Kyzylorda-news.kz. Қазгидромет 16 тамызға арналған ауа райы болжамын жариялады.
Кей жерлерде жаңбыр жауады, солтүстік-батыста қатты жаңбыр жауады, найзағай, дауыл күтіледі, бұршақ жаууы ықтимал. Республиканың шығысы және оңтүстік-шығысы жоғарғы атмосфералық қысым алқабында болғандықтан, жауын-шашынсыз ауа райы күтіледі. кей жерлерінде жел күшейеді, оңтүстікте шаңды дауыл, солтүстігінде және шығысында тұман болады.
Қызылордада жел 15-20 м/с күшейеді, шаңды дауыл, түнде кей жерлерде найзағай күтіледі.

16 тамызға арналған ауа райы болжамы

Kyzylorda-news.kz. Қызылордада 14 елді мекенге интернет желісінің жылдамдығын арттыру үшін талшықты-оптикалық кабелі апарылды.
Сондай-ақ, 70 елді мекеннің 23-не антенна-діңгек құрылыстарын салу жоспарлануда. Оның ішінде, 4 компания «Билайн» және 19-ы «Кселл». Бұл туралы Өңірлік коммуникациялар қызметінің ақпарат алаңында өткен брифингте облыстық цифрлық технологиялар басқармасы басшысының міндетін атқарушы Юлия Тремасова мәлімдеді.
<blockquote>
 “Қазіргі таңда, провайдерлік компаниялардың өкілдері интернетті қамтамасыз етуге барынша күш салуда. Сондай-ақ, “Билайн”, “Кселл” компанияларымен қолда бар 2G радиорелейкаларын 3G-ге жаңғыртуға және бір оператордың қолданыстағы базалық станцияларын басқа екі компанияға қосу жұмыстары атқарылуда. Осылайша, 2021 жылы 47 ауылдық елді мекенді интернетпен қамтамасыз ету бойынша мәселе шешімін табады”, – деді Юлия Тремасова.
</blockquote>
Сонымен қатар, “Билайн” компаниясы “Сабалақ”, “Ягодка” және “ПМК-29” саяжайларына антенна орнату үшін құжаттарын дайындауда.
Брифингте сала маманы “Бәйтерек” шағын ауданына 2021 жылы 2 станция орнатылатынын айтты. Бұған қоса, сол жағалауға антенна-діңгек құрылысы мен базалық станция орнату үшін жер учаскесін бөлу мәселесі қарастырылуда.
<img src="https://kyzylorda-news.kz/wp-content/uploads/2020/08/fb_img_1597422259524.jpg" alt="" />

Қызылордада 14 елді мекенге талшықты-оптикалық кабелі апарылады

Kyzylorda-news.kz. Қазалы ауданының Ақсуат ауылында 90 орындық «Балауса» бөбекжай балабақшасы пайдалануға берілді.
Жаңа балабақшаның ашылу салтанатына Қазалы ауданының әкімі Мұрат Ергешбаев қатысты.
<blockquote>
 “Қазіргі таңда Қазалы ауданы – қарқынды құрылыс алаңына айналған. Соңғы 2 жылдың өзінде көптеген нысандар салынып, пайдалануға берілді. Оның ең ірісі ретінде Сырдария өзенінде «Әлсейіт» темір-бетон көпірін, Әйтеке би кентіндегі 6 көп қабатты тұрғын үйлердің құрылысын айтсақ болады. Бұған дейін Ақсуат ауылының өзінен әлеуметтік маңызы бар 2 бірдей нысанның құрылысы басталған болатын. Бүгін міне соның бірі 90 орындық «Балауса» бөбекжай балабақшасы пайдалануға берілуде”, – деген Мұрат Нәлхожаұлы балабақша меңгерушісі Шынар Мүберековаға бағалы сыйлықты табыс етті.
</blockquote>
Жаңа ғимараттың ашылу салтанатында ауыл тұрғындары қуаныштарын жасыра алмады.
<blockquote>
 “Ақсуат ауылы мемлекет қамқорлығынан шет қалып жатқан жоқ. Мәселен, біздің ауылда өткен жылы абаттандыру жұмыстары жүргізіліп, орталық саябақ салынған болатын. Міне, бүгін де біз үшін ерекше күн болып тұр. Бұған дейін балабақша салу туралы мәселе көтерген болатынбыз. Көп уақыт өтпей-ақ ауыл ішінен заманауи үлгідегі зәулім ғимарат салынып, бүлдіршіндердің жан-жақты тәрбие алуына мүмкіндік туып отыр. Немерелеріміз енді жаңа балабақшаға барады. Осындай балабақшалар көптеп ашыла берсін. Биыл бізде тағы да қуанышты жаңалығымыз бар. Ауыл орталығынан мемлекеттік бағдарлама аясында 150 орындық клубтың құрылысы жүріп жатыр. Амандық болса ол да жақын күндері аяқталып, елдің игілігіне пайдалануға берілмекші”, – Ақсуат ауылдық ардагерлер кеңесінің төрағасы Қуаныш Рзаханов.
</blockquote>
Айта кетейік, бұл балалар мекенінің салынуына бюджеттен 396,8 млн теңге қаржы бөлінді. Екі қабатты сәулетті ғимаратты «Орион LTD» ЖШС сапалы етіп салып шықты.
Балабақша 90 орынға арналған. Оның ішінде 2 топ 15 баладан, 3 топ 20 баладан орналасады. Оның аумағында негізгі ғимаратпен қатар, 5 топқа арнайы ойын алаңы бар.
<img src="https://kyzylorda-news.kz/wp-content/uploads/2020/08/fb_img_1597462026382.jpg" alt="" />
<img src="https://kyzylorda-news.kz/wp-content/uploads/2020/08/fb_img_1597462038821.jpg" alt="" />
<img src="https://kyzylorda-news.kz/wp-content/uploads/2020/08/fb_img_1597462032662.jpg" alt="" />
<img src="https://kyzylorda-news.kz/wp-content/uploads/2020/08/fb_img_1597462035567.jpg" alt="" />
<img src="https://kyzylorda-news.kz/wp-content/uploads/2020/08/fb_img_1597462041524.jpg" alt="" />

Қазалының ауылында жаңа балабақша пайдалануға берілді

Kyzylorda-news.kz. Үкімет комиссиясы 17 тамыздан бастап Қазақстанда карантин жеңілдейтіні жайында шешім шығарған болатын, деп хабарлайды <a href="https://24.kz/kz/zha-aly-tar/o-am/item/416242-d-jsenbide-sauda-ortaly-tary-ashylady">«Хабар 24».</a>
Дүйсенбіден бастап елдегі сауда орталықтары, жабық базарлар, сұлулық салондары, бассейні жоқ фитнес орталықтар мен моншалар ашылады. Бірақ келушілер саны шектеледі. Яғни, 30%-ке ғана толтыра алады. Жабық мекемелерде 4 шаршы метрге бір адамнан болуы қажет. Дегенмен, мемлекеттік комиссия жұмыс берушілерге қызметкерлердің 80%-і қашықтан жұмыс істеуді жалғастырғаны жөн деген кеңес берді. Ал, кинотеатр, тойхана және тағы басқа ойын-сауық орталықтары жұмысына шектеу қойылады. Карантин толық аяқталғанша отбасылық мерекелер мен еске алу шараларына да тыйым салынады.

Дүйсенбіде сауда орталықтары ашылады

Kyzylorda-news.kz. Бүгін Қызылорда облысының әкімі Гүлшара Әбдіқалықова Қызылорда қаласындағы бірқатар нысандарды аралады.
Аймақ басшысына қала әкімі Нұрлыбек Нәлібаев «Жұмыспен қамтудың Жол картасы» аясында атқарылып жатқан жұмыстарды баяндады. Өңір басшысы алдымен Нұрсұлтан Назарбаев даңғылын абаттандыру жұмысымен танысты. Жобаның жалпы құны – 500 млн.теңге. «Асанасдар» ЖШС мердігер компаниясы қолға алған жоба аясында 180 адам жұмыспен қамтылған. Мамыр айындағы басталған жұмыстар қыркүйекке дейін толығымен аяқталады деп жоспарланып отыр.
Мұнан кейін Гүлшара Әбдіқалықова «Шұғыла» ықшам ауданындағы №49, 50, 51, 52 үйлеріндегі жылу желілерін қайта жаңғырту жұмыстарын көрді. Қысқа дайындық барысы жоспармен жүзеге асып жатыр. Бұл ауданда қазір 2671 шақырым жылу құбырлары жаңғыртылуда. Аймақ басшысы жобамен айналысып жатқан «Сапақ» ӨК-ге белгіленген мерзімде, яғни, 21 қыркүйекке дейін барлық жұмыстарды аяқтауды тапсырды. Себебі ауа-райы күрт суыса барлық жылыту жүйелері сақадай сай болу қажет.
Облыс әкімі «Локомотив» стадионын қайта жаңғырту жұмыстарымен де танысты. Облыстық дене шынықтыру және спорт басқармасының басшысы Жақсылық Оспанов күрделі жөндеуден өтіп жатқан спорттық нысан жайында баяндады.
Айтуынша, 19 маусымда басталған жұмыстар 4 ай ішінде аяқталады. Жоба аясында 70 адам жұмыспен қамтылған. Оның 35-і жұмыспен қамту орталығы арқылы орналасқан.
Сондай-ақ, Гүлшара Әбдіқалықова Ақсуат ауылдық окгругіндегі 38 жылдық тарихы бар №143 орта мектепке барды. Мұнда 624 оқушы білім алады. Жұмыспен қамтудың жол картасы аясында күрделі жөндеуден өтіп жатқан білім ордасы жаңа оқу жылының басталуына орай пайдаланылуға беріледі. Одан бөлек Ақсуатта «Ауыл – ел бесігі» жобасы аясында 462 млн теңге қаржыға абаттандыру жұмыстары жүргізіліп, тұрғындардың игілігіне берілуде.
Облыс әкімі Қызылорда қаласында атқарылып жатқан жұмыстарға оң бағасын беріп, әрбір нысан мердігерлердің белгіленген мерзімі негізінде ел игілігіне берілу керектігін баса айтты.
Жалпы «Жұмыспен қамтудың Жол картасы» аясында облыс бойынша 276 инфрақұрылымдық жобаны іске асыруға 36,9 млрд теңге көлемінде қаржы бөлінді, оның ішінде Қызылорда қаласында 17,7 млрд теңгеге 97 жоба жүзеге асуда. Жұмыспен қамтудың жол картасы аяқталғаннан кейін, жаңа нысандардың құрылысы арқылы 452 тұрақты жұмыс орындары ашылады.
<img src="https://kyzylorda-news.kz/wp-content/uploads/2020/08/fb_img_1597475885732.jpg" alt="" />
<img src="https://kyzylorda-news.kz/wp-content/uploads/2020/08/fb_img_1597475896246.jpg" alt="" />
<img src="https://kyzylorda-news.kz/wp-content/uploads/2020/08/fb_img_1597475898690.jpg" alt="" />
<img src="https://kyzylorda-news.kz/wp-content/uploads/2020/08/fb_img_1597475905136-1.jpg" alt="" />
<img src="https://kyzylorda-news.kz/wp-content/uploads/2020/08/fb_img_1597475900969-1.jpg" alt="" />
<img src="https://kyzylorda-news.kz/wp-content/uploads/2020/08/fb_img_1597475907425.jpg" alt="" />
<img src="https://kyzylorda-news.kz/wp-content/uploads/2020/08/fb_img_1597475909765.jpg" alt="" />

Гүлшара Әбдіхалықова қаладағы бірқатар нысандарды аралады

Kyzylorda-news.kz. Елімізде 114 бала коронавирус жұқтырған. Оның үшеуі Кавасаки синдромына шалдыққан. Бұл туралы Денсаулық сақтау министрлігінің ресми өкілі&nbsp;Бағдат Қожахметов айтты.
Жыл басынан бері Нұр-Сұлтан, Алматы, Петропавлда Кавасаки синдромының 3 дерегі тіркелген.
Кавасаки ауруы коронавирус пандемиясына дейін де кездескен. Алайда қазір коронавируспен ауырған балаларда Кавасаки синдромына ұқсас ауру белгілері анықталып жатыр. Коронавирустың жеңіл не симптомсыз түрімен ауырған балаларда 2-3 аптадан соң жұқпалы аурудан кейінгі асқыну байқалады. Дәрігерлер мұны алғаш Ұлыбритания, АҚШ және Италияда байқаған. Кавасаки ауруы орта тамырлардың зақымдалуымен, оның ішінде көбіне коронарлық артериялардың зақымдалуымен байланысты.
Ғалымдар&nbsp;Кавасаки синдромы типтес ауруға көп жүйелі қабыну синдромы деген атау берді.
Бұған дейін елімізде жылына 2-3 бала Кавасаки синдромымен ауыратын болған. Әдетте бұл ауруға 5 жасқа дейінге балалар шалдығады. Алайда коронавирус пандемиясының салдарынан Кавасаки синдромына ұқсас ауру белгілері балалармен қоса жасөспірімдерден де байқалып жатыр.&nbsp;
Коронавирустан жазылып, тест оның жоқ екенін көрсеткен сәттен бастап 2-3 апта өткенде Каваски синдромына ұқсас аурудың белгілері байқалуы мүмкін. Баланың дене қызуы көтеріліп, 2-3 тәулік бойы түспей қоюы мүмкін. Денеге бөртпе шығып,&nbsp;лимфотүйіндер&nbsp;үлкейе түседі. Тіл қызғылт түске боялып, еріндер бозарады.&nbsp;
Жалпы балалардағы муль­­ти­­жүйе­лік қабыну синдромының кли­никалық белгілері – қалтырау, 1 тәулік немесе одан да көп уақыт бойы 38 градус­тан жоғары дене қыз­уы, бөртпе, конъюнктивит, склерит, лимфаденопатия, алақанның, аяқтың ісінуі, тыныс алудың қиын­да­уы, асқазан-ішек жолдарының за­қым­дануы.
Балада Кавасаки синдромының белгілері байқалған кезде жергілікті дәрігерге немесе педиатрға жүгіну керек. Мұндай синдроммен балалар міндетті түрде ауруханаға жатқызылады. Бұл синдром бала коронавирус жұқтырып, екі-үш апта өткен соң, яғни жазылғаннан кейін байқалғандықтан толыққанды диагноз бен зерттеулер жасалады. Зерттеулерге биохимиялық қан талдауы, гемостазды бақылау, коагулограмма, эхокардиограмма, ЭКГ, УДЗ, кеуде рентгені немесе КТ кіруі мүмкін.
<a href="https://massaget.kz/layfstayl/bilim/ol-kim-bl-ne/62964/">Massaget.kz.</a>

Кавасаки синдромы жайлы не білу керек?

Kyzylorda-news.kz. Арал ауданы Қамыстыбас ауылдық округінің тұрғындары Қамбаш көлі көз алдымызда таяздануда деп дабыл қағуда.
Бұл бірқатар экологиялық проблемаларға алып келді, жергілікті тұрғындардың жұмыспен қамтылуына және жалпы кәсіпкерліктің дамуына әсер етті. Биыл Қамыстыбас ауданының ең ірі көліндегі жағалаудағы ауылдардың әдеттегі өмір ырғағына карантин ғана әсер еткен жоқ. Сырдария өзенінің тұрақсыз деңгейіне байланысты көлдегі су жағалаудан 300 метрге жуық жерге ысырылып кетті. Осының салдарынан балық сағасына шығып, ал балықшылар балық аулауын тоқтатты. Бірақ бұл да басты проблема емес, дейді округ әкімі.
<blockquote>
 “Көлдің таяздануы экологиялық проблеманы туғызды. Жақын жерде шаңды дауылдар жиілеп кетті, ал кешке жел ауылға қарай соққанда, тұншықтырады. Бұл тұрып қалған судан. Егер үлкен су келмесе, апат болары анық. Балықшылар жұмысынан айрылады, ал Қосжары балық аулайтын қойма да тұрып қалады, ол күз сайын көлді шабақтармен қоректендіреді. Егер Камбаш көлі қурап қалса, онда ондаған туристік нысандар жабылады, дейді аудан басшысы”, – Қамыстыбас ауылдық округінің әкімі Нұржау Ділмағамбетов.
</blockquote>
Осылайша, құмның ішінде жол салу мен жарықтандыру үшін айтарлықтай бюджеттік шығындар кетуі мүмкін.
<blockquote>
 “Күріш алқаптарына су әрең жетеді. Үміт жаңбырда, бірақ ол да жоқ. Егер Тоқтоғұл, Қайраққұм, Чарвак жоғарғы су қоймаларында көп су жиналса, онда ол бізге жіберіледі. Бірақ төменгі деңгей де бар. Ал Қамбашты күзде және қыста толтыруға тырысамыз. Жылдың осы уақытында Қырғызстаннан электр энергиясын өндіру үшін үлкен су ағызылады. Содан кейін бұл су Шардарада жиналады”, – дейді Табиғи ресурстар және табиғат пайдалануды реттеу басқармасының бөлім басшысы Қайрат Жансұлтанұлы.
 “Су құрамының өзгеруіне байланысты өліп кетуі мүмкін шабақтарды құтқару керек, көлге судың түсу жолдарын қарастыру керек, түбін тазарту керек, көрші су қоймалары арасында су алмасу режимін қалыптастыру керек”, – дейді балық шаруашылығы ғылыми – өндірістік орталығы Арал филиалының директоры Тынысбек Барақбаев.
</blockquote>
Тұрғындардың айтуынша, Қамбаш көлі соңғы рет 35 жыл бұрын құрғап кеткен. Бірақ сол кезде мәселе жылдың күзгі-қысқы кезеңінде шешілген, Сырдария көлді шетіне дейін толған.
<a href="https://stan.kz/kizilorda-oblisindagi-kambash-koli-tayazdanip-zhatir-335712/">Stan.kz</a>

Қызылорда: Қамбаш көлі таязданып жатыр

Kyzylorda-news.kz. 15 тамызда аты аңызға айналған сазгер, қазақ вальсінің королі Шәмші Қалдаяқовтың туғанына 90 жыл толады.
Болашақ халық композиторы 1930 жылы 15 тамызда елдің оңтүстігіндегі шағын ауылда дүниеге келді. Оның әкесі зергер, темір ұстасы болған. Десек те, өнерден де құры қол емес еді. Қазақтың қобызы мен домбырасын құйқылжыта тартатын сері адам. Анасы да ән салатын. Шәмші бала кезінен өнерге бейім болды. Кішкентайынан мандолинада ойнап, алғашқы әндерін жаза бастады.
<blockquote>
 «Әкем Тимур совхозында, қазіргі Түркістан облысының Шәмші ауылында дүниеге келді. Ол әрдайым: «Мен атақты қолбасшы, батыр ақсақ Темір қайтыс болған жерде тудым», – деп айтып отыратын. Ол дүниеге келгенде атын Жәмшид деп қойған. Кейін Шәмші болып кетті. Атамның шын есімі Әнәпия. Аяғында туа біткен үлкен қал болған. Сондықтан Қалдыаяқ болып кетті. Бүгінде оның лақап аты аңызға айналды ғой»,– дейді композитордың ұлы Мұхтар Қалдаяқов.
</blockquote>
Шәмші Қалдаяқовтың балғын балалық шағы қиын-қыстау кезеңге тұспа-тұс келді. Екінші дүниежүзілік соғыста 15 жастағы бозбала тракторшы болып жұмыс істеді. Кейін техникалық училищеде ветеринар мамандығы бойынша оқыды. Содан кейін Ақтөбе облысына қарасты бір ауылда еңбек етті.
<img src="https://kyzylorda-news.kz/wp-content/uploads/2020/08/2008141316411454g.jpg" alt="" />
<blockquote>
 «Әкем Ақтөбе облысында жұмыс істеп жүргенде халықтың жағдайы өте нашар болған. Соғыстан кейінгі жылдар, жейтін тамақ жоқ. Бұған бейжай қарай алмаған әкем үкіметтің бір отар қойының жартысын халыққа таратып берді. Әрине, бір шартпен. Қой төлдегенде қайтып орнына қою керек. Сөйтіп, ауылдағы көптеген адамды аштықтан құтқарып қалды. Осы ісі үшін ол түрмеге қамала жаздады. Бірақ ауыл тұрғындары оған жол бермей, әскерге кетуге кеңес береді», – дейді композитордың ұлы.
</blockquote>
Шәмші Қалдаяқов Ресейде шамамен 7 жыл қызмет етіп, кіші лейтенант атағын алады. 1955 жылы Ташкент қаласындағы Хамза Ниязи атындағы музыка училищесіне түседі. Бірақ оны бітірмей, Алматыға көшіп келеді. Содан соң Құрманғазы атындағы консерваторияға оқуға түседі.
Мұхтар Қалдаяқовтың айтуынша, әкесі Ресейде өмір сүрген жылдары орыс музыкасын бойына сіңірген. Сондықтан оның көптеген шығармаларында қазақ және орыс музыкасының өзіндік синтезі бар.
<img src="https://kyzylorda-news.kz/wp-content/uploads/2020/08/2008141316440659g.jpg" alt="" />
<blockquote>
 «Әкем Ташкенттегі музыкалық училищеде оқып жүргенде, бір соқыр музыкантпен танысыпты. Дәл сол кісінің қолдауымен оның музыкаға деген құштарлығы артып, ән әлеміне енген», – дейді Мұхтар Қалдаяқов.
</blockquote>
Шәмші Қалдаяқов – қайталанбас музыкасымен, қарапайымдылығымен, адами қасиеттерімен халықының ыстық ықыласына бөленіп, жүректерінің төрінен орын алған жан.
<blockquote>
 «Әкем қазақтың табиғатына жақын әндерді жазғандықтан халық жүрегінен орын алды. Ол – өте мейірімді, ақкөңіл болатын. Айналасындағы адамдарға үнемі қол ұшын беруге асықты. Үйге қонақ шақырғанды жақсы көретін. Бір сөзбен айтқанда, кеңпейіл жан еді. Қыста ешқайда шықпайтын, үйде отыратын. Ал көктем шыға салысымен, туған-туыс, достарын аралап кететін», – деп еске алады ұлы.
</blockquote>
<img src="https://kyzylorda-news.kz/wp-content/uploads/2020/08/2008141316450661g.jpg" alt="" />
Сұхбат барысында Мұхтар Қалдаяқов әкесі бір кездері сығандар тобына еріп, Изольдаға өлердей ғашық болған деген алып-қашпа әңгімеге тоқталды. «Бұл –театрда сахналанған «Сыған серенадасы» драмалық шығармасының сюжеті. Ондағы басты кейіпкердің аты – Шәмші. Алайда, шынайы өмірде олай болған жоқ», – деп сендірді композитордың ұлы.
«Анамның айтуынша, әкем екеуі саябақта серуендеп жүрген. Бір кезде әкем бір сығанды көріп қалып соған бал аштыруға бел буған. Соңында әкемнің болашағын болжаған сығандардың көрсеткен қызметі үшін ақшаны анам төлеген екен. Содан кейін, бәрі өз жолымен кеткен көрінеді. Әкем сығандар тобына ермеген, ешқандай сыған қызына ғашық болған жоқ. Бұл, ойдан құрастырылған әңгіме»,– дейді Мұхтар Қалдаяқов.
Оның сөзінше, Ш. Қалдаяқов отбасының шырқын бұзған адам емес. Отбасылық өмірі жақсы болған. Жұбайымен Алматыда ортақ таныстарының туған күн кешінде танысқан.
<img src="https://kyzylorda-news.kz/wp-content/uploads/2020/08/2008141316450562g.jpg" alt="" />
<blockquote>
 «Анам ол кезде 24 жаста болатын. Ол тігін ательесінде жұмыс істеді. Ал әкем консерваторияда оқып жүрген. Анам отбасының бақытын, тыныштығын бірінші орынға қоятын жан. Ол әкемнің шығармашылығына құрметпен қарады. Сондықтан әрдайым отбасындағы музыка мәдениетін қолдады. Екі ұлы мен немересі әке жолын таңдады. Менің ағам – Әбілқасым пианист, мен скрипкашы болдым. Әбілқасымның жары мен қызы да пианинода ойнайды. Жиенім екі халықаралық байқаудың жүлдегері атанды. Бүгінде мен Абай атындағы Мемлекеттік академиялық опера және балет театрының дирижерімін. Әйелім бизнеспен айналысады. Үш баламның екеуі музыка мектебінде оқиды», – деді ол.
</blockquote>
<img src="https://kyzylorda-news.kz/wp-content/uploads/2020/08/2008141316437157g.jpg" alt="" />
Бүгінде Шәмшіні де, оның әндерін де елеусіз қалдырған ешкім жоқ. Ол халқының жүрегінде мәңгі тірі. Соның құрметіне 1992 жылдан бастап сазгерлер мен әншілер үшін Қалдаяқов атындағы халықаралық фестиваль дәстүрлі түрде өткізіліп тұрады.
<blockquote>
 «2010 жылы ән жинағын шығардық. Оған 55 ән енгізілді. Көзі тірісінде әкем «Жақсы композитор болу үшін көп ән білу керек» деп айтып отыратын. Бірақ, ешқашан жоғары атақ пен марапатқа ұмтылған емес. Композиторлар одағына мүше бола алмады. Себебі, қолында консерваторияның дипломы жоқ еді. Қазақстанның халық әртісі атағын қайтыс боларының алдында, екі ай бұрын алды»,– дейді Мұхтар Қалдаяқов.
</blockquote>
<img src="https://kyzylorda-news.kz/wp-content/uploads/2020/08/2008141316441760g.jpg" alt="" />
Халық сазгер әндерінің барлығын да сүйсіне тыңдайды. Шәмші аға, анадан бастап, отан, табиғатқа дейін ән арнап, қазақ музыка өнерінің мұрағатын байытты.
Естеріңізге сала кетейік, композитордың 90 жылдық мерейтойына орай Нұр-Сұлтан және Алматы қалаларында «Шәмші әлемі» атты үлкен концерт өткізу жоспарланған болатын. Коронавирус пандемиясына байланысты мәдени іс-шара кейінге шегерілді.
<img src="https://kyzylorda-news.kz/wp-content/uploads/2020/08/2008141316436356g.jpg" alt="" />
<img src="https://kyzylorda-news.kz/wp-content/uploads/2020/08/2008141316422055g.jpg" alt="" />
<img src="https://kyzylorda-news.kz/wp-content/uploads/2020/08/2008141316430858g-1.jpg" alt="" />
<a href="https://www.inform.kz/kz/bugin-shamshi-kaldayakovtyn-tuganyna-90-zhyl-kompozitor-turaly-uly-syr-shertti_a3683577">ҚазАқпарат</a>

Бүгін Шәмші Қалдаяқовтың туғанына – 90 жыл

Kyzylorda-news.kz. Қызылорда қаласының әкімі Нұрлыбек Нәлібаев қаладағы карантиндік шектеу шараларын пысықтау мақсатында шұғыл мәжіліс өткізді.
Мәжілісте Ақсуат ауылдық округіне қарасты Ж.Махамбетов ауылында болған тәртіпсіздік талқыланды. Яғни, 13 тамыз күні ауыл тұрғыны тыйым салынған шектеулерді ескермей, 100-ге жуық адам жинап, той жасаған. Тойдың өту барысында тұрғынмен атыс қару қолданылып, салдарынан 2 бүлдіршін дене жарақатын алған.
Аталған тәртіпсіздіктің орын алуына жол берген Ақсуат ауылдық округінің әкімі Мәмбетәлі Ақмырзаев бұл мәселеге қатысты пікірін «Той егесіне ауызша да, жазбаша да ескерту жасадым. Менің ескертуімді назарға алмай той жасады», – деп қысқа қайырды.
Пандемия уақытынды ауылдың қоғамдық-саяси ахуалын тұрақты бағытта ұстай алмай, тойдың болғанын қала әкімдігіне дер кезінде хабарламағаны үшін, шарасыздық танытқан округ әкімі Мәмбетәлі Ақмырзаевқа шаһар басшысы қатаң сөгіс берді.
«Ауыл тұрмысын түзетуде атқарған жүйелі еңбектеріңізді ескеріп, қатаң сөгіспен қалдырдым»,- деді Нұрлыбек Нәлібаев.
Қала әкімі басқа да кент және ауылдық округ әкімдеріне өздеріне сеніп тапсырылған аумақта бақылауды арттырып, алдын-алу шараларын күшейтуді нықтап тапсырды. Сондай-ақ, ауылдық округтің аймақтық полиция қызметкерін дер кезінде қажетті шараларды қолданбай, тиісті органдарға хабарламағаны үшін тәртіптік жауапкершілікке тартуға қалалық полиция басқармасына нұсқау берді.
Бұған дейін қалаға қарасты Қызылжарма ауылдық округінде ауыл тұрғыны аулада той өткізбек болған. Алайда той қалалық мобильді топтың араласуымен тоқтатылды. Аталған мәселеге байланысты ауыл әкімі Медет Сейіловтың орын алған оқиғаны дер кезінде хабарлағаны ескеріліп, ескерту берілді.
Қала әкімдігінің Әдеп жөніндегі уәкілі мен сала басшыларына кент және ауылдық округ әкімдерінің қызметіне талдау жасап, олардың қызметіне қатысты ұсыныс беруді жүктеді.
Мәжіліс соңында шаһар басшысы ауыл әкімдеріне карантин талаптарын сақтауда жоғары жауапкершілікпен жұмыс жасау керектігін тағы да қатаң ескертті.

Қызылорда: Ақмырзаев қатаң сөгіс алды

Kyzylorda-news.kz. Қызылорда облысының әкімі Гүлшара Әбдіқалықова мүмкіндігі шектеулі азаматтарды қабылдап, мәселесіне жеке-жеке мән берді.
Жиында аймақ басшысы алдымен өңірдегі мүмкіндігі шектеулі азаматтардың өмірін жақсарту мен оларға кедергісіз орта қалыптастыруда атқарылып жатқан жұмыстарды тілге тиек етті.
<blockquote>
 “Облыстың инфрақұрылымы әлі де толық бейімделмеген. Осы мақсатта «Нұр Отан» партиясымен қабылданған «Кедергісіз келешек» бағдарламасы аясында әлеуметтік нысандарға мүмкіндігі шектеулі азаматтар үшін бейімделуіне жұмысшы топпен мониторинг жүргізіліп, тиісті жұмыстар іске асуда. Дегенмен, бұл жұмыстарды әлі де жандандыру қажет. Осы жұмыстарды жүйелеу мақсатында менің тапсырмаммен облыста мүгедектігі бар адамдардың тұрмыс сапасын жақсарту жөніндегі іс-шаралардың Жол картасы әзірленуде”, – деді Г.Әбдіқалықова.
</blockquote>
Бүгінде облыста 30 мыңнан астам мүмкіндігі шектеулі жан бар. Биылғы жылдың өзінде мүгедектігі бар адамдардың өмір сүру сапасын жақсартуға бөлінетін қаражат көлемі 1,5 есеге артып 1,3 млрд теңгені құрады. Ал, 2021 жылдан бастап ерекше жандарға қажетті барлық тауарлар мен қызметтерге мемлекеттік сатып алу процесі қолданылмай, мүгедектер өздері қажетті тауарлар мен қызметтерді толығымен Портал арқылы алатын болады.
Өңірде биыл мүгедектігі бар адамдардың жеке оңалту бағдарламасын орындауға бөлінетін қаражат көлемі 1,5 есеге артып, 1,3 млрд теңгеге жетті. Ал, жұмыспен қамту органдары арқылы 528 мүгедектігі бар адамдар жұмыспен қамтылды. Бұған қоса 13 адам шағын несие алды.Кездесуге шақырылған қала тұрғыны, І топ мүгедегі Зәуре Балтабайқызы ипотекалық пәтерлердің құнын төлеуде жүктемелерді азайту қажеттігін алға тартып, мүмкіндік шектеулі жандарға пәтер ақысын төлеуде қайта қаржыландыру тетіктерін қарастыруды ұсынды. Өз кезегінде облыс әкімі бұл мәселені зерделей отырып, тиісті шешім қабылдайтынын жеткізді.
Қабылдау барысында І топ мүгедегі, «Жылы жүрек жастар» қоғамдық қорының төрағасы Сағатбек Қуанышбайұлы пандус мәселесін көтерді. Қоғамдық орындар мен әлеуметтік нысандар салынған уақытта мүмкіндік шектеулі жандарға арнап салынатын пандустардың ыңғайлы әрі кедергісіз болуына әлі де мән беру қажеттігін атап өтті. Сонымен бірге мүмкіндік шектеулі жандардың өмірге құштарлығын ояту бағытында түрлі мәдени-спорттық шараларды ұйымдастыруға қолдау қажеттігін жеткізді.
Қабылдауда болған бірқатар азаматтар облыс әкіміне ортақ мәселесін де айтты. Мүмкіндігі шектеулі азаматтарды жұмыспен қамту арқылы әлеуметтік өмірге бейімдеу мәселесін жүйелі шешуді, ІІ топ мүгедектері үшін қоғамдық көлікте 50 пайыз жеңілдік қажеттігін ұсынды. Аймақ басшысы әрбір ұсыныс пен жеке мәселені жіті бақылауға алып, тиісті сала басшыларына тапсырма беріп, мәселені бірге шешуге ықпал ету қажеттігін атап өтті.
Жиында Гүлшара Әбдіқалықова облыстық құрылыс басқармасының басшысы Б.Пірімбетовке құрылыс объектілерінің, көше-жол желісінің жоба-сметалық құжаттарын дайындау барысында мүгедектер үшін қолжетімділікті қамтамасыз етуді міндетті түрде ескеруді қатаң тапсырды. Барлық көтерілген мәселені бақылауға алып, тоқсан сайын кездесу ұйымдастыруды облыс әкімінің орынбасары Наурызбай Байқадамовқа жүктеді.
Кездесуде сөз алған облыстық мүгедектер қоғамының төрағасы Мұрат Жұмадилаев өзі секілді мүмкіндігі шектеулі жандардың мүмкіндігін арттыруға бағытталған шаралардың қолға алынғандығына ризашылығын білдірді. Арнайы жүздесіп, келелі мәселелерді көтерген аймақ басшысына өзінің және облыстық мүгедектер қоғамы мүшелерінің алғысын жеткізді.
<img src="https://kyzylorda-news.kz/wp-content/uploads/2020/08/fb_img_1597418568671-1.jpg" alt="" />
<img src="https://kyzylorda-news.kz/wp-content/uploads/2020/08/fb_img_1597418570555-1.jpg" alt="" />
<img src="https://kyzylorda-news.kz/wp-content/uploads/2020/08/fb_img_1597418574696-1.jpg" alt="" />
<img src="https://kyzylorda-news.kz/wp-content/uploads/2020/08/fb_img_1597418577168-1.jpg" alt="" />
<img src="https://kyzylorda-news.kz/wp-content/uploads/2020/08/fb_img_1597418579623-1.jpg" alt="" />
<img src="https://kyzylorda-news.kz/wp-content/uploads/2020/08/fb_img_1597418582258-1.jpg" alt="" />

Гүлшара Әбдіхалықова мүмкіндігі шектеулі жандармен кездесті

Kyzylorda-news.kz. Синоптиктер 15 тамыз күнгі ауа райына байланысты республиканың 8 өңірінде ескерту жасады.
Қызылорда облысында солтүстік-шығыстан жел соғады, күші күндіз кей жерлерде 15-20 м/с. Күндіз өте жоғары өрт қаупі сақталады. Дабылды ескертудің ықтималдығы 90-95%.

Сенбіге арналған ауа райы болжамы

<a href="https://kyzylorda-news.kz/date/2020/08/14/">Kyzylorda-news.kz.</a> Қызылорда облысындағы жергілікті атқарушы және аумақтық мемлекеттік органдармен 366 мемлекеттік қызмет түрі көрсетіледі.
<blockquote>
 «2020 жылдың 6 айында облыстағы қызмет беруші мекемелер тарапынан 1608263 қызмет көрсетілген. Электронды түрде қызметтер алу үлесі 2019 жылдың тиісті кезеңімен салыстырғанда 15,8 пайызға артып, нәтижесінде 88 пайызды құрап отыр», – деді ҚР Мемлекеттік қызмет істері агенттігінің облыстық департаментінің басшысы Нұрман Талқанбаев.
</blockquote>
2020 жылғы мамыр айынан бастап мемлекеттік қызметтер алу жүйесінің жаңа форматына сәйкес электронды ұсынылатын мемлекеттік қызметтерді тұрғындар халыққа қызмет көрсету орталығына келмей, «Электронды үкімет порталы» «eGov mobile» және Telegram қосымшасындағы «EgovKzBot2.0» боты арқылы алуға мүмкіншілік жасалған.
Қазіргі таңда халықтың қызмет алуына қолайлы жағдай жасау мақсатында облыс көлемінде 574 «өзіне – өзі қызмет көрсету бұрыштары» жұмыс жасауда.

Қазақстан және Қызылорда облысының жаңалықтары