Kyzylorda-news.kz. Ауқымды антициклон республиканың басым бөлігіне әсерін тигізеді. Сондықтан жауын-шашын жаумайды, деп хабарлайды Қазгидромет.
Дегенмен еліміздің батыс және солтүстік-батысында циклонға байланысты жаңбыр жауады. Қазақстанның солтүстігінде және шығысында тұман түседі.
Алматы облысының Алакөл ауданында жел күшейеді, екпіні 22-27, кей кезде 30 м/с асады.
Түнде және таңертең Ақмола облысының солтүстік-батысында тұман түседі.
Қостанай облысының солтүстігінде, Солтүстік Қазақстан облысының солтүстік және оңтүстік-шығысында, Шығыс Қазақстан облысының батыс және солтүстігінде тұман болады.
Түнде Павлодар облысының оңтүстігінде тұман түседі.

16 қазанға арналған ауа райы болжамы

<a href="https://kyzylorda-news.kz/ru/obshestvo/">Kyzylorda-news.kz</a>. Бүгін «Бизнеске арналған Үкімет» алаңында азаматтық штаб өкілдері облыстың кәсіпкерлерімен кездесті.
Шараға ҚР Премьер-министрі орынбасарының баспасөз хатшысы-санитарлық-эпидемиологиялық бақылау комитетінің ресми өкілі Ержан Байтанаев, азаматтық штаб мүшелері Мирас Әукенов, Серік Беркамалов және облыстық кәсіпкерлік және туризм басқармасы мен «Атамекен» кәсіпкерлер палатасы және бизнес қауымдастық өкілдері қатысты.
Аталған басқосуда Ержан Қалиұлы 2021 жылы 3 тамызда Қазақстанда коронавирус пандемиясымен күрес жөніндегі «Ел үшін егілемін» атты тәуелсіз белсенділер бірлестігі – Азаматтық штабтың құрылғандығын атап өтті. Сонымен қатар, коронавирус пандемиясына қарсы салынып жатқан екпенің қаншалықты әсер ететіні және де екпе жұмыстарының тұрақты жүргізілу керектігі жайлы сөз қозғалды. Сондай-ақ, кәсіпкерлік субъектілерімен әртүрлі бағытта мәселелер көтерілді. Шараға қатысушылар осы мәселе тұрғысында өз ойларын жеткізді.
Кездесу соңында Ержан Қалиұлы кәсіпкерлер тарапынан туындаған сауалдарға жауап беріп, аталған мәселеге байланысты пікір білдірді.

Қызылордада азаматтық штаб өкілдері кәсіпкерлермен кездесті

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Қызылордада жасөспірімді масаң күйге жеткізген азамат 5 күнге қамалып, арақ сатқан дүкеншіге айыппұл салынды.
Арал ауданының тұрғыны 39 жастағы азамат 2006 жылы туған жасөспірімге ақша беріп, дүкеннен бір шыны арақ алдырып, оған алкогольдік ішімдік ішкізіп, масаң күйге жеткізген. Азаматқа жасаған құқық бұзушылығы үшін Қазақстан Республикасы ӘҚБтК-нің 131-бабымен әкімшілік хаттама рәсімделіп, жинақталған құжаттар сотқа жолданған.
Сотта азамат өз кінәсін толықтай мойындап, істеген іс-әрекетіне өкініп, енді қайталамайтынын көрсеткен.
Жоғарыдағылардың негізінде Арал аудандық сотының 12 қазан 2021 жылы шыққан қаулысымен құқық бұзушы азамат ҚР ӘҚБтК 131 бабымен кінәлі деп танылып, оған 5 (бес) тәулікке әкімшілік қамаққа алу түріндегі жаза тағайындалды. Сонымен қатар, құқық бұзушы Қазақстан Республикасы Ішкі Істер Министрлігінің 29.12.2015 жылғы №1098 «Ішкі істер органдарының кәмелетке толмағандардың істері жөніндегі учаскелік полиция инспекторларының қызметін ұйымдастыру қағидалары» бұйрығының талаптарына сай, кәмелетке толмағандарды құқық бұзушылықтар немесе басқа да қоғамға қарсы әрекеттер жасауға тартатын адамдар санатымен ішкі істер органдарының есебіне алынды.
Ал, кәмелетке толмағанға алкоголь өнімін сатқан азық-түлік дүкенінің сатушысының әрекеті ҚР ӘҚБтК-нің 200-бабы 1-бөлімімен (Жиырма бір жасқа дейінгі адамдарға алкоголь өнімін өткізу) дәрежеленіп, сот қаулысымен құқық бұзушы кінәлі деп танылып, оған 20419 (жиырма мың төрт жүз он тоғыз) теңге айыппұл салынды.

Қызылордада жасөспірімді масаң күйге жеткізген азамат 5 күнге қамалды

<a href="https://kyzylorda-news.kz/ru/obshestvo/">Kyzylorda-news.kz</a>. Бүгін Жалағаш ауданы Таң ауылдық округінде Қызылорда облыстық ауыл әйелдерінің слеті өтті.
Слет барысында қонақтар ауыл келбетімен, кәсіпкер әйелдер өнімдерінің, ұлттық қолөнер бұйымдарының көрмелерімен танысты. Облыстық слетқа Қызылорда облыстық ішкі саясат басқармасының басшысы Мира Қазбекова модераторлық жасаса, «Сыр елі облыстық әйелдер кеңесі» үкіметтік емес ұйымының төрайымы Райкүл Байназарова, «Сыр аналары» қоғамдық қорының төрайымы Нұрсәуле Мусаева, Арал ауданындағы «Ақбұлақ» балабақшасының меңгерушісі Мейрамкүл Махатова, Шиелі аудандық Ы. Жахаев атындағы күріш өсіру тарихи музейінің директоры Құттықыз Ыханова сөз сөйледі. Сонымен қатар слет барысында сөз сөйлеген аудан әкімінің орынбасары Жасұлан Еспенбет ауыл тарихына, ауылдағы азаматтардың көмегімен атқарылған жұмыстарға тоқталып, слет жұмысына сәттілік тіледі.
<blockquote>
 «Бүгінгі слет өткізіліп отырған Таң ауылының тарихы 1928 жылдан бастау алады. Бұл ауылдағы негізгі шаруашылық – «Таң ЛТД» ЖШС. Серіктестік төрағасы облыстық мәслихат депутаты Шағыртаев Имамзада. 
 Өзі туып өскен ауылдың дамуына, халықтың жағдайының жақсаруына үлес қоссам деп еңбектеніп келе жатқан Имамзада Қуанышбайұлының бастамасымен Таң ауылы абаттанып, орталық алаң қалыптасты. Сонымен қатар «Әбжәли» мешіті күрделі жөндеуден өткізіліп, мемлекеттік жекешелік әріптестік аясында спорт кешені ғимараты салынып, заманауи «Таң бөбегі» балабақшасы бой көтерді.Тәулігіне 150 тонна күріш салысын ақтайтын күріш зауыты іске қосылып, №118 мектепке жөндеу жұмыстары жүргізілді. Бұл игілікті жұмыстардың барлығы ауылдағы әйел азаматтарымыздың, батыр аналарымыздың қолдауымен жүзеге асырылды», – деді аудан әкімінің орынбасары Жасұлан Еспенбет.
</blockquote>
Облыстық слетте ауданның әлеуметтік-экономикалық дамуына үлес қосып жүрген бірқатар кәсіпкерлер марапатталды.
Бұдан соң облыс әкімі жанындағы әйелдер істері және отбасылық – демографиялық саясат жөніндегі комиссияның отырысы өтті.
Сондай-ақ Қызылорда облыстық Қазақстан халқы Ассамблеясы жанындағы Аналар кеңесінің, Қызылорда облыстық әйелдер кеңесінің, «Сыр аналары» қоғамдық қорының жұмыстары баяндалып, білім саласы қызметкерлерімен, Аналар кеңесімен кездесулер, кәсіпкер әйелдермен семинар-тренинг өткізілді.
<img src="https://kyzylorda-news.kz/wp-content/uploads/2021/10/slet.jpg" alt="" />
<img src="https://kyzylorda-news.kz/wp-content/uploads/2021/10/slet1.jpg" alt="" />
<img src="https://kyzylorda-news.kz/wp-content/uploads/2021/10/slet3.jpg" alt="" />
<img src="https://kyzylorda-news.kz/wp-content/uploads/2021/10/slet4.jpg" alt="" />

Қызылордада ауыл әйелдерінің слеті өтті

<a href="https://kyzylorda-news.kz/ru/obshestvo/">Kyzylorda-news.kz</a>. Елімізде жыл сайын 2,5 мың адам бас және мойын қатерлі ісігіне шалдығады. Бұл Қазақстан онкологиялық және радиологиялық институының дерегі. Ал дәрігер тексеруінен өтпей, тіркелмеген науқастар бұдан да көп болуы мүмкін. Өзекті мәселе Түркістанда өткен онкологтар мен радиологтардың халықаралық съезінде талқыланды.
Премьер-министрдің орынбасары Ералы Тоғжанов пен денсаулық сақтау министрі Алексей Цой онлайн режимде қатысқан жиынға оннан аса шет мемлекеттен бірқатар білікті дәрігер келді. Бұдан бөлек еліміздің әр аймағынан жүзден аса онколог дәрігерлер қатысып, қатерлі ісік ауруларын емдеуге қатысты өз тәжірибелерімен бөлісті. Мамандар қатерлі ісік ерте анықталса, соғұрлым тез жазылатынын айтады.
<blockquote>
 «Халықты уақытылы скринингтен өтуге шақырамыз, тұрғылықты емханаларында профилактикалық тексеруден жылына бір рет өтуге шақырамыз. Бұл ауруды қаншалықты ерте сатысында анықталатын болса, онда науқастың жазылып кету мүмкіншілігі 90 проценттен жоғарылайды», – дейді Түркістан облыстық қоғамдық денсаулық басқармасының бас онкологы Қарлығаш Омарова.
</blockquote>
Екі күнге жалғасқан Қазақстанның онкологтары мен радиологтарының келелі басқосуында аурудың алдын алу мәселелері талқыланды. Себебі науқастардың басым көпшілігі кеселдің соңғы сатыларына жеткен кезде ғана дәрігер көмегіне жүгінетінін айтады. Ал аурудың үшінші және төртінші деңгейдегі сатысында ісікті жеңу өте қиын екенін алға тартады.
<blockquote>
 «Қандай симптомдары болады, қалай диагностика жасау керек. Ең бірінші мәселе, ол адамдарға жеткізу. Қалай өз-өздерін тексеру дейді. Сол мәселемен біз жиналып отырмыз. Осы проблемаларды көтерейік, осы проблемаларды орнынан қозғайық деп», – деді Алматы онкология және радиология институтының бас-мойын ісіктері бөлімшесінің меңгерушісі Мұрат Қайбаров.
</blockquote>
Дәрігерлердің айтуынша, Қазақстанда жылына 2,5 мың адам бас және мойын қатерлі ісігіне шалдығады. Бұл Қазақстан онкологиялық және радиологиялық институының дерегі ғана.
<blockquote>
 «Ал дәрігердің тексеруінен өтпей, тіркелмей жүргендердің саны бұдан да көп болуы мүмкін», – деді сьездге қатысушылар.
</blockquote>
Алайда инновациялық жаңа технологиялардың дамыған заманында қатерлі ісікті емдеудің түрлі тәсілдері қолданылуда.
<blockquote>
 «Қазір бізде онкологиялық ауруларды емдеудің үш тәсілі қолданылады. Операциялық емдеу, химия және сәулелік терапия. Ал дамыған елдердің білікті ғалымдары бас қосқан мұндай жиындар онкологиялық ауруларды емдеуге жаңа мүмкіндіктер сыйлайды. Дәрігерлер бір-бірімен тәжірибе алмасып, науқасты емдеудің жаңа тәсілдерін меңгереді», – дейді ҚР Денсаулық сақтау министрлігінің штаттан тыс бас онкологы Дилара Қайдаров.
</blockquote>
Съезд барысында Қазақ онкология және радиология ҒЗИ мамандары шетелдік хирургтармен бірлесіп онкогинекология, маммология, торакалды онкология бойынша шеберлік сағатын өткізді. Бұдан бөлек науқастарға нәтижелі ем жүргізу үшін түрлі әдістемелер ұсынылып, арнайы көрмеде заманауи құрал-жабдықтар таныстырылды. Жиын соңында Қазақ онкология және радиология ҒЗИ мен Францияның Кюри атындағы онкологиялық орталығы бірлесіп жұмыс істеу жөнінде меморандумға отырды.
<a href="https://24.kz/kz/zha-aly-tar/o-am/item/504546-elimizde-190-my-a-zhuy-adam-aterli-isikke-shaldy-an">24.kz</a>

Қазақстанда 190 мыңға жуық адам қатерлі ісікке шалдыққан

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Қызылорда облысындағы өнеркәсіп кәсіпорындарында 543 млрд. теңгенің өнімі өндірілді.
Атап айтқанда, пайдалы қазбаларды өндіру 5,3 пайыз және өңдеу өнеркәсібі 12,6 пайызды құрады. Тағы бір айта кетерлігі облыста жаңа жұмыс орындары ашылып, жұмыссыздық деңгейі төмендеген. Өңірлік коммуникациялар қызметінде өткен брифингте облыстық экономика және бюджеттік жоспарлау басқармасының басшысы Нұрғали Қордабай өңір экономикасының өсімі туралы баяндады.
<blockquote>
 «Өңірде жеңіл өнеркәсіптің өсімі 2,6 есеге өсті. Өзге де бейметалл минералдық өнімдер 2 есеге, ал тамақ өнеркәсібі 12,5 пайызды құрады. Сондай-ақ, жеңіл көлік пен жабдықтарды жөндеу және орнату 48,4 пайыз. Есепті кезеңде аймақ экономикасына 186,4 млрд. теңге инвестиция салынды. Соның ішінде құрылыс жұмыстарына 63,1 млрд.теңге бөлінді. Ал ауыл шаруашылығы өнімінің жалпы көлемі 120 млрд теңгені құрайды. Биылғы жылы 25 033 жаңа жұмыс орны ашылды. Оның ішінде тұрақты 12 372 жұмыс орыны бар. 2021 жылдың 2 тоқсанында жұмыссыздық деңгейі 4,9 пайыз болды», – деді басқарма басшысы Нұрғали Рахымшаұлы.
</blockquote>

Қызылордада 543 млрд. теңгенің өнімі өндірілді

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;ҚР Денсаулық сақтау министрі Алексей Цой Орталық коммуникациялар қызметінде өткен брифингіде БАҚ өкілдеріне «Салауатты ұлт» әр азамат үшін сапалы және қолжетімді денсаулық сақтау» атты ұлттық жобаны таныстырды, деп хабарлайды ҚазАқпарат.
«Ұлттық жоба 4 бағыттан тұрады. Бірінші бағыт медициналық көмектің қолжетімділігі мен сапасын арттыруға байланысты.
Екінші бағыт эпидемиологиялық болжау мен ден қоюдың заманауи жүйесін қалыптастыруға арналған.
Үшінші бағыт отандық фармацевтика саласының дамуына ықпал етеді.
Төртінші бағыт салауатты өмір салтын ұстанатын халықтың үлесін арттыруға және бұқаралық спортты дамытуға бағытталған», – деді министр.
Оның мәліметі бойынша, Ұлттық жобаның бірінші бағытын іске асыру үшін халықтың медициналық қызмет сапасына қанағаттану деңгейін 80% дейін арттыру көзделген.
<blockquote>
 «Ауылдық елді мекендер, оның ішінде тірек және спутник ауылдар алғашқы медициналық-санитарлық көмек ұйымдарымен 100% қамтамасыз етіледі. Кем дегенде 40 денсаулық сақтау объектісін және 2 ғылыми орталықты жаңғырту жоспарланған. Тегін медициналық көмектің кепілдік берілген көлемі мен міндетті әлеуметтік-медициналық сақтандыру жүйесі шеңберінде медициналық көмектің жалпы көлемінде амбулаториялық деңгейде медициналық көмек көлемін кеңейту қарастырылған», – деді Алексей Цой.
</blockquote>

Ұлттық жоба: 2025 жылға дейін барлық ауылда алғашқы медициналық мекеме болады

<a href="https://kyzylorda-news.kz/ru/obshestvo/">Kyzylorda-news.kz</a>. Синоптиктер 16-18 қазан күндеріне арналған ауа райы болжамын жариялады.
Қазақстан аумағына антициклон әсер етуі жалғасады. Республиканың дерлік барлық аумағында құрғақ, жылы күн райы сақталады. Еліміздің тек батыс бөлігінде ғана циклон әсерінен жаңбыр жаууы мүмкін. Батыс және оңтүстік бөлігінде жел күшейіп, шаңды дауыл болады. Республиканың батыс, солтүстік-батыс бөлігінде күндіз ауаның температурасы 12-22 градус жылы болса, солтүстік, шығыс және орталығында 13-20 градусқа дейін, ал оңтүстік, оңтүстік-шығыста 13-23 градусқа дейін көтеріледі.

Демалыста күн жылы болады

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Бүгін Қызылорда облысының әкімі Гүлшара Әбдіқалықова жасөспірімдер арасында әлем чемпионы атанған ауыр атлет Рахат Бекболатпен кездесті.
Жиынға облыс әкімінің орынбасары Серік Ахмет, облыстық ауыр атлетика федерациясының президенті Темірхан Кенжебаев және ауыр атлетикадан ҚР еңбегі сіңген жаттықтырушы Нұржан Смаханов ауыр атлетикадан 4 дүркін әлем чемпионы Илья Ильин қатысты.
17 жасар қызылордалық зілтемірші 11 қазан күні Джиддада (Сауд Арабия) өткен турнирде 102 келіге дейінгі салмақ дәрежесінде жүлделі І орын алды. Ол 355 келі салмақты еңсерді. Бұл Рахат Бекболаттың жасөспірімдер арасындағы әлем чемпионатында иеленген екінші алтыны. Бұған дейін ол Ташкентте өткен әлемдік додада 377 келіні бағындырып, жеңімпаз атанған болатын.
Кездесуде аймақ басшысы әлемдік аренада ел абыройын асқақтатып, олжалы оралған спортшыны жеңісімен құттықтап, игі тілегін арнады.
<blockquote>
 «Кезекті жеңісің құтты болсын! Бұл біздің өңіріміз үшін ғана емес, ел үшін үлкен жетістік. Әрине, жеңіс еңбексіз келмейді. Спортшыларымыздың үздіксіз жалықпай жаттығып, жарысқа жауаптылықпен қарауы мен жаттықтырушылардың дайындық процесін дұрыс ұйымдастыра білуінің арқасында осындай зор жетістіктерге қол жеткізіп отырмыз. Сыр елінің абыройын асқақ еткен Қамшыбек Қоңқабаевтан кейінгі сенің бұл жеңісің – Тәуелсіз Қазақстанның 30 жылдық мерейлі белесіндегі жүлде тайқазанына тарлан рухты сырбойылықтардың атынан салған олжалы сый болды. Сол үшін де жерлестерің өзіңе риза! Сені осындай мерейлі жеңісіңмен құттықтаймын», – деді Гүлшара Әбдіқалықова.
</blockquote>
Облыс әкімімен пікірлесу барысында байрақты бәсеке жеңімпазы Рахат Бекболат жарыс кезіндегі ерекше сәттерімен бөлісті. Қолдау көрсеткен жанкүйерлеріне алғысын білдіріп, ел мәртебесін одан әрі асыруға дайын екендігін жеткізді.
Қабылдау соңында облыс әкімі Рахат Бекболатқа жеңісі үшін Сыр жұртының атынан сый-сияпат ретінде демеушілер есебінен 1 миллион теңгенің сертификатын табыстады.
Айта кетейік, Рахат Бекболат өткен жылы Перудің Лима қаласында онлайн форматта өткен Әлем кубогында жеңімпаз атанып, ел мәртебесін асырды. Кезекті жеңісі кезінде де спортшыны аймақ басшысы қабылдап, құрмет білдірген. Ал Vesti.kz оқырмандарының таңдауымен қызылордалық ауыр атлет «2020 жылдың үздік спортшысы» атанған болатын.
<img src="https://kyzylorda-news.kz/wp-content/uploads/2021/10/245892065_3802005073235867_1450137189251933721_n.jpg" alt="" />
<img src="https://kyzylorda-news.kz/wp-content/uploads/2021/10/245816301_3802004679902573_4982466406778656927_n.jpg" alt="" />
<img src="https://kyzylorda-news.kz/wp-content/uploads/2021/10/246138077_3802004729902568_1874197849724716243_n.jpg" alt="" />

Аймақ басшысы әлем чемпионы Рахат Бекболатты құттықтады

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Сырдария ауданы Тереңөзек кентінде орналасқан аудандық орталық стадион «Ауыл ел бесігі» бағдарламасының аясында қайта жаңғыртылып, күрделі жөндеуден өтуде.
Мердігер мекеме «Астана сервис LTD» ЖШС-нің жүргізуімен күрделі жөндеу жұмыстары ағымдағы жылдың 20 қыркүйегінде бастау алған.
Стадионның күрделі жөндеу жұмыстарына 14 жұмысшы тартылған олардың 7-уі жергілікті тұрғындар.
Бүгінде стадион алаңының бордюрлары қойылып, малта тасы төселуде. Жасанды төсеніштері де құрылыс алаңына жеткізілген. Құрылыс жұмыстарының аяқталуы 2021 жылдың 30 қарашасына дейін жоспарлануда. 
Жалпы, Сырдария ауданында спортпен шұғылданушыларға әр түрлі деңгейдегі 130 нысан қызмет көрсетуде. Аудан бойынша дене шынықтыру мұғалімі және оқытушы-жаттықтырушылар саны – 230, оның 199-ы жоғарғы білімді, 30-ы арнаулы орта білімді мамандар. 574 дене шынықтыру және спорт үйірмелері жұмыс жасайды. Аудан бойынша оқушылар және тұрғындарды қоса есептегенде 11729 спортшы жүйелі спортпен айналысуда. Бұл аудан тұрғындарының 31 пайызын құрап отыр.
<img src="https://kyzylorda-news.kz/wp-content/uploads/2021/10/d-1.jpg" alt="" />
<img src="https://kyzylorda-news.kz/wp-content/uploads/2021/10/zh.jpg" alt="" />

«Ауыл ел бесігі»: Сырдарияда стадион жаңғыртылуда

<a href="https://kyzylorda-news.kz/ru/obshestvo/">Kyzylorda-news.kz</a>. Тараз қаласында өткен «Көне Тараз күмбірі» ІІ республикалық фольклорлық ансамбльдер байқауында «Дидар» халықтық фольклорлы-этнографиялық ансамблі жүлделі ІІІ орын иеленді. Салтанатты шара Қазақстан Республикасы Тәуелсіздігінің 30 жылдығы мен жыр алыбы Жамбыл Жабаевтың 175 жылдығына орай&nbsp; ұйымдастырылды.&nbsp; Байқауға еліміздің түкпір-түкпірінен 20-ға жуық өнер ансамблі қатысты.
<blockquote>
 «Байқау арқылы ұмыт болып бара жатқан бабалар мұрасы қайта жаңғырып, этно-фольклорлық ұжымдардың шығармашылық қарым-қатынасы нығаяды деп білемін. Біздің ансамбль соңғы рет 2019 жылы Түркия және Өзбекстан қалаларында Тұрмағанбет оркестрінің құрамында өнер көрсетті. Карантиннен кейін өнер додасына қайта оралдық. Бұл байқау бізге үлкен тәжірибе болды,-деді ансамбльдің көркемдік жетекшісі Мүсілім Әмзе.
</blockquote>
Айта кетейік, «Дидар» халықтық фольклорлы – этнографиялық ансамблі&nbsp; 2000 жылы наурыз айында Қорқыт Ата атындағы Қызылорда университеті жанынан құрылды. Өнер ұжымының бағдарламасында халық ән – күйі, термелері, қазақ халық композиторларының шығармалары мен шетел шығармалары да қамтылған. Ансамбльдің құрамында Құрманғазы атындағы Алматы мемелекеттік&nbsp; консерваториясы мен Қорқыт Ата атындағы Қызылорда университетінің түлектері өнер көрсетеді.&nbsp;
<img src="https://kyzylorda-news.kz/wp-content/uploads/2021/10/00.jpg" alt="" />

Қорқыт ата атындағы Қызылорда университетінің өнер ұжымы жеңімпаз қатарынан көрінді

<a href="https://kyzylorda-news.kz/ru/obshestvo/">Kyzylorda-news.kz</a>. Ел Тәуелсіздігінің 30 жылдығы аясында бүгін аймақ басшысы Гүлшара Әбдіқалықова өңірдегі белгілі жыр жампоздарымен кездесіп, ашық форматта әңгімелесіп, пікірлерін тыңдады.
Облыс әкімі кездесу алдында ұлттық өнерді айшықтайтын арнайы көрмені тамашалап, ұлттық аспаптар мен бірнеше жыр-жинақтарымен танысты.
Келелі басқосуда Гүлшара Әбдіқалықова дәстүрлі өнер өкілдерінің Сыр еліндегі рухани-мәдени дамуына қосқан үлестерін жоғары бағалап, ұлттық өнердің жанашырларына құрметін жеткізді.
<blockquote>
 «Елбасымыз Нұрсұлтан Әбішұлы Назарбаев «Өркениетті ұлт ең алдымен тарихымен, мәдениетімен, ұлтын ұлықтаған ұлы тұлғаларымен, әлемдік мәдениеттің алтын қорына қосқан үлкенді-кішілі үлесімен мақтанады. Сөйтіп, тек өзінің төл мәдениеті арқылы ғана басқаға танылады» – деп атап өткендей, халқымыздың ерекше қадірлейтін дарынды тұлғалары қасиетті мұраларды тудырушы, жасаушы және келер күндерге ұластырушы таланттар қатарында жыраулар мен жыршылардың қай заманда да бәсі жоғары, шоқтығы биік. Қорқыт бабадан бастау алған жәдігер өнерді жалғастырушы Сыр сүлейлерінің әрқайсысы бір-бір жеке философиялық мектеп, әрқайсысы дүниетанушы ұлттық тәлімгер екенін ескерсек, бұл қастерлі өлке ұлт руханиятының алтын діңгегі деуге болады. Қасиетті де киелі Сыр бойы – біріне-бірі өмірде жол, өнерде қол берген атақты Сыр сүлейлері шыққан өңір. Дәстүрлі өнердің дарабоз иелері ретінде жанашырлары ретінде бүгінгі өздеріңізбен жүздесіп, руханият саласының өткені, бүгіні, келешегі жөнінде келелі ойлар айтып, емен жарқын пікірлесу үшін жиналдық», – деді облыс әкімі.
</blockquote>
Өңір басшысы еліміз егемендік алған жылдар ішінде ұлттық өнердің осы түріне ерекше көзқарас қалыптасқанын тілге тиек етті. Сондай-ақ, Ел Президенті Қасым-Жомарт Тоқаев «Тәуелсіздік бәрінен қымбат» атты мақаласында «Ұлттық болмысымыздан, төл мәдениетіміз бен салт-дәстүрімізден ажырап қалмау – барлық өркениеттер мидай араласқан аласапыранда жұтылып кетпеудің бірден бір кепілі» екендігін, Тәуелсіздік жылдарында жүзеге асырылған «Мәдени мұра» бағдарламасы арқылы тарихымызды түгендеп, ұлттық дәстүріміз бен мұраларымыздың қайта жаңғырғанын тағы бір еске салды.
Кездесу барысында «Парасат» орденінің иегері, Қазақстанның еңбек сіңірген қайраткері Алмас Алматов облыс әкіміне дәстүрлі өнерге көрсеткен қамқорлығы үшін алғыс білдіріп, осы кезге дейін ұсыныс ретінде айтылған Түркітілдес халықтарының дәстүрлі өнер академиясында ән, күй, жыр, айтыс, би бағыттары бойынша жастарға грант бөлуді ұсынды.
Ал, жыршы, Мәдениет қайраткері төсбелгісінің иегері Берік Саймағамбетов Қызылорда қаласында «Сыр сүлейлері музейін» ашу туралы ұсыныс айтса, дәстүрлі әнші Ақмарал Ноғайбаева облыс әкімінен Нартайдың шығармашылығына экспедициялық зерттеу жұмыстарын жүргізуге ықпал етуін сұрады. Сондай-ақ, жыршы, Қорқыт мұрасын насихаттаушы Марат Сүгірбай дәстүрлі өнер кеңінен насихатталуына, өзге өңірлерде Сыр елінің еріктілерінің өнер көрсетуге қолғабыс етуді ұсынды.
Жыраулық өнерді жалғастырушы азаматтардың пікірлерін саралаған облыс әкімі ұлттық өнерді дамытуға оң серпін беретін әрбір ұсыныстың байыпты түрде қаралатынын қаперге салды.
Кездесуде Гүлшара Әбдіқалықова жыршы, жырау Алмас Алматов пен Жиенбай жыраудың ұрпағы Бидас Рүстембековты мерейтойымен құттықтап, Сыр елі жұртының атынан қазақы дәстүрмен иығына шапан жапты. Сондай-ақ, бірқатар өнер саңлақтарына құрмет төрінен көрінді.
ҚР Мәдениет және спорт министрлігінің «Мәдениет саласының үздігі» төсбелгісімен Шолпан Бимбетова, Серік Жақсығұлов, Айбек Тәңірбергенов марапатталды. Ал, министрліктің Құрмет грамотасын Марат Сүгірбай мен Нұртілек Ахтаев иеленді. Сондай-ақ, бірнеше өнер жанашырлары облыс әкімінің Алғыс хатына ие болды. 
Жүздесу соңында өнер қайраткерлері Марат Сүгірбай және Мұхаметәлі Бекпейісов жыр шашу орындап, ақын Айдос Рахметов арнау арнады.
Айта кетейік, өнер зерттеушілері Мардан Байділдаев, Алма Құнанбаева, Алмас Алматовтың тынымсыз еңбегінің арқасында Сыр бойында мақам-саздық ерекшеліктеріне қарай төрт жыраулық мектеп – Нұртуған, Жиенбай, Нартай, Сәрсенбай жырау мектептері қалыптасып, дәстүрлі өнердің өрісі кеңіп, қанаты қатайды.
Өңірдегі «Жыр мұра» жобасы аясында ашылған жыр-терме, қобыз сынды 50-ден аса үйірмеде 500-ден аса шәкірт тәрбиеленуде. Үйірмелерден шыққан өнерпаздар республикалық, халықаралық деңгейдегі жыр додаларында жүлделі орындарды иеленумен қатар, дәстүрлі өнер мамандықтары бойынша арнаулы, жоғары оқу орындарында білім алуда.
Биылғы жылы да Қорқыт ата атындағы Қызылорда университеті жанындағы «Дәстүрлі өнер» институтына дарынды жастарды оқытуға облыстық бюджеттен 6 грант бөлінді. Сонымен қатар, Сыр өңірінің жыраулық дәстүрін насихаттап жүрген орта және жас буын жыршыларымыз «Qazaqstan» ұлттық арнасының «Күміс көмей», «Хабар» телеарнасының «Алтыбақан» бағдарламаларына қатысып, алтын қорға жазылып алынса, жыршы Күнсұлу Түрікпен халықаралық «Мен қазақпын» мега жобасында дәстүрлі өнер номинациясы бойынша Бас жүлдені иеленді.
Биыл Ел Тәуелсіздігінің 30 жылдығы, Сыр сүлейі Кете Жүсіп Ешниязұлының 150 жылдығына арналып өткен «Жырлансын, Тәуелсіздік жыр бұлағы» атты жыршы-жыраулар байқауы жыраулық дәстүрді бойына сіңірген талантты жыр жауһарларының өсіп келе жатқандығын, рухани сабақтастықтың жалғастығы бар екендігін дәлелдеді.
Келер жылы Сыр шайырлары Базар Жырау Оңдасұлының 180 жылдығы, Тұрмағамбет Ізтілеуұлының 140 жылдығын атап өтіп, дәстүрлі «Қорқыт және Ұлы Дала сазы» халықаралық фольклорлық-музыкалық өнер фестивалін ұйымдастыру жоспарлануда.
<img src="https://kyzylorda-news.kz/wp-content/uploads/2021/10/oblys1.jpg" alt="" />
<img src="https://kyzylorda-news.kz/wp-content/uploads/2021/10/oblys2.jpg" alt="" />
<img src="https://kyzylorda-news.kz/wp-content/uploads/2021/10/oblys3.jpg" alt="" />
<img src="https://kyzylorda-news.kz/wp-content/uploads/2021/10/oblys4.jpg" alt="" />
<img src="https://kyzylorda-news.kz/wp-content/uploads/2021/10/oblys5.jpg" alt="" />
<img src="https://kyzylorda-news.kz/wp-content/uploads/2021/10/oblys6.jpg" alt="" />
<img src="https://kyzylorda-news.kz/wp-content/uploads/2021/10/oblys7.jpg" alt="" />

Қазақстан және Қызылорда облысының жаңалықтары