<a href="https://kyzylorda-news.kz/">Kyzylorda-news.kz.</a> Қызылорда қаласында 5 қаңтар күні жаппай тәртіпсіздік кезінде екі азаматша бүлікшілермен бірге облыс әкімдігінің ғимаратына баса көктеп кіріп, тәртіпсіздікке орын берген.
Бейне-жазбада көрсетілгендей азаматшалар тас лақтырып, әкімдіктің қоршауына мініп, балағат сөздер айтып, ғимаратқа заңсыз кірген.
<blockquote>
 “Аталмыш екі азаматшаға қатысты «сотқа дейінгі тергеп-тексеру бірыңғай тізіліміне» Қылмыстық кодексінің 272-бабының 2-бөлігімен (жаппай тәртіпсіздікке қатысу) қылмыстық іс тіркеліп, жан жақты және объективті тергеп-тексеру жұмыстары жүргізілген. Бүгінгі күні екі азаматшаның қылмыстық әрекеттерін толық мойындағандығы, асырауында кәмелетке толмаған балаларының болуы, соңғыларының денсаулық жағдайы мен өздерінің өтініштерін ескеріп бас шарасы үй қамаққа ауыстырылды. 
 Әрбір дерек мұқият зерттеледі. Нәтижелері бойынша құқықтық баға берілетін болады”,- делінген қалалық полиция басқармасының хабарламасында.
</blockquote>

Жаппай тәртіпсіздік: Қызылордада   көпбалалы аналар қамауға алынды (ВИДЕО)

<a href="https://kyzylorda-news.kz/">Kyzylorda-news.kz.</a> Облыс әкімінің қаулысымен Қызылордада қаңтардағы тәртіпсіздік нәтижесінде шағын және орта кәсіпкерлік субъектілеріне келтірілген мүліктік зиянды айқындау жөніндегі Өңірлік комиссия құрылды.
Комиссия төрағасы болып облыс әкімінің орынбасары Нұрлан Тілешев бекітілді. Өңірлік комиссияның жұмысын облыстық кәсіпкерлік және туризм басқармасы үйлестіреді. Өңірлік комиссия хатшысының байланыс нөмірі 8 /7242/ 40-10-59, 8 747 200 30 30. 
Комиссия мүшелігінде мүдделі мемлекеттік орган өкілдерінен өзге Кәсіпкерлер палатасының директоры Ғалымбек Жақсылықов, Өңірлік кеңес төрайымы Гүлзағира Әбдірайымова, Өңірлік кеңес мүшесі Наталья Мишукова, облыстық мәслихат депутаттары Қайрат Боранбаев, Нұрболат Ибраев, қоғамдық ұйымдардың жетекшілері Анар Ізден, Жандос Тұсмағамбетов бар. 
Өтінішті толтыру, қажетті құжаттарды жинау және өтеу механизмі бойынша мәселелер орын алса Қызылорда облысы кәсіпкерлер палатасындағы жауапты маман Аида Қаюповаға +7 777 456 3090 нөмірі арқылы хабарласуға болады.
«Атамекен» Ұлттық кәсіпкерлер палатасының байланыс орталығына 2022 жылғы тәртіпсіздіктер кезінде келтірілген залалдың орнын толтыру мәселелері бойынша кәсіпкерлерден сұрақтар келіп жатыр. Сол себепті бизнестің жиі қоятын сұрақтарына жауап жариялаймыз.
Бағалау компанияларының байланыс нөмірі қайда ұсынылған?
Алдымен әкімдіктер қандай компаниялар бағалау жүргізетінін анықтайды. Содан кейін тізім және олардың байланыс нөмірі InfoKazakhstan.kz сайтының «Маңызды ақпарат» бөлімінде, сондай-ақ өңірдегі әкімдіктердің сайтында жарияланады.
Өңірлік комиссияда бағалау компанияларының қызметі үшін шотты кім ұсыну қажет? Бағалау компаниясының қызметі үшін шотты InfoKazakhstan порталына жүктеуге бола ма?
Зардап шеккен ШОБ субъектілері әкімдік бекіткен бағалау компанияларының біріне жүгінуі қажет. 2022 жылғы қаңтардағы тәртіпсіздіктерден жәбірленуші деп тану туралы қаулы негізінде бағалау компаниясы өтініш беруші үшін тегін қызмет көрсетеді. Бағалау компанияларының қызметін әкімдік тікелей бағалау компаниясына төлейді, зардап шеккен ШОБ субъектілеріне өтелетін залалдың жалпы сомасына кірмейді. Бағалау компанияларымен шарт жасасуды әкімдіктер жүргізеді. Әкімдіктер бағалау компанияларына алдын ала кепілхат береді, кейіннен жұмыстың орындалу фактісі бойынша бағалаушылардың қызметін төлейтін болады. 
Бағалау компаниясына төлем алу үшін ШОБ субъектіне төлем шотын беру қажет, ол InfoKazakhstan.kz сайтындағы өтінімге қоса берілуі тиіс. Өңірлік комиссия қарағаннан кейін төлем шоты әкімдікке беріледі, ол қаражатты шотта көрсетілген деректемелер бойынша жібереді.
Бағалау компанияларының тізіліміне қалай кіруге болады?
Сіз өз аймағыңыздың әкімдігіне, атап айтқанда кәсіпкерлік басқармасына хабарласуыңыз керек.
Сот сараптамасы не үшін қажет?
Егер сіз нақты келтірілген залал бойынша өтем алғыңыз келсе және ұсынылған өтеудің оңайлатылған нұсқасымен келіспесеңіз (мысалы, орташа айлық айналым негізінде тауар-материалдық құндылықтарға залалды өтеуді есептеу әдістемесімен келіспесеңіз), сот сараптамасы қажет болады. Сот сараптамасы қылмыстық істі тергеу шеңберінде жүргізіледі және оны тергеуші немесе прокурор тағайындайды. Оны анықталған немесе тәуелсіз сот сарапшысы жүргізеді.
Егер әртүрлі мекенжайы бар бірнеше объект зардап шексе, қанша өтінім жіберу керек?
Әрбір зардап шеккен жылжымайтын мүлік объекті бойынша жеке өтінім беру қажет. Егер 3 дүкеніңіз болса және олардың 2-еуі зардап шеккен болса, сізге 2 өтінім беру керек. Әр өтінімде сіз тек 1 жылжымайтын мүлік объектін, сондай-ақ тауарлар мен жабдықтарға келтірілген залалды (қажет болған жағдайда) көрсете аласыз.
Мүлік бүлінген жағдайда кім өтініш беру керек? Жалға алушы ма немесе жалға беруші ме?
Барлық зардап шеккен объект (жылжымайтын мүлік және жылжымалы мүлік) бойынша өтінімді объектінің иесі береді. Мысалы, егер дүкенге (қабырғалар, витриналар және т. б.) зиян келтірілсе және жалға алушыға тиесілі тауар ұрланса, онда 2 өтінім беріледі:
дүкен ғимаратына келтірілген залал бойынша – жылжымайтын мүлік иесі;
тауарларға келтірілген залал бойынша – тауар иесі, яғни жалға алушы.
Егер жылжымайтын мүлік иесі өтінім бере алмаған жағдайда, ол өтеу құқығын белгіленген тәртіппен өзге тұлғаға, оның ішінде жалға алушыға сеніп тапсыруға құқылы.
Техникалық тексеру актін кім береді?
Актілерді ҚР Индустрия және инфрақұрылымдық даму министрлігінің Құрылыс және ТКШ істері комитеті аккредиттеген сараптамалық ұйымдар береді және олар InfoKazakhstan.kz сайтының «Маңызды ақпарат» бөлімінде жарияланған.
Өтінімді дұрыс толтырмай, құжатты толық жүктемей, ЭЦҚ кілтпен қол қойғаннан кейін өтінімді кері алуға бола ма?
Құжатқа электронды цифрлық қолтаңбамен қол қойылғаннан кейін өтініш берушінің өтінімді кері алуға немесе өзгертуге мүмкіндігі жоқ. Өйткені ЭЦҚ қолтаңбасы өтінімде (мәліметтер мен құжаттар) толтырылған барлық дерекке салынады. Электрон құжаттар болған жағдайда жаңа өтінім жасау қажет, жаңа өтінім жасауға 10 минут кетеді. 
Сондықтан ЭЦҚ қол қойғанға дейін барлық құжат пен енгізілген ақпаратты алдын ала тексеруді сұраймыз. Өтінімді сақтап, оны толықтырып, ЭЦҚ-мен қол қоюға болады.
Кәсіпкер қанша өтінім бере алады?
Өтінім саны шектеусіз.
Егер жылжымайтын мүлік, жабдық және тауар-материалдық құндылықтар (ТМҚ) бүлінсе, қанша өтінім беру қажет?
Жылжымайтын мүліктің 1 нысаны, сондай-ақ соның ішіндегі жабдық және ТМҚ бүлінсе, онда 1 өтінім беруге болады. Залал түрін: жылжымайтын және жылжымалы мүлік/жабдық, ТМҚ деп таңдау жеткілікті.
Қызмет көрсету саласының тізімінде сізге қажеті болмаған жағдайда нені таңдау керек?
Өтініш беруші тізбеде нысанның «Басқа» түрін таңдап, қызмет түрі ашылған жолаққа өз бетінше енгізуі қажет. Бұл функция жақын арада ІnfoKazakhstan.kz сайтында қосылады.
Егер компания өкілінің қол қою құқығы болса, нотариус куәландырған сенімхатты ұсыну міндетті ме?
Заңды тұлғаның атынан сенімхат басшысының немесе оның құрылтай құжаттарымен уәкілеттік берілген өзге де адамның қолы қойылып беріледі. Егер осы тұлғаның Қазақстан Республикасының заңнамасына сәйкес мөрі болуы тиіс болса, осы ұйымның мөрімен бекітіледі. Сенімхатты нотариалды куәландыру талап етілмейді. Жеке кәсіпкерлер үшін нотариалды сенімхат қажет және міндетті.
Сараптаманы қай жерден өтуге болады?
Егер нысанға бұған дейін полиция өкілдері келген болса, сараптама жүргізу қажет пе? 
Егер бұл сот сараптамасы болса, №4 сұрақты қараңыз. Сараптама сот істері шеңберінде тергеуші-прокурор шешімі бойынша іске асырылады. 
Егер аккредиттелген сараптама ұйымдары жүргізетін сараптама туралы айтатын болсақ, онда сараптаманы Индустрия және инфрақұрылымдық даму министрлігінің Құрылыс және тұрғын үй-коммуналдық шаруашылық істері комитетінде аккредиттелген сараптамалық ұйымдары жүргізеді. Бұл ұйымдардың тізімі infoКazakhstan.kz сайтында жарияланады.

Қызылордада бизнеске  келтірілген мүліктік зиянды айқындау жөніндегі Өңірлік комиссия құрылды

<a href="https://kyzylorda-news.kz/">Kyzylorda-news.kz.</a> Қазалы аудандық полиция бөлімінің қызметкерлері «Охотзоопром» ӨБ РМҚК қызметкерлерімен бірлесіп, 23 қаңтар күні рейд барысында Тапа елді мекенінен 20 шақырым далалық жерде «ИЖ-Планета» мотокөлігін тоқтатқан.​
Тексеру барысында мотокөліктің жүк салғышынан 1 бас ақбөкен аңына ұқсас жануардың денесі және 1ұңғылы 16 калибрлі аңшы мылтығы, 3 дана патрон айғақ зат ретінде тәркіленді. Күдікті ретінде екі азамат ұсталды.
<blockquote>
 “Күдіктілер уақытша ұстау абақтысына қамаққа алынып, бұл дерек бойынша ҚР ҚК-нің 337-бабының 4-бөлігінің 2-тармағына сәйкес (жануарлардың сирек кездесетін және құрып кету қаупі төнген түрлеріне, сондай-ақ пайдалануға тыйым салынған жануарларға қатысты жасалған)​ сотқа дейінгі тергеп – тексеру амалдары жүргізілуде. Сараптамалар тағайындалды. Оқиғаның мән-жайы анықталуда”,- делінген полиция департаментінің хабарламасында.
</blockquote>

Қазалылық полицейлер заңсыз ақбөкен аулаған облыс тұрғындарын ұстады

<a href="https://kyzylorda-news.kz/">Kyzylorda-news.kz.</a> «Nur Otan» партиясы Саяси кеңесінің отырысы өтеді. Бұл туралы партия төрағасының бірінші орынбасары Бауыржан Байбек мәлімдеді.
<blockquote>
 «Nur Otan» Саяси кеңесі Бюросының қаулысымен (Жарғының 9.5. тармағына сәйкес) 27 қаңтарда партияның Саяси кеңесінің отырысын өткізу туралы шешім қабылданды», – деп жазды ол <a href="https://mobile.twitter.com/BauyrzhanBaibek">Twitter-де</a>.
</blockquote>

Ертең «Nur Otan» Саяси кеңесінің отырысы өтеді

<a href="https://kyzylorda-news.kz/">Kyzylorda-news.kz.</a> Биылғы жылдың 1 қаңтарынан бастап азаматтардың жасы мен еңбек еткен жылдары үшін зейнетақы төлемдерінің мөлшері 7 пайызға, ал мемлекеттік базалық зейнетақы төлемінің мөлшері ең төменгі күнкөріс деңгейі көлемінің ұлғаюына байланысты артты. Сонымен қатар, биыл ең төменгі күнкөріс деңгейі мен айлық есептік көрсеткіш мөлшерінің өсуіне байланысты әлеуметтік жәрдемақылардың мөлшері қайта есептелінеді.
Бұл жөнінде Өңірлік коммуникациялар қызметінде өткен брифингте облыс бойынша еңбек, әлеуметтік қорғау және көші-қон департаментінің басшысы Ертілеу Жалғасбаев мәлімдеді.
<blockquote>
 -Биыл мемлекет тарапынан берілетін әлеуметтік жәрдемақылардың мөлшеріне өзгерістер енді. Айталық, облыс бойынша 7 жастан 16 жасқа дейінгі 3080 «мүгедек-бала» санатындағы балаларға мүгедектік тобына қарай төленетін жәрдемақының мөлшері 16,7%-дан 37 %-ға дейін ұлғайтылды. Ал I топ мүгедектігі бар балаларға 69 155 теңге, II топтағы мүгедек балаларға 57 269 теңге, III топтағы мүгедектігі бар балаларға 50 426 теңге жәрдемақы төленеді. Қазіргі уақытта 208 мүгедек балаларға асыраушысынан айырылу жағдайына байланысты мемлекеттік әлеуметтік жәрдемақы тағайындалды,- деді Ертілеу Шынтасұлы.
</blockquote>
Өткен жылы табысы аз 70 мыңға жуық адамға 4,7 млрд.теңге көлемінде әлеуметтік көмек төленді. Ал бюджеттен тыс көздерден 11 147 азаматқа көмекке мұқтаж халықтың әлжуаз топтарынан шыққан отбасыларға қайырымдылық көмектер көрсетілді.
<blockquote>
 -Жалпы бюджет есебінен 74 390 аз қамтылған азаматқа әлеуметтік көмектер берілді. Сондай-ақ, бес мыңға жуық отбасыға коммуналдық қызмет шығындары өтелді. Ұлы Отан соғысының қатысушылар және КСРО орденімен марапатталған азаматтарға, Семей ядролық сынақ полигонына қатысушыларға арнайы жәрдемақы мөлшері төленді, – деді облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Мейрамбек Әбдікәрімов.
</blockquote>
<hr />

Жәрдемақы өсті:  Қызылордада мүмкіндігі шектеулі 3080 бала бар

<a href="https://kyzylorda-news.kz/">Kyzylorda-news.kz.</a> Қызылорда қаласында жол-көлік инфрақұрылымын дамыту бағытында 2021 жылы Сырдария өзенінің сол жағалауындағы 2 магистральды жол құрылысы және ұзындығы 40,7 шақырым болатын 63 көшеге қиыршық тас, 20 көшеде асфальт төсеу жұмыстары жүргізілді.
Құрылысы 2019 жылы басталған С.Бейбарыс көшесінен «Қызылжарма» каналы – Назарбаев даңғылына дейін магистральды көше құрылысы ағымдағы жылы толығымен аяқталмақ.
Бұл туралы қалалық тұрғын үй коммуналдық шаруашылығы, жолаушылар көлігі және автомобиль жолдары бөлімінің басшысы Бауыржан Оспанов мәлімдеді.
<blockquote>
 Қоғамдық көлік сапасын жақсарту бағытында 2021 жылдың соңында жеке тасымалдаушылардың 21 бағыты әлеуметтік маңызы бар бағыт ретінде танылды. 2022 жылға әлеуметтік маңызы бар 26 бағытқа 1 млрд теңге субсидия бөлінді, – деді Бауыржан Оспанов.
</blockquote>
Бөлім басшысының айтуынша қаладағы 79 көшеге орташа жол жөндеу жұмыстарын жүргізуге бюджеттік өтінім ұсынылған. Сондай-ақ 19 көшеге жаяу жүргіншілер жолын орналастыру үшін жоба-сметалық құжаттарының сараптама қорытындысы алынды.
2021 жылы көппәтерлі тұрғын үй аулаларында 25 ойын алаңдары пайдалануға беріліп, 33 көшеге түнгі жарық бағаналары орнатылды.
<blockquote>
 “Қалалық арық жүйелерін аяқ сумен қамтамасыз ету үшін Қызылорда қаласына 26 дана барлау өндірістік ұңғымасын орнатуға жоба-сметалық құжаттары әзірленіп, мемлекеттік сараптамадан өткізу үшін мемлекеттік сатып алу конкурстарын жариялауға тиісті құжаттар дайындалуда.
 Тұрғын үйлерді қайта жаңғырту (модернизация) бойынша «Тұрғын үй-коммуналдық шаруашылығын жаңғыртудың 2011-2020 жылдарға арналған», «Өңірлерді дамыту 2020 жылға» және «Нұрлы жер 2020-2021ж.ж.» бағдарламалары және ҚР «Тұрғын үй қатынастары туралы» заңына сәйкес 2011-2021 ж.ж. аралығында 174 көппәтерлі тұрғын үйлерге күрделі жөндеу жұмыстары жүргізілді. 2021 жылға 12 көппәтерлі тұрғын үйлерге құрылыс-мердігерлік келісім-шарт жасалып, жөндеу жұмыстары басталды. 2022 жылға 11 көппәтерлі тұрғын үйді жаңғырту жоспарланып, бюджеттік өтінім берілді”, – деді бөлім басшысы.
</blockquote>

Қызылордада жеке қоғамдық көліктерге субсидия бөлінді

<a href="https://kyzylorda-news.kz/">Kyzylorda-news.kz.</a> Бас прокуратура заңсыз сақталған атыс қаруын, оқ-дәрілер мен жарылғыш заттарды өз еркімен тапсырған адамдарды қылмыстық жауапкершіліктен босатуға кепілдік береді.
Ішкі істер министрлігінің өкілдері қаруларды өз еркімен тапсыру мүмкіндігі бар екенін хабарлады. Бұл шара қылмыстық қудалаудан босатады. Бас прокуратураның 1-қызмет бастығының орынбасары Елдос Қилымжанов Орталық коммуникациялар қызметінде өткен брифингте бұған қандай кепілдіктер бар және қандай жағдайда бұл мүмкін болатынын түсіндіріп өтті.
<blockquote>
 «Бас прокуратура, қаруларды, оқ дәрілерді, жарылғыш заттарды заңсыз сақтап, өз еркілерімен тапсырған тұлғаларға, қылмыстық жауаптан босату кепілін береді. Адам қарумен жүріп, құқық қорғау органдарымен ұсталса, ондай жағдай, өз еркімен қаруды тапсыру деп танылмайды. Ішкі істер органдарына заңсыз айналымнан атыс қаруларын алу бойынша жедел-іздестіру және профилактикалық іс-шараларды жандандыру туралы тапсырма берілді»,- деп атап өтті спикер.
</blockquote>
Сонымен қатар, ол прокурорлар жергілікте процеске қатысушылардың конституциялық құқықтарының сақталуын қамтамасыз ету және қылмыстық істерді объективті тергелуі бойынша шаралар қабылдауды жалғастырып жатқанын жеткізді.

Бас прокуратура кімдерге қылмыстық жауаптан босату кепілін береді?

Kyzylorda-news.kz. «Жол активтерінің ұлттық сапа орталығы» Қызылорда облыстық филиалының мамандары былтыр аймақ жолдарына 516 мәрте тексеру жүргізді. Бұл туралы облыстық филиалдың баспасөз қызметі хабарлады.
Жылжымалы зертхана арқылы жолдардан 1383 сынама алынып, соның 480-і нормативтік талаптарға сай еместігі анықталған. Сондай-ақ, асфальт жабындысын аспаптық тексеру барысында 250 ақау шықты. Оның 79-ы өрескел олқылық.
<blockquote>
 “Сапа орталығы мамандарының сын-ескертпелерінен кейін 11008 шаршы метрді құрайтын сапасыз салынған асфальт бетон жамылғысы сүріліп, қайта төселді. Яғни, 31 миллион теңгені құрайтын бір жарым шақырым жолдың кемшіліктері түзелді деген сөз. Сондай-ақ, мемлекеттік мекеме тарапынан жол құрылысымен айналысатын компанияларға анықталған ақаулар бойынша хат жолданып, кепілдік мерзіміне сәйкес қайта қалпына келтіру жұмыстары жүргізілетін болады”, – делінген хабарламада.
</blockquote>

Қызылорда: Бір жарым шақырым жолдың асфальт жабындысы қайта төселді

<a href="https://kyzylorda-news.kz/">Kyzylorda-news.kz.</a> Қазалы ауданының әкімі Мұхтар Оразбаев аудандық мәслихат хатшысы Бақытжан Жарылқаппен бірге бірқатар құрылыс нысандарына арнайы барып, жұмыс барысын көрді.
Аудан басшысы алдымен Әйтеке би кентінің Достық көшесінен салынып жатқан 250 орындық құрылыс басында мердігер мекеменің жауапты қызметкерлерімен кездесті.
Өткен жылы басталған білім ордасының құрылысы қазіргі таңда қарқынды жүргізілуде. Атап айтар болсақ, «А, Б, В» блоктары бойынша бірінші қабат қабырғаларының кірпіші өріліп, плитасы жабылды. В блогы бойынша екінші қабаттың қабырғаларына кірпіші қаланып, төбе жабынына плита төсеу жұмыстары жүргізілуде.
Сонымен қатар, «Г» блогы бойынша іргетас табаны мен іргетасын монтаждау жұмыстары жүріп жатыр.
Мұнан соң Мұхтар Әуесұлы Қ.Пірімов атындағы ауылына жол тартып, спорт кешенінің құрылысын көрді. Мердігер мекеме жауапты қызметкерінің айтуынша, спорт кешені ғимаратының қабырға кірпіші өріліп, әкімшілік ғимараты блогының төбе шатыры жабылған. Сонымен қатар спорт зал блогының төбе жабының жабу жұмыстары мен ішкі сылақ жұмыстары жүргізілуде. Ал, сыртқы жұмыстардан КТПН қондырғысы монтаждалып, ауыз су құбырлары жүргізілген.
Аудан әкімі Мұхтар Оразбаев құрылыс жұмыстарының барысын көрген соң мердігер мекеме мен тиісті сала басшыларына ең алдымен сапаға мән беруді тапсырды. Сондай-ақ, құрылыс жұмыстары белгіленген мерзімде аяқталуы тиіс екендігін жеткізді.
<img src="https://kyzylorda-news.kz/wp-content/uploads/2022/01/03-1.jpg" alt="" />

Мұхтар Оразбаев:  Құрылыс жұмыстары белгіленген мерзімде аяқталуы тиіс

<a href="https://kyzylorda-news.kz/">Kyzylorda-news.kz.</a> Қорқыт Ата атындағы Қызылорда университетінде 6 ай бұрын коронавирусқа қарсы вакцина алған қызметкерлер мен білім алушылардың ревакцинациясы басталды.
Қалалық №6 емхана мамандары вирустың жаңа штаммдарынан қорғау үшін екпенің үшінші дозасын егуде. Науқанның алғашқы күнінде оқу орнының 100-ге жуық қызметкері қайта екпе салдырды.
Коронавирус инфекциясына қарсы вакцинаның екі компонентін қызметкерлердің 98 пайызы, білім алушылардың 94 пайызы алған. Сондай-ақ, бүгінде университетте 18 жасқа толмаған 1100 студент бар. Оларға түсіндірме жұмыстары жүргізіліп, Pfizer вакцинасын ерікті түрде алу насихатталады.
Еске сала кетейік, білім алушылар 24 қаңтар мен 7 ақпан аралығында сабақтар онлайн форматта өтеді.&nbsp;Ал 7 ақпаннан бастап аралас форматта оқиды.

Қорқыт Ата атындағы Қызылорда университетінде ревакцинация басталды

<a href="https://kyzylorda-news.kz/">Kyzylorda-news.kz.</a> Прокуратура органдары халық арасында көз жұмғандардың қаза болу мән-жайларын анықтау жұмыстарын жалғастыруда. Бұл туралы Орталық коммуникациялар қызметі алаңында Бас прокуратураның 1-қызмет бастығының орынбасары Елдос Қилымжанов мәлімдеді.
<blockquote>
 «Әр жағдай бойынша өлімнің себептері толық зерделенуде. Осыған байланысты, прокурорлар 3 дерек бойынша қылмыстық істерді адам өлтіруге қайта саралады. Сонымен бірге, келтірілген деректер түпкілікті емес, жұмыс көп еңбекті қажет ететінін атап өтемін», – деді Бас прокуратура өкілі.
</blockquote>
Құқық қорғау органдары қылмыстық істерді тергеу мен қоса, жымқырылған қаруларды іздеу және оларды алып қою жұмыстарын жүргізуде.

Елдос Қилымжанов: Әр жағдай бойынша өлімнің себептері толық зерделенуде

<a href="https://kyzylorda-news.kz/">Kyzylorda-news.kz.</a> 21 қаңтарда Мемлекет басшысы отандық бизнес өкілдерімен кездесіп, халық игілігі үшін билік пен бизнестің өзара ықпалдастығына қатысты жолдарды айқындау қажеттігін атап өтіп, жемқорлыққа қарсы кешенді тұжырымдама әзірлеуді тапсырған болатын. Президент бірінші кезекте қарапайым халықтың, кәсіпкерлердің мүдделері ескерілуі тиіс екенін айтты.
Осы ретте, Қызылорда облысының әкімі Гүлшара Әбдіқалықова Сыбайлас жемқорлыққа қарсы саясаттың 2022-2026 жылдарға арналған тұжырымдамасы жобасын аймақтың бизнес өкілдерімен талқылап, кәсіпкерлердің ұсыныс-пікірлерін тыңдады. Жиынға облыстық мәслихат хатшысы Наурызбай Байқадамов, облыс бойынша сыбайлас жемқорлыққа қарсы іс-қимыл департаменті басшысының міндетін атқарушы Руслан Яғмұсов, департамент басшысының бірінші орынбасары Ғалия Әлімқұлова және облыстық кәсіпкерлер палатасының директоры Ғалымбек Жақсылықов және салалық басқарма басшылары мен өңірдегі бизнес өкілдері шақырылды. Ал қала және аудан әкімдері онлайн селекторлық байланыс арқылы қатысты.
Кездесуде аймақ басшысы сыбайлас жемқорлық мемлекеттік басқарудың тиімділігін төмендетіп, елдің инвестициялық тартымдылығын жоятынын тілге тиек етіп, келеңсіз құбылыспен күресте мемлекет пен қоғам күш-жігерін біріктіруі керектігін айтты.
<blockquote>
 “Бүгінгі күні ҚР Сыбайлас жемқорлыққа қарсы саясатының 2022-2026 жылдарға арналған тұжырымдамасының жобасы әзірленді. Сыбайлас жемқорлық деңгейін төмендету және оған қарсы саясатты одан әрі дамыту осы құжаттың аясында жүргізілетін болады. Тұжырымдама жобасын талқылау кезінде азаматтық қоғам мен кәсіпкерлік субъектілерінің пікірі маңызды. Сондықтан да өз ұсыныстарыңызды тыңдау үшін жиналдық”, – деді Гүлшара Әбдіқалықова.
</blockquote>
Басқосуда Ғалия Әлімқұлова талқылауға түскен жобадағы басым бағыттарды тізбелеп, сыбайлас жемқорлыққа қарсы істе себеппен емес, салдарды анықтаудың маңызды екенін тілге тиек етті. Тұжырымдаманы әзірлеуде шетелдік тәжірибе мен халықаралық стандарттар ескерілген. Әсіресе, «тұрмыстық» жемқорлықты жоюға, бюджеттік рәсімдер мен сатып алу тәртібінің ашық болуына, мемлекеттің экономикаға әсері мен әкімшілік кедергілерді азайту принциптері енгізілген. Тұжырымдамада нақты реформалар мен жобаларды қамтитын 6 міндеттер блогы көзделген. Бірінші блокта – сыбайлас жемқорлыққа төзбеушілікті қалыптастыру айқын көрсетілген. Екінші блоктағы шаралар сыбайлас жемқорлық мүмкіндіктерін барынша азайтуға бағытталған. Үшінші блок жауапкершіліктің бұлтартпастығын қамтамасыз етуге үндейді. Төртінші блок – бұл азаматтық қоғамды сыбайлас жемқорлыққа қарсы іс-қимылға одан әрі ауқымды тарту жөніндегі шараларды қамтыса, бесінші блок сыбайлас жемқорлыққа қарсы саясат мониторингіне арналған. Ал соңғы блок сыбайлас жемқорлыққа қарсы іс-қимыл жөніндегі уәкілетті органның қызметін одан әрі жетілдіруге бағытталған. Мұнан соң кездесуге шақырылған бизнес өкілдері сыбайлас жемқорлыққа қарсы әзірленген тұжырымдама төңірегінде ойларын айтып, пікірлері мен ұсыныстарын жеткізді. Облыстық кәсіпкерлер палатасының директоры Ғалымбек Жақсылықов жемқорлық тәуекелдері жиі кездесетін салаларды атап, кәсіпкерлер кездесетін қиындықтарды айтты.
Жиынды қорытындылаған өңір басшысы дәйекті ұсыныстарды саралап, орталық Агенттікке жолдауды тапсырды.

Қазақстан және Қызылорда облысының жаңалықтары

Жаппай тәртіпсіздік: Қызылордада көпбалалы аналар қамауға алынды (ВИДЕО)

Қызылордада бизнеске келтірілген мүліктік зиянды айқындау жөніндегі Өңірлік комиссия құрылды