<a href="https://kyzylorda-news.kz/ru/obshestvo/">Kyzylorda-news.kz</a>. 27 қыркүйекте республиканың басым бөлігінде құбылмалы ауа райы сақталады. Фронталды бөліктердің әсерінен жаңбыр жауады, батыста қатты жаңбыр күтіледі. Елдің солтүстігінде, солтүстік-батысында жауын-шашын жаңбыр мен қар түрінде болады. Республиканың барлық аумағында күшті жел тұрады, оңтүстікте шаңды дауыл көтеріліп, оңтүстікте, батыста найзағай болжанады. ҚазАқпарат бұл туралы Қазгидрометке сілтеме жасап хабарлайды.
Түнде&nbsp;Қызылорда облысының&nbsp;басым бөлігінде, күндіз солтүстігінде найзағай күтіледі, 15-20 м/с екпіндегі желдің жылдамдығы 23 м/с артады. Түнде Қарағанды облысының солтүстігінде, орталығында желдің күші 15-20 м/с құрайды. Күндіз басым бөлігінде 15-20 м/с болады, екпіні 23 м/с күшейеді.

27 қыркүйекке арналған ауа райы болжамы

Kyzylorda-news.kz. Йод – адам ағзасына аса қажет микроэлементтердің бірі. Ол жетіспесе, адамның ми дамуы тоқтайды. Әсіресе, баланың ақыл-ой жетіспеушілігі, психологиялық ауытқуы пайда болуы мүмкін.
Йод тапшылығы холестерин көбею, салмақ бұзылу, летаргия мен күйзеліске әкеледі. Йод жетпесе, қалқанша безінен бөлінетін гормон азаяды. Содан гипотиреоз, басқа да ағзалық ауытқулар пайда болады.
Сондықтан йодтың бар-жоғына аса мән берген жөн. Қазақстанда йод тапшылығы себебінен ас тұзына йод қосу өндірістік қажеттілікке айналған.
Ендеше йоды мол тағамдарға не жатады, соны қарастырып көрейік.
Картоп
Иә, картоптың құрамында йод жетерлік. Әрі бұл өнімнің бағасы да арзан. Суға не буға піскен картоптың қабығында 60 мг йод болады. Байқағаныңыздай, картоп пайдалы болсын десеңіз, қуырмай және қабығымен жеген жөн.
Тұз
Ас тұзының бәрінде йод болады. Бірақ өндірістік өңдеу кезінде жойылып кетуі мүмкін. Кейбір тұзда йод мол болады. Мәселен, гималай тұзының құрамында 500 мг йод болады екен. Сондықтан мүмкіндік болса, гималай тұзын тауып тұтыну керек.
Мүкжидек/клюква
Мүкжидек – жақсы антиоксидант (қатерлі ісіктің алдын алушы). Құрамында йод мол. 120 грамм мүкжидекте 400 мкг йод болады. Йодтың күндік нормасын алғыңыз келсе, аздап мүкжидек жеңіз. Немесе бір стақан балғын шырынын ішсеңіз жеткілікті.
Асбұршақ/фасоль
Жарты стақан асбұршақ пен теңіз асбұршағының құрамында 32 мгк йод болады.
Теңіз орамжапырағы мен балдыр
Теңіз мен мұхит – йодтың нағыз қайнар көзі. Сондықтан теңіз өнімдерінің құрамында микроэлемент мол болады. Мәселен, теңіз орамжапырағының бір мәзіріндегі йод мөлшері бір күндік нормадан 4 есе көп. Оны салат не сорпаға қосып ішсеңіз болады.
<a href="https://massaget.kz/layfstayl/Zdorove/66248/">Massaget</a>

Йод жетіспесе адамның ми дамуы тоқтайды

Kyzylorda-news.kz. Қазақстанның бас санитар дәрігері жаңа қаулығы қол қойды, деп хабарлайды&nbsp;<a href="https://ru.sputnik.kz/?_ga=2.82791763.454298259.1632538704-138522855.1629862799">Sputnik Қазақстан.</a>
Құжатта “Ashyq” жобасына жаңа қатысушыларды қосудың алгоритмі, бір аймақтан екінші аймаққа өту кезіндегі карантиндік шараларды жеңілдету мен қатаңдатудың ережелері бекітілген.&nbsp;
<blockquote>
 “12 жастан асқан балалардың компьютерлік клубтарға, цирктерге, кинотеатрларға, балалардың сауықтыру орталықтарына, облысаралық және қала аралық туристік тасымалдарға “Ashyq” қосымшасында, оның ішінде басқа платформаларда ата-аналарының немесе заңды өкілдерінің рұқсатымен, QR-кодты сканирлеу кезенде ерікті түрде тіркеле отырып кіруін қамтамасыз ету”, – делінген құжатта.
</blockquote>
Осы қаулыға сәйкес “Ashyq” жобасына қатысатын әлеуметтік-экономикалық объектілердің қызметін шектеу өлшемшарттарына сәйкес барлық объектілерінің жұмысына:
&nbsp;– жұмыс күндері – “Ashyq” жобасына қатысушы барлық объектілер үшін сағат 00.00-ге дейін, “Ashyq” жобасының көшбасшылары үшін – сағат 02.00-ге дейін;
– демалыс күндері – сағат 02.00-ге дейін, қызметкерлер мен келушілерде “жасыл мәртебе” болған жағдайда (вакцинация, сынама алған кезден бастап 7 тәуліктен аспайтын теріс нәтижесі бар ПТР тест, тұрақты медициналық қарсы көрсетілімдері бар, ауырып жазылған адамдар соңғы 3 ай ішінде) “Ashyq” жобасының көшбасшылары үшін – сағат 02.00-ге дейін рұқсат етілді.
Сонымен қатар инфекциялық төсектердің толтырылу көрсеткіші 70%-тен жоғары тәуекел деңгейі қауіпті аймақта эпидемиологиялық жағдай күрделенген жағдайда өңір “қою қызыл” аймаққа ауысады және шектеу шаралары енгізіледі. Өңір “қою қызыл” аймақта кемінде 3 күн болған кезде карантиндік шараларды қатаңдату қабылданады.
Күшейтілген карантиндік шаралар “қою қызыл” аймақтан “қызыл” аймаққа көшкеннен кейін кемінде 7 күн сақталады. Карантиндік шараларды жеңілдету “қою қызыл” аймақтан “қызыл” аймаққа көшкеннен кейін 7 күннен ерте жүргізілмейтіні айтылған.
Қаулы 27 қыркүйекте күшіне енеді.
Құжаттың толық мәтінімен&nbsp;<a href="https://www.gov.kz/memleket/entities/kkkbtu/press/news/details/260754?lang=kk">мына жерде</a>&nbsp;таныса аласыз.

Бас санитар дәрігердің жаңа қаулысы қабылданды

Kyzylorda-news.kz. Көп жылдардан бері Қызылорда мен Жезқазған арасындағы ескі тас жолдың жөнделіп, заманауи стандарттарға сай болуы қоғам тарапынан жиі талқыланып келді. Бұл мәселені Қызылорда облыс әкімдігі жыл басында бірнеше мәрте үкіметтік деңгейде көтерген. Қос өңірдің халқы үшін ірі маңызға ие Қызылорда-Жезқазған тас жолын жөндеу жұмыстары биыл жүзеге асатын болады.
<blockquote>
 «Күні кеше Қазақстан Үкіметі тарапынан «Қазавтожол» ұлттық компаниясы Еуропа қайта құру және даму банкімен құны 240 миллион доллар тұратын Жезқазған-Қызылорда автомобиль жолының жаңа жобасына қол қойды.Компания бұл қаржыны Қызылорда мен Жезқазған арасындағы ұзындығы 204 шақырымдық ескі жолды күрделі жөндеуге, сондай-ақ, Қызылордадағы ұзындығы 14,8 шақырымдық айналма жолдың құрылысына бөлмек. Жолды салу бағыты Қызылорда облысы жағынан басталады», – деді аймақ басшысы.
</blockquote>
Айта кетейік, аталған тас жол Қытайдың батысы мен Ресейдің Орал өңірін байланыстыратын Е123 стратегиялық бағыты бойынша жолаушылар мен жүк тасымалын жақсартады.
Жоба аймақтардың байланысын жақсартуға, жол қозғалысы қауіпсіздігі стандарттарының жоғарылауына мүмкіндік береді. Сондай-ақ, еліміздің ұлттық автожол жүйесінде электромобильдерді қолдануды қамтамасыз ететін жол инфрақұрылымын құруға әзірлік стратегиясын жасауға көмектеседі. Жоба қазіргі кезде жиілеп кеткен ауа райының құбылмалы жағдайында жол тұрақтылығын арттыруды, жолдардың климаттың өзгеруіне бейімделуін қамтитын іс-шараларды қарастырады.
Қазір Сыр елінде жалпы ұзындығы 3398 шақырымды құрайтын автокөлік жолы бар. Оның ішінде 1016 шақырымы республикалық, қалған бөлігі – облыстық және аудандық деңгейдегі жолдар. Биыл жол жөндеу мақсатында барлық қаржы көзінен 19 млрд теңгеден астам қаржы бөлінді. Нәтижесінде ұзындығы 488 шақырымды құрайтын автокөлік жолы, көшелер мен жолаушылар өткелі жөнделуде. 397 шақырым автомобиль жолдарын, көпір өткелдері мен көшелерді жөнделетiн болады. Бұл жақсы жағдайда тұрған жолдардың үлесін 70%-тен 75%-ке дейін арттырады.

Қызылорда-Жезқазған тас жолының жөндеу жұмыстары Қызылордадан басталмақ

Kyzylorda-news.kz. Қазақстанда өткен тәулікте 2381 адам коронавирус індетінен емделіп шықты. Бұл туралы www.coronavirus2020.kz сайты хабарлайды.
Аймақтар бойынша:
Нұр-Сұлтан қаласы – 167,
Алматы қаласы – 823,
Шымкент қаласы – 7,
Ақмола облысы – 196,
Ақтөбе облысы – 28,
Алматы облысы – 102,
Атырау облысы – 215,
Шығыс Қазақстан облысы – 238,
Жамбыл облысы – 37,
Батыс Қазақстан облысы – 23,
Қарағанды облысы – 173,
Қостанай облысы – 25,
Қызылорда облысы – 52,
Маңғыстау облысы – 25,
Павлодар облысы – 153,
Солтүстік Қазақстан облысы – 79,
Түркістан облысы – 38.
Қазақстан бойынша жазылғандар саны – 810681.

Өткен тәулікте 52 қызылордалық коронавирустан жазылып шықты

Kyzylorda-news.kz. Қазақстанда өткен тәулікте 2192 адамда коронавирус індеті ПТР арқылы расталып ауырғаны белгілі болды. Бұл туралы www.coronavirus2020.kz сайты хабарлайды.
Аймақтар бойынша:
Нұр-Сұлтан қаласы – 184
Алматы қаласы – 491
Шымкент қаласы – 126
Ақмола облысы – 99
Ақтөбе облысы – 93
Алматы облысы – 221
Атырау облысы – 55
Шығыс Қазақстан облысы – 126
Жамбыл облысы – 55
Батыс Қазақстан облысы – 62
Қарағанды облысы – 201
Қостанай облысы – 103
Қызылорда облысы – 51
Маңғыстау облысы – 17
Павлодар облысы – 175
Солтүстік Қазақстан облысы – 86
Түркістан облысы – 47
Жалпы ел бойынша ауырғандар саны 877112.

Қызылордада 51 адамнан коронавирус табылды

Kyzylorda-news.kz. 2021 жылғы 26 қыркүйектегі жағдай бойынша Қазақстан өңірлеріндегі эпидемиологиялық ахуалды бағалау матрицасы жарияланды.
«Қызыл» аймақта: Нұр-Сұлтан, Алматы қалалары, Ақмола,Қарағанды, Павлодар облыстары.
«Сары» аймақта : Шымкент қаласы, Атырау, Алматы, Ақтөбе, Қостанай, Солтүстік Қазақстан, Батыс Қазақстан, Шығыс Қазақстан облыстары.
«Жасыл» аймақта: Түркістан, Жамбыл, Маңғыстау, Қызылорда облыстары. Кешегі мәлімет бойынша, Түркістан, Жамбыл, Маңғыстау облыстары «жасыл» аймақта тұрған болатын.

Қызылорда облысы «жасыл» аймаққа өтті

Kyzylorda-news.kz. 26 қыркүйекте республиканың басым бөлігінде құбылмалы ауа райы күтіледі, деп хабарлайды Қазгидромет.
Фронталды бөліктердің әсерінен жаңбыр жауады, елдің солтүстік, оңтүстік және оңтүстік-шығысында антициклон жотасының әсерінен жауын-шашынсыз күн райы болжанады.
Республиканың басым бөлігінде жел күшейеді, оңтүстікте, батыста – шаңды дауыл, оңтүстікте – найзағай, солтүстігінде тұман болады.
Қызылорда облысында күндіз орталығында найзағай, 15-20 м/с жылдамдықтағы жел, шаңды болжанады.

Жексенбіге арналған ауа райы болжамы

<a href="https://kyzylorda-news.kz/ru/obshestvo/">Kyzylorda-news.kz</a>. Бүгін «Евразия» спорт кешенінде Қазақстан Республикасы Тәуелсіздігінің 30 жылдығына және қала күні мерекесіне арналған Қызылорда қаласына қарасты кенттер мен ауылдық округ тұрғындарының қатысуымен «Тәуелсіздік – мәңгілік елдің тұғыры» атты спартакиаданың марапаттау рәсімі өтті.
Қала әкімінің бастамасымен бірінші рет ұйымдастырылып отырған бұл шара қалаға қарасты кенттер мен ауылдық округтер арасындағы ынтымастықты нығайту, бұқаралық спортты дамыту, дене шынықтыру және спортпен жүйелі түрде айналысуға тартуды насихаттайды. Бір айға созылған айтулы додада елдімекендерден 400 – ге жуық спортшы қатысып, спорттың 7 түрінен өзара мықтылар анықталды.
<blockquote>
 Жеңімпаздар мен жүлдегерлерді құттықтау үшін арнайы барған қала әкімі Ғанибек Қонысбекұлы «Қызылорда – олимпиада саңлақтары – Ильяны, Қамшыбекті дүниеге әкелген қасиетті өлке. Бұқаралық спорты дамыған, салауатты халқы бар қазыналы қоныс. Қазір қалада жаңадан ашылған спорт нысандары қызылордалықтарға қызмет көрсетіп келеді. Заман сұранысына сай теннис орталығы, мұз айдыны келушілерді кедергісіз қабылдауда. Мұның барлығы да қызылордалықтарды салауаттылыққа ынталандыратын қадамдар» – екендігін атап өтті.
</blockquote>
Жарыс қорытындысымен 7 сайыс түрінен үшінші орынды Ақжарма ауылдық округінің, екінші орынды Тасбөгет кентінің, бірінші орынды Ақсуат ауылдық округінің құрама командалары еншіледі.
Жеңімпаздарға дипломдар мен спорттық киім жиынтықтарын алуға арналған сертификаттар табысталды. 
Аталған шара жылда дәстүрлі түрде ұйымдастырылатын болады.
<img src="https://kyzylorda-news.kz/wp-content/uploads/2021/10/249039317_2948136975453041_8881183551352036303_n.jpg" alt="" />
<img src="https://kyzylorda-news.kz/wp-content/uploads/2021/10/248880385_2948137042119701_2351622419102072595_n.jpg" alt="" />

Қызылордада ауыл спартакиадасы өз мәресіне жетті

Kyzylorda-news.kz. Сыр елінде әр апта сайын ауыл шаруашылығы өнімдерінің жәрмеңкесі өтуде. өткен аптада Шиелі ауданы мен Қызылорда қаласы шаруаларының өнімдері жәрмеңке алаңына қойылса, бүгін Жаңақорған және Сырдария аудандарының шаруалары ала жаздай еңбек өтіп баптаған өнімдерін қызылордалықтарға ұсынды.
Қалаға іргелес жатқан Сырдария ауданынан жәрмеңкеге жеңілдетілген бағамен 46 көлікке тиелген азық-түлік тауарлары келді. Жанқожа батыр көшесінде ұйымдастырылған жәрмеңкеде бақша өнімдері, қарбыз-қауын, жеміс-жидектер, күріш, сүт өнімдері мен балыққа сұраныс жоғары болды. Қала тұрғындары үшін 18 тонна ақталған күріш,18 тонна жем, 6 тоннадан астам картоп, 6 тонна басты пияз, 19 тонна қауын-қарбыз, 9 тонна көкөніс, 600 кг ет, 500 кг астам балық өнімдері, 260 литр сүт өнімі және 40 литр бал өнімі жеткізілді. Тауарлар нарық бағасынан 10-15 пайыз төмен бағада сатылды.
Жаңақорған ауданының шаруалары да жәрмеңкеге 180 тоннаның өнімін алып келді. 60 көлікке тиелген азық-түліктің ішінде ет, сүт өнімдері, көкөніс, бақша дақылдары, жеміс-жидектер бар. Тұрғындар арасында Жайылманың қауын-қарбызына сұраныс жоғары болды. 
Облыс әкімдігінің «Алқаптан сөреге дейін» пилоттық жобасы бойынша Жаңақорған ауданы осымен төртінші рет облыс орталығында жәрмеңке өткізіп отыр. Ал, жыл басынан бері 15 рет ауыл шаруашылығы өнімдерінің жәрмеңкесі ұйымдастырылды. Бұған дейін Сыр елінің Нұр-Cұлтан қаласындағы жәрмеңкесі ұйымдастырылып, 400 тонна өнім саудаланған болатын.
Айта кетейік, 4 желтоқсанға дейін облыс орталығының тұрғындары үшін апта сайын аудандардың ауыл шаруашылығы жәрмеңкелері өткізіледі.
<img src="https://kyzylorda-news.kz/wp-content/uploads/2021/09/fb_img_1632571576361.jpg" alt="" />
<img src="https://kyzylorda-news.kz/wp-content/uploads/2021/09/fb_img_1632571565063.jpg" alt="" />
<img src="https://kyzylorda-news.kz/wp-content/uploads/2021/09/fb_img_1632571553867.jpg" alt="" />

Қызылордалықтарға Сырдария мен Жаңақорған аудандарының ауылшаруашылығы өнімдері ұсынылды

<a href="https://kyzylorda-news.kz/ru/obshestvo/">Kyzylorda-news.kz</a>. Кеше ғана аулада футбол ойнап, тізесін жаралап келетін ұлыңыз бен басына ақ бантигін тағып мектепке баратын қызыңыз чемоданын жинап, бөтен қалаға аттанды ма? Әрине, балаңыз әлдеқашан өз жүрісіне жауап бере алатындай жасқа жетсе де, кез келген ата-ана алаңдаушылыққа бой алдырады. Бұл заңды құбылыс. Осы орайда біз психоаналитиктер ұсынған бірнеше кеңеспен бөліскелі отырмыз. Қажетін алыңыз. Балаңызды ересек өмірге қалай дайындау керек екенін және оларға еркін өмірдің қателіктерін болдырмауға көмектесетін кеңестерге құлақ асыңыз.&nbsp;
Қорқыныш қайдан пайда болады?&nbsp;
Психоаналитиктердің пікірінше, кез келген қорқыныш пен үрей бейсаналық түрде пайда болады. Егер адам бір нәрседен қорқатын болса, бұл оның осындай тәжірибені өз басынан өткергенін және қандай да бір себептермен басқаларды одан қорғауға тырысатынын білдіреді. Яғни, студенттің әкесі не анасы өзі студент болған кезде оны ортасы қабылдамай,
Ыңғайсыздық пен жалғыздық сезінген болуы мүмкін, немесе, керісінше, студенттер тобының «жүрегіне» айналып, сол «билігін» асыра сілтеп пайдаланғаны үшін өкінетін болуы мүмкін. Жиырма жыл бұрын осындай тәжірибе алған студенттің анасы не әкесі баласына алаңдаулы болары анық.&nbsp;
Күн сайын бізге теледидар мен электронды ақпарат құралдарынан қорқынышты жаңалықтар жетіп жатады. Мысалы, «студенттер оқыс оқиғаға ұшырады», «студент бейтаныс адамдардың қолынан зардап шекті» деген контексттегі мақалалар алаңдаушылық сезімін тудырады. Тіпті ең ақылды және саналы деген адамдардың өзінің осындай тақырыптардан кейін жүйкесі сыр береді, автоматты түрде баласының телефон нөмірін тере бастайды. Бірақ, басқа адамның, әсіресе студенттің өмірін тәулік бойы бақылау мүмкін емес.&nbsp;
Ата-аналарға қалай дайындалу керек?
Егер баланың жеке басының дамуының барлық алдыңғы кезеңдері сәтті өткен болса, яғни, бірінші сыныптан бастап оқу үдерісіне ата-ана өз үлесін қосқан болса, демек баланың білім алу үшін басқа қалаға көшуіне қарсы болмауы керек. Қорқынышқа бой алдырмауы керек. Бұл жерде олар өз баласына сенетін болса да, ата -аналар жасөспірімнің бөлек кетуіне алаңдайтыны рас. Бірақ баласы түбі тәуелсіз өмір кезеңіне өтетінін ұққан ата-ана оған дайындыққа ерте бастайды. Әбден баласы аттанар күн жақында ғана есін жиып, баласын әлі сәби көріп жүргендер, әрине, дайын емес болғандықтан ғана қорқынышқа бой алдырады. Баланың бөлек кетуіне бірнеше жыл бойы моральды тұрғыда дайындалып жүрген болсаңыз да, оның дәл кететін күні жүрегіңіз шыдамастай күйге түспес үшін бірнеше ай бұрын қоныс аудару процесін ұйымдастыруға көшіңіз: заттарды тасымалдау үшін жүк сөмкелерін дайындаңыз, онымен қалта ақшасын, өмір сүруге қажетті ақшаны талқылаңыз, жаңа жерге қоныстануға көмектесіңіз.&nbsp;
Онымен «қауіпсіздік, сенім, жауапкершілік» туралы әңгіме қозғаңыз. Ештеңе жасырмай, айтып жүруін сұраңыз. Ата-аналар «ол әлі бала» деп баласының ересек екеніне сенуден үзілді-кесілді бас тартса да, бұл шындық. Сондықтан, уайымдауды доғарыңыз – бәрі міндетті түрде жақсы болады. Сіз қаласаңыз да, қаламасаңыз да, ол өз өмірін сүруі тиіс. Өмірдің осы кезеңіндегі өзіңіз туралы және достарыңыз туралы әдемі естеліктерді еске алып, балаңыздың да жолы ашық боларына сеніңіз.&nbsp;
Баланы қалай дайындау керек?&nbsp;
Қазіргі студенттер – жаңа мыңжылдықта туылған балалар. Олар тумысынан компьютер мен интернетпен таныс. Олар ата-аналарына сирек сұрақ қояды, өйткені қазір бәрін олардың қатысуынсыз табуға да, сатып алуға да болады. Қазіргі студенттер ересек өмірді, ата-анасынан алыста өздіктерінен шешім қабылдап, еркін жүруді бала кезінен аңсайды. Осындай жағдай орын алмас үшін, яғни, балаңыз сіздің қамқорлығыңыздан бас тартуға асықпас үшін оған өмірдің жаңа кезеңі керемет екенін және сіз оның тәуелсіздігін қолдайтыныңызды жеткізуге тырысыңыз. Бірақ өмірден мысал келтіре отырып, әр әрекеті үшін жауапкершілік сезінуі керек екенін құлағына құйыңыз. Мысалы, сабағын дұрыс оқымай, диплом алмаса, өзі ұнатпайтын іспен айналысып, аз жалақыны қанағат тұтуға тура келетінін ескертіңіз.
Сіз студент кездегі өз тәжірибеңізбен бөлісіңіз, бірақ «Мен білемін, бұл мен үшін солай болды, сенде солай істе» деген позициядан емес, «Мен сенің қалай істейтініңді білмеймін, бірақ менімен осылай болды. Қандай жағдай болса да, мен сені қолдаймын …» деп айтыңыз.
Баланың еркін өмірге аяқ басуы трагедия емес. Алғашқы алты айда ол әр демалыс сайын ата-анасына барғысы келеді. Кейін үйренісіп кетеді.

Ата-ана баласын үлкен қаладағы өмірге қалай дайындауы керек?

Kyzylorda-news.kz. Облыс әкімі Гүлшара Әбдіқалықова өңірдегі тұрмыстық қатты қалдықтарды басқару саласындағы өзекті мәселелер бойынша арнайы жиын өткізді. Отырысқа облыс әкімінің орынбасары Бақыт Жаханов, қала әкімі Ғанибек Қазантаев пен басқарма басшылары және онлайн режимде аудан әкімдері қатысты.
Экология мәселесіне жетілікті деңгейде мән беру Президент Жолдауында нақты айтылған. Бұл ретте аймақ басшысы қала, аудан әкімдеріне 2030 жылға қарай республикалық «Жасыл экономика» тұжырымдамасына сәйкес қалдықтарды өңдеу үлесі 40%, қоқыс шығару қызметімен қамтамасыз ету 100%, экологиялық және санитарлық талапқа сай келетін полигондар санын 95%-ға жеткізу керектігін айтты.
<blockquote>
 Қазіргі таңда облыста қалдықтарды өңдеу 19%, қоқыс шығару қызметімен қамтамасыз ету 71%, экологиялық және санитарлық талапқа сай келетін полигондар көлемі 5% ғана құрап отыр. Әрине, бұл төмен көрсеткіш. Бұл жұмыстарды ұйымдастыру қала және аудан әкімдерінің тікелей міндеттері. Жұмысты жүйелі атқаруларыңыз қажет, – деді Гүлшара Әбдіқалықова.
</blockquote>
Отырыста облыстық табиғи ресурстар және табиғат пайдалануды реттеу басқармасының басшысы Бауыржан Шаменов тұрмыстық қалдықтарды сұрыптайтын полигондардың жағдайы бойынша ахуалды таразылап берді. Бауыржан Серікұлы «Жасыл экономикаға» көшу тұжырымдамасына сәйкес облысымызда қалдықтарды басқару жүйесі 3 негізгі нысаналы индикаторлар бойынша іске асатынын тілге тиек етті.
Бүгінде облыс аумағында түрлі қалдықтарды тасымалдау, жинақтау, қайта өңдеу және жою саласында 41 кәсіпкерлік субъектілері жұмыс жасайды. Ал, Қызылорда қаласындағы «Ибрайхан и К ЛТД» жаяу жүргіншілер жолына арналған төсеніштер жасап шығаруда.
Сонымен қатар, «Smart Rubber» (Смарт Раббер) ЖШС-і автокөліктердің жарамсыз дөңгелектерінен резеңке ұнтақтары мен тамшылатып суаруға арналған түтіктерді өндіруде.
Сондай-ақ, облыс орталығында «Қызылорда Қағазы», «ДаЖаЕр» ЖШС, «Август», «Аймырзаев», «Аян» жеке кәсіпкерлік субъектілері макулатура, қартон, пластмасса, пластик қалдықтарын сұрыптап, жинақтауды жүзеге асыруда.
<blockquote>
 Облыста 145 полигон болса, оның 7-уі немесе 4,82% экологиялық талаптарға сәйкес келеді. Республикада орташа көрсеткіш – 17,6% құрайды. 
 Ал, бүгінгі күні Жалағаш, Сырдария, Жаңақорған аудандарында экологиялық талаптарға сәйкес келетін полигондар жоқ. 
 2015-2018 жылдары аралығында полигон алаңдары үшін 145 елді мекенде барлығы 402 гектар жер учаскелері белгіленді. Соңғы 3 жылда 1,4 млрд. теңгеге жаңадан 2 полигон құрылысы жүргізілсе, соның 650 млн.теңгеге жеке инвестордың қаржысы есебінен жүзеге асты,-деді Бауыржан Шәменов.
</blockquote>
Экологиялық бағыттағы жұмыстың тиімділігін арттыруда стихиялық қоқыс орындарын анықтап, жедел әрекет ету мақсатында жергілікті тұрғындар үшін іске қосылған «WhatsApp» мессенджерінде «Эко-патруль Қызылорда» жобасы өзінің тиімді нәтижесін беруде. Мәселен, жыл басынан бастап (9 айда) 67 хабарлама түсіп, стихиялық қоқыс орындары анықталып, оларды жою бойынша жергілікті әкімдіктермен жедел шаралар қабылданған.
Отырыста құрылыс қалдықтарын заңсыз тасымалдайтын адамдарды анықтау, оларды жауапкершілікке тарту мәселелері қаралды. Бұл ретте Қызылорда облысының полиция департаменті бастығының бірінші орынбасары Шамшидин Амитов жыл басынан бері заңсыз құрылыс қалдықтарын тасымалдаудың 1834 дерегі анықталғанын тілге тиек етті.
Облыс әкімі қала мен аудан әкімдеріне мұндай заңсыз әрекеттерге жол бермеу қажеттігін еске салды. Сондай-ақ, қала әкіміне Белкөл кентіндегі полигонда қалдықтардың өртенуі, одан жағымсыз иістердің шығуы тұрғындар тарапынан жиі айтылатынын ескеру керектігін атап өтіп, мәселені шешуді тапсырды.
Жиында Гүлшара Әбдіқалықова қоқыс қалдықтарын жинайтын полигондардың жағдайына жеке-жеке тоқталып, аудан әкімдеріне нақты тапсырмалар жүктеді. Яғни 5 жылдық кешенді іс-шаралар жоспарын әзірлеп, «Жасыл экономикаға» көшу тұжырымдасамасының индикаторларына қол жеткізуді, экологиялық және санитариялық талаптарға сәйкес келмейтін тұрмыстық қатты қалдықтар полигондары қалпына келтіруді қажеттігін қаперге салды. Сондай-ақ, Жалағаш, Сырдария, Шиелі және Жаңақорған аудандарының әкімдері белгіленген тәртіппен полигонның және сұрыптау кешенінің жоба-сметалық құжаттамаларын әзірлеуді міндеттеді.
Отырыста айтылған тапсырамалардың орындалуын үйлестіруді орынбасары Бақыт Жахановқа жүктеді.
Айта кетейік, облыс әкімі апта басында Қызылорда қаласындағы бірқатар нысандардың жұмысын саралап, Белкөл кентіндегі тұрмыстық қатты қалдықтарды жинайтын кешеннің қызметін көріп, экологиялық бағытта қала тазалығын сақтау мәселесін ерекше тапсырған болатын.

Қазақстан және Қызылорда облысының жаңалықтары