<a href="https://kyzylorda-news.kz/">Kyzylorda-news.kz.</a> Жақсылық жасау – жүректің ісі. Қысылғанға қол ұшын беріп, қиналғанның жанына желеу болу әр адамның қолынан келеді, тек ниет болса болғаны. Қайырымдылық қайырлы іс. Осы жолды таңдап, талайдың сауабын арқалаған Қазалыдағы «Сауаптан құр қалмайық» қайырымдылық қорының әрекеті көпге үлгі. Бүгінде аты жұртшылыққа етене таныс қордың қызметі мен алдағы жоспары туралы төрағасы Мақсұт Мұратұлыннан сұраған едік.– Мақсұт Мұратұлы, қор қашан құрылды. Бұл бастамаға кім түрткі болды?– Жалпы қор 2021 жылы ақпан айында құрылды. Осы уақытта қолымызға заңды құжаттарын алдық. Бірақ 2018 жылдан бастап сауапты іс жасап келеміз. «Оң қолың бергенді, сол қолың білмесін» дейді ғой. Жарияға жар салуды қаламадық. Ең алғаш аудандағы бір нысанның ішкі жұмыстарына күрделі жөндеу жүргіздік. Өзім бастап, жігіттердің басын құрап, қаражат жинастырдық. Сөйтіп, нысанның жаңаруына себепкер болдық. Содан кейін маған: «Неге қаражат жинап, мұқтаж отбасыларына қол ұшын созбасқа?» деген ой келді. Міне, осы ойды жүзеге асырып, содан бері жақсы амал жасауды жалғастырып келеміз. Бізбен бірге жақсылық жасауға ұмытылып жүрген баршаға алғысым шексіз.– Көпшілікке қордың аты тарқатып айтпаса да түсінікті болар. Дегенмен өз аузыңыздан естісек…– Сауап – жөн, шын, лайық деген мағынаға саяды. Ислам дінінде жасалған игілікті іс үшін Алла тағала тарапынан берілетін сый. Ислам парыздарын орындау әр мұсылманның міндеті. Міне, осындай жақсылық жасаудан, сауап жинаудан құр қалмайық деген ниеттен туған болатын.– Ең бірінші кезекте кімдерге көмек беріледі?– Көп балалы, асыраушысынан айырылған жандарға, мүмкіндігі шектеулі, тұрмысы төмен отбасыларына, жалғыз басты қарттарға, ата-анасынан айырылған балаларға, жалғыз басты әкелерге көмек көрсетеміз. Кезектілігі әр кезде әр қалай, жағдайға байланысты болады.– Қанша отбасыға баспана сыйлап, бақытқа бөледіңіздер?– Осы кезге дейін Әйтеке би кенті мен Абай, Жанқожа батыр ауылдарынан төрт отбасыны баспаналы қылдық. Бірін салсақ, енді бірін сатып әпердік. Мұқтаж жандарды дәрі-дәрмек, азық-түлік, киім-кешекпен қамтамасыз ету күнделікті жұмысымыз. Үйден бөлек, алты шаңыраққа көгілдір отын кіргізіп, барлық құжаттарын дайындап бердік.– Алдағы жоспарларыңызбен бөлісе отырсаңыз…– Осы жылы он үйге көгілдір отын құрғызып беруді жоспарлап отырмыз. Қанша қаражат кететіндігінде есептеп, шығарып қойдым. Енді осыған қарай әрекет етеміз. Президент Қасым-Жомарт Тоқаев атаған «Жаңа Қазақстанды» бірге құруға атсалысуды жөн санаймыз. Әр адам қолынан келгенше жаңаруға, жаңғыруға ұмтылса, кез келген қиындықтың күрмеуі табылады. Ер азаматтар барда әйел-аналар, қарындастарымыз, жетім-жесірлеріміз көшеге шығып, көмек сұрамауы керек. Осы орайда баршаны қайырымды болуға шақырамын. Табысыңды түгелдей садақаға бер деуден аулақпыз. Тек бір бөлігін беріп отырса жеткілікті. Реті келіп тұрғанда айтайын, бұрынғы «Наурыз» театрының ішінен арнайы офис ашылды. Бізді сол жерден табасыздар. Аудан жігіттерін бірлесіп жұмыс істеуге шақырамын.– Қордың құрамына кімдер кіре алады?– Қазір менімен бес адам бар. Олар Талғат Ембергенов, Жарылқасын Ділімбетов, Рауан Нұрбаев, Сердалы Ықыласов. Қордың мүшесі болмай-ақ кез келген адам өз көмегін бере алады. Мүше боламын деушілерге ешқандай қарсылық жоқ.– Сұхбатыңызға рахмет!

Мақсұт Қарымсақ, «Сауаптан құр қалмайық» қайырымдылық қорының төрағасы: Жақсылық – жанды жадыратады

<a href="https://kyzylorda-news.kz/">Kyzylorda-news.kz.</a> Қазалы ауданы әкімінің орынбасары Дәурен Тілеумбетов ауданның батыс беткейіндегі тұрғындармен кездесіп, ұсыныс-пікірлерін тыңдады.&nbsp;Басқосуда Дәурен Оңғарбайұлы аталған аумақ жастарының жуырда ғана ауызбіршілікпен ауқымды шараны өткізгенін айтып өтті. Сондай-ақ, татулықты ту еткен тұрғындардың бірлігіне ризашылығын білдірді.&nbsp;Сонымен қатар аудан әкімі Мұхтар Оразбаевтың тапсырмасына сәйкес жастар арасындағы құқық бұзушылық пен топтық төбелестің алдын алу бойынша арнайы топтардың рейд жұмыстарын жүргізіп жатқанын тілге тиек етті.Оған қоса мемлекет тарапынан жастарға берілетін несие аясында, «Ауыл аманаты» жобасы туралы және өскіндердің әскерге баруы жөнінде түсіндірме жасады.&nbsp;Мұнан соң жастар өздерінің талап-тілектерін жеткізіп, түрлі сауалдар жолдады. Әрбір сұрақтарға жеке-жеке тоқталған аудан әкімінің орынбасары барлығы уақытымен шешім таба беретінін айтты.Ағайынды ауызбіршілікке шақырып, көпшілікті ортақ мекеннің гүлденуіне біркісідей атсалысуға үндеген Дәурен Тілеумбетовті тұрғындар құптай кетті. Оның айтқан әрбір сөзін зер сала тыңдап, мемлекет тарапынан жастарға көрсетіліп жатқан қолдаулардың жыл санап артып келе жатқандығына тұрғындар ризашылық білдірді

Қазалы ауданы әкімінің орынбасары тұрғындармен кездесті

<a href="https://kyzylorda-news.kz/">Kyzylorda-news.kz.</a> Қазалы ауданын қазыналы деп бекер атамаса керек. Қасиетті жердің әр сай саласы шежіреге тұнып тұр. Киелі топырақта дүниеге келіп, батырлығымен, шешендігімен, әулиелігімен ел арасында өзіндік орнын алған ерекше жандар көптеп кездеседі. Олар мықтылығын қай кезде де дәлелдей білген. Жауға қарсы айбаты мен дауға қарсы тұрар от ауызы, қиындыққа төтеп берер намысы болған. Соның бірі – елдің береке-бірлігін ойлаған Құттыбай би Сыр бойындағы тарихи тұғырлы тұлға деуге әбден лайық. Халқымыз елдің туын көтерген ерлердің ерек істерін, би-шешендердің өнегелі жолын аңыз қылып ұрпақтан-ұрпаққа жеткізіп келеді.Құттыбай Ақболұлы шамамен 1807 жылы туып, 1900 жылы дүниеден өткен. Ол жасынан зерек, алғыр болған. Өз заманының атақты биі, әрі батыры атанған.1848-1856 жылдардағы Жанқожа Нұрмұхамедұлы бастаған Сыр бойы қазақтарының отаршылдыққа қарсы күресіне қатысқан. Жанқожа баба Құттыбай бидің әділдігіне бас иген екен. Ел аузындағы әңгімеге сенсек, Жанқожа батыр бітпейтін даулар мен шағымдарды шешуге Құттыбай биді жіберіп отырған. Халық та қара қылды қақ жарған өткірлігі мен әділдігіне сай оны аузы дуалы би деп дәріптеген. Сыр бойына қоқандықтар мен хиуалықтар өктемдігін жүргізіп тұрған шақта Құттыбай би ел билігіне араласады. Он сегізінші ғасырдың жиырмасыншы жылдарынан бастап Сыр бойы мен Арал теңізінің шығыс жағалауын мекендеген қазақ руларына өз үстемдігін орната бастаған Хиуа, Қоқан хандықтары езгіні күшейтті. Бұл кезде Құттыбай би елден алым-салық, зекет жинау кезіндегі асыра сілтеушілікті, жер бөлісіндегі теңсіздікті ақыл-ойымен, көсемдігімен халықтың көңілінен шығатындай шешіп отырған. Кейде дұшпандардың зорлық-зомбылықтарына шыдамай бетпе-бет қарсыласқан. Сырттан келген ел билеушілерінің күшінің басымдығынан тайсалмастан турасын айтып, әділ төрелік еткен. Мұндай өжет іс-әрекеттеріне қарап, халық Құттыбайды би, батыр, тентек жігіт деп атаған.Халық аңызына сенсек, Құттыбай би жылқы айдап жүріп, Қыдырды үш рет көрген. Билігімен қоса онда төрт түлік малдың жиналып, байлықтың иесі болуы оның Қыдырды көргенін растаса керек. Малының есебі болмаған көрінеді. Жылқы 15 мыңнан асқан. Құттыбай Ақболұлы талай дауды даулап, төрелігін айтқан. Үш адамға құн төлеген. Екі адамға мал айдап берген. Сыр бойындағы елдің барлық түйткілді мәселелерін бітістіріп отырған.Деректерге сүйенсек, Құттыбай би 1897 жылы 90 жастан асқан шағында әкесі Ақбол бидің құрметіне өздерінің ата қонысы ежелгі Жанкент қорғанының іргесінен 5-6 шақырым қашықтықта күмбезді ескеркіш-кесене тұрғызған. Оны салдырған кезде 70 биені байлап, сүтін сауып, саз топырақты биенің сүтіне илеп, сексеуілдің шоғына күйдіріп, 23 түрлі үлгіде қыш кірпіш дайындаған. Ал кірпішті күйдіретін шеберханасы кесененің қасында болған деседі. Мазардың ішіне 7 адам жерленген. Бейітті салдырғаннан кейін үш жылдан соң 93 жасында дүниеден озып, денесі кесене ішіне қойылған.Кесенені 1980 жылы Казпроектреставрация институты XVIII-XIX ғасырда тұрғызылған республикалық санаттағы сәулет ескерткіші есебінде тізімге алған. 2010 жылы тарихи-мәдени нысанға қайта жаңғырту жұмыстары жүргізіліп, көне дәуір келбетінің айқын белгісі ретінде сақталуда.

Қыдыр көріп, дәулет дарыған би

<a href="https://kyzylorda-news.kz/">Kyzylorda-news.kz.</a> «AMANAT» партиясының сайлауалды бағдарламасына енген негізгі жобалар партиялық бақылауға алынып, партиялық бекеттер орнатылған. Қызылорда қаласында қазіргі таңда дәл осындай 4 нысанда партиялық бақылау бекеті жұмыс жасайды. Солардың бірі – өңіріміз үшін маңызы бар Қызылорда су торабы.Бүгін партияның облыстық филиалының төрағасы Наурызбай Байқадамов, облыстық партия филиалының партиялық бақылау комиссиясының төрағасы Нұркен Бақытбекұлы және қалалық мәслихаттағы «AMANAT» партиясы депутаттық фракциясының мүшелері стратегиялық нысанның құрылыс жұмыстарнына бақылау жасады.Су торабының құрылысы 2020 жылы күз мезгілінде басталды. Смета бойынша қаржы көлемі 2 миллиард 600 миллион теңге. Қазіргі таңда негізгі құрылыс жұмыстары аяқталған. Су торабының екі арнасы жұмыс жасауда. Сонымен қатар, алдағы уақытта су торабының автокөлік көпірін нығайту жұмыстары жүргізілмек. Жоба осы жылдың төртінші тоқсанына дейін аяқталып, толық пайдалануға берілмек.Зерделеу жұмыстары барысында партияның облыстық филиалының төрағасы Наурызбай Байқадамов партиялық бақылау жұмыстарының негізгі мақсаты бөлінген қаржының мақсатты игерілуі мен құрылыстың сапалы,мерзімінде аяқталуын пысықтау екенін айтты.<blockquote>«AMANAT» партиясының сайлауалды бағдарламасын іске асыру бойынша арнайы жол картасы бекітілген. Бағдарламада қамтылған жобаларға республикалық және жергілікті бюджеттен қаржы қаралып отыр. Биыл аймақ басшысы Нұрлыбек Нәлібаевтың ықпалымен облыс бюджеті 600 миллиард теңгеге жетті. Бұл өте қомақты қаражат және өңірдің экономикалық тұрғыда дамуына үлкен әсер ететін сөзссіз. Дегенмен негізгі мәселе осы қаржы жұмсалатын жобалардың сапалы, тиімді іске асуын қадағалау. Себебі бізде кейбір мердігерлер мемлекеттік сатып алу арқылы заңға сәйкес тендер ұтып алады. Бірақ, жұмыс барысында оның материалдық, техникалық мүмкіндігі жетпей, бағаның да өзгеруін сылтауратып, көптеген жобалардың аяғын сапасыздыққа әкеп соқтыруда. Бұл тұрғыда құқық қорғау органдары да өз тарапынан тиісті шараларды жүргізуде. Халықтың игілігіне бағытталған ортақ іске «AMANAT» партиясы да бақылау жұмыстарын жүргізуде. Себебі кішкентай кемшілік өңірімізге үлкен зиян келтіреді. Сондықтан, бақылау жұмыстары жыл көлемінде жалғаса беретін болады», – деді партияның облыстық филиалының төрағасы.</blockquote>

Қызылорда су торабының құрылысы партия бақылауында

<a href="https://kyzylorda-news.kz/">Kyzylorda-news.kz.</a> Қазалы ауданының аумағы кие мен сырға тұнған шежіреге бай жер деп айтуға негіз бар. Қасиетті мекеннен небір шайыр, қара қылды қақ жарған би-шешендер, елді ерлік-айбатымен тамсантқан батырлар шыққан. Олар жайлы аңыз-әңгімелер бүгінге дейін халық санасында жаңғырып тұр.Солардың қатарына Ақтан Ақайұлын қосуға болады. Тарихи жазбаларды қарасақ, ол шамамен 1770 жылы туылып, 1854 жылы көз жұмған. Халықтың сүйікті батыры Қаракесек руынан шыққан. Жанқожа батырдың үзеңгілес серігі, Хиуа, Қоқан бекіністеріне жасалған жорықтарға қатысқан. Қазіргі Қызылорда облысының Қазалы ауданы Арықбалық ауылында (бұрынғы Қазақстанның қырық жылдығы совхозы) дүниеге келген. Батырдың бейіті Ақтөбе облысы, Шалқар ауданы, Берсүгір бекетінен батысқа қарай отыз-отыз бес шақырым жердегі Мұғалжар тауының баурайындағы «Тебенсай» алқабында орналасқан. Осы зиратқа Ақтан батырдың інісі Шортай да жерленген. Он тоғызыншы ғасырдың жиырмасыншы жылдарынан бастап, Сыр бойы мен Арал теңізінің шығыс жағалауын қоныстанған қазақтарға өз үстемдігін жүргізе бастаған Хиуа, Қоқан хандықтары 1830-1840 жылдары жергілікті халыққа өктемдігін одан әрі күшейтті. Хиуа хандығы Жаңадария, Қуаңдария, Қызылқұмнан өтіп, Қосқорған, Арал теңіздеріне дейінгі аралықтағы Сыр бойындағы қазақтарға ұдайы шапқыншылық жасады. Қаныпезерлер олардың малын барымталап, әйел, бала-шағаларын тұтқындап отырды. Қоқандықтар шекара бекітіп, әкімшілік құрды.&nbsp;1817 жылдан бастап салына бастаған бекіністерінен жасақ шығарып, бейбіт елге шабуылдап, алым-салық жинап тұрған. Осындай зорлық-зомбылықтан жапа шеккен қазақтар, жастайынан әділдігімен, батырлығымен елге танымал болған Жанқожаның төңірегіне топтасады. Сыр бойы қазақтарының Хиуа, Қоқан хандықтарының езгісіне және Ресей отаршыларына қарсы ұлт-азаттық көтерілісінің басшысы Жанқожа батыр Ақтанмен бірге көне Жанкенттің жанындағы Хиуа бекінісі Жаңақаланы тас-талқан етеді.Деректер бойынша, бұл оқиға 1842 жылы болған. Жаңақаланы алардағы ұйымдастырушылығы мен жанқиярлық батырлығы үшін халық Ақтан Ақайұлын бүгінгі күнге дейін қазақтың қайсар батырларының бірі деп біледі.Сондай-ақ, осы жылдың қазан айында Хиуа хандығының Сыр бойы қазақтарынан ұшыр, зекет жинауға қойылған найыбы Бабажан сарттың көне Жанкент шаһарының маңындағы бекінісі Бесқаланы аларда айрықша ерлік көрсеткен. Ақтан батыр бастаған қазақ сарбаздары қамалды қоршауға алып, Бабажанды қолға түсіріп, Жанқожа батырдың үкімімен жазалаған.1997 жылы Ақтан бабаға сапалы кiрпiштен халықтың күшiмен Ақтан батыр ауылында ескерткіш-кесене тұрғызылды. Халқымыздың тәуелсiздiгi жолында ел-жұртын жаудан қорғаған жолбарыс жүректі батырлардың бiрi – Ақтан Ақайұлын халық әулие санап, пiр тұтады. Мамандардың айтуынша, Ақтан батыр кесенесi орналасқан архитектуралық ескерткiшіне арнайы қорғау аймағы белгіленген. Ақтан өз заманында Жанқожа батырдың досы, үзеңгiлес жолдасы, қарулас серiгi болған. Халқын қорғау үшiн Ақтан Сырда жүрсе, Жанқожа Қырда жүрген. Ақтан батыр атақты Жақау батырдың шөбересі. Батырдың атасы Сыр өңірінде он сегізінші ғасырда өмір сүрген. Жанқожа батыр жорыққа шығарда әрдайым Ақтанмен ақылдасып отырған деседі. Ақтан батыр жауға аттанар шақта аспанды бұлт торлап, дауыл тұратын көрінеді. Артынша найзағай ойнап, жауын құйған. Осы қасиетіне байланысты жергілікті халық оны «бұлты бар батыр» деп атаған.Елім деп еңіреген батыр сексен төрт жасында қайтыс болған. Бүгінде бұрынғы Арықбалық елді мекеніне Ақтан батырдың есімі берілген.

Қазалы: Кие мен сырға тұнған мекен

<a href="https://kyzylorda-news.kz/">Kyzylorda-news.kz.</a> Қазалы ауданына қарасты Бозкөл ауылында жұмбағы толық ашылмаған, талай тылсым сырды жасырған киелі ұстахана бар.Темірден түрлі туынды мен зергерлік бұйым жасалатын киелі ұстахана Жәлен Ерімбетұлына тиесілі. Ол кісі ел аузында «Жәлен ата» деп аталып кеткен. Құпия сырды бүккен ұстахананың иесі 1902-1982 жылдары өмір сүрген.Бозкөл ауының тұрғыны, ұста Мінәжат Қаниевтің айтуынша, Жәлен жастайынан ұсташылық өнерді меңгеріп, Анарбек Елбесбайұлының балға ұрушысы және шәкірті болған.&nbsp;<blockquote>«Келе-келе Жәкеңнің қолының ептілігі, шеберлігі Анарбек ұстаға ұнаған көрінеді. Анарбектің Нәжау, Махан деген екі баласы болған. Екеуі де әкесіне жуымай, «қара дүкенге» ие болып қалуға ыңғай танытпапты. Сонымен, «қара дүкен» Жәлен атаға бұйырып, алтын-күмістен әшекей бұйымдар, ол ат әбзелдерін жасайтын зергерге айналады», - дейді Мінәжат қария.</blockquote>Жәлен ұста қайтыс болғаннан кейін ұстаханаға баласы Сахит иелік қылған. Ол да асқан шебер, зергер адам болған.<blockquote>«Ол кісінің жасаған бұйымдары қазіргі кезде мұражайларға қойылып, көпшіліктің назарына ұсынылған. Сахит ағамыз көзі тірі кезінде әкесі Жәлен әулие жатқан ауылдың батысындағы «Алдамжар» бейітінің қасынан орын алып, Жәкеңе зиярат етіп келгендерге арнап, түнеухана салды. Жанында су сақтайтын құдығы, сарайы, ас әзірлейтін шайласы бар. Тағы бір арнайы бөлмеге Жәкең тұтынған қара дүкеннің құралдары қойылған. Бөлменің есігінің маңдайшасында «Аманат» деген жазу бар. Ол жазуда айтарлықтай мағына жатыр. Себебі, Аманат - Сахиттің кенже баласының аты. Келешекте «қара дүкенге» ие болатын ата жолын ұстайтын осы бала болады-ау деген үлкен үміт артқан болуы керек», - дейді Мінәжат Қаниұлы.</blockquote>Оның айтуынша, Сахиттың болжамы, ойлаған арманы дәл келіп, бүгінде Аманаты қара дүкенге ие болып, әкесінің жолын қуды. Тараған аңызға қарағанда, Аманат ұста Жәлен атасының көзіне жанары қып-қызыл от болып жүретін бір үйір жылқы мен жылан көрінеді-міс. Ол жыланды әкесі Сахит көрген екен дейді.<blockquote>«Біздің үйге ішімдік ішкен адам келсе, алдынан ұзын қара жылан атып шығып, ысылдап тұрып алады деген аңыз ел арасында тарап кеткен. Кезінде сол кереметті көрген адам әп-сәтте талып та қалатын жағдайлар болады екен. Ұстахана ісін бізге тастауға болмайды, біздің мақсатымыз - киелі орынды таза ұстап, көрік басып, балға ұрып, төс соғу, сол арқылы елге қызмет қылу. Бұл «қара дүкеннің» ішінде адам болмаса да кей мезгілдері дүрсілдеген, тарс-тұрс еткен дауыс шығып жатады», - дейді Аманат.&nbsp;</blockquote>Сонымен қатар, Жәлен ұстаның немересі Ләззат Жәленованың айтуынша, атасының ұстаханасы «пері аунаған» жерге салынған-мыс.<blockquote>«Ұсталардың жұмыс орынын халық «қара дүкен» деп атайды. Атам әруақ қонған кісі. Жын-перілерді жұмсайтын болған. Қалың қамыстың арасына бір қолы жоқ болса да өзі кіріп кетіп, пішен шөбін орады екен. Сонда оған перілер көмектесетін көрінеді. Расында, көрік басатын ұсталық өнер кез келген жанға бұйыра бермейтін киелі іс қой. Атамыздың бір қолы болмаған, соған қарамастан шебер ұста болған. Темірден түрлі бұйымдарды жасап шығаратын. Зергерлік өнімдері де өте әдемі», - дейді Ләззат Жәленова.</blockquote>Жәлен ата да, оның баласы Сахит ұста да өмірден өткенімен, «қара дүкеннің» киесі жойылған жоқ.

Қазалыдағы «қара дүкен» киесі

<a href="https://kyzylorda-news.kz/">Kyzylorda-news.kz.</a> Қазақта «Диқанның қазынасы – жер» деген даналық сөз бар. Расында бастаған кәсібіңнің нәсібін көру үлкен жеңіс, зор еңбек. Қысы-жазы тынбай еңбек етушілер де сол диқандар. Сондай, еңбекқор, өз еңбегінің жемісін адалынан көріп жүрген азаматтардың бірі – ақмаялық Исабек Уәділ.Сонау 1976 жылы мектепті бітіре сала егін даласындағы еңбекке араласқан ол 1977-1979 жылдары әскер қатарында болып, азаматтық борышын өтейді. Ауылға келген соң қайтадан совхоз жұмысына араласады. Алғашқыда күрішші, одан соң механизатор болып жұмыс істейді. Ал 1982 жылдан бастап И.Ташкенбайұлы шаруашылықта көлік жүргізуші болып қызмет етеді. Жастайынан еңбекке ерте араласқан Исабек Уәділ шаруашылықта жүріп шыңдалды. Кейіннен ауылдағы май шығаратын цехта, одан соң май құю бекетінде еңбек етіп, зейнетке шықты.Зейнетке шықты демесең, Исабек Ташкенбайұлы үшін нағыз еңбектің қызған шағы осы кезеңде басталған еді. Себебі інісі екеуі 2017 жылы «Ерназар» атты шаруашылық құрып, отбасылық кәсіпті жүргізе бастайды. Ал биыл диқанның кіші ұлының атымен «Абай» шаруа қожалығы құрылып, егіншілік еңбектің ауқымын арттырды.<blockquote>«Қырық жылға жуық совхозда жұмыс істедім. Зейнетке шыққан соң жеке шаруашылықты жандандырып келеміз. Бүгінде ұлдарым «Абай» шаруа қожалығын құрып, еңбек етіп жүр. Өзіммен бірге оқыған бір құрдасым күрішке қарайды. Басы-қасында өзім де боламын. Шүкір, шаруашылықта төрт ұлымнан артылар тірлік жоқ», – дейді ардагер диқан.</blockquote>Көктемнің алагеуім таңынан бастап күзгі салымға дейін дала төсіне себілген Сыр маржанын күтіп баптау күрішшінің мойнындағы міндет. Ана баласын қалай әлпештесе, күрішші де атыз, алқаптағы ақ маржанын солай аялап, өсіреді. Бала кезінен егіннің жайын жақсы білетін Исабек балаларын да кішкентайынан жанына ертіп, адал еңбекке баулыған. Бүгінде «К-700», комбайн, трактор, КамАз секілді шаруашылыққа қажетті техникалар түгелдей өздерінен табылады. Барлығын тізгіндейтін өзінің ұлдары.Биыл олар 78 гектар аумаққа дән септі. Күздігүні өнімнің ырысты, мол болуынан үмітті. Ауыл шаруашылығы – ауыр шаруашылық. Күн астында маңдай тердің төгілуін талап ететін тірліктің машақатын Уәділовтар отбасы жақсы біледі.Кейіпкеріміз «Еңбек етпесең елге өкпелеме, егін екпесең, жерге өкпелеме» деген тәмсілді қаперде үнемі ұстайды. Таң бозарғаннан кетпенін иыққа артып, егістікке қарай тартып, тынымсыз еңбекке араласқан зейнеткер шаруаның бір күндік жұмысын көріп біз де марқайдық. Жас диқандарға үлгі болар арда азаматтың бойындағы қайтпас қайсарлығы мен байсалдылығы, жұмысқа деген құлшынысы оны алға жетелейді. Бастысы, жасы алпыстың асқарынан асса да бейнеттің бел ортасынан табылып жүргені қуантты. Исабек Ташкенбайұлының «Тірліктен қашпаңдар, қара жұмысқа күш-жігерлеріңді салыңдар, тынымсыз еңбек етіңдер» деп балаларын еңбекке қайрап отырғанының өзі үлкен еңбек.Бүгінде ұл-қыз тәрбиелеп, берекелі шаңырақтың тұтқасын ұстап отырған отағасы түйір нанның нәпақасы маңдай термен келетінін ұлдарымен қатар немерелерінің де санасына сіңдіріп келеді. Әке арманы да осы, ұлағатты ұрпақ тәрбиелеу.Нағыз диқан болу үшін тынымсыз ыждағат керек болса, ал күрішші болуда одан екі есе ынта керек, – дейді ақмаялық күрішші. Иә, әрбір дән диқан үшін тер тамшысы болып көрінетіні рас. Сондықтан ауыл шаруашылығы саласын өркендетіп, тынбай еңбек еткен, әсіресе оны отбасылық кәсіп ретінде дөңгелеткен жандар қашанда мақтауға лайық.

Еңбекке епті азамат

<a href="https://kyzylorda-news.kz/ru">Kyzylorda-news.kz.</a>&nbsp; Ел болашағының жарқын болуы әрбір отбасының шаңырағын шынайы қуаныш пен жылулыққа, махаббат пен мейірімге толтыратын өскелең ұрпақтың қолында. Осы себепті де балалардың құқығын қорғап, өмірлерін сақтандырып, оларға бақытты ғұмыр сыйлау арқылы ертеңгі күнге жетелеу – әр отбасы мен мемлекетіміздің жауапкершілігінде. Сондықтан жыл сайын балғын бүлдіршіндер үшін мерекеленіп отыратын ең атаулы қуанышты мейрамның бірі – 1 маусым –Халықаралық балаларды қорғау күні.Осы мереке биыл да аудан көлемінде кеңінен аталып өтті. Аудан әкімі Серік Сермағамбетов 1 маусым – Халықаралық балаларды қорғау күніне орай «Балықшылар» аллеясында ұйымдастырылған салтанатты іс-шараға қатысып, балаларды құттықтады.Алаңда бүлдіршіндерге мерекелік көңіл-күй сыйлау үшін «Біз – бақытты баламыз!» бағдарламасы мен арнайы фотозона жасақталған. Алдымен аудан басшысы балғын балапандардың қуанышына арналған шараларды көріп, спорт алаңында өткен ұлттық ойындарын тамашалады. Одан соң, мектеп оқушылары арасында өткізілген суретшілер байқауының қатысушыларымен кездесіп, жас өрендердің арман-қиялдарынан туындаған шығармашылық жұмыстарын тамашалады. Салтанатты шарада сөз алған Серік Сағитжанұлы:&nbsp;<blockquote>«Қымбатты балалар! Сіздерді 1 маусым – Халықаралық балаларды қорғау күнімен шын жүректен құттықтаймын! Біз сіздердің тәуелсіз еліміздің бейбіт аспанында бақытты өмір сүруі үшін жағдай жасауға барынша еңбек ететін боламыз. Бар жақсылықты балаларға арнауды мақсат тұтқан Президентіміз Қасым-Жомарт Кемелұлы Тоқаев халыққа арнаған әрбір Жолдауында балғын балаларымыздың болашағына аса мән беріп, өскелең ұрпақтың үйлесімді дамуы жолында оларға көрсетілетін қолдаулар мен көмектерді арттыруды міндет етті. Мемлекет басшысы өткен жылды Балалар жылы деп жариялағаны белгілі. Атаулы жыл ішінде аралдық балалардың игілігіне арнап ауданымызда 5 жеке балабақша, 6 спорт-ойын алаңы пайдалануға берілді. Сонымен қатар балғын бүлдіршіндеріміз үшін 2 ойын-сауық балалар орталығы ашылды. Бұл жұмыстар биыл да жалғасын тауып, жеке инвесторлар есебінен 4 заманауи үлгідегі балабақшаның құрылысы басталды. Президентіміздің тікелей қолдауымен «Жайлы мектеп» ұлттық жобасы шеңберінде алдағы 2023-2025 жылдары біздің өңірде жаңа талаптағы 10 мектептің құрылысы жүргізіледі. Биылғы жылы 2 білім ұясының құрылыс жұмыстары басталса, оның 1-еуі аудан орталығынан салынбақ. Ал келер жылы дәл сондай 2 оқу ордасы Арал қаласы мен Сексеуіл кентінде бой көтереді. Біз үшін бұл өмірде сіздердің балғын жүздеріңізден нұр шашып, бар ықыласымен риза болғандарыңызды көруден асқан бақыт жоқ», – деп ізгі лебізін білдірді.</blockquote>Кең көлемде ұйымдастырылған мерекелік шарада аудандық оқушылар үйінің талантты балалары ән мен жырдан шашу шашып, өнерлерін ортаға салды. Жас бүлдіршіндерден құралған би топтарының бұрала билеген билері мен балабақшаның бал тілді балапандарының риясыз көңілден шыққан өнерлері көпшілікті ерекше қуанышқа бөледі.Бұдан бөлек, алаңда «Балалардың игілігі үшін» атты республикалық акциясы аясында балапандарға тәтті балмұздақтар үлестірілді. Балалар арасында ұлттық спорт түрлері – асық ату, қол күрес пен арқан тартыс, батпырауықтар ұшыру, жебе ату сынды ойындардан сайыс өткізіліп, жеңімпаз және жүлдегер атанған оқушыларға марапаттар табысталды.&nbsp;Мереке қарсаңында балаларға аудандық мәдениет үйінде көркем фильм көрсетілімі мен «Балықшылар», «Тарихи-өлкетану» мұражайларына және «Ә. Нұрпейісов атындағы әдебиет үйіне» тегін кіру қарастырылған.Балақайларға ерекше көңіл күй сыйлаған тағы бір шара аудандық мәдениет үйінде шымылдығын түрді. Шаттыққа толы шырайлы мерекенің иісі сезіліп, мәдениет үйіне қарай ағылған адамның қарасы үзілмей, теңізге құйған дарияның арнасындай қосылып жатты. Әр перзентінің бақыты үшін барын беріп, солардың жетістігіне қуана білген ата-аналардан бөлек өз қатарластарының өнерін тамашалап, оларға қолдау білдіремін деген кішкентай балалардың көптігі мерекенің сәнін келтіріп, бейнесін айшықтай түскендей көрінді. Бірі құшағына қуыршақ қыса құшақтап, енді бірі гүл ала жүгірген балақайларды көрген мұндағы барлық адам өздерінің бала күніне сапар шегіп келгендей әсер алды.Бұл сахнадан тыс орын алған кереметтер еді. Ал сахна төріндегі аудандық "Әнші балапан" байқауы оларға тіпті өзгеше шырай алып келді. Өнерлі балалардың көркем биімен басталған байқауда алғашқы болып би номинациясы бойынша қаладағы балабақша тәрбиеленушілері өз өнерлерін ортаға салды. Барлығы бірдей киіммен шығып, мың бұралған қимылымен, өздеріне ғана жарасымды тәтті қылықтарымен көрермендерге түрлі қызық сыйлады. Олардың бұл әрекеттерінен уайымсыз шақ пен нағыз достық пейілді, алаңсыз балғын балалықты анық аңғардық. Бәсекеге түскен жандардай емес, өздерінің жан рахаттары үшін осындай сахнада өнер көрсеткендері көпшіліктің көңілін көтеріп тастады.Одан әрі тәтті тілдері балдан тәтті балақайлар мәдениет үйі сахнасын әсем әнге бөледі. Жанды дауыста жүрек үнін жұртшылыққа жеткізе білген бүлдіршіндерге қандай құрмет қылса да жарасып-ақ тұрғандай еді. Үлкен сахнаның төрінде еркін сезініп, өнерге өздерінің де таласы барын таныта алған қала балабақшаларының бүлдіршіндері мерекенің сәнін тіпті аша түсті.Бірақ жарыс бар жерде жеңіс те, жеңіліс те бар. Байқау шымылдығын түрген бишілер бәсекесінде «Балбөбек», «Алтын балық», «Балдырған», «Айгөлек» балабақшаларының тәрбиеленушілері ІІІ орын алса, ІІ орын «Мереке», «Сартай», «Нұргүлім» балабақшаларының еншісінде кетті. «Нұр -Ай» балапандары І орынмен марапатталса, бас жүлде &nbsp;«Қарлығаш» балабақшасының бүлдіршіндеріне табысталды. Ал ән байқауында "Толқын" балабақшасының қатысушысы Еркесұлу Жанұзақ, "Аялан" тәрбиеленушісі Бірханым Русланқызы, "Жазира" бүлдіршіні Раяна Төлегенқызы мен "Құлыншақтың" құлыншақтары Мансур Алпамыс пен Кәусар Бекжанқызы жүлделі ІІІ орынды иеленді. ІІорын "Шағаланың" өнерпазы Айнамкөз Арапханова, "Балдырғанның" әншісі Арсен Ерланұлы, "Мерекенің" тілі тәтті балақайы Інжу Сатыбалдыға бұйырса, "Қарлығаш" балабақшасының бүлдіршіні Айару Жаңаберген &nbsp;І орынды жеңді. Байқау жеңімпазы Асылай Мақсұт бас жүлдені «Алтынбалық» балабақшасына ала кетті.&nbsp;Сонымен қатар "Әнші балапанның" барлық қатысушыларына ойыншық таратылып, көңілдерін қуаныш кернеді.Мерекеге қатысты тағы бір тартымды шара аудандық өнер мектебінде жалғасын тапты. Көңілді балақайлардың өнер ордасына айналған мекемеде өнерпаз жастар балалар күнін жоғары деңгейде атап өтті. "Балалар дауысы" атты концерттік бағдарламада әсем ән мен көңілді би орындалып, термеден шашу шашылды. Ансамбльдің өнері де тамашаланып, балалардың жүзі бақыттан бал-бұл жанды.Ел болашақтарының мерейін өсірген мереке тәулік бойы жалғасты. Балықшылар аллеясынан бастау алған жоғарыдағы түрлі деңгейдегі шаралар аудандық мәдениет орталығы жанындағы демалыс паркінде қорытындыланды.Күннің аптабына қарамай өздеріне арналған мерекелік қуанышты сезіне білген бүлдіршіндер аудан орталығындағы демалыс саябағында да көп болды. Мұнда өткен «Бала – біздің болашағымыз» атты аудандық фестивальді тамашалады. Ашық аспан астында өткен фестивальде аудан өнерпаздары ұлттық жырдан шашу шашып, жас бүлдіршіндер мың бұрала билеп, өнерлерін жиналған жұртшылыққа паш етті. Осылайша балалардың бүгінгі төл мерекесі көңілді концертпен қорытындыланды.

Арал ауданында Балалар мерекесі ерекше аталып өтті

<a href="https://kyzylorda-news.kz/">Kyzylorda-news.kz.</a> Кезінде тағдырдың тәлкегіне тап болған біршама ұлт өкілдері, қуғын-сүргінге ұшырап, елінен, көшуге тура келді. Осы тұста кеңестің қызыл әскері айдап алып келген өзге ұлт өкілдері, қазақ даласын паналаған. Сол сәтте оларға кеңпейілділік, қонақжайлық пен қарапайымдылықтың төбесін көрсеткен қазақ еліне, барша ұлт сүйсінсе керек. Бүгінде бір ананың баласындай тату-тәтті өмір сүріп жатыр. Міне, Қадір Мырза Әли атамыз жырлаған нағыз қазақ осы болса керек.Кейін келе қазақ даласын паналаған өзге ұлттар саны арта түсті. Қазіргі таңда Қазалыдағы этностың жалпы саны 300 адамға жуықтайды.&nbsp;<blockquote>«Мен осы қасиетті Қазалы жерінде туып, топырағына аунап өскенмін. Кезінде Қазалы қала статусын алмас бұрын уезд болған. Сол уезд шағында ата-тегіміз келіп қоныстанған екен. Мен көшіп келген тумаларымның 5-ші ата ұрпағымын. Отбасымда күйеуім Абдухаким екеуімізден бір ұл және бір қызымыз бар. Сөйтіп өз кезегінде ұрпақ жалғасып, бүгінде екі баламнан бес немере сүйіп отырған жайым бар. Қазалысушар өндірістік учаскесінде инженер лауазымы бойынша жұмыс жасап жатқаныма биыл 39 жылға толып отыр. Әрине, қиын кезеңде қол ұшын созып, пана болған қазақ жұртына алғысым шексіз. Бірлігіміз жарасып, бір шаңырақ астында көптеген жылдар бойы тату-тәтті өмір сүріп жатқанымызға қуаныштымын. Осы орайда Қазақстан халқына ыстық ықыласым мен достық лебізімді білдіремін. Еліміз аман, жұртымыз тыныш болсын», - дейді өзбек ұлтының өкілі Гулором Журабаева.</blockquote><blockquote>«Мен 1986 жылы Қазалы қаласында дүние есігін аштым. Аталарым ертеректе осында қоныс тепкен. Қазір жұбайым Розамен үш ұл, екі қыз тәрбиелеп отырмыз. Еліміздің бар жетістігі мен жеңісіміздің мызғымас тұғыры – татулық пен тұтастық. «Бірлік бар жерде – тірлік бар», – дейді дана халқымыз. Қазақстан – түрлі ұлт өкілдеріне қиын-қыстау заманда құшағын жая қарсы алған еңселі ел, іргелі мемлекет. Қазақтардың ұлтшылдыққа, нәсілдікке бөлінбейтіні, бауырмалдығы қатты ұнайды. Әрқашан татумыз, доспыз және бір-бірімізбен етене араласа өмір сүрудеміз. Барлығымыз туған жердің төсінде, бейбіт елдің ішінде ел бірлігін сақтауға атсалысып, бірлікке өз үлесімізді қосуымыз қажет», - дейді татар ұлтының өкілі Аслан Гильмутдинов.</blockquote><blockquote>«Қазақстанға 1994 жылы Ресейдің Брянскі облысы, Клинцы ауданынан қоныс аудардық. Сөйтіп, Қазалы ауданы, Жалаңтөс баһадүр ауылына тұрақтап, Қ.Пірімов атындағы мектепте тәлім-тәрбие алдым. Кейін жоғары оқуды тәмамдап, Қазалы қаласына яғни, асан жұртына келін болып түстім. Қазіргі таңда екі ұлым, бір қызым бар», - дейді орыс ұлтының өкілі Наталия Баркова.</blockquote>Бүгінгі күні қалада №95-інші мектепте мұғалім болып жұмыс жасап жатырмын. Қаншама ұлтқа пана болған Қазақстанның кең шаңырағы астында көптеген ұлт өкілдері тұрады. Олардың бәрі бірдей таптырмас қасиеттерге ие. Осы елде біз – тату-тәтті өмір сүретін бір халықпыз.

Қазалы: Тату-тәтті өмір сүретін бір халықпыз

<a href="https://kyzylorda-news.kz/">Kyzylorda-news.kz.</a> Біздің екінші дүниежүзілік соғыстан кейінгі 1939-1945 жылдар аралығындағы ұрпақ көзімізді тырнап ашқаннан десек әбестік болар, мектептің жоғары сыныбында оқыған кітап пен газетке бауыр басқан тұста қолымыздан тастамай жүріп оқитын аптасына бес рет шығатын басылымымыз «Лениншіл жас» еді... Ол заманда «күн көсемнің» атақ-даңқы дүркіреп тұрған. Оның есімі қосарланбайтын дүние ілеуде біреу.&nbsp;Жастар газетінің мен мұндалап тұратын атауын нақ солайша қабылдадық. Арада жылдар өтіп, талаптанып қазіргі Әл-Фараби атындағы ҚазҰҮ-нің (бұрынғы ҚазМУ) студенті атандық. Алматы шаһарында да «Лениншіл жаспен» бауыр бастық. Бас оқу ғимаратының іргесіндегі киоскіден таңдап алатынымызда аталған басылым. Ол тұстағы оның таралымы үш жүз мыңнан асып жығылатын. Редакторы сайыпқыран С.Бердіқұлов. Студент ағайынның қайбір жетіскен күні бар дейсің?! Кейде ашқұрсақ күйді бастан өткізсек те «Лениншіл жастан» алатын рухани азығымыз бірыңғай тоқ санататын. Қазақ журналистикасының тарихына ден қойған тұста ұстаздарымыз: профессор Қ.Бекхожин, Т.Амандосов, Т.Қожакеевтің дәрісінен біз сүйіп оқитын басылымның 1921 жылы 21 наурызда Ташкент қаласында жарық көрген әу бастағы атауы «Жас Алаш», ал оның негізін қалаған, қаражатын тапқан, ұйымдастырған, тұңғыш редакторы жастар жетекшісі Ғани Мұратбаев болғанына қанықтық. Жасыратын несі бар, өткен ғасырдың тоқсаныншы жылдарына дейін қазақ қоғамы, оның тарихы мен әдебиеті жиырмасыншы ғасырдың жиырмасыншы жылдары саяси аренаға шыққан алаш қайраткерлерімен олардың шығармашылық еңбегіне үрке қарайтын. Өкімет идеологиясы бізге оларды шетінен ұлтшыл, байшыл көзқарастағы жандар деген насихатты тықпалап сіңіріп жатты. Ақыры көзіміз 1986 жылы Алматыдағы Желтоқсан көтерілісінің дүмпуімен қанат жайған жариялылық пенқайта құру, бертіндегі (1991ж.Желтоқсан) Тәуелсіздікке қолжеткізген кезеңнен ашылды.&nbsp;Жазықсыз айыпталған, тіпті, біржолата мансұқталған Алаш қайраткерлері және олармен мұраттас (идеялас) болған тарихи тұлғалардың сол бір сапты аяққа ас құйып, сабынан қарауыл қаратқан дұшпанкөз замандағы басын бәйгеге тігіп көзсіз ерлікке барған батыл іс-қызметіне жаңаша көзқараспен баға беруге ұмтылып бақтық. Осы ретте 1922 жылы сол тұстағы Түркістан коммунистік Жастар Одағының Орталық комитетінде басшылық қызмет атқарып жүріп, Күншығыс жастарының Ұлт тіліндегі газетін шығару керек деп үндеу тастаған, басшы органдардың келісімін алып қарекет жасаған, оның алғашқы санын Ұлыстың Ұлы күніне орайластырған, құлагер ақын Ілияспен бірлесе отырып, газет арқылы заманға қожа болу, тұрмысқа тұтқа болудың кілті – бірігіп ұйымдасуда. Ояныңдар, ұйымдасыңдар, езілген Күншығыс Жастары! деп ұран тастаған, демі таусылғанға дейін сүйікті басылымынан көз жазбаған Ғани Мұратбаев есімі еріксіз ойға оралады. Заманында қазақ халқына кемсітушілік көзқараспен қараған большевиктер партиясы ұлтымыздың оқыған, зиялы қауым өкілдеріне (әсіресе Алаш Орда партиясының көсемдерімен мүшелеріне) алакөздене қарады. Олардың адымын аштырмауға күш салып бақты. Міне, осындай әсіре қызыл, ұр да жық ұстанымы белең алған тұста Ғани заманның ағымына орай жастар қозғалысының (комсомол) басшылық қызметінде жүрсе де, негізінен рухани орталық Ташкентте шоғырланған қазақтың бетке ұстарлары, ыстық қанды, Алашжанды; М.Жұмабаев, М.Әуезов, М.Шоқай, Ә.Бөкейханов, Т.Рысқұлов, Н.Төреқұлов, С.Қожанов сынды арыстармен мұраттас, рухтас болуының арқасында атауынан ат үркетін Алаш ұғымын жастар газетіне темірқазық серік етті. Оның бұл әрекеті билік басындағыларға ұнамағаны рас. Ақыры олар қаражатының тапшылығын желеу етті. «Жас Алаш» атын тұқыртып 1922 жылы енді оны журнал көлеміндегі «Жас Қайрат» деген атпен шығарды. Профессор Б.Кенжебаевтың дерегіне сүйенсек, 1924 жылы Түркістан Республикасындағы комсомолдардың «Жас Қайрат» журналы Қазақстан автономиялық облысындағы комсомолдардың «Жаса Қазақ» журналы мен «Еңбекші қазақ» газетінде «Лениншіл жас» атты бір беті шығып тұрды. Осы күймен 1925 жылға жетті, деп сипаттама береді.&nbsp;1925 жылдан бастау алған «Лениншіл жас» атауы табаны күректей алпыс алты жылға созылып, басылым тізгінін ақмылтық журналист, әдебиетші ғалым Уәлихан Қалижан ұстаған 1991 жылдың тамыз айының ортасына дейін сақталып, Мәскеудегі дүрбелеңді «Тамыз бүлігі» басылған соң бір түнде үкіметтің ешқандай қаулы-қарарын қажет етпестен ұйым мүшелерімен келісе отырып, байырғы тарихи атауы «Жас Алаш» деп өзгертілді. Осылайша, тарихи әділет қайта орнады. Тәуелсіз Қазақстан жастарының, яғни, жас ұрпақтың республикалық қоғамдық-саяси «Жас Алаш» газетімен табысқанына да биыл 32 жыл толып отыр. Газеттің Мақтаарал ауданындағы қоғамдық белсенді тілшісі Махамбет Сапармұратовтың өлең тілімен: Сол Ғани жаққан от – жалыны, тоқтамай жүз жыл лауладың! дегеніндей, Ғани жаққан алаудың мәңгілік лаулай беруіне бек тілектеспіз.&nbsp;Бүгінгідей орайы келген, туғанына 121 жыл толған сәтте айтарымыз, жиырмасыншы ғасырда жетпіс жылдан астам (1917-1925ж.) сол қоғамның орнығуымен қатар қазақ және басқа да түркі тілдес халық жастарының оянып, жолын ашуы бағытында бар күш-жігері мен білімін аямаған, тіпті, өмірін де құрбан еткен Ғани Мұратбаев Алаш қайраткерлері қатарынан көрінетіндей қыруар іс атқарды. Алаш арыстарымен мұраттас болды, Алаш зиялысы атана білді. Бұл ұйғарымымызға оның халқы үшін жасаған жасампаз істері нақтылы дәлел.

Ғани – Алаш зиялысы

<a href="https://kyzylorda-news.kz/">Kyzylorda-news.kz.</a>&nbsp; Бүгін облыс әкімі Нұрлыбек Нәлібаев 1 маусым – Халықаралық балаларды қорғау күніне орай Президент паркінде ұйымдастырылған салтанатты іс-шараға қатысып, балаларды құттықтады.Паркте бүлдіршіндерге мерекелік көңіл-күй сыйлау үшін «Мен бақытты баламын» музыкалық би композициясы мен дрон-шоу ұйымдастырылған, арнайы фотозона жасақталған.<blockquote>«Біз ел болашағы – білікті де білімді ұрпақ қалыптастыруда барлық мүмкіндіктерге жол ашамыз. Мемлекет басшысы Қасым-Жомарт Кемелұлы Тоқаев 2022 жылды Балалар жылы деп жариялағаны белгілі. Атаулы жылда сырбойылық балалардың игілігі үшін 80 спорт-ойын алаңы пайдалануға берілді. Сонымен қатар Жалағаш ауданында 200 орынға арналған Оқушылар үйі, 50 орындық Өнер мектебі ашылды. Осы кезге дейін қаламызда бір ғана Оқушылар үйі болса, биыл сол жағалаудан «ҚазГерМұнай» компаниясының демеушілігімен 350 орынға арналған заманауи үлгідегі Оқушылар сарайының құрылысы басталды. Мемлекет басшысының қолдауымен «Жайлы мектеп» ұлттық жобасы аясында алдағы 3 жылда біздің өңірде 15 100 орынға арналған құны 100 млрд. теңгеден асатын 21 заманауи мектеп құрылысы жүргізіледі. Биыл 10 мектептің құрылысы басталады, оның 5-еуі облыс орталығынан салынады. Осы жоба аясында апатты мектептер мәселесі шешіледі», – деді аймақ басшысы.</blockquote>Айта кетейік, үш ауысым мәселесін шешу үшін қаладағы 4 мектепке қосымша ғимараттар салынуда. Бұл бастама нәтижесінде 5000-ға жуық орын тапшылығы жойылмақ.Қазір инвесторлардың өз қаражаты есебінен салынған жеке мектептер желісі 24-ке жетті. Алдағы жылдары тағы 8 жеке мектеп ашу жоспарлануда. Сонымен қатар жыл соңына дейін Сыр өңірінде 5 жаңа мектеп оқушылар игілігіне табысталады.Жуырда Қызылорда қаласы «Сабалақ» елді мекенінде дарынды балаларға арналған 150 орындық мектеп-лицей-интернаты пайдалануға берілсе, дәл осындай 150 орындық мектеп-интернат жаңа оқу жылында Қармақшы ауданында ашылады.Үкімет басшысының Сыр еліне сапары кезінде 300 орындық жатақханасы бар 400 орынға арналған «Физика-математика» бағытындағы мектеп-интернат салу жобасы қолдау тауып, бүгінде мектеп құрылысы басталды. Тағы бір жаңалық, алдағы 3 жылда 64 балабақша ашу жоспарлануда.Іс-шара барысында аймақ басшысы олимпиада және ғылыми жоба жеңімпаздарын марапаттады. Білім беру ұйымдарына 9 жаңа автобустың кілтін және балаларға лагерьге жолдама мен BILIMBOOK құрылғыларын табыстады.Айта кетейік, аймақта бүгіннен бастап тамыз айына дейін «Қазақстан – бақытты балалық мекені» тақырыбында апталықтар өте бастайды. Бүлдіршіндерге арналған мәдени-рухани, спорттық, зияткерлік іс-шаралармен бірге қайырымдылық акциялар ұйымдастырылмақ.Биыл 400-ге жуық сырбойылық өрен халықаралық, республикалық дәрежедегі ғылыми жобалар мен олимпиадалардың, спорт турнирлерінің және өнер конкурстарының жеңімпаздары мен лауреаттары атанды. Лайықты қолдаудың нәтижесінде Сыр өрендері білім бәсекелерінде топ жарып, аймақ абыройын еселеуде. Атап айтар болсақ, жалпы білім беретін пәндер бойынша республикалық олимпиадада командалық есепте оқушыларымыз жаратылыстану бағытында ІІ, ал гуманитарлық пәндер бойынша ІІІ орынды иемденді. Бұл – өте жақсы көрсеткіш. Бұдан бөлек, 4 және 9-сынып оқушылары арасындағы білім жетістіктерін бағалау мониторингі бойынша өңіріміз республикада үздік үштіктің қатарына енді. Жазғы демалыс кезінде 1 - 10 сынып оқушыларының 98 пайызы жазғы тынығу лагерлерімен, әр түрлі сауықтыру, жұмыспен қамту, үйірме, экскурсиямен қамтылады.Аймағымызда бүгінгі күні 280 мыңға жуық бала бар. Облыстағы 686 мектепке дейінгі ұйымда 60 мыңнан астам бала тәрбиеленуде. «Білімді ұлт» ұлттық жобасы аясында 2-6 жастағы бүлдіршіндердің 88,8%-ы, ал 3-6 жас аралығындағы балалар 100% балабақшамен қамтылған. Жыл басынан қазірге дейін 1 561 орындық 13 жеке балабақша балаларға есігін айқара ашты.<figure class="image"><img src="https://knadmin.beoblood.kz/uploads/347265426_1166531337347280_8735288474401908444_n_f05f3f7913.jpg" alt="347265426_1166531337347280_8735288474401908444_n.jpg"></figure>&nbsp;<figure class="image"><img src="https://knadmin.beoblood.kz/uploads/347550750_150057378062003_1249452814782668087_n_a3704b718b.jpg" alt="347550750_150057378062003_1249452814782668087_n.jpg"></figure>&nbsp;<figure class="image"><img src="https://knadmin.beoblood.kz/uploads/347555941_764236128525765_5800696279714403996_n_c329c505a9.jpg" alt="347555941_764236128525765_5800696279714403996_n.jpg"></figure>&nbsp;<figure class="image"><img src="https://knadmin.beoblood.kz/uploads/347433733_225256993582306_9090962131813270620_n_989bad6709.jpg" alt="347433733_225256993582306_9090962131813270620_n.jpg"></figure>&nbsp;<figure class="image"><img src="https://knadmin.beoblood.kz/uploads/347426622_1007459253490928_6804535795363767159_n_ad7d2bc7f1.jpg" alt="347426622_1007459253490928_6804535795363767159_n.jpg"></figure>&nbsp;<figure class="image"><img src="https://knadmin.beoblood.kz/uploads/347556032_558024842937078_4571365690355558930_n_bc103947ed.jpg" alt="347556032_558024842937078_4571365690355558930_n.jpg"></figure>

Аймақ басшысы балаларға жаңа автобустар мен лагерьге жолдама сыйлады

<a href="https://kyzylorda-news.kz/">Kyzylorda-news.kz.</a> Ақмая ауылдық округінде 31 мамыр саяси қуғын-сүргін құрбандарын еске алуға арналған конференция өтті.&nbsp;«Қуғын-сүргін құрбандары – алаш жұртының зиялылары» атты конференцияға Шиелі аудандық қоғамдық даму бөлімінің әдіскері Гүлжанат Сейітова және Шиелі ауданы бойынша ұлтаралық қатынастар жөніндегі сарапшысы Самал Абызбаева ашып беріп, өз пікірлерін білдірді.&nbsp;Басқосу – жазықсыз жапа шегіп, қазақты егеменді ел етеміз деп еркіндікке ұмтылған ерлердің алдындағы борышты өтеуге, ерлігіне тағзым етуге арналды.Өткен ғасырдың бірінші жартысындағы саяси қуғын-сүргін сан тағдырды тәлкек етті. Нақақтан жер аударылған, әділетсіз сотталған, көрсетіндімен өлім жазасына кесілген мыңдаған адам қуғын-сүргінге ұшырап, зобалаңға душар болды. Қуғын-сүргін кезеңінде Қазақстан аумағында құрылған лагерьлерге 5 миллионнан астам адам жер аударылды. Бұл санның артында сүргіннен зардап шеккен миллиондаған отбасылардың тақсіреті жатыр. Ресми деректерге сәйкес, Қазақстанда 100 мыңнан астам адам қуғын-сүргінге ұшырады. 25 мыңнан астам адам ату жазасына кесілген. Сол жылдары жазықсыз жазаланғандардың қатарында Әлихан Бөкейхан, Ахмет Байтұрсынұлы, Міржақып Дулатұлы, Тұрар Рысқұлов, Мағжан Жұмабаев, Сәкен Сейфуллин сияқты көрнекті мемлекет және қоғам қайраткерлері, өзге де ұлт зиялылары болды.&nbsp;Сонымен қатар, Ақмая ауылдық ардагерлер кеңесінің төрағасы Кенжетай Палмағанбетов, кәріс ұлтының өкілі Лян Светлана қуғын сүргін туралы ой пікірлерін айтты.&nbsp;<blockquote>«Бұл есімдер исі қазақ елі қасіретінің жаңғырығындай. Ұлы даланың қыран ұлдары ұлт идеясы үшін күресіп, басын бәйгеге тікті. Қылтасынан қиылған сом тұлғалар тарих бедерінде алтын әріппен жазылды. Өйткені, олардың үміті мен арманы шындыққа айналды. Кейінгі жас буын егемен мемлекеттің аумағында асқан әрі еркін өмір сүруде», – деді Ақмая ауылдық ардагерлер кеңесінің төрағасы Кенжетай Палмағанбетов.</blockquote>Бір сөзбен айтқанда, зобалаң жылдарды бастан кешкен әр арыстың айтқан зары, кешкен мұңы, жүріп өткен «тар жол тайғақ кешуі» ақмаялықтардың есінде. Конференция соңында Акмая ауылдық мешітінің имамы Ғани Мақұлбеков қуғын-сүргін құрбандарына Құран бағыштады.

Архив