<a href="https://kyzylorda-news.kz/">Kyzylorda-news.kz.</a> Қазалы қаласында Ғани Мұратбаев атымен аталатын мектеп бар. Сонау 1939 жылы ашылған білім ордасы бүгінде білікті ұстаздар мен білімді шәкірттердің құтты шаңырағына айналған. Қашанда мектептер арасында алғашқылардың бірі болып жаңашылдығымен көзге түсетін ұжым мүшелерінің ауызбіршілігі мен жұмысқа деген жауапкершілігі аса жоғары. Уақыт көшімен қатар лесіп, заманауи жаңалықтар мен тың идеяларды өмірге әкеліп жүрген білім ордасының басшысы Эльмира Сматуллаеваның еңбегі ерекше. Күн-түн демей, ұжымды алға сүйреп, білім берумен қатар шәкірттердің тәлімді тәрбиені бойына сіңіруіне атсалысып жүрген мектеп директорының бастамасымен жұма күні тәрбие мектебі жобасы аясында «Ұлттық құндылық – ұлттық иммунитет» тақырыбында аудандық семинар өтті. Шараға мектеп директорлары, тәрбие ісі жөніндегі орынбасарлары және өзге де қонақтар шақырылды.&nbsp;Бұл күні таңның атысымен мектеп ауласында ерекше көңіл-күй сезілді. Әуезді ән ойнап, шуақты күннің шұғыласына бөленген шәкірттер шуылы әдеттегіден ерекше есітілді. Өйткені олар үлкен шараға дайындық үстінде еді. Бірі ән салып, енді бірі домбыра шертіп, өздеріне жүктелген міндетті жоғары деңгейде алып шығуға талпынып жатқан-ды. Қаз-қатар тізілген көрмелер мен жайма базар спеттес сауда орындары келушілердің назарын ерекше аударды. Бірнеше бөлімнен тұратын семинар қонақтарды күтіп алумен басталды. Алдымен «Ғанибай үйінің архитектуралық ерекшеліктері» жобасын 10 сынып оқушысы Диас Ильяс танысытырып өтті. Өз жұмысында «Ғанибай үйінің» қыр-сырын толық баяндап, тарихи деректерді тізбектеген жас өреннің жан-жақтылығына жиналғандар тәнті болды. «Көне тарих сыр шертеді» атты көрме аясында XIX ғасырдың екінші жартысындағы көрініс көпшілік назарына ұсынылды. Келушілер сауда-саттық алаңында жібек тауарлардың саудасын қыздырды. Жәрмеңкеде қап-қап арпа, бидай, тары, жүгері сатылып, тіпті қозылы қойда саудаға түсті. Қос жанында жүн сабап отырған кимешекті әже жәрмеңкеге жан бітіріп, қонақтардың қызығушылығын одан әрі арттырды.Қазақы ауылда жырдан жаһұт, әннен шашу шашылды. Өткен ғасырға шегініс жасалып, Ғанибай көпестің мәрттігі мен кеңдігін ата-аналар комитетінің төрағасы Еркін Әбдіраманов ерекше сомдап шықты. Осы орайда ауқымды шараға ұстаздардан бөлек ата-аналарда айрықша атсалысқандығын атап өткен жөн. Бұдан кейін күмбірлеген күй тартылып, мектеп оқушыларының қолынан шыққан көркем туындылардан жасақталған көрме таныстырылды. Ою ойып, кесте тігіп отырған өнерлі өрендердің ісіне көпшілік сүйсіне қарады. Ардагер ұстаз, ата-ана Қазыбай Саниязов жанына жиналған балаларға өнегеге толы өсиет сөздерін айтты. Қазақтың «Ат қою» салтына тоқталып, би-шешендерден қалған аталы сөздің астарын түсіндірді.&nbsp;«Ұлы дала жәдігерлері» құндылықтар жәрмеңкесінде «Ұлттық фармокология» үйірмесінің жұмыстары қойылды. Онда ұстаздардың жетекшілігімен дайындалған оқушылардың ғылыми жобалары таныстырылды. «Қамыс өсімдігінен жасалатын сұраныстағы бұйымдар», «ЕБҚ оқушыларының интеллектісін дамыту», «Ұлттық бренд – қазақы тақия», «Қазақ дүниетанымындағы физика», «Биологиялық активті заттардың фармокологиялық әсері», «Өңірдегі қара тұз кенінің қасиеті», «Ұлттық ойындар» үйірмесі, «Ұлттық киім – ұлт ажары», «Ата-аналар акдемиясы – ұлттық тәрбиенің қайнар көзі», «Қолөнер бұйымдарының көрмесін» көрушілер шығармашыл шәкірттер мен ізденімпаз ұстаздардың еңбегін ерекше бағалады. Бірінен-бірі өткен жобалардың қай-қайсысы болмасын өзіндік құндылығымен қадірлі.&nbsp;Бұл күні ерекше көзге түскен дүние – мектеп ауласындағы су бұрқақ болды. Бұны түлектер тарту еткен екен. Ол жасыл желегі жайқалған ауланың одан әрі ажарын аша түскен. Ауладағы керемет көріністерден кейін мектеп директоры Эльмира Сматуллаева қонақтарды білім ордасына бастап барды. Білім ордасының қабырғаларында ұлтымызға тән ою-өрнектер, қазақи нақыштағы картиналар, мектеп мақтаныштары, жетістікке жеткен мұғалімдер суреті ілінген. Әр кабинет ұлттық бұйымдармен жабдықталған. Бұнда алдымен «Ұлы дала биосферасы – әдіс-тәсілдер қоржыны» атты педагогикалық шеберхана жұмысы көрсетілді. Көрнекіліктер көрмесі, «Асық GAME» жобасы, үйірмелер үлгісі, таңдау курстарының топтамасы, ҚМЖ жинақтары, дидактикалық материалдар, 1-11 сынып тәрбие бағдарламалары қойылған. Келесі кезекте этно ойындар өрнегі келушілер назарына ұсынылды. Шәкірттердің классикалық квест, ұлттық квест ойыны, «Алтын қақпа» және «Алтын сақа зияткерлік ойындары тамашаланды. Осы орайда оқушылардың ұлттық салт-дәстүрлер мен әдет-ғұрыптар жөніндегі білімдері жоғары екендігі байқалды.&nbsp;«Тәрбие атмосферасындағы құндылық» атты бөлімде «Меірімділк жүректен ...» тәрбие сағаты, «Ұлттық тәрбие негізі – Tik Tokтрендінде», «Қазақ хандығы» ойыны, қазақтың жазылмаған психологиясы (ұлттық ойындардың психолгоиялық мәні), «Шам түбіндегі ертегі» жобасы, BANI әлеміндегі альфа ұрпақ, «Ұлттық қоржын» «MEGA study» жобасы, ұлттық құндылықтар деректер қоры арнайы сайты семинарға қатысушылардың таным көкжиегіне ерекше әсер қалдырды. Шара барысында қонақтарға қазақшы нақышта ою-өрнектермен безендірілген кәдесыйлар таратылып, ұлттық тағамдар құрт, ірімшік, жаппай нан, бауырсақ пен айран ұсынылды.&nbsp;Семинар соңында қонақтар алған әсерімен бөлісіп, мектеп басшысы мен ұжым мүшелерінің іскерлігіне, дүниетанымдарының кеңдігіне, жұдырықтай жұмыла білген бірліктеріне ризашылық білдірді. Аудандық білім және ғылым қызметкерлері кәсіподағы комитетінің төрағасы Әбілқасым Роман, әдістемелік кабинет меңгерушісі Лаура Ізбасарова, №93 мектеп директоры Серікбол Сансызбаев сөз алып, семинардың көпшілікке ерекше шабыт сыйлағанын тілге тиек етті. Әрбір педагогтың санасында тың идеялардың туындауына себепші болған бастаманы жоғары бағалады. Ал «арқамнан ауыр жүк түскендей болды» деген мектеп басшысы Э.Сматуллева бізбен әңгіме барысында өз әсерін былай баяндады.&nbsp;<blockquote>«Бұл жобаны қолға алғанымызға да екі жылдың жүзі болды. Мақсат – ұлттық құндылыққа негізделген тәрбие мектебінің нобайын ұсынып, құндылық жобаларымен таныстыру. Ал міндетіміз білім алушылардың тұлғалық мәдениетін қалыптастыру және оқушыларды ұлттық тәрбиенің құнарымен ізгілендіру болатын. Бүгін мақсатымыз орындалып, міндетіміздің іргетасы қаланды дей аламын. Себебі, бұл міндет бұнымен тоқтап қалмауы тиіс. Әрбір оқушы ұлттымыздың ерекшеліктерін естіп-біліп, көріп өсуі тиіс. Елдің ертеңі – бүгінгі шәкірт. Осындай дүниелерді әрі қарай жандандыратында осылар. Семинардың өз деңгейінде өтуіне үлес қосқан демеушілер Мырзахмет Толыбаев, Жарқынбек Қабақбаев, Нұртай Аманов, Кенжебек Толыбаев, Нұргүл Қайназарова, Медеу Есқожаев, Ардақ Кәдіров секілді жомарт жандар мен әр жылы мектеп бітірген түлектерімізге алғыс білдіреміз. «Бір жеңнен қол, бір жағадан бас шығара білген» ұжым мүшелеріне ризамын. Бұл шарада әрқайсысының еңбегі ерекше. Ешқайсысықалыс қалды дей алмаймын. Ауызбіршіліктің жарқын үлгісін көрсете білді», –деді риза кейіппен.</blockquote><img src="https://knadmin.beoblood.kz/uploads/Whats_App_Image_2023_05_26_at_15_17_58_3681368b9f.jpeg" alt="WhatsApp Image 2023-05-26 at 15.17.58.jpeg"><img src="https://knadmin.beoblood.kz/uploads/Whats_App_Image_2023_05_26_at_15_18_43_1f12a820cb.jpeg" alt="WhatsApp Image 2023-05-26 at 15.18.43.jpeg"><img src="https://knadmin.beoblood.kz/uploads/Whats_App_Image_2023_05_26_at_15_20_15_bb75fb85c8.jpeg" alt="WhatsApp Image 2023-05-26 at 15.20.15.jpeg">

Мектеп ұжымы ұлттық құндылықтарды ұлықтады

<a href="https://kyzylorda-news.kz/">Kyzylorda-news.kz.</a> Жаңадария ауылы ауданнан шалғай орналасқанымен, шаруасы ширақ елді мекендердің бірі. Бұл ауылда тұратын тұрғындар бақша дақылдарын егуде көпке үлгі қыларлықтай. Аталған ауылдағы «агрико» шаруа қожалығы да 2016 жылдан бері ауылда табысты еңбек етуде. Шаруасы шираған шаруашылықтың тындырымды тірлігімен танысу үшін аудан әкімі еңбек адамдарымен кездесті.Биыл серіктестік 15 гектар алқапқа жүгерінің «Пионер» сұрпын сепккен. Америкалық дақылдың пісіп-жетілу уақыты – 3 ай. Мұнан бөлек 12 гектар алқапқа қарбыздың франциялық «Кримсон Свит» сұрпын егіп жатыр. Бұл өнімнің пісіп-жетілу уақыты жергілікті қарбыздармен шамалас, яғни 80-85 күннен кейін нарыққа шығаруға болады.Арман Қайратұлы бұл дақылдардың суды әлдеқайда аз қажет ететінін айтады. Мәселен, күріштің әр гектарына шамамен 36 мың текше метр су кетсе, аталған бақша дақылдарының гектарына 3-3,5 мың текше метр су жеткілікті екен. Оның үстіне өнімділік жағынан да жүгері мен қарбыз еккен тиімді екенін жасырмайды.&nbsp;<blockquote>«Күріш жерге себілгеннен жинап алғанға дейін суда тұрады, сон-дықтан ол суды көп қажет етеді. Ал бақша дақылдарының барлығы да суды аз қажет етеді. Оның ішінде біз биыл қолға алған жүгері, қарбыз, жоңышқа өнімдері мүлде суды аз қажет етеді. Бір жағынан өнімділік жағынан да ұтарымыз көп. Сондықтан егінді әртараптандырып, бақша дақылдарына басымдық берген дұрыс. Себебі жылдан-жылға аяқ судың тапшылығын өздеріңіз де көріп жүрсіздер. Бақша дақылдарын еккен адамда шығын аз, керісінше кірісі көп болады. Жүгеріні осыған дейін де егіп көргенбіз. Екі жыл бұрын жинап алған өніміміз егіс басынан сатылып кетті. Бұдан жүгеріге сұраныстың көп екенін аңғару қиын емес. Биыл да өнімнің бұл түріне басымдық бергеніміз сондықтан», – дейді серіктестік құрылтайшысы.</blockquote>Еңбек ұжымы әлі егу жұмыстарын жүргізіп жатыр, осы кездің өзінде мұндағы өнімдерге сұраныс көптеп түсіп жатыр екен. Сондықтан шаруашылық басшысы ала жаздай күтіп-баптаған өнімді нарыққа шығару жағына бас қатырмайтыны анық. Бастысы, дақыл өнімді болса жеткілікті.<blockquote>«Қазірдің өзінде шаруашылықта ондаған адам жұмыс жасайды, мұнан бөлек уақытында бізге еңбек өнімділігін арттыру үшін тағы көмек қажет болады. Сол тұста тағы да ауылдың бірнеше азаматын маусымдық жұмысқа аламыз. Осыған дейін қауын егіп, оны Ресейге экспортқа шығардық. Мұндағы өнім сапасы жоғары болса керек, әлі күнге дейін ресейлік тұтынушыларымыздан тапсырыс түсіп тұрады. Биыл жүгері мен қарбыз егіп жатырмыз. Алдағы уақытта қауын егуді және оны шет елдерге экспорттауды қайта қолға аламыз», – дейді серіктестік құрылтайшысы Арман Иса.&nbsp;</blockquote>Шаруашылықта техникадан мәселе жоқ, себебі серіктестік басшысы техника базасын жаңарту жұмыстарын жыл сайын жүргізеді екен. Биылдың өзінде олар бірнеше озық техника сатып алған. Оның ішінде жерді сүдігерлейтін, алқап тегістігін қамтамасыз ететін бірнеше озық техника бар. Тіпті шаруашылық ұжымы дақылдарды егу жұмыстарын да техникамен жүргізеді.&nbsp;Айта кетейік, 2016 жылдан бері аталған серіктестік өнімдері Ресей нарығында сатылымға шыққан. Дәмі тіл үйірер қауындар Мәскеудегі ірі сауда дүкендерінің сөрелерінен орын алған болатын. «Мырзашөл» тұқымдасына жататын «Жиенбай» қауыны ешқандай химиялық қоспасыз күтіп бапталған. Ауылдың теріскейіндегі «Атжайған» алқабын осыған дейін тек мал жайылым ретінде пайдаланғандықтан шөбі шүйгін, жері құнарлы. Сондықтан табиғи таза өнімге Ресей нарығында сұраныс жоғары болды.2016 жылы шаруа қожалық Ресейге 453 тонна 260 келі қауын, Қыр-ғызстанға 20 тонна қауын, 2017 жылы Ресейге 554 тонна 550 келі қауын, 191 тонна 600 келі тәтті бұрыш экспорттаған. Ал 2018 жылы жеке тұрғындармен бірлесіп, Жаңадария ауылдық округінен 30 гектарға қауын, 4 гектар қарбыз, 1 гектар қызанақ, 1 гектар қияр орналастырған болатын. Дәл осы жылы Ресейге 159 тонна 100 келі қауын, 16 тонна 400 келі тәтті бұрыш экспорттады. Шалғайдағы ауылда осындай тындырымды тірліктің болуы аймағымыз үшін үлкен мақтаныш, әрине.&nbsp;<blockquote>«Қауыннан пайда көп, сондықтан алдағы жылдары бұл кәсіпті қайта қолға аламыз. Келер жылы да қауын егіп қалуымыз ғажап емес. Ол кезде тағы да шетелге өнім экспорттауға тура келеді. Ресей, Қырғызстан және басқа да мемлекеттерден тапсырыс мол түседі. Сондықтан алдағы уақытта бұл мүмкіндікті құр жібермеуіміз керек. Бастысы, бақша дақылдарын күтіп-баптауда, оны нарыққа шығаруда тәжірибе бар. Алдағы жылдары қауыннан бөлек басқа да бақша дақылдарына басымдық береміз. Қазірдің өзінде жүгеріге тапсырыс көптеп түсуде. Алдыңғы жылы тұтынушыларымыздың көбісін жүгерімен қамтамасыз ете алмадық. Барлығын бір азамат сатып алып кетті. Алдағы уақытта егіс алқабы ұлғайса, сұраныстың барлығын қамтамасыз етуге жол ашылады деп ойлаймын», – дейді Арман Иса.</blockquote>Айта кетейік, қазіргі таңда «Агрико» шаруа қожалығының Жаңа-дарияда 300 гектардай жері бар. Бастысы, еңбек ұжымы оның барлығын тиімді пайдаланып отыр. Негізінен ауылда осындай шаруашылықтардың көптеп құрылғаны дұрыс, себебі бір жағынан шалғай ауылдың тұрғындарына да жұмыс табылады. Екіншіден, елді мекеннің кірісі артып, шаруасы ширайды. Мұнан бөлек аудан әкімінің сапары басқа да бақша дақылдары орналасқан егіс алқаптарында жалғасты. Қазіргі таңда Жаңадария ауылдық округіндегі «Игенбай», «Атжайған» жер учаскелерінде 30 отбасы 45 гектар жерге картоп және басқа да бақша дақылдарын орналастырған. Бұндай ілкімді істер Таң ауылдық округінде де жалғасын тапқан, бүгінде Таңда 25 гектар жерге 55 отбасы бақша дақылдарын орналастырған.&nbsp;«Жалқаулықты жеңіп, адал еңбек жолына түскен ауыл тұрғындарының жаз бойы жасаған еңбегінің жемісі тек бір отбасын ғана емес, баға тұрақтылығын сақтай отырып, аудан халқының жергілікті табиғи өнімді тұтынуына мүміндік береді. Мен келгенде айтқанмын, еңбек етемін деген адамды қашанда қолдауға дайынмын. Бүгінгі сапарымда дала жұмыстарымен танысып, еңбек адамдарының шаруасының ширағанын көріп, көңіл сүйсінді. Қазір заман жалқаулықты көтермейді. Міне, осы ретте бақша салып жатқан ауыл азаматтарының жұмысы бәрімізге үлгі болуы тиіс, – деді Асқарбек Темірбекұлы. Расында соңғы жылдары ауданда бақша дақылдарына басымдық берілуде. Мұны біз еңбек етемін деген азаматтарды қолдау шараларымен және жергілікті халықтың еңбексүйгіштігімен байланыстырдық. Бұл сөзімізге дәлел де жоқ емес. Мәселен, жыл басында шалғайдағы Жаңадарияның халқы бақша салуда бірнеше мәселе барын Асқарбек Темірбекұлының назарына салған. Қазіргі таңда оның барлығы шешімін тапты. Болмаса бүгінгідей ауыл халқының шаруасы ширамас еді.&nbsp;Биыл ауданда картоп және басқа да бақша дақылдарын орналастыруға 500 гектар жаңадан жер дайындалды. Бұл жерлер бақша салуға ниетті отбасыларға үлестіріледі. Бүгінге дейін ауданнан 610 отбасы картоп, көкөніс және басқа да бақша дақылдарын орналастыруға ниет білдірген. Жаңадан жер ашу жұмыстары шаруашылықтардың демеушілігімен жүргізілуде. Бұл ретте жер толық дайындалады, оған аяқ су жеткізіледі, сондай-ақ қоршауын да жергілікті әкімдіктің бастамасымен жүргізілуде. Тек тұрғындар еккен өнімінің күтіміне ғана жауапты. Олардан жерді дайындауға, қоршауға, аяқ су жеткізуге ешқандай қаражат болмаса көмек сұралмайды. Бұл бір жағынан өңірде бақша өнімдері бағасының тұрақталуына, тұрғындардың өз-өзін өніммен қамтамасыз етуге үлкен қолғабыс болып отыр. Былтыр да осындай жұмыстар қолға алынған, биыл да игі бастама жалғасын табуда.&nbsp;Қазіргі таңда 295 гектар жер дайындалып, 346 отбасыға берілген. Бүгінгі күнге дейін 71 гектар жерге 85 отбасы картоп, бақша дақылдарын орналастырған. Картоп, бақша дақылдарын орналастыруда Жаңадария, Аққұм ауылдық округтері тұрғындарының белсенділігі жоғары.Айта кетейік, бұған дейін аталған серіктестік шалғай ауылда шаруасын ширатып, өз өнімдерін шетелге экспорттаған болатын. Қазіргі таңда «Агрико» ШҚ 30 гектар алқапқа жоңышқа, 12 гектарға қарбыз және 15 гектар алқапқа жүгері егуді бастап кетті. Бүгінде 30 гектар жоңышқа толықтай күтімге алынған. Қазіргі таңда шаруашылық еңбеккерлері жүгері мен қарбыз егу жұмыстарына қарқынмен кіріскен. Серіктестік бүгінде ауылдың ондаған азаматын жұмыспен қамтып отыр.

Жаңадарияның шаруасы ширақ

<a href="https://kyzylorda-news.kz/">Kyzylorda-news.kz.</a> Тіл – ұлттың жаны. Ұлттың ұлт болып қалуының басты тірегі де оның ана тілінің қолданысымен тығыз байланысты екені даусыз. Қазақ поэзиясының ерекше құбылысына айналған Қадір Мырза Әлі «Ана тілің арың бұл, Ұятың боп тұр бетте. Өзге тілдің бәрін біл, Өз тіліңді құрметте», деп тілді құрметтеудің қажеттігін көрсетті. Иә, ана тілін құрмейтін тіл жанашырларының жадында ақынның жыр шумағы жүруі қажет-ақ. &nbsp;Жақында «Қазақ тілі» қоғамы аудандық филиалының ұйымдастыруымен аудандық емханада тіл жанашырларымен кездесу болып өтті. Оған аудандық аурухананың бас дәрігері Бақытжан Нысанбаев, Халықаралық «Қазақ тілі» қоғамы аудандық филиалының төрағасы Гүлжауһар Раева және тіл белсенділері қатысты.Қазақ тілі қоғамы өз жұмысында халқымыздың мәдениетін, қазақ тілін, әдебиетін, тарихын, әдет-ғұрпы мен тұрмыс-салтын сақтай отырып, оны одан әрі дамытуда филиалдың бастауыш ұйымдарымен тығыз байланыста бірлесе жұмыс жүргізіп келеді. Соның бірі аудандағы филиалдың ірі бастауыш ұйымы – аудандық ауруханасы. Ұйым мүшелерінің белсенділігі, туған тілге деген көзқарасы, азаматтық ұстанымы ерекше. Оның бір дәлелі – аудандық филиалдың ұйымдастыруымен Отбасы күніне орай өткен «Келіні жақсы үйдің керегесі алтын» атты байқауда аурухана ұжымынан қатысқан дәрігер Гүлдана Қалмаханова сайыстың бас жүлдесін жеңіп алды. Сондай-ақ, тілдің мәртебесін көтеру мен мекемедегі белсенділіктің артуына мекеменің бас дәрігері қай кезде де атсалысады.Кездесуде бастауыш ұйым ұсынысымен тұрғындарға медициналық көмек көрсетуде дертке шипалы сөздерімен жан жылуын сыйлап, ел құрметіне бөленіп жүрген бір топ тіл жанашырлары марапатталды. Ұлттық құндылықты насихаттауда қоғамның белсенді мүшесі ретінде атсалысқан мейіргерлерге Гүлжауһар Төлегенқызы шынайы алғысын білдірді. Жиын соңында аудандық аурухананың бас дәрігері Бақытжан Сағилатұлы мемлекеттік мәртебесі жоғары қазақ тіліне қашан да құрметі шексіз екенін айтып, мекемеде барлық құжаттар қазақ тілінде жүргізілетінін жеткізді.

Қармақшыда тілге жанашыр медбикелер марапатталды

<a href="https://kyzylorda-news.kz/">Kyzylorda-news.kz.</a> Төретам кенті және Ақай ауылдық округі бойынша кәмелетке толмағандардың істері және олардың құқықтарын қорғау жөніндегі кенттік комиссия отырысы өтті.2023 жылдың 23 мамыры күні Төретам кенті және Ақай ауылдық округі бойынша кәмелетке толмағандардың істері және олардың құқықтарын қорғау жөніндегі кенттік комиссия отырысы өтті. Комиссия отырысын комиссия төрағасы, Төретам кентінің әкімі Ғалымжан Тажмағамбетұлы жүргізді. Жиналысқа комиссия мүшелері, Байқоңыр қаласының прокуратурасының прокуроры Н.Тілекбай және құқық қорғау органдарының қызметкерлері, Төретам және Ақай а/о мектептерінің тәрбие ісі жөніндегі орынбасарлары, ата-аналар, мектеп психологы қатысты. Күн тәртібінде 4 мәселе қаралды.&nbsp;Бірінші мәселе бойынша балалардың жол көлігі жарақаттарының алдын алу жөнінде қабылданған шаралар мен кәмелетке толмағандарды жол қауіпсіздігі ережелерін сақтауға қалыптастыру туралы сөз болды. Екінші кезекте мектеп педагог-психологының тәрбиелік әрекетін әдістемелік қамтамасыз ету туралы атқарылған жұмыстар баяндалды. Сонымен қатар ”Жаз – 2023” балалар мен жасөспірімдердің жазғы демалыс сауықтыруын және жұмысқа тартылуын ұйымдастыру туралы мәселелер қаралды.Қазақстан Республикасы ІІМ Байқоңыр қаласындағы Өкілдігінің кәмелетке толмағандардың ісі жөніндегі инспекторы М.Мурзагалиеваның, білім бөлімінің білім беруді дамыту секторының меңгерушісі Ж.Алданованың, Ақай ауылдық округінің №279 мектебінің психологы П.Жугинисованың баяндамалары тыңдалды. Отырыс барысында жасөспірімдердің сабақ үлгерімі, тәртібі, жазғы лагерь, демалыс уақытындағы жұмысқа тартылу шаралары талқыланды.

Төретамда кәмелетке толмағандардың ісі талқыланды

<a href="https://kyzylorda-news.kz/">Kyzylorda-news.kz.</a> Ұрпақ тәрбиесі – қоғамның болашағы. «Балаңды өз тәрбиеңмен тәрбиелеме, өз ұлтыңның тәрбиесімен тәрбиеле» деп халық даналығы айтқандай, бала тәрбиесінің дұрыс жолға түсуі, сөз жоқ, қоршаған ортаға, әсіресе ата-аналар мен ұстаздар қауымының парасаттылығына байланысты. Ендеше ұрпақ тәрбиесіне аса зор жауапкершілікпен қарау – әрбір саналы азаматтың борышы.&nbsp;Халқымыздың бойына сіңген атадан балаға жалғасып келе жатқан ұлттық тәрбиесі өзге ұлттардан ерекшеленіп, өздеріне тән қасиеттерді көрсетіп тұратындығын жоққа шығара алмаймыз. Ұлттық тәрбиеміздің халықтың сан ғасырлар тарихымен тығыз байланыста болып, осы уақытқа дейін дәстүрлі тәрбие құндылықтарын жоғалтпай жалғастырып келеді. Халқымыздың ұлттық тәрбиесі негізінен жүйелі болған. Өйткені, тәрбие әке-шеше, отбасынан бастап, ағайын-туыс, көрші-қолаңның бәрі араласып, бәрі де халықтың баласына ортақ қамқорлық жасаған. «Балаңа басқұр қалдырғанша, тозбас дәстүр қалдыр» деген қазақ халқы озық жұрттардың санатында болашақ қамын қатты ойластырған. Сол себепті ұлтымыз «Балаң өзіңе тартса – жұбан, қоғамға тартса – қуан» деп бекер айтпаған. &nbsp;Тәрбиенiң бiртұтастығы, осы біртұтастықты сақтап, &nbsp;ұрпақ тәрбиесі мен ұлт тағдыры әр азаматтың қолында екенін ұмытпайық. Ауданда тәрбие жұмысын ұйымдастыруда 42 мектеп директорының тәрбие жөніндегі орынбасары, 29 педагог-психолог, 29 әлеуметтік педагог, 29 тәлімгер, &nbsp;797 сынып жетекші жұмыс істейді. &nbsp;Тәрбие жұмысын ұйымдастыру кезінде басым бағыт Абайдың «Толық адам» рухани &nbsp;адамның ұлттық бейнесін ашу, баланың жеке басына &nbsp;тілектестік қарым-қатынас, құрмет пен сенім, балалардың құқықтары мен заңды мүдделерін қамтамасыз ету &nbsp;болып табылады. Барлық білім беру ұйымдарында «Оқуға құштар мектеп», «Дебат қозғалысы», «Балалар және театр», «Мектеп парламенті», «Жылыжай» жобалары жоспарлы жүзеге асырылып, &nbsp;жүзден астам іс-шара өткізілуде.Жоба жұмыстары, оқушылардың көшбасшылық қабілетін дамытып, ата-ана мен мектеп арасындағы байланыстарды одан әрі нығайтуда. Қазіргі таңда жоба жұмыстарына 8000-нан астам бала қамтылған.«Оқуға құштар мектеп» жобасы аясында оқушылардың &nbsp;кітап оқуға қызығушылығын ояту үшін 29 мектептің кітапханаларында «COWORKING» &nbsp; &nbsp;орталықталығы &nbsp; ашылды. Мектеп кітапханаларында 87497 дана көркем әдебиет &nbsp; қорлары бар. Білім беру мекемелеріне демеушілер, еріктілер, мектебін ұлықтаушы шәкірттер арқасында мектеп кітапханаларына 792 дана көркем әдебиетпен толықтырылды.Барлық білім беру ұйымдарында «Оқуға құштар мектеп» жобасына жауапты маман бекітіліп, арнайы бұйрық шығарылған. Барлық білім беру ұйымдарында &nbsp;іс-шара жоспары бекітіліп, жұмыстар жүргізілуде. Атап айтар болсақ, балалардың &nbsp;оқу мәдениетін &nbsp;дамыту мақсатында «Кітапқа құмар құрдастар» тақырыбында кітапқұмарлар акциясы, &nbsp;балаларда кітап оқу дағдысын қалыптастыру, &nbsp;отбасы құндылықтарын дәріптеу мақсатында «Үздік оқырман отбасы» байқауы өткізіліп, оған аудан бойынша 138 &nbsp;отбасы қатысты. Барлық білім беру ұйымдарында мектепішілік жергілікті танымал тұлғалармен кездесу кештері ұйымдастырылды. №29 орта мектепте аудандық «Ақын – елдің ардағы» тақырыбы бойынша жергілікті қаламгер, &nbsp;ақын, ардагер-ұстаз Зарипа Тасымовамен өткен сыр-сұқбат жас ұрпақ бойына &nbsp;жоғары азаматтық және рухани-адамгершілік құндылықтарды қалыптастыратын мазмұнды кеш болды.Аудан мектептерінде дебаттық клуб жұмыстарына 450 оқушы тартылған. Биылғы оқу жылында Дебат клубы жұмысы үздік нәтиже көрсетіп отыр. Облыстық кезеңге 3 команда қатыстырылды. &nbsp;№277 орта мектептің &nbsp;«Mind cell» (миндсел) клубы облыстық кезеңде І орын иеленіп, республикаға жолдама алды. Облыстық кезеңде №277, №250, №121 мектеп оқушылары ІІІ орынмен марапатталды. Осы жылы «Жеке тұлғаны қалыптастырудағы өнер мен дебаттың маңызы» атты облыстық &nbsp;дебат ойыны мен семинар жұмысы №250 мектеп-лицейінде ұйымдастырылып, оң нәтижесін беруде. Мектеп-лицей базасында жалпы білім беру ұйымдарының мектеп директорлары арасында «Ұшқыр ой алаңы» аудандық дебат турнирі, &nbsp;№26 мектепте оқушылар арасында «Қазақстан – бақытты балалар мекені» республикалық турнирінің аудандық кезеңі, №250 мектеп-лицейінде мектеп директорларының тәрбие ісі жөніндегі орынбасарлары арасында &nbsp;облыстық дебат турнирінің аудандық кезеңі өткізілді.Жүйелі жұмыстар нәтижесінде &nbsp;Білім және ғылым министрінің кеңесшісі Раиса Шер ауданның дебат жұмысын насихаттап, фейсбук парақшасына жариялады.Тәрбие жұмысында &nbsp;әрбір оқушының өзін-өзі басқаруы, патриот болып ержетуі, Отанды танудан бастап, айналаға деген және азаматтық тұлғалық ұстанымын &nbsp;қалыптастыруда мектептерде оқушыларды кітап оқып тарту, бос уақыттарын тиімді ұйымдастыруда &nbsp; түрлі шараларға қатыстыру басты назарда ұсталады.Мектеп парламенті жобасы бойынша өзін-өзі басқару органы &nbsp;29 мектепте толық құрылып, сайлау өткізілді. 8 фракция бойынша мектептерде құрамдары жасақталып, 2891 оқушы қамтылуда. Парламент мүшелері мектеп өміріне белсенді араласып, &nbsp;өзін-өзі басқару ұйымы арқылы жұмыстарды іске асырып, өздерінің коммуникативті &nbsp;ұйымдастыру шеберліктерін көрсетуде. Атап айтсақ, &nbsp; &nbsp;«Әке – шаңырақтың негізгі тірегі» тақырыбындағы &nbsp;әкелер кеңесі мектептің парламент &nbsp;мүшелерінің ұйымдастыруымен №26 мектепте өтіп, тәлім-тәрбие алатын тағылымды шара болды.&nbsp;«Мектеп театр» жобасына &nbsp;435 оқушы қамтылған. &nbsp;Ұрпақты &nbsp;театр өнеріне тарту, адамгершілік, эстетикалық &nbsp;тәрбие беру, сөздің көріктілігіне, ойдың жүйріктігіне тәрбиелеу, адамды өзгерту және әлемді тану, білім алушыларға ізгілік жолын, имандылық жолын көрсету мақсатындағы театр жобасы жоспарға сәйкес жұмыс жүргізуде. Облыстан &nbsp;«Театрдың ғажайып әлемі» тақырыбындағы байқаудан &nbsp;№80 мектеп-гимназия ІІІ орынмен, №99 мектеп шығармашылық пен шеберлік көрсеткені үшін алғыс хатпен марапатталды. Қаңтарда «Т.Жүргенов – қазақ мәдениетінің алып нары» тақырыбында аудандық театрландырылған қойылым байқауы, ақпанда аудандық мәдениет үйінде «Театр – тәрбие мен мәдениет ошағы» тақырыбында тәжірибе алаңы өтті. Ақпанда Т.Жүргеновтің 125 жылдығына арналған №80 мектеп-гимназиясында «Т.Жүргенов – тарихи тұлға ұлт жанашыры» тақырыбында облыстық театр байқауы өткізілді. &nbsp; Наурызда &nbsp; N275 орта мектепте «Театр – өнер мен тәрбие ордасы» тақырыбында облыстық семинар өтті. Ерекшелігі – оқушыларға сан түрлі өнердің ішінде театр өнерінің алатын орнының ерекшелігін, тәрбие ошағына айналған мектеп театрының жұмысымен таныстыру. Мәдени өсуге ықпал ететін театрландырылған қойылымдар арқылы жас ұрпақты өнерді құрметтеуге баулу, театр қойылымдарына қызығушылығын арттыру.Аудандық Т.Салқынбайұлы атындағы өнер мектебінде облыстық «Дәстүрлі әндерді заманауи нақышта орындаудың тиімділігі мен әдістері» тақырыбында тәжірибе алаңы болып өтсе, аудан бойынша білім бөліміне қарасты оқушылар үйінде «Қосымша білім берудегі инновациялар: идеядан іске асыруға дейін» тақырыбында облыстық семинар-практикумы ұйымдастырылды. Мектептерде рухани-адамгершілік тәрбие беру, адамзаттық құндылықтарды дамытуда «Ата-аналар комитеті», «Әкелер, аналар кеңесі» &nbsp;жұмыстарын жүргізуде. Мектеп, отбасы және қоғамдастық арасындағы өзара түсіністік, әртүрлі проблемаларды шешуге бірлесе ұмтылу, тәрбие жүйесінде тұлғаның өсуі мен өзін-өзі &nbsp;жетілуіне қол жеткізеді. Өскелең ұрпақтың дамуы мен тәрбиелеудегі жетістігі және әрбір баланың тұлға болып қалыптасуы көбіне отбасындағы ата-ана мен мектептің бірлескен іс-әрекетіне, шешіміне тікелей байланысты.Отбасылық құндылықтарды дәріптеу және оны сақтаудың маңыздылығына назар аудару мақсатында білім беру ұйымдарында тоқсан сайын әртүрлі тәрбиелік іс-шаралар сынып сағаттары, бейнероликтер, конкурстар, флешмобтар, акциялар, семинар-тренингтер, шеберлік сабақтары іске асырылады.Жаңа Қазақстан үшін қазақ өркениетін дамыту, салт-дәстүрін, әдет-ғұрпын, тілін тағы басқа ұлттық құндылықтар аясын кеңейту – өзекті мәселенің бірі. Сондықтан алдымызда тұрған – ұлттық мұра құндылықтарын қазіргі таңның мәдени жетістіктерімен үйлестіру. Жас ұрпақ тәрбиесінде үйлесімділік заңы салтанат құруы шарт. Яғни ол өзінің өсу, есею кезінде ақ сүт беріп асыраған ата-анасымен де, көкірек көзін ашқан ұстаздарымен де үйлесім таба білуі тиіс. Сонда ғана тұлға бойында ұлттық рухани қасиеттер бірте-бірте қалыптасары сөзсіз. Тұлға бойындағы рухани құндылықтарды қалыптастырудың көзі отбасы, әулет, әлеуметтік орта, мемлекет болса, ұлтық құндылық, ұлттық салт-сана, ұлт алдындағы міндет, парыз, намыс, рух, ұлттық салт-дәстүр тұлға бойындағы ұлттық құндылықтың ең жоғары көрсеткіші.&nbsp;Қорыта айтқанда, отбасылық құндылықтар мен ұлттық тәрбие мәселелері орта білім беру ұйымдарының тәрбие жұмысының ажырамас бір бөлігі болуы тиіс.

Қармақшыда 8000-нан астам бала жоба жұмыстарына қатысады

<a href="https://kyzylorda-news.kz/">Kyzylorda-news.kz.</a> 26 мамыр күні республика көлемінде бейнеконференциялық байланыс режимінде «Нашақорлыққа және есірткі бизнесіне қарсы іс-қимылға бағытталған қызметті үйлестіру жөніндегі ведомствоаралық комиссия» отырысы өткізілді.&nbsp;Отырыстың негізгі мақсаты - «Халықаралық нашақорлыққа қарсы күрес күніне» орай республика көлемінде профилактикалық іс-шаралар айлығының &nbsp;салтанатты ашылуы.&nbsp;Аталған жиынға республикамыздың барлық өңірлерінен мүдделі мемлекеттік органдар мен үкіметтік емес ұйым өкілдері, қоғам белсенділері, журналистер, блогерлер, еріктілер және жанашыр тұрғындар қатысты.&nbsp;Конференция барысында нашақорлықтың алдын алу және есірткінің заңсыз айналымымен күрес бағытындағы атқарылған жұмыстар, алдағы уақыттағы басым міндеттер мен жоспарланған іс-шаралар туралы сөз қозғалды.&nbsp;Өткізілетін айлық шеңберінде Қызылорда облысы көлемінде көптеген іс-шаралар жоспарланып, іске асырылатын болады.«26 маусым – Халықаралық нашақорлыққа қарсы күрес күніне» орай өткізілетін айлық, 26 мамыр – 26 маусым аралығында жалғасатын болады.

Республика көлемінде нашақорлыққа қарсы күрес айлығы басталды

<a href="https://kyzylorda-news.kz/">Kyzylorda-news.kz.</a> Қызылорда облысының полиция департаментінде департамент бастығының орынбасары полиция подполковнигі Жұмағұлов Ілияс Байжұманұлының төрағалығымен облысымыздағы екінші деңгейдегі банк қызметкерлерімен &nbsp;кездесу өтті. Кездесу барысында интернет алаяқтықпен күрес, оның алдын алу мәселелері талқыланды. &nbsp;Қазіргі уақытта ақпараттық технологиялардың үздіксіз дамуына байланысты интернет алаяқтық қылмыстары қоғамның ең өзекті әрі маңызды мәселесіне айналып отыр және оның түрлері де күн сайын кең таралып келеді.Ең жиі кездесіп жүрген интернет алаяқтықтың түрлері: интернет арқылы сауда жасау және қызмет көрсету, сондай-ақ өздерін банк қызметкері ретінде таныстырып, жеке деректерді иемдену және бөтен біреудің атынан онлайн-несие рәсімдеу арқылы жасалатын қылмыстар. &nbsp;Интернет алаяқтықтың басқа қылмыстарға қарағанда басты ерекшелігі – жалпақ жұрттың бәріне қатысты жасалуында болып отыр. Ол дегеніміз - қолында компьютер, смартфон, планшеті бар адам кез-келген уақытта интернет алаяқтардың құрбанына айналуы мүмкін. Қылмыскерлер уақыт талабынан қалмай, азаматтардың ақшалай қаражатын жымқырудың түрлі жаңа әдіс-тәсілдерін қолдануда. Әсіресе, олар әлеуметтік желілердің мүмкіндігін ұтымды пайдаланып отыр.Ағымдағы жылдың 4 ай қорытындысымен облыс көлемінде жалпы 46 интернет алаяқтық қылмысы тіркеліп, өткен жылмен салыстырғанда 60 пайызға немесе 70 дерекке азайған.Дегенмен, ескерту және алдын алу жұмыстарының жүйелі түрде атқарылып жатқанымен интернет алаяқтардың қақпанына түсетіндер азаймай тұр.Техника дамыған сайын алаяқтар да жұртты алдап, табыс табудың әдіс-айласын жетілдіріп келеді. Мысалы, қазір әлеуметтік желіде «банк пен шағын несие ұйымдарының кредитін жауып беремін» деген жарнама толып тұр. Соларға сеніп, айтқан ақшасын аударып, алданып қалып жатқандары қаншама. Туыстары мен таныстарының атынан онлайн несие рәсімдеп, оларды миллиондаған қарызға батырып жатқандар да кездесіп қалады.<blockquote>«Бүгінгі күнге алаяқтық қылмыстарының алдын алу, болдырмау бағытында тиісті іс-шаралар атқарылуда. Құқықтық сауатымызды көтеріп, қай нәрсеге де жауаптылықпен қарасақ әркімге алданатындар да, барын соларға беріп, бәрінен баз кешкендей күйге түсетіндер де азаяр еді. Полицейлер тарапынан облыс тұрғындарына түсіндіру жұмыстары жүргізіліп, алаяқтардың &nbsp;арбауына түсіп қалмау жайлы қандай сақтық шараларын сақтау керектігі түсіндірілуде. Осы мақсатта халыққа қызмет көрсету орындары мен базарларда, сауда орталықтарында плакаттар жапсырылып, жаднамалар таратылды. Бүгінгі кездесулер сынды бірлескен шаралар интернет желісінде және байланыс жүйелерінде жасалатын алаяқтыққа қарсы іс-қимылда оң нәтиже беретініне сенімдіміз», - деді департамент бастығының орынбасары полиция подполковнигі &nbsp;Жұмағұлов Ілияс Байжұманұлы.</blockquote>Қызылорда облысының Полиция департаменті облыс тұрғындарына алаяқтардың құрбанына айналмас үшін сақтық шараларына мұқият болып, қарапайым ғана ұқыптылықты ұстану керектігін ескертеді. Сонымен қатар, алаяқтық фактілері орын алған жағдайда тез арада полицияға хабарлау қажеттігін еске салады.

Қызылордалық полицейлер интернет алаяқтықтың алдын алу мақсатында банк қызметкерлерімен кездесті

<a href="https://kyzylorda-news.kz/">Kyzylorda-news.kz.</a>&nbsp; Қазақстан Республикасының Ғылым және жоғары білім министрлігі Тіл саясаты комитеті ұйымдастырған ұлт ұстазы Ахмет Байтұрсынұлы атындағы Тілдерді оқыту орталығы оқытушылары арасындағы республикалық байқау қасиетті Атырау жерінде өз мәресіне жетіп, жүлдегерлер анықталды.Ұлт ғылымының негізін қалаушы, Алаштың рухани көсемі, ұлт ұстазы атындағы дәстүрлі байқау – қатысушылар үшін де, қатары қалың орман тіл жанашырлары үшін де орны бөлек рухани оқиға, жаңашылдыққа жол ашатын шоқтығы биік шара.Бұған қоса тіл меңгерту бойынша ұтымды әдіс-тәсілдерді игеруге ынталандырып, оқытушылардың кәсіби біліктілігін жетілдіруге, өзара тәжірибе алмасуға мүмкіндік береді.Көпшілік асыға күткен сайыстың биылғы үміткерлерін Атырау облыстық мәдениет басқармасының басшысы Әбіл Жоламан құттықтады.<blockquote>«Қойнауы ырысқа толы қазыналы өлке, еліміздің мұнайлы астанасы, қасиетті Атырау жеріне қош келдіңіздер! Батырлар атойлатып ат ойнатқан, аспанында күй шалқыған киелі топырақта ана тіліміздің аламан бәйгесі өтсе, оған таң қалуға болмас. Тіл – ұлттың әрі жаны, әрі ары. Кез келген адамның басындағы ойдың бәрі тіл арқылы шығады. Тіл кез келген ұлтты басқа ұлттардан ерекшелеп тұратын белгісі. Осы орайдағы істеріңізге береке тілейміз», – деді ол.</blockquote>Үш кезеңнен тұратын байқаудың алғашқы бөлігінде қатысушылар өзін және авторлық бағдарламасын таныстырды. Бірден айту керек, бекітілген ережеге сәйкес, бұл жолы тек қана Тіл оқыту орталықтарының оқытушылары ғана қатысты. Бұл – қазақ тілін үйретудегі әдістемелік дайындауда, бірінші кезекте, нақты тәжірибеге сүйенген кәсібилікке мән берудің белгісі болса, осы салада маңдай терін төгіп жүрген тіл майталмандарының еңбегін бағалау. Солай болған соң, бәйге шарты әр қатысушыдан тақырып, тақырыпша, коммуникативтік дағды, интенция, грамматика және қосымша материал болуын талап етті. Бұдан басқа әрбір тақырып бойынша коммуникативтік дағдыны таратып жазып, оның интенциясы мен грамматикасын беруге міндетті болды.Екінші кезеңде отандық және шетелдік танымал әдіскерлердің сөйлеудің 4 дағдысын үйретуге ұсынған тиімді әдіс-тәсілдері мен әдістемелері, пікірлері туралы сұрақтар берілді. Қатысушы ұяшықтардан таңдалған қос сұраққа толық жауап беруге тиіс болды. Соңғы айналымға В1 деңгейіне сәйкес келетін өзге этнос өкілдерінен тұратын 5-10 тыңдаушы сынама топ ретінде қатысты. Үміткер оларға сөйлеу әрекетінің 4 түрі бойынша (оқылым, жазылым, тыңдалым, айтылым) жағдаяттық тапсырма беріп, 20 минут көлемінде сабақ жүргізді.Байқау аса тартысты өтті. Қызу талқыдан кейін, білікті педагог-әдіскерлер мен ғалымдардан құралған қазылар алқасы топ жарған жеңімпаздарды анықтады.Қазылар алқасына А. Байтұрсынұлы атындағы Білім академиясының директоры, ахметтанушы, филология ғылымдарының кандидаты Ұлан Еркінбай төрағалық етті. Қазылар алқасының құрамында Астана ІТ университетінің қауымдастырылған профессоры, филология ғылымдарының кандидаты Бекзат Динаева, А.Қ.Құсайынов атындағы Еуразия гуманитарлық институтының доценті, педагогика ғылымдарының кандидаты Нұргүл Шадиева, Тіл саясаты комитеті Әдістемелік қамтамасыз ету және лингвистикалық жұмыстар басқармасының басшысы, филология ғылымдарының кандидаты Айнагүл Көкен, Х.Досмұхамедұлы атындағы Атырау университетінің доценті, филология ғылымдарының кандидаты Айгүл Елеуова болды.Қазылар алқасының шешімі бойынша Бас жүлде мен 500 мың теңге Қызылорда облысының тілдерді оқыту орталығының мемлекеттік тіл оқытушысы Дүзенова Гүлжанат Өмірқызының қанжығасына байланды.Бірінші орынды Жетісу облыстық «Тіл» оқу-әдістемелік орталығының мемлекеттік тіл оқытушысы Елесбаева Жанар Әлмұхаметқызы жеңіп алып, 350 мың теңге сыйлыққа ие болды.Екінші орын мен 250 мың теңге сыйлықты Ақтөбе облысы Тілдерді оқыту орталығының әдіскері Нұржанова Ақмарал Серікқызы мен Қарағанды облысының тілдерді оқыту орталығының әдіскері Ағымбаева Мүнира Шайхсламқызы бөлісті. Үшінші орынға Жамбыл облысы, Қордай аудандық тілдерді оқыту орталығының қазақ тілі оқытушысы Әшімхан Алтынай Бақытқызы, Қостанай облысы әкімдігі мәдениет басқармасының «Тілдарын» облыстық тілдерді оқыту орталығының әдіскері Крікпенова Гүлмира Талғатқызы, Ақмола облысы Ішкі саясат басқармасының Ақмола облыстық оқу-әдістемелік орталығының оқытушысы Жақанова Айман Сейілбекқызы ие болып, әрқайсысы 200 мың теңгеден сыйлыққа ие болды.Павлодар қаласының «Ана тілі» орталығының ұстазы Артықпаева Ақмарал Елдібайқызы, Қазақстан Республикасы Ұлттық ұланы академиясы тілдік дайындық кафедрасының бастығы, Солтүстік Қазақстан облысы тілдерді оқыту орталығының оқытушысы Ақмарал Саркенқызы, Астана қаласы «Руханият» КММ-сі мемлекеттік тіл оқытушысы Сейдахметова Айман Қалдыбекқызы, Алматы облысының «Тіл» оқу әдістемелік орталығының оқытушысы Дусанбаева Гүлмира Әбілқасымқызына ынталандыру сыйлығы мен 70 мың теңге табысталды.&nbsp;Бұдан басқа белсене қатысқаны үшін Алматы қаласы Мемлекеттік тілді дамыту институтының оқытушысы Боранбаева Бубайша Абдрахманқызы, Шымкент қалалық Тілдерді оқыту-әдістемелік орталығының қазақ тілі оқытушысы Әбдіғаппарова Гүлшахар Өтебайқызы, Түркістан қаласы Тілдерді оқыту және дамыту орталығының қазақ тілі оқытушысы Оразов Мадияр Лесұлы, Атырау облыстық Тілдерді оқыту орталығының оқытушысы Тәуекелова Раушан Сағынғалиқызы 30 000 теңге және арнаулы алғысхатпен марапатталды. &nbsp;<figure class="image"><img src="https://knadmin.beoblood.kz/uploads/55bb3179_b77a_46cc_9161_93708bce0fc6_4c546db847.jpg" alt="55bb3179-b77a-46cc-9161-93708bce0fc6.jpg"></figure>

Республикалық байқауда қызылордалық оқытушы жеңімпаз атанды

<a href="https://kyzylorda-news.kz/">Kyzylorda-news.kz.</a> Жуырда еліміздің бас қаласы Астанада «Аспаз fest» өтті. Бұрын соңды Қазақстанда болмаған бірегей жобаға қазалылық қос жерлесіміз Айжан Исаева мен Айман Ермекова есімді бармағынан бал тамған аспазшыларымыз қатысып,төбе көрсеткен еді. Осы орайда 250-ден астам аспазшылардың басын қосқан үлкен фестивалге барып, ерекше әсермен оралған жерлестеріміз жаңалықтарымен бөліскен еді.&nbsp;Аспаздық салада бірнеше жыл бойы қызмет етіп келе жатқан қос ару бүгінде аудан халқына тіл үйіретін тағамдарды ұсынып, көптің ықыласына бөленіп жүрген жайы бар. Тұтынушылардың сұранысына қанағаттандыруда тыным таппай, жұмыстанғандығының нәтижесі болса керек, елімізде алғаш рет ұйымдастырылған шарада үздік аспазшылардың арасынан табылып, еңбектері ескерусіз қалмады. Осындай шараның бір бөлігіне айналған аспазшылар бұл жетістіктерінің құпиясын үнемі ізденісте жүретіндіктерімен байланыстырады.&nbsp;<blockquote>«Аталған фестивальге шақырту алғанда ерекше қуандым. Бұл мен үшін үлкен жетістік. Үздік аспаздармен бір ортада болу, олармен тәжірибе алмасу көптен ойда жүрген дүние еді. Шақырту келгенде ойланбастан бас қалаға қарай тарта жөнелдім. Себебі бұл шараның аспаздар қауымы үшін маңызы зор. Неге десеңіз, аспаздық сала елімізде әлі де болса кенжелеп тұр. Дегенмен табыссыз сала деп айта алмаймын. Тек қынжылтатыны елімізде аспазшыларға деген көзқарас әлі де жолға қойылмаған. Ал кешегі өткен фестиваль аспазшылардың мәртебесін көтеріп, оларға ерекше қолдау көрсету үшін қолға алынған жоба деуге болады. Осындай шаралар көпшілік арасында қалыптасқан ескі стереотипті жойып, бұл мамандықпен үлкен табыстарға жетуге болатындығын көрсетеді. Біздің де мерейімізді өсіріп, қуанышқа бөледі. Осы орайда аспазшыларға көрсетіліп жатқан ерекше құрметі үшін ұйымдастырушыларға ерекше алғыс айтқым келеді», – дейді Айжан Таупикқызы.&nbsp;</blockquote>Ал баламен үйде отырып, кейін аяқ асты аспаздыққа бет бұрған Айман Ермекова табысты аспаздармен иық теңестіріп, фестивалге қатысқанына ерекше қуанғандығын айтып, алған әсерімен былайша бөлісті.<blockquote>«Бұл саланы кәсіби түрде меңгермесем де, қазір тұрақты айналысатын мамандығыма айналды. Соңғы 10 жылда осы салада үздіксіз еңбек етіп келемін. Сол еңбегімнің жемісі лайықты бағасын алып, фестивальге шақырту алдым. Жаңа ортада болып, өз ісіне адал аспаздармен танысып, ерекше толқыныспен елге оралдым. Мұндай жоба елімізге керек-ақ. Себебі аспазшылардың жұмысы үнемі сахна сыртында. Аспаздың қолынан шыққан тағамнан дәм татушылар олардың жұмысының бергі жағын көреді. Ал олардың қызу еңбегі асханада көрініс табады. Бұл көпшілік үшін көзге көрінбейтін жұмыс. Деседе бас қалада өткен фестивальде аспаздарға деген ілтипаттың жоғары екендігін жүрекпен сезіндік. Сол кеште шиырма артында жүретін нағыз майталмандардың еңбегі бағаланып, серпіліске толы сәтті басымыздан өткердік.Аспаздардың еңбегі оңайлықпен келмейтіндігін жұртшылыққа дәріптеп, олардың да қоғамда өзіндік рөлі бар екендігін халыққа кеңінен танытып жатқан «Аспаз fest» жобасының авторы Махаббат Тоғызбаева ханымға ерекше ризашылығымды білдіргім келеді», – дейді Айман Айман Баянбекқызы.&nbsp;</blockquote>Қос жерлесіміздің ауыз толтырып, ерекше ықыласпен баяндағанынанаңғарғанымыз, бұл фестивалді қазақстандық аспазшылардың ортақ жеңісі мен жемісі деуге болар. Мұнда аспазшылардың алдыңғы және кейінгі буыны бір жерде тоғысып, биігі мен алған бағытын, жағымды жаңалықтарын бөлісіп, бір-бірінің қуанышына ортақтасты. Аспазшыларға стимул сыйлайтын бірегей жобадан жаңа серпінмен оралып, тағамдарымен талайды тамсандырып жүрген жерлестеріміздіңжетер жетістігі бұдан да көп болсын деп тілейміз.&nbsp;Айта кетейік, еліміздің он алты облысынан жиналған жобаның ерекшелігі сол әр өңірден келген аспазшылар белгіленген түстер бойынша киініп, қызыл кілем үстімен жүріп өткен. Сондай-ақ сән-салтанатқа толы кеште арнайы сертификатпен марапатталып, құрметке бөленді.

«Аспаз fest»: Қазалылық аспаз елордада марапатталды

<a href="https://kyzylorda-news.kz/">Kyzylorda-news.kz.</a>&nbsp; Қызылорда қаласындағы Тәкей Есетов атындағы №264 мектеп-лицейінің 6 сыныптың оқушысы Сармырзаев Ержігіт Алматы қаласы «Мен де жұлдыз боламын» республикалық байқауының бас продюссері Лариса Мақсатқызының шақыртуымен Түрік елінде киноға түсуге шақырту алған.&nbsp;Қызылорда облысының білім басқармасының баспасөз қызметінің хабарлауынша, халықаралық байқаулардың бірнеше дүркін жеңімпазы, өнерлі өрен Фенике қаласында түсірілген балалар фильмінде басты рөлдердің бірін сомдап, көпшіліктің ықыласына бөленген.&nbsp;Шетелдік киноға түсе жүріп Ержігіт Ата Түріктің 100 жылдығына орай мәнерлеп оқудан ұйымдастырылған халықаралық байқауға қатысып, Түрік елінің атақты шайыры Неджип Фазыл Кысакюректің «Annacigim» шығармасын түрік тілінде орындап бас жүлде иеленді. Алты мемлекеттің өнерпаздары қатысқан таланттылар байқауында еліміздің абыройын асқақтатып, дарынымен дараланған сырбойылық оқушыны бүгін мектеп әкімшілігі, сыныптастары мен ата-аналары салтанатты түрде күтіп алды.&nbsp;Білім ордасының басшысы Бек Сұлтанбекұлы жас өнерпазды ата-анасымен қабылдап, ізгі тілегін білдірді. Ержігіттің анасына бала тәрбиесінде, өнер жолында қолдау көрсетіп жүргені үшін арнайы Алғыс хатпен марапаттап, сый-сияпат көрсетті.<figure class="image"><img src="https://knadmin.beoblood.kz/uploads/a142676a_df55_4738_9b10_1711d0037108_09ee7846af.jpg" alt="a142676a-df55-4738-9b10-1711d0037108.jpg"></figure>

 Қызылордалық оқушы түрік елінде киноға түсіп, халықаралық байқаудың жеңімпазы атанды

<a href="https://kyzylorda-news.kz/">Kyzylorda-news.kz.</a> Бүгінде Қызылорда облысында әлеуметтік нысандардың құрылысы қарқынды жүруде. Мәселен, соңғы 4 ай қорытындысымен облыстағы құрылыс жұмыстарының көрсеткіші былтырғымен салыстырғанда 144 пайызды құрады. Ал қазіргі таңда өңірде 150 жобаның құрылысы жүргізілуде. Бұл туралы Өңірлік коммуникациялар қызметінің ақпарат алаңында өткен брифингте облыстық құрылыс, сәулет және қала құрылысы басқармасының басшысы Ерлан Төрәлиев мәлімдеді.Басқарма басшысының айтуынша, осы жылы облыста 174,3 мың шаршы метрді құрайтын тұрғын үй ел игілігіне берілді. Осылайша, пайдалануға берілген тұрғын үй саны 2,4 пайызға, ал құрылыс көлемі 44 пайызға артып отыр. Сондай-ақ, «Қуатты өңірлер – ел дамуының драйвері» ұлттық жобасы аясында биыл мың шаршы метр тұрғын үй пайдалануға берілмекші. Осы мақсатта тұрғын үй құрылысына мемлекеттік бюджеттен 19,1 млрд. теңге бөлінген болатын. Бұл қаржыға жалпы ауданы 90 мың шаршы метр болатын 1 346 пәтерлі 26 тұрғын үйдің құрылысы салынуда.&nbsp;<blockquote>«Биыл облыста бірнеше әлеуметтік маңызы бар нысандар ашылып, жаңа ғимараттардың іргетасы қаланды. Соның бірі – «Ауылдық денсаулық сақтауды жаңғырту» ұлттық жобасы аясында ауылдық елді мекендерде 27 дәрігерлік амбулаторияны салу жоспарлануда. Қазіргі таңда оның 16-ы салынып жатыр. Бұдан бөлек, қаланың сол жағалауында бір ауысымда 100 адамды қабылдауға арналған емхана мен 300 орындық онкологиялық бөлімшесі бар көп бейінді аурухананың құрылысы басталды. Жобаның жалпы құны – 36,4 млрд. теңге. Осы сол жағалауда құны 2,7 млрд. теңгені құрайтын облыстық қан орталығының да құрылысы да қарқынды жүруде. &nbsp;Сонымен қатар қалада 200 төсектік перинаталдық орталықтың жаңа ғимаратын салу үшін тиісті жұмыстар пысықталып жатыр. Ал білім саласына тоқталатын болсам, бүгінде облыстық бюджет есебінен 10 мектептің құрылысы басталды. Бұған қоса, өңірде «Жайлы мектеп» ұлттық жобасы шеңберінде алдағы үш жылда 15 100 орынға арналған 21 мектептің құрылысы жүргізіледі. Сондай-ақ, қаланың сол жағалауында дарынды балаларға арналған 300 орындық физика-математика &nbsp;мектеп интернатының іргетасы маусым айында қаланады. Биыл облыста бірнеше &nbsp;мәдени нысандар мен спорт орталықтарының құрылысы басталған болатын. Атап айтқанда, «Көп салалы дене шынықтыру сауықтыру кешені» мен облыс көлеміндегі 13 спорт нысаны салынуда. Сондай-ақ, 7 мың адамға арналған жаңа стадионның жоба-сметалық құжаттары әзірленуде. Ал биыл құны 1,6 млрд. теңгені құрайтын жаңа Неке сарайы мен мың орындық Өнер орталығы Сыр жұртшылығына пайдалануға беріледі. Одан бөлек, бірқатар аудандарда 5 ауылдық клуб пен бір мәдениет үйінің құрылысы салынып жатыр», - деді басқарма басшысы Ерлан Кәрімбекұлы.</blockquote>Әлеуметтік нысандар салуда демеушілердің де үлесі зор. Соның бірі &nbsp;- Марат Дүйсенбаевтың демеушілігімен құны 1,5 млрд. теңгені құрайтын «Анаға тағзым» орталығы осы жылдың маусым айында пайдалануға беріледі. «Болат &nbsp;Өтемұратов Қорының» қолдауымен жаңа әуежай терминалы салынуда, ал «ҚазГерМұнай» ұлттық компаниясының демеушілігімен Оқушылар сарайының құрылысы басталды. Құрылыс компаниялар мен жеке кәсіпкерлердің бастамасымен Қызылорда қаласында 26 көпқабатты тұрғын үйлердің қас беттері жаңартылуда.

Қызылордада 150 жобаның құрылысы жүріп жатыр

<a href="https://kyzylorda-news.kz/">Kyzylorda-news.kz.</a> Бүгін бірнеше өңірде найзағай ойнап, жел күшейеді, деп хабарлайды «Қазгидромет».Ақмола облысының шығыс жартысында найзағай күтіледі. Солтүстік-шығыстан жел соғады, облыстың солтүстігінде, шығысында екпіні – 15-20 м/с.Астана қ аласында найзағай күтіледі. Солтүстік-шығыстан жел соғады, күндіз екпіні – 15-20 м/с.Батыс Қазақстан облысының батысында, солтүстік-батысында найзағай күтіледі. Жел оңтүстік-шығыстан, шығыстан соғады, күндіз облыстың батысында, оңтүстігінде екпіні – 15-20 м/с.Қызылорда облысының орталығында, шығысында төтенше өрт қаупі сақталады.Қарағанды облысының солтүстігінде, шығысында найзағай күтіледі. Облыстың шығысында төтенше өрт қаупі сақталады. Қарағанды қаласында таңертең және күндіз найзағай күтіледі.Түркістан облысының тауларында найзағай, солтүстігінде шаңды дауыл күтіледі. Шығыстан жел соғады, облыстың солтүстігінде, таулы аудандарында күші – 15-20 м/с.Қостанай облысында солтүстік-шығыстан жел соғады, күндіз облыстың оңтүстігіңде екпіні 15-20 м/с күтіледі. Облыстың басым бөлігінде жоғары өрт қаупі болады.Павлодар облысының батысында, онтүстігінде найзағай күтіледі. Солтүстік-шығыстан жел соғады, найзағай кезінде екпіні – 15-20 м/с. Облыстың шығысында төтенше өрт қаупі сақталады. Павлодар қаласында түнде найзағай күтіледі. Солтүстік-шығыстан жел соғады, найзағай кезінде екпіні – 15-20 м/с.Маңғыстау облысының солтүстік-шығысында, орталығында шаңды дауыл күтіледі. Оңтүстік-шығыстан жел соғады, облыстың солтүстігінде, шығысында, орталығында – 15-20 м/с.Жетісу облысының Алакөл көлдері ауданында солтүстік-шығыстан жел соғады, екпіні – 15-20, күндіз 23-28 м/с сақталады.Ұлытау облысының орталығында 26-27 мамырда төтенше өрт қаупі сақталады.Ақтөбе облысының оңтүстік-батысында 26-28 мамырда өте жоғары өрт қауіпі күтіледі.26 мамырда Атырау облысының батысында, 27 мамырда батысында, оңтүстігінде, 28 мамырда батыс бөлігінде найзағай күтіледі. 26-27 мамырда облыстың солтүстігінде, шығысында шаңды дауыл тұруы мүмкін. Оңтүстік-шығыстан жел соғады, 26 мамырда облыстың солтүстігінде, шығысында, оңтүстігінде, 27 мамырда басым бөлігінде, 28 мамырда облыстың батысында, солтүстігінде, оңтүстігінде екпіні – 15-20 м/с. 26-28 мамырда күндіз облыстың басым бөлігінде 35 градус қатты ыстық күтіледі. Облыстың басым бөлігінде төтенше өрт қаупі сақталады. Атырау қаласында 26 мамырда оңтүстік-шығыстан жел соғады, екпіні – 15-20 м/с.

Архив