<a href="https://kyzylorda-news.kz/">Kyzylorda-news.kz.</a> Бүгіннен бастап карантин режимі жеңілдетілді.
17 тамыздан бастап барлық өңірлерде жұмысын қайта бастайтын кәсіпкерлік субъектілерінің қызмет түрлерінің тізбесі бекітілді. Атап айтар болсақ,
<ul>
<li>СОСО, сауда үйлері, сауда желілері, жабық базарлар (толымдылығы 30%-дан аспауы тиіс, 1 келушіге 4 шаршы метр);</li>
<li>сұлулық салондары, шаштараз, СПА орталықтары, косметологиялық қызмет көрсететін нысандар (алдын ала жазылу бойынша 1 келушіге 4 ш.м.);</li>
<li>бассейні жоқ фитнес орталықтары (толымдылығы 50%-дан аспауы тиіс, 1 келушіге 5 ш.м.), бассейні жоқ моншалар мен сауналар (толымдылығы 50%-дан аспауы тиіс, 1 келушіге 4 ш.м.);</li>
<li>балаларға арналған түзету кабинеттері, балалар және ересектерге білім беру орталықтары (топтарда — 5 адамнан артық емес, жазылу бойынша); мектепке дейінгі балалар мекемелерінің кезекші топтары (15 адамнан артық емес);</li>
<li>ашық ауадағы аттракциондар (қашықтықты сақтау, маска тағы, адамдар ағынын реттеу).</li>
</ul>
Айта кетейік, жұмыс берушілерге әлі де қызметкерлердің кемінде 80% үшін қашықтан жұмыс істеу форматын сақтау ұсынылады.

Қазақстанда карантин жеңілдетілді

Kyzylorda-news.kz. Қазақстан аумағының басым бөлігінде циклонның өтуімен байланысты ауа райы құбылмалы болады, деп хабарлайды Қазгидромет.
Кей жерлерде жаңбыр жауады, найзағай күтіледі, дауыл, бұршақ жаууы ықтимал. Тек оңтүстік және батыста ауа райы көбінесе жауын-шашынсыз болады. Республиканың батысында шаңды дауыл, солтүстігінде және орталық аймақтарында тұман күтіледі.
Ақмола, Түркістан, күндіз Алматы облыстарының кей жерлерінде найзағай күтіледі, жел 15-20 м/с күшейеді.
Жамбыл, Қарағанды, Қостанай облыстарының кей жерлерінде найзағай, дауыл күтіледі, жел 15-20 м/с күшейеді, бұршақ жаууы ықтимал. Қарағанды, Қостанай облыстарында тұман болады.
Қызылорда, Маңғыстау, Атырау, Шығыс Қазақстан облыстарының күндіз кей жерлерінде жел 15-20 м/с күшейеді, Атырау облысында шаңды дауыл, Маңғыстау облысының кей жерлерінде найзағай күтіледі.
Павлодар облысының кей жерлерінде, Батыс Қазақстан облысының солтүстігінде найзағай күтіледі, бұршақ жаууы ықтимал. Сонымен қатар бұл аймақтарда күндіз жел 15-20 м/с күшейеді.
Ақтөбе облысының кей жерлерінде найзағай күтіледі, дауыл, бұршақ жаууы ықтимал, күндіз кей жерлерінде жел 15-20 м/с күшейеді.
Алматы облысында күндіз қатты ыстық болжанады.
Атырау, Қызылорда, Түркістан, Жамбыл, Алматы облыстарының басым бөлігінде, Ақтөбе облысының шығысында, Қарағанды, Шығыс Қазақстан облыстарының оңтүстігінде төтенше өрт қаупі сақталады.

17 тамызға арналған ауа райы болжамы

<a href="https://kyzylorda-news.kz/">Kyzylorda-news.kz</a> ақпараттық агенттігінің 17 тамызға арналған жұлдыз-жорамалы.
Тоқты
Бүгін күніңіз жақсы өтеді. Өзіңізді жеңіл сезініп, барлық істі тез атқаратын боласыз. Сонымен қатар жаныңыздағы жандармен де тез тіл табысасыз.
Торпақ
Егер жұмысыңыз қаржымен тығыз байланысты болса, онда бүгін қызықты ұсыныстар түседі. Жаңа жұмыстан қорықпаңыз. Қайта білек сыбана кірісіңіз.
Егіздер
Сүйіктіңізге деген махаббатыңыз арта түседі. Дәл қазіргі сәтте сүйікті адамыңыз моральды және материалды тұрғыдан қолдауды қажет етеді.
Шаян
Күш-қуатыңыз азайып, иммунитетіңіз төмендейді. Соның салдарынан аздап сырқаттанып қалуыңыз да мүмкін. Дерттің алдын алу үшін спортпен шұғылданыңыз.
Арыстан
Қызықты күн болмақ. Отбасы – сіздің бар байлығыңыз. Шулы әрі, қызықты отбасылық мереке ұйымдастырасыз. Бірақ біреумен әзілдескенде абай болыңыз.
Бикеш
Көңіл-күйіңіз құбылмалы болады. Көңілшектігіңіз ұстап, көңіліңіз босайды. Ұстамды болыңыз. Сонымен қатар қарыздарыңыздан тез арада құтылуға тырысыңыз.
Таразы
Стратегиялық жоспар құруға қолайлы күн. Алдағы күндеріңізді жоспарлап, мақсатыңызға қарай бет аласыз. Тұралап қалған жұмыстарды аяқтайсыз.
Сарышаян
Таңертеңнен ерлі-зайыптылар арасында өзгелерге еліктеушілік пайда болады. Бірақ көп ұзамай өзіңіздің танытып жүрген қылығыңыздан шаршап, қалпыңызға түсесіз.
Мерген
Керемет күн. Мақсаттыңызға бір табан жақындайсыз. Достарыңыз көмек көрсететін болады. Жақын туыстарыңыз сізбен мақтанады.
Тауешкі
Нақты бір іске қаржы салсаңыз, пайдаға кенелесіз. Бірақ ең алдымен серіктестеріңіз сенімді болғанын қадағалаңыз. Күмәнді іске ақша салмаңыз.
Суқұйғыш
Отбасылық мәселелер туындап, сіз оларға мән бермеуге тырысасыз. Алайда шыдамыңыз таусылып, оларды шешуді қолға алуды жөн санайсыз.
Балықтар
Ішпыстырарлық күн. Бастығыңыз көп тапсырма беріп, оның орындалуын мұқият қадағалайтын болады. Тапсырманы жауапкершілікпен атқара біліңіз.

Жұлдыздар не дейді?

Kyzylorda-news.kz. Өткен жылы толайым табыстарға қол жеткізіп, Алматы қаласында өткен «Әлем барысы» турнирінде жүлдегер атанып, еліміздің намысын қорғадым. Бүгінгі таңда самбодан және қазақ күресінен Азия чемпионымын, Қазақстан Республикасының Ұлттық спорт түрлерінен V фестивалінің жеңімпазымын.
Әрине, жеңіс еңбексіз келмейді. Күні-түні жалықпай жаттығып, жарысқа жауаптылықпен қарау мен жаттықтырушылардың дұрыс ұйымдастыра білуінің арқасында осындай жетістіктерге қол жеткізіп отырмыз.
Сондай-ақ, ата-анам, бауырларымның да тікелей қолдауының арқасында белестерді бағындырып келемін.Сондықтан да мені спортқа жетелеп әкелген әкеме айтар алғысым шексіз.
Ендігі меже – Әлем чемпионы атанып, еліміздің абыройын асқақтату.
Барша спорт сүйер қауымды, Сыр спортшыларын, бапкерлерімді Қазақстан Республикасының Спорт күні мерекесімен құттықтай отырып, жаңа жетістіктер мен табыстар тілеймін.
Денім сау болсын десеңіз, спортпен шұғылданыңыздар, балаңыздың өмірі жарқын болсын десеңіз, спортқа баулыңыз.
Мереке құтты болсын!
Мақсат ИСАҒАБЫЛОВ,
Қазақ күресінен «Әлем барысы» турнирінің күміс жүлдегері

Мақсат Исағабылов: Арманым Әлем чемпионы атанып, еліміздің абыройын асқақтату

Kyzylorda-news.kz. Қазақстандағы COVID-19 вакцинасын құрастырушы осы күзде қазақстандықтарға коронавирусқа қарсы екпе егіле ме деген сауалға жауап берді деп хабарлайды Қазақпарат.
Журналистер қойған сұраққа Леспек Құтымбетов жауап берді. Ол COVID-19 вакцинасын жасаушы әрі оны ең алғаш болып өзіне еккен адам.
Құтымбетовтың айтуынша, вакцина адамдарда бірнеше кезеңдерде сыналады. Алдымен жануарлға тәжірибе жасалса, кейінірек ерікті адамдарға екпе салынады. ДДСҰ талаптарына сәйкес, тәжірибе жалпы 4 кезеңнен тұрады. Оның сөзінше, вакцинаны сынаудың бірінші кезеңіне тек санаулы ғана еріктілер қатысады. Бұл сатыда препараттың зияны бар-жоғы тексеріледі.
Екінші кезеңде вакцинаның иммуногендігі сыналады. Мұнда бірінші сатыға қарағанда көбірек адам қатысады.
Құрастырушының айтуынша, үшінші кезеңде мың адамға вакцина егіледі. Сондай-ақ Құтымбетов Қазақстанда қыркүйек айында бірінші кезеңнің басталатынын хабарлады. Бұл тәжірибеге 40-тан астам ерікті іріктеліп алынған.
Осы ретте журналистер маманға 2020 жылдың соңына қарай Қазақстан халқына коронавирусқа қарсы вакцина егіле ме деген сауал қойды.
БАҚ өкілдеріне жауап берген ол шешімді денсаулық сақтау министрлігі, үкімет және президент қабылдайтынын айтты. Егер бұл идея мақұлданса, Құтымбетов өзінің әріптестерімен бірге препаратты дайындап, пайдалануға беруге уәде етті.
Сонымен бірге, құрастырушының сөзінше, тәжірибеге қатысқысы келетін еріктілерге қойылатын шектеулер бар. Яғни вакцинаны сынаудың бірінші кезеңіне тек 15 пен 50 жас аралығындағылар қатыса алады. Осы ретте олардың бұрын COVID-19-бен ауырмағаны маңызды.

Қыркүйекте қазақстандықтарға COVID-19-ға қарсы вакцина егіле ме?

Kyzylorda-news.kz. 17 тамыздан бастап жұмысын бастамайтын кәсіпорындарға 42 500 теңге көлеміндегі мемлекеттік төлемді ұзарту ұсынылып отыр. Бұл туралы “Атамекен” ұлттық кәсіпкерлер палатасы басқарма төрағасының бірінші орынбасары Эльдар Жұмағазиев орталық коммуникациялар қызметінде өткен брифингте мәлімдеді, деп хабарлайды&nbsp;<a href="https://sputniknews.kz/">Sputnik Қазақстан.</a>
Қазір Ұлттық палата қазақстандық кәсіпкерлерді қолдау көрсету пакетімен қамту үшін ұлттық экономика министрлігімен келіссөздер жүргізіп жатыр.
<blockquote>
 “Біз қазір мемлекеттік төлемді ұзарту жөніндегі өз ұсыныстарымызды дайындап жатырмыз. Бүгінде қызметтің тағы бірнеше бағыты шет қалып отыр. Мысалы, караоке, тойхана және басқа да бағыттар. Біз онда қанша адам жұмыс істейтіні туралы ақпарат жинап, тексеріс жүргіземіз”, – деді “Атамекен” төрағасының орынбасары. &nbsp;&nbsp;
</blockquote>
Сонымен қатар Ұлттық палата кәсіпкерлердің кредитін кейінге қалдыру және қайта қаржыландыру, салықтарды кейінге қалдыру және жалдау ақысын төлеу мәселелерін пысықтауды ұсынады.
Эльдар Жұмағазиев 17 тамыздан бастап жұмыс істеуге тыйым салынған кәсіпкерлер саны едәуір азаятынын атап өтті.
Бұған дейін ҰКП төрағасының орынбасары Қазақстанда карантиннің салдарынан 1,3 миллион адам жұмыссыз қалғанын мәлімдеген еді.

17 тамызда жұмысын бастамайтын кәсіпкерлерге 42 500 теңге төлене ме?

<a href="https://kyzylorda-news.kz/">Kyzylorda-news.kz.</a> Бала үшін ана сүтінен асқан тағам жоқ. Алайда 4-5 айға толғаннан кейін олардың асқазаны жаңа туған кезіне қарағанда жетіліп, дами түседі. Демек сүттен өзге тағамдарды да қорыта алады және қажетсінеді. 6 айға толмаған балалардың тамақтану тәртібі қандай болуы тиіс?
• Таңда сүт; 
• Түске дейін сүтсіз ботқа (жүгері, картоп, ұнтақ ботқасы); 
• Түстен кейін сүт (ана сүті не қоспа) және езілген көкөніс (картоп, сәбіз, брокколи, кәді); 
• Кешке дейін сүт және езілген жеміс (алма, алмұрт); 
• Кешке сүт, компот.
Бір жасқа толмаған балаларға беруге болмайды:
– шұжық өнімдері; 
– кондитерлік тәттілер; 
– теңіз өнімдері; 
– тұзды, майлы ет; 
– қызыл түсті (аллергенді) жемістер мен көкөністер; 
– цитрустық, экзотикалық жемістер; 
– саңырауқұлақ; 
– жаңғақ; 
– бал; 
– чипстер; 
– газдалған сусындар.
8-10 айдан асқан балалар ана сүтінен өзге қосымша тамақ жемейтін болса мынадай келеңсіздіктер болуы мүмкін:
– қаназдық; 
– жаңа дәм мен иісті қабылдау қиынға соғады; 
– шайнауды кеш және қиындықпен үйренеді, демек ас қорытуында да мәселе туындайды; 
– тағамдық құндылықтар жетіспегендіктен, физикалық жетілуі де кешеуілдейді.
<a href="https://massaget.kz/layfstayl/Zdorove/58556/">Massaget</a>

6 айдан асқан балаға қосымша тамақ рационы

Kyzylorda-news.kz. Абайдың қара сөздеріне арналған зерттеулер көп. Әлем тілдеріне аударылған бұл туынды талай әдебиетшінің, тіл мамандары мен тарихшылардың ғылыми еңбектеріне арқау болған. Аудармашы болған соң, қара сөздерді аудару тарихына, автордың ойын өзге тілде қандай амал-тәсілдер көмегімен жеткізгеніне көбірек көңіл бөлесің. Осы сұрақ төңірегінде ізденіске кіріскен бойда, жалпы шығарма не жөнінде, мәтін қандай тақырыптар мен негізгі ұғымдарға құрылған ­деген сұрақ ­туындайды. Бұл сұраққа жауап табу үшін корпустық әдістерге жүгініп көрсе не болар еді деген ой келді. Осылайша, мен Абайдың қара сөздеріне қарапайым корпустық талдау жүргізіп көруді жөн санадым.
Корпустық талдау (лат.&nbsp;corpus –&nbsp;дене; бұл жерде&nbsp;«лингвистикалық корпус», яғни арнаулы зерттеулер жүргізуге ыңғайланған мәтіндер жинағы деген мағынада жұмсалып тұр)&nbsp;–&nbsp;тұтас бір тілдің немесе ­жекелеген автор шығармаларының лексикалық құрамын, сөз қолдану ерекшеліктерін, т.б. анықтауға мүмкіндік беретін компьютерлік әдіс.
Абай шығармаларын жинап, өңдеп, қазіргі заман талаптарына сай өз алдына бөлек ашық корпус құруға болады. Бұл&nbsp;–&nbsp;болашақтың жұмысы. Мұндағы менің корпус деп отырғаным&nbsp;– арнаулы компьютерлік бағдарламаға салынған, талдауға қажетті форматқа келтірілген қара сөздердің толық мәтіні. Ондағы тірек сөздер, яғни жиі ұшырасатын сөздер мен сөз тіркестері қандай?
Талдауға 2009 жылы Халықара­лық Абай клубы шығарған&nbsp;«Абай. Қара сөз. Книга слов. Book of Words»&nbsp;басы­лымының мәтіні алынды. Мәтіндегі сөздер саны (корпустарда бұл көрсеткішті&nbsp;сөзқолданым&nbsp;дейді)&nbsp;–&nbsp;16&nbsp;982.
Ең жиі қолданылған сөздер мен тір­кестер&nbsp;–&nbsp;адам&nbsp;(адамды, адамға, адам­­мен, т.б. сөзтұлғалары және&nbsp;адам­дық, адамшылық&nbsp;деген туынды сөздерді қосқандағы жиілігі&nbsp;–&nbsp;203),&nbsp;кісі&nbsp;(жиілігі&nbsp;–117) және&nbsp;адам баласы. Мысалы:
«Адам баласы жылап туады, кейіп өледі» (Төртінші сөз);
«Адам баласына адам баласының бәрі&nbsp;–&nbsp;дос» (Отыз төртінші сөз).
Бұдан кейін жиі ұшырасатын тірек сөзі&nbsp;–&nbsp;Құдай, Алла, Жаратушы, Құдай тағала, Алла тағала&nbsp;(жиілігі –151):
«Алла тағала&nbsp;–&nbsp;өлшеусіз, біздің ақы­лымыз&nbsp;–&nbsp;өлшеулі» (Отыз сегізінші сөз).
«Біз жаратушы емес, жаратқан көлең­кесіне қарай білетұғын пендеміз. Сол махаббат пен ғаделетке қарай тартпақпыз, сол Алланың хикметін біреуден біреу анығырақ сезбекпен артылады» (Қырық бесінші сөз).
Ғылым, білім, ғылым табу&nbsp;(жиілігі&nbsp;–&nbsp;126):
«Әуелі&nbsp;–&nbsp;білім-ғылым табылса, ондай-мұндай іске жаратар едім деп, дүниенің бір қызықты нәрсесіне керек болар еді деп іздемекке керек» (Отыз екінші сөз).
«Сол қуат жетпеген, ми толмаған ессіз бала күндегі «Бұл немене, ол ­немене?» деп, бір нәрсені сұрап білсем екен дегенде, ұйқы, тамақ та есімізден шығып кететұғын құмарымызды, ержеткен соң, ақыл кіргенде, орнын тауып ізденіп, кісісін тауып сұранып, ғылым тапқандардың жо­лына неге салмайды екеміз?» (Жетінші сөз).
Ақыл, ақыл айту&nbsp;(ақылсыз&nbsp;­деген болым­сыз тұлғасын қосып санағандағы жиілігі&nbsp;–114; басқа мағынада жұмсалып тұрған&nbsp;ақылдасу&nbsp;деген туынды формасы есепке алынбаған):
«Тегінде, адам баласы адам ­баласынан ақыл, ғылым, ар, мінез деген нәрселермен озбақ. Онан басқа нәрсеменен оздым ғой демектің бәрі де&nbsp;–&nbsp;ақымақтық» (Он сегізінші сөз).
«Кей жұрт ақыл айтарлық кісіні іздеп таба алмайды. Қылығының қылшығын танитұғын кісіден қашық жүретұғыны қалай?» (Қырықыншы сөз).
Қазақ&nbsp;(жиілігі&nbsp;–&nbsp;66):
«Осы мен өзім&nbsp;–&nbsp;қазақпын. Қазақты жақсы көрем бе, жек көрем бе? Егер жақсы көрсем, қылықтарын қостасам керек еді. Уә әрнешік бойларынан адам жақсы көрерлік, көңілге тиянақ қыларлық бір нәрсе тапсам керек еді. Соны не үміт үзбестікке, не онысы болмаса, мұнысы бар ғой деп, көңілге қуат қылуға жаратсам керек еді, ондайым жоқ» (Тоғызыншы сөз).
Мал, мал табу, мал іздеу&nbsp; (жиілігі&nbsp;–&nbsp;115):
«Ешбір қазақ көрмедім, малды иттікпен тапса да, адамшылықпен жұмсаған. Бәрі де иттікпен табады, иттікпен айрылады» (Оныншы сөз).
«Құдайдан қорық, пендеден ұял, балаң бала болсын десең&nbsp;–&nbsp;оқыт, мал аяма!» (Жиырма бесінші сөз).
Иман, иман келтіру&nbsp;(жиілігі&nbsp;–&nbsp;49):
«Әрбір ақылы бар кісіге иман ­парыз, әрбір иманы бар кісіге ғибадат парыз екен. Және де әрбір рас іс ақылдан қорықпаса керек» (Жиырма сегізінші сөз).
Ұят&nbsp;(жиілігі&nbsp;–&nbsp;29):
«Ұят деген&nbsp;–&nbsp;адамның өз бойындағы адамшылығы, иттігіңді ішіңнен өз мойныңа салып, сөгіс қылған қысымның аты» (Отыз ­алтыншы сөз).
Ұлы ақынның ой толғау, монолог түрінде жазған нақыл сөздер жи­на­ғында жиі айтылатын тірек ұғым­дары осындай. Айта кетерлігі, осы корпустық талдаудың нәтижелері Мұхтар Әуезовтің басқаруымен 1957 жылы шыққан ақынның екі томдық шығармалар жинағы ­бойынша жасалған&nbsp;Абай тілі сөздігіндегі&nbsp;(2011 жылы «Өнер» баспасынан шыққан басылым) статистикалық деректерден көп ауытқымаған. Бұл анықтамалықтан байқағанымыз (жиілігі 200, 400, 600-ден асып кететін&nbsp;алу, беру, табу, қылу, көру&nbsp;т.c.c. сөздерді санамағанда): жоғарыдағы тізімге енген тірек ұғымдар тек қара сөздерде ғана емес, жалпы Абай шығармаларында жиі кездеседі екен (мысалы:&nbsp;адам – 270,&nbsp;кісі –190, ақыл – 199, ғылым&nbsp;және&nbsp;білім – 142, Алла – 133, қазақ – 127, иман – 59, ұят – 39, мал – 214). Абай шығармаларында бұлардан басқа көп ұшырасатын сөздер:&nbsp;өмір – 113, өлу – 106, ойлау – 126, дүние&nbsp;(өмір, мүлік, жаратылыс мағынасында)&nbsp;– 145, көңіл – 215, жан – 220.
Абайдың қара сөздері жанрлық сипаты жағынан Монтеньнің «Тәжірибелер», Паскальдің «Ойлар», Ницшенің «Афоризмдеріне», баяндау формасы жағынан&nbsp;Толстойдың «Оқу шеңбері» («Круг чтения»)&nbsp;атты әйгілі діни-философиялық еңбегіне ұқсас. Толстой мен Абайдың жоғарыда аталған&nbsp;иман, дін, білім-ғылым, адамшылық&nbsp;тақырыбын қозғайтын мағыналас, үндес нақыл сөздері де бар. Сөз соңында солардан бірнеше мысал келтірейін, қабыл алыңыздар.
«Иманы жоқ адамның өмірі хайуан­ның өмірімен бірдей» (Л.Толстой. Круг чтения).
«Көкіректе сәуле жоқ, көңілде сенім жоқ. Құр көзбенен көрген біздің хайуан малдан неміз артық?» (Абай. Жетінші сөз).
«Еңбегі нәтижесіз ғалым&nbsp;–&nbsp;­жауын жаудырмайтын бұлттай» (Шығыс даналығы / Л.Толстой. Круг чтения).
«Шәкіртсіз ғалым&nbsp;–&nbsp;тұл» (Абай. Отыз жетінші сөз).
«Адамға басқаларға мейірім көрсету шарт. Сенің басқа адам­дарға мейірім танытпағаның&nbsp;–&nbsp;басты парызыңды орын­дамағаның» (Л.Толстой. Круг чтения).
«Адамға хәлінше ихсанды* болмақ&nbsp;–&nbsp;қарыз іс. Бірақ өзгелердің ­ихсанына сүйенбек дұрыс емес» [*ихсан — жақсылық, игі іс] (Отыз сегізінші сөз).
«Адамды бойындағы ақыл-білім қорына емес, сол қорды жинауға жұмсаған еңбегіне қарап бағала» ­(Лессинг/ Л.Толстой. Круг чтения).
«Адамның адамшылығы істі баста­ғандығынан білінеді, қалайша бітірген­дігінен емес» (Абай. Отыз жетінші сөз).
Ерлан Ысқақов,&nbsp;аудармашы
“Ана тілі” газеті

Қара сөздің қадіріне үңілсек…

<a href="https://kyzylorda-news.kz/">Kyzylorda-news.kz.</a> 15 тамыздағы мәліметке бойынша Қазақстанда 842 адам коронавирус індетінен емделіп шықты, деп хабарлайды &nbsp;<a href="https://www.coronavirus2020.kz/kz/kazakstanda-otken-taulikte-842-adam-koronavirus-indetinen-emdelip-shykty_a3683867">coronavirus2020.kz</a>.
Аймақтар бойынша 
Нұр-Сұлтан қаласы – 3 
Алматы қаласы – 13 
Шымкент қаласы – 3 
Ақмола облысы – 33 
Ақтөбе облысы – 174 
Атырау облысы – 19 
Шығыс Қазақстан облысы – 74 
Жамбыл облысы – 11 
Батыс Қазақстан облысы – 14 
Қарағанды облысы – 392 
Қостанай облысы – 25 
Қызылорда облысы – 6 
Маңғыстау облысы – 6 
Павлодар облысы – 28 
Түркістан облысы – 41
Қазақстан бойынша жазылғандар саны – 81 558.

Кеше Қызылордада 6 науқас коронавирустан жазылып шықты

Kyzylorda-news.kz. Құрметті спортшылар! Спорт саласының ардагерлері мен қызметкерлері! Сіздерді кәсіби мерекелеріңіз – Спорт күнімен шын жүректен құттықтаймын!
Елбасымыз Нұрсұлтан Әбішұлы Назарбаев “Спорт – елдің мерейін асырып, абыройын тасытатын сала” деп, спортқа баса көңіл бөлгенін білесіздер. Соның арқасында еліміз тәуелсіз болғалы спортшыларымыз талай байрақты бәсекелерде жеңіс тұғырынан көрініп, әлемнің түрлі спорт алаңдарында еліміздің Әнұранын асқақтатып, көк Туын аспанда желбіретті.
Спорттың адам өміріндегі орны ерекше екені сөзсіз. Спортпен айналысқан адамның денсаулығы мықты, жігерлі болады. Ойы сергек, дені сау ұрпақ – қоғам байлығы десек, дені сау ұлт қана бәсекеге қабілетті бола алары анық. Сондықтан, бұқаралық спортты дамыту – мемлекетіміздің стратегиялық дамуының басым бағыттарының бірі.
Ел Президенті Қасым-Жомарт Кемелұлы Тоқаев өзінің “Сындарлы қоғамдық диалог – Қазақстанның тұрақтылығы мен өркендеуінің негізі” атты Қазақстан халқына арнаған алғашқы Жолдауында “Барлық жастағы ел азаматтары арасында бұқаралық спортты дамыту маңызды. Спорт инфрақұрылымының балалар үшін барынша қолжетімді болуын қамтамасыз ету керек. Бұқаралық дене шынықтыруды өркендету ісі жаңа чемпиондар шыңына шығатын пирамидаға айналуы тиіс” деді.
Осы ретте, облыста дене шынықтыру және спортпен жүйелі түрде шұғылданушыларды саны 243 078 адамға жетті. «Жұмыспен қамту жол картасы» бағдарламасы аясында спорт саласы бойынша 22 жоба жүзеге асуда. Оның ішінде, 9 жаңа құрылыс жұмыстары, Қызылорда қаласындағы байдарка және каноэ есу базасы, қала және аудандарда 8 жаттығу және стритбол алаңдарының құрылыстары жүргізілуде. Мемлекеттік-жекешелік әріптестік аясында өңірде 5 дене шынықтыру кешені пайдалануға беріледі. Биыл пандемия індеті салдарынан спорт сүйер қауым көптеген спорттық жарыстарды тамашалай алмай отыр. Соған қарамастан жыл басынан бері облыс спортшылары Қазақстан Республикасының чемпионаттары мен кубоктарында 254 медаль жеңіп алса, Азия чемпионаттарында 19 медальға қол жеткізді. 5 Қазақстан Республикасының халықаралық дәрежедегі спорт шебері, 16 спорт шебері, 320 спорт шеберлігіне үміткер, 97 І разрядты спортшылар дайындалса, облыстың 670 спортшысы Қазақстан Республикасының Ұлттық құрама сапына енді.Сыр елі спорт саласына бар ғұмырын арнаған жаттықтырушыларымен мақтанады. Олардың арасында еркін күрестен ҚР еңбек сіңірген жаттықтырушысы Әбутәліп Аманов пен ауыр атлетикадан ҚР еңбек сіңірген жаттықтырушысы Велорик Пак бар. Олардың шәкірттері еліміздің атын талай халықаралық додаларда танытты.
2021 жылы Токио қаласында өтетін Олимпиада ойындарына ҚР еңбек сіңірген спорт шеберлері, балуан Дәулет Ниязбеков пен боксшы Қамшыбек Қоңқабаев жолдама алған болатын.
“Жүйріктен жүйрік озар жарысқанда” дейді халқымыз. Алдағы дүбірлі додаларда ел намысын қорғайтын Сыр спортшыларына тек жеңіс пен сәттілік тілеймін!
Сіздерді кәсіби мерекелеріңізбен тағы да құттықтай отырып, Сыр спортын дамытудағы еселі еңбектеріңіз үшін зор ризашылығымды білдіремін! Денсаулықтарыңыз мықты, шаңырақтарыңыз шуақты болсын! Жеңісті күндеріміз көп болсын! Тәуелсіз Қазақстан спорты жасай берсін!

Гүлшара Әбдіхалықова Сыр спортшыларын құттықтады

<a href="https://kyzylorda-news.kz/">Kyzylorda-news.kz.</a> Спорт күні – Қазақстан Республикасының Тұңғыш Президенті Нұрсұлтан Назарбаевтың 2003 жылдың 15 қарашасындағы Жарлығына сәйкес тамыз айының үшінші жексенбісінде атап өтіледі.
Спорт саласы Қазақстанда кең қолдауға ие. Елде спорттың дамуына бұқаралық спорт қозғалысын кеңейтуге, спорттағы жетістіктерді ынталандыруға бағытталған саясат ықпал етуде.
Қазақстандық спортшылар соңғы онжылдықтарда халықаралық жарыстарда, Олимпиада ойындарында үздік нәтижелерді көрсетіп келеді. Мемлекеттің өзі беделді халықаралық жарыстарды өткізетін орынға айналуда. Бұл Қазақстанда спорт мәдениетінің жоғары деңгейде дамуының әлемдік мойындалуын көрсетеді.
Биыл елімізде Дене шынықтыру және бұқаралық спортты дамыту жөніндегі 2020-2025 жылға арналған кешенді жоспары әзірленді. Бұл жоспарда мүдделі мемлекеттік органдардың, жергілікті атқарушы органдардың ұсыныстары толық ескерілiп, ҚР Премьер-Министрімен бекітілді.
Кешенді жоспар 34 тармақ пен 5 негізгі бағыттан тұрады: нормативтік-құқықтық қамтамасыз ету, мектеп және студенттік спорт, спорт желілерін кеңейту, салауатты өмір салтын насихаттау және кеңінен тарату, спорттық-бұқаралық іс-шаралары.
Бұқаралық спортты дамыту, сондай-ақ дене шынықтырумен және спортпен шұғылданатындардың санын арттыру мақсатында кешенді жоспарда негізгі бағыттар бойынша Қазақстан Республикасының 8 заңнамалық актісіне 33 түзету енгізе отырып, бұқаралық спорт жөніндегі заң жобасы Мәжіліске енгізілді.
<a href="https://lenta.inform.kz/kz/bugin-elimizde-sport-kuni_a3683919">ҚазАқпарат</a>

Бүгін елімізде &#8211; спорт күні

Kyzylorda-news.kz. Облыс бойынша шектеу шараларды, оның ішінде карантинді кезең-кезеңімен жеңілдету туралы Қызылорда облысының Бас мемлекеттік санитариялық дәрігерінің №20 Қаулысы жарық көрді. Бұл туралы Өңірлік коммуникациялар қызметінің ақпараттық алаңында өткен брифингте Қызылорда облысының Бас мемлекеттік санитариялық дәрігері Әлия Мүтәліпқызы мәлімдеді.
<blockquote>
 «Меншік нысанына қарамастан барлық жұмыс жасап тұрған және кезең-кезеңімен іске қосылған салалар мен нысандарда күшейтілген санитариялық-дезинфекциялық режимді және ҚР Бас мемлекеттік санитариялық дәрігерінің қолданыстағы қаулыларымен бекітілген санитариялық-эпидемиологиялық, санитариялық-дезинфекциялық ережелер алгоритмдерін басшылыққа алып жұмыс жасалынады»,-деді Әлия Мүталіпқызы
</blockquote>
«Осы қаулы 2020 жылдың 17 тамыз 00 сағат 00 минуттан бастап күшіне енеді. Олардың қатарында бірнеше шектеу және карантиндік шараларға жеңілдіктер енгізілді.
Атап айтқанда :
<ul>
<li>сауда-ойын-сауық орталықтары мен сауда нысандары (бутиктер), сауда желілері жұмысына (толтырылуын 30% -дан асырмай, 1 адамға 4 ш.м. болу) сағат 09.00 ден 21.00-ге дейін;</li>
<li>сұлулық салондарының, шаштараз, СПА орталықтар және косметологиялық қызмет көрсететін орталықтар жұмысына (алдын ала жазылу бойынша, 1 адамға шаққанда 4 ш.м. болу) сағат 09.00 ден 19.00-ге дейін;</li>
<li>меншік нысанына қарамастан балалар коррекция, балалар және ересектерге арналған білім беру орталықтарының қызмет көрсетуіне (5 адамнан аспайтын топтармен, алдын ала жазылумен);</li>
<li>меншік нысанына қарамастан балабақшалардың кезекші топтарына (15 баладан асырмай);</li>
<li>ашық алаңдағы аттракциондар жұмысына сағат 10.00 ден 22.00-ге дейін;</li>
<li>фитнес орталықтарының (бассейінсіз), тренажер залдары (орталықтары), спорттық-сауықтыру орталықтарының (үйірмелер, секциялар т.б.) жұмысына (1 адамға 5 ш.м. дейін болу, толтырылуын 50% -дан асырмай, алдын ала жазылумен) сағат 09.00 ден 20.00-ге дейін;</li>
<li>қоғамдық монша, сауна (бассейінсіз, толтырылуын 50% -дан асырмай, 1 адамға 4 ш.м. болу) жұмысына сағат 09.00 ден 22.00-ге дейін;</li>
<li>ашық алаңда жеке және топтық жаттығуларға (5 адамнан аспай) сағат 09.00 ден 21.00-ге дейін;</li>
<li>әлеуметтік қашықтықты сақтай отырып Ұлттық құрама, клуб командаларына спорттық жаттығулар өткізуге (30 адамнан асырмай, байланыссыз термометрия, спорттық базаларда тұру);</li>
<li>облыс, аудан орталықтарындағы қоғамдық көліктің жұмысына сағат 07.00-ден 22.00-ге дейін шектеумен (пик сағаты уақытта автобустар санының көбейту, кондуктордың болуы, соңғы аялдамада дезинфекциялық тазарту, барлық есіктерді ашу, жолаушылар саны көліктегі орындар санына сәйкес болу керек);</li>
<li>қоғамдық орындарға (демалыс саябақтары, саяжолдар, субұрқақтар, жағалаулар және басқа демалыс орындары) 3 адамнан аспайтын топтармен немесе бір отбасы мүшелеріне әлеуметтік қашықтықты сақтай отырып баруға сағат 10.00 ден 22.00-ге дейін;</li>
<li>жабық азық-түлік және азық-түлік емес базарларының қызметіне 1 адамға 4 ш.м. дейін болу, толтырылуын 30% -дан асырмай сағат 09.00 ден 18.00-ге дейін;</li>
<li>ұжымдық іс-шараларды өткізбей, ашық ауадағы және үй-жайда 30-дан аспайтын отыратын орын орната отырып, қоғамдық тамақтану объектілерінің қызметіне сағат 10.00 ден 23.00-ге дейін;</li>
<li>халыққа қызмет көрсету орталықтарының, сондай-ақ мамандандырылған ХҚКО жұмысына тек алдын ала Egov.kz, EgovKZBBot 2.0 телеграмм-ботпен брондау арқылы сағат 9.00 ден 17.00-ге дейін;</li>
<li>қызметті барынша онлайн форматта көрсету арқылы «Қазпочта» АҚ-ның жұмысына сағат 9.00 ден 17.00-ге дейін;</li>
<li>Қазақстан Республикасы Ұлттық Банкінің және Қазақстан Республикасы Қаржы нарығын реттеу және дамыту агенттігінің актісіне сәйкес уақыты және саны бойынша шектей отырып, қаржы нарығы субъектілерінің қызметіне;</li>
<li>халыққа байланыссыз қызмет көрсету (автомобиль жуу, автомобильдерді, тұрмыстық техниканы жөндеу және т.б.) объектілердің қызметіне сағат 10.00-ден 20.00-ге дейін;</li>
<li>аймақтау талаптарын сақтай отырып медициналық орталықтардың (жазылу бойынша) қызметіне»</li>
</ul>

Қазақстан және Қызылорда облысының жаңалықтары

Қазақстанда карантин жеңілдетілді

17 тамызға арналған ауа райы болжамы

Жұлдыздар не дейді?

Мақсат Исағабылов: Арманым Әлем чемпионы атанып, еліміздің абыройын асқақтату

Қыркүйекте қазақстандықтарға COVID-19-ға қарсы вакцина егіле ме?

17 тамызда жұмысын бастамайтын кәсіпкерлерге 42 500 теңге төлене ме?

6 айдан асқан балаға қосымша тамақ рационы

Қара сөздің қадіріне үңілсек…

Кеше Қызылордада 6 науқас коронавирустан жазылып шықты

Гүлшара Әбдіхалықова Сыр спортшыларын құттықтады

Бүгін елімізде – спорт күні

Қызылордада карантиндік шаралар жеңілдетілді

Қазақстан және Қызылорда облысының жаңалықтары

Қазақстанда карантин жеңілдетілді

17 тамызға арналған ауа райы болжамы

Жұлдыздар не дейді?

Мақсат Исағабылов: Арманым Әлем чемпионы атанып, еліміздің абыройын асқақтату

Қыркүйекте қазақстандықтарға COVID-19-ға қарсы вакцина егіле ме?

17 тамызда жұмысын бастамайтын кәсіпкерлерге 42 500 теңге төлене ме?

6 айдан асқан балаға қосымша тамақ рационы

Қара сөздің қадіріне үңілсек…

Кеше Қызылордада 6 науқас коронавирустан жазылып шықты

Гүлшара Әбдіхалықова Сыр спортшыларын құттықтады

Бүгін елімізде &#8211; спорт күні

Қызылордада карантиндік шаралар жеңілдетілді

Бүгін елімізде – спорт күні