<a href="https://kyzylorda-news.kz/">Kyzylorda-news.kz</a>. Қазалы аудандық сотында «TrueConf» мобильді қосымшасының көмегімен карантин режимін бұзған тұлғаларға қатысты 10 әкімшілік іс қаралды.
<blockquote>
 «Сот отырысында анықталғандай, төтенше жағдай кезінде көлік құралдарының жүруіне шектеу қойылғанына қарамастан кешкі сағат 21.00-ден кейін негізсіз автокөлік басқарып жүрген үш құқық бұзушы ҚР ӘҚБтК-нің 476-бабының 9-тармақшасымен кінәлі деп танылып, екі құқық бұзушы 2 тәулікке әкімшілік қамаққа алынса, 1 құқық бұзушыға 27 780 теңге көлемінде әкімшілік айыппұл салынды», – деп хабарлады аудан әкімдігінің баспасөз қызметі.
</blockquote>
Сондай-ақ, аудан тұрғындарына кешкі сағат 21.00-ден таңғы 6.00-ге дейін жүруге шектеу қойылғанына қарамастан негізсіз көше бойында балалармен топтасып жүрген екі құқық бұзушы ӘҚБтК-нің 476-бабының 6-тармақшасымен біреуі 5 тәулікке, екіншісі 3 тәулікке әкімшілік қамаққа алынды.
Қазалы ауданы, Алтай теміржол бекеті жанындағы көлге серуенге шыққан екі құқық бұзушыға соттың қаулысымен 27 780 теңгеден әкімшілік айыппұл салынды.
Карантин және басқа да мiндеттi санитариялық-эпидемияға қарсы iс-шараларды бұза отырып, көше бойында қорғаныс бет-пердесіз жүрген үш құқық бұзушыға ӘҚБтК-нің 476-бабының 6-тармақшасымен ескерту жазасы тағайындалды.

Қазалылықтар төтенше жағдай кезінде көлге серуендеуге барған

<a href="https://kyzylorda-news.kz/">Kyzylorda-news.kz</a>. Ресейлік фармаколог дәрігері Игорь Федоров үй жағдайында дұрыс дайындалмаған антисептиктің коронавирусты өлтіре алмайтынын мәлім етті, деп хабарлайды <a href="https://kaz.nur.kz/1850807-driger-koldan-zasalgan-antiseptikti-zianyn-ajtty.html">NUR.KZ</a>.
<blockquote>
 «Ең бастысы, мұндай құралдарды үй жағдайында дайындамаңыз, себебі спиртті дұрыс мөлшерде қосып, дұрыс үйлестіре алуыңыз екіталай. ДДСҰ бізге құрамы 62 пайыздан асатын спирт қана вирусты жоя алатынын, қалған антисептик инфекцияны өлтіруге қауқарсыз екенін айтады», – дейді Федоров.
</blockquote>
Оның сөзінше, антисептик дұрыс дайындалмаса, сақтануға көмектесе алмайтын көрінеді.
<blockquote>
 «Сіз қолыңызға антисептик сеуіп, қолыңызды тазартқандай боласыз, ал шын мәнінде, қолыңыз еш тазармады, және бұл өміріңіздегі үлкен қателік болуы мүмкін. Сондықтан спирттің негізінде жасалған кез келген антисептик құралын сатып алыңыз, ол вирусты санаулы минут ішінде жоқ қылады», – деп түсіндірді фармаколог.
</blockquote>
Сондай-ақ, Федоров құрамында спирт жоқ антисептиктердің неліктен нашар екенін айтты.
<blockquote>
 «Құрамында спирті жоқ антисептиктер жайлы айтсақ, олардың құрамында хлогексидин болады, ал ол өз кезегінде тек кейбір бактерияларды жояды, ал вирусқа қарсы мүлде әсер етпейді», – дейді дәрігер.
</blockquote>

Дәрігер қолдан жасалған антисептиктің зиянын айтты

<a href="https://kyzylorda-news.kz/">Kyzylorda-news.kz</a>. Қызылорда қаласының тұрғынына төтенше жағдай режимін бұзғаны үшін айыппұл салынды.
13 сәуірде&nbsp;Nur Otan партиясының облыстық филиалының ғимаратына бірнеше адам жиналған. Олар әлеуметтік көмек тағайындалғандар тізімінде бар ма, жоқ па екенін білуге келген.
Жергілікті атқарушы органдардың өкілдері мен прокуратура қызметкерлері түсіндіру жұмыстарын жүргізгеннен кейін жиналған адамдар тарай бастаған.
Алайда&nbsp;27 жастағы қала тұрғыны карантин режимінің талаптарын сақтамай, полицияның ескертулеріне мүлдем құлақ аспаған. Осыған байланысты&nbsp;оған ӘҚБтК-нің «Төтенше жағдай режимін бұзу» бойынша&nbsp;әкімшілік құқық бұзушылық туралы хаттама жасалды.
Қызылорда қаласының мамандандырылған әкімшілік соты оған 10 АЕК (27 780 теңге) көлемінде айыппұл салды.

Қызылордада 42500 теңгені талап еткен әйел төтенше жағдай режимін бұзғаны үшін жазаланды

<a href="https://kyzylorda-news.kz/">Kyzylorda-news.kz.</a>&nbsp;Бүгін 12:30-дағы мәлімет бойынша облысымызда коронавирустық инфекцияны жұқтырған 2 науқас – Қызылорда қаласынан.
<blockquote>
 “Соңғы тіркелген 2 науқас – Қызылорда қаласының тұрғындары”, – деп мәлімдеді облыстық Денсаулық сақтау басқармасының басшысы Ж. Абдусаметов біздің ақпарат агенттігіне.
</blockquote>

Коронавирус: соңғы науқастар – Қызылорда қаласынан

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында коронавирустық инфекцияны жұқтырған науқастар саны 126 адамға жетті, деп хабарлайды&nbsp;<a href="https://www.coronavirus2020.kz/kz/kazakstandagy-koronavirus-boyynsha-15-sauirdin-12-30-uakytyndagy-epidemiologiyalyk-zhagday_a3638301">www.coronavirus2020.kz.</a>
15 сәуір сағат 12:30-дағы&nbsp;мәлімет бойынша елімізде коронавирус індетін жұқтырған тағы 8 адам тiркелген.
Атап айтқанда, науқастар саны Қарағанды облысында – 1 адам, Нұр-Сұлтан қаласында – 3 адам, Ақтөбе облысында – 1 адам, Ақмола облысында – 1 адам, Қызылорда облысында – 2 адамға көбейген. ⠀

COVID-19: Қызылордада науқастар саны тағы 2 адамға көбейді

<a href="https://kyzylorda-news.kz/">Kyzylorda-news.kz.</a> Қазалы ауданында тұрғындардың қауіпсіздігін қамтамасыз ету, жұқпалы індеттің алдын алу мақсатында карантин жарияланып, бірқатар шектеулер енгізілгені белгілі. Алайда кейбір азаматтар карантин талаптарын бұзып, өзі және өзгенің денсаулығына бей-жай қарауда.
Жақында Қазалы аудандық сотында «TrueConf» мобильді қосымшасының көмегімен төтенше жағдай режимін бұзу фактілері бойынша төрт әкімшілік құқық бұзушылық туралы іс қаралды.
Алдымен азаматша Р-ның ісі қаралды. Ол сағат 18.00-ден кейін азық-түлік дүкенінен сауда-саттық жасағаны үшін ҚР ӘҚБтК-нің 476-бабының 6-тармақшасымен кінәлі деп танылып, 26510 теңге көлемінде әкімшілік айыппұл салынды.
Арал ауданының тұрғыны азаматша Е. де карантин режимін бұзып, көршілес ауданнан Қазалы ауданы аумағына бақылау бекетінен айналып өтпекші болған. Сол үшін де ол ҚР ӘҚБтК-нің 476-бабының 1-тармақшасымен кінәлі деп танылды. Соттың қаулысымен Арал ауданының тұрғынына 27 780 теңге мөлшерінде әкімшілік айыппұл салынды.
Сонымен қатар, азаматтардың негізсіз тұрғын үйден шығуына және автокөліктерімен жүруіне шектеу салынғанына қарамастан, Әйтеке би кентінің тұрғындары 2020 жылдың 9 сәуірі күні сағат 18.00-ден кейін кент көшелерінде көлік жүргізгендері анықталған. Сот қаулысымен азаматтар Н. және Р. ҚР ӘҚБтК-нің 476-бабының 9-тармақшасымен кінәлі деп танылып, оларға 27 780 теңге әкімшілік айыппұл салынды.
Әйтеке би кентінің тұрғыны азамат Ж. өз иелігіндегі азық-түлік дүкенін сағат 18.09-де жауып, карантин уақытын 9 минутқа бұзғаны ескеріліп, ҚР ӘҚБтК-нің 476-бабының 6-тармақшасымен кінәлі деп танылып, ескерту жазасы қолданылды.

Қазалыда төтенше жағдай режимін бұзғандар жазадан құтылмады

<a href="https://kyzylorda-news.kz/">Kyzylorda-news.kz</a>. <a href="https://www.coronavirus2020.kz/kz/kyzylordalykta-koronavirus-ekinshi-marte-alyngan-synamada-anyktaldy_a3638249">coronavirus2020.kz</a> Қызылорда облысындағы соңғы тәулікте жаңадан жаңадан тіркелген КВИ жағдайы бойынша ақпараттарды жариялады.
<blockquote>
 «Қызылорда облысындағы екі науқас Сырдария ауданының тұрғындары. Олар коронавирустық инфекциямен ауырған адаммен қарым-қатынаста болуына байланысты карантиндік стационарға жатқызылған. Екінші мәрте алынған сынамада ғана КВИ оң нәтиже көрсетті», – делінген аталған хабарламада.
</blockquote>

COVID-19: Сырдариялық тұрғында коронавирус екінші мәрте алынған сынамада ғана анықталған

<a href="https://kyzylorda-news.kz/">Kyzylorda-news.kz.</a> «Рухани жаңғыру» Мемлекеттік бағдарламасына биыл 3 жыл толып отыр. Осы азғантай уақыт бедерінде аталған бағдарлама қазақ қоғамына не берді деген сауал әрбір саналы азаматтың көкейінде жүрері анық. ҚР Республикасының Мемлекеттік хатшысы, белгілі қоғам қайраткері Қ.Е.Көшербаевтың «Егемен Қазақстан» газетінде жарияланған «Ұлтты ұлы мұраттар алға жетелейді» атты мақаласы осы сауал төңірегінде салиқалы сөз қозғай отырып, бағдарлама аясында алдағы атқарылар жаңа міндеттер жайында ой бөліседі.
Қырымбек Елеуұлы идеология саласында ту бастан араласқан кәсіби маман ретінде «Рухани жаңғыру» бағдарламасының ұлтқа қажет ұтымды тұстарына терең мән берген. Расында, соңғы жылдары республикамыз бойынша Елбасының аталған мақаласы негізінде қабылданған мемлекеттік бағдарлама көлемінде атқарылып жатқан игі істер мен ілкімді шаралар аз емес қой. Осы орайда Мемлекеттік хатшының мына тұжырымдары ден қоярлық: «Ғасырлар тезінде жоғалтқанымыздың көп екенін ескерсек, рухани дамып, қоғамдық сананы жаңғыртып, ұлттың идеологиясын өрістетуде 3 жыл көп уақыт емес. Сайып келгенде, халықтың рухани жаңғыруы – мәңгілік жүретін процесс. Бүгінгі күні Бағдарламаның 6 бағыты бойынша 13 арнайы жоба іске асырылып жатыр. Ұлттық құндылықтарды жүйелеп, салт-дәстүрімізді, руханиятымызды ұлықтау мақсатында атқарылған шаруа ұшан-теңіз». «Ұшан теңіз» деп ауыз толтыратындай ауқымды шаруалардың атқарылып жатқаны да шындық.
«Рухани жаңғырудың» Тұңғыш президентіміз атап көрсеткен басты бағыттары: бәсекеге қабілеттілік, прагматизм, ұлттық бірегейлікті сақтау, білімнің салтанат құруы, революциялық емес, эволюциялық даму, сананың ашықтығы секілді 6 бағыты бойынша жүзеге асырылып жатқан рухани-мәдени шаралардың молдығы көңіл көншітерлік. Біткен іске сыншы көп. Кемшіліктері болуы мүмкін. Бірақ ел санасын жаңғырту жолында істеліп жатқан сапалы әрі маңызды іс-шаралар да жетерлік. Аталған 13 арнайы жоба шеңберінде шешімін тауып жатқан түрлі деңгейдегі рухани, тарихи, мәдени-әлеуметтік кіші жобаларды да ескеру керек. Мәселен, елімізде жастарға қамқорлық, еріктілер қозғалысы, отбасылық дәстүрді сақтау, ауылға бетбұрыс, ақын-жазушыларымызды қолдау, ішкі және сыртқы туризмді дамыту, ұлттық тарихымыз бен жалпы ұлттық мәдени-рухани санамызды жаңғырту бағытында жасалып жатқан үлкенді-кішілі шаралар жай ғана жалаң сөз емес, ел келешегі үшін игі ниеттен туындаған ізгі мақсаттың нәтижесі. Бұл айтылғандарға Мемлекеттік деңгейде қолға алынып, сатылы түрде жүзеге асырылып жатқан «100 жаңа оқулық» және «Ұлттық жазуымызды біртіндеп латын әліпбиіне көшіру» секілді іргелі жобаларды қосқанда «Рухани жаңғырудың» мәртебесі биіктей түсері хақ.
Тәуелсіздік жылдары ұлт қаламгерлерінің шығармашылық тұрмысы мүшкіл халге түскені жасырын емес. Жазушы қауым капитал қоғамының қатал талаптарына икемделе алмай көп мехнат тартты. Ал өткен 3 жылда мемлекетіміз ұлт әдебиетіне оң көзімен қарап, жанашырлық ниетін іспен дәлелдегеніне күллі әлем куә. Қ.Елеуұлының: «Үш жыл бұрын «Рухани жаңғыру» бағдарламасы жарық көрген сәтте ұлт руханияты төңірегіндегі тұлғалардың қуанышы есімде. Қараусыз баладай қалған әдебиетіміздің бойына қан жүгіріп, зиялы қауымның күпті көңілі бір серпілген еді. Содан бері ұлттық әдебиет өрісін кеңейтуге арналған шаралар тоқтаған емес. Атап айтқанда, 2018-2019 жылдары алғаш рет қазақстандық авторлардың таңдаулы әдеби шығармаларын (поэзия және проза бойынша) БҰҰ-ның 6 тіліне аудару жобасы іске асырылды. Қазіргі қазақ поэзиясының антологиясы мен қазіргі қазақ прозасының антологиясы БҰҰ-ның 5 тілінде шығарылды», – деп ағынан жарылуы да соның айқын айғағы. Мемлекеттік хатшы сонымен қатар балалар әдебиетінің алтын қоры құрылғанын және осы тақырыпта жазатын жазушыларға арнайы гранттар бөлу қарастырылғаны айтады. «Бала – біздің болашағымыз» дейтін ұлт үшін бұл да «Рухани жаңғыру» бағдарламасы аясындағы айта қаларлық әдеби-мәдени шаралардың бір парасы ғана.
Сағат сайын құбылған қазіргі кезеңде сандық технологияның маңызы күннен күнге арта түсуде. Осы орайда «Рухани жаңғыру» бағдарламасын насихаттау бағыты да сандық форматқа жедел көшуді қолға алып отыр. Алдағы уақытта жұмыстың басым бөлігі әлеуметтік желі, электронды БАҚ және онлайн-платформалар негізінде жүргізілмек. Ол үшін үнемді әдеттер қалыптастырып, қаржы, құқықтық және медиасауаттылық деңгейін арттыру мақсатында тәжірибелік кеңестер беретін аудиоподкасттер мен бейнеконтент құрастырылған. «Бұл тұрғыда ақпараттандыру жұмыстарына да жете мән беріліп отыр. Қоғамдағы өзекті ойлар, дәстүр мен ғұрпымыздың бүгінгі көрінісі, ұрпақ тәрбиесіне қатысты келелі әңгімелер, танымдық мақалалар мен сүбелі сұхбаттарды біріктірген Ruh.kz порталы ашылып, сәтті жобаларды жүзеге асырып жатыр. Портал құрамындағы мәдени шараларды біріктіретін «Этноген» сайты халықты жақсы жаңалықтарымен сусындатып отыр», – дейді Қырымбек Елеуұлы.&nbsp;
Пандемия қасыреті көптеген мемлекеттердің шаңырағын шайқалтып, ел экономикасы мен қарапайым халыққа ауыр бейнет тартқызып отыр. Бұл қатерлі вирустың әлегі Қазақстанды да айналып өткен жоқ. Еліміздің бірқатар ірі қалалары мен елді мекендері карантин жағдайында өмір сүруде. Елдің де, ердің де сыналар кезі туған күрделі уақытта ұлт бірлігі мен қоғамдық тәртіптің аса маңызды екендігі айтпаса да белгілі. Алайда кейбіреулер өз басын ғана ойлап, жалған дақпырт пен бір сәттік пендеуи көңіл-күйдің жетегінде кететіндігі өкінішті! Мемхатшы бүгіндері әлемді жайлаған коноравирус індетінің салдарынан туындайтын бірнеше маңызды мәселеге тоқталған. Автордың: «Жаһандық пандемия адамзатқа табиғат алдындағы ұмытқан борышын да еске салды. Отбасылық құндылықтың, туыстық қатынас пен бауырмалдықтың, дәстүрлеріміз бен рухани мұрамыздың қадірін түсіндірді. Мұндайда бақтың тек бағалай білгенге қонатынын ұғынамыз», – деген сөздерінде үлкен астар жатыр. Қырымбек Елеуұлы жазып отырғандай, руханият пен мәдениетке, білім мен ғылымға көңіл бөлу – ұлтты алға ілгерілететін негізгі күш. Рухани қазынамыздың кемел болғаны халық үшін де, қоғам үшін де маңызды. Қоғам қайраткерінің мақаласында ендігі жерде ғылым мен білімге, медицина мен рухани сананың жаңғыруына ерекше көңіл бөлу қажеттігіне баса назар аударылған.
«Бір ақиқат бар: енді әлем бұрынғыдай болмайды… Иә, тереңнен толғап, арыға үңілсек санамызда сілкініс, қоғамда үлкен қозғалыс қажеттілігін пайымдаймыз. Қоғамдық санада көзқарастар жаңғырып, құндылықтарды бағалау көрсеткіші де ауысуда. Әлемді жаппай жаулаған дағдарыс дауылы жаһанды күйзеліске ұшыратты. Бірақ әрбір аласапыранның артында дамудың даңғыл жолы жатады емес пе? Тоқырау кезеңі орта және шағын бизнестің жаңа тынысын ашып, отандық өнімнің өрісін кеңейтері анық. Берілген қолдау мен мүмкіндікті ұтымды қолданар сәт келді», – деген тұжырымдары арқылы автор ұлт келешегіне алаңдаулы ел азаматының позициясын айқын аңдатқан. Әлбетте, бүгінгі әлемді жайлаған жайсыз ахуал елдің экономикасына ғана емес, рухани жан дүниесіне де орасан әсер етуде. Мұндай сын сағатта ұлтын сүйетін Қырекеңдей текті тұлғаның тебіренбей, толғанбай қалуы мүмкін бе?
Мемлекеттік хатшы әр саладағы түйткілді мәселелерге жеке тоқталып, олардың ең маңызды бағыттарына қатысты орнықты ұсыныс, ойлы пікірлерін білдіріпті. Солардың арасында өзіме ұнаған тағы бір мәнді тақырып – автордың ұлттық идеология туралы толғаныстары болды. Шындығында, Қазақ елінің «алдымен экономика» саясатының тасасында үнемі елеусіз қала беретін ұлттық идеологиясы алдағы кезеңде қандай болатындығы ел зиялыларын ғана емес, көзі ашық халықты түгелдей толғандырып отырғаны даусыз. «Бір ел, бір мүдде», «Біз біргеміз» деген ізгі ұранды ту еткен елдің ендігі ұрпақтарының басын қандай ұлттық идея біріктіре алады? Бұл орайдағы Қырымбек Елеуұлының көзқарасы көптің көңілінен шығарлықтай көрінеді.
«Ұлттық сана – адамды мемлекетімен, қоғамымен біріктіріп отыратын рухани феномен. Сондықтан ұлттық идеологияның болашағын қоғам талқысына салу – ең дұрыс шешімдердің бірі. Жаңғырудың қадамдарын халық саналы түрде өзі таңдауы тиіс. Осы мақсатта «Азаматтық алаң» пікірталас клубы жұмысын бастады. Рухани өркендеуіміздің, мұрамызды ұлықтап, құндылықтарымызды жаңғыртуға қатысты барлық тақырыптар ұлт зиялылары мен ғалымдар, жастар мен әлеуметтік топ өкілдерінің талқысына түседі. Аға буын мен жастардың өзара үндестігі, сабақтастығы жалғасады», –дейді Мемлекеттік хатшы. Сөз жоқ, дәл бүгінгідей алмағайып дәуірде ұлттық идеология мемлекетке де, сол мемлекеттің негізін құраушы қазақ халқына да ауадай қажет. Ал шын мағынасындағы нағыз ұлттық идеологияны қалыптастыру қазақ қоғамындағы рухани сананың толықтай түлеп, қайта жаңғыруымен тығыз байланысты деп ойлаймын. ҚР президенті Қ.К.Тоқаевтың «толық адам» концепциясы жайындағы ұлы Абайдың ойларына жүгінуі де осының жарқын дәлелі. Демек, «Рухани жаңғыру» дегеніміз – ұлтты ұлы мұраттарына жетелейтін ұлағатты жол. ҚР Мелекеттік хатшысы Қ.Е.Көшербаевтың аталған мақаласын оқығанда көңілге түйіп, хатқа түсірген алғашқы ой-әсеріміз осындай болды.
Серікбай ҚОСАН,
ақын, түркітанушы,
Қызылорда облыстық «Рухани жаңғыру» орталығының бөлім меңгерушісі

Серікбай Қосан: Рухани жаңғыру – ұлттық сананың бағдаршамы

<a href="https://kyzylorda-news.kz/">Kyzylorda-news.kz</a>. 2018 жылы Netflix-те эфирге шыққан Оңтүстік Кореяның «My Secret Terrius» телехикаясында&nbsp;коронавирустық пандемияға болжам жасалған.
Сериалдың оныншы түсірілімінде&nbsp;қолдан жасалған ауру туралы айтылады. Бұл CoViD-19 дертіне өте ұқсас. Аурудың басты ерекшелігі – соңы өлімге әкелетіні. Сериалда аурудың террористердің араласуымен болатыны айтылады.&nbsp;Оның үстіне, бұл шынайы өмірге қарағанда әлдеқайда жұқпалы.
53-минуттан басталған бір көріністе дәрігер вирустың тыныс алу жүйесіне әсер ететінін айтады. Тіпті инфекцияның инкубациялық кезеңі де болжалды – екі күннен 14 күнге дейін делінген.
<blockquote>
 «Вирус жұқтырғаннан кейін бес минут ішінде өкпеге зақым келтіреді», – дейді дәрігер.
</blockquote>
Сонымен қатар, дәрігер қазіргі уақытта вирусқа қарсы дәрі-дәрмектер мен вакциналар жоқ деп жауап береді.
Келесі кезекте балаларға вирустың таралмауы үшін қолды қалай жуу керектігі көрсетіледі.
Айта кету керек, CoViD-19 бұл адамзат анықтаған коронавирустардың алғашқысы емес. Осы вирустың басқа түрлері, мысалы, SARC-CoV, 2002 жылы коронавирустың өршуіне себеп болған.

2018 жылы шыққан корейлік сериалда коронавирус жайлы айтылған (видео)

<a href="https://kyzylorda-news.kz/">Kyzylorda-news.kz.</a> 2020-2022 жылдарға арналған республикалық бюджет туралы Заңдарына өзгерістер мен толықтырулар енгізілді. Бұл туралы Өңірлік коммуникациялар қызметінің ақпараттық алаңында Еңбек, әлеуметтік қорғау комитетінің Қызылорда облысы бойынша департаменті басшысы Төреахмет Жолымбетов мәлімдеді.
<blockquote>
 «2020 жылдың 1 сәуірінен бастап зейнетақы төлемдері мен еңбек сіңірген жылдары үшін зейнетақы төлемдерінің мөлшері 5 пайызға артты. Мұнан өзге, жаңадан тағайындалған зейнетақы мөлшерін есептеу 46 айлық есептік көрсеткіш (127 788 теңге) мөлшерінен аспауы керек. Сонымен қатар, мемлекеттік базалық зейнетақы төлемі, әлеуметтік жәрдемақы мөлшері, мүгедек баланы тәрбиелеп отырған ата-ана, бала асырап алушыға, қамқоршыға жәрдемақы, бала кезінен бірінші топтағы мүгедектің күтіміне арналған жәрдемақы ең төменгі күнкөріс деңгейінің жоғарлауына байланысты өсті»,- деді Төреахмет Сайлаубайұлы.
</blockquote>
Өз сөзінде сала басшысы бірінші және екінші тізімдердегі мемлекеттік арнайы жәрдемақы, бала тууына байланысты біржолғы төленетін жәрдемақы, бала бір жасқа толғанға дейінгі төленетін жәрдемақы, көпбалалы отбасыларға, көп балалы аналарға ай сайынғы төленетін жәрдемақылар, арнаулы жәрдемақы, айлық есептік көрсеткіштің жаңа мөлшерін ескере отырып көбейгендігін айтты.
Айта кетейік, облыс бойынша зейнетақы мен жәрдемақы алушылар саны – 247,4 мың адамды құрап отыр.
2020 жылдың 1 сәуірінен бастап:
– айлық есептік көрсеткіш (АЕК) – 2 778 теңге;
– зейнетақының ең төменгі мөлшері – 40 441 теңге;
– ең төменгі күнкөріс деңгейі “ЕТКД) – 32 668 теңге;
-мемлекеттік базалық зейнетақы төлемінің ең төмен мөлшері – 17 641 теңге;
-жалақының ең төмен мөлшері – 42 500 теңгені құрайды.
<img src="https://kyzylorda-news.kz/wp-content/uploads/2020/04/zejnetaky-kaz-ishine-1.jpeg" alt="" />

COVID-19: Зейнетақы мен жәрдемақы автоматты түрде есептеледі

<a href="https://kyzylorda-news.kz/">Kyzylorda-news.kz</a>. Қызылорда облысында балық аулауға шыққан екі азаматтың қайығы аударылып, өздері суға кетті. Оқиғалар Арал және Жаңақорған аудандарында тіркелді, деп хабарлайды <a href="https://lenta.inform.kz/kz/kyzylordada-balyk-aulauga-kayykpen-shykkan-eki-adam-suga-ketti_a3638082">ҚазАқпарат</a>.
Жаңақорған ауданы аумағындағы №24 теміржол бекеті аумағындағы Қаракөл көлінде 35 жастағы азаматтың қайығы аударылды. Соның салдарынан ол суға батып кетті. Денесі тұрғындардың көмегімен жағаға шығарылды.
Осыған ұқсас жағдай Арал ауданы Қарашалаң елді мекені аумағында да болды. Ол ауыл аумағындағы көлде қайықтан құлап, суға кетті. Оның денесін де тұрғындар жағаға алып шықты.
<blockquote>
 «Балық аулауға шыққандар көп жағдайды сақтық шараларын ұмытып кетіп жатады. Бұл орны толмас оқыс оқиғаларға алып келеді. Қазір бұдан бұрын суға кеткен 5 адамның денесі табылмай жатыр. Жұртшылықтан сақтық шараларын қатаң сақтауын сұраймыз», – деді Өрт сөндіру және авариялық құтқару қызметі ММ бастығының орынбасары, жедел-құтқару жасағының басшысы Бақыт Ембергенов.
</blockquote>

Қызылордада балық аулауға қайықпен шыққан екі адам суға кетті

<a href="https://kyzylorda-news.kz/">Kyzylorda-news.kz.</a> Қызылордада полиция қызметкеріне тіл тигізген&nbsp;облыс тұрғыны ұсталды.
13 сәуір күні Қызылорда қалалық Полиция басқармасының ғимаратында соттың қаралуын күтіп отырған азаматтардың бірі қызметтік міндетін атқарып тұрған полиция қызметкерінің ескертуін елемей, тіл тигізген.
Полиция қызметкері 23 жастағы жас жігітті сабырлық сақтауын сұрағанымен, ол полицейдің талабын орындаудан бас тартып, билік өкілін өз қызметтерін атқару кезінде әдепсіз сөздермен балағаттаған.
Бүгінгі таңда бұл дерек бойынша ҚР Қылмыстық кодексінің 378-бабының 2-бөлігімен (билік өкілін қорлау) сотқа дейінгі тергеп – тексеру амалдары жүргізіліп жатыр.
Күдіктіге қатысты ешқайда кетпеу туралы қолхат түріндегі бұлтартпау шарасы қолданылды. &nbsp; Егер күдіктінің кінәсі дәлелденсе 160&nbsp;айлық есептiк көрсеткiшке дейiнгi мөлшерде айыппұл салуға не сол мөлшерде түзеу жұмыстарына не 160 сағатқа дейiнгi мерзiмге қоғамдық жұмыстарға тартуға не 40 тәулікке дейінгі мерзімге қамаққа алуға жазаланатын болады.

Қазақстан және Қызылорда облысының жаңалықтары