жарықтануда. Кент тазалығы бірдің емес, көптің ортақ міндеті.

Жаңақорғанда  "Тaza - Like" жобасы қорытындыланды

<a href="https://kyzylorda-news.kz/">Kyzylorda-news.kz.</a> Жалағаш ауданының әкімі Есжанов Асқарбек Темірбекұлы Жалағаш аудандық полиция бөлімі жергілікті полиция қызметі бөлімшесінің бастығы, полиция майоры Ержан Абдрамановты қабылдады.Аудан әкімі қызметтік міндетін адал атқарып, жанқиярлық ерлік көрсеткен, адам өміріне араша болған Ержан Абдрамановқа Жалағаш ауданының “Құрмет грамотасын” табыстады.Еске сала кетейік, Жалағашта суға батып бара жатқан тұрғынды &nbsp;<a href="https://kyzylorda-news.kz/kogam/nurlybek-naelibaev-oez-khyzmetine-adaldyghy-ueshin-alghys-ajtamyn-06-06-2023">полиция қызметкері құтқарып қалған</a> болатын.

Жалағашта суға батып бара жатқан тұрғынды құтқарған полицейге «Құрмет грамотасы» табысталды

<a href="https://kyzylorda-news.kz/">Kyzylorda-news.kz.</a> Қармақшы ауданының әкімі Жандос Еркінбек Президент Жарлығы аясында Жосалы кентінің халқымен кездесті.Кездесу барысында аудан басшысы ауданның әлеуметтік-экономикалық дамуы бағытында атқарылып жатқан жұмыстардың жайын баяндап, алдағы жоспарларымен бөлісті.Сондай-ақ, биыл аймақ басшысының қолдауымен Жосалы кенті бойынша ауқымды 33 жоба республикалық, облыстық бюджет көздері арқылы қаржылай қолдау тапқандығын айрықша атап өтті.Қазіргі уақытта «Ауыл – Ел бесігі» жобасы аясында Орталық аурухана ғимаратына күрделі жөндеу, «Шипагер» емханасы үшін блоктық модульдік қазандық салу, 15 көшеге орташа жөндеу, 10 көшені жарықтандыру және 2 көшеге жарық шамдар бағаналарын орнату жұмыстары жүргізілуде.Сонымен қатар, облыстық бюджет есебінен Жосалы кентіндегі дене шынықтыру-сауықтыру кешені пайдалануға беріліп, аталған ғимараттың бу қазандығын табиғи газге ауыстыру, Шығыс және Мырзағалиев көшелерінің қиылысынан №16-ТВ, "Қазақ хандығына 550 жыл" аллеясы аумағынан №17-ТВ, Сегізов және Төлеуов көшелерінің қиылысынан №18-ТВ, Нұртай және Ораз ахун көшелерінің қиылысынан №15-ТВ техникалық су ұңғымаларын бұрғылау жұмыстары атқарылуда.Одан бөлек, №21«Тоғжан» бөбекжай балабақшасының қазандық ғимаратының құрылысына, №284 мектеп лицей-интернат ғимаратына спорт зал құрылысына, №27, №121 орта мектептерінің жылу қазандығын газ отынына қайта жабдықтау үшін ЖСҚ әзірлеу, сараптамадан өткізу үшін тиісті қаржылары бөлінді.Кездесу соңында аудан басшысы тұрғындардың ұсыныс-пікірлерін тыңдап, айтылған мәселелердің алдағы уақытта кезең-кезеңімен шешу жолдары қарастырылатынын жеткізді.<img src="https://knadmin.beoblood.kz/uploads/352360088_2379805205520226_3490024135542311876_n_0919354ae3.jpg" alt="352360088_2379805205520226_3490024135542311876_n.jpg">

Қармақшы ауданының әкімі кент тұрғындарымен кездесті

<a href="https://kyzylorda-news.kz/">Kyzylorda-news.kz.</a>&nbsp;8 маусым күні Қазақстан Республикасының Денсаулық сақтау бірінші вице-министрi Тимур Сұлтанғазиев Қызылорда облысының халқымен кездесу өткізіп, азаматтарды жеке қабылдайды.Қызылорда облысының халқымен кездесу 8 маусым сағат 15:30-да, ал азаматтарды жеке қабылдау сағат 17:00-де өтеді.Жеке қабылдауға жазылу үшiн сағат 09:00-19:00 аралығында 8-771-134-68-05 байланыс номерiне хабарласу керек.

ҚР Денсаулық сақтау бірінші вице-министрi қызылордалықтарды жеке қабылдайды

<a href="https://kyzylorda-news.kz/">Kyzylorda-news.kz.</a>&nbsp;Атмосфералық фронталды бөліктердің өтуімен еліміздің басым бөлігінде тұрақсыз ауа райы күтіледі, соған байланысты найзағай мен өткінші жаңбыр, солтүстік-батыста қатты жаңбыр жауады, деп хабарлайды Қазгидромет.Тек республикамыздың батысында, оңтүстігінде, шығысында жауын-шашынсыз ауа райы сақталады. Республика бойынша желдің күшеюі сақталады, оңтүстік-батыста, солтүстік-батыста бұршақ, батыста шаңды дауыл күтіледі.Павлодар, Абай, Шығыс Қазақстан облыстарының солтүстік-батысында өте қатты ыстық болады.Ақмола, Түркістан, Солтүстік Қазақстан, Павлодар, Қарағанды, Ұлытау, Шығыс Қазақстан, Абай, Қызылорда, Жамбыл облыстарында, Ақтөбе облысының оңтүстігінде, шығысында, Қостанай облысының оңтүстік-шығысында қатты ыстық сақталады, Алматы және Жетісу облыстарыңда қатты ыстық күтіледі.Қызылорда, Маңғыстау, Жамбыл, Ақмола, Солтүстік Қазақстан, Павлодар, Қостанай, Қарағанды, Ұлытау облыстарында, Атырау облысының солтүстігінде, шығысында, Абай, Шығыс Қазақстан облыстарының солтүстік-батысында, Ақтөбе облысының батысында, оңтүстік-шығысында, Алматы және Жетісу облыстарының солтүстігінде төтенше өрт қаупі сақталады.

Архив