<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Машбекұлының төрағалығымен 2025 жылдың 10 маусым күні өткен мәжілісте «Қауіпсіз еңбек жағдайларын және еңбек саласын цифрландыру жөніндегі шаралар туралы» мәселесі қаралып, тиісінше мүдделі мекемелер мен аудан әкімдіктеріне қажетті шаралар қабылдап, «Еңбек тәуекелдерінің картасына» енген кәсіпорындарға түсіндірме жұмыстарын жүргізуді тапсырған болатын.Осы бағытта аудан әкімдігінің мәжіліс залында аудан әкімінің орынбасары Е.Әбішевтің төрағалығымен Еңбек тәуекелдерінің цифрлық картасындағы еңбек жанжалдарының алдын алу бағытында арнайы семинар өтті.Семинарға тиісті мекемелер мен кәсіпорын басшылары, жеке кәсіпкерлер мен шаруа қожалық иелері қатысты. Сонымен қатар арнайы келген мемлекеттік еңбек инспекциясы комитетінің Қызылорда облысы бойынша департаментінің басшысы Б.Жұмағұлов және осы департменттің бас маманы Б.Жұманов қатысты.Жиында Еңбек қатынастары және еңбек қауіпсіздігі саласындағы жұмыстар мен білім беру ұйымдарындағы еңбек заңнамасының орындалуын қамтамасыз ету туралы Мемлекеттік еңбек инспекциясы комитетінің Қызылорда облысы бойынша департаментінің бас маманы – мемлекеттік еңбек иснпекторы Б.Жұманов хабарлама жасады.Мұнан соң «Еңбек тәуекелдер картасы бойынша әлеуметтiк аударымдар және басқа да міндетті төлемдерді уақытылы және толық төлемеген төлеушілермен жұмыс туралы» аудандық кірістер басқармасының басшысы Е.Әбдікеров және Еңбек қауіпсіздігін ұйымдастыру туралы хабарлама жасау үшін сөз аудандық төтенше жағдайлар бөлімі басшысының міндетін атқарушы Н.Тажибаев баяндама жасады.Аталған мәселе бойынша семинарға қатысушылар өз ойларын ортаға салып, өзара пікір алмасты.

Еңбек жанжалдарының алдын алу бағытында семинар өтті

<a href="https://kyzylorda-news.kz/">Kyzylorda-news.kz</a> Жақында Қытайдың Ханчжоу қаласында волейболды отырып ойнаудан өткен Азия чемпионатында Қазақстан ұлттық құрамасы тарихи жеңіскеқол жеткізді. Бұл жеңіс — еліміздің осы спорт түріндегі алғашқы және ең айтулы жетістік болды. Ел намысын абыроймен қорғаған ұлттық құрамда Сыр өңірінің мақтаныштары — Эрик Қасқабаев, Шыңғыс Медеуов, Ерасыл Әбдібек және Асылхан Амидолла жарыс барысында жоғары деңгейде өнер көрсетіп, жеңіске сүбелі үлес қосты.Осыған орай, бүгін Сыр елінің спорт сүйер қауымы чемпиондарды «Қорқыт ата» әуежайынан зор қошеметпен қарсы алды. Сыр мақтаныштарына гүл шоқтарын табыстап, қазақтың дәстүріне сай шашу шашып, өздерінің ізгі тілегін жеткізді.Салтанатты күтіп алу рәсіміне Қызылорда облысының дене шынықтыру, спорт және туризм басқармасының басшысы Бахтияр Ғарифоллаұлы арнайы келіп, чемпиондарға өңір халқы атынан жүрекжарды алғысын білдіріп, айтулы жеңіспен құттықтады.Сондай-ақ, өңірде дәл осы спорт түрі қарқын дамып келе жатқандығын атап өтіп, алда өтетін әлемдік жарыстарда да жоғары нәтиже көрсететіндеріне сенім білдірді.Айта кетейік, Азия чемпионатында үздік ойын өрнегін көрсеткен жерлестеріміз Эрик Қасқабаев – үздік доп беруші, Шыңғыс Медеуов – үздік либеро атанды.Ендігі кезекте Қазақстан ұлттық құрамасы 2026 жылы Қытайда өтетін әлем чемпионатына өнер көрсетеді.Сырбойылық чемпиондар енді тек Азияны ғана емес, әлемдік додаларды да бағындыра деп сенеміз. Жеңісті күндер жалғасын таба берсін!Фото: Сыр спорты

Сырбойылықтар Азия чемпиондарын салтанатпен қарсы алды

<a href="https://kyzylorda-news.kz/">Kyzylorda-news.kz</a> 2025 жылы 16 маусымнан бастап Қазақстанда атаулы әлеуметтік көмек (АӘК) тағайындау және төлеудің жаңартылған қағидалары күшіне енді. Тиісті №166 бұйрыққа Еңбек және халықты әлеуметтік қорғау министрі 30 мамыр күні қол қойған.&nbsp;Бұл туралы<a href="https://stan.kz/kazakstanda-memleketten-beriletin-aleumettik-komekti-ta-419402/">&nbsp;Stan.kz&nbsp;</a>ақпарат агенттігі хабарлады.Жаңашылдықтардың басты мақсаты – жүйені анағұрлым нақты әрі әділ ету. Енді мемлекеттік көмек рәсімдеу кезінде өтініш берушінің табысы ғана емес, шығындары да ескеріледі. Еңбек және халықты әлеуметтік қорғау министрлігінің жоспары бойынша, бұл өзгеріс шынымен мұқтаж жандарды анықтап, көмекті дәл сол адамдарға бағыттауға мүмкіндік береді.Өтініш берген кезде барлық қажет&nbsp;деректер "электронды&nbsp;үкімет" жүйесі арқылы автоматты түрде жиналады. Ақпарат түрлі мемлекеттік органдардың дерекқорынан алынады – азаматтық мәртебесінен бастап, тіркелген мекенжайы, көлік пен жылжымайтын мүлік иелігі, депозиттер, банктік қарыздар мен жұмыс не бизнестен түсетін табыстарға дейін. Тіпті банк карталары арқылы жасалған шығындар да есепке алынады.Сондай-ақ&nbsp;азаматтың асырауындағы адамдардың оқып жүргені, алименттің тағайындалуы, еңбекке жарамдылығы мен біліктілік деңгейі де тексеріледі.Атаулы әлеуметтік көмек қалай беріледі?Қазақстанда атаулы әлеуметтік көмекті&nbsp;отбасының әрбір мүшесіне есептелетін орташа табысы кедейлік шегінен төмен азаматтар ала алады. Бұл көмекке келесі санаттағы адамдар үміткер бола алады:Қазақстан азаматтары;Қандастар (тарихи Отанына оралған этникалық қазақтар);Босқындар;Қазақстанда тұрақты тұратын азаматтығы жоқ адамдар.Отбасының бір адамға шаққандағы орташа табысы — бұл отбасының жалпы табысын отбасы мүшелерінің санына бөліп есептеледі.2025 жылдан бастап Қазақстанда кедейлік шегі — өтініш берілген тоқсаннан алдыңғы тоқсандағы медиандық табыстың 35%-ына тең, бірақ ол сол кезеңдегі өңірлік ең төменгі күнкөріс деңгейінің 70%-ынан төмен болмауға&nbsp;тиіс.Қазір&nbsp;АӘК-ті алу үшін азаматтар:Тұрғылықты жері бойынша әкімдікке,Мансап орталығына,Немесе электронды&nbsp;үкімет порталы (egov.kz) арқылы өтініш бере алады.Өзімен бірге тек жеке куәлік (немесе шетелдік азаматтың ықтиярхаты, азаматтығы жоқ адамның куәлігі, босқын куәлігі немесе қандас куәлігі) болуы жеткілікті.Еңбек және халықты әлеуметтік қорғау министрлігінің деректеріне сәйкес, 2024 жылы АӘК төлемдеріне 39,5 миллиард теңге жұмсалған. Ал 2025 жылы 1 миллион адамға&nbsp;атаулы әлеуметтік көмек&nbsp;төлеу үшін 132,9 миллиард теңге қарастырылған.

Қазақстанда мемлекеттен берілетін әлеуметтік көмекті тағайындау ережесі өзгерді

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде Мемлекет және қоғам қайраткері Оразкүл Асанғазықызымен «Берекелі отбасы» тақырыбында кездесу өтті.Жиынға Қызылорда облысы әкімінің орынбасары Шахмардан Байманов, Әлеуметтік және тәрбие жұмыстары жөніндегі проректор Жандос Базартай және Отбасы орталығы мен Жастар орталығының қызметкерлері, &nbsp;университеттің профессор-оқытушылары мен студенттері, сондай-ақ, бірқатар жоғары оқу орындары мен колледждердің білім алушылары қатысты.Шараның басты мақсаты – жастарға отбасылық құндылықтарды дәріптеу, ұлттық тәрбие негізінде саналы ұрпақ қалыптастыру.Кездесуде Оразкүл Асанғазы естеліктерімен бастап, тәрбиелі, саналы, ой өрісі дамыған ұрпақ тәрбиелеу, болашақ ұрпақтың бойына ұлттық құндылықтарымызды сіңіру, әдет-ғұрып, салт-дәстүр, бақытты отбасын құрудағы аналардың рөлі, мемлекеттік тіл туралы және еліміздің әр өңірінде еңбек еткен жылдарында өмірден алған тәжірибесімен бөлісті.<blockquote>«Әке – отбасының тірегі, отбасы мүшелеріне қамқоршы, ал ана – отбасының жүрегі, мейірімі мен тәрбиенің қайнар көзі. Екеуі бірлікте болып, баланы имандылық пен адамгершілікке тәрбиелеу – берекелі отбасының басты негізі», – деді Оразкүл Асанғазықызы.</blockquote>Кездесуге қатысушылар қоғам қайраткерінің өмірлік тәжірибесінен тағылым алып, өздерін толғандырған сұрақтарын қойды. Ашық форматта өткен жиын жастарға рухани серпін беріп, отбасы институтының қоғамдағы орны жайлы тың көзқарас қалыптастырды.Шараға қатысушылар қонаққа түрлі сұрақтар қойып, пікір алмасты.<img src="https://knadmin.beoblood.kz/uploads/korkyt_755b4575b6.jpg" alt="коркыт.jpg">

Университетте отбасы құндылықтарына арналған жиын өтті

<a href="https://kyzylorda-news.kz/">Kyzylorda-news.kz</a> Қызылорда қаласындағы Достық үйінде Қазақстан корейлер қауымдастығының мүшелері арнайы іс-сапармен келіп, жергілікті этномәдени бірлестік өкілдерімен кездесті.Кездесуді Қызылорда облыстық корей этномәдени бірлестігінің төрағасы Елена Ан жүргізіп, басқосудың негізгі мақсатына тоқталып, атқарылған жұмыстар туралы есеп берді.Іс-шара барысында қаржы саласының ардагері, өңірлік корей орталығының белсенді мүшесі Ирина Ким Қазақстандағы корей этносының депортациядан кейінгі қалыптасуы, дамуы және ел өміріне қосқан үлесі жайлы мазмұнды баяндама жасады.Сондай-ақ корей орталығының ардагері Юрий Ким Қызылорда өңіріндегі корей халқының тарихына, олардың еңбек жолына және орталықты басқарған тұлғалардың еңбегіне шолу жасады.Кездесу аясында LED экран арқылы бір жыл көлемінде орталықтың атқарған жұмыстарын қамтыған бейнешолу көрсетіліп, қатысушыларға ұсынылды.Қазақстан корейлер қауымдастығы жанындағы төралқа мүшесі Юрий Ким өз сөзінде қауымдастықтың 35 жылдық мерейтойы және 2027 жылы корейлердің Қазақстанға қоныс аударуына 90 жыл толуына орай өткізілетін маңызды шаралар жөнінде айтып өтті.Кездесу соңында тараптар өзара пікір алмасып, болашақтағы бірлескен жобалар мен бастамаларды талқылады.<img src="https://knadmin.beoblood.kz/uploads/assambleya_7ef08ed446.jpg" alt="ассамблея.jpg">Фото: Ассамблея Қызылорда

Қызылордада корей қауымдастығы өкілдерімен өткен мазмұнды кездесу өтті

<a href="https://kyzylorda-news.kz/">Kyzylorda-news.kz</a>&nbsp; ҚР Қаржы мониторингі агенттігінің жоспарына сәйкес «АФМ спортты қолдайды!» ұранымен Қызылорда облысы бойынша экономикалық тергеп-тексеру департаментінің ұйымдастыруымен&nbsp;департамент қызметкерлері арасында спорттық сайыс өтті.Шараның салтанатты ашылуында Қызылорда облысы бойынша экономикалық тергеп-тексеру департаментінің басшысы Аслан Кеңес, облыстық спорт және туризм басқармасының басшысы Бақтияр Артаев, &nbsp;бокстан Азия чемпионатының жеңімпазы Нұрсұлтан Алтынбек қатысып, жарысқа қатысушыларға сәттілік тіледі.<blockquote>– Бүгінгі спорттық мереке – тек жарыс емес, тәртіп пен әділдікті, достық пен табандылықты насихаттайтын шара. Бұл іс-шара Мемлекет басшысы Қасым-Жомарт Кемелұлының бастамасымен қолға алынған «Заң мен Тәртіп» жобасы аясында өткізіліп отыр. Осындай шарамызға қолдау көрсеткен Қаржы мониторингі агенттігінің Төрағасы Жанат Қалдыбекұлына, аймақ басшысы Нұрлыбек Машбекұлына және барлық ұйымдастырушыларға алғысымды білдіремін!, – деді Аслан Кеңесұлы.</blockquote>«Заң мен Тәртіп» нарративін ілгерілету мақсатында ұйымдастырылған бұл спорттық шараға қызметкерлердің балалары да қатысып, бақ сынады.&nbsp;Спорт бәсекесінде бәсі басым болғандарға жарыс қорытындысы бойынша алғыс хатпен марапатталды.Айта кетейік, аймақтық экономикалық тергеп-тексеру департаменттің ұйымдастыруымен маусым айының соңына дейін «Заң мен Тәртіп» акциясы аясында &nbsp;түрлі іс-шаралар өткізілетін болады. &nbsp;<img src="https://knadmin.beoblood.kz/uploads/AFM_sportty_oldajdy_1_9fa1981cb4.jpg" alt="АФМ спортты қолдайды 1.jpg">

«АФМ спортты қолдайды!» ұранымен спорттық сайыс өтті

<a href="https://kyzylorda-news.kz/">Kyzylorda-news.kz</a> &nbsp;2025 жылғы 11–14 маусым аралығында Алматы қаласында өткен Халықаралық «Бозторғай» балалар шығармашылығы байқауында жерлесіміз айрықша табысқа қол жеткізді.Аталмыш өнер додасына Қырғызстан, Өзбекстан, Тәжікстан, Польша, Армения сынды мемлекеттерден келген дарынды өнерпаздар қатысып, өзара үздік атану үшін сынға түсті.Солардың арасында Қызылорда облысы, Қармақшы аудандық К.Рүстембеков атындағы Жыраулар үйінің «Рүстембек жырау» үйірмесінің шәкірті – Талант Балтабай жыр-терме жанры бойынша өнер көрсетіп, қазылар алқасының жоғары бағасына ие болды. Нәтижесінде ол байқаудың ең жоғары марапаты – Гран-при жүлдесін жеңіп алды.Бұл жеңіс – халқымыздың төл өнеріне деген құрметтің, жас буын арасындағы жалғастықтың жарқын көрінісі. Жас жырауды және оны тәрбиелеген ұстаздарын шын жүректен құттықтай отырып, шығармашылық табыс пен биік белестер тілейміз!Фото: Қармақшы ауданы

Жерлесіміздің жарқын жеңісі – мақтанышымыз!

<a href="https://kyzylorda-news.kz/">Kyzylorda-news.kz</a>&nbsp; «Өнер орталығында» облыс әкімі Нұрлыбек Нәлібаевтың қатысуымен «Заң және Тәртіп» қоғамдық қауіпсіздікті күшейту мен өзара іс-қимылдың басымдықтары» тақырыбында форум өтті.Алқалы жиынға ҚР Парламент Сенаты мен Мәжілісінің депутаттары Наурызбай Байқадамов, Мұрат Әбенов, Мархабат Жайымбетов, Абзал Құспан, облыс прокуроры Ризабек Ожаров, құқық қорғау органдары мен жауапты сала басшылары, қоғам қайраткерлері, зиялы қауым өкілдері қатысты.Аймақ басшысы қоғамдық қауіпсіздік пен заңдылықты қамтамасыз ету бағытында атқарылған жұмыстарға тоқталып, алдағы бірлескен маңызды міндеттерді айқындады.<blockquote>«Биыл 1 сәуірде Үкімет қаулысымен «Қоғамда заң мен тәртіп идеологиясын ілгерілету жөніндегі 2025-2030 жылдарға арналған тұжырымдама» бекітіліп, нақты міндеттер белгіленді.Өңірімізде «Заң мен Тәртіп» қағидасын іске асыруда облыс прокуроры Ризабек Кәрімұлымен бірлесіп кешенді шараларды қолға алып, жаңа бастамаларға үздіксіз қолдау көрсетіп келеміз.Құқық қорғау органдарымен бірлесе жүргізілген кешенді әрі үйлесімді шаралардың нәтижесінде өңірімізде ахуал тұрақты. Статистикалық ақпараттарды салыстырмалы түрде қарасақ, аймақта 2015 жылы 6 мыңға жуық қылмыс тіркелген болса, нақты жұмыс нәтижесінде бұл көрсеткіш 1158-ге дейін азайды. Соңғы үш жылда құқық бұзушылық көрсеткіші едәуір қысқарды.Бүгінде тіркелген қылмыстық құқық бұзушылық саны бойынша Қызылорда облысы республикадағы ең төменгі позицияда, яғни 20 өңірдің ішінде 19-шы орындамыз. Біздің міндет – тек көрсеткішті ғана емес, құқық бұзушылықты тұрақты түрде төмендету.Жол-көлік оқиғаларын азайтуда жол инфрақұрылымын дамытуға басымдық бердік. Түрлі гаджеттер мен смартфондағы бағдарламалар көмегімен жасалатын алаяқтық, кибершабуыл схемалары сәт сайын өзгеріп жаңаруда. Қаржы пирамидалары, лудомания, интернет буллинг азаматтарды қиын жағдайда қалдыруда.Мүдделі құқық қорғау органдары қолда бар ресурстармен шектелмей, қылмыстық әрекеттерге тосқауыл қоятын жаңа тетіктерді дамытуы тиіс. Осы бағыттағы қылмыстарды анықтауда жасанды интеллектті пайдалану – орнықты шешімнің бірі. Форум – біздің алдағы жұмыстарымызды жаңа формацияда жүргізуге өз септігін тигізеді деп сенемін», – деді Н.Нәлібаев.</blockquote>Басқосуда облыс прокурорының орынбасары Нұрболат Дүйсенбаев, Парламент Сенатының депутаты Наурызбай Байқадамов, мемлекет және қоғам қайраткері Оразкүл Асанғазы, Парламент Мәжілісінің депутаттары Мұрат Әбенов пен Абзал Құспан сөз сөйлеп, форум жұмысына сәттілік тіледі.Құқық бұзушылықтардың алдын алуда ерекше белсенділік танытып, киберкеңістіктегі заңсыз әрекеттердің жолын кесуге үлес қосқан мамандарға облыс әкімінің сыйлық сертификаттары мен облыс прокурорының Алғыс хаты табысталды.Соңғы үш жылда полиция органдарының материалдық-техникалық базасын жақсартуға облыстық бюджеттен 8 млрд.теңгеге жуық қаржы бөлінді. Биыл бұл мақсатқа 2 млрд. 800 млн. теңге қаралып, заманауи құрылғылармен, жабдықтармен қамтамасыз етілуде.Республикада алғашқы болып облыстың барлық ауданында полиция бөлімдерінің Жедел басқару орталықтары ашылды. Қауіпсіздікті күшейту, жедел әрекет ету мақсатында бейнебақылау камераларының желісі көбейтілді.Барлық ауданға құны 2 млрд. 200 млн. теңге болатын 539 бейнебақылау, 49 жылдамдық өлшейтін камера орнатылды. Соңғы жылдары полиция қызметкерлеріне замануи құрылғылармен жабдықталған 128 жаңа автокөлік табысталды.Биыл тағы 31 қызметтік автокөлік тапсырылып, арнайы құрал-жабдықтар көбеймек. Бұл мақсаттағы жұмыстар алдағы уақытта да жалғасын табады. Ашықтық қағидатына сәйкес қала, аудандарда құқық қорғау органдарының бірінші басшыларымен бірге қоғамдық қабылдаулар тұрақты өткізіліп келеді. Бұл өз кезегінде тұрғындардың мемлекеттік органдарға деген сенімділігін арттырып, әділетті қоғам құруға тың серпін бермек.Фото: Қызылорда облысы әкімінің баспасөз қызметі

 «Заң және тәртіп» қоғамдық қауіпсіздікті күшейту мен өзара іс-қимылдың басымдықтары» форумы өтті

<a href="https://kyzylorda-news.kz/">Kyzylorda-news.kz</a>&nbsp; Президент Қасым-Жомарт Тоқаев Ақорда резиденциясында Қытай Халық Республикасының Төрағасы Си Цзиньпинді қарсы алды.Мемлекет басшысының айтуынша, ҚХР Төрағасы қазақ жерінде қай кезде де қадірлі қонақ саналған, ал оның бұл жолғы сапары – шынайы әрі мызғымас достығымыздың айқын көрінісі.<blockquote>– Қытай Халық Республикасы – Қазақстанның тату көршісі, жақын досы және сенімді серіктесі. Сан қырлы қазақ-қытай ықпалдастығы Сіздің жеке қолдауыңызбен мәңгі әрі жан-жақты стратегиялық әріптeстік рухында және бұрын-соңды болмаған қарқынмен дамып келе жатыр. Мұны ерекше ықыласпен атап өткім келеді. Ортақ тарихымызға мұқият үңілсек, елдеріміздің арасында ешқандай түйткілдер немесе тосқауылдар болмаған. Тек қана өзара достық пен ықпалдастық, түсіністік пен жылы лебіздер басым болды. Қытай халқы қазақ халқына ешқандай зиян келтірген жоқ,– деді Қазақстан Президенті.</blockquote>Мемлекет басшысы екіжақты қарым-қатынас жылдан жылға нығайып, жаңа «алтын кезеңге» қадам басқанын мәлімдеді. Достық байланыс екі елдің тұрақты әлеуметтік-экономикалық дамуына және халықтардың әл-ауқатын жақсартуға зор септігін тигізіп жатқанына назар аударды.Қасым-Жомарт Тоқаев ҚХР Төрағасының елімізге сапары оның туған күнімен тұспа-тұс келіп отырғанына ерекше мән беріп, Си Цзиньпинге зор денсаулық, бақ-береке, жауапты мемлекеттік қызметіне толайым табыс тіледі.<blockquote>– Сізді Қазақстанда аса көрнекті мемлекет қайраткері, халықаралық қоғамдастық алдында зор абырой-беделге ие көреген көшбасшы деп біледі. Еліңіздің қарқынды дамуы Өзіңізбен тікелей байланысты. Сіздің сарабдал саясатыңыздың арқасында Қытай Халық Республикасы әлеуметтік-экономикалық жаңғыру және азаматтардың әл-ауқатын жақсарту ісінде ерен жетістікке жететініне сенімдімін. Біз жаңа тарихи кезеңде өзіне тән ерекшелігі бар социализм негізін қалап жатқан Қытай халқының мол табыстарына шын қуанамыз. Сіздің маған және барша Қазақстан халқына деген құрметіңізді жоғары бағалаймын, – деді Қасым-Жомарт Тоқаев.</blockquote>Президент Қытайды Қазақстанның тату көршісі және уақыт тезінен өткен сенімді стратегиялық серіктесі деп атады. Мемлекет басшысының айтуынша, екі елдің қарым-қатынасы тұрақты сипатқа ие әрі оған геосаяси сын-қатерлер мен дүрбелеңдер, сондай-ақ халықаралық ахуал теріс әсер етпейді.<blockquote>– Қытай Қазақстанмен арадағы ынтымақтастығында қандай да бір саяси шарт қоймаған. Біздің егемендігіміз бен қауіпсіздігімізге көрсеткен қолдауыңызды бағалаймыз. Қытайдың бейбітшілік бастамаларын қолдаймыз. Еліңіздің әділ әлемдік тәртіп орнату әрекеттерін қуаттаймыз, – деді Қазақстан Президенті.</blockquote>Қасым-Жомарт Тоқаев екі елдің БҰҰ, ШЫҰ, АӨСШК секілді халықаралық және өңірлік ұйымдар аясында, сондай-ақ БРИКС + және «Орталық Азия – Қытай» форматында жоғары деңгейдегі ықпалдастық орнатқанын атап өтті.Мемлекет басшысы ҚХР-дың Қазақстанның ең ірі сауда-экономикалық серіктесі екенін еске салды. Былтырғы қорытынды бойынша екіжақты сауда-саттық көлемі 44 миллиард долларға жеткен. Бұл – рекордтық көрсеткіш.Сонымен қатар Президент мәдени-гуманитарлық саладағы елеулі жетістіктерге тоқталды. Атап айтқанда, елімізде мәдениет орталықтары, Лу Бань шеберханалары, Қытай жоғары оқу орындары мен ғылыми-техникалық орталықтарының филиалдары ашылды. Қазақстан Конфуций орталықтарына қолдау көрсетеді. 2025 жыл «Қазақстандағы Қытай туризмінің жылы» болып жарияланды. Бұл екіжақты ынтымақтастықты тереңдетуге, өзара сенімді нығайтуға септігін тигізеді.Қасым-Жомарт Тоқаев атом энергетикасы саласына арнайы тоқталды.<blockquote>– Біз Қазақстанда бірнеше, тым болмағанда екі-үш АЭС салу туралы шешім қабылдадық. Осы маңызды жобаға ірі компанияларды тартуға қатысты жұмыс жүргізіліп жатыр. Қазақстан Республикасының Атом энергиясы жөніндегі агенттігі құрылды. АЭС құрылысы бойынша Қытайдың CNNC компаниясын сенімді стратегиялық серіктес ретінде қарастырып отырғанымызды ерекше атап өткім келеді. Әлемге әйгілі компания біздің нарықта өз орнын табатыны анық. Сонымен қатар Қазақстан Қытайға табиғи уран мен ядролық отын жеткізіп отырған сенімді ел, – деді Президент.</blockquote>Си Цзиньпин қазақ жерінде көрсетілген сый-құрмет үшін Президентке ризашылығын білдірді. Ол Қасым-Жомарт Тоқаевтың басшылығымен Қазақстан ұлттық жаңғыру жолына түскенін, ел дамуында тың табыстарға қол жеткізіп келе жатқанын атап өтті.<blockquote>– Тату көрші әрі стратегиялық серіктес ретінде біз Сіздердің жетістіктеріңізге тәнтіміз. Сіздер үшін қуаныштымыз. Қытай мен Қазақстанның қарым-қатынасы құбылмалы әлемнің сынына төтеп беріп, қарқынды дамып келеді. Бұл – тек географиялық тұрғыдан жақындықтың, ғасырларға ұласқан достықтың арқасы ғана емес, елдеріміздің өркендеу жолындағы табиғи сұранысы. Соңғы жылдары бірлескен күш-жігердің нәтижесінде тағдыры ортақ Қытай мен Қазақстан арасындағы ықпалдастық жаңа мән-мазмұнмен толығып жатыр. Бірқатар әлеуметтік маңызы бар жобалардың жүзеге асырылуы қос халыққа айтарлықтай пайда әкелді. Мен Өзіңізбен тізе қосып, Қытай-Қазақстан достығын нығайтуға, өңірдің және жалпы әлемнің дамуына елеулі үлес қосу үшін екі елдің сан қырлы ынтымақтастығын одан әрі ілгерілетуге әзірмін, – деді ҚХР Төрағасы.</blockquote>Келіссөз барысында екі ел ынтымақтастығының барлық бағыт бойынша перспективасы талқыланды. Байырғы достық пен өзара құрметке арқа сүйеген екі ел басшылары емен-жарқын әңгімелесті. Президент Қасым-Жомарт Тоқаев пен ҚХР Төрағасы Си Цзиньпин жүргізген келіссөз нәтижесінде 24 үкіметаралық және ведомствоаралық құжатқа қол қойылдыЕкі ел делегациясының мүшелері энергетика, аэроғарыш, цифрландыру, кеден, ауыл шаруашылығы, электронды сауда, туризм, зияткерлік меншік, медицина, медиа, ғылым, өңіраралық байланыс салаларындағы ынтымақтастықты қамтитын құжаттармен алмасты. Олардың ішінде инвестицияларды көтермелеу және өзара қорғау, техникалық-экономикалық ынтымақтастық туралы үкіметаралық келісімдер бар.akorda.kz

Мемлекет басшысы ҚХР Төрағасымен келіссөз жүргізді

<a href="https://kyzylorda-news.kz/">Kyzylorda-news.kz</a> &nbsp;Қызылорда қаласындағы NIS-те 2025 жылғы түлектерге аттестат табыстау рәсімі өтті. «Exit: мектеп, Enter: болашақ» атауымен ұйымдастырылған шара түлектердің жаңа өмір жолына жасаған алғашқы қадамын білдіретін маңызды оқиғаға айналды.Салтанатты шара өңірдегі мәдениет пен өнердің іргелі ордасы – Нартай Бекежанов атындағы Қызылорда облыстық қазақ академиялық музыкалық драма театрының сахнасында өтті. Биыл 151 түлек алтын ұя мектебімен қоштасты. Олардың төртеуі «Алтын белгі» иегері атанса, тағы 12 түлек үздік аттестатқа ие болды. Жас зияткерлер оқу барысында ғылыми жобалар мен пәндік олимпиадаларда жоғары жетістіктерге қол жеткізіп, қорытынды жиынтық бағалауда және халықаралық тіл емтиханында жақсы нәтиже көрсете алды.<blockquote>– Біздің мектеп халықаралық A-Level стандарттарына негізделген NIS Programme бағдарламасы бойынша оқытады. Бұл бағдарлама әлемнің жетекші елдері тарапынан мойындалған. Сыртқы жиынтық бағалау қорытындысы бойынша түлектер Кембридж сертификатын алады. Бұл – күрделі әрі жауапты сынақ. Соған қарамастан, биыл әр үшінші түлегіміз А және А* деңгейінде жоғары бағаға ие болып отыр. Бұл – оқушылардың табандылығы, ұстаздардың тәлімі мен ата-аналардың қолдауының нәтижесі деп білеміз., – деді мектеп директорының міндетін атқарушы Калман Беймбетов өз сөзінде.</blockquote>Шара барысында сынып түлектері сахнаға жеке-жеке көтеріліп, әрқайсысы мектеппен қоштасу сәтін ерекше сезіммен қарсы алды. Концерттік бағдарламада шырқалған әндер мен жүрекжарды лебіздер мектеп қабырғасындағы естеліктерді айшықтай түсті.<img src="https://knadmin.beoblood.kz/uploads/NI_Sh_ce48570411.jpg" alt="НИШ.jpg">

«Exit: мектеп, Enter: болашақ»: Қызылордадағы NIS түлектеріне аттестат табысталды

<a href="https://kyzylorda-news.kz/">Kyzylorda-news.kz</a> Қызылордада тәртіп сақшылары балалардың құқықтық және қауіпсіздік мәдениетін қалыптастырып, жазғы демалысын мазмұнды әрі қауіпсіз етуге бағытталған іс-шараларды жүйелі түрде ұйымдастырып келеді.Осы ретте Қызылорда облысы полиция департаментінің жергілікті полиция қызметі басқармасының қызметкерлері Арал ауданындағы «Қамбаш» балалардың жазғы тынығу лагерінде және Шиелі ауданындаға «Сыр ұланы» жазғы демалыс лагерінде балалармен кездесіп, қауіпсіздік ережелерін түсіндірді.«Полиция – балалар қауіпсіздігінің кепілі» қағидатын ұстанған тәртіп сақшылары балалардың құқықтық сауаттылығын арттырып, құқық бұзушылықтардың алдын алу бағытында түсіндірме жұмыстарын жүргізді.Жазғы демалыс кезінде қауіпсіз жүріс-тұрыс ережелерін еске сала отырып, балалармен әңгімелесті. Соның ішінде балалардың дұрыс жүріс-тұрысы, жол қозғалысы ережелерінің сақталуы туралы да айтып өтті.Аталған іс-шара облыс көлемінде орналасқан балалардың жазғы демалыс лагерьлерінде кезең-кезеңімен өткізілетін болады.Алдағы уақытта да балалар мен жасөспірімдердің қауіпсіздігін қамтамасыз ету мақсатында облыс көлемінде бірқатар іс-шаралар өткізіледі.

Балалардың қауіпсіздігі басты назарда

<a href="https://kyzylorda-news.kz/">Kyzylorda-news.kz</a> Сырдария ауданының әкімі Берік Сәрменбаев Сәкен Сейфуллин елді мекеніндегі №137 орта мектебіне жүргізіліп жатқан күрделі жөндеу жұмыстарының барысымен танысты.&nbsp;<blockquote>– Мемлекет басшысы Қасым-Жомарт Кемелұлы Тоқаевтың тапсырмасымен, Үкіметтің, аймақ басшысы Нұрлыбек Машбекұлы Нәлібаевтың қолдауымен өңірдің білім саласында ауқымды жұмыстар атқарылуда. Оның ішінде, аймақтағы білім ошақтары жаңалануда. Бұл – болашақ ұрпақтың сапалы білім алуына жасалып жатқан нақты жұмыстар. Сондықтан күрделі жөндеу жұмыстары сапалы жүргізіліп, уақытылы аяқталуы тиіс, – деді Берік Әбідғаппарұлы.</blockquote>Елді мекендегі №137 орта мектеп 1974 жылы салынған. Жалпы сыйымдылығы 460 орынға негізделген. Биыл мектептің күрделі жөндеу жұмыстарына облыстық бюджеттен 309 млн. теңге қаржы бөлінді. Құрылыс жұмыстарын медігер мекеме «N Cтрой Сервис» ЖШС атқаруда. Бүгінде білім ғимаратының сырты қапталып, ішкі жұмыстары жүргізілуде.Сырдария ауданының әкімі құрылыс барысын тұрақты бақылауда ұстау қажеттігін айтып, салалық орынбасары мен тиісті бөлім басшыларына нақты тапсырмалар жүктеді. Мектептің жөндеу жұмыстары жаңа оқу жылына дейін аяқталуын қатаң ескертті.<img src="https://knadmin.beoblood.kz/uploads/Zh_ndeu_zh_mystary_Syrdariya_audany_2_3f30f771f9.jpg" alt="Жөндеу жұмыстары Сырдария ауданы 2.jpg">

Қазақстан және Қызылорда облысының жаңалықтары