<a href="https://kyzylorda-news.kz/">Kyzylorda-news.kz.</a> Қызылорда облысында жаңа қатты қалдықтар полигонына 5 гектар жер телімі бөлінді. Бұл ақпарат Өңірлік коммуникациялар қызметінің «Facebook» парақшасында жарияланды.
Қатты қалдықтар полигоны Арал қаласының солтүстік-батыс бөлігінде, яғни қаладан 4 шақырым қашықтықта орналасқан.
Қазіргі таңда полигон құрылысының бірінші кезеңі аяқталды. Атап айтқанда, жер мен топырақты тегістеу жұмыстары толық аяталып, автокөліктерге кіретін жол дайындалды. Полигон құрылысын осы жылдың соңына дейін аяқтау жоспарланған.
Айта кетейік, Қызылорда облысында қатты қалдықтарды қайта өңдеу саласындағы жұмыстар үш бағытта жүргізілуде. Олар қатты тұрмыстық қалдықтарды қайта өңдеу, халыққа қалдықтарды жинау және тасымалдау бойынша қызметтер ұсыну, экологиялық және санитарлық талаптарға сәйкес келетін қатты қалдықтар полигондарын құру.

Қызылордада жаңа қатты қалдықтар полигонына 5 гектар жер бөлінді

<a href="https://kyzylorda-news.kz/">Kyzylorda-news.kz.</a> Бұл туралы Маңғыстау облыстық «Қоғамдық коммуникация орталығында» өткен брифингте ҚР Қазақ күресі федерациясының бас хатшысы Бақдаулет Сәбитов мәлім етті, деп хабарлайды <a href="https://www.inform.kz/kz/kazak-kuresi-mektepterde-pan-retinde-engizilui-mumkin_a3611010">ҚазАқпарат</a>.
<blockquote>
 «Жас өспірімдер арасында осы Қазақ күресінен біріншіліктің алғаш рет Ақтау қаласында өтуі, оған қолдау тапқаны қуантады. Өйткені, жылдан жылға ата-аналар тарапынан қазақ күресіне деген қызығушылық артып келеді. Осыған орай, жаңа оқу жылынан бастап осы спорт түрін мектептерде пән ретінде енгізуді жоспарлап отырмыз. Алдымен, Нұр-Сұлтан қаласы мен Маңғыстау облысында пилоттық жоба ретінде іске асырылады. Бағдарламасы әзірленіп, мамандар даярлау барысы қолға алынды», – деді ҚР Қазақ күресі федерациясының бас хатшысы Бақдаулет Сәбитов.
</blockquote>
Осы бағытта жылдың соңына дейін Қазақ күресі академиясы құрылып, мамандар дайындау жұмыстары жүргізілмек. 1-4 сыныптарға қазақ күресінен акробатика ретінде, ал 5-11 сынып оқушылары арасында арнайы пән ретінде өткізіледі деп жоспарлануда. Сондай-ақ, қыз балалар да осы спорт түрімен айналысуға мүмкіндіктер жасалған.
<blockquote>
 «Осындай беделді жарыстарды өлкемізде өткізу арқылы қазақ күресінің облысымызда қарқынды дамуына ерекше екпін береміз», – дейді ұйымдастырушылар.
</blockquote>

«Қазақ күресі» мектептерде пән ретінде енгізілуі мүмкін

<a href="https://kyzylorda-news.kz/">Kyzylorda-news.kz.</a> Қазгидрометтің мәліметінше, ауа райының бұзылуына байланысты 5 ақпанға бірнеше өңірде ескерту жарияланды.
Қызылорда облысының кей жерлерінде тұман сақталады. Оңтүстік-шығыстан, оңтүстіктен жел соғып, таңертең және күндіз оның күші кей жерлерде 15-20 м/с жетуі ықтимал.
Сонымен қатар Нұр-Сұлтан қаласында көктайғақ болады. Оңтүстік-батыстан соғатын желдің екпіні 15-20 м/с артады.
Ақмола облысының кей жерлерінде тұман, көктайғақ, жаяу бұрқасын күтіледі. Оңтүстік-батыстан соғатын желдің күші 15-20 м/с жетуі ықтимал. Көкшетау қаласында жолдарда көктайғақ болады. Оңтүстік-батыстан 15-20 м/с екпінмен жел тұрады. Түркістан облысының кей жерлерін түнде тұман басып, күндіз оңтүстік-батыстан соғатын желдің күші 15-20 м/с артады.
Түркістан қаласында күндіз 15-20 м/с жылдамдықтағы жел күтіледі.
Шымкент қаласында күндіз оңтүстік-батыстан 15-20 м/с екпінмен жел соғады.
Қостанай облысының кей жерлерінде тұман, көктайғақ, бұрқасын болжанады. Оңтүстік-батыстан жел соғады, екпіні кей жерлерде 15-20, 23-28 м/с артуы мүмкін. Қостанай қаласында оңтүстік-батыстан 15-20 м/с күшпен жел тұрады.
Ақтөбе облысының кей жерлерінде тұман, көктайғақ, түнде жаяу бұрқасын сақталады. Оңтүстік-батыстан, оңтүстіктен соққан желдің күші кей жерлерде 15-20 м/с болады. Ақтөбе қаласында түнде оңтүстік-батыстан, оңтүстіктен соққан желдің екпіні 16 м/с сақталады.

Қызылорда облысының кей жерлерінде тұман сақталады

<a href="https://kyzylorda-news.kz/">Kyzylorda-news.kz.</a> Ақылы жолдарда төлем алу жүйесін орнату және қызмет көрсетуге қатысты инвестициялық жоба аясында биыл еліміздің тас жолдарына бейнебақылау камералары орнатыла бастайды, деп хабарлайды Индустрия және инфрақұрылымдық даму министрлігінің <a href="http://miid.gov.kz/kk/news/kazakstan-taszholdarynyn-32-uchaskesinde-beyne-bakylau-kameralary-ornatylady">баспасөз қызметі</a>.
Еліміздегі республикалық маңызы бар автомобиль жолдарының 11 мың шақырымында 600 бейнебақылау камерасы орнатылады деп жоспарлануда.
Камералар ел жолдарындағы қозғалысты тәулік бойы бақылайды. Тұтастай алғанда мұндай қондырғылар 2024 жылға дейін еліміздегі республикалық маңызы бар жолдардың 32 учаскесінде пайда болмақ.
Әзірлеушілердің айтуына қарағанда, есептеу қуаттылығы мен арнайы бағдарламалық қамтамасыз ету ақпараттың кең көлемін нақты уақыт режимінде өңдеуге мүмкіндік береді. Осылайша көлік қозғалысының жылдамдығы мен бағыты, жеке деректерді пайдаланусыз көлік құралының типі, сондай-ақ жол жиегімен қозғалып келе жатқан және мемлекеттік тіркеу нөмірінсіз жүрген автокөліктер анықталады. Бейне-бақылау камераларының басты міндеттерінің бірі – белгіленбеген жерде тоқтау, кері бағытта қозғалу, қозғалыстың қарсы жиегімен жүру, жылдамдық режимін асыру сияқты жолда жүру ережелерін бұзудың фактілерін тіркеу. Бұдан бөлек жүйе автоматты режимде жол трафигінің мөлшерін тіркеуге, камераның осіне қарамастан көлік құралының қозғалысын анықтауға мүмкіндік береді.
Жолдарда төлем алу жүйесі инфрақұрылымның кең шоғырын ұсынбақ. Осылайша, оларға стационарлы бақылау пункті, автоматты идентификациялау құралдарының аппаратты-бағдарламалық кешені, мониторинг, деректерді өңдеу, пайдаланушылармен жұмыс орталықтары, сондай-ақ деректерді жіберуге арналған байланыс каналдары жатқызылады.&nbsp;
«QazAvtoJol» ұлттық компаниясы өткен жылдың желтоқсанында республикалық маңызы бар автомобиль жолдары арқылы жүріп өту үшін ақы алу жүйесін орнату және қызмет көрсету бойынша инвестициялық конкурстың қорытындысын жариялағанын еске салайық. Оның қорытындыларына сәйкес қазақстандық және тайваньдық консорциуммен ынтымақтастық туралы келісімшартқа қол қойылған болатын.

Қазақстан тасжолдарының 32 учаскесінде бейнебақылау камералары орнатылады

<a href="https://kyzylorda-news.kz/">Kyzylorda-news.kz.</a> Сауда және интеграция министрлігінің Тұтынушылардың құқықтарын қорғау комитеті Нұр-Сұлтан қаласының сотына «Бек Эйр» компаниясының үстінен тұтынушылардың құқықтарын бұзу туралы талап арыз берді. Бұл туралы Сауда және интеграция министрлігінің <a href="https://www.government.kz/kz/hrpolitic/appointments/v-ministerstve-torgovli-i-integracii-rk-naznacheny-vice-ministry">баспасөз қызметі</a> хабарлайды.
Арызда «Бек Эйр» компаниясы қызметінің тоқтатылуына байланысты сатып алынған авиабилеттердің құны уақытында қайтарылмай, тұтынушылырдың құқықтары бұзылғандығы жазылған.
Комитетке жалпы сомасы 444 434 теңге болатын билеттерді сатып алған 20 адам шағымданды.

ҚР Сауда және интеграция министрлігі Bek Air әуекомпаниясын сотқа берді

<a href="https://kyzylorda-news.kz/">Kyzylorda-news.kz.</a> 2020 жылдың 6 ақпан күні Қызылорда қаласының әкімдігінде ашық есік күні өтеді.
Қызылорда қаласының әкімі Нәлібаев Нұрлыбек Машбекұлы және қала әкімінің орынбасарлары, тиісті сала басшыларының қатысуымен 6 ақпан күні қоғамдық қабылдау өткізіледі. Қоғамдық қабылдау таңғы сағат 09.00-ден 13.00-ге дейін қала әкімдігі жанындағы құқық қорғау қызметі орталығында өткізіледі.
Мекенжайы: Қызылорда қаласы, Ы.Жақаев көшесі №16 №5, 11, 18, 21, 22, 24 маршрутты автобустар қалалық әкімдік жанындағы аялдамаға тоқтайды.
Қоғамдық қабылдау алдын ала жазылуды қажет етпейді.

Қызылорда қаласының әкімі қала тұрғындарын қабылдайды

<a href="https://kyzylorda-news.kz/">Kyzylorda-news.kz.</a> Үстірт мемлекеттік қорығында тағы да қабылан фототұзаққа түсіп қалды. Бұл туралы ҚР Экология, геология және табиғи ресурстар министрлігінің Орман шаруашылығы және жануарлар әлемі комитетінің баспасөз хатшысы Сәкен Ділдахмет мәлімдеді, деп хабарлайды <a href="https://www.inform.kz/kz/ustirtte-fototuzakka-ilingen-kabylan-kazakstannyn-kyzyl-kitabyna-engizildi_a3610927">ҚазАқпарат</a>.
Оның мәліметінше, фототұзаққа қабылан 2019 жылдың желтоқсан айы мен 2020 жылдың қаңтарында екі мәрте түсіп қалған. Ал жалпы Комитет өкілдері Үстіртте қабыланның пайда болғанын 2018 жылы хабарлаған болатын.
<blockquote>
 «Сол тұста қорықта қабыланды зерттеу бойынша экспедиция ұйымдастырылған еді. Экспедиция қорытындысы бойынша, мамандар мысық тұқымдастардың сирек кездесетін түрі – алдыңғы азиялық қабыланның пайда болғанын растаған еді. Осыдан кейін комитет жыртқышты зерттей бастады. Жақында сол қабыланды «Қазақстан Республикасының Қызыл кітабына енгізу» жобасы бойынша мемлекеттік экологиялық сараптаманың оң қорытындысын алдық», – деп жазады Сәкен Ділдахмет.
</blockquote>
Қабыланды Қызыл кітапқа енгізудегі басты мақсат – Қазақстанда аталған аңды сақтау және оған мониторинг жасау бойынша жұмысты жалғастыру болып отыр.
Panthera pardus L.,1758 қабыланы – жыртқыш сүтқоректілердің түрі. Негізінен Африка мен Оңтүстік Азияда мекендейді.
<img src="https://kyzylorda-news.kz/wp-content/uploads/2020/02/4kabylan2.jpg" alt="" />

Үстіртте фотоға түсіп қалған қабылан Қазақстанның Қызыл кітабына енгізілді

<a href="https://kyzylorda-news.kz/">Kyzylorda-news.kz.</a> Елімізде Шығыс Қазақстан, Қарағанды, Түркістан облысы және Алматы қаласында онкологиялық ауруға шалдыққандардың саны өзге өңірлермен салыстырғанда әлдеқайда көп. Бұл жайында Алматыда Қазақ онкология және радиология ғылыми-зерттеу институтында Дүниежүзілік обырға қарсы күрес күніне орай өткен конференция барысында Қазақстан денсаулық сақтау министрлігінің бас онкологы, ҚазОжРҒЗИ басқарма төрайымы Диляра Қайдарова мәлімдеді, деп хабарлайды&nbsp;<a href="https://sputniknews.kz/regions/20200204/12737124/onkolog-qaterli-isik.html">Sputnik Қазақстан</a>.
4 ақпан – Дүниежүзілік обырға қарсы күресі күні. Осыған орай Халықаралық обырға қарсы одақтың бастамасымен Қазақстанда #IamAndIWill ұранымен кең ауқымды ақпараттық-ағартушылық акция өтіп жатыр. Акцияның мақсаты – халыққа онкологиялық аурулардың алдын алу және ерте анықтау туралы мәліметтерді жеткізу, тұрғындардың өз денсаулығына жауапкершілікпен қарауын қалыптастыру, қолжетімді скринингтік тексерулер туралы ақпарат беру.
<blockquote>
 “Қазір Қазақстанда онкоскринингтің 3 түрінен тегін өтуге болады: 40 жастан 70 жасқа дейінгі әйелдер сүт безі обырына, 50 жастан 70 жасқа дейінгі ерлер мен әйелдер колоректалды обырға тексеріле алады. Сондай-ақ, 30 жастан 70 жасқа деейінгі әйелдерге арналған жатыр мойны обырына скрининг жасалады. Аталған үш скрининг емханаларда тегін жүргізіледі”, – деді бас онколог.
</blockquote>
Қайдарованың айтуынша, Қазақстанда онкологиялық ауруға шалдыққандар саны жыл сайын артып келеді. 2019 жылы елімізде 36 345 адам қатерлі ісікке шалдыққан.
<blockquote>
 “Елімізде онкологиялық аурулардың ерте диагностикасы да жақсарып келеді. 36 345 науқастың 27%-ы 0-1 сатыдағы науқастар. Бұл – халық&nbsp; бұл аурудан қорықпай, алдын ала тексеруден өтуге келеді деген сөз.&nbsp; Ал диспансерлік онкологиялық есепте 186 мыңнан аса адам тұр. Ал өткен жылы тіркелгендер саны – 181 мың. Жыл сайын науқастардың саны да, 5 жыл және одан да көп өмірін ұзартқан науқастардың саны да артуда. Орта есеппен әрбір екінші науқас ауруға шалдыққанына қарамастан, ем алу арқылы 5 жылдан аса өмір сүреді”, – деді Диляра Қайдарова.
</blockquote>
Қазақстанда қатерлі ісіктің ең көп тараған түрі – өкпе обыры. Бас онкологтың айтуынша, аурдың кең таралуына тұрғындардың газбен қамтылмай, қыста от жағуының да әсері бар. Өкпе обыры ең алдымен темекі тартудан пайда болады. Алайда темекі тартпайтын әйелдердің бұл аурға шалдығуы экологиялық жағдайға да байланысты. Көмір жағу арқылы шыққан түтін де өкпе обырына әкелуі мүмкін.
<blockquote>
 “Өкінішке қарай, әлемде ең көп таралған өкпе обыры. Елімізде өкпе обырына шалдыққандар науқастардың арасында ең көп көз жұмады. Екінші орында&nbsp; асқазан обыры, үшінші орында сүт безі обыры тұр. Дүниежүзілік денсаулық сақтау ұйымының ұсынысымен өкпе обырына скрининг жүргізіле бастады. Павлодар, Қостанай, Өскемен қалаларында өкпе обыры көп таралғандықтан сол жақтың тұрғындарына тексеру жүргізіп жатырмыз”, – деді онколог.
</blockquote>

Бас онколог қай облыстардың тұрғындары қатерлі ісікке көбірек шалдығатынын айтты

<a href="https://kyzylorda-news.kz/">Kyzylorda-news.kz.</a> Байқоңыр ғарыш айлағынан «Фрегат-М» үдемелі блогы және OneWeb британдық байланыс спутнигі бар «Союз 2.1б» зымыран-тасығышын ұшыруға үш тәулік қалды, деп хабарлайды <a href="https://www.inform.kz/kz/baykonyrdagy-start-keshenine-oneweb-sputnigi-bar-zymyran-ornatyldy_a3610911">ҚазАқпарат</a>.
«Союз 2.1б» зымыранын Байқоңыр ғарыш айлағының № 31 алаңындағы старт кешеніне орнату және шығару мемлекеттік комиссия шешіміне сәйкес жүзеге асырылды. Стартқа дейін бірнеше күн бойы жүйелер мен пайдалы жүк агрегаттары, ракета-тасығыш пен старт кешені автономды сынақтан өткізіледі», деп хабарлайды Роскосмостың баспасөз қызметі.
«Фрегат-М» үдемелі блогы және OneWeb британдық байланыс спутнигі бар «Союз 2.1б» зымыран-тасығышын 2020 жылдың 7 ақпаны күні, Нұр-Сұлтан уақытымен 02:42:41 ұшыру жоспарланған.
Үдемелі блок старттан кейін 10 минуттан соң үшінші сатыдан ажырайды деп есептелген. Одан кейінгі 3,5 сағат ішінде ұшу циклограммасына сәйкес, ғарыш аппараттары «Фрегат-М» үдемелі блогынан бөлінеді.
Айта кетерлігі, бұл Байқоңыр ғарыш айлағынан 2020 жылы ұшырылатын алғашқы зымыран.

Байқоңырдағы старт кешеніне OneWeb спутнигі бар зымыран орнатылды

<a href="https://kyzylorda-news.kz/">Kyzylorda-news.kz.</a> Ішкі істер министрлігі жабылған тасжолдармен жүрген автожүргізушілерге айыппұл салу мәселесін қарастырып жатыр, – деп хабарлайды&nbsp;<a href="https://kaz.tengrinews.kz/kazakhstan_news/kazakstanda-shekteu-koyyilgan-tasjoldarmen-jurgenderge-304802/">Tengrinews.kz</a>.&nbsp;
<blockquote>
 «Осындай мәселе бізде талқыланып жатыр. Естеріңізде ме, Владимир Божко ТЖ министрі (қазір Мәжілістің вице-спикері) болған уақытта ол жүргізушілерді жауапкершілікке тартуды ұсынған (ауа райының қолайсыздығына байланысты тасжолдың жабылуына қарамастан шектеу қойылған жолдармен жүргені үшін) болатын. Қазір осы мәселе қайтадан көтеріліп жатыр», – деді ІІМ ТЖ Комитетінің басшысы Владимир Беккер.&nbsp;
</blockquote>
Оның айтуынша, осындай ережені Әкімшілік жауапкершілік кодексіне енгізуді ұсынған.

Қазақстанда шектеу қойылған тасжолдармен жүргендерге айыппұл салынуы мүмкін

<a href="https://kyzylorda-news.kz/">Kyzylorda-news.kz.</a> Коронавирус күдігіне іліккен 33 науқас әлі де дәрігерлердің бақылауында. Олардың ағзаларынан коронавирус табылмады, деп хабарлайды&nbsp;<a href="https://stan.kz/birtanov-kataydan-kelgen-33-azamattan-koronavirus-tabil-326914/">Stan.kz</a>.
Бұл туралы бүгін Үкімет отырысынан кейін ҚР Денсаулық сақтау министрі Елжан Біртанов айтты
<blockquote>
 «Коронавирус күдігімен аруханаға жатқызылған пациенттер ем алып жатыр. Оларға тестілеу жүргізілді, коронавирус табылған жоқ. Дегенмен, оларда өткір респираторлық инфекция, тұмау болғандықтан ем алуын жалғастырып жатыр, бақылауымызда», – депті министр.&nbsp;
</blockquote>
Денсаулық сақтау министрі&nbsp;бүгінгі мәліметке сәйкес ауруханада әлі 33 науқас ем алып жатқанын атап өтті. Сонымен қатар ол шетелден, тіпті Қытайдан келген адамдардың барлығын бірдей коронавирусқа зертханалық тестілеуден өткізудің еш қажеттілігі жоқ екенін баса айтты.
<blockquote>
 «Аталған зерттеу адамда ауру белгісі болса ғана жүргізіледі. Мұндай дене қызуы, жөтелу сынды белгілердің 99 пайызында ол кәдімгі тұмау болып шығады. Қазір бүкіл 18 млн адамды коронавирусқа тексеріп шығудың ет қажеттілігі болмай тұр. Оның мәні де жоқ», – деді Біртанов.
</blockquote>
Бұған қоса министр коронавируске қатысты ел ішінде аласапрын тудыру қажет емес деп ескертті.
<blockquote>
 «Кейбір адамдар «мен тексеріліп, көңілімді тыныштандырғым келеді» деген ұстаныммен дүрбелең жасайды. Әрине, тексерілуге болады. Бірақ, оның еш мәні жоқ. Бұл үшін оның алғашқы белгілері болуы тиіс. Анализ жасау өте қымбат. Бұл тестіні қазір ғана әзірледік және оң нәтиже көрсетіп отыр. Біз оны көбейтеміз және бұл коронавирус күдігіне іліккен пациенттер жедел тексеруден өтеді дегенді білдіреді»,- деді Елжан Біртанов.
</blockquote>

Елжан Біртанов: Ауруға шалдықты деп күдіктелген 33 азаматтан коронавирус табылмады

<a href="https://kyzylorda-news.kz/">Kyzylorda-news.kz.</a> Мүгедектігі бар адамдар жеке көмекшілермен тікелей келісімшарт жасайды және бұл ереже туыстарына да қолданылады, деп хабарлайды <a href="https://www.enbek.gov.kz/kk/node/365962">ҚР Еңбек және халықты әлеуметтік қорғау министрлігі</a>.
Осы және басқа да өзгерістер ерекше қажеттіліктері бар адамдардың өтініші бойынша ҚР Денсаулық сақтау және әлеуметтік даму министрлігінің «Мүгедектерді оңалтудың кейбір мәселелері туралы» 2015 жылғы 22 қаңтардағы №26 бұйрығына енгізілді.
ҚР еңбек және халықты әлеуметтік қорғау вице-министрі Ерлан Әукеновтің айтуынша, жеке қабылдау, конференция режиміндегі жиналыстар мен жазбаша өтініштер аясында мүгедектігі бар адамдар көбінесе жеке көмекшінің қызметтерін ұсынуға қатысты ескертулер мен ұсыныстар қалдырды.
2020 жылғы шілдеден бастап жеке көмекшілердің қызметтері «әлеуметтік қызметтер» порталына ауысады, содан кейін мүгедектігі бар адаммен жеке көмекшінің арасында келісімшарт жасалады, ерекше қажеттіліктері бар адамның жақын туыстары да жеке көмекші бола алады.
Сонымен қатар, еліміздің барлық облысында көмекшілердің қызметтеріне сағатына ақы төлеудің бірыңғай мөлшері белгіленетін болады. Бұйрықта бұған дейін бұл мәселе реттелмеген болатын, сондықтан әртүрлі өңірлерде жеке көмекшілердің жалақыларында елеулі айырмашылық болды.
Сонымен қатар, жаңа редакцияда жеке көмекшінің және ымдау тілі маманының қызметтерін көрсетуге қарсы көрсетімдерден АИТВ-инфекциясын жұқтырған адамдар санаты алынып тасталды. Бұл олардың құқықтары мен заңды мүдделеріне нұқсан келтірмеуге мүмкіндік береді.

Қазақстан және Қызылорда облысының жаңалықтары