<a href="https://kyzylorda-news.kz/">Kyzylorda-news.kz</a>. Қызылорда қаласында инфекция таралуының алдын алу мақсатында №66597 әскери бөлім қызметкерлері және арнайы мекемелер арқылы бекітілген кестеге сәйкес, бүгінгі күнге дейін жалпы көлемі 356 мың шаршы метрді болатын 131 аумақты залалсыздандыру жұмыстары күшейтілген режимде жұмыс жасауда.
Қаладағы қоғамдық көліктер, аялдамалар, теміржол мен автовокзалдар, ірі кәсіпкерлік нысандар, базарлар және адам көп жүретін көшелер, көпқабатты тұрғын үйлер аумақтары және әлеуметтік нысандарға залалсыздандыру жұмыстары жүргізілді.
<blockquote>
 «Бүгін міне Әл-Фараби, С.Торайғыров, Хон-Бен-До көшелерінде және тұрғын-үй аулаларында орналасқан балалар ойын алаңдары, аялдамалар мен қоқыс жәшіктерінде залалсыздандырылуда. Көшелерге арнайы гипохлорид кальций ерітіндісі қосылған қоспамен, ғимараттарды диохлорид ерітіндісі қосылған қоспамен залалсыздандырылды. Бұл жұмыстар әрі қарай бекітіленген кестеге сай кезең кезегімен толығымен дезинфекцияланады және барлық құралдар-жабдықтар жеткілікті», – дейді қалалық тұрғын үй-коммуналдық шаруашылығы, жолаушылар көлігі, автомоблиль жолдары және тұрғын үй инспекциясы бөлімі басшысының орынбасары Біржан Далабаев.
</blockquote>
Айта кетейік, елімізде орын алып отырған коронавирус іңдетіне байланысты, ҚР Президентінің тапсырмасына сәйкес, ҚР Қорғаныс министрлігіне бағынысты Қызылорда облысында орналасқан әскери бөлімдердің ұйымдастыруымен қала аумағында орналасқан теміржол вокзалы мен автовокзал аумағын 26 наурыздан бастап дезинфекциялау жұмыстары жүргізілген болатын.
<img src="https://kyzylorda-news.kz/wp-content/uploads/2020/04/01-29.jpg" alt="" />
<img src="https://kyzylorda-news.kz/wp-content/uploads/2020/04/02-6.jpg" alt="" />
<img src="https://kyzylorda-news.kz/wp-content/uploads/2020/04/03-6.jpg" alt="" />
<img src="https://kyzylorda-news.kz/wp-content/uploads/2020/04/04-3.jpg" alt="" />

Қызылордада залалсыздандыру жұмыстары күшейтілген режимде жұмыс жасауда (ФОТО)

<a href="https://kyzylorda-news.kz/">Kyzylorda-news.kz</a>. Қазақстан мұсылмандары діни басқармасы барша мұсылман қауымын 10 сәуір, жұма күні намаз уақытында «Біз – біргеміз, тілегіміз – ортақ» деген игі бастама аясында күллі адамзаттың амандығы үшін бір мезетте алақан жайып, дұға жасауға үндеді.
<blockquote>
 «Аса қамқор, ерекше мейірімді Алланың атымен бастаймын! Әуелі барлық мадақ әлемдердің Раббысы Аллаға тән. Адамзаттың асылы Мұхаммед Пайғамбарға оның отбасы мен барша сахабаларына салауат пен сәлем болғай! Ассаламу алайкум уа рахматуллаһи уә бәрәкәтуһу! Құрметті Дін Басшылары, мұсылман бауырлар! Бүгінде COVID-19 коронавирус жұқпалы дерті жер бетіндегі әлем жұртшылығын алаңдатып отырғаны баршаңызға мәлім. Өкінішке қарай, бұл індеттен әлемде мыңдаған адам көз жұмды. Әлемде осы дерттен қаза тауып, қара жамылған отбасылардың қайғыларына ортақтасып, көңіл айтамын. Алла алдынан жарылқасын! Өмірді сынақ мекені деп білген мұсылман баласы басына қиындық түссе, төзімділік танытады, нығметке бөленсе, шүкір етеді. Қиындықты сабырға жеңдірген пенде Алланың мейіріміне бөленеді. Алла Тағала: «Сөзсіз Біз сендерді қорқынышпен, аштықпен және дүние-мүліктеріңді, жандарыңды, сондай-ақ жемістеріңді алу арқылы сынаймыз. Сабыр етушілерді сүйіншіле!» («Бақара» сүресі, 155-аят) деген. Алла Тағала сынаққа сабыр етіп, сауапқа кенелген пенделерінен еткей!», – деді Бас мүфти Қазақстан мұсылмандары діни басқармасының&nbsp;<a href="https://www.muftyat.kz/kk/news/qmdb/2020-04-07/30849-kazakstan-musylmandary-dini-baskarmasynyn-musylman-lemine-undeui">ресми</a>&nbsp;сайтында жарияланған үндеуінде.
</blockquote>
Қазақстан мұсылмандары діни басқармасының төрағасы қазіргі таңдағы бұл ауыр індет күллі адамзат баласына қатер төндіріп тұрғанын баса айтады.
<blockquote>
 «Біз (Барлығымыз) Адам ата және Хауа анадан тараған бір үмбетпіз. Қасиетті Құран Кәрімде: «Уа, адам балалары! Бәріңді бір жаннан жаратқан һәм одан жұбын жаратып, ол екеуінен көптеген ерлер мен әйелдер өрбітіп, жер бетіне таратқан Раббыларыңа қарсы келуден сақтаныңдар!» («Ниса» сүресі, 1-аят) деген. Ардақты Пайғамбарымыз (оған Алланың салауаты мен сәлемі болсын): «Уа, адамдар! Сендердің барлығың Адам атадан, ал Адам топырақтан жаратылды …» деп бірлікке үндеген. Расында, ешкімнің ұлты, нәсілі, тегі Жаратқанның құзырында бір-бірінен артық емес. Құранда: «Уа, адамзат баласы! Біз сендерді бір Ата, бір Анадан жараттық. Сондай-ақ бір-бірлеріңді тануларың үшін сендерді әртүрлі ұлт-ұлысқа, ру-тайпаға бөлдік. Расында, Алланың алдында ең ардақтыларың – тақуаларың» («Хұжұрат» сүресі, 13-аят) делінген. Әлемде етек алған індеттің алдын алуда адамзат Ұлы Жаратушының мейіріміне мұқтаж екендігін айқын сезінуде. Сол үшін әрбір ұлт өкілі, барша адам баласы жұдырықтай жұмылып, шын жүректен Жаратқанға жалбарынып, адамзаттың амандығын сұрайтын сындарлы сәтте тұрмыз. Алланың ардақты Елшісі (оған Алланың салауаты мен сәлемі болсын): «Дұға – мұсылманның қорғаны», – дегені баршаңызға мәлім. Осы ретте Қазақстан мұсылмандары діни басқармасы ислам әлемінің ғұламаларын, күллі дін қайраткерлерін, дін саласының оқытушы-ұстаздары мен Құран қариларын және барша мұсылман қауымын 10 сәуір, жұма күні намаз уақытында «Біз – біргеміз, тілегіміз – ортақ» деген игі бастама аясында күллі адамзаттың амандығы үшін бір мезетте алақан жайып, дұға жасауға үндейді. Аса мейірімді Алла Тағала күллі адамзат баласына амандық-саулық беріп, ауру-сырқаудан айығып, қуанышты күндерге тезірек жетуін нәсіп еткей», – деп атап өткен Наурызбай қажы Тағанұлы.
</blockquote>

Бас мүфти барша мұсылман қауымын адамзаттың амандығы үшін бір мезетте дұға жасауға үндеді

<a href="https://kyzylorda-news.kz/">Kyzylorda-news.kz</a>. Ақмола облысында бір адам коронавирустан көз жұмды.
8 сәуір 13:45-тегі жағдай бойынша, коронавирус індетін жұқтырған тағы 5 адам тiркелдi: Қызылорда облысында – 3 адам, Ақмола облысында – 1 адам, Маңғыстау облысында – 1 адам.
Ақмола облысында коронавирус індетінен бір науқас көз жұмды. Ол 1929 жылы дүниеге келген екен.

Қазақстанда коронавирустан 91 жастағы адам қайтыс болды

Kyzylorda-news.kz. Мемлекет басшысының өкімімен Серік Жүсіпұлы Сүлейменов Қазақстан Республикасы Президентінің «Байқоңыр» кешеніндегі арнаулы өкілі қызметіне тағайындалды, деп хабарлайды Ақорданың баспасөз қызметі.
Серік Сүлейменов 1966 жылы Алматы қаласында дүниеге келген.
1990 жылы С. Киров атындағы Қазақ мемлекеттік университетін «Математик» мамандығы бойынша үздік бітірді, 1997 жылы Әл-Фараби атындағы Қазақ мемлекеттік университетін «Құқықтану» мамандығы бойынша сырттай бітірді.
Еңбек жолын 1992 жылы «Казкоммерцбанк» АҚ-да бастады, заң қызметінің бастығы болып жұмыс істеді. 1997-2003 жылдары «Мемлекеттік жинақтаушы зейнетақы қоры» АҚ Бас директоры, «Темірбанк»АҚ Басқарма төрағасының орынбасары болып жұмыс істеді. 2003 жылдан 2013 жылға дейін энергетика саласында жұмыс істеді, «Қазақстандық Коммунальдық жүйелер» АҚ президенті, «Маңғыстау электртораптық бөлу компаниясы» АҚ Басқарма төрағасы, «Қызылорда электртораптық бөлу компаниясы»АҚ Басқарма төрағасы лауазымында жұмыс істеді. Мемлекеттік органдарда жұмыс тәжірибесі бар, Қазақстан Республикасы Еңбек және халықты әлеуметтік қорғау министрінің орынбасары, Қазақстан Республикасы Президенті Әкімшілігінде сарапшы, Қазақстан Республикасы Премьер-Министрі Кеңсесінің бас инспекторы лауазымында жұмыс істеген.
2015 жылдан бастап Қызылорда облысы әкімінің орынбасары қызметін атқарды. «Құрмет» орденімен және Қазақстан Республикасының мемлекеттік органдарының медальдарымен марапатталған.
2019 жылдың 1 сәуірінен бастап Қазақстан Республикасы Энергетика министрлігі Атомдық және энергетикалық бақылау және қадағалау комитетінің төрағасы қызметін атқарды.

Серік Сүлейменов ҚР Президентінің «Байқоңыр» кешеніндегі арнаулы өкілі қызметіне тағайындалды

<a href="https://kyzylorda-news.kz/">Kyzylorda-news.kz</a>. Қызылорда облысының кәмелетке толмағандардың істері жөніндегі мамандандырылған ауданаралық сотында семинар сабағы өткізілді.
Онда атлған соттың бас маманы Д.Тайыров «Медиация туралы Заңының талаптарын кәмелетке толмағандардың істері бойынша қолдану ерекшеліктері» тақырыбында&nbsp; семинар сабағын өткізді. Шараға кеңсе меңгерушісі мен сот қызметкерлері қатысты.
Бас маман Д.Тайыров өз баяндамасында кәмелеттік жасқа толмағандардың ісін құқықтық қатынастарда бейтарап реттеуде медиациялық жүйенің орны ерекше екендігін айтып өтті.
Атап айтқанда, медиатор кәмелеттік жасқа толмағандарды сотты болудан сақтап, тараптар мәселелерінің дұрыс шешілуіне жағдай жасайды. Екі жақтың&nbsp;&nbsp; ұстанымы мен мүдделерін түсінуін тырысып, олардың басқа ниеттерден арылып, күрделі мәселе түйінінің шешілуін жолын реттейді. Кәмелетке толмаған балаларға&nbsp; қатысты олардың тұрғылықты жерін анықтау, кездесу уақытын белгілеу, алимент мөлшерін азайту туралы дауларды медиатор көмегімен шешу шаралары жөнінде толық түсіндіріп айтты.
Семинарға қатысушы кеңсе қызметкерлері өз ойларын талқыға салып, пікірлерін ашық білдірді.

Қызылордада кәмелетке толмағандардың құқығы – басты назарда

<a href="https://kyzylorda-news.kz/">Kyzylorda-news.kz.</a> Бұл тізімге адамдар күніне бірнеше рет қолданатын, бірақ оларды тазартқышпен тазартудан бейхабар заттар кіреді, деп хабарлайды&nbsp;<a href="https://stan.kz/">Stan.kz</a>.
Бірінші кезекте дезинфекциялауды қажет ететін зат&nbsp;– санитарлық тазарту құралы. Айналасындағылардың барлығын дезинфекциялай отырып, ол өзі әртүрлі бактериялардың өсу алаңы болып қала береді.
Сондай-ақ, тізімде сағат, мойын жібі, зарядтағыш құрал, құлаққап, кілттер және теледидарға арналған пульті бар. Адамдар бұл заттарды&nbsp;жиі қолданады, бірақ оларды әрдайым дезинфекциялау керектігін біле бермейді.
Сонымен қатар, дәрігерлер есік тұтқаларын, балалар ойыншықтары мен тарақтарын антисептикалық өңдеуге шақырды.
<img src="https://kyzylorda-news.kz/wp-content/uploads/2020/04/nado-zalalsyvzdandyrw-kaz-ishine-1.jpg" alt="" />

Біз зарарсыздандыруды ұмытып кеткен вирустардың ошақтары туралы не білесіз?

<a href="https://kyzylorda-news.kz/">Kyzylorda-news.kz.</a> Гидроксиохлорин коронавируспен ауыратын науқастарды емдейтін медициналық қызметкерлердің алдын-алу үшін қолданатын дәрісі ретінде анықталды. Сондай-ақ, COVID-19 науқастарды емдеуге арналған дәрі-дәрмектердің де тізімі жасалды, деп мәлімдеді Денсаулық сақтау вице-министрі Лязат Ақтаева, деп хабарлайды&nbsp;<a href="https://kaz.zakon.kz/5015904-aza-standa-koronavirus-zh-tyr-andardy.html">zakon.kz.</a>
Ақтаеваның айтуынша, әлемде COVID-19 вирусының таралуының басында-ақ Денсаулық сақтау министрлігі бұл инфекцияны аса қауіпті инфекция қатарына жатқызған. Жұқпалы ауру бойынша жетекші мамандар пульмонологтармен және реаниматологтармен бірлесіп жаңа клиникалық хаттама жасады. Үстіміздегі жылдың 3 ақпанында ол Денсаулық сақтау министрлігінің сапа жөніндегі бірлескен комиссиясының отырысында мақұлданды.
Шетелдік әріптестермен үнемі онлайн-кеңес өткізіп, BMJ (British Medical Journal), Вили (АҚШ), Ланцет халықаралық журналдарында жарияланған ғылыми жұмыстар сүзгіден өткізілгеннен кейін, әлемде коронавирус инфекциясын диагностикалау және емдеудің жаңа ілімі мен тәжірибесі пайда болғандықтан, қазақстандық клиникалық хаттама жаңартылды. Бүгін оның 5-ші нұсқасы мақұлданды. Сіз олармен Денсаулық сақтау министрлігінің&nbsp;<a href="https://www.gov.kz/memleket/entities/dsm/documents/details/25568?fbclid=IwAR22UnJUDeT5Z16QT4UoHsd5Ddb-YxRnTzJU5wwo9u8O4VbknvySuonXe9A&lang=kk">сайтында</a>&nbsp;таныса аласыздар.
Гидроксиохлорин коронавируспен ауыратын науқастарды емдейтін медициналық қызметкерлердің алдын-алу үшін қолданатын дәрісі ретінде анықталған. Қазақстанда бұл препарат бар.
Науқастарды емдеу үшін Лопинавир/Ритонавир, Гидроксихлорохин, Азитромицин, Рибавирин көрсетілген. Олар да Қазақстанда бар.
Клиникалық хаттамада резервтік емдеу режимдері көрсетіледі: Хлорокин, Ремдисивир – олар Қазақстан Республикасында әлі жоқ. Хлорокинді Үндістаннан сатып алу бойынша экспорт тыйылған, қазір дәрі-дәрмекті жеткізушілермен келіссөздер жүргізілуде. Ремдесивир препараты әлі де клиникалық зерттеу сатысында, өндірушімен келіссөздер жүргізілуде.

Қазақстанда коронавирус жұқтырғандарды қандай дәрімен емдейтіні белгілі болды

<a href="https://kyzylorda-news.kz/">Kyzylorda-news.kz</a>. Қасиетті Қармақшы өңірінің тұрғындары қауіпті індетке қарсы сақтық шараларына да бір кісідей атсалысуда.
Аудан əкімдігі жанынан құрылған штаб мүшелері аудан тұрғындарын үйден шықпауына, кəсіпкерлерге күнделікті қажетті тауарлардың бағасын көтермеуге,&nbsp; өздері де сақтық шараларын сақтауға насихаттық жұмыстар жүргізуде.
Ал, дəрігерлер күндіз-түні науқастарға&nbsp; тынбай ем-дом жасауда, ал қоғамдық тəртіп сақшылары тəртіп пен тыныштық сақтауда өз үлестерін қосуда.
Міне, осындай ел қамын ойлаған азаматтарымызға қолдау көрсетуде тұрғындар да өз үлесін қосуда.
Бүгінде Алматы облысы, Іле ауданындағы Əділхан мешітінде бас иман қызметін атқарып жүрген қармақшылық Ақылбек Алтынсариев, сондай-ақ&nbsp; аудандық қоғамдық кеңестің төрағасы, мəслихат депутаты Гүлжауһар Раева мен аудан əкімдігіне қарасты бір топ мекеме басшылары&nbsp;&nbsp; блок-бекеттерде кезекшілікте отырған тəртіп сақшыларына&nbsp; түскі ас əзірлеп, қолдау көрсетуде.

Қармақшылық тұрғындар блок-бекеттердегі қызметкерлерге қамқорлық танытуда

<a href="https://kyzylorda-news.kz/">Kyzylorda-news.kz.</a> Уханьда көліктер ақылы автомобиль магистральдары арұылы шығу бекеттерінде кезек орнатып, жолаушылар пойызға отырып, қаладан кетуге асығуда, деп хабарлайды <a href="http://russian.news.cn/2020-04/08/c_138955661.htm">Синьхуа</a>.
Қытайдың орталық бөлігінде орналасқан алып қалада ертеңнен бастап COVID-19 коронавирусын одан әрі таратпас үшін енгізілген шектеулер алынып, 11 аптаға созылған карантин аяқталады.
Ухань қаласының солтүстік бөлігіндегі Фухэ төлеу бекетінде көлік иелері дабылды асыға күтіп, қаладан шығуға асықты.
Уханьда жеке бизнесі бар Го Лэй көлігімен төлеу орнына сағат 20:40 шамасында келген. Онымен бірге көлікте тағы алты адам бар. Олардың барлығы үйіне қайтатын күнді күтіп жүрген.
«Мен үйге оралуды тағатсыз күтудемін», – дейді Го Лэй.
Ол – елдің шығысындағы Шаньдун провинциясының тумасы.
«Уханьда сегіз жылдан бері тұрып жатырмын. Көктем мерекесі кезіндегі демалыста туыстарым қалаға келіп, маған қажетті заттарды жеткізуге көмектесті. Эпидемия салдарынан барлығымыз осында қалып қойдық», – дейді ол.
<img src="https://kyzylorda-news.kz/wp-content/uploads/2020/04/whan-kaz-ishine.jpg" alt="" />

Уханьда бірнеше айға созылған карантин аяқталды

<a href="https://kyzylorda-news.kz/">Kyzylorda-news.kz.</a> Қытайдың коронавирусты алдын алу және науқастарды емдеуде тәжірибесі мол жоғары білікті дәрігерлері қазақстандық мамандарға көмек көрсетпек, деп хабарлайды <a href="https://www.coronavirus2020.kz/">www.coronavirus2020.kz</a>.
Құрамына коронавирус инфекциясының алдын алу және коронавирусқа шалдыққан науқастарды емдеуде тәжірибесі мол жоғары білікті дәрігерлер кіретін Қытай делегациясының миссиясы – қазақстандық медицина қызметкерлеріне COVID-19 қарсы күресте консультациялық әдістемелік көмек көрсету, оның ішінде COVID-19 алдын алу және бақылаудың Қытай тәжірибесімен, жақын байланыстарды анықтау және оқшаулау тетіктерімен танысу, қолданыстағы клиникалық емдеу хаттамаларына ұсыныстар беру және т.б.
Бұл бастаманы Қазақстан тарапы осы жылдың 24 наурызында Мемлекет басшысы Қ-Ж. Тоқаевтың Қытай Халық Республикасының (ҚХР) Төрағасы Си Цзиньпинмен COVID-19 жаңа коронавирус инфекциясына қарсы күресте ҚХР-ның Қазақстанға жан-жақты қолдау көрсетуі туралы телефон арқылы сөйлесу барысында қол жеткізілген уағдаластықты жүзеге асыру мақсатында ұсынды.
Дипломатиялық арналар арқылы қытайлық сарапшыларды Қазақстанға жіберуді ұйымдастыру мәселелерін шешуге қатысты екіжақты келіссөздер жүргізілуде. 
Бүгін 7 сәуірде ҚР денсаулық сақтау вице-министрі Л.М.Ақтаеваның төрағалығымен ҚХР денсаулық сақтау комитеті өкілдері мен қытайлық дәрігерлермен онлайн кездесу өтті.
Кездесуге Қазақстан тарапынан ҚР денсаулық сақтау вице-министрі К.Надыров, ҚР Денсаулық сақтау министрлігінің жауапты хатшысы Б.Жақселекова, Нұр-Сұлтан, Алматы, Қарағанды қалаларындағы медициналық ЖОО ректорлары, Нұр-Сұлтан, Алматы қалалары мен Қарағанды облысының денсаулық сақтау басқармасының басшылары, сондай-ақ ҚР Сыртқы істер министрлігінің өкілдері қатысты. 
Қытай тарапынан Чжан Ганчан мырза – Қытайдың Шыңжаң-Ұйғыр автономиялық өлкесі (ШҰАӨ) Денсаулық сақтау комитетінің инспекторы, Хэ Шаохуа мырза – Қытай денсаулық сақтау комитеті Халықаралық ынтымақтастық департаменті директорының орынбасары, қытайлық дәрігерлер, Қытайдың Сыртқы істер министрлігі мен ҚР-дағы ҚХР Елшілігінің өкілдері қатысты. 
Осы онлайн кездесу барысында тараптар 13 маманнан тұратын қытайлық делегацияның Қазақстанға сапарының бағдарламасын, ынтымақтастықтың басым бағыттарын, COVID-19 тақырыбы бойынша қазақстандық дәрігерлерге арналған тренинг тақырыптарын, логистика мәселелерін және т.б. кеңінен талқылады. Делегация құрамында пульмонология, инфекция, шұғыл терапия, эпидемиология, қоғамдық денсаулық сақтау және т.б. сала мамандары бар. 
ҚХР дәрігерлері сәуірдің басында Нұр-Сұлтанға арнайы ұйымдастырылған ұшақпен ұшып келеді. Сонымен қатар делегациямен бірге Қытайдан гуманитарлық көмектің екінші бөлігі де жеткізіледі деп күтілуде.

Коронавирус: Қытайдың білікті дәрігерлері Қазақстанға келмек

<a href="https://kyzylorda-news.kz/">Kyzylorda-news.kz.</a> Қазақстанда қатты соққан желдің салдарынан бір адам көз жұмды. Бұл туралы ҚР ІІМ Төтенше жағдайлар комитетінде хабарлады.
Оқиға Ақмола облысында орын алған.
Аталған комитеттің баспасөз қызметінің хабарлауынша, 7 сәуірде Бурабай облысы Үрімқай ауылында екпіні 28 м/с-қа дейін күшті желдің салдарынан машина ауласындағы ғимаратының төбесіндегі&nbsp;шатыр сынған. Соның салдарынан&nbsp;1980 жылғы күзетші&nbsp;жарақат алып,&nbsp;қайтыс болды.
Еске салсақ,&nbsp;кешеден бері еліміздің бірқатар өңірінде қуатты дауыл соғуда. Мәселен, қатты желдің салдарынан секундына отыз метрден асатын жел Көкшетаудағы электр қуатын үзіп жіберді. Соның салдарынан, бірнеше аудан жарықсыз қалды.
Айта кетейік, бүгін Қызылорда облысында да ауа райына байланысты дабылды ескерту жарияланды. Синоптиктердің болжауынша, бүгін аймақта қатты жел соғып, қар аралас жаңбыр жауады.

Елімізде дауыл салдарынан бір адам қайтыс болды

<a href="https://kyzylorda-news.kz/">Kyzylorda-news.kz.</a> 2020 жылдың наурыз айында Қызылорда облысы медицина қызметкерлерінің еңбекақысына 150,9 млн. теңге үстемеақы бөлінді.
<blockquote>
 «Әлеуметтік медициналық сақтандыру қоры» КЕ АҚ Қызылорда облысы бойынша филиалының директоры Бақыт Исмаханбетовтың айтуынша, ағымдағы жылдың наурыз айында COVID-19 коронавирусының таралуының алдын алу және инфекция жұқтырған науқастарды емдеуге 238,8 млн. теңге бөлінген.
</blockquote>
Сондай-ақ, эпидемияға қарсы шараларға тартылған медициналық немесе медициналық емес ұйымдардың қызметкерлеріне 150,9 млн. теңгеден астам үстемеақы қарастырылған.
Бұдан бөлек, полимеразды тізбекті реакция арқылы биологиялық материалдан COVID-19 вирусының РНҚ (рибонуклеин қышқылы) анықтау үшін диагностикалық зерттеуге 60,2 млн. теңге бөлінді.
<blockquote>
 «Қордың облыстық филиалы 2020 жылғы тегін медициналық көмектің кепілдік берілген көлемі шеңберінде міндеттемелер мен төлемдер бойынша жеке қаржыландыру жоспарын өзгерту үшін тиісті өтінім жолдады», – деді Б. Исмаханбетов.
</blockquote>
Еске салайық, Мемлекет басшысы індетпен күрес жүргізетін медицина қызметкерлерін қолдау міндетін жүктеді. Үкімет қазақстандық <a href="https://kyzylorda-news.kz/kogam/koronavirwspen-kuereske-zhumyldyrylghan-medicina-qyzmetkerlerine-toelenetin-uesteme-aqy-koelemi-bekitildi-52920/">дәрігерлер үшін төлем мөлшерін</a> бекітті. Қаулыға сәйкес, эпидемияға қарсы іс-шараларға тартылған медицина қызметкерлері 212 мыңнан 850 мың теңгеге дейін алады.
Облыстық филиал директоры төлемдер коронавирусты жұқтыру қаупі бар үш топ бойынша наурыз, сәуір, мамыр айларында жүргізілетінін атап өтті.
Қауіптілігі аса жоғары – жансақтау бөлімшелерін қоса алғанда, инфекциялық стационар дәрігерлері, орта және кіші медицина қызметкерлері. Үстемеақы 20 ең төменгі жалақыны құрайды (жалақының ең төменгi мөлшерi – 850 мың теңге).
Қауіптілігі жоғары – провизорлық стационарлар мен жедел жәрдем дәрігерлері, орта және кіші медицина қызметкерлері. Үстемеақы 10 ең төменгі жалақы – 425 мың теңге.
Ал, қауіптілігі орташа – карантиндік стационар дәрігерлері, орта және кіші медицина қызметкерлері, санитарлық дәрігерлер (мемлекеттік қызметкерлер), жедел жәрдем жүргізушілері және т.б. Үстемеақы 5 ең төменгі жалақы немесе 212,5 мың теңгені құрайды.

Қазақстан және Қызылорда облысының жаңалықтары