<a href="https://kyzylorda-news.kz/">Kyzylorda-news.kz.</a> Қызылорда облысындағы 802,3 мың тұрғынның, 471 мыңы, яғни (58,8%) осы 15 категорияға жатады. Өңірде 21 520 тұрғын өз статустарын әлі анықтаған жоқ. Ең қысқа мерзімде аталған тұрғындардың статусын анықтап, жұмысты жүйелендіру керек.
Бұл туралы Өңірлік коммуникациялар қызметінің ұйымдастыруымен өткен баспасөз конференциясында «Әлеуметтік медициналық сақтандыру қоры» КЕАҚ басқарма төрағасының орынбасары Эрик Байжүнүсов мәлімдеді.
<blockquote>
 «2017 жылдың 1 шілдесінен 2020 жылдың 31 қаңтарына дейін әлеуметтік медициналық сақтандыру қорына қызылордалықтар 7,6 млрд теңге қаржы түсірді. Бұл қаржы тұрғындардың денсаулығын сақтауда емдеу ұйымдарына беріліп, сапалы медициналық көмек алуға жұмсалады. Негізінен «әлеуметтік медициналық сақтандыру» деп аты айтып тұрғандай, ең бірінші кезекте әлеуметтік жағдайға баса назар аударылады. Емдеу ұйымдары арасында бәсекелестік орта қалыптасып, әрбір тұрғын қолжетімді медициналық көмекке жүгіне алады. Сондай-ақ медицина қызметкерлерінің еңбекақысының өсуіне жағдай туғызылады» – деді Эрик Байжүнүсов.
 «Біздің қазіргі мақсатымыз – әрбір емдеу ұйымының жұмысымен танысып, қажеттіліктерін анықтау. Қосымша ұсыныстарды қарап, медициналық құжаттамаларға электронды толықтырулар жасауды басшылыққа алып отырмыз. Осы уақытқа дейін, Қызылорда облысының солтүстікте орналасқан 3 ауданында болып, тиісті жұмыстардың жүргізілуін көзбен көріп келеміз. Сонымен қатар министрлікке күнделікті ұсыныстарды баяндап отырмыз» – деді ҚР ДСМ Жұртшылықпен байланыс департаменті директоры Ілияс Бакиров.
</blockquote>
Мұнан өзге, 2020 жылы Қызылорда облысы денсаулық сақтау саласына 57 млрд теңгеден астам қаржы бөлініп, медициналық көмектің көлемі 25% артып отыр. Соның ішінде, кеңес беру -диагностикалық қызметтер көлемі 6 есеге, стационарды алмастырушы көмек 85%, қалпына келтіру және медициналық оңалту 13 есеге, паллиативті көмек және мейірбике күтімі 2,6 болса, онкогематология 2,4 есеге артты.
Қазіргі уақытта ел тұрғындарының 90% астам (17 млн адам) міндетті әлеуметтік медициналық сақтандыруға қатысушы болып тіркелді. Оның ішінде 11 млн тұрғын – 15 жеңілдетілген азаматтар категориясына кіреді. Бұл – азаматтар үшін мемлекет төлем жасайды.
<img src="https://kyzylorda-news.kz/wp-content/uploads/2020/02/25mams2.jpg" alt="" />

МӘМС: Қызылордада 21 520 тұрғын өз статустарын әлі анықтаған жоқ

<a href="https://kyzylorda-news.kz/">Kyzylorda-news.kz.</a> Қазақстан коронавирус тараған бірқатар елмен әуе қатынасын уақытша тоқтату немесе шектеу мүмкіндігін қарастыруда. Бұл туралы брифингте индустрия және инфрақұрылымдық даму министрлігі азаматтық авиация комитетінің басшысы Талғат Ластаев мәлімдеді, деп хабарлайды <a href="https://sputniknews.kz/society/20200225/12927772/Kazakhstan-aue-katynasy.html">Sputnik Қазақстан</a>.
<blockquote>
 «Қазір бірінші санатқа (науқастар саны бойынша) жататын мемлекеттерге рейстерді шектеу мүмкіндігі қарастырылып жатыр. Бұл Оңтүстік Корея, оңтүстік-шығыс Азия елдері. Толық тізімді денсаулық сақтау министрлігі бекітеді», – деді Талғат Ластаев.
</blockquote>
Бұған дейін Қазақстанның бас санитар дәрігерінің қаулысы шыққан болатын. Оған сәйкес, бірінші санатқа науқастар саны он адамнан асатын мемлекеттер жатқызылды.
Қазіргі таңда Қытайдан тыс жерде ең көп науқас тіркелген елдер: Оңтүстік Корея – 893, Жапония – 851 (олардың 691-і – Diamond Princess круиздік лайнерінің жолаушылары мен экипаж мүшелері), Италия – 229, Сингапур – 90, Иран – 61, АҚШ – 53, Таиланд – 35, Австралия және Малайзия – 22 адамнан бар.

Қазақстан бірқатар елмен әуе қатынасын шектейді

<a href="https://kyzylorda-news.kz/">Kyzylorda-news.kz.</a> Елімізде ұлы ақын Абай Құнанбайұлының 175 жылдық мерейтойын жоғары деңгейде мерекелеу туралы Президент Жарлығы шығып, жалпыреспубликалық жоспар бекітілді. Соған сәйкес ел көлемінде елеулі мәдени шаралар өткізілуде.
Абайды танып-білу, данышпанның дүниетанымына үңілу – бар қазақтың мақсаты болмақ. Осыған орай, Арал аудандық мәдениет үйінде қазақтың бас ақыны, ағартушы, композитор Абай Құнанбаевтың 175 жылдық мерейтойының аудандағы салтанатты ашылуы өтті.&nbsp;
Шараға қатысушыларға алдымен ақынның өмірі мен шығармашылығы жайлы кітап көрмесі таныстырылды.
<blockquote>
 &nbsp;«Ұлы Абайдың 175 жылдығы – маңызды саяси шаралардың бірі. Абай дүниетанымы – ұлттың рухани игілігі. Сондықтан да, ішкі түйсік пен ой-өрісімізді дамытуда Абайды айналып өту мүмкін емес. Ақынның мерейтойы өнегелі, өміршең жобалармен есте қалары анық. Дүйім ел, тұтас ұрпақ буыны үшін тағылымды маңызы зор, тәрбиелік мәні жоғары осындай шаралар бүгінгі буынның Отаншылдық рухына дем беріп, ұлтты ұйыстыратын, жасампаз істерге жұмылдыратын рухани маңызы зор мәдени мұраға айналуына тілектеспін»- деп лебізін білдірді аудан әкімі Мұхтар Оразбаев.
</blockquote>
Шара барысында көркем сөз бен ойлы өлеңнің реформаторы, жаңа замандағы жазба әдебиеттің негізін қалаушы Абай Құнанбаевтың жастық шағы жайлы театрландырылған қойылымдар мен ақын бейнесі сомдалған көріністер көпшілік назарына ұсынылды. Сонымен қатар, мектеп оқушылары Абайдың ақындық мұрасына қосылған бағалы қазынасы – қара сөздерін, философиялық ой-толғаныстары мен өлеңдерін нақышына келтіре орындады.
Мерекелік шарада ақынның халыққа танымал «Айттым сәлем Қаламқас», «Желсіз түнде жарық ай», «Сегізаяқ», «Жарқ етпес қара көңілім» сынды әндері аудан өнерпаздарының орындауында айтылып, жырлары Сыр мақамдарына келтіріліп шырқалды.
<img src="https://kyzylorda-news.kz/wp-content/uploads/2020/02/25aralabaidyn2.jpg" alt="" />
<img src="https://kyzylorda-news.kz/wp-content/uploads/2020/02/25aralabaidyn3.jpg" alt="" />
<img src="https://kyzylorda-news.kz/wp-content/uploads/2020/02/25aralabaidyn4.jpg" alt="" />
<img src="https://kyzylorda-news.kz/wp-content/uploads/2020/02/25aralabaidyn5.jpg" alt="" />

Аралда Абайдың 175 жылдығына орай салтанатты кеш өтті

<a href="https://kyzylorda-news.kz/">Kyzylorda-news.kz.</a> Қармақшы ауданы әкімдігінде облыстық статистика департаментінің жауапты қызметкерлерінің қатысуымен семинар кеңес өтті.
Семинар кеңеске Қызылорда облыстық статистика департаменті басшысының орынбасары Г.Нұрқабылова және департаменттің түрлі бағыттағы басқарма басшылары қатысты.
Аудан әкімі Мұса Қалдарбековтың төрағалығымен өткен семинар кеңес барысында статистикалық есептерді тапсыру және нәтижелерін шығару, есептілікті тапсырудың оңтайлы жолдарын шешу, алдағы уақытта атқарылатын жұмыстарды жоспарлау туралы сауалдар қойылып, қатысушылардың ұсыныс пікірлері тыңдалды.&nbsp;
Еркін форматта ұйымдастырылған шарада облыстан келген жауапты қызметкерлерге мекемелердің басшылары мен ауылдық округ әкімдері өздерінің сауалдарын қойып, жұмыспен қамту, кәсіпкерлік бағытындағы көрсеткіштерді статистикалық көрсеткіштерімен салыстыру жайлы маңызды мәселелер сараланды.
Ауданымыздың даму жоспарын айқындау және болжамдар мен талдау жүргізу барысында статистикалық көрсеткіштер маңызды орын алады.
Семинар кеңесте қатысушылар тарапынан қойылған сұрақтарға жауап берген облыстан келген мамандар статистика органдарымен жүйелі түрде байланыс орнатып салыстырып отыру қажеттілігі туралы мағлұматтар берілді.
<img src="https://kyzylorda-news.kz/wp-content/uploads/2020/02/25karmakshy2.jpg" alt="" />

Қармақшыда статистика департаменті қызметкерлері семинар кеңес өткізді

<a href="https://kyzylorda-news.kz/">Kyzylorda-news.kz.</a> Халықаралық Аралды құтқару қорының атқарушы дирекциясының ұйымдастыруымен балық ресурстарына ұқыпты қарауды көрсету мақсатында “Aral Fish” мұз астынан қысқы балық аулау турнирі өткізілді.
Турнирдің ашылу салтанатына аудан әкімінің орынбасары Жәнібек Жұбанов қатысып, жарысты өткізудің тиімді тұстарына тоқталып, қатысушыларға сәттілік тіледі. Одан соң Халықаралық Аралды құтқару қорының атқарушы дирекциясының директоры Болат Бекнияз сөз&nbsp;алып, сайыстың мақсаты мен ережелерін түсіндіріп өтті.
Турнирге Қызылорда, Байқоңыр, Арал қалаларынан барлығы 18 команда құрамында 100-ге жуық әуесқой балық аулаушылар қатысты.
Іс-шара барысында командалық және жекелей сынақ бойынша және «Жарыстың ең жас қатысушысы» «Жарыстың ең тәжірибелі қатысушысы», «Ең жылдам мұз қазушы» номинациялары бойынша жеңімпаздар анықталды. Cайыс қорытындысы бойынша жеңімпаздар мен жүлдегерлерге кубоктар мен арнайы медальдар табысталды.
Командалық сайыс қорытындысы бойынша жүлделі орынды I орынды «Зенит» командасы жеңіп алды. Жүлделі II орынды «Живцы» командасы иеленсе, III орынға «Рыболовные воиска» командасы ие болды.
<img src="https://kyzylorda-news.kz/wp-content/uploads/2020/02/25atalmuzdan2.jpg" alt="" />
<img src="https://kyzylorda-news.kz/wp-content/uploads/2020/02/25atalmuzdan3.jpg" alt="" />
<img src="https://kyzylorda-news.kz/wp-content/uploads/2020/02/25atalmuzdan4.jpg" alt="" />
<img src="https://kyzylorda-news.kz/wp-content/uploads/2020/02/25atalmuzdan5.jpg" alt="" />

Аралда мұз астынан балық аулау турнирі өтті

<a href="https://kyzylorda-news.kz/">Kyzylorda-news.kz.</a> Арал ауданының айнасына айналған “Толқын” газетіне 90 жыл толуына орай шығармашылық байқау ұйымдастырылып жатқанын хабарлаймыз. Байқау мақсаты мен шарттары төмендегідей:
Байқаудың мақсаты: Ауданның тоқсан жылдық шежіресіне айналған төл басылым бүгінге дейін редакция мен оқырман арасындағы байланысты үзбей келеді. Газеттің биылғы мерейлі межесіне орай осы үрдісті одан әрі жандандыруды мақсат еткен басылым шығармашылық байқау ұйымдастырып отыр. Газет қашан да оқырманымен құнды. Осы алтын көпірді әрқашан жалғап тұратын шығармашылық екенін негізгі назарға ұстаймыз.
Байқау шарттары: Байқауды әртүрлі жастағы әрі түрлі саладағы оқырмандарымызға ыңғайлы ету мақсатында Әңгіме жанры бойынша жариялап отырмыз. Яғни біздің кез келген оқырман бұл байқауға қатыса алады. Байқауға қатысушы әңгіме тақырыбын өзі таңдайды.Редакцияға келіп түскен әрбір хат (әңгіме) арнайы комиссияның сараптауынан өтеді. Сондай-ақ келіп түскен әңгімелердің газет бетіне жарамдысы жыл көлемінде газетімізге жарияланып отырады. Байқау жеңімпаздарын шығармашылық өкілдерінен құрылған арнайы комиссия анықтайтын болады. Жеңімпаздар «Толқын» газетінің 90 жылдығына орай қараша айында өтетін салтанатты шарада арнайы бағалы сыйлықтармен марапатталады.
Ескертпе: Қатысушы байқауға ұсынған әңгімесінің жоғарғы жағына «Толқын» газетінің 90 жылдығы үшін»деген арнайы айдарды белгілеп жіберуі тиіс. Сондай-ақ әңгіменің көлемі 8-9 беттен аспауы тиіс. Жеңімпаздарды анықтауда байқауға ұсынылатын шығарманың тақырыбы, көркемдік ерекшелігі, жазу стилі мен шығарма мазмұнының әлеуметтік-қоғамдық маңызы ерекше назарға алынатынын ескертеміз. Сонымен бірге әңгіме авторы өзі туралы мәліметті толық көрсетуі керек (аты-жөні, қызметі, тұрғылықты мекен жайы, байланыс телефоны). (Шығарма 14 шрифт, Times New Roman нұсқасында қабылданады.)
Хаттарды <a href="https://e.mail.ru/compose/?mailto=mailto%3Atolkyn_gazeta@mail.ru">tolkyn_gazeta@mail.ru</a> электронды поштасына жіберуге немесе редакция мекен жайына (Арал қаласы, Қарасақал Ерімбет көшесі №66 үй) әкеліп тапсыруға болады.
Байланыс телефоны:
2-14-50, 2-29-91

«Толқын» газетінің 90 жылдығына орай шығармашылық байқау ұйымдастырылып жатыр

<a href="https://kyzylorda-news.kz/">Kyzylorda-news.kz.</a> Қазалы аудандық жастар ресурстық орталығы тұрғындар үшін тиімді шараны қолға алды.
Аудан тұрғындары алдағы уақытта ресурстық орталықтан тегін құқықтық кеңес алып, заңгердің көмегіне жүгіне алады. Келушілерге орталық заңгері апта бойы қызмет көрсетуге дайын.
Жастар ресурстық орталығының мекен-жайы: Қ.Пірімов көшесі №5, (Әйтеке би кенті әкімдігі, 2 қабат).
Байланыс телефондары: 8 (724 38) 79-2-14, 22-2-54.

Қазалылық заңгерлер тегін кеңес береді

<a href="https://kyzylorda-news.kz/">Kyzylorda-news.kz.</a> “Азаматтық алаң” бірінші отырысы аясында ұлттық Наурыз мерекесінің жаңа тұжырымдамасы ұсынылды. Ол тақырыптық іс-шаралардың тоғызкүндік циклін қамтиды, деп хабарлайды <a href="https://baq.kz/news/othernews/nauryz-meyramy/">BAQ.KZ</a>.
Қазақстандық “Рухани жаңғыру” қоғамдық даму институтының сарапшылары Наурыз мерекесін өткізудің жаңа тәсілдерін ұсынды. Атап айтқанда, ҚҚДИ басқармасының төрағасы Кемелбек Ойшыбаев 14-22 наурыз аралығында мерекелік іс-шараларды өткізу регламентін ұсынды. Оның айтуынша, Наурыз мейрамы ұлттық бірлік пен отбасылық дәстүрлер мен құндылықтарды нығайтуға бағытталған.
Сонымен, сарапшылар күн сайын ерекше маңызы бар мереке тұжырымдамасын қарауды ұсынды:
14 наурыз – Көрісу күні;
15 наурыз – Шежіре күні;
16 наурыз – Жайлау күні;
17 наурыз – Дархандық күні;
18 наурыз – Шымырлық пен шеберлік күні;
19 наурыз – Зияткерлік күні;
20 наурыз – Жоралғы күні;
21 наурыз – Ұлттық тағамдар күні;
22 наурыз – Бұқара күні.
“Азаматтық алаң” алаңына қатысушылар өз пікірлерін белсенді айтты, нәтижесінде ҚР ақпарат және қоғамдық даму вице-министрі Ғабидулла Оспанқұлов әрбір ұсынысты қарастыруға уәде берді.
“Рухани жаңғыру” бағдарламасының амбассадоры, ұлттық тағамдар бойынша сарапшы Әйгерім Мұсағажинова Наурыз мейрамы маңызды рөл атқаратын мәдени мұра мәртебесін арттыру қажеттігін атап өтті.
Л. Н. Гумилев атындағы Еуразия ұлттық университетінің професоры Ерлан Арын мейрамды жаппай жеңілдіктер мен жалақыны мерзімінен бұрын беру, жәрменкелер өткізуді ұсынды.
<blockquote>
 «Жаңа формат деп жатырмыз ғой. Жаңа формат ол әбден үйреніп алған қантар айында басе құру. Сол айда,бәрі жерде әсіресе батыс мемлекеттерінде міндетті түрде балаларға сыйлық беріледі және желтоқсан айына жеткізбей жалақыларын, премияларын береді. Сондықтан осы мәселе әсіресе үлкен мекемелерде қолға алынса дейміз. Жалпы той ретінде ұйымдастыру керек. Менің ойымша осы форматты қолға алып ерекше атап өту керек», – деді ол.
</blockquote>
Сонымен қатар, ғылыми зерттеуші Ғарифолла Есім көктемгі демалыстың ұзақтығын арттыру қажеттігін атап өтті.
<blockquote>
 «Егер Наурызды тойлау 9 күн жалғасатын болса, оқушылардың демалыс уақыты артады, ал студенттер үйіне барып, туған-туыстарымен көбірек уақыт өткізе алады», – деді ол.
</blockquote>
Естеріңізге сала кетейік, “Азаматтық алаң” пікірталас алаңы “Рухани жаңғыру” бағдарламасын іске асыруға азаматтық қоғамды тарту және қатысу мүмкіндіктерін кеңейтуге бағытталған.
Алаңның құрамына ҮЕҰ, жастар ұйымдарының өкілдері, қоғамдық пікір көшбасшылары, еріктілер мен белсенді азаматтар кірді. Пікірталастар әртүрлі форматтарда, мысалы, Open space technology, Аквариум, Lightning talks және әртүрлі алаңдарда өтеді.
ҚҚДИ – қазақстандық қоғамдық даму институты. “Рухани жаңғыру” бағдарламаны іске асырудың барлық қатысушысының тиімді қызметін ғылыми-әдістемелік қамтамасыз ету үшін құрылды. Бағдарламаның арнайы жобасына кіретін “Туған жер”, “Қазақстанның киелі жерлерінің географиясы”, “Латын әліпбиіне көшу”, ” Жаһандағы заманауи қазақстандық мәдениет”, “100 жаңа оқулық”, “100 жаңа есім” бағдарламалары бар.

Сарапшылар Наурыз мейрамын мерекелеудің жаңа тәсілдерін ұсынды

<a href="https://kyzylorda-news.kz/">Kyzylorda-news.kz.</a> Облысаралық пойыз билеттерінің бағасы өсті. Бұл туралы «Жолаушылар тасымалы» АҚ хабарлады.
<blockquote>
 «Қазақстан Республикасының Индустрия және инфрақұрылымдық даму министрлігі Көлік комитетінің 2020 жылғы 24 ақпандағы №27-27-9/559 хаты негізінде 2020 жылғы 5 наурыздан бастап әлеуметтік маңызы бар облысаралық қатынастар бойынша қатынайтын «Жолаушылар тасымалы» АҚ құрастырған барлық пойыздың тарифін 7 %-ға өсіру келісілді», – делінген хабарламада.
</blockquote>

Пойыз билеттерінің бағасы өсті

<a href="https://kyzylorda-news.kz/">Kyzylorda-news.kz.</a> Синоптиктер еліміздің басым бөлігі жоғары қысым жағдайында болады, сондықтан ауа райы негізінен жауын-шашынсыз болады, деп болжайды.
Батыс пен солтүстік-батыста атмосфералық фронтальды бөліктердің өтуімен жауын-шашын күтіледі. Республиканың кей жерлерінде тұман түсіп, жел күшейеді, батыста көктайғақ, солтүстік және солтүстік-батыста қар жауады, деп хабарлайды Казгидромет. 
Қостанай облысында кей жерлерде тұман, көктайғақ күтіледі, түнде қар жауады, жел 15-20 м/с күшейеді.
Солтүстік Қазақстан облысында кей жерлерде тұман, көктайғақ болады, түнде жел 15-20 м/с күшейеді.
Атырау, Батыс Қазақстан, Ақтөбе облыстарында кей жерлерде тұман, көктайғақ күтіледі, күндіз Атырау және Батыс Қазақстан облыстарында жел 15-20 м/с күшейеді. 
Қызылорда және Маңғыстау облыстарында кей жерлерде тұман түседі, күндіз желдің күші 15-20 м/с.
Алматы облысында түнде кей жерлерде тұман түседі, күндіз Жалаңашкөл ауданында жел 15-20 м/с күшейеді.
Түнде Ақмола, Жамбыл, Павлодар, Қарағанды, Шығыс Қазақстан, Түркістан облыстарының кей жерлерінде тұман болады.
Алматыда күндіз 8°&nbsp;күн ашық,&nbsp;Нұр Султанда&nbsp;күндіз -7°, аздап бұлтты болады.

25 ақпанға арналған ауа райы болжамы

1991 жылы Қазақ КСР Министрлер Кеңесінің «Семей қаласында Радиациялық медицина және экология институтын құру туралы» қаулысы қабылданды. Институт ғылыми қызметінің негізгі бағыттары – радиациялық және басқа да факторлардың қоршаған ортаға, адамдарға, жануарларға әсерін зерттеу.
1994 жылы Қазақстан Республикасы мен Камбоджа корольдігі арасындағы дипломатиялық қарым-қатынас орнады.
1999 жылы Қазақстанда тәуелсіздік алғаннан кейінгі алғашқы халық санағы басталды. Санақ наурыздың 4-іне дейін жалғасты. Мемлекет аумағы 1 463 санақ бөлімдеріне бөлінді. Санақ қорытындысы бойынша Қазақстанда 15 673 400 адам тұрады.
2011 жылы Қазақстан Президенті Нұрсұлтан Назарбаев халықаралық «Жыл тұлғасы-2010» сыйлығының гран-при иегері атанды. РБК медиа-холдингі тағайындаған «Жыл тұлғасы» сыйлығы саясат, бизнес, мәдениет және қоғамдық өмірде дәрежеге жеткен тұлғаларға беріледі. ҚР Президенті Қазақстан мен Ресейдің ынтымақтастығына қосқан үлесі үшін марапатталды.
2016 жылы Қазақстан Жоғарғы соты жанынан Әділ сот академиясы құрылды. Академия қызметінің негізгі бағыттары – ЖОО-дан кейінгі білім беру бағдарламасын іске асыру; сот жүйесі судьялары мен қызметкерлерін қайта дайындау, біліктілігін арттыру, ғылыми қызметті жүзеге асыру.

25 ақпан: Ел тарихында орын алған оқиғалар

<a href="https://kyzylorda-news.kz/">Kyzylorda-news.kz</a> ақпараттық агенттігінің 25 ақпанға арналған жұлдыз-жорамалы.
Тоқты
Сәтті күн. Қиын тапсырмаларды орындай аласыз. Сондықтан табысты боласыз. Маңызды шаруалармен айналысыңыз, уақытты текке кетірмеңіз.
Торпақ
Бүгін жұмыстарды кейінге қалдырмаңыз. Құр қол қарап отырған жарамайды. Сондықтан өзіңіз айналысатын жұмыс тауып алыңыз.
Егіздер
Жемісті күн деп айту қиын. Көптеген қиындықтарға кезігесіз. Бастаған жұмысыңызды аяқтауға кедергі келтіретін жайттар жеткілікті.
Шаян
Бүгін жұмыста бастама жасауға, жаңа идеяларды жүзеге асыруға қолайлы күн. Жаңа серіктестер табасыз. Барлығы сізбен жұмыс жасауға құмартады.
Арыстан
Қарбалас күн болады. Бірақ шаруаларыңыз аяқталған сайын қуанатын боласыз. Айналаңыздағы адамдармен тіл табысуыңыз қиындайды.
Бикеш
Бүгін пайдалы істермен айналысасыз. Көптен ойға алған шаруаны қолға алып, нәтижелі аяқтайтын боласыз. Достарыңыз қуантатын болады.
Таразы
Сақ болыңыз. Бүгін тәуекел етудің қажеті жоқ. Маңызды жұмыстармен өз-өзіңізге сеніміңіз мол болған уақытта ғана айналысқан жөн.
Сарышаян
Бүгін жақындарыңызға қонаққа барыңыз. Туыстардың арасында көңілді кеште болып, бір серпілгеніңіз жөн. Ештеңені уайымдамаңыз.
Мерген
Жемісті күн. Қызықсыз тапсырманы соңына дейін жеткізіп, маңызды жұмыстарды қолға алатын боласыз. Материалдық жағдайыңыз жақсарады.
Тауешкі
Жаңа жұмыс бастауға қолайлы күн. Сіздің жоспарларыңыз жүзеге аса бастайды. Жаңа тәжірибелер сәтті аяқталып, өз кәсібіңізді ашасыз.
Суқұйғыш
Асықпаңыз. Маңызды істі қолға алмас бұрын, ең алдымен барлығын жан-жақты ойлап, оның соңы немен аяқталарын бағдарлап алғаныңыз жөн.
Балықтар
Бүгін біраз маңызды сауалдарға жауап табасыз. Ішкі түйсік қалай әрекет ету керек екеніне жөн сілтейді. Пайдалы жаңа таныстық орын алады.

Қазақстан және Қызылорда облысының жаңалықтары