<a href="https://kyzylorda-news.kz/ru/">Kyzylorda-news.kz</a>. Назарбаев зияткерлік мектебінің оқушысы Бекжан Бектұрған математикадағы күрделі тақырыптың келесідей шешімін тапқан. Ол Безье қисығының моделін қарастыра отырып, соның көмегімен көлемі өте аз болатын векторлық кескін алудың жолын жасады.Жас математиктің айтуынша, Безье қисығын алғаш ХХ ғасырдың 60 жылдары француз инженері Пьер Безье «Рено» автокөлігінің сызбасын жасау кезінде қолданысқа енгізген. Қарапайым түрде жеткізер болсақ, Безье қисығы – векторлық қуу немесе аңду сызығы деп түсіндіріледі. Әрі бұл сызық вектордың қуалау бағытындағы нүктелер жиынтығынан құралады екен.<blockquote>«Вектор бағыты қуалау нүктесіне жеткенше өзгеріп отырады. Мысалы, қасқыр қоянды қуады, ал қоян болса, өз ініне қарай қашады. Сонда қасқырдың бағыты әр қадам сайын өзгеріп отырады. Безье қисығын осылай сипаттауға болады. Осы моделдің арқасында интернеттен сурет іздеу мүмкіндігі жеңілдей түседі. Тіпті алдағы уақытта интернеттен сурет көшіруге тосқауыл қоюды, яғни плагиатқа жол бермеуді ұйымдастыруға болады. Сонымен қатар сайт жылдамдығын арттыруда векторлық суреттер таптырмас ресурсқа айналуда. Мен Безье қисығының көмегімен әртүрлі кескіндердің математикалық моделін құру арқылы векторлық кескінін ала алдым. Бұл кескінді басқа әдіспен салынған суретпен салыстыра отырып, нәтиженің дұрыстығына көз жеткіздім. Алдағы уақытта осы тақырыпты кеңейте отырып, python (питон) тілінде математикалық анимациялардың моделін зерттеп, компьютерлік математика саласына өз үлесімді қосқым келеді», ‒ дейді Бекжан Бектұрған.</blockquote>Ол ең алғаш информатика сабағында озат оқушыны «векторлық суреттер неге олай аталады және оның математикамен қандай байланысы бар?» деген сұрақтар ойландырған. Содан соң ғылыми жетекшісімен кеңесе отырып, ғылыми жоба тақырыбы ретінде таңдаған екен.<blockquote>«Жоба барысында мультимедиа және компьютерлік анимация, сонымен қатар векторлық графикаларды жасау мақсатында қолданылатын adobeanimate программасын пайдаландым. Осы орайда маған бағыт-бағдар беріп, қолдап жүрген ұстазым Мұхтар Талғатұлын ерекше атап өткім келеді. Бұл жоба менің ғана емес, ұстазымның да еңбегі, сол кісінің маған артқан үміті деп білемін», ‒ дейді есепке жүйрік оқушы.</blockquote>Бекжан бұған дейін тың жобасын Назарбаев Зияткерлік мектептері арасында өткен желілік ғылыми жобалар сайысында қорғап, жеңімпаз атанған. Осы орайда жоба жетекшісі Мұхтар Талғатұлы оқушы жұмысын тәжірибеге енгізуді ұсыныпты.<blockquote>«Растрлық графикадан векторлық графикаға өту – қазір ең &nbsp;өзекті тақырыптың бірі. Векторлық графика мен математика пәніндегі вектор ұғымы арасындағы байланысты көпшілігі түсіне бермейді. Бекжан өз жұмысында осы байланысты ашық көрсеткен. Векторлық суреттерді тек Corel Draw секілді бағдарламалармен салатын болсақ, Бекжан мұны Geogebra бағдарламасында модельдеп, салу жұмысын анимациялаған. Сонымен қатар .svg форматында векторлық кескіннің салу этаптарын көрсете отырып, Безье қисығы көмегімен әртүрлі кескіндерді алған. Векторлық графикадағы салу әдістері келесідей бөлінеді: доғалық, алтын қима әдісі, т.б. Соларға қосымша ретінде ұсынылған Бекжанның әдісі басқа әдістерге қарағанда өте қарапайым және жадыда өте аз орын алады. Ғылыми жобада растрлық кескін 3,1 Мб. Ал «Алтын қима» әдісімен салынған векторлық кескін 238 кб болса, өзі қарастырған Безье қисығы көмегімен бар-жоғы 745 байт орын алған. Бұл компьютерлік графика саласында үлкен жаңалық, егер мұны практикаға енгізетін болса, жадымен жұмыс жасау кезінде серверлерді үнемдеуге көп көмегін тигізеді. Сонымен қатар сайттағы суреттерді Бекжан жасаған әдіспен салатын болса, сайт жылдамдығы 3-4 есеге артады. Мұның дәлелі ретінде fontawesome.com сайтындағы қолданыстағы векторлық иконкаларды Безье қисығымен салып көргенде, суреттің коды бұрынғысынан 4-5 есеге аз екенін байқауға болады. Geogebra бағдарламасы көмегімен әртүрлі математикалық модельдер мен анимацияларды жасауға болады. Geogebra бағдарламасында Безье қисығының моделі, &nbsp;ондағы бағыттауыштардың жылжуы және жүрген траекториясы көрсетілді. Бір жағынан алғанда, бұл да бұрын-соңды болмаған жаңалық десе болады. Дегенмен, мұнымен шектеліп қалу практикада, яғни компьютерлік графикада қолайсыз болды. Сол себепті коды .svg форматында жазылды. Бұл жұмыстың соңғы кезде зерттеліп жүрген жұмыстардан өзгеше екенін ескере отырып, алдағы уақытта практикаға енгізуді қолдаймын», ‒ дейді Мұхтар Бегайдаров.</blockquote><blockquote>«Жобаның тиімділігін қарапайым ғана мына мысалмен түсіндіруге ‒ Безье қисығы арқылы оптимальді векторлық кескін алу әдісі «Алтын қатынас» әдісінен тиімдірек. Мысалы, менің әдісім арқылы жасалған Назарбаев зияткерлік мектебінің (НЗМ) логотипі 7 байт қана орын алса, «Алтын қатынас» әдісі арқылы жасалған логотип 244 кб алды. Логотип жасаушылардың көпшілігі суреттің идеялдығы мен оған жұмсалған кодтың, тірек нүктелердің, манипуляторлардың аздығына және суреттің көлеміне мән береді», ‒ дейді Бекжан.</blockquote>Айта кетейік, Бекжан дәрігерлер отбасында дүниеге келген. Сондықтан әкесі ұлының ата жолын жалғап, дәрігер болғанын қалайды.<blockquote>«Меніңше, математиканы мектептегі оқу пәні немесе қиын есептердің жиынтығы ғана деп қарау қате секілді. «Математика ‒ даңғазаны қажет етпейтін, саясат пен идеологияға қатысы жоқ, мәңгі де ұлы ғылым» дейді профессор Асқар Жұмаділдаев. Менің ойымша, қай салада да жетістікке тынымсыз еңбекпен жетуге болады. Бірақ адам бойында бейімділік, табиғи қабілет те болу керек. Жалпы өзім барлық пәнді жақсы көріп оқимын. Нақты ғылымдарға басымдық беремін, алайда гуманитарлық пәндерден де &nbsp;алыс емеспін. Тарих пен әдебиетке де ерекше қызығушылықпен қараймын, кейде өлең де жазамын. Ал математика ғылым атасы болған соң, оған қызықпау мүмкін емес секілді. Осы тұста аннам айтқан мына әңгіме есіме түсіп отыр. Менің жасым екіден асқан уақытта әжемнің ауылына, Атырауға қыдырып барған екенбіз. Сол жерде ойнап, жүгіріп жүрген мені бір ер кісі ұстап алып, басымнан ұзақ сипап тұрып, анама: «Қашан айтты, кім айтты дерсің, мына балаңнан өскенде мықты математик шығады, сен тек бейімде, бағыт бер» деген екен. Қазір аз да болса, жетістікке жетсем, соның бәрі ата-анамның маған берген тәрбиесі, дұрыс бағыт-бағдары мен артқан сенімінің нәтижесі», ‒ дейді Бекжан.</blockquote>

Қызылордалық жас математик күрделі тақырыптың шешімін тапқан

<a href="https://kyzylorda-news.kz/ru/">Kyzylorda-news.kz</a>. Елімізде алғаш рет африкалық тары егуді қолға алған ғалым Қызылордада тұрады. Нұрәли Шайқысұлтанұлының бұл жобасы аймақтағы мал шаруашылығының маңызды мәселесін шешуге бағытталған.− Ғылымға деген қызығушылығыңыз қалай басталды? Алғаш рет өзіңіз түбегейлі зерттеген тақырып қандай?− Ғылым саласына қызығушылығым студент кезімде басталған. Студенттерге арналған ғылыми конференцияға қатысып, «Шөп тайлағыштардың кинематикалық көрсеткіштерін арттыру» тақырыбында баяндама жасап I орын алғанмын. 2010 жылы магистратураға, 2012 жылы докторантураға түсіп, университетіміздің профессор-оқытушыларының жетекшілігімен түрлі тақырыптарда ғылыми жобалар жазып жүрдік. Докторлық диссертациям бойынша Арал өңірінің күріш ауыспалы егістерін әртараптандыру мақсатында африкалық тарыны өсіру жөнінде зерттеу жұмыстарын жүргіздік. Бұл менің түбегейлі зерттеген тақырыбым болды. Қазіргі жайылымдық жерлердің деградацияға ұшырауы отарлы мал шаруашылығын дамытуға кедергі келтіріп отыр. Нәтижесінде мал шаруашылығы елді мекендер маңына топтастырылып, мал азығы бойынша мәселелер туындауда. Аталған жағдай мал шаруашылығы өнімдерінің шамадан тыс қымбаттауына әкелуде. Сол себепті тұрақты мал кешендерінде сүт өндірісіне бағытталған фермаларды және бордақылау алаңдарын арзан мал азығымен қамтамасыз ету қажет. Ол үшін егіншілік жем-шөп өндірісін қалпына келтіру маңызды. Бұл мәселенің шешімі − бидай, күріш секілді дәстүрлі дақылдар көлемін азайтып, орнына мал азықтық дақылдар егу. &nbsp;Аса күтімді қажет етпейтін дәстүрлі емес дақылдарды орналастыру да көп пайдасын береді. Осы мақсатта дәстүрлі емес дақыл ретінде африкалық тары дақылын ұсынғанбыз.− Бүгінде ауыл шаруашылығы дақылдарының өнімділігін арттыру жолын қарастырудасыз. Бұл мақсатта қолданылатын агротехникалық шаралар қандай?− Ең негізгісі тұқым себу мерзімі саналады. Дақылдың биологиялық ерекшеліктеріне байланысты және өсіру аймағының ауа-райы жағдайына қарай тұқым себу мерзімі әртүрлі болып келеді. Біз зерттеу жүргізген Қызылорда облысының орта ауыл шаруашылық аймағында жоңышқа және ерте астық дақылдар наурыз айының екінші онкүндігінде егіледі. Екінші топ астық дақылдары жүгері, күріш, тары мамыр айында, ал жылу сүйгіш бақша дақылдары мамыр айының екінші жартысында егіледі. Бұл – өсімдіктің топырақ температурасына қоятын талабы. Африкалық тары өсімдігі жылу сүйгіш дақыл болғандықтан, оны зерттеушілер жылытылған топыраққа себуді ұсынады. Біздің зерттеулерімізде мамыр айының үшінші онкүндігінде, 20 мамыр және 30 мамыр күндері егіп бастадық, яғни кеш көктемгі егіс. Ерте астық дақылдар (арпа, бидай, сұлы) жиналған соң шілде айының екінші жартысында африкалық тарының жазғы егісі де зерттелді. Барлық дақыл секілді африкалық тары да өзінің өніп-өсу дәуірінде даму сатысының бірнеше кезеңінен өтеді. Әр кезеңнің тұсында африкалық тары өсімдігі қоршаған ортаның факторларына өзгеше талап қояды. Бұл әсіресе, дақылдың тұқым себу мерзімі әртүрлі болғанда жақсы байқалады. Әрине, тұқым себу мерзімі бойынша топырақ температурасы мен ылғалдылығында айырмашылық болған соң өсімдіктің барлық көрсеткіштерінен де өзгешелік байқауға болады.− Қолға алған жобаларыңыздың қатарында Арал өңірінде африкалық тарыны экологиялық түрде сынау тақырыбы да бар. Бұл бастаманың ғылыми жаңалығы қандай болды?− «Қазақстандық Арал өңірінде шетелдік селекцияның африкалық тарысының перспективалы сорт үлгілерін экологиялық сынау» тақырыбындағы ғылыми-зерттеу жұмысына жетекшілік жасап, республикалық «Жас ғалым» гранттық қаржыландыру конкурсының негізінде 49 млн теңгеден астам қаржыны құрайтын грант ұтып алдық. Бұл зерттеу жобасының ғылыми жаңалығы деп африкалық тары дақылының тұқым себу мерзімі мен тұқым себу мөлшері, қорек және су режимдерін айтуға болады. Себебі бұл зерттеулер дақылдың минералды тыңайтқыш мөлшері мен суару нормасын нақтылауға мүмкіндік береді. Қазіргі таңда осы мәселелерді басты назарға ала отырып, африкалық тарының перспективалы сорт үлгілерін экологиялық сынау жұмыстары жүргізілуде.− Жалпы осы салада сізді ерекше таңқалдырған жаңалықтар бар ма? Көпшілік біле бермейтін ғылыми ақпараттармен бөліссеңіз…− Африкалық тары − Африка мен Азияның көптеген елінде ертеден өсіріп келе жатқан дәнді дақыл. Осы зерттеулерді жүргізу кезінде африкалық тары жармасын кондитерлік және диетикалық тағамдар дайындау дапайдаланатыны таңқалдырған жаңалық болды. Сонымен қатар нанның дәмі мен түсін жақсарту үшін қара бидай ұнына африкалық тарының ұнын қосуға болады екен. Ал оны әзірге тек мал азықтық дақыл ретінде өсірудеміз.&nbsp;− Ғылымды түбегейлі тауысу мүмкін емес. Сондықтан адам баласы білім жолындағы сапарын әлі де жалғастыруда. Бұл бағытта сіз қалай ізденесіз? Уақытты басқара аласыз ба?− Иә, дұрыс айтасыз, ғылым – үлкен шыдамдылықты талап ететін жол. Сол себепті ең алдымен әр адам өзінің мақсатын айқындап алса, сол мақсатқа жету үшін нақты жоспар құрып, аталған бағытта жұмыс жасаса уақытты басқаруға болады деп ойлаймын.&nbsp;− Сұхбатыңызға рақмет!

Қызылордалық ғалым африкалық тарыны егуді қолға алды

<a href="https://kyzylorda-news.kz/ru/">Kyzylorda-news.kz</a>. Абуәли Ақылбекұлы ‒ мобилограф. Жерлесіміз Ташкентте авторлық мобилография курсын ашқан оның оқырманға айтары бар.‒ Жалпы фото, бейнежазбаға қызығушылық бала кезімнен басталды. Оның себебін әкемнен берілген талант деп ойлаймын. Әкемнің кішкентай кезімізде үлкен камерасы болғаны есімде. Ол сонымен тойға шығатын. Мен видео түсіруге арналған техникаларды ұстап көріп, ерекше қызығатынмын. Біздің үйде әрдайым жаңа техникалар болатын.Мектеп жасынан би өнерімен айналыстым әрі бұл қабілетімді университет қабырғасына келгенде де тоқтатпадым. Біршама елді аралап, жүлделі орындар да алдық. Міне осылай өнер саласында жүргенімде мобилографияға деген қызығушылығым оянып, би жарыстарынан үзінділер түсіре бастадым. Тіпті айналамдағы барлық биші досыма инстаграмға арналған видеолар дайындадым. Бұл менің осы салаға келуіме әсер етті. Әрдайым білім мен шығармашылық саланы алып жүру маған ешқандай қиындық туындатпады. Бірақ НЗМ мектебін бітіріп тұрып, балалық пен мамандығым ретінде актер немесе би жолын таңдағым келмеді. Жақсы оқу орнына түсіп, басқа бір саланы оқығым келді. Өйткені маған әрдайым жаңа эмоция мен тың дүниені зерттеген ұнайды. Осылайша Еуразия ұлттық университетінің «Халықаралық қатынастар» факультетіне, «Шығыстану» мамандығына оқуға түстім. Онда қытай тілін таңдап, Қытайда бір жыл оқып, университетті қызыл дипломға тәмәмдадым. Ол әрине әуелі Алла, сосын НЗМ-дегі мұғалімдерімнің берген білім нәтижесі деп білемін. Сол үшін барлық мұғалімдеріме, әсіресе кураторым Мархабат Мейрамханқызына алғыс айтамын!‒ Мобилография саласы өмірімді өзгертті, себебі оның маған берген мүмкіндіктері өте көп. Қазір өзім қалаған шетелге бара аламын. Кезінде Дубайға қатты барғым келетін еді. Ал бүгінде мобилография арқылы әр ай сайын Дубай қаласына жұмыс бабымен барып тұрамын. Одан басқа мекемелер (ресторандар, ақылы клиникалар, т.б) бартер немесе бартер үстіне ақша төлеу арқылы екі жаққа да тиімді ұсыныстар жасайды. Қымбат деген жерлерде бартер арқылы қажет кезде еміңді ала аласың. Әр күн мүмкіндікке толы, яғни өзіңнің жақсы көретін хоббиді жұмысқа айналдырсаң, еш шаршамай, ынтаңмен жұмыс жасайсың дегім келеді.Жалпы өңдеу, түсіру, монтаж жасау жұмыстары жобаға байланысты жүргізіледі. Осы жерде мобилографияның ыңғайлылығын айтып өткім келіп тұр. Сіз телефон арқылы кез келген жерде, яғни көлікте, қоғамдық көлікте, ұшақта, паркте кетіп бара жатсаңыз да телефоныңызбен монтаж жасай бересіз. Бұл маған өте қолайлы, өйткені телефон әрдайым өзіммен бірге. Менің ең ұзақ уақыт жасаған монтажым 8 сағатқа созылды. Кейде 3 күн қатарынан видеоны әрлеп, көңілден шыққанша монтаж жасай береміз. Мобилографияның көмегімен түсірілген жұмыстың кәдімгі үлкен техникалармен түсірілетін бейнежазба, жарнама ролигынан ешқандай айырмашылығы жоқ болып қалды. Жұмыстың бағасы да жобаға байланысты өзгереді. Қазіргі таңда соткамен түсірген 1 минуттық бір ролигім Дубайда 800-1000 долларға бағаланады.Өмірде кез келген нәрсенің шегі бар, өйткені өмірдің өзі солай құрылған. Әлем digital заманда даму үстінде, сондықтан мобилография әрдайым трендте болады. Әлеуметтік желінің бәрі телефонмен байланысты. Қазір Өзбекстанда авторлық мобилография курсын аштық. Одан бөлек онлайн, оффлайн курстарымыз бар, яғни көршілес мемлекеттерге жаймен қадам басып жатырмыз. Біздегідей бұл сала ешқандай мемлекетте дамымаған. Америка, Дубай, Түрік елі болсын, мобилографияның әлі не екенін білмейді, яғни біз алдамыз деген сөз. Сондықтан жобасын енді бастап жатқан мобилографтарға тек жұмыс жасауға кеңес беремін.

Қызылордалық мобилограф: 1 минуттық бір ролигім 800-1000 долларға бағаланады

<a href="https://kyzylorda-news.kz/">Kyzylorda-news.kz.</a>&nbsp; Аудан әкімі Серік Сермағамбетовтың халықпен кездесуі бүгін Ақирек пен Қамыстыбас ауылдық округтерінде жалғасты. Аудан басшысының іс-сапары алдымен Ақбай ауылында өтті. Ауыл халқымен өткен кездесуде аудан әкімі жыл басынан бері өңірдегі атқарылған жұмыстарды баяндады.<blockquote>«Агроөнеркәсіп кешені саласында 2022 жылы еңбеккерлердің жұмысы жемісті болып, ауданымыз «Мал және балық шаруашылығын дамыту» бойынша аудандар арасында үздік деп танылды. Өткен жылы 13,4 млрд теңгенің ауыл шаруашылығы өнімдері өндіріліп, 104,2 пайызды құрады.</blockquote><blockquote>Былтыр ауылшаруашылығын дамытудың 2022-2024 жол картасын бекіттік. Жол картасы негізінен 3 бағытқа, яғни мал, балық және егін шаруашылығын дамытуға көзделген. Аталған бағдарламаға сәйкес ауданды егін шаруашылығына бейімдеу жұмыстары қолға алынуда, 2021 жылы 166,7 гектар жерге егін егілсе, 2022 жылы бұл көрсеткіш 704,2 гектарға жетті. Ал, биыл 1500 гектарға жеткізуді жоспарлап отырмыз», - деді С.Сермағамбетов.</blockquote>Сондай-ақ тұрғындармен басқосуда аудан басшысы ауылдың географиялық жағдайын ескере отырып, егін егу көлемін арттыру қажет екендігін алға тартты. Тиісінше дихандарға мемлекеттік қолдаулардың жеткілікті екендігін айтып, бірлесе жұмыс жасауға шақырды.Жыл қорытындысы бойынша халықпен кездесу мұнан соң Қамыстыбас ауылдық округінде жалғасты. Онда аудан әкімі барыс жылындағы жетістіктерді тізбектеп, алдағы жоспарларға да тоқталды.<blockquote>«Урбанизация және демографиялық процестерге байланысты 2025 жылға дейін білім ордалары салу көзделіп отыр. Жалпы аудан бойынша 12 мектеп салынса, оның 4-еуі «Жайлы мектеп» бағдарламасы аясында жүзеге асады. Ал осы Қамыстыбас ауылында типтік мектеп салу жобасы қолға алынады. Кәсіпкерлік саласында аудан жоғарғы орында. 2022 жылы ауданымыз бойынша тіркелген шағын және орта кәсіпкерлік субъектілері 6038 бірлікті құраса, оның ішінде 95 пайыздан астамы тұрақты жұмыс жасауда. Осыған орай, өткен жылы Арал қаласында аудандар арасында орталықтандырылған «Кәсіпкерлік үйі» алғаш болып ашылды. Қазіргі таңда, нысан кәсіпкерлерге және кәсібін бастаймын деген азаматтарға бизнес кеңес беру секілді қызмет түрлерін бір орталықтан көрсетуге мүмкіндік туған»,-деп кәсіпкерлікпен айналысамын деушілерге жан-жақты демеудің бар екендігін айтты.</blockquote>Есепті кездесуден соң аудан әкімі жеке мәселелері бойынша тұрғындарды қабылдады.<figure class="image"><img src="https://knadmin.beoblood.kz/uploads/e5a7dc34_c7bd_4372_ad1e_fea3ae4900f8_40835ef19b.jpg" alt="e5a7dc34-c7bd-4372-ad1e-fea3ae4900f8.jpg"></figure>

Арал ауданында биыл 1500 гектарға жерге егін егу жоспарлануда

<a href="https://kyzylorda-news.kz/ru/">Kyzylorda-news.kz</a>. Қыз баласын ерекше қадірлеген қазақ халқы бойжеткеннің бұрымына тағатын әшекейіне де көңіл бөлген. Әсіресе екі үзбелі етіп, күмістен соғылған шолпы қазақ қызының қадірі мен құрметін одан әрі арттыра түскен. Ұлттық әшекейге бүгінгі қоғамның да сұранысы жоғары. Сөзімізге қазақы бұйымдар жасауға ден қойған Алтын Жеткергенқызының бастамасы дәлел.− Алтын, ұлттық қолөнерге бала кезден қызығасыз ба? Шолпы жасауға не әсер етті?− Қолөнерге деген махаббатым ерекше және бұл қабілетімнің дамуына ата-анам үлкен септігін тигізді. Табандылық пен ұқыптылық қасиеттері де бойыма кішкентайымнан сіңген. Осы орайда қызық бір оқиғаға тоқталып өткім келеді. Негізінен халқымыз ырымшыл, көз тию, тіл өтуге сенетінін білесіздер. Менің анам да осы түсінікпен Алматыға барған бір сапарында фурнитураларды біріктіріп, оны резинкаға байлап өте қарапайым етіп шолпы жасап берген болатын. Көлемі кішкентай болса да шолпыны мектепке тағып барып, мектеп басшылығынан, мұғалімдер мен сыныптастарымнан жақсы сөздер естігенім есте. Шолпы жасауға деген қызығушылығым осы сәттен басталған тәрізді.−Шолпы жасап жүргеніңізге қанша уақыт болды? Қайдан немесе кімнен үйрендіңіз?− Шолпы жасауды өткен жылдың жаз айында бастадым. Өзім қазақы тәрбие алған соң, жастайымнан ұлттық киімге, оюларға, жалпы мәдениетіміз бен бай тарихымызға деген қызығушылығым ерекше болды. Соның арқасында тәлімгерді қажет етпей-ақ, ғаламтордағы суреттерден шабыт алып жасай бастадым.− Шашбауды дайындауға қанша уақыт кетеді? Тапсырыс қабылдайсыз ба? Бағасы қолжетімді ме және қажетті заттарды қайдан аласыз?− Шолпы, сырға, алқа сынды бұйымдардың көлеміне қарай айырмашылық болады. Тапсырыс қабылдауға келетін болсақ, менің этно-әшекейлерге арналған (@shashbau_kzo атты инстаграм парақшам жұмыс жасауда. Менің ойымша, шолпылардың бағалары халықтың қалтасы көтере алатындай тиімді. Қазіргі таңда жиі тапсырыс түсуде және менен алған бұйымдарды күнделікті тағып жүрген бойжеткендер мен қыздар санының артуы қатты қуантады! Қазір шолпыға қажетті құрал-саймандар мен жабдықтарды Алматыдан тапсырыспен алдырып жүрмін.− Әр шолпыға жеке ат бересіз бе? Жалпы шашбау жайлы тың ақпарат білсеңіз, оқырманмен бөліссеңіз…− Алдағы уақытта шолпыларыма қазақы ат беру ойымда бар. Мысалы “Тұмар”, “Ою” сияқты есте қаларлық қысқа есімдер оларға қосымша көрік беретін тәрізді. Шолпының сылдыры қызды жамандықтан қорғайтынын, ертеректе бойжеткендер шолпы мен шашбауды басын тік, арқасын түзу ұстау мақсатымен таққандығын тағы бір еске салғым келеді. Бұрын шашбау мен шолпылардың салмағы сегіз-он келіге дейін жеткен.− Қолөнерден бөлек, қандай дүниелерге қызығасыз? Бос уақытыңызда немен айналысасыз?− Шабытым келгенде сурет саламын. Әлеуметтік желілерде түсірген бейнежазбаларым мен фотосуреттерімді әрлеу де менің сүйікті хоббиіме жатады. Бұдан бөлек бос уақытымда қазақ тіліндегі кітаптарды, шығармаларды оқығанды жақсы көремін. Жақында Жүсіпбек Аймауытовтың “Ақбілек” романын аяқтадым.&nbsp;

Қызылордалық оқушы шолпы жасап, бизнесінің шырайын кіргізуде

<a href="https://kyzylorda-news.kz/">Kyzylorda-news.kz.</a> Бүгін Қазалы ауданында 14 наурыз – Көрісу күні жоғары деңгейде ұйымдастырылды. Атаулы күнге орай Ақтан батыр ауылында «Наурызнама бастауы – көрісу күні» атты мерекелік шара өтті.&nbsp;Алдымен аудан әкімі Мұхтар Оразбаев ауыл ақсақалдарымен қазақы салтпен қауышты. Мұнан соң ауыл балаларының асық ату, ләңгі тебу, қазақша күрес сияқты ұлттық спорт түрлерінен жарысын тамашалады. &nbsp;Татулық пен бауырмалдыққа шақыратын тағылымы мол мерекеде аудан әкімі Мұхтар Әуесұлы тал көшеттерін отырғызды. Жиналған көпшілік ауыл аналары дайындаған ыстық нан мен қымыздан дәм татты.&nbsp;Мерекелік шарада аудан әкімі Мұхтар Оразбаев жұртшылықты Наурыз мерекесінің бастауы – Көрісу күнімен құттықтады.<blockquote>«Бұл күні адамдар арадағы өкпе-ренішті ұмытып, бір-біріне береке-бірлік тілейді. Біздің еліміз үшін достық пен ынтымақты үлгі ететін осындай жарқын мерекенің маңызы зор. Сондықтан бүгінгі шарада барша қазалылықтарды Көрісу күнімен шын жүректен құттықтаймын! Рухымыз биік, іргеміз берік, еліміз аман, жұртымыз тыныш болсын»,- деді Мұхтар Әуесұлы.&nbsp;</blockquote>Амал мерекесінде Ақтан батыр және Жанқожа батыр ауылдарының әжелері қауышып, әдет-ғұрыпқа сай шашу шашты. Қазақтың ұлттық тағамдарынан дәм ұсынып, Қыдыр ата ақ батасын берді. Ауыл тұрғындары арасында жаңылтпаш, мақал-мәтел мен бата-тілек айтудан сайыс өткізіліп, жеңімпаздар арнайы сыйлықтармен марапатталды. Сондай-ақ, халқымыздың салт-дәстүріне негізделген театрландырылған көрініс пен пен концерттік бағдарлама халық назарына ұсынылды.Өнерпаздар ән мен жырдан шашу шашып, халыққа ерекше қуанышты көңіл-күй сыйлады.<figure class="image"><img src="https://knadmin.beoblood.kz/uploads/335948222_177873028364225_6106115406807779667_n_2255e8e1ad.jpg" alt="335948222_177873028364225_6106115406807779667_n.jpg"></figure>

Қазалылықтар Көрісу күнін атап өтті

<a href="https://kyzylorda-news.kz/">Kyzylorda-news.kz.</a>&nbsp; Ұсталық өнер – көнеден үзілмей келе жатқан киелі кәсіп. «Ұсталы ел озар, ұстасыз ел тозар» деген халқымыз темірден түйін түйіп, ағаш жонған ісмерді «темірші», «дарқан», «ұста» деп төбесіне тұтып қадірлеген. Әйгілі Махмұд Қашқари «ағашты ұзын кес, темірді қысқа кес» деп ұсталық нақылды өсиет етіпті. Бағзыдан жеткен сақ әшекейлері де, мыңдаған жылдар мызғымай тұрған балбал мүсіндер де осы ұсталардың көз майының еңбегі.Қазақ жерінде осындай он саусағынан өнер тамған небір ұсталар мен ғажайып ұстаханалардың болғаны белгілі. Бүгінде ата жолын жалғастырар ұрпақ көбеймесе азайған жоқ.Кәсіпкерлікті дамытып, мемлекеттік бағдарламаның игілігін көрген жандардың бірі – Қармақшының Дүр Оңғар ауылында тұратын Ерсін Өтепов есімді ұста.Қазір ол шағын цехында тікен сым мен қоршауға арналған тор, шеге секілді ауыл шаруашылығына қажетті материалдар шығарумен айналысады. Оған себеп те жоқ емес. Өйткені мұндай құрылысқа қажетті заттар біздің өңірде кейінгі бірнеше жылда ғана өндіріле бастады. Міне, кәсіп иесі осы олқылықтың орнын толтыруға тырысқан. Әуелі «Бастау бизнес» жобасы бойынша курс оқыған ол кәсіпкерліктің қыр-сырын меңгеріп, «Қызылорда өңірлік инвестициялық орталығы» арқылы 5 млн теңге несиеге қол жеткізеді. Сосын Қытайға өзі барып, өндіріске қажетті құрал-жабдықтар сатып алған. Сол жерден техниканың тілін меңгеріп, елге жете салысымен өнімдерін шығара бастайды.<blockquote>– Арғы аталарым темірден түйін түйген ұста болған. Әкем де жас күнінде ұсталықпен отбасымызды асырады. Бұл қасиет маған қаннан берілсе керек. Бала күнімнен темірден әйтеуір бір зат жасауға бейім едім. Соның бәрі осы кәсіпті қолға алуыма себепші болды. Негізгі мамандығым – инженер-механик. Қазір мұндай жобамен облыста бірнеше адам айналысады. Ал мен бастаған кезде баламасы болмаған. Тек еліміздің 5-6 өңірінде ғана бар еді. Уақытында саланы әбден зерттедім. Сосын кәсіпкерлік палатасының тегін оқуына қатысып, білімімді шыңдадым. Соның арқасында жобамды сәтті қорғап шығып, грант ұтып алдым. Әуелгіде шеге өндірісін мақсат еткеніммен, кейін бір бағытпен шектелмей, қоршауға арналған тор мен тікен сымды қоса қамтыдым. Қазір аяқалысымыз жаман емес, қондырғымыз бір сағатта тікен сымның 70-80 метрін шығарса, тор сеткадан 60-70 метр өнімді дайын күйінде шығарады, – дейді кәсіпкер.</blockquote>Ал шеге өндірісі биылдан бастап тоқтап тұр екен. Өйткені шикізат бағасы өнімді сатқандағы бағамен пара-пар болыпты, яғни, нарықтағы бағасы өсіп кеткен. Мәселен, қазір шегенің келісі 600-700 теңге болса, оған кететін шикізат сымның бағасы 750 теңге болып тұр. Жалпы, жұмыс істеп тұрған шағында қондырғымен минутына 270-280 дана шеге шығарыпты. Бүгінде цех толық жұмыс істеп тұрған жоқ.Әйткенмен қалған екі құрылыс материалына өңірде сұраныс жоғары болмаса, төмендемеген. Оған себеп – бағаның айтарлықтай арзандығы. Содан болар, облыстағы шаруашылықтар мен құрылыс дүкендері нарық бағасынан төмен өнімді шыға салысымен алдыртады екен. Мұнда ұзындығы 200 метр болатын бір бума тікен сымның құны – 11 мың теңге. Ал қоршауға арналған тордың шаршы метрі орташа есеппен 1000-1500 теңге көлемінде саудаланады.<blockquote>– Жалпы шикізаттан бізге қажеттісі сым ғана. Ол қалың, орташа және қатты, жұмсақ болып бөлінеді. Қазақстанда оны бірнеше зауыт шығарады. Ал мен көбіне Қытай мен Ресейден алдыртуға тырысатынмын. Себебі еліміздегі бағамен шетелдегі бағада айтарлықтай айырмашылық бар. Қазір саяси ахуалға байланысты сымды Алматыдан алып отырмын. Ал енді өнімімізге келсек, сұраныс жоғары. Қазір біршама танылып та үлгердік. Аудандардан тапсырыс жиі түседі. Одан бөлек көрші облыстардан да тапсырыс аламыз, – дейді ол.</blockquote>Орайы келгенде айта кетейік, Ерсін үш ағайынды. Олар қазір отбасылық бизнесті жолға қойған. Ағасы мен інісі – ағаш шебері. Екеуі тұрмысқа қажетті жиһаздың түр-түрін жасайды. Екеуі «Қарапайым заттар экономикасы» бағдарламасы аясында несие алып, кәсібін кеңейткен. Қызылорда қаласынан арнайы орын алып, ішін заманауи құрылғылармен жабдықтаған. Қазір олар ауылдың да, тіпті Астана, Шымкент сияқты ірі қалалардың да сұранысын қамтамасыз етуде.&nbsp;<blockquote>– Ағам мен інім Қызылорда қаласында. Мен қарашаңырақта қалдым. Қазір қасымда 2 жігіт жұмыс істейді. Біреуі тікен сым жасасса, екіншісі тор жасауға жәрдемдеседі. Ендігі мақсат – тағы да қосымша шуруп, профиль, шифр шығаратын станоктар алып, өндірісті одан әрі ұлғайту, – дейді Ерсін.</blockquote>&nbsp;

Ұсталық – ұтымды кәсіп

<a href="https://kyzylorda-news.kz/">Kyzylorda-news.kz.</a> Бүгінде білім саласындағы тартысты бәсекенің бірі – «Ұлттық мектеп лигасы». Бұл оқушылардың салауатты өмір салтын ұстануына, ептілікпен ерек көрінуіне септесетіні белгілі. Бұл сайыс биыл да жалғасын тауып, дода дүбірін естіртуде.10-12 наурыз күндері Қызылорда облыстық білім басқармасының Аймақтық дене тәрбиесі методикалық орталығының ұйымдастыруымен 5-6 сынып мектеп оқушылары арасында үздік мектеп командасын анықтау мақсатында «Ұлттық мектеп лигасы» бағдарламасына сәйкес Волейболдан «Шұбар доп», Гандболдан «Ұшқыр доп», Баскетболдан «Алтын доп» спорт түрлері бойынша облыстық іріктеу өтті. Жарысқа Қазалы ауданынан 6 команда, 60 жуық оқушы қатысты.Алуан-алуан жүйрік бар, әліне қарай шабады. Бұл аламанда да қазалылық жүйріктер жеңімпаздар қатарынан табылды. Облыстық іріктеу жарыстарының нәтижесі бойынша гандболдан «Ұшқыр доп» 5-6 сынып ер балалар мен қыз балалар арасындағы жарысқа №91 мектеп командасы қатысып, алтыннан алқа тағынды. Шәкірттің мерейі тасып, ауданның абыройы асуын команда жетекшілері Д.Бақытбергенов, Б.Алиасқаров, Ғ.Төлегеннің еңбегі ерекше екенін айта кетейік. Бұдан бөлек волейболдан «Алтын доп» сайысында №92 мектеп командасы екінші орынға тұрақтап, жаттықтырушылары Ж.Мамаев, Е.Қайсарға орасан алғысын білдірді.Осы доданың ер балалар арасындағы тартысында №96 мектеп командасы үздік үштікті қорытындылады. Қ. Әбдіжаппар, А.Әлімжан күміс медаль иегерлерін баптады. Сондай-ақ баскетболдан қыз балалар арасындағы тартыста Б.Балымбетов пен Ғ.Алиасқаров жетектеген №249 мектеп командасы үшінші орынды қанжығаға басты.Облыстық жарыста жеңімпаз атанған мектеп командалары республикалық «Ұлттық мектеп лигасы» жарысына жолдама алды. Жас спортшылар Қазалы ауданының абыройын алдағы сайыста да асқақтатады деген сенім мол.

Қазалы: Жас спортшылар жарады

<a href="https://kyzylorda-news.kz/">Kyzylorda-news.kz.</a> Қызылорда облыстық «Жастар ресурстық орталығында» қайырымдылық жәрмеңкесі өтті.Қайырымдылық – халқымыздың ең ізгі қасиеттерінің бірі. Қамқорлықты қажет ететін жандарға қол ұшын беру арқылы адам баласы жақсылыққа қадам бастайды. Ал мұқтаж жандарға қамқорлық жасау – әрбіріміздің азаматтық парызымыз.Бүгін «Жастар ресурстық орталығының» ұйымдастыруымен 14 наурыз — Көрісу күніне орай «Сабалақ» саяжайында әлеуметтік аз қамтылған, жалғызбасты, қамқоршысынан айырылған, мұқтаж отбасыларға арналған «Көшпелі әлеуметтік жәрмеңке» өткізілді. Жәрмеңке барысында орталықтың әлеуметтік дүкенінде жинақталған жаздық, қыстық киімдер, балалар киімдері және аяқ-киімдер тұрғындарға тегін таратылды.Әлеметтік көмек алуға құқылы аз қамтылған, көпбалалы басқа да санаттағы отбасыларға көмек қолын созуды мақсат еткен жәрмеңкеде 100-ге жуық отбасы өздеріне қажетті киім-кешектерін алып, шексіз ризашылықтарын білдірді. Алдағы уақытта мұндай игі шаралардың жалғасын табуын сұрады.Сауабы мол шарада «Қызылорда қаласының жұмыспен қамту орталығы» КММ-нің мамандары Аман Бақыт пен Нұрсұлтан Дюсембаев және «Отбасы» банкі Қызылорда облыстық филиалының маманы Маржан Алигентова саяжай тұрғындарына өз салалары бойынша тегін кеңес беріп, сауалдарына жауап берді.<figure class="image"><img src="https://knadmin.beoblood.kz/uploads/335626218_1347416709161970_427091751530824995_n_ddb17da09f.jpg" alt="335626218_1347416709161970_427091751530824995_n.jpg"></figure>

Қызылордада қайырымдылық жәрмеңкесі өтті

<a href="https://kyzylorda-news.kz/">Kyzylorda-news.kz.</a> Ақжар ауылдық С.Бөртебайұлы атындағы клуб үйінде «Дана ене, дара келін» тақырыбында ене мен келін арасындағы сыйластықты дәріптеу, жас аналарға, қыз-келіншектерге үлгі ету мақсатында байқау өтті. Байқауда 65 пен 45 жас аралығындағы әжелер өз келіндерімен сайысқа түсті. Қазақтың ұлттық киімін киген олар сахнаны жайнатып жіберді. Сайысқа қатысушылар өздеріне тән әдебімен, инабаттылығымен байқаудың алғашқы таныстыру сәтінде-ақ көпшіліктің ризашылығын тудырды. Бақ сынаушы ене мен келіндер үлкен дайындықпен келгендерін көрсете білді.Екінші «Өнерлі өрге жүзер» бөлімінде Төлеу Медетова келіні Жансұлуға өсиет арнаса, келіні енесіне өзінің жүрекжарды жыр шумақтарын оқыды. Ал Жанар Қойшығұлова келіні Мөлдірге бау-шу тоқудың өзіндік ерекшеліктерін көрсетсе, ақ халатты адам жанының арашашысы Қалдыгүл Тоқсанбаева психолог келіні Ақерке Айтмахановамен бірге кішкентай Абылайдың сүндет тойын сахналады.Сондай-ақ Дүйсенкүл Жайсаңбаева келініне арнап алқа әзірлесе, келіні Алтынай Әуезханова мың бұрала «Қос алқа» биін орындап, көрермендерді өнерімен тәнті етті. Гүлнар Жұмахметова мен келіні Әсел Амантаева «Ене мен келін» әнін орындап, көрермендерге дүркірете қол соққызды.Қатысушылар ұлттық салт-дәстүрді ұлықтау мақсатында сұрақтарға жауап беріп, «Сұлулық әлемі» байқауының шарттары бойынша ұлттық киім үлгілерін ұсынды. Сахнадағы түрлі үлгідегі қазақтың ұлттық киімін киген, жанына немерелерін ерткен байқауға қатысушыларға көрермендер дән риза болды. Әсіресе, әжелердің жас ерекшелігіне байланысты киетін кимешегінің тамаша екі нұсқасын ұсынған Қалдыгүл өзінің ісмер ене екенін байқатты.Үйге берілген тапсырма бойынша ұлттық тағамдарды әзірлеп келген олардың дастарқанынан құрт, айран, ірімшік, қымыз, жент, қауынішек, қауынқұрт, тағы басқа тіл үйірер тағамдармен бірге Дүйсенкүл мен Алтынайдың өз қолымен әзірлеген қарынға салып жылқының қазы-қарта, жал-жаясынан пісірген «Қарын бүрме» тағамы мен асқабаққа салып пісірген қуырдағы ерекше болды. Байқауға қатысушылардың тыныс-тіршілігі, сыйластықтары жайлы бейнебаяндары да көрерменге көңілді күй сыйлады.Жарыс қорытындысы бойынша І орынды Парахат әулеті жеңіп алса, ІІ орынды Таубаевтар әулеті иеленді. Ал ІІІ орынды Жүнісовтер әулеті қанжығасына байлады. «Парасатты ене» номинациясына Төлеу Медетова, «Өнегелі ене» номинациясына Жанар Қойшығұлова лайық деп танылды. Қатысушыларға ауыл әкімі Нұржамал Бектайқызы, әйелдер кеңесінің төрайымы Рая Қайырқызы, С.Бөртебайұлы атындағы клуб үйінің меңгерушісі Роза Кенжеғұлова, зейнеткерлер Бихан Дүйсенова, Рая Бұрқұловалар жүрекжарды лебіздерін білдіріп, тәлімі мол ісшара үшін ұйымдастырушыларға алғыс айтты.Байқау жеңімпаздарына алғыс хат пен бағалы сыйлықтар табысталды. Кеш соңында ауыл өнерпаздары ән мен жырдан шашу шашты.&nbsp;

Қармақшыда ене мен келін сайысқа түсті

<a href="https://kyzylorda-news.kz/">Kyzylorda-news.kz.</a> Әлемнің өзегінде жасырынған әсемдік пен үйлесімділікті, болмыстың жылы, шырайы мен көңіл сергітер мән-мағынасын ақынжанды рух иелерінің маржандай тізілген әдемі сөздер арқылы жеткізе білудің бір түрі – поэзия. Ол – адамның ой-қиялы жете бермейтін, қыранның қанаты талатын асқақ әлемді танып-білуі жолындағы қадам немесе осы жолда жұмсалған ғайыптан сыр аулағысы келген ақынның жан күйзелісі. Өлеңнің ырғағы сол сәттегі ақынның рухани күйі мен ішкі толқуына қарай кейде күшейіп, кейде мүлдем нәзік болып шығады. Сондықтан поэзиядағы әрбір дыбыс пен әрбір сөзді өлең жолдары төгілген кездегі айтушының көңіл-күйінен ғана толық түсінуге болады.Ақынның дүниетанымына, сезіміне әсер еткен сеніміне, мәдениеті мен түйсіну қабілетіне қарай туып, белгілі пішінге ие болатын өнердің түрі де осы – поэзия. Бірақ оның мәнін тереңдетіп, адам ақылынан жоғары деңгейге шығаратын тылсым – шабыт. Шабытпен толқыған жүректе титтей атом алып күнге, тамшы теңізге айналады. Көңілде бүршік атқан ойлар қиялмен қанаттанса, шексіздіктің қақпасын қағып қайту мүмкіндігіне ие болады.Ол бүгінді нұрландырған сәуле, келешекке жарығын шашқан қуатты шам және шексіздіктен бастау алатын ғашықтықтың әні және адамның толқуынан туатын әуен. Нағыз өлең арқылы ақиқатқа адамның көзі ашылып, көңілдерде көктем орнап, шуаққа бөленеді, алыстағы жақындайды, рух қанаттанады.Егер ақын сезгендерін елестетіп, ойының дұрыстығын ақыл елегінен өткізе алса, содан соң шабыттан туған сырлы ойлар сөйлем боп өрілгенге дейін ой бастапқы күйінде сақталса, бұл шығарма ұзақ уақыт оқылатын болады. Олай болмаған жағдайда, өлең деп ұсынғанымыз асыл тасты жез жүзіктен немесе көмірмен оюланған алмастан айырмашылығы болмайды. Нағыз ақынның әр сөзі мен сөйлемдерінен сиқырлы сарайдың қараңғы дәліздерін кезіп жүрген әр дыбыстан селт ететін ерекше сезімтал саяхатшының көзқарасы мен сезімдерін кездестіруге болады.Өлеңнің сыртқы пішінінде көбінесе сөз, сөйлем басқадай өлшемдер, сөздің мәнері сияқты элементтер маңызды рөл ойнайды. Ал оның ішкі пішініне келсек, онда адам рухынан бастау алып, оның жан дүниесінде бүршік жарған ой керуенін жеткізу үшін қажет болған кезде гүлдердің түр-түсі мен көбелектердің қанаттары сияқты ең айшықты сөйлемдерді, реті келгенде түскен жерін ойып түсетін оттай сөздерді және сыбызғының сызылған үнін айна қатесіз елестететін сәтті теңеулерді іздеп табады да, оларды орын-орнына үйлестіріп қояды. Міне, мұны өлеңнің музыкаға айналуы деуге болады.Құпия-сырлар мен түрлі ишаралар – өлеңнің негізгі қайнар бұлағы. Осы табиғаты мен сипатына қарай өлең терең мағынаға ие болады. Сөйтсе де, терең мағына үлкен ұғымды қамти алатын өлеңнің бұл өзгешелігі оның өзіне тән қасиеті болып табылады, сол себепті де қандай да бір ауыр жүкті арқаласа да, бұл жүк туындының шегінен асып, ауа жайылып кетеді. Өлең ақынның шабытына қарай түрлі иірімдерге ие болып, мағынасы тереңдесе де, ол өзінің әуел бастағы қасиетін бәрібір жоғалтпайды.Өлеңге ой мен сезімнің біте астасуынан туатын сарын үстемдік етеді. Алайда адам денесіндегі гипофез безі іспеттес ой мен сезімнің артында оларға ұдайы әмірін жүргізіп, әсер ететін екі маңызды элемент – ниет пен көзқарас бар. Олар өлеңнің барлық жолдары мен шумақтарына өз ізін қалдырады, ой шатқаяқтай бастаған кезде оны құрдымға жібермей ұстап қалады және сиқырлы шам сияқты сезімнің жолын жарық қылады.Ақын – кейде бұл қоғамның тыныс алу жолы, кейде аузы мен тілі. Сондықтан егер біз оның өсіп-өнген қоғамының ерекшеліктерін ескере отырып саралайтын болсақ, әрбір поэзиялық туынды бізге көп жайтты аңғартады. Егер оның туған бесігі мен нәр алған ортасын есепке алмасақ, одан көп нәрсе түсіне алмаймыз.Абдулла Байкенжеев Қармақшы табанындағы Иіркөл ауылында орта шаруаның отбасында дүниеге келген. Қызылорда ауылшаруашылық техникумында техник-механик мамандығы бо¬йынша білім алған. 1968 жылдан бастап шофер, құрылыс қоймасы мен күріш ақтайтын диірменнің меңгерушісі болып еңбек еткен. Иіркөл ауылы ардагерлер кеңесінің төрағасы қызметін атқарған.Сол жылдардан бастап ауылда еңбек ете жүріп жазған өлеңдері баспасөз беттерінде жиі жарық көріп отырған. Ақын туындыларының арқауы – туған жер, Отан, халқымыздың ұлы тұлғаларына арнау, адамгершілік мәселелері және табиғаттың тылсым сырлары жайлы болып келеді. Өлеңдерінде кейінгі жас ұрпақты білім алуға, ғылым мен жаңа технологияны игеруге шақырады. Қоғам өмірінде және кішкентай ауылдың күйбең-күйкі тірлігінде ішін-тұра кездесетін келеңсіз жайттарды ащы мысқылмен түйреп, көпшілікке жеткізуге тырысқан. Ауылдағы алдында жол бастап жүрген ағаларына тай-құлындай асыр салып ойнап өскен құрдастарына, ізінен ерген ізетті інілеріне арналған өлеңдері де бір төбе.Бір сөзбен айтқанда, қолына қалам ұстаған қарапайым еңбек адамы Абдулла Байкенжеевтің "Елімнің сырын еттім жыр" атты жыр жинағының бірлігі жарасып, берекелі өмір сүріп жатқан Иіркөл ауылының руханиятын дамытуға қосатын үлесі зор деп ойлаймыз.&nbsp;

Жаңа кітап жарық көрді

<a href="https://kyzylorda-news.kz/">Kyzylorda-news.kz.</a> Бүгін – Көрісу күні. 14 наурызда еліміздегі өнірлер Наурыз мейрамының басы Көрісу мерекесін атап өтіп жатыр. Солардың ішінде Жалағаш ауданы да бар.<img src="https://knadmin.beoblood.kz/uploads/333646999_203847412233858_5849581138884633553_n_601ce04b55.jpg" alt="333646999_203847412233858_5849581138884633553_n.jpg">Бұл күнді Амал мерекесі деп те айтады. Халық қыстан аман-есен шыққанына, көктемге аяқ басып, туыс- туған, көрші-көленюңмен жүздескеніне қуанып, қол алысып, төс қағысады. Бір-біріне деген араздық, өкпе-ренішті ұмытып, амандық тілейді.Бұл мерекені «Көрісу» немесе «Амал» мерекесі деп атайды. Таң атысымен «Көрісу» мерекесін асыға күткен әрбір отбасы дастарқанын қазақтың құрт, бауырсақ, ірімшік, сары май, уыз сынды ұлттық тағамдарымен көмкеріп, наурыз көжесін дайындап, табалдырығын аттаған әр қонағын жылы жүзбен қарсы алады. Оларға ерекше ілтипат көрсетіп, төріне шығарып, ас ұсынады. Дәл осы күні әр адам өзінен жасы үлкен кісілердің шаңырағына кіріп, амандасып көріседі. Барған үйіне «Бір жасыңызбен!» деп еніп, жаңа жылға аман-есен аяқ басқан жора-жолдас, туған-туысқандарын құттықтайды. Бір-біріне деген өкпе-реніштері болса кешіріп, амандық-саулық тілеседі. Сондай-ақ, әр отбасы көршілерімен көріседі. Бұл күні әр адам міндетті түрде үш үйдің есігін ашуы керек, яғни түске дейін үш үйге кіріп, көрісіп үлгеруі тиіс деген ырым да бар. Үй-үйді қыдырып жүргенде кішкентай балаларға аналары шағын дорба ұстатып қояды. Балақай қай үйге көрісуге кірсе, сол үйдің дастарқанынан ауыз тиіп, бауырсақ, тәттілерден салып алады. Бұл жоралғы «жыл бойы балаларымыз тоқ жүрсін, дастарқанымыз аралас болсын, қарым-қатынасымызға сызат түспесін» деген ниеттен туған екен.<img src="https://knadmin.beoblood.kz/uploads/336471651_741552274014721_1746881206777821219_n_5cee1b215c.jpg" alt="336471651_741552274014721_1746881206777821219_n.jpg">Иә, көктемде мал төлдеп, ол аяқталған соң желі тартылып, бұзау, құлын байланып, қозы-лақ көгенделіп, мал сауу басталады. Осы уақытта мал иелері желі басына келіп, «ел тоқ болсын», «ақ мол болсын», «мал басы көбейе берсін» деген тілекпен ырымдап төл ноқтасы мен бұршағына, қазығына май жағып, ақ құяды. Мұндай ырымдар жылқыда «бие бау», басқа малда «қазық майлау» деп атайды. Көненің ізін жалғаған көнермес салт-дәстүрді бүгін Т.Жүргенов ауылдық мәдениет үйі және Мәдениет, Аққыр, Жаңаталап ауылдық клубтарының қызметкерлері қайта жаңғыртты. Елдегі молшылықты, татулықты, тұтастық пен бірлікті сақтаған Жалағаш жұртшылығы қазыналы қарияның ақ батасы мен ақ жаулықты ананың ақ тілегіне бөленді.<img src="https://knadmin.beoblood.kz/uploads/335857524_566686458567951_7369884602884048087_n_0d8f65192c.jpg" alt="335857524_566686458567951_7369884602884048087_n.jpg">&nbsp;

Архив