<a href="https://kyzylorda-news.kz/">Kyzylorda-news.kz.</a> Қазақстанда коронавирус қаупіне байланысты қоғамдық іс-шаралар уақытша тоқтатылады. Бұл туралы ҚР Президенті Қасым-Жомарт Тоқаев&nbsp;<a href="https://twitter.com/TokayevKZ?ref_src=twsrc%5Egoogle%7Ctwcamp%5Eserp%7Ctwgr%5Eauthor">Twitter</a>-дегі парақшасында хабарлады.
<blockquote>
 «ДДСҰ коронавирусты пандемия деп жариялады. Үкімет арнайы алдын алу шараларын қолға алады. Қоғамдық іс-шаралар уақытша тоқтатылады. Азаматтар азық-түлікпен және ең қажетті тауарлармен үздіксіз қамтылады. Шағын және орта бизнес зардап шекпеуі тиіс. Ең бастысы – азаматтарымыздың денсаулығы. Біз қиыншылықтарды #Birge еңсереміз», – делінген хабарламада.
</blockquote>

Пандемияға байланысты Қазақстанда қоғамдық іс-шаралар тоқтатылады

Коронавирустың белгілері қандай?

Коронавирустан қалай қорғана аламыз?

Коронавирусқа қатысты жиі қойылатын сұрақтар

<a href="https://kyzylorda-news.kz/">Kyzylorda-news.kz.</a> Парламент Сенатының жалпы отырысында «ҚР Үкіметі мен РФ Үкіметі арасындағы «Байқоңыр» кешенін газбен жабдықтау туралы келісімді ратификациялау туралы» Заң қабылданды, деп хабарлайды <a href="https://lenta.inform.kz/kz/baykonyr-turgyndary-kolzhetimdi-ari-ekologiyalyk-taza-otynmen-kamtamasyz-etiledi_a3623956">ҚазАқпарат</a>.
«Байқоңыр» кешенін газбен жабдықтау туралы келісім 2019 жылғы сәуірде жасалды. Келісім «Байқоңыр» кешенін газбен қамтамасыз етудің құқықтық негіздерін айқындауға бағытталған және тұтынушыларды сұйытылған мұнай газынан табиғи газға көшіруді көздейді.
ҚР Энергетика министрі Нұрлан Ноғаевтың айтуынша, бұған дейін Байқоңыр қаласын газбен, яғни сұйытылған мұнай газы немесе пропан-бутанмен жабдықтау үшін ресейлік «Газовое хозяйство» кәсіпорны жауапты болған. Сұйытылған мұнай газының бағасы бір келісіне 343 теңге немесе текше метрге шаққанда 714 теңгені құрады.
<blockquote>
 «Үкіметаралық келісімге сәйкес, «ҚазТрансГаз Аймақ» АҚ-ға қала аумағында және «Байқоңыр» ғарыш айлағында табиғи газды өткізу құқығы беріледі. Осы қызмет ресейлік салық органдарында тіркелмей жүзеге асырылады. Бұл қосарланған салық салуға жол бермейді. Келісімде Байқоңыр қаласының аумағында табиғи газды бөлшек саудада өткізу бағасы Қызылорда облысының газ тұтынушылары үшін Қазақстанның монополияға қарсы органы белгілейтін бағаға сәйкес келуі тиіс деп бекітілген», – деді ведомство басшысы.
</blockquote>
Оның атап өтуінше, бүгінде Байқоңыр қаласы және Қызылорда облысындағы табиғи газдың бөлшек бағасы тұрғындар үшін қосымша құн салығын есептемегенде бір текше метрге 18,6 теңгені, заңды тұлғалар және бюджеттік ұйымдар үшін бір текше метрі 18,9 теңгені құрады.
«ҚазТрансГаз Аймақ» АҚ мен «Газовое хозяйство» кәсіпорнының бірлескен жұмысының нәтижелері бойынша қазіргі уақытта Байқоңыр қаласының барлық көпқабатты секторы, яғни 328 тұрғын үй, сондай-ақ 150 жеке үйдің 45-і табиғи газға қосылған.
<blockquote>
 «Осы келісім тұрғындар үшін коммуналдық қызмет шығындарын азайтуға мүмкіндік береді. Себебі сұйытылған газға қарағанда, табиғи газдың құны айтарлықтай арзан. Бұдан басқа, Байқоңыр қаласында газды бөлу инфрақұрылымы салыстырмалы түрде жаңа болып есептеледі», – деді Нұрлан Ноғаев.
</blockquote>

Байқоңыр тұрғындары қолжетімді әрі экологиялық таза отынмен қамтамасыз етіледі

<a href="https://kyzylorda-news.kz/">Kyzylorda-news.kz.</a> Қазалылық 83 жастағы желаяқ Аққоян Ырсалиев Түркия мемлекетінің Анталия қаласында өткен марафонның жеңімпазы атанды.
Халықаралық жарысқа жергілікті желаяқтармен бірге Франция, Германия және Қазақстан мемлекетінің 80-нен асқан спортшылары қатысты.
Жүгіруді жастайынан жанына серік еткен Аққоян Ырсалиев 1000-нан аса спортшылардың арасынан дара шығып, алтын медальді ұтып алды.

83 жастағы қазалылық желаяқ халықаралық марафонның жеңімпазы атанды

<a href="https://kyzylorda-news.kz/">Kyzylorda-news.kz.</a> Қызылорда облыстық полиция департаменті, Қызылорда қалалық полиция басқармасы мүдделі органдармен бірлесіп 2020 жылдың 11-15 наурыз аралығында «Қауіпсіз мектеп» жедел-алдын алу іс-шарасын өткізуде.
Іс-шараның негізгі мақсаты – кәмелетке толмағандар арасындағы құқық бұзушылықтардың алдын алу және жолын кесу, олардың жыныстық тиіспеушілігіне қолсұғушылық, қорқытып алушылық, қоғамға қарсы іс-әрекетке тарту, қоғамдық орындарда, жолдарда және бейтаныс адамдармен қауіпсіз жүріс-тұрыс қағидаларын оқыту.
Іс-шара аясында кәмелетке толмағандармен жасалатын әкімшілік құқық бұзушылықтар анықталмақ.

Қызылордада «Қауіпсіз мектеп» жедел алдын алу шарасы басталды

<a href="https://kyzylorda-news.kz/">Kyzylorda-news.kz.</a> Облыс әкімі Қ.Ысқақов Қармақшы ауданына жұмыс сапарымен барып, бірқатар нысандардың жұмысымен танысты.
Аймақ басшысы алдымен аудан аумағында орналасқан «Құрайлы» каналының күрделі жөндеу жұмыстарымен танысты.
Осы күнге дейін «Құрайлы» каналын қайыр басуына байланысты, ауданның егістік жерлеріне су жеткізу мәселесі қиындық тудыратын. Бүгінгі таңда құны 168 млн. теңгені құрайтын жоба сметалық құжаттары әзірленіп, «Қазсушар» РМК Қызылорда филиалы каналға механикалық тазалау жұмыстарын жүргізуде. Жоба бойынша 22 шақырым механикалық қазу жұмыстарын жүргізіп, 150 мың текше топырақ шығару көзделген.
Аймақ басшысы каналдың жөндеу жұмыстарын сапалы және шаруа қожалықтарымен бірігіп жүргізуді тапсырды.
<blockquote>
 ««Құрайлы» каналының механикалық тазалау жұмыстарынан кейін су өткізу қабілеті артып, аудан орталығындағы аяқ су мәселесін шешуге ықпалын тигізетін болады. Каналдың бойында 7,1 мың га егістік жерлер бар, оның ішінде күріш егісінің көлемі 6,4 мың га құрайды. Сол себепті тазалау жұмыстарына шаруа қожалықтарды да тарту керек. Бөлінген қаражат каналды толығымен тазартуға жетпеуі мүмкін. Бірігіп жұмыс жасалуын қадағалаңыздар», – деді облыс әкімі Қуанышбек Ысқақов.
</blockquote>
Мұнан кейін, Қуанышбек Досмайылұлы аудан орталығында орналасқан кварталішілік газ тарту жұмыстарының барысымен танысты.Жосалы кентінде
«Бейнеу-Бозой-Шымкент» магистралдық газ құбырынан 14,8 шақырым газ құбыры мен АГТС (автоматтандырылған газ тарату стансасы) 2017-2018 жылдары орнатылған болатын. 2019 жылдан бастап Жосалыда жалпы ұзындығы 160 шақырым құрайтын ішкі газдандыру жұмыстарының құрылысы жүргізілуде. Жоба 2020 жылдың қазан айында аяқталады деп жоспарлануда. Жобаның жалпы құны: 3&nbsp;292,2 млн.теңгені құрайды.
Облыстық энергетика және тұрғын үй-коммуналдық шаруашылық басқармасының басшысы Медет Усаин аудандағы газ жүргізу бойынша жұмыс барысын таныстырды.
<blockquote>
 «Жалпы 160 км газ құбырын жүргізу керекпіз. Қазір біз бірінші, екінші, үшінші ГРП-ларды орнатып қойдық. 2019 жылы республикалық бюджеттен 872 млн.тенге қаржы бөлінді. Бүгінгі таңда қаржы толық игеріліп, 87км газ құбыры жүргізілді. Көктемнің уақытында су көлемі көбейетін болғасын бірінші ГРП жанынан 10 км.газ құбырын жүргіздік. Биылғы жылға республикалық бюджеттен қаржы қаралып тұр. Бұл жұмыстар әрі қарай да жалғасын табады», – деді М.Усаин.
</blockquote>
Облыс әкімі «КазТрансГаз» АҚ аймақтық филиалымен келісіп, мамыр айында газ тарту жұмыстары аяқталған &nbsp;аудан бөлігіне көгілдір отын беруді тапсырды.
<blockquote>
 «Мамыр айындағы атаулы мерекелер қарсаңында &nbsp;Қармақшы және Сырдария ауданы тұрғындарының бір бөлігіне газ беру мәселелсін шешіңіздер. Жалпы жоспарланған үш ауданға көгілдір отын күзге дейін толық берілуі керек.», – деді облыс әкімі Қуанышбек Ысқақов.
</blockquote>
Сонымен қатар, аймақ басшысы Қ.Ысқақов Қармақшы аудандық электр тарату торабының және Қармақшы аудандық аграрлы-техникалық колледжінің жұмысымен танысты.
Айта кетейік, «Жосалы 220/35/10 кВ» қосалқы стансасын реконструкциялау жұмыстары 2019 жылы басталған болатын. Бүгінгі күні суға арналған резервуар, ашық тарату құрылғының ғимараты салынды. 2020 жылға қуаты 25 МВА 220/35/10 кВ трансформатор, 6,3 МВА 35/10 кВ трансформатор орнатылып, 220 кВ, 35 кВ тарату құрылысы жүргізіледі деп күтілуде. Жалпы электр тарату торабының жөндеу жұмыстары 2020 жылдың 2 тоқсанында аяқталады деп жоспарлануда.
Сондай-ақ, өткен жылы «Ауыл-Ел бесігі» бағдарламасы аясында 429,7 млн. теңге бөлініп, «Қармақшы аграрлық-техникалық колледжі» ғимаратына күрделі жөндеу жұмыстары жүргізілді.Бүгінгі күні оқу процесі үздіксіз жүргізілуде.
Мұнан бөлек, аймақ басшысы&nbsp; ІІІ Интернационал ауылындағы “Абай-Дәулет” &nbsp;ЖШС қарасты егіс алқабында болды. Онда қазір бидай егу жұмыстары жүргізілуде. Облыс әкімі Қуанышбек Ысқақов шаруашылық иелерінің жаңа бастамаларына сәттілік тілеп, әрқашан қолдау көрсетуге дайын екенін айтты.
<img src="https://kyzylorda-news.kz/wp-content/uploads/2020/03/03-15.jpg" alt="" />
<img src="https://kyzylorda-news.kz/wp-content/uploads/2020/03/04-6.jpg" alt="" />
<img src="https://kyzylorda-news.kz/wp-content/uploads/2020/03/05-4.jpg" alt="" />
<img src="https://kyzylorda-news.kz/wp-content/uploads/2020/03/06-3.jpg" alt="" />

Қармақшы ауданының орталығы  биыл көгілдір отынға қосылады

<a href="https://kyzylorda-news.kz/">Kyzylorda-news.kz.</a> Қызылорда қаласының әкімі Нұрлыбек Нәлібаев қалалық жастар ресурстық орталығында арнайы еріктілермен кездесті.
Алдымен жастар орталығының алаңында “Жас Сарбаз” Республикалық қоғамдастық әскери-патриоттық қозғалысының Қызылорда облыстық жетекшісі Айдос Қожамұратов рапорт беруден бастады. Осы клубтың мүшелері АК-74 қаруын бөлшектеп жинап, бүгінге дейін игерген әдістерін көретті. Облыс көлемінде құрылғанына 1 жылға жуықтаған бұл клубта қала бойынша 54 мектептен 1500-ге жуық жас сарбаздар мүше болып табылады.
Одан әрі “Qosyl” қалалық жастар ресурстық орталығының директоры Кеңшілік Сабыржан қозғалыстың жұмысымен, жастар орталығының базасында воллейбол, workout алаңымен, кеңес беру бөлмесімен, волонтерлік ұйымдардың қызметі және жастар ресурстық орталығының жоспарымен кең көлемде таныстырды.
<blockquote>
 «Негізінен қалада Еріктілер жылы жарияланбай тұрып, 5 жылға жуық уақытта осы бағыттағы жобаларды қала көлемінде жүзеге асырып келе жатқан ұйымдар бұрыннан бар. Олар мерекелер қарсаңында қариялардың үйін тазалап немесе әлеуметтік көмекке мұқтаж отбасыларға азық-түлік апарумен шектеліп қалмайды», – деді орталық директоры.
</blockquote>
Мерзімінен ерте туылған балаларға тоқыма киімдер тоқитын «28 ілмек» еріктілер клубы. Клуб жетекшісі&nbsp; Айгерім Нұрлан ерте туылған балаларға тоқыма киімдер тігуді бүгінде Қызылорда қаласында қолға алып отыр. Шала туылған сәбилердің салмағы 500 грамнан басталып, екі келіге дейін жетеді­. Қалалық перзентxана мен облыстық ана мен бала орталығынан олардың жұмыстарына сұраныс жоғары. Мұнда еріктілер бас қосады. Тоқыма білмейтіндерге клуб мүшелері үйретеді. Барлығы тегін. Мерзімінен ерте туылған нәрестелерге тоқыма киімдерін тоқып, көмек&nbsp; көрсететін еріктілер ұйымы еліміздің 13 қаласында бар.
<blockquote>
 «Топтың мақсаты өзгеге көмек қолын созуда бірреттік емес жүйелі түрде жұмыстар жүргізу. Бұл үш жақты келісім бойынша жүзе асады. «Әлім сізбен әдемі» жобасы. Жоба аясында Қызылорда қаламыздағы «Талсуат» оңалту орталығындағы ем алушыларға сұлулық салон қызметтерін тегін ұсыну. 50 аса ем алушыларға шаштарын қысқарту, тырнақтарын сәндеу және т.б жұмыстар жүргізілді.&nbsp; Алдағы уақытта осы жоба «Атамекен» балалар ауылы,&nbsp; «Аналар үйі», «Қарттар үйі», «Талсуат балалар оңалту орталықтарында өткізу жоспарлануда. Сонымен қатар қаламыздағы беделді сұлулық слаондармен келісімдер жүргізіліп жатыр», – дейді «Қызылорда қайырымды жандар» волонтерлер тобының жектешісі Айгерім Әмірхан.
</blockquote>
Екінші жоба «Озат»&nbsp; ойлы, зерделі, алғыр, таланттар жобасы. Көп балалы отбасынан және аз қамтамасыз етілген отбасылардың&nbsp; балалары мен мектеп оқушылары қамтылатын болады. Қаламыздағы үйірмелер, клубтар, білім беру орталықтары және т.б. орталықтармен келіссөздер жүргізіп осы отбасылардан шыққан балаларды тегін қатыстыру.
Сонымен қатар ресупбликамызда 209 жастар ресурстық орталығы жұмыс жасайды, және тек 5 аймақта ғана орталықтарға атау берілгенін атап өтті. Оның бірі қаламыздағы «QOSYL» қалалық жастар ресурстық орталығы. Орталық директоры Кеңшілік Сабыржан «QOSYL» деп аталуының мақсаттары мен және орталықтың алдағы жоспарлармен таныстырды. Орталық 4 бағыт бойынша жұмыс жасайтын болады.
Біріншісі – бос уақытты тиімді ұйымдастыру, екіншісі – NEET санатындағы жастармен жұмыс, үшіншісі – суицид пен құқық бұзушылықтың алдын алу, соңғысы – жастарға ONLINE кеңес беру жұмыстары.
<blockquote>
 «Биылғы &nbsp;Еріктілер жылында да қала жастары үшін үлкен жоспарлар бар. Түрлі бағыттағы 12 әлеуметтік жоба жүзеге асырылатын болады. Қазірдің өзінде, қалалық жастар ресурстық орталығы тарапынан «Birgemiz» еріктілер корпусы» арнайы жобасы бастау алып, ерікті жастардың базасы құрылуда. Бірақ, волонтер болу немесе елінің мүддесі үшін ерікті еңбек ету тек жастарға тиесілі міндет емес. Бұл баршамызға ортақ ұстаным, еш міндеттеусіз қолға алынуы тиіс ерікті ұғым болуы керек. Кез келген елдің дамуы үшін әрбір саламен қатар, сол елдің әрбір азаматының тынымды тірлігі, мызғымасы бірлігі және шынайы өз отанына деген жанашырлығы маңызды. Сол себепті, биылғы жылы еріктілік пен белсенділіктің үлгісін танытып жүрген жерлестеріміз үшін көктем айларынан бастап арнайы байқау жариялауды жоспарлап отырмыз. Яғни, жыл көлемінде түрлі бағытта қаламыздың өсіп-өркендеуі мен көркеюіне ерекше атсалысқан жерлестерімізді анықтап, жыл соңында еңбегіне алғыс білдіріп, лайықты демалыс сыйлау үшін &nbsp;шет елге жолдама табыстаймыз. Шет елге жолдама берудің негізгі себебі – қала мәдениетін дамыту, қоғамды дамытудағы халықтың жауапкершілігін арттыру, қоршаған ортаны көркейту және көгалдандыру бағытында дамыған елдердің жақсы азаматтық бастамалары мен қала тіршілігі үшін қажетті тың идеяларын алып келіп, қала көлемінде оны жүзеге асыруға жағдай жасау. Алдағы уақытта біз Сіздермен бірлесіп ел игілігі жолында талай жаңа жобаларды жүзеге асырамыз»,&nbsp; – деді қала әкімі Нұрлыбек Нәлібаев.
</blockquote>
Кездесу соңында Қалалық жастар ресурстық орталығының директоры қала әкіміне еріктілердің атынан “Қызылорда қаласы волонтерларының жанашыры” статуеткасын табыстады
<img src="https://kyzylorda-news.kz/wp-content/uploads/2020/03/02-27.jpg" alt="" />
<img src="https://kyzylorda-news.kz/wp-content/uploads/2020/03/03-14.jpg" alt="" />

Қызылорда қаласының әкімі еріктілермен кездесті

Оқыған: <a href="https://www.facebook.com/profile.php?id=100046759452246">Фариза ОМАРОВА</a>
Осы ақылды кім үйренеді, насихатты кім тыңдайды?Біреу – болыс, біреу – би. Олардың ақыл үйренейін, насихат тыңдайын деген ойы болса, ол орынға сайланып та жүрмес еді. Олар өздері де үздік кісіміз, өздеріміз біреуге үлгі беріп, ақыл айтарлықпыз деп сайланды. Өздері түзеліп жеткен, енді елді түзерлігі-ақ қалған. Ол не қылып тыңдасын және тыңдайын десе де, қолы тие ме? Басында өзіндік жұмысы бар: ұлығымызға жазалы болып қаламыз ба, елдегі бұзақыларымызды бүлдіріп аламыз ба, немесе халқымызды бүлдіріп аламыз ба, яки өзіміз шығымдап, шығынымызды толтыра алмай қаламыз ба? – деген ебіне қарай біреуді жетілтейін деп, біреуді құтылтайын деген бейнетінің бәрі басында, қолы тимейді.
Байлар, олар өздері де бір күн болса да, дәулет қонып, дүниенің жарымы басында тұр. Өзінде жоқты малыменен сатып алады. Көңілдері көкте, көздері аспанда, адалдық, адамдық, ақыл, ғылым, білім – ешнәрсе малдан қымбат демейді. Мал болса, құдай тағаланы да паралап алса болады дейді. Оның діні, құдайы, халқы, жұрты, білімі, ұяты, ары, жақыны – бәрі мал. Сөзді қайтіп ұқсын, ұғайын десе де, қолы тие ме? Ол малды суармақ, тойғызбақ; саудасын жиғызбақ, күзеттірмек, бақтырмақ, ұры-бөрі, қыс, суық-сұғанақ – солардан сақтанбақ, солардан сақтарлық кісі таппақ. Оның бәрін жайғастырып, аяғын алып келіп мақтанға орналастырғанша қашан? Қолы тимейді.
Енді ұры-залым, сұм-сұрқия өздері де тыңдамайды.
Онша-мұнша қой жүнді қоңыршалар күнін де көре алмай жүр. Аналар анадай болып тұрғанда, білім, ғылым, ақылды не қылсын? Және де білім, ғылым кедейге керегі жоқтай-ақ: «Бізді не қыласың, ана сөзді ұғарлықтарға айт!» дейді. Оның өзгеменен ісі жоқ, ана алдындағы үшеуіндей болған жанның ойында ешбір қайғысы, мұңы болмаса керек.

Абай Құнанбайұлының сегізінші қара сөзі

Бүкіләлемдік киберцензураға қарсылық күні
Алғаш рет 2008 жылы атап өтілген. «Шекарасыз тілшілер» және «Халықаралық рақымшылық» үкіметтік емес ұйымдарының бастамасымен бекітілген.
Күн-Жер күні
Күн-Жер күні деген мереке бар екенін дүйім жұрт біле бермейді. Ол 2000 жылдан бастап атап өтіледі. Бұл мерекені АҚШ-тың Ұлттық әуеде ұшу және ғарыш кеңістігін зерттеу басқармасы (NASA) мен Еуропа ғарыш агенттігі (ESA) бекітті. Ол адамдарға ғарышта болып жатқан оқиғалар жайлы көбірек ақпарат беру мақсатында күнтізбеге енгізілген.
1993 жылы&nbsp;тәуелсіз Қазақстанның тарихында алғаш рет Алматы-Шарджа (БАӘ) бағытында авиарейс ұшырылды. Бортта 90 адам болды, Төрт жарым сағаттан кейін ұшақ Шарджаға келіп қонды.
1999 жылы&nbsp;Каирде (Египет) Қазақстан елшілігі орналасқан көшеге Абай есімі берілді.
2010 жылы&nbsp;Будапештте өткен министрлер форумы мәжілісі барысында Қазақстан Болон процесіне қосылды.
Қазақстанның қосылуы туралы шешімді Болон декларациясына қол қойған 46 елдің өкілдері бірауыздан қолдады. Болон үдерісіне қосылу қазақстандық жоғары оқу орындарына отандық білім беру бағдарламаларын еуропалық стандарттарға сәйкестендіру, қазақстандық біліктіліктер мен академиялық сатыларды тану, студенттер мен оқытушылардың академиялық икемділігін қамтамасыз ету, қазақстандық дипломдардың Еуропада танылуы және түлектердің шетелде жұмысқа тұру мүмкіндіктерін кеңейту сияқты бірқатар басымдықтар береді.
2017 жылы&nbsp;Бүкіләлемдік бокс кеңесінің (WBC) белбеуінде Геннадий Головкин мен Қазақстан туы бейнеленді. Белбеуде бокс тарихына есімдерін алтын әріппен жазып қалдырған ұлы чемпиондар: Мұхаммед Әли, Майк Тайсон, Леннокс Льюис, Рэй Леонард, Роберто Дюран, Хулио Сезар Чавес, Ларри Холмс, Виталий Кличко, Марвин Хаглер, Томми Хернс, Оскар де Ла Хойя мен Флойд Мэйвезер бар.

12 наурыз: Атаулы күндер мен оқиғалар

<a href="https://kyzylorda-news.kz/">Kyzylorda-news.kz</a> ақпараттық агенттігінің 12 наурызға арналған жұлдыз-жорамалы.
Тоқты
Пайдалы істермен айналысасыз. Маңызды тапсырмаларды тез орындап, сонан соң келесі мақсатыңызға қадам басасыз. Жақындарыңыз көп көмектеседі.
Торпақ
Нақты шешім қабылдай біліңіз. Табысқа жетуге мүмкіндік туып тұр. Сол мүмкіндікті жіберіп алмаңыз. Тек өзіңізге сеніңіз.
Егіздер
Қандай іспен айналыссаңыз да, мықты тәжірибе керек екенін ұғасыз. Сонымен қатар жұмысқа немқұрайлы қарамыңыз. Әріптестеріңізбен тіл табысыңыз.
Шаян
Өте сәтті күн. Жұмыста табысқа жетуге, сондай-ақ айналаңыздағы адамдармен тіл табысуға мүмкіндік бар. Жол сапарға шығуға қолайлы күн.
Арыстан
Түске дейін әрбір басқан қадамыңызға абай болыңыз. Кез келген уақытта, кез келген істе қателік жіберуіңіз мүмкін.
Бикеш
Күннің алғашқы жартысында қызықты мүмкіндіктер туындап, жұмысыңыз алға басады. Өз кәсібіңізді кеңейтіп, жұмыс ауқымы да көбейеді.
Таразы
Жемісті күн. Бойыңызда энергияңыз тасып, барлық мәселенің шешімін табасыз. Жұмысыңыз алға басып, өз мақсатыңызға жетесіз.
Сарышаян
Сабырлы болыңыз. Көптен бері ойда жүрген жоспарды қолға алып, сол бойынша жұмыс жасайсыз. Қызықты ұсыныстар түсуі мүмкін.
Мерген
Өзгеге де, өзіңізге де пайдалы іспен айналысасыз. Өз жоспарыңызды жүзеге асырып, көпшілік сіздің ізіңізді басатын болады.
Тауешкі
Асықпаңыз. Ұсақ-түйекке көңіл бөлмеңіз. Жүйкеңізді жұқартып, өзіңізді шаршатудың қажеті жоқ. Жақындарыңызбен әңгімелесіңіз.
Суқұйғыш
Жемісті күн. Көптен бері ойыңызда жүрген, біраз уақыттан бері басыңызды «қатырған» тапсырманы орындайсыз.
Балықтар
Жаңа идеялар пайда болады. Оларды жүзеге асыру үшін сізге көмек қажет. Жақын адамдарыңыздан тосынсый аласыз.

Қазақстан және Қызылорда облысының жаңалықтары