<a href="https://kyzylorda-news.kz/">Kyzylorda-news.kz.</a> Қазақстан Президенті әскери міндеттілерді арнаулы жиынға шақыру туралы жарлық шығарды. Оның басты мақсаты – халқымыздың қауіпсіздігі мен денсаулығын қорғау.
Шақыруды жергілікті атқарушы органдар жергілікті әскери комиссариаттар арқылы жүргізіледі. Ол үшін тұрғылықты жері бойынша әскери есепте тұрған азаматтарға шақыру қағаздары мен СМС хабарламалар таратылады.
Бұл әскери жиын біздің өңірде мүлде өтпеуі де мүмкін. Төтенше жағдай және карантин кезінде жеткіліксіз ресурстардың орнын толтыру үшін қолға алынған шара.
Сондықтан бұл қабылданған құжаттан саяси астар іздеп, қорқудың қажеті жоқ. «Бір жағадан бас, бір жеңнен қол шығарып» азаматтардың атқарып жатқан қызметтеріне жәрдемдесейік, ағайын.
Тәубә, Қазақстан халқы соғыс-тартыссыз, бейбіт өмір сүруде.
Алайда әлемді шарпыған жұқпалы індет біздің елді де айналып өтпеді. Қайтсек бетін қайтарамыз, ел амандығын сақтап, мамыражай өмірімізді жалғастырамыз деп жан алысып жатқан азаматтарға жәрдем беру – кез келген Қазақстан азаматының бойына сіңген елжандылық қасиет болуы керек.
Тарихтың көптеген сынағынан өткен ата-абаларымыз болашақ ұрпағы үшін алауы лаулап тұрған Ұлы Отан соғысында да кері шегінбеді.
Қолға қару алған соғыс болмағанымен қауіпті аурумен бетпе бет келіп тұрмыз.
Бұл індетті жою жолында біздің алдымызда тұрған міндеттер немқұрайлық пен алаңсыздықты кешірмейді.
Мемлекетімізді қауіпті кеселден сақтап қалу жолында бір отбасының балаларындай біріккендеріңізді қалаймын, құрметті азаматтар!
Қайраддин БАЙМАХАНОВ,
Қызылорда облыстық «Ауғанстан соғысының ардагерлері ұйымы» қоғамдық бірлестігінің төрағасы

Қайраддин Баймаханов: «Осынау қысылтаяң кезеңде бәріміз біз үшін күресіп жатқан азаматтарға жәрдем беруіміз керек»

<a href="https://kyzylorda-news.kz/">Kyzylorda-news.kz.</a> Жаңақорған ауданындағы Шалқия ауылының тұрғындары коронавирус жұқтырғандармен байланыста болған 40 адамды ауылдағы туберкулезбен ауырғандарға арналған шипажайға жатқызуға қарсылық білдірді. Олар осыны айтып 31 арнаның «<a href="https://www.youtube.com/watch?v=OzTIZ6fGv8U">Информбюро</a>» жаңалықтар бағдарламасына жүгінген.
Шалқиялық тұрғындардың сөзінше, ауданда карантинге оқшауланғандар Жаңақорғанның орталығындағы жұмыс істемей тұрған шипажайға жеткізілген.
Әкімдіктегілер науқастармен байланысқа түскендердің саны әлі де анықталып жатқанын айтады. Қазір облыста ең көп індет жұқтырған тұрғындар – осы Жаңақорған ауданынан тіркеліп отыр. Бүгінгі таңда ауданда COVID-19 инфекциясынан 16 науқас емделіп жатыр.
Осыған байланысты, құзырлы орган өкілдеріне Шалқи ауылының тұрғындары жаппай наразылықтарын жеткізген.
Аудандық станционарда оқшаулануы керек болған 87 тұрғынның 40-ы осы ауылдағы туберкулез шипажайына жатқызылмақ болған.
Өйткені 47 адам оқшауланған аудандағы колледж ғимаратына барлығын сыйғызу мүмкін болмапты.
Ал қарсылық танытып, жиналғандар болса:&nbsp;«Карантинге алынғандарды ауылға әкелетінін неге ескертпейді?» деп шулап жатқан көрінеді.
Шағымданғандардың барлығы бір ауыздан билік өкілдерінің бұл әрекеті ауылға қауіпті індетті әкеледі ме деп қорқып отырған сыңайлы.
Дегенмен ауылдықтардың жаппай қарсылықтарынан кейін мамандар коронавирус жұқтырғандармен байланыста болғандардың 87 адамның барлығын аудан орталығындағы шипажайға жатқызыпты.
Бұдан бөлек ауданда 42 тұрғын үй карантиніне оқшауланыпты.

Коронавирус: Жаңақорғандағы ауыл тұрғындары не үшін дүрлікті?

<a href="https://kyzylorda-news.kz/">Kyzylorda-news.kz</a>. Қызылордада азық-түлік қауіпсіздігін сақтау мақсатында бюджеттен 776 миллион теңге бөлінді.
Қызылорда облысы әкімі Гүлшара Әбдіқалықованың төрағалығымен Қазақстан Республикасы Президенті Қасым-Жомарт Кемелұлы Тоқаевтың еліміздегі төтенше жағдайға және дағдарысқа қарсы іс-шараларына қатысты берген тапсырмаларын орындау жөнінде отырыс өтті.
Жиында сәуір айынан бастап аймақ тұрғындарына қосымша қандай көмектердің көрсетілетіндігі талқыланып, нақты міндеттер жүктелді.
<blockquote>
 «Мемлекет тарапынан мұндай халықты қолдау шаралары бұрын соңды болмаған. Сондықтан осындай қиын-қыстау кезеңде мемлекет тарапынан көрсетіліп жатқан көмекті өңір тұрғындарына уақытылы әрі сапалы жеткізу біздің міндетіміз екенін ұмытпаңыздар. Мемлекет басшысы берген тапсырмаларды орындау үшін бюджетті тиімді жоспарлап, қала, аудан әкімдері мен басқарма басшылары тиісті талаптарды тиімді әрі жылдам орындаулары керек», – деді облыс әкімі Гүлшара Әбдіқалықова.
</blockquote>
Сонымен қатар, аймақ басшысы қала, аудан және ауылдық округ әкімдеріне бюджет кірістерін есептеп, шығындарды оңтайлындыруды да тапсырды.
<blockquote>
 «Шағын және орта бизнес субъектілеріне жасалған жеңілдікті ескере отырып, Қызылорда қаласы мен барлық аудан, ауылдық округ әкімдері бюджеттің кірістері мен түсімдерін анықтап, соған сәйкес жылдық жоспарды орындауы қажет», – деді өңір басшысы.
</blockquote>
Сондай-ақ, отырыс барысында бірінші кезекте әлеуметтік осал топ өкілдеріне баса көңіл бөлу керектігі айтылды. Оның ішінде табысынан айырылған азаматтарды ең төменгі жалақы мөлшеріндегі қаржымен, мұқтаж азаматтарды тұрмысқа қажетті заттар және азық-түлікпен қамтамасыз ету жөнінде нақты тапсырмалар берілді.
<blockquote>
 «Жауапты сала мамандары халықтың жекелеген санаттарын азық-түлік және тұрмыстық жиынтықпен қамтамасыз ету жұмыстарын бүгінгі күннен бастап уақытылы қамтамасыз етсін және «Жұмыспен қамтудың 2020 – 2021 жылдарға арналған жол картасын» іске асыру аясында жаңа жұмыс орындарын құруға қатысты кешенді шаралар қабылдасын», – деді аймақ басшысы.
</blockquote>
Облыс әкімі электронды үкімет порталының жұмысын да сынға алды.
<blockquote>
 «Халыққа қызмет көрсету саласындағы жұмыстарды уақытылы орындалуы қажет», – деді ол.
</blockquote>
Сонымен қатар, жұмыссыз ретінде тіркелген және өзін-өзі жұмыспен қамтыған азаматтарға 42 500 теңге көлеміндегі төлемдердің уақытылы төленуін қамтамасыз ету міндеттелді. Ал медицина қызметкерлеріне мемлекет тарапынан қаралған үстемақыға уақытылы қол жеткізу тапсырылды.
Өңірде азық-түлік қауіпсіздігін сақтау тұрғысында облыстық бюджеттен 776 млн теңге бөлінді. Бұл ретте, тауар ең алдымен отандық өндірушілерден сатып алынуы тиіс.
<blockquote>
 «Облыстық ауыл шаруашылығы басқармасы «Байқоңыр» әлеуметтік кәсіпкерлік корпорациясы» АҚ бірлесіп, азық-түлік тауарларын отандық ауылшаруашылығы және өңдеу кәсіпорындарынан кем дегенде 6 айға кепілдендірілген сатып алу механизмі бойынша іске асыру жұмыстарын ұйымдастырсын. Облыстық кәсіпкерлік және туризм басқармасы «Бизнестің жол картасы 2025» мемлекеттік бағдарламасы аясында облысқа қосымша қаржы тарту мәселесін Қазақстан Республикасы Ұлттық экономика министрлігімен пысықтасын», – деді облыс әкімі.
</blockquote>
Жиын соңында аймақ басшысы, қала және аудан әкімдеріне, жауапты сала басшыларына нысандарды жалға алушы кәсіпкерлерді жалдау ақысынан босату, шағын және орта кәсіпкерлік субъектілерінің коммуналдық төлемдерін кейінге шегеру, ауыл кәсіпкерлерін несиемен қамтамасыз ету, қайтарымсыз гранттар беру сынды мәселелерді шешуді тапсырды. Тиісті мекеме басшыларына көктемгі дала жұмыстарын тиісті деңгейде жүргізу міндеті жүктелді.
Мәжілісте облыстық экономика және бюджетті жоспарлау, жұмыспен қамтуды үйлестіру және әлеуметтік бағдарламалар, денсаулық сақтау, кәсіпкерлік және туризм басқармаларының басшылары және облыстық ауыл шаруашылығы басқармасы басшысының міндетін атқарушы, «Азаматтарға арналған үкімет» мемлекеттік корпорациясы» АҚ-ның Қызылорда облысы бойынша филиалының басшысы баяндама жасады.
Қала және аудан әкімдері бейне-байланыс арқылы әлеуметтік-экономикалық жағдай жөнінде есеп беріп, коронавируспен күрес шараларына тоқталды.
<img src="https://kyzylorda-news.kz/wp-content/uploads/2020/04/kyzylorda-776-mln-kaz-1.jpeg" alt="" />
<img src="https://kyzylorda-news.kz/wp-content/uploads/2020/04/kyzylorda-776-mln-kaz-2.jpeg" alt="" />
<img src="https://kyzylorda-news.kz/wp-content/uploads/2020/04/kyzylorda-776-mln-kaz-3.jpeg" alt="" />

Қызылордада тұрғындарды азық-түлікпен қамтамасыз ету үшін 776 миллион теңге бөлінді

<a href="https://kyzylorda-news.kz/">Kyzylorda-news.kz.</a> Кеше, яғни, 2 сәуірде Қазақстан Республикасының Президенті Қасым-Жомарт Тоқаевтың «Әскери міндеттілерді арнаулы жиындарға шақыру туралы» №296 Жарлыққа қол қойды.
Бұл шара, ең алдымен, еліміздегі қиын-қыстау кезеңде, карантин жағдайында қоғамның қауіпсіздігін қамтамасыз ету және Төтенше жағдай режимін ұстап тұруда мемлекетке жәрдемдесу үшін қажеттігін баса айтқым келеді.
Мемлекет басшысының аталған Жарлығын еліміздің әрбір тұрғыны салмақтап, терең түсініп, байыппен қарауы керек. Себебі, бұл – бәріміздің, отбасымыздың, жақындарымыздың қауіпсіздігі үшін жасалып оытрған қадам.
Бұдан қорқудың, үрейге бой алдыру, босқа дүрлігудің қажеті жоқ.
Өйткені, заңға сәйкес, арнаулы жиындарға шақырылғандарға әскери қызметшілердің барлық жеңілдіктері қолданылады. Атап айтқанда, тамақтану, медициналық қамтамасыз ету, киім-кешек, жеке инвентармен жабдықтау, тасымалдау мәселелері түбегейлі шешілген.
Ерекше атап өтерлігі – арнаулы жиындарға шақырылғандар тек тұрғылықты жері бойынша қызмет өткеретін болады. Жиындарға тартылған азаматтар басқа өңірлерге мүлдем жіберілмейді.
Бүгін Қорғаныс министрі Нұрлан Ермекбаев атап өткендей, жиынға шақырылғандар күндіз қызмет орындарында болып, кешке үйлеріне қайтатын болады.
Ең бастысы – жиынға қатысушылар жалақы алатын болады.
Бұл жиындарға шақырылған барлық жұмыс істейтін азаматарға олардың жұмыс орны бойынша орташа айлық жалақы төленетін болады. Аталған жұмыс орындары жиындарға қатысудың барлық мерзімінде сақталады.
Ал, жиынға қатысушы жұмыс істемейтін азаматтарға да ең төменгі жалақы төленетін болады.
Бұл да – жұмыссыз азаматтарға беріліп отырған үлкен мүмкіндік.
Шақыру әр өңірдің қажеттілігіне қарай ғана шағын топтармен өтетінін ескерсек, еліміздің қауіпсіздігі үшін барлық азаматтар бұған жұдырықтай жұмылып атсалысуы қажет.
Ғалымжан ТАСЖАНОВ,
Қызылорда облысы әкімінің әскери қауіпсіздік және қорғаныс мәселелері жөніндегі көмекшісі

Ғалымжан Тасжанов: «Әскери міндеттілерді арнаулы жиындарға шақыру – жақындарымыздың қауіпсіздігі үшін қажет»

<a href="https://kyzylorda-news.kz/">Kyzylorda-news.kz</a>. Қазақстанда Міндетті әлеуметтік сақтандыру қорынан берілетін төлемге өтініш беруге арналған қосымша сервис іске қосылды. Бұл туралы Еңбек және халықты әлеуметтік қорғау министрлігі хабарлады.
<blockquote>
 «Президент Әкімшілігінің тапсырмасы бойынша ҚР Еңбек және халықты әлеуметтік қорғау министрлігі Президент Әкімшілігі жанындағы құрамына IT-сарапшылары мен IТ-компаниялары кіретін IT-штабымен бірлесіп, ҚР Цифрлық даму, инновациялар және аэроғарыш өнеркәсібі министрлігінің көмегімен төтенше жағдай кезеңінде табысынан айырылуға байланысты Мемлекеттік әлеуметтік сақтандыру қорынан (бұдан әрі – МӘСҚ) берілетін төлемдерге өтініштер беру үшін сервис құрды», – делінген Еңбек министрлігі таратқан ақпаратта.
</blockquote>
Ведомство мәліметінше, сервис Enbek.kz электрондық еңбек биржасының алаңында ашылды.
МӘСҚ-тан ең төменгі жалақы – 42 500 теңге мөлшерінде төлемге өтініш беру үшін келесі қадамдарды орындау қажет:
1) https://42500.enbek.kz сайтына кіріңіз;
2) «жәрдемақы алу 42 500» таңдаңыз;
3) өтініш берушінің аты-жөні, ЖСН, IBAN немесе жұмыс берушінің БСН, электронды поштасы көрсетілген нысанды (форма) толтырыңыз;
4) нысанды (форма) жіберу керек;
5) жүйе телефон нөмірін сұрайды;
6) телефон нөмірін SMS арқылы жіберілген кодпен растау;
7) өтініш жіберілді.
Өтінішті өңдеп, «Азаматтарға арналған үкімет» мемлекеттік корпорациясы» КЕАҚ деректерін тексергеннен кейін, өтініш беруші қабылданған шешім туралы SMS-хабарлама алады. Ақпарат төлемді тағайындау және төлеу үшін МӘСҚ-қа жіберіледі.
Естеріңізге сала кетейік, төтенше жағдайлар кезінде табысынан айырылу жағдайына байланысты МӘСҚ-тан әлеуметтік төлем келесі санаттағы азаматтарға тағайындалады:
– орта, шағын және микробизнес субъектілерінің қызметкерлері;
– жеке кәсіпкерлер (бұдан әрі – ЖК);
– жеке практикамен айналысатын адамдар (нотариус, жеке сот орындаушысы, адвокат, кәсіби медиатор) (бұдан әрі – ЖП);
– бірыңғай жиынтық төлемді төлеушілер;
– нысанасы жұмыстарды орындау (қызметтер көрсету) болып табылатын азаматтық-құқықтық сипаттағы шарттар (бұдан әрі – АҚС) бойынша табыс табатын, салық агенттері олар үшін міндетті зейнетақы жарналарын аударған адамдар;
– карантин енгізілген елді мекендердегі ірі бизнес субъектілерінің қызметкерлері.
Өтінімдерді қарастырудың және әлеуметтік төлемдерді тағайындаудың жалпы мерзімі – 3 жұмыс күні.

42 500 теңгеге өтініш беруге арналған қосымша сервис іске қосылды

<a href="https://kyzylorda-news.kz/">Kyzylorda-news.kz.</a> Еркін күрестен елімізде 4 спортшы əлемдік рейтингте үздік үштіктің қатарында болса, оның екеуі – Сыр балуандары.
Олар: 65 келіде әлем чемпионатының финалисі Дәулет Ниязбеков пен&nbsp; 79 келідегі Ғалымжан Өсербаев.
Айта кетейік, былтыр Нұр-Сұлтан қаласында өткен Əлем чемпионатында жерлесіміз Дəулет Ниязбеков 65 келі салмақта&nbsp; күміс жүлдені иеленіп, Токио Олимпиада ойындарының жолдамасын жеңіп алған болатын.

Сыр спортшылары əлемдік рейтингте  үздік үштікке енді

<a href="https://kyzylorda-news.kz/">Kyzylorda-news.kz.</a> Қызылорда облысы әкімінің орынбасары Наурызбай Байқадамов «Qyzylorda» телеарнасының тікелей эфиріне шығып, халықпен тілдесті.
Мутацияға ұшыраған, басқа вирустан бірнеше есе тез жұғатын коронавирус пандемиясы 180-ге жуық елге тарап, біздің мемлекетімізге де жетті. Қазақстан бойынша Қызылорда облысы коронавирус індетін жұқтырудан көш басында тұр. Соған байланысты тікелей желіде 1 сағатқа жуық уақыт аралығында Наурызбай Байқадамов халықтың көкейіндегі маңызды сауалдарға жауап берді.
<blockquote>
 «Дәл қазіргі уақытта облыс аумағы қатаң бақылауда. 1 сәуірден бастап біздің аймақ та карантин режиміне көшті. Енді сыртта топтасып немесе жай жүрген азаматтар міндетті түрде жазаланады», – деді облыс әкімінің орынбасары.
</blockquote>
Бұл індеттің Қызылорда облысындағы ошағы Оңтүстік Кореядан келген азаматшадан анықталғаны белгілі. Дәл қазіргі таңда вирус Қызылорда мен Жаңақорған, Шиелі, Қармақшы аудандарына тарап отыр. Наурызбай Байқадамов бір отбасыдағы 8 адамның бұл инфекцияны жұқтырғаны өте қауіпті жағдай екенін айтты.
<blockquote>
 «Әр адам өзі үшін жауапты. Сондықтан санитарлық талаптарды сақтап, маскасын киіп, отбасыдан бір адам ғана дүкенге баратын жағдайда болу керек. Бұл пандемияға салғырт қарауға болмайды. Ауа жұтқанның барлығы қауіпте. Ауа жұтпайтын адам болмайды. Осыны халық түсінуі керек», – дейді Наурызбай Сейітқалиұлы.
</blockquote>
Пандемия кезінде облыстың азаматтары да халыққа барынша көмек көрсетіп жатыр.&nbsp; «Біз біргеміз» акциясы аясында әлеуметтке жағынан аз қамтылған отбасылар азық-түлік, тұрмыстық заттармен қамтылды.
<blockquote>
 «Акция аясында облыс көлемінде бірнеше қайырымдылық шарасы жасалды. Бұған қоса, кәсіпкерлер де кәсіп нысанын карантинге пайдалануға келісімін беріп отыр. Мысалы, Қайрат Боранбаев «Қызылорда» қонақүйін, Мұрат Сәрсенбаев есімді азамат та қонақүйін, Раушан Базарбаева жеке клиникасын медицина бағытында жұмыс істеуге тегін пайдалануға берді. Міне, нағыз жомарт азаматтар. Осындай қиын-қыстау кезеңде қол ұшын созып жатқан жандар аз емес, – деді ол.
</blockquote>
Наурызбай Байқадамов карантинде жатқан азаматтардың жағдайы бойынша да ақпарат бөлісті.
<blockquote>
 «Бокста, карантинде бақылауда жатқан, ем алып жатқан азаматтар азық-түлікпен толық қамтылған, уақытылы беріліп отырады. Бірақ сырттан тағам кіргізуге рұқсат етілмейді. Өйткені тамақ жеткізіп тұрған азаматқа да жұғу қаупі бар», – дейді ол.
</blockquote>
Білім беру ұйымдары 6 сәуірден бастап қашықтан оқытуға көшеді. Бірақ аймақта бұл жүйе бойынша үйден отырып білім алуға мүмкіндігі келмейтіндер де бар.
<blockquote>
 «Облыста қашықтан оқуға жағдайы келмейтін отбасылар бар. Мәселен, интернет желісі тартылмаған ауыл-аймақтардағы оқушылар теледидар арқылы білімін жалғастырады. Ал үйінде компьютері болмаған оқушылар мектеппен келісу арқылы компьютермен қамтылады. Интернетке қаражаты жоқ отбасыларға қалталы азаматтар тарапынан көмек беріледі», – деді Н. Байқадамов.
</blockquote>
Зейнеткерлердің сыртқа шықпай-ақ, үйде отырып зейнетақысын алу мәселесі де қарастырылып жатыр. Қызметкерлер үйде отырып онлайн жұмыс істеуге көшті. Санитарлық тазалық, дезинфекция да күшейтіледі.
Эфир соңында Наурызбай Байқадамов халықты сабырға шақырып, әрбір адам өзінің денсаулығы үшін жауапты екенін алға тартты. Облыс әкімінің орынбасары сыртқа шықпай үйде болуға, Президент үндеуін, медицина қызметкерлерін қолдауға шақырды.

Наурызбай Байқадамов тікелей эфирде облыс тұрғындарының сауалдарына жауап берді

<a href="https://kyzylorda-news.kz/">Kyzylorda-news.kz.</a> Қызылорда облысында коронавирустық инфекция жұқтырғандар саны 28 адамға жетті. Соңғы екі оқиға Қармақшы және Шиелі аудандарында тіркелген.
<blockquote>
 “Ауданда коронавирус инфекциясы нақтыланған 3 жағдай тіркелді. Науқастардың жағдайлары орташа, ауыртпалықта, емдерін толығымен алуда&nbsp;. Бұл науқастармен тығыз қарым-қатынаста болған және жақын туысқандары провизорлық стационарда және үй карантиніне оқшауланып, анализдер алынып, тексерілуде”, – делінген <a href="https://m.facebook.com/story.php?story_fbid=615846635664678&id=100017180408938">Қармақшы аудандық ауруханасы Facebook-тегі</a>&nbsp;парақшасында.
</blockquote>
Мұндай жағдай дәл осы уақытта Шиелі ауданында да тіркелген.
<blockquote>
 “Өкінішке орай, Шиелі ауданы бойынша COVID-19 коронавирус инфекциясы бойынша 3-ші адам тіркелгендігін мәлімдейміз. COVID-19 коронавирус инфекциясын жұқтырған науқас осы күнге дейін карантинге жатқызылған азаматтар арасынан анықталды. Осыған орай, Шиелі кентінің тұрғыны болған науқастың тұрған үйі мен үй айналасына және тұрғылықты көшесіне дезинфекция жұмысы жүргізілетіндігін хабарлаймыз. Науқаспен қарым-қатынаста болған азаматтардың барлығы карантинге жатқызылды, байланыста боғандар әлде де анықталатын болады”, – делінген Шиелі аудандық ауруханасы таратқан хабарламада.
</blockquote>

Қызылордада коронавирус жұқтырғандар саны 28 адамға жетті

<a href="https://kyzylorda-news.kz/">Kyzylorda-news.kz.</a> Қазақстан Республикасының Қорғаныс министрі Нұрлан Ермекбаев әкімдерге әскери міндеттілерді арнайы жиындарға шақырудың тәртібін түсіндіріп берді.
<blockquote>
 «Бұл жарлықтың негізгі мазмұны – әкімдерге әскери міндеттілерді арнайы жиындарға шақыруға құқық және мүмкіндік беру. Басты мақсат – халқымыздың қауіпсіздігі мен денсаулығын қорғау. Аталған жарлық әкімдерді аумақтық әскерді толығымен жинауды міндеттемейді. Жиын заңға сәйкес үш айға дейін созылуы мүмкін. Әйтсе де жиынның мерзімін өз қажеттілігіне қарай жергілікті атқарушы орган белгілейді. Олар өз қаулысымен жиындарды ұйымдастырып, өңірдегі қажеттілік пен барлық шараның орындалуына қарай ертерек аяқтауына мүмкіндік болады», – деді Нұрлан Ермекбаев ОКҚ-да өткен баспасөз мәслихатында.
</blockquote>
Министрдің айтуынша жекелеген аймақтардың әкімдері 10 күндік, кейбірі одан да ұзақ әскери жиынды ұйымдастыра алады. Нұрлан Ермекбаев, сонымен қатар, мұндай жиын заң бойынша 3 айға созылуы мүмкін екенін айтып өтті.
<blockquote>
 «Кейбір аймақта әскери міндеті бар азаматтарды шақырудың мүлде қажеттігі болмайды. Әскери бөлім орналасқан аймақтарда әскери қызметшілердің біршама бөлігі қазірдің өзінде жұмысқа тартылып, бекітілген шаралар бойынша жұмыстарды атқаруда. Әскери қызметшілердің бір бөлігі басқа аймақтарға жөнелтілген. Бәрі де елдің жоғарғы әскери басшылығы мемлекеттің қорғанысқа қабілеттігін де, Қарулы күштердің жауынгерлік дайындығын да есепке алып отырғанын түсіну керек», – деді ол.
</blockquote>
Қорғаныс министрі брифингте бұл әскери жиыннан кімдердің босатылатынын да айтып берді. Оған бірнеше санаттағы тұрғындар кіреді.
<blockquote>
 «Бізде жасы үлкен азаматтар, отбасылық жағдайына және денсаулығына байланысты әскери жиынға шақырылмайтындар бар. Заңға сәйкес әскери жиындардан азаматтардың мына санаттары босатылады: қорғаныс, тәртіпті қамтамасыз етумен байланысты мемлекеттік органдарда қызмет ететіндер, авиациялық персонал, егін науқаны кезінде ауыл шаруашылығында жұмыс істейтіндер, педагогикалық қызметкерлер, күндізгі оқуда білім алатындар, әйелдер, 18 жасқа дейін үштен көп баласы бар азаматтар және тергеу және процессуалдық әрекеттер жүргізіліп жатқан тұлғалар, жергілікті атқару органдарының депутаттары», – деді министр.
</blockquote>
Еске сала кетсек, кеше Қазақстан Президенті <a href="https://kyzylorda-news.kz/kogam/qazaqstanda-aeskeri-mindettiler-arnawly-zhiyndargha-shaqyrylatyn-boldy-53761/">әскери міндеттілерді арнаулы жиынға шақыру</a> туралы&nbsp;жарлық шығарған еді.
Атап айтқанда қазақстандықтар жекелеген өңірлерде медициналық қызмет, тасқынмен күрес және дезинфекция жұмыстарына&nbsp;шақырылады.
<blockquote>
 «Біздің Қарулы күштер шоғырланған өңірлерде күш бар. Ал олар жоқ жерге медициналық даярлығы бар, қазір денсаулық сақтау саласына тартылған азаматтар шақырылады. Сонымен бірге қызметте тәжірибесі бар мамандар блокпостарда, елдімекендерді патрульдеуге және ол жерлерді санитарлық тұрғыда тазартуға жұмылдырылады. Бәлкім, кейбір аймақта көктемгі су тасқынының салдарын жою процесіне көмектеседі», – деген болатын Руслан Шпекбаев ҚазАқпарат тілшісіне <a href="https://www.inform.kz/kz/kazakstandyktar-zhekelegen-onirlerde-medicinalyk-kyzmet-taskynmen-kures-zhane-dezinfekciya-zhumystaryna-shakyrylady_a3633085">телефон арқылы айтқан</a> сөзінде.
</blockquote>
Сонымен қатар, ол мұндай тәжірибе бүкіл аймақта жүргізілетінін жеткізді. «Аймақтарда әскердің жұмысқа тартылғанын білесіздер. Бірақ олар жетіспейді. Әскери бөлімдер дислокациясы жоқ орындарға бәлкім адамдарды тартамыз. Алайда бұл ретте адам саны, міндеті мен мерзімі бойынша шешімді Бас штабтың келісімімен әкімдік қабылдайды», – деді ол.
ҚР Бас штабы бастығының орынбасары сондай-ақ бұл жұмысқа тартылу кезіндегі төлем жайлы да айтып өтті.
<blockquote>
 «Жұмыссыз қалған азаматтар минималды айлық төлемақыны алады. Жұмысынан тартылған азаматтар айлық жалақысына ие болады. Ең бірінші кезекте нақты аймақтарға керекті мамандарды іске тартамыз. Әр өңірде жағдай әртүрлі. Яғни, адамдар таңертең өз міндетін орындау үшін жұмысқа келгендей тәртіпте жүреді. Тұрғылықты мекені бойынша барады. Кешке үйлеріне қайтады», – деді Руслан Шпекбаев
</blockquote>

Президент жарлығы: Әскери міндеттілер қандай жұмыстарға тартылады және қанша уақытқа созылуы мүмкін?

<a href="https://kyzylorda-news.kz/">Kyzylorda-news.kz.</a> ҚР Ішкі істер министрі Ерлан Тұрғымбаевтың тапсырмасы бойынша түзеу мекемелерінде жазасын өтеп жатқандар бір реттік және бірнеше реттік қолданыстағы бетперде тігуді бастаған болатын.
Қызылорда қаласындағы ЗК-169/5 мекемесінің аумағындағы «Еңбек-Қызылорда» РМК тігін цехында арнайы кәсіби білімі бар сотталғандар көп реттік бетперде тігумен айналысуда. Бүгінгі күнге барлығы 14250 дана бетперделер тігілді.
Еліміздің Ішкі істер министрі ҚАЖК-нің және «Еңбек» РМК-ның басшылығына бетперде тігіп жатқан сотталғандарға жалақы төлеуден басқа, оларды ақшалай сыйақымен көтермелеуді тапсырған болатын.
Министрдің осы тапсырмасына сәйкес, ҚР ІІМ ҚАЖ комитеті ҚАЖ мекемелерінің «Еңбек» шаруашылық жүргізу құқығындағы РМК-нің 01.04.2020 жылғы №9-АХД бұйрығы бойынша, ЗК-169/5 мекемесінің тігін цехында бетперде тігіп жатқан сотталғандарға сыйақы төленді.
<blockquote>
 «Бүгінде әлем жұртшылығын алаңдатып отырған коронавирус дерті Қазақстанға да жетті. Осы қысылтаяң шақта темір торда отырсақ та еліміздің, халқымыздың амандығын тілеп, қолымыздан келгенше бетперде тігіп жатырмыз. Қиын сәтте қол ұшын созып, көмектесу азаматтық парызым деп білемін. Еңбегімізге қарай жалақымыздан бөлек сыйақы беріп жатқан, Ішкі істер министрлігіне алғысымыз шексіз», – дейді жазасын өтеуші А.есімді азамат бізбен әңгімесінде.
</blockquote>
<img src="https://kyzylorda-news.kz/wp-content/uploads/2020/04/img-20200403-wa0005-1.jpg" alt="" />
<img src="https://kyzylorda-news.kz/wp-content/uploads/2020/04/20200320_152236-scaled.jpg" alt="" />

Қызылордада  бетперде тіккен сотталғандарға ақшалай сыйақы төленді

<a href="https://kyzylorda-news.kz/">Kyzylorda-news.kz.</a> Мемлекет басшысының Төтенше жағдай режиміне байланысты мәлімдемесін толық тыңдап шықтым. Бұл үндеу елімізге енген індеттке қарсы елді бірлік пен сабырлылыққа шақыру болса, екінші жағы бүкіл әлемді жайлап келе жатқан жаппай дағдарысқа қарсы күресудің амал шараларын жария етіп отыр.
Мәлімдемемен танысқан азаматтардың жүрегіне болашаққа деген сенім ұялап, жағымды жаңалықтарға қуандық. Жасыратыны жоқ, «Коронавирус пандемиясы» жайлаған әлемді көріп, ондағы қасіреттер мен ажал құшқандармен хабардар болып, бізде қалай болар екен деп уайымдап оытрған бүкіл қазақ еліне бұл мәлімдеме мемлекет атынан жасалынған зор сенім мен кепілдік деп санаймын.
Мысалға Президенттің үндеуінде 9-10 мәселе атап көрсетілсе, солардың ішінде басты тақырыптары мыналар деген болар едім.
Біріншіден, халықтың әлеуметтік осал топтарына зейнетақы, мемлекеттік жәрдемақы және атаулы әлеуметтік көмектің 10 пайызға индексациялануы оған бөлінген қомақты қаржысы.
Екіншіден, халыққа едәуір жеңілдік жасап, МӘМС жүйесіне сақтандырылмағандарға 1 шілдеге дейін бұрынғы қалпында қызмет алуларына берілген кепілдік.
Үшіншіден, кәсіпкерлер мен шағын орта бизнесті қолдау, шаруа қожалықтарға басымдық берілуі құптарлық жағдай. Сол үшін бюджеттен 70 млрд. теңге көктемгі егіске өзге бағдарламадан 100 млрд. теңге бөлінуі халықтың қол жетпейтін осы кезеңдегі арман мақсаты деуге болады.
Төртіншіден, салықтың түрлеріне жасалынып жатқан жеңілдіктері, сондай-ақ, қазіргі таңдағы уақытша жұмыссыз қалған азаматтарды, өзін өзі жұмыспен қамтып жүргендерді қолдауға, яғни, 3 млн адамға ең төменгі орташа жалақы 42500 теңгеден төленетіндігі.
Бесіншіден, соңғы айтатын мәселе нағыз көктем мезгілінде шаруаларға ең қажетті жанар-жағар майдың нарықтық бағадан 15 пайызға төмендетіп, 390 мың тонна жанар майды 165 теңгеден халыққа жеңілдікпен сатылуы дұрыс қабылданған шешім деп есептейміз.
Қадірлі жерлестер! Президентіміз Қасым-Жомарт Кемелұлының жаппай індетке қарсы және әлемдік дағдарыстан шығу жолдарын қарастырып жасаған мәлімдемесін бүкіл сырбойылықтар, оның ішінде, жаңақорғандықтар болып қолдайтындығымызды жеткіземін.
Ақылбек ЖӘНІБЕКОВ,
«Nur Otan» партиясының мүшесі,
Жаңақорған аудандық қоғамдық кеңесінің төрағасы

Ақылбек Жәнібеков: «Президент мәлімдемесі – келешекке деген кепілдік»

<a href="https://kyzylorda-news.kz/">Kyzylorda-news.kz.</a> Төтенше жағдай кезіндегі 42 500 теңге мөлшеріндегі төлемді енді eGov порталында электронды қолтаңбасыз-ақ, SMS-пен авторизациялау арқылы алуға болады.
Қызмет түрін қолдану үшін eGov парақшасындағы&nbsp;<a href="https://egov.kz/cms/kk">«Төтенше жағдай кезінде 42 500 теңге төлеу</a>» қызметін таңдайсыз.
Cосын бірреттік құпиясөзді таңдап, ЖСН мен телефон нөмірін жазу қажет.
Содан хабарламадағы сандарды жазып, келісемін және әрі қарай деген функцияны таңдау керек.
Электронды өтінішті толтырған соң сізге қатысты мәліметтің барлығы және өтініштің нөмірі шығады. Өтініштің қаралып жатқаны да көрсетіледі. Статусты өзіңіздің жеке кабинетіңізде тексере аласыз.
Жүйеде сіздің мәліметтер базасында тіркелмегеніңізді көрсетсе, сізге көрсетілген сілтемеге өту керек болады. Міндетті түрде тіркелу керек. Әйтпесе жүйе төлемді нақты сіз алатынын білмейді.
Базада тіркелу үшін сіз ХҚКО қызметкерімен видеобайланыс арқылы сөйлесесіз. Сосын бірреттік құпиясөзді тересіз. Азаматтарды базаға тіркейтін 500-ге жуық ХҚКО қызметкері байланыста болады.

Қазақстан және Қызылорда облысының жаңалықтары