<a href="https://kyzylorda-news.kz/">Kyzylorda-news.kz</a>.&nbsp;Бексұлтанның биігі елінің сүйіспеншілігінде Алаштың анасы атанған Сыр бойы, оны ішінде ежелден өнер сүйген, табиғатынан әнге әуез, жырға құмар Жаңақорған өңірі ел мәдениеті мен әдебиетін, өнерін өрге бастырған танымал дара тұлғалардан кенде емес. Соның бірі – республикаға еңбегі сіңген мәдениет қызметкері композитор – Бексұлтан Байкенжеев.
«Құлақтан кіріп бойды алар, 
Жақсы ән мен тәтті күй. 
Көңілге түрлі ой салар, 
Әнді сүйсең менше сүй»- деп ұлы Абай атамыз ән мен жырдың құдыреттілігін қалай бейнелеген десеңізші. Сырдың топырағы мен шөңге, тікенегіне аяғын тілгілеп өскен Бексұлтан ән мен жырды Абай атасынан кем сүйген емес. Содан болар ол 450-ге жуық ән жазса, оның 80-нен астамы бұл күндері кең байтақ егеменді еліміздің ауыл кештерінде болсын сахна төрінде болсын асқақ сезіммен орындалып келеді, – деп еске алады ағаның өнердегі әпкесі Жақсыгүл Бегманова.
Иә, қамшының сабындай ғана қысқа ғұмырында үлкен шыңдардан көрініп, бірталай өнерпаздың өнер әлемінде қанаттануына жол ашқан, талайлардың сүйікті әншісіне айналған сазгер Бексұлтан Байкенжеев көзі тірі болғанда биыл 70 жасқа толар еді. Зымырап өтіп жатқан күндер-ай десеңізші. Уақыт адамзаттың еншісіне берілген ғанибет десек, Алланың әркімге өлшеп берілген уақытынан бөлек бір минутқа болса да мына фәниде қалу бұйырмаған. Бірақ тиесілі өміріңді өнегелі пайдалану ең басты парыз.
Жаңақорған ауданына қарасты Қосүйеңкі ауылында 1949 жылы қараша айының 11-інде дүниеге келген Бексұлтан 1966 жылы аудандағы №51 орта мектепті аяқтап, Қызылорда қаласындағы Гоголь атындағы Педагогикалық Институтының музыка факультетіне түсіп, оны 1972 жылы тәмамдайды. Сол уақыттағы ауданның бірінші хатшысы Ғафур Мұхаммеджанов жатақхана болып салынған ғимаратты «Әлшекей күйші» атындағы өнер мектебіне айналдырып, Бексұлтанды аталмыш мектепке директорлық қызметке тағайындайды. Ол өмірінің соңына дейін осы қызметті абыроймен атқарады. Сонымен қатар аудандық мәдениет үйі жанындағы драма үйірмесінің белсенді мүшесі болды. Кезінде С. Субханбердиннің «Айгүл», Б. Майлиннің «Талтаңбайдың тәртібі», Т.Нұрмағанбеттің «Кімге тартқан», Қ. Тұрсынқұловтың «Кәпірзада»,О. Бодықовтың «Ар азабы» атты пьесаларында басты рөлдерде ойнап, көрермен көңілінен шыға білді.
Айта кететіні, Қызылорда облысына белгілі «Сыр сұлуы», «Нұргүл» ән-би ансамбльдерінің құрамында әнші ретінде Болгария, Германия, Ресей елдерінде Мәскеу, Кишинев, Нүкіс, Алматы, Шымкент, Тараз қалаларында болып өнер көрсеткен. Халық шығармашылығы бүкілодақтық Фестивальдарының лауреаты атанып, бірнеше мәрте құрметті атақтарға ие болды. Сол уақытта әндері бірнеше ән жинаққа енді. Кеңестік заманда мұның бәрі оңай шаруа емес еді.
Сансыз жылдарды артқа тастаса да, халық талғамынан ойып орын алған туындылары «Құда болып жүрейік», «Ақбаян», «Ақ гүлім», «Ақ Шолпан» т.б әндері қашанда ел құлағында жаңғырып тұрары сөзсіз. Неліктен әндерінің алдына «Ақ» пен «гүлден» басқа теңеу таппаған деп ойларсыз. Себебі, ақынның анасының есімі Ақнұр болғандықтан екен. Сондықтан болар әндерінің алдында «ақ» сөзінің тіркесіп жүруі Аға үшін заңдылыққа айналыпты. Сахна саңлақтары белгілі әншілер З.Қойшыбаева, М.Ералиева, В.Қармысова, Л.Төлешева, Б.Маханбетова, тағы да басқалардың орындауынан осы әндердің танымалдығы арта түсті.
Сыр жұртшылығына ғана емес, жүрегі өнер деп соғатын ән сүйер қауымның сүйікті әніне айналған «Ақ гүлімнің» шығу тарихын білесіз бе? Жасыратыны жоқ әнін, сөзін елітіп шырқағанымызбен қашан, қалай дүниеге келгені беймәлім. Үлкен ұлы Әбсұлтанның айтуынша, әкесі ақын Адырбек Сопыбековпен тығыз байланыста жұмыс жасапты. Бірде екеуіне әйелдер қауымына арнап өлең жазу міндеттеледі. Сөйтіп бірі сөзін, екіншісі әнін жазуға кірісіп кетеді. Нәзікжандыларға ән жазу өте қиын екенін екеуі де жақсы біледі. Өйткені қыз-келіншек бойындағы сұлулықты төрт-бес шумаққа сыйғызу мүмкін емес еді. Содан арада бір апта өткенде қайта кездескен ақын мен композитор іштен шыққан төл туындыларын ортаға салып, нәтижесі керемет сезімге толы дүние болатынына сенеді. Міне, осылайша біздер айтып жүрген «Ақ гүлім» әні Қызылорда қаласындағы қазіргі Қорқыт ата университетінің залында әйелдер мерекесінде алғаш тұсауы кесіліп, тыңдарманға жол тартқан болатын, – деп сағынышпен еске алып әннің шығу тарихына тоқталып өтті.
Айта кететіні, ең соңғы әні «Сағынып жүрші» екен. Өмірден өтерін сезгендей бір апта бұрын әнiн шығарып “Сағынып жүршi” деген тақырыбын өзi берiп, соңғы өлең сөзiн де қиылып отырып Адырбекке жаздырыпты. “Жазбады ауруымды емшi демi, Көңiлiм ештеңеге көншiмедi. Жанымды түсiнетiн өзiң едiң, Сағынып айналайын, айналайын жүршi менi”, – деп жүрек қалауын қағазға түсіріп, Адырбекке айтып берiп, елiне, достарына, сүйгенiне, жанұясына, аманаттап тастап кеткен ән сияқты көрініпті. Әндi тыңдауын тыңдаса да, соңынан мең-зең болып тiрлiк кешкен Адырбек ақынның, Бексұлтан қазасында. “…Бұл өмiр әнсiз ендi қала ма екен, Кiмге тастап барасың баяныңды” – деп Жаңақорған төңiрегiн тiршiлiгiнде ән мен жырға бөлеген әнші iнiсiне жоқтау айтады. Перiште бейне, пәк көңiл Бексұлтанның рухани ұстазы, белгiлi халық ақыны Манап Көкенов болды. Екеуi қатарласып ел аралап сахнаға шыққанда, сол концерттi көрген де арманда, көрмегенде арманда болатын. «Ұстазы мықтының ұстамы мықты» демекші, есімін бүкіл ел қадірлеген халық ақыны Манап Көкеновтен тәлім-тәрбие алған әнші-компазитор қабілет-қарымын дамытуда үнемі ұстазымен ақылдасып отырған көрінеді. Ол кісінің де өнеріне өз заманында лайықты баға берілді және жылдар өткен сайын манаптану мектебінің мәртебесі де биіктей түсуде. Ол кісінің өнері, еңбегі туралы айта отырып, біз онымен мақтанатын ұрпақтың қатарынан екенімізді мақтан тұтамыз.
Гастрольдік сапарда жүріп танысқан жары Шәрбану екеуінен бүгінде 4ұл 1 қыз ұрпақ өрбітуде. Ат тұяғын тай басар демекші, үлкен ұлы Әбсұлтан аудандық М. Көкенов үйінде әке жолын жалғаса, қалған ұрпағы ұстаздық жолда қызмет етеді.
Жайдары мінезімен кез келген жанды өзіне баурап алатын қасиет қонған өнер иесінің жүзі мейірім мен жылулыққа толы болғаны, баяғы сал-серілердің жолын жалғастыруда өз мамандығының қас шебері екендігі, көмейіне бұлбұл ұялаған әнші әуезді әндерді жоғары деңгейде орындап қана қоймай, сазгерлік және ақындық қабілеттерімен көпшілікті қуанта білгені рухани күш береді.
Гүлнар АБДИШЕВА, 
Әлшекей атындағы өнер мектебінің, 
домбыра сыныбының мұғалімі, 
домбыра бөлімінің жетекшісі

Сазгерлік қабілетімен көпшілікті қуанта білген ақын

*<a href="https://kyzylorda-news.kz/">Kyzylorda-news.kz</a>. Биыл Тәуелсіздігіміздің 30 жылдығы мерекесіне орай облыстық басқармалар мен салалық мекемелермен «Рухани жаңғыру» бағдарламасы және «Тәуелсіздік бәрінен қымбат» мақаласы негізінде «Сыр жұрты» танымдық-пассионарлық жобасы әзірленді.*
Жоба «Сыр саңлақтары», «Туған жер – тұнған шежіре», «Тал бесіктен – жер бесікке дейін», «Сыр елі – Жыр елі», «Сыр өңірі – ұлттық құндылықтардың темірқазығы» секілді 5 бағыттан тұрады. Мұндағы басты мақсат өңірдің тарихи-саяси және мәдени-рухани даралығын айшықтап, өскелең ұрпаққа тәуелсіздіктің құндылығын ұғындыру. Жоба алдағы 3 жылға жоспарланған.
<blockquote>
 “Жобаға енгізілген бес бағыттың өзіндік ерекшеліктері бар. Біз түркі жұртына ортақ тұлға Қорқыт атадан бастап, Сырда өмір сүрген тарихи тұлғалар туралы телехабарлар дайындап, ғылыми ізденіс жұмыстарын жүргізіп, тарихи орындарға экскурсиялар ұйымдастырмақпыз. Салт-дәстүрлер мен әдеп-ғұрыптарды, тәрбие дағдыларын, дәстүрлі отбасы құндылықтарын, салауатты өмір салтын насихаттаймыз. Жастар арасында жыршы-жыраулық, ақындық, күйшілік және орындаушылық өнерді насихаттауға қолдау білдіреміз. Мәдениеттанушылар, тарихшылар, философтар мен әлеуметтанушы мамандардың қатысуымен лекторийлер, зиялы қауым өкілдерімен кездесулер, сұхбаттар ұйымдастыру секілді түрлі форматты шаралар өтетін болады”, – деді облыс әкімінің орынбасары Серік Ахмет.
</blockquote>
Жалпы жобаның бірінші кезеңі яғни, 2021 жылы түрлі форматта 113 шара ұйымдастыру жоспарланған.

«Сыр жұрты» танымдық-пассионарлық жобасы жүзеге асырылады

<a href="https://kyzylorda-news.kz/">Kyzylorda-news.kz</a>. Қазақстан Республикасының Тәуелсіздігіне орай ел президенті Қасым-Жомарт Тоқаевтың «Тәуелсіздік бәрінен қымбат» мақаласы жарияланған болатын.
Қызылорда облыстық зағип және нашар көретін азаматтарға арналған арнаулы кітапханасының кітапханашысы, І топ көз мүгедегі Ақмарал Нүрлиева зағип жандар үшін осы мақаланы брайль қарпінде жазып шықты. Ол өзі секілді мүмкіндігі шектеулі жандардың сұранысы сәйкес осы еңбекті жасағанын айтады.
<blockquote>
 “Мүмкіндігі шектеулі жандар да ел жаңалықтарынан, мемлекеттің саясатынан хабардар болғысы келеді. Олар да өз хәлдерінше Тәуелсіз мемлекетіміздің дамуына үлестерін қоспақ ниетте. Сол мақсатта маған Президент мақаласын оқу үшін брайль қарпінде жазуымды өтінді. Мен бұл ұсынысты қуана қабылдадым, – деді Ақмарал Нүрлиева.
</blockquote>
Сондай-ақ арнаулы кітапхана жанындағы дыбыс жазу студиясы мақаланың дыбыстандырылған нұсқасын дайындап, тыңдармандарына ұсынды. Оқырмандар кітапхана қоры құнды дүниелермен толыққанына қуанышты.
<img src="https://kyzylorda-news.kz/wp-content/uploads/2021/02/whatsapp-image-2021-02-12-at-11.27.10-1.jpeg" alt="" />

Қызылордада Президент мақаласы Брайль жүйесінде жазылды

<a href="https://kyzylorda-news.kz/">Kyzylorda-news.kz</a>. Қызылордалық полицейлер бір тәулік ішінде жоғалған 72 бас жылқыны иесіне тауып берді. &nbsp;&nbsp;&nbsp;&nbsp;&nbsp;&nbsp; &nbsp;
11 ақпан &nbsp;күні облыс орталығының тұрғыны жайылымда жүрген&nbsp;72 бас жылқысының жоғалғаны туралы&nbsp;полицияға хабарлама түсірген.
Аталған хабарлама бойынша, Ақсай Пб-нің барлық жеке құрамы жұмылдырылып, тиісті бағыт-бардар беріле отырып, барлық елді мекендердегі шаруа қожалықтары, жайылымдық жерлер мен шалғайлар толығымен араланып,&nbsp; нәтижесінде учаскелік полиция инспекторларымен жоғалған жылқылар табылып, иесіне тапсырылды.
Қалалық Полиция басқармасының басшылығы халыққа жеке қосалқы шаруашылықтардағы малдың сақталуына бақылауды күшейтуді сұрап, азаматтарды қырағылық танытуға, жайылымдарда үй малын қараусыз қалдырмауға, сондай-ақ оны бейтаныс адамдарға жаюға сенбеуге шақырады. Егер сіз мал ұрлығының құрбаны немесе куәгері болсаңыз, дереу полицияға «102» телефоны немесе жаңа мобильді қосымшасы арқылы хабарласуыңызға &nbsp;болады.

Қызылордалық полицейлер 72 бас жылқыны иесіне тауып берді

<a href="https://kyzylorda-news.kz/">Kyzylorda-news.kz</a>. Қызылорда облысы бойынша Қылмыстық-атқару жүйесі департаменті қызметкерлері мұқтаж жандар үшін қан тапсырып, қайырымды іс жасады.
Департаменттің 10 қызметкері донорлық қанға мұқтаж жандарға көмектесіп, өмірлерін құтқаруды мақсат етіп Қызылорда облыстық қан тапсыру орталығына келді.
Игі іске қатысушылар ең алдымен медициналық тексеруден өтті.
<blockquote>
 «Бір донор – бір өмір» деп бекер айтылмаса керек. Осы іс-әрекетіміз біреудің анасының, әкесінің, баласы немесе ағасының өмірін құтқарып қалатынына сенімдіміз. Барлық азаматтарды осындай қайырымды іс жасап, көмекке мұқтаж жандарға көмектесуге шақырамыз», – деді департамент бастығының орынбасары әділет полковнигі М.Нәкенов.
</blockquote>
Айта кетерлік жайт, мұндай акция ҚАЖД қызметкерлері үшін игі дәстүрге айналған және жүйелі түрде өткізіліп отырады.

Қызылордада ҚАЖ қызметкерлері мұқтаж жандар үшін қан тапсырды

<a href="https://kyzylorda-news.kz/">Kyzylorda-news.kz</a>. Қазақстанда ауа температурасының жоғарылауы күтілуде, деп хабарлайды Қазгидромет.
Синоптиктердің мәліметінше, мәскеу аудандарынан келетін циклон республиканың батыс және солтүстік аймақтарына ауысуды жалғастыруда.
<blockquote>
 “Оның келуімен жаңбыр мен қар түрінде жауын-шашын, ауа температурасының жоғарылауы, сондай-ақ жаяу бұрқасынмен желдің күшеюі күтіледі. Ел аумағының қалған бөлігі жоғары қысым аясында болады, осыған байланысты, көбінесе, жауын-шашынсыз ауа райы күтіледі. Республика бойынша кей жерлерде тұман, көктайғақ күтіледі”, – делінген хабарламада.
</blockquote>

Қазақстанда ауа температурасы көтеріледі

<a href="https://kyzylorda-news.kz/">Kyzylorda-news.kz</a>. 2023 жылға қарай педагогтердің айлығы екі есе өсіп, 330 мың теңгеден асады. Бұл туралы премьер-министр Асқар Мамин мәлімдеді, деп хабарлайды&nbsp;<a href="https://sputnik.kz/">Sputnik Қазақстан</a>.
<blockquote>
 “Педагогтердің жалақысы 2023 жылға қарай 2 есе, 330 мың теңгеден асатын болады. Орташа жалақы жыл сайын кемінде 25 процент өседі”, – деді Мамин мәжілістегі Nur Otan фракциясының кеңейтілген отырысында сайлауалды бағдарламаны жүзеге асыру бойынша Жол картасының жобасын таныстырып.
</blockquote>
Айтуынша, 2023 жылға қарай білім беру жүйесі білікті мұғалімдермен 100 процент қамтылады.
Бұдан бөлек, 3-6 жас аралығындағы балалар мектепке дейінгі тәрбиемен және оқытумен толық қамтылады. 
Апатты және үш ауысымды мектептер мәселесін толық шешу үшін 800 мектеп салынады. Биыл 200 жаңа мектеп пайдалануға беріледі.
2025 жылы ауыл мектептері интернетке қосылады, сондай-ақ компьютерлермен және оқу процесін ұйымдастыруға қажет басқа жабдықтармен қамтамасыз етіледі.
Жол картасы сайлауалды бағдарламаның төрт бағыты бойынша 362 іс-шарадан тұрады:
<ul>
<li>бірінші – “Баршаға тең мүмкіндік”;</li>
<li>екінші – “Зияткер, саламатты және ыждағатты ұлт”;</li>
<li>үшінші – “Экономика мен өңірлердің тұрақты дамуы”;</li>
<li>төртінші – “Халыққа есеп беретін мемлекет және жауапты азаматтар”.</li>
</ul>

Мамин кімдердің жалақысы 330 мың теңгеден асатынын айтты

<a href="https://kyzylorda-news.kz/">Kyzylorda-news.kz</a>. Қызылорда гарнизонындағы Қызылорда қаласы қорғаныс істері жөніндегі басқармасының Қызылорда қаласы білім бөлімінің И.В.Панфилов атындағы №5 мектеп-лицейіне жауапты офицері мектеп түлектерімен əскери оқу орындарына түсу жолдары бойынша кəсіптік бағдар беру жұмыстарын жүргізді.
Мектептегі кездесу кезінде Қызылорда қаласы қорғаныс істері жөніндегі басқармасының өкілі мен мектептегі алғашқы əскери дайындық пəнінің мұғалімімен бірлесе əскери оқу орындарына оқуға қалай түсу жолдары, қабылданатынын құжаттары мен қай уақыт аралығында оқуға тапсыруға болатындығы түсіндірілді. Қажетті мəліметтерді ойларына түйген мектеп оқушыларына ҰБТ-да қанша ұпай жинап, əскери оқуға қатысты қандай пəнді таңдау туралы да айтылды.
<blockquote>
 «Еліміздің əскери оқу орындарында білім алып жүрген Сыр елінің азаматтары аз емес. Олармен жолығып, сөйлесу кезінде сол оқып жүрген азаматтардан оқу барысының өте қызықты əрі жоғары екенін жиі естиміз. Керекті білім алу үшін барлық жағдайлар қамтамасыз етілген. Әскери институтты бітірген түлектер мамандықтарына сай жұмыстармен қамтамасыз етіледі», – деді Қызылорда қаласының ҚІЖБ бастығының тəрбие жəне идеологиялық, əскери-патриоттық жұмыстары жөніндегі орынбасары, аға лейтенант Бағдат Ахимбеков.
</blockquote>
Əскери оқу орындарына түсу жолдары бойынша кəсіптік бағдар беру жұмыстары осы жылдың наурыз айының соңына дейін жалғасады. Моральдық-психологиялық жай-күйі мен дене дайындығынан жоғары нəтиже көрсеткен, ҰБТ-дан ең азы 50 балл, оның ішінде таңдалған математика мен физика пəндерін кемінде 7 балл жинап жəне медициналық тексеруден сау өткен үміткерлер Құрлық əскерлердің Əскери институты мен Əуе қорғанысы күштерінің əскери институтына жəне Радиоэлектроника жəне байланыс əскери инженерлік институтына және т.б. əскери оқу орындарына оқуға түсе алады.
Соңғы жылдары Қызылорда облысында Қорғаныс министрлігінің əскери оқу орындарына түсуге өтініш білдірген азаматтардың саны артып келеді.
<img src="https://kyzylorda-news.kz/wp-content/uploads/2021/02/img_20210201_003119_451-1.jpg" alt="" />

Қызылордада оқушыларға әскери оқу орындарына түсуге бағдар берілді

<a href="https://kyzylorda-news.kz/">Kyzylorda-news.kz</a>. Электронды форматта іс жүргізу жүйесінің ерекшелігі неде? Бұл сұраққа Қызылорда облысының Полиция департаменті Тергеу басқармасының бастығы полиция полковнигі Әбдібек Жаназаров жауап берді.
«Цифрлы Қазақстан» бағдарламасының негізінде «Қазақстан Республикасының кейбір заңнамалық актілеріне құқық қорғау қызметінің процестік негіздерін жаңғырту мәселелері бойынша өзгерістер мен толықтырулар енгізу туралы» Қазақстан Республикасының 2017 жылғы 21 желтоқсандағы Заңының шеңберінде 2018 жылдың 1 қаңтарынан бастап Қазақстанда қылмыстық істерді тергеу санаттарына қарай кезең-кезеңімен электронды форматта жүргізуге көшірілді.
Электронды қылмыстық істің ерекшелігі:
Біріншіде, цифрландыру саласындағы жаңа технология қылмыстық процестер жеңілдетеді, олардың мерзімі қысқарады, сондай-ақ сапаны жақсартып, шығындарды қысқартады (мысалы: тергеу әрекеттері жеңілдетіледі, қаншама қағаз үнемделеді, қылмыстық істі зерделеу жолдауға, оны кері алуға бұрынғыдай біршама уақыт алмайды).
Екіншіден, сыбайлас жемқорлық сипаттағы тәуекелдікке, яғни бұрмалаушылыққа жол берілмейді, қылмыстық істің қозғалуынан бастап сотқа жолдануына дейінгі қылмыстық процестің айқындылығын қамтамасыз етеді, қылмыстық істердің жоғалуына жол берілмейді.
Үшіншіден, аналитика күшейеді. Әрбір іске терең қарап, дұрыс практиканы қалыптастыруға мүмкіндік беріледі (мысалы:рұқсаты бар басшы (жетекші) кажетті істі қарап, зерделей алады. Тиісті баға бере алады).
Төртіншіден, жәбірленуші, айыпталушы, адвокат істің қалай қаралып жатқанын кез келген уақытта онлайн режимде көре алады.
Бесіншіден, электронды шағымдар модулі жұмыс істей бастайды.
Сондай-ақ, электрондық қылмыстық істің басқа артықшылығы қашықтан санкциялау болып саналады. Енді тергеп қамаққа алғанды оған бұлтартпау шарасын белгілеу үшін біршама ара-қашықтықта апарудың қажеті жоқ. Санкциялау үрдісі бейне-конференц байланыс режимінде өтетін болады. Бұл уақыт шығындарын қысқарту, қашу тәуекелдерін жоюға мүмкіндік береді. Сотпен санкцияланатын тергеу әрекеттері де электронды жүргізіліп, уақыт үнемделеді.
Бастысы, қылмыстық істі сотқа дейінгі тергеп-тексеру өкілеттігі бар қызметкерлерді қылмыстық істі тергеуде тәртіп қалыптастырады. Себебі, электрондық форматта қылмыстық істерді тергеу әрекеттерін уақытылы орындап, оны СДТБТ базасындағы «е-ҚІ» модулінің жүйесіне уақытылы енгізілмесе, оны өзгертуге жол берілмейді. Қандай да бір процестік құжаттарды уақытылы енгізу талап етіледі.
Осы мақсатта, Қызылорда облысы Полиция департаменті бойынша электронды форматта қылмыстық іс жүргізуге мүмкіндік беретін 266 жұмыс орнымен (орг.техника) қамтамасыз етілген. 2020 жылы Қызылорда облысы ПД-нің бөліністерінің жалпы өндірісінде болған қылмыстық істердің 71 пайызы, яғни 3827 қылмыстық іс электронды форматта жүргізіліп, оның 65 пайызы, яғни 2487 қылмыстық іс өндірістен аяқталған.
Қазіргі таңда барлык істердің 83,2 пайызы электронды түрде жүргізілуде.
Сонымен қатар, 2021 жылдың 1 қаңтарынан бастап күшіне енген «Қазақстан Республикасының кейбір заңнамалық актілеріне қылмыстық іс жүргізу және сыбайлас жемқорлыққа қарсы іс-қимыл кезінде азаматтардың құқықтарын қорғауды күшейту мәселелері бойынша өзгерістер мен толықтырулар енгізу туралы» Қазақстан Республикасының 2017 жылғы 21 желтоқсандағы Заңының шеңберінде сотқа дейінгі тергеп-тексеру нәтижесімен тоқтатылған немесе мерзімі үзілген қылмыстық істер бойынша қабылданған шешімдерді қадағалаушы орган бақылап отырады. Қысқа мерзімде шешім қабылданып, қылмыстық істердің созбалаңға салынуына жол берілмейді.
Қолданысқа енгізілген жаңа Заң аясында прокуратура органдарымен ағымдағы жылдың қаңтар айында 412 процестік шешімдер келісіліп, 16 процестік шешімдердің күші жойылған.
Болашақта бұл процесс, яғни электронды форматта іс жүргізу жүйесі азаматтардың қылмыстық құқық бұзушылық туралы шағымдары мен хабарламары тіркелгеннен бастап жүзеге асатын болады.

Электронды форматта іс жүргізу жүйесінің маңызы зор

<a href="https://kyzylorda-news.kz/date/2021/02/12/">Kyzylorda-news.kz.</a> Қызылорда облысында 7 ұрлық жасаған жасөспірім сот үкімімен 2 жылға ерекше режимде ұстайтын білім беру ұйымына жіберілді.
2004 жылы туған жасөспірім Қызылорда қаласында үй-жайлардан, қоймалардан, автокөліктерден барлығы 7 ұрлық қылмысын жасағандығы анықталды. Қызылорда қалалық Полиция басқармасымен тергеп-тексеру амалдары аяқталып, тиісті шешім қабылдау үшін облыстық кәмелетке толмағандардың істері жөніндегі мамандандырылған ауданаралық сотына жолданған.
Сот үкімімен кәмелетке толмаған сотталушы Қазақстан Республикасы Қылмыстық кодексінің 188-бабы 3-бөлігінің 2,3 тармағымен кінәлі деп танылып, оған 3 жылға бас бостандығынан айыру жазасы тағайындалған. ҚК-нің 63-бабына сәйкес, тағайындалған бас бостандығынан айыру жазасы шартты деп саналып, пробациялық бақылау тағайындалған.
Сонымен қатар ҚК-нің 84-бабының 1-бөлігінің 5-тармағының талаптарына сай кәмелетке толмаған сотталушы 2 жыл мерзімге ерекше режимде ұстайтын білім беру ұйымдарына орналастыру тәрбиелік ықпалы бар мәжбүрлеу шарасы қолданылған. Үкім ағымдағы жылдың 7 ақпан күні заңды күшіне енген.
Үкімді орындаудан жалтарған кәмелетке толмаған сотталушы, тұрғылықты мекен-жайынан белгісіз бағытқа кетіп қалған.
Қызылорда ҚПБ ювеналды полиция бөлімшесінің қызметкерлерімен іздестіру барысында кәмелетке толмаған Шымкент қаласынан табылды.
Қазіргі таңда кәмелетке толмаған сотталушы Шығыс-Қазақстан облысы, Көкпекті ауданы, Үлкен Бөкен ауылында орналасқан ерекше режимде ұстайтын арнайы мектеп-интернатына орналастырылды. Оған қатысты пробациялық бақылау белгіленген мерзімі ішінде Көкпекті аудандық пробация қызметі жүргізетін болады.

Қызылордада 7 ұрлыққа қатысы бар жасөспірімге сот үкімі шықты

<a href="https://kyzylorda-news.kz/kogam/qyzylordada-4-adam-koronavirws-indetin-zhuqtyrdy-99189/">Kyzylorda-news.kz</a>. Қызылордада балабақша иелері кезекші топқа баратын бала санын көбейтуді сұрады.
Қызылорда облысы кәсіпкерлер палатасының алаңында мүдделі мемлекеттік орган өкілдері, жеке кәсіпкерлер мен «КАНО» заңды тұлғалар бірлестігінің Қызылорда облысы бойынша филиал мүшелерінің қатысуымен мектепке дейінгі тәрбие мен оқытудың жан басына шаққандағы нормативтік қаржыландыру мәселелеріне арналған отырыс өткізілді.
Шара Кәсіпкерлер палатасы Өңірлік кеңесінің Адами капиталды дамыту комитеті жұмысы аясында ұйымдастырылды.
Отырыста облыстық білім басқармасының басшысы Ақзира Қасымова шектеу шаралары кезеңінде балабақшаларда мемлекеттік тапсырысты орналастырудың көлемі мен мөлшеріне қатысты ұсыныстарын ортаға салды.
<img src="https://kyzylorda-news.kz/wp-content/uploads/2021/02/img_0809-scaled.jpg" alt="" />
<blockquote>
 «Биылғы жылы білім басқармасы бойынша вертикальды басқару жүзеге асырылуда. Аталмыш жүйе аясында аймақтағы ауылдық елді мекен, кент, яғни аудандар мен қаладағы балабақшалардың қаржыландырылуы облыстық білім басқармасында. Облыс бойынша 667 балабақша бар. оның 415 жеке, 162 мемлекеттік балабақша, 90-ы шағын орталықтар. Аталмыш ұйымдардың қаржылары өткен жылы арнайы әдістеме бойынша есептелді. Биылғы жылы осы әдістемеге орай біршама өзгерістер бар. Жан басына қаржыландыру қазіргі таңда көтерілді. Әдістеме бойынша қаржыландыру бекітілді. Сол бойынша төленеді», – деді кездесуде облыстық білім басқармасының басшысы Ақзира Қасымова.
</blockquote>
Айта кету керек, әдістеме бойынша өткен жылы балабақшаларға бір балаға субсидия орта есеппен 33 мың теңгеден астам болса, биыл қаладағы балабақшалар үшін 43 мың теңге, аудандағы балабақшалар үшін 46 мың теңгеге дейін өсті.
<blockquote>
 «Дегенмен, мәселе де бар. Карантинге орай балабақшалардың толық қуаттылықта жұмыс жасай алмауына байланысты. Бүгінгі отырыста осы мәселені Сіздермен бірге шешіп алу үшін келіп отырмыз», – деді облыстық білім басқармасының басшысы.
</blockquote>
Бұдан әрі сала басшысы Білім және ғылым министрлігінің бұйрығына мектепке дейінгі тәрбиелеу мен оқытуға мемлекеттік білім беру тапсырысын орналастыру қағидасына 2020 жылдың 28 қазанында өзгерістер енгізілгендігін атап өтті.
<blockquote>
 «Тиісті мемлекеттік органдардың шектеу шаралары, оның ішінде карантин салдарынан балалар мектепке дейінгі ұйымға бармайтын әлеуметтік, табиғи және техногендік сипаттағы төтенше жағдайлар қолданылған кезеңде мектепке дейінгі тәрбие мен оқытуға мемлекеттік білім беру тапсырысы жергілікті атқарушы органдардың шешімі бойынша айқындалатын көлемде және мөлшерде қаржыландырылады», – делінген өзгеріс енгізілген бұйрықта.
</blockquote>
Осы жайтта ортаға сала келе, Ақзира Қасымова облыс әкімдігі тарапынан шектеу шараларына сәйкес балабақшаға бармаған балаларға төленетін мемлекеттік тапсырыс көлемі мен мөлшерін нақтылау жөніндегі ұсыныстарымен бөлісті.
Кездесуде балабақша иелері мемлекеттік қолдауға алғыстарын білдіре отырып, проблемаларды да ортаға салды. Мәселен, құрылтайшылар карантин жағдайына қарамастан, кезекші топтар жұмыс жасап отырса да қызметкерлерді толықтай жұмыспен қамтып отырғандықтарын, сондай-ақ персоналдың жалақылары толық көлемде сақталғандығын ортаға сала келе, жеке балабақшалар қолдауға мұқтаж екендігін жеткізді.
<blockquote>
 «Кәсіпкерлер палатасының алаңындағы бизнес пен биліктің ортақ мәселесінің талқыланып, шешілу жолы қарастырылып жатқанына қуаныштымын. Әрине жеке балабақшалар карантинге қарамастан көрсетіліп отырған қолдауды сезіндік. Дегенмен, Қызылорда облысының эпидемиологиялық жағдайда жасыл аймақта орналасқанын ескере келе балабақшадағы кезекші топтағы балалар санын 15-тен 20-ға жеткізулеріңізді сұраймыз. Бұл мәселе шешілген жағдайда балабақша иелері де айтарлықтай қаржылық шығынға ұшырамас еді», – деді «КАНО» заңды тұлғалар бірлестігінің Қызылорда облысы бойынша филиал төрағайымы Наталья Мишукова.
</blockquote>
Қызылорда облысы кәсіпкерлер палатасы директорының орынбасары Пірмұхаммед Сыздықов кәсіпкерлердің бұл өтініші негізсіз емес екендігін айтты.
<blockquote>
 «Себебі республикалық қаулыда жасыл аймақта орналасқан өңірлерге балабақшада кезекші топтарына 20 балаға дейін қабылдауға рұқсат берілген. Бүгінгі отырыстан кейін Сіздердің жазбаша өтініштеріңіздің негізінде Кәсіпкерлер палатасы атынан облыстық штабта бұл мәселені көтереміз. Жақында ғана мектеп асханаларында қызмет көрсететін кәсіпкерлердің мәселесі осылайша оң шешілген болатын», – деді Пірмұхаммед Сыздықов.
</blockquote>
Отырыс қорытындысымен балабақша құрылтайшылары Кәсіпкерлер палатасына жазбаша өтініштерін қалдырды. Ал облыстық білім басқармасының басшысы Кәсіпкерлер палатасымен бірге аталмыш мәселені облыстық штабта көтеріп, шешу жолдарын қарастыратындықтарын жеткізді.

Қызылордада балабақша иелері кезекші топта бала санын көбейтуді сұрады

<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 1167 адам коронавирус індетінен емделіп шықты, деп хабарлайды coronavirus2020.kz.
Аймақтар бойынша
Нұр-Сұлтан қаласы – 102,
Алматы қаласы – 68,
Ақмола облысы – 183,
Ақтөбе облысы – 11,
Алматы облысы – 112,
Атырау облысы – 79,
Шығыс Қазақстан облысы – 21,
Жамбыл облысы – 23,
Батыс Қазақстан облысы – 48,
Қарағанды облысы – 47,
Қостанай облысы – 70,
Қызылорда облысы – 15,
Маңғыстау облысы – 10,
Павлодар облысы – 323,
Солтүстік Қазақстан облысы – 45,
Түркістан облысы – 10.
Қазақстан бойынша жазылғандар саны – 181974.

Қазақстан және Қызылорда облысының жаңалықтары