<a href="https://kyzylorda-news.kz/">Kyzylorda-news.kz</a>&nbsp;Белгілі қаржыгер-экономист, «Ерен еңбегі үшін» медалінің иегері Мүбәраков Қамбарбек Амангелдіұлын еске алуға арналған мемлекеттік қызметшілер арасында футзалдан облыстық турнирдің салтанатты ашылу рәсімі өтті.&nbsp;Оған облыс әкімі Мұрат Ергешбаев, облыстық мәслихат төрағасы Мұрат Тлеумбетов, облыстық қоғамдық кеңестің төрағасы, Қорқыт ата атындағы Қызылорда университетінің басқарма төрағасы-ректоры Наурызбай Байқадамов, мемлекет және қоғам қайраткері Руслан Рүстемов, зиялы қауым өкілдері және отбасы мен ағайын-туыстары қатысты.&nbsp;Рәсімде аймақ басшысы Қамбарбек Амангелдіұлының &nbsp;қажырлы еңбегі мен адал қызметін еске алып, қатысушыларға сәттілік тіледі.&nbsp;<blockquote>«Баршаңызды бүгінгі турнирдің ашылуымен құттықтаймын! Жарыстың ашылу салтанатына орай Қазақстан Республикасы Премьер-министрінің бірінші орынбасары Нәлібаев Нұрлыбек Машбекұлы арнайы құттықтауын жолдады.&nbsp;Қамбарбек Амангелдіұлы саналы ғұмырын Сыр өңірінің өсіп-өркендеуіне арнап, мемлекеттік қызметте адал еңбектің жарқын үлгісін танытты.&nbsp; Қызмет жолында Шиелі ауданының әкімі, облыстық тексеру комиссиясының төрағасы, ауыл шаруашылығы және жер қатынастары, кәсіпкерлік және өнеркәсіп, экономика және қаржы басқармаларының басшысы болған уақытта ел мүддесін негізге ала отырып, аймағымыздың әлеуметтік-экономикалық дамуына, тұрғындардың әл-ауқатын арттыруға, байыпты бастамалар мен тың жобаларды жүзеге асыруға ерекше үлес қосты.&nbsp;Әріптесіміз қай қызметте де биік парасатымен абыройға кенеліп, азаматтық ұстанымымен, іскерлік қасиетімен, мол тәжірибесімен көпке үлгі болды.&nbsp; Бүгінгі спорт сайысы асыл азаматтың есімін ел жадында мәңгі сақтап, жастарға үлгі-өнеге ретінде насихаттау мақсатында ұйымдастырылып отыр. Алдағы уақытта бұл бағыттағы жұмыстарды жүйелі түрде жалғастырамыз. Осындай спорттық шараларда шыңдалған жастарымыз байрақты бәсекелерде ел мерейін үстем етіп, көк Туымызды биікте желбірете берсін!», - деді аймақ басшысы.&nbsp;</blockquote>Шарада үзеңгілес досы, әріптесі Руслан Рүстемұлы, Қамбарбек Амангелдіұлының ағасы Бақытжан Амангелдіұлы сөз сөйледі.&nbsp;Айта кетейік, турнирге облыстағы барлық мемлекеттік мекемелерден 27 команда қатысуда. Жарыс қорытындысы бүгін шығады.&nbsp;<figure class="image"><img src="https://knadmin.beoblood.kz/uploads/akimat_1cdddc875e.jpeg" alt="акимат.jpeg"></figure>

Ардақты азаматтың есімі ұлықталды

<a href="https://kyzylorda-news.kz/">Kyzylorda-news.kz</a>&nbsp;26 шілдеде Қазақстанның бірқатар өңірлерінде дауылды ескерту жарияланды. Синоптиктердің болжамынша, елдің көптеген аймақтарында найзағай ойнап, нөсер жаңбыр жауады, бұршақ түседі, екпінді жел соғып, шаңды дауыл көтеріледі. Сонымен қатар аптап ыстық сақталып, бірқатар өңірде өрт қаупінің деңгейі өте жоғары болады.&nbsp;Қызылорда облысында күндіз облыстың солтүстігінде, оңтүстігінде және орталығында шаңды дауыл көтерілуі мүмкін. Желдің екпіні 15–20 м/с. Ауа температурасы +40…+42°С-қа дейін көтеріліп, аптап ыстық болады. Облыс бойынша төтенше өрт қаупі сақталады. Қызылорда қаласында күндіз +40…+41°С ыстық күтіледі, төтенше өрт қаупі сақталады.Фото: pixabay

26 шілдеде бірқатар өңірде дауылды ескерту жарияланды

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде студенттердің шығармашылық әлеуетін дамыту мен жастар бастамаларын қолдауға ерекше мән беріледі. Бүгінде университетте түрлі бағытта жұмыс істейтін 20 жастар ұйымы белсенді қызмет атқарып келеді.Сол ұйымдардың бірі – студент қыздардан құралған «Матриархат» жайдарман командасы. Қосшы қаласының туған күніне арналған республикалық «Туған күніңмен, Қосшы!» мерекелік жайдарман ойынына қатысып, елдің әр өңірінен келген үздік командалармен бірге өнер көрсетті. Өздерінің тапқырлығы мен сахна мәдениетін көрсеткен университет жастары көрерменнің ыстық ықыласына бөленіп, мерекелік іс-шараның жоғары деңгейде өтуіне үлес қосты.Шара қорытындысында Қосшы қаласының әкімі Азамат Қапышев «Матриархат» командасын мерекелік іс-шараның жоғары деңгейде өтуіне қосқан үлесі үшін Алғыс хатпен марапаттады.

Қорқыт ата университетінің КВН командасы республикалық турнирде үздік өнер көрсетті

<a href="https://kyzylorda-news.kz/">Kyzylorda-news.kz</a> Өңірдегі су ресурстарын тиімді пайдалану бағытындағы жұмыстар жүйелі түрде жалғасуда. Биыл вегетациялық кезеңде Шардара су қоймасына жоспарланған көлемнен артық су келіп, Солтүстік Арал теңізіндегі су көлемі 23,4 млрд текше метрге жеткен. Бұл туралы Өңірлік коммуникациялар қызметінің ақпарат алаңында өткен баспасөз конференциясында Қызылорда облысының табиғи ресурстар және табиғат пайдалануды реттеу басқармасы басшысының міндетін атқарушы Қайрат Жансұлтанұлы баяндады.<blockquote>«Су үнемдеу технологияларын енгізу мақсатында 68 каналды бетондау жобалары әзірленіп, олардың бір бөлігі халықаралық қаржы ұйымдарының қолдауымен жүзеге асырылмақ. Сонымен қатар Қызылжарма науа каналының құрылысы, Қазалы ауданындағы коллекторлық жүйені қайта жаңғырту және бірқатар каналдарды тазалау жұмыстары қарқынды жүргізілуде», - деді Қайрат Жансұлтанұлы.</blockquote>Спикердің айтуынша орман шаруашылығы саласында жыл басынан бері мыңдаған гектар аумаққа сексеуіл және өзге де ағаш көшеттері отырғызылып, орман қорын толықтыру шаралары қолға алынды. Орман өрттерінің алдын алу мақсатында жаңа техникалар сатып алынып, өртке қарсы жолақтар салу және қалпына келтіру жұмыстары атқарылуда. Елді мекендерді көгалдандыру жоспары аясында облыс бойынша бүгінге дейін ондаған мың ағаш көшеті егілді.<blockquote>«Балық шаруашылығында да оң көрсеткіштер қалыптасты. Алты ай ішінде өңірде 2300 тонна балық ауланып, 1808 тонна балық өнімі 12 мемлекетке экспортталды. Қазіргі таңда облыста 11 балық өңдеу зауыты жұмыс істейді. Сонымен қатар акваөсіру бағытында көл-тауарлы балық шаруашылықтарының саны 80-ге жетіп, бұл салаға мемлекеттік қолдау көрсетілуде», - деді спикер.</blockquote>Баспасөз конференциясында тұрмыстық қатты қалдықтарды басқару мәселесіне де ерекше назар аударылды. Жыл басынан бері өңірде жиналған қалдықтардың 35 пайызы өңделген. Қалдықтарды сұрыптау және қайта өңдеу бойынша жаңа өндірістік жобалар іске асырылып, бірнеше ауданға арналған сұрыптау кешендері кезең-кезеңімен пайдалануға берілуде. Сонымен бірге жаңа полигондар салу және қолданыстағы инфрақұрылымды жетілдіру жұмыстары жалғасуда.«Таза Қазақстан» республикалық экологиялық бағдарламасы аясында облыста кең көлемді сенбіліктер ұйымдастырылып, тұрғындардың белсенді қатысуымен мыңдаған тонна қоқыс шығарылды. Сондай-ақ тұрғындардың өтініштері «Таза Қазақстан» онлайн-платформасы арқылы жедел қаралып, басым бөлігі оң шешімін тапқан.<blockquote>«Экологияны қорғау, су ресурстарын тиімді пайдалану, орман қорын молайту және қалдықтарды басқару бағытындағы жұмыстар алдағы уақытта да кезең-кезеңімен жалғасады. Бұл бағыттағы негізгі мақсатымыз өңірдің экологиялық ахуалын жақсартып, табиғи ресурстарды ұтымды пайдалану арқылы халыққа қолайлы өмір сүру ортасын қалыптастыру», – деді басқарма басшысының міндетін атқарушы Жансұлтанұлы Қайрат.</blockquote>

Экология саласында кешенді жобалар жүзеге асырылуда

<a href="https://kyzylorda-news.kz/">Kyzylorda-news.kz</a> Шілденің 23–24-і күндері Ақтау қаласында ҚР Премьер-министрі Олжас Бектеновтің төрағалығымен сауда-экономикалық байланыстарды кеңейту, өнеркәсіптік кооперацияны дамыту және мәдени-гуманитарлық ынтымақтастықты нығайту мақсатында Қазақстан Республикасы мен Өзбекстан Республикасы арасындағы Өңірлер басшылары кеңесінің I отырысы өтті.<figure class="image"><img src="https://knadmin.beoblood.kz/uploads/OL_Zh_AS_BEKTENOV_4fa9cbef73.jpg" alt="ОЛЖАС БЕКТЕНОВ.jpg"></figure>Оған Қызылорда облысы әкімінің орынбасары Нұриддин Аманқұл қатысты.Кеңес отырысы аясында «Инвестициялар, сауда және көлік байланысы» тақырыбындағы пленарлық отырыс, Қазақстан–Өзбекстан бизнес-диалогы, сондай-ақ екі елдің мемлекеттік органдары мен бизнес қауымдастықтарының қатысуымен B2B кездесулер ұйымдастырылды.&nbsp;Сонымен қатар, Өзбекстан Республикасының Әндіжан облысы хокимияты мен Қазақстан Республикасының Қызылорда облысы әкімдігі арасында 2026–2028 жылдарға арналған сауда-экономикалық, ғылыми-техникалық және гуманитарлық салалардағы ынтымақтастық туралы келісімді іске асырудың жол картасына қол қойылды.Аталған жол картасы тараптар арасындағы өзара іс-қимылды жаңа деңгейге көтеруге бағытталған. Құжат аясында инвестиция тарту, өнеркәсіптік кооперацияны дамыту, ауыл шаруашылығы, сауда, білім, ғылым, мәдениет және туризм салаларындағы ынтымақтастықты кеңейту бойынша нақты іс-шараларды кезең-кезеңімен жүзеге асыру көзделген.Қол қойылған құжат екі өңір арасындағы серіктестікті одан әрі нығайтып, жаңа инвестициялық жобаларды іске асыруға, өзара тауар айналымын ұлғайтуға, тәжірибе алмасуға және халықтар арасындағы достық байланыстарды дамытуға мүмкіндік береді деп күтілуде.

Бірқатар саладағы ынтымақтастық туралы келісімді іске асырудың жол картасына қол қойылды  

<a href="https://kyzylorda-news.kz/">Kyzylorda-news.kz</a> Облыс әкімі Мұрат Ергешбаевтың төрағалығымен өткен мәжілісте егін шаруашылығының қазіргі жағдайы талқыланды.Биыл облыста 185,8 мың гектарға ауыл шаруашылығы дақылдары егілгені белгілі. Оның ішінде дәндi дақылдар 89,7 мың гектар, майлы дақылдар 6,1 мың гектар, мал азықтық дақылдар 73,2 мың гектар, картоп, көкөнiс, бақша 16,8 мың гектар. Мемлекет басшысының тапсырмасына сәйкес, &nbsp;өткен жылмен салыстырғанда күріш көлемі 10,9 мың гектарға қысқарды, бүгінде 70 мың гектар күріш суға толық бастырылған.Жалпы 7 541 гектар мақсары, 415 гектар жаздық арпа, 4 338 гектар жаздық бидай, 21 394 гектар жаңа жоңышқа, 428 гектар қант құмайы, 873 гектар судан шөбі, 409 гектар сүрлемдік жүгері, 373 гектар соя, 30 гектар күнбағыс, 120 гектар жемдік асқабақ, 326 гектар тары, 1 366 гектар картоп, 6 743 гектар көкөніс, 8 735 гектар бақша егілді. Күріштің 53,4 мың гектары үстеп қоректендіріліп, 61,2 мың гектары арамшөптерге қарсы өңделді.Осыған сәйкес, 16,7 мың гектары (23,9%) түтікке шығу, 44,8 мың гектары (64%) масақтану, ал 8,5 мың гектары (12,1%) гүлдену кезеңіне өтті.<figure class="image"><img src="https://knadmin.beoblood.kz/uploads/akimat_736e247ee5.jpg" alt="акимат.jpg"></figure>Күздік бидай, сұлы толық &nbsp;жиналып бітті. Шаруашылықтар күтімге алған 49 мың гектар ескі жоңышқаның 2380 гектарын тұқымға қалдырып, 46,6 мың гектардан екі орымнан жалпы 142,7 мың тонна жоңышқа дайындады. Мал азығын дайындау жұмыстары жалғасуда.Шілденің 23-індегі мәліметке қарағанда, &nbsp;Шардара су қоймасына жоғарыдан секундына 113,4 текше метр су түсуде. Қоймадағы су көлемі 3,3 млрд. текше метр. Сырдария өзенінің төменгі ағысына 550 текше метрі &nbsp;жіберілуде.Көксарай су реттегішінде жинақталған су көлемі 23 млн. текше метр, былтырғыдан 2,76 млн. текше метр артық.Биыл гидротехникалық құрылыстарға, ішкі шаруашылық каналдарына жөндеу жүргізілді.Мәжіліс қорытындысында аймақ басшысы жауапты сала жетекшілеріне бірқатар тапсырма берді.<figure class="image"><img src="https://knadmin.beoblood.kz/uploads/akimat_208b01cd49.jpg" alt="акимат.jpg"></figure>

Егін шаруашылығының мәселелері талқыланды

<a href="https://kyzylorda-news.kz/">Kyzylorda-news.kz</a> Қызылорда облысында абаттандыру талаптарын бұзғандар жауапқа тартылды, - деп хабарлайды Polisia.kz.&nbsp;«Заң мен тәртіп» қағидатын ілгерілету және елді мекендердің санитарлық тазалығын қамтамасыз ету мақсатында Қызылорда облысы полиция департаменті тұрғындар мен қала қонақтарын абаттандыру қағидаларын қатаң сақтауға шақырады.&nbsp;2026 жылдың шілде айынан бастап елді мекендерді абаттандырудың жаңа талаптары күшіне енді. Енді жеке тұрғын үй иелері өздерінің ауласы ғана емес, қоршаудың сыртындағы 5 метр аумақтың тазалығына да жауапты. Белгіленген аумақта қоқыс, құрылыс материалдары немесе өзге де қалдықтар анықталған жағдайда, Қазақстан Республикасының Әкімшілік құқық бұзушылық туралы кодексінің талаптарына сәйкес әкімшілік жауапкершілік қарастырылады.&nbsp;Сонымен қатар тұрғындар: қоршаудан тыс аумақтағы арамшөптерді уақтылы шабуға; қыс мезгілінде қар мен мұзды тазартуға; қоршау мен қасбетті күтіп ұстауға; тұрғын үйдің нөмірлік белгісін орнатып, оның сақталуын қамтамасыз етуге міндетті.&nbsp;<figure class="image"><img src="https://knadmin.beoblood.kz/uploads/policziya_kz_98ba6b4883.jpg" alt="полиция кз.jpg"></figure>Жеке тұрғын үйлердің маңына құрылыс материалдарын, кірпіш, цемент, бетон, сантехникалық бұйымдар мен өзге де қалдықтарды қалдыруға жол берілмейді. Бұл талаптар кәсіпкерлік нысандарының иелеріне де бірдей қолданылады.&nbsp;Көпқабатты тұрғын үйлердің аулаларындағы қалдықтарды уақтылы шығару – мүлік иелері бірлестіктері, пәтер иелері кооперативтері немесе басқарушы компаниялардың міндеті. Қоқысты контейнерлерден тыс жерге тастауға немесе ұзақ уақыт бойы үй маңында қалдыруға болмайды. Егер қалдықтар белгіленген мерзімде шығарылмаса, заңнамаға сәйкес жауапкершілік көзделген.&nbsp;Жыл басынан бері Қызылорда облысында абаттандыру қағидаларын бұзуға байланысты ӘҚБтК-нің 434-2-бабы бойынша – 1 299, ал 505-бабы бойынша – 6 649 әкімшілік құқық бұзушылық дерегі анықталып, заң талаптарына сәйкес шаралар қабылданды.&nbsp;Полиция аталған талаптардың сақталуы Жедел басқару орталығының бейнебақылау камералары арқылы тәулік бойы бақылауда екенін еске салады.&nbsp;Тазалық – әр азаматтың ортақ міндеті. Қоршаған ортаны таза ұстау – заң талаптарын орындаумен қатар, мәдениетті қоғам қалыптастырудың маңызды кепілі.

Қызылорда облысында абаттандыру талаптарын бұзғандар жауапқа тартылды 

<a href="https://kyzylorda-news.kz/">Kyzylorda-news.kz</a> Қызылордада «Сыр даласында – көне есімдердің сыры» атты тарихи-танымдық ғылыми экспедицияның зерттеу тобымен кездесу өтті.Қызылорда қаласындағы «Анаға тағзым» орталығында Қазақстан ономаст ғалымдарының қоғамдық бірлестігінің ұйымдастыруымен өтіп жатқан «Сыр даласында – көне есімдердің сыры» атты тарихи-танымдық ғылыми экспедиция аясында ғылыми кездесу ұйымдастырылды.​Жиынға экспедиция мүшелері, Қорқыт ата атындағы Қызылорда университетінің ғалымдары, зиялы қауым өкілдері, өлкетанушылар, тіл жанашырлары, сондай-ақ қала әкімдігіне қарасты кент және ауылдық округ әкімдері, тиісті мекемелердің басшылары мен ономастика мәселелеріне жауапты мамандар қатысты.​Кездесудің негізгі мақсаты – өңірдің тарихи жер-су атауларын ғылыми тұрғыдан зерделеу, тарихи топонимиялық мұраны сақтау және ғылыми айналымға енгізу бағытындағы жұмыстарды талқылау, сондай-ақ ғылыми қауымдастық пен жергілікті мамандар арасында тәжірибе алмасу болды.​Іс-шара барысында Қазақстан ономаст ғалымдарының қоғамдық бірлестігінің басшысы, жоба жетекшісі, Республикалық ономастика комиссиясының мүшесі, филология ғылымдарының кандидаты, профессор Гүлнар Шияпқызы Бекенова экспедицияның мақсаты мен негізгі бағыттары туралы баяндама жасап, Сыр өңірінде жүргізілген далалық зерттеулердің алғашқы нәтижелерімен бөлісті.​Экспедиция мүшесі, география ғылымдарының PhD докторы Нұрлыбек Бердібекұлы Зинабдин өңірдің тарихи жер-су атауларын зерттеудің ғылыми маңызы мен оларды картаға түсіру, жүйелеу бағытындағы жұмыстар жөнінде баяндады.Еркін пікір алмасу барысында қатысушылар тарихи жер-су атауларын сақтау, жүйелеу, ғылыми айналымға енгізу, тарихи атауларды цифрландыру және ономастикалық зерттеулерді одан әрі дамыту мәселелері бойынша өз ұсыныстары мен пікірлерін білдірді.​Айта кетейік, «Сыр даласында – көне есімдердің сыры» тарихи-танымдық ғылыми экспедициясы 2026 жылғы 19–26 шілде аралығында Қызылорда облысында өткізілуде. Экспедицияның негізгі мақсаты – Қазақстан Республикасының ономастикалық кеңістігін тарихи-диахрондық әдіс негізінде кешенді зерттеу, тарихи жер-су атауларын ғылыми тұрғыдан жүйелеу, ғылыми айналымға енгізу және ономастикалық қызметті заманауи ғылыми тәсілдер негізінде жетілдіруге үлес қосу.

Қызылордада «Сыр даласында – көне есімдердің сыры» экспедициясының зерттеу тобымен кездесу өтті

<a href="https://kyzylorda-news.kz/">Kyzylorda-news.kz</a> Бүгін Қызылорда облысының кәсіпкерлік және өнеркәсіп басқармасының басшысы Мөлдір Тәуіпбаева Париж қаласында өткен халықаралық көрмеге қатысқан өңір кәсіпкерлеріне облыс әкімі орынбасарының Алғыс хатын табыстады.Биыл мамыр айында Париж қаласында Еуропа қазақтарының құрылтайы аясында Қызылорда облысының 9 тауар өндірушісі өз өнімдерін халықаралық хауымдастыққа ұсынып, ұлттық өнімдердің сапасы мен ерекшелігін кеңінен таныстырды.Көрмеде «Абзал и К» толық серіктестігі күріш өнімдерін, «Аралтұз» АҚ табиғи ас тұзын, ЖК «Н. Қазбергенов» «Қазалы» кондитерлік өнімдерін, ЖК «М. Халиев» ұлттық құрт өнімдерін, «Aral Organic» кәсіпорны түйе сүтінен жасалған табиғи сабындарын, ЖК «Ж. Кушжанова» жантақ шайын, ЖК «Юсупова» ұлттық нақыштағы үйге арналған тоқыма бұйымдарын, ЖК «Светлана Цой» қолөнер бұйымдары мен сәндік аксессуарларын, сондай-ақ «Айман Абди» балалар сән үйі ұлттық нақыштағы ересектер мен балалар киімдерін таныстырды.Айта кету керек, халықаралық көрмеге қойылған жергілікті &nbsp;кәсіпкерлердің бірқатар өнімдері Қазақстан Республикасының Франциядағы Елшілігінде орналасқан музей экспозициясына қойылып, ұлттық брендтердің халықаралық деңгейде насихатталуына өз үлесін қосты.Кездесу барысында кәсіпкерлердің өңір экономикасын дамытуға, отандық өндірісті өркендетуге және ұлттық құндылықтарды халықаралық деңгейде дәріптеуге қосқан үлесі ерекше аталып өтті.Еліміздің басты Заңына деген құрметтің және құқықтық мемлекет қағидаттарын дәріптеудің белгісі ретінде марапат иелеріне Қазақстан Республикасы Конституциясының кітаптары табысталды.

Қызылордада өңірдің дамуына үлес қосқан кәсіпкерлер марапатталды

<a href="https://kyzylorda-news.kz/">Kyzylorda-news.kz</a> Қазалы аудандық сотында Қазақстан Республикасы Әкімшілік құқық бұзушылық туралы кодексінің 127-бабының 3-бөлігі бойынша әкімшілік құқық бұзушылық туралы іс қаралды.Сотта азаматшаның кәмелетке толмаған ұлының жүргізуші куәлігінсіз автокөлік басқарғаны және әкімшілік құқық бұзушылық жасағаны анықталды. Осылайша, анасы баласының қауіпсіздігін қамтамасыз ету және оны тиісінше тәрбиелеу жөніндегі міндеттерін орындамаған.Сот отырысында азаматша өз кінәсін толық мойындап, мұндай жағдайдың енді қайталанбайтынын мәлімдеді.Сот қаулысымен азаматша әкімшілік жауапкершілікке тартылып, оған 60 550 теңге мөлшерінде әкімшілік айыппұл салынды.Сурет: Нұрболат Нұржаубай&nbsp;

Қазалы ауданында кәмелетке толмаған ұлының әрекеті үшін анасы жауапқа тартылды

<a href="https://kyzylorda-news.kz/">Kyzylorda-news.kz</a> Қызылорда облысында «Өңірлік-ҚАРУ» республикалық жедел-профилактикалық іс-шарасы жалғасуда. Іс-шара Мемлекет басшысының «Заң және тәртіп» тұжырымдамасы аясында қарудың заңсыз айналымының жолын кесу және қоғамдық қауіпсіздікті қамтамасыз ету мақсатында өткізілуде.Сегіз күн ішінде өңірде 5704 қару иесі тексеріліп, қару айналымы саласында 51 әкімшілік құқық бұзушылық анықталды. Заңсыз айналымнан ішкі істер органдарында тіркелмеген 6 тегіс ұңғылы қару тәркіленді.Қаруды сақтау талаптарын бұзған 32 азамат, ал қаруды тасымалдау және тіркеу талаптарын сақтамаған 13 азамат әкімшілік жауапкершілікке тартылды.Қызылорда облысының Полиция департаменті азаматтарды қаруды сақтау, алып жүру, тасымалдау және тіркеу талаптарын қатаң сақтауға шақырып, профилактикалық жұмыстардың тұрақты түрде жалғасатынын хабарлады.Фото: polisia.kz

«Өңірлік-ҚАРУ»: Қызылордада заңсыз айналымнан 6 қару тәркіленді

<a href="https://kyzylorda-news.kz/">Kyzylorda-news.kz</a> Облыс әкімі Мұрат Ергешбаевтың төрағалығымен мәжіліс өтіп, аймақтағы қоғамдық-саяси ахуал, алдағы жылу беру маусымына дайындық мәселелері қаралды. Оған қала, аудан әкімдері мен басқарма басшылары қатысты.&nbsp;Жауапты маусымға әзірлік бекітілген іс-шара жоспарына сәйкес жүргізілуде. Оған 7,8 млрд.теңге қаржы жоспарланған. Бұл қаржыға 8,7 шақырым жылу желісін жаңғырту жобасы аяқталып, №1 және 2 газтурбиналық қондырғы, 1,3 шақырым жылу желісі, 1 қазандық, 1 турбина және 10 автономдық қазандық, негізгі және қосалқы қондырғылар жөнделеді. Бүгінде жұмыстың 68 пайызы орындалған.Мемлекет басшысының қолдауымен «Акса Энерджи» түрік компаниясы Қызылорда қаласында 240 МВт электр энергиясын және 277 Гкал жылу энергиясын өндіретін жылу-электр орталығын салды. Жоба бойынша қуатылығы 176 МВт 2 газ турбиналық қондырғы, 95 МВт бу турбинасы, қуаттылығы 120 тн/сағ 2 &nbsp;бу қазандығы мен 150 Гкал/сағ 4 &nbsp;жылу қазандығы орнатылған.Бүгінде жылу орталығы толық іске қосылып, 240 мегаватт электр энергиясы өндірілуде. Қуаттылығы 150 МВт 4 су жылыту қазандығы жұмыс істеп тұр. Алдағы жылу беру маусымында Қызылорда қаласының тұрғындары жаңа станция арқылы жылумен қамтамасыз етіледі.

Қазақстан және Қызылорда облысының жаңалықтары