<a href="https://kyzylorda-news.kz/ru/obshestvo/">Kyzylorda-news.kz</a>. Қызылордалық жас кәсіпкер Дәулет Ізбасарұлы сабын шығару ісін қолып, жеке кәсібін дөңгелетуде. Биыл ол «Бизнестің жол картасы – 2025» мемлекеттік бағдарламасы аясындағы грантқа қатысып, 4,5 млн теңге қаржыға ие болған. Гранттық қаржыға цехты кеңейту және «Ұнтақ өндірісі» жобасын жүзеге асырмақ. Бүгін Өңірлік коммуникациялар қызметінде өткен баспасөз конференциясында Дәулет Ізбасарұлы жеке өндірісі туралы айтты.
Әділет цехында тұрмыста пайдаланылатын кір сабын шығарылады. Онда тәулігіне 1500 дана сабын өндіріледі.
<blockquote>
 «Біздегі басты мақсат – өнім сапасына мән беру. Ел игілігіне қызмет ету. Қарамағымда 20 жұмысшы бар. Алғашқы кәсіпті сабын шығарудан бастадым. Бүгінде отандық өнімге халық арасында сұраныс жоғары. Мемлекеттік грант есебінен және «Қызылорда» инвестициялық орталығы арқылы жеңілдетілген несие алып, кір жуғыш ұнтақ өндірісін ұлғайтып келеміз. Мемлекет тарапынан жеке кәсіпкерлерге қолдау көп екенін айтқым келеді», – деді «Әділет» жеке кәсіпкерлігінің иесі Дәулет Ізбасаров.
</blockquote>

Өндірісі өркендеген қызылордалық кәсіпкер

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда қаласында 25 бағыт және қала маңына 8 бағыт бойынша 400-ге жуық автобус қызмет көрсетеді. Оның ішінде, «Қызылорда» автобус паркі» ЖШС-і 5 бағытта және қалған 28 бағытта жеке кәсіпкерлер жолаушы тасымалымен айналысуда.
«Қызылорда» автобус паркі» ЖШС-і директорының орынбасары Қанат Рахметов жол-көлік ережелерін сақтау бағытында аптасына екі мәрте қоғамдық көлік жүргізушілерінің қатысуымен жол ережелері тәртібі түсіндірілетін жиын өткізу қолға алынғандығын айтып өтті.
Сонымен қатар, қалалық тұрғын үй-коммуналдық шаруашылығы, жолаушылар көлігі, автомобиль жолдары бөлімімен қоғамдық көлік бағыттарының жол сызбасын тұрғындардың сұранысына сәйкес ұзартып, жаңадан бой көтерген мөлтек аудандар мен шалғай елді мекендер, саяжай, бау-бақша серіктестіктерін қоғамдық көлікпен қамту мақсатында Алматы қаласындағы Көлік және коммуникациялар ғылыми-зерттеу институтымен келісім-шарт жасалып, қорытынды жобалары тапсырылды.
Жобада Белкөл кенті, Бәйтерек, Саяхат мөлтек аудандары, қалаға қарасты ПМК-29, ПМК-66, Сабалақ, Ягодка, Пищевик саяжайлары да қамтылған.
Жол сызбаларына сәйкес, жолаушылар тасымалдауға қызмет көрсету құқығына арналған конкурс өткізуге қажетті құжаттар әзірленуде.
Қазіргі таңда «Қызылорда» автобус паркі» ЖШС-і «ALEMPAY» жүйесімен жұмыс жасауда. Серіктестік теңгеріміндегі 135 дана автобустың 90 пайызына электрондық төлем жүйесі орнатылған. Алдағы уақытта қала және оған қарасты елді мекен тұрғындарын тасымалдау қызметімен айналысатын жеңімпаз серіктестіктердің көліктеріне де электронды төлем жүйесін орнатылмақ. Ол үшін серіктестіктер «QazSmartTrans» ЖШС-мен келісім-шартқа отырды. Сонымен қатар, жоспарда орталықтандырылған диспетчерлік қызметін ашып, (ЦДС) бір жерден басқару жұмыстарын жүргізу қарастырылған.

Қызылордада қоғамдық көлік қозғалысы реттеле ме?

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда облысында шағын және орта бизнес саласы қарқынды дамып келеді. Өңірде кәсіпкерлердің саны 5,6 пайызға, өндірілген өнім көлемі 11,7 пайызға артқан. Қызылорда облысы кәсіпкерлік саласы бойынша алғашқы үштікте. Бұл жөнінде Өңірлік коммуникациялар қызметінде өткен брифингте облыстық кәсіпкерлік және туризм басқармасы басшысының орынбасары Талғат Бекішов мәлімдеді.
<blockquote>
 «Шағын және орта бизнес саласын дамыту бағытында қарқынды жұмыстар атқарылуда. Нәтижесінде, өңірде бизнестің экономикадағы үлесі артып келеді. Жалпы шағын және орта бизнестің өңірлік өнімдегі үлесі 15 пайызды, ал орта бизнестің үлесі 3,1 пайызды құрады. Сондай-ақ, биыл мемлекеттік бағдарламалар аясында 2 592 жобаға өтеусіз гранттар берілді», – деді Талғат Болатбекұлы.
</blockquote>

Қызылордада кәсіпкерлердің саны 5,6 пайызға артты

<a href="https://kyzylorda-news.kz/ru/obshestvo/">Kyzylorda-news.kz</a>. Желтоқсан айында қазақстандықтар 20 күн жұмыс істеп, 11 күн&nbsp; демалады.
1 желтоқсан – Тұңғыш Президент күні, сонымен бірге 16 және 17 желтоқсан күндері қазақстандықтар еліміздің Тәуелсіздік күнін тойлайды.
Бес күндік жұмыс аптасын ескере отырып, Қазақстан Республикасының азаматтары 4 күн қатарынан – 16, 17, 18 және 19 желтоқсанда демалады және жұмысқа тек 20-сында шығады.
Сонымен желтоқсан айында қазақстандықтар 20 күн жұмыс істеп, 11 күн&nbsp; демалады.

Желтоқсанда қазақстандықтар қанша күн демалады?

<a href="https://kyzylorda-news.kz/ru/obshestvo/">Kyzylorda-news.kz</a>. Бүгін Сенаттың жалпы отырысында депутат Мұрат Бақтиярұлы «Байқоңыр» ғарыш айлағынан ұшатын зымырандарды көктем айларында ұшырмауды сұрады, деп жазады ҚазАқпарат.
Айта кетейік, бүгін жалпы отырыста «2004 жылғы 22 желтоқсандағы ҚР Үкіметі мен РФ Үкіметі арасындағы «Байқоңыр» ғарыш айлағында «Бәйтерек» ғарыш зымыран кешенін құру туралы келісімге өзгерістер мен толықтырулар енгізу туралы хаттаманы ратификациялау туралы» Заңы қабылданды.
<blockquote>
 «Бүгінгі талқыға түсіп отырған Заң жобасы біздің комитетте де жан-жақты қызу талқыланды. Бұл хаттама жобасының ережелері қабылданған жағдайда Байқоңыр ғарыш айлағында «Бәйтерек» ғарыш зымыраны кешенін бірлесіп пайдалану мәселелері бойынша Қазақстан – Ресей ынтымақтастығы барысында туындайтын құқықтық қатынастарды реттейтін болады. Әсіресе, көптен бері шешімін таппай келе жатқан Ресей тарапының меншігіндегі және Байқоңыр кешенінің объектілерінде орналасқан мүлікті қабылдау-тапсыру үшін ұйымдық-құқықтық мәселелер шешімін табады деп ойлаймыз. Бәйтерек ғарыш зымыран кешенін құру орбиталық спутниктік жүйелерді жаңарту және қалыптастыру жөніндегі мүмкіндіктерді кеңейтуге мүмкіндік беретін ауқымды Қазақстан – Ресей жобасы деп айтуға болады. Сондықтан да Заң жобасын қолдаймын», – деп тоқталды М. Бақтиярұлы.
</blockquote>
Сонымен бірге сенатор 80 мыңға жуық халық тұратын Байқоңыр қаласының тұрғындары және сайлаушыларымен кездесу барысында олардың талап-өтініштері бойынша ұзақ жылдар бойы әлі де болса шешімін таппай келе жатқан мәселелерге назар аударды.
<blockquote>
 «Біріншіден, әрбір зымыран ұша салысымен кемінде төрт-бес күн бойы ауа райы бұзылып, қатты жел тұрады. Ол жел оңтүстүгі Жаңақорған, солтүстігі Аралдан асып Ырғызға дейін барады. Көктем айларында ылғалды болған жерлерде жақсы шыққан шөпті және жерді осы үздіксіз соққан жел кептіріп жібереді. Бұл мал мен егін шаруашылығына зардабын тигізіп жатқан қалыпты құбылысқа айналды. Сондықтан да біздің сайлаушыларымыз мүмкіндік болғанша Байқоңыр ғарыш айлағынан ұшатын зымырандарды көктем айларында ұшырмауды сұрайды», – деді депутат.
</blockquote>
М. Бақтиярұлы Байқоңыр қаласы мен ғарыш кешені Ресейге ұзақ жылдарға жалға берілгенін айта келе, осы үшін жылына Қазақстан бюджетіне 115 млн доллар көлемінде қаржы түсетініне тоқталды.
Сенатордың айтуынша, соңғы 15-20 жылдың ішінде осы аймақтағы тұрғындар арасында қан-тамырлары аурулары көбейген. Бұған кезінде аса улы отын гептилмен ұшатын Протон зымырандарында болған апаттардың үлкен әсері болды.
<blockquote>
 «Жалға беруден түсетін қаржының бір бөлігі жергілікті тұрғындардың емдеу-сауықтыру орындарында денсаулығын жөндеуге беріліп отыру керек деп есептейміз», – деді Мұрат Бақтиярұлы.
</blockquote>

Сенатор «Байқоңыр» ғарыш айлағынан зымырандарды көктемде ұшырмауды сұрады

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Елімізде қыстыгүні ауа райының қолайсыздығы мен ескертуге қарамастан жолға шығатын азаматтарды әкімшілік жауапқа тарту қаралып жатыр. Бұл туралы Нұр-Сұлтан қаласы төтенше жағдайлар департаменті төтенше жағдайды жою басқармасының басшысы Эльдор Райымбеков мәлім етті, деп хабарлайды <a href="https://www.inform.kz/kz/kazakstanda-aua-rayy-eskertuin-elemey-zholga-shykkandar-zhauapka-tartyluy-mumkin_a3860832">ҚазАқпарат</a>.
<blockquote>
 «Бүгінде «Қазавтожол» және «Қазавтодор» мекемелерімен бірлесіп қыстыгүні ауа райының қолайсыздығы туралы ескерту, хабарландыруға құлақ аспай жолға шығып кететін тұрғындарды жауап тарту жағын қарастырып жатырмыз. Ауа райының қолайсыздығына және ескертуге қарамастан жолға шығып кететіндер бар. Салдарынан адамдар төтенше жағдайға тап болып жатады. Яғни, жолды тазалау қызметінің мамандары қарлы-боранды күні жолға шыққан көлік иелері туралы полицияға хабарлайды, одан әрі тәртіп сақшылары іске кірісіп, жолаушыны әкімшілік жауапкершілікке тартады. Бұл жерде басты мәселе – адамның қауіпсіздігі», – дейді Эльдор Райымбеков.
</blockquote>
Оның айтуынша, аталған шараны «Қазавтожол», «Қазавтодор», полиция және төтенше жағдай қызметі бірлесіп атқарады.
<blockquote>
 «Негізі жолда жүру заңында бұл мәселе қаралған. Яғни жол қозғалысы ережесін бұзу болып табылады. Сондықтан да ескертуді елемейтін жолаушыларды жауапкершілікке тарту шарасы қолға алынып жатыр. Ескеретін жайт, әкімшілік жауапкершілік ауа райының қолайсыздығы туралы хабарландыру және төтенше жағдай қызметкері мен полицияның ескертуіне қарамастан жолға шыққандарға ғана қатысты», – дейді ол.
</blockquote>

Қазақстанда ауа райы ескертуін елемей жолға шыққандар жауапқа тартылуы мүмкін

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда қаласында құтқарушылар тұрғын үйдің моншасына соғылған жүк көлігінде қысылып қалған жүргізушіні арнайы құрылғымен құтқарды.
Оқиға облыс орталығында орналасқан «Саяхат» шағын ауданындағы Айдосов көшесінде болған. «Shacman» жүк көлігі тұрғын үйдің моншасына соғылып, жүргізушісі көлік ішінде қысылып қалған. Оның шығарып алу үшін оқиға орнына құтқарушылар шақырылды.
<blockquote>
 «Оқиға орнына облыстық Төтенше жағдайлар департаменті Өрт сөндіру және авариялық-құтқару жұмыстары қызметінен 1 техника мен 5 қызметкер барды. Мамандар қысылып қалған азаматты арнайы құрылғының көмегімен аман алып шықты. Ол жедел жәрдем қызметіне табысталды», – деді Қызылорда облыстық Төтенше жағдайлар департаменті Өрт сөндіру және авариялық-құтқару жұмыстары қызметінің баспасөз хатшысы Әлия Ережепова.
</blockquote>

Қызылордада көлігіне қысылып қалған жүргізуші құтқарылды

<h4 id="kyzylordanewskzhttpskyzylordanewskzruobshestvo200422i"><a href="https://kyzylorda-news.kz/ru/obshestvo/">Kyzylorda-news.kz</a>. Депутаттар Сенаттың жалпы отырысында Цифрлық даму, инновациялар және аэроғарыш өнеркәсібі министрі Бағдат Мусин «2004 жылғы 22 желтоқсандағы Қазақстан Республикасының Үкіметі мен Ресей Федерациясының Үкіметі арасындағы «Байқоңыр» ғарыш айлағында «Бәйтерек» ғарыш зымыран кешенiн құру туралы келісімге өзгерістер мен толықтырулар енгізу туралы хаттаманы ратификациялау туралы» заңның жобасын қабылдады.</h4>
<blockquote>
 Қаралып отырған хаттама «Бәйтерек» Қазақстан-Ресей бірлескен қәсіпорны» акционерлық қоғамын бюджеттік кредиттен босату және «Бәйтерек» ғарыш зымыран кешенін жүктеу кепілдіктерімен қамтамасыз ету тәртібін реттейді. Хаттамада тараптардың 2023 жылы орта класты тасымалдағыш зымыранмен «Бәйтерек» ғарыш зымыран кешенінің ұшу сынақтарының басталуын қамтамасыз ету жөніндегі міндеттемелері нақты жазылған, – деді сенатор Талғат Мұсабаев.
</blockquote>
Сенатор атап өткендей, хаттаманы ратификациялау «Бәйтерек» бірлескен қәсіпорны» акционерлық қоғамының кредиттік міндеттемелерден босатылуына және «Бәйтерек» мемлекетаралық жобасын іске асыруды жалғастыруға мүмкіндік береді.
<blockquote>
 Заң жобасын қабылдау республикалық және жергілікті бюджеттерден қосымша шығыстарға алып келмейді, әлеуметтік-экономикалық және құқықтық теріс әсер туғызбайды. Сенаттың тұрақты комитеттері оң қорытындыларын берді. Жұмыс тобында заң жобасы жан-жақты қаралды және зерттелді, – деп атап өтті Талғат Мұсабаев.
</blockquote>
<a href="https://baq.kz/">Baq.kz</a>

Сенатта «Бәйтерек» жобасына қатысты заң қабылданды

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Қызылорда облысының қаржы-экономика саласына биыл 100 жыл толды.
​15 қараша – қаржыгерлер күніне орай осы сала ардагерлерінің құрметіне ​ бүгін Тұңғыш​ Президент саябағында «100 жылға – 100 ағаш» экологиялық акциясы өткізілді.
Акцияның басты мақсаты – облыс экономикасы мен қаржы саласының ілгерілеуіне аянбай қызмет еткен Камал Шөкенов, Бименді Баймаханов, Құттықожа Ыдырысов, Қалқазбек Ажібеков және тағы басқалары сынды еңбек ардегерлерінің жасаған еңбегі мен ізгі жолын көрсету. Сол арқылы жастар мен болашақ ұрпақты табиғатты қорғауға, оған құрметпен қарау сынды өнегелі үлгілі істерге шақыру мен тәрбиелеу. Қоғамда экологиялық мәдениетті қалыптастыру мен насихаттау болып табылады.​
Аталған акцияға қаржы саласының қызметкерлері, ардагерлері мен еріктілер қатысып, 100 түп көшет отырғызылып, көшеттер күтімге алынады.
<img src="https://kyzylorda-news.kz/wp-content/uploads/2021/11/255666772_1410471576015017_7779717730917954468_n.jpg" alt="" />
<img src="https://kyzylorda-news.kz/wp-content/uploads/2021/11/255967651_1410471602681681_5805225107726143163_n.jpg" alt="" />

Қызылордада «100 жылға 100 ағаш» экологиялық акциясы өтті

<a href="https://kyzylorda-news.kz/ru/obshestvo/">Kyzylorda-news.kz</a>. Ересектер Pfizer екпесімен ревакцинация жасай ала ма? Бұл сауалға брифинг барысында Алматы қаласы санитарлық-эпидемиологиялық бақылау департаменті басшысының орынбасары Әсел Қалықова жауап берді, деп хабарлайды ҚазАқпарат.
<blockquote>
 «Sputnik векторлық екпе болғандықтан, кез келген инактив вакцинамен ревакцинация жасауға болады. Алматыда азаматтар Sputnik, Pfizer сияқты екпелермен ревакцинация жасай алады, таңдау бар. Егер керісінше бірінші инактив екпе салдырған болса, онда Sputnik векторлық вакцинасымен ревакцинация жасай алады. Pfizer екпесімен ревакцинация жасағысы келетіндер тұрғылықты мекенжайы бойынша емханаға барып, өтінім қалдыруы тиіс. Қосымша доза болған жағдайда ревакцинация жасалады»,- деді спикер.
</blockquote>
Оның айтуынша, Алматы қаласында Pfizer екпесін сақтауға арналған екі арнайы тоңазытқыш бар. Олар екпе сақтау орталығында орналасқан. Әрқайсысының сыйымдылығы – 35 мың доза. Тағы дәл осындай 4 тоңазытқышқа тапсырыс берілді.

Pfizer екпесімен кімдер ревакцинация жасай алады?

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Оқушылар бойына ұлттық-рухани құндылықтарды дәріптеген «Туған елге тағзым» экспедициясы аяқталды.
NIS жүйесінде ең қызықты әрі туған жерді танып білуде өте маңызды патриоттық жобалардың бірі — «Туған елге тағзым» өлкетану-зерттеу экспедициясы. Жыл сайын NIS-тің үздік оқушылары еліміздің түрлі аймақтарына саяхаттап, сол жердің табиғатын, мәдениетін, тарихи ескерткіштері мен архитектуралық нысандарын зерттейді.
Биыл қызылордалық өрендер өз өңірінің тарихи, мәдени және инновациялық дамуын зерттеуге мүмкіндік алды. Экпедициялық маршрут бойынша жас зерттеушілер алғашқы күні ежелгі Сығанақ, Сауран қалашықтарына саяхаттады. Көне тарихтың теңдессіз ескерткіштерімен танысып, Ақорданың, Қазақ хандығының астанасы болған маңызды орталықтар жайында ақпарат алды.
«Сауранда билік құрған хандар жайында білімімізді толықтырдық. Сонымен қатар бұл қала ірі сауда мен қолөнерінің орталығы болғанын байқадық. Үлкен қақпалар арқылы қала орталығына кіріп, бірнеше ғасырға қайта оралғандай болдық. Мұндай жобалардың тарихымызды танып білуде ықпалы зор», – дейді экспедиция қатысушысы Айгерім Серікбайқызы.
Бұл күні оқушылар Қызылорда облысы Жаңақорған аудандық тарихи-өлкетану музейінде де таным көкжиегін кеңейте түсті. Көне қалалардан табылған қыш ыдыстар мен құнды жәдігерлерді көзбен көрді. Бұл мұражайда сыры мен құпиясы сақталған 8600 – ден астам экспонат бар екен.
Экспедицияның екінші күнінде оқушылар қола дәуірінің тарихынан сыр шертетін Шиелі ауданында орналасқан «Сауысқандық» шатқалына бет алды. Онда петроглифтерге зерттеу жұмыстарын жүргізді. Қаратау жоталарының жартастарындағы қола дәуірінен қалған суреттерде антропоморфтық бейнелер, арбалар, аңшылық сюжеттері мен солярлық таңбалар кездеседі. Тарихи ескерткішпен танысу барысында жас зияткерлер антропогендік, техногендік және табиғи факторлардың әсерінен оның жойылу үстінде екенін байқап, мәселені шешуде өз идеяларын ұсынды.
«Сауысқандық петроглифтері» электронды базасын құру және виртуалды музей әзірлеу ойға келді. Бүгінгі экспедиция барысында біз қажетті деректер жинап, алдағы уақытта осы бағытта жұмыс жасайтын боламыз», – дейді 9-сынып оқушысы Еркін Ағзам.
Үшінші күні зияткерлер Қызылорда облысында орналасқан дүниежүзіне әйгілі Байқоңыр қаласында болды. Дәл осы жерден адамның ғарышқа алғашқы ұшуы басталды. Адамзаттың ғарыш кеңістігін игеру жолы мен зымыран техникасының дамуы жайында экспедициялық топ мүшелері Байқоңыр ғарыш алаңы тарихының мұражайында жан-жақты танысты. 15000-нан астам экспонатқа толы музейді аралау барысында зияткерлер ғарыш алаңының құрылуы, қазіргі өмірі мен даму болашағы туралы ақпарат алды. Құнды жәдігерлердің ішінде ұшқыштар кителінің түпнұсқалары, тұрмыстық заттары мен құрал-жабдықтары бар. Сондай-ақ, ғарышқа жол салған адамдар, көрнекті ғалымдар, құрылысшылар, зымыран-ғарыштық техника сынаушылар жайлы арнайы көрме залы ұйымдастырылған.
«Бұл саяхат ерекше әсер қалдырды. Шындығында ғарыш саласының даму тарихы туралы көптеген қызықты деректерді естіп, Байқоңырдың әлем үшін маңызды екеніне тағы да көз жеткіздім. Ғарыш ғылымының қазақ даласында бастау алғаны туған жерге деген мақтаныш пен сүйіспеншілік сезімімді арттырды», – дейді 10-сынып оқушысы Жібек Кучербаева.
Байқоңырдан қайтар жолда оқушылар түркілердің бәріне ортақ тарихи тұлға, кемеңгер ойшыл, ғажайып музыкант Қорқыт бабаның құрметіне қойылған мемориалдық кешеніне бас сұқты. Аңыз әңгімелерде Қорқыт Ата – өзінің желмаясына мініп, халыққа мәңгілік бақыт әкелетін жерұйықты іздеген данагөй ойшыл. Ол мәңгілік өмірді Сырдың жағасында өзі ойлап тапқан қобыз аспабының сарынынан табады. Қалың жұрт қастерлеп, тәу ететін осындай киелі орында оқушылар абыздың ғұмыр кешкен кезеңімен, мәдениетімен танысып, рухани азық алды.
Экспедиция бағыты бойынша жас зияткерлер өңірдегі өндіріс орындарында болып, отандық өнім өндіру технологиясымен танысты. Алдымен оқушылар Қазақстандағы ең ірі күріш өндіруші «Абзал және К» компаниясының зауытында болды. Жылына 50 мың тоннаға дейін күріш ақтап шығаратын зауыт 50% өнімін ішкі нарыққа жіберсе, қалғанын Рессей, Иран, Қырғызстан, Өзбекстан және Тәжікстан елдеріне экспорттайды. 
«Зауыттың басты ерекшелігі қалдықсыз өнім өндіруге бағытталған. Күріш күрмегін қатты отын ретінде және мал азығына пайдаланады екен. Сонымен қатар танымал «Нестле» компаниясы да балалар тағамдары мен құрғақ таңғы астарды дайындау үшін Сырдың ақ маржанын қолданатынын білдік», – дейді 10-сынып оқушысы Аянат Шамшидин.
Жас зияткерлер қазақстандық нарыққа отандық өнімді шығарып отырған бірден-бір компания «Далатекс» тігін фабрикасының жұмысымен танысты. Осы фирмадан шыққан ерлер жейделері еліміздің барлық аймақтарынан бөлек, Ресейдің қалаларында жоғары сұранысқа ие. Бұдан бөлек «Далатекс» фабрикасы мектеп оқушыларының формасы мен басқа да мекемелердің арнайы киімдерін тігеді екен.
«Туған елге тағзым» экспедициясының соңғы күнінде оқушылар облыс орталығында орналасқан тарихи-мәдени нысандарды аралады. Қызылорда облыстық тарихи-өлкетану мұражайында зияткерлер өлкенің тарихы, мәдениеті мен салт-дәстүрі және еліміздің айшықты оқиғаларына арналған экспозияцияларымен танысты. Тәуелсіздік залында егемендігіміздің 30 жылдығына арналған викториналық сұрақтарда білімдерін байқатты. Сонымен қатар оқушылар темір жол вокзалында, облыстық сурет галлереясында, «Рухани жаңғыру» орталығында болып, болашақ зерттеу жұмысына негіз болатын ақпарат жинады.
Бұл саяхат оқушылардың дүниетанымын кеңейтуімен қатар оларды патриоттық бағытта тәрбиелеп, ұлттық рухани құндылықтарымызды дәріптеуге ықпал етті.
<img src="https://kyzylorda-news.kz/wp-content/uploads/2021/11/whatsapp-image-2021-11-11-at-14.55.26.jpeg" alt="" />
<img src="https://kyzylorda-news.kz/wp-content/uploads/2021/11/whatsapp-image-2021-11-11-at-14.55.27.jpeg" alt="" />
<img src="https://kyzylorda-news.kz/wp-content/uploads/2021/11/whatsapp-image-2021-11-11-at-14.55.25-1.jpeg" alt="" />
<img src="https://kyzylorda-news.kz/wp-content/uploads/2021/11/whatsapp-image-2021-11-11-at-14.55.23.jpeg" alt="" />

«Туған елге тағзым» экспедициясы аяқталды

<a href="https://kyzylorda-news.kz/ru/obshestvo/">Kyzylorda-news.kz</a>. Мектеп жасына дейінгі балаларға арналған «Ұмай» қайырымдылық үйі мектеп жасына дейінгі балаларға арналған экологиялық білім беру және эковолонтерлікті дамыту бойынша жобаны іске асыруда. Жоба «Шеврон» компаниясы және Орталық Азияның Еуразия қорымен әріптестікте «Qolda 3.0» жедел көмек бағдарламасы аясында гранттық қаржыландыру есебінен іске асырылады.
Балалар үйінің 10 тәрбиешісі «Мектеп жасына дейінгі балалардың қарапайым экологиялық түсініктері» бағдарламасы бойынша оқытудан өтеді. Тәрбиешілер Монтессори әдісінің элементтерін қолдана отырып, мектеп жасына дейінгі 75 балаға білім берумен айналысады. Жылыжайда 48 сағаттық теориялық және практикалық сабақтар балалардың бойына экологиялық мәдениетті ойын түрінде бекітуге бағытталған.
Сондай-ақ «Ұмай» қайырымдылық үйінде табиғат аясында тұрақты экскурсиялар өткізу арқылы балалардың бойына сұлулықты көру қабілетін арттырады. Эксперттердің айтуынша бұл байқампаздық пен эмоционалды интеллектті дамытады, баланың бойындағы шығармашылық қабілеттерді оятады және қоршаған ортаға деген жауапкершілік сезімін тәрбиелейді.
<blockquote>
 Оқыту семинарларының тренері Анар Изден: «Табиғатқа тамсану бойынша сабақтар – бұл мектепке дейінгі білім беру процесінде экологиялық бағытты дамыту ғана емес. Бұл – балалардың шығармашылық әлеуетін дамыту және мәдениетті адамды тәрбиелеу. Бүгін семинарда маған «Таудың басындағы жалғыз ағаш» тақырыбын талдау ұнады. Ұмайлықтар күш пен тұрақтылық тақырыбын өте кең және қолжетімді түрде аша білді. Жоба аясындағы басқа да тақырыптар мазмұнды болады деп ойлаймын» – деп атап өтті.
</blockquote>
Мектеп жасына дейінгі балалардың эко-білім беру бағдарламасына қатысуы олардың дұрыс экологиялық әдеттерін деп күтілуде, атап айтқанда: қоқыс тастамау, гүлдерді жұлмау, пластикті пайдаланбау, қалдықтарды сұрыптау, үй өсімдіктерін өсіру, ағаш отырғызу және қоршаған ортаға мұқият болу қасиеттерінқалыптастыруға көмектеседі.
<blockquote>
 «Мектеп жасына дейінгі балаларға экологиялық тәрбие беру өте маңызды! Дәл осы 4-5 жаста сана элементтері айқын көрінеді: табиғатқа деген қызығушылық, эмоционалды реакциялар, табиғаттағы адамдардың мінез-құлқын саналы бағалау. Осылайша, мектепке дейінгі балалық кезеңде балалардың экологиялық мәдениетінің қалыптасуы мен дамуы жүреді. Дәл уақытында осы субмәдениеттің сапалы түрде қалыптасуының арқасында бала өзінің білімі мен дағдыларын келесі ұрпаққа бере отырып, қоршаған табиғатты өмір бойы жақсы көретін болады, бағалайды және оны қорғайды. Оқыту семинары аясында мен көп нәрсені білдім. Маған тыңдаушы ғана емес, орын алып жатқан оқиғалардың қатысушысы болу ұнады. Мен өз жұмысыма басқаша қарай бастадым», – деп санайды қайырымдылық үйінің тәрбиешісі Айзада Дәуренбекова.
</blockquote>
«Ұмай» мектеп жасына дейінгі балаларға арналған сауықтыру және тәрбиелеу қайырымдылық үйі» – 1999 жылы құрылған мемлекеттік емес мекеме. Облыстың ең ірі үкіметтік емес ұйымдарының бірі қазіргі уақытта 41 қызметкерді жұмыспен қамтамасыз етіп отыр. Негізі қаланған сәттен бастап әлеуметтік жетімдіктің алдын алу мақсатында қиын өмірлік жағдайларға тап болған отбасыларға үздіксіз қызмет көрсетеді. Қайырымдылық үйі республикалық «Таным» сыйлығының иегері атанды.

Қазақстан және Қызылорда облысының жаңалықтары