<a href="https://kyzylorda-news.kz/">Kyzylorda-news.kz</a>.&nbsp;Бүгін ҚР Премьер-Министрі Асқар Маминнің төрағалығымен өткен Үкімет отырысында жем-шөппен қамтамасыз ету және егін жинау науқанына дайындық мәселелері қаралды. Облыс әкімі Гүлшара Әбдіқалықова атқарылған жұмыстың барысын баяндады.
Биыл облыс бойынша 188 мың гектарға ауыл шаруашылығы дақылдары орналастырылды. Оның ішінде облыстың негізгі дақылы – күріш егісінің көлемі 83,6 мың гектарды құрады. Өткен жылмен салыстырғанда 6 мың гектарға күріш көлемі қысқартылып, орнына 9,8 мың гектар болатын суды аз қажет ететін майлы және мал азықтық дақылдармен қатар көкөніс, бақшаның егіс көлемдері артты.
Қазіргі таңда облыста егін жинау жұмыстары белгіленген кестеге сәйкес жүргізілуде. Негізгі дақыл – күрішке орақ салу жұмыстары тамыз айының үшінші онкүндігінде басталады.
Егін жинау жұмыстарына қатысатын қолда бар ауыл шаруашылығы техникаларының бүгінде 98 пайызы дайын. Жанар-жағар маймен қамтамасыз ету жұмыстары кестеге сәйкес жүргізілуде. Егін жинау жұмыстарын 15 қазаннан кешіктірмей толық аяқтау жоспарланып отыр. Аймақ басшысының айтуынша, зоотехникалық нормаларға сәйкес, биылғы жылы қысқа түсетін мал басына 770 мың тонна шөп, 8 мың тонна сүрлем және 213 мың тонна құрама жем қажет. Бекітілген жоспарға сәйкес қажетті жем-шөп қоры 220 мың тонна жоңышқа, 8 мың тонна сүрлем, 17 мың тонна астық жемі, 115 мың тонна күріш жемі және 550 мың тонна шабындық шөбі өз өндірісіміз есебінен қамтамасыз етіледі. Бұдан басқа, 170 мың тонна күріш сабанын дайындау жоспарлануда. Ал, қалған жетіспейтін құрама жем көлемін «Азық-түлік келісім шарт корпорациясы» акционерлік қоғамы арқылы және нарықтан сатып алынатын болады.
Сонымен қатар, облыста мал азығын дайындау үшін 114 бригада құрылып, 1000-нан астам адам және 170-тен астам ауылшаруашылық техникасы жұмылдырылған.
Облыс әкімі Арал ауданында орын алған қуаңшылық мәселесін қатысты атқарылып жатқан жұмыстарға да тоқталды.
<blockquote>
 «Арал ауданында орын алған құрғақшылық зардабын төмендету мақсатында төтенше жағдай жарияланды. Облыстың резерв қорынан 250 млн. теңге бөлінді. Оның ішінде жем-шөп тасымалдауға 49,5 млн. теңге және жайылымдықтар мен шабындықтарды, көлдер жүйесін суландыруға және мал суару құрылғыларына 200 млн. теңге бөлінді. Мұнымен қоса, «Байқоңыр» Әлуметтік кәсіпкерлік корпорациясы арқылы облысқа құрама жем жеткізу мақсатында 100 млн теңге қаралды. Облыс бойынша қайырымдылық көмек көрсету жұмыстары жүргізілуде. Бүгінгі күнге дейін Арал ауданының 3287 аз қамтылған отбасыларына 860 тонна шөп және 740 тоннадан астам құрама жем жеткізіліп, көмек көрсетілді», – деді Гүлшара Әбдіқалықова.
</blockquote>
Айта кету керек, Үкімет резервінен тауар өндірушілердің жем-шөп сатып алу шығындарын ішінара субсидиялауға 1,7 млрд. теңге қаржы бөлінген.

Гүлшара Әбдіқалықова: Аралда 3287 аз қамтылған отбасыға 860 тонна шөп және 740 тоннадан астам құрама жем жеткізілді

<a href="https://kyzylorda-news.kz/">Kyzylorda-news.kz</a>. Қызылорда облысында коронавирус індетін жұқтыру көрсеткіші едәуір төмендеп келеді. Бүгінгі тәулікте 150 жағдай тіркелген. Жалпы, жыл басынан бері вирус жұқтырған 13 826 адам тіркелсе, оның 80 пайызы жазылып шықты. Бұл туралы бүгін Өңірлік коммуникациялар қызметінде облыстық денсаулық сақтау басқарма басшысының орынбасары Жангелді Шаймбетов мәлімдеді.
Брифингте сонымен қатар басқарма басшысының орынбасары кешеден бастап өңір тұрғындарына “SinoVac” вакцинасы салынып жатқандығын атап өтті. Аймаққа бүгінде ДДСҰ мақұлдаған індетке қарсы “SinoVac” жаңа вакцинасының 11 500 дозасы келген. Қазіргі таңда оның 80 пайызы аудандарға жіберілген. Мәселен, Арал және Қазалы аудандарына – 2000, Қармақшы, Жалағаш, Сырдария және Шиелі аудандарына – 1000, Жаңақорған ауданына – 1500 доза жөнелтілді. Ал Қызылорда қаласына 2000 дозасы қалдырылған.
<blockquote>
 «Бұл жаңа вакцина инактивтелген. Үлкен кісілерге, науқасы бар жандарға салдыруға болады. Күтілетін реакциялар сирек кездеседі. Кең көлемде сұраныс болады деп ойлаймыз. Жалпы облыста екпе алуға қабілетті 401 мың тұрғын болса, бүгінде соның 63,9 пайызы вакцинацияланды», – деді Ж.Шаймбетов.
</blockquote>

Қызылордаға «Sinovac» жаңа вакцинасы әкелінді

<a href="https://kyzylorda-news.kz/">Kyzylorda-news.kz</a>. Өткен жылы өңірімізде ұлтымыздың мәдени мұрасын, ұлттық құндылықтарын жас ұрпақтың бойына сіңіру мақсатында «Сыр елі» мега жобасы бастау алған болатын. Биыл мега жоба шеңберінде Тәуелсіздігіміздің 30 жылдығына Елбасының «Рухани жаңғыру» бағдарламасы мен Мемлекет басшысы Қасым-Жомарт Тоқаевтың «Тәуелсіздік бәрінен қымбат» мақаласы негізінде «Сыр жұрты» танымдық-пассионарлық жобасы әзірленді. Өңірлік коммуникациялар қызметінде өткен баспасөз конференциясында облыс әкімінің орынбасары Серік Ахмет жобаның мақсаты мен жоба аясында атқарылар жұмыстарды жан-жақты айтып берді.
Өңірдің тарихи – саяси және мәдени – рухани даралығын айшықтап, насихаттауды негізге алған жаңа жоба 3 жылға жоспарланған. Қазіргі таңда «Сыр саңлақтары», «Туған жер – тұнған шежіре», «Тал бесіктен – жер бесікке дейін», «Сыр елі – Жыр елі», «Сыр өңірі – ұлттық құндылықтардың темірқазығы» сынды 5 бағытта жұмыс атқаруда.
<blockquote>
 «Өскелең ұрпақты отаншылдық рухта тәрбиелеп, қастерлі Тәуелсіздігіміздің құндылығын ұғындыру жобаның басты мақсаты. Биыл COVID-19 пандемиясына байланысты шектеу шараларын қатаң сақтай отырып, түрлі форматта барлығы 80-нен астам шара өткізілді. Оған 20 мыңға жуық адам қатысты. «Құнды жәдігер» телевизиялық жобасы мен өңіріміздегі бірқатар кесенелерге жасалған тарихи-этнографиялық экспедицияларды жоба аясында ұйымдастырылған ауқымды шаралар қатарына жатқыза аламыз», – деді облыс әкімінің орынбасары.
</blockquote>
Сонымен қатар, танымдық-пассионарлық жоба шеңберінде «Мәңгілік сарын – Қорқыт ата мұрасы» облыстық онлайн қыл қобызшылардың фестивалі, «Тұғыры биік Тәуелсіздік» республикалық ақындар айтысы өткізілді. Қорқыт ата атындағы Қызылорда университетінің археолог ғалымдарынан құралған «Жанкент археологиялық экспедициясы» Сақ заманының Бәбіш мола, ортағасырлық Жанкент қалашығында далалық зерттеу жұмыстарын жүргізуде. «Сығанақ» қалашығында археологиялық қазба жұмыстары да басталды. Сондай-ақ, жыл көлемінде аймағымызда өткен «Сыр дарыны» жастар шығармашылық байқауы, облыстық «Алтын белбеу» жарысы, «Музей радиосы», «Асыл мұра», «Жас өлкетанушы», «Киелі мұра», «Тәлімгерлер» жобалары мен қатар «Жаныңда жүр жақсы адам», «Отаныма 30 қайырымды қадам» акциялары, «Ұлы дала аманаты», «Сарын» , «Күй шежіре», «Жібек жолы саздары», «Күй – мұра» сазды кештері де «Сыр жұрты» танымдық-пассионарлық жобасы аясында ұйымдастырылған болатын.
<blockquote>
 «Жоба жоспарына сәйкес кешенді жұмыстар алдағы уақытта эпидемиологиялық ахуалды ескере отырып жалғасын тауып, Сыр елінің тарихы және мәдениеті жаңа жәдігерлер мен тың жаңалықтарға толығуына өз септігін тигізеді», – деді Серік Ахмет.
</blockquote>

«Сыр жұрты» жобасы жалғасуда

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықова Токиода өтетін ХVI Паралимпиада ойындарына қатысатын қызылордалық парадзюдошы Даяна Федосовамен онлайн форматта кездесті.
Аймақ басшысы Даянаға алдағы спорт бәсекесіне сәттілік тілеп, Сыр елінің жанашыр жерлестері оған жанкүйер болатынын жеткізді.
<blockquote>
 «Сізді Токио ойындарына қатысуға құқық беретін лицензияны ұтып алуыңызбен шын жүректен құттықтаймын. Сіз Сыр өңірінің спорт тарихында тұңғыш Паралимпиадаға қатысушысыз, сондықтан мұның өзі зор жетістік деп білеміз. Токиода бар күш-жігеріңізді сарқа жұмсап, үздік болатыныңызға сенеміз», – деді облыс әкімі.
</blockquote>
Онлайн форматтағы жүздесуде облыс әкімі Сыр елі жұртшылығының атынан еліміздің абыройын қорғайтын спортшы қызға көрсетілетін сый-сияпат ретінде 500 мың теңгенің сертификатын ұсынды. Өз кезегінде, Даяна спорт бәсекесі алдында өзіне қолдау білдіріп, пікірлескен аймақ басшысына және барша спорт жанашырларына алғыс білдіріп, жерлестерінің үмітін ақтайтынын айтты.
Естеріңізге сала кетейік, коронавирус пандемиясына байланысты бір жылға шегерілген ХVI Паралимпиада ойындары биыл 24 тамыз бен 5 қыркүйек аралығында өтеді. Федосова Даяна Владимировна 2001 жылдың 13 шілдесінде Қызылорда қаласында дүниеге келген. Алматы қаласындағы дарынды балаларға арналған спорт интернатын, Қызылорда қаласындағы «Болашақ» колледжін аяқтаған.
Парадзюдомен 2019 жылдан бастап айналысады. Бапкері – дзюдодан ҚР еңбек сіңірген жаттықтырушысы Жанарбек Сансызбаев.Пара дзюдодан ҚР спорт шебері, ҚР чемпионатының жеңімпазы (2020 ж.), ҚР Кубогінің жеңімпазы (2021 ж.), Гран-при турнирінің қола жүлдегері, Уорик қаласы (Англия, 2021 ж.).
<img src="https://kyzylorda-news.kz/wp-content/uploads/2021/08/238608703_3627164567386586_5005639785439952551_n.jpg" alt="" />
<img src="https://kyzylorda-news.kz/wp-content/uploads/2021/08/234761557_3627164484053261_2250470612956358527_n.jpg" alt="" />

Аймақ басшысы Токио паралимпиадасына қатысатын спортшымен кездесті

<a href="https://kyzylorda-news.kz/">Kyzylorda-news.kz</a>.&nbsp;Қызылорда қаласындадағы Назарбаев Зияткерлік мектебінің 2020-2021 оқу жылы түлектерінің жоғары оқу орындарына түсу көрсеткіші 100 пайызды құрады. Жас зияткерлердің дерлігі қазақстандық және шетелдік университеттердің білім гранттарына қол жеткізді.
Биыл мектептен түлеп ұшқан 95 зияткердің 38 пайызы Назарбаев Университетіне қабылданды. Ал 13 сырбойылық жас зияткер Италия, Ресей, Гонконг, АҚШ, Венгрия, Оңтүстік Корея және Малайзия елдерінің озық білім ордаларынан тегін оқуға шақырту алды.
<blockquote>
 «Мектеп маған коммуникация, жауапкершілік, өз ойымды еркін жеткізе білу дағдыларын бойыма дарытты. Бұл өз кезегінде болашақта өзге елде білім алуда, жаңа ортаға бейімделуде өзінің үлкен септігін тигізетініне сенімдімін. Тандаған мамандығым ғылым саласына қатысты болғандықтан, келешекте туған жерде ғылыми жаңалықтарды ашуға және ғылымға халықаралық тәжірибені енгізуді жоспарлаймын», – дейді Оңтүстік Кореяның Кваджу технология мен ғылым институтының студенті Зарина Алтынбай.
</blockquote>
Мектеп шәкірттерінің басым бөлігі әдеттегідей медицина, ақпараттық технологиялар мен ғылым бағытындағы мамандықтарға таңдау жасады. Келешегін әлеуметтану, педагогика, экономика, бизнес, құрылыс пен халықаралық қатынастар саласымен байланыстырғысы келетіндер жоқ емес. Ринат Керімсал жоғары академиялық білімнің арқасында және NIS оқу бағдарламасының халықаралық мойындалуының нәтижесінде Назарбаев Университетінің тікелей бірінші курсына оқуға түсті. НУ-ға шақырту алуда мектептегі ұстаздардың қосқан үлесі зор деп санайды:
<blockquote>
 «Назарбаев Университетін таңдаудағы басты себебім – ол оқу ордасының әлемнің үздік университеттерінің ұстанатын жүйесі бойынша студенттерге сапалы білімді ұсынуы. Саясаттану және халықаралық қатынастар мамандығын игеру арқылы әлемдегі түрлі өзгерістерді саралап, Қазақстанның басқа елдермен достық қарым-қатынаста бірге дамуын қамтамасыз еткім келеді», – дейді жас түлек.
</blockquote>
Сондай-ақ, оқушылардың таңдауы Әл-Фараби атындағы Қазақ ұлттық университеті, С.Ж. Асфендияров атындағы Қазақ ұлттық медицина университеті, Астана медицина университеті, Қазақстан-Британ техникалық университеті, Сулеймен Демирел атындағы Университет, Astana IT University секілді беделді жоғары оқу орындарына түсті.

Қызылорда: NIS түлектері – озық университет студенттері

<a href="https://kyzylorda-news.kz/">Kyzylorda-news.kz</a>. Сырдария ауданында кәсіпкерлік саласының дамуы мен әлеуметтік нысандардың қысқы жылыту маусымына дайындық барысы талқыланды.
Сырдария ауданының әкімі Мұрат Ергешбаевтың төрағалығымен аппарат мәжілісі өтті. Мәжілісте кәсіпкерлік саласының даму барысы және әлеуметтік нысандардың қысқы жылыту маусымына дайындық мәселелері талқыланды.
Аудан басшысы шағын және орта кәсіпкерлік экономиканың негізгі тірегі екенін атап өтті. Ауылдық округтердегі кәсіпкерлік саласын дамыту күнделікті бақылауда тұратынын айтып, жобаларды сүйемелдеуге басымдық беру қажеттігін жеткізді.
Күн тәртібіндегі бірінші мәселе бойынша аудандық кәсіпкерлік, өнеркәсіп және туризм бөлімінің басшысы Е.Ахетов баяндама жасады.
<blockquote>
 «Аудан бойынша 2021 жылдың 1 шілдесіне 2579 шағын және орта кәсіпкерлік субъектілері тіркелсе, оның 2377-і жұмыс жасап тұр. «Еңбек» нәтижелі жұмыспен қамту және жаппай кәсіпкерлікті дамыту» бағдарламасының екінші бағыты бойынша құны 190,2 млн теңгенің 41 жобасы несилендірілді. Жыл басынан бері А.Тоқмағанбетов, С.Сейфуллин, Жетікөл, Айдарлы, Іңкәрдария, Қалжан ахун, Шаған және Шіркейлі ауылдық округтерінде бірде-бір жоба қаржыландырылмаған. Дегенмен, қазіргі таңда «Ауылшаруашылығын қаржылай қолдау қоры» АҚ-на және «Атамекен» МҚҰ-на ұсынуға дайын 318,2 млн теңгенің 79 жобасының тізімі жасақталды. Оның ішінде «Ауылшаруашылығын қаржылай қолдау қоры» АҚ-на 152,2 млн теңгенің 39 жобасы және «Атамекен» МҚҰ-на 166,0 млн теңгенің 40 жобасы ұсынылды. Осы бағдарламаның екінші бағыты аясында «Стартап»жаңа бизнес идеяларды іске асыру мақсатында 138 адамға 583 400 теңгеден 80,1 млн теңге көлемінде мемлекеттік грант берілді», – деген бөлім басшысы аудан әкімінің тапсырмасына сәйкес тамыз айының 10-12 күндері аралығында барлық ауылдық округтерде кәсіпкерлік саласы бойынша түсіндірме жұмыстары жүргізілгенін атап өтті.
</blockquote>
Бүгінде аталған кездесуде айтылған ұсыныс-пікірлер сараланып, жинақталуда. Бірінші мәселе бойынша аудан әкімі қосымша ауыл әкімдерінің де хабарламасын тыңдап, атқарылуы тиіс жұмыстарды айқындап, бірқатар нақты тапсырмалар берді.
Күн тәртібіндегі екінші мәселе бойынша аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Е.Бахтияров баяндама жасады.
<blockquote>
 «Аудандағы нысандардың 39-і сұйық отынмен, 34-і қатты отынмен, 7-і табиғи газбен жылытылады. Аудан бойынша әлеуметтік нысандарға қажетті2212 тн сұйық және 3672 тн қатты отын сатып алуға облыстық және аудандық бюджеттен 444,0 млн теңге бөлінген. Қазіргі уақытта әлеуметтік нысандардың қоймасында 86,5 тн сұйық және 334 тн қатты отын қоры бар. Жылу беру маусымына дайындық жұмыстарын қарап шығу мақсатында сала мамандарымен елді мекендердегі әлеуметтік нысандарға тексеру жүргізілді. Тексеру барысында қазандықтарға, жылу жүйелеріне, айналым насостарына, қосалқы генераторлардың сапасы тексерілді. Бюджеттік бағдарлама әкімшілеріне 1 қыркүйекке дейін қойманың сыйымдылығына сәйкес отын қорын түсіру ұсынылды», – деген бөлім басшысы Шіркейлі ауылдық округіндегі емхана ғимаратында, сондай-ақ бірқатар мектептерде мәселе бар екенін атап өтті.
</blockquote>
Шіркейлідегі мәселені шешу үшін әкімшілік ғимаратынан арнайы бөлмелер әзірленіп, емхана персоналын көшіру жұмыстары ұйымдастырылып жатқанын айтты. Ал білім бөліміне қатысты мәселелер тиісті бөлім басшысына облыстық білім басқармасымен бірлесіп тез арада шешу тапсырылды.
Аудан басшысы жылыту маусымының маңыздылығына тоқталып, әр ауылдың халқына қажетті отын қорының болжамды көлемін анықтап, отын қорын жеткізуді, тиісті мердігер мекемелермен келісімдер жүргізуді тапсырды. Сондай-ақ көгілдір отынға қосу жұмыстарына байланысты кент тұрғындары арасында ақпараттық-насихаттық іс-шараларды үйлестіруді міндеттеді. Аппарат мәжілісіндегі тапсырмалардың орындалуын бақылау аудан әкімінің орынбасарларына, аппарат басшысына жүктелді.
<img src="https://kyzylorda-news.kz/wp-content/uploads/2021/08/238619449_958520168044209_2320656372401836453_n.jpg" alt="" />
<img src="https://kyzylorda-news.kz/wp-content/uploads/2021/08/239450088_958520148044211_7302512855182752201_n.jpg" alt="" />

Сырдарияда 2377 кәсіпкерлік нысан жұмыс істеп тұр

<a href="https://kyzylorda-news.kz/">Kyzylorda-news.kz</a>. Токио Олимпиадасының қола жүлдегері, боксшы Қамшыбек Қоңқабаев мемлекет тарапынан берілген сыйақыны қайырымдылық қорына жұмсайды. Бұл туралы боксшы өзінің «Facebook» парақшасында хабарлады.
<blockquote>
 «Ассалаумағалейкум құрметті спорт сүйер қауым! Бүгін Алматы қаласында Қазақстан бокс федерациясының президенті Кеңес Хамитұлының қолдауымен Олимпиада ойындарына қатысқан спортшылар мен жаттықтырушыларды марапаттау рәсімі өтті. Команда капитан ретінде ұлттық құрама атынан қандай нәтиже болмасын бізге қолдау көрсетіп жатқан Кеңес Хамитұлына алғысымызды айтқымыз келеді. Осы орайда Мемлекет тарапынан берілген 75,000 $ сыйақыны қайырымдылық қорына жұмсауды жөн көрдім», – деп жазады боксшы.
</blockquote>

Қамшыбек Қоңқабаев мемлекеттік сыйақыны қайырымдылық қорына жұмсайды

<a href="https://kyzylorda-news.kz/">Kyzylorda-news.kz</a>. Қызылорда облысының әкімі Гүлшара Әбдіқалықова облыстық ветеринария басқармасының басшысы Шахмардан Қойшыбаевпен кездесіп, есебін тыңдады.
Облыс көлемінде ветеринариялық қауіпсіздікті қамтамасыз ету, эпизоотиялық тұрақтылықты сақтау мақсатында тиісті ветеринариялық іс-шаралар уақытылы атқарылуда.
Биыл аса қауіпті 16 түрлі жұқпалы ауруларға республикалық бюджет есебінен қаралған 6311,2 мың доза ветеринариялық препараттың бүгінгі таңда облысқа 6095,5 мың (96,6%) дозасы жеткізілді. Қазіргі күні бекітілген 8 айлық жоспарға сәйкес алдын ала егу жұмыстары 86,7 пайызға орындалды.
Бруцеллез ауруына қарсы диагностикалық тексеру нәтижесінде ауру болып анықталған 42 бас мүйізді ірі қара, 177 бас уақ мал ветеринариялық-санитариялық талаптарға сәйкес уақытылы сойылды.
Облыс көлемінде 382,3 мың бас мүйізді ірі қара, 836,2 мың бас уақ мал, 175,6 мың бас жылқы, 57,9 мың бас түйе, 1,5 мың бас шошқа, 810 бас тақтұяқтылар ауыл шаруашылығы жануарларын бірдейлендіру ақпараттық жүйесінде тіркелген.Облыс әкімі Арал ауданындағы қалыптасқан жағдайға ерекше мән берді. Арал ауданы бойынша жыл басынан маусым айына дейін 481 бас, 1 маусым – 15 шілде аралығында 93 бас, 22 шілде – 6 тамыз аралығында 14 бастың өлім-жітімі тіркеліп, бүгінгі күнге 588 бас болып отыр. Клиникалық белгілеріне сәйкес «алиментарлы дистрофия», яғни мал көтеремдіктен өлген.
Осыған байланысты аудан бойынша қысқа қажетті шөптің көлемі нақтыланып, қазіргі күні осы қажеттілікке орай 15145 тонна шөп және 845,4 тонна жем жеткізілген. Сонымен қатар, мал басын сақтап қалу үшін басқа өңірлерге 540 бас уақытша жіберіліп, есептен шығарылды. 450 бас Шалқар ауданымен шектес жайылымдарға ауыстырылғандығы баяндалды.
Мұнымен қоса, Арал ауданының Жақсықылыш кентінде 13 бас, Қарақұм а/о 10 бас, Аққұм ауылдық округінде 3 бас, барлығы 26 бас түйе «некробактериоз» ауруымен ауырды. Ауру малдар уақытылы оқшауланып, тиісті емдік шараларын жүргізу нәтижесінде барлығы жазылып, жайылымға қосылды. Өлім-жітім тіркелген жоқ. Қазіргі таңда эпизоотиялық ахуал тұрақты.
Ауыл шаруашылығы жануарларына, олардың өнімдері мен шикізатына берілетін ветеринариялық анықтамалар «Бірыңғай автоматтандырылған басқару жүйесі» арқылы рәсімделуде. Жыл басынан 28351 дана ветеринариялық анықтамалар беріліп, мемлекеттік қызмет көрсетілді.
Облыс көлемінде жыл басынан ит, мысықтан 588 адам жарақат алу оқиғасы тіркелген. Осыған орай, қаңғыбас иттер мен мысықтардың санын шектеу мақсатында аулап жою жұмыстары тұрақты жүргізіліп келеді. Қазірде 14883 бас қаңғыбас ит пен мысықтар ауланып, жойылған.
Сондай-ақ, Шахмардан Қойшыбаев облыс бойынша 90 типтік жобадағы мал қорымы пайдаланылып, әлі де 56 типтік жобадағы мал қорымын салу қажеттілігін атап өтті. Басқарма басшысы жалпы саланың материалдық-техникалық жарақтану жағдайын баяндады.
Аймақ басшысы ветеринариялық ұйымдарды материалдық-техникалық жарақтандырудың, апаттық жағдайдағы ветеринариялық пункт ғимараттарын және типтік жобадағы мал қорымдарын салудың кезең-кезеңімен орындау жоспарын әзірлеп ұсынуды тапсырды. Облыс көлемінде тиісті ветеринариялық іс-шаралардың уақытылы орындалуын ұйымдастыруды жүктеді.
Сонымен қатар, Арал, Қазалы, Жалағаш, Шиелі аудандары мен Қызылорда қаласы әкімдерімен бірлесе жұмыс жасап, типтік жобадағы мал қорымдары мен сібір жарасы ауруының ошақтарын облыстық теңгерімге берілуін қамтамасыз ету жөнінде тапсырмалар берді. Арал ауданында қалыптасқан жағдайды күнделікті бақылауда ұстау қажет екенін айтты.

Гүлшара Әбдіқалықова ветеринария саласындағы мәселелерді бақылауда ұстауда

<a href="https://kyzylorda-news.kz/">Kyzylorda-news.kz</a>. 18 тамыз – Шекарашылар күні. Атаулы мерекеге орай Қызылорда облысының әкімі Гүлшара Әбдіқалықова сырбойылықтар мен шекарашыларды мерекемен құттықтады.
Қымбатты сырбойылықтар! Қадірлі шекарашы сардарлар мен сарбаздар!
Сіздерді кәсіби мерекелеріңіз – Шекарашылар күнімен шын жүректен құттықтаймын!
Қай елдің болмасын, мемлекеттілігін айқындайтын оның шекарасы екені белгілі.Елбасы Нұрсұлтан Әбішұлы Назарбаев айтқандай, біздің бабаларымыз ғасырлар бойы ұшқан құстың қанаты талып, жүгірген аңның тұяғы тозатын ұланғайыр аумақты ғана қорғаған жоқ. Олар ұлттың болашағын, келер ұрпағын, бізді қорғады. Сан тараптан сұқтанған жат жұртқа Атамекеннің қарыс қадамын да бермей, ұрпағына мирас етті. Тәуелсіздігімізді алған 30 жылдың ішінде еліміз мемлекеттік шекарамызды заңдық тұрғыдан халықаралық қауымдастық алдында мойындатты. Қол жеткен азаттықты елдің мықты әскері ғана қорғай алады десек, халық тыныштығын қамтамасыз ету – әрбір азаматтың абыройлы міндеті, перзенттік парызы. Осы тұрғыда кірпік қақпай ел тыныштығын күзетіп тұрған шекарашыларымызда үлкен жауапкершілік жүгі бар.
Жер көлемі жағынан тоғызыншы орынды иеленетін еліміздің шекарасын күзету де оңай емес. Алайда, елдің тыныштығы мен қауіпсіздігіне аса сақтықпен қарайтын жауынгерлеріміз өздеріне артылған жүкті абыроймен көтеріп келеді.
Қазіргі кезде алыс-жақын шетелдерде болып жатқан түрлі жағдайлар шекарашыларымызға бір сәт те босаңсуға болмайтынын көрсетеді.
Ел Президенті Қасым-Жомарт Кемелұлы Тоқаев өзінің «Тәуелсіздік бәрінен қымбат» атты мақаласында: «Аумақтық тұтастығымызға күмән келтіріп, тату көршілік қатынастарға сына қаққысы келетін кейбір шетел азаматтарының арандатушылық іс-әрекеттеріне ресми және қоғамдық деңгейде тойтарыс бере отырып, ағартушылық жұмыстарын ұстамдылықпен жүргізген жөн. Біз ұлттық мүддені аспен де, таспен де қорғауға дайын болуымыз қажеттігін тағы да баса айтқым келеді», – деген еді.
Құрметті шекарашылар! Еліміздің ұлттық қауіпсіздігі мен тыныштығын қамтамасыз етіп, ұлан-ғайыр мемлекеттік шекарамызды қорғауда еңбектеріңіз зор.
Сіздердің қиын да абыройлы, жауапкершілігі мол істеріңізге табыс, мықты денсаулық, шаңырақтарыңызға амандық тілеймін. Еліміз тыныш, шекарамыз берік болсын!

Гүлшара Әбдіқалықова шекарашыларды құттықтады

<a href="https://kyzylorda-news.kz/">Kyzylorda-news.kz</a>. 18 тамыз – ел іргесін күзеткен Шекарашылар күні.
1992 жылдың 18 тамызында «Шекара әскерлерін құру туралы» Президент Жарлығына қол қойылды. Алайда айтулы дата Қазақстанның мемлекеттік мерекелер күнтізбесіне 2012 жылғы 29 тамызда ғана енгізілді.
Шекарашылар мемлекеттік шекараны қорғап, күзетеді. Шекарада болған кез келген күмәнді оқиғаны қалт жібермей, шекара режимін бақылайды. Олардың міндеттеріне адамдарды мемлекеттік шекара арқылы өткізу, өткізу бекеттеріндегі тәртіпті бақылау, шекара шебіндегі мекемелерді қорғау, мемлекеттік шекара режимін қамтамасыз ету сияқты істер кіреді.
<blockquote>
 «Шекара қауіпсіздігі – Қазақстан Республикасының ұлттық қауіпсіздігінің ажырамас бөлігі. Оны елдің саяси және экономикалық мүдделерін мұқият қорғайтын Ұлттық қауіпсіздік комитетінің құрамдас бөлігі – Шекара қызметі іске асырады. Бүгінгі шекарашылар трансшекаралық қылмысқа, халықаралық терроризм мен экстремизмге, заңсыз көші-қонға, елдің аумақтық тұтастығы мен егемендігін бұзуға сенімді тосқауыл қоя отырып, батыр бабалардың жауынгерлік дәстүрін абыроймен жалғап келеді», – деп жазылған ҰҚК Шекара қызметінің хабарламасында.
</blockquote>
Мемлекеттік шекараны қорғау шаралары Қазақстан Республикасының Үкіметі мен уәкілетті органдардың өз құзыреті шегінде қабылдаған саяси, құқықтық, ұйымдастырушылық, экономикалық, шекаралық, әскери және өзге де шешімдері аясында іске асырылады.
Елдің шетінде, желдің өтінде жүрген сарбаздардың қырағы болып, жауапты қызмет атқаруы бүкіл елдегі тыныштықтың кепілі болып отыр.

Бүгін шекарашылар кәсіби мерекесін атап өтіп жатыр

<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 7416 адам коронавирустан жазылды, деп хабарлайды <a href="https://www.coronavirus2020.kz/kz/kazakstanda-otken-taulikte-7416-adam-koronavirus-indetinen-emdelip-shykty_a3825171">coronavirus2020.kz</a>.
Аймақтар бойынша:
Нұр-Сұлтан қаласы – 687,
Алматы қаласы – 1824,
Шымкент қаласы – 739,
Ақмола облысы – 278,
Ақтөбе облысы – 511,
Алматы облысы – 215,
Атырау облысы – 489,
Шығыс Қазақстан облысы – 121,
Жамбыл облысы – 35,
Батыс Қазақстан облысы – 126,
Қарағанды облысы – 1112,
Қостанай облысы – 48,
Қызылорда облысы – 194,
Маңғыстау облысы – 390,
Павлодар облысы – 459,
Солтүстік Қазақстан облысы – 75,
Түркістан облысы – 113.
Қазақстан бойынша жазылғандар саны – 585298.

Қызылордада өткен тәулікте 194 адам індеттен айықты

<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 7034 адамда коронавирус індеті ПТР арқылы расталып ауырғаны белгілі болды, деп хабарлайды <a href="https://www.coronavirus2020.kz/kz/kazakstandagy-koronavirus-boyynsha-17-tamyz-23-59-dagy-epidemiologiyalyk-zhagday_a3825168">coronavirus2020.kz</a>.
Аймақтар бойынша:
Нұр-Сұлтан қаласы – 735,
Алматы қаласы – 1403,
Шымкент қаласы – 410,
Ақмола облысы – 284,
Ақтөбе облысы – 375,
Алматы облысы – 477,
Атырау облысы – 550,
Шығыс Қазақстан облысы – 163,
Жамбыл облысы – 219,
Батыс Қазақстан облысы – 132,
Қарағанды облысы – 1049,
Қостанай облысы – 267,
Қызылорда облысы – 150,
Маңғыстау облысы – 200,
Павлодар облысы – 323,
Солтүстік Қазақстан облысы – 158,
Түркістан облысы – 139.
Жалпы ел бойынша ауырғандар саны 708379.

Қазақстан және Қызылорда облысының жаңалықтары