Kyzylorda-news.kz. Карантин кезіндегі мемлекеттік қолдаудың нәтижесінде Қызылорда облысы тұрғындарының өнім өндіруге деген белсенділігі арта түскен.
Індет өршігелі Қармақшы ауданындағы 3 тойхана иесі бизнестегі бағытын өзгертті. Дүр Оңғар ауылынан ашылған темірбетон өнімдерін шығаратын цех ауыл азаматтарын жұмыспен қамтып, құрылыс материалдарын өндіруге жол ашты.
<blockquote>
 “Өз ауылымызда суға салатын кіші және үлкен лотоктар шығарамыз. Сондай-ақ, қабырға плиталарын шығарып жатырмыз. Автоматтық режимге қойса, зауыттың өнімділігі сағатына 12 куб шығарады”, – дейді серіктестік директорының орынбасары Оралбай Машарапов.
</blockquote>
Ауыл тұрғыны Ерсін Өтеев те өз кәсібін әртараптандыруды көздеп отыр. Ол шеге, тор, тікен сым сынды ауыл шаруашылығына керек өнім түрлерін шығаратын құрылғылар сатып алған. Ол үшін мемлекеттік қолдау аясында жеңіл несие алған. Жалпы, ауданда құны 28 миллион теңге болатын 4 жоба “Қарапайым заттар экономикасы” аясында жүзеге асқан.
<blockquote>
 “Жыл басынан бері 54 кәсіпкерге 296 миллион теңгеге несие алынған. Сондай-ақ, бұл кәсіпкерлер өз жұмыстарын істеп жатыр. Қазірдің өзінде кішігірім цехтардың 27-сін аштық. Болашақта бұл жұмыс жалғасады. Инвестиция 220%-ға, өндіру өнеркәсібі 134%-ға орындалған. Жалпы бізде макроэкономикалық көрсеткіш жақсы жағдайда”, – дейді Қармақшы ауданының әкімі Мұса Қалдарбеков.
</blockquote>
<img src="https://kyzylorda-news.kz/wp-content/uploads/2020/08/fb_img_1597133943587.jpg" alt="" />
Мамандардың айтуынша, карантин кезінде кәсіпкерлердің бірқатары ісін жаңа бағытқа бұра бастаған. Мәселен, оны тойханалардың басқа салаға бейімделе бастауынан көруге болады. 
Аудандағы тойханалардың бірінен тұшпара цехын, тағы бірінде құс шаруашылығын ашуға бетбұрыс жасалуда. Қазіргі таңда жаңа кәсіпке қатысты жобалар дайындауда.
<blockquote>
 “Тағы бір тойхана иесіне бағаны тұрақтандыру мақсатында желілік дүкен аштыруға жұмыс істеп жатырмыз. Оған қоса, кенттегі тойхана қонақ үй есебінде пайдаланылып жатыр”, – дейді Қармақшы аудандық кәсіпкерлік бөлімінің басшысы Еркебұлан Әбдікеров.
</blockquote>
<img src="https://kyzylorda-news.kz/wp-content/uploads/2020/08/fb_img_1597133946443.jpg" alt="" />

Қызылордада тойханалар өндіріс орнына айнала бастады

<a href="https://kyzylorda-news.kz/date/2020/08/11/">Kyzylorda-news.kz.</a> Қазалы ауданында мәслихаттың кезекті LXII сессиясы өтті. Сессияның күн тәртібінде бірнеше мәселе қаралды. Оның ең негізгісі аудан әкімі Мұрат Ергешбаевтың 2020 жылдың І жарты жылдығында атқарған жұмыстарының есебі болды.
Сондай-ақ аудандық мәслихаттың кезекті сессиясында «2020-2022 жылдарға арналған аудандық бюджет туралы» Қазалы аудандық мәслихаттың 2019 жылғы 24 желтоқсандағы №341 шешіміне өзгерістер енгізу туралы, «Кәмелетке толмағандардың істері және олардың құқықтарын қорғау жөніндегі аудан әкімдігі жанындағы комиссияның құрамын бекіту туралы» Қазалы аудандық мәслихаттың 2017 жылғы 31 наурыздағы №102 шешіміне өзгерістер енгізу туралы мәселелер қаралды.
Күн тәртібіндегі алғашқы мәселе бойынша баяндама жасаған аудан әкімі Мұрат Ергешбаев аудан көлемінде жыл басынан бері атқарылған жұмыстарға тоқталды.
<blockquote>
 “Негізінде, әрбір саланың тынымды тірлігінің арқасында аудан экономикасы тұрақты дамып келеді. Нақты дәлел, 2020 жылға нақтыланған бюджет көлемі 24 млрд. 64,8 млн. теңгені құрап отыр. Оның ішінде өз кірістеріміз 1,4 млрд. теңгеге жетті. Ал, 6 айда өнеркәсіп кәсіпорындарында 7 млрд. 378 млн. теңгенің өнімі өндірілді. Жұмыс істеп тұрған шағын және орта кәсіпкерлік субъектілерінің саны да артып, өткен жылмен салыстырғанда 112,8 пайызды құрады. Кәсіпкерлікті қолдау шаралары да біздің назарымыздан тыс қалған емес. Осының нәтижесінде жыл басынан бері аудан кәсіпкерлерінің 231 жобасы бойынша 973,0 млн. теңге несие, грант қаражатын алды”, – деген Мұрат Нәлхожаұлы ауданда «Жол картасы» және «Ауыл – ел бесігі» мемлекеттік бағдарламалары арқылы атқарылып жатқан жұмыстарды да тілге тиек етті.
</blockquote>
<img src="https://kyzylorda-news.kz/wp-content/uploads/2020/08/117444411_2822651884622407_3383184649054439612_o.jpg" alt="" />
Аудандық мәслихат сессиясында алғашқы жартыжылдықтағы ауданның әлеуметтік-экономикалық дамуының қорытындылары туралы есеп берген аудан басшысы алда тұрған міндеттер жөнінде жан-жақты баяндады.
Аудан әкімінің баяндамасынан соң аудандық мәслихат депутаттары Қасқырбек Мәмбетжан мен Ләззат Ізбасқанова туған жерде атқарылып жатқан жұмыстарға оң бағасын беріп, сайлаушылардың атынан алғыс айтты.
Сессия отырысында көтерілген өзге де мәселелер жайында хабарламашылар тыңдалып, аудандық мәслихат депуттары тарапынан оң шешім тапты.
<img src="https://kyzylorda-news.kz/wp-content/uploads/2020/08/117342056_2822651984622397_2972215267211692693_o.jpg" alt="" />

Қазалыда кәсіпкерлік субъектілерінің саны артты

<a href="https://kyzylorda-news.kz/date/2020/08/11/">Kyzylorda-news.kz.</a> Өңірде жастар күніне орай «Жастар апталығы» жарияланды. Бұл туралы Өңірлік коммуникациялар қызметінің ақпарат алаңында өткен брифингте облыстық “Жастар ресурстық орталығы” КММ-нің директоры Бауыржан Мастеков мәлімдеді.
<blockquote>
 «Жастар апталығында түрлі форматтағы 72 шара карантиндік режимді сақтай отырып, өткізіледі. Бұған қоса, жастар саясатының ақпараттық бағыттағы жұмыстарын күшейту мақсатында «Syr zhastary» сайты іске қосылады. Аталған интернет ресурсына өңір жастарына қатысты күнделікті ақпараттар мен жаңалықтар жарияланады. Көшбасшылар жайлы тың мәліметтер, қажетті кітап қорының электронды нұсқасы да қамтылатын болады. Жастардың қызығушылығын анықтау мақсатында сауалнамалар ұйымдастыру тетігі де қарастырылған. Сондай-ақ, Сыр жастары «Birgemiz: Asyl Mura» бағыты бойынша Қоғалыкөл іргесіндегі «Қыш қала» археологиялық аймағына экскурсия ұйымдастыруда. Себебі, төл тарихтың парақтарын ақтара отырып, әрбір азамат туған өлкесінің тарихын білуі керек»,-деді Бауыржан Қайырбекұлы.
 «Еліміздің өсіп-өркендеуіне орасан үлес қосып жүрген өңір жастарын айтулы мерекемен құттықтаймын. Сонымен қатар, жастар күніне орай өтетін шаралар легі карантиндік талаптарды сақтай отырып, жастарды белсене қатысуға шақырамыз»,- деді облыстық жастар саясаты мәселелері басқармасының басшысы Қуаныш Қуантқанұлы. 
</blockquote>
<img src="https://kyzylorda-news.kz/wp-content/uploads/2020/08/117806372_1086450791750432_8222108555505790036_o.jpg" alt="" />

Қызылордада жастар күні қарсаңында жаңа сайт іске қосылады

<a href="https://kyzylorda-news.kz/date/2020/08/11/">Kyzylorda-news.kz.</a> Қызылорда облысының денсаулық сақтау басқармасының басшысы Пазилов Сабит Бексеитұлы Арал ауданына жұмыс сапарымен барды.
Алдымен Арал ауданаралық ауруханасының жұмысымен танысқан басқарма басшысы аурухананың қазіргі ахуалымен, оның ішінде провизорлық, инфекциялық стационар жұмыстарына қанықты.
210 төсек орынға арналған Арал ауданаралық ауруханасында 1440 қызметкер жұмыс жасайды. 
Сондай-ақ, 100 провизорлық төсек орын, 20 инфекциялық төсек орын ұйымдастырылған.
Қазіргі таңда провизорлық стационарда 18 науқас ем алып жатса, инфекциялық стационарда ем алып жатқан науқас жоқ.
Эпидемиологиялық ахуал басталғалы бері провизорлық стационарда 225 науқас емделіп шықса, инфекциялық стационарда аудан бойынша 52 науқас емделіп шықты. 
Ауруханада 9 ИВЛ аппараты, 33 кислородты концентраторы бар. Аурухана 2017 жылы жаңа типтік ғимаратқа көшкен.
Одан соң, басқарма басшысы Сабит Бексеитұлы Сексеуіл ауылдық ауруханасына да барды. 25 төсек орынға арналған Сексеуіл ауылдық ауруханасында 15 емдеу бөлімі, 10 балалар бөлімі бар. Одан бөлек 20 провизорлық орын ашылған.
40 қызметкер жұмыс жасайтын ауруханада айына 70 науқаска дейін жоспарлы және шұғыл емделіп шығады. 
Эпидемиологиялық ахуал басталғалы бері провизорлық стационарда 60 науқас ем алып шықты. Ауылдық ауруханада 4 оттегі концентраторы бар.
Бүгінде Арал ауданында ахуал тұрақты. Кезекті жұмыс сапарымен жол тартқан басқарма басшысы ауданның ахуалды артта қалдырғаны, яғни коронавирус жұқтырып емделіп жатқан науқастың жоқтығы қуантарлық оң жайт екенін атап өтіп, дей тұрғанмен босаңсымай, алдағы уақытта індетпен күресте аянбай еңбек етуді тапсырды.

Арал ауданында эпидахуал тұрақты

<a href="https://kyzylorda-news.kz/date/2020/08/11/">Kyzylorda-news.kz.</a> Премьер-министр Асқар Мамин карантинді жеңілдету жоспарын әзірлеуге тапсырма берді.
Үкімет басшысының айтуынша, бүгінде індеттен жазылып шыққандардың саны 73,6 процентті құрап отыр. Ауруханалардың жүктемесі 61 процентке, ал жедел жәрдемді шақыру көрсеткіші 62 процентке төмендеді.
<blockquote>
 “Осы нәтижелер қабылданып жатқан шаралардың тиімділігін көрсетеді. Қалыптасып отырған эпидемиологиялық жағдайды ескере отырып, денсаулық сақтау министрлігіне карантин шараларын кезең-кезеңімен алып тастау жоспарын мемлекеттік комиссияның қарауына бейсенбі күні енгізуді тапсырамын”, – деді Мамин үкіметтің онлайн отырысында.
</blockquote>

Үкімет басшысы карантинді жеңілдетуді тапсырды

<a href="https://kyzylorda-news.kz/">Kyzylorda-news.kz. ҚР</a>&nbsp;Парламенті Мәжілісінің депутаты, әлеуметтік-мәдени даму комитетінің мүшесі Наталья Жұмаділдаева Қызылорда қаласында іс-сапармен болып, жалпы білім беру мекемелерінің жөндеу жұмыстары және оқу жылына дайындық барысымен танысты.
Білім ордалары «Жұмыспен қамту 2020» бағдарламасы аясында жөндеуден өткізілуде. Бағдарлама аясында Қызылорда қаласында 4 мектеп, 2&nbsp;балабақша жөндеуден өтіп жатыр. Одан бөлек, «Ауыл ел бесігі» бағдарламасы аясында Н.&nbsp;Махамбетов ауылындағы №143 мектепте, халықаралық гранттар негізінде қала орталығындағы №1мектеп-гимназия, №4 ІТ мектеп-лицей және №176&nbsp;орта мектепте жөндеу жұмыстары жүргізілуде.
Ең алдымен депутат қала орталығындағы Ж.&nbsp;Қизатов атындағы №23&nbsp;мектеп-лицейінің жөндеу жұмыстарымен танысты. 1942 оқушы оқитын білім ордасын жөндеуге 211&nbsp;130,0 мың тг. көлемінде қаржы бөлінген.
Келесі кезекте, С.&nbsp;Торайғыров көшесі бойындағы Ж.&nbsp;Маханбетов атындағы №43 орта мектеп Жөндеуге 46767,192 мың тг. қаралып, мектеп&nbsp; фасадын бояу, терезелері, ішкі қабырғалары мен едендері және есіктері ауысады
Тізімдегі келесі мектеп – Н.&nbsp;Ахмадеева атындағы №112 мектеп 1952&nbsp;жылы салынған. 751 оқушы білім алып отырған мектепті жөндеуге 49503,108 мың тг. бөлініп, мектеп фасады, шатыры, электр желісі, ішкі қабырғалары мен едендері және есіктері ауысады.
Одан кейін, Ә.&nbsp;Молдағұлова атындағы №173 орта мектепке барып, мектептің жөндеу жұмыстары және оқу жылына жоспарымен танысты. Мектепте 1587 оқушы білім алуда. Мектеп терезелері, ішкі қабырғалары мен едендері және есіктері, сыртқы қоршау ауысады бұл мақсатта 82447,6&nbsp;мың тг. бөлінген.
«Ауыл ел бесігі» бағдарламасы аясында жөнделуден өтіп жатқан Н.&nbsp;Махамбетов ауылындағы №143 мектепте депутат «Педагог мәртебесін» сақтау қажеттілігін атап, білім беру сапасы мен саладағы қазіргі бәсекелстік деңгейінің артқанын жеткізді.
Н.&nbsp;Жұмаділдаева мектептердің жаңа оқу жылына дайындығын бақылап, кезекші сыныптарды енгізу, мектепте карантиндік талаптарды сақтау бойынша ұсынысын білдірді. Мектеп директорларының оқулықтар және білім берудің онлайн форматына ауысу мәселесі туралы ойын тыңдап, шешу жолдарын талқылады.
<img src="https://kyzylorda-news.kz/wp-content/uploads/2020/08/mw6a5717-scaled.jpg" alt="" />

Мәжіліc депутаты Наталья Жұмаділдаева Қызылордаға келді

<a href="https://kyzylorda-news.kz/date/2020/08/11/">Kyzylorda-news.kz.</a> Егер сіз Әлеуметтік медициналық сақтандыру қорына үнемі жарналар енгізіп отырсаңыз, бірақ egov-дағы жағдайды тексергенде, телеграмм бот «сақтандырылмаған» деп&nbsp; көрсеткен болса, онда сіз оны анықтап, себебін білуіңіз керек. Олардың ең жиі кездесетін себептері туралы Әлеуметтік медициналық сақтандыру қорының Қызылорда облысы бойынша филиалында айтылды.
Бірінші себеп. Қазақстандықтардың көпшілігі жеңілдікті кезеңді 1 шілдеге дейін төлемдерді төлеуден босату ретінде қабылдап, төлеуді тоқтатты. Ал жеңілдікті кезең халықтың осы тұста МӘМС жүйесіндегі мәртебесін оңай анықтай алуы үшін арнайы жасалды.
Нәтижесінде, алғашқы алты айда төленбеген немесе ішінара төленген болуы мүмкін, ал МӘМС пакетіндегі медициналық көмек осы кезеңде барлығына тегін қол жетімді болды. &nbsp;
Не істеу керек? Алдымен айларға бөлінген өз төлемдеріңіздің үзіндісін алу қажет. Егер Сіз жеке кәсіпкер, АҚС шарты бойынша қызметкер, өзін-өзі жұмыспен қамтыған немесе дербес төлеуші болсаңыз, онда сізде 2020 жылдың 1 қаңтарынан бастап&nbsp; 8 айға жарналар төленуі керек. &nbsp;Егер сіз жалдамалы жұмысшы болсаңыз, соңғы 12 айда аударымдар болуы қажет. Егер бір немесе бірнеше ай ішінде аударымдар болмаса, төлем жасалмаған ай үшін төлеу керек немесе жұмыс берушіңізге барып, бар қарызды өтеуді сұрау керек. Естеріңізге сала кетейік, жарналарды уақтылы төлемейтін ЖК мен жұмыс берушілер үшін әрбір мерзімі өткен күн үшін, төлем күнін қоса алғанда, берешек сомасының 1,25% мөлшерінде айыппұлдар мен өсімпұлдар қарастырылған. Егер жарналар мен аударымдар бойынша олқылықтар болмаса, Әлеуметтік медициналық сақтандыру қорына 1406 нөмірі бойынша хабарласу немесе телеграмм ботта&nbsp; сұрау қалдыру қажет. Сіздің өтінішіңіз жеке қаралады.
Екінші себеп. 42,5 мың теңге біржолғы көмек төлеуге байланысты қазақстандықтардың көпшілігі сәуір-мамыр айларында бірыңғай жиынтық төлемді төлей бастады, осылайша өзін-өзі жұмыспен қамтыған азаматтар санатына жатқызылды. Айта кетейік, 2 626 теңгенің тек 40% – ы немесе 1,1 мың теңгесі міндетті әлеуметтік медициналық сақтандыруға жұмсалады, қалғандары мемлекеттік әлеуметтік сақтандыру қоры( МӘСҚ), зейнетақы қоры мен салық төлемі арасында бөлінеді.
БЖТ міндетті төлемдермен, оның ішінде бюджетке байланысты төрт мәселені бірден шешсе де, көптеген адамдар оны төлеуді жалғастырмауды жөн көрді. Сонымен бірге, «бір реттік» төлеушілердің көпшілігі бұл төлем оларға алдын-ала бір жыл үшін сақтандыру мәртебесін беретініне сенімді. Бұл олай емес. Бірыңғай жиынтық төлемді ай сайын және тұрақты, үзіліссіз төлеу қажет. Егер сіз осы сегіз ай ішінде тек бір рет немесе екі рет төлесеңіз, оны Қор қарыз ретінде қарастырады.
Не істеу керек? Алдыңғы айлар үшін жарналарды төлеу жүргізілетін кезеңді көрсете отырып, дербес төлеуші ретінде 2125 теңге мөлшерінде жеке төлемдермен төлеу қажет. Сіз «Азаматтарға арналған үкімет» мемлекеттік корпорациясының банктік шотына қолма-қол ақшамен де, банктік аударым арқылы да екінші деңгейдегі банктердің немесе «Қазпошта» бөлімшелерінің кассалары арқылы, сондай-ақ Qiwi және Kassa 24 терминалдары, Халық банкінің терминалдары және Kaspi.kz мобильдік қосымшасы арқылы төлей аласыз. ЕДБ кассалары арқылы төлеу үшін деректемелерді ӘМСҚ www.fms.kz. сайтынан білуге болады.
Үшінші себеп. Карантиндік шараларға байланысты жұмыс беруші қызметкерлерді жалақысыз демалысқа уақытша босату туралы шешім қабылдады, сонымен бірге міндетті медициналық сақтандыру бойынша аударымдарды тоқтатты. Айтар болсақ, бүгінгі күні шамамен 4,5 миллион адам жарналарды өз бетінше төлемейді, олар үшін жұмыс беруші жасайды.&nbsp;
Не істеу керек? Естеріңізге сала кетейік, 20 сәуірден бастап ірі бизнес өз қызметкерлері үшін 1 шілдеге дейін, шағын және орта бизнес 1 қазанға дейін 29 қызмет бағыты бойынша аударымдар төлеуден толық босатылды. Осы кәсіпорындардың қызметкерлері олар үшін аударымдар түскеніне немесе түспегеніне қарамастан, осы кезеңге дейін сақтандырылған болып саналады.
Егер сіз міндетті медициналық сақтандыру төлемдерінен босатылған компанияда 1 қазанға дейін жұмыс жасасаңыз да, өзіңіздің сақтандырылушы мәртебеңіз жоқтығын білсеңіз, Qoldau 24/7 мобильді қосымшасын жүктеп алуыңыз керек, «ШОБ қызметкерлері үшін» қосымша бетін ашып, ұйымыңыздың БСН көрсетіңіз,&nbsp; лауазымға тағайындау туралы бұйрықты жүктеп, сұраныс жіберіңіз. Ол 30 минут ішінде өңделеді. Егер МКК деректері бойынша БСН МӘМС төлеуден босатылғандар тізіміне енсе, онда азаматқа 1 күнтізбелік айға сақтандырылған мәртебесі беріледі. Осы уақыт ішінде оның жұмыс берушісі тізімді жаңартуы керек. Ол үшін сіз Мемлекеттік кірістер комитетінің веб-сайтына кіріп, арнайы сілтемені немесе <a href="http://www.msb.fms.kz/">www.msb.fms.kz</a> сілтемесін қарап, ЭЦҚ қолдана отырып, өз қызметкерлеріңіздің деректерін жүктеуіңіз қажет. Атап айтқанда, тізімдерді ай сайын жаңартып отыру керек.
Төртінші себеп. Сіз жұмыссыз қалдыңыз және МӘМС үшін жарна төлеуге еш мүмкіндігіңіз жоқ.
Не істеу керек? Естеріңізге сала кетейік, мемлекет МӘМС жүйесінің негізгі қағидатын ұстанады, бұл ынтымақтастық болып табылады және халықтың әлеуметтік әлсіз топтарынан 11 миллион азаматқа аударымдар жасайды. Бұл азаматтардың 15 жеңілдік санаты, оның ішінде балалар, студенттер, көп балалы аналар, жүкті әйелдер және жұмыссыздар. Сондықтан, егер сіз жұмыссыз қалсаңыз және қазіргі уақытта ӘМСҚ-ға жарна төлей алмасаңыз, жергілікті атқарушы органның жанындағы жұмыспен қамту орталығында ресми түрде тіркелуіңіз керек. Сіздің мәртебеңіз келесі айдан бастап автоматты түрде «сақтандырылған» болып өзгереді. &nbsp;
Бесінші себеп. Сіз азаматтардың 15 жеңілдік санаттарының біріне жатасыз, бірақ бұл туралы білмейсіз. Сіз біраз уақыт жарналар төлейсіз, содан кейін объективті себептермен тоқтатасыз. Мемлекет сіз үшін жарналарды төлей алмайды, өйткені сіздің мәртебеңіз автоматты түрде тәуелсіз төлеуші немесе өзін-өзі жұмыспен қамтыған адам болып өзгерді.
Не істеу керек? Сіз өзіңіздің медициналық ұйымыңыздың Пациентті қолдау қызметіне жүгінуіңіз керек, онда қызметкерлер әр жағдайда маршрутты жеке түсіндіреді. Сондай-ақ, Qoldau 24 \ 7 мобильді қосымшасы арқылы өтініш қалдыруға, 1406 медициналық сақтандыру қорының байланыс орталығына немесе Қордың&nbsp; филиалына қоңырау шалуға болады.
Алтыншы себеп. Жарналар мен аударымдарды төлеу кезінде қате көрсетілген деректер, не жеткіліксіз сома.
Не істеу керек? Сіз «Азаматтарға арналған үкімет» мемлекеттік корпорациясына хабарласып, төлем туралы түбіртек ұсынуыңыз керек. Содан кейін қаражатты қайтаруға өтініш жазыңыз және қарызға рұқсат берілген айлар үшін жарналарды қайта төлеңіз.
Есіңізде болсын, егер сіз сақтандырылмаған болсаңыз да, сіз мемлекет кепілдік берген тегін медициналық көмек пакетінде медициналық көмекке құқығыңыз бар. Учаскелік дәрігер, педиатр, жалпы практика дәрігері мамандарының қабылдауы, дәрігерді үйге шақыру, жедел жәрдем, емхана мен стационар деңгейіндегі шұғыл көмек, әлеуметтік маңызы бар, жұқпалы ауруларды, онкологиялық ауруларды емдеу осы пакетке кіреді және сақтандырылған мәртебесіне қарамастан барлығына көрсетіледі.
<img src="https://kyzylorda-news.kz/wp-content/uploads/2020/08/kak-stat-zastrahovannym-v-sisteme-osms-kaz.jpg" alt="" />

Медициналық сақтандыру жүйесінде болмауыңыздың алты себебі

<a href="https://kyzylorda-news.kz/date/2020/08/11/">Kyzylorda-news.kz.</a> Қазақстанда жыл сайын вирустық инфекциялар мен тұмауға 1 миллионға жуық адам шалдығады. Күзде оған коронавирус та қосылуы мүмкін. Бұл туралы денсаулық сақтау министрлігінің ресми өкілі Бағдат Қожахмет мәлімдеді.
<blockquote>
 “Биыл күзде коронавирус күшейеді деген болжам бар. Сол кезде жіті респираторлық вирустық инфекциялар мен тұмаудың маусымы басталады. Соның аясында коронавирустың жаңа толқыны болады деген болжам бар”, – деді Қожахмет орталық коммуникациялар қызметінде өткен онлайн брифингте.
</blockquote>
Оның айтуынша, соңғы 5-7 жылдың ішінде Қазақстанда қазан мен наурыз аралығында ЖРВИ мен тұмауға шалдыққандардың жалпы саны 600 мыңнан бастап 1 миллион адамға дейін барған.
Оның сөзіне қарағанда, бүгінде ең пессимистік болжамдар негізге алынады. Соның арқасында денсаулық жүйесін барынша дайындап қоюға мүмкіндік бар.
Министрліктің ресми өкілі дәрі-дәрмектің қорына да тоқталды. Оның сөзіне қарағанда, “СК-Фармация” ЖШС жалпы құны 8,7 миллиард теңге болатын 91 түрлі дәрі-дәрмекті аймақтарға жіберді. Бұл препараттар орташа есеппен 40 мың науқасқа жетеді. Бес күннен кейін, яғни 15 тамыздан бастап тағы екі айға жететін қор әзірленеді.
Ал&nbsp; амбулаторлық деңгейде, яғни, үйде ем алатын науқастарға арналған тегін дәрінің бес түрін сатып алу жұмыстары аяқталуға жақын. Ол препараттар 1 миллион пациентке жетеді. Тегін дәрілердің ішінде “Парацетамол”, “Ибупрофен”, “Ривароксабан”, “Апиксабан” мен “Дабигатран” деген препараттар бар. Бұның барлығы емхана арқылы таратылады.
<a href="https://sputniknews.kz/society/20200810/14676965/tumau-COVID-densaulyq.html">Sputniknews</a>

Коронавирус пен тұмау: денсаулық министрлігі күзде не болатынын болжады

<a href="https://kyzylorda-news.kz/">Kyzylorda-news.kz.</a> Әлеуметтік медициналық сақтандыру қорына міндетті төлемдер бойынша кімге кейінге қалдырылды және неге кәсіпорын қызметкерлері МӘМС-те медициналық қызмет көрсетуден бас тартуда-бизнестің ең өзекті мәселелеріне жауап береміз.
МӘМС үшін төлемдерді &nbsp;1 қазанға дейін кім төлемейді және кімдер үшін жеңілдік кезеңі 1 шілдеде аяқталды?
1 сәуірден 1 шілдеге дейін әлеуметтік медициналық сақтандыру қорына аударымдарды төлеуден мынадай қызмет түрлері бойынша ірі кәсіпкерлік субъектілері босатылды:
– автомобильдерді, жеңіл автокөлік құралдарын, мысалы, мотоциклдерді, автомобиль бөлшектерін, тораптарды және керек-жарақтарды бөлшек саудада сату;
– дәріханаларды, тамақ өнімдерін, сусындар мен темекі бұйымдарын сатуды қоспағанда, ірі сауда желілеріндегі, стационарлық сауда объектілеріндегі, саудаобъектілері болып табылатын мамандандырылмаған дүкендердегі бөлшек сауда;
–&nbsp; жол бойындағы жолақта орналасқан техникалық қызмет көрсету станциялары жүргізгендерді қоспағанда, автомобильдерге техникалық қызмет көрсету және жөндеу;
– әуе жолаушылар көлігі;
– қонақ үйлердің және тұруға арналған ұқсас орындардың қызмет көрсетуі;
– жеке немесе жалға алынған жылжымайтын мүлікті жалдау және басқару, сонымен қатар коммерциялық үй-жайларды жалға беру.
1 сәуірден 1 қазанға дейін МӘМС жарналарын төлеуден босату әрекет етеді және ШОБ субъектілері үшін 29 қызмет түрі бойынша қызметкерлердің сақтандырылуы сақталады:
Заң кеңесшілері, нотариустар, адвокаттар, жеке сот орындаушылары, медиаторлар;
Коммерциялық қызмет және басқару мәселелері бойыншак еңесшілер;
Туристік агенттіктер мен туроператорлар;
санитарлық-эпидемиологиялық, ауруханалық және санаторлық-курорттық ұйымдар;
жеке меншік мектепке дейінгі, бастауыш және орта оқу орындары;
жеке дәрігерлік практика, стоматология;
концерт және театр залдары;
фитнес-клубтар;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;
тоқыма және үлбір бұйымдарын жуу және химиялық тазалау;
шаштараздар мен сән салондары.
Жеңілдік кезеңі аяқталғаннан кейін (1 қаңтардан 1 шілдеге дейін) бизнес өткен 6 ай үшін өз қызметкерлері үшін аударымдар төлеуі керек пе?
Иә. Жеңілдікті кезең-бұл төлемдерді кейінге қалдыру, оларды төлеу бойынша міндеттемелерді жоймайды. Осылайша, «МӘМС туралы» Заңның 5-бабының 3-тармағына сәйкес, қорға аударымдар және (немесе) жарналар төленбеген тұлғалар міндетті әлеуметтік медициналық сақтандыру жүйесінде медициналық көмек алу құқығын алу үшін Қорға төленбеген кезең үшін, бірақ төлеу күнінің алдындағы он екі айдан аспайтын мерзімде жарналарды төлеуге міндетті. Сондықтан жұмыс берушілер өткен 6 ай үшін олардың қызметкерлері МӘМС пакетін пайдалану мүмкіндігіне ие болуы үшін ақы төлеуі қажет.
Қызметкерлерге аударымдардың мөлшері қандай?
Жұмыс беруші қызметкер үшін қызметкердің табысынан 2% мөлшерінде аударымдар төлейді, сондай-ақ қызметкердің есептелген жалақысынан 1% ұстап қалады.
Жұмыс берушіге қызметкерлер үшін аударымдарды уақтылы төлемегені немесе толық төлемегені үшін өсімпұлдар немесе айыппұлдар есептеле ме?
Иә. Өз қызметкерлері үшін жарна аударатын жұмыс берушілер үшін МӘМС бойынша берешек үшін төлем күнін қоса алғанда, мерзімі өткен әрбір күн үшін берешек сомасының 1,25% мөлшерінде өсімпұл көзделген. Егер жұмыс беруші қызметкерге ақы төлемесе немесе оны уақтылы жасамаса, қызметкер МӘМС пакетінен медициналық көмек ала алмаса, оның мәртебесі автоматы түрде «сақтандырылмаған» күйіне өзгереді.
Жұмыс беруші Қазақстанның резиденттері болып табылмайтын қызметкерлер үшін&nbsp; Қорға ӘМС аудару керек пе?
Иә. Егер қызметкер Еуразиялық экономикалық одақ елдерінің (Армения, Беларусь, Қырғызстан, РФ) азаматы болса, жұмыс беруші Қазақстан Республикасы ратификациялаған халықаралық шарттың және «МӘМС туралы» Заңның талаптарына сәйкес ай сайын қызметкерге аударымдар жүргізуге міндетті.&nbsp;
Жұмыс беруші жарналарды ЖК ретінде дербес аударатын қызметкер немесе АҚС шарты бойынша қызметкер үшін аударымдар жүргізуі тиіс пе?
Иә. Жұмыс беруші қызметкердің қосымша әлеуметтік мәртебесінің болуына қарамастан, өз міндеттемелеріне сәйкес аударымдар жүргізеді. Бұл ретте қызметкер өзі үшін ЖК ретінде 1,4 ЕТЖ-нің 5% – ы немесе 2 975 теңге мөлшерінде, не шарт бойынша алынатын табыстың 1%-ы мөлшерінде АҚС-ның шартшысы ретінде жарналарды аударады. Бұл ретте барлық көздерден алынатын салық салынатын жиынтық табыс 10 ЕТЖ-ден немесе 425 мыңтеңгеден аспауы тиіс.
1 қазанға дейін қызметкерлер үшін аударымдар төлеуден босатылған кәсіпорындардың қызметкерлері МӘМС-тен медициналық көмек ала ала ма?
Ия, мүмкін. 1 қазанға дейін пандемияға байланысты шектеу шараларын енгізуден барынша зардап шеккен экономика секторларында қызметін жүзеге асыратын ШОБ субъектілерінің қызметкерлеріне әлеуметтік медициналық сақтандыру қорына берілген тізімдерге сәйкес &nbsp;«сақтандырылған» мәртебесі беріледі.&nbsp;&nbsp;
Егер сіз сақтандырылмаған болсаңыз да, сіз мемлекет кепілдік берген тегін медициналық көмек пакетінде медициналық көмекке құқығыңыз бар екенін есте ұстаған жөн. Учаскелік дәрігер, педиатр, жалпы практика дәрігері мамандарының қабылдауы, дәрігерді үйге шақыру, жедел-жәрдем, емхана мен стационар деңгейіндегі шұғыл көмек, әлеуметтік маңызы бар, жұқпалы ауруларды, онкологиялық ауруларды емдеу осы пакетке кіреді және сақтандырылған мәртебесіне қарамастан барлығына көрсетіледі.
<img src="https://kyzylorda-news.kz/wp-content/uploads/2020/08/msb_algoritm-prisvoenija-odnokratnogo-statwsa-osms-kaz.jpg" alt="" />

МӘМС: 1 қазанға дейін кімдер жарна төлемейді?

<a href="https://kyzylorda-news.kz/">Kyzylorda-news.kz.</a> Қызылордада 9 тамызда Шіркейлі каналына жуынуға барған сәтте құлап кеткен 28 жастағы жігіттің мәйіті табылды, деп хабарлады <a href="https://lenta.inform.kz/kz/kyzylordada-kanalga-batyp-ketken-zhigittin-mayiti-tabyldy_a3681935">ҚазАқпарат</a>.
Оқиға Қызылорда қаласы маңындағы Шіркейлі каналы аумағында елорда уақытымен 05.55-те болды. Жуынуға келген&nbsp;28 жастағы жігіт&nbsp;суға батып кетті.
<blockquote>
 «Сол күні құтқарушылар&nbsp;<a href="https://www.inform.kz/kz/kyzylordada-kanalga-batyp-ketken-zhigitti-izdeuge-14-kutkarushy-tartyldy_a3681452"></a>іздестіру жұмыстарын жүргізді.&nbsp;Ол жұмыстар ешбір нәтиже берген жоқ. Іздестіру 10 тамызда да жалғасып, құтқарушылар жігіттің мәйітін жергілікті уақытпен 19.30-да өзі суға батып кеткен аумақтан 300 метр қашықтықтан тапты. Мәйіт су бетінде қалқып жүрген жерінен жағаға шығарылды», – деп мәлім етті Қызылорда облыстық төтенше жағдайлар департаменті өрт сөндіру және авариялық-құтқару жұмыстары қызметінің өкілдері.
</blockquote>

Қызылордада каналға батып кеткен жігіттің мәйіті табылды

<a href="https://kyzylorda-news.kz/">Kyzylorda-news.kz.</a> Қан құю арқылы коронавирус індетінен айықтыруға болады. Облыстық қан орталығы мамандары COVID-19 инфекциясымен ауырған науқастардан иммунды плазма дайындауды бастады.
Осы кеселдің орташа немесе ауыр түрімен ауырғандардың кейбірінде ауруға қарсы иммунитет пайда болатын көрінеді. Орталық мамандары осыған дейін кеселді жеңген 25 адамнан сынама алып, оның 17-де дертке қарсы антидене бар екендігін анықтаған.
Германиядан әкелінген 100 сынама тест 1 сағат ішінде адамда COVID-19-ға қарсы иммунитет бар жоғын анықтап береді. 
Облыстық қан орталығы мамандары осы уақытқа дейін короновирустың ауыр түрімен науқастанып жатқан 5 адамға иммунды плазманы құйып көрген. Нәтижесінде олардың бәрі ауруына айыққан. Бұл антиденелер COVID-19 ауруымен ауырып шыққан тұрғынның бойында 3 айға дейін вирусқа қарсы күреседі.
Аймақ тұрғындары осы инфекцияға қарсы иммунитеті бар немесе жоқтығын білгісі келсе, облыстық қан орталығында ақылы түрде тексерілуге болады. Егер иммунитеті бар болса қалауы бойынша иммунды плазма тапсырып, оны ақылы түрде облыстық қан орталығының плазма банкісінде сақтап қоя алады. Келешекте жоғарыдағы індетпен туысы науқастанса немесе өзі қайталап ауырған жағдайда өз плазмасын өзіне пайдалануға жарамды. Плазма бұл жерде 3 жылға дейін сақталады.
Облыстық қан орталығының мамандары соңғы уақытта донорлардың екі есеге азайып кеткенін айтады. Иммунды плазма дайындау мақсатында COVID-19 ауруымен ауырып шыққан тұрғындарға қан тапсырып, өзгеге өмір сыйлауға шақырады.

Қызылордалық мамандар науқастардан иммунды плазма дайындауды бастады

<a href="https://kyzylorda-news.kz/">Kyzylorda-news.kz.</a> «Қазгидромет» РМК-сы 11 тамызға арналған ауа райы болжамын жариялады.
11 тамыз күні республиканың бірқатар аумағында найзағай ойнап, жаңбыр жауады. Солтүстік-батыста, солтүстікте нөсерлетіп, дауыл тұрады, бұршақ жаууы да ықтимал. Республиканың кей жерлерінде жел күшейіп, оңтүстікте және оңтүстік-батыста шаңды дауыл тұрады, солтүстік-батыста тұман түсуі мүмкін.
Ақмола, Қостанай, Солтүстік Қазақстан, Павлодар облыстарының кей жерлерінде найзағай ойнап, дауыл тұрады, жел секундына 15-20 метр жылдамдықпен соғады, бұршақ жаууы ықтимал. Қостанай облысының бірқатар аумағында түнде және күндіз тұман түседі.
Қарағанды облысының кей жерлерінде найзағай ойнап, дауыл тұрады, жел секундына 15-20 метр жылдамдықпен ұйтқиды, күндіз екпіні 23 метр болады.
Шығыс-Қазақстан, күндіз Алматы облыстарының кей жерлерінде найзағай ойнап, жел секундына 15-20 метр жылдамдықпен соғады.
Түркістан, Қызылорда, Манғыстау облыстарының кей жерлерінде желдің жылдамдығы секундына 15-20 метр болады. Қызылорда, Маңғыстау облыстарында шаңды дауыл тұрады.
Жамбыл облысының кей жерлерінде найзағай ойнап, күндіз желдің жылдамдығы секундына 15-20 мтер, екпіні 23 метрге жетеді.
Ақтөбе облысының кей жерлерінде жел секундына 18 метр жылдамдықпен ұйтқиды.
Күндіз Алматы облысында аптап ыстық сақталады.
Қызылорда, Түркістан, Жамбыл, Алматы облыстарының басым бөлігінде, Қарағанды, Атырау, Ақтөбе облыстарының кей жерлерінде төтенше өрт қаупі сақталады.

Қазақстан және Қызылорда облысының жаңалықтары