<a href="https://kyzylorda-news.kz/">Kyzylorda-news.kz</a> Тәуелсіздік сарайында Қазақстанға мемлекеттік сапармен келген Ресей Федерациясының Президенті Владимир Путинді салтанатты қарсы алу рәсімі өтті &nbsp; Президент Қасым-Жомарт Тоқаев Ресей басшысын өзі күтіп алды.Мәртебелі мейманның құрметіне Қазақстан Республикасы Әуе қорғанысы күштерінің әскери ұшақтары Ресей туын бейнелейтін ақ, көк және қызыл түсті жолақтардан із тастап ұшты. &nbsp; Содан соң Қасым-Жомарт Тоқаев пен Владимир Путин бір біріне ресми делегация мүшелерін таныстырды.<blockquote>– Құрметті Владимир Владимирович, елордаға қош келдіңіз! Мемлекеттік сапармен келгеніңізге қуаныштымын. Бұл сапардың елдеріміз арасындағы стратегиялық серіктестік пен одақтастық қатынастарды дамыту тұрғысынан мәні зор. Сонымен қатар Еуразия құрлығындағы қауіпсіздік пен тұрақтылықты қамтамасыз етуде де айрықша мәнге ие деп ойлаймын. Өйткені біздің елдеріміз алып Еуразия кеңістігінің өзегі саналады. Осы орайда екі мәселені ерекше атап өткім келеді. Біріншісі, елдеріміз арасындағы стратегиялық серіктестік пен одақтастық қатынастардың жеті негізі туралы бірлескен мәлімдеме. Жеті – қасиетті сан. Құжат өте мазмұнды. Бұл жөнінде баспасөз конференциясында толығырақ айтамын. Оны өзім қарап, түзетулер енгіздім. Аталған мәлімдеме екі ел жылнамасына маңызды оқиға ретінде енеді деп сенемін. Екіншісі, Қазақстанда атом электр станциясының құрылысына қатысты келісімге қол қою. Осы жобаға қолдау көрсеткеніңіз үшін Сізге ризашылығымды білдіремін. АЭС құрылысы туралы келісімнің стратегиялық мәні жөнінде айта беру артық. Бұл бәріне түсінікті. Біз – достас, бауырлас елдерміз. Ортақ бай тарихымыз бар, мәдени дәстүрлеріміз бен халықтарымыздың менталитеті бір біріне ұқсас. Кешегі бейресми кездесуде ол жөнінде егжей-тегжейлі айтып, өткенді еске алдық. Ресей үшін де мұның мәні ерекше деп ойлаймын. Біз халықтарымыздың түпкілікті мүддесіне сай жұмыс істейміз. Азаматтарымыз мемлекеттеріміздің достығы мен ынтымағы сақталғанын қалайды. Одан әрі өркендеу үшін баршамызға бейбітшілік қажет.</blockquote>Сонымен қатар, Қазақстан мен Ресей президенттері шағын құрамда келіссөз жүргізді.<blockquote>– Құрметті Қасым-Жомарт Кемелұлы! Ең әуелі шақырғаныңыз үшін алғыс айтамын. Былтыр бізге мемлекеттік сапармен келгеніңізге қуандық. Сол кезде ғасырлар бойы, соның ішінде бір мемлекет аясында қалыптасқан халықтарымыз арасындағы берік достық пен өзара құрметке негізделген стратегиялық серіктестігімізді кеңейту бағытында тағы да алға қарай қадам жасадық. Бүгін де жемісті жұмыс атқарамыз деп ойлаймын. Бейресми сипатта өткен кешегі кездесу үшін ризашылығымды білдіремін. Өзара ықпалдастығымыздың көптеген маңызды әрі перспективті бағыты бойынша пікір алмастық. Делегациямыз еліңізге мереке қарсаңында келіп отыр. Ресей мұсылмандары Құрбан айт мерекесін атап өтеді. Қазақстанда да бұл мейрам кеңінен тойланатынын білемін.</blockquote>Фото: Ақорда

Қазақстан-Ресей: Екі ел Президенті келіссөз жүргізді

<a href="https://kyzylorda-news.kz/">Kyzylorda-news.kz</a> Қызылорда қаласындағы қайта жаңғыртудан өткен Президент саябағы аумағында «Заң мен тәртіп» қағидаты аясында қоғамдық қабылдау өтті.&nbsp;Қоғамдық қабылдаудың басты мақсаты – тұрғындардың өтініш-тілектерін тыңдап, құқықтық сауаттылықты арттыру, қоғамдағы заң үстемдігін нығайту және халықпен кері байланысты күшейту.Қоғамдық қабылдау барысында тұрғындар өздерін толғандырған әлеуметтік, құқықтық және қоғамдық мәселелер бойынша түрлі сала өкілдеріне тікелей жүгініп, нақты жауаптар мен кеңестер алды. Азаматтардың ұсыныс-пікірлері назарға алынып, бірқатар мәселелер бойынша түсіндірме жұмыстары жүргізілді.Қоғамдық қабылдауыға арнайы қатысқан Қорқыт ата атындағы Қызылорда университеті «Құқықтану» кафедрасының аға оқытушысы, заң ғылымдарының кандидаты Ләззат Қаржаубаева тәжірибелі заңгер ретінде тұрғындардың құқықтық сауалдарына жауап беріп, заң аясында кеңінен түсіндірме жұмыстарын жүргізді.Сонымен қатар, ҚР Мемлекеттік қызмет істері агенттігінің Қызылорда облысы бойынша департаментінің өкілдері мемлекеттік қызмет саласындағы заң талаптары мен азаматтардың құқықтарына қатысты маңызды ақпараттармен бөлісті.Ал «Qosyl» қалалық жастар орталығының басшысы Медет Жорабек жастар арасында құқықтық мәдениетті қалыптастыру, қоғамдық тәртіпті сақтау және азаматтық жауапкершілікті арттыру бағытында өз ойын ортаға салды.Жастар арасында заңға құрметпен қарау, қоғамдық тәртіпті сақтау және азаматтық жауапкершілікті арттыру мәселелері кеңінен қозғалды. Бұл бағыттағы түсіндіру жұмыстары қоғамдағы тұрақтылық пен бірлікті нығайтудың маңызды тетігі екені атап өтілді.Осындай ашық форматтағы кездесулер халық пен билік арасындағы байланысты нығайтып қана қоймай, тұрғындардың мемлекеттік органдарға деген сенімін арттыруға да ықпал етеді.

«Заң мен тәртіп» қағидаты аясында қоғамдық қабылдау өтті

<a href="https://kyzylorda-news.kz/">Kyzylorda-news.kz</a> Бүгін Қызылордада әлемге әйгілі испандық «Roca Group» компаниясының санитарлық-техникалық жабдықтар зауытының іргетасы қаланды.&nbsp;Оған облыс әкімі Мұрат Ергешбаев, «Roca Group» компаниясының бас директоры Даниэль Хурадо Эрнандес, Испания елшілігінің сауда-экономикалық кеңесшісі Хесус Видаль Боррелья, құқық қорғау органдарының бірінші басшылары, құрылыс компанияларының директорлары, зиялы қауым өкілдері мен ел ағалары қатысты.«Roca Group» – жүз жылдан астам тарихы бар, сантехникалық жабдықтар өндіру саласындағы әлемдік көшбасшылардың бірі. Компания әлем бойынша 78 өндірістік алаңды басқарады. Онда 20 мыңнан астам адам еңбек етеді. Өнімдері 170-тен астам елге экспортталады.Рәсімде облыс әкімі Мемлекет басшысы Қасым-Жомарт Тоқаевтың инвестиция тарту және заманауи өндірісті дамыту жөніндегі тапсырмасына тоқталып, өңірде қолайлы инвестициялық ахуал қалыптасқанын атап өтті.<blockquote>«Мемлекет басшысы «Жаңа инвестициялар ең алдымен еліміздегі заманауи өнеркәсіптің негізін қалыптастыруға бағытталуы керек» деген болатын. Кейінгі жылдары өңіріміздің инвестициялық әлеуеті артып, ірі жобалар табысты жүзеге асуда.Аймақ экономикасына 2,3 трлн теңгеден астам инвестиция тартылды. Алдағы үш жылда 1,9 трлн теңгеге 48 инвестициялық жобаны жүзеге асыру жоспарлануда. Нәтижесінде 10 мыңнан астам жаңа жұмыс орны ашылады. Бүгін біз еліміз үшін маңызды, жоғары технологиялық өндіріс орнының капсуласын салу рәсімінің куәсі болып отырмыз. Осындай ауқымды жобаны Сыр өңірінде жүзеге асырғаны үшін испандық «Roca Group» компаниясына ризашылығымды білдіремін. Бұл бастама өңір экономикасына жаңа серпін беріп, экспорттық әлеуетті арттыруға және жаңа жұмыс орындарын ашуға мүмкіндік береді. Біз отандық және шетелдік инвесторлармен әрдайым ашық әрі сенімді қарым-қатынас орнатып, нәтижелі жұмыс істеуге дайынбыз, – деді Мұрат Нәлқожаұлы.</blockquote>Жиында облыс прокуроры Ризабек Ожаров пен «Roca Group» серіктестігінің бас директоры Даниэль Хурадо Эрнандес сөз сөйлеп, ел ағасы Ибрагим Әбибуллаев ақ батасын берді.Айта кету керек, жоба «KAZAKH INVEST» ҰК» АҚ қолдауымен жүзеге асырылуда. «Roca Group» компаниясының зауытын Қызылорда өңірінде салу туралы келісім облысты Нұрлыбек Нәлібаев басқарған кезеңде жасалып, Үкімет деңгейінде тиісті құжаттарға қол қойылған болатын.Бұл – Қазақстандағы экологиялық қауіпсіздіктің халықаралық стандарттарына сәйкес келетін санитарлық-техникалық өнімдер шығаратын алғашқы өндіріс орны.Зауытқа 24 гектар жер телімі бөлінді, 44,1 млрд теңге инвестиция салынады. Жылдық өндірістік қуаты 500 мың бұйымға дейін жетеді. Өндірілген өнім Қазақстанның ішкі нарығына жеткізіліп, Орталық Азия елдеріне экспортталады.&nbsp;Сонымен қатар 300-ге жуық тұрақты жұмыс орны ашылады, жергілікті мамандарды оқыту және олардың біліктілігін арттыру көзделген. Компания жыл соңына дейін смесительдер мен инсталляциялық жүйелерді құрастыратын өндіріс орнын іске қосуды жоспарлап отыр. Ал компания өнімдері ұсынылатын шоурумдар Астана және Алматы қалаларында маусым айында ашылады.<img src="https://knadmin.beoblood.kz/uploads/V_Kyzylorde_zalozhen_fundament_zavoda_kompanii_Roca_Group_1_8b57d39eb3.jpg" alt="В Кызылорде заложен фундамент завода компании «Roca Group»1.jpg">

Қызылордада испандық «ROCA GROUP» зауытының іргетасы қаланды

<a href="https://kyzylorda-news.kz/">Kyzylorda-news.kz</a> «Жол активтері сапасының ұлттық орталығы» РМК Қызылорда облыстық филиалы мамандары республикалық маңыздағы автожолдарды мобильді зертханамен тексеруге шықты. Қыс-көктемнен кейін жолдардың жай-күйі мен сапасын зерделеу жыл сайын жүретін маңызды процесс. &nbsp;Арнайы заманауи құрылғылармен жабдықталған жылжымалы зертхана алдымен өңір аумағына тиесілі КАZ-06 «Қарабұтақ-Қызылорда-Шымкент» автожолына тексеру жүргізді. Жалпы трассаның жай-күйі бірнеше параметр бойынша анықталады. Жалпы ұзындығы 800 шақырымнан асатын жолды диагностикалық тексеру барысында кейбір аралығында автожолдың көлденең және тік еңістері, асфальттың кедір-бүдірлігі, ауыр жүк көліктерінен пайда болатын жол іздері мен шұңқырлар тіркелген. Бұл аймақ жолдарында жиі кездесетін кемшіліктер. &nbsp;<blockquote>– Мобильді кешен толықтай автоматтандырылған. Бұл жүйе жасанды инттелект арқылы жұмыс істейді. Жолдың кез-келген кемшілігін аса дәлдікпен анықтап, мезетінде арнайы базаға түсіріп отырады. Яғни, адами фактор жоқ. Жолдағы көліктердің интенисвтік көрсеткішіне дейін шығарып береді. Біздің жұмыс базаға түскен ақпараттарды тізбектеп, анықталған ақауларды қайта қалпына келтіру бойынша тиісті мекемеге ұсыныс жібереміз. Және жол күтімімен айналысатын мердігер анықталған кемшіліктерді түзетіп отырады,- дейді ЖАСҰО инженері Нұржан Бекжігітов. &nbsp;&nbsp;</blockquote>Қазіргі таңда орталық мамандары республикалық маңыздағы «Қызылорда-Жезқазған» автожолына диагностикалық тексеру жүргізіп жатыр. Мобильді кешен анықтаған ақаулар жол салушы мердігер компанияларға жіберіледі. Себебі, былтыр ғана ел игілігіне берілген күрежолдың 5 жылдық кепілдік мерзімі бар.

Автожолдардың жай-күйі мобильді зертханамен тексеріліп жатыр

<a href="https://kyzylorda-news.kz/">Kyzylorda-news.kz</a> &nbsp;Қазақстанда зейнетақы жинақтарын мерзімінен бұрын алу үшін есептелетін жаңа шекті көрсеткіштер шілде айының басында жарияланады. Бұл туралы Үкімет басшысы Олжас Бектенов қол қойған жаңа әдістемелік құжатта айтылған, деп хабарлайды<a href="https://qaz365.kz/society/18453-zeinetaky-zhinagyn-alu-talaptary-ozgeredi/">&nbsp;Qaz365.kz.</a>Құжат 4 маусымнан бастап күшіне енеді. Жаңа есептеу моделі зейнетақы активтерінің жылдық 9% және жұмыс берушілердің міндетті зейнетақы жарналарының 8% табыстылығын ескере отырып жасалған.Шекті көрсеткішті есептеу үшін арнайы формула қолданылады: минималды ай сайынғы төлем мөлшері 12 айға және төлемдердің күтілетін ұзақтығы мен болашақ құнының коэффициентіне көбейтіледі. Мұндағы базалық көрсеткіш – ең төменгі зейнетақының 75%-ы мен ең төменгі жалақының 60%-ын құрайды. Бұл пайыздық мөлшерлер жас ұлғайған сайын өсіп отырады: 20 жастан бастап әрбір қосымша жыл үшін ең төменгі зейнетақыдан 2,5%, ал ең төменгі жалақыдан 2% қосылады. Дегенмен, жиынтық мән 200%-дан аспауы тиіс.Формуланың соңғы бөлігі – төлемдердің ағымдағы құнының факторы. Ол азаматтардың өмір сүру ұзақтығын, белгілі бір жасқа дейін жету ықтималдығын, активтердің болашақ кірістілігін және төлемдерді жыл сайын индексациялауды қамтиды.Фото: Нұрболат Нұржаубай

Зейнетақы жинағын алу талаптары өзгереді

<a href="https://kyzylorda-news.kz/">Kyzylorda-news.kz</a>&nbsp; Қазақстан Республикасы Индустрия және инфрақұрылымдық даму министірлігінің 2023 жылғы 5 шілдедегі №492 бұйрығына сәйкес, жол төсемі бөлігінің бұзылуын болдырмау мақсатында жалпы пайдаланымдағы республикалық маңызы бар KAZ-06 «Қарабұтақ-Қызылорда-Шымкент» автожолының 1240-2055,5 шақырым, KAZ-14 «Қызылорда-Жезқазған» автожолының 127-216 шақырымдар аралықтарына әрбір оське түсетін жүктемесі 9 тоннадан артық, KAZ-14 «Қызылорда-Жезқазған» автожолының 1-24 шақырымы аралығына әрбір оське түсетін жүктемесі 8 тоннадан артық автокөлік құралдарының қозғалысына 2026 жылдың 1 маусымы мен 31 тамызы аралығында ауа температурасы +25° С градустан асқан жағдайда сағат 10.00-ден сағат 22.00-ге дейін уақытша шектеу еңгізіледі.Халықаралық келісімдерге сәйкес жүктердің және жолаушылардың халықаралық тасымалдарын жүзеге асыратын, төтенше жағдайлар мен олардың салдарын алдын алу және оларды жою жөніндегі іс-шараларды жүзеге асыратын, тез бұзылатын азық-түліктерді тасымалдауды жүзеге асыратын, жолаушылар мен багаж тасымалын жүзеге асыратын, өте қауіпті жүктерді тасымалдауды жүзеге асыратын, мердігер ұйымдарға реконструкциялау жұмыстарын жүргізу үшін берілген учаскелердегі жол-құрылыс жұмыстарын жүзеге асыратын, қарулы күштер, басқа да әскерлер мен әскери құралымдарды, сондай-ақ әскери тасымалдауларды жүзеге асыратын, зардап шеккендерге гуманитарлық көмек көрсетуді жүзеге асыратын авто көлік құралдарына шектеулер қолданылмайды.Фото: egemen.kz

Жолдарға уақытша шектеулер қойылды

<a href="https://kyzylorda-news.kz/">Kyzylorda-news.kz</a> Қармақшы ауданы әкімдігінің мәжіліс залында аудан әкімі Жандос Еркінбектің төрағалығымен мәжіліс өтті. Күн тәртібінде оқу жылының аяқталуы, балалардың жазғы демалысын ұйымдастыру, қауіпсіздік мәселелері қаралды.Жиын басында аудан әкімі аудандағы кадрлық өзгерістермен таныстырды. Аудан әкімінің өкімімен аудандық мәдениет және тілдерді дамыту бөлімінің басшысы лауазымына Ғарышбек Бауыржанұлы Нысанбаев тағайындалғанын хабарлап, жаңа қызметіне сәттілік тіледі.Мәжілісте аудандық білім бөлімінің басшысы Берік Жәнібеков оқу жылының аяқталуы мен балалардың жазғы тынығу демалысын ұйымдастыру бойынша атқарылып жатқан жұмыстар жөнінде баяндады.<blockquote>– Болашақ елдің тұтқасына айналатын балаларымыз бүгіннен бастап ұқыптылықты, қарапайымдылықты, мәдениеттілікті бойына сіңіріп өсуі тиіс, – деді Жандос Еркінбек.</blockquote>Жиында балалардың жазғы демалысын сапалы ұйымдастыру мәселесіне де ерекше назар аударылды. Аудан бойынша 29 мектепте мектеп жанындағы күндізгі тынығу лагерьлері жұмысын бастайтыны айтылып, қауіпсіздік пен санитарлық талаптарды сақтау міндеттелді.Сондай-ақ жаз мезгілінде су айдындарындағы қауіпсіздік мәселесі көтерілді. Аудандық төтенше жағдайлар бөлімі мен кент және ауылдық округ әкімдеріне шомылуға тыйым салынған орындарда рейд жұмыстарын күшейтіп, тұрғындар арасында түсіндірме жұмыстарын жүргізу тапсырылды.<blockquote>«Қаралған мәселелер өте өзекті және бірінші кезектегі назар аударуды қажет етеді. Әрбір баланың қауіпсіздігін қамтамасыз етуде кемшіліктерге жол беруге мүлдем болмайды»,- деді Жандос Еркінбек.</blockquote>Фото: Қармақшы ауданы әкімінің баспасөз қызметі&nbsp;

Оқу жылының аяқталуы және балалардың жазғы қауіпсіздігі талқыланды

<a href="https://kyzylorda-news.kz/">Kyzylorda-news.kz</a> Сыр өңірі өнер шеберлерінің Еуропадағы гастрольдік сапары аясында Люксембург Ұлы Герцогтігінде Қызылорда облыстық филармониясының концерті өтті. «Shanyraq Fest Luxembourg» мәдени бастамасы шеңберінде ұйымдастырылған кеште қазақ халқының бай музыкалық және фольклорлық мұрасы көрермен назарына ұсынылды.Мәдени іс-шара Қазақстан Республикасының Бельгия Корольдігі мен Люксембург Ұлы Герцогтігіндегі елшілігі, Қызылорда облысының әкімдігі және ERG қолдауымен ұйымдастырылды.Өнер сапары осыдан бірнеше ай бұрын Нұрлыбек Машбекұлының бастамасымен жоспарланған болатын.Концертке Люксембургтің мемлекеттік мекемелерінің өкілдері, дипломатиялық корпус мүшелері, кәсіпкерлер, мәдениет саласының қызметкерлері, сондай-ақ осы елде тұратын қазақстандықтар мен студент жастар қатысты.Кеште Қазақстанның Люксембургтегі елшісі Роман Василенко құттықтау сөз сөйлеп, мәдениет пен өнердің халықтарды жақындастыратын маңызды рухани құндылық екенін атап өтті. Сонымен қатар мұндай бастамалар мемлекеттер арасындағы достық қарым-қатынасты нығайтып, халықтардың бір-бірінің тарихы мен дәстүрін тереңірек тануына ықпал ететінін жеткізді.Мәдениет саласының үздігі Әзиза Іздіқұлова режиссерлік еткен концерттік бағдарламада Сыр өңірінің бай музыкалық мұрасы кеңінен насихатталып, ұлттық фольклор, күй өнері мен жыраулық дәстүр көрермен назарына ұсынылды. Өнерпаздар орындауындағы шығармалар арқылы Ұлы даланың рухы мен қазақ халқының мәдени ерекшелігі шетелдік көрерменге кеңінен таныстырылды.Кеш қорытындысында өнерпаздар «Атамекен» әнін орындап, қазақ мәдени кешінің әсерлі финалына айналдырды.

Сыр өнерпаздары Люксембургте қазақ мәдениетін дәріптеді

<a href="https://kyzylorda-news.kz/">Kyzylorda-news.kz</a> &nbsp;Облыс әкімі Мұрат Ергешбаев «Seven Rivers Technologies» ЖШС директоры Ануар Үмбетаевпен кездесті. Онда аймақта шыны ыдыстар шығаратын зауыт салу мәселесі талқыланды.Облыс әкімі Мемлекет басшысының тапсырмасына сәйкес, өңірде инвестициялық бастамаларды жүзеге асыруда жүйелі жұмыс жүргізіліп жатқанын атап өтті.Кейінгі төрт жылда аймаққа 2,3 трлн теңгеден астам инвестиция тартылған. Оның басым бөлігі - жеке инвестициялар. Алдағы уақытта құны 1 трлн теңге болатын 14 ірі инвестициялық бастама қолға алынады.<blockquote>«Жаңа өндіріс орындарын ашу – өңір экономикасын дамытудың негізгі бағыттарының бірі. Солардың қатарында шыны ыдыстар шығаратын зауыт құрылысы бар. Бұл өңірдің өнеркәсіптік әлеуетін арттырып қана қоймай, импортты алмастыруға және қайта өңдеу саласын дамытуға серпін береді. Әкімдік тарапынан жан-жақты қолдау көрсетіледі»,– деді Мұрат Нәлқожаұлы.</blockquote>Айта кетейік, аталған зауыт құрылысына қатысты келіссөздер 2023 жылдан бері жүргізіліп келеді. Астана қаласында мемлекет басшыларының қатысуымен өткен «Қазақ-Герман» бизнес-форумы аясында ынтымақтастық туралы меморандумға қол қойылған.«Seven Rivers Technologies» серіктестігінің шыны ыдыстар шығаратын зауытының жалпы құны - 60 млрд теңге, инвесторы – Германияның «Medal holding» компаниясы, бас мердігері – «Horn» компаниясы. Кәсіпорында жылына 240 млн дана шыны ыдыс өндіру жоспарлануда. Нысанды 2027 жылдың желтоқсан айында пайдалануға беру көзделген.Өндіріске мемлекеттік қолдау көрсетіліп, Қызылорда қаласындағы «Өндіріс» индустриялық аймағынан 38 гектар жер телімі берілген. Сонымен қатар, «Жанплес-3» кен орнынан кварц құмын өндіруге жер қойнауын пайдалану құқығы ұсынылған.«Өнеркәсіпті дамыту қоры» АҚ арқылы қаржыландыру мақсатында екінші кезеңге қажетті құжаттар топтамасы тапсырылған.Зауыт іске қосылғаннан кейін республика көлемінде жиналатын шыны қалдықтарын қайта өңдеу арқылы жоғары сапалы өнім өндіру және импортты алмастыру мүмкіндігі артады. Сонымен қатар өңірдің өнеркәсіптік әлеуеті күшейіп, жаңа жұмыс орындары ашылады.Фото: Қызылорда облысы әкімінің баспасөз қызметі

Шыны ыдыстар шығаратын зауыт салу мәселесі талқыланды

<a href="https://kyzylorda-news.kz/">Kyzylorda-news.kz</a>&nbsp; Облыс әкімі Мұрат Ергешбаев Сыр өңіріне жұмыс сапарымен арнайы келген «Roca Group» компаниясының бас директоры Даниэль Хурадо Эрнандеспен кездесті.Кездесуде аймақ басшысы өңірдің инвестициялық әлеуеті, өндіріс орындарын дамытуда атқарылып жатқан жұмыстар, алда жүзеге асатын жобалар туралы айтты.<blockquote>«Ең алдымен, өңірге арнайы іссапармен келгеніңіз үшін ризашылығымды білдіремін. Сантехникалық бұйымдар өндірісіндегі әлемдік көшбасшылардың бірі, ғасырдан астам тарихы бар «Roca Group» компаниясымен серіктестік орнату - біз үшін үлкен мәртебе.Мемлекет басшысының қолдауымен соңғы төрт жылда аймағымызға 2,3 трлн теңгеден астам инвестиция тартылды. Оның басым бөлігі - жеке инвестициялар.Алдағы уақытта жаңа өндіріс орындарын ашу мақсатында 1 трлн теңгеге 14 ірі жобаның құрылысы басталады. Ертең Өздеріңізбен бірге көптен күткен «Roca» зауытының іргетасын қалаймыз.Санитарлық-техникалық бұйымдар өндіру жобасы 2024 жылдан қолға алынды. Сол кездегі аймақ басшысы Нұрлыбек Машбекұлы бастаған Қызылорда облысының делегациясы Испания Корольдігіне арнайы іссапармен барып, компанияның өндіріс орындарымен танысты.Өткен жылдың маусым айында «Roca Group», ҚР Өнеркәсіп және құрылыс министрлігі және Қызылорда облысының әкімдігі арасында үшжақты келісімге қол қойылып, желтоқсан айында инвестициялық келісім жасалды.Мемлекеттік қолдау ретінде Қызылорда қаласындағы «Өндіріс» индустриялық аймағынан 24 гектар жер телімі берілді.Сонымен қатар Үкіметпен бірлесіп, елімізде өндірілмейтін, инновациялық және экспортқа бағытталған жоғары сапалы өнім шығаратын жобалар үшін шикізат тасымалы шығындарының бір бөлігін өтеу мүмкіндіктері қарастырылуда.Елімізде баламасы жоқ жобаның біздің облыста жүзеге асқанына қуаныштымыз!», - деді Мұрат Нәлқожаұлы.</blockquote>Айта кетейік, Қызылорда қаласында 44,1 млрд теңгеге «Roca Group» санитарлық-техникалық бұйымдар шығару зауытының құрылысы басталмақ. Кәсіпорында 300 адам жұмыспен қамтылып, жылына 500 мың өнім өндіріледі. Жоба ҚР Үкіметі, Қызылорда облысының әкімдігі және аталған компания арасындағы үшжақты келісім негізінде жүзеге асырылады.Фото: Қызылорда облысы әкімінің баспасөз қызметі

Қызылордада «Roca Group» зауытының құрылысы басталады 

&nbsp;<a href="https://kyzylorda-news.kz/">Kyzylorda-news.kz</a> &nbsp;Облыс әкімі Мұрат Ергешбаев Қызылорда қаласының құрылыс нысандарындағы жұмыс барысымен танысты.Президент саябағындағы Ботаникалық білім беру орталығының құрылысына 4 млрд 948 млн теңге бөлінген, 2,41 гектар аумақта орналасқан. Орталық табиғат пен ғылымды ұштастыратын, білім беру, ғылыми-зерттеу және экологиялық мәдениетті қалыптастыруға бағытталған көпфункционалды кешен болмақ. Мұнда әлемнің әртүрлі өңірлерінің флорасына арналған тақырыптық бақтар, дәріс залдары, демалыс және әкімшілік аймақтар қарастырылған. Нысан ағымдағы жылдың маусым айында пайдалануға беріледі.<img src="https://knadmin.beoblood.kz/uploads/leumettik_nysandar_men_t_r_yn_jler_rylysy_ar_yndy_1_7f1fcdfdaf.jpg" alt="Әлеуметтік нысандар мен тұрғын үйлер құрылысы қарқынды 1.jpg">Көпқабатты тұрғын үй кешені - 22 млрд теңгенің жобасы, яғни 8,2 гектар аумақта 15 тұрғын үй салынып, 945 пәтер пайдалануға беріледі. Құрылысты тамыз айында аяқтау жоспарланған.«Қызылорда Арена» көпфункционалды спорт кешені халықаралық талаптарға сәйкес салынуда. Бас мердігер «ASPAN HOLDING» серіктестігі құрылысына 20 млрд 61 млн теңге қарастырылған нысанды 2,1 гектар аумаққа, 25 540 шаршы метр етіп, 3 және 4 қабатты блоктардан тұрғызуда.Кешенде бір мезетте 2 552 келушіні қабылдауға болады. Олимпиадалық стандарттарға сәйкес келетін бассейн, 2500 орындық әмбебап спорт залы және спортшыларға арналған жаттығу алаңдары қарастырылған.<img src="https://knadmin.beoblood.kz/uploads/leumettik_nysandar_men_t_r_yn_jler_rylysy_ar_yndy_2_733f897f48.jpg" alt="Әлеуметтік нысандар мен тұрғын үйлер құрылысы қарқынды 2.jpg">Құрылыс былтыр шілде айында басталды, алдағы тамыз айында пайдалануға беру жоспарланған.Мұнда халықаралық және республикалық жарыстар өткізуге, бұқаралық спортты дамытуға барлық жағдай жасалады.Фото: Қызылорда облысы әкімінің баспасөз қызметі

Әлеуметтік нысандар мен тұрғын үйлер құрылысы қарқынды 

<a href="https://kyzylorda-news.kz/">Kyzylorda-news.kz</a> Қызылорда қаласында жастар мен тұрғындар арасында есірткі таралуының алдын алуға бағытталған кең көлемді акция өткізілді. Іс-шараны Қызылорда облысы Полиция департаментінің Есірткі қылмысына қарсы іс-қимыл басқармасы мен «Amanat» партиясы жанындағы «Жастар Рухы» жастар қанаты бірлестігі тартыла &nbsp;ұйымдастырылды.Акция барысында қала аумағындағы ғимараттардың қабырғаларына, қоршауларға және қоғамдық орындарға жазылған есірткі сататын интернет-дүкендердің мекен-жайлары бар граффити жазулары боялып, жойылды. Мұндай заңсыз жазбалар жастарды есірткі қылмысына тартудың және тыйым салынған заттарды интернет арқылы таратудың бір тәсілі болып табылады.<img src="https://knadmin.beoblood.kz/uploads/yzylordada_esirtki_zharnamalaryn_zhoyu_akcziyasy_tkizildi1_ac747fe6d0.jpg" alt="Қызылордада есірткі жарнамаларын жою акциясы өткізілді1.jpg">Сонымен қатар, акция аясында, қала тұрғындарына есірткіге қарсы бағыттағы ақпараттық парақшалар мен буклеттер таратылды. Еріктілер мен полиция қызметкерлері тұрғындарға есірткінің зияны, есірткі бизнесіне қатысқаны үшін қарастырылған қылмыстық жауапкершілік, сондай-ақ есірткі жарнамаларын байқаса, тиісті органдарға хабарлау қажеттігі жөнінде түсіндірме жұмыстарын жүргізді.Ұйымдастырушылардың айтуынша, мұндай шаралар қоғамда есірткіге қарсы теріс көзқарасты қалыптастыруға, тұрғындардың құқықтық сауаттылығын арттыруға және есірткі заттарға байланысты қылмысқа қарсы күресте күш біріктіруге ықпал етеді.Қала аумағындағы есірткі жарнамаларын анықтау және жою жұмыстары алдағы уақытта да жалғасын табады.

Қазақстан және Қызылорда облысының жаңалықтары