<a href="https://kyzylorda-news.kz/">Kyzylorda-news.kz.</a> Қызылорда облысына соңғы үш жылда шет елден 700-ден астам отандасымыз көшіп келіп, қандас мәртебесін алды. Атамекенге аңсары ауған қандастырымыздың басым бөлігі Өзбекстан және Ресей елінен келген. Бұл туралы Өңірлік коммуникациялар қызметінің ақпарат алаңында өткен брифингте ОПД Көші-қон қызметі басқармасы басшысының міндетін атқарушы Сағындық Қамитбеков мәлімдеді.
<blockquote>
 «Бүгінде басқарма тарапынан 21 мың 500 мемлекеттік қызмет түрі көрсетілді. Оның 21 242-сі электронды, ал 258-іне қағаз түрінде жауап берілді. Ал облысқа жыл басынан бері 311 шетел азаматы келіп, уақытша тіркеуге алынды. Олардың дені жұмыс істеуге келген. Бұған қоса, аймақта мүмкіндігі шектеулі және зейнеткерлерді, көп балалы аналарды құжаттандыру үшін арнайы мобильді топ ұйымдастырылды. Бүгінгі күннің өзінде 160 тұрғынның құжаты әзірленді. Алдағы уақытта бұл бағыттағы жұмыстар өз жалғасын табады», – деді Сағындық Убайдуллаұлы.
</blockquote>

Қызылордаға 3 жылда 700-ден астам қандас көшіп келді

<a href="https://kyzylorda-news.kz/">Kyzylorda-news.kz.</a> Сәуір айының басында еліміздің әр аумағында ауа райы әртүрлі болады, деп хабарлайды Қазгидромет.&nbsp;
Бастапқыда Қазақстанның шығыс жартысында антициклонға байланысты ауа-райы жауын-шашынсыз болады.
Батыс аймақтарға солтүстіктен және оңтүстіктен екі циклон әсер ете бастайды, олар кейінірек біріктіріліп, елдің басым бөлігінде ауа-райын анықтайды. Нәтижесінде оңтүстікте және оңтүстік-шығыста негізінен жаңбыр түрінде, кей жерлерде қатты жауын-шашын болады.
Елдің кей жерлерінде тұман, көктайғақ күтіледі, оңтүстікте және оңтүстік-шығыста – найзағай, бұршақ, желдің күшеюі, оңтүстік-батыста – шаңды дауыл күтіледі.

Алдағы күндері ауа райы қандай болады?

**<a href="https://kyzylorda-news.kz/">Kyzylorda-news.kz.</a> Биыл пітір мөлшері 420 теңге болып белгіленді. *Бұл туралы Қазақстан мұсылмандары діни басқармасының кеңейтілген төралқа мәжілісінде Бас мүфти Наурызбай қажы Тағанұлы айтты.***
Пітір садақаның мөлшері 2 келі ұнның орташа бағасымен есептелді. Ал ұнның бағасы ҚМДБ-ның қала және облыс өкілдіктерінің берген мәліметі негізінде анықталды.
ҚМДБ Уағыз-насихат бөлімінің меңгерушісі Батыржан Мансұров Төралқа мәжілісінде тарауық намазында санитарлық талаптарды сақтай отырып қысқа сүрелер оқу, ауа райы қолайлы аймақтарда мешіт ауласында өткізу, Рамазан айында Құран хатым жасайтын топтар құрып, жамағатты сауапты істерге жұмылдыру жағына басымдық беру туралы айтты. Сондай-ақ Батыржан Мансұров қасиетті айда онлайн және тікелей эфирде бірнеше жоба ұсынылатынын жеткізді.
Төралқа мәжілісінде ҚМДБ Ақпарат және қоғаммен байланыс бөлімінің меңгерушісі Марат Бектазинов ай бойы “Рамазан – ұлық ай”&nbsp;атымен тікелей эфир ұйымдастыру, әлеуметтік желілерде орталық мешіт парақшаларында облысқа танымал тұлғалармен «Рамазан – он екі айдың сұлтаны”&nbsp;атты күнделікті онлайн сұхбаттар өткізу, “Берекелі Рамазан”&nbsp;деген атпен апталық марафон болатынын айтты. “Халық арна телеарнасынан тікелей эфирде Рамазанға қатысты жобалар көрерменге жол тартпақ”&nbsp;деді Марат Дәлелханұлы.
Айта кетсек, Қазақстан мұсылмандары діни басқармасының мәліметіне сәйкес, биыл Рамазан айы 13 сәуірде басталып, 12 мамырда аяқталады. Рамазан айы 30 күн болады. 13 мамыр – Ораза айт күні. 8 мамырдан 9 мамырға қараған түн – Қадір түні.

Биыл пітір мөлшері 420 теңге болып белгіленді

<a href="https://kyzylorda-news.kz/">Kyzylorda-news.kz.</a> Бүгін Қазақстан Республикасы Президенті Әкімшілігінің келісімі бойынша облыс әкімінің өкімімен Шәменова Балжан Мөрәліқызы облыс әкімінің орынбасары лауазымына тағайындалды.
<img src="https://kyzylorda-news.kz/wp-content/uploads/2021/04/shamenova.jpg" alt="" />
Аймақ басшысы Гүлшара Әбдіқалықова жаңа орынбасарының қызметіне сәттілік тіледі.
<blockquote>
 «Балжан Мөрәліқызы өңірдің әлеуметтік-экономикалық және қоғамдық-саяси ахуалымен жақсы таныс. Әр түрлі салада жинақтаған мол тәжірибесін, қазіргі таңда маңызды болып саналатын әлеуметтік саланы одан әрі жетілдіруге аянбай жұмсайды деп сенім білдіремін.Облыс әкімінің орынбасары ретінде Балжан Мөрәліқызы денсаулық сақтау, білім беру, жұмыспен қамту және еңбек саласындағы бақылау салаларына жетекшілік жасайтын болады.Жаңа қызметіңізбен құттықтай отырып, алдағы атқарар жауапты жұмыстарыңызға сәттілік тілейміз», – деді облыс әкімі.
</blockquote>
Шәменова Балжан 1962 жылы Қызылорда облысында дүниеге келген. Алматы халық шаруашылығы институтын «экономист» мамандығы бойынша бітірген. Экономика ғылымдарының кандидаты, доцент.
Еңбек жолын 1979 жылы Қызылорда қаласындағы «Риссовхозстрой» тресінің № 27 жылжымалы механикалық колоннасында штукатур-маляршы ретінде бастаған.
1984-1997 жылдары облыстың жоғарғы оқу орындарында жауапты педагогикалық қызметтер атқарған.
1997-2012 жылдары облыстық экономика басқармасының басшысы болған.
2012-2013 жылдары облыстық медицина орталығы директорының экономика бойынша кеңесшісі.
2013-2014 жылдары Қазақ инженерлік-техникалық академиясының доценті ғылыми қызметтерін атқарған.
2014-2016 жылдары ҚР Денсаулық және әлеуметтік даму министрлігінің департамент директоры.
2016-2019 жылдары “Nur Otan” партиясы орталық аппараты жетекшісінің орынбасары лауазымдарын атқарған.
2019 жылғы қыркүйек айынан бастап “Еңбек ресурстарын дамыту орталығы” АҚ басшылық лауазымдарында әлеуметтік қамсыздандыру саласында қызмет атқарып келді.
<img src="https://kyzylorda-news.kz/wp-content/uploads/2021/04/167940282_3249238595179187_4102962819231014620_n.jpg" alt="" />

Қызылорда облысы әкімінің орынбасары тағайындалды

<a href="https://kyzylorda-news.kz/">Kyzylorda-news.kz.</a> Қазақстан президенті Қасым-Жомарт Тоқаев үкіметке шағын және орта бизнесті қолдау шараларын қарастыруды тапсырды, деп хабарлайды.
<blockquote>
 “Үкіметтен келесі мәселелерді тез арада пысықтауды сұраймын: бірінші – пандемиядан зардап шеккен салалардағы ШОБ субъектілері үшін жекелеген салықтар мен төлемдерді төлеуді кейінге қалдыру, екіншісі – салықтық және кедендік берешектерді мәжбүрлі түрде өндіріп алуды уақытша тоқтату”, – деді Тоқаев коронавирус індетіне қарсы қабылданып жатқан шаралар жөніндегі жиында.
</blockquote>
Айтуынша, аталған шаралар жаппай вакциналау басталғанға және шектеулердің көбі алынғанға дейін уақытша қолданыста болуға тиіс.
Сондай-ақ, президент Ұлттық банк пен Қаржы нарығын реттеу және дамыту агенттігіне экономиканың зардап шеккен салаларындағы ШОБ-қа кредиттер бойынша төлемдерін кейінге шегеру мүмкіндігін пысықтауды тапсырды.
<blockquote>
 “Үкімет пандемияға қатысты жағдайды жақсы жағына қарай өзгертеді деген үмітпен, мамырдан бастап ШОБ субъектілеріне, соның ішінде қызмет көрсету саласында шектеулерді біртіндеп алып тастауға кірісе беруге болады”, – деді Тоқаев.
</blockquote>
Президент үкіметке ASHYQ жобасының ауқымын кеңейту және жүйені белсенді енгізуді қамтамасыз ету міндетін жүктеді. Сондай-ақ, ол тиісті нормативтік база жасаудың маңыздылығын атап өтті.
<a href="https://sputnik.kz/">Sputnik Қазақстан</a>

Тоқаев кредит төлеу мерзімін кейінге қалдыруды тапсырды

<a href="https://kyzylorda-news.kz/">Kyzylorda-news.kz.</a>&nbsp;Қызылорда қаласы Бұқарбай батыр көшесінің бойында жаяу жүргіншілер жолағымен өтпекші болған екі азаматшаны белгісіз автокөліктің қаққандығы туралы полицияға хабарлама түсті.
Орын алған жол-көлік оқиғасы бойынша жедел түрде іздестіру &nbsp;шаралары &nbsp;басталып, &nbsp;оқиға орнынан сұрастыру жұмыстары жүргізілді.
Кешенді іздестіру шараларының нәтижесінде 1 сағат ішінде күдікті автокөлік анықталды. Көлік тізгіндеген 36 жастағы қала тұрғынына қатысты оқиға орнында Қазақстан Республикасының Әкімшілік құқық бұзушылық туралы кодексінің 610-бабының 1-бөлігімен &nbsp;(Көлiк құралдары жүргiзушiлерінiң жол жүрісі қағидаларын адамдардың денсаулығына зиян келтiруге, көлiк құралдарының немесе өзге де мүлiктiң бүлінуіне алып келген бұзушылығы) әкімшілік құқық бұзушылық туралы хаттама толтырылды. Жаяу жүргіншілердің өмірі мен денсаулығына қауіп жоқ.&nbsp;&nbsp;&nbsp;&nbsp; &nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;
Жедел әрекет еткен Қызылорда облысы полиция департаментінің Жергілікті полиция қызметі басқармасының іздестіру тобының ерекше тапсырмалар жөніндегі аға инспекторы полиция майоры Нартай Азат &nbsp;ізін суытпай күдікті автокөлікті анықтады. Тәжірибесі мол, өз міндетін жауапты әрі қырағылықпен орындайтын полиция майоры Нартай Азат&nbsp; Ішкі істер органдарында 2010 жылдан бері қызмет атқарады.
Жаяу жүргіншілердің бірінің туысы әлеуметтік желілер арқылы Нартай Азат&nbsp; бастаған қызметкерлер тобына алғысын білдіріп, жазба қалдырған. &nbsp;&nbsp;&nbsp;&nbsp;
<img src="https://kyzylorda-news.kz/wp-content/uploads/2021/04/whatsapp-image-2021-04-01-at-09.18.11.jpeg" alt="" />
Полиция майоры Нартай Азат

Қызылордада 36 жастағы жүргізуші екі адамды қағып кетті

<a href="https://kyzylorda-news.kz/">Kyzylorda-news.kz.</a> Қызылорда қаласы әкімінің орынбасары Бектас Нуридиновтың төрағалығымен әлеуметтік әріптестік пен әлеуметтік және еңбек қатынастарын реттеу жөніндегі қалалық үшжақты комиссия отырысы өтті.
Оған қалалық үшжақты комиссия, жұмысшы тобы құрамы, қала кәсіпорындарының басшылары қатысты.
Жиында қала бойынша мекемелер мен кәсіпорындардан жұмыстан босаған жұмысшыларға әлеуметтік шараларды қарастыру, қала кәсіпорындарындағы еңбек қатынастарының жағдайы және «Еңбек жолы» республикалық конкурсының қалалық кезеңін өткізу мәселері қаралды.
Қалалық жұмыспен қамту орталығының директоры Ж. Төлегенов қала мекемелерінен жұмыстан қысқартылған азаматтардың босағаннан кейін жұмыспен қамтудың белсенді шараларына тартуы, оларға көрсетіліп жатқан әлеуметтік көмектер жайлы баяндады.
Бұдан бөлек, қала кәсіпорындарындағы, оның ішінде «Су жүйесі» МКМ, «Қызылорда тазалығы» ЖШС, «Дорстрой» ЖШС мекемелеріндегі еңбек қатынастарының жағдайы бойынша жұмыскерлер алдындағы қалыптасқан берешекті өтеу бағытында қабылданып жатқан шаралар пысықталды.
<img src="https://kyzylorda-news.kz/wp-content/uploads/2021/04/167560130_2805019623098111_2847915199213288260_n.jpg" alt="" />
Жоғарыда аталған мәселе бойынша Бектас Балғабайұлы жұмыс берушілердің еңбек заңнамасын сақтауы, жалақы берешектерін өтеу бойынша мекеме басшыларына бірқатар тапсырмалар берді.
Сонымен қатар, комиссия төрағасы 2021 жылғы 1 шілдеге дейін «Еңбек Жолы» республикалық конкурсына қатысуға өтінімдер қабылдау басталғанына тоқталып өтіп, барлық меншік нысанындағы ұйымдардың еңбек ұжымдарын аталған <a href="https://qorda.kz/anons/888-ebek-zholy-respublikaly-konkursyna-tnm-abyldau-bastaldy.html">конкурсқа</a> қатысуға шақырды.
<img src="https://kyzylorda-news.kz/wp-content/uploads/2021/04/167838951_2805019716431435_5343305084248669290_n.jpg" alt="" />

Әлеуметтік және еңбек қатынастарын реттеу жөніндегі комиссияның отырысы өтті

<a href="https://kyzylorda-news.kz/">Kyzylorda-news.kz.</a> Қалада коронавирустан көз жұмғандарды жерлеу үшін ескі қабірлер қазылып, орын босатылып жатыр,&nbsp;деп хабарлайды «Хабар 24».
Бразилияның Сан-Паулу қаласында коронавирустан көз жұмғандарды жерлеу үшін ескі қабірлер қазылып, орын босатылып жатыр.
Жергілікті билік осылайша індеттен қайтқандарды жерлейтін жаңа жер әзірлеуге кірісті. Ақпарат көздерінің хабарлауынша, 3 жыл бұрын жерленген мәйіттердің денесі эксгумацияланып жатыр. Марқұмдардың сүйектері басқа жерге көшірілмек. Билік өкілдерінің айтуынша, жер тапшылығынан осындай қадамға баруға тура келді.
Айта кетейік, Бразилияда коронавирус дертінен бір күнде 4 мыңға жуық адам бақилық болды. Соңғы тәулікте 75 мыңнан астам адам індет ілмегіне ілінген. Қазір елдің ірі штаттарында локдаун жарияланды. Ал мамандар жағдайдың ушығуына жол бермеу керек деп дабыл қағуда.

Коронавирустан көз жұмғандарды жерлеу үшін ескі қабірлер қазылып жатыр

<a href="https://kyzylorda-news.kz/">Kyzylorda-news.kz.</a> Шиелі ауданы өткен жылы 120 тонна күріш, 850 тонна қарбыз, 1005 тонна қауын және 351 тонна қызанақ дақылын Ресей және Қырғызстан елдеріне экспорттады. Бұл туралы Өңірлік коммуникациялар қызметінің ақпарат алаңында өткен баспасөз конференциясында Шиелі ауданының әкімі Қамбарбек Мүбараков мәлімдеді.
Жалпы ауданда 13 жылыжай бар. Былтыр қызанақ пен қиярдан 550 тонна өнім жинаған. Биыл Шиеліде 30 246 гектар жерге ауыл шаруашылығы дақылы егіледі. Негізгі дақыл күріштің үлесі 12 037 гектар. Жалпы егіс көлемінің 38,8 пайызын құрап отыр. Дәнді дақылдар үлесін 2379-ға, картоп, көкөніс, бақша дақылдарын 5157 гектарға ұлғайту көзделуде. Сондай-ақ, 70 гектарға соя дақылы егілетін болады.
<blockquote>
 «Өткен жылы аудан бойынша 29 461 гектар жерге ауыл шаруашылығы дақылдарын еккенбіз. Диқандар 14 353 гектардан 59,9 центнерден өнім алып, қамбаға 85 940 тонна астық жинады. Бұған қоса, 1183 гектар картоптан 29575 тонна, 1537 гектар көкөністен 46110 тонна және 2123 гектар бақша дақылдарынан 63690 тонна өнім алды. Биыл да мол өнім жинаймыз деген ниеттеміз», – деді Шиелі ауданының әкімі Қамбарбек Мүбараков.
</blockquote>

Шиелі ауданы ауыл шаруашылығы өнімдерін Ресей мен Қырғызстанға экспорттауда

<a href="https://kyzylorda-news.kz/">Kyzylorda-news.kz.</a> Қазақстандағы коронавирусқа қатысты 1 сәуірдегі 23:59-дағы эпидемиологиялық жағдай бойынша ПТР арқылы 2 077 адамда коронавирус індеті расталды, деп хабарлайды <a href="https://www.coronavirus2020.kz/kz">coronavirus2020.kz</a>.
Аймақтар бойынша:
Нұр-Сұлтан қаласы – 427, 
Алматы қаласы – 595, 
Шымкент қаласы – 96, 
Ақмола облысы – 50, 
Ақтөбе облысы – 127, 
Алматы облысы – 239, 
Атырау облысы – 103, 
Шығыс Қазақстан облысы – 41, 
Жамбыл облысы – 18, 
Батыс Қазақстан облысы – 104, 
Қарағанды облысы – 144, 
Қостанай облысы – 36, 
Қызылорда облысы – 27, 
Маңғыстау облысы – 22, 
Павлодар облысы – 21, 
Солтүстік Қазақстан облысы – 5, 
Түркістан облысы – 22.
Жалпы ел бойынша ауырғандар саны 248 931.

Қызылордада өткен тәулікте 27 адам коронавирус жұқтырды

<a href="https://kyzylorda-news.kz/">Kyzylorda-news.kz.</a> Қазақстан территориясының басым бөлігі әлі де жоғарғы қысым аймағында болатындықтан, жауын-шашынсыз ауа райы сақталады, деп хабарлайды Қазгидромет.
Қазақстанның оңтүстік-шығысында, батысында және қиыр солтүстігінде атмосфералық фронталды бөліктердің өтуіне байланысты кей жерлерінде жауын-шашын, оңтүстік-шығысында таулы аудандарда мол жауын-шашын (жаңбыр, қар) түседі.
Республиканың кей жерлерінде тұман, көктайғақ, желдің күшеюі, оңтүстік-батыста шаңды дауылмен, қиыр солтүстікте жаяу бұрқасынмен күтіледі.
Солтүстік Қазақстан облысының түнде кей жерлерінде жаяу бұрқасын, тұман күтіледі, басым бөлігінде жел 15-20, екпіні 23-28 м/с күшейеді.
Қостанай, Жамбыл облыстарының кей жерлерінде тұман, көктайғақ күтіледі, жел 15-20 м/с, Қостанай облысында екпіні 25 м/с жетеді.
Маңғыстау облысының кей жерлерінде жел 17-22 м/с күшейеді, күндіз шаңды дауылмен. Ақмола облысының кей жерлерінде тұман, желдің күшеюі 15-20 м/с күтіледі.
Атырау, күндіз Павлодар облыстарының кей жерлерінде жел 15-20 м/с күшейеді.
Қызылорда, Ақтөбе облыстарының түнде кей жерлерінде тұман күтіледі, күндіз кей жерлерінде жел 15-20 м/с күшейеді.
Алматы, Қарағанды облыстарының кей жерлерінде тұман, көктайғақ күтіледі.
Батыс Қазақстан, түнде және таңертең Шығыс Қазақстан облыстарының кей жерлерінде тұман күтіледі.

2 сәуірге арналған ауа райы болжамы

Kyzylorda-news.kz. Қызылорда қаласының әкімі болған Нұрлыбек Нәлібаев жаңа қызметке тағайындалды.
Нұрлыбек Машбекұлы Үкімет басшысының өкімімен Қазақстан Республикасы Премьер-Министрі Кеңсесінің Өңірлік даму бөлімінің меңгерушісі қызметіне тағайындалды.
Нәлібаев Нұрлыбек Машбекұлы 1976 жылы Жаңақорған ауданында дүниеге келген.
Қазақ мемлекеттік аграрлық университетін экономист-менеджер мамандығы бойынша бітірген ол өзінің еңбек жолын «Казахойл-коммерция» серіктестігінде мұнай және мұнай өндірісі сарапшысы болып бастаған.
Кейін «Бұлақ» ЖШС директорының орынбасары, «Стандарт ОйлБейс» және «Стандарт ОйлТрейдинг» ЖШС-лерінің директоры, «СтандартГаз» ЖШС директорының орынбасары, «ХаррикейнОйлПродактс» ШАҚ Қызылорда бөлімшесінің директоры, «ҚызылордаМұнайСервис» ЖШС бас директоры қызметтерін атқарған.
2005-2007 жылдары Қызылорда қаласы әкімінің орынбасары, 2007-2008 жылдары Қызылорда облысы әкімі аппаратының басшысы болды. Ал 2008-2013 жылдары Шиелі ауданын басқарған.
2013 жылдан осы күнге дейін Қызылорда қаласының әкімі болып келді.

Қазақстан және Қызылорда облысының жаңалықтары