<a href="https://kyzylorda-news.kz/">Kyzylorda-news.kz.</a> Қазақстанда өткен тәулікте 753 адамда коронавирус індеті ПТР арқылы расталды.
Аймақтар бойынша:
<ul>
<li>Нұр-Сұaлтан қаласы – 68,</li>
<li>Алматы қаласы – 93,</li>
<li>Шымкент қаласы – 6,</li>
<li>Ақмола облысы – 63,</li>
<li>Ақтөбе облысы – 9,</li>
<li>Алматы облысы – 39,</li>
<li>Атырау облысы – 38,</li>
<li>Шығыс Қазақстан облысы – 73,</li>
<li>Жамбыл облысы – 18,</li>
<li>Батыс Қазақстан облысы – 65,</li>
<li>Қарағанды облысы – 59,</li>
<li>Қостанай облысы – 68,</li>
<li>Қызылорда облысы – 14,</li>
<li>Маңғыстау облысы – 5,</li>
<li>Павлодар облысы – 90,</li>
<li>Солтүстік Қазақстан облысы – 39,</li>
<li>Түркістан облысы – 6.</li>
</ul>
Жалпы пандемия басталғалы ел бойынша ауырғандар саны 209 562 адамға жетті.

Қызылордада 14 адам коронавирус жұқтырды

<a href="https://kyzylorda-news.kz/">Kyzylorda-news.kz.</a> Сәрсенбі күні елімізде жел күшейіп, боран соғады, солтүстікте қалың қар жауып, оңтүстік өңірлерде тұман түсіп, көктайғақ болуы мүмкін, деп хабарлайды Қазгидромет.
24 ақпанда Қазақстан аумағының басым бөлігінде фронтальды бөліктердің өтуіне байланысты құбылмалы ауа райы сақталады. Қар жауады, еліміздің солтүстігінде кей жерлерде түнде қалың қар түседі, оңтүстігінде, оңтүстік-шығысында, күндіз шығысында қар аралас жаңбыр жауады, тек батыста антициклон ықпалымен күн райы ашық болады. Еліміздің кей жерлерінде тұман түседі, көктайғақ болады, жел күшейіп, боран соғады, оңтүстікте және солтүстікте жел күшейіп, жылдамдығы 30 м/с асып кетеді.

24 ақпанға арналған ауа райы болжамы

<a href="https://kyzylorda-news.kz/">Kyzylorda-news.kz.</a> Өткен жылдың желтоқсан айында Кәсіпкерлер палатасына аймақтағы бірқатар фармацевтика саласындағы кәсіпкерлерден көрсеткен қызметі үшін қаражатын толық ала алмай жүргендігі жөнінде, аталмыш мәселеге қатысты құқықтық қолдау көрсетуді сұраған өтініштер түсті.
Қазалы ауданаралық ауруханасы фармацевтика саласындағы 5 кәсіпкерге 110 млн.теңгеден астам қаржы қарыз болып шықты. Бұл қарыз кеше-бүгін қалыптасқан шығын емес, алды 2017 жылдан бастап жинақталып қалған екен. Кәсіпкерлер Қазалыдағы ауруханаға дәрі-дәрмектер, медициналық бұйымдар жеткізіп беру қызметтерін көрсетіп келген.
Кәсіпкерлер палатасы заңгерлері аталмыш мәселені жан-жақты зерттей келе облыс прокуроры Нұрлан Бижановпен кездесу ұйымдастырып, бизнес өкілдерінің мәселесін осы отырыста көтереді.
<blockquote>
 «Бизнес өкілдерін жақсы түсінуге болады. Дәрі-дәрмек, медициналық бұйымдарға бюджеттен арнайы қаржы бөлініп отыр. Алайда аталмыш қаржының нысаналы мақсатына жетпеуі кәсіпкерлерге қиындық тудыруда. Олар да көрсететін қызметтеріне қажетті құрал-жабдықтар мен дәрілерді алдыртады. Ол үшін қаржысын толық төлейді. Ал аурухана тарапынан қаржының уақытылы төленбеуі фармацевтика саласындағы компаниялардың тұрақты жұмыс орнын сақтап қалуда, еңбекақыларды уақытылы төлеуде салмақ салуда. Осы жерде облыс прокуроры Нұрлан Бижановқа арнайы алғысымызды білдіргіміз келеді. Кәсіпкерлермен кездесуден кейін мәселені өз бақылауына алып, шешілуіне септігі тиюде», – дейді бизнес-омбудсмен аппаратының облыс бойынша сектор меңгерушісі Салават Құлмахан.
</blockquote>
Кәсіпкерлер палатасы мен облыстық прокуратураның араласуымен бүгінде кәсіпкерлерге 29 млн.491 мың теңге қаржысы төленді. Ал қалған 80 млн.708 мың теңге қарызды аурухана басшылығы жыл соңына дейін төлеп беретіндігін жеткізді.
Өңір фармацевтерінің мәселесі Кәсіпкерлер палатасы үшін әлі де күн тәртібінде. Палата заңгерлері сала кәсіпкерлеріне құқықтық сүйемелдеу жұмыстарын жалғастырады.

Қызылордада фармацевтердің құқығы қорғалды

<a href="https://kyzylorda-news.kz/">Kyzylorda-news.kz.</a> Бүгін облыстық мәслихаттағы «Nur Otan» партиясы депутаттық фракциясының мүшесі, Аида Әбибуллаева жеке қабылдау өткізіп, тұрғындар тілегін тыңдады.
Депутаттың қабылдауына келген тұрғындардың мәселелері әлеуметтік көмек пен тұрғын үй жайында болды.
Қоғамдық қабылдауда болған қала тұрғыны Айгерім Арынова тұрмыс жағдайының төмендігін, баласының денсаулығы да дұрыс емес екенін, қажетті дәрі-дәрмекті сатып ала-алмай отырғанын алға тартып, әлеуметтік көмек көрсетуді сұрады. Тұрғынның өтініші бойынша науқас баласын мүгедектікке шығару жайында тиісті орындармен байланысып, түсіндірме жұмысын жүргізді. Сондай-ақ, жеке қабылдауда болған Ақжарма ауылының тұрғыны Назерке Жаңабаева кәмелетке толмаған 3 баласы барын айтып, атаулы әлеуметтік көмек ала алмай жүргенін баяндап, аталған көмекті алуына ықпал жасауын сұрады.
Баяндалған мәселе бойынша 18 жасқа толмаған балаларға берілетін жәрдемақы бойынша қалалық жұмыспен қамту, әлеуметтік бағдарламалар және азаматтық хал актілерін тіркеу бөлімімен байланыс жасалып, ортақ табысты есептеу отбасы арқылы, табысы белгіленген нормадан артық болуына байланысты аталған көмек тиесілі емес екендігі түсіндірді.
Қабылдауға келген Аружан Ержан есімді азаматша арендалық тұрғын үй кезегінде жетімдер санаты бойынша кезекте тұрғанын айтып, баспанамен қамтамасыз етуге ықпал жасауды сұрады. Тұрғынның шағымы бойынша қалалық тұрғын үй инспекциясының сектор меңгерушісімен байланыс жасалып, пәтер беру мәселесі кезектілікпен шешілетіні жайлы түсіндірме жүргізді. Сондай-ақ, өтініш иесін фельдшер мамандығы бойынша жұмыспен орналастыру мәселесін жан-жақты зерттейтінін түсіндірді.
Шиелі ауданы, Байгеқұм ауылынан келген Рсалды Қайыпбергенова мектепте от жағушы болып жұмыс жасайтын, 5 баласы бар ұлының жалақы алатын банктік карточкасын сот орындаушылар бұғаттап тастағаныдғын айтып, осы мәселенің шешілуіне ықпал етуді сұрады. 
Аталған мәселе бойынша өтініш иесіне сот орындаушының әрекетіне шағымдану үшін облыстық әділет департаменті, облыстық прокуратура органдарына арыздану керектігі жөнінде түсіндірді.
Жұмысқа орналасуға көмек сұраған қала тұрғыны Рахымбек Қосмұратовқа ҚР заңнамалары аясында тиісті түсініктеме жүргізді.
<img src="https://kyzylorda-news.kz/wp-content/uploads/2021/02/153553330_1105958579816651_7784614802864658212_o.jpg" alt="" />

Аида Әбибуллаева тұрғындар тілегін тыңдады

<a href="https://kyzylorda-news.kz/">Kyzylorda-news.kz.</a>&nbsp;Жыл басынан бері 1406 Call-орталығына Қызылорда облысының медициналық мекемелерінің қызметіне қатысты барлығы 14 шағым келіп түскен, оның 4-уі -Қолдау -24/7 мобилдік қосымшасы арқылы келген. Бұл туралы «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов мәлімдеді.
<blockquote>
 «Шағымдарды медициналық мекемелерге талдайтын болсақ, Шиелі ауданы бойынша-1, Қармақшы ауданы-3, Сырдария ауданы-1, Арал ауданы-1, «Сенім» емханасына- 2, «Дария-мед» ЖШС-1, №1 емхана-3, «Медиум» ЖШС-1, Қызылорда қалалық темір жол емханасына-1&nbsp; шағым түскен. Шағымдардың басым көпшілігі медициналық қызмет сапасының төмендігіне, тегін берілетін дәрі-дәрмектердің, МӘМС жүйесі шеңберінде тегін түрде берілуге жататын консультативті-диагностикалық қызмет түрлерінің және стационарлық көмек алу мүмкіндігі болмауына, медициналық қызметкерлердің дөрекілігіне қатысты жазылған», – дейді Бақыт Исмаханбетов.
</blockquote>
Науқастар медициналық ұйымдарда&nbsp;қызмет алу кезінде қиындықтарға тап болғанда, көбінесе өз құқықтарын қорғау үшін қайда бару керектігін білмей жатады. &nbsp;
Қордың басты міндеттерінің бірі – науқас құқығын қорғау. Сондықтан Қор мамандары медициналық көмектің сапасын бақылайды және қызмет &nbsp;көрсетуден бас тартудың себептерін тексереді.
Науқас құқығын қалай қорғай алады?
1-әдіс.&nbsp;Науқастарды қолдау қызметі.
Уақытты жоғалтпай, медициналық қызмет көрсетуді бақылау және жағдайды сол жерде шешу үшін арнайы құрылған&nbsp;«Науқастарды қолдау қызметіне»&nbsp;хабарласу керек. Бұл қызмет барлық медициналық ұйымдарда жұмыс істейді және әр емханада бұл қызмет: медициналық көмектің ішкі бақылауын жүргізеді, медициналық қызмет көрсету кезіндегі бұзушылықтарды анықтайды, өтініштер мен шағымдарды қарау мәселелерімен айналысады.
2-әдіс.&nbsp;Облыстық денсаулық сақтау басқармасының 40 00 01 байланыс орталығына&nbsp;хабарласады.
Барлық медициналық ұйымдар денсаулық сақтау басқармасына бағынады, сондықтан науқастар тікелей басқарма байланыс орталығына хабарласу арқылы өз мәселесін шеше алады.
3-әдіс.&nbsp;«Qoldau 24/7» мобильді қосымшасы арқылы өтініш жолдай алады.&nbsp;
Азамат «Qoldau 24/7» қосымшасына байланысқаннан кейін әлеуметтік сақтандыру Қорының мамандары: медициналық ұйымға хабарласып, ақпаратты анықтайды және медициналық көмек көрсетуден бас тарту себептерін тексереді.
Өтінішке нөмір беріледі, сол арқылы шағымның мәртебесі бақылай алады.
4-әдіс:&nbsp;Telegram-дағы SaqtandyryBot.
Telegram-нан «SaqtandyryBot» тауып, оны іске қосу керек. Бас мәзірден «1406 нөміріне өтініш жіберу» пәрменін таңдайды және өтініш жолдайды.
5-әдіс.&nbsp;1406 бірыңғай байланыс орталығы арқылы өтініш қалдыра алады. 1406 бірыңғай байланыс орталығы тәулік бойы қоңырауларды қабылдайды және сұрақтарды өңдеу үшін арнайы құрылған үш деңгейлі модель бойынша өтініштерді қарастырады:
Бірінші деңгей – кеңес беру сипатындағы сұрақтар қабылданады;
Екінші және үшінші деңгей – жан-жақты зерттеуді қажет ететін өтініштерді қарастырады.
Қор мамандары медициналық ұйымға хабарласады, түскен ақпаратты анықтап, медициналық көмек көрсетуден бас тарту себептерін тексереді.
6-әдіс: fms.kz сайтындағы&nbsp;«Халықтық бақылау» бөлімі
Әлеуметтік медициналық сақтандыру Қорының сайтына&nbsp;кіріп, өтініш береді: fms.kz сайтына өтеді, «Халықтық бақылау» бөлімін ашады және тапсырманы таңдайды: шағым немесе ұсыныс қалдырады.
Шағым қалдыру үшін:
Аймақ, емхана, диагноз, тексеру күні, ЖСН көрсетіп, шағым себебін таңдау қажет.
Ұсыныс қалдыру үшін:
Бастапқы мәліметтерді толтырып, мәтінді тұжырымдау қажет.
Сонымен қатар, МӘМС жүйесі іске асырылуымен жеңілдік санатқа жатқызылған азаматтардың сақтандыру мәртебесін алуында қиындықтар кездесіп, МӘМС жүйесі шеңберінде медициналық қызметтерді алуға кедергілер туындады. Бұл азаматтардың басым көпшілігі жоғары және орта арнайы оқу орындарының күндізгі нысанда оқитын студенттер мен еш жерде жұмыс істемейтін жүкті әйелдер. &nbsp;
Бұл сұрақты оң шешу мақсатында, Қормен «Қолдау-24/7» мобилдік қосымшасына функция енгізіліп, қазіргі таңда Заңмен белгіленген жеңілдік санатқа жататын азаматтар МӘМС жүйесінде сақтандыру мәртебесіне 1 күнде ие болу мүмкіндігі пайда болды.&nbsp;&nbsp;&nbsp;&nbsp; &nbsp;
Заңның 26-бабының 1-тармағында көрсетілген 18 жасқа дейінгі балалар, жұмыссыз ретінде тіркелген адамдар, жұмыс істемейтін жүкті әйелдер, бала үш жасқа толғанға дейін оны тәрбиелеп отырған жұмыс істемейтін адам, жүктілікке және босануға, жаңа туған баланы асырап алуға байланысты, бала үш жасқа толғанға дейін оның күтіміне байланысты демалыста жүрген адамдар, мүгедек балаға күтім жасауды жүзеге асыратын жұмыс істемейтін адамдар, бала кезінен бірінші топтағы мүгедекке күтім жасауды жүзеге асыратын жұмыс істемейтін адам, зейнетақы төлемдерін алушылар, оның ішінде Ұлы Отан соғысының ардагерлері; жұмыс істемейтін оралмандар; “Алтын алқа”, “Күміс алқа” алқаларымен наградталған немесе бұрын “Батыр ана” атағын алған, сондай-ақ I және II дәрежелі “Ана даңқы” ордендерімен наградталған көпбалалы аналар; мүгедектер; орта, техникалық және кәсіптік, орта білімнен кейінгі, жоғары білім беру, сондай-ақ жоғары оқу орнынан кейінгі білім беру ұйымдарында күндізгі оқу нысанында білім алып жатқан адамдар; мемлекеттік атаулы әлеуметтік көмекті алушы жұмыс істемейтін азаматтар үшін ай сайынғы МӘМС үшін жарналарын мемлекет төлейді және олар МӘМС жүйесі шеңберінде медициналық қызметтерді алуға құқылы.
Жеңілдік санаты бар азаматтардың мәртебесі САҚТАНДЫРЫЛМАҒАН болып көрсетсе, олар Қолдау-24/7 мобилдік қосымшасы арқылы тиісті құжаттарын тіркеп, өтініш жолдау қажет. Егер, ол студент болса, өзінің ЖСН-н көрсетіп, оқу орнында оқитынын растайтын анықтаманы тіркеу қажет. Қор филиалының жауапты қызметкері бұл өтінішті қарап, тіркелген құжаттардың негізінде студентке сақтандыру мәртебесін уақытша 1 ай мерзімге береді. Әрі қарай, МӘМС жүйесінде тұрақты мәртебеге ие болу үшін, студент оқу орнына өзінің аты-жөнін тіркеу үшін хабарласу қажет.
Егер, студент шетелде оқитын болса, ол электрондық үкіметтің egov.kz сайтына өтіп, «Қызметтер» бөлімінен «Шетелде оқитын студенттерді тіркеу» тармағын таңдап, тіркелу қажет.&nbsp;&nbsp;
Еш жерде жұмыс істемейтін әйелдер емхана дәрігерінен жүктілікті дәлелдейтін анықтаманы Қолдау -24/7 мобилдік қосымшасына тіркеп, сақтандыру мәртебесін алу туралы өтініш жолдайды.&nbsp; Қор филиалының жауапты қызметкері бұл өтінішті қарап, тіркелген анықтаманың негізінде еш жерде жұмыс істемейтін жүкті әйелге сақтандыру мәртебесін уақытша 1 ай мерзімге береді. Әрі қарай, емхана қызметкерлері бұл азаматшаны «Жүкті әйелдердің тізіліміне» тіркеу қажет.
Сонымен қатар, филиал сарапшыларымен азаматтарды қабылдау барысында туындаған сұрақтарға жауаптар беріліп, кеңестер беріліп, өзекті мәселелер шешілуде.
Қазіргі таңда, Ресей Федерациясынан зейнеткерлікке шыққан Қазақстан Республикасынан азаматтарының және Ауған соғысының ардагерлерінің жеңілдік санатына енгізілмегені өзекті мәселелерінің бірі болып табылуда.&nbsp;
Бұл сұрақты шешу мақсатында, филиалмен Қор төрағасына ұсыныстар жолданды және оң шешілуіне үміт артамыз.

МӘМС: Шағымдардың басым көпшілігі медициналық қызмет сапасының төмендігіне жазылған

<a href="https://kyzylorda-news.kz/">Kyzylorda-news.kz.</a> Қазақстан мемлекеттік қызметті реформалауда айтарлықтай жетістіктерге қол жеткізді деп сенімді түрде айта аламыз. Заң жүйесі жасалды, мемлекеттік қызметкерлердің құқығы, міндеттері және мәртебесі айқындалды, мемлекеттік органдардың уәкілеттілігі белгіленді.
Ендігі кезекте қоғамымыздың дамуы халықтың өмір сүру жағдайын тиімді және сапалы ету мақсатында мемлекет пен азаматтардың арасындағы қарым-қатынастарды өзгерту мүмкіндіктерін қарастыруды талап етіп отыр.
Осы орайда, Еліміздің Тұңғыш Президенті бекіткен бес институттық реформасын жүзеге асыруға бағытталған «100 нақты қадам» Ұлт Жоспарының алғашқы 15 қадамын іске асыру аясында 2015 жылы 23 қарашада қабылданған «ҚР Мемлекеттік қызметі туралы» Заңы еліміздегі мемлекеттік қызметтің жаңа моделін қалыптастырып, осы саладағы реформаның жаңа кезеңіне аяқ басуына ықпал етті.
Халықаралық сарапшылардың пікірінше Заңның қабылдануы мемлекеттік қызметті жетілдірудің заманауи үрдістері мен озық халықаралық тәжірибелеріне сай келеді деп пайымдаған.
Енді өткен тарихымызға көз жүгіртіп, Қазақстан Республикасының мемлекеттік қызмет жүйесін реформалау жүйесіне тоқталып өтейік. 
Кеңестік замандағы мемлекеттік аппарат жүйесі өзінің көрінеу идеологиялық тәуелділігімен біздің жаңа егеменді мемлекетіміздің мақсаты мен бағытына сәйкес келмеді. Сондықтан тәуелсіздік алғаннан бері Қазақстан Республикасы қазіргі жағдайға сәйкес келетін мемлекеттік қызмет жүргізу үлгісін іздестіру жолына шықты. Мемлекеттік қызметті жетілдіруге бағытталған шараның ең алғашқысының бірі – 1995 жылы қабылданған Қазақстан Республикасы Президентінің «Мемлекеттік қызмет туралы» Заң күші бар Жарлығы. Жарлық алғаш рет мемлекеттік қызметті жаңа қоғамдық, әлеуметтік-экономикалық қатынастарға бейімдей жүйелеуге мүмкіндік туғызды.
Жарлықты қабылдау нәтижесінде мемлекеттік қызметшілердің статусы белгіленді, жалақы төлеу жүйесі қабылданды, мемлекеттік қызметшілер сыныптарға, шендерге бөлінді, мемлекеттік қызметшілерді әлеуметтік қорғау шаралары қабылданды. Яғни мемлекеттік қызметшілер жалпы еңбек қатынастарынан бөлініп шығып, бөлек заңдылыққа бағына бастады.
Алайда, Жарлықта мемлекеттік қызметке орналасу үшін міндетті түрде конкурс өткізу мәселелері, біліктілік талаптары белгіленбеді. Соның нәтижесінде мемлекеттік қызметке білім деңгейі төмен азаматтар көптеп орналасты, тамыр-таныстық, жерлестік негізінде жұмысқа қабылдау көбейіп кетті.
Заңдылықты өзгертумен қатар, Республикада мемлекетті басқару жүйесі бірқатар күрделі өзгерістерге ұшырады. Мысалы 1994 жылдың ортасында республикалық мемлекеттік басқару органдарының құрылымына Министрлер Кабинетінде 43 министрлік пен комитет және т.б. ведомствалар кірген болатын. Ал 1997 жылы министрліктердің саны 24-ке дейін қысқарып, Қазақстанның мемлекеттік басқару жүйесі түбегейлі өзгерістерге ұшырады.
Қазіргі таңда елімізде 17 министрлік пен 5 агенттік жұмыс істейді. 
Мемлекеттік қызметті дамытудағы келесі кезеңі деп 1997 жылы қабылданып, мемлекеттік дамудың ұзақ мерзімді басымдығы ретінде кәсіби үкімет құруды айқындап берген, «Қазақстан – 2030» стратегиясы атап өтуге болады.
Стратегияны іске асыру барысында 1998 жылы Тұңғыш Президент Жарлығымен тікелей Президентке бағынатын және есеп беретін мемлекеттік орган – Мемлекеттік қызмет істері жөніндегі агенттік және Қазақстан Республикасы Президентінің жанындағы Мемлекеттік қызмет академиясы құрылды.
Осы бағытта 1999 жылдың 23 шілдесінде қабылданып, 2000 жылдың 1 қаңтарынан күшіне енген «Мемлекеттік қызмет туралы» жаңа Заңы мемлекеттік қызмет саласының келесі үлкен кезеңі болды. Заң және 20-дан астам заңға тәуелді актілер мемлекеттік қызметке қатысты негізгі мәселелердің тәртібін реттеді. Яғни Қазақстан Республикасында жаңа мемлекеттік қызмет жүйесі құрылды.
Қазақстан Республикасы мемлекеттік қызметі жаңа моделінің Тұжырымдамасы Қазақстан Республикасы Президентінің 2011 жылғы 21 шілдедегі №119 Жарлығымен бекітілді. 
Осы Тұжырымдама мемлекеттік қызметтің жаңа моделін қалыптастырудың негізгі бағыттары қамтылып, мемлекеттік қызметшілердің басқарушылық деңгейіе «А» және «Б» корпусы мемлекеттік әкімшілік қызметшілерінің санаттары айқындалды. 
Бірақ уақыт бір орында тұрмайды.
Елімізде мемлекеттік қызметті реформалау халықаралық дәрежеде зерттеліп, Тұңғыш Президентіміздің «100 нақты қадам» Ұлт Жоспарының басты бөлігі кәсіби аппарат құру бағытына сәйкес, қолданыстағы 2015 жылдың 23 қарашасында «ҚР Мемлекеттік қызметі туралы» Заңы қабылданды.
Осы заңның аясында мемлекеттік қызметшілердің кәсібилігін арттыратын бірнеше заңнамаға тәуелді актілер жүзеге асырылды. 
Дүниежүзінде қазіргі таңда мемлекеттік қызметтің қалыптасқан екі негізгі жүйесі бар – «позициялық» (конкурстық) және «мансаптық». Әр жүйенің өзіне тән плюс және минустары бар.
Мысалы: позициялық жүйеде кез келген лауазымға конкурс жарияланады, яғни мемлекеттік қызметке жоғары білімді, жас менеджерлерді тартуға жағдай жасалынған, алайда бұл жүйеде көбінесе азаматтардың жеке қабілетіне көңіл бөлінеді де, ал іс тәжірибесіне, осы мамандық бойынша біліктілігі ескерілмей қалуы қаупі бар. Ал керісінше мансаптық жүйеде жас мамандар мемлекеттік қызмет жүйесінің ең төменгі лауазымдарына қабылданады да, келесі сатыларға бірте-бірте көтеріледі, сондықтан да жоғары лауазымдарға іс тәжірибесі мол, біліктілігін көтерген азаматтар келеді, алайда орта немесе жоғары деңгейдегі лауазымдарға жас мамандардың келуі қиындатылған.
Қазіргі таңда Қазақстанның мемлекеттік қызмет жүйесі осы аталған екі жүйенің де негізгі жақсы жақтарынан өзіне алып, конкурстық-мансаптық моделді құрайды, яғни азаматтар мемлекеттік қызметке ашық конкурс негізінде қабылданады, ішкі қызмет жүйесінде, яғни мемлекеттік органның ішінде, әкімшілік мемлекеттік қызметкерлер басқа лауазымдарға біліктілік талаптарына сәйкес келген жағдайда, ішкі конкурс тәртібімен жоғары тұрған лауазымға орналаса алады. 
Қазіргі таңда жинақтаған тәжірибелеріміз бен болашақта мемлекеттік қызметті жетілдіру бағытында жұмыстар жасалуда. 
Атап айтсақ:
<ol>
<li>Азаматтық қызметте жүрген білімді, білікті кадрларды, университет қабырғасында жүрген зерек, алғыр студенттердің базасын жасақтау қажет. Бұл бағытта өткен жылы бірқатар жұмыстар жасалды. Онда, мемлекеттік әкімшілік қызметшілерге кіруге тесттен өту уақытын 15 күнге дейін қысқарту, конкурсқа қажетті құжаттар санын азайту, конкурсқа онлайн режимде қатысу сынды жұмыстар жүргізілді. 
Сонымен бірге, резервшілердің келесі тобын, яғни орындаушылық санатына да Президенттік кадр резервіне жинақталғандай білікті кадрлармен толықтыруымыз қажет. 
Университет қабырғасындағы студенттерге арнап, мемлекеттік қызмет мектебі ашылды. Осы ретте, университет бітіруші студенттерді өте мықты дайындықтан өткізіп, жұмыс беруші мемлекеттік органдардың қызығушылығын тудыратындай жағдай жасауымыз керек және олар конкурстарға қатысқан кезде комиссияның әділ шешім қабылдауына қатаң бақылау орнату қажет деп ойлаймын.</li>
<li>Өңірлердегі меритократия қағидатының сақталуы басты мәселе. Аймақтарда белгілі бір басшылардың ауысуы барысында “командалық ауысу” қатар жүреді.Бұл ретте, жаңа басшылар тағайындалған жағдайда кадрлардың ауысушылығына мониторинг қатаң түрде жүргізілуі керек. Сонымен бірге, біз мемлекеттік қызметшілерді аттестаттау және олардың жұмыс сапасын бағалау, сондай-ақ мансаптық жоспарлау құралдары мен әдістерін жетілдіру шараларын қарастыруымыз қажет.</li>
<li>Өткен жылы орын алып, әлі күнге дейін жалғасып келе жатқан әлемдік “пандемия” цифрландыру дәуіріне өтіп кеткеніміздің дәлелін көрсетті. Дегенмен, ескінің сарқыншағындай әрбір қол қою құжатын қағазға шығарып, алтындай уақыттарын өздері алып отырған мекемелер жетерлік. Бұл ретте, Е-қызмет персоналды басқарудың ықпалдастырылған жүйесінің құлашын кеңінен жайып, жұмыс жасауына мүмкіндік тудыруымыз қажет деп санаймын.</li>
<li>Мемлекеттік қызметшілердің, әсіресе тұрғындармен және бизнеспен тікелей байланыста қызмет атқаратындардың жұмысын регламенттеу арқылы мемлекеттік қызмет көрсету сапасын арттыру. Мемлекеттік қызмет көрсетудің айқын стандарттары мен регламенттерін белгілеу, олардың сақталуы үшін жауапкершілікті бекіту, сондай-ақ қызмет көрсету сапасын бағалау жүйесі мен сыртқы бақылауды, оның ішінде мемлекеттік қызметтерді алушылармен кері байланыс орнатудың маңызы зор екендігін атап өткім келеді. Бұл туралы Қазақстан Республикасының Президенті Қ.К. Тоқаевтың 2020 жылдың 1 қыркүйегінде Қазақстан халқына Жолдауында “Халық үніне құлақ асатын мемлекет”-бұл, шын мәнісінде “Әділетті мемлекет” құру тұжырымдамасы – деген болатын. 
Осы ретте, қазіргі мемлекеттік қызметте қоғам мен кері байланыс орнатудың маңыздылығы ерекше. Бізде мемлекет қоғам үшін қызмет етпейді, керісінше қоғам мемлекет үшін қызмет етуі керек деген идеология басым. Бұл-дамуды тежейтін, қауіпті идеология. Мемлекет бірінші кезекте салық төлеушілердің есебінен жұмыс жасайтын аппарат. Сондықтан әрбір мемлекеттік қызметші мемлекеттегі қоғам үшін жұмыс жасап жатқандығын түсіндіруіміз қажет деп санаймын.</li>
</ol>
Жасұлан ШЫНТАСОВ, 
ҚР Мемлекеттік қызмет істері агенттігінің 
Қызылорда облысы бойынша департаментінің басқарма басшысы

Жасұлан Шынтасов: Мемлекеттік басқаруда жаңа реформалар жүзеге асуда

<a href="https://kyzylorda-news.kz/">Kyzylorda-news.kz.</a> Мемлекет басшысы «Қазақстан Республикасының кейбір заңнамалық актілеріне Каспий теңізінде қызметті жүзеге асыруға байланысты мәселелер бойынша өзгерістер мен толықтырулар енгізу туралы» Қазақстан Республикасының Заңына қол қойды.
Бұл туралы Ақорданың&nbsp;<a href="https://www.akorda.kz/kz/legal_acts/laws/memleket-basshysy-kazakstan-respublikasynyn-keibir-zannamalyk-aktilerine-kaspii-tenizinde-kyzmetti-zhuzege-asyruga-bailanysty-maseleler-boiy">ресми сайты</a>&nbsp;хабарлайды.
Заңның мәтіні баспасөзде жарияланады.

ҚР Президенті Каспий теңізіндегі қызметке қатысты заңға қол қойды

<a href="https://kyzylorda-news.kz/">Kyzylorda-news.kz.</a> ҚР цифрлық даму, инновациялар және аэроғарыш өнеркәсібі министрі Бағдат Мусин алдағы уақытта Қазақстанның ғарыш саласында қандай жаңалықтар орын алатыны, жалпы, әуеге зымыран ұшырудың тұрғындар үшін қандай пайдасы бар екенін айтып берді, деп хабарлайды&nbsp;<a href="https://stan.kz/">Stan.kz</a>.
Министр ауылдарға байланыс тартуда Жер серіктерінің маңызы зор екенін сөз етті.&nbsp;
<blockquote>
 “Бізде бүгін байланыс тарататын 2 жасанды Жер серігіміз бар. Олар: Kazsat-2, Kazsat-3. Айтылған Жер серіктері еліміздегі ауылды мекендердегі интернет мәселесінің 85%-ын шешуге жұмылдырылуда. Бұл Жер серіктерінсіз ауылдарда сым жете бермейтін жерлерге интернетті жеткізу мүмкін болмайды. Бұған қоса, екінші мәселе – Жерді қашықтықтан мониторинг жасау. Бұл мониторинг жерді пайдалану үшін ғана жасалмайды, сонымен қатар, ауыл&nbsp;шаруашылығының тиімділігін бақылау, экологиялық жағдайды анықтауға септігін тигізеді. Мәселен, Өзбекстандағы Сардоба су қоймасының жарылуын біз спутник арқылы мониторинг жасап, тиісті мемлекеттік органдарға көмектесіп отырдық. Судың қайда кетуін бақылап хабарлап отырдық. Үшінші мәселе – қорғаныс саласы. Дегенмен оны қалай қолданып жатқанын біз айта алмаймыз”, -деді Мусин.&nbsp;
</blockquote>
Қазақстанның Байқоңырда ғарышқа зымыран ұшыру бойынша екі жобасы&nbsp;бар екеніне тоқталған министр ғарыш саласындағы жаңалықтарды атады.&nbsp;
<blockquote>
 “Қазіргі таңда біз “Союз-5” зымыранын көкке ұшыруға дайындап жатырмыз. Бүгінде зымыран жасау бизнеске айналуда. Егер біз “Союз-3” зымыранын дамытып, ғарышқа ұшырсақ, бизнесті дамытамыз. Екіншіден, егер ертеңгі күні Ресей Байқоңырдан бас тартса, бізде модернизацияланған ғарыш айлағы мүлдем жоқ. Осы саланы дамытуымыз керек. Қазір біз Біріккен Араб Әмірліктері, Ресей және Қазақстан болып, “Гагарин кешені” ғарыш айлағын модернизациялау туралы келісімдер жүргізілуде”, – деді шенеунік.
</blockquote>
Айтуынша, алдағы уақытта Байқоңырға Ресейден басқа елдерді тарту жоспарланған.&nbsp;
<blockquote>
 “Бұған қоса, біз Байқоңырға Ресейден басқа елдерді тартпақшымыз. Осы тұрғыда біз жақында Марсқа аттандырған комплексі сәтті болған БАӘ-мен тығыз байланыс орнатпақпыз”, – деді Мусин&nbsp;&nbsp;
</blockquote>
Айта кетейік, өткен аптада америкалық марсоход “Персеверанстың”&nbsp;Марсқа қонғаны хабарланды. Құрама штаттардың аэронавтика және ғарыш кеңістігін зерттеу жөніндегі Ұлттық басқармасы NASA-ның&nbsp;мәліметінше, марсоход жұмыс істеп бастаған, бірнеше, тіпті түрлі-түсті сурет жіберіп үлгерді. Жалпы, “Персеверанс”&nbsp;Марсқа соңғы айда қонған үшінші аппарат, оған дейін қызыл планетаның орбитасына Біріккен Араб Әмірліктері мен Қытайдың роботтары енген. Үшеуі де былтыр шілдеде ұшып шыққан. Жарты жылда 500 млн шақырымды артқа тастап.
Ғарышты зерттеу, игеру саласында жетекші рөлге ие мемлекеттер, мысалы, АҚШ былтырғы бюджетіне 22,6 млрд доллар салған. Ресей 2,6 млрд долларға жеткізбек. Ал біздің мемлекет 2019 жылы 0,19 млрд доллар жұмсаған.

Қазақстан Байқоңырға Ресейден басқа елдерді тартпақшы

<a href="https://kyzylorda-news.kz/">Kyzylorda-news.kz.</a>&nbsp;COVID-19 таралуын азайту үшін атаулы әлеуметтік көмек алатын отбасыларға дәрі қобдишасы тегін таратылады. Бұл туралы ҚР еңбек және халықты әлеуметтік қорғау министрлігінің баспасөз қызметі хабарлайды.&nbsp;
Қазақстанда коронавирустық инфекцияның таралу деңгейін төмендету мақсатында ағымдағы жылдың маусымына дейін 145 мың медициналық дәрі қобдишасы табысы аз, атаулы әлеуметтік көмек алушы отбасыларға тегін жеткізілетін болады.
<blockquote>
 “Медициналық дәрі қобдишаларын сатып алуға қаражат Азия даму банкінің гранты есебінен бөлінетін болады. Дәрі қобдишаларын БҰҰДБ арқылы сатып алу болжанып отыр. Жиынтықтардың құрамын ҚР денсаулық сақтау министрлігі айқындады және оған термометрлер, маскалар, дезинфекциялық құралдар және стероидты емес қабынуға қарсы препараттар кіреді. Дәрі қобдишаларын алушыларға жеткізуді қалалық немесе аудандық жұмыспен қамтуды үйлестіру және әлеуметтік бағдарламалар бөлімдері және ауылдық әкімдіктер жүзеге асырады”, – делінген хабарламада.&nbsp;
</blockquote>
Министрліктің мәліметінше, аталған шара материалдық жағдайы қиын, атаулы әлеуметтік көмек алушы отбасылардың экономикалық жүктемесін азайтуға мүмкіндік береді.
<blockquote>
 “Ағымдағы жылдың маусымына дейін Қазақстандағы табысы аз отбасыларға 145 мың медициналық дәрі қобдишасы жеткізілетін болады. 2020 жылдың 10 шілдесінде ҚР үкіметінің кеңейтілген отырысында мемлекет басшысы табысы аз отбасыларды коронавирустық инфекцияның таралуына жол бермеу мақсатында дәрі-дәрмектермен және алғашқы медициналық қорғау құралдарымен қамтамасыз етуді тапсырған болатын”, – деп хабарланды.
</blockquote>

Қазақстанда аз қамтылған отбасыларға тегін дәрі-дәрмек таратылады

<a href="https://kyzylorda-news.kz/">Kyzylorda-news.kz.</a>&nbsp;Шешендер мен ингуштардың жер аударылғанына 77 жыл толды.
Осыған орай Қызылорда облыстық «Вайнах» шешен этномәдени бірлестігінің ұйымдастыруымен қайырымдылық шарасы өтті.
Достық үйінде депортацияның қиын кезеңдері мен сол оқиғалардың куәгерлерін еске алу ниетінде құран оқылды. Осы орайда облыстық шешен этномәдени бірлестігі тарапынан мұқтаж 20 отбасына азық-түліктей көмек көрсетіліп, үйлеріне таратылды.
Мұндай игі іс аудан мен ауылдарда жалғасын табады.
Айта кетейік, шешендер мен ингуштардың Қазақстанға жер аударылуы 1944 жылдың 23 ақпанынан 9 наурызына дейін жалғасты. Оның барысында әртүрлі есептеулер бойынша 500-ден 650 мыңға дейін шешендер мен ингуштар шығарылды. Шығару кезінде және одан кейінгі алғашқы жылдары шамамен 100 мың шешен мен 23 мың ингуш көз жұмды. Яғни, екі халықтың төрттен бірі қайтыс болды.
Қазақстанға күнкөріс көзінсіз жер аударылған халықтар тек қазақ халқының бауырластық көмегінің арқасында өмір сүре алды. Олар тек өмір сүріп қана қоймай, өз тілдері мен мәдениетін сақтап қалды.

Шешендер мен ингуштардың жер аударылғанына 77 жыл толды

<a href="https://kyzylorda-news.kz/">Kyzylorda-news.kz.</a> 24 ақпанда&nbsp;Қызылорда облысының кей жерлерінде көктайғақ, бұрқасын күтіледі, деп хабарлайды Қазгидромет.
Батыстан, оңтүстік-батыстан жел соғады, күші 15-20, кей жерлерде 23-28 м/с күтіледі.

Қызылордада ауа райына байланысты ескерту жарияланды

<a href="https://kyzylorda-news.kz/">Kyzylorda-news.kz.</a>&nbsp;Мемлекеттік қызметші декларацияны толтыру кезінде қате жіберген болса, не істеуге болады? Бұл декларацияны қайтадан толтыру керек пе және қате декларациямен не істеу керек? Бұл сұраққа ҚР Қаржы министрлігі Мемлекеттік кірістер комитеті жауап берді, деп хабарлайды <a href="https://lenta.inform.kz/kz/kate-tapsyrylgan-deklaraciyany-kalay-zhondeuge-bolady_a3756619">ҚазАқпарат</a>.
Жалпыға бірдей декларациялаудың енгізілуіне байланысты мемлекеттік қызметшілер, оларға теңестірілген адамдар мен олардың жұбайлары (зайыптары) биылғы жылы активтер мен міндеттемелер туралы декларацияны ұсынуы тиіс.
Алайда, активтер мен міндеттемелер туралы декларацияда қате немесе толық емес мәліметтер толтырылса, мұндай декларацияны қосымша декларациямен түзетуге болатынын барлық жеке тұлғалар біле бермейді.
Егер бастапқы декларацияда активтер мен міндеттемелерді көрсетуді ұмытып қалсаңыз немесе толық көрсетпесеңіз, онда қосымша декларация ұсынуға болады.
Қосымша декларация&nbsp;– осы өзгерістер немесе толықтырулар қатысты болатын салықтық кезең үшін бұрын ұсынылған декларацияға өзгерістер немесе толықтырулар енгізілген кезде ұсынылатын декларация.
Қосымша декларацияда:
1) сомалары өзгертілген кезде – салықтық кезеңдегі бұрын ұсынылған декларацияда көрсетілген сома мен іс жүзіндегі салықтық міндеттеме арасындағы айырма;
2) қалған деректер өзгертілген кезде, жаңа мән тиісті жолдар бойынша көрсетіледі.
Егер декларацияда міндетті деректемелер дұрыс көрсетілмесе немесе мүлдем көрсетілмесе, оны кері қайтарып алуға болады.
Салықтық есептілікті керi қайтарып алу&nbsp;мынадай әдiстердiң бірiмен жүргізіледі:
1) жою әдiсiмен, бұл ретте керi қайтарылатын салықтық есептілік жойылады;
2) өзгерту әдiсiмен, бұл ретте бұрын ұсынылған салықтық есептілікке салық төлеушi мәлiмдеген өзгерістер немесе түзетулер енгiзiледі.
Жою әдісімен&nbsp;қате ұсынылған декларацияны (табыс ету бойынша міндеттемелер жоқ), сондай-ақ егер:
– декларация нысаны белгіленген нысанға сәйкес келмесе;
– декларацияда салық органының коды немесе салық кезеңі көрсетілмеген; активтер мен міндеттемелер туралы декларация жасалатын күні көрсетілмеген немесе салық есептілігінің түрі көрсетілмеген жағдайда табыс етілмеген деп саналатын декларацияны кері қайтарып алуға болады.
Мысалы, кейбір мемлекеттік қызметшілер 2021 жылы қате түрде 230.00 нысаны бойынша декларация ұсынды. Биылғы жылы мұндай декларацияны ұсыну бойынша міндеттеме болмағандықтан, оны жою әдісімен кері қайтарып алу қажет.
Егер декларацияны тапсыруға міндетті болмаса, жою әдісімен кері қайтарып алғаннан кейін дұрыс декларацияны қайта тапсыру қажет.
Сондай-ақ валюта коды көрсетілмесе немесе дұрыс көрсетілмесе, салық органының коды, салық кезеңі немесе салық есептілігінің түрі дұрыс көрсетілмесе, декларацияны&nbsp;өзгерту әдісімен&nbsp;кері қайтарып алу жүргізіледі.
Қате декларацияны кері қайтарып алу үшін салық органына өзінің тіркеу есебінің орны бойынша өтініш беру қажет.
Салық органының коды дұрыс көрсетілмесе, салық есептілігін өзгерту әдісімен кері қайтарып алу үшін өтініш осы декларация тапсырылған салық органына табыс етіледі.
Декларацияны кері қайтарып алу туралы мәліметтерді «e-Salyq Azamat» мобильдік қосымшасының «Электрондық сервистерінен» көруге болады. «E-Salyq Azamat» тегін мобильдік қосымшасын «App Store» немесе «Play Market»-тен жүктеуге болады.
Жыл басынан бері 269 510 адам өз мүлкін декларациялап үлгергенін атап өткен жөн. Декларацияларын тапсырып үлгергендердің ішінен 171 682 адам «e-Salyq Azamat» мобильді қосымшасын пайдаланған.
Еске сала кетейік, 2021 жылы елімізде жалпыға бірдей декларациялауды енгізудің бірінші кезеңі басталды.
Салық кодексінде жалпыға бірдей декларациялауды төрт кезеңмен жүзеге асыру қарастырылған.
Бірінші кезеңде (2021 жылғы 1 қаңтардан бастап):
– жауапты мемлекеттік лауазымды атқаратын адамдар мен олардың жұбайлары (зайыптары);
– мемлекеттік функцияларды орындауға уәкілеттік берілген және оларға теңестірілген адамдар, сондай-ақ олардың жұбайлары (зайыптары);
– «Қазақстан Республикасындағы сайлау туралы Қазақстан Республикасының Конституциялық Заңына және «Сыбайлас жемқорлыққа қарсы іс-қимыл туралы», «Қазақстан Республикасындағы банктер және банк қызметі туралы», «Сақтандыру қызметі туралы», «Бағалы қағаздар рыногы туралы» Қазақстан Республикасының Заңына сәйкес табыс ету міндеті жүктелген адамдар декларация тапсыруға міндетті.

Қазақстан және Қызылорда облысының жаңалықтары