<a href="https://kyzylorda-news.kz/">Kyzylorda-news.kz.</a> Бұл туралы Кәсіпкерлер палатасының директоры Ғалымбек Жақсылықов айтты.
Палата басшысының айтуынша, төтеше жағдайға дейін өңірде 46 мың кәсіпкерлік субъектісі жұмыс жасаған, ондағы жұмысшылар саны – 95 мың адам.
Облыста короновирусқа шалдыққан азаматтардың саны республика бойынша бастапқыда 3 орында болуына орай, басқа өңірлермен салыстырғанда күшейтілген шектеу шаралары ерте қабылданды. Осының салдарынан кәсіпкерлік субъектілерінің 42%-ы, ал жұмысшыларының 47%-на дейін жұмыстарын тоқтатуға мәжбүр болды. Құрылыс жұмыстарына дейін тоқтатылды.
29 сәуірден бастап карантин режимі жеңілдетіліп, бүгінгі күні 96%-дан астам кәсіпкерлік субъектіcі кезең-кезеңімен жұмыстарына кірісті. Тойханалар іске қосылмады.
Ғалымбек Жақсылықов төтенше жағдай уақытында отандық тауарөндірушілерді сертификациялау жұмыстары тоқтамағандығын, бұл кезеңде 316 сертификат берілгендігін жеткізді.
«Өткен жылмен салыстырғанда берілген сертификаттар саны екі есе көбейді, жаңадан 7 экспорттаушы қосылды. Сонымен қатар, аймақтың ауыл шаруашылығы мен тамақ өндірісі тұрақты жұмыс жасады. Агросектор жұмысшылары қысқарып не жалақысы кешіктірілген емес», – дейді Палата директоры.
Көктемгі дала жұмыстарына қаржы институттары арқылы «Кең Дала», «Агробизнес», «Қарапайым заттар экономикасы» бағдарламалары бойынша 62 несиеленушіге 1,4 млрд.теңге қаражат берілген. Бұл бағытта жұмыстар жалғасуда.
Облыста көктемгі дала жұмыстары аяқталуға жақын. Саланы субсидиялауға биылға 10,9 млрд.теңге қарастырылған, бүгінгі күні 513 ауыл шаруашылығы тауар өндірушілеріне 2,9 млрд. теңге субсидия төленді.
<img src="https://kyzylorda-news.kz/wp-content/uploads/2020/05/001.jpg" alt="" />

Қызылордада төтенше жағдай режимінде жаңадан 7 кәсіпкер экспорттаушылардың қатарына қосылды

<a href="https://kyzylorda-news.kz/">Kyzylorda-news.kz.</a> Бүгін Қызылорда қаласындағы Назарбаев Зияткерлік мектебінің оқушылары үшін қашықтан Жазғы мектеп өз жұмысын бастады.
Жоба бойынша мамыр айының соңына дейін 7, 8, 9-сынып оқушылары ағылшын тілі, математика, физика, информатика, химия және биология пәндері бойынша олимпиадаға онлайн түрде дайындық жұмыстарын жүргізеді. Сонымен қатар, орта мектеп оқушылары «Жер туралы ғылым», «Өсімдік шаруашылығы», «Бизнес инкубатор» және «Экономика» танымдық курстарында білімдерін толықтырадын болады.
&nbsp;Ал жоғары сынып оқушылары үшін жаратылыстану-математикалық пәндер бойынша және халықаралық IELTS, SAT / NUFYP емтихандарына&nbsp; екі апталық дайындық курстары ашылды. Алдағы уақытта 10-11-сынып білім алушылары «Web-дизайн» сабақтарына да қатысып, веб-сайт әзірлеуді және графикалық өңдеуді үйренетін болады.
Сондай-ақ, 10-сынып оқушылары кәсіби бағыт бағдар курстарына жазылып, мамандық таңдау және университетке түсу жолдары бағытында топтық және жеке консультациялар алуға мүмкіндіктері бар.
Жазғы мектеп жобасы бойынша 11-сынып оқушыларына арналған қосымша жазғы тілдік курстары да ашылып, шәкірттер мектептің шетелдік мұғалімдерінен ағылшын тілінен дәріс алатын болады.
<blockquote>
 «Жазғы мектеп бағдарламасы оқу жоспары негізінде және студенттердің ұсыныстары бойынша дайындалады. Әр оқушы қалауы бойынша екі немесе үш бағыттағы курстарға жазылуға мүмкіндіктері бар», – деп түсіндірді Қызылорда қаласындағы Назарбаев Зияткерлік мектебі директорының орынбасары Ляззат Абдраимова.
</blockquote>

Қызылордада жазғы онлайн-мектеп ашылды

<a href="https://kyzylorda-news.kz/">Kyzylorda-news.kz.</a> Сыр өңірінде күріш егу науқаны мәресіне таяды. Қазір жергілікті диқандар 81954 гектарға басты дақылды орналастырды. Бұл жоспарланған көлемнің 92,9 пайызын құрайды. Облыс бойынша 73724 гектар егін суға бастырылды.
Күріш егісі жөнінен Сырдария және Жалағаш аудандары алдыңғы лектен көрініп отыр. Атап айтқанда, 25 мамырдағы мәлімет бойынша Сырдария­да 20046, Жалағашта 19956 гектарға дән себілді. Екі ауданда да 18 мың гектарға жуық егістік суға бастырылған. Одан кейінгі кезекте Қармақшы 13750, Шиелі 12200, Жаңақорған 7500, Қа­залы 5570 гектарға күріш екті.
Диқандар санаулы күнде күріш егуді толық аяқтайды.

Қызылорда облысында күріш егу аяқталып келеді

<a href="https://kyzylorda-news.kz/">Kyzylorda-news.kz.</a> «Азаматтық бастамаларды қолдау орталығы» КЕАҚ үкіметтік емес ұйымдарына арналған мемлекеттік гранттары арқылы «Қызылорда облысында «бір терезе» қағидаты бойынша үкіметтік емес ұйымдарға қолдау көрсетуге арналған азаматтық орталықтарды ұйымдастыру мен дамыту» жобасы аясында «Умай» Мектеп жасына дейінгі балаларға арналған сауықтыру және тәрбиелеу қайырымдылық үйі үкіметтік емес ұйымының ұйымдастыруымен онлайн&nbsp;режимде семинар-тренинг өтті.
Семинарды кәсіби білікті тренер Мадина Төлепова жүргізді. Семинар-тренинг «Азаматтық бастамаларды қолдау орталығы» КЕАҚ арқылы жарияланған гранттар өтінімін талапқа сай жазу және өзге де заңнамалық мәселелер тақырыбын қамтыды. Жоба жетекшісі Анар Изден семинар-тренинг барысында қатысушы қоғамдық ұйымдардың&nbsp; институциональдық дамуына қатысты сұрақтарына сәйкес кеңестер берді.
&nbsp;«Қызылорда облысында «бір терезе» қағидаты бойынша үкіметтік емес ұйымдарға қолдау көрсетуге арналған азаматтық орталықтарды ұйымдастыру мен дамыту» жобасының мақсаты – азаматтық орталық жұмысын үйлестіру. Аймақтың үкіметтік емес ұйымдарына және облыс тұрғындарының азаматтық бастамаларын дамыту мақсатында «бір терезе» қағидаты негізінде құқықтық, методологиялық және консультациялық қызмет көрсетеді. Жыл бойы тұрақты жұмыс жасайтын азаматтық орталықта аймақтың қоғамдық ұйымдарының өз жұмыстарын жетілдіру бағытында кәсіби практикалық көмек көрсетіледі.
Сонымен қатар, ҮЕҰ-ды құру және жұмысын жүргізу, қоғамдық ұйымдардың деректер қорына тіркелу, мемлекеттік әлеуметтік тапсырыстарға, мемлекеттік гранттар мен сыйлықақылар алуға қатысады. Қоғамдық кеңес құрамындағы үкіметтік емес ұйымдар жұмысын жетілдіру бойынша ұсынымдар беру, әлеуметтік серіктестікті арттыру&nbsp; бағытындағы жұмыстар жүргізіліп, тағы басқа мәселелеріне сәйкес тегін кеңес берілетін болады. &nbsp;&nbsp;&nbsp;&nbsp;&nbsp;
Айта кетейік, осы жоба аясында 8&nbsp;800&nbsp;080 8809 бірыңғай Call-орталық арқылы кеңес беріледі.
Жоба жұмысына «Азаматтық бастамаларды қолдау орталығы» КЕАҚ қолдау көрсетіп, ҚР Ақпарат және қоғамдық даму министрлігі қолғабыс етіп «Умай» Мектеп жасына дейінгі балаларға арналған сауықтыру және тәрбиелеу қайырымдылық үйі ұйымдастыруымен орындалады.
Айта кетейік, азаматтық орталық «Умай» Мектеп жасына дейінгі балаларға арналған сауықтыру және тәрбиелеу қайырымдылық үйі базасында (Ақмешіт м/а, 36) орналасқан.

Қызылордада қоғамдық ұйымдар онлайн режимде біліктілігін арттырды

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова «Невада-Семей» қоғамдық бірлестігінің төрағасы Сәбит Әбішті қабылдады.
Кездесуде «Невада-Семей» қозғалысының мүшелеріне берілетін әлеуметтік төлем және қоғамдық бірлестіктердің жұмысы туралы мәселелер талқыланды.
«Невада-Семей» қоғамдық бірлестігінің облыс бойынша өкілділігі 2009 жылдан бастап жұмыс жасайды. Бүгінгі күні облыс көлемінде «Невада-Семей» қозғалысының 1043 мүшесі бар. Оның ішінде тікелей қатысқан 507 азаматқа әлеуметтік төлем беріледі. Қалған 536 қатысушыға төлем тағайындалмаған.
Өңір басшысы облыстық жұмыспен қамту және әлеуметтік бағдарламалар басқармасы басшысына қозғалыстың қалған мүшелеріне әлеуметтік көмек тағайындауға қатысты ұсыныстар беруін тапсырды.
<blockquote>
 «Облыс көлеміндегі «Невада-Семей» қозғалысы мүшелерінің тізімін қайта қарап, қызмет еткен жылына қарай санатқа бөліп дайындаңыздар. Әлеуметтік көмек тағайындау үшін Қорғаныс министрлігіне осы санаттар бойынша ұсыныстар жолдауымыз керек. Жалпы, «Невада-Семей» қозғалысымен бірлескен іс-шаралар өткізуді қайта қарап, оларды 29 тамыз – Халықаралық ядролық сынақтарға қарсы күрес күніне дейін біріктіру керек. Мемлекетіміз ядролық жарылыстар салдарынан жәбірленушілер үшін үнемі әлеуметтік сауықтыру шараларын жүргізіп келеді», – деді Гүлшара Әбдіқалықова.
</blockquote>
Жиын соңында «Невада-Семей» қоғамдық бірлестігінің Қызылорда облысы бойынша төрағасы Сәбит Әбіш облыс әкімі Гүлшара Әбдіқалықоваға кездесу мен көтерілген мәселелерге қолдау көрсеткені үшін алғысын білдірді.

Гүлшара Әбдіқалықова «Невада-Семей» қозғалысы мүшелеріне әлеуметтік көмек тағайындауды тапсырды

<a href="https://kyzylorda-news.kz/">Kyzylorda-news.kz</a>. Білім және ғылым министрі Асхат Аймағамбетов балалардың жазғы демалысы мен бос уақытын ұйымдастыру жұмысы туралы пікірін білдірді.
<blockquote>
 &nbsp;«Балалардың жазғы демалысы мен бос уақытын ұйымдастыру, сауықтыру мәселесі өте маңызды. Бұл ретте, есімізден бір мәселе шықпауы тиіс, бастысы – балалардың денсаулығы. Өңірлердің өздері эпидемиологиялық ахуалға сәйкес шешім қабылдайды. Қауіпсіз болса ғана мәселені шешу керек. Балаларды қалай болса да сауықтыру орталығына жіберу қажет деген сөзді ешкім қозғап отырған жоқ. Ең бастысы, балалардың қауіпсіздігі бірінші орынға қойылсын», – деді Асхат Аймағамбетов Білім және ғылым министрлігінің аппарат отырысында.
</blockquote>
Министрдің айтуынша, жылда мұғалімдер ата-аналардан әртүрлі қолхат алатын дәстүр бар.
<blockquote>
 &nbsp;«Ол қаншалықты дұрыс? Ата-аналар онсыз да өз балалары үшін жауапты. Ешқандай қолхат қажет емес. Жаз айында мұғалімдер демалуы тиіс. Ата-аналардан «балаларымызға өзіміз жауаптымыз» деп қолхат алу – ойға қонымсыз мәселе. Оны тоқтауымыз керек. Бұл мәселені мектеп басшыларына жеткізген абзал», – деді ол.
</blockquote>

Білім министрі: Мұғалімдер жазда демалуы керек

<a href="https://kyzylorda-news.kz/">Kyzylorda-news.kz.</a> Міне, күні кеше ғана еліміздің барлық мектептерінде ерекше соңғы қоңырау соғылды. Тағы бір оқу жылы аяқталды. Ел тарихында алғашқы рет онлайн режимде соңғы қоңырау соғылып, оқушылар тұңғыш рет мектеппен үйде отырып қоштасты. Осындай форматта оқу жылын аяқтаған Қызылорда қаласындағы мектептердің бірі С. Сейфуллин атындағы №4 орта мектепте облыс әкімі Гүлшара Әбдіқалықованың оқығанын біреу білсе, біреу білмейді. Аймақ басшысының мектепте қандай оқушы болғанын танымал журналист Қаныбек Әбдуов <a href="https://aqmeshit-aptalygy.kz/zanalyk/12935-km-oyan-mektep.html">«Ақмешіт апталығы»</a> газетінде жазады.
Әкім оқыған мектеп
Біз қаланың қақ ортасында орналасқан Сәкен Сейфуллин атындағы №4 орта мектеп ауласына келдік. Баяғы шулы кезең жоқ, қазір тып-тыныш. Оқушы біткен қашықтан оқытуға көшкен. Төтенше жағдай талабы солай. Қашықты жақындатқан қазіргі технология білім сапасын бір мысқал кем етпеді. Мектептің елу алты жыл тарихында 100-ден аса түлек «Алтын медаль», «Күміс медаль», «Үздік аттестат», «Алтын белгі», «Ерекше үлгідегі аттестат» алғаны терең білімнің тағылымы ғой, сол үлгілі үрдіс жалғасын тауып тұр.
Уақытында несін айтасың, бұл дүрілдеген мектеп-ақ еді. Аралас оқытылған ұядан кім ұшпады? Менмін дегеннің баласы осында оқыған дейді. Бәлкім солай шығар. Оның да кезегі келер. Қазіргі ойымыз басқа, жөніміз де басқа. Біз білгеніміздей, облыс әкімі Гүлшара Әбдіқалықова осы мектептің түлегі. Озық оқушымен, қайраткер қызымен мектеп ұжымы мақтанады, үнемі үлгі тұтады. Оны мектеп директоры Алмат Бақытбекұлы да баян етті, мектептің елу жылдық мерейтойына арнап шығарылған «Самғатқан сан қыранды алтын ұя» кітабынан да оқыдық. Әрине, әкім оқыған мектеп туралы әркім-ақ білгісі келеді, соңғы қоңырау салтанатында оны қаперге алғанымыз да жасырын емес. Сол үшін Гүлшара Наушақызының сонау сексенінші жылдары оқытқан ұстаздарын, қатар жүрген құрбыларын іздестірдік және таптық. Ендігі сөзді солардың өз аузынан естісек жөн болар. Әзірге өткенге де ой жіберіп алайық.
Соңғы қоңыраудың сыңғырын сағынған адам алтын ұя мектебі туралы толғанып, сонан соң балалық шақтың бал сезіміне бойлап, бір тебіреніп алады. Оқушы мектептің құдіретіне, мұғалімнің мәртебесіне мойынұсынса, ұстаз шәкірті шыққан биігімен мақтанады. Иә, дәл солай. Оны неге айттым?
Осыдан бірнеше жыл бұрын Елбасы Нұрсұлтан Назарбаев оқыған Қаскелеңдегі Абай атындағы орта мектебінде болып, «Үшқоңыр ұшырған үміт» атты көлемді эссе жазғанмын. Әрине, әлемдегі ең беделді, ірі саясаткер Нұрсұлтан Әбішұлының балалық шағын, оқушылық өмірін кім болса да білгісі келетіні анық. Біздің сапардың мақсаты сол болатын. Бір қабат болса да бес жұлдызды қонақ үй секілді үйлесімді, ауласы көкпен көмкерілген көне ғимаратқа кіргенбіз. Нағыз антиквар дерсің. Бұл – бұрынғы мектеп, қазір тарихи-өлкетану мұражайы. Мұражай директоры Мәрия Қожанова өзі бас болып, бізге Елбасы тұтынған заттарды түгелдей таныстырды. Ал, мектеп директоры Баян Мұхамедиярова мектептің 1958 жылғы журналын көрсетіп, Тұңғыш Президенттің үздік оқыған білімпаздығын баяндап берген еді. Бүгін дәл сондай күй Сәкен Сейфуллин мектебіне жетеледі. Мұнда сынып журналы сақталмаған. Есесіне, көзі тірі ұстаздар естелігі меселімізді қайтармады.
Ұлағатты ұстазы
Алдымен сол кездері мектепте биология пәнінен дәріс берген, бүгінде Қорқыт ата атындағы Қызылорда мемлекеттік университетінің профессоры Күлбарам Сәдуақасқызын іздеп бардық. Апай әлі тың, ескінің есті естелігін төкті дерсің.
<blockquote>
 – Мен отыздан жаңа асқанда Сейфуллин мектебіне жұмысқа орналастым. Қаланың элитасы баласын осы мектепке беруге ықыласты болды. Себебі кіл таңдаулы мұғалім, өз мамандығының майталманы осында. Соған сай оқушылардың да бәсі биік, білімге құштар келетін.
 Мектеп 1964 жылы пайдалануға берілді. Алғашқы директор Қасымбек Ыбыраев болатын. Қатал кісі, майдангер. Талапты тікесінен қояды. Оның «учитель на уроке – как солдат на войне» дейтін тұрақты тіркесі бар. Директормен бетпе-бет келу жоқ, көзіне түспеуге тырысамыз.
 Шәкірттерімнің ішінен көптеген белгілі тұлға шықты. Гүлшара Наушақызы сол шоғырдың шоқтығы. Ол бала күнінен сүйкімді, өте мәдениетті, аз сөйлеп, көп тыңдайтын. Үздік оқыды. Сүйегі текті ғой, қан­ша уақыт өтсе де мінез-құлқы ешбір өзгермеген, сол қалпы. Мектеп бітірген соң Жам­был технология институтының экономика факультетіне оқуға түсті. Онан кейін­гі қыз­меттік өсу баспалдағы өздеріңізге бел­гілі. Мемлекеттік хатшы кезінде Гүлшара менің 75 жылдық мерейтойыма байланысты құттықтау хат жолдады. Қатты қуанып қал­дым. Шәкіртімнің ұмытпай ұстазын құрметтегені мен үшін бақыт, – деді Күлбарам апай.
</blockquote>
Сынып жетекшісі
Гүлшара Наушақызының бастауыш сыныптағы алғашқы ұстазы Айша Үсенова апай екен. Ал, жетінші сыныпқа дейін жетекші болған Үміткүл Айманова аналық, ұстаздық мейірімін төккен. Сегізінші сыныптан бастап бүгінде «Болашақ» университетінің оқытушысы, филология ғылымдарының кандидаты, доцент Сара Тайманова жетекшілік жасаған.
Біз ол кісімен телефон арқылы байланыстық.
<blockquote>
 – Гүлшара өзі бойшаң, соңғы партада отыратын. Зеректігі оған кедергі келтірген жоқ. Сабақты кілең бестікке оқыды, түрлі білім сайыстарында есе жібермейтін ұшқырлығы, ой тереңдігі, қабілеттілігі ерекше еді. Мінезі тұйық, кішіпейіл, сыныптастарымен емен-жарқын араластығы жоғары болатын. Ұстаздарының қай-қайсы да оның озат орнын биік қойды, сосын жақсы көрді. Мұғалімдер Спандияр Дүйсеков, Камила Абиловалар аузынан тастамай айтатын. Гүлшара оқыған 10 «Г» сыныбы туралы қанша айтсам да таусылатын тақырып емес. Өйткені өте ұйымшыл, бір-бірімен сыйлас еді және сабақ үлгерімі жақсы сынып болды, – дейді Сара апай.
</blockquote>
Дауасыз дене шынықтыру
1983 жыл. Майталман мектеп директоры Евгений Васильевич Конның кезі. Қатал уақыт. Сабақтан себепсіз қалу жоқ, оқушының басты міндеті – оқу болса, ол талқылаусыз орындалатын.
Ұмытпасам, Гүлшара Наушақызы мектеп бітірер жылы бір мәселе туындады. Негізгі пәннің бәрі бестік бола тұрып, қырсыққанда дене шынықтырудан төрт қойылды. Ұмытпасақ, Тхя Анатолий Ефремович болу керек, қайдағы дене шынықтырудың бағасына келгенде қадалды да қалды. Соның салдарынан «Алтын медаль» бұйырмай тұр. Бұған Гүлшара Наушақызы көңілін түсіріп, іштегі қыжылын білдірген жоқ. Өзін байыпты ұстады. Тектілігін таныта білді.
Дәл осындай жағдай Елбасыда да болған. Химия пәнінің мұғалімі Асқаров: «Өзім беске білмеймін. Сосын саған да бес қоя алмаймын» деп төрт қойған. Сөйтіп «Алтын медальдың» ауылы алыстады.
Сыныптастар
Бұлар сыныпта жиырма бес еді. Өрімдей қыз-жігіттерге мектеп формасы жарасып тұратын. Кеңестік кезеңдегі сол сурет мектептің де сәні болатын. Сыныптастар әліге дейін бір-бірін іздеп, сағынысып қалады. Олардың ішінде Ақбөпе Әбілдаева, Сәуле Оспанова, Гүлсім Бисенова, Құралай Сариева, Жанар Досаева, Қанағат Сақтағанов, Сәкен Әбенов, Талғат Төлегеновтерді атай кеткенді жөн санадық.
Ақбөпе Әбілдаеваның естелігінен:
<blockquote>
 «Гүлшара екеуміз пәндік олимпиада – орыс тілі, математика, физика, химиядан сайысқа барамыз. Жеңбей қайтпаймыз. Ортамызда Үміткүл апай. Сонда ол: «Біреуің ұзын, біреуің қысқа, мен ортада жүріп, баспалдақ болайық» дейтін. Гүлшараның бойы да, ойы да бар бөлек жан ғой. Оның суреті мектептің Құрмет тақтасынан бір түскен емес. Мен – топ жетекшісі, ол – комсорг. Құрбымның әке-шешесі де алтын адамдар. Үйіне жиі қонаққа барамыз. Бала демей бауырмал құшағын ашып қарсы алады».
</blockquote>
Сәуле Оспанованың естелігінен:
<blockquote>
 «Біздің сыныптың барлық оқушысы жақсы оқыды. Сонау бірінші сыныптан. Ішімізде 15-і озат. Бәріміз де жоғары оқу орнына түстік. Мектепішілік мәдени-көпшілік шараларда бас жүлде бізге бұйыратын. Гүлшара идеал қыз, барлық жағынан үлгі болды. Білімі, мінезі, түр-тұлғасы түгелдей тұнып тұрған бөлек әлем».
</blockquote>
Құралай Сариеваның естелігінен:
<blockquote>
 «Мен бұл сыныпқа төртінші сыныпта Шиелі ауданынан ауысып келдім. Алғашқыда үйренісе алмай жылаған сәттерім есімнен шықпайды. Сонда Гүлшара сезімтал ғой, менің қиналғанымды біліп, өзіне жақын тарта бастады. Көп көмектесті. Ол О.Кошевой, мен Пушкин көшесінде тұрамыз. Сабаққа бірге барып, бірге қайтамыз. Кезекші болғанда кешке жанымда болып, еденді де жуысатын. Гүлшара өте тиянақты, уақытқа мұқият болатын.
 Бізге орыс тілінен Ирина Иннокентьевна дейтін кәріс апай берді. Ауылда өскенбіз, орысшаға шорқақпын. Біреуден сұрауға жасқанамын. Мазақтайды деп. Сол кезде Гүлшара ғана көмекке келіп, орысшаны жетік білуге ықпалы тиді. Тіпті оған арқа сүйегенім сонша, қиналғанда сүйеу, деміккенде демеу болғанын қалай жасырайын».
</blockquote>
Олар мектеп бітіргеніне 25 жыл болғанын жоғары деңгейде атауды қолға алған еді. Оған Гүлшара Әбдіқалықова келе алмады. Мемлекеттік жоғары лауазым иесіне сыныптастары ыстық, бірақ ел мүддесі одан да жауапты. Сондықтан сыныптастары түсіністікпен қарайды, сәттілік тілейді.
Сөз соңы
Иә, туған жерге оралып, ел мен жерге перзенттік парызымды қосамын деген облыс басшысына өңірдің әрбір адамы, бір уыс топырағына дейін ыстық. Сол үшін күн-түн демей аянбай қызмет етуде. Қазіргі қиындықтарға қарамастан құрылыс жұмыстары, шағын және орта бизнесті өркендету барысы екпін алып жатыр. Ел-жұрттың алаң көңілі басылды. Елімізде нәзік жандардан тұңғыш рет облыс басшысы болған Гүлшара Наушақызы үшін 25 мамырдың соңғы қоңырауы, өзі оқыған Сәкен Сейфуллин атындағы №4 орта мектеп қашанда ерекше деп білемін. Өйткені мектеп мерейін өсірді, мұғалім мейірімін төкті, содан қанаттанып, ол биікке самғады.
Қаныбек ӘБДУОВ
<img src="https://kyzylorda-news.kz/wp-content/uploads/2020/05/gwlshara-abdykalykova-kandaj-okwshy-bolgan-kaz-02-1.jpg" alt="" />
<img src="https://kyzylorda-news.kz/wp-content/uploads/2020/05/gwlshara-abdykalykova-kandaj-okwshy-bolgan-kaz-03-1.jpg" alt="" />
<img src="https://kyzylorda-news.kz/wp-content/uploads/2020/05/gwlshara-abdykalykova-kandaj-okwshy-bolgan-kaz-04-1.jpg" alt="" />

«Өзі бойшаң, соңғы партада отыратын»: Гүлшара Әбдіқалықова мектепте қандай оқушы болған? (ФОТО)

<a href="https://kyzylorda-news.kz/">Kyzylorda-news.kz.</a> Қызылорда облысында коронавирус инфекциясын жұқтырған 8 адам тіркелді.
Олардың 7-і Қызылорда қаласының тұрғыны болса, 1-і Арал ауданында тұрады.
Соңғы деректе қауіпті дертті бір отбасының үш адамы жұқтырғаны белгілі болды. Бұл туралы Қызылорда облыстық тауарлар, қызметтердің сапасы мен қауіпсіздігін бақылау департаментінің баспасөз қызметі хабарлады.
<blockquote>
 «Вирус жұқтырған тұрғындардың үшеуі – бір отбасы мүшесі. Олар Қызылорда қаласында тұрады. 6 науқастан ПТР анализдері вирусты жұқтырған адаммен қарым-қатынаста болуына байланысты сынама алынған. Қалған 2 адамнан ҚР Бас мемлекеттік санитариялық дәрігерінің Қаулысына сәйкес скринингтеу кезінде оң нәтиже көрсетті. Қазіргі таңда пациенттер ауруханаға оқшауландырылып, хаттамаға сәйкес ем қабылдап жатыр. Ауру ошақтарында мамандар індетке қарсы іс-шаралар ұйымдастырып, қарым-қатынаста болғандар анықталуда», – делінген департамент хабарламасында.
</blockquote>
Қазіргі таңда Қызылорда облысында коронавирус инфекциясын жұқтырған 297 адам тіркелген. Оның ішінде 228-і сырқатынан жазылып шықты .

Қызылордада бір отбасында үш адам коронавирус жұқтырды

<a href="https://kyzylorda-news.kz/">Kyzylorda-news.kz.</a> Antikor.live жобасы аясында Қазақстан Республикасының Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) Қызылорда облысы бойынша департаментінің ұйымдастыруымен онлайн режимінде департамент басшысының бірінші орынбасары Бақытжан Ниязов ҚР АШМ Ветеринариялық бақылау және қадағалау комитетінің Қызылорда облысы бойынша аумақтық инспекциясының» басшысы Жандос Сәрсенбаев 2020 жылғы «Ветеринариялық қауіпсіздік» бойынша жүргізіліп жатқан жұмыстар жайлы&nbsp; облыс тұрғындарының сауалдарына жауап берді.
Тікелей &nbsp;эфир барысында&nbsp; сауықтыру шаралары, ветеринариялық бақылау, көрсетілетін мемлекеттік қызметтер пен сарып індетіне қарсы жүргізілген жұмыстар бойынша тоқталып өтті.
АШЖБ дерек қорында &nbsp;358,5 мың бас МІҚ, 772,4 мың бас уақ мал, 52,3 мың бас түйе, 151,4 мың бас жылқы, 2,9 мың бас шошқа тіркелген.
Осы жылы облыста эпизоотиялық іс-шаралардың алдын алу мақсатында аса қауіпті 14 түрлі жұқпалы ауруларға қарсы 5552,4 мың доза ветеринариялық препараттар қаралған,&nbsp; оның 86,4 пайызы&nbsp; облысқа тасымалданып жеткізілді. Егу жұмыстары қалалық, аудандық ветеринариялық станциялар арқылы жүргізілуде.
Сарып індетіне қарсы&nbsp; 173548 бас МІҚ, 308628 бас уақ мал тексеріліп, нәтижесінде ауру 24 бас МІҚ, 36 бас уақ мал анықталды. Осы ауру малдар ветеринариялық-санитариялық ережелерге сәйкес&nbsp; санитариялық сойылып, қайта өңдеу кәсіпорынына өткізілді.
Жануарлардан алынған сынамалардан құтыру ауруына оң нәтиже көрсетуіне байланысты облыста 4 ошаққа Жаңақорған ауданы, Бесарық а/о, Жаңақорған кенті /ит/,&nbsp; Сырдария ауданы, А. Тоқмағамбетов а/о /қасқыр іқм жарақаттаған/ және Қазалы ауданы, Құмжиек ауылдық округінде /түйе/ құтыру ауруына шектеу іс-шаралары белгіленіп, «Эпизоотияға қарсы отрядтың» Қызылорда филиалы тарапынан сауықтыру іс-шаралары жүргізіліп сауықтырылды.
“Экспорттау кезінде орны ауыстырылатын (тасымалданатын) объектілерге ветеринариялық сертификат беру” мемлекеттік көрсетілетін қызмет бойынша 174 &nbsp;мемлекеттік қызмет көрсетілді.
Осы ветеринариялық сертификат арқылы облысымыздан барлығы&nbsp; 2114 тонна балық және балық өнімдері экспортталды. Оның ішінде Ресей Федерациясына 1548 тонна, Польшаға 130 тонна, Голландияға 16,1 тонна, Қытайға 20 тонна, Литва- 32,4 тонна, Германия – 307,5&nbsp; тонна.
<blockquote>
 Қызылорда облысындағы ветеринариялық бақылаудағы объектілерді экспорттаушы кәсіпорындардың РЕЕСТР-іне тіркелген объектілер бойынша: ЕАЭО реестріне – 33 кәсіпорын, Еуро Одақ реестріне– 4 кәсіпорын, ҚХР реестріне – 4 кәсіпорын, Өзбекстан реестріне – 2 кәсіпорын тіркелген.
</blockquote>
Ресейден 50 бас МІҚ малдары Жаңақорған ауданы «Амалбек»ШҚ-на импортталды.
Қызылорда облысының полиция департаментімен «Браконьерлікке және мал ұрлығына қарсы іс-қимыл жөніндегі шаралардың 2020-2021 жылдарға арналған жоспары» келісіліп, бекітілді. Келісілген жоспарға сәйкес қала, аудандарда ішкі істер органымен бірге жұмыс атқарылуда.
ҚР ӘҚБтК-нің 406-бабына сәйкес ветеринариялық құжатсыз мал тасымалдаған тұлғаларға 32 әкімшілік&nbsp; іс қозғалып, 864 114 &nbsp;теңге көлемінде айыппұл салынды.
Кездесу соңында департамент басшысының бірінші орынбасары Ниязов Бақытжан Мақсұтұлы көрермендер тарапынан қойылған біршама сұрақтарға жауап беріп, алдағы уақытта ANTIKOR.LIVE жобасы аясында атқарылып жатқан жұмыстар өз жалғасын табатындығын атап өтті.

Қызылордада ветеринариялық қауіпсіздік шаралары қалай жүріп жатыр?

<a href="https://kyzylorda-news.kz/">Kyzylorda-news.kz.</a> Бірқатар шектеулерді қамтитын режим шағын және орта кәсіпкерлік субъектілеріне кері әсерін тигізбей өтпеді.
Қызылорда облысында 51 мыңнан аса кәсіпкерлік субъектілері тіркелген болса, оның 74,3 пайызы жұмысын уақытша тоқтатты.
Сәйкесінше, ШОК-те жұмыспен қамтылған 95 мыңға жуық жұмыс күшінің 49 пайызы еңбек етіп, қалған 51 пайызы уақытша жұмыссыздар қатарында болды.
Осыған орай, Үкімет тарапынан ШОК-ті қолдау мақсатында салықтардан босату, несие төлемдерін кейінге шегеру, нысандарды жалға алудан босату, мемлекеттік бағдарламалар аясында қосымша қаражаттар бөлу түріндегі жедел экономикалық шаралар қабылданды.
Біріншіден, салық және кеден берешегін, әлеуметтік төлемдер бойынша берешегі бар 25 мыңға жуық субъектінің банк шоттарына қойылған шектеулер кері қайтарылды. 
Екіншіден, мемлекеттік немесе квазимемлекеттік сектордан жалға алып отырған мүліктердің жалға алу құнын шағын және орта кәсіпкерлері үшін 3 айға босату туралы 23,9 млн теңгеге қосымша 308 келісім жасалынды. Сондай-ақ, шағын және орта кәсіпкерлік субъектілері коммерциялық мақсаттағы ғимараттарды жалға алу құнынан босатылып, жеңілдіктің жалпы сомасы 351 млн теңгені құрады.
Үшіншіден, ШОК субъектілерінің екінші деңгейлі банктер мен қаржы ұйымдарынан алған 1 990 несиесі үш айға кейінге шегерілді.
Айта кету қажет, жуырдағы Мемлекет басшысының тапсырмасына сәйкес төтенше жағдайдан кейін ШОК сауықтыру үшін мемлекеттік бағдарламалардың қаржыландыру шарттары жетілдіріліп, бюджеттен қосымша қаражаттар тартылуда.
Биылғы жылы, «Бизнестің жол картасы 2025» бизнесті қолдау мен дамытудың мемлекеттікбағдарламасын іске асыруға қаралған 1,7 млрд теңге қаражат 3,42 млрд теңгеге ұлғайтылды. Сондай-ақ,нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасы арқылы Қызылорда қаласына шағын несие беру құралына бөлінген 250 млн теңгені 500 млн теңгеге дейін көбейтілуде.
Сондай-ақ, Қазақстан Республикасының Президенті Қ.К. Тоқаев Төтенше жағдайлар жөніндегі мемлекеттік комиссияның 2020 жылғы 10 сәуірдегі отырысында шағын және орта бизнесті тоқыраудан шығарып, кезең-кезеңмен жандандыру туралы тапсырма берді.
Осыған орай, облыста 29 сәуірден бастап шағын және орта кәсіпкерлік субъектілерінің қызметіне кезең-кезеңмен рұқсат етілуде. Атап айтқанда, бірінші кезең 29 сәуірден, екінші кезең 4 мамырдан, үшінші кезең 11 мамырдан, төртінші кезең 18 мамырдан, бесінші кезең 25 мамырдан басталды.
Бүгінгі күні күшейтілген санитарлық режимде барлығы 47 мыңға жуық кәсіпкерлік субъектісінде 90 мыңнан аса адам жұмысын қайта жандандырды.

Төтенше жағдай және карантин режимі қызылордалық кәсіпкерлерге қалай әсер етті?

<a href="https://kyzylorda-news.kz/">Kyzylorda-news.kz.</a> ҚМДБ «Зекет» қорының Қызылорда облыстық өкілдігінің ұйымдастыруымен «Ел үлесі – пәтерге» акциясының 212-баспанасы Қармақшы ауданы Ақтөбе ауылының имамына бұйырды.
ҚМДБ-ның Сыр өңірі бойынша бас имамы Болатбек Ұласқанұлы Қармақшы ауданы Ақтөбе ауылдық «Әбу Ханифа» мешітінің имамы Е.Күдеровті облыстық мешітке арнайы шақырып, пәтер кілтін табыстады.
Айта кетейік, биыл Қазақстан мұсылмандары діни басқармасына 30 жыл толуына орай шалғай ауылдағы 30 дін қызметкерін баспанамен қамтамасыз ету шарасы бастау алған болатын.
Аталған шараның мақсаты – әлеуметтік жағдайы төмен, баспанасыз 30 дін қызметкерін үй-жаймен қамтамасыз етіп, қолдау білдіру.
<img src="https://kyzylorda-news.kz/wp-content/uploads/2020/05/qarmaqshy-awdanynyng-imamy-1.jpg" alt="" />
<img src="https://kyzylorda-news.kz/wp-content/uploads/2020/05/qarmaqshy-awdanynyng-imamy-2.jpg" alt="" />

Қармақшыда Ақтөбе ауылының имамы баспаналы болды (ФОТО)

<a href="https://kyzylorda-news.kz/">Kyzylorda-news.kz.</a> Халықтың сұранысына және өңірлердегі эпидемиологиялық жағдайға байланысты жолаушылар пойыздары биылғы 1 маусымнан жүре бастайды.
ҚР Индустрия және инфрақұрылымдық даму министрлігінің ақпаратына сәйкес,&nbsp;бастапқы кезде&nbsp;54 пойыз қатынай бастайды:
– Нұр-Сұлтаннан – Алматы, Маңғыстау, Өскемен, Сарыағаш, Семей, Арқалык, Павлодар, Петропавл/Қызыл ту, Орал, Жезқазган, Қызылорда;
– Алматыдан – Шымкент, Павлодар, Ақтөбе, Маңғыстау, Сарыағаш, Өскемен, Жезқазган, Орал, Петропавл, Қостанай;
– Кызылордадан – Семей, Көкшетау, Петропавл;
– Қостанайдан – Қарағанды; Арқалык;
– Қарағандыдан – Жезқазған;
– Қызылордадан – Көкшетау, Петропавл,
– Маңғыстаудан – Ақтөбе бағыттары бойынша және қаламаңы қатынастары.
Екінші кезең – 10 маусымнан бастап&nbsp;39 пойызды&nbsp;жолға шығару жоспарланып отыр. Оның ішінде:
–&nbsp;Нұр-Сұлтаннан – Алматы, Атырау, Достық, Орал, Айсары, Шымкент;
–&nbsp;Алматыдан – Атырау, Ақтөбе, Орал, Өскемен, Түркістан, Петропавл;
–&nbsp;Атыраудан – Маңғыстау, Ақтөбе, Құлсары, Карабатан бағыттары бойынша және қаламаңы бағыттары.
Үшінші кезеңде&nbsp;аймақтарда санитарлық-эпидемиологиялық жағдайдың жақсаруына қарай, сонымен бірге көрші елдермен келіскеннен кейін&nbsp;15 пойызды&nbsp;жүргізу көзделген. Оның ішінде:
–&nbsp;Алматыдан – Ташкент, Саратов, Үрімші, Новосібір, Қазан;
–&nbsp;Нұр-Сұлтаннан – Челябі;
–&nbsp;Қарағандыдан – Мәскеу, Омбы, Томск;
–&nbsp;Атыраудан – Астрахан бағыттары бойынша.
<blockquote>
 «Қазіргі кезде (осы жылы 15 мамырдан бастап) жолаушылар билеттері сатылып жатыр. Барлық инфраструктуралық нысандар санитарлық талаптарға сәйкес тасымалдар жасауға және құрамдар сапарға шығуға дайын. Жолаушылардың және пойыздардың бригада қызметкерлерінің қауіпсіздігін қамтамасыз ету үшін тасымалдар Көліктегі мемлекеттік бас санитарлық дәрігердің ұсынымдарына сәйкес атқарылады», – деді министрліктен.
</blockquote>

Қазақстан және Қызылорда облысының жаңалықтары