<a href="https://kyzylorda-news.kz/">Kyzylorda-news.kz.</a> Тұтас әлемді үрей құшағына алған коронавирус инфекциясы бүгінде біздің еліміздің де басына төнді. Бұл жағдай халыққа оңай соқпағаны айтпаса да белгілі.
Дегенмен, осындай күрделі кезеңде мемлекет тарапынан жасалып жатқан қолдау шараларынан бөлек, жаны жомарт ел азаматтары тұрмысы төмен тұрғындарға қамқорлық көрсетуді қолға алып, індетпен күресте өзінше үлестерін қосып келеді.
Соның ішінде, Арал ауданының белді кәсіпкерлері індетпен күреске бағытталған шараларға барынша қолдау танытуда. Бұдан өзге аудан азаматтары да қолдан келгенше мұқтаж жандарға көмек беруден аянар емес. Әсіресе еріктілердің қимылы ерекше. Осыған қарап «қайырымдылық» атты қасиетті ұғым ұмытылмайтынын, қандай да болса қиындықты жеңетінін байқаймыз.
Енді солардың бірқатарына назар аударып көрелік. Үнемі игі істердің басынан табылатын кәсіпкер, облыстық мәслихат депутаты Мейрамбек Жұмашев жеке қаражаты есебінен аз қамтылған отбасыларды азық-түлікпен қамтып, аудан жұртын қауіпті індеттен қорғау мақсатында 5000 дана бетперде үлестіруді қолға алды.
Өз кезегінде облыстық мәслихат депутаты, кәсіпкер Қадірберген Бедер, халықтың алғысына бөленіп жүрген аудандық мәслихат депутаты, кәсіпкер Ақыл Сәдуақасова мен жеке кәсіпкер Қуанышбай Ердіқалықов көмекке мұқтаж отбасыларды қолдау мақсатында қаржылай көмек көрсетті.
Бұдан бөлек, кәсіпкер Төребек Игіліков тұрмысы төмен отбасыларын балық шабақтарымен қамтамасыз етсе, еліміздегі «Coca-Cola» компаниясының аудандағы өкілі Нұрсұлтан Ақмұрзаев аудан аумағындағы барлық блок бекетте күндіз-түні тынбай, қауіпсіздік шараларын сақтауға үлес қосып отырған жауапты қызметкерлерге 40 блок сусындар үлестірді. Сонымен қатар, аудан еріктілері мен бірқатар кәсіпкерлер бекет басындағы азаматтарды қолдап, ыстық тамақпен қамтамасыз етіп келеді.
Бұл ізгі шаралар ауданға қарасты кент, ауылдық округтерде жалғасып, ауыл кәсіпкерлері мен еріктілері мұқтаж отбасыларды осындай қиын сәтте демеу мақсатында азық-түлік өнімдерімен қамтамасыз етуде.
Дәл қазіргі жағдайда, яғни, коронавирус індетінің таралуына байланысты тұрғындар арасында жеке қорғаныс құралдарына да сұраныс артқаны белгілі.
Осы орайда, індеттің алдын алуға және бетперде тапшылығын болдырмауда ауданымыздың тігін шеберханалары мен білім беру ұйымдары ерекше белсенділік танытты.
Атап айтсақ, елімізде төтенше жағдай жарияланған бойда ауданымыздағы жеке кәсіпкер Индира Жұмашева мен Фатима Сәрсенбаевалар игі шараны қолға алып, тігін шеберханаларында тігілген бетперделерді көпбалалы отбасыларға, мүмкіндігі шектеулі жандарға тегін таратты.
Сондай-ақ, аталған игілікті бастаманы ауданымыздың еріктілері мен №14, 13, 83, 220, 262, 71 мектеп ұжымдары, Арал индустриалды-техникалық колледждері жалғастырып, қолдан бетперде тігіп, аудан тұрғындарына үлестірді.
Халықтың төзімі мен елдің бірлігін сынға алған індетпен аралдықтар осылайша күресіп, күш біріктіруде. Жаны жайсаң, жақсылыққа жаны құмар жандарға алғыстан басқа айтарымыз жоқ.

Төтенше жағдай: Аралдық кәсіпкерлердің игі істері көпке үлгі

<a href="https://kyzylorda-news.kz/">Kyzylorda-news.kz</a>. Бүгін Қызылорда облысында тағы 7 науқас коронавирустық инфекциядан жазылып шықты.
Осылайша қауіпті індеттен айыққандар саны өңірде 13 адамға жетіп отыр.

Қызылордада індеттен жазылғандар саны 13 адамға жетті

<a href="https://kyzylorda-news.kz/">Kyzylorda-news.kz</a>. Қазақстанның еңбек және халықты әлеуметтік қорғау министрі Біржан Нұрымбетов төтенше жағдайға байланысты 42 500 теңге көлемінде әлеуметтік төлем алатын азаматтардың <a href="https://online.zakon.kz/Document/?doc_id=39462186#pos=2;-108">тізіміне өзгеріс енгізді</a>.
Әлеуметтік төлем төтенше жағдай кезінде жалақысы сақталмайтын еңбек демалысындағы немесе кірісін жоғалтқан адамдарға беріледі:
– Жалақысы сақталмайтын демалыста жүрген жеке кәсіпкерлер мен шағын және орта кәсіпкерлік субъектілерінің қызметкерлері;
– Карантин енгізілген елді мекендерде қызметін жүзеге асыратын, жалақысы сақталмайтын демалыста жүрген ірі кәсіпкерлік субъектілерінің қызметкерлері;
– Жеке кәсіпкерлер және жеке практикамен айналысатын азаматтар;
– Салық кодексінің 774-бабына сәйкес бірыңғай жиынтық төлем төлеуші жеке тұлғалар;
– Қызмет көрсету саласында жұмыс істейтін, салық агенттері міндетті зейнетақы жарналарын төлеген азаматтық-құқықтық сипаттағы шарттар бойынша табыс табатын жеке тұлғалар;
– Жалақысы сақталмайтын демалыста жүрген коммерциялық емес заңды тұлғалардың қызметкерлері 42 500 теңге көлемінде әлеуметтік төлем алуға құқылы.
Айта кетейік, төтенше жағдайға байланысты халықтан 42 500 теңге төлем алуға&nbsp; 5,9 миллион өтінім түскен. Соның ішінде 2,15 миллион, яғни 37% бойынша төлем тағайындалған жоқ.

42 500 теңге алуға құқылы қазақстандықтардың тізімі өзгерді

<a href="https://kyzylorda-news.kz/">Kyzylorda-news.kz</a>. Төтенше жағдай кезеңінде Қызылорда қаласының төңірегінде орналасқан саяжайларға жылжымалы көлікте көшпелі сауда ұйымдастырылды.
Төтенше жағдай кезеңінде қала аумағында блок-бекеттер орналасуына орай, қалаға қарасты елді-мекен тұрғындарының қалаға кіріп-шығуына шектеу қойылды.
Осы ретте, қала әкімінің тапсырмасымен қаланың шет аймақтарында шоғырланған елді мекендердегі халықтың күнделікті тұтынатын азық-түлік тапшылығын болдырмау мақсатында, «Мирас» және «Анвар» сауда орталығының демеушілігімен арнайы жүк көлігі бөлініп, қала төңірегінде орналасқан саяжайларға («Эделвейс», «Сабалақ», «ПМК-29», «Электромонтажник», Наурыз, Ақсуат, т.б.) нарық бағасынан 5-10% төмен бағада азық-түлік және тұрмысқа қажетті заттармен көшпелі сауда ұйымдастырылды. Жалпы көшпелі саудаға 5 тонна көлемінде сұранысты қажет ететін өнім түрлері (азық-түлік: картоп, пияз, сәбіз, күріш, рожки, сүт, шәй, өсімдік майы; тұрмыстық заттар:сабын, ұнтақ, сіріңке, фейри, шампунь т.б.) сатылымға шығырылды.
<blockquote>
 «Қазір бекеттерге тосқауыл қойылғандықтан қалаға өте алмай қалдық. Бүгін міне бізге көшпелі сауда келгенін естіп, қажетті заттарымды алып жатырмын. Шімішкі май, картоп, сәбізімді, т.б. алып жатырмын. Енді бізге жиі келіп тұрса екен, бағалары да тиімді», – деді саяжай тұрғыны Айнагүл Оразымбетова.
</blockquote>
Бұған қоса, қаладағы 167 дәріханалардың ішінен «Еврофарм» ЖШС жылжымалы дәріхана қызметі қаланың шет аймақтарына шығып өз тауарларын халыққа ұсынуда.
<blockquote>
 «Қазіргі таңда төтенше жағдай режимі кезінде қаланың кіре беріс жерлерінде 5 тосқауыл бекеттері қойылғандықтан, қаланың шеткі елді мекендерін азық-түлікпен қамтамасыз ету мақсатында бүгін жылжымалы көлікте көшпелі сауда ұйымдастырып отырмыз. Бұл бірінші кезекте карантин кезінде қауіпсіздікті сақтай отырып, тұрғындар сыртқа бармай-ақ үйінің алдына келіп тұрған жылжымалы көліктен қолжетімді бағада қажетті өнімдерін ала алады. Бұл жұмыстар төтенше жағдай кезеңінде өз жалғасын табатын болады», – дейді қалалық кәсіпкерлік, өнеркәсіп және туризм бөлімінің басшысы Алмасбек Есмаханов.
</blockquote>
<img src="https://kyzylorda-news.kz/wp-content/uploads/2020/04/02-16.jpg" alt="" />
<img src="https://kyzylorda-news.kz/wp-content/uploads/2020/04/04-9.jpg" alt="" />
<img src="https://kyzylorda-news.kz/wp-content/uploads/2020/04/05-3.jpg" alt="" />
<img src="https://kyzylorda-news.kz/wp-content/uploads/2020/04/03-14.jpg" alt="" />

Қызылорда қаласына қарасты саяжайларға жылжымалы көлікпен көшпелі сауда ұйымдастырылуда (ФОТО)

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында коронавирустық инфекцияны жұқтырған науқастар саны 143 адамға жетті. Бүгін соңғы тәулікте жаңадан анықталған 12 жағдайдың мән-жайын облыстық Денсаулық сақтау басқармасының басшысы Жақсылық Абдусаметов Өңірлік коммуникациялар қызметінде өткен брифингте айтып берді.
<blockquote>
 «Қазіргі таңда Қызылорда облысында коронавирустық инфекцияны жұқтырған 143 жағдай тіркелді. Соңғы тәулікте жаңадан 12 жағдай анықталды. Оның үшеуі – Қызылорда қаласынан болса, тоғызы – Жаңақорған ауданынан. Осы 12 науқастың 11-і – бұрын анықталған науқастармен жақын қарым-қатынаста болғандардың арасынан анықталып отыр. Ал, 1 науқас – Жезқазған қаласынан вахталық әдіспен жұмыс жасап келген. Қауіпті індет жұқтырғандардың барлығы жұқпалы аурулар ауруханасына ауыстырылып, тиісті емдерін қабылдауды бастады», – деді Жақсылық Абдусаметов.
</blockquote>
Оның айтуынша, COVID-19 індетін жұқтырған өңірдегі 143 науқаспен байланыста болғандардың жалпы саны – 2162.&nbsp;Оның ішінде, жақын қарым-қатынаста болғандар саны – 1128, потенциалды байланыста болғандар – 1034 адамды құрап отыр. Бүгінгі таңда барлығы бақылауға алынып, оқшауланған. Барлығының жағдайы қанағаттанарлық.
Сондай-ақ, бүгінгі таңда облысымыздағы жұқпалы аурулар ауруханасында – 137, правизорлық стационарда – 21, карантиндік стационарда – 455 адам бақылауда.
Басқарма басшысы атап өткендей, 1 (Б) елдерінен 17 адам келген. Қазіргі таңда оның төртеуі – стационарда, 13 – үй жағдайындағы карантинде бақылауда.
Брифингте Жақсылық Әбілқасымұлы мәлімдегендей, облысымызда анықталып отырған науқастардың санынан қорқудың еш қажеті жоқ. Себебі, дәрігерлер қауіпті індетке шалдыққандарды анықтаудың белсенді сатысына көшкен.
<blockquote>
 «Облысымызда анықталған науқастардың санынан қорқудың қажеті жоқ. Өйткені, біз өңірде қауіпті індетке шалдыққандарды анықтаудың белсенді сатысына көштік. Себебі, неғұрлым ерте анықталса, соғұрлым емдеу шаралары тез басталады. Өзінің нәтижесін береді. Осы тұрғыда, дене қызуы көтеріліп, ЖРВИ белгілері байқалған болмаса өкпесі қабынған тұрғындарды дер кезінде дәрігерлерге қаралуын сұраймыз», – деді ол.
</blockquote>
Сондай-ақ, басқарма басшысы өңірге сырттан келіп жатқандардың арасында коронавирустық инфекцияны жұқтырғандар саны артып отырғандығын мәлімдеді.
<blockquote>
 “Біздің өңірге сырттан келіп жатқан адамдар туралы қандай да бір дерек білсеңіз, тұрғылықты жері бойынша аймақтық медицина мамандарына хбарласуыңызды сұраймыз. Себебі, бүгінгі таңда сырттан келгендердің арасынан коронавирустық инфекцияны жұқтырғандардың саны артып отыр. Егер қауіпті індет жұқтырған ошақты, ол науқаспен қарым-қатынаста болғандарды дер кезінде анықтасақ, оның әрі қарай таралуына жол бермейміз”, – деді Ж. Әбілқасымұлы.
</blockquote>
Айта кетейік, бүгін Қызылорда облысында коронавирустық инфекцияға шалдыққан науқастардың саны&nbsp;<a href="https://kyzylorda-news.kz/covid-19-news/qyzylorda-oblysynda-qawipti-indet-zhuqtyrghandar-sany-143-boldy-56931/">143 адамға жеткенін</a>&nbsp;хабарлаған болатынбыз.
Оның ішінде, Қызылорда қаласында – 21, Жаңақорған ауданында – 28, Қармақшыда – 4, Шиеліде – 59, Сырдарияда – 25, Арал – 4, Қазалы ауданында – 2 жағдай тіркеліп отыр.

COVID-19: Соңғы анықталған науқастардың біреуі Жезқазған қаласынан келген

<a href="https://kyzylorda-news.kz/">Kyzylorda-news.kz</a>. Кеше Қарағанды облысында МиГ-31 әскери ұшағы апатқа ұшырады. Құлаған ұшақтан екі сарбаз зардап шекті. Бүгін Қорғаныс министрлігі Қарағанды маңында болған болған ұшақ апатына қатысты толық ақпаратты жариялады.
Қазіргі уақыттағы ақпаратқа сәйкес, Қарағанды қаласы маңында апатқа ұшыраған МиГ-31 жойғыш ұшағын подполковник А. Құрманғалиев пен подполковник И. Гаврилконың басқарғандары белгілі болды.
Олар тәжірибелі әскери ұшқыштар. А. Құрманғалиевтің жалпы ұшу уақыты 888 сағат болса, ал И. Гаврилконыкі -1161 сағатты құрайды.
Апат орнына Қазақстан Әскери-әуе күштерінің жердегі іздестіру-құтқару қызметі бірінші болып келген.
Ұшқыштарға оқиға орнында алғашқы медициналық көмек көрсетілгеннен кейін, олар Қарағанды қаласының ауруханасына эвакуацияланды.
Қазіргі кезде ұшқыштарға қажетті медициналық көмек көрсетілуде. Дәрігерлер біреуінің жағдайын қанағаттанарлық, екіншісінікі орташа ауырлықта деп баға беруде.
Қорғаныс министрлігінен тағайындаған комиссия авиациялық оқиғаның мән-жайын анықтауға кірісті. Апат орнына Әуе қорғаныс күштерінің бас қолбасшысы мен Әскери-әуе күштерінің қолбасшысы ұшып кетті.
Айта кетейік, апатқа ұшыраған ұшақ 1991 жылы шығарылған болатын. Бұл МиГ-31 ұшағының Қазақстандағы төртінші рет апатқа ұшырауы. Бұдан бұрынғы оқиғалар 2007, 2008, 2013 жылдары болатын.

Қарағанды облысында апатқа ұшыраған әскери ұшақтан 2 подполковник зардап шекті

<a href="https://kyzylorda-news.kz/">Kyzylorda-news.kz</a>. Қызылорда облысында коронавирустық инфекцияны жұқтырған науқастар саны 143 адамға жетті, деп хабарлайды&nbsp;<a href="https://www.coronavirus2020.kz/kz/kazakstandagy-koronavirus-boyynsha-17-sauir-10-05-tegi-epidemiologiyalyk-zhagday_a3639214">www.coronavirus2020.kz.</a>
17 сәуір сағат 10:05-тегі&nbsp;мәлімет бойынша елімізде коронавирус індетін жұқтырған тағы 68 жағдай тіркелді. Атап айтқанда, Нұр-Сұлтан қаласы – 2, Алматы қаласы – 44, Шымкент қаласы – 1, Түркістан облысы – 2, Қызылорда облысы – 9, Атырау облысы – 1, Батыс Қазақстан облысы – 4, Павлодар облысы – 2, Қарағанды облысы – 3.
Қазақстан бойынша барлығы 1470 жағдай.

Қызылорда облысында қауіпті індет жұқтырғандар саны 143 болды

<a href="https://kyzylorda-news.kz/">Kyzylorda-news.kz</a>. 17 сәуірде жұма күні Қазақстанда күн райы ашық, тек еліміздің батысы мен солтүстік-батысында жауын жауады, деп хабарлайды Қазгидромет.
<blockquote>
 «Орталығы Қарағанды облысында орналасқан антициклон жотасының әсерінен республиканың басым бөлігінде жауын-шашынсыз ауа райы күтіледі. Тек еліміздің батысы мен солтүстік-батысына Финляндия аймағынан циклонның жырасы жылжиды, соған байланысты кей жерлерде жаңбыр жауады. Кей жердерде тұман, желдің күшеюі, батыста шаңды дауылмен, бұршақ күтіледі», делінген ауа райы болжамында.
</blockquote>
Күндіз Қызылорда облысының кей жерлерінде жел 15-20 м/с жетеді.

Ауа райы: Жұма күні Қызылорда облысында жел күшейеді

Қазақстан Республикасының өртке қарсы қызмет күні
1918 жылы сәуірдің 17-де кеңестік республикаларда «Өртпен күресудің мемлекеттік шараларын ұйымдастыру туралы» декретке қол қойылды. Бұл күн Қазақстан Республикасында және бұрынғы КСРО республикаларында өртке қарсы қызметтің ұйымдастырылған күні ретінде атап өту қабылданған. Бүгінгі таңда елімізде аталмыш қызметтің құрамында 13 мыңға жуық адам қызмет етеді. Өрт бөлімшелері 3 мыңға жуық негізгі және арнайы өрт машиналарымен және басқа да өрт сөндіретін құрал-жабдықтармен жарақтанған.
1968 жылы&nbsp;«Жануарлар әлемінде» телебағдарламасы алғаш рет эфирге шықты. Аталмыш бағдарламаның негізін қалаушы және тұңғыш жүргізушісі кинорежиссер, КСРО-ның халық әртісі Згуриди Александр Михайлович болды.
1995 жылы&nbsp;Қазақстан Республикасының «Лицензиялау туралы» Заңы қабылданды.
2009 жылы&nbsp;Астанада Қаржы министрлігінің Кедендік бақылау комитеті және «ТеңізШевройл» ЖШС Қазақстанда кедендік рәсімдеудің ілкі жобасын іске асыру бойынша меморандум қабылдады.
2013 жылы&nbsp;Нью-Йоркте Қазақстан Республикасы мен Суринам Республикасы тұрақты өкілдерінің деңгейіндегі бірлескен коммюникеге қол қою арқылы екі ел арасында дипломатиялық қарым-қатынастар орнатылды. Қазақстандық тараптан құжатқа ҚР БҰҰ жанындағы тұрақты өкілі, Елші Б.Әйтімова, Суринам тарапынан бұл елдің БҰҰ жанындағы тұрақты өкілі Хенри Мак Дональд қол қойды.
2014 жылы&nbsp;Мемлекет басшысы Алматы қаласының шекараларын өзгерту туралы Жарлыққа қол қойды. Енді оның құрамына Алматы облысының жалпы ауданы 23200 гектар жері, соның ішінде Іле ауданы (604,6 га), Қарасай ауданы (16069,7 га) және Талғар ауданы (6525,7 га) кірді.

17 сәуір: Атаулы күндер мен оқиғалар

<a href="https://kyzylorda-news.kz/">Kyzylorda-news.kz</a> ақпарат агенттігінің 17 сәуірге арналған жұлдыз-жорамалы.
Тоқты
Көп жұмыс істеуге қолайлы күн. Өз кәсібіңізде жетістікке жетемін деу қиын. Дегенмен біраз шаруаны тындырып тастарыңыз анық. Материалдық жағдайыңыз жақсарады. Бірақ шығындалып қалудан аулақ болыңыз.
Торпақ
Көп іс тындырғыңыз келеді. Алайда барлығы сіз ойлағандай болмайды. Әлдекімнен көмек сұрауға ұялмаңыз. Ескі таныстарыңыздың қолдауына ие боласыз. Кейбір таныстарыңыз сіз ойлағаннан да көп көмегін тигізетін болады.
Егіздер
Бүгінгі күн өте ауыр, бірақ жемісті болады. Бүгін бар дарыныңызды көрсететін күн. Әсіресе кәсіби салада. Маңызды келісім шарттар жасап, жаңа қызметкер іздеу үшін қолайлы күн. Алаяқтардан сақтаныңыз.
Шаян
Бүгін түсініспеушілік туындаған қарым-қатынастарға көңіл бөлген дұрыс. Жағдай өздігінен дұрысталып, татуласамын деп үміттенбеңіз. Одан да бәрін талқылап, мәселенің басын ашып алған дұрыс.
Арыстан
Бүгін келісім шарт жасау, басшылықпен сөйлесу, сезім білдіру сынды маңызды мәселелерде қайсарлық танытқан жөн. Негізі барлық мәселелерде тез, әрі нақты шешім қабылдай біліңіз.
Бикеш
Кез келген жағдайда өз дегеніңізден қайтпайтын боласыз. Қателескеніңіз анық көрініп тұрса да, өзіңіздікін дәлелдеуге тырысасыз. Қателескеніңді мойындай білу де өнер екенін ұмытпаңыз.
Таразы
Бүгін барлық мәселелерді жылдам, қисынды және нақты орындайсыз. Күш-жігеріңіз мол болады, алайда жұмыста кідірудің қажеті жоқ. Алдағы демалыстарға дайындалыңыз.
Сарышаян
Бүгін жақсы нәтижелерге қол жеткізу үшін барыңызды саласыз. Адамдармен, ақпаратпен жақсы жұмыс істейсіз. Бұл ынтаңызды басшылық байқап, мақтауын аямайды, бірақ үйдегі жанұяңызды да ұмытпаған жөн.
Мерген
Бүгін бірден барлық нәрсеге қол жеткізгіңіз келеді. Ол үшін жылдам, әрі әсерлі жұмыс істейсіз. Қалағаныңызды іске асыруыңызға болады. Бірақ айналадағы адамдардың көңіл-күйіне де қарап қойған абзал.
Тауешкі
Бүгін жолға немесе саяхатқа шықсаңыз міндетті түрде жолыңыз болады. Кез келген жұмыс үшін жақсы марапатталасыз. Айтқандарыңыздың бәрін адамдар бұлжытпай орындайтын болады.
Суқұйғыш
Бүгінгі күн оқиғаларға толы және жауапты болады. Білмейтін мәселелердің өзін бірден түсінесіз. Көпшілік алдында сөз сөйлеп, қоғамдық шараға қатыссаңыз дұрыс болады.
Балықтар
Бүгін көкейіңіздегі мәселелерді басшылықпен талқыламаңыз. Жалақыңызды көтеруді сұрап, қандай да бір ынта танытудың қажеті жоқ. Басшылықтың көзіне түспей, аз сөйлеп, көп тыңдаған дұрыс.

Жұлдыздар не дейді?

<a href="https://kyzylorda-news.kz/">Kyzylorda-news.kz.</a> Коронавирус дертімен ауыратын науқастарда өкпенің көлемі кішірейіп, мидың қызметі нашарлайды. Бұл туралы Джордж Мейсон университетінің (АҚШ) жүйелік биология мектебінің профессоры Анча Баранова айтты, деп хабарлайды&nbsp;<a href="https://ria.ru/20200416/1570110074.html">РИА Новости</a>.
<blockquote>
 «Аталған дерттің ауыр түрін бастан өткерген жастар бұдан былай марафонға қатыса алмай, ал қарт адамдар баспалдаққа көтерілген кезде тыныс алудан зардап шегеді. Әрине, осы санаттағылардың бәрі емес», – дейді Баранова.
</blockquote>
Сонымен қатар, профессордың айтуынша, коронавируспен ауыр сырқаттанған науқастарда неврологиялық белгілер пайда болады. Егде жастағы адамдарда сана-сезім шатасуы мен бағыттан ауытқушылық белгілері жиі кездеседі.
<blockquote>
 «Вирустың нейроқабыну жүргізу мүмкіндігі күмән тудырмайды. Оның қанша уақытқа созылатыны және қашан аяқталатыны да қазірше белгісіз. Өйткені, науқастар ауруханадан жазылып шықаннан кейін де, шаршау мен көз алдының тұманданатынын айтуда», – деді Анча Баранова.
</blockquote>
Демек, адам сауығып, қалпына келгеннен кейін де аурудың салдары қанша уақытқа созылатыны әлі белгісіз.

Ғалым коронавирустан айыққан адам қандай қиындыққа тап болатынын айтып берді

<a href="https://kyzylorda-news.kz/">Kyzylorda-news.kz.</a> Аймақта 2020 жылы егілетін ауыл шаруашылығы дақылдарының сызбасы аудандар және Қызылорда қаласы бойынша бекітілген. Бекітілген сызбаға сәйкес, үстіміздегі жылы облыс бойынша 183,1 мың гектарға егiс егу межеленіп отыр. Бұл туралы облыстық ауыл шаруашылығы басқармасы мәлімдеді.
Басқарманың мәліметінше, облыс бойынша егілетін 183,1 мың гектардың ішінде дәндi дақылдар 97,8 мың, майлы дақылдар 6,0 мың, мал азықтық дақылдар 61,6 мың, картоп, көкөнiс, бақша 17,7 мың гектарды құрайды. Негізгі дақыл күрiштің көлемі 88,2 мың гектар.
Облыста егіс көлемдерін әртараптандыру бағытында биылғы жылы соя дақылын 290 гектарға, қант құмайын 200 гектарға ұлғайтуды және 164 гектар жерге жеміс-жидек, жүзім отырғызу межеленіп отыр.
Сонымен қатар, су үнемдеу технологиясын қолдану арқылы барлығы 200 гектар жерге ауыл шаруашылығы дақылдарын орналастыру жоспарлануда. Оның 80 гектары бүгінгі таңда егіліп отыр.
Бүгінде егістікке қажетті минералдық тыңайтқыштар мен тұқымдық материалдар толық қамтамасыз етілді. Сондай-ақ, ауыл шаруашылығы техникалары толықтай дайындалып, егіс егу науқанына қатысуда.
Облысқа 2020 жылдың көктемгі егіс және дала жұмыстарын жүргізуге 14 мың тонна арзандатылған дизель отыны бөлінген. Бекітілген операторлар арқылы наурыз айына бөлінген 3250 тонна дизель отыны облысқа жеткізіліп, шаруашылықтарға толығымен таратылды. Бүгінгі күні сәуір айына бөлінген 4615 тонна дизель отынына келісім-шарт жасалып, қаржысы аударылған. Оның ішінде, 2432 тонна дизель отыны облысқа жеткізіліп, оның 1770 тоннасы шаруашылықтарға таратылды.
Мемлекет басшысы Қасым-Жомарт Тоқаевтың дизель отынының бағасын арзандату бойынша берген тапсырмасына сәйкес, бүгінде арзандатылған дизель отынының бағасы әр литрге 162 теңгені құрап отыр.
Басқарма мәліметінше, соңғы жылдары мемлекет тарапынан көрсетіліп келе жатқан қолдаулардың арқасында облыстың машина-трактор паркі тұрақты жаңарып келеді.
Жалпы соңғы 5 жылда 25,5 млрд. теңгеге 1049 дана жаңадан ауыл шаруашылығы техникалары сатып алынып машина-трактор паркі 23,7%-ға жаңарды. Атап айтқанда, «ҚазАгроҚаржы» АҚ-ы арқылы 22,2 млрд. теңгеге 649 дана және өз қаражаты есебінен 3,3 млрд. теңгеге 400 дана алынған.
Биылғы жылы да облыстың шаруашылық құрылымдары «ҚазАгроҚаржы» АҚ-ның Қызылорда филиалы арқылы 5,0 млрд теңгеге ауыл шаруашылығы техникаларын сатып алуды жоспарлап, бүгінгі күнге 1,3 млрд теңгеге 20 дана ауыл шаруашылығы техникалары сатып алынды.
Биылғы жылға бекітілген ауыл шаруашылығы дақылдарын орналастыру сызбасына сәйкес тұрақты суаруға 4,2 млрд. текше метр су қажет көрінеді.
15 сәуірдегі мәлімет бойынша Шардара су қоймасына жоғарыдан секундына 533 текше метр су түсуде. Қоймадағы су көлемі 5,1 млрд. текше метрді құрап, төменге секундына 400 текше метр, ал Көксарай су реттегішінде 1,9 млрд. текше метр су көлемі жиналып, төменге секундына 200 текше метр су тасталуда.
Бүгінгі күнге Шардара мен Көксарайды қосқанда 7,0 млрд. текше метр су бар, бұл өткен жылдың осы кезеңімен салыстырғанда 0,2млрд. текше метрге кем.
Көктемгі су алу жұмыстарына сәйкес, барлық аудандар мен Қызылорда қаласының су шаруашылығы нысандарын дайындау жұмыстары жоспарға сәйкес атқарылып, бүгінгі күнге облыс бойынша су алу каналдары арқылы барлығы секундына 162,0 текше метр су алынуда.
Сонымен қатар, 2020 жылдың егісі үшін шаруашылық құрылымдарына су жеткізіп беру қызметі үшін Су шаруашылығы мекемесімен келісім-шартқа отыру жұмыстары жүргізілуде.
Бүгінге облыс бойынша 986,8 млн текше метр су алуға 191 шаруашылықпен су жеткізіп беру қызметі үшін келісім-шарт жасалды.
Көктемгі дала жұмыстарын қаржыландыруға келсек, облыста 2020 жылы межеленген егіс көлемдеріне сәйкес, Қызылорда қаласы мен аудандар әкімдіктерінің мәліметтері бойынша көктемгі дала және егіс егу жұмыстарына қажетті қаржы көлемі 8&nbsp;581,6 млн. теңгені құрап отыр.
Осы қажет қаржыдан шаруашылықтардың өз қаржысы есебінен 2&nbsp;450,3 млн. теңге, инвесторлар тарапынан 3 656,7 млн. теңге, «Агрохолдинг Қызылорда» ЖШС арқылы 907,2 млн. теңге қаржыландыру жоспарланса, «Аграрлық несие корпорациясы» АҚ-нан 768,6 млн. теңге, басқа көздерден 798,8 млн.теңгені құрайды.
Бүгінгі күнге «Аграрлық несие корпорациясы» АҚ арқылы 21 шаруашылық құрылымы 349,4 млн теңгеге, «Агрохолдинг Қызылорда» ЖШС арқылы 36 шаруашылық құрылымы 489,6 млн теңгеге қаржыландырылып отыр.
Айта кетейік, қазір қала және барлық аудандар ерте егілетін дақылдарды егу жұмыстарына кірісті. Бүгінгі күнге егілген егіс көлемі 27,8 мың гектар, оның ішінде: жаздық бидай – 3,8 мың (100,5%), жаздық арпа – 0,6 мың (105,6%), мақсары – 5,0 мың (85,7%), жаңа жоңышқа – 18,6 мың (98,9%)гектарды құрайды. Негізгі дақыл – күріш егу жұмыстары сәуір айының 20–нан кейін басталады деп күтілуде.
Сонымен қатар, қала және аудандардан алынған мәліметтерге сәйкес, ауыл шаруашылығы құрылымдарындағы 41857 гектар ескі жоңышқа толығымен тырмаланып, 5894(14,0%) гектары суғарылса, 4142 гектар күздік бидай тырмаланып, толығымен үстеп қоректендірілген.

Қазақстан және Қызылорда облысының жаңалықтары