<a href="https://kyzylorda-news.kz/">Kyzylorda-news.kz.</a>&nbsp;Ресейдің апелляциялық комиссия GZT түрік басылымының ұсталған редакторлары қазақстандық Назгүл Кенжетай мен Эмин Карачакты қамаудан босату туралы шешім қабылдады. Бұл туралы заңгер Абзал Құспан&nbsp;<a href="https://www.facebook.com/abzalkuspan">мәлімдеді.</a>
<blockquote>
 «Қазір ғана әріптестерден хабар алдым. Бүгін апелляциялық алқа Назгүл Кенжетай мен Түркиялық Эмин Карачакты босату туралы шешім қабылдады. ҚР Сыртқы істер министрлігіне алғыс айтамыз», – деді заңгер.
</blockquote>
Журналистің ағасы Досай Кенжетай да Қазақстанның Сыртқы істер министрлігіне көрсеткен көмегі үшін алғысын білдірді.
<blockquote>
 «Менің қарындасым Назгүл Кенжетай Ресейде орынсыз айыпталды. Бүгін екі мемлекеттің дипломатиялық бастамалары нәтижесінде сот шешімін өзгертті. Журналистер мен заңгерлерге үлкен алғыс айтамын», – деп қосты Кенжетай.
</blockquote>
Айта кетейік, бұған дейін Хакасияда экстремизмге қарсы күрес басқармасының қызметкерлері Түркиядан келген Назгүл Кенжетай мен Эмин Карачакты қамауда ұстап отырғандығы туралы <a href="https://kyzylorda-news.kz/kogam/qyzylordalyq-nazguel-kenzhetaj-hakasijada-qamawgha-alyndy-135931/">хабарлаған болатынбыз</a>.

Хакасияда қамауға алынған Назгүл Кенжетай босатылды

<a href="https://kyzylorda-news.kz/">Kyzylorda-news.kz.</a> Жандарбек Бекшин Алматының бас санитар дәрігері лауазымын босатады, деп хабарлайды <a href="https://www.inform.kz/kz">ҚазАқпарат.</a>
Бұл ақпаратты ҚР Денсаулық сақтау министрлігі растады.
Алматы қаласының бас санитар дәрігері және ҚР ДСМ КСК Алматы қалалық санитарлық-эпидемиологиялық бақылау департаментінің басшысы Жандарбек Бекшин зейнетке шығуына байланысты 5 қаңтардан бастап қызметінен кетеді.
Еске салайық, Жандарбек Бекшин Алматының бас санитар дәрігері қызметіне 2020 жылдың сәуір айында тағайындалды.
2019 жылдың маусым айынан бері Денсаулық сақтау министрлігінің тауарлар мен көрсетілетін қызметтердің сапасы және қауіпсіздігін бақылау комитеті төрағасының орынбасары – бас мемлекеттік санитар дәрігер қызметін атқарған.
Бұған дейін Жандарбек Бекшин Қазақстан Республикасының бас мемлекеттік санитар дәрігері қызметінде болып, лауазымынан босатылған еді. Жандарбек Бекшин 1958 жылы Қостанай облысында дүниеге келген.

Жандарбек Бекшин қызметінен кетеді

<a href="https://kyzylorda-news.kz/">Kyzylorda-news.kz.</a>&nbsp;ҚР Білім және ғылым министрі Асхат Аймағамбетов педагогтерді жұмысқа қабылдау қағидаларына қатысты өзгерістер енгізілгенін айтты. Министр бұл туралы <a href="https://www.facebook.com/askhat.aimagambetov">Facebook</a>&nbsp;парақшасында хабарлады.
Енді мұғалімдерді жұмысқа қабылдау жаңа форматта: конкурс және нақты белгіленген критерийлер арқылы жүзеге асырылады.
Аймағамбетовтің сөзінше, бұған дейін нақты ережелер болмаған, яғни мектеп директоры кімді және қандай көрсеткіштер бойынша жұмысқа қабылдау керектігі туралы өзі шешетін.
<blockquote>
 «Бірқатар аймақта сағаттар санын дұрыс бөлмей, үш-төрт мұғалім бір ставкаға қабылданған жағдайлар тіркелді. Мұндай жағдайлар қандай себептерге байланысты орын алатынын болжау қиын емес. Бұдан былай білім беру ұйымдары барлық бос немесе уақытша бос лауазымдарға конкурс өткізетін болады. Бұл шағын жинақты мектептерге қатысты емес», – деп жазды ол.
</blockquote>
Байқауға біліктілік сипаттамаларына сәйкес келетін мұғалімдер қатысады. 
Жұмысқа қабылдау тәртібі мынадай:
– Жұмысқа орналасу кезінде үміткер конкурсқа қатысу туралы өтініш береді. Өтініш беруші өзінің бағалау парағын қоса ұсынады. Онда барлық жетістігі, нәтижелері, еңбек өтілі, әкімшілік немесе әдістемелік қызмет тәжірибесі, курстық дайындық және басқа да ақпарат көрсетіледі.&nbsp;
– Әрбір бағыт бойынша кандидат белгіленген критерийлер арқылы бағалау шкаласына сәйкес өз балдарын дербес қояды.
– Конкурстық комиссия өтініш берушінің өзі қойған балдардың, оларды растайтын құжаттардың сәйкестігін тексеріп, қорытынды ұпай шығарады. Нәтижесінде бос орынға ең көп балл жинаған үміткер қабылданады. Субъективизм деңгейі барынша төмендейді.
Нәтижесінде бос орынға ең көп ұпай жинаған үміткер ие болады.
<blockquote>
 «Ұйымдар үміткердің қандай да бір бұзушылықтарға, оның ішінде педагогикалық этика бойынша бұзушылықтарға жол берді ме, жоқ па, сол туралы ақпаратты ескере алады. Мұндай фактілер анықталса, педагог кез келген кезеңде конкурстан шеттетіледі. Ережеде үміткердің біліктілік санатының міндетті түрде болуы қарастырылған», – деп мәлімдеді министр.
</blockquote>
Ол сондай-ақ ережеде үміткерге міндетті біліктілік санаты қарастырылғанын қосып өтті.
<blockquote>
 «Енді жоғары оқу орындары мен колледж түлектеріне жұмысқа қабылдану үшін дипломның болуы жеткіліксіз екенін атап өткен жөн. Олар Ұлттық біліктілік тестілеуден өтіп, одан әрі мектепте «педагог» бірінші санатын алуға міндетті», – деді Асхат Аймағамбетов.
</blockquote>
Министр сонымен бірге педагог қызметін негізгі жұмысымен қоса атқаратын мұғалімдерді бір пән бойынша 8 сағаттан аспайтын жүктемемен конкурссыз жұмысқа қабылдауға рұқсат етілетінін айта кеткен жөн. Сондай-ақ осы білім беру ұйымының мұғалімдері арасында жүктемесі 8 сағаттан аз бос орындарды үлестіруге болады. Бұл ретте бір пән бойынша бос 9 немесе одан да көп сағатты жасанды түрде бөлшектеуге жол берілмейтінін жеткізді.
Аймағамбетов аталған шаралар сыбайлас жемқорлық тәуекелдерін жоюға және педагог лауазымына үміткерлерді сапалы іріктеуге бағытталғанын атап өтті.

Мұғалімдерді жұмысқа қабылдау ережесі өзгерді

<a href="https://kyzylorda-news.kz/">Kyzylorda-news.kz.</a>&nbsp;Өзбекстандағы Сырдария облысында Өзбекстан және Қазақстан жастарының қатысуында «Сайхун» фестивалі өтуде, деп хабарлайды <a href="https://www.inform.kz/kz/syrdariya-oblysynda-ozbek-zhane-kazak-zhastarynyn-sayhun-festivali-otip-zhatyr_a3877972">ҚазАқпарат</a>.
<img src="https://kyzylorda-news.kz/wp-content/uploads/2021/12/2112241629162206g.jpg" alt="" />
Фестивальға қатысушылар түркі жұртының ұлы ақыны хәм шығыстың ойшыл данышпаны Әлішер Науаи мүсініне гүл шоқтарын қойды. Облыстық музыкалық драма театрының фойесінде өзбек-қазақ халықтарының тарихы мен құндылықтары туралы тұсаукесер өтіп, ол «Достық көпірі» атты концерттік бағдарламамен жалғасты.
Осы шарадан соң облыс әкімі Гафуржон Мирзаев қазақстандық қонақтармен кездесу өткізіп, өңірде атқарылып жатқан ауқымды жұмыстар, көршілес елдермен барлық салада байланысты нығайту шаралары, Өзбекстан мен Қазақстан арасындағы достық пен ынтымақтастық қарым-қатынастары туралы мәлімет берді.
Кездесу барысында жас өнерпаздар екі халықтың шығармашылығынан жыр мүшәйрасын ұйымдастырып, достық сайыс өткізді.
Жүздесу соңында қазақстандық қонақтарға «Достық» форумының мүсіні мен естелік сыйлықтары табыс етілді.
<img src="https://kyzylorda-news.kz/wp-content/uploads/2021/12/2112241629087300g.jpg" alt="" />

Сырдарияда өзбек және қазақ жастарының «Сайхун» фестивалі өтіп жатыр

<a href="https://kyzylorda-news.kz/">Kyzylorda-news.kz.</a> Бүгін Қызылорда облысында карантиндік шектеулерге байланысты шырша мерекесі онлайн форматта өтті.
Бір мезетте қала және аудан көлемінде 200 балаға 200 Аяз ата мен 200 Ақша қар Президент сыйлықтарын табыс етіп, думанды мерекені сезіндірді.
Балаларға арналған Президент шыршасы мерекесінде облыс әкімі Гүлшара Әбдіқалықова телевизиялық форматта балаларға тілек білдіріп, жаңа жыл мерекесімен құттықтады.
Президент шыршасы аясында әлеуметтік санаттағы отбасылардың балаларына Президент құттықтауы мен планшет, роутер, 6 айға тегін интернет пен ойыншықтар, кітаптар және тәтті сыйлықтар табысталды.
<img src="https://kyzylorda-news.kz/wp-content/uploads/2021/12/269864621_1263467164156486_8887589418232049557_n.jpg" alt="" />
<img src="https://kyzylorda-news.kz/wp-content/uploads/2021/12/269957894_1263467247489811_8484407074767213807_n.jpg" alt="" />
<img src="https://kyzylorda-news.kz/wp-content/uploads/2021/12/269973749_1263467160823153_4076714992621567910_n.jpg" alt="" />
<img src="https://kyzylorda-news.kz/wp-content/uploads/2021/12/269966204_1263466737489862_2200791017175825024_n.jpg" alt="" />
<img src="https://kyzylorda-news.kz/wp-content/uploads/2021/12/269907549_1263467220823147_4897871287982228545_n.jpg" alt="" />
<img src="https://kyzylorda-news.kz/wp-content/uploads/2021/12/269875035_1263467214156481_2743720170580265375_n.jpg" alt="" />
<img src="https://kyzylorda-news.kz/wp-content/uploads/2021/12/269851240_1263498974153305_4606783651428483642_n.jpg" alt="" />

Қызылордада 200 балаға Президенттің жаңажылдық сыйлығы табысталды (ВИДЕО)

<a href="https://kyzylorda-news.kz/">Kyzylorda-news.kz.</a> Тәуелсіздік жылдары облыстың ауыл шаруашылығы саласын дамытуға көрсетілген мемлекеттік қолдаулардың арқасында оң серпін қалыптасты. Мәселен, соңғы 10 жылда жалпы өңірлік өнімдегі ауыл шаруашылығының үлесі 5,9 пайызға өсті. Сондай-ақ, өнімдердің электрондық саудасын жүйелендіру және агроөнеркәсіптік кешеннің экспорттық әлеуетін арттыру мақсатында «Агробиржа» жобасы іске асырылды.
<blockquote>
 «Биыл мемлекет тарапынан көрсетілген қолдаулардың арқасында жалпы егіс көлемі 188,1 мың гектарды құрады. Ал 2016 жылдан бастап егілген өнімдерге 100 пайыз жоғары репродукциялы тұқымдарды пайдалануда. Бұл соңғы 25 жылда болмаған көрсеткіш. Нәтижесінде, күріштің өнімділігі 12,6 пайызға ұлғайды», – деді облыстық ауыл шаруашылығы басқармасы басшысының орынбасары Қайратбек Сәрсенбаев.
</blockquote>
Айта кетейік, жыл сайын өндірілген күрішті қайта өңдеу толығымен жолға қойылған болатын. 1991 жылға дейін облыста күріш ақтайтын бірнеше ғана зауыт болса, бүгінгі күні аймақта 76 күріш ақтау зауыты жұмыс істейді. Бұл зауыттардың жылдық қуаттылығы 514 мың тоннаны құрайды және жыл сайынғы жиналатын күріштің барлық көлемін өңдеуге толық мүмкіндік береді.
<blockquote>
 «Барлық экспортталған өнімнің 93 пайызын негізгі дақыл – күріш өнімі құрайды. Биыл күрiштің көлемі 83,6 мың гектарды құрады. Көршілес Ресей, Қырғызстан, Беларусь, Әзірбайжан, Өзбекстан, Моңғол мемлекеті, Тәжікстан, Украина және Ирак мемлекеттеріне Сыр күріші экспортталуда. Есепті кезеңде 71 мың тонна күріш шет мемлекеттерге жөнелтіліп, былтырғы жылмен салыстырғанда 112,6 пайызға артты», – деді Қайратбек Әубәкірұлы.
</blockquote>

Қайратбек Сәрсенбаев: Сырдың күріші 19 елге экспортталуда

<a href="https://kyzylorda-news.kz/">Kyzylorda-news.kz.</a> Келесі жылдан бастап мемлекеттік қызметкерлер қысқартыла бастайды. Министрліктер мен ведомстволардың штат саны 10 пайызға қысқарады. Оларды қысқарту алдағы екі жыл ішінде жүргізіледі. Әртүрлі деңгейдегі мемлекеттік мекемелердің штаттарында шектеулер өзгереді. Премьер-министр Асқар Мамин тиісті қаулыға қол қойды. Әкімдіктерде қысқарту жүргізіледі.&nbsp;Оның ішінде облыс, қала және аудан әкімдерінің орынбасарлары бар. Бұл туралы&nbsp;<a href="https://www.youtube.com/watch?v=zvEXOJLnqng&list=PLn2OyECVOtB980GbYlz2UXo_cgc76D951">Информбюро</a>&nbsp;жаңалықтар қызметі хабарлайды.
Министрліктер мен басқа да орталық атқарушы органдардың қызметкерлері де жұмыстан босатылатын болады. Қасым-Жомарт Тоқаев Жолдауда мемлекеттік аппаратты оңтайландыру туралы айтқан болатын. Мемлекеттік қызметкерлер санын 25 пайызға қысқарту жоспарланған еді.
Парламент Мәжілісінің депутаты Снежанна Имашеваның пікірінше, ең үздік жұмысшыларды жетекшілер алып қалуды жоспарлап отыр.
<blockquote>
 “Жақында біз ішкі істер министрлігінің есебін тыңдадық. Олар іс жүзінде ешкімді жұмыстан босатпағанын және қысқарту бос орындар есебінен жүргізілгенін айтты. Менің ойымша, мемлекеттік қызмет жүйесінде де олардың барлығы осылай болады”, –&nbsp;дейді&nbsp;ҚР Парламенті Мәжілісінің депутаты.
</blockquote>

Жаңа жылдан бастап  мемлекеттік қызметкерлердің саны қысқартылады

<a href="https://kyzylorda-news.kz/">Kyzylorda-news.kz.</a> Қызылордада жыл басынан бері «Аркан» құрылғысымен 30 мыңға жуық құқық бұзушылық анықталды.
Қызылорда қаласында автокөліктер ағымы басым көп жүретін көше бойларына жалпы саны 24 дана құқық бұзушылықтарды автоматты түрде анықтайтын сертификатталған арнайы бақылау-өлшеу құрылғылары жұмыс атқаруда. Құрылғылардың негізгі мақсаты жол қауіпсіздігін сақтап, жол көлік оқиғасын азайту болып саналады.
Есепті мерзімде «Аркан» құрылғылармен 32579 құқық бұзушылық анықталып, 339 млн 402 мың 377 теңге айыппұл салынса, оның 268 млн 932 мың 517 теңгесі өндірілді.
<blockquote>
 «Құрылғылардың тиімділігін ескере отырып қаламызда алдағы уақытта құрылғыларды көбейту мақсатында тиісті жұмыстар атқарылуда»,-деді Қызылорда облысы Полиция департаментінің бастығы полиция полковнигі Бектөре Сұлтан.
</blockquote>

«Аркан» құрылғысымен 30 мыңға жуық құқық бұзушылық анықталды

<a href="https://kyzylorda-news.kz/">Kyzylorda-news.kz.</a> Оңтүстік Африкада коронавирустың жаңа Омикрон нұсқасының таралуы туралы деректерді талдау барысында дәрігерлер оның SARS-CoV-2 бастапқы нұсқасынан екі есе жұқпалы, ал дельта штамынан 36% жылдам жұғады деген қорытынды жасады. Талдау нәтижесі medRxiv сайтында жарияланды.
Омикрон – коронавирустың жаңа түрі (B. 1.1.529). Ол Оңтүстік Африка мен Африканың басқа мемлекеттерінің аумағында осы жылдың күзінің соңында тарала бастады. Қазір әлемнің 80-нен астам мемлекетінде анықталды. Ғалымдардың пікірінше, Омикрон Дельта штамына қарағанда әлдеқайда жұқпалы, бірақ әзірге дәрігерлер бұл тұжырымды толық растау үшін жеткілікті мәліметтер жинаған жоқ.
Жаңа зерттеуде Колумбия университетінің (АҚШ) профессоры Джеффри Шаманның басшылығымен америкалық дәрігерлер бұл олқылықтың орнын толтырды. Ғалымдар Оңтүстік Африканың Гаутенг провинциясындағы соңғы бірнеше аптадағы мәліметтерді талдады.
Осы деректерге сүйене отырып, зерттеушілер Оңтүстік Африкада SARS-CoV-2 таралуының компьютерлік моделін құрастырды. Онда жергілікті дәрігерлердің инфекцияны қаншалықты жиі анықтағаны, ПТР сынақтары және вирус үлгілеріне геномдық талдау жүргізілгені ескерілді. Шаман мен оның әріптестері пандемияның бірінші және кейінгі толқындары кезінде COVID-19 қоздырғышының қалай тарағанын салыстырды.
<a href="https://www.inform.kz/kz/koronavirus-omikron-nuskasy-del-ta-shtamyna-karaganda-zhugu-zhyldamdygy-36-zhogary_a3877824">ҚазАқпарат</a>

Коронавирус: Омикрон нұсқасы Дельта штамына қарағанда жұғу жылдамдығы 36% жоғары

<a href="https://kyzylorda-news.kz/">Kyzylorda-news.kz.</a> Қызылорда қаласындағы ЗК-169/5 мекемесінде жазасын өтеуші азаматтар балаларына жаңа жылдық сыйлық дайындады.
Мәселен Ғ.О есімді азамат қызына өз қолымен жасаған ас үй жабдығын тарту етпек.
<blockquote>
 «Қыз балаға қандай сыйлық ұсынсаңда балаша қуанатын нәзік жаратылыс иесі ғой. Сондықтан менде қызыма осы бұйымды арнайы жасадым. Оның қуанышы мендегі қиындықты жеңілдетеді», – дейді ол.
</blockquote>
Ал сотталушы С.Қ болса оқушы ұлына домбыра жасады.
<blockquote>
 «Ұлым домбыра үйірмесіне қатысатын. Кішкене күнінен ұлттық аспапқа ерекше қызығатын болған соң жаңа жылына соны сыйға тартқым келді. Бұл жер маған жақыныңды бағалауға үйретіп жатыр. Бала қуанса ата-ананың жігері тасиды. Сол үшін бала көңілі ортаймаса екен», – дейді С.Қ.
</blockquote>
<img src="https://kyzylorda-news.kz/wp-content/uploads/2021/12/whatsapp-image-2021-12-24-at-09.35.44.jpg" alt="" />

Қызылордада сотталғандар балаларына сыйлық жасады

<a href="https://kyzylorda-news.kz/">Kyzylorda-news.kz.</a> Достық үйінде «Қоғам мен мемлекеттің тұрақты дамуы мүддесіндегі әріптестіктің 30 жылдығы» Х жергілікті Азаматтық форумы өтті. Тәуелсіздіктің 30 жылдығына орай ұйымдастырылған шараға облыс әкімінің орынбасары Серік Ахмет қатысты.
Алғашқы рет бұл форум 2003 жылы өткізілді. Содан бері 2 жыл сайын тұрақты ұйымдастырылып келеді.
<blockquote>
 «Халық пен билік арасындағы алтын көпірге, азаматтық қоғам өкілдерінің диалог алаңына айналған мұндай басқосулардың маңызы зор. Облыстағы үкіметтік емес ұйымдар саны жылдан жылға көбейіп келеді. Тәуелсіздік алған жылдары облыстағы қоғамдық ұйымдар саны 15 болса, бүгінде олардың қатары 1000-ға жуықтады. Бұл да азаматтық сектор негіздерінің күшейіп, қоғамдағы азаматтық жауапкершілік пен белсенділіктің артқанын көрсетеді»,- облыс әкімінің орынбасары Серік Ахмет.
</blockquote>
«Рухани жаңғыру» қазақстандық қоғамдық даму институты «Қазақстан Республикасы Тәуелсіздігінің 30 жылдығына орай ұйымдастырылған қажырлы еңбектің арқасында жетістікке жеткен тұлғалардың «Қажырлы еңбек – табыс кілті» атты электронды флаерлерін әзірлеу жобасы іске асырылып, өңірімізден екі адам тізімге енді. Олар «Абай-Дәулет» ЖШС директоры Мұрат Сәрсенбаев және «Қазақстанның еңбек сіңірген ұстазы», бірінші деңгейлі педагог Жәмилә Әбжан.
Өңірдегі үкіметтік емес секторды дамытуда Азаматтық Альянс Қауымдастығы үлкен жұмыс атқаруда. «Бір терезе» қағидаты бойынша қолдау көрсету орталығын жүзеге асырды. Азаматтық қоғам өкілдері мен белсенділер, меценаттар ел өміріндегі кез келген шаруаға, әсіресе пандемияны еңсеруге белсенді атсалысуда.
Азаматтық қоғам өкілдері бас қосқан келелі кеңесте қоғам дамуына үлес қосқан бірқатар азаматтар марапатқа ие болды. «Қазақстан Республикасының Тәуелсіздігіне 30 жыл» мерекелік медалімен «Қызылорда облысының Үкіметтік емес ұйымдарының Альянсы Қауымдастығы» ЗТБ-нің төрайымы, Қызылорда қалалық мәслихат депутаты Анар Ізден марапатталды. Сондай-ақ, «Халық алғысы» медалі, ҚР Президентінің жанындағы Әйелдер істері және отбасылық-демографиялық саясат жөніндегі ұлттық комиссияның және ҚР Тәуелсіздігінің 30 жылдығына орай облыс әкімінің алғыс хаты бірнеше азаматқа табысталды. Сонымен бірге, «Рухани жаңғыру» бағдарламасы аясында ұйымдастырған республикалық «Жомарт жүрек» байқауының өңірлік жеңімпаздары марапатталды. Атап айтқанда, «Жыл меценаты» номинациясының иегері кәсіпкер Ляйля Ризванова, «Жыл тұлғасы» номинациясының иегері дәрігер Әлия Қартабаева, «Жылдың үздік ұйымы» номинациясының иегері «Қызылорда қалалық мүгедектер қоғамы» қоғамдық бірлестінің жетекшісі Сәкен Алдашбаев, «Туған өлке» номинациясының иегері «Ер-Әлі» шаруа қожалығының төрағасы Әліби Бекжанов, «Жылдың үздік қамқоршысы» номинациясының иегері Самұрық инновациялық идеяларды дамыту орталығы» қоғамдық қорының директоры Жандос Тұсмағанбетов.
Форумда қоғам белсенділері, жастар, өңірдегі азаматтық қоғам өкілдері баяндама жасап, пікірлері мен ұсыныстарын ортаға салды.
<img src="https://kyzylorda-news.kz/wp-content/uploads/2021/12/269818227_1437613259967515_4763980743063611819_n.jpg" alt="" />

Қызылордада «Жомарт жүрек» байқауының жеңімпаздарына марапат табысталды

<a href="https://kyzylorda-news.kz/">Kyzylorda-news.kz.</a> Қызылорда қаласы әкімінің орынбасары Бектас Нуридинов қала жастарының форумына қатысып, «Самғау» жастар сыйлығының иегерлерін марапаттады.
Шара барысында қала әкімінің орынбасары Бектас Балғабайұлы «Самғау» жастар сыйлығының иегерлерін құттықтап, алдағы уақытта да еліміздің жарқын болашағына бағытталған іргелі істерімен толағай жетістіктерге жете берулеріне тілектестік білдірді. Жастардың ұсыныстарын назарға алып, қаламызды өркендетуге бағытталған жобаларды қала әкімдігі бірлесе жүзеге асыратындығын жеткізді.
«Самғау» жастар сыйлығы белсенді жастардың одан әрі шығармашылығын шыңдап, саяси-мәдени, рухани байлығын арттыруға қолдау көрсету, көтермелеу мақсатында жыл сайын дәстүрлі түрде жалғасын тауып келеді. 
Сыйлыққа үміткер ретінде 14 пен 28 жас аралығындағы Қызылорда қаласының белсенді жастары қатысып, үміткерлер 10 номинация бойынша таңдалды. Сондай-ақ, Ел Тәуелсіздігінің 30 жылдық мерейтойына орай арнайы номинация тағайындалды.
Конкурсқа білім және ғылым, журналистика, спорт, медицина, мәдениет, IT, өндіріс, әлеуметтік салаларында табысты еңбек етіп, өз саласы бойынша жоғары көрсеткіштерге жетіп жүрген жастар қатысты.
Әр номинация бойынша үздік шыққан 11 жасқа Қызылорда қаласы әкімінің «Самғау» жастар сыйлығы мен 100 мың теңге көлеміндегі сыйақысы табысталды.
Сонымен қатар, салтанатты жиында өңірдегі жастар саясатының дамуына үлес қосып, Қызылорда қаласы жастарының дамуына ерекше қолдау көреткен әріптестер мен қоғамдық жұмыстарға белсене араласып, білімге, өнерге, ғылымға, спортқа жаны құмар, азаматтық қоғамды қалыптастыруда өзіндік үлес қосып жүрген бірқатар жастар қосымша арнаулы номинацияларға ие болды.
Айта кету керек, салтанатты шара «Қоғам дамуындағы жастардың рөлі» қала жастарының форумынан бастау алды. Тәжірибе алмасу алаңында «Қазақстанның 100 есімі» жобасының жеңімпазы, халықаралық деңгейдегі психолог, тренер С. Абдрахманова, Жамбыл облыстық жастар ресурстық орталығы басшысының орынбасары А. Абдуалиева спикер ретінде сөз сөйледі.
<img src="https://kyzylorda-news.kz/wp-content/uploads/2021/12/samgaw3.jpg" alt="" />
<img src="https://kyzylorda-news.kz/wp-content/uploads/2021/12/samgaw6.jpg" alt="" />

Қазақстан және Қызылорда облысының жаңалықтары