<a href="https://kyzylorda-news.kz/">Kyzylorda-news.kz</a> Облыс әкімінің қолынан «Ерен еңбегі үшін» медалін алып тұрғанында толқымайын десе де толқыды. Марапатқа қызықпаймын дейтін еді, біреулер құсап оның соңынан қуып әуре де болмады, бірақ одан бұрын өзін сол құрметке лайық көрген таза пейілдің шапағаты шаршаулы көңілге кәдімгідей дем беріп, жүректі толқытты.Ойланып отырса, он жеті жасынан қаламға телінген құштар тілек одан бір суымапты. Ерте есейтіп елдің алдына шығарыпты.Оныншыны бітірген жылы дәрігер болуды мақсат тұтты. Жасынан шаруашылықтың ауыр қосын жеккен ата-ананың саушылықтан ерте қалуы қайтсем соларды емдеп жазамын деген тілекке ойысқандықтан болар, бірақ одан жолы болмады. Жүрегіне жақын қаламға деген құштарлық одан да биік құзіретті - қоғамның жанына батқан сыздауықты сылып тастауға мүмкіндік беретін тағдыр талайын тарту етті.Бойындағы талабын таяныш етіп осы бағытта жоғары білім алуға қол жеткізген қайратты жас бауырларына өзі бас-көз болып, етінің тірілігінен елдік істің шаужайына жармасып, көпті бастар көшелігімен өнеге болған әке жолын әрі қарай жалғады. Алғашқы жылдары жастар ұйымына жетекшілік етіп, шалғайдағы ауылдың сүреңсіз өмірін өміршең мазмұнмен өрнектеудің жолын іздеп басы қатты. Ел әлеуеті мен мәдениетін көтеруде Тәңір сыйлаған шығармашылық қуат тылсым түйсікті түртіп оятып, жарқын жобаларға тыңнан түрен салып, жұлдыздай аққан тұлпар-талаптың жалына жармастырды. Ұлт, нәсіл, шекараға жіктелмейтін адами жаратылыстың әділеттігі қияндағы қазақ баласының көкірегін көкке тіреп, арманын айға біледі. Қызылдың малға жайлы құтты қонысы елге аты шығар жалын кеуде ерлерден де кенде емес екенін іспен дәлелдеу үшін комсомолдар бригадасын құрып оны өзі басқарды.Қолы сәл қалт еткенде ауылдың қалқанқұлақтарына қақпа қорытып, алаөкпе қып доп қуалатты. Волейбол, баскетбол алаңында алдымен өзі алашапқын алдыға түсіп, қатарына ерген іні-бауырды спортқа баулыды. Ауылдан Әлем чемпионын шығарамын деп әлектенді. Еңбегі еш кетпеді. Әлем чемпионы болмаса да намысты қолдан бермес, өңшең сен тұр мен атайын бөріктілерді тәрбиелеп шығарды. Мейлі ғалым, жазушы немесе кәсіпкер бол, спортқа жаны жақын адамның тірлігі өнімді, кәсібіне жүйрік, денсаулығы мықты, мемлекетке де зор пайда әкеледі емес пе? Адами капитал дегеніміз осы. Баланың бәрі дарынды, соның көзін тауып, өзін танытуына, өсуіне, өнуіне жүрек жылуын аямаған қамқорлықты айтыңыз. Осы орайда қияндағы елдімекен мектебінде білім алып жүрген бозөкпенің ерек талабын аңдап, өнер сайыстарына қатыстырған, бүгінде көпке танымал болған қос саңлақ – Асқар Дүйсенбиев пен Бекарыс Шойбековты тәрбиелеп өнер өріне оздырған ердің еңбегі бір төбе.Ал өзінің жеке өміріне келсек, бозбала шақтан жүрек түкпіріне орныққан періште тілек қайда барса да, қайда жүрсе де тіршіліктегі қалт еткен құбылысқа қарауыл қып, қылша мойнын талша етіп, жалқы сәт тыным берген емес. Бүгінге дейін қолынан қаламы түспеген оның қоғамдағы жақсыны да, жаманды да көңіл сүзгісінен өткізіп, жақсыға сүйініп, жаманға күйініп, ар таразысын әділ салмақтай білуі осы табиғатына адалдығынан дер едік.Қолында билігі бар адам төрешілдікке жақын, ауылда көп жылдар директордың орынбасары болып биліктің бір жағында жүрген адамның ақ дегені алғыс, қара дегені қарғыс, көңіл тоқ, уайым жоқ, қамсыз-мұңсыз бір күнді өткізуге беруге болатын еді ғой. Жоқ, cезімге бай, сертке адал Нұрекең қашанда айналаға жүректің көзімен қарай білген тәрізді. Міне, сол кезде көзі көріп, көңілі иланған құбылыстарды ақ қағазға шебер қиюластыруға келгенде табиға тұма таланты көмекке келді. Өмірдегі ұнамсыз құбылыстар, адамдардың теріс мінез-қылықтары, соның салдарынан қоғамды дендеген дауасыз дертті сылып алуда сатираны қару еткен ол осы жанрдың оң жамбасына келетініне сол кездің өзінде нық сенімде болды. Өйткені әжуа тілмен түйреген сөз сойылының діттеген жеріне дөп тиіп жатуы өзгеден бұрын өз көңілін тоқ етті. Соның дәлелі Оспанхан Әубәкіров ағасы алғашқы қадамынан-ақ жанашыр тілектесі болды. Жас талапты үнемі қолдап, өзі өмірден озғанша әріптестік қарым-қатынасын үзбеді.Тіл тазалығы, әдебиет тағдыры үшін бетің бар, жүзің бар демей туғанына да туралығын айта білер әділқазы, әдебиет сыншысы Бақыт Сарбалаевтың оң пікіріне ілігудің өзі дәтке қуат. Қаламгер өзінің 2011 жылы шыққан кітабында Нұрмахан Елтайдың шығармашылық лабораториясына арнайы тоқталады. Сонда Нұрмахан Елтайдың жан-дүниесінің Бейімбет Майлинмен өзектесе өріліп жатқаны туралы айтады. «Нұрмахан Елтай халықтық тілмен қарапайым жазуымен әрбір туындысының әлеуметтік қатпары қалың, астары терең, айтары ажарлы, әдеби байлығы базарлы нағыз Бейімбет Майлин бітімдес сатирик» деп жазады ол.Нұрмахан өзінің төл туындыларымен қоса жүрген жерінде құлақты түрік ұстап ауыл айтқыштарының есті сөз, қаймақты хикаяларын жазып алудан шаршамайтын қалыбымен қазақ әдебиетіне қаншама жауқар дүниелерді қосты. Ол өзінің «Үшінші таим» кітабының «Қақпа алдында» деп аталатын бөлімінде ауыл айтқыштарының сөзін жинақтап беріп, келешек көрерменнің асыл қазынасына айналдыра білді.Сонау жетпісінші жылдардан бастап Нұрмаханның сатирик ақын ретінде өлеңдері аудандық «Коммунизм жолы», облыстық «Ленин жолы» газетінде шыға бастады. Бірқатар сатиралық топтамалары жинақтарға енді. Асқар Тоқмағанбетовтың көзін көрген, тәрбиесін алған, сатираның сарбазы атанған Оспанхан Әубәкіровтен бата алған оның шығармаларын жұрт іздеп жүріп оқитын болды.Осы кезеңдері ол «Жаңақорған тынысы» газеті бетінен ашылған «Көк ине» деген арнайы сатиралық беттің шығарушысы болды. Нұрмаханның шалқар шабытпен жазылған «Қатырамыз», «Ауылдың айтқыштары», «Япырмай, бұл қандай қызық», «Сүйінші дайындаңыздар», «Беті бүлк етті», «Үшінші таим», «Қияға қонған қыран», «Беласар» деген атпен сатиралық өлеңдері, әзіл-қалжың, қызықты әңгімелері, деректі хақаяттары, баспадан шығып оқырманға тарап кетті. Сондай-ақ «Жәннат жер – жайсаң жандар», «Қияға қонған қыран», «Жаңарған өлкенің жасампаз ұрпағы», «Сұңқарлар биікте самғайды» атты деректі кітаптардың авторы.Нұрмахан Елтай талантты сатирик қана емес, мықты журналист. Тоқсаныншы жылдардың басынан журналистикаға ден қойған ол ширек ғасырға жуық уақыт «Сыр бойы» газетінің Жаңақорған және Шиелі аудандарындағы меншікті тілшісі болды. Өтпелі кезеңнің ауыр уақытында облысқа қатынап жұмыс істеу жеңіл болған жоқ. Аудандарда болып жатқан шаралар туралы газеттің сол күнгі санына шығу керек. Қазіргідей интернет жоқ. Нұрекең шараға бастан-аяқ қатысып, оны жол бойы пойызда отырып жазып, редакцияға тапсырып үлгеретін.Ертесіне кезекшілікке газет өндірісіне қатысу үшін жағдай кем, жылуы жоқ мұздай кабинетте қонып, орындықты төсек еткен күндердің нешемесі бастан өтті. Жастығын, денсаулығын алды демесең, көз майын сарқып жазған жауһар дүниелері өңірдің өлмес тарихына, сырлы шежіресіне айналып тасқа басылып қалды. «Өзі бір күндік, сөзі мың күндік» газеттің сарғайған парақтары бетінен оның Қандөздің топырағынан сыр түйген өзгеше өрнекті төлтумаларын көзге сүртіп, көшіріп жазып алып жататын күн де туады әлі. Өйткені әр нәрсе қолдан кеткенде қадірлі ғой өзі. Бастысы, артта қалар ұрпақ аман болсын.Нұрмахан Елтай 2000 жылдары облыстық газетте «Түрлі-түрлі бастар бар» деген әзіл-сықақ бетіне редакторлық жасаумен қатар «Спорт» бетінің де оқырман жүрегіне жол табуына еңбек етті. Сол жылдары мектеп оқушыларына арналған «Хан алшы» атты үнжарияны шығаруды қолға алды. Ауылда тұрып-ақ Жазушылар Одағына мүше болды. Аудан, облыс сахналарында «Ән мен әнші», «Өмір мен юмор», «Қазақы қалжың» деп аталатын жеке шығармашылық бағдарламалары жұртшылықты күлкіге көмді. Осы бағдарламалары арқылы елімізге танымал әншілердің Сыр сахнасында өнер көрсетуніе жол ашты.Бұл оның қаламгерлігімен қатар қоғамдағы қайраткерлігінің бір қыры. Ал отбасында… Сүйіп қосылған жары Орынкүл екеуі бес перзентті өсіріп тәрбиеледі.Жақында жазушының жары Орынкүл Молдағалымқызына арнаған «Аяулы жар» деген естеліктер жинағы жарық көрді. Бұлай еске алып кітап жазам деп ойлап па? Үнемі аттың үстінде, түйенің қомында қаламын қару етіп қоғам тазалығы үшін тіресіп, жағдайы жоқтың мәселесін шешуге, жанары жастының көңілін демдеуге демалмастан жұмыс істеп, құдайдың еңбек демалысында жарытып от басында, ошақ қасында аялдамаған сертіне берік қаламгер енді бейнеттен бел жазып, жанұя шуағына кенеліп отырамын деген уақытта жансерігінен айрылып қаларын қайдан білсін? Әйтпесе, ең әдемі арнауын асыл жарына көзі тірісінде тарту етіп, көңілін шат еткен болар еді. Тағдыр оған жеткізбеді.Кітаптың бірінші бөлімі ағайын-туыс, көрші-көлемнің жүрекжарды естеліктерінен тұрады. Бәрінің айтатыны бір ой, бір пікір – Орынкүлдің керемет кеңпейілдігі, қолының ашықтығы, мінезінің жомарттығы, жоқ-жітікке қолындағысын бөліп беруге бар қайырымдылығы, қонақжайлығы. Қаламгер үшін қосағының осы қасиеттерге ие болуынан асқан нығмет бар ма? Бұл мүмкіндік өзінің де жүрегі жаз ағаның екінші тынысын ашқан, оны көптің ортақ қадірлісіне айналдырған тағдырдың айрықша сыйы болды деуімізге болар.Қайран ағаның қан жылаған көңілін жұбатып, елесінің өзімен жандүниесін тыныштыққа бөлейтін өткен күндер естелігі осынысымен қымбат.&nbsp;Баян ҮСЕЙІНОВА &nbsp;

Сыр сатиригіне «Ерен еңбегі үшін» медалі табысталды

<a href="https://kyzylorda-news.kz/">Kyzylorda-news.kz</a> Облыстық қоғамдық даму басқармасы аймақтағы қоғамдық-саяси ахуалдың тұрақтылығы мен мемлекеттік тілдің қолданылуын, жастар саясаты мен мемлекеттік ақпараттық саясатты, сондай-ақ, ҮЕҰ арқылы мемлекеттік тапсырысты қалыптастыру саласындағы қызметтерді жүзеге асырады. Жыл басынан бері басқармаға қарасты салаларда ауқымды жобалар қолға алынып, оң көрсеткіш қалыптасқан.&nbsp;Мәселен, биыл тіл орталығы арқылы 205 адам мемлекеттік тілді жетілдірсе, 169 адам орыс тілінен, ал 176 адам ағылшын тілі бойынша оқыту курсынан өткен. Бүгінде орталық тұрақты түрде әлеуметтік желідегі парақшалары арқылы сөздердің дұрыс жазылуы мен ұлттық дәстүрлерді, сөз саптау үлгілерін насихаттау мақсатында «Сөзтүзер», «Ұлылар ұлағаты», «Трендтегі сленгтер», «Ас мәзіріңіз қазақша ма?» сынды ақпараттық айдарларды тұрақты түрде жүргізіп келеді.Қазіргі таңда облыстың медиа кеңістігінде 149 бұқаралық ақпарат құралы болса, оның 13-і мемлекеттік, ал қалған 136-сы тәуелсіз жұмыс істейді. Ашықтықты қамтамасыз ету мақсатында «Ашық диалог» egov.kz порталында &nbsp;Қызылорда облысы әкімінің қатысумен онлайн режимінде түрлі тақырып бойынша интернет-конференциялар ұйымдастырылады. Жыл басынан бері 9 интернет-конференция мен 5 сауалнама өтсе, интернет-конференция бойынша 26 сұрақ келіп түсіп, барлығына онлайн режимде уақытылы жауап берілген.Жыл басынан бері облыста этносаралық саладағы ахуал және этностық топтар арасындағы өзара қарым-қатынас тұрақты әрі қалыпты деңгейде сақталған. Этникалық белгілеріне сәйкес кикілжіңдер тіркелмеген. Соңғы статистикалық ақпаратқа сәйкес, облыс халқының 96,2 пайызы қазақ болса, 3,8 пайызы түрлі этностық топтан құралған. Мемлекеттік этносаясатты жүзеге асыруда облыстық ҚХА құрамында 11 этномәдени бірлестік, аудандарда 4 этнобағытталған үкіметтік емес ұйымдар және 9 қоғамдық құрылым жұмыс істейді. Сонымен қатар, облыста 14 пен 35 жас аралығындағы 244 865 жас есепке алынып, жалпы халықтың 29,3 пайызын құрады. Есепті мерзімнің қорытындысымен жастардың жұмыссыздық деңгейі 3,4 пайызды құраған. Сондай-ақ, өңір жастарын қолжетімді тұрғын үймен қамтамасыз ету мақсатында «Сыр жастары» жеңілдетілген ипотекалық несие беру бағдарламасын жүзеге асырылып жатыр.Фото: Қызылорда облысының Өңірлік коммуникациялар қызметі

Облыстың қоғамдық-саяси тұрақтылығы басты назарда

Аралдағы ағартушылық қашан басталды?

<a href="https://kyzylorda-news.kz/">Kyzylorda-news.kz</a> Жас ұрпақтың бойында ұлттық сананы қалыптастырып, тарих тармағын танытып, ата-баба мұрасынан сыр шерту жолында музейдің орны бөлек. Өткенге құрметпен қарап, бүгінімізді қадірлесек қана болашақ жарқын болмақ. &nbsp;Қазіргі кезде музейлердің алдында ескі мәдени мұраны сақтау және мәнді құндылықтарды замандастар үшін көрсету, насихаттау мәселелері тұр. Мәдени құнды көне заттарды көрсету, жалпы адамзаттық мәнін ашу арқылы музейге келушілердің адамгершілік, рухани өсуіне әсер ету де басты мақсаты. Бүгінгі кейіпкеріміздің үйі де ХХ ғасырдан бастап тұтас дәуірді көз алдыңа әкелетін музейге айналған.&nbsp;Нұржан Іздібаев 1992 жылы Тоқабай елді мекенінде туып-өскен. Жастайынан ата-әжесінің тәрбиесінде болған ол өзінің бұл қызығушылығы туралы кеңінен сыр шертіп:<blockquote>– Өзім кішкентай кезімнен ата-әжемнің ескі заттарына қызығатынмын. Көненің адамдары қолданған бұйымдарына өте ұқыпты болады ғой. Мен де сол кісілерден көріп ойыншықтарымды, кітаптарды, естелік сыйлықтарды сақтап жүретінмін. Кейін келе заттар көбейді. Оларды лақтыруға қимадым. Осылайша ескі үйдің бір бөлмесіне жинап бастадым, – дейді.&nbsp;</blockquote>Қазір қаладағы мұражай-үйде 800-ге жуық өткен дәуірдің естелігі бар. Олардың басым көпшілігі өткен жылдың сәуір айынан бастап жинақталған.<blockquote>– &nbsp;Негізі үйімнің бөлмесі мұражайға айналады деп ойламаған едім. Дегенмен жақындарым бұл қызығушылығымды білетін. Көбіне үйге келген қонақтар, жолдастарым оларды көріп, жастық шағына саяхат жасап, «ностальгия» алатын. Сөйтіп уақыт өте келе құнды, бағалы деген дүниені сыйлық ретінде ала бастадым. Әлеуметтік желіден көріп, арнайылап өзінің қолданған бұйымын салып жіберуші жандар да табылды. Кейбір көңілім кете қалаған дүниені сатып аламын. Осылайша бір жарым жылдың көлемінде бір бөлме толарлықтай зат жиналды. Олардың ішінде ескі рубльдер, қағаз ақшалардан бастап телефон-теледидарлар, кітап-журналдар, магнитофондар мен кассеталар, ойын түрлері және тіпті ата-әжем қолданған кебеже-сандығы, иінағаш, шапан мен бөрік сақталып тұр. Жалпы бөлмедегі заттарды арнайылап санатқа бөлмей, өзіме ыстық көрінгенін жинақтаймын, – дейді Нұржан Іздібаев.</blockquote>Ескінің көзіне лық толы бөлмеге кіргенде, расымен де, өзге әлемге түсіп кеткендей боласың. Мұнда сонау 1915 жылы шыққан рубльден бастап, осыдан бірнеше жыл бұрын қоғамда кеңінен пайдаланылған техникалар бар. Рубльді көзбен көріп, қолға ұстағанда фильмдегідей ескі көпестің сауда жасағаны еске түскені рас. Коллекционердің айтуынша, мен олай елестеткен алғашқы жан емес екенмін. Ал Нұржан мырзаның өзіне ең құнды дүние атасы тіккен қараша үйдің уығы мен әжесінің кебежесі болса, материалдық тұрғыда ең қымбат зат 1950 жылы пайдаланылған шахта телефоны екен.<blockquote>– &nbsp;Қазір бір-бірінен естіп, арнайылап келуші қонақтар саны артып келеді. Әлеуметтік желі арқылы да қызығушылық танытатын жандар жетерлік. Алдағы уақытта арнайы мекемелерден рұқсат алып, кеңейту жұмыстарын қолға алғым келеді. Оны әзірге уақыт еншісіне қойып отырмын, – деді ол сөз соңында.</blockquote>Нұржан Іздібаевтың рухани азық орнына айналған үйі – көпшіліктің көз қуанышы. Балалық балғын шағына саяхаттағысы келген немесе ата, аға буын өкілдерінің тұтынған заттарына қызыға қарайтын жандарға мол мүмкіндік сыйлап жүрген жер болашақта үлкен музейге айналатыны сөзсіз. Гүлмарал САҚТАПОВА

Үй-музей ашқан азамат

<a href="https://kyzylorda-news.kz/">Kyzylorda-news.kz</a> Бақтыбай Ордабаев 1966 Арал қаласында дүниеге келген. Ата-анасы өлкеміздің басты байлығы болған айдынды теңіздің кеме өңдеу зауытында шебер болып қызмет еткен жастың арманы да, талғамы да басқаша еді.&nbsp;Ол туралы өзі:<blockquote>– &nbsp;Бала кезіміз қазіргі жастардың өмірінен басқаша өтті ғой. Ұялы телефон, теледидар жоқ еді. Бағымызға орай, аула алдында «Водник» деген стадион болатын. Уақытымыздың көбін сонда футбол ойнаумен өткіземіз. Одан өсе келе арнайы секциялар ашылып, соған бардым. Алғашқы ұстазым, марқұм Серік Тілеужанов деген кісі болды. Ең бірінші жарысымыз, кәсіби ойынымыз сол мектеп жасында басталған, – деп еске алды.</blockquote>Осылайша өмірін спортпен байланыстырған ол 1985 жылы әскери борышын өтеуге аттанады. Украинада 2 жылдық әскери міндетін атқарып жүргенде де бос уақытын сүйікті ісімен өткізеді. Аралға келген соң кеме жөндеу зауытына жұмысқа тұрады. Ол уақытта ауданаралық жарыстарға зауыттың командасы атынан шығып жүрген Бақтыбай Жарылқасынұлы кейін келе аудан атынан ойын көрсете бастайды.<blockquote>– &nbsp;Жарылқасын Сәменов жаттықтырушымыз болды. Зауыттың командасы болып Арал ауданының атынан облыс, республика лигасына шыға бастадық. Қазақстан Республикасының біріншілігінің ІІ лигасында жүлделі ІІІ орын алғанымыз әлі есімде.&nbsp; Сол жылдары оқу орнына құжат тапсырдым. Осылай Алматы қаласындағы Жоғарғы оқу орнына қабылданып, «Футбол жаттықтырушысы» маманы болып шықтым. Еліміз Тәуелсіздік алған жылы зауыт жұмысынан шығып, 4 жыл «Шапағат» қоғамдық қорында, 2001 жылға дейін «Намыс» футбол клубында жаттықтырушы болып жұмыс істедім. Сол жылдан бері қазірге дейін №19 мамандандырылған балалар-жасөспірімдер спорт мектебінде балаларды спортқа баулып келемін, – деп алғашқы еңбек жолымен таныстырды ол.</blockquote>Иә, 30 жылдан аса еңбек өтілі бар жаттықтырушы бүгінде талай шәкірттің спорт саласында бағын жақты. Олардың алды Қазақстан Премьер Лигасында өнер көрсетіп жүрсе, жақында ғана оқушылары Нұрдаулет Талғатұлы мен Асқар Қолғанатов облыс командасында ойнап, республика чемпионы атанды.<blockquote>– &nbsp;Оқушы балалар спорт мектебіне 7 жасынан бастап қабалданады. Келген әрбір шәкіртке ерекше бап жасап, айрықша көңіл бөлу керек. Әр баланың қыры мен сыры болады. Бәрін бірдей «футболшы» етіп шығару мүмкін емес. Дегенмен бейімі бар, денсаулығы жарайтын, шымыр баланы түбінде спорт саласының бір кірпіші етіп қалауға мүмкіндік бар. Оның өзі қаншама жылдық еңбекпен келеді.&nbsp;Футбол саласына, жалпы спортқа қазір көп көңіл бөлініп жатыр. Ауданда да түрлі секциялар ашылды, бәрі мемлекет тарапынан тегін жүреді. Жастар бос уақытын тиімді өткізіп, қызығушылық танытса, біздің тарапымыздан қолдау әрқашан бар, – деп &nbsp;жаттықтырушы пікірін білдірді.&nbsp;</blockquote>Спорт саласында атқарған еселі еңбегі ескеріліп, кейіпкеріміз бүгінге дейін аудан, облыс әкімдерінің «Құрмет грамотасы» мен «Алғыс» хаттармен марапатталған. Сонымен қатар Қазақстан футбол Федерациясының арнайы төсбелгілерімен де құрметтелді және «Арал ауданының футболдан аға жаттықтырушысы» атағын алды.&nbsp;Қазіргі таңда Бақтыбай Жарылқасынұлы жұбайы Ботакөзбен 2 қыз, 1 ұл тәрбиелеп, немерелерінің қызығын көріп отырған бақытты әулеттің отағасы. Ал өзінің ізін қуған баласы Аян Бақтыбайұлы аудан, облыс құрамасында өнер көрсетеді.&nbsp; Г.МЫҚТЫБАЙҚЫЗЫ

30 жылдық тәжірибесі бар жаттықтырушы

<a href="https://kyzylorda-news.kz/">Kyzylorda-news.kz</a> Жаңақорған ауданында арнайы сала мамандарының қатысуымен &nbsp;кәсіпкерлікті қодау мақсатында арнайы басқосу өтіп, осы тұрғыда бірқатар ақпараттар берілді. Жалпы Жаңақорғанда шағын кәсіпкерлікке мемлекеттік қолдау тетіктерінің саны артпаса кеміген емес. Мамандар жеңілдетілген пайыздық несие, қайтарымсыз қаржы және субсидия биыл да жалғасын табады дейді. Елдегі төтенше жағдайға байланысты сәл кешеуілдеген бағдарламалар араға көп уақыт салмай қайта жанданбақ.Мемлекеттік жобаларды жүзеге асыруда облыс бойынша Жаңақорған ауданы алдыңғы қатарда. Яғни несие алу мен грантқа ие болуда аймақта көш бастап тұрмыз. Әрине қуанатын жағдай, бірақ келелі іске көлеңке түсіріп тұрған кемшіліктер де жоқ емес. Аз пайызбен несие және грант алғандар қатарында мақсатсыз қаржы жұмсағандар анықталып, сотпен өндірілуге шешім шыққан деректер де бар. Мұндай жағдайларды аймақ басшысы да тікелей назарында ұстап келеді.Басқосуда Қызылорда облысы кәсіпкерлер палатасы және өңірлік кеңес мүшелері аудандағы бизнес өкілдеріне түсіндірме жұмыстарын жүргізіп, ұсыныстарын тыңдады. Аудан әкімінің орынбасары Бектас Нұрдиновтің қатысуымен өткен жиында облыстық кәсіпкерлер палатасының директоры Пірмұхаммед Сыздықов модераторлық етті.Жиынға қатысушылар алдымен жергілікті кәсіпкерлердің қолынан шыққан бұйымдарынан жасақталған көрмені тамшалады. Онда тігін және қолдан тоқылған тұрмыстық бұйымдардан бөлек бисер және сәндік әшекейлер мен қолдан пісірілген дәмге толы дастархан мәзірі, құрылысқа қажетті жабдықтардан құралған бұйым өзіндік сән-салтанатымен көз тартты. Басқосуда сөз алған Бектас Балғабайұлы жиынның мән-мақсатын түсіндірді. Өз кезегінде палата директоры аймақта кәсіпкерлік саласында нәтижелі жұмыс бар екенін атап өтті.<blockquote>– Сыр өңірі соңғы жылдары кәсіпкерлік саласында жақсы нәтиже көрсетуде. Отандық өнім өндіруде бәсіміз артып, шағын кәсіптің шырайы кіріп келеді. Бұл нәтижеге қол жеткізуде мемлекеттен көрсетілетін қолдауды тиімді ұйымдастырып отырған кәсіпкерлер палатасын іске ынталы азаматтардың ортақ шаңырағы деуге болады. Кәсіпкерлермен тығыз қарым-қатынас орнатып, консультативті кеңес, бағыт-бағдар беруге тырысамыз. Бүгінде өңірлік кеңестің құрамында жиырмаға жуық маман бар. Қолымызға келіп түскен жобаларды жан-жақты сараптап, болашағы бар бизнестің түріне барынша қолдау көрсетеміз. Екіншіден, олардың құқығын қорғауға мүдделіміз. Сайып келгенде, жергілікті өнім көлемін көбейтіп, экспортқа кең жол ашуға тиіспіз, – дейді палата директоры.</blockquote>Ол одан әрі экспортқа жол тартқан бренд тауарлар жөнінде тоқталды. Осы орайда Жаңақорғанда өндіріліп өңіріміздің дүкендері сөрелеріне жайғасқан кір сабын, әжетхана қағазы, гипс өнімдеріне жоғары бағасын берді. Аграрлы саланың ауқымы кең, мал өнімдері мен егіндік дақылдардың шет ел асып жатқанына қуанамыз. Енді үлкен сұранысты ұлғайту мақсатында шағын кәсіпті кеңейту аса маңызды. Бұл іске демеу болатын бағдарламалар жөнінде «Қазпошта» АҚ Қызылорда облыстық филиалы директорының орынбасары Айзат Ізтілеуова баяндады. Бұл бағытта негізінен онлайн платформасы аса маңызды, яғни онлайн дүкендерде электронды сауда қызып тұр. Түрлі мекемелер, тіпті брендтегі компаниялар тауарларын пошта қызметі арқылы алуға толық мүмкіндік бар. Тасымалдау құны да қолжетімді.– Онлайн сауда тек өңіраралық қана емес, әлемдік нарықта да ыңғайлы екенін көрсетті. Осыған орай Астана қаласында үлкен логистикалық хаб ашылды. Бұл бастамасы, тағы үш-төрт аймақтан ашу жоспарда бар. Біздің тарапымыздан саудагерлерге де, тұтынушыларға да тиімді бағдарламалар, жаңа жобалар енгізілуде. Соның бірі – маркетплейс қосымшасы. Бұл арқылы сатушы да, сатып алушы да қосымша қаражат жұмсап шығындалмайды. Түйіндей айтқанда, электронды саудаға қазір алтын көпір дерліктей деңгейде қызмет жасап отырмыз, – деген «Қазпошта» АҚ Қызылорда облыстық филиалы директорының орынбасары Айзат Өмірзаққызының айтуынша, тұтынушыға тауар ұнамай қалған жағдайда кері қайтару қызметін үйлестіруді де мекеме өз жауапкершілігіне алып отыр екен.Облыстық кәсіпкерлік және өнеркәсіп басқармасының кәсіпкерлікті дамыту және қолдау бөлімінің бас маманы Алуа Есіркеп әлеуметтік кәсіпкерлік санаттар бойынша түсінік берді. Бұл тақырыпта әлеуметтік деңгейге көбірек мән беріледі. «Әлеуметтік кәсіпкерлік санат төрт топқа бөлінеді. Бірінші кезекте мүмкіндігі шектеулі азаматтарға қолдау білдіруге бағытталған. Осал топтарға жататын тұлғаларды жұмыспен қамту, олар өндіретін өнімге қолдау көрсету, демеу болу, олардың жеке бастарына жәрдемші болу және психикалық-педагогикалық қолдау көрсетуге бағытталған. Осы санаттар ішінде алғашқысы сәл жеңілірек. Өйткені жарымжан жандар, көпбалалы аналар, тұрғылықты жері жоқ немесе пробациядағы азаматтарды жұмысқа орналастыру өзге санаттарға қарағанда жылдам жүзеге асады. Қалай дегенде де кәсіпкер төрт санаттың біреуі бойынша өтінім білдіруі керек. Егер комис¬сия мақұлдаса онда кәсіпкер қажетті қолдауын ала алады» дейді жауапты маман. Иә, бұл кәсіп бастауға ынталылар үшін табыс көзі, қарапайым халық үшін жұмыссыздықты шешудің тетігі болмақ.«Ауыл аманаты» кімдерге тиімді?Келесі кезекте ауылшаруашылығы кооперациясы және экспорт бөлімінің басшысы Гүлмира Исабергенова «Ауыл аманаты» жобасы аясында ақпаратқа қанықтырды. Қазіргі кәсіп бастаушылар мен шағын ісін ілгерілетушілерге бұл бағдарламаның берері көп. Аталмыш бағдарлама арқылы қызылордалықтар былтыр 3 млрд теңгеге қол жеткізіп, 700-ден аса жұмыс орны ашылған. Берілген рұқсат бойынша 406 жоба қаржыландырылыпты. Оның ішінде басым бөлігі мал шаруашылығына бағытталған. 216 жоба агроөнім өңдеу, егіншілік, ауылшаруашылығы техникасын алу және мал шаруашылығына бағытталған. Сондай-ақ, ауыл шаруашылығы өндірістік кооперативтер жал¬пы 716 млн теңге несиеге ие болған екен. 51 өндірістік кооператив құрылып, соның 31-і ғана төмендетілген пайыздық несие алыпты. Ал, биылғы меже қандай?<blockquote>– Биыл Сыр өңіріне 4 млрд 596 млн несие беру көзделіп отыр. Бұл қаржыға 575 жоба мақұлданады. Оның ішінде ауылдарға басымдық беріледі. Былтыр 106 жоба елді мекен кәсіпкерлерне берілсе, биыл олардың саны 146-ға жетті. 600-ден аса жұмыс орны құрылып, шағын кәсіпкерлікке үлкен қолдау болады деген үміттеміз, – деді Гүлмира Рахымжанқызы.</blockquote>Жауапты маман аудандардағы мәліметті салыстырып берді. Биыл қорғалатын жобалардың көбі Жаңақорған мен Шиелі ауданына тиесілі екен. Қос ауданға бөлінгелі тұрған қаржы көлемі 1,5 млрд теңгеге жуық. Жобаның саны 200-ден асады. Осы орайда аудандағы жауапты өкілдер, сала мамандары қорғалуға ұсынылатын 305 жобаның құжаты дайын екенін айтты. Жалпы «Ауыл аманаты» бағдарламасы өте тиімді жоба. Жобаға байланысты аймақ басшысы да қатаң талабын қойған болатын. Әсіресе, мал басын көбейтуге байланысты қатаң тексеруді талап етті. Оның себебі де жоқ емес, несие болсын, қайтарымсыз қаржы болсын мал басын көбейтуге берілген ақша өзге мақсатқа бұрылып кетпеуі керек. Ауданға берілетін 100 жобаның тең жартысынан көбі мал бағытына ойысуы мүмкін. Аграрлы салаға бет бұрсақ ұтылмаймыз.Қызылорда облысы бойынша мемлекеттік кірістер департаментінің түсіндіру жұмыстары мен байланыс орталығы басқармасының басшысы Гүлсара Қарымсақова салық жүйесі бойынша ережелерге тоқталды. «Даму» кәсіпкерлікті дамыту қоры АҚ бағдарламаларды жылжыту бойынша бас менеджері Салтанат Абдуллаева «Бірыңғай кешенді бағдарлама» бағытында субсидия, шағын несие мен әлеуметтік кәсіпкерлікке қолдау туралы жан-жақты түсіндірді.Аграрлы сала қолдау күтеді«Аграрлық несие копорациясы» АҚ Қызылорда филиалының несиелендіру бөлімінің бас маманы Айбек Дүйсенов өнімдік бағдарламаларға тоқталды. Өнімдік бағдарламалар ішінде 4 бағыт қарастырылған. «Кең дала», «Агробизнес», «Іскер» және «Жастарды микроқаржыландыру».<blockquote>– «Кең дала» қолдау қоры көктемгі дала жұмысы мен егін жинау науқанына арналған. «Агробизнес» жобасы аграрлы саланың барлық бағытына, атап айтқанда құрал-жабдық сатып алуға, айналым қаражатын толтыру мен құрылыс монтаждауға беріледі. «Іскер» қаржылай қоры Еңбек және жұмыспен қамту бағдарламасының 2021-2025 жылдарға арналған жол картасы аясында өнім өндіруге қолдау білдіреді. Жастарды қаржыландыру бағытына 21-мен 34 жас аралығындағы барлық кәсіп иелері тартылады, тек бағыты айқын, құжаты түгел болуы керек, – деді Айбек Малкайдарұлы.</blockquote>Бұл бағдарлама ауылшаруашылығы саласына арналған барлық кәсіп түрлерін қамтиды. Бұл бағытта жаңақорғандықтардың талапты бастамалары көңіл қуантады. Жиын соңында аудандық полиция бөлімінің көші-қон қызмет тобының инспекторы Бақтияр Нұрманов қысқаша түсіндірме жасады.Кәсіпкерлік саласындағы мемлекеттің қолдауы осылай көрініс тапты. Басты міндеті – отандық өнімнің көлемін арттырып, әлеуметтік мәселенің оң шешілуін толық қанағаттандырып, жұмыссыздықты азайту. Кәсіп бастауға ынталы және мемлекеттік бағдарламаны жіті меңгергісі келетін тұлғалар «Атамекен» ұлттық кәсіпкер¬лер палатасы директоры Асылжан Жолдасбаевқа жолығуына болады.&nbsp;Әлібек ЖАРЫҚБАЕВ &nbsp;

Кәсіпкерлікке қолдау қашан да бар 

<a href="https://kyzylorda-news.kz/">Kyzylorda-news.kz</a> Сайыпжамал Әшімқызы – қазақ қоғамында ұзақ жылдар бойы ұстаздық қызмет атқарып, білім беру саласына зор үлес қосқан құрметті ұстаз. Оның өмірі мен қызметі жас ұрпаққа білім мен тәрбие беру ісіне арналған. Сайыпжамал Әшімқызы білім жолында талмай еңбек етіп, өз ісіне деген шынайы сүйіспеншілігімен ерекшеленген. Ұстаздық қызметін ауыл мектебінен бастаған Сайыпдамал Әшімқызы сол кезден-ақ оқушыларының жүрегіне жол тауып, оларға терең білім берумен қатар, адамгершілік қасиеттерді дарытты. Ол балалардың бойына патриоттық сезім, еңбекқорлық, жауапкершілік, достық секілді құндылықтарды сіңіруде үлкен еңбек сіңірді. Жаңақорғандағы Құттықожа ауылының халқы жарты ғасырдан астам бұрын ауыл мектебіне мұғалім болып келіп, жас талаптың көкірегіне білімнің жарық нұрын жаққан аяулы ұстаздары – Сайыпжамал Әшімқызын еске алуға арналған ұлағатты шараның куәсі болды.Бар ғұмырын елдің баласының етекте қалмай, еңсесін биік түзеуіне арнап келген үлкен жүректі тұлғаны көпшілік шараларда көріп қалушы едік, қарапайымдылығы мен қоса қаталдығы, тәкаппар талапшылдығы, бірақ сонымен қатар тұла бойынан кіршіксіз тазалығы аңғарылып тұратын кісілік болмысы біздің де есімізде сақтаулы.Сайыпжамал Әшімқызы 1937 жылы 15 қыркүйекте Жаңақорған ауданында дүниеге келген. 1953 жылы Қызылорда мемлекеттік педагогикалық институтына оқуға түсіп, физика және математика пәнінің мұғалімі мамандығын бітірген. Еңбек жолын 1957 жылы Құттықожа ауылындағы №164 орта мектебінде математика пәні мұғалімі болып бастады. 1961-1967 жылға дейін осы мектепке басшылық еткен. 1967-1981 жылдары оқу-тәрбие ісінің меңгерушісі, 1981 жылдан зейнетке шыққанға дейін осы мектептің директоры қызметін атқарған. Еңбегі бағаланып, бірнеше рет саланың Құрмет грамоталарын, «Еңбек ардагері» медалін, «Қазақ ССР оқу ісінің үздігі» төсбелгісін иеленген.Бүгінгі кеште Сайыпжамал Әшімқызының алдымен мықты математик ретінде есепке жүйрік шәкірттер тәрбиелеп, мектеп атын алысқа шығарған еңбегі ерекше айтылды. Бұл туралы ыстық ықыласты лебізін жеткізген өзінің шәкірті, ізбасары, мектеп директорының міндетін атқарушы Әділ Әбужүсіп арнайы тоқталып, атаулы күні ұстаз құрметі¬не математика пәнінен мектепішілік байқау ұйымдастырылғанын тілге тиек етті. Математика пәні бойынша ұйымдастырылған сынаққа қатысқан 5-9 сынып оқушыларының ішінен топ жарған шәкірттер осы күні көп алдында марапатталып, оларға ұстаздың перзенттері атынан ынталандыру сыйлықтары табыс етілді. Осынау білімге ынтық талапткерлерді шыңдаған ұстаздары Орынкүл Дулатова мен Гүлжаухар Исаева да ұмыт қалмай, лайықты сый-құрметке ие болды.Ұстаз-ана ері Ізбасар екеуі 4 перзентті дүниеге әкелді. Қыздары Рзуан, Маржан, Балжан үшеуі де анасының жолымен ұстаздықты таңдаса, ұлы Орынбасар музыка маманы. Өкініштісі, Рзуан мен Балжанға бұл күнді көру жазбады. Екеуі де мезгілсіз жарық дүниені тәрк етті.Тіршілігінде тәрбиелі отбасынан алған тағылымын ақтап, екеуі де ағарту саласында лайықты орындарын алып үлгерді. Рзуан Қорқыт атындағы университетте аға оқытушы болса, Балжанның аудандық оқушылар үйін басқарған кездегі қоғамдық өмірге қолтаңбасы көптің есінде қалды.Сайыпжамал Әшімқызын еске алу кешінде ауыл халқының ұстаздың өзіне ғана емес, оның отбасына деген қалтқысыз пейілдері аңғарылып тұрды. Көп алдына шығып сөз алған көзкөрген жандардың ықыласты жүрек сөзі бізге осыны ұқтырды.<blockquote>– Бізге Жайпанов Жүндібай және Бегайдар ағай, Сайыпжамал апай үшеуі математикадан сабақ берді. Үшеуі де ауданда математикадан аты озық мұғалімдер болуы ауыл балаларының маңдайын ашты деуге болады. Ауыл мектебі түлектері арасында білімімен тас жарып, ел экономикасы мен элеуеті¬нің қарыштап дамуына лайықты үлесін қосып келе жатқан тұлғалар қатарының көптігі осының дәлелі. Бүгінгі мектепіші¬лік математика пәні олимпиадасында озық шыққан Қожанбек Айғаным, Қал-дар Камила, Камила Мейрамбекқызы болашағынан көп үміт күттіреді, – деді Маржан Синаева.</blockquote>Еске алу кешінде сөз алған ардагер-ұстаз Махан Қошқаровтың сөзі көптің көңілін елжіретті.<blockquote>– Мен 1957 жылы Сайыпжамал Әшімқызы біздің мектепке мұғалім болып келгендегі алғашқы шәкіртінің бірімін. Оспанова Күләш апай екеуі еңбек жолын бірге бастады. Ол кезде оқушы атаулы мұғалімді тік тұрып қарсы алып, алдынан кесе өтпейтінбіз. Төбесі көрінгеннен тастай қатып, артық-ауыс қимыл жасауды әдепсіздіктің көкесі деп түсіндік. Ауылда мұғалімнен артық, мқғалімнен ардақты адам бар деп білмеппіз.Сайыпжамал апай бір жылдан соң ауыл азаматы Ізбасар Синаевпен бас қосты. Ізбасар ағай бізге музыкадан дәріс берді. Күндіз сабақ берсе, кешке ауыл клубында түрлі мәдени шараларды ұйымдастырып жастардың қоғам өмірімен етене араласуына жол ашты.Ізбасар ағайымыздың өмірден ерте озуы төрт баланы өсіріп-жетілдіру тау-қыметін асыл жардың нәзік иығына артып, енді апайға мектеп басшылығы бір бөлек, отбасында да ер адамның орнын басатын апайтөс қайрат, қажырлы мінезді серік етуге тура келді.Балаларының барлығына тастай талап қойып, тәртібін көзден таса етпеді. Барлығын оқытты. Жаны асыл ұстаз өз баласына берген тәрбиесін халықтың баласына екі есе беруге құмбыл. Ал, біз, білімгерлер, жақсы баға алсақ соны мақтан тұттық, – деді ол.&nbsp;</blockquote>Одан әрі ел ағалары Сәулебек Қалыбаев, Мұзаффар Тойымбетовтер сөз алып, ықыласты лебіздерімен бөлісті.Еске алу кешінде Ізбасар мен Сайыпжамал апайдың перзенті, Синаева Маржан сөз алып, әсіресе осы кештің ұйымдастырылуына мұрындық болған аудан білім қызметкерлері ардагерлер кеңесінің төрағасы Аллаберген Ахметовке арнайы алғысын жеткізді. Анасына құрмет көрсетіп жатқан көпшілікке рахметін айтты.Сайыпжамал Әшімқызының ұзақ жылғы тәжірибесі мен терең білімі қазіргі жас мұғалімдер үшін үлгі болып табылады. Ол білім беру саласында ғана емес, сондай-ақ қоғамдық жұмыстарда да белсенділік танытып, ұстаздық қызметінің аясын кеңейтіп, туған өлкесіне үлкен үлес қосты.Осындай ұстаздардың өмірі мен еңбегі болашақ ұрпаққа өнеге болып қалатыны сөзсіз.&nbsp;Баян ҮСЕЙІНОВА &nbsp;

Үздік ұстазды ұлағаттау шарасы өтті

<a href="https://kyzylorda-news.kz/">Kyzylorda-news.kz</a> Цифрлық дәуірдің шапшаң дамуымен білім беру саласы да елеулі өзгерістерді бастан кешуде. Әсіресе, жасанды интеллект &nbsp;технологияларының енгізілуі оқу процесін мүлде жаңа деңгейге көтеруде. Білім беру сапасын жақсарту жолдарын іздеген кезде, ЖИ-дің білім саласына ықпал етуі аса маңызды тақырыпқа айналып та үлгергені байқалады. Сол себепті біз бұл мақалада ЖИ-дің білім сапасын жақсарту жолдарын, мүмкіндіктерін және онымен байланысты жаңа трендтерді талқылап көрмекпіз.Жасанды интеллект және &nbsp;ЖОО-дағы дербестендірілген оқытуБілім берудегі басты мәселелердің бірі – студенттердің түрлі деңгейдегі қабілеттері мен қажеттіліктерін ескеретін жеке оқу траекториясын құру. ЖИ-дің көмегімен білім алушының жеке қажеттіліктеріне бейімделген оқыту процесі жүзеге аса алады. ЖИ-дің алгоритмдері оқушының бұрынғы білімін, оқу стилін және оның жылдамдығын талдау арқылы оқу мазмұнын сәйкесінше бейімдеп береді. Мұндай әдіс оқушының мүмкіндігін барынша пайдаланып, оның білімін тереңдетуге көмектеседі.&nbsp;Яғни, ә дегеннен-ақ айтқаныңды екі еткізбей, іздегеніңді ұсынатын ЖИ алгоритмдері қай деңгейдегі болмасын оқушының ыңғайына ойысып, ойындағы дүниені оңай тауып береді. Бұл жаңа әдіс оқимын, үйренемін дегеннің ықыласына ынта, біліміне біліктілік қосатыны айтпаса да белгілі. Бірақ, дайын асқа тік қасық сұғатын студенттер қатары көбейіп кетпей ме деген сұрақ туындауы әбден мүмкін. Десе де, қажет болған жағдайда ЖИ деректерді терең талдай отырып, плагиатты болдырмауға ықпал жасай алады. &nbsp;Мысалы, плагиатқа қарсы жүйелер мәтіндерді зерттеп, ұқсас материалдарды анықтап, оқушылардың түпнұсқалық жұмыс жазуын қамтамасыз етеді. Сонымен қатар, ЖИ деректерді терең талдай отырып, білім беру мекемелеріне оқушылардың оқу жетістіктерін бағалауға және оқу бағдарламаларын жетілдіруге мүмкіндік береді.Сонымен қатар, студент дағдысындағы компьтерлік слайдтар мен презентациялық тақырыптарға жасанды интеллект көмегімен оңай қол жеткізудің өзі компьютерлік сауаттылықты талап етіп, &nbsp;сыни ойлауға үйретері сөзсіз. Демек, ЖИ-ні &nbsp;игеруге тура келген жастардың &nbsp;үздіксіз ізденісі жаңа технологияларды жетік меңгеруді көздейтін бүгінгі қоғамның талабын қанағаттандыратындығы тағы бір олжа.Жасанды интеллектінің жаңа мүмкіндіктері білім беруде қолданыла бастағаннан-ақ ең алдымен студенттер мен жалпы жас буын оны оңай-ақ игеріп кетті. Оған себеп бүгінгі қоғамның қозғаушы күшіне айналған – әлеуметтік желілер. Үздіксіз ақпарат айдынындағы тоқтаусыз түрленіп жатқан тренд – жаңа технологиялар мен жасанды интеллектіге келіп табан тіреді десек те жарасады. Тренд демекші, тек оқушы мен студенттің қызуғушылығын оятып қоймаған бұл технологиялар жалпы ұстаздар қауымы мен жас тәлімгерлердің де таңданысын туғызып үлгерді. &nbsp;Сағаттап сабақ ұйымдастыратын, һәм, компьютерден көз алмай таң атыратын білім беру саласы мамандарының қолын ұзартып, жүгін жеңілдетуге желеу бола алған-ды.Жаңақорғанда жаңа технологиялардың жай күйі қандай?Жасанды интеллектіні білім беруде қолдану тақырыбы қазіргі кезде өте өзекті және маңызды болып отыр. Білім саласындағы жаңашылдықтардың бірқатар көріністерін аудан мектептерінен де анық байқауға болады. Білім беруде жаңа технологияларды енгізуге қатысты &nbsp;ауданымыздағы бірқатар сала мамандарымен ой бөлістік: Айдос Арасат 286 мектептің информатика пәнінің мұғалімі&nbsp;Жасанды интеллектіні сабақта қолдану ең алдымыт уақыт үнемдеудің ең қолайлы мүмкіндіктеріне жол ашуда. Ұзын сонар дәрістерді баяндауда виртуалды ассистенттердің, ашық сабақтар ұйымдастыруда оқушылардың қабылдауына жеңіл презентациялық сабақтарды түрлі диззайнда әрі аз уақыт ішінде ұйымдастырып беретін &nbsp;ЖИ алгоритімдердің көмегі орасан. Сонымен қатар, жаңа жүйелер жасөспірімдердің компьютерлік білімін арттыруға да айтарлықтай үлескер болуда. Қазіргі таңда оқушылар арасында кеңінен қолданылып жүрген ЖИ алгоритмдері қатарына &nbsp;Chat GPT(ақпараттық чат бот) &nbsp;Gamma (креативті презентациялар ошағы) &nbsp;Grammarly (мәтіндердегі қатені түзетуші ЖИ) &nbsp;Slidesgo (тегін шаблондар ұсынатын ЖИ) сынды алгоритімдерді атар едім.&nbsp;Оқытудағы тың тәсілдер мен мұғалімдердің көмекші құралыМұғалімдер үшін ЖИ уақытты үнемдеуге мүмкіндік береді. Жасанды интеллект тесттерді автоматты түрде бағалап, оқушылардың үлгерімін қадағалап, жеке оқыту бағдарламаларын ұсынып, мұғалімнің әкімшілік міндеттерін жеңілдетеді. Сонымен қатар, ЖИ-мен басқарылатын виртуалды ассистенттер оқушылардың сұрақтарына нақты уақытта жауап беріп, мұғалімдердің жұмыс жүктемесін азайтуы мүмкін. Бұл мұғалімдерге шығармашылық және педагогикалық жағынан көбірек уақыт бөлуге мүмкіндік береді.ЖИ-дің арқасында білім беруде көптеген инновациялық әдіс-тәсілдер қолданыс табуда. Виртуалды шынайылық &nbsp;пен қосымша шынайылық &nbsp;технологияларын қолдана отырып, оқушылар күрделі ұғымдарды нақты көріністер арқылы игере алады. Мысалы, тарих сабағында оқушылар ежелгі қалалардың 3D модельдерін зерттеп, географияда планетарлық жүйелердің құрылымын көре алады. ЖИ сондай-ақ табиғи тілді өңдеу технологияларын пайдалану арқылы тіл үйрену процесін жеңілдетіп, интерактивті диалогтық жүйелерді қолдану арқылы білім беру тәжірибесін жақсартады.Жасанды интеллект тек оқыту процесін оңтайландырып қана қоймай, білім беру жүйесіне жаһандық әсер етіп жатыр. Мысалы, цифрлық платформалар арқылы білім беру географиялық шекараларды жойып, оқытушылар мен оқушыларды әлемнің түкпір-түкпірінен біріктіреді. ЖИ-дің көмегімен жасалған онлайн курстар мен оқу платформалары көпшілікке қолжетімді және икемді білім беру формаларын ұсынады. Бұл әсіресе шалғай аймақтардағы, білім беру ресурстарынан шектеулі жандар үшін жаңа мүмкіндіктер алаңына айналуда.&nbsp; P/S: Әлем алпауыттары талас-тартыста қол жеткізіп отырған өнертабыстар мен жаңа технологияларды жат санамай, жаңа дүниені игеруге үйрену де керек-ақ. &nbsp;&nbsp;Жәмила Ермахан &nbsp;

Жасанды интеллект: Білім сапасын жақсартудың жаңа мүмкіндігі

<a href="https://kyzylorda-news.kz/">Kyzylorda-news.kz</a> 2012 жылдың 28 шілдесі. Көгілдір экраннан көз алмай қараған қазақстандықтар дәл осы күні өздерін жеңіп күтіп тұр дегенге сенбеді. Себебі "сайтанарбаның" талай саңлақтары бәсекеге түскен веложарыста Александр Винокуровтың мүмкіндігі жоғары емес еді. Бірақ мәре сызығын 5 сағат 45 минут 57 секундта алғашқы болып кесіп, төбемізді көкке жеткізді. Қазақ елі бұл сәтті естен шығармақ емес.Алайда осыдан кейін бұл спорт түрінен олимпиадада олжа салған ешкім болмады. Десек те болашақта велоспорттан талай жеңімпаз шығарына сенеміз. Себебі бүгінде Аралда бірнеше жас спорттың осы түрін жанына серік етіп, кәсіби тұрғыда шынығып жүр.Балғын спортшылардың бапкері Олжас Ідірісов:<blockquote>– Қызылорда велоспорт кәсіпқой клубы аудандарда балалардың спортпен айналысуына мүмкіндік жасап жатыр. Осыған дейін көршілес Қазалы ауданында бала дайындадым. Ал Аралға былтыр күзде келдім. Нақтырақ 2023 жылдың 3 қазаны күні ауданда Қызылорда велоспорт кәсіпқой клубының бөлімшесі ашылды. Алғашында қыстың қолайсыздығына, арнайы залдың болмауына байланысты аздаған кедергілер болды. Бірақ қазір Рәміздер алаңында балаларды жаттықтырып жатырмын, – дейді.</blockquote>Бапкер қос дөңгелекке қызығатын жастар көп екенін айтып, олармен жұмыс істеу шабыт беретінін жеткізді. Осыған дейін жастарды спортқа баулуды жете меңгерген Олжастың өзі 1995 жылы Арал қаласында дүниеге келген. Денешынықтыру және спорт мамандығы бойынша білім алып, оқу бітіріп келген соң қаладағы №62 мектеп-лицейде ұстаздық еткен. Кейіннен біз айтып өткен Қызылорда велоспорт кәсіпқой клубына жұмысқа орналып, велоспорттың қыр-сырын терең меңгерген. Білгенін балғындарға үйретуді көздеген ол қазіргі жұмысы жайлы толыққанды айтып берді.<blockquote>– 2010-2014 жылдары туған жастарды қабылдап жатырмын. 15-тей бала күнделікті жаттығып, жетіліп қалды. Тіпті жарыстарға барып жүр. Ашылғанына жыл толмаса да жетістіктері көңіл қуантады. Қыстық жаттығу түрлерінен сынға түскен Азамат Батуханұлы күміс, Дінислам Қуанышұлы қола жүлде еншілеп үлгерді, – дейді.</blockquote>Алдағы жоспарымен бөліскен Олжастың мақсаты айқын. Тек санаулы баламен шектеліп қалғысы келмеген бапкер жақында 2015 жылы туған балаларды да топқа қосып, олармен де жетістікке жетуді көздейді.Мемлекет басшысы Қ.Тоқаев "Халықтың денсаулығын жақсарту мәселесі айрықша назар аударуды қажет етеді. Барлық жастағы ел азаматтары арасында бұқаралық спортты дамыту маңызды. Спорт инфрақұрылдарының балалар үшін барынша қолжетімді болуын қамтамасыз ету керек. Бұқаралық денешынықтыруды өркендету ісі жаңа чемпиондар шыңына шығатын пирамидаға айналуы тиіс. Бұл салауатты әрі белсенді жастардың, түптеп келгенде, қуатты ұлттың негізін қалыптастырады" деген болатын.&nbsp;Бұқаралық спортты дамытуды алдыңғы кезекке қойған елімізде қолдау мен мүмкіндік бар. Ал спортқа жаны жақын жастар тіпті көп. Тек осы екеуін ұштастырып, балалардың қызығушылығы мен жасалған жағдайды тиімді пайдаланса талай әлемдік додада көк Туымыз желбірейтіні анық. Оңталап ЖОЛДАСОВ

Аралда велоспортшылар бар

<a href="https://kyzylorda-news.kz/">Kyzylorda-news.kz</a> Футболдан Қазақстан ұлттық құрамасы соңғы жылдары жоғары деңгейде ойын көрсетіп келеді. Ұлттар лигасында өз тобының үздігі атанып, В лигасына көтерілсе, биыл Германия төріндегі ЕУРО-2024-ке іріктеу кезінде төртжылдықтың басты турниріне бір қадам қалды. Бұл – үлкен жетістік. Барша қазақстандықтың есінде қалатын нәтиже. Міне, осы құрамада доп теуіп, әр ойын сайын жанкүйерге керемет эмоция сыйлаған ойыншылардың бірі – Абат Айымбетов. Әсіресе ЕУРО-ның 1/8 финалында алаң иелеріне жол берген, осы турнирдің 1992 жылғы чемпиондары Дания қақпасына жеңісті гол соққан сәті мен Солтүстік Ирландиямен сырт алаңда өткен ойында қарсылас команда қорғаушыларынан қиналмай өтіп, соңғы минуттарда соққан жеңіс голы футболсүйер жандардың есінен ұмытылмақ емес.&nbsp;Міне, осы Абаттың Аралдық екенін сұхбаттарынан естіген болатынбыз. Жақында ұлттық құрама мен Түркия премьер лигасының Адана Демирспор клубында өнер көрсететін жерлесіміздің әкесі Қайрат Сабашұлы Айымбетовпен сұхбаттасқан едік.– Қайрат аға, амансыз ба?! Қазірде әрбір қазақ баласы Абатқа еліктеп өсіп келеді, оның спорттағы жолын жақсы таниды. Бірақ Абаттың осы жолға қалай келгенін, қандай сынақтардан өткенін өзіңізден артық ешкім білмейді. Сол жайында айтып өтсеңіз.– Көп рақмет! Шынында спортқа қызықпайтын ер азамат жоқ шығар. Оның үстіне футбол әлемдегі ең танымал спорт. Абаттың осы спортқа қызығуы да заңдылық.Менің өзім жас кезімнен доп тептім. Әлі күнге дейін Арал қаласында «Водник» футбол клубы болғанын ересек буындар жақсы біледі. Мен сол «Водник» - 2 жасөспірімдер командасының құрамында болдым. Сол «Водник» - 2 жасөспірімдер командасынан бастау алып, үлкен деңгейде танымал боп көптеген ойыншылар шықты. Олар, Аралда Бақтыбай Ордабаев, Байқоңырда Теміржан Атағұлов, Серік Жанұзақұлы, Марс Сәдуақасов, Алматыда Болат Есмағанбетов және т.б. Осы азаматтар қазіргі таңда елімізде футболдың дамуына көп үлестерін қосып келеді.&nbsp;Маған да кезінде Қызылорданың "Мелиоратор" клубынан шақырту келген. Бірақ отбаслық жағдайыма байланысты, жоғарғы деңгейде спортты жалғастыруға &nbsp;бара алмадым. Оның үстіне ауыр жарақат алып, жасыл алаңда өнер көрсетуді қойып кеттім. Бірақ теледидардан үнемі футбол көретінмін. Сол кезден-ақ Абаттың футболға деген қызығушылығын байқадым. Кішкентай кезінен түнімен жанымда отырып, ойын көретін. Мейлі үйде болсын, қонаққа барсын балалармен ойнағаннан көрі доп теуіп кететін.&nbsp;Бірде Атырауда ұлттық құрама ойыншыларымен кездестім. Сол кезде ол 3-4 жасар бала еді. Қазақ футболының аңыздары Самат Смаков, Әли Әлиев сынды танымал ойыншылармен сәлемдесіп, батасын алған еді. Кейін Ақтөбе қаласына көшіп келіп, баламның қызығушылығын байқағасын футболға алып бардым. 2-3 рет ғана өзім апарып-әкеліп жүрдім. Кейін өзі қатынайтын болды. Салқынға, ыстыққа, жаңбыр, қар демей бір күн дайындықты бос жібермеді.– Абат сол уақыттың өзінде ерекше көзге түсті деп естіп жатамыз. Ең алғаш футбол әлеміне қадамы жайлы айтып берсеңіз.– Барлық бала осы жолды армандайды ғой. Бірақ шын мықтыға кедергі болмайтынын ол дәлелдеп шықты. Ай сайын ата-аналарды шақырып, бапкерлері жиналыс жасайды. Сол кезде Абатты ауызынан тастамай мақтайтын. Бірде жұмыстан келсем, Абат жаттығудан көңілсіз келіп, "мен енді футбол ойнамаймын" деді. Себебін сұрадым. Өзі қатарлас балалардың арасында құрамаға іріктеу өтіп, солардың қатарына ілікпей қалыпты. Сол кездегі жастар футболын басқаратын Прихноға қоңырау соғып себебін сұрадым. Сөйтіп ол іріктеу соңғы мүмкіндік екенін естідім. Бірақ барынша жағдай жасайтынын айтты. Қателеспесем 2010 жыл еді. 7 наурыз күні олар хабарласып, бүгіннен қалмай Шымкентке жолға шығу керегін жеткізді. Сол жақта Президент кубогына іріктеу өтеді екен.Шымкентке бардық, бапкер неміс екен. Барлық ойыншылар іріктеліп қойған. Бірақ қосымша іріктеуге жер-жерден тағы бір топ бала жиналған. Бапкер кірген бойда Абатқа бастан аяқ қарады да, "Балаңызды тастап кетіңіз. Өзімізден хабар болады" деді. Екі күн іріктеу өтті. Үшінші күн дегенде балам телефон соғып "Әке, келіп кетіңізші, мен іріктеуден өттім" деп сүйінші сұрады. Әкеге мұнан асқан бақыт бар ма?! Төбем көкке жеткендей болды. Сол іріктеуден кейін-ақ құраманың негізгі ойыншысы атанып, Түркіменстанмен өткен ойыннан бастап гол соқты. Сол турнирдің үздік бомбардирі атанды. Кейін Каспий кубогына қатысып, бір ойында төрт гол соғып, үздік шабуылшы атанды. Осылайша "Ақтөбе" ФК-ның дубліне ілікті.– Бала кезден көзге түсіп, кейін футболдан қол үзіп кететіндер жайлы да көп айталады. Оған да белгілі бір себептер болатынын да естіп жатамыз. Абатта ондай кедіргілер болмады ма?– "Ақтөбе" ФК-ның дублінде ол небары 3 ай ғана ойнады. Кейін ешқандай қиындықсыз негізгі құрамына ауысты. Ол уақытта елімізге белгілі, өзі баптаған клубтармен премьер лига чемпионы атанған Владимир Муканов баптайтын. Бірде дайын кезінде дубль мен негізгі құрам бір-біріне қарсы ойнады. Өзім сол ойынды тамашаладым. Жалпы Абаттың Ақтөбедегі бір де бір ойынын қалт жібермедім. Сол ойында І тайм дубльдің жеңісімен аяқталды. Есеп 1:0. Үзілісте бас бапкер Абатты шақырып алып, сөйлесті де, ІІ таймда негізгі құрамның қатарында ойнады. Ойын 1:1 есебімен тең аяқталды. Есепті теңестірген де Абат болды. Осылайша негізгі шабуылшы атанып шыға келді.&nbsp; Премьер лигадағы алғашқы ойынын Атыраумен сырт алаңда өтікізіп, 70 минут жасыл алаңда өнер көрсетті. Оқушы баланың осындай ерлігі жайлы жарыса жазылды. Ал ең алғаш голын қарағандылық Шахтер қақпасына салды. Өзі абдырап қалғаны әлі көз алдымда. Команда капитаны Петр Бадло алғашқы болып құттықтағанда ғана өзінің гол соққанына сенімді болған еді.Бірақ спорт кедергісіз болмайды ғой. Оны жеңу үшін шыдам мен сабыр керек. Абаттың ең ауыр кезеңі жарақатта жатқан уақыты еді. Тізе жарақаты футболшылар үшін ең ауыры. Сол жарақаттан 8 айдан аса уақыт емделді. Бірақ футболды тастамады. Осы ретте сол уақытта "Ақтөбе" ФК-ның бас директоры болған марқұм Шарипа Бихамбетованың қолдауын ерекше айтып өткім келеді. Ол Абатқа футболшы емес, баласындай қарайтын. Ерекше жақсы көрді. Сол кісінің қолдауымен футболға қайта оралды. Мұнан кейін де талай жарақат алды. Астанамен ойында кебеже сүйегі сынып, әлі күнге дейін темірмен ойнап келеді.– Абаттың аралдық екенін баршамыз білеміз. Аралдық жастар республикалық турнирлерде бақ сынаған кезде арнайы барып қолдау білдіргенін естіп жүрміз. Алайда оның "Ақтөбенің алтын баласы" деп аталуында себеп бар ма?– Иә, Абат Аралды ешқашан ұмытқан емес. Жақында демалысқа келген уақытында да жерлестеріміз түрлі жобалармен шақыртып, кездесулер өткізгісі келді. Бірақ уақыт ыңғайға келмей жатады. Ал Ақтөбеде "Алтын бала" атануына чемпиондық маусымдағы өнері себепші болды. Жалпы ФК "Ақтөбе" ел чемпионатын бес мәрте жеңген. Соның соңғысы 2013 жылы еді. Шешуші ойын шымкенттік "Ордабасы" клубымен өтті. Дәл сол ойында Абат жеңіс голын соығып, алтын медаль сыйлады. Сол ойыннан кейін осы атаққа ие болды.– Әдетте спортты жанына серік еткен жандар аса білімді болмайды деген түсінік бар ғой. Абат мектепте қалай оқыды?– Абат мектепте өте жақсы оқыды. Үлгірімі өте жоғары, қай жағынан да мектептің мақтанышына айналды. Мектепті бітірген соң Қ.Жұбанов университетінің спорт факультетін үздік аяқтап шықты. Алайда көп уақыты алаңда өтті.– Табысты, үздік ойыншыларға сұраныс, шақырту көп болады. Абаттың үнемі қастарыңыздан алыста жүргені сіздерге қиындық тудырмайды ма?– Жоғарыда айттым ғой. "Балаң жақсы болса – екі көздің шырағы" деген қазақпыз ғой. Бастысы әкесі жетпеген биікті бағындырды. Бүгінде құрамадағы ең белді ойыншы. Алайда ата-ана болғасын уайымдайтын кездеріміз болады. Анасы Айгүл, апасы Мөлдір, қарындасы Айкенже, бәріміздің тілеуіміз сол – Абат. Бірақ өз саласында өсіп, дамып, жетілу үшін оған біздің қолдауымыз маңызды. Абаттың сыртта жүргеніне биыл бес жыл. Алматыда, Астанада доп тепті. Бүгінде Түркияда "Адана Демирспор" сабында жүр.Баламыздың осындай жемісті жолынан асқан бақыт бар ма?! Бір жағынан бұл үлкен мақтаныш. Өйткені Абат Түркия премьер лигасында ойнауға мүмкіндік алған алғашқы қазақ. Бұл тек біздің емес, елдің мақтанышы деп ойлаймын.– Әрине, елдің абыройын арқалап, көк Туымызды көкте желбіреткен әрбір қандамысызға бәріміз тілекшіміз, солармен мақтанып отырамыз. Осы ретте танымал адамдар жайлы халық арасында түрлі әңгімелер айтылады. Сондай сөздердің арасында көңіліңізге тигені болды ма?– Оның рас. Түрлі әңгімелерді естіп жатамыз. Кім-кімнің де жақсыға жақын жүргісі келеді ғой. Оған ренжіп, көңілді түсіру орынсыз болар. Десе де Абатты руы жайлы айтылған сөздерді көп естіп жатамын. Шындығында Абат Кіші жүзден тараған Жақайымның Торжынбайы. Бірақ өз басым жүзшілдікке, рушылдыққа қарсымын. Сондықтан Абатты барша қазақтың баласы деп қабылдаса екен деймін.– Әңгімеңізге көп рақмет! Біз Абатпен, қазақ футболымен мақтанатын күнге жетейік, аға! Сұқбаттасқан Оңталап ЖОЛДАСОВ

Аралдан Аданаға дейін

<a href="https://kyzylorda-news.kz/">Kyzylorda-news.kz</a> «Теңге – тиыннан, ынтымақ – ұйымнан» деген қазақ мәтелі тегін айтылмаса керек. Мағынасына келсек, әрбір үлкен істің бастауындағы ниет бірлігіне саяды. Яғни тиыннан тау тұрғызып, мол табысқа кенелуге болады деген сөз. Мәселен, балықты көбейтуді мақсат еткен кәсіп иелері шабақ өсіруге аса мән беруге міндетті. Әсіресе, күріш суы тартылғанда қараусыз қалған майшабақтар аң-құсқа жем болып, құрт-құмырсқаның азығына айналғанын талай көз көрді. Сондықтан осы салаға жауапты мамандар көл иелері жаздың соңына қарай шабақты құтқару науқанына білек сыбана кіріседі. Биыл да «Балық шабақтарын құтқару акциясы – 2024» дәстүрлі жалғасуда.Облыс әкімдігінің хатымен бекітілген «2024 жылға облыс көлеміндегі күріштік алқаптарда қалған балық шабақтарын құтқару жұмыстарының іс-шаралар жоспарын» орындау мақсатында Жаңақорған ауданы әкімінің орынбасарымен бекітілген жоспар аясында 700 000 дана балық шабақтарын құтқару тапсырылған. Кезекті шабақ құтқару шарасы барысында облыстан арнайы мамандар келіп, күріштіктерді аралап, көлдерге шабақ салу жұмыстарына қатысты.Акцияға Арал-Сырдария облысаралық бассейндік балық шаруашылығы инспекциясының бас мамандары Б.Белгібаев, Б.Балжанов, Жаңақорған орман және жануарлар дүниесін қорғау жөніндегі аумақтық инспекциясы директорының орынбасары Е.Баязитов, ауданның ауыл шаруашылығы мен жер қатынастары бөлімінің бас маманы Ж.Тұраповтар қатысып, дәстүрлі науқанға серпін берді. Сондай-ақ, табиғат пайдаланушылар арасынан «Кіржуған», «Қойлақы-Ата», «Имаш», «Жыңғылдысай», «Тынысбек», «Қалғандария-1», «Қалғандария-2», «Баспақкөл» және «Мырзакөл» көлінің иелері де ортақмақсаттан тыс қалмады.<blockquote>– Жыл сайын шабақ құтқару жұмысына жұмыла кірісіп, мүмкіндігінше көл байлығының шығын болмауын қадағалаймыз. Биыл жұмыс берекелі ұйымдастырылып, құтқарылған шабақтар келесі жылдың көктеміне дейін өсіп, кәсіптің керегесін кеңейтеді деген ниетіміз бар. Ең бастысы, табиғат байлығы талан-таражға түспей, көптің игілігіне жаратылуы керек, – деді «Кіржуған» көлінің иесі Н.Жұманов.</blockquote>Арнайы топ «Р-11» каналы бойынан шабақ құтқаруға қатысып, Кіржуған көліне – 50 000 дана, Жыңғылдысай көліне – 60 000 дана, «Р-16» каналы бойынан Қойлақы-Атаға – 40 000 дана, Тынысбекке – 40 000 дана, Имаш көліне – 10 000 дана, Қалғандария-1-ге – 30 000 дана, Қалғандария-2-ге – 20 000 дана, Баспақкөлге – 15 000 дана, Мырзакөлге – 15 000 дана, барлығы 280 000 дана балық шабақтарын тиісті су айдындарына жөнелтті.<blockquote>– Акцияны орындау барысында ағымдағы жылдың 12-13 тамыз күндері «Борықты» көлінің иесі және 3 жұмысшысы, 1 дана УАЗ техникасы, 1 дана су сорғыш насос қондырғысы, 3 дана шелек, 1 дана балық сақтайтын бөшке көмегімен Жаңақорған ауданының шипажайына баратын «Тұздыкөл» көліне құятын арнаның бөлектенген бөлігінен 60 мың дана (карас – 48 мың, сазан – 9 мың, тұқы – 3 мың) балық шабақтары құтқарылып, «Борықты» көліне жіберілді. Одан бөлек, Аққорған ауылдық округінде күріштік алқаптарын сумен қамтамасыз ететін «Р-11, Р-16» каналдарынан балық шабақтарын құтқару акциясы ұйымдастырылды. Акцияға 6 техника, 20 адам, балық тасығыш систерна, бөшке, шелек, аулағыш торлар, өзге де құралдар қатыстырылды. Алдағы күндері акция Сунақата, Екпінді, Қыркеңсе, М.Нәлібаев, Өзгент, Жаңарық ауылдық округтерінде жалғасын табатын болады, – деді жауапты маман Жасұлан Тұрапов.</blockquote>Шыны керек, шабақтың шығынын көргенде «әттеген-ай» деген ой келеді. Неге? Өйткені бізде балық шаруашылығы дами қойған жоқ. Шабақ деген дайын өнім ғой, соны өсіріп-өндірсек, не болмаса сол дайын күйде иігілігімізге идірсек деген ой ғой. Өткенде де айтқн болатынбыз, біздің күнделікті тіршілікте тұтынып жүрген майшабақ консервілері, балық паштеттері немесе қазір кез-келген дүкеннен табылатын кептірілген майда балықтар біз әлгінде ғана атап өткен күріш алқабында күз келсе қырылып қалатын шабақтардан жасалған. Оның дүкендегі орташа бағасы – 500-600 теңге. Көзге түскен консервідегі балықтардың басым бөлігі Орал өңірінде дайындалса, қалтадағы кептірілген балықтар Алматы облысынан шығарылады.Осы жерде балық бизнесіне бет бұратындарға құлаққағыс болсын, балық шаруашылығын субсидиялау да әжептеуір көңілге демеу. «Балық шаруашылығы өнімінің өнімділігі мен сапасын арттыруды субсидиялау» 034 бағдарламасы бойынша бекіре, арқан және тұқы балықтарының түрлері мен олардың будандарын өсіру кезінде пайдаланылатын жемді сатып алуға жұмсалған шығыстардың 30%-ын, өзге де шығыстардың 50%-ын өтеу облыстық бюджеттен қаралатын қаражат арқылы жүргізіледі.Биыл ауданда күріш өсіру межелі орындалды, өнім де көңіл қуантарлық. Диқандар төккен термен еңбекті ақтады деп қуануда. Енді шабақтар шығын болмаса болғаны. Өйткені балық та табиғаттың бір байлығы, әрі табыс көзі. Тілін түсініп, істің көзін тапқан адамға балық бизнесі қыруар пайда әкеледі. Десе де Жаңақорғанда балық шаруашылығы аяғынан тік тұрып кете қойған жоқ.Қорыта айтқанда, жасалынып жатқан игі іс – Сыр балығына деген қамқорлық. Табиғат сыйы – тіршілік иесін құтқару әрбір азамат алдындағы үлкен жауапкершілік. Табиғат өзі жүктеп отырған маңызды міндет дер едік. Сондықтан бұл тіршілік иесіне де мейірімділік танытқан абзал.&nbsp;Әли ТЕМІРБЕК &nbsp;

Жаңақорғандағы балық шаруашылығының жай-күй қалай?

<a href="https://kyzylorda-news.kz/">Kyzylorda-news.kz</a> 17 жылдан бері құрылыс саласында табанды еңбек етіп аудандық маңызы бар және қалаішілік жолдарды салумен айналысып келе жатқан құрышқол құрылысшы Мейрамбек Құлмырзаев аудан көлемінде елеулі ісімен танылып келеді. Әке жолын жалғаған құрылысшының бүгінгі жеткен жетістіктері мен салада қалдырған қолтаңбасы туралы ел жақсы біледі.&nbsp;Кейіпкеріміз 1983 жылы Арал қаласында өмірге келген. Әкесі Оразғали ауданға белгілі құрылысшы. Ал анасы Балзира медицина саласында абыройлы еңбек еткен абзал жан. Отбасындағы 4 баланың ішінде әке жолын жалғанан тек Мейрамбек ғана. Жоғары оқу орнын «инженер экономис» және «заңгер» мамандықтар бойынша тәмамдаған ол бар білім, білігін өзі басшылық жасайтын «Арал құрылысы» ЖШС-нің жұмысын ілгерілетуге арнап келеді.&nbsp;<blockquote>– 2007 жылдан бері құрылыс саласына бетбұрыс жасап, ауданда бірқатар жобаларды жүзеге асырып келемін. Әсіресе, жол жөндеу, асфальт салу жұмыстарын жүйелі атқардық. «Арал құрылысы» мекемесінде 50 адам тұрақты жұмыспен қамтылған. Тендерлік жобаларға байланысты кейде 100 адамды маусымдық жұмысқа алып отырамыз. «Ер ел үшін туады» деген қазақта жақсы сөз бар. Менің де басты мақсатым елдің дамуына өз үлесімді қосу. Құрылысшы болу қажырлы еңбекті талап етеді. Сондай-ақ халықтың қажетін өтеу үшін басталған жобаларды қолға алғанда асқан жауапкершілік қажет. Қарапайым еңбек адамына тындырымды тірліктен соң елдің батасын алғаннан артық бақыт жоқ, – дейді Мейрамбек Оразғалиұлы.&nbsp;</blockquote>Экономикның негізгі күретамыры құрылыс саласы. Сол үшін атаулы саланың дамуы мемлекеттің экономикалық күш-қуаты мен әлеуметтік жағдайының дамуына тікелей байланысты. Бүгінде заман талабына сай етіп салынған құрылыс кешендері аймақтың айбынын арттырып, өңірдің өсіп-өркендеуіне үлес қосуда. Саланың серпінді дамуына септігін тигізіп жүрген ол «Құрметті жолшы» төсбелгісінің иегері. Аудандық мәслихат депутаты ретінде де ел мәселесіне мән беріп жүрген азамат.&nbsp;<blockquote>– Осы өңірде туып, өсіп, болашағымды қалыптастырған соң мені есейткен еліме қызмет ету міндетім деп білемін. Депутаттық мандатқа халық арасындағы көкейкесті мәселені оң шешуге ықпал жасап, тұрғындар талабын мінбелерде көтеру мақсатында келдім. Өзіме артылған сенімді абыроймен атқару үшін бар күш жігерімді салудамын. Әрине, кейде көп қаржыны талап ететін үлкен мәселелер болады. Оның бәрі уақыт талабына сай шешімін тауып жатады, – дейді кейіпкеріміз.&nbsp;</blockquote>Жастық жалыны мен күш-қайратын ауданның маңызды саласы құрылыс саласының қарқынды дамуына арнаған М. Құлмырзаев бүгінде өзінің айшықты келбетін қалыптастырып халықтың ұлына айналып отыр. Еңбекте табысты болумен қатар отбасылық бақытқа бөленіп, 5 баланың қамқоршы әкесіне айналған жанның табанды тірлігі мен тындырымды ісі көпке үлгі.&nbsp; Назерке БАҚЫРАН&nbsp;

Қазақстан және Қызылорда облысының жаңалықтары