<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a>&nbsp; “Союз МС-18” ғарыш кемесін Халықаралық ғарыш станциясына ұшыру үшін “Союз-2.1а” зымыран тасығышы “Байқоңыр” ғарыш айлағына орнатылды, деп хабарлайды <a href="https://sputnik.kz/">Sputnik Қазақстан.</a>
Ұшыру алаңындағы дайындық жұмыстары қалай жүргізілгенін видеодан тамашалаңыз
“Союз МС-18” ғарыш кемесі тұңғыш ғарышкер Юрий Гагариннің есімімен аталады. Сондықтан батырдың суреті мен оның ғарышқа ұшуының 60 жылдығының ресми рәміздері зымыран тасығыштың сыртқы бөлігіне бейнеленген.
“Союз-2.1а” зымыран тасығышы мен “Союз МС-18” басқарылатын ғарыш кемесінің ұшырылуы 9 сәуірде Нұр-Сұлтан уақытымен сағат 13.42-ге жоспарланған.
Халықаралық ғарыш станциясына ұшатын 65-ші экспедиция құрамында Роскосмос ғарышкерлері Олег Новицкий мен Петр Дубров және NASA&nbsp;астронавты Марк Ванде Хай бар. Олар негізгі экипаж құрамында. Ал экспедицияның қосымша экипажының құрамында – Роскосмос ғарышкері Антон Шкаплеров пен Олег Артемьев және NASA астронавты Энн Макклейн болады.
“Байқоңыр” ғарыш айлағынан зымыран ұшыру сәтін тікелей эфирде тамашалауға болады. Тікелей эфир&nbsp;<a href="http://www.roscosmos.ru/30596/">roscosmos.ru</a>&nbsp;сайтында көрсетіледі.

Байқоңырда ғарыш кемесін ұшыруға дайындық қалай жүріп жатыр? (ВИДЕО)

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Жаңақорған ауданында қуаты 10 мегаваттық күн электр стансасының құрылысы аяқталды. Бұл туралы Энергетика министрлігінің баспасөз қызметі хабарлады.
Жобаны ресейлік «Хевел» компания­сының еншілес кәсіпорны «Хек-Кт» ЖШС іске асырды. Аталған станса күнді бақылау жүйесі бар жоғары тиімді күн модульдерімен қамтылған. Бұл жүйе фотоэлектрлік жүйе орналасуының статистикалық әдісімен са­лыстырғанда электр энергиясын өндіруді орта есеппен 20-25%-ға арттыруға мүмкіндік береді. КЭС құрылысы кезінде 100-ге жуық адам тартылып, 10 тұрақты жұмыс орны құрылды.
Былтыр «Хевел» компаниялар тобы Алматы облысында «Қапшағай» КЭС-ін (3 МВт) және «Сарыбұлақ» КЭС-ін (4,95 МВт) салған болатын. Аталған ұйым осы жылдың бірінші тоқсанында Шымкентте «Шымкент» КЭС-ін (20 МВт), Түркістан облысындағы «Кентау» КЭС-ін (50 МВт) және Қызылорда облысындағы «Жаңа­қорған» КЭС-ін (10 МВт) пайдалануға берді.
Инвестор сәуір айының соңына дейін Түр­кіс­тан облысында Шоқтас КЭС-ін (50 МВт) және Күшата КЭС-ін (10 МВт) пайда­ла­ну­ға беруді жоспарлап отыр. Бұл нысандарда негізгі жұмыстар аяқталып, іске қосу-жөндеу жұмыстары жүріп жатыр.
Осылайша, Қазақстанның оңтүстігінде «Хевел» компаниялар тобы жобаларының жиынтық қуаты 148 мегаватты құрайтын болады. 2020 жылғы қазандағы жағдай бойынша Қазақстандағы топ жобаларының жалпы көлемі 248 мегаватқа жетіп отыр.

Жаңақорғанда күн электр стансасының құрылысы аяқталды

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Қызылорда облысында мониторингтік топ жыл басынан бері 1904 нысанды тексерген. Нәтижесінде карантин талабын бұзған 137 дерек анықталып отыр. Бұл туралы Өңірлік коммуникациялар қызметінің ақпарат алаңында өткен брифингте облыстық санитариялық-эпидемиологиялық бақылау департаментінің басшысы Динара Жаңабергенова мәлімдеді.
Карантин ережелерінің бұзу дерегінің көпшілігі қоғамдық тамақтану орындарында тіркелді. Атап айтқанда, персонал келушілерге жеке қорғаныш құралдарынсыз қызмет көрсеткен, караокелер мен кальяндар жұмыс жасаған, ғимараттың толымдылығы 30 пайыздан аспауы қажет болса да, келушілердің санына шектеу қойылмаған, қызметіне тыйым салынса да компьютерлік клубтар жұмыс жасаған.
<blockquote>
 «Бүгінде 45 мониторингтік топ жұмыс істеуде. Топтың құрамына полиция департаментінің, жергілікті атқарушы органдардың, қоғам белсенділері мен еріктілер барлығы 128 маман жұмылдырылды. Қазіргі таңда, карантин талаптары еңбек ұжымдарының барлығында бірдей сақтала бермейді. Әсіресе 8 наурыз, 22 наурыз мерекелеріне орай өткізілген ұжымдық іс-шаралар кезінде карантин талаптарын сақтамаған бірқатар ұйымдар мен мемлекеттік қызметшілерге әкімшілік құқық бұзушылық кодексіне сәйкес айыппұлдар салынды», – деді Динара Олжабайқызы.
</blockquote>
Сондай-ақ, оқу жылының IV тоқсаны басталғалы бері 29 карантин талаптарын бұзушылық анықталған. Бұған қоса, халыққа бетпердесіз қызмет көрсеткендігі үшін медициналық және мемлекеттік ұйым қызметкерлеріне де әкімшілік айыппұлдар салынған.
<blockquote>
 Арнайы мониторингтік топтар карантин талаптарының сақталуын қадағалау үшін күн сайын тексеру жүргізуде. Мәселен облыс орталығының өзінде 1500-ден астам нысан мен тұрғын үй араланды. Оның ішінде, карантин талаптарын сақтамай той және басқа да рұқсат етілмеген мерекелік шаралар жасаған 83 жағдай анықталды. Және де 52 нысанға құзырлы орган арқылы әкімшілік шара көрілді. Талаптардың сақталуын қадағалау топтың жұмысы болғанымен де барлығын аралау мүмкін емес. Мониторингтік топтардың қызметі жазалау шараларынан тұрмайды. Түсіндіреміз, ескерту жасаймыз. Баршаңыздан карантин талаптарын сақтауды сұраймыз, – деді арнайы мониторингтік топтың жетекшісі Ләззат Бақтыбаева.
</blockquote>

Қызылордада карантин талабын бұзған 137 дерек тіркелді

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Қазақстанда өткен тәулікте 2586 адамда коронавирус індеті ПТР арқылы расталып ауырғаны белгілі болды, деп хабарлайды www.coronavirus2020.kz.
Аймақтар бойынша:
Нұр-Сұлтан қаласы – 578,
Алматы қаласы – 710,
Шымкент қаласы – 81,
Ақмола облысы – 98,
Ақтөбе облысы – 117,
Алматы облысы – 325,
Атырау облысы – 137,
Шығыс Қазақстан облысы – 55,
Жамбыл облысы – 39,
Батыс Қазақстан облысы – 125,
Қарағанды облысы – 160,
Қостанай облысы – 33,
Қызылорда облысы – 22,
Маңғыстау облысы – 43,
Павлодар облысы – 28,
Солтүстік Қазақстан облысы – 16,
Түркістан облысы – 19.
Жалпы ел бойынша ауырғандар саны 261503.

Қызылордада 22 адам коронавирус жұқтырды

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a>&nbsp; Синоптиктер 8 сәуір күні ел аумағында ауа райы қандай болатынын жариялады, деп хабарлайды «Қазгидромет».
ҚР басым бөлігінен атмосфералық фронттардың өтуіне байланысты тұрақсыз ауа райы сақталады.
Республикамыздың кей жерлерінде жауын-шашын жауады, тек оңтүстікте және оңтүстік-батыста және орталықта жауын-шашын жаумайды.
Кей жерлерде тұман түсіп, жел күшейеді, солтүстікте көктайғақ болады.
Солтүстік Қазақстан облысының кей жерлерінде тұман түседі, көктайғақ болады. Күндіз кей жерлерде жел екпіні – 15-20 м/с.
Ақмола, Жамбыл, Батыс Қазақстан, Қостанай, Павлодар, Қарағанды, түнде және таңертең Ақтөбе облысының кей жерлерінде тұман түседі.
Батыс Қазақстан, Қостанай, күндіз Жамбыл облысының кей жерлерінде жел қарқыны 15-20 м/с дейін күшейеді.

8 сәуірде күн райы қандай болады?

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a>&nbsp;Шекара асып шетелден білім алу әр адамның көкжиек танымын кеңейтіп, озық үлгідегі бағдарламалармен танысып, тұлғалық дамуына елеулі әсер етеді. Осы тұрғыдан сыртқы ақпаратты тез қабылдауға бейім жастар шетелге барып білім ізденуге, өзге мәдениетпен танысуға құштар болып тұрады.
Дегенмен, сырты жылтырақтың барлығы алтын бола бермейтіндігі секілді шетелден білім алудың соңы теріс көріністерге соқтыратыны да бар. Мұның нақты дәлелі тәуелсіздік жылдары қазақстандық азаматтар діни білімін жетілдірем деген ниетпен шетелдерге барып түрлі саяси, діни топтардың жетегіне еріп, рухани танымын мүлде басқа арнаға өзгертіп алды. Одан соң елге келіп, қазақ халқының тарихи сахнасында қалыптасқан мәдениеті мен дәстүріне керағар идеологияны қарқынды түрде насихаттап, өздеріне көптеген ел тұрғындарын ертіп те үлгерді.
Деструктивті көзқарастағы индивидтерді даярлайтын оқу орындардың білім беру жүйесінде әуелі ортақ құндылықтарды дәріптей отырып, ақырындап адам санасын еркін ойлаудан ажыратады. Нәтижесінде оқыту процесінен өткен азаматтар өздері «идеал» тұтатын ұстаздарының кез келген бұйрығын бұлжытпай орындайтын «солдатқа» айналып, сол жолда құрбан болуға дайын тұрады. Мұндай «солдатқа» айналған тұлғаларды саяси мақсатта ұйымдастырылған, діни терминдерді жалау еткен соғыс алаңдарына тарту оңай жүзеге асырылады.
Сондай-ақ, ораторлық қабілеттерін жетілдірген аталмыш «солдаттар» өз отандарына оралып, &nbsp;өзін ақиқаттың жаршысы ретінде таныта отырып діндарлар арасынан белгілі бір «тобырды» қалыптастырады. Бұл процес сыртқы ықпалды күштерге өз мақсат-мүдделерін іске асырып отыруға тиімді құбылыс болмақ.
Аталмыш сипаттағы діни ағымдар ислам әлемінде ғана емес, христиандық бағытта да кездесетінін естен шығармаған жөн. 
Сондықтан шетелдік оқу орындарынан білім алғысы келген азаматтар әуелі діни танымын отандық білім ордаларынан қалыптастырып алып, содан кейін ҚР Дін істері комитеті мақұлдаған шетелдік университтерге барып жалғастырғаны абзал.
Осыған қатысты ҚР Дін істері комитеті 2014 жылы «Шет елдерге оқуға кететін азаматтарға арналған дін мәселелері жөніндегі Жадынамасын» әзірледі.&nbsp; Шетелде діни білім алуға ниетті азаматтар осы құжатпен міндетті түрде танысуы керек. Себебі, бұл құжаттағы нұсқаулықтарды толық орындаған әрбір азамат әуелі өз жеке қауіпсіздігін сақтай алады және түрлі топтардың құрығына ілінбейді. 
Сондай-ақ, отандық оқу орындар Әл-Фараби атындағы Қазақ ұлттық университеті, Л.Гумилев атындағы Еуразия ұлттық университеті, 
«Нұр-Мүбарак» Египет Ислам мәдениеті университеті, Е.Бөкенов атындағы Қарағанды мемлекеттік университеті, Қ.А.Яссауи атындағы Халықаралық қазақ-түрік университеті, Шет тілдері және іскерлік карьера университетінен «Дінтану», «Исламтану», «Теология» мамандықтарын игеруге болады.
Бұдан бөлек, рухани ізденістегі, өздерін діни мәселелер мазалап жүрген азаматтар үшін ҚР «Діни қызмет және діни бірлестіктер туралы» Заңына сәйкес ҚР Әділет министрлігіне тіркелген, базалық сапасы қалыптасқан, Қазақстан Республикасы аумағында ислам дінін насихаттауға құқық берілген – Қазақстан мұсылмандары діни басқармасы жұмыс жасайды. Қазақстандағы ресми тіркелген діни оқу орындар туралы ақпаратты осы басқарманың өкілдерінен тікелей сұрай алады және сайттарынан алуға мүмкіндіктер жасалған. 
&nbsp; 
&nbsp; 
Дархан ЕРНАЗАРОВ
**Қызылорда облысы дін істері басқармасының маманы 
**

Шетелде діни білім алудың қауіптілігі қандай?

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a>&nbsp; Бүгін А.Тоқмағамбетов атындағы қалалық мәдениет үйінде сұлу Сырдың ақын қызы, халықаралық «Алаш» әдеби сыйлығының иегері Қатира Жәленованың «Өмірімнің өрнегі өлеңімде» атты шығармашылық кеші өтті.
Қызылордалықтар тағылымды шараны Қатира Сыздыққызының 70 жылдық мерейтойына орай ұйымдастырған. Әдеби мазмұны бай, әсерлі кешке қала әкімінің орынбасары Асқарбек Есжанов және аймағымыздың белгілі қаламгерлері, ақынның достары мен шәкірттері де қатысты.
<blockquote>
 Өлең сүйер қауым жиылған кешті қала әкімінің орынбасары Асқарбек Есжанов ашып, мерейтой иесіне «Сіздің жырларыңыз сан алуан тақырыпты қамтиды. Өмірін өлеңмен өрнектеп, жүректегі қуаныш, мұңын, нәзік сезімін өлең жолдарына сыйғыза білген талантты ақын ретінде жыр сүйер қауым үшін орныңыз ерекше» – деп, ыстық ықыласын білдіріп, ақын шығармашылығына зор табыс тілеп, сый-құрмет көрсетті.
</blockquote>
Сондай-ақ, қалалық ардагерлер кеңесінің төрағасы, ақынның замандасы Сайлаубай Әбішев ақын шығармаларындағы адами асқақ сезім, өрелі ой, өмірлік рухани құндылықтар туралы пікірін ортаға салып, Қатира Жәленоваға құттықтау лебізін білдірді.
Ал ҚР Мәдениет саласының үздігі, белгілі айтыскер ақын Серік Ыдырысов «Қатираның қаламы» атты арнауын оқып, ақын қаламынан туған қуатты жырлардың өнегелі де өміршеңдігін өлеңге арқау етті.
Рухани шарада жас өрендер ақынның өлеңдерін оқып, қаламгер сөзіне жазылған әндер орындалды. Бұл кеште жас күйшілер де өз өнерлерін ортаға салып, «Жастар театрының» актерлары көрерменге сахналық қойылымдарын ұсынды.
Шара соңында ақын Қатира Жәленова шығармашылық кешін ұйымдастырушыларға және қатысушыларға алғысын білдіріп, ризашылығын жеткізді.
<img src="https://kyzylorda-news.kz/wp-content/uploads/2021/04/169795300_2809028676030539_428897301687455867_n.jpg" alt="" />

«Алаш» әдеби сыйлығының иегері Қатира Жәленова 70 жасқа толды

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Қызылорда облысының тұрғыны 2018 жылдың қазан айында 48 жастағы туған інісінің тұрғылықты үйінен белгісіз бағытқа шығып кетіп, қайта оралмаған.
Аталған дерек бойынша жедел іздестіру жұмыстары жүргізілді. Қармақшы аудандық полиция бөлімінің криминалды полиция бөлімшесінің жедел уәкілдері 6 сәуірде хабар-ошарсыз кеткен азамат Түркістан облысынан табылды. Ол Түркістан қаласында вокзал маңында жүрген.
<blockquote>
 «Қазіргі таңда ол Қармақшы аудандық полиция департаментіне жеткізіліп, інісіне тапсырылды. Белгілі болғандай, жүйке ауруымен ауыратын бұл азамат алдында да үйінен кетіп қалып жүрген.&nbsp; Сұрастыру барысында, жоғалған ер адам осыған дейін Алматы қаласында мал шаруашылығында&nbsp; жүріп, мал бағып күнін көргендігін айтуда», – делінген полиция департаментінің хабарламасында.
</blockquote>

Қызылордада 3 жыл бұрын жоғалған ер адам Түркістаннан табылды

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Жапонияның Astroscale компаниясы құрастырған ELSA-d магнит құрылғысы Жерге жақын орбитаға шығарылды. Бұл ғарыш қоқыстарын жинауға және жоюға арналған алғашқы құрылғы.
ELSA-d эксперимент құрылғысы және ол әлі толық іске қосылмаған. Спутниктің салмағы – 200 келі. Ол қалдықтарды жинап, Жер атмосферасына еніп, өртеніп кетеді. Бұл жағдайда алынған барлық ақпарат осындай құрылғыларды жасау үшін қолданылады.
Магнит екі блоктан тұрады – негізгі модуль және кеңістіктегі қалдықтар моделі. Негізгі блоктың салмағы – 180 келі, ал қосымша модульдің салмағы – 20 келі. Жерсерік сынақ режимінде ғарыш қоқыстарын бірнеше рет жинайды. Осылайша құрылғы тексеріледі.
<blockquote>
 «Ғарыш аппараттары топтарының дәуірі басталады. Олардың кейбіреулері бұзылып, Жерге оралуы мүмкін, ал басқалары ғарышта қалып, басқа құрылғылармен соқтығысады. Сонымен қатар, олар ғарышта қоқысқа айналып, Жер тұрғындарына айтарлықтай қауіп төндіреді», – дейді Ұлыбританиядағы Astroscale еншілес компаниясының атқарушы директоры Джон Обурн.
</blockquote>
Магниттің келесі сынақ рейсі 2023 жылға жоспарланған.
Ғарыш қоқыстары жер серіктеріне соқтығысады және оларды істен шығарады. Қазіргі уақытта шамамен 170 миллион тонна қалдық Жерді айналып жүр.
Еуропалық ғарыш агенттігінің бағалауынша, Жерге жақын орбитада 9 мың тоннадан астам немесе 34 мың ғарыш қоқысы бар. Сонымен қатар, орбитада ұзындығы 15 см жетпейтін 130 мың объект бар.
<a href="https://massaget.kz/layfstayl/tehno/64749/">Massaget.kz</a>

Ғарыш қоқысын жинауға арналған магнит құрылғы орбитаға шығарылды

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Денсаулық сақтау вице-министрі&nbsp;Ажар Ғиният онлайн баспасөз маслихаты барысында вакцина салатын арнайы орындар емхананың алдында, далада ұйымдастырылатынын айтты, деп хабарлайды&nbsp;<a href="https://stan.kz/">Stan.kz</a>.
Вице-министр ірі қалаларда вакцина салу қалай ұйымдастырылатынын айтты. Ажар Ғинияттың сөзінше, вакцина салуға сауда орталықтары, емханалар мен емхананың ауласы қолданылады.&nbsp;
<blockquote>
 «Күн жылы өңірлерде емханалардың алдына уақытша вакцина салатын орындар жасақтаймыз. Қазір министрліктің тарапынан уақытша вакцина салатын орынға қойылатын талаптар бекітіліп жатыр. Адам саны көп аймақтарда емханаларда, емханалардың алдында, басқа да медициналық ұйымдарда вакцина салынады. Үлкен мегополистерде сауда орталықтарында да егу бөлмелері ұйымдастырылады. Ең бастысы вакцина&nbsp;тұрақты температурасы сақталған, салқын жерде сақталып, жеткізілетін болады», – дейді Ажар Ғиният.
</blockquote>

Қазақстанда вакцина далада салынатын болды

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Әлеуметтік медициналық сақтандыру қорына жарна төлеуден кім босатылды және МӘМС жүйесіндегі азаматтардың жеңілдік санатының мәртебесі «сақтандырылмаған» болса, қайда жүгінуге болады?
Әлеуметтік медициналық сақтандыру қорына кім үшін мемлекет жарна төлейді?
Әлеуметтік осал санат ретінде анықталған азаматтардың 15 жеңілдік санаты үшін. Бұлар:
1) балалар;
2) жұмыссыз ретінде ресми тіркелген адамдар;
3) жұмыс істемейтін жүкті әйелдер;
4) үш жасқа толмаған бала (балалар) тәрбиесімен аналысатын жұмыс істемейтін азаматтар;
5) бала (балалар) туу немесе жаңа туған сәбиді (сәбилерді) асырап алуға байланысты, баласы (балалары) үш жасқа толғанға дейін оның (олардың) күтіміне байланысты демалыс алған адамдар;
6) мүгедек бала күтімімен айналысатын жұмыс істемейтін азаматтар;
7) зейнеткерлер, оның ішінде Ұлы Отан соғысының қатысушылары мен мүгедектері;
8) сот үкімі бойынша қылмыстық-атқару (пенитенциарлық) мекемелерінде жазасын өтеп жатқандар;
9) тергеу изоляторларында отырғандар;
10) жұмыс істемейтін оралмандар;
11) «Алтын алқа», «Күміс алқа» алқаларымен немесе бұрын «Батыр ана», I және II дәрежелі «Ана даңқы» ордендерімен марапатталған көп балалы аналар;
12) мүгедектер;
13) орта, кәсіптік-техникалық, орта білімнен кейінгі, жоғары білім беру, сондай-ақ жоғары оқу орнынан кейінгі білім беру ұйымдарында іштей оқып жатқан тұлғалар;
14) балалық шақтан бірінші топ мүгедегі болып табылатын жарымжан тұлғаның күтіміне байланысты үйде отырған, жұмыссыздар;
15) мемлекеттен атаулы әлеуметтік көмек алатын жұмыссыз азаматтар.
Сіз азаматтардың әлеуметтік осал санатына жататындығыңыз туралы құжаттарды тапсыруыңыз қажет пе?
Жоқ. Әлеуметтік мәртебе басқа мемлекеттік органдардың ақпараттық жүйелерінен Қордың ақпараттық жүйесіне беріледі. Әлеуметтік медициналық сақтандыру жүйесіндегі сақтандыру мәртебесі автоматты түрде беріледі.
Егер сіз ресми түрде жұмыссыз болсаңыз, бірақ жұмыс тапсаңыз, мемлекет Сіз үшін ақы төлеуді жалғастыра ма?
Жоқ. Сіздің әлеуметтік мәртебеңіз автоматты түрде жалдамалы қызметкерге ауысады және мемлекет сіз үшін аударымдар жасауды тоқтатады. Сондай-ақ, егер ол ЖК ашса немесе өзін-өзі жұмыспен қамтыған азамат ретінде бірыңғай жиынтық төлемді (БЖТ) төлей бастаса, мемлекет ол адам үшін ақы төлеуді тоқтатады.
Қандай жағдайларда студент сақтандырылмаған болуы мүмкін?&nbsp;
ЖОО студенттер туралы деректерді азаматтардың жеңілдікті санатына енгізу үшін &nbsp;&nbsp;Білім және ғылым министрлігіне, содан кейін ақпараттық жүйелерді ӘМСҚ-ға интеграциялау арқылы береді. Егер студент тізімге енгізілмесе және МӘМС жүйесіндегі мәртебесі «сақтандырылмаған»болса, оның себебін анықтау үшін өз ЖОО-ның деканатына жүгінуі қажет.
Егер сіз әлеуметтік осал санатқа жатсаңыз, бірақ міндетті медициналық сақтандыру жүйесіндегі мәртебеңіз «сақтандырылмаған» болса не істеу керек?
Егер сіз 15 жеңілдік санатының біріне жатсаңыз, бірақ сіз МӘМС жүйесінде сақтандырылмаған болсаңыз, себебін анықтау үшін 1406 телефон нөмірі бойынша Әлеуметтік медициналық сақтандыру қорының бірыңғай байланыс орталығына жүгінуіңіз немесе өтінімді «Qoldau-24/7» мобильді қосымшасына жолдауыңыз немесе өз өңіріңіздегі қордың филиалына жүгінуіңіз қажет. Әрбір жағдай себептері әртүрлі болғандықтан,&nbsp; жеке қарастырылады.&nbsp;
Егер сіз сақтандырылмаған болсаңыз да, сіз мемлекет кепілдік берген тегін медициналық көмек пакетінде медициналық көмекке құқығыңыз бар екенін есте ұстағаныңыз жөн. Учаскелік дәрігер, педиатр, жалпы практика дәрігері мамандарының қабылдауы, дәрігерді үйге шақыру, жедел жәрдем, емхана мен стационар деңгейіндегі шұғыл көмек, әлеуметтік маңызы бар, жұқпалы ауруларды, онкологиялық ауруларды емдеу осы пакетке кіреді және сақтандырылған мәртебесіне қарамастан барлығына көрсетіледі.
<img src="https://kyzylorda-news.kz/wp-content/uploads/2021/04/lgotniki-2021-kaz.jpg" alt="" />
<img src="https://kyzylorda-news.kz/wp-content/uploads/2021/04/kaz-lgotniki-osms.png" alt="" />

МӘМС: Азаматтардың әлеуметтік осал санатынан сақтандыру мәртебесі туралы жиі қойылатын сұрақтар

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Тасбөгет кентінің 49 жастағы тұрғыны есірткі затын сату кезінде ұсталды. Заң бұзушыдан заттай дәледемелер алынды.
Тағайындалған сараптаманың қорытындысына сәйкес ерекше иісі бар өсімдік тәріздес заттар жалпы салмағы 2,27 грамм кептірілген марихуана болып шықты.
Сонымен қатар, күдіктінің тұрғылықты жеріне тінту тергеу әрекетін жүргізу барсында үйінен газет қиындысына оралған 3 дана есірткі заттары алынды.
<blockquote>
 «Күдіктіге ҚПБ-ның УҰИ-на қамауға алынды. Қазіргі уақытта аталған дерек бойынша Қазақстан Республикасы Қылмыстық кодексінің 297-бабы 1-бөлігімен (Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, оларды жөнелту не өткізу) сотқа дейінгі тергеп-тексеру амалдары жүргізілуде. Оқиғаның мән-жайы анықталуда», – делінген полиция департаментінің хабарламасында.
</blockquote>

Қазақстан және Қызылорда облысының жаңалықтары