<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Облыстағы эпидемиологиялық жағдай тұрақталып келеді. Бүгінде өңір «жасыл» аймақта. Дегенмен, сақтық шараларына салғырт қарауға әлі ерте. Өңірімізде індет тіркелгелі бері коронавирус инфекциясымен 19 019 науқас анықталды. Ал өткен тәулікте коронавирустың 15 жағдайы анықталды. Жалпы емделіп шыққандар саны 96 пайызды құрайды. Бүгін Өңірлік коммуникациялар қызметінде өткен баспасөз конференциясында облыс әкімінің орынбасары Балжан Шәменова облыс тұрғындарын коронавирус және Орви инфекцияларынан барынша сақтануға шақырды.
<blockquote>
 «Денсаулық сақтау саласының басты бағыты – тұрғындарға сапалы медициналық көмек көрсету болып табылады. Бүгінгі күні қажетті медициналық құрал-жабдықтар, төсек-орындар дайындығы және дәрілік заттармен қамтамасыз ету жолында қарқынды жұмыстар атқарып келеміз. Медициналық құралдармен жабдықталу індет басталған тұста 66 пайызды құраса, биыл 76 пайызды қамтыды. Күшейтілген карантиндік режимді іске асыру барысында коронавирус инфекциясымен күресте қарқынды жұмыстар жүргізілуде. Облыста эпидемиологиялық ахуал тұрақталып келеді. Атқарылған жұмыстардың нәтижесінде аурудың таралуы бір деңгейде сақталуда. Аталған індетпен күресте облыстық медициналық ұйымдар толығымен дайын. Алдағы уақытта аталған жұмыстар жалғасын табатын болады. Бүгінде вакцинациялау науқаны бойынша Қызылорда облысы бесінші орында. Сондықтан да облыс тұрғындарын аурудан сақтанып, дер кезінде екпе алуға шақырамын», – деді облыс әкімінің орынбасары Балжан Мөрәліқызы.
</blockquote>
Балалар арасында тұмау мен пневмония көбеюіне байланысты медицина саласының мамандары ата-аналар мен облыс тұрғындарын сақтануға шақырды. Қазіргі таңда қалалық көпбейінді ауруханада балалар саны көбейгенін атап өтті.
Облыстық денсаулық сақтау басқармасының басшысы Сәбит Пазыловтың айтуынша, соңғы күндері ауа райының тұрақсыздығына байланысты ЖРВИ, тұмау ауруларының таралуы күрт көбеюде. Тыныс алу аурулары күрт өскен жағдайда ауруханада негізгі емдеу орындарына қосымша төсек орын саны көбейіп отырады. Көпбейінді облыстық балалар ауруханасы мен облыстық жұқпалы аурулар ауруханасындағы төсек орындар саны толық. Осыған байланысты, қалалық босану орталығынан 40 төсек орын өз жұмысын бастады. Ол жерде дәрі-дәрмекпен, кислородты концентратормен толық қамтамасыз етілген. Қазіргі таңда облыста ЖРВИ, тұмау, пневмония аурушаңдығы бойынша 3 327 бала толық емделіп шыққан.
<blockquote>
 «Биыл облыс көлемінде жедел респираторлы вирусты инфекциясының 19 851 жағдайы есепке алынып, 100 мың халыққа шаққандағы аурушаңдық көрсеткіші – 2414,0 құрады. Бұл өткен жылдың осы мерзімімен салыстырғанда – 26,9 пайызға жоғарлағанын білдіреді. Зертханалық жолмен нақтыланған тұмау ауруының деңгейі 187 жағдайға дейін төмендеген. Жыл сайын тұмау емес вирустардың қоршаған орта айналымын бақылау мақсатында жедел респираторлы вирусты инфекциясының 46 науқастың сынамасы ПЦР әдісімен тексерілді. Нәтижесінде 3 сынамада тұмау емес вирустар анықталды», – деді облыстық санитарлық-эпидемиологиялық бақылау департаменті басшысының орынбасары Әлия Әбдіқайымова.
</blockquote>
Айта кету керек, 8-17 қараша аралығында өңірімізге Pfaizer вакцинасының 17 мың дозасы жеткізілмек. Барлығы 97 мың доза алынады деп жоспарлануда. Алдымен, екпе 17-18 жастағы жасөспірімдерге салынады. Бірақ, міндетті түрде ата-анасының келісімі алынады. Ал, жүктілігі 16-37 аптадан асқан жүкті әйелдер де вакцина салдыруына болады.

Балжан Шәменова: Сақтық шараларына салғырт қарауға әлі ерте

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Облыс әкімі Гүлшара Әбдіқалықованың төрағалығымен әлеуметтік маңызы бар азық-түлік пен азық-түлік емес тауарлардың бағасын тұрақтандыру бойынша кеңейтілген отырыс өтті. Жиынға облыс әкімінің орынбасарлары, тиісті салалық басқарма мен департамент басшылары және онлайн режимде қала, аудан әкімдері қатысты.
Жиынның күн тәртібінде 3 мәселе қаралды. Атап айтқанда, облыстағы тұтыну бағасының индексі, әлеуметтік маңызы бар азық-түлік пен азық-түлік емес тауарлардың бағаларын ұстап тұруға бағытталған шараларды саралау.
Алдымен облыс бойынша статистика департаментінің басшысы Мәриям Баекеева атқарылған жұмыстар бойынша есеп беріп, нақты көрсеткіштерге тоқталды.
Облыста тұтыну бағаларының индексі өткен жылдың осы кезеңімен салыстырғанда 106,8% құрады. Азық-түлік тауарларына бағалар – 8,3%, азық-түлік емес тауарларына – 6,7%, халыққа арналған ақылы көрсетілетін қызметтер – 4,9%-ға өскен.
Отырыс барысында аймақ басшысы Президент Қасым-Жомарт Тоқаевтың Үкіметке және Ұлттық банкке инфляцияны 8,5 пайыз деңгейінде ұстап тұру тапсырмасына сәйкес өңірдегі көрсеткішті осы межеге жеткізу керектігін тілге тиек етіп, жауапты сала басшыларына бірқатар міндеттемелер жүктеді.
Күн тәртібіндегі екінші мәселе бойынша облыстық ауыл шаруашылығы басқармасының басшысы Талғат Дүйсебаев негізгі азық-түлік бағаларын тұрақтандыру мәселесіндегі басты басымдықтарды атады.
Аймақта бағаның негізсіз өсуіне жол бермеу үшін облыстың тұрақтандыру қорынан тауарлық интервенциялар жүргізу механизмі қолға алынған. Нәтижесінде, тұрақтандыру қорында 189,1 млн. теңгенің 1161,4 тонна тауарлары сақталып отыр. Ал, 19 әлеуметтік маңызы бар өнімдері бойынша үш айлық қажеттілік 68,3 мың тоннаны құраса оның жеткізілуі 59,2 мың тоннаны құрады. Осы қажетті өнім көлемін облыс бойынша қамтамасыз ету үшін «Байқоңыр» ӘКК» АҚ арқылы 1685,4 тонна әлеуметтік маңызы бар өнімдерді жеткізу бойынша келісім алынса, 1900 тонна өнімді мемлекеттік сатып алу арқылы жүргізу жоспарланды.
Өңірде азық-түлік бағаларына деген қолжетімділікті арттыру үшін жәрмеңкелер ұйымдастыру қолға алынды. Жыл басынан бері тұрғындар үшін тұрақты түрде 35 рет ауыл шаруашылығы жәрмеңкесі өткізілді.
Талғат Тұрсынұлы бекітілген шекті мәннен бөлшек сауда бағасы 15%-дан жоғарылаған өнімдерге шекті бағаларды облыс әкімдігімен бекіту жөнінде 2021 жылдың 6 қыркүйегінде шешім ұсынып, қаулы жобасын әзірлеу бойынша жұмыстар жүргізілгенін тілге тиек етті. Мәселен, күнбағыс майын 781 теңге, пиязды 106 теңге, сәбізді 221 теңге, картопты 158 теңде және қантты 286 теңге көлемінде бекіту мәселесін қарау ұсынылды. 
Жиын барысында облыс әкімі азық-түлік бағасының өсуі халықты алаңдатып отырған өзекті мәселе екенін назарға салып, қала және аудан әкімдеріне нанның орташа бағасын 90 теңгеден асырмау қажет екенін қаперге салды. Бұл бағытта тиісті мониторинг жұмыстары ұдайы түрде жүргізілмек.
<blockquote>
 «Қазіргі уақытта халықты өте алаңдатып отырған өзекті мәселе – азық-түлік бағасының өсуі. Мұны реттеу мақсатында әр аптаның сенбі күндері Премьер-министр Асқар Ұзақбайұлы Маминнің төрағалығымен мәжілістер өткізілуде. Жыл болса аяқталып қалды, желтоқсан айындағы мерекелер қарсаңында әдеттегідей сауда-саттық көлемі ұлғайып, әсіресе азық-түлік бағаларының өсу қаупі болады. Сондықтан осы мәселелердің алдын-алу шараларын қарастыруымыз қажет. 
 Үкіметтің тапсырмасына сәйкес азық-түлік тауарларына баға белгілеудің бүкіл тізбегі бойынша делдалдық схемаларды тексеру жөніндегі комиссияның құрылғанына 1 айдан астам уақыт өтті. Дегенмен комиссия аясында жүктелген міндеттер бүгінге дейін орындалмай отыр. Қызылорда қаласы мен аудан әкімдері тиісті жұмыстарды апта соңына дейін аяқтап, ақпаратты ауыл шаруашылығы басқармасына жолдасын. Жауапты басқарма басшысы бәсекелестікті қорғау және дамыту департаментіне жинақталған ақпаратты жолдап, нәтижесін маған баяндайды. Ал, Бәсекелестікті қорғау және дамыту департаменті азық-түлік тауарларының бағаларына талдау жүргізіп, нәтижесімен, заң бұзушылық анықталған жағдайда Қызылорда қаласы және аудан әкімдіктеріне ұсыныс енгізуі қажет. Жұмыс та, абырой да ортақ, сондықтан бұл жерде бірлескен жұмыс қажет», – деді Гүлшара Әбдіқалықова.
</blockquote>
Жиында қаралған үшінші мәселе бойынша облыстық кәсіпкерлік және туризм басқармасының басшысы Фердоуси Қожабергенов азық-түлік емес тауарларының бағасына қатысты негізгі көрсеткіштерді тізбеледі. 
Биыл азық-түлік емес тауарлардың бағасы өткен жылдың есепті кезеңімен салыстырғанда 6,7 пайызға өсті. Тұрмыстық, құрылыс тауарларына қарағанда өсім жанар-жағармай бағасында байқалуда.
Аймақ басшысы азық-түлік емес тауарлардың бағалары да жалпы инфляцияға үлкен әсерін ететінін атап өтті. Мәселен, өткен жылғы пандемия кезіндегі карантиндік шаралар уақытша сауда-экономикалық байланыстардың үзілуіне әкеліп, тауар, шикізаттардың тапшылығының салдарынан республикалық нарықта негізсіз баға көтерілуіне әкелді. Әсіресе, жанар-жағармай бағасының өсуі мен тапшылығына байланысты халық арасында шағымданушылар көп. Осы ретте аймақ басшысы энергетика басқармасының басшысына басты өзгерістерге сай тұрғындарға қажетті түсіндіру жұмыстарын күшейту қажет екендігін тапсырды.
Облыста ақылы қызмет көрсету бағаларында да өсім байқалады. Өткен жылдың осы кезеңімен салыстырғанда комплекстік демалысты ұйымдастыру 31,4 пайызға, жолаушылардың әуе тасымалы 17,5 пайызға, пошталық қызмет 12,5 пайызға өскен. Дегенмен тауарлардың бағасына делдалдардың қызметі кері әсерін тигізуде. Осыған байланысты облыс әкімі Гүлшара Әбдіқалықова азық-түлік емес тауарлар бағасын реттеу бойынша делдалдық схемаларды тексеру қажеттігін атап өтті.
Жиынды қорытындылаған облыс әкімі тамақ өнімдеріне қатысты әсіресе халық жиі тұтынатын 19 түрлі тауарлар бағасының шекті бағадан асып кетпеуі үшін бақылауды күшейтіп, күн сайын мониторинг жүргізуді міндеттеп, нақты тапсырмалар берді.
Облыс көлемінде азық-түлік қорларын қалыптастыруды және тұрақтандыру қорының және айналым схемасы арқылы заем беру арқылы бағаны тұрақтандыру, әлеуметтік маңызы бар азық-түлік тауарларының бағаларына талдау жүргізіп, заң бұзушылық анықталған жағдайда қала және аудан әкімдіктеріне тиісті шараларды қабылдау тапсырылды. Сондай-ақ, әлеуметтік маңызы бар 19 тауардың сауда үстемесі 15 пайыздан асырмауын қамтамасыз етіп, бағаны тұрақтандыру үшін қосымша қаржы бөлу мүмкіндіктерін қарастыру жүктелді.

Әлеуметтік маңызы бар тауарлардың бағасын тұрақтандыру мәселелері қаралды

&nbsp;<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Өткен тәулікте Қазақстанда коронавирус инфекциясын жұқтырған 909 жағдай тіркелді.
Елімізде коронавирус инфекциясын жұқтырғандар саны 950 539 жетті.
Оның ішінде:
Нұр-Сұлтан қаласында – 109,
Алматы қаласында – 79,
Шымкент қаласында – 16,
Ақмола облысында – 76,
Ақтөбе облысында – 4,
Алматы облысында – 61,
Атырау облысында – 9,
Шығыс Қазақстан облысында – 50,
Жамбыл облысында – 15,
Батыс Қазақстан облысында -10,
Қарағанды облысында – 109,
Қостанай облысында – 83,
Қызылорда облысында – 7,
Маңғыстау облысында – 3,
Павлодар облысында – 133,
Солтүстік Қазақстан облысында – 135,
Түркістан облысында – 10.Жалпы ел бойынша ауырғандар саны 950539.

Қызылордада вирус жұқтырғандар саны азайып келеді

<a href="https://kyzylorda-news.kz/ru/obshestvo/">Kyzylorda-news.kz</a>. Қазгидромет 8 қарашада арналған ауа райы болжамын жариялады.
Қазақстан территориясының басым бөлігінде жауын-шашынсыз ауа райы сақталады.Тек батысында, елдің оңтүстігі мен оңтүстік-шығысының таулы аудандарында атмосфералық ауа ағындарының өтуіне байланысты жауын-шашын (жаңбыр, қар) күтіледі. Еліміздің батысында, солтүстік-батысында, шығысында, оңтүстік-шығысында желдің күшейіп, оңтүстік-батысында және оңтүстік шығыстың таулы аудандарында тұман түседі.

9 қарашаға арналған ауа райы болжамы

Kyzylorda-news.kz. Соңғы уақытта облыста электрмен қамту жүйесінде арнаулы шектеу қойылуда. Негізгі себебі – электр энергиясының тапшылығына байланысты болып отыр. Осы себепті бірнеше елді-мекендерде 17:30 дан 20:30-ға дейін электр энергиясы уақытша шектеледі. Бұл туралы Өңірлік коммуникациялар қызметінде өткен брифингте облыстық энергетика және тұрғын үй-коммуналдық шаруашылық басқармасының басшысы Ерлан Жаңабаев мәлімдеді.
Ерлан Мақсотұлының айтуынша, облыстың жалпы электр энергиясын тұтыну көлемі шамамен 172 МВ құрайды. Оның 29 пайызы «Қызылорда жылу электр орталығы» мекемесі қамтыса, 6 пайызы «СКЗ-U» ЖШС өндіреді. Қалған 65 пайызы сырттан алынады. Электр энергиясымен қамтамасыз ететін «Самұрык-Энерго» акционерлік қоғамына қарасты Екібастұз ГРЭС-1, ГРЭС-2 және Мойнақ ГЭС электр станцияларының электр энергиясын өндіру көлемінің шамадан тыс жүктелуіне байланысты шектеулер қойылды. Бұндай шектеулер облыста 3 қарашадан басталды. Алдағы уақытта оңтүстік аймақтарда электр энергиясын өндіруші станциялардағы энергия тапшылығы және қуаттың жетіспеушілігінен уақытша шектеулердің орын алатындығын хабарлаймыз. Шектеулер уақыты 17:30-дан 20:30-ға дейін болады.
<blockquote>
 «Шектеудің негізгі себебі – еліміз бойынша электр қуаты жетіспеуде. Өйткені, Мойнақ су электр станциясында ақаулар пайда болды. Бұл уақытша екенін айтқым келеді. Қазір оңтүстік өңірлер бойынша орта есеппен 200 МВ шамасында жетіспейді. Шектеулер келесі елді мекендерде жүргізілуде: Арал АЭТ – Аманөткел, Көктем, Аққұлак, Бөген, Ақлақ, Қарашалаң, Жаңақұрылыс. Қазалы АЭТ – Басықара, Ақсуат, Байқожа, Майлыбас, Кожабақы, Түктібаев, Бекарыстан би, Кәукей, Бозкөл, Өркендеу, Майдакөл, Жалпақ, Бірлік, Аранды, Қазалы қаласы. Қармақшы АЭТ – Қорқыт, Төребай би, III-Интернационал, Жаңажол, Қуаңдария, Жаңақала, Иіркөл, Ақжар, Тұрмағанбет, Ақтөбе, Көмекбаев, Алдашбай Ахун. Жалағаш АЭТ – Шаменов, Қаракеткен, Далдабай, Таң, Жаңаталап, Мәдениет, Аққыр, Мақпалкөл, Мырзабай, Еңбек, Бұхарбай батыр, Жаңадария, Ақарық. Тереңөзек АЭТ – Іңкәрдария, Ақжарма, Қарақасқа. Шиелі АЭТ – Алмалы, Ботабай, 1-май, Бірлестік, Бестам, Қарамұрын, Сұлутөбе, Бала би, Тартоғай, Досбол би, Қарғалы, Жансейіт, Телікөл. Қызылорда қаласы бойынша КБИ, Коммунизм, Шанхай, Наурыз, Сабалақ, Сәулет, Саяхат, Шұғыла, Белкөл, Водозобор, Астана-1 мөлтек ауданы», – деді «Қызылорда электр тарату тораптары» компаниясы АҚ басқарма төрағасы Мұхиджан Исмайылұлы.
</blockquote>

Қызылордада электр энергиясына шектеу қойылады

<a href="https://kyzylorda-news.kz/ru/obshestvo/">Kyzylorda-news.kz</a>. Қазалы ауданына қарасты Ақжона ауылдық округінің орталығы – Майдакөл елді мекенінде ауыл күні кең көлемде аталып өтілді. Мерекелік шараға осы қасиетті жерде туып-өскен азаматтар көптеп жиналды.
Орталық саябақта өткен салтанатты шарада аудан әкімі Мұхтар Оразбаев құттықтау сөз сөйлеп, Майдакөл ауылында атқарылған жұмыстарды тілге тиек етті.
«Қасиетті Қазалы ауданыТәуелсіздіктің 30 жылдық мерейтойына толымды табыстармен жетіп отыр. Тәуелсіздіктің 30 жылдығы ішінде қазақ халқының жүрегі саналатын ауылдарға көп көңіл бөлінді. Оны бүгінгі Майдакөл ауылының тұрғындары да сезініп жатыр деп ойлаймын.
Біріншіден Тәуелсіздіктің арқасында Сырдария өзенінің «Әлсейіт» өткеліне темір бетон көпірі салынып, пайдалануға берілді. Бұл көпірді аудан халқы ғасырлар бойы армандады десек артық айтқандық емес.
Екіншіден ауылдағы біздің болашағымыз – балалар білім алатын мектеп ғимараты заманауи талаптарға сай салынған. 2020 жылы Майдакөл ауылында абаттандыру жұмысы жүргізіліп, ауыл орталығынан саябақ салынды.Одан бөлек биыл ауылдағы ауыз су сервистік желіге қосылды.
Биыл Майдакөл ауылындағы электр желілеріне жөндеу жұмыстарын жүргізуге қаржы бөлініп, нәтижесінде 7,8 шақырым электр желісі мен 217 дана темір бетон бағаналары орнатылды.Жақында ғана Ақжона ауылдық округіне қарасты Жалпақ елді мекенінде медициналық бекеттің құрылысы басталды», – деген аудан басшысы ауқымды жұмыстар алдағы уақытта өз жалғасын таба беретін жеткізді.
Мұнан соң туған жердің өсіп-өркендеуіне белсене атсалысып, ауыл мәдениетін көтеруге өлшеусіз үлес қосқан бірқатар майдакөлдік азаматқа «Алғыс хат»тапсырып, ризашылығын білдірді.
Ауыл күні аясында «Жиенбай ишан» мешіті пайдалануға берілді. Осы елден шыққан азаматтар мен ауыл тұрғындарының күшімен салынған имандылық үйінің ашылу салтанатында Қазалы ауданының құрметті азаматы Самұрат Имандосов, философия ғылымдарының докторы Баймырза Қожамберлиев бастаған азаматтар құттықтау сөз сөйлеп, игі тілектерін жеткізді.
Бұл күні спорттың сан түрінен сайыстар ұйымдастырылды. Оған ауданымыздың әр түкпірінен келген спортшылар бақ сынады. Ұйымдастырушылар жарыс жеңімпаздарына қомақты ақшалай сыйлықтарды табыстады.
<img src="https://kyzylorda-news.kz/wp-content/uploads/2021/11/252950277_3198923896995202_1304458661062198304_n.jpg" alt="" />
<img src="https://kyzylorda-news.kz/wp-content/uploads/2021/11/252941291_3198924216995170_331105646395755138_n.jpg" alt="" />
<img src="https://kyzylorda-news.kz/wp-content/uploads/2021/11/253704625_3198923953661863_5537731502972516823_n.jpg" alt="" />
<img src="https://kyzylorda-news.kz/wp-content/uploads/2021/11/253739707_3198924073661851_5464565817642720977_n.jpg" alt="" />
<img src="https://kyzylorda-news.kz/wp-content/uploads/2021/11/253518681_3198925480328377_70818437228161145_n.jpg" alt="" />

Елдің бірлігі берекеге бастайды

<a href="https://kyzylorda-news.kz/ru/obshestvo/">Kyzylorda-news.kz</a>. 10 қараша, сәрсенбі күні сағат 10.00 де «Достық» үйінде ел тәуелсіздігінің 30 жылдығына орай «Nur Otan» партиясы, «Qazaq Epos» қоғамдық қоры және ҚР Білім және ғылым министрлігінің ұйымдастырумен 6-10 сынып оқушылары арасында өтіп жатқан республикалық «Тұлпар мініп, ту алған!» байқауының облыстық кезеңі өтеді.
Бұл кезеңде байқаудың қала, аудандық кезеңдерінде жеңімпаз болған 24 оқушы сынға түседі. Талапкерлер «Едіге батыр» жырын жатқа айтудан жарысады.
Байқауға қатысушы балалардың денсаулығына қауіп төндірмеуді ескере отырып, ата-аналар мен басқа да жанкүйерлердің карантин талаптарын қатаң сақтауын сұраймыз.
Байқау «Nur Otan» партиясы облыстық филиалының әлеуметтік желілердегі ресми парақшаларынан тікелей эфир арқылы көрсетіледі.

«Тұлпар мініп, ту алған!» байқауының облыстық кезеңі өтеді

<a href="https://kyzylorda-news.kz/ru/obshestvo/">Kyzylorda-news.kz</a>. Мемлекет және қоғам қайраткері,&nbsp;тарих ғылымдарының докторы,&nbsp;профессор,&nbsp;Қазақстан Республикасының Еңбек сіңірген қызметкері&nbsp;Өмірзақ Озғанбаев Сыр еліне арнайы іс-сапармен келіп,&nbsp;Қорқыт Ата атындағы Қызылорда университетінің ұжымымен кездесті.
Жиында университеттің ректоры Бейбіткүл Кәрімова Өмірзақ&nbsp;Озғанбаевтың&nbsp;елді дамыту, сала жұмыстарын жандандыру бағытында айрықша еңбек сіңіргенін атап өтті.
Кездесуге облыстық ардагерлер кеңесі төрағасының орынбасары
Күләй Ермағамбетова, Қызылорда қалалалық ардагерлер Кеңесінің төрағасы Сұлтанбек Тәуіпбаев, университет ардагерлері, профессор-оқытушылары және жас ғалымдар мен студенттер қатысты.
Айта кету керек, Өмірзақ Озғанбайұлы еңбек жолын білім беру саласынан бастап, «Білім» облыстық ұйымы төрағасының орынбасары, Маңғыстау облыстық педагог кадрларды даярлау, кәсіптік оқыту басқармасының Өңірлік институтының директоры, Қазақ КСР Білім және ғылым министрлігінің Ұлттық оқыту орталығының директоры, Маңғыстау облысы Білім департаментінің басшысы, Ы.Алтынсарин атындағы Қазақ білім беру академиясының президенті, Т.Рысқұлов атындағы Қазақ экономикалық университетінің проректоры қызметтерін атқарды.
1994-1995 жылдары Қазақстан Білім және Ғылым жөніндегі министрлігінің жаңа технологиялар комитетінің мүшесі, 1996-1999 жылдары ҚР Парламенті Сенатының депутаты, Аймақтық даму және жергілікті басқару комитетінің төрағасы ретінде жауапкершілігі өте жоғары, ауқымды жұмыстарды жүргізді. «ҚазМұнайГаз барлау және өндіру» АҚ бас директорының кеңесшісі, «Рауан Медиа Груп» АҚ бас директорының кеңесшісі, республикалық «Ардагерлер ұйымы» Орталық кеңесінің төрағасы ретінде де еліміз үшін маңызды мәселелердің шешілуіне атсалысты.
Бүгінде «Ардагерлер ұйымы» Республикалық қоғамдық бірлестігі Орталық кеңес төрағасының орынбасары қызметін атқарады.

Өмірзақ Озғанбаев Қорқыт ата атындағы Қызылорда университетінің ұжымымен кездесті

<a href="https://kyzylorda-news.kz/ru/obshestvo/">Kyzylorda-news.kz</a>. «Халық санағы-2021» аясында жүргізілген нақтылау жұмыстары аяқталды. Нәтижесінде 19,6 миллионнан аса респондент қамтылды.
Негізгі кезеңде қандай да бір себептермен санаққа қатыса алмаған азаматтарға арнайы sanaq.gov.kz сайты мен e-Gov порталы және Aitu мобильді қосымшасы арқылы санақ сауалдарын толтыру мүмкіндігі берілді. Қазір ұлттық статистика бюросы деректерді өңдеуге кірісті.
Айта кетерлігі, респонденттердің 42 проценттен астамы онлайн-санақ функциясын пайдаланды.
<a href="https://24.kz/kz/zha-aly-tar/o-am/item/509012-khaly-sana-y-2021-ayasynda-zh-rgizilgen-na-tylau-zh-mystary-aya-taldy">Хабар 24</a>

«Халық санағы-2021» аясында жүргізілген нақтылау жұмыстары аяқталды

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда қаласындағы Толыбеков – М.Әуезов көшелері қиылысында жаяу жүргіншілер өткелінен&nbsp; келе жатқан жасөспірімді белгісіз автокөлік қағып, оқиға орнынан бой тасалаған.
Облыстық балалар ауруханасынан «102» арнасына жол көлік оқиғасы салдарынан дене жарақатымен жасөспірім түсті деген хабарлама түскен.
Орын алған ЖКО бойынша жедел түрде іздестіру&nbsp; шаралары&nbsp; басталып,&nbsp; оқиға орнынан сұрастыру жұмыстары жүргізілді.
<blockquote>
 «Кешенді іздестіру шараларының нәтижесінде кезекші тәулікте күдікті автокөлік анықталды. Көлік тізгіндеген 32 жастағы қала тұрғынына қатысты Қазақстан Республикасының Әкімшілік құқық бұзушылық туралы кодексінің 610-бабының 2-бөлігімен және 611-бабының 2-бөлігімен әкімшілік құқық бұзушылық туралы хаттамалар толтырылды. Жаяу жүргіншінің өмірі мен денсаулығына қауіп жоқ. Түпкілікті шешім қабылдау үшін жинақталған құжаттар сотқа жіберіледі», – делінген полиция департаментінің таратқан хабарламасында.
</blockquote>

Жолда жасөспірімді қағып, қашып кеткен жүргізуші ұсталды

<a href="https://kyzylorda-news.kz/ru/obshestvo/">Kyzylorda-news.kz</a>. 15 қарашадан бастап республикалық маңызы бар Самара-Шымкент тас жолы ақылы негіздегі жүйеге қосылады. Ақылы жолдар тарифі жеңіл көліктерге 1 шақырымға 1 теңге, жүк көліктері мен автобустарға техникалық көлемдеріне байланысты 5 теңге мен 25 теңге аралығында болады. Бұл жөнінде Өңірлік коммуникациялар қызметінде өткен баспасөз конференциясында облыстық жолаушылар көлігі және автомобиль жолдары басқармасы басшысының орынбасары Қайрат Әбсұлтанов хабарлады.
Облыс аумағында автомобиль жолдарының жалпы ұзындығы – 3 397 шақырымды құрайды. Оның – 1016 км республикалық, 557 км – облыстық, 1824 км – аудандық маңызы бар автомобиль жолдары. Қайрат Байғабылұлының айтуынша, биыл өңір аумағынан өтетін республикалық маңызы бар ұзындығы 812 шақырымды құрайтын автомобиль жолдары ақылы жүйеге ауыспақ. Онда автомобильаралық бақылау аркалары орнатылып, жүйені пайдаланушыларға қызмет көрсететін орталықтар ашылды. «Нұрлы жол» бағдарламасы аясында республикалық және облыстық бюджет есебінен ұзындығы 216 км облыстық және аудандық маңызы бар автомобиль жолдары жөндеуден өткізілуде.
Ақылы жүйеге енгізілген автомобиль жолдарында «ашық» жүйесі қолданылмақ. Сондай-ақ, көліктердің өтуі арнайы бейнекамералар және арнайы жабдықтардың көмегімен бақылау аркаларына бекітілген.
<blockquote>
 «Ақылы жолдар жобасы 2019 жылы ҚР Үкіметінің қаулысымен бекітілген инфрақұрылымды дамытудың «Нұрлы жол 2020-2025» мемлекеттік бағдарламасы негізінде қабылданды. Аталған бағдарлама шеңберінде еліміздегі 11 мың шақырымды құрайтын автожол ақылы жүйеге ауысады. Қазіргі таңда жеті жаңа ақылы учаскені пайдалануға енгізу туралы бұйрыққа қол қойылды. Бұйрыққа сәйкес, І-ші техникалық санаттағы учаскелердегі ақылы жүйе 15 қарашадан бастап енгізіледі. Ақылы жүйе іске қосылатын автожолдар: Шымкент-Қызылорда, Нұр-Сұлтан – Павлодар, Шымкент-Өзбекстан шекарасы, Щучинск-Көкшетау, Қапшағай-Талдықорған, Шымкент-Тараз, Тараз-Қайнар бағыттары», – деді «ҚАЗАВТОЖОЛ» ҰК АҚ Қызылорда облыстық филиалы директорының орынбасары Шанжархан Мырзабай.
</blockquote>

Самара-Шымкент тас жолы ақылы болады

<a href="https://kyzylorda-news.kz/ru/obshestvo/">Kyzylorda-news.kz</a>. МӘМС пакетімен қарастырылған стоматологиялық көмек тек балалар мен жүкті әйелдерге ғана тиесілі емес. Шұғыл стоматологиялық көмекті қажет болған жағдайда азаматтардың 9 түрлі санаты ала алады.
18 жасқа дейінгі балалар;
жүкті әйелдер;
ҰОС қатысушылары және оларға теңестірілген тұлғалар;
I, II, III, IV топтағы мүгедектер;
“Алтын алқа” және “Күміс алқа”алқаларымен марапатталған көп балалы аналар;
атаулы әлеуметтік көмекті алушылар;
жасы бойынша зейнеткерлер;
инфекциялық және әлеуметтік мәні бар аурулармен ауыратын науқастар;
ерекше назар аударуды талап ететін балаға немесе бала кезінен I – топтағы мүгедекке күтім жасайтын жұмыс істемейтін қазақстандықтар.
Төтенше жағдай деп қандай кезде айтуға болады?
Көбінесе стрептококктар немесе стафилококктар тудыратын – терінің, тері астындағы тіндердің жедел бактериялық флегмонус инфекциясы;
абсцесс, фурункул, карбункул сияқты жақ-бет аймағының өткір одонтогентті емес қабынатын аурулары;
остеомиелит;
сыртқы қол жеткізуді талап ететін тісті жұлу;
тек стационар жағдайында ғана көмек көрсетуге болатын басқа да жағдайлар.
Егер тексеруден кейін тіс дәрігері амбулаториялық жағдайда көмек көрсету мүмкін емес деп шешсе, ол пациентті емдеуден бас тартуға және оны жедел жәрдем арқылы ауруханаға жіберуге құқылы.
Науқастың өміріне қауіп төндіретін кенеттен болатын өткір аурулар мен созылмалы аурулардың өршуі кезінде шұғыл стоматологиялық көмек қажет. ⁠
пульпит (жедел немесе созылмалылықтың қабынуы);
периодонтит (жедел немесе созылмалылықтың қабынуы);
жақ-бет жарақаты (мысалы, тістің шытынауы немесе сынуы);
жақ-бет аймағының одонтогендік және одонтогендік емес қабыну ауруларының өршуі;
стоматит;
жедел ауырсыну жағдайларда;
шұғыл хирургиялық араласуды қажет ететін емдеулер.
Пациенттердің аталған санаттары үшін МӘМС пакетімен қандай көмек тегін көрсетіледі?
анестезия;
жақ немесе тіс рентгенографиясы;
тісті жұлу;
пломбаны препараттау және салу;
периостотомия;
пульпит, периодонтит, стоматиттің жедел түрлерін, альвеолитті емдеу;
абсцесті ашу.
Жоспарлы көмекті тек 18 жасқа дейінгі балалар мен жүкті әйелдер ғана ала алатынын естеріңізге саламыз. Ол:
анестезия;
жақтың немесе тістің рентгенографиясы;
химиялық қататын композитті материалдардан жасалған пломбаны препараттау және салу;
қарапайым және күрделі тісті жұлу.
<img src="https://kyzylorda-news.kz/wp-content/uploads/2021/11/cdd77f8c-7d45-4ebd-b76f-78c7ce1291e9.jpg" alt="" />
<img src="https://kyzylorda-news.kz/wp-content/uploads/2021/11/f671c524-ab87-432f-a779-0a6850d5b96d.jpg" alt="" />

Қазақстан және Қызылорда облысының жаңалықтары