<a href="https://kyzylorda-news.kz/">Kyzylorda-news.kz.</a>&nbsp;Қызылорда облысының әкімі Гүлшара Әбдіқалықова Қазалы ауданына жасаған жұмыс сапары аясында Жалаңтөс Баһадүрге арналған ескерткішті ашып, көпбалалы аналарға пәтер кілтін табыстап, әлеуметтік бағыттағы қызмет көрсету нысанының жұмысын саралады.
Алдымен аймақ басшысы Әйтеке би кентінде даңқты қолбасшы Жалаңтөс батырдың 445 жылдығына орай бой көтерген ескерткіштің ашылу рәсіміне қатысты. Салтанатты шараға зиялы қауым өкілдері, батырдың ұрпақтары қатысты.
Облыс әкімі атаулы датаның Ел Тәуелсіздігінің 30 жылдық мерейтойымен қатар келгенін тілге тиек етіп, даңқты қолбасшыға арналған ескерткіштің ашылуымен тұрғындарды құттықтады.
<blockquote>
 «Тәуелсіздігіміздің 30 жылдық мерекесімен қатар келген Жалаңтөс Баһадүрдің 445 жылдық мерейлі мерекесінде сәулеті өнерінің бір белгісі – осы еңселі ескерткішті орнатып отырмыз. Самарқанды 30 жыл билеген Жалаңтөс Баһадүрдің тылсымға толы құпия әлеміне аса бір мұқиятпен үңіліп, ескерткішін қоладан құштарлықпен құйған елімізге белгілі мүсінші Аманкелді Кененбаев ерлік пен өрліктің, даналықтың үйлесімін дәл бейнелесем деген мақсатына жетті деп есептеймін. Туған жерімізді найзаның ұшымен, білектің күшімен қорғаған батыр атамыздың рухы ұрпағын қолдап-қорғап жүргей», – деді Гүлшара Әбдіқалықова.
</blockquote>
Ескерткіштің негізгі бөлігінде Жалаңтөс пен оның мінген аты таза қоладан құйылып жасалған. Еңселі ескерткіштің авторы Аманкелді Кененбаев бұған дейін де мемлекеттік деңгейдегі маңызы бар ескерткіштерді шынайы жасап жүрген мүсінші. Бой көтерген мәдени нысанның жалпы биіктігі 12 метрді құрайды.
Айта кетейік, Елорда, Алматы мен Ақтөбеде, облыс орталығы мен Қазалы ауданында Жалаңтөс Баһадүр атындағы көшелер бар. Қызылорда қаласында еңселі ескерткіші бой көтерген. Сондай-ақ, облыс орталығында дарынды балаларға арналған спорт мектебі, Қазалыда орта мектеп пен ауылға батыр есімі берілген.
Мұнан соң, өңір басшысы Әйтеке би кенті, Аймақаш мөлтек ауданында жаңа тұрғын үйлердің кілтін табыстады. 35 пәтерлік 18 тұрғын үй аудандағы көпбалалы отбасыларға жалға беру тәртібімен беріліп отыр. Салтанатты шарада аймақ басшысы жаңа қоныс иелерін құттықтап, ізгі ниетін білдірді.
<blockquote>
 «Бүгін, Жаңа жыл қарсаңында көптеген отбасы қоныс тойын тойламақ. «Нұрлы жер» бағдарламасы аясында салынған бұл үйлер негізінен баспанаға мұқтаж көпбалалы отбасыларға беріліп отыр. «Аймақаш» шағын ауданындағы 36 тұрғын үйдің құрылысы осы жылдың басында басталды. Ол үшін бюджеттен 388 млн теңге бөлінді. Бұл тұрғын үйлер елімізде мемлекет тарапынан тұрғындардың әл-ауқатын арттыруға жасалып жатқан қолдаудың нақты көрінісі. Жаңа пәтер иелеріне қоныстарыңыз құтты болсын деймін! Еліміз тыныш, халқымыз бейбіт, Тәуелсіздігіміз баянды болсын», – деді облыс әкімі.
</blockquote>
Салтанатты шарадан соң өңір басшысы 7 баланың анасы Жанаргүл Баймұханованың жаңа шаңырағында болып, қуаныштарына ортақтасып, құрметін көрсетті. Пәтер иесіне арнайы сыйын табыс етіп, балаларына жаңажылдық тәттілерді тарту етті.
Ауданда халыққа сервистік қызмет көрсету саласы да қарқын алған. Облыс әкімі «Батыс Еуропа – Батыс Қытай» автокөлік дәлізі бойындағы көпсалалы қызмет көрсету кешенінің жұмысымен танысты. Кешен қонақ үй, монша, тамақтану орны, автотұрақ, көлік жөндеу орталығы мен шағын маркетті қамтиды. Жеке кәсіпкер Арзана Байсуганова осы нысан арқылы 10 тұрғынды тұрақты жұмыспен қамтып отыр.
Облыс әкімі Гүлшара Әбдіқалықова бизнес бастаған кәсіп иелеріне мемлекет тарапынан көрсетіліп жатқан көмек туралы айтып, туған жердің өсіп-өркендеуіне қосып жатқан үлестері үшін бизнес өкілдеріне ризашылығын білдірді.
Айту керек, 30 жыл ішінде ауданда 19 орта мектеп, 9 мемлекеттік балабақша, 25 денсаулық, 15 спорт нысаны және 6 мәдениет ошағы іске қосылды. Автокөлік жолдарының жағдайы 80,3 пайызға жақсарды. Ал, 467,9 мың шаршы метр тұрғын үй салынып, пайдалануға берілген.
Облыс әкімінің жұмыс сапары Қармақшы ауданында жалғасты.
<img src="https://kyzylorda-news.kz/wp-content/uploads/2021/12/eskertkishsh.jpg" alt="" />
<img src="https://kyzylorda-news.kz/wp-content/uploads/2021/12/ashylw.jpg" alt="" />
<img src="https://kyzylorda-news.kz/wp-content/uploads/2021/12/bigali.jpg" alt="" />
<img src="https://kyzylorda-news.kz/wp-content/uploads/2021/12/kazaly.jpg" alt="" />
<img src="https://kyzylorda-news.kz/wp-content/uploads/2021/12/tost.jpg" alt="" />
<img src="https://kyzylorda-news.kz/wp-content/uploads/2021/12/baspana-kazaly.jpg" alt="" />
<img src="https://kyzylorda-news.kz/wp-content/uploads/2021/12/kafe.jpg" alt="" />
<img src="https://kyzylorda-news.kz/wp-content/uploads/2021/12/arzan.jpg" alt="" />
<img src="https://kyzylorda-news.kz/wp-content/uploads/2021/12/gostt.jpg" alt="" />

Қазалыда Жалаңтөс Баһадүрдің ескерткіші ашылды

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысының әкімі Гүлшара Әбдіқалықова Арал ауданына жұмыс сапарымен барып, бірқатар өндірістік және әлеуметтік нысандардың жұмысымен танысты және аудан орталығында баспана алуға кезекте тұрған аз қамтылған, көпбалалы отбасыларға жаңа пәтер кілтін табыстады.
Аймақ басшысының жұмыс сапары Арал ауданаралық ауруханадан басталды. 150 орындық ауруханада 385 қызметкер жұмыс істейді, ал ұйымға 68 мыңға жуық аудан тұрғыны тіркелген.
Облыс әкіміне аурухананың бас дәрігері Марат Ршымбетов жаңадан сатып алынған компьютерлік томография мен жылжымалы медициналық кешенін көрсетті. Жылжымалы медициналық кешен «Өнеркәсіпті дамыту қоры» АҚ-мен 5 жылға қаржы лизингі шартымен алынған. Кешен хирургиялық, гинекологиялық, рентген, УЗИ, офтальмология, жалпы қабылдау бөлмелерімен зертхана осы заманғы медициналық қондырғылармен жабдықталған. Жаңа құрылғы арқылы шалғай елді мекендердің тұрғындарына медициналық көмек көрсететін болады.
Мұнан кейін аймақ басшысы «Aral Sea Food» ЖШС-нің «Балықты тереңнен өңдеу» жобасының жұмысымен танысып, кәсіпорындағы жаңа құрал-жабдықтарды көріп, мамандармен тілдесті. Жоба аясында жылына 4 мың тонна өнделген балықтың сүбесі шығарылып, ішкі нарыққа және ТМД елдеріне ұсынылады. Сондай-ақ, кәсіпорын ішінен балық ұнтағын шығаратын цех іске қосылды. Кәсіпорында қолданылатын технология еуростандарт бойынша мақұлданды. Нысанда 50 адам жұмыспен қамтылған.
Сондай-ақ, Гүлшара Әбдіқалықова Арал қаласында салынған 18 екі пәтерлі үйдің кілтін табыстап, баспана иелерін келе жатқан Жаңа жыл мен қоныс тойларымен құттықтады.
<blockquote>
 «Бүгін, міне, Жаңа жыл қарсаңында үй кезегінде тұрған Арал тұрғындарына үйлердің кілтін табыстағалы тұрмыз. Қазан айында ғана біз осы маңдағы 1 қабатты 4 пәтерлі тұрғын үйлердің кілтін берген болатынбыз. Белгілі меценат Болат Өтемұратов Арал өңіріндегі қуаңшылық мәселесімен қатар, тұрғындардың әлеуметтік жағдайына да назар аударып, бірнеше отбасының баспаналы болуына демеушілік жасады. Бүгінгі таңда осы тұрғын үйлердің құрылысы аяқталып, барлық жағдайы жасалған жайлы баспана пайдалануға беріліп отыр. Тұрғындарға қуаныш сыйлаған құрылысшыларға, жұмысшыларға зор ризашылығымызды білдіреміз. Шаңырақтарыңызға шаттыққа толып, құт-береке кетпесін! Еліміз еңселі, Тәуелсіздігіміз мәңгілік болсын!», – деді облыс әкімі.
</blockquote>
Іс-шара барысында 10 көпбалалы, аз қамтылған отбасыға пәтер кілті табысталды.
Облыс әкімі жаңа пәтер алған көпбалалы ана Нұргүл Еділбаеваның үйін көріп, қоныс той иелерін құттықтады және оларға ас үй жиһазын сыйға тартты. Баспанаға қолы жеткен Нұргүл жолдасы Нұрболат екеуі де жұмыссыз, 7 бала тәрбиелеп отыр.
Айта кетейік, Тәуелсіздік алған жылдан бері Арал ауданында 324 697 шаршы метрді құрайтын тұрғын үй пайдалануға беріліп, 180 жас маман тұрғын үймен қамтамасыз етілді. Мұнан бөлек, ауданға қарасты шалғай елді мекендерде жаңадан 6 дәрігерлік-амбулатория, 1 фельдшерлік-акушерлік пункт, 7 медициналық бекет пен 38 білім ошағы жаңадан салынды. 4 мәдениет үйі, 2 клуб және 2 музей аудан халқына рухани қызмет етуде. Сондай-ақ, бұқаралық спортты дамыту бағытында ауданда 2 спорттық кешен, 1 стадион, 35 спорттық алаң пайдалануға берілсе, 3 спорт кешенінің құрылысы жүруде.
Әрі қарай облыс әкімі Жақсықылыш кентінде орналасқан «Аралтұз» АҚ ас тұзы және техникалық тұз өндірісінің жұмысымен танысты. Жұмысшылармен кездесіп, пікірлесті. Кәсіпорынның индустрияландыру бағдарламасы аясында 2014 және 2016 жылдары ашылған 2 цех «Construcciones Mecanicas J.SERRA,S.A.» испан технологиясы бойынша шығарылатын өнім отандық нарықта сатылады және ТМД елдеріне экспортталады. Қазіргі таңда нысанда үшінші цех пайдалануға беріліп, өндірістің қуаты 350 мың тоннадан 600 мың тоннаға дейін ұлғайтылды. Кәсіпорында мыңға жуық жұмысшы істейді.
Жұмыс сапары соңында аймақ басшысы Аралқұм ауылдық округіне қарасты Шөміш елді мекеніндегі «Aral Quartz» ЖШС-ның кварц құмын байыту бойынша тау-кен комбинатының І кезеңін іске қосу рәсіміне қатысты. Комбинат жылына 120 мың тонна байытылған кварц концентраты мен құрғақ құрылыс ұнтақтарын өндіреді, нысанда 70 жаңа жұмыс орын құрылды. Дайын өнімнің 30% ішкі нарыққа, 70% экспортқа шығарылады. 
Айта кетейік, комбинат өндіретін кварц құмы жуырда жұмысын бастаған шыны зауытының өндірісінде қолданылмақ. Бұл өнімге шетелден де сұраныс жоғары. Жобаның екінші кезеңінде цех қуаттылығын арттыру және өнім түрлерін көбейту мақсатында жаңа нысанның құрылысы басталды.
Аймақ басшысы жаңа өндірістің жұмысына сәттілік тілеп, цехты іске қосты.
<img src="https://kyzylorda-news.kz/wp-content/uploads/2021/12/koz.jpg" alt="" />
<img src="https://kyzylorda-news.kz/wp-content/uploads/2021/12/med.jpg" alt="" />
<img src="https://kyzylorda-news.kz/wp-content/uploads/2021/12/aral1.jpg" alt="" />
<img src="https://kyzylorda-news.kz/wp-content/uploads/2021/12/aral3.jpg" alt="" />
<img src="https://kyzylorda-news.kz/wp-content/uploads/2021/12/balyk1.jpg" alt="" />
<img src="https://kyzylorda-news.kz/wp-content/uploads/2021/12/balyk-2.jpg" alt="" />
<img src="https://kyzylorda-news.kz/wp-content/uploads/2021/12/twz.jpg" alt="" />
<img src="https://kyzylorda-news.kz/wp-content/uploads/2021/12/twz1.jpg" alt="" />
<img src="https://kyzylorda-news.kz/wp-content/uploads/2021/12/taw3.jpg" alt="" />
<img src="https://kyzylorda-news.kz/wp-content/uploads/2021/12/taw2-1.jpg" alt="" />

Арал ауданында 36 пәтер кілті беріліп, жаңа өндіріс орны ашылды

<a href="https://kyzylorda-news.kz/">Kyzylorda-news.kz.</a>&nbsp;Қазақстанда 588 адам коронавирус инфекциясынан жазылып шықты, деп хабарлайды <a href="https://www.coronavirus2020.kz/">coronavirus2020.kz.</a>
Нұр-Сұлтан қаласында – 80,
Алматы қаласында – 8,
Шымкент қаласында – 0,
Ақмола облысында – 65,
Ақтөбе облысында – 12,
Алматы облысында – 9,
Атырау облысында – 6,
Шығыс Қазақстан облысында – 12,
Жамбыл облысында – 14,
Батыс Қазақстан облысында – 43,
Қарағанды облысында – 115,
Қостанай облысында – 11,
Қызылорда облысында – 5,
Маңғыстау облысында – 0,
Павлодар облысында – 155,
Солтүстік Қазақстан облысында – 45,
Түркістан облысында – 8.
Елімізде барлығы 958 277 адам COVID-19-дан емделіп, сауығып шықты.

5 қызылордалық коронавирустан айықты

<a href="https://kyzylorda-news.kz/">Kyzylorda-news.kz.</a>&nbsp;Қазақстанда өткен тәулікте 354 адамда коронавирус індеті ПТР арқылы расталды, деп хабарлайды <a href="https://www.coronavirus2020.kz/">coronavirus2020.kz.</a>
Аймақтар бойынша:
Нұр-Сұлтан қаласы – 76
Алматы қаласы – 49
Шымкент қаласы – 7
Ақмола облысы – 46
Ақтөбе облысы – 1
Алматы облысы – 8
Атырау облысы – 3
Шығыс Қазақстан облысы – 17
Жамбыл облысы – 2
Батыс Қазақстан облысы – 2
Қарағанды облысы – 65
Қостанай облысы – 7
Қызылорда облысы – 1
Маңғыстау облысы – 2
Павлодар облысы – 37
Солтүстік Қазақстан облысы – 30
Түркістан облысы – 1
Жалпы ел бойынша ауырғандар саны – 986 553.

Қызылордада өткен тәулікте 1 адамнан коронавирус анықталды

<a href="https://kyzylorda-news.kz/">Kyzylorda-news.kz.</a>&nbsp;Қазақстанның басым бөлігінде Солтүстік-Батыс циклон жырасының өтуімен қар жауып, жаяу бұрқасын болады, деп хабарлайды Қазгидромет.
Тек Қазақстанның оңтүстігінде, оңтүстік-шығысында және орталығында жауын-шашынсыз ауа райы күтіледі. Республиканың кей жерлерінде тұман, еліміздің оңтүстік-шығысында, солтүстігінде, батысында көктайғақ күтіледі.
Қостанай облысында жел 15-20 м/с күшейеді, облыстың орталығында, оңтүстігінде жаяу бұрқасынмен соғады, облыстың солтүстігінде тұман болады.
Солтүстік Қазақстан облысының солтүстігінде, оңтүстігінде, шығысында 15-20 м/с жел жаяу бұрқасынмен болады, көктайғақ, облыстың оңтүстік-батысында тұман болады. Алматы облысының солтүстігінде, шығысында, оңтүстігінде тұман, көктайғақ, Алакөл көлдері ауданында желдің жылдамдығы 18-23 м/с жетеді.
Ақмола облысында жаяу бұрқасын соғады, солтүстік – батысында, оңтүстік-шығысында желдің жылдамдығы 15-20, екпіні 23 м/с жетеді.
Павлодар облысының батысында, солтүстігінде жаяу бұрқасын күтіледі, облыстың батысында жел 18 м/с күшейеді. Қарағанды облысының шығысында, орталығында, Шығыс Қазақстан облысының солтүстігінде, оңтүстігінде, Қызылорда облысының оңтүстігінде, Маңғыстау облысының орталығында, Ақтөбе облысының солтүстік-батысында, солтүстігінде, Батыс Қазақстан облысының солтүстігінде, Түркістан облысының таулы аумағы мен тау бөктерінде, Жамбыл облысының солтүстігі мен таулы, тау бөктерінде тұман күтіледі.
Атырау облысының батысында, оңтүстігінде, шығысында тұман, көктайғақ күтіледі.

Сейсенбі күнге арналған ауа райы болжамы

<a href="https://kyzylorda-news.kz/">Kyzylorda-news.kz.</a>&nbsp; Президент Қасым-Жомарт Тоқаев бірнеше жаңа заңға қол қойды, – деп хабарлайды&nbsp;Ақорда сайты.
Мемлекет басшысы мынадай заңдарға қол қойды:
<ul>
<li>“Қазақстан Республикасының кейбір заңнамалық актілеріне құқық қорғау органдары, прокуратура және сот арасында өкілеттіктердің және жауапкершілік аясының аражігін ажырата отырып, үш буынды модельді ендіру мәселелері бойынша өзгерістер мен толықтырулар енгізу туралы”;</li>
<li>“Қазақстан Республикасының кейбір заңнамалық актілеріне өнеркәсіптік саясат мәселелері бойынша өзгерістер мен толықтырулар енгізу туралы”;</li>
<li>“Өнеркәсіптік саясат туралы”.</li>
</ul>

Мемлекет басшысы бірнеше заңға қол қойды

<a href="https://kyzylorda-news.kz/">Kyzylorda-news.kz.</a> Қызылорда облыстық дене шынықтыру және спорт басқармасының келісімімен Жұмахметов Жағыппар Насрадинұлы «Қайсар» футбол клубының директоры қызметіне тағайындалды.
Жағыппар Насрадинұлы 1961 жылы 21 наурызда Арал қаласында дүниеге келген. Жоғары білімді.
1978-1983 жылдары Қазақстан политехникалық институтын тәмамдаған.
Еңбек жолын 1983 жылы Ақтөбе облысында «ЗапКазГеология» бірлестігінде бұрғылау шеберінен бастап, бас инженер лауазымына дейін көтерілген.
1991-1999 жылдары «ЮЖ Нефтегаз» компаниясында инженер, бөлім басшысы, басқарма басшысы қызметін атқарған.
1999-2005 жылдары Қызылорда облыстық Төтенше жағдайлар басқармасы басшысының орынбасары;
2005-2009 жылдары Батыс Қазақстан облысы Төтенше жағдайлар басқармасының басшысы;
2009-2010 жылдары ОҚО Төтенше жағдайлар басқармасы басшысының бірінші орынбасары;
2010-2012 жылдары «ҚазГерМұнай» АҚ-ның департамент басшысы;
2012-2014 жылдары «Тұран» барлау мұнай компаниясы бас директорының орынбасары;
2014-2016 жылдары Өрт сөндіруші АҚ-ның Қызылорда облыстық филиалының директоры;
2017 жылдың ақпан айынан бастап осы кезге дейін «Қызылорда аз тонналық мұнай өңдеу зауытының» техникалық директоры қызметін атқарып келді.
<img src="https://kyzylorda-news.kz/wp-content/uploads/2021/12/nasradin.jpg" alt="" />

«Қайсар» футбол клубына жаңа директор тағайындалды

<a href="https://kyzylorda-news.kz/">Kyzylorda-news.kz.</a> «e-Salyq Business» мобильді қосымшасы кәсіпкерлерге салық міндеттемесін орындауды жеңілдетеді, деп хабарлайды <a href="https://www.inform.kz/kz">ҚазАқпарат.</a>
<blockquote>
 «Мемлекеттік кірістер комитеті 2022 жылдың 1 қаңтарынан бастап арнаулы мобильді қосымшаны пайдалана отырып және оңайлатылған декларация негізінде арнаулы салық режимін қолданатын жеке кәсіпкерлер үшін «e-Salyq Business» мобильді қосымшасын іске қосады», – делінген ҚР Қаржы министрлігі Мемлекеттік кірістер комитеті мәліметінде.
</blockquote>
Мобильді қосымшаның функционалы жеке кәсіпкер ретінде тіркелуге, салық режимін таңдауға және өзгертуге, түбіртектер беруге, кірістер тізілімін автоматты түрде қалыптастыруға, қосымшада есептелген салық міндеттемелерін төлеуге, оның ішінде қызметкерлер үшін, сондай-ақ алдын ала толтырылған оңайлатылған салық декларациясын ұсынуға мүмкіндік береді. Мұнымен қоса, арнаулы мобильді қосымшаны пайдалана отырып, арнаулы салық режимін қолдану кезінде салық есептілігін тапсырмауды ескереді.
<blockquote>
 «Бұдан басқа, қосымшада берешекті қарау және төлеу, мемлекеттік кірістер органдарынан хабарламалар алу, сондай-ақ оңайлатылған тәртіпте жеке кәсіпкердің қызметін тоқтату бойынша қызметтер қолжетімді. Қосымша «Play Market» және «App Gallery»-де қолжетімді», – деп аталып өткен комитет ақпаратында.
</blockquote>

1 қаңтардан бастап кәсіпкерлерге салық төлеу жеңілдейді

<a href="https://kyzylorda-news.kz/">Kyzylorda-news.kz.</a> Қызылорда облысы санитарлық эпидемиологиялық ахуалдың тұрақталығына байланысты «жасыл аймақта». Дегенмен сақтық шараларына салғырт қарауға әлі ерте. Індет басталғалы бері өңірімізде коронавирус инфекциясымен 19422 науқас тіркелді.
<blockquote>
 «Өткен тәулікте 2 жағдай анықталды. Бүгінде облыс бойынша инфекциялық стационарда – 51, реанимациялық төсек-орында 6 науқас ем қабылдап жатыр. Індетті ауыздықтар бір ғана жол бар, ол – вакцинация. 1 ақпан мен 27 желтоқсан аралығында облыста вакцинацияның 1 компонентімен егілгендер саны – 415538, халықтың қамтылуы 91,8 пайызды құрады. Екінші компонентті – 380740 (84,1 пайыз) адам салдырды», – деді облыстық денсаулық сақтау басқармасы басшысының орынбасары Жангелді Шаймбетов.
</blockquote>
14078 адамға «Рfizer» вакцинасы егілді. Оның 11325-і жасөспірім, 1264-і жүкті әйелдер, емізулі аналар-1488. Сонымен қатар бүгінге дейін өңірдің 16488 тұрғыны ревакцинациядан өтті.

Қызылорда: 14078 адамға «Pfizer» вакцинасы салынды

<a href="https://kyzylorda-news.kz/">Kyzylorda-news.kz.</a>&nbsp; Қызылорда облысы Қазалы ауданының тұрғыны мал ұрлығы бойынша аудандық полиция бөліміне арызданған.
Жедел іздестіру шараларының нәтижесінде Қазалы ауданы мен Ақай ауылының&nbsp; тұрғындарынан құралған қылмыстық топ ұсталды. Олар 3 бас жылқы малын ұрлап, ет өнімдерін Қазалы ауданы мен Төретам кенті, Ақай елді мекенінің тұрғындарына өткізген.
<blockquote>
 «Аталған дерек бойынша Қазақстан Республикасы Қылмыстық кодексінің&nbsp; 188-1 бабы 1-бөлігімен сотқа дейінгі&nbsp; тергеп-тексеру әрекеттері жүргізілуде. Күдіктілер Қазалы ауданы полиция бөлімінің уақытша ұстау изоляторына қамалды. Айғақ зат ретінде&nbsp; 16-шы калибрлі 1 дана аңшы мылтығы, ет өнімдері және Уаз 3163 «Патриот» маркалы автокөлігі тәркіленді», – делінген полиция департаментінің таратқан хабарламасында.
</blockquote>

Қызылордалық полицейлер мал ұрлығымен айналысқан қылмыстық топты ұстады

<a href="https://kyzylorda-news.kz/">Kyzylorda-news.kz.</a> Қазалыда Роза Бағланова атындағы аудандық мәдениет орталығында «Тәуелсіздігімді жырлаймын» атты аймақтық ақындар айтысы өтті. Сөз сайысы ел тәуелсіздігінің 30 жылдығына орай ұйымдастырылды.
Дүбірлі додада Қызылорда облысы мен Ақтөбе және Тараз қалаларынан келген 10 ақын сынға түсті. Олар ел бірлігі мен тарихты жырларына арқау етті.
Аймақтық ақындар айтысын аудан әкімі Мұхтар Оразбаев құттықтау сөзімен ашып, айтыскерлерге сәттілік тіледі.
<blockquote>
 «Ұлт құндылықтарының арасында сан ғасырлық тарихы бар ақындардың ауызша жыр сайысы – айтыстың алар орны ерекше. Бүгінгі жыр сайысына түсу үшін еліміздің әр түкпірінен айтысқа қатысушы ақындар ортамызға келіп отыр!
 Қазалы топырағында ұрпақтар сабақтастығы деген ұғымды қалыптастыра отырып, саф алтындай сақталып келе жатқан киелі қазақ тілі, салт-дәстүр, қазақы қалып бар. Тамыры терең, тарихы кенен – Қазалы өңірі – кешегі қиын қыстау заманда өзінің жанкешті еңбегімен елінің де, өзінің де даңқын шығарған тау тұлғаларды дүниеге әкелген қасиетті топырақ. Сөз құдіретінің қайнар бұлағы – бүгінгі сөз додасы ел Тәуелсіздігінің 30 жылдық мерейтойына арналып отыр. Бүгін ақындар Тәуелсіздікті, дархан даланы, ұлы елдің рухани қазынасын, кемел келешегі мен қасиетті Қазалының даңқын жырлайды», – деді Мұхтар Әуесұлы.
</blockquote>
Дүбірлі доданы «Алтын домбыраның» үш дүркін иегері, айтыстың ақтаңгері Мұхтар Ниязов тізгіндеп, ақындарды ортаға шақырды.
Алғаш болып сахна төріне Қармақшы ауданынан келген Тұрар Бекмұрзаев пен жалағаштық Қартбай Мейіржан көтеріліп, өз өнерлерін көрсетті.
Ел тәуелсіздігінің 30 жылдығына орай ұйымдастырылған айтыста аралдық жас ақын Бексұлтан Орынбасар жеңіске жетті. Дүбірлі додада кестелі сөз айтқан ақынға 500 мың теңгенің сертификатын аудан әкімі Мұхтар Оразбаев өзі табыстап, жеңісімен құттықтады.
Ал, екінші орынға жерлесіміз, Жанкент ауылының тумасы Нұрзат Қару қол жеткізіп, 300 мың теңге қаржылай сыйлыққа ие болды.
Үшінші орындарға ақтөбелік Аруна Керімбек пен жалағаштық Мейіржан Қартбай табан тіреді. Оларға 100 мың теңгенің сертификаттары табысталды.
Сондай-ақ, барлық ақындарға Жалаңтөс баһадүр, Жанқожа батыр, Ақтан батыр, Шағырай батыр, Дабыл батыр, Толыбай батыр, Айдарбек батыр, Сартай батыр атындағы және «Жеті Ишан», ел Тәуелсіздігінің 30 жылдығына орай «Тәуелсіздік – бабалар аманаты» атты арнайы номинациялар табыс етіліп, әрқайсысына 100 мың теңгелік қаржылай сыйлыққа ие болды.
<img src="https://kyzylorda-news.kz/wp-content/uploads/2021/12/3c68708b-65af-49ea-b160-608003346050.jpg" alt="" />
<img src="https://kyzylorda-news.kz/wp-content/uploads/2021/12/8df87591-d4ac-4519-9b48-b24cdc92d28b.jpg" alt="" />
<img src="https://kyzylorda-news.kz/wp-content/uploads/2021/12/39d8ddad-5752-4c12-bcf3-c6997c3b1609.jpg" alt="" />
<img src="https://kyzylorda-news.kz/wp-content/uploads/2021/12/269923959_3237387263148865_6908726438983416705_n.jpg" alt="" />
<img src="https://kyzylorda-news.kz/wp-content/uploads/2021/12/269918090_3237386126482312_4647540385796023566_n.jpg" alt="" />
<img src="https://kyzylorda-news.kz/wp-content/uploads/2021/12/269946313_3237387379815520_1493540890213850152_n.jpg" alt="" />
<img src="https://kyzylorda-news.kz/wp-content/uploads/2021/12/269922255_3237386083148983_3330776269912364819_n.jpg" alt="" />

Қазалыда аймақтық ақындар айтысы өтті

<a href="https://kyzylorda-news.kz/">Kyzylorda-news.kz.</a> Байқоңыр ғарыш айлағында OneWeb ғарыш аппараттарының жаңа топтамасын ұшыруға дайындық жүріп жатыр,&nbsp;<a href="https://www.inform.kz/ru/zavershayuschiy-pusk-2021-goda-s-baykonura-pokazhut-v-pryamom-efire_a3878546">деп хабарлайды</a>&nbsp;ҚазАқпарат.
«Фрегат» үдемелі блогы және 36 OneWeb ғарыш аппараты бар «Союз-2.1б» зымыран тасығышы Байқоңыр ғарышайлағының «Восток» ұшыру кешенінде 2021 жылдың 24 желтоқсанында орнатылған.
Ұшыру кешені жүйелері қызметінің басты сынақтары, зымыранға отын құю құбырларының тұмшалылығын тексеру сәтті аяқталды.
Бүгін комиссия отырысы өтіп, оның қорытындылары бойынша зымыран-тасығышқа отын құю және белгіленген уақытта ұшыру шешімі қабылданады, деп хабарлайды Роскосмостың баспасөз қызметінен.
<img src="https://www.inform.kz/radmin/fotofiles/2021/12/27/2112271111483700g.jpg" alt="" />
Бұрын хабарланғандай, Байқоңыр осымен биылғы ұшыру бағдарламасын аяқтайды.
«Фрегат» үдемелі блогы және 36 OneWeb ғарыш аппараты бар «Союз-2.1б» зымыран тасығышын ұшыру 27 желтоқсан күні Нұр-Сұлтан уақытымен сағат 19:10-ға жоспарланған.
Байқоңырдан 2021 жылғы соңғы ұшыру процесі тікелей эфирден көрсетіледі.
Көрсетілім Роскосмос сайтында Нұр-Сұлтан уақытымен сағат 18.00-де басталады.

Қазақстан және Қызылорда облысының жаңалықтары