<a href="https://kyzylorda-news.kz/">Kyzylorda-news.kz.</a> Қызылорда облысында өткен жылы 8 жаңа спорт нысаны салынды. Бұл туралы аймақ басшысы Гүлшара Әбдіқалықова 2020 жылғы облыстың әлеуметтік-экономикалық дамуының қорытындылары бойынша халық алдындағы есепті кездесуінде айтты.
Қызылорда облысында өткен жылы бюджет есебінен 8 жаңа спорт нысаны салынды. Мемлекеттік-жекешелік әріптестік шеңберінде 60секциялы 5 жоба жүзеге асырылды. Арал ауданы Жақсықылыш кентінде 1 жобаның құрылысы жалғасуда.
<blockquote>
 «Биыл Қызылорда қаласының сол жағалауында көгалдағы хоккей және Тасбөгет кенті мен Ақай, III Интернационал ауылдарында денешынықтыру-сауықтыру кешені құрылыстарын бастаймыз», – деді облыс әкімі.
</blockquote>

Қызылорда облысында былтыр 8 жаңа спорт нысаны салынды

<a href="https://kyzylorda-news.kz/">Kyzylorda-news.kz.</a> Өткен жылы елімізде Әбу Насыр Әл-Фарабидің 1150, Алтын Орданың 750, ұлы Абайдың 175, Ұлы Жеңістің 75 жылдығы аталып өтіп, мерейтойлар аясында облыста 2000-ға жуық іс-шара онлайн форматта ұйымдастырылды. Бұл туралы аймақ басшысы Гүлшара Әбдіқалықова өзінің халық алдындағы есепті кездесуінде айтты.
<blockquote>
 «Youtube платформасында арнайы «Сыр шаңырағы»,«Сыр қоғамы», «Сыр бірлігі», «Сыр жастары», «Сыр спорты»&nbsp; медиа-арналары ашылды. Сыр жерінде алғаш рет Латиф Хамидидің атақты «Абай» операсы қойылды. Оған өңірдің жүзге жуық әртісі қатысты», – дейді облыс әкімі.
</blockquote>
Ежелгі және ортағасырлық қалашықтарға, атап айтар болсақ, Бәбіш-Мола Сортөбе, Жанкент, Сығанақ, Қышқала, Асанасқа археологиялық зерттеулер жүргізілді.

Қызылордада былтыр 2 мыңға жуық іс-шара ұйымдастырылды

<a href="https://kyzylorda-news.kz/">Kyzylorda-news.kz.</a> Қызылорда облысында апатты мектептердің мәселесін шешу күн тәртібінен түспейді. Бұл туралы аймақ басшысы Гүлшара Әбдіқалықова халық алдындағы есепті кездесуінде айтты.
Қызылорда облысында пандемияға байланысты бүгінгі күні оқушылардың 49 пайызы қашықтан, 51 пайызы дәстүрлі форматта білім алуда. Қашықтан оқытуды сапалы ұйымдастыру мақсатында мектептердің балансындағы 14 мыңнан астам компьютер оқушыларға берілген. Өңірге Үкімет резервінен 3,2 млрд. теңге қаржы бөлініп, 22 870 дана құрылғы сатып алынды. Сондай-ақ, жергілікті бюджет және демеушілер есебінен 4 мың компьютерлік техника сатып алынып, мұқтаж балаларға таратылды.
Сонымен қатар, 2020 жылы аз қамтылған және көп балалы отбасылардан шыққан дарынды ауыл балаларына арналған гранттардың саны 150-ге көбейген.
<blockquote>
 «Апатты жағдайдағы мектептердің мәселесін шешудеміз. Өткен жылы Жалағаш ауданы, Шәменов ауылындағы апатты мектеп орнына жаңа ғимарат салынып, пайдалануға берілді. Жаңақорған кентіндегі мектептің құрылысы жүргізілуде. Арал қаласындағы апатты мектептің құрылысын биыл бастаймыз. Инвесторлар есебінен 500 орынға лайықталған бір мектеп салынса, қазіргі таңда Қызылорда қаласы Саяхат мөлтек ауданынан 300 орындық бір мектептің құрылысы жүргізілуде», – деді аймақ басшысы.
</blockquote>

Гүлшара Әбдіқалықова: «Қызылорда облысындағы апатты мектептердің мәселесі күн тәртібінде тұр»

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова 2020 жылғы өңірдің әлеуметтік-экономикалық дамуының қорытындылары бойынша халық алдындағы есепті кездесуінде аймақта аудандық орталық ауруханалар салу мәселесі толығымен шешілгенін айтты.
<blockquote>
 «Біз аудандық орталық ауруханалар салу мәселесін толығымен шештік. Енді алғашқы медициналық-әлеуметтік көмек көрсететін 62 нысанды 2024 жылға дейін жаңартуды жоспарлап отырмыз», – деді Гүлшара Наушақызы.
</blockquote>
Оның ішінде биылғы жылы Жаңақорған ауданындағы Жаңарық, Жалағаш ауданындағы Таң ауылдарында дәрігерлік амбулатория құрылысы басталады.
Сондай-ақ, өңірде 23 нысанның, атап айтқанда, 14 амбулатория, 9 медпункт жобалық-сметалық құжаттары әзірленуде.
Гүлшара Әбдіқалықова Мемлекет басшысының тапсырмасына сәйкес 2020 жылы індетпен тікелей күрескен 3 мыңнан аса медицина қызметкеріне 3 млрд теңге көлемінде үстемеақы төленгенін айтты. Сонымен қатар, 20 медицина қызметкері жоғары мемлекеттік наградамен, 107 қоғам белсендісі (еріктілер, медицина қызметкерлері, меценаттар) «Халық алғысы» медалімен марапатталған.

Облыс әкімі: Қызылорда облысында аудандық орталық ауруханалар салу мәселесін толығымен шешілді

<a href="https://kyzylorda-news.kz/">Kyzylorda-news.kz.</a> Бүгінде Қызылорда облысында 271 млрд. теңгені құрайтын өңірдің «Экономикалық даму картасы» өзінің тиімділігін көрсетуде. Бұл туралы аймақ басшысы Гүлшара Әбдіқалықова 2020 жылғы облыстың әлеуметтік-экономикалық дамуының қорытындылары бойынша халық алдындағы есепті кездесуінде айтты.
<blockquote>
 «Облыстың жалпы экономикалық жағдайын талдай отырып, біз өткен жылы өңірдің 2023 жылға дейінгі «Экономикалық даму картасын» қабылдадық. Картада 271 млрд теңгені құрайтын 265 маңызды жоба бар. Бүгінгі күні жалпы құны 7 млрд теңгені құрайтын 89 жоба өз жұмысын бастады, 1047 жұмыс орны құрылды. Биыл жобалар санын 500-ге жеткізу жоспарлануда», – деді Гүлшара Наушақызы.
</blockquote>
Өңірде кешегі індет кезінде мейрамханалар қызметін тоқтатқаны белгілі. Осыған орай, облыс бойынша 128 мейрамхананың 15-сі қызметін өндіріс саласына қайта бағыттады.
Сонымен қатар, аз қамтылған көп балалы отбасыларын тұрақты табыспен қамтамасыз ету мақсатында оларды кәсіпкерлікке тарту жолға қойылуда. Мәселен, «Еңбек» бағдарламасы бойынша 670 көп балалы ана бизнес-идеяларды іске асыруға арналған гранттар алды.

«Қызылорда облысының экономикалық даму картасы»: 271 млрд теңге, 265 маңызды жоба

<a href="https://kyzylorda-news.kz/">Kyzylorda-news.kz.</a> Пандемия кезінде өңірдегі 54 мыңға жуық кәсіпкер салықтық жеңілдіктерін алып, 8,5 мыңнан астамы міндетті әлеуметтік медициналық сақтандыру төлемдерінен босатылды. Бұл туралы Қызылорда облысының әкімі Гүлшара Әбдіқалықова халық алдындағы есеп беру кездесуінде айтты.
<blockquote>
 «Тоғыз мың сауда алаңы, яғни 147 ірі сауда нысандары шамамен 
700 млн теңге арендалық ақыдан, 194 кәсіпкер мемлекеттік меншікті жалдау құнынан, яғни 60 млн теңгеден босатылды. Сегіз мыңға жуық кәсіпкердің 11 млрд теңгеден астам несие қарызы кейінге шегерілді», – дейді облыс әкімі.
</blockquote>
Кәсіпкерлік саласындағы бағдарламалар аясында өткен жылы бизнесті қолдауға банктермен 20 млрд теңгеден астам қаражат бағытталды.
<blockquote>
 «Қызылорда» өңірлік инвестициялық орталығымен несиелендірудің қолжетімді шарттары арқылы ауыл кәсіпкерлерінің стартап жобаларына облыстық бюджеттен 2 млрд теңге қаржы бөлінді», – дейді Гүлшара Әбдіқалықова.
</blockquote>
Нәтижесінде жұмыс істеп тұрған шағын және орта бизнес субъектілерінің саны 5 пайызға, республика бойынша 2%-ға артып, жұмыспен қамтылғандар саны 96 мың адамды (2019 жылы – 91,4 мың адам) құрады. Бұл көрсеткіш өткен жылы 91,4 мың адамды құраған болатын.
<blockquote>
 «Осы атқарылған жұмыстардың қорытындысымен облыста жалпы өңірлік өнімнің үлесі 18 пайызға ұлғаяды», дейді аймақ басшысы.
</blockquote>

Қызылордада 8 мыңға жуық кәсіпкердің несие қарызы кейінге шегерілді

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова өңірдің 2020 жылғы әлеуметтік-экономикалық дамуының қорытындылары бойынша халық алдындағы есепті кездесуінде өңірдегі балық шаруашылығына да тоқталды.
2030 жылға дейін кемінде 55 көл-тауарлы балық өсіру шаруашылығы, 12 тоған және 16 тор шаруашылығы құрылып, 3 жабық сумен жабдықтау құрылғысы салынатын болады.
<blockquote>
 «Балық саласы мемлекет тарапынан субсидияланған. 2020 жылы біз балық шаруашылығын дамытудың 2030 жылға дейінгі өңірлік бағдарламасын әзірледік. Оған шамамен алдағы жылдарда кезең-кезеңімен 29 млрд теңге бағытталатын болады. Нәтижесінде тауарлық балық көлемі 110 есеге артып, балық өнімдерінің экспорты қазіргі 4,2 мың тоннадан 8,5 мың тоннаға дейін ұлғаятын болады», – деді аймақ басшысы.
</blockquote>

Қызылордада 55 көл-тауарлы балық өсіру шаруашылығы салынбақ

<a href="https://kyzylorda-news.kz/">Kyzylorda-news.kz.</a> Биыл Қызылорда облысында жалпы құны 3,8 млрд. теңге болатын «Қараөзек» және «Күміскеткен» су қоймаларының жобалау құжаттамалары аяқталған соң, құрылысын басталмақ. Бұл туралы аймақ басшысы Гүлшара Әбдіқалықова халық алдындағы есепті кездесуінде айтты.
Бүгінгі күні өңірде Қызылорда және Әйтек су тораптарын қайта жаңғырту және Жалағаш ауданындағы дренаж-суару жүйесін жетілдіру жұмыстары жүргізілуде. Сондай-ақ, Жиделі су қоймасын жөндеу жұмыстары аяқталып, былтыр пайдалануға берілді.
Аймақ басшысының айтуынша, осы жылы Үкіметтің қолдауымен «Көкарал» бөгетін қалпына келтіру жұмыстары жүргізілетін болады. Бұл жобаның құны 4,7 млрд. теңгені құрайды.

Г. Әбдіқалықова: «Осы жылы «Қараөзек» және «Күміскеткен» су қоймаларының құрылысы басталады»

<a href="https://kyzylorda-news.kz/">Kyzylorda-news.kz.</a> Сыр өңірінде мал шаруашылығын дамыту саласы бойынша жүйелі жұмыстар жүргізілуде.
<blockquote>
 «Мәселен, үстіміздегі жылы қосалқы жерде орналасқан жайылымдарда 345 су көзін құжаттандырып, шамамен 1,3 млн гектар жерді іске қосамыз», – деді облыс әкімі Гүлшара Әбдіқалықова халық алдындағы есепті кездесуінде.
</blockquote>

Сыр өңірінде биыл 1,3 млн гектар жайылымдық жер пайдалануға беріледі

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова өңірдің 2020 жылғы әлеуметтік-экономикалық дамуының қорытындылары бойынша халық алдындағы есепті кездесуінде Сыр елінің агроөнеркәсіп саласында айтарлықтай өсім бар екендігін мәлімдеді.
Қазіргі таңда облыста 8,7 мың тоннадан астам әлеуметтік маңызы бар азық-түлік қоры қалыптасқан. Оның 2,2 мың тоннасы тұрақтандыру қорының өнімдері. Бұл мақсатқа 1,2 млрд. теңге бөлінді.
<blockquote>
 «Соңғы 5 жылда аграрлық сектордың жалпы өңірлік өнімдегі үлесі 4%-ға өсті. Бұл инвестициялардың жоғары өсу қарқынына, техникалық қайта жарақтандыруға және жаңа технологиялардың енгізілуіне байланысты. Тек соңғы жылдың өзінде агроөнеркәсіптік кешеннің негізгі капиталына салынған инвестициялар көлемі екі есеге өсті», – деді Гүлшара Наушақызы.
</blockquote>
Сонымен қатар, өңірде ауыл шаруашылығы өнімдерінің экспорты шамамен 9 пайызға өскен. Осы экспорттың 97 пайызы қайта өңделген өнімді құрайды.
2020 жылы алғаш рет шет елге қамыс экспортталды. Оның алғашқы 685 тоннасы Германияға жіберілді.
Сондай-ақ, Сыр елінен әлемнің 17 еліне ауыл шаруашылығы өнімдерінің 11 түрі экспортталды.

Сыр елінің агроөнеркәсіп саласында айтарлықтай өсім бар

<a href="https://kyzylorda-news.kz/">Kyzylorda-news.kz.</a> Сыр өңірінде жыл сайын туындайтын су тапшылығын жою үшін қоймалар салынады. Бұл туралы аймақ басшысы Гүлшара Әбдіқалықова халық алдындағы есепті кездесуінде айтты.
<blockquote>
 «2020 жылы күрішшілеріміз гектарына 61,8 центнерден өнім алып, 550 мың тоннадан астам күріш жинап, жоғары көрсеткішке қол жеткізді. Аймағымызда вегетациялық кезеңде қайталанатын су тапшылығына байланысты ауылшаруашылығын әртараптандырудамыз. Өткен жылы пилоттық режимде Жаңақорған ауданында күздік бидай себілген 80 гектарға аквагельдер қолданылды. Нәтижесінде әр гектардан орта есеппен 18 центнерден өнім алдық», – деді Г.Наушақызы.
</blockquote>
Биыл өңірде тамшылатып суару әдісімен 3 мың гектарға қызанақ отырғызу және жаңбырлатып жүгері мен жоңышқа егуді бастау жоспарланып отыр. Алдағы жылдарда Мемлекет басшысының тапсырмасына сәйкес 158 мың гектар алқаптағы ирригациялық және дренаждық жүйелер мен 29 мың гектар суармалы жерді қалпына келтіру және айналымға енгізу жобаларын жүзеге асыру басталмақ.
<blockquote>
 «Өздеріңізге белгілі, жыл сайын жаз мезгілінде аймақта су тапшылығы орын алады. Әсіресе өткен жылы су тапшылығы қатты сезілді. Сырдария өзені арқылы келетін судың 70 пайызға жуығы қыс мезгілінде келеді. Сондықтан, алдағы уақытта қысқы тасқын суды жинақтау үшін 2,3 млрд. текше метр су жинайтын қоймалар салуды жоспарлап отырмыз», – деді аймақ басшысы аталған мәселеге орай.
</blockquote>

Қызылорда облысында 2,3 млрд текше метр су жинайтын қоймалар салынады

<a href="https://kyzylorda-news.kz/">Kyzylorda-news.kz.</a> 2020 жылы Қызылорда облысының экономикасының негізгі басым бағыттарын дамытуға Президент тапсырмасымен қосымша 15,6 млрд теңге қаржы бөлінген.
Бүгін халық алдындағы есепті кездесуінде Гүлшара Әбдіқалықова бұл қаржыға өңірде маңызды 42 жоба жүзеге асырылғанын айтты.
<blockquote>
 «Барлық мемлекеттік бағдарламалар бойынша облыста 492 шақырым болатын автожол мен көше жөнделіп, 2 көпір және 408 пәтерлі 39 көпқабатты тұрғын үй, 13 әлеуметтік нысан пайдалануға берілді. Биыл 1964 пәтерлік 101 тұрғын үйді пайдалануға береміз», – деді Гүлшара Наушақызы.
</blockquote>

Қазақстан және Қызылорда облысының жаңалықтары