<a href="https://kyzylorda-news.kz/">Kyzylorda-news.kz.</a> Мәдениет саласы бойынша «Жұмыспен қамту 2020-2021» жол картасы 22 жобаны қамтиды. Бүгінде 21 жоба бойынша мемлекеттік сатып алу конкурстары аяқталып, мердігерлер анықталды. Бұл туралы Өңірлік коммуникациялар қызметінің ақпараттық алаңында облыстық мәдениет, мұрағаттар және құжаттама басқармасының басшысы Мира Абуова баяндады.
<blockquote>
 “Қазіргі таңда облыстық мемлекеттік сатып алу басқармасы арқылы Шиелі аудандық тарихи-өлкетану музейі ғимаратының қосымша құрылыс жұмысына қайта конкурс жарияланып, жеңімпаз мердігермен келісім-шартқа отыру жұмыстары жүргізілуде. Ал, облыстық филармония ғимаратының қосымша құрылыс жұмысына, Қазалы ауданы Ақсуат, Шиелі ауданы Жиделіарық елді мекендеріндегі 150 орындық ауылдық клуб құрылыстары мен Жаңақорған ауданы Түгескен елді мекеніндегі ауылдық клубты қайта жаңғырту жұмыстарына жеңімпаз атанған мердігер мекемелермен келісім-шарт жасалды”,-деді Мира Абуова.
</blockquote>
Биыл облыстағы 3 мәдениет нысанына күрделі жөндеу жұмыстары жүргізіледі. Олар “Қызылорда облыстық мемлекеттік архиві” КММ-нің Арал аудандық архиві филиалы ғимараты, Шиелі ауданы Бірлестік ауылындағы “Жаназар батыр” ауылдық мәдениет үйі және Жаңақорған ауданы Жаңаарық ауылындағы ауылдық клубы. Сондай-ақ, ағымдағы жылы 14 жоба жөндеу жұмыстарына бағытталады.

Қызылордада мәдениет саласы бойынша 22 жоба жүзеге асырылады

<a href="https://kyzylorda-news.kz/">Kyzylorda-news.kz.</a> Қармақшы ауданының әкімі Мұса Қалдарбеков Дауылкөл, ІІІ-Интернационал, Жаңажол ауылдық округтері мен Жосалы кентінде орналасқан шағын өндірістік цехтарды аралап жұмыс барысымен танысты.
Аудан басшысы Дауылкөл ауылдық округіндегі жеке кәсіпкер Ақшолпан Шыныбекованың наубайханасын аралап көрді.
Жеке кәсіпкер А. Шыныбекова «Шағын наубайхана» бизнес жобасы аясында 505 мың теңге қайтарымсыз грантын ұтып алған болатын. Қазіргі таңда ауыл тұрғындарының нан өнімдеріне сұранысын қамтамасыз етіп отыр.
Келесі нысан ІІІ-Интернационал ауылдық округіндегі жеке кәсіпкер Оңалбай Бүркітбайдың «Мал азықтық жем-шөп дайындау цехы» бизнес жобасымен танысты. Өткен жылы жеке кәсіпкер Оңалбай Бүркітбай «Бизнес – кеңесші» оқу курсынан өтіп, бизнес жобасын сәтті қорғап шыққан болатын.
Сонымен бірге аудан басшысы «Жаңажол» ауылдық округіндегі құрылыс материалдарын өндіру цехының жұмысымен және дәнекерлеу цехының жұмысының іске асырылу барысымен танысты.
Аталған цехтар үстіміздегі жылдың наурыз айында жұмысын бастаған болатын. Қазіргі таңда тұрғындарға қажетті құрылыс бұйымдарын шеге, тор сым тағыда басқа қажетті өнімдермен қамтамасыз етуде.
Аудан әкімі Жосалы кентіндегі шағын кәсіпорындарды аралау барасында жеке кәсіпкер М. Қалбаевтың пластик терезелер мен есіктер шығару цехының жұмыс барысын көрді.
Сонымен қатар Жосалы кентінің тұрғыны жеке кәсіпкер Елубаев Әмит цехында болып, кәсіпкердің жоспарымен танысты. Өткен жылы жеке кәсіпкер Елубаев Әмит қарапайым заттар экономикасы бағдарламасы аясында «Жиһаз цехын ашу» бизнес жобасын сәтті қорғап шыққан болатын. Қазіргі таңда бизнес жобада көрсетілген құрал-жабдықтарды сатып алып 4 азаматты жұмыспен қамтып отыр.
Үстіміздегі жылы барлық кент, ауылдық округтерде нәтижелі жұмыспен қамтуды және жаппай кәсіпкерлікті дамыту бағдарламасы аясында жаңа тұрақты жұмыс орындарын құру, өндіріс пен қызмет көрсету бағытында кәсіпкерлік жобаларды іске асыру міндеті жүктелген болатын.
Еліміздің экономикасының қозғаушы күшінің бірі шағын кәсіпкерлік саласы екендігі белгілі.
Осы ретте, аудан әкімі Мұса Оспанұлы кәсіппен айналысуға ниет білдіргендерге жан-жақты қолдау көрсетіліп жатқандығын тілге тиек етіп, халықты отандық өнімдермен қамтамасыз етіп отырған кәсіпкерлерге ризашылығын білдірді.
<img src="https://kyzylorda-news.kz/wp-content/uploads/2020/05/qarmaqshyda-shaghyn-oendiristik-ceh-1-1.jpg" alt="" />
<img src="https://kyzylorda-news.kz/wp-content/uploads/2020/05/qarmaqshyda-shaghyn-oendiristik-ceh-2-1.jpg" alt="" />

Қармақшыда шағын өндірістік цехтардың жұмысы жолға қойылған

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова жұмыс сапарымен Шиелі ауданында болды. Сапар барысында елді мекендердің тыныс-тіршілігімен танысып,&nbsp; «Жұмыспен қамту жол картасы» мемлекеттік бағдарламасы (әрі қарай – Мемлекеттік бағдарлама) аясында атқарылып жатқан жұмыстарды тексерді.
&nbsp;Мемлекеттік бағдарлама аясында Шиелі ауданына 3 млрд.астам қаржы бөлініп, инженерлік-көліктік инфрақұрылым, әлеуметтік-мәдени, тұрғын-үй коммуналдық, абаттандыру бағытында 21 жоба жүзеге асырылуда. Сонымен қатар, 681 жаңа жұмыс орны ашылатын болады.
&nbsp;Өңір басшысы алдымен Сұлутөбе ауылдық округінің 1 Мамыр елді мекеніндегі «Жұмыспен қамту жол картасы» мемлекеттік бағдарламасы аясында жүргізіліп жатқан абаттандыру жұмыстары және ауыз су жүйесінің жағдайын көрді. Бұл ауылға абаттандыру жұмыстарын жүргізуге 58 млн.теңге бөлініп, 14 тұрғын жұмыспен қамтылуда. Сондай-ақ, аталған бағдарлама шеңберінде «Самара-Шымкент-Тартоғай» жолының орташа жөндеу жұмысын тексерді. Гүлшара Әбдіқалықова жұмыстарды сапалы жүргізіп, белгіленген уақытта бітіруді тапсырды.
Мұнан соң облыс әкімі Жөлек елді мекеніне кіре берістегі көпірге күрделі жөндеу және Шиелі кентінде жол жөндеу жұмыстарының барысын көрді. Облыс әкімі аудан әкіміне бөлінген қаржыны мақсатты жұмсап, сапалы жұмыс жүргізуде тапсырды.
&nbsp;Аймақ басшысы екі мәрте социалистік еңбек Ері Ы.Жақаев атындағы күріш өсіру тарихы музейінде болып, кесенесінде баба рухына тағзым етті.
&nbsp;Шиелі кентіндегі Ә.Қоңыратбаев атындағы №48 мектеп лицейіне мемлекеттік бағдарламасы аясында күрделі жөндеу жұмыстары жүргізілуде. Облыс әкімі жөндеу жұмыстарының барысын тексеріп, жаңа оқу жылына дейін аяқтауды тапсырды.
&nbsp;Өңір басшысы Гүлшара Әбдіқалықованың төрағалығымен ауданның әлеуметтік-экономикалық дамуы жөніндегі мәжіліс өтті. Жиында аудан әкімі Қ.Мүбараков атқарылған жұмыстар мен алдағы жоспарлар туралы баяндап, аймақ басшысы әлеуметтік-экономикалық саладағы көрсеткіштерді арттыру бойынша бірқатар нақты тапсырмалар берді.
<blockquote>
 &nbsp;«Алдымен, аудан экономикасы дамуының үстіміздегі жылдың 4 айының қорытындысына қысқаша тоқталып өтейін. Шиелі ауданында негізгі макрокөрсеткіштердің 4-уі, атап айтсақ, ауыл шаруашылығы 0,2%, инвестиция 74%, құрылыс жұмысы көлемі мен тұрғын үй құрылысы 15,3% төмендеп, меже орындалмаған. Әлеуметтік сала, оның ішінде денсаулық сақтау саласында да кемшіліктер бар. Шиелі ауданының әлеуметтік-экономикалық дамуы бойынша бірқатар мәселелер көтерілді. Аталған кемшіліктерді жою бағытында ауқымды жұмыс атқару қажет. Біздің басты бағытымыз тұрғындардың әл-аухатын көтеру», – деді облыс әкімі Гүлшара Әбдіқалықова.
</blockquote>
Мәжілістен&nbsp; кейін аймақ басшысы Шиелі кентіндегі жылыжайдың, «РУ-6» кен басқармасының «Қарамұрын» цехының, «Ару ана» шұбат цехының, «Кемикал қазақстандық мұнай-химия компаниясы» ЖШС-нің пластмасса құбырларын шығару зауытының, «Компания Гежуба Шиелі Цемент» ЖШС-нің цемент зауытының жұмысымен танысты. Аймақ басшысы аудан әкіміне: «Біз кәсіпкерлікті дамытуға барынша жағдай жасап келеміз. Мәселен, биылға «Бизнестің жол картасы 2025» мемлекеттік бағдарламасын аймақта іске асыруға 3,4 млрд. теңге қаражат бөлінді. Яғни, жылдан жылға бөлінетін қаржы еселеп артып келеді. Кәсіпкерлік саласын дамытуға мүмкіндік берілуде, тек жұмыс жасау керек. Мұнымен қоса, «Қарапайым заттар экономикасы» бағдарламасының жүзеге асырылуын қолға алыңыздар. Бұл бағдарлама ішкі нарықты отандық тауарлармен толықтыру және өңдеу өнеркәсібінің бәсекеге қабілеттілігін арттыру мақсатында іске асырылуда. Халықты күнделікті тұтынатын тауарлармен және қызметтермен қамтамасыз етуге бағытталған. Мемлекеттік бағдарламалардың дұрыс жүзеге асуын қадағалаңыздар», – деп тапсырды.
Сондай-ақ, облыс әкімі Гүлшара Әбдіқалықова Шиелі кентіндегі үш қабатты 18 пәтерлі тұрғын үй құрылысының және Ақмая ауылындағы егіс алқабында ауданның дала жұмыстарының барысымен танысты. Бұл егіс алқапта 370 гектар жерге күздік бидай егілген және жаңа цифрлық технологиялар пайдалануда.
<img src="https://kyzylorda-news.kz/wp-content/uploads/2020/05/obl.akim-1-1.jpg" alt="" />
<img src="https://kyzylorda-news.kz/wp-content/uploads/2020/05/obl.akim-2-1.jpg" alt="" />
<img src="https://kyzylorda-news.kz/wp-content/uploads/2020/05/obl.akim-3-1.jpg" alt="" />
<img src="https://kyzylorda-news.kz/wp-content/uploads/2020/05/obl.akim-4-1.jpg" alt="" />

Гүлшара Әбдіқалықова: «Аудандағы әлеуметтік-экономикалық дамудағы мәселелерге баса назар аудару қажет»

<a href="https://kyzylorda-news.kz/">Kyzylorda-news.kz.</a> Синоптиктер 27 мамырда ел аумағында ауа райы қандай болатынын айтты.
Қазақстан территориясының басым бөлігі әлі де жоғары қысым аумағында болғандықтан күн ашық болады.
Тек республиканың шығысында ғана Солтүстік-батыс циклонының әсерінен кей жерлерде өткінші жаңбыр жауады, найзағай жарқылдап, дауыл соғады. Бұршақ жаууы ықтимал.
Кей жерлерде жел күшейеді, оңтүстікте және оңтүстік-шығыста шаңды дауыл тұрады. Солтүстікте тұман түседі.
Түнде Солтүстік Қазақстан облысының кей жерлерінде жел екпіні 15-20 м/с жетеді. Түнде және таңертен тұман түседі.
Шығыс Қазақстан облысының түнде кей жерлерінде жел қарқыны – 15-20 м/с, күндіз – 15-20, екпіні 25 м/с дейін күшейеді. Кей жерлерде дауыл соғады. Бұршақ жаууы мүмкін.
Түнде Қызылорда облысының кей жерлерінде жел жылдамдығы – 15-20 м/с, 25 м/с болады. Шаңды дауыл күтіледі. Жамбыл, Түркістан облыстарының кей жерлерінде шаңды дауыл тұрады. Жел екпіні – 15-20 м/с, Түркістан облысында – 23 м/с жетеді.
Батыс Қазақстан, Қостанай, Павлодар, түнде Ақтобе, күндіз Алматы, Қарағанды облыстарының кей жерлерінде жел 15-20 м/с дейін күшейеді.
Батыс Қазақстан облысында найзағай жарқылдайды.
Алматы, Жамбыл, Түркістан, Қызылорда, Ақтөбе облыстарында, Манғыстау облысының оңтүстігінде аптап ыстық болады.
Павлодар облысында, Шығыс Қазақстан, Қызылорда облыстарының кей жерлерінде өте жоғары өрт қаупі сақталады.

Сәрсенбіде Қызылордада күн ыстық болады

1992 жылы Жамбыл облысы Шу ауданының Балуан Шолақ атындағы ауылында балуан, ақын, композитор Балуан Шолаққа ескерткіш орнатылды.
1995 жылы баспасөзде Қазақстан Республикасының Президенті Нұрсұлтан Назарбаевтың Қазақстан Республикасы мен Ресей Федерациясы арасындағы Қазақстан Республикасының Қарулы Күштерінде РФ азаматтарының келісімшарт бойынша әскери қызмет өткеруі және олардың мәртебесі туралы келісімді, Тәуелсіз Мемлекеттер Достастығына қатысушы мемлекеттердің төлем одағын құру туралы келісімді, Экономикалық одақтың Халықаралық экономикалық комитетін құру туралы келісімді ратификациялау туралы Жарлығы жарияланды.
2012 жылы Каннда 65-ші мерейтойлық кинофестиваль өз мәресіне жетті. Осы мәртебелі халықаралық байқау аясында көрермен қошеметіне ие болған қазақстандық «Жаужүрек мың бала» фильмінің әлемдік прокатқа шығаратын агенті белгілі болды. Шетелдік сарапшылар «осындай сапалы өнер туындысын түсірген қазақстандық кинематографтардың бұдан да жоғары жетістіктерге жетуге мүмкіншіліктері жеткілікті» деген баға берді.

27 мамыр: Ел тарихында орын алған оқиғалар

<a href="https://kyzylorda-news.kz/">Kyzylorda-news.kz</a> ақпараттық агенттігінің 27 мамырға арналған жұлдыз-жорамалы.
Тоқты
Түске дейінгі уақытта әлдеқайда қатты асығасыз. Асығыстық сізге жат қылық болғанымен, бүгін тым асығыссыз.
Торпақ
Бүгін барлық шаруаңыз бірінің үстіне бірі қарбаласып, біраз уақыттан бері жиналған жұмыстарды тез арада бітіруге тура келеді.
Егіздер
Жиындарда, отырыстарда өзіңізді еркін ұстап, керемет көңіл-күйде боласыз. Осы кездесулерден жаңа таныстар тауып, олардың сізге пайдасы тиетін болады.
Шаян
Сізді жаңа өмір күтіп тұр. Қызметте өсесіз, жеке кәсіпте табысыңыз артады, сондай-ақ шығармашылығыңыз шыңдала түседі.
Арыстан
Қазіргі уақыт ем қабылдауға, ғылымдағы құпияларды ашуға қолайлы. Жұмысқа қатысты мәселелерді түске дейінгі уақытта шешіп алыңыз.
Бикеш
Бүгін сіз үшін қаржылық жағдайыңыз маңыздырақ. Біраз шығындаласыз. Бірақ бұл шығындар сіздің жан рахатыңыз үшін жұмсалады.
Таразы
Жұлдыздар материалдық жағдайыңызды жақсартуға, өмір сүру салтыңызды жоғары деңгейге жеткізуге күш-қуат береді.
Сарышаян
Бүгінгі күн табысты болады. Әсіресе топ болып жұмыс жасайтындардың айы оңынан туады. Бүгінгі басты қағида – ұстамды болу.
Мерген
Таңертеңгілік барлық жоспарыңыз жүзеге аса бастайды. Табысты болуға мүмкіндік туып тұр. Жаңа идеялар пайда болады.
Тауешкі
Түске дейінге уақытыңыз керемет өтеді. Жаңа жұмысқа тез бейімделіп, қиын тапсырмаларды игере аласыз.
Суқұйғыш
Асықпаңыз. Қиындықтың барлығын еңсере аласыз. Қызметтік сатыда өсу үшін бар күшіңізді саласыз.
Балықтар
Өмірдің жаңа баспалдағын аттайсыз. Өзіңіздің жоспарларыңызды жүзеге асырып, белсенділік танытатын уақыт.

Жұлдыздар не дейді?

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаев өзінің Қазақстан халқына Жолдауында «Халық үніне құлақ асатын мемлекет» тұжырымдамасы барлық азаматтардың өтініштеріне жедел және тиімді әрекет етуге бағытталуы тиіс екенін атап өтті.
Ауыл әкімі халықпен тікелей өзара іс-қимылда болады және байланысты&nbsp; орната алуқабілеті, тұрғындардың өзекті мәселелері бойынша дер кезінде шешім қабылдай білуі оның қызметінің басты бағыты болып табылады.
Жергілікті деңгейде әкім мемлекеттік саясаттыжүргізуші және оның іс-әрекеті бойынша халық арасында жалпы мемлекеттік басқарудың тиімділігіне қатысты көзқарасы қалыптасады.
Мемлекеттік қызмет істері агенттігі «Рухани Жаңғыру» бағдарламасы аясында жергілікті өзін-өзі басқаруды дамытуға және жергілікті маңызы бар мәселелерді тиімді шешуге үлес қосқан, жұмыста жоғары практикалық нәтижелерге жеткен үздік ауыл әкімдерді анықтауға және көтермелеуге бағытталған «Үздік ауыл әкімі» республикалық конкурсын жариялайды.
Байқау 25 мамырда басталып, екі негізгі кезеңде өтеді:
– I кезең-өңірлік деңгей (облыстық деңгей);
– II кезең-республикалық деңгей.
Байқау нәтижелері 2020 жылдың қыркүйек айында белгілі болады. 
Конкурс өткізу барысында халықтың пікірі ескеріледі. Ағымдағы жылдың маусым айынан бастап облыс әкімдіктерінің ресми сайттарында жергілікті әкімнің тиімді жұмыс істеуіне халықтың қанағаттануын бағалау үшін сауалнама орналастырылатын болады. Сауалнамаға азаматтардың құқықтары мен заңды мүдделерін қорғау, мемлекеттік қызметтер көрсету бойынша қабылданған шаралардың тиімділігі, көп балалы және аз қамтамасыз етілген отбасыларға, халықтың әлеуметтік осал топтарына көмек және қолдау көрсету,халықты жұмыспен қамту мен жұмысқа орналастыруға жәрдемдесу, жергілікті әлеуметтік инфрақұрылымды дамыту, жергілікті қоғамдастықпен өзара іс-қимыл және т. б. сияқты бірқатар бағалау критерийі кіреді.
Сонымен қатар, әрбір өңірдің Әдеп жөніндегі уәкілдері үміткерлердің мемлекеттік қызметшілердің әдеп нормаларын сақтауы мәселелері бойынша анонимдік сауалнама жүргізетін болады.
Сауалнама нәтижелері конкурстық комиссияның әрбір ауыл әкімін объективті бағалауға мүмкіндік береді.
Конкурс өткізу ережесі туралы толық ақпарат Мемлекеттік қызмет істері агенттігінің&nbsp;<a href="http://www.gov.kz/">www.gov.kz</a>&nbsp;сайтында және облыс әкімдіктерінің ресми сайтында орналастырылған.

Қазақстанда ең үздік ауыл әкімі анықталады

<a href="https://kyzylorda-news.kz/">Kyzylorda-news.kz</a>. Қызылорда қаласында тәртіп сақшыларының жүргізген рейд жұмыстары барысында жасөспірімдердің түнгі сағат 23-00-де қала көшелерінде жүргендері анықталды.
Жастар мен жасөспірімдер арасындағы құқықбұзушылық пен қылмыстылықтың алдын алу және олардың қауіпсіздігін қамтамасыз ету мақсатында қалалық полиция басқармасы, қалалық білім бөлімі, қалалық ішкі саясат бөлімі, «Qosyl» қалалық жастар ресурстық орталығы мен Облыстық ЖҚ «Жас Отан» бірлескен қала әкімдігі жанынан мобильді топ құрылып қала көшелерінде рейд жұмыстары жүргізілді.
Түн&nbsp;мезгілінде кәмелетке толмаған 8 жасар жасөспірім 23.00-ден кейін Орталық алаңда заңды өкілінсіз жүргені үшін полиция қызметкерлері СПМ-ге жеткізіп, ата-анасын шақыртып, түсіндірме жұмыстарын жүргізді. Сонымен қатар, Тәуелсіздік көшесінен сағат 23.15 пен 00.30 аралығында 10 жасөспірім және Жібек жолы көшесінен 1 жасөспірім жеткізілді. Жасөспірімдер заңды өкілі екенін растайтын жеке басының құжаттарымен келген азаматтармен үйіне қайтарылды.
Түнгі рейд жұмыстарын жүргізу жыл соңына дейін жалғасатын болады.
<img src="https://kyzylorda-news.kz/wp-content/uploads/2020/05/02-30.jpg" alt="" />

Қызылордада түнде жүрген жасөспірімдер ата-аналарына тапсырылды

<a href="https://kyzylorda-news.kz/">Kyzylorda-news.kz.</a> Қызылорда қаласы аумағында ұзындығы 694 шақырымды құрайтын 823 көше бар.
Оның ішінде ұзындығы 390 км асфальт, ұзындығы 172 км тас жол және ұзындығы 132 км топырақты жол бар.
Сонымен қатар, 77,9 км болатын автомобиль жолдары бар.&nbsp; Оның, 29,1 км асфальтты, 47 км қарақиыршықтасты, 1,5 км қиыршықтасты және 0,26 км топырақты жол болып табылады.
2019 жылдың қорытындысымен аудандық маңызы бар автомобиль жолдарының жақсы және қанағаттанарлық жағдайы-81% немесе 63,1 км және қанағаттанарлықсыз 19 % немесе 23 км болды.
2020 жылы барлығы 146,4 км жолдар мен көшелеріне (1,5 км – аудандық маңызы бар жолдарын және 144,9 км – көше) жолдары жөндеуден жүргізілді.
Атап айтқанда:
«Өнірлік даму» бағдарламасы бойынша – Сұлтан Бейбарыс көшесінен «Қызылжарма» каналы – Назарбаев даңғылына дейін магистральды жол құрылысы 4,6 км.
«Жұмыспен қамту жол картасы» бағдарламасы бойынша барлығы 109,9 км болатын 144 жобаны жүзеге асыру жоспарланып отыр. Оның ішінде:
– Қызылорда қаласындағы 109 көше (78,2 км) орташа жөндеу;
– Қызылорда қаласы С. Бейбарыс көшесі бойындағы орналасқан көпірдің су ағарына күрделі жөндеу;
– Тасбөгет кентіндегі Батыршаев, Сырдария, Бакишов көшелеріне күрделі жөндеу (3,6 км).
– Тасбөгет кентіндегі Әбенов көшесін орташа жөндеу (2,0 км);
– Бәйтерек шағын ауданына кірме жолын орташа жөндеу (1,8 км);
– Бірқазан елді мекеніне кірме жолды орташа жөндеу (1,2 км);
– Талсуат елді мекеніндегі 2 көшеге орташа жөндеу (2,7 км);
– Белкөл кентіндегі 4 көшеге орташа жөндеу (3,15 км);
– Қызылөзек ауылдық округіндегі 2 көшеге орташа жөндеу (4 км);
– Ақжарма ауылдық округіндегі 6 көшеге орташа жөндеу (4,2);
– Қосшыңырау ауылдық округіндегі 3 көшеге орташа жөндеу (1,9 км);
– Қызылжарма ауылдық округіндегі 11 көшеге орташа жөндеу (6,9 км) жүргізіледі.
&nbsp;«Ауыл-Ел бесігі» бағдарламасы аясында Ақсуат елді мекеніндегі жалпы ұзындығы 12,4 км болатын 16 көшеге орташа жөндеу жұмыстары жүргізілуде.
&nbsp;Сонымен қатар, Қызылорда қаласындағы жалпы ұзындығы
22,2 км болатын 36 көшеге орташа жөндеу жұмыстары жүргізілуде.
2020 жылдың қорытындысымен аудандық маңызы бар автомобиль жолдарының жақсы және қанағаттанарлық жағдайын 82% жеткізу жоспарлануда.
<img src="https://kyzylorda-news.kz/wp-content/uploads/2020/05/zhol-zhondew-1.jpg" alt="" />

Қызылорда қаласында  жол жөндеу жұмыстары жалғасуда

<a href="https://kyzylorda-news.kz/">Kyzylorda-news.kz.</a> Коронавирусқа шалдыққан науқастардың бойындағы вирус 11 күннен кейін жұқпалы болуын доғарады, деп хабарлайды <a href="https://24.kz/kz/zha-aly-tar/o-am/item/398361-alymdar-virus-11-k-nnen-kejin-ledi">«Хабар 24»</a>.
Сингапурлық ғалымдар «COVID-19» дертіне шалдыққандарды зерттей келе осындай қорытындыға келіп отыр. Мамандардың айтуынша, аурудан айығып келе жатқан науқастардың сынамасы оларда әлі де вирустың бар екенін көрсетуі мүмкін. Бірақ 11 күннен кейін ол қауіпсіз болмақ. Ал коронавирус тесті вирус геномының бір бөлігін ғана тапқанымен, оның өміршеңдігі мен өзге адамға жұқпалылығын анықтай алмайды дейді мамандар. Дегенмен, Сингапур Денсаулық сақтау министрлігі бұл тұжырымдаманы әзірге негізге алып отырған жоқ. Қазір бұл елде науқастың коронавирусқа тесті 2 рет теріс болса ғана ауруханадан шығарылады.

Ғалымдар: Вирус 11 күннен кейін өледі

<a href="https://kyzylorda-news.kz/">Kyzylorda-news.kz.</a> Бұл туралы Кәсіпкерлер палатасының директоры Ғалымбек Жақсылықов айтты.
Палата басшысының айтуынша, төтеше жағдайға дейін өңірде 46 мың кәсіпкерлік субъектісі жұмыс жасаған, ондағы жұмысшылар саны – 95 мың адам.
Облыста короновирусқа шалдыққан азаматтардың саны республика бойынша бастапқыда 3 орында болуына орай, басқа өңірлермен салыстырғанда күшейтілген шектеу шаралары ерте қабылданды. Осының салдарынан кәсіпкерлік субъектілерінің 42%-ы, ал жұмысшыларының 47%-на дейін жұмыстарын тоқтатуға мәжбүр болды. Құрылыс жұмыстарына дейін тоқтатылды.
29 сәуірден бастап карантин режимі жеңілдетіліп, бүгінгі күні 96%-дан астам кәсіпкерлік субъектіcі кезең-кезеңімен жұмыстарына кірісті. Тойханалар іске қосылмады.
Ғалымбек Жақсылықов төтенше жағдай уақытында отандық тауарөндірушілерді сертификациялау жұмыстары тоқтамағандығын, бұл кезеңде 316 сертификат берілгендігін жеткізді.
«Өткен жылмен салыстырғанда берілген сертификаттар саны екі есе көбейді, жаңадан 7 экспорттаушы қосылды. Сонымен қатар, аймақтың ауыл шаруашылығы мен тамақ өндірісі тұрақты жұмыс жасады. Агросектор жұмысшылары қысқарып не жалақысы кешіктірілген емес», – дейді Палата директоры.
Көктемгі дала жұмыстарына қаржы институттары арқылы «Кең Дала», «Агробизнес», «Қарапайым заттар экономикасы» бағдарламалары бойынша 62 несиеленушіге 1,4 млрд.теңге қаражат берілген. Бұл бағытта жұмыстар жалғасуда.
Облыста көктемгі дала жұмыстары аяқталуға жақын. Саланы субсидиялауға биылға 10,9 млрд.теңге қарастырылған, бүгінгі күні 513 ауыл шаруашылығы тауар өндірушілеріне 2,9 млрд. теңге субсидия төленді.
<img src="https://kyzylorda-news.kz/wp-content/uploads/2020/05/001.jpg" alt="" />

Қызылордада төтенше жағдай режимінде жаңадан 7 кәсіпкер экспорттаушылардың қатарына қосылды

<a href="https://kyzylorda-news.kz/">Kyzylorda-news.kz.</a> Бүгін Қызылорда қаласындағы Назарбаев Зияткерлік мектебінің оқушылары үшін қашықтан Жазғы мектеп өз жұмысын бастады.
Жоба бойынша мамыр айының соңына дейін 7, 8, 9-сынып оқушылары ағылшын тілі, математика, физика, информатика, химия және биология пәндері бойынша олимпиадаға онлайн түрде дайындық жұмыстарын жүргізеді. Сонымен қатар, орта мектеп оқушылары «Жер туралы ғылым», «Өсімдік шаруашылығы», «Бизнес инкубатор» және «Экономика» танымдық курстарында білімдерін толықтырадын болады.
&nbsp;Ал жоғары сынып оқушылары үшін жаратылыстану-математикалық пәндер бойынша және халықаралық IELTS, SAT / NUFYP емтихандарына&nbsp; екі апталық дайындық курстары ашылды. Алдағы уақытта 10-11-сынып білім алушылары «Web-дизайн» сабақтарына да қатысып, веб-сайт әзірлеуді және графикалық өңдеуді үйренетін болады.
Сондай-ақ, 10-сынып оқушылары кәсіби бағыт бағдар курстарына жазылып, мамандық таңдау және университетке түсу жолдары бағытында топтық және жеке консультациялар алуға мүмкіндіктері бар.
Жазғы мектеп жобасы бойынша 11-сынып оқушыларына арналған қосымша жазғы тілдік курстары да ашылып, шәкірттер мектептің шетелдік мұғалімдерінен ағылшын тілінен дәріс алатын болады.
<blockquote>
 «Жазғы мектеп бағдарламасы оқу жоспары негізінде және студенттердің ұсыныстары бойынша дайындалады. Әр оқушы қалауы бойынша екі немесе үш бағыттағы курстарға жазылуға мүмкіндіктері бар», – деп түсіндірді Қызылорда қаласындағы Назарбаев Зияткерлік мектебі директорының орынбасары Ляззат Абдраимова.
</blockquote>

Қазақстан және Қызылорда облысының жаңалықтары