<a href="https://kyzylorda-news.kz/">Kyzylorda-news.kz.</a> Қазақстанның бас санитар дәрігері Ерлан Қиясов жаңа қаулыға қол қойды. Құжатта 1 сәуірде басталатын оқу жылының төртінші тоқсанын ұйымдастыру тәртібі көрсетілген.
Қаулыға сәйкес, 2020-2021 оқу жылының төртінші тоқсанында барлық өңірде оқушы саны 300-ден аспайтын мектептерде оқу дәстүрлі форматта өтеді. Бір сыныптағы бала саны 25-тен көп болмауы тиіс.
Білім мекемесі әкімшілігінің шешімімен саны 15 оқушыға дейінгі топтарда сабақтан тыс жеке оқыту да ұйымдастырылады.
Коронавирус таралуы бойынша “жасыл” және “сары” аймақтағы өңірлерде жалпы білім беру мектептерінде барлық сыныптар аралас форматта оқиды. Бір сыныптағы бала максимум жиырма бес.
“Қызыл” аймақтағы өңірлерде аралас форматта:
<ul>
<li>жалпы білім беру мектептерінде – мектеп алды сынып оқушылары, 1-5 сынып оқушылары,</li>
<li>халықаралық мектептерде – 1-7- сынып оқушылары, сыныптағы бала саны ең көп дегенде жиырма бес болуы керек.</li>
</ul>
9, 11 және 12-сыныптар аптасына алты күн аралас форматта оқиды: пәндердің 70%-і – штаттық режимде, 30%-і – қашықтан (сыныпта 15 адамнан көп болмауы тиіс, “бір сынып-бір кабинет” қағидаты мен маска режимі және санитарлық талаптар сақталуы шарт).
<a href="https://sputnik.kz/society/20210326/16618311/oqushylar-tortinshi-toqsan.html">Sputnik</a>

Оқушылар төртінші тоқсанда қалай оқиды – жаңа қаулы шықты

<a href="https://kyzylorda-news.kz/">Kyzylorda-news.kz.</a> Оңтүстік және Атлантикалық циклондармен байланысқан атмосфералық фронталды бөліктердің өтуіне байланысты, еліміздің басым бөлігінде құбылмалы ауа райы сақталады – жауын-шашын, батыс, оңтүстік, оңтүстік-шығыс және шығыс аудандарда қатты жауын-шашын (жаңбыр, қар) жауады.
Республиканың кей жерлерінде тұман, көктайғақ, желдің күшеюі, солтүстік-шығыс, орталық пен шығыста – жаяу бұрқасынмен, оңтүстік-батыста, оңтүстікте және оңтүстік-шығыста найзағай күтіледі.
Қызылорда облысының кей жерлерінде желдің 15-20, екпіні 23-28 м/с күшеюі күтіледі, тұман түседі.

26 наурызға арналған ауа райы болжамы

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысындағы барлық ауданда ресейлік “Спутник V” вакцинасының алғашқы дозалары салынуда. Мәселен, Қармақшы мен Жалағаш ауданына 100 дозадан жеткізілді. Басым бөлігі медицина саласының қызметкерлеріне салынуда.
<blockquote>
 «Ауданда екпе салу ерікті түрде жүргізілуде. Бірінші кезекте медицина қызметкерлері, мұғалім, мемлекеттік қызметкерлер және аудан тұрғындары қабылдайды. Екпе салынған пациенттердің жағдайлары қанағаттанарлық. Олар 3 күн бойы бақылауда болды. Жанама әсерлер байқалмады. Вакцинациялаудың екінші кезеңінде 3300 доза келеді», – деді Жалағаш ауданаралық ауруханасының бас дәрігерінің міндетін атқарушы Аманкүл Маханбетова.
 «Қармақшы ауданында екпе егу жұмыстары 9-15 наурыз жүргізілді. Аудан бойынша 100 адамға егілді. Оның ішінде, 94-і бірінші болып жұқпалы аурулар бөлімшесінің, жедел медициналық көмек, реанимация, жалпы тәжірибелік дәрігеріне, қабылдау бөлімшесінің медицина қызметкерлеріне салынды. Егуден кейін асқынулар тіркелген жоқ. Алдағы уақытта 320 дана Спутник-V вакцинасы күтілуде. Келген уақытта жоспар бойынша мұғалімдер қамтылады. Мен өзім де коронавирус инфекциясына қарсы екпені салдырдым. Ешқандай кері әсер болған жоқ. Барша халықты бұл індетті жою үшін вакцинациялауға шақырамын», – деді Қармақшы ауданаралық ауруханасының бас дәрігері Бақытжан Нысанбаев.
</blockquote>

Аманкүл Маханбетова: Ауданда екпе ерікті түрде егілуде

<a href="https://kyzylorda-news.kz/">Kyzylorda-news.kz.</a> Қызылорда облысында Батыр ана, Социалистік Еңбек Ері Сәлима Жұмабекқызының 85 жылдығы атап өтіледі.
Батыр ананың еселі еңбегі мен өнегелі өмірін өскелең ұрпаққа үлгі ету мақсатында өңірлік іс-шаралар жоспары бекітілді. Ертең Қорқыт Ата атындағы Қызылорда университетінің «Студенттер сарайында» ғасыр анасының құрметіне ғылыми-танымдық конференция ұйымдастырылады. Ал 27 наурызда Тұрмағамбет Ізтілеуов ауылында «Сәлима ана» кесенесінде құран бағышталып, арнайы ас берілетін болады.
<blockquote>
 «Аты аңызға айналған тұлғаның өмірі мен еңбек жолын насихаттау біздің міндетіміз. Себебі алдыңғы көшке қарап, кейінгі ұрпақ бой түзейді. Біз ол кісінің есімін ұлықтау мақсатында 26-27 наурыз күндері қала мен туған жері Қармақшы ауданы, Тұрмағамбет Ізтілеуов ауылында ауқымды іс-шаралар ұйымдастырмақпыз. Мәселен, осы күндері қаламызда батыр ананың тұрған үйінде мемориялдық тақта орнатылады. Сондай-ақ, үйі «Сәлима ана» атты қоғамдық музейге айналып, онда архивтік құжаттар мен наградалары, фото суреттері мен жеке заттары қойылады», – деді облыстық мәдениет, архивтер және құжаттама басқармасының басшысы Мира Әбуова.
</blockquote>
Еңбек Ерінің құрметіне орай студенттер арасында Сәлима Жұмабекқызының мұражайын цифрландыруға арналған конкурс өткізіледі. Оған ІТ саласына қызығатын жастар қатыса алады. Конкурс үздігіне Сәлима Жұмабекқызының ұрпақтары атынан 150 мың теңге қаржылай сыйақы берілетін болады.
<blockquote>
 «Еңбек Ері атанған Сәлима Жұмабекқызының ел игілігі жолындағы атқарған еңбектерін келешек жас буын білуі керек. Батыр ананың 85 жылдық мерейтойына арнап түрлі деңгейде танымдық-шығармашылық бағытта шаралар өткізуді жоспарлап отырмыз. Яғни, 29 наурыз күні облыс бойынша тұлғаның өнегелі өмірін насихаттайтын бірыңғай сынып сағаттары өтсе, 30 наурызда «Сәлима Жұмабекова – ғасырдың батыр анасы» тақырыбында оқушылар арасында эсседен байқау ұйымдастырылады», – деді облыстық білім басқармасының басшысы Ақзира Қасымова.
</blockquote>

Қызылордада «Сәлима ана» қоғамдық музейі ашылады

<a href="https://kyzylorda-news.kz/">Kyzylorda-news.kz.</a>&nbsp;Дубайда әлемдегі ең үлкен сурет 62 миллион долларға сатылды, деп хабарлайды <a href="https://24.kz/kz/zha-aly-tar/lemde/item/463342-lemdegi-e-lken-suret-62-mln-dollar-a-satyldy">«Хабар 24»</a>.
Көлемі 2 мың шаршы метр картинаны британдық суретші Саша Джафри салған. Шебер оны ғаламторда әлем елдері балаларының салған түрлі суреттерінен алып құрастырғанын айтады. Ал алып туындыны салуға 8 ай жұмсапты.
Джафри картинаны аукционда бөлшектеп сатуды жоспарлаған көрінеді. Бірақ бәссаудаға қатысқан бір француз кәсіпкері картинаны толық сатып алды. Суретші түскен қаржыны қайырымдылыққа жұмсамақ.

Әлемдегі ең үлкен сурет 62 млн долларға сатылды

<a href="https://kyzylorda-news.kz/">Kyzylorda-news.kz.</a>&nbsp;Бүгін Қызылорда облысы Полиция департаментінің бастығы полиция полковнигі Бектөре Сұлтан облыс тұрғындары&nbsp;алдында есеп берді. &nbsp;
Есептік кездесу полиция департаментінің «Facebook» әлеуметтік желісіндегі ресми парақшасында тікелей эфирде өтті. &nbsp;&nbsp;&nbsp;
<blockquote>
 «Полиция департаментінің қызметкерлерімен жыл бойы атқарылған шаралардың нәтижесінде аймақта қылмыстық ахуал тұрақты, қылмыс саны төмендеді. 10 мың халыққа шаққанда қылмыс деңгейі республикада 83 бірлікті құраса, облыста бұл көрсеткіш 46-ны құрап, республикадағы ахуалы ең тұрақты аймақтың біріміз», – деді Бектөре Сұлтан.
</blockquote>
«Халық үніне құлақ асатын мемлекет» тұжырымдамасын іске асыру аясында Қызылорда қалалық Полиция басқармасының Жедел басқару орталығында ресми түрде жаңа сервис – «102» мобильді қосымшасы іске қосылған болатын.&nbsp;Департамент бастығы бұл қосымшаның ерекшелігі туралы айтып, қылмыстар мен құқық бұзушылықтарға жедел ден қоюы, қылмыстарды ашудағы тиімділіктің артатындығын сөз етті. &nbsp;&nbsp;&nbsp;
Есеп беру барысында департамент бастығы соңғы уақытта алаяқтық фактілерінің көбейгендігін айтты. Есепті мерзімде 641 қылмыс&nbsp; тіркелді. Олардың басым бөлігі пәтер, жер учаскесін алу, жұмысқа орналастырумен байланысты. Интернет-алаяқтық&nbsp;жағдайлары&nbsp;да көбейді. Бектөре Сұлтан осы санаттағы қылмыстардың көбейгендігін айта отырып, облыс тұрғындарын сақтық шараларға ерекше назар аудару қажеттігін ескертті.&nbsp;
Тікелей эфир кезінде департаментке жалпы 50-ден астам сұрақтар мен ұсыныстар келіп түсті. Тұрғындардың бірі белгілі бір аймақтарда жылдамдық өлшеуіш құрылғыларын орнату, ішкі істер органдарына жұмысқа орналасу, зейнеткерлікке шығу тәртібі және жекелеген қылмыстық істер бойынша мәлімет алғысы келсе, енді бірі полиция қызметкерлеріне алғысын білдіріп, ел тыныштығын қорғау жолындағы қиын да жауапты қызметтеріне&nbsp; сәттілік тіледі.
Бектөре Жеңісбайұлы тікелей эфир барысында тұрғындардан түскен сұрақтар мен ұсыныстарды мұқият тыңдап, зерделеп, арнайы құрылған топқа тапсырма берді. Барлық өтініштер Полиция департаменті бастығының қатаң бақылауына алынды.

Қызылордада алаяқтық қылмыс көбейген

<a href="https://kyzylorda-news.kz/">Kyzylorda-news.kz.</a> 26 наурызда Қазақстанның бірнеше облысында дауылды ескерту жарияланды, деп хабарлайды Қазгидромет.
Қызылорда облысында түнде кей жерлерде найзағай ойнап, тұман түседі. Кей жерлерде батыстан 15-20 м/с жылдамдықпен жел соғады, кей жерлерде екпіні 23 м/с дейін&nbsp;жетеді.
Шығыс Қазақстан облысының кей жерлерінде түнде қатты қар жауады, күндіз жауын-шашын (жаңбыр, қар) күтіледі. Кей жерлерде тұман, көктайғақ, бұрқасын болжануда. Жел солтүстік-батыстан шығысқа ауысып, күші кей жерлерде 15-20, екпіні 23-28 м/с жетеді.&nbsp;
Қарағанды облысының оңтүстігінде күндіз қатты жауын-шашын (жаңбыр, қар), кей жерлерде тұман, көктайғақ, бұрқасын күтіледі. Солтүстік-шығыстан, шығыстан, кей жерлерде 15-20 м/с жылдамдықпен жел соғады, екпіні 23-28 м / с жетеді.&nbsp;
Қостанай облысының кей жерлерінде тұман, көктайғақ, бұрқасын болжануда. &nbsp;Шығыстан жел соғады, кей жерлерде күші 15-20 м/с.
Ақмола облысының кей жерлерінде тұман, көктайғақ күтіледі.
Түркістан облысында түнде және таңертең кей жерлерде қатты жаңбыр жауады. Кей жерлерде найзағай ойнап, тұман түседі, батыстан 15-20 м/с жел соғады, екпіні 23-28 м / с жетеді. Шымкентте 26 наурызда түнде және таңертең қатты жаңбыр, кей уақытта найзағай күтіледі. Оңтүстік-батыстан жел соғады, екпіні 15-20 м/с.&nbsp;
Ақтөбе облысының кей жерлерінде көктайғақ, бұрқасын болады, таңертең кей жерлерде тұман түседі. Жел солтүстік-шығыстан оңтүстік-батысқа ауысып, кей жерлерде 15-20 м/с жылдамдықпен соғады.
Батыс Қазақстан облысының кей жерлерінде қатты жауын-шашын (жаңбыр, қар), тұман, көктайғақ күтіледі. Солтүстік-шығыстан, шығыстан соққан желдің күші түнде 15-20 м/с жетеді, Оралда түнде және таңертең тұман күтіледі.

Ауа райына байланысты ескерту жарияланды

<a href="https://kyzylorda-news.kz/">Kyzylorda-news.kz.</a> Сырдария ауданында жергілікті маңыздағы автомобиль жолдарының 92 пайызы жақсы және қанағаттанарлық дәрежеде. Ішкі жолдардың 83 пайызы асфальтталды. Биыл Сырдария ауданында 19,7 шақырым жол орташа, ал 2 шақырымы күрделі жөндеуден өтеді. Бұл туралы Өңірлік коммуникациялар қызметінің ақпарат алаңында өткен брифингте Сырдария ауданының әкімі Талғат Дүйсебаев мәлімдеді.
<blockquote>
 «Ауданның жолдар желісін дамытуға өткен жылы республикалық және жергілікті бюджеттен барлығы 2,6 млрд. теңге қаржы бөлінді. Аудандық маңызы бар жолдар мен елді мекен көшелерінің 70,1 шақырымы, яғни 51 жол және көше жөндеуден өткізілді», – деді Талғат Тұрсынұлы.
</blockquote>
Сондай-ақ, Тереңөзек кентіндегі Бердіқұлов көшесіне асфальт төселеді.
17 көше жарықтандырылды
Өткен жылы ауданда 17 көше жарықтандырылды. Оған 98 млн теңге қаржы бөлінген. Биыл елді мекендердің көшелерін жарықтандыру жұмыстарына аудандық бюджеттен 17,6 млн теңге қаржы қаралып, 7 көше жарықтандырылады.
<blockquote>
 «Әсіресе, 1973 жылы қолданысқа берілген Аманкелді, Шаған, Қоғалыкөл және А.Тоқмағамбетов ауылдық округтеріндегі электр энергиясы жиі ажырауы орын алуда. Бүгінде аталған ауылдардағы электрмен жабдықтау жүйесін қайта жаңғырту жұмыстарына жоба-сметалық құжаттама әзірлеуге қаржы көздері қарастырылуда», – деді Талғат Дүйсебаев.
</blockquote>
Ауданда 84 мың түп ағаш егіледі
Алдағы бес жылда 60 гектардан астам жерге 84 мың түп ағаш егіледі. Сондай-ақ, биыл суды аз қажет ететін көкөніс-бақша, майлы дақылдарға басымдық берілмек.
Өткен жылы ауданда өнеркәсіп өнімі 51,1 пайызды құрап, өндіру көлемі 38,6 пайызға артты. Диқандар 21 мыңнан астам гектарға күріш дақылын орналастырып, 135 мың тонна өнім жинады.
<blockquote>
 «Ауданда аграрлық секторға көрсетілген мемлекеттік қолдаулардың арқасында өсім сақталып, ауыл шаруашылығы тауар өндірушілерінің әлеуеті артты. Соңғы жылдары Сыр өңірінде су тапшылығы орын алуда. Осыған байланысты алдағы уақытта біз суды аз қажет ететін майлы дақылдар, көкөніс-бақша және мал азығындық дақылдарға басымдық беретін боламыз. Осы ретте, біз аймақ басшысының қолдауымен аудан орталығынан шалғай жатқан Аманкелді, Жетікөл, Айдарлы ауылында егістік жерлерді пайдалануды қолға алып жатырмыз. Өткен жылы Айдарлы ауылындағы «Ақтам» және Аманкелді ауылындағы «Қызылту» каналдары тазартылып, көптен бері қозғалған аяқ су мәселесі шешілді. 157 гектардан астам үй іргелік және бау-бақшаға аяқ су барды. Іңкәрдария ауылында 10 гектар жерге заманауи технологияларды пайдаланып, бақша дақылдарының тұқымын өндіру және өсіру жоспарымызда бар. Алдағы бес жылда 60 гектардан астам жерге 84 мың түп ағаш егілетін болады», – деді Талғат Тұрсынұлы.
</blockquote>
Биыл Қалжан ахун ауылындағы «Ескі бостандық», Н.Ілиясов ауылындағы «Дәурен» каналдары тазартылады. Нәтижесінде 1000 гектар егістік, 202 гектар жайылымдық және үй іргелік жерлер аяқ сумен қамтамасыз етіледі.
Ойын алаңдары көбейіп келеді
Былтыр Тереңөзек кенті және Шаған ауылында 4 ойын алаңы салынып, пайдалануға берілді. Ал А.Тоқмағамбетов ауылындағы мектептің өжіресі тазартылып, жаттығу залы жасақталды.
<blockquote>
 «Дені сау ұлт бәсекеге қабілетті болады. Сол себепті спорттың бұқаралық сипатын дамыту – біздің негізгі бағыттарымыздың бірі. Ауданда спортты дамыту бойынша қабылданған шаралар аясында дене шынықтыру және спортпен айналысушылардың үлесі 31 пайыздан асты. Өткен жылы 58 спорттық шара өткіздік. Оған 5911 адам қатысты. 22 спортшы спорт шеберіне үміткер, 11 спортшы жасөспірімдік І разрядтағы спортшы атақтарын алды. 15 спортшымыз Қазақстан Республикасының жүлдегерлері атанды және 1 спортшымыз облыстық мектеп интернатына қабылданды»,- деді Талғат Дүйсебаев.
</blockquote>
831 адам тұрақты жұмысқа орналасты
Ауданда мемлекеттік бағдарламалар сәтті жүзеге асуда. Мәселен «Жұмыспен қамтудың Жол картасы» аясында өткен жылы 23 инфрақұрылымдық жоба жүзеге асты. Нәтижесінде 592 адам еңбекке тартылды. Оның ішінде, бес адам тұрақты жұмысқа тұрды. Ал жалпы аудан бойынша 831 адам тұрақты жұмысқа орналасты.
<blockquote>
 «Ауданда «Еңбек» бағдарламасыаясында 2945 адам жұмыспен қамтылды. Бұған қоса, атаулы әлеуметтік көмек алушылардың ішінен 291 адам жұмыспен қамтудың белсенді шараларын атартылып, 25 адам тұрақты жұмысқа орналасты. Мұнан өзге, төтенше жағдайға байланысты 3369 адамға коммуналдық қызмет төлеміне республикалы қбюджеттен 101,1 млн. теңге берілді. Сонымен қатар, «Еңбекнарығы» ақпараттық жүйесі арқылы 8474 тұрғынға 42500 теңгедентөленді. «Дипломмен-ауылға» бағдарламасы бойынша 65 маман 18,1 млн. теңге көтерме жәрдемақы алса, 52 маманғатұрғынүйсатыпалуүшін 202,8 млн. теңгебюджеттікнесиеберілді», – деді Сырдарияау данының әкімі Талғат Дүйсебаев.
</blockquote>
42 отбасы баспаналы болды
Өткен жылы ауданда17,8 мың шаршы метр тұрғын үй салынды. 42 отбасы баспаналы болды.
<blockquote>
 «Халықты баспанамен қамтамасыз ету күн тәртібінен түскен емес. Ауданда соңғы жылдары тұрғын үй салуда айтарлықтай жетістік бар. Өткен жылы «Жұмыспен қамтудың 2020-2021 жылдарға арналған жол картасы» аясында Тереңөзек кентінде көпқабатты тұрғын үйлер бой көтеріп, 42 отбасы баспаналы болды. Бұл бағыттағы жұмыстар алдағы уақытта да жалғасын тауып, тағы да көпқабатты 2 тұрғын үй салу жоспарлануда. Оған қоса, республикалық бюджеттен 12 елді мекенге 35 тұрғын үй құрылысын жүргізуге және аз қамтылған көпбалалы отбасыларға 10 тұрғын жайын сатып алуға қаржы бөлініп отыр. Жалпы, биыл мемлекет есебінен 81 отбасы баспаналы болады деген жоспар бар», – деді Сырдария ауданының әкімі Талғат Дүйсебаев.
</blockquote>
Соңғы жылдары жеке тұрғын үй секторында 329 жер учаскесі инженерлік инфрақұрылыммен қамтамасыз етілді. Бұл тұрғындарды баспана салуға ынталандыруда.

Сырдарияда қоныс той көбейді

<a href="https://kyzylorda-news.kz/">Kyzylorda-news.kz.</a>&nbsp; Қазақстан азаматтарына да жерді жекеменшікке беруге болмайды. Бұл туралы Жер реформасы жөніндегі комиссияның 1-отырысында қоғам қайраткері Мұрат Әбенов айтты, деп хабарлайды <a href="https://lenta.inform.kz/kz/kazakstan-azamattaryna-da-zherdi-zhekemenshikke-beruge-karsymyn-murat-abenov_a3767976">ҚазАқпарат</a>.
<blockquote>
 «Шетелдіктерге қатысты мәселе бойынша Президент барлық жауапкершілікті мойнына алды. Жер шетелдіктерге жалға да берілмейді, сатылмайды да. Бәріміз қолдаймыз. Сол арқылы комиссияның бір үлкен жұмысы шешілді деп ойлаймын. Тағы бір мәселе – біздің азаматтарға жекеменшікке ауыл шаруашылығы жерлерін беру. Бұл негізгі мәселелердің бірі. Жеке өзім ауыл шаруашылығы жерлерін жекеменшікке беруге қарсымын. Қарсы болатын себебім, азаматтардың 99 пайызы ауыл шаруашылығы жерін иеленбеген. Кезінде жер бөлінгенде басы-қасында болмаған, оған қызықпаған. Сол азаматтардың 99 пайызы жер мәселесіне араласуы тиіс», – деді комиссияның бірінші отырысында Мұрат Әбенов.
</blockquote>
Сонымен қатар ол жалға жер беру нарығын дамыту қажеттігін атап өтті.
<blockquote>
 «Көп елде жерді жалға беру нарығы бар. Жылдан-жылға бағасын белгілеп отырады және азаматтар жалға беру арқылы табыс тауып отыр. Меніңше бұл көп мемлекетте қолданыстағы тиімді жүйе. Бізге де соны пайдалануға болады», – деді ол.
</blockquote>

Қазақстан азаматтарына да жерді жекеменшікке беруге қарсымын – Мұрат Әбенов

<a href="https://kyzylorda-news.kz/">Kyzylorda-news.kz.</a> Тереңөзек кентінде ұн шығаратын зауыт салынды. Жоба құны 80 млн. теңге. Тәулігіне 60 тонна ұн өндіреді. Жобаны «Аққұм Жер» серіктестігі жүзеге асыруда. Қазіргі таңда құрылыс жұмыстары толығымен аяқталған. Шикізат Қостанай облысынан әкелінетін болады.
Жалпы өткен жылы ауданда мемлекеттік бағдарламалар арқылы өз кәсібін дөңгелетуге ниетті азаматтардың 538 жобасы қолдау тапты. Ал биыл облыстың экономикалық даму жоспарын іске асырудың Жол картасына ауданнан 6 жоба енгізілген. Оның ішінде «Күріш ақтап, тазалайтын және кіші пастерленген сүт зауыттарын іске қосу, жылыжай және бау-бақша сақтайтын қойма салу» жобасы бар. Жаңадан 33 жұмыс орны ашылады. Бүгінде бұл жобаның күріш тазалайтын цехы іске қосылды.
<blockquote>
 «Аудан бойынша шағын және орта бизнес өкілдерінің саны 10,9 пайызға, ал нақты жұмыс жасайтын субьекті саны 10,2 пайызға артты. Экономиканы өркендетудің бірден-бір жолы кәсіпкерлікті дамыту екені анық. Қазіргі нарықтық экономика кезеңінде елімізде кәсіп ашуға мол мүмкіндіктер жасалуда», – деді Сырдария ауданының әкімі Талғат Дүйсебаев.
</blockquote>
Биыл «Қуаттылығы жылына 630 тонна күріш ақтау цехының құрылысын салу» жобасы индустрияландыру картасына енгізілді. Құны 150 млн. теңгені құрайтын жоба жүзеге асса, айына 70 тонна күріш ақталып, 25 жаңа жұмыс орны ашылады деп күтілуде.

Сырдарияда ұн шығаратын зауыт ашылады

<a href="https://kyzylorda-news.kz/">Kyzylorda-news.kz.</a>&nbsp;&nbsp;Ішкі істер министрлігінің ақпараттық сервисінде болған техникалық ақау салдарынан мамандандырылған халыққа қызмет көрсету орталықтарының жұмысы уақытша тоқтатылды, деп хабарлайды “Азаматтарға арналған үкімет” мемлекеттік корпорациясының баспасөз қызметі.
<blockquote>
 “Бүгін, сағат 9:10-нан бастап ішкі істер министрлігінің ақпараттық сервисіндегі техникалық ақауға байланысты мамандандырылған халыққа қызмет көрсету орталықтарының жұмысы уақытша тоқтатылды. Ақпараттық сервис қызметінің қолжетімділігін қамтамасыз ету бойынша қосымша хабарлайтын боламыз. Келтірілген қолайсыздықтар үшін кешірім сұраймыз”, – делінген хабарламада.
</blockquote>
Қазіргі кезде техникалық ақаулықтарды жою бойынша сала мамандары тиісті деңгейде жұмыс істеп жатыр.

Қазақстанда мамандандырылған ХҚКО қызметі уақытша тоқтады

<a href="https://kyzylorda-news.kz/">Kyzylorda-news.kz.</a>&nbsp;Қызылорда қалалық Полиция басқармасына&nbsp;арызданушының айтуынша белгісіз біреулер орталық алаңдағы бір ғимараттың жанында баласын ұрып-соғып, қолындағы «Самсунг S20» үлгісіндегі ұялы телефонын, «Радо» үлгісіндегі қол сағатын және 2000 теңге ақшасын тартып алған. Келтірілген материалдық шығын 310 мың теңге.
<blockquote>
 «Басқарма полицейлерінің жедел-іздестіру шараларының арқасында күдікті азамат ретінде, облыс орталығының 17 жастағы тұрғыны ұсталды. Оған қатысты Қазақстан Республикасының Қылмыстық кодексінің 191-бабы 2-бөлігі 1 тармағымен&nbsp; (Тонау, жәбiрленушiнiң өмiрiне немесе денсаулығына қауiптi емес күш қолданып не осындай күш қолдану қатерін төндіріп) сотқа дейінгі тергеп-тексеру жұмыстары жүргізілуде», – делінген полиция департаментінің хабарламасында.
</blockquote>
Күдіктіге қатысты, ешқайда кетпеу және тиісті мінез-құлық туралы қолхат түрінде бұлтартпау шарасы қолданылды.&nbsp; Оқиғаның мән-жайы анықталуда.

Қазақстан және Қызылорда облысының жаңалықтары