Kyzylorda-news.kz. COVID-19 таралуына жол бермеу жөніндегі ВАК шектеулерді алып тастау бойынша бірқатар шешім қабылдады. Соның ішінде өңірлерде «Ashyq» мобильді қосымшасын міндетті түрде қолдану талабы да алынды.
Бұндай шешім ҚР Премьер-Министрінің орынбасары Ералы Тоғжановтың төрағалығымен Қазақстан Республикасының аумағында коронавирус инфекциясының таралуына жол бермеу жөніндегі ведомствоаралық комиссияның отырысында қабылданды.
Елдегі эпидемиологиялық жағдайдың тұрақтануын ескере отырып, Қазақстан Республикасының аумағында коронавирус инфекциясының таралуына жол бермеу жөніндегі ведомствоаралық комиссия шешіміне сай, эпидемиологиялық тәуекелдің «сары» және «жасыл» аймақтарында орналасқан өңірлердегі барлық объектілерде «Ashyq» мобильді қосымшасын міндетті түрде қолдану алынып тасталды.
Сондай-ақ, әлеуметтік қашықтықты сақтауға қойылатын талаптар, міндетті термометрия талабы да күшін жойды.

«Ashyq» қосымшасын қолдану талабы алынып тасталды

Kyzylorda-news.kz.«Қазгидромет» РМК баспасөз қызметі 12 наурызға арналған ауа райы болжамын ұсынды.
Қазақстан аумағының басым бөлігі әлі де оңтүстік циклон ықпалында болады.
Осыған байланысты жауын-шашын, кей жерлерде қатты жауын-шашын (жаңбыр, қар) жауып, тұман, көктайғақ болады, жел күшейеді.
Тек Казақстанның қиыр солтүстік-шығысында суық антициклонның әсерінен жауын жаумайды, күн ашық.

Сенбіге арналған ауа райы болжамы

Kyzylorda-news.kz. ҚР Білім және ғылым министрінің кеңесшісі, «Республикалық қосымша білім беру оқу-әдістемелік орталығы» республикалық мемлекеттік қазыналық кәсіпорнының директоры Раиса Шер университеттегі жастар ұйымдарының жұмысымен танысты.
Студенттер сарайында өткен жиын барысында Раиса Петровна университеттегі «Бизнес-старт» жастар кәсіпкерлігі орталығының резиденттері, «Ақиқат» саяси пікір-сайыс клубы, «Студенттік Парламент», «Жайдарман», «КТА» және «Жауқазын» студенттер театры, «Алтын домбыра», «Сырлы қалам», «Кітап құрттары» және «Book club» ұйымдарының мүшелерімен кездесті.
Жиын барысында университеттің Басқарма Төрағасы – Ректоры Бейбіткүл Кәрімова студенттік өзін-өзі басқару жүйесі – болашақ мамандардың әлеуметтік белсенділігін көтерудің ең маңызды жолы екенін атап өтті.
<blockquote>
 “Университетте 2004 жылы ашылған “Ақиқат” саяси пікірсайыс клубы – ұшқыр ойлы көшбасшылардың мектебі. Бүгінде бұл ортада шыңдалып, үлкен жетістіктерге жеткен түлектер өте көп. Ұйымның барлық институтта бөлімшелері ашылды. Клуб мүшелері Қызылорда қаласындағы мектептермен тығыз байланыста. Бүгінде 25 мектепте филиалы бар. Филиалдар бойынша 250-ден астам оқушы тіркеліп, жұмыс жасауда. Жыл соңына дейін тағы да 20 мектепте филиал ашу жоспарлануда”, – деді «Ақиқат» саяси пікірсайыс ұйымының төрағасы Айжан Орынбасар.
</blockquote>
Жиында Раиса Шер дебат клубтары еліміздің әр аймағында жандана түскенін атап өтті.
<blockquote>
 “Пікірсайыс ең алдымен жастардың білімді болуына ықпал етіп, көшбасшылыққа баулиды. Сенімділікті арттырып, дипломатиялық қасиеттеріңіздің дамуына әсер етеді. Көшбасшылық қасиет сіздерге өмір бойына көмектесетін болады. 
 Университетте жастардың сапалы білім алуына, мәдени, спорттық шараларға қатысуына, студент кезден-ақ кәсіпкер атануына қолайлы жағдай жасалғаны қуантып отыр. Бұл – сіздер үшін үлкен мүмкіндік”, – деді Райса Шер.
</blockquote>
Бүгінде университет Қазақстан Республикасының үздік көпбейінді жоғары оқу орындарының ұлттық рейтингісі бойынша ондыққа кіреді. Оқу ордасында студенттердің білім ала жүріп ғылыми ізденістер жасауы, қоғамдық шараларға белсене қатысуы, шығармашылық қабілеттерін дамытуы, кәсіпкерлік салаға бейімделуі үшін жұмыстар жүйеленген. Қазіргі уақытта 22 жастар ұйымы жұмыс жасайды.
Университеттің негізгі мақсаттарының бірі – сапалы маман даярлаумен қатар, өзін-өзі жұмыспен қамтыған кәсіпкер тәрбиелеу. Оқу орнында ІТ саланы игеріп, бизнес бастаймын деген жастарға нақты қолдау бар. Студенттер арасында кәсіпкерлікті дамыту үшін «Business-START» жастар кәсіпкерлігі орталығы жұмыс істейді. Қазіргі уақытта бизнес-инкубатор резиденттері 40 студентті тіркеді. Оқу орны тарапынан жас кәсіпкерлерге тиімді түрде жұмыс орны беріліп, жобаларына инвестор тарту бойынша қолдау көрсетіледі.
2020 жылы университет пен Astana Hub халықаралық технопаркі арасында ынтымақтастық туралы меморандум жасалды. Меморандум нәтижесінде облысымыздағы инновациялық жобаларды дамыту мақсатында бірлескен түрде жұмыстар жүргізілуде. Бұл студенттер үшін инновациялық жобаларын халықаралық деңгейге шығаруға бағытталған үлкен мүмкіндік деуге болады.
Жиын «Дидар» халықтық фольклорлы-этнографиялық ансамблі және вокальды-аспапты ансамбльдің бірлескен концертімен қорытындыланды.
<img src="https://kyzylorda-news.kz/wp-content/uploads/2022/03/p1700748-scaled.jpg" alt="" />
<img src="https://kyzylorda-news.kz/wp-content/uploads/2022/03/p1700733-scaled.jpg" alt="" />
<img src="https://kyzylorda-news.kz/wp-content/uploads/2022/03/p1700671-scaled.jpg" alt="" />

Жастар ұйымдары жаңа жобаларды жүзеге асыруда

Kyzylorda-news.kz. Бірнеше жылдан бері Қазалы ауданының тұрғындары қыста мұз қатып елді әбігерге салатын, қызыл судан құтқаратын көпір салуды көтеріп келді. Енді бұл мәселе шешімін тауып, Қарлаң өткелінің құрылысы басталды. Жаңа көпір арқылы Әйтеке би кенті мен Қазалы қаласы, Өркендеу, Бірлік, Қожабақы, Аранды, Бозкөл, Ажар, Тасарық және Кәукей елді мекеніндегі 12 мыңға жуық халықтың алыс-берісі артып, жол қатынасы жақсармақ.
Бүгін облыс әкімі Қазалы ауданына жасаған жұмыс сапары аясында ауыл ақсақалдарымен бірге Қарлаң учаскесіне салынатын көпірдің іргетасын қалау рәсіміне қатысты.
Аймақ басшысы Сырдария өзені арқылы өтетін темір-бетон көпірі құрылысының маңыздылығына тоқталып, тұрғындармен кездесу барысында бұл нысанның ерекше бақылауда болатынын жеткізді.
<blockquote>
 “Бүгінгі күні аталмыш көпірді салу үшін жоба-сметалық құжаттары әзірленіп, мемлекеттік сараптама қорытындысы алынды. Көпірдің экономикалық тиімділігі де зор. Себебі, сауда-саттық қарым қатынасын жақсартуға және Сырдария өзінінің арғы бетіндегі егін және балық шаруашылығы дамытуға оң септігін тигізеді. Қауіпсіз және тұрақты көлік қатынасымен қатар, медициналық қолжетімділікке оң әсерін беретін болады. Жалпы Қазалы ауданында жол салу, инфрақұрылым жүргізу, әлеуметтік нысандар салуға бағытталған 10-нан астам жоба жүзеге асырылады”, – деді Гүлшара Әбдіқалықова.
</blockquote>
Айта кетейік, Қарлаң учаскесіндегі темір-бетон көпірі «Қазалы-Қожабақы-Бозкөл-Кәукей» автомобиль жолының 16 шақырымында орналасқан. Өткелдің ұзындығы 249 метрді құрайды. Бұған дейін көліктер Сырдария өзені арқылы өтетін қалқымалы көпірмен қатынап келді.
<img src="https://kyzylorda-news.kz/wp-content/uploads/2022/03/fb_img_1647012966718.jpg" alt="" />
<img src="https://kyzylorda-news.kz/wp-content/uploads/2022/03/fb_img_1647012970781.jpg" alt="" />
<img src="https://kyzylorda-news.kz/wp-content/uploads/2022/03/fb_img_1647012973924.jpg" alt="" />
<img src="https://kyzylorda-news.kz/wp-content/uploads/2022/03/fb_img_1647012979963.jpg" alt="" />

Қызылордада 10 елді мекенді байланыстыратын көпірдің іргетасы қаланды

Kyzylorda-news.kz. Қаржы орталығының қолдауымен білім беру саласындағы әлеуметтік жобалар яғни студенттік жатақханаларды, жекеменшік мектептерді салу және реконструкциялау, «Aqyl» білім беру депозиті, мемлекеттік білім беру кредиті бүгінде нәтижесін беріп келеді. Бұл туралы бүгін Өңірлік коммуникациялар қызметінде өткен баспасөз конференциясында ҚР БҒМ «Қаржы орталығы» АҚ Ілгерілету және сыртқы коммуникациялар департаментінің директоры Алпамыс Сатыбалдин мәлімдеді.
Орталық қызметі инвесторларды, жеке кәсіпкерлерді мемлекеттің қаржылық қолдауымен студенттік жатақханалар құрылысына қаржы салуға шақырады. Бұл табысты, тұрақты және келешегі мол бизнес-жоба. Себебі, бүгінде жатақханаға сұраныс жоғары.
<blockquote>
 «Елімізде студенттер тұру үшін 63 мыңнан астам орын-жайды жасау қажет. Сонымен қоса жақын болашақта Қазақстанды 2000-шы жылдарда болған baby-boom-ның салдары күтіп тұр, сондықтан студенттер контингенті де өсетін болады. Жатақхана салу мемлекет пен жекеменшік сектордың әріптестігіне негізделеді. Инвестор өз қаражаты есебінен объектіні іске қосуды жүзеге асырады. Объекті сәтті пайдалануға енгізілген жағдайда мемлекет онда мақсатты мемлекеттік тапсырысты орналастырады, қаржы қарастырылады. Мәселен, жатақханада іс жүзінде 100 адам тұратын болса, төлемдер 200 адамға төленеді», – деді А.Сатыбалдин.
</blockquote>
Бүгінгі таңда 30 630 орынға лайықты 124 жатақхана пайдалануға берілді. Биыл 11 057 орындық 32 жатақхананы беру жоспарлануда.
Сонымен қатар, жекеменшік мектептер де көптеп ашылуда. 2019-2021 жылдары 94 696 орындық 287 жекеменшік мектеп ашылды. Қызылорда жекеменшік мектеп ашып, ең жоғары төлем алатын өңір саналады. Қазірде жекеменшік мектептердің жалпы саны 408-ге жетті.
Сондай-ақ, «AQYL» мемлекеттік білім беру жинақтау жүйесі арқылы республикамыздың кез келген азаматы өзіне немесе баланың атына білім беру жинақтау салымын ашуға мүмкіндігі бар. Депозиттің мақсаты жинақталған қаражат ҚР-да, сондай-ақ шетелде оқудың ақысын төлеуге жұмсалуы тиіс.
Жоба бойынша Қазақстанның колледждері мен жоғары оқу орындарында білім алудың қолжетімділігін кеңейту мақсатында талапкерлер мен студенттерге негізгі қарыз сомасын төлеу мерзімін ұзарта отырып, кепілсіз студенттік кредиттер алуға мүмкіндік бар. Кредиттің жалпы мерзімі 10 жылға дейін. Қазіргі уақытта несие беруші «Нұрбанк» АҚ. Білім беру кредиті бойынша пайыздық мөлшерлеме 20 пайызды құрайды.

Алпамыс Сатыбалдин: Жатақханада 100 адам тұратын болса, төлемдер 200 адамға төленеді

<a href="https://kyzylorda-news.kz/">Kyzylorda-news.kz.</a>&nbsp;Қазақстандық банктер үндеу жасап, қолма-қол доллар не себепті жоқ екенін түсіндірді.
Тұрғындар айырбастау пунктері мен банктерде қолма-қол доллар мен валюталық депозиттен қаражат алу мүмкін емес екенін айтып шағымданып жатыр.
Екінші деңгейлі банктердің бірлескен үндеуінде шиеленіскен халықаралық саяси жағдайға байланысты Қазақстанға басқа елдерден қолма-қол шетел валютасын жеткізу қиынға соғып отырғаны айтылған.
<blockquote>
 «Бұл қолма-қол валютаға қатысты екенін тағы да атап өткіміз келеді. Ал валюта сіздің шотыңызда сақталады. Оны онлайн-банкинг арқылы тексере аласыз», – делінген үндеу мәтінінде.
</blockquote>
Банктер қолма-қол валютаны жеткізумен байланысты қиындық тек уақытша деп сендірді.
<blockquote>
 «Біз қысқа мерзімде Қазақстанға қолма-қол валютаны тұрақты жеткізуді қамтамасыз ету үшін Ұлттық банкпен бірге жұмыс істейміз», – деді олар.
</blockquote>
Қазақстанда қолма-қол шетел валютасын сатып алуға жоғары сұраныс байқалады.
Бұған дейін Ұлттық банк валюталық операцияларды шектеу туралы тапсырма бермегенін мәлімдеді.

Банктер қолма-қол валюта айырбастауға қатысты үндеу жасады

<a href="https://kyzylorda-news.kz/">Kyzylorda-news.kz.</a>&nbsp;Нұрлан Қоянбаевтың «Қазақша бизнес Түркияда» фильмі көпшілікке өткен жылдың 30 желтоқсанында ұсынылды. Картинаны 2 жыл күткен жұрт алғашқы күндері кинотеатрларға жарыса ағылды. Продюсердің айтуынша, сол кезеңде таңғы сеанстардан бастап түнге дейін билеттер болмаған. Алайда 4 қаңтар күні елімізде митингілер басталып, ақырында фильм көрсетілімі біраз уақытқа тоқтап қалды. Қазір кей кинотеатрлар фильмді қайта көрсетуде. Осы орайда Қоянбаев қаңтардағы тәртіпсіздіктер кезіндегі уайымы мен саясатқа көзқарасы жайлы Динара Сәтжанға сұхбат берді, деп хабарлайды <a href="https://stan.kz/nyrlan-koyanbaev-kazakstanda-kasibi-maman-bolsan-da-tab-361512/">Stan.kz</a>.
<blockquote>
 «Елімізде әрбір бейсенбі сайын митинг болмайды ғой, 30 жылда бір болады», – деген Қоянбаев демократиялы елде митингілердің болуын заңды деп санайды.
</blockquote>
Айтуынша, еліміздің әрбір тұрғыны өз ойын ашық білдіре алса, қақтығыстар болмайды.
<blockquote>
 «Мысалы, Кореяға, Сеулге бардым, көшеден 5 мың адам айқайлап өтіп бара жатыр. Не істеп жатыр десем, олар бірдеңеге қарсы дейді. Яғни, митинг болып жатыр, ал мұнда адамдардың өмірі жалғасып жатыр. Демократиялы ел деген сондай болу керек», – дейді кинопродюсер.
</blockquote>
Қоянбаев «Қазақша бизнес Түркияда» фильміне 500 мың АҚШ долларын жұмсаған. Айтуынша, кеткен қаражат бүгінде толығымен ақталды. Тіпті түскен табыс та бар. «Алайда ол байып кететіндей табыс емес», – дейді өзі. Десе де, продюсер қаңтардағы тәртіпсіздіктер кезінде өз қалтасын емес, мемлекеттің болашағына алаңдағанын айтады.
<blockquote>
 «Әрине, уайымдадым. Мемлекет, халық ретінде болашағымызды ойладым. Мен Түркияға бардым, қолдан келгенше кино түсірдім. Киноға шығардық, бірақ халық митингіге шығып, одан кейін төтенше жағдай болып, кинотеатрлар жабылып қалды. Әрбір қазақстандықта табысқа жетуге деген мүмкіндік болу керек. Мен, мысалы, өз мүмкіндігімді кино түсіру арқылы көрдім. Бірақ мен еңбектенсем де, табысты болу, болмау маған байланысты емес екен. Өз салаңда кәсіби маман болсаң да, табысты болу өзіңе ғана байланысты емес. Қазір бәріміз саясатпен айналысуымыз керек болды. Саясатпен айналыспасаң, ол сенімен айналысады. Бұрын жоғарыдағылар ақылды ғой, олар біз үшін шешім қабылдайды, ал мен комедия түсіремін деп ойлаушы едім. Бірақ біздің елде комедия түсіруге ерте екен», – деді Қоянбаев.
</blockquote>

Нұрлан Қоянбаев: Қазақстанда кәсіби маман болсаң да, табысты болу өзіңе байланысты емес

<a href="https://kyzylorda-news.kz/">Kyzylorda-news.kz.</a>&nbsp;Жаңақорған ауданында автокөлікпен 4 баланың әкесін қағып мерт қылған, оған қоса, оқиға орнынан қашып кеткен күдікті полиция қызметкері қамауға алынды.
Биылғы жылдың 7 наурызында кешкі сағат 19:06 шамасында Қызылорда облысының Жаңақорған кентінде ​ жаяу жүргіншіні белгісіз автокөлік қағып, оқиға орнынан бой тасалаған. Жол-көлік оқиғасы салдарынан 1 адам қайтыс болды.​
Қазіргі таңда бұл дерек бойынша Қазақстан Республикасы Қылмыстық кодексінің​ ​ 345 бабы​ (Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы) және 347 бабы бойынша (Жол-көлiк оқиғасы болған жерден кетіп қалу) сотқа дейінгі тергеп-тексеру әрекеттері жүргізілуде.
Жаңақорған аудандық полиция бөлімінің қызметкерлерімен жүргізілген жедел-іздестіру шараларының нәтижесінде жол-көлік оқиғасын жасаған күдікті ретінде полиция қызметкері анықталып, уақытша ұстау изоляторына қамалды. Тергеу әрекеттері жалғасуда. Аудандық полиция бөлімінің​ басшылығына қатысты тексеру жүргізілуде.

Жаңақорғанда адам қағып, мерт қылған полиция қызметкері ұсталды

<a href="https://kyzylorda-news.kz/">Kyzylorda-news.kz.</a> Бүгін дүниежүзілік тұтынушылардың құқығын қорғау күні.
Тұңғыш рет тұтынушылардың құқықтарын қорғау күні 1983 жылы 15 наурызда атап өтті. 1985 жылы 9 сәуірде БҰҰ Бас Ассамблеясы тұтынушылардың мүдделерін қорғауға арналған ереже қабылдады. Жыл сайын дүииежүзілік тұтынушылардың құқықтарын қорғау күні белгілі бір ұранмен өткізіледі. Биыл «Әділ цифрлық қаржылық қызметтер» ұранымен атап өтілмек.
<blockquote>
 «Дүниежүзілік ұйым бүкіл әлемдегі тұтынушылардың мүдделерін қорғайды. «Тұтынушылардың құқықтарын қорғау туралы» ҚР Заңында арнайы нормалар бекітілген. Аталған заңда тұтынушының өміріне, тауары немесе мүлкіне зиян келген жағдайда келтірілген залалды толық көлемде өтету қарастырылған. Қазіргі таңда интернет арқылы тауар сатып алу барысында алаяқтықтың құрбаны болу жиі кездеседі. Сол себепті ҚР кейбір заңнамалық актілеріне өзгерістер мен толықтырулар енгізілмек», – деді ҚР Сауда және интеграция министрлігі тұтынушылардың құқықтарын қорғау комитетінің Қызылорда облысы бойынша департаментінің басшысы Ерқасым Сүлейменов.
</blockquote>
Сонымен қатар брифинг барысында әлеуметтік желі арқылы тауарларды сатып алу және төлеу кезінде алаяқтыққа ұшырамас үшін техникалық, қаржылық, құқықтық тұрғыдан қаржылық сауаттылықтың керектігі айтылды.
<blockquote>
 «Қаржылық сауаттылық – бірінші кезекте өз ақшаңызды сауатты басқаруды білдіреді. Халықтың қаржылық білімін арттыру тұтынушылардың құқықтарын қорғау жүйесінің негізгі элементі болып табылады. Тауар сатып алу барысында кез келген құжатты мұқият оқып шығыңыз. Егер шартқа қол қоюға күмәндансаңыз арнайы мамандардың көмегіне жүгінген дұрыс», – деді қаржы нарығын реттеу және дамыту агенттігінің Қызылорда қаласындағы өңірлік өкілдер басқармасының бас маманы Мұрат Сарманов.
</blockquote>

Ерқасым Сүлейменов: Интернет арқылы тауар сатып алуда алаяқтықтың құрбаны болу жиі кездеседі

Kyzylorda-news.kz. Облыстық мәслихаттың жұмыс жоспарына сәйкес алдағы уақытта болатын кезекті сессияда «Облыста халықтың әлеуметтік жағынан осал топтарын қорғаудың жайы және оны жақсарту шаралары туралы» мәселе қаралады.
Мәселені сессияға әзірлеу үшін уақытша комиссия құрылып, оның құрамына барлық депутаттар қамтылып және осы салаға қатысты басқарма органдарының басшылары мен тиісті мамандар қатыстырылды. Осы мақсатта облыстық мәслихат хатшысы Н. Байқадамов, Уақытша комиссия төрағасы Г. Есқалиева және комиссия мүшелері мен жауапты басқарма басшылары Арал ауданына барып, аудан әкімдігінде халықтың әлеуметтік жағынан осал топтарын қорғаудың жайы бойынша атқарылған жұмыстарымен және оңалту орталықтарының жағдайымен танысып, соған қатысты мәселелерді жан-жақты талқылады.
Алдымен аудан әкімінің орынбасары Б. Жұмағұлов жоғарыда аталған мәселелер бойынша баяндама жасады. Атап айтар болсақ, Арал ауданы халқының саны 81738 адам, оның ішінде атаулы әлеуметтік көмек алушылар 3426, экономикалық белсенді халық саны 30440 жұмыспен қамтылғандар саны 28910, ал жұмыссыздар саны 1530 адам. Аудан бойынша мүгедектердің саны 2621 адам. Оның ішінде: I топ мүгедектері – 226, II топ мүгедектері – 850, III топ мүгедектері – 1143, мүмкіндігі шектеулі балалардың саны – 402, тұлдыр жетім балалардың саны – 66.
Ағымдағы жылы халықтың әлеуметтік жағынан осал топтарын қорғау бойынша қоғамдық жұмыстарға жергілікті және республикалық бюджеттен қаржы бөлінген болатын. Дегенмен бөлінген қаржы аз, тек бірінші жарты жылдыққа ғана жетеді. Осы мәселеге байланысты аудан әкімінің қолымен қоғамдық жұмыстарды қаржыландыруға облыс әкімінің атына қосымша 200 адамға 144 000,0 мың теңге бөлу туралы хат жолданды.
Арал ауданы бойынша 2022 жылға жүріп тұруы қиын 1 топ мүгедектерінің жеке көмекшілер қызметіне атқарған жұмысының кепілдендірілген құны сағатына 367,56 теңгеден болып белгіленді.
Жыл соңына дейін жеке көмекшілердің қызметақысын үздіксіз төлеу үшін 232 878,0 мың теңге қаржы жұмсалады деп күтілуде. Осы қызмет ақыларын толық төлеу мақсатында 70 180,0 мың теңге қосымша қаржы қажет, – деді аудан әкімінің орынбасары Б. Жұмағұлов.
Хабарлама аяқталған соң, «Осал топтармен жұмыс жасау» қоғамдық бірлестігінің төрайымы А. Итенқызы мүгедектердің жеке көмекшілеріне қатысты пікірін білдірді. Ол облыс бойынша қаржының&nbsp; жеткіліксіз екендігін алға тартып, кезекті облыстық бюджетті нақтылауға облыстық экономика және бюджеттік жоспарлау басқармасына бюджеттік өтінім жолданғанын айтты.
2021 жылдың 12 қазанында ҚР-ның кейбір заңнамалық актілеріне жекеленген санаттағы әлеуметтік қорғау мәселелері бойынша өзгерістер мен толықтырулар енгізілген болатын. Соған байланысты өткен жылдың 1 қарашасынан бастап 1 топтағы мүгедектерді күту жөніндегі&nbsp; арнаулы мемлекеттік жәрдемақы енгізілді. Енді жеке көмекшілердің жеке бағдарламаларын қайта қарау қажет. Әрбір аудандық емханалармен бірге зерттеу жұмыстарын жүргізіп,&nbsp; нақты күтімді қажет ететін адамдарды анықтап, талдау жасау керек, – деді А. Итенқызы.
Одан соң, сөз алған&nbsp; облыстық мәслихат депутаты М. Жұмашев жұмыспен қамтуды үйлестіру және әлеуметтік бағдарламалар басқармасына&nbsp; мүгедектердің көмекшілеріне берілетін жалақыға қатысты&nbsp; мәселені зерттеп, талдау жасау жұмыстарын жүргізу туралы ұсынысын жеткізді.
Одан бөлек, депутаттар тарапынан грант бөлу мәселесі, ерекше балаларға арналған ойын алаңдарын ашу, халыққа тиімді болатын жобалар туралы, әлеуметтік осал топтар бойынша аудандарда оңалту орталықтарын ашу және т.б мәселелер көтерілді.
Отырыс соңында, облыстық мәслихат хатшысы Н. Байқадамов ерекше жағдайдағы жандардың мәселесі мен оңалту орталықтарының мүмкіндігінің жетіспеушілігі басты мәселе болып отырғандығын және алдағы уақытта аталған мәселелер облыстық мәслихат сессиясында қаралатынындығын жеткізді.

Арал ауданында 3426 отбасы атаулы әлеуметтік көмек алады

<a href="https://kyzylorda-news.kz/">Kyzylorda-news.kz.</a>&nbsp;12 наурыз күні Тасбөгет кентіндегі орталық алаңда «Байқоңыр» ӘКК» АҚ және оның серіктестіктерінің ұйымдастыруымен өңірлік тұрақтандыру қорынан алынған әлеуметтік маңызы бар азық-түлік тауарларының жәрмеңкесі өтеді.
<img src="https://kyzylorda-news.kz/wp-content/uploads/2022/03/zharmenke.jpg" alt="" />

Қызылордада жәрмеңке өтеді

<a href="https://kyzylorda-news.kz/">Kyzylorda-news.kz.</a>&nbsp;Бірыңғай жинақтаушы зейнетақы қоры 1 сәуірден бастап біржолғы зейнетақы төлемдері қалай жүзеге асырылатынын түсіндірді, деп хабарлайды <a href="https://lenta.inform.kz/kz/1-sauirden-keyin-birzholgy-zeynetaky-tolemderi-kalay-beriledi-bzhzk_a3909985">ҚазАқпарат</a>.
Биыл 1 сәуірден бастап 2022 жылға есептелген зейнетақы жинақтарының ең төменгі жеткіліктілік шегі күшіне енеді. Бұған дейін Президент Қасым-Жомарт Тоқаевтың тапсырмасын орындау үшін ҚР Үкіметінің 2021 жылғы 13 желтоқсандағы №875 қаулысымен 2021 жылға есептелген төменгі жеткіліктілік шегін қолдану мерзімі 2022 жылдың 1 сәуіріне дейін ұзартылды.
<blockquote>
 «Зейнетақы жинақтарының бір бөлігін пайдалану құқығын іске асыру үшін салымшы тұрғын үй жағдайын жақсарту және (немесе) емделуге ақы төлеу мақсатында алуға қолжетімді зейнетақы жинақтарының бар-жоғына көз жеткізуі тиіс. Мұны enpf.kz сайты немесе БЖЗҚ мобильді қосымшасындағы жеке кабинеттен және egov порталы мен мобильді қосымшасынан көруге болады. Одан әрі салымшы зейнетақы жинақтарының бір бөлігін пайдалану туралы шешім қабылдаған жағдайда, уәкілетті операторлардың интернет-ресурсы арқылы алдын ала өтініш бергені жөн. Бүгінде тұрғын үй жағдайын жақсартуға арналған біржолғы зейнетақы төлемдеріне өтініштер қабылдайтын уәкілетті операторлар: «Отбасы банк» тұрғын үй құрылыс жинақ банкі» АҚ, «Қазақстан Халық банкі» АҚ, «Altyn Bank» АҚ, «Банк ЦентрКредит» АҚ және «Банк Фридом Финанс Қазақстан» АҚ, емделуге «Отбасы банк» тұрғын үй құрылыс жинақ банкі» АҚ болып отыр», – деп жазылған БЖЗҚ хабарламасында.
</blockquote>
Уәкілетті оператор біржолғы зейнетақы төлемін алу туралы өтінішті қарағаннан кейін 2 жұмыс күнінде БЖЗҚ-ға электронды хабарлама жібереді. БЖЗҚ тарапынан алуға қолжетімді қаражат тексеріледі, мұнда уәкілетті оператордан электронды хабарлама келіп түскен күнгі төменгі жеткіліктілік шегі ескеріледі. БЖЗҚ электронды хабарлама келіп түскен күннен бастап, бес жұмыс күні ішінде уәкілетті операторға алушының арнайы шотына біржолғы зейнетақы төлемін аударады.
Назар аударарлық жайт – 2022 жылға арналған төменгі жеткіліктілік шегі 2022 жылдың 1 сәуірінен бастап күшіне енетіндіктен, БЖЗҚ уәкілетті операторлардан БЖЗҚ-ға 2022 жылдың 31 наурызына дейін келіп түскен өтініштер бойынша 2021 жылға есептелген төменгі жеткіліктілік шегіне сәйкес біржолғы зейнетақы төлемдерін жүргізеді.
«Қазақстан Республикасында зейнетақымен қамсыздандыру туралы» Заңда төменгі жеткіліктілік шегі – ҚР Үкіметі бекіткен әдістемеге сәйкес айқындалған міндетті зейнетақы жарналары және міндетті кәсіптік зейнетақы жарналары есебінен қалыптастырылған зейнетақы жинақтарының ең төменгі мөлшері деп айқындалған. Төменгі жеткіліктілік шекті айқындау әдістемесі ҚР Үкіметінің 2013 жылғы 2 қазандағы №1042 қаулысымен (2021 жылғы 6 қаңтардағы өзгерістері мен толықтыруларымен) бекітілген.
Әдістемеге сәйкес, төменгі жеткіліктілік шек мөлшері жыл сайын әр жас үшін есептеледі және болашақ зейнетақы төлемдері мен зейнетақы жарналарының өсуін (индекстелуін) ескереді. Бұл ретте ҚР «Республикалық бюджет туралы» Заңына сәйкес, жыл сайын индекстелетін ең төменгі жалақы, ең төменгі зейнетақы, базалық зейнетақы төлемінің ең төменгі мөлшері сияқты әлеуметтік көрсеткіштер пайдаланылады.
Еске сала кетейік, Бірыңғай жинақтаушы зейнетақы қорының мәліметінше, 2021 жылдың қаңтары мен осы жылдың 1 наурызы аралығында 967 853 қазақстандық зейнетақы жинағының шекті мөлшерден асатын сомасын үй жағдайын жақсартуға алу үшін өтінім берді. Оларға қордан 2,7 трлн теңге қаржы аударылды.
Бұл ретте біржолғы зейнетақы төлемдерінің орташа сомасы 3,1 млн теңге болды. Зейнетақы жинағын алғандардың басым көпшілігі Алматы, Нұр-Сұлтан қалаларының және Маңғыстау облысының тұрғындары.
Сонымен бірге, зейнетақы жинағын бала еміне жұмсауға да рұқсат етіледі.

Қазақстан және Қызылорда облысының жаңалықтары