<a href="https://kyzylorda-news.kz/">Kyzylorda-news.kz</a> &nbsp;Сыр өңіріне Корея Республикасы Ұлттық Ассамблеясының Төрағасы У Вон Шик бастаған ресми делегация жұмыс сапарымен келді. Делегация мүшелерін Қызылорда облысының әкімі Нұрлыбек Нәлібаев күтіп алды.Аймақ басшысы екі ел арасындағы стратегиялық қарым-қатынастың тиімділігіне тоқталды.<blockquote>«Екі елдің Президенттері қазақ-корей ынтымақтастығын жоғары деңгейге көтерді. Сізді Корея Республикасы Ұлттық Ассамблеясының Төрағасы қызметіне тағайындалуыңызбен шын жүректен құттықтаймын! Жұмысыңызға табыс тілеймін.Біздің Қызылорда облысына өткен ғасырдың басында қоныстанған корей ағайындармен жергілікті халық тату-тәтті өмір сүріп келеді. Елімізде әр этностың өз тамырынан ажырамай, тілі мен ділін сақтауына барлық жағдай жасалған. Корейлер өздерінің адал еңбегімен аймақтың әлеуметтік-экономикалық, аграрлық және мәдени-рухани дамуына зор үлес қосуда.Өмірінің соңғы жылдарын қазақ жерінде өткізген генерал Хон Бом Доның құрметіне Қызылорда қаласында мемориал тұрғызылып, оның есімі қаланың бір көшесіне берілген. Бұл – корей халқына, батырдың ерлік даңқына деген шынайы ықылас пен зор құрметтің белгісі.Өзіңіздің тікелей қолдауыңызбен Сеул Ұлттық ғылыми-техникалық университеті президентімен кездесіп, білім және ғылым саласында тиімді байланыс орнатылды. Өткен жылы қараша айында Қорқыт ата университетінде Жасанды интеллект мектебі ашылып, қазір онда 100 студент білім алуда.Екіжақты ынтымақтастық аясында өнеркәсіп саласына да жіті көңіл бөлінді. Корейлік «With you E&amp;C» компаниясы облыста 36 млн. АҚШ долларына тұрмыстық қалдықтарды сұрыптау, қайта өңдеу және кәдеге жарату зауыты жобасын жүзеге асыруда. Жобаға тиісті жер телімі табысталып, қолдау көрсетілді», – деді Н.Нәлібаев.</blockquote>Корея Республикасы Ұлттық Ассамблеясының Төрағасы У Вон Шик екі ел арасындағы қарым-қатынастың одан әрі нығаюы жолында нәтижелі жұмыстар жүйелі түрде жалғасатынын жеткізді.Қос тарап өзара байланысты дамытуға бағытталған маңызды мәселелерді талқыға салды. Облыс әкімі ынтымақтастыққа кең әріптестік алаң ұсынылатынын, Арал теңізінің тартылуы салдарынан болған өңірдің экожүйесіндегі проблемаларды шешу, халық денсаулығын жақсарту басты назарда екенін атап өтті. Бұл орайда Кореяның озық экологиялық және ғылыми-инновациялық компанияларымен жұмыс жасауға мүдделі екенін жеткізді.Қызылорда облысының әкімдігі инвесторларды жан-жақты сүйемелдеуге әрдайым әзір.Корея Республикасы Ұлттық Ассамблеясының Төрағасы көтерілген мәселелер бойынша қолдау көрсетілетінін айтып, ыстық ықылас танытқан қызылордалықтарға алғысын білдірді.Шетелдік делегация қайта жаңғыртудан өткен Хон Бом До мемориалдық кешеніне барды.Хон Бом До – өткен ғасыр басындағы жапон басқыншыларына қарсы қарулы күрес қолбасшыларының бірі. 1919 жылдан Тәуелсіздік армиясының ұйымдастырушысы болды. Азамат соғысы аяқталғаннан кейін Кеңес Одағы аумағында өмір сүріп, 1937 жылы Қызылорда қаласына жер аударылып, 75 жасында дүниеден өткен. 2021 жылы генерал Хон Бом Доның сүйегін жерлестері туған жеріне алып кетті.Сонымен қатар делегация Қорқыт ата атындағы Қызылорда университетіндегі СеулТех Жасанды интеллект мектебінің жұмысымен танысып, студенттермен кездесті. Облыс әкімі Корея Республикасына іссапары кезінде Сеул Ұлттық ғылыми-техникалық университеті президентімен кездесіп, келіссөздер нәтижелі болды. Бүгінде мұнда жасанды интеллект, киберқауіпсіздік және информатика бойынша жоғары білімді кадрлар даярланады. Аймақ басшысы бұл әріптестік инновациялық технологияларды дамытуға, озық тәжірибе алмасуға жол ашатынына сенім білдірді.Осы жылы 12 маусымда Астана қаласында өткен «Қазақстан-Корея» бизнес форумында Қызылорда облысының әкімдігі мен Корея Республикасының «With you E&amp;C» компаниясы арасында «Қызылорда қаласында тұрмыстық қатты қалдықты кәдеге жарататын, сұрыптайтын және қайта өңдейтін зауыт салу» жобасын іске асыру жөніндегі меморандумға қол қойылды.<img src="https://knadmin.beoblood.kz/uploads/yzylorda_a_Koreya_Respublikasynan_resmi_delegacziya_keldi_2_20464fdf30.jpg" alt="Қызылордаға Корея Республикасынан ресми делегация келді 2.jpg"><img src="https://knadmin.beoblood.kz/uploads/yzylorda_a_Koreya_Respublikasynan_resmi_delegacziya_keldi_3_ff7a26d936.jpg" alt="Қызылордаға Корея Республикасынан ресми делегация келді 3.jpg">

Қызылордаға Корея Республикасынан ресми делегация келді

<a href="https://kyzylorda-news.kz/">Kyzylorda-news.kz</a>&nbsp; Тындырымды тірліктің бәрі Тереңөзекте болып жатыр. Өңірлік коммуникациялар қызметі ұйымдастырған пресс-турда Сырдария ауданының орталығындағы жағымды жаңалықтармен танысып, бірнеше орынның құрылысынын аралады.Мәселен, А.Иманов көшесінің бойында салынып жатқан “Жастар” аллеясы аудандық бюджеттің қаражаты есебінен жүргізілуде. Жоба қолданысқа берілген соң кенттің ең көрікті орнының біріне айналмақ. Одан бөлек, жергілікті белсенді жастардың көмегімен аллеяны көркейту-көгалдандыру жұмыстары ұйымдастырылса, түрлі көңілді кештер де дәл осы жерде өтетін болады,- дейді кент әкімі.<blockquote>– Облыс әкімінің қолдауымен Тереңөзек кентінде абаттандырудан бөлек, жаяу жүргіншілер жолдары салынып, көпқабатты тұрғын үйлер де күрделі жөндеуден өтіп жатыр. “Тағзым” алаңында да қайта жаңғырту жұмыстары жүргізілуде. Бұл бір жағынан тұрғындарға демалыс орны болсын деген ниетпен де жасап жатырмыз. Балаларға арналған ойын алаңы да дәл осы жерге салынатын болады. Айта кету керек, Тереңөзек кентінде 9 көшеге жаяу жүргіншілер жолын салуға қаражат бөлінді. Қазіргі уақытта 6 көшенің жүмыстары толық басталды. Ең алдымен әлеуметтік нысандар орналасқан көшелер қамтылды. Бұл жұмыстары келесі жылы да жүзеге асатын болады. Ал көпқабатты тұрғын үйлердің аула аумақтарын қайта жаңғырту жобасы бойынша да қазір бірнеше жоба іске асырылып жатыр. Оның ішінде А.Иманов көшесінде орналасқан 6 көпқабатты тұрғын үй күрделі жөндеуден өтуде, – деді Тереңөзек кентінің әкімі Ержан Бақтияров.</blockquote><img src="https://knadmin.beoblood.kz/uploads/Tere_zekte_tyndyrymdy_tirlik_k_p_28750a8f1e.jpg" alt="Тереңөзекте тындырымды тірлік көп.jpg"><img src="https://knadmin.beoblood.kz/uploads/Tere_zekte_tyndyrymdy_tirlik_k_p_1_1089f4c2fe.jpg" alt="Тереңөзекте тындырымды тірлік көп 1.jpg"><img src="https://knadmin.beoblood.kz/uploads/Tere_zekte_tyndyrymdy_tirlik_k_p_2_ecd490160e.jpg" alt="Тереңөзекте тындырымды тірлік көп 2.jpg"><img src="https://knadmin.beoblood.kz/uploads/Tere_zekte_tyndyrymdy_tirlik_k_p_4_9eb5feff7b.jpg" alt="Тереңөзекте тындырымды тірлік көп 4.jpg">@Қызылорда облысының Өңірлік коммуникациялар қызметі

 Тереңөзекте тындырымды тірлік көп

<a href="https://kyzylorda-news.kz/">Kyzylorda-news.kz</a> &nbsp;«Қазгидромет» РМК ел аумағында 10 қазанда болатын қауіпті метеорологиялық құбылыстарға болжам жасады.Қазақстанның көп бөлігінде циклон мен атмосфералық фронтальды бөлімдердің әсерінен жауын-шашын, оңтүстікте, шығыста, елдің орталығында жаңбыр түрінде, кейде қатты жаңбыр, оңтүстікте, оңтүстік-шығыста найзағай ойнап, бұршақ жауады, солтүстікте, солтүстік-батыста жауын-шашын (жаңбыр, қар), боран, көктайғақ күтіледі.Елдің батысында ғана жауын-шашынсыз ауа райы сақталады. ҚР бойынша желдің күшеюі күтіледі, батыста, солтүстік-батыста түнгі және таңертеңгі сағаттарда тұман болады.<blockquote>«Павлодар облысында, батысында, солтүстігінде, Абай облысының орталығында, солтүстігінде, Шығыс Қазақстан облысының орталығында, Қарағанды облысының шығыс жартысында, Ұлытау облысының оңтүстігінде, Ақтөбе облысының солтүстігінде, солтүстік-шығысында, Батыс Қазақстан солтүстік-шығысында, Жамбыл облысының солтүстік-шығысында, Қостанай облысының батысында, оңтүстік-шығысында, Қызылорда облысының батысында жоғары өрт қаупі сақталады», — деп жазды синоптиктер.</blockquote>Ақтөбе, Қызылорда облыстарында, батысында, оңтүстігінде, солтүстігінде, Батыс Қазақстан облысының орталығында, Түркістан облысының оңтүстігінде, шөлді аудандарында, Атырау облысының батысында, солтүстігінде, Жамбыл облысының солтүстік-батысында, Қостанай облысының оңтүстігінде, Шығыс Қазақстан облысының батысында, оңтүстігінде, Абай облысының Үржар ауданында, Жетісу облысының батысында, солтүстігінде, орталығында, Алматы облысының батысында, солтүстігінде төтенше өрт қаупі сақталады.

Жаңбыр, бұршақ, боран: Еліміздің басым бөлігінде күн бұзылады

<a href="https://kyzylorda-news.kz/">Kyzylorda-news.kz</a>&nbsp; Бүгінде Сырдария ауданын табиғи газбен қамтамасыз ету деңгейі 35 пайызды құрап отыр. Өткен жылы С.Сейфуллин мен А.Тоқмағамбетов ауылдарын газдандыру жұмыстары басталса, алдағы күндері бұл елді мекендер толығымен көгілдір отынға қосылатын болады. Одан бөлек биыл Шаған мен Н.Ілиясов ауылдарын да газдандыру жұмыстары қолға алынды.<blockquote>– Аасқар Тоқмағамбетов ауылдық округіне көгілдір отын кіргізу жұмыстары өткен жылы басталды. Қазіргі таңда ауылда 356 тұрғын үй болса, соның 104-ін газға қосуға дайындап қойдық. Алдағы уақытта 100 пайыз қамтимыз деп жоспарлап отырмыз. Жалпы, ауылдың қазіргі жағдайы өте жақсы. 2013 жылы ауыз су кіргізілсе, келер жылы электр желісін жаңғырту жоспарда бар. Ал, ауылдағы 16 көшенің 13-іне тас жол төселсе, қалған 3 көшенің жоба сметалық құжаттары дайындалу үстінде. Ауылды жандандыру бойында тиісті жұмыстар алдағы уақытта да өз жалғасын табатын болады, – деді А.Тоқмағамбетов ауылының әкімі Ғабдолла Алданазаров.</blockquote><img src="https://knadmin.beoblood.kz/uploads/Syrdariyada_gazdandyru_zh_mystary_ar_yn_aldy_4d81d64e56.jpg" alt="Сырдарияда газдандыру жұмыстары қарқын алды ..jpg">Фото: Қызылорда облысының Өңірлік коммуникациялар қызметі

Сырдарияда газдандыру жұмыстары қарқын алды

<a href="https://kyzylorda-news.kz/">Kyzylorda-news.kz</a> Ислам – әлемдік діндердің ішінде таралуы бойынша екінші орында тұрған дін болып саналады. Қазіргі уақытта жер бетіндегі мұсылмандардың саны 2 миллиардтан астам адамды құрап отыр.Дегенмен, қоғамда «ислам» сөзі кейде «радикализм», «террор», «экстремизм» сынды қауіпті ұғымдармен тіркесіп жүргенін көзіміз шалып жатады. Соның салдарынан, дін туралы жеткілікті дәрежеде ақпараттанбаған адамдардың ойында ислам діні жайлы негативті көзқарас қалыптасады. Ал, шын мәнінде ислам дінінің табиғаты қандай? Осы тақырыпты талдап көрейік.«Ислам» сөзі араб тіліндегі түбірі «сәләм» деген сөзден шығады. Оның қазақша мағынасы «бейбітшілік, татулық, ынтымақ, қауіпсіздік» дегенді білдіреді.Мұсылманша «әссәләмуалейкум» деп амандасудың да мәні «сізге тыныштық, бейбітшілік болсын» деген сөз.Атауының өзі татулыққа үндейтін діннің қоғамға зиян тигізуі мүмкін бе? Әрине, мүмкін емес. Ислам дінінің негізгі қайнар көздері Құран мен хадистерде адамдар арасындағы татулық пен бірлікке қатты мән беріледі.Мәселен, Бақара сүресінің 256-аятында «дінде зорлық жоқ» делінген. Бұл аяттан бізешқандай адамды мәжбүрлеп, күштеп дінге кіргізуге болмайтындығын түсінеміз. Құдайдың өзі адамға ерік беріп тұрғанда, ол еркіндікті өзге адамның тартып алуына жол берілмейтіндігін ұғамыз.Осы ұстанымның жарқын көрінісіретінде ислам тарихында 622 жылы Мұхаммед пайғамбар (с.ғ.с.) мен Медина қаласының халқы арасында қабылданған «Медина конституциясы» немесе «Медина декларациясы» деген атаумен белгілі құжатты айтуға болады. Оның ішінде түрлі дін өкілдерінің бір елде қалай бейбіт өмір сүру керектігі көрсетілген. Әрбір дін өкілінің өз сенімін еркін ұстанып, өзгелерге кедергі келтірмей, ынтымақ-бірлікте болуы керектігі айтылған.Тіпті пайғамбардан жеткен «мұсылмандардың жерінде өмір сүретін басқа дін өкілдеріне қысым жасайтындар менің үмметімнен емес» деген хадистері де кездеседі. Бұдан біз Мұхаммед пайғамбардың (с.ғ.с.) өзі мұсылмандармен де, мұсылман емес кісілермен де бірлікте өмір сүргендігін, олармен өте көркем түрде қарым-қатынас жасағандығын көреміз.Сондай-ақ, хадистерге үңілер болсақ, Сахих Муслим жинағында «нағыз мұсылман – өзге адамдар оның тілі мен қолынан зиян көрмеген адам» делінген. Яғни, өзін мұсылман санайтын адам айналасындағы адамдарға зиян тигізбеуі керек. Керісінше, қоғамға пайдалы іс істеп, көркем мінезділіктің үлгісін көрсетуі шарт. Себебі, пайғамбар тағы бір хадисінде «сендердің ең жақсыларың – адамдарға пайдалы болғандарың» деген.Қазақ даласында ислам дінінің шынайылығын түсіндірген Абай Құнанбайұлы өз өлең жолдарында:«Махаббатпен жаратқан адамзатты,Сен де сүй, ол Алланы жаннан тәтті.Адамзаттың бәрін сүй, бауырым деп,Және хақ жолы осы деп әділетті»,- деп бекерден-бекер жырламаса керек. Ақынның өлең жолдарынан хақ діннің қашанда адамзатты мейірімділік пен бауырмалдыққа үндейтінін көреміз.Қорыта айтқанда, ислам дінінің табиғаты тек бейбітшілік пен ынтымақтастыққа құрылғанын анық түсінеміз. Себебі, ислам шариғаты әділеттілік, толеранттылық, сүйіспеншілік принциптеріне негізделген.Сондықтан, әрбір мұсылманның міндеті – адамдар арасында алауыздықты болдыртпай, бейбіт қоғам құру болып табылады. Міне, осы келтірілген ақпараттардан-ақ шынайы ислам дінінің қоғам арасында іріткі тудыратын түрлі теріс идеологияларғаеш қатысы жоқ екендігіне көз жеткіземіз.Дәулетсейд&nbsp; ЖарылқасынҚызылорда облысының дін істерібасқармасының «Дін мәселелерін зерттеуорталығы» коммуналдық мемлекеттік мекемесінің дінтанушы маманы&nbsp;Фото: ашық дереккөз

Ислам – ынтымақ діні

<a href="https://kyzylorda-news.kz/">Kyzylorda-news.kz</a>&nbsp; "Анаға тазғым" орталығында 10 қазан &nbsp;– Қазақстан кәсіподақтары күніне арналған мерекелік шара өтті.Шара барысында бірнеше азаматқа «Қазақстандық салалық мәдениет, спорт, туризм және ақпарат қызметкерлерінің кәсіптік одағының» марапаты табысталды. Соның ішінде Әсия Жиенбаева мен Ерұлан Дәткеновтей қос әріптесіміз бар.&nbsp; ҚР Президентінің жалпыға ортақ еңбек қоғамын құру идеясы аясында қоғамның дамуына қосқан елеулі үлесі, әлеуметтік әріптестікті дамыту жолындағы жемісті еңбегі үшін "Сыр медиа" ЖШС дизайнер орталығының басшысы Ерұлан Дәткенов "Құрмет грамотасымен" марапатталса, аға жарнама менеджері Әсия Жиенбаеваға Алғыс хат табысталды.<blockquote>– Кәсіподақ жүйесінің мерейін тасытқан мерекелік басқасуда бірқатар сала мамандары марапатталды. Біздің де еңбекті елеп, құрмет көрсеткені үшін алғыс білдіремін. Қызылордалықтарды, кәсіподақ ардагерлері мен белсенділерді мерекемен құттықтаймын. Еңбектері елеңе берсін, – дейді Ерұлан Балтабайұлы.</blockquote>&nbsp; Айта кетейік, еліміздегі кәсіподақтар ұйымы – жұмыс берушілер мен еңбеккерлер арасында басты медиатор, қоғамдағы ірі және қуатты азаматтық институттардың бірі. Ұйымның қызметі қызметкерлердің құқығы мен мүддесін қорғауға, өндіріс шарттарын жақсартуға, еңбек дауларын реттеуге бағытталған.<img src="https://knadmin.beoblood.kz/uploads/riptesterimiz_marapat_t_rinen_k_rindi_1_750629a9bd.jpg" alt="Әріптестеріміз марапат төрінен көрінді 1.jpg">

Әріптестеріміз марапат төрінен көрінді

<a href="https://kyzylorda-news.kz/">Kyzylorda-news.kz</a> Бүгін – Қазақстан кәсіподақтары күні. Аталған сала қызметкерлері еңбек адамдарының құқығы мен мүддесін қорғауда, олардың әл-ауқатын жақсартуда маңызды рөл атқарады. Аймақтағы кәсіподақтардың жай-күйін бүгін Өңірлік коммуникациялар қызметінің ақпарат алаңында Қызылорда облысы аумақтық кәсіподақтар бірлестігінің төрағасы Мақсұт Нәлібаев айтты.&nbsp;<blockquote>– Қазіргі таңда Қызылорда облыстық аумақтық кәсіподақтар бірлестігі 12 салалық кәсіподақтарда 1 020 кәсіподақ ұйымдары мен 95 600 кәсіподақ мүшелерін біріктіреді. Кәсіподақтардың негізгі міндеті – еңбеккер мен жұмыс берушілер арасында туындайтын мәселелерді дер кезінде шешіп, барлық тараппен тығыз ынтымақтастықта болу. ҚР Кәсіподақтар Федерациясы биылғы жылды "Лайықты еңбек жылы" деп белгіледі. Биылғы іс-шаралар мен жұмыс бағыттарының барлығы еңбек адамдарына дұрыс жағдай жасалып, лайықты ақы төленуіне және жоғары деңгейде құрмет көрсетуге арналып отыр. Мәселен, сәуір айында Кәсіподақтар федерациясымен Еңбеккер әйелдер форумы өтті, оған облыстан 4 делегат қатысты. Ал 8-9 қазан кәсіподақтар күні қарсаңында Астана қаласында «Еңбек эволюциясы: Климат. Құзыреттілік. Код» атты жұмысшы мамандықтардың екі күндік жастар форумы болды. Форумға Қызылорда облысы кәсіподақтарының Келешек жастар кеңесінің 3 белсенді өкілі қатысты. Бұл жұмыскерлердің құқықтарын қатаң мемлекеттік қадағалаумен қатар, лайықты еңбек ортасын құруға мүмкіндік береді,- деді Мақсұт Ыбрайханұлы.&nbsp;</blockquote>Ал мұнай саласы бойынша кәсіподақ ұйымы 1989 жылдың қазан айында құрылған. Құрамында 1 400-ге жуық мүшесі бар ұйым әр жыл сайын өз қызметкерлерімен қоса олардың отбасына да қажетті қолдауды көрсетеді.<blockquote>– Биыл біздің кәсіподақ ұйымының құрылғанына 35 жыл толып отыр. Алғашында небәрі 10 адам мүше болған ұйым бүгінде 1 400-ге жуық қызметкерді біріктіріп отыр. Әр үш жыл сайын ұжымдық шартқа өзгерістер енгізіп, оны жаңартып отырамыз. Ұжымдық шартқа сәйкес, қыз-келіншектер дүниеге сәби әкелген күннен бастап оларға қажетті қолдау көрсетіледі. Зейнетке шыққан қызметкерлер мен ұжым мүшелерінің балаларына да әрдайым көмек қолын созамыз. Мысалы, биыл 450 бала Шымкенттегі демалыс орнына жолдама алды. Соынмен қатар, серіктестеріміздің қолдауымен де ұйым мүшелері демалысқа жіберіліп тұрады. Қазан, қараша айларында 100 адам Манкентке демалуға барады,- деді "Петро Қазақстан Құмкөл Ресорсиз" кәсіподақ комитетінің төрағасы Бақытжан Мукашева.</blockquote><img src="https://knadmin.beoblood.kz/uploads/k_sipoda_tar_k_ni_8486895f9d.jpg" alt="кәсіподақтар күні.jpg">Фото: Қызылорда облысының Өңірлік коммуникациялар қызметі

Бүгін – кәсіподақтар күні

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаевтың қатысуымен мемлекет және қоғам қайраткері, Ұлы Отан соғысының ардагері Ғафур Мұхамеджановтың 100 жылдығына арналған «Еселі еңбегімен еленген қайраткер» атты ғылыми-танымдық конференция өтті.Конференцияға сала басшылары, қоғам қайраткерлері, ғалымдар, облыстың зиялы қауымы, ардагерлер, Ғафур Мұхамеджановтың балалары мен немерелері қатысты.Нұрлыбек Машбекұлы қайраткердің аймақтың әлеуметтік-экономикалық дамуына қосқан үлесі туралы айтып, еңбек жолына тоқталды.<blockquote>«Аймағымыздың шежіресінде толағай болмысты, нар тұлғалы азаматтардың есімі әрдайым құрметпен аталады. Сондай ағаларымыздың бірі – елжанды азамат, Сыр перзенті, ғибратты ғұмыр иесі Ғафур Мұхамеджанов. Ол қасиетті Сыр топырағында дүниеге келіп, өз дәуіріндегі барлық тарихи оқиғаның бел ортасынан табылды. Совет, партия басшылығында болып, Шиелі және Жаңақорған аудандарының тізгінін ұстады. Тынымсыз еңбек, жоғары талап, іске деген адалдық ағамыздың рухани тағылымының тамыры терең, діңгегі мықты екенін көрсетті.Аймақтың бүгінгі бет-бейнесінің қалыптасуы мен дамуына Ғафур Мұхамеджановтың қосқан орасан зор үлесі бар. Аға буынның елі үшін жасаған еңбегі мен ерлігі жас ұрпаққа мирас болып қалуы тиіс. Парасат пайымы биік тұлғаның жарқын бейнесі, бекзат болмысы ешқашан ұмытылмайды, елімен бірге мәңгі жасай береді», – деді Н.Нәлібаев.</blockquote>Басқосуда облыстық мәслихат төрағасы, конференцияның модераторы Мұрат Тілеумбетов Парламент Сенатының депутаты, мемлекет және қоғам қайраткері, академик, заң ғылымдарының докторы Құл-Мұхаммед Мұхтар Абрарұлының Ғафур Мұхамеджановтың 100 жылдығына арнаған құттықтауын оқыды.Әрі қарай Ғафур Мұхамеджанов туралы естеліктер мен тарихи деректерге толы баяндамаларға кезек берілді. Саяси ғылымдар докторы, профессор Әбдіжәлел Бәкір, Қызылорда облысының Құрметті азаматы Ибрагим Әбибуллаев оның мұқтажға қамқор, әлсізге тіреу, шешімге әділ, халқына абзал азамат болғанын айтты. Баяндамалар легін саяси ғылымдар докторы, Қызылорда облысының құрметті азаматы Мұрат Бақтиярұлы жалғастырды. Тарих ғылымдарының кандидаты, доцент, Нұрлыбек Мыңжас та дәйекті деректерді ортаға салды.Ғафур Мұхамеджанов 1924 жылы 1 шілдеде Жаңақорған ауданы, Өзгент ауылында туған. Ол кісінің балалық және жастық шағы алапат аштық, сұрапыл соғыспен тұспа-тұс келді.Мектептен соң Қызылорда педагогикалық институтына түсіп, мұғалім мамандығын иеленді. Кейін Алматы Жоғары партия мектебін аяқтады. Еңбек жолын 1941-1942 жылдары бастауыш мектепте бастап, 1943-1945 жылдары Ұлы Отан соғысына қатысып, елге аман оралды.Соғыстан кейін ел еңсесін тіктеуге, халықтың әлеуметтік жағдайын жақсартуға білек сыбана кірісті. 1945-1970 жылдары Шиелі аудандық комсомол комитетінің хатшысы, аудандық атқару комитетінің бөлім меңгерушісі, төраға орынбасары, төрағасы, Шиелі аудандық партия комитетінің бірінші хатшысы қызметтерін абыроймен атқарды.1970-1975 жылдары Жаңақорған аудандық партия комитетінің бірінші хатшысы, 1975-1985 жылдары Қызылорда облыстық комитетінің бөлім меңгерушісі, облыстық атқару комитеті төрағасының бірінші орынбасары қызметінде болған. Облыстық комитет мүшесі, аудандық, облыстық кеңестердің депутаты болып сайланған.<img src="https://knadmin.beoblood.kz/uploads/Nauchno_poznavatelnaya_konferencziya_proshla_v_Kyzylorde_1_62bdbb8580.jpg" alt="Научно-познавательная конференция прошла в Кызылорде 1.jpg">Фото: Қызылорда облысы әкімінің баспасөз қызметі

«Еселі еңбегімен еленген қайраткер» атты ғылыми-танымдық конференция өтті

<a href="https://kyzylorda-news.kz/">Kyzylorda-news.kz</a> Қызылорда облысының Сырдария ауданына қарасты Бесарық ауылындағы мектептің дене шынықтыру пәні мұғалімі Самат Ақпанбетов жары Гүлзирамен бірге жұмысқа арналған қолғап шығаруда.Оның кәсіптің бұл түрін қолға алуына қызығушылығы себеп болған. Самат әлеуметтік желі, ютубтен қолғап шығаруға қатысты бейне материалдарды көруді ұнатады. Осы саланы екі жылдан астам уақыт зерттей келе, отбасымен ақылдасып, шығарып көруге бел байлайды.Саматтың келіншегі де ұстаз. Мектепте информатика пәнінен сабақ береді. Қос ұстаз көп балалы отбасы. Бүгінде 5 баланы өсіріп, тәрбиелеуде.<blockquote>"Қазір бір ғана табысқа қарап отыратын уақыт емес. Ешкімге қол жаймай балаларымызды аяққа тұрғызғымыз келеді. Сол үшін отбасылық кәсібіміз болғанын қалаймыз. Бұған дейін де кәсіппен айналысып көргенмін. Сала бізге таңсық емес. Дегенмен осы жолы хоббиімді бизнеске айналдырып көргім келеді", - дейді Самат Ақпанбетов.</blockquote>Самат пен Гүлзира ең алдымен нарықты зерттейді. Қызылорда облысының өзінде шаруашылыққа қолданатын жұмысқа арналған қолғап шығарылмайтынын анықтайды. Облыс тұрғындары оны көрші Шымкенттен, Қытайдан алдырады екен. Содан қолғап шығару ісін жақсы білетін мамандарды іздеп табады. Таразда осы салаға машықтанған кәсіпкерлер бар екен. Солармен серіктес болып, Қытайдан қолғап шығаруға қажет жіп пен шағын цехтың құралын алдырады.<blockquote>"Кәсібімізге қажет қаржыны "Қызылорда" Өңірлік инвестициялық орталығынан алдық. Мемлекеттік бағдарлама аясында аз пайызбен 6 млн теңге несиеге осы ісімізді бастап отырмыз. Қазір нарықта жұмысқа қолдануға арналған қолғап парымен 120-150 теңгеден сатылып жатыр. Біз 80-85 теңгеден береміз. Сұраныс жоғары. Енді ғана ғой бастап жатқанымыз. Десе де алғашқы шығарған партияны құрылыс заттарын сатумен айналысатын кәсіпкерлер қуана-қуана алып кетті", – дейді.</blockquote>ЖК "Гүлзира" қазір күніне 200-250 дана, аптасына 1200-1500 дана қолғап шығарып жатыр. Цехтың қуаттылығына сай өнім шығаруына Гүлзира, ал өнімнің сапасы мен тұтынушы табуға Самат жауапты. Әзірге бар шаруаны өздері істеп жатқан отбасылық кәсіп иелері болашақта екі жұмысшы алуды көздеп отыр.<img src="https://knadmin.beoblood.kz/uploads/k_sipker_2_c974e96d64.jpg" alt="кәсіпкер 2.jpg"><img src="https://knadmin.beoblood.kz/uploads/k_sipker_1_8572a060d2.jpg" alt="кәсіпкер 1.jpg">"Қызылорда" өңірлік инвестициялық орталығының баспасөз қызметі

Қызылордалық қос мұғалім қолғап шығаруда

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаев Байқоңыр қаласы әкімшілігінің басшысы Константин Бусыгинмен кездесті.Кездесуге облыс әкімінің орынбасары, Қазақстан Республикасы Президентінің «Байқоңыр» кешеніндегі арнаулы өкілі Қайрат Нұртай қатысты.<blockquote>«Екі елдің Мемлекет басшыларының қолдауының арқасында Байқоңыр қаласының әлеуметтік-экономикалық жағдайы жыл сайын жақсарып келеді. "Байқоңыр қаласын сумен жабдықтау және су бұру жүйелерін реконструкциялау" жобасы бойынша жұмысты бастау үшін 27 қыркүйекте мердігерге ("Мелиоратор" ЖШС) 144 млн.теңге аванс төленді. Жыл соңына дейін 625 млн.теңге бөлу қарастырылған. Жобаның жалпы құны – 12 млрд.теңге, бұл қаржы қаланың су және кәріз құбырларын түгел ауыстыруға бағытталмақ. Жұмыс 17 қазанда ең алдымен, қала әкімшілігі ұсынған проблемалық учаскелерден басталады.</blockquote><blockquote>Бес тұрғын үйдің құрылысына қатысты айтсақ, мердігерлер міндеттемені орындамағандықтан, Қармақшы ауданының әкімдігі келісім-шартты біржақты тәртіппен бұзды. Қазіргі уақытта құрылысты аяқтауға конкурс жарияланды. Жұмысты келесі жылы бітіру жоспарлануда», – деді Н.Нәлібаев.</blockquote>К.Бусыгинмен бұған дейінгі кездесуде облыс әкімдігінің қаражаты есебінен қалада заманауи спорт кешенін салу туралы келісілген болатын. Бүгінде жер учаскесі анықталған, кешеннің дайын жобасы бар. Жаңа нысанды "Байқоңыр" ғарыш айлағының және қаланың 70 жылдығына орай пайдалануға беру жоспарланған.Қала әкімшілігі тұрғындардың тұрмыс-тіршілігіне қолайлы жағдай жасауда. Коммуналдық қызметтердің сапасын жақсартып, қолжетімділігін арттыруда жүйелі жұмыс бар. Атап айтқанда, Ресей тарапы тұрғындарды газ, жылу-электр станциясымен қамтамасыз етеді.Кездесуде Байқоңыр қаласы әкімшілігінің басшысы облыс көлемінде жүзеге асырылып жатқан жұмыстардың ауқымы мен Қызылорда қаласының күн санап көркейіп келе жатқанын ерекше атап өтіп, бірлескен жұмыстардың маңыздылығына тоқталды.Фото: Қызылорда облысы әкімінің баспасөз қызметі

Байқоңыр қаласының әлеуметтік-экономикалық даму мәселелері қаралды

<a href="https://kyzylorda-news.kz/">Kyzylorda-news.kz</a> Ақмола облысындағы Сұрған станциясында электровоз бен жүк вагондары рельстен шығып кетті, – деп хабарлайды Massaget.kz тілшісі «Қазақстан темір жолы» ҰК» АҚ баспасөз қызметіне сілтеме жасап.Куәгерлер оқиға орнынан түсірілген видеоларды бөлісіп жатыр.«9 қазанда сағат 17:40-та Есіл – Құсмұрын учаскесінің Сұрған станциясында электровоз мен жүк пойызының вагондары рельстен шығып кетті, зардап шеккендер жоқ», – деп хабарлады ҚТЖ баспасөз қызметі.ҚТЖ-ның мәліметінше, оқиғаның себебін анықтау үшін оқиға орнына комиссия жіберілді.Көлік полициясы Қостанай станциясындағы желілік полиция бөлімі жол қозғалысы немесе теміржол көлігін пайдалану қауіпсіздігі ережелерін бұзғаны үшін қылмыстық іс қозғағанын хабарлады.<blockquote>«Қазіргі уақытта тексеру жұмыстары жүргізіліп жатыр. Құрбандар жоқ. Басқа ақпарат ҚР Қылмыстық-процестік кодексінің 201 бабы бойынша жария етілмейді», – деп хабарлады полиция.</blockquote>Фото: Midjourney нейрожелісі

Ақмола облысындағы станцияда пойыз рельстен шығып кеткен

<a href="https://kyzylorda-news.kz/">Kyzylorda-news.kz</a> Tomorrow School – білім беру саласында әлемге танылған жаңашыл педагог Николас Садирак әзірлеген 01 Edu платформасында инновациялық peer-to-peer оқыту жүйесін пайдаланатын бірегей жасанды интеллект мектебі, деп хабарлайды&nbsp;<a href="https://el.kz/qazaqstandagy-algashqy-zhasandy-intellekt-mektebi-ashylmaq_135435/">El.kz</a>&nbsp;ақпарат агенттігі.Мектеп білім алушылар арасындағы тәжірибеге негізделген өзара байланысқа басымдық беріп, бағдарламалау дағдыларын нөлден бастап үйретеді. Мұндай бағдарламалар бойынша оқыған түлектердің 90%-дан астамы курсты аяқтағаннан кейін жұмысқа орналасып, әдістің тиімділігін айшықтады.Tomorrow School-дың оқыту ерекшеліктері:<ul><li>Мұғалімдер мен дәстүрлі сабақтар жоқ – оқыту студенттердің өзара көмегі мен топтық жұмысына негізделген;</li><li>Барлық студентте Астана қаласындағы Astana Hub технопаркі алаңында оффлайн форматта тегін оқу мүмкіндігі бар;</li><li>Мектеп тәулік бойы (24/7) жұмыс істейді, студенттер өздеріне ыңғайлы оқу кестесін құрады;</li><li>Оқуға түсу үшін бағдарламалау бойынша алдын ала тәжірибе талап етілмейді.</li></ul>Іріктеу үміткерлердің логикалық ойлауын тексеретін 2 онлайн ойыннан және «бассейн» деп аталатын оқытудың кіріспе кезеңіне тікелей қатысуды көздейтін бөлімнен тұрады. Бірінші «бассейн» 21 қазан – 17 қараша аралығында өтеді, мұнда қатысушылар бағдарламалау әлеміне тереңірек бойлап, оқуды жалғастыру үшін өз мүмкіндіктерін бағалайды.«Бассейннен» өткеннен кейін қатысушылар 18 айлық негізгі оқытуға көшеді. Бұл кезеңде олар 50-ден астам жобаны жүзеге асырып, Golang, Rust, JavaScript, Python және басқа да 20-дан астам бағдарламалау тілін меңгереді. Ақтық мәреде студенттер мына мамандықтардың бірін таңдауға мүмкіндік алады: ЖИ-инженері, бағдарламалық қамтамасыз етуді әзірлеуші, фулстек-әзірлеуші, мобильді қосымшалар әзірлеушісі, DevOps инженері, IT жүйелерінің сәулетшісі, киберқауіпсіздік маманы және бейнеойындар әзірлеушісі. Ал «бассейн» барысында үздік нәтиже көрсеткен өзге қаладан келген қатысушыларда негізгі оқу уақытында тұрғын үймен қамтылу мүмкіндігі бар.Фото: astanahub.com

Қазақстан және Қызылорда облысының жаңалықтары