Kyzylorda-news.kz. Қызылорда облысында жасы жүзден асқан 29 қария бар, оның басым бөлігі – батыр аналар.
Қос ғасыр куәгерлері әлі де тың. Мысалы, 102-ші көктемін қарсы алу бақыты бұйырған санаулы кейуананың бірі – Арал ауданында тұратын Күлмаш Жүрсінбаева.
Өткен ғасырдағы аштық, соғыс зұлматын көріп, бертін келе сауда-саттық саласында тер төккен еңбек және тыл арадагері есеп-қисапқа әлі де жүйрік.
<blockquote>
 “Қиыншылықты да көрдік, жоқшылықты да көрдік. Енді мына кіші баламның қолында отырмын, қара шаңырақта”, – дейді тыл ардагері Ілия Рысқұлова.
</blockquote>
102-ге толған Ілия әжейді күллі Қазалы жұрты қадір тұтады. Қос ғасыр куәгерінің жастық шағы соғыс кезімен қатар келіп, тылда тынбай еңбек етті. Өнегелі әулеттің отын маздатқан шамшырақ ана бейнетпен өткен ғұмырының зейнетіне бөленіп, ұрпақтарының алдында бақытты өмір сүріп келеді.
<a href="https://sputnik.kz/20220313/qyzylorda-oblysy-zhasy-zhuzden-asqan-29-qariya-23478614.html#pv=g%3D23478614%2Fp%3D13640111">Sputnik.kz</a>

Қызылордада жасы жүзден асқан 29 қария тұрады

Kyzylorda-news.kz. Қазақстанда бүгінгі күні қант тапшылығы жоқ. Бұл туралы ҚР Сауда және Интеграция министрлігі хабарлады.
<blockquote>
 “Сауда желілері мен тұрақтандыру қорларында бұл әлеуметтік маңызы бар азық-түлік тауарының қоры кемі 3 айға жеткілікті. Сонымен қатар қант өндірісі жалғасып жатыр, тоқтамайды. Қор толтырылып отырады. Яғни “үш айдан кейін қор таусылады, қант тапшылығы болады” деген ақпарат шындыққа жанаспайды. Елдегі қант өндірісінен бөлек, өзге елдерден импорттау мүмкіндігі бар. Сондықтан ажиотажға ерік бермеуге шақырамыз”,- деді ҚР Сауда және интеграция министрлігінің ресми өкілі Әлішер Өмірзақ.
</blockquote>

Әлішер Өмірзақ: Қант тапшылығы жоқ

Kyzylorda-news.kz. eGov.kz порталына кіру шарттары 14 наурыздан бастап өзгереді.
<blockquote>
 “14 наурыздан бастап eGov.kz порталының пайдаланушылары үшін логин/пароль және бір реттік смс-хабарлама арқылы кіру жеке-жеке қол жетімсіз болады”, – делінген сайт хабарламасында.
</blockquote>
Енді eGov.kz порталындағы деректер екі факторлы аутентификациямен қорғалады.
eGov.kz порталына кіру үшін пайдаланушылар:
• логин / ЖСН енгізу;
• құпиясөзді енгізу;
• мобильді азаматтар базасында тіркелген телефон нөміріне жіберілетін бір реттік СМС-кодты енгізу арқылы кіруді растау қажет. Осылайша қауіпсіздіктің жоғары деңгейі қамтамасыз етіледі.
Электрондық-цифрлық қолтаңба (ЭЦҚ), биометрия және eGov mobile мобильдік қосымшасының көмегімен QR-кодты сканерлеу арқылы кіру аутентификация әдістері өзгеріссіз қалады.
Бұл нені білдіреді?
2FA немесе екі факторлы аутентификация – пайдаланушыны идентификациялау әдісі. Бұл әдіс арқылы сіз өзіңіздің аккаунтыңыздың иесі екеніңізді екі түрлі жолмен растауыңыз керек. Оның көмегімен сіздің деректеріңізге үшінші тұлғаларға қол жеткізу әлдеқайда қиын.
Порталдың қызметтерін пайдалану үшін Азаматтардың мобильді базасында тіркелген белсенді телефон нөмірі болуы керек. Нөміріңіз бұғатталған немесе тіркелмеген жағдайда 1414 нөмірі бойынша call-орталыққа хабарласыңыз немесе eGov.kz жеке кабинетіндегі нөмірді ауыстырыңыз.

Ертеңнен бастап eGov.kz порталына кіру тәртібі өзгереді

<a href="https://kyzylorda-news.kz/">Kyzylorda-news.kz.</a>&nbsp;Кейде адамдар танысына мобильді аударым арқылы ақша аударамын деп, нөмірін қате теріп, қаражатты бөтен біреуге жіберіп қояды. Мұндай жағдайда бейтаныс адамның шотына түскен ақшаны қалай қайтаруға болады? Егер сіздің шотыңызға біреу қателесіп ақша аударса, не істеу керек?
Егер қателесіп ақшаны бейтаныс адамға аударсаңыз
Банк басқа адамның шотына түскен ақшаны сізге кері қайтара алмайды. Мұны істеуге міндетті де емес. Бейтаныс адамға хабарласып, мән-жайды түсіндіріп, ақшаны жіберуін өтінуге болады. Егер ол бас тартса, сотқа ақшаны өндіріп алу туралы талап-арыз бере аласыз. Өйткені Азаматтық кодекске сәйкес, қолданыстағы заңнамада ақшаны алған адамның әрекеті “негізсіз баю” деп саналады.
Бұл ретте сотқа дәлелді айғақтар ұсыну қажет. Мысалы, ақша аударғыңыз келген танысыңыздың телефон нөмірін немесе деректемелерін көрсету. Сондай-ақ ұялы операторға хабарласып, қоңыраулар тізімін сұратуға болады. Сол арқылы бұрын бейтаныс адамға ешқашан телефон соқпағаныңызды, қателесіп ақша жіберіп қойғаннан кейін ғана қоңырау шалғаныңызды дәлелдей аласыз.
Әлгі адам ақшаны сізге қайтармас үшін түрлі айла-амалға баруы мүмкін. Мәселен, ақшаны сіз оған көрсетілген қызмет немесе қайырымдылық ретінде аударды деп өтірік айта алады. Бірақ мұны дәлелдеуі қажет. Егер дәлел болмаса, сот алушыны барлық қаражатты қайтаруға міндеттейді.
Сонымен қатар, сіз Ұлттық банктің қолданыстағы қайта қаржыландыру ставкасы бойынша ақшаңызды пайдаланғаны үшін сыйақы өндіріп алуға құқыңыз бар.
Телефон нөмірінен қателессеңіз
Телефон нөмірі арқылы ақша аудардыңыз, бірақ бір нөмірді қате жаздыңыз делік. Ақшаны банк арқылы қайтарып ала алмайсыз. Ең дұрысы, сол нөмірдің иесіне хабарласаңыз. Ақшаны қателесіп аударғаныңызды түсіндіріп, оны қайтаруын сұраңыз. Сізге сенуі үшін шотын тексеруді өтініңіз. Жөні түзу адам болса, жағдайыңызды түсініп, ақшаны кері жіберуі мүмкін.
Карта немесе шот нөмірінен қате жіберсеңіз
Егер сіз банк картасының немесе шоттың нөмірін қате теріп, ақша аударып қойсаңыз, банкке хабарласып, мән-жайды түсіндіріп, менеджерден ақшаны қалай қайтаруға болатынын біліңіз. Бұл жағдайда банк төлемді біржақты тәртіпте кері қайтара алмайды. Әрбір банктің өз рәсімі бар. Егер ақша басқа шотқа сәтті түссе, оны тек ақшаны алған адамның келісімімен ғана қайтаруға болады.
Егер ақша аудару процесі жүріп жатса, яғни шотқа әлі түспесе, онда операцияны тоқтатуға мүмкіндік бар. Ал егер сіз қате жіберіп, мүлде жоқ банктік деректерді көрсетсеңіз, төлем жасалмайды және ақша автоматты түрде қайтарылады.
Алаяқтарға алданып қалмау үшін не істеу керек
Көбіне алаяқтар банктің атынан шотыңызға ақша түскені туралы SMS-хабарлама жолдап, артынша телефон соғып, ақшаны қайтаруды сұрайды. Сол себепті қайтармас бұрын шотқа шынымен бөтен біреуден ақша түскеніне көз жеткізу қажет. Шотты банктің мобильді қосымшасы немесе банк операторымен ресми нөмір арқылы байланысып тексеруге болады.
Айта кетері, ақша сізге қарыз адамнан немесе жұмыс істейтін компаниядан түсуі мүмкін. Сондықтан ақшаның сізге тиесілі емес екеніне әбден көз жеткізіңіз.
Ақшаның кімнен және қашан түскенін шоттағы үзінді көшірмеден білуге болады. Егер біреу ақшаны қателесіп аударып қойса, ал өзі сізбен байланысқа шықпаса, банкке хабарласыңыз. Ақшаны қайтаруға келісім беру туралы жазбаша өтініш жазыңыз. Содан кейін банк заң бойынша төлемдерді қайтару рәсімдеріне сәйкес кері төлем жүргізеді.
<a href="https://sputnik.kz/20220308/aqsha-qatelesip-boten-adam-23369695.html">Sputnik Қазақстан</a>

Ақшаны қателесіп бөтен адамға аударып қойсаңыз, не істеу керек?

Kyzylorda-news.kz. Қызылорда облысында жол-көлік апатынан екі адам оқиға орнында көз жұмды.
Оқиға 12 наурыз күні «Батыс Европа – Батыс Қытай» тас жолының Шиелі ауданы Сұлутөбе елді мекені тұсында болды.
Екі жеңіл автокөлік соқтығысып, оқиға орнында 2 адам қаза болды.
<blockquote>
 “Аталған дерек бойынша ҚР Қылмыстық кодексінің 345-бабының 4-бөлігі бойынша сотқа дейінгі тергеп тексеру әрекеттері жүргізілуде. Онда автомобильдi басқаратын адамның жол жүрісі қағидаларын бұзып, абайсызда екi немесе одан да көп адамның өлiмiне әкеп соғу жағдайы көрсетілген. Бұл бойынша тиісті сот сараптамасы тағайындалды. Оқиғаның мән-жайы анықталуда”, – деп хабарлады Қызылорда облыстық полиция департаменті.
</blockquote>

Қызылордада 2 адам жол-көлік апатынан көз жұмды

Kyzylorda-news.kz. Оңтүстік циклон Қазақстанның бүкіл аумағына өз ықпалын тигізеді, тек республиканың ең шеткі солтүстігі мен солтүстік-батысы суық антициклон жотасының ықпалында қалады, деп хабарлайды Қазгидромет.
Жоғары температуралық контрасттар мен көлденең қысым градиенттерінің жоғарылауы аясында Қазақстан Республикасының аумағында фронтальды аймақ қалыптасады. Осыған байланысты, жауын-шашын жауады, солтүстікте қар жауып жаяу бұрқасын күтіледі, республиканың оңтүстік жартысында көбінесе жаңбыр түрінде, оңтүстіктің, оңтүстік-шығыс және шығыстың таулы аймақтарында қатты жауын-шашын жауып, көктайғақ болады. Республика бойынша жел күшейіп, тұман күтіледі.
Қызылорда облысының солтүстігінде – көктайғақ, тұман, күндіз облыс орталығында желдің 15-20 м/с күшеюі күтіледі.

13 наурызға арналған ауа райы болжамы

Kyzylorda-news.kz. Облыс әкімі Гүлшара Әбдіқалықованың аудандардағы жұмыс сапары Қармақшы ауданында аяқталды.
Алдымен облыс әкімі Жосалы ауылдық округінде тұрғындармен кездесті. Ауыл халқы бақша өнімдерін тікелей айналысатындықтан ақсақалдар жүздесу барысында аяқ су мәселесін шешуге ықпал етуді сұрады. Өңір басшысы биылғы су деңгейінің төмен дәрежеде түсуіне байланысты ауыл азаматтарымен бірге әрбір мәселені пысықтап алу қажет екенін жеткізді.
Елді-мекендерді аралау барысында аймақ басшысы шаруалармен кездесіп, егін егу және мал басын аман сақтау мәселесіне қатысы өзекті ұсыныстарды арнайы жиында талқылады. 
Отырыста аудан әкімі Әділбек Ерсұлтанов бірінші кезектегі басымдықтарды тізбелеп, өткен жылы егіске пайдаланылатын суармалы судың тапшылығына байланысты «Батыс Қармақшы» қашыртқысынан «Құрайлы» каналының П309 пикетіне қосымша су жеткізу үшін ұзындығы 11 шақырымды құрайтын канал қазылғанын жеткізді. Сондай-ақ, сала мамандары биылғы су түсіміне байланысты болжамды баяндап, күріштіктің егіс көлемін қысқарту және каналарды тазарту, насос қондырғысын орнату ісі таяу арада басталатынын жеткізді. Ал, бірнеше шаруа қожалықтарының иелері аудан үшін өзекті мәселелерін жеткізді.
Жиынды қорытындылаған аймақ басшысы су көлемінің лимиті белгіленгенге дейін аудандағы ауылдардың қажеттілігін қайта қарап, шаруалармен бірге суды аз қажет ететін дақылдарға мән беріп, малға қажетті жем-шөп қорын алдын ала әзірлеп, ветеринар мамандарға қыстан шыққан төрт түліктің жағдайына қарай дәрі-дәрмек егу жұмыстарын қарқынды жүргізуді тапсырды.
<blockquote>
 Биыл Көксарай су реттегішіне су жиналмау қауіпі бар. Бұл былтырғымен салыстырғанда су көлемі 2 млрд. текше метрге кем болады деген сөз. Қолда бар мүмкіндікке қарай әрекет жасау үшін әр аудан бойынша жоспар құрылып, мамандар жұмыс істейтін болады. Үкімет деңгейінде шешілетін мәселе екен деп қарап отырмай, каналдарды тазалап, насос қондырғыларын орнатып, егіске әртараптандыру жолын әкелуде тәжірибелеріңізді қосып, күш біріктіруіміз керек. Үкіметтің резерв қаржысы мен бюджеттен қаражат бөлінеді. Тек уақыт ұттырмай тиімділігіне қарай жұмыс қарқынын ұлғайтуға тиіспіз,-деді Гүлшара Әбдіқалықова.
</blockquote>
Мұнан кейін аймақ басшысы Қуаңдария ауылдық округіндегі 100 орындық клубтың құрылысы барысымен танысты. Мердігер мекеме – «Ахат+ГС» ЖШС құрылыс жұмыстарын өткен жылы бастап, биыл қыркүйек айында аяқтайды деп жоспарлауда. Ғимарат ішінде акт залы, оқырмандар бөлмесі мен әкімшілік бөлмелері қарастырылған. Облыс әкімі мердігерге сапалы құрылыс материалдарына жете мән беріп, нысанды уақытылы аяқтауға күш салу қажет екенін баса айтты.
Әрі қарай облыс әкімі Т.Көмекбаев және Алдашбай ахун елді мекендерінің тұрғындарымен кездесіп, ұсыныс-пікірлерін тыңдады. Ауыл ақсақалдары шағын ауылға балабақша салу, инфрақұрылым тарту және аяқ су тапшылығына қатысты өзекті ұсыныстарын жеткізді. 1397 тұрғыны бар Т.Көмекбаев ауылында 256 қожалық бар. Мұнда да егін мен мал шаруашылығын дамыту өзекті. Аймақ басшысы облыс бюджетінен Қармақшы ауданына 3 насос қондырғысын алуға қаржы қаралғанын, Үкімет резервінен тағы 17 насос қондырғысын алу жоспарда бар екенін жеткізіп, арнаға келетін суды бөлу ісінде ауылдардың нақты жағдайы ескерілетінін еске салды.
Айта кетейік, облыс әкімі Байқоңыр қаласында салынып жатқан 50 пәтерлік 5 көпқабатты тұрғын үй құрылысын көріп, мердігерлермен пікірлесті. Құрылыс алаңында жүріп жатқан жұмыстарды бақылап, нысанды сапалы әрі уақытылы аяқтауды тапсырды.
<img src="https://kyzylorda-news.kz/wp-content/uploads/2022/03/fb_img_1647085173012.jpg" alt="" />
<img src="https://kyzylorda-news.kz/wp-content/uploads/2022/03/fb_img_1647085167646.jpg" alt="" />
<img src="https://kyzylorda-news.kz/wp-content/uploads/2022/03/fb_img_1647085163731.jpg" alt="" />

Гүлшара Әбдіқалықова Қармақшы ауданына жұмыс сапарымен барды

Kyzylorda-news.kz. Алматы қаласында жалпы білім беру ұйымдарының оқушылары арасында “Жыр алыбы – Жамбыл” атты республикалық жас ақындар айтысы өтті.
Жыл сайын дәстүрлі түрде өткізілетін айтысқа өңіріміздің атынан қатысқан Шиелі ауданы №206 орта мектебінің 10 сынып оқушысы Ержігітова Дильназ дарынымен дараланып, бас жүлдені жеңіп алды.
Қазақтың төл өнері айтысқа оқушыны әкесі Асхат Амиров дайындаған. Оның айтуынша, Дильназ төл өнерімізді жастайынан меңгерген. Ол қызының алар асуы әлі де биік екендігіне сенімі мол.
Айта кетейік, еліміздің түкпір-түкпірінен жиналған жас айтыскерлердің арасынан оқ бойы оза шапқан Дильназ бұл кезге дейін де түрлі додаларда жеңіске жетіп, ауданның ғана емес, аймақ абыройын асқақтатуда.

Қызылордалық оқушы жас ақындар айтысында бас жүлде алды

Kyzylorda-news.kz. ҚР Бас прокуратурасы Иманғали Тасмағамбетовке қатысты тексеру жүргізіп жатқан жоқ. Бұл туралы аталған ведомствоның баспасөз қызметінен мәлім етті, деп хабарлайды ҚазАқпарат.
<blockquote>
 «Әлеуметтік желілерде Бас прокуратураның ведомствоаралық жедел-тергеу тобы Иманғали Нұрғалиұлы Тасмағамбетовке қатысты оның «Астана LRT» ЖШС-дағы ұрлыққа қатыстылығы фактісі бойынша тексеру жүргізіп жатқаны туралы хабарлама таратылуда. Бас прокуратура бұл мәліметтердің шындыққа сәйкес келмейтінін хабарлайды. Азаматтарды тек ресми ақпарат көздеріне сенуге шақырамыз», – делінген Бас прокуратура мәліметінде.
</blockquote>

Иманғали Тасмағамбетовке қатысты тексеру жүргізіліп жатқан жоқ &#8211; Бас прокуратура

Kyzylorda-news.kz. ҚР Парламенті Сенатының депутаттары М. Бақтиярұлы мен А. Әлназарова және облыстық мәслихат хатшысы Н. Байқадамов алдымен Жалағаш ауданында орналасқан «Агро Холдинг Қызылорда» ЖШС-нің жұмысымен танысты. Сонымен қатар, аудандық шаруашылық басшыларымен және облыстық, аудандық мәслихат депуттарымен кездесті. Кездесуде «AMANAT» партиясынан сайланған облыстық мәслихат депутаты И. Шағыртаев, «AMANAT» партиясынан сайланған аудандық мәслихат депутаты Ә. Бекжанов т.б егінге байланысты тыңайтқыштар бағасының күрт өсуі мен субсидиялау, егістікті әртараптандыру және т.б мәселелер туралы ашық ой-пікір алмасып, әңгіме өрбітті.
Одан кейін, Жалағаш аудандық аурухана жұмысымен танысып, денсаулық сақтау саласындағы өзекті мәселелер талқыға салынды.
Бүгінде адамның өмірі мен денсаулығы – мемлекеттің басты байлығы. Осы ретте денсаулық сақтау саласын нығайту кез келген мемлекеттік негізгі міндеті екені анық. Салаға көрсетілген қолдаудың нәтижесін аудан медицинасынан-ақ аңғаруға болады. 2020 жылы халыққа ең қажетті нысандардың бірі жаңадан салынған 100 төсектік аурухана пайдалануға берілді. Жалпы құны 3,9 млрд теңгені құрайтын жаңа ғимарат заманауи құрылғылармен жабдықталған. Аудандық аурухананың ашылуы көптеген аурулардың алдын алуда кездесетін мәселелердің түбегейлі шешілуіне мүмкіндік берді. 100 төсектік аурухана үш қабаттан тұрады. Аурухана құрылымына 1 терапия, 1 хирургия, 1 реанимация, 1 босану-гинекология, 1 балалар бөлімі, 1 асхана, 2 операциялық блок, қайта қалпына келтіру бөлімшелері кіреді. Аталмыш ауруханада 90 дәрігер, 432 орта буын қызметкер жұмыс істейді.
Іс-сапар Сырдария ауданында жалғасып, ҚР Парламенті Сенатының депутаттары мен облыстық мәслихат хатшысы Сырдария ауданындағы «Углесбыт» ЖШС-нің күріш ақтау зауытына барды. Зауытта аудандық шаруашылық басшыларымен және аудандық мәслихат депутаттарымен кездесіп, бірқатар мәселелерді талқылады.&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; &nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;
Сапар соңында, Шіркейлі ауылдық округіндегі апаттық жағдайдағы фельдшерлік-амбулаториялық пункттің жұмысын көрді. Бұл медициналық ғимарат «ҚайсарСтройЭксперт» ЖШС-нің мамандарымен берілген техникалық қорытындысына сай, аталған ғимаратты одан әрі пайдалану науқастар мен жұмыскерлердің өміріне қауіп тудырады және нысанды мақсатына қарай пайдалануын тоқтату ұсынылып, жағдайы төтенше деп тұжырымдалған.
Барлық көтерілген мәселелер жөнінде Парламент депутаттарына жазбаша анықтама беріліп, олар өз тараптарынан орталық билік органдарына сауал жасап, &nbsp;мәселелердің шешімін табу бағытында жұмыстар жүргізетіндерін жеткізді.
Алдағы уақытта құрылыс мәселесіне байланысты Парламенттік тыңдау өткізіледі. Тыңдауға сәйкес, ағымдағы жылдың 25 наурыз күні, сағат 10:00-де қалалық мәслихатта Парламент депутаттарының қатысуымен құрылыс материалдарының қымбаттауы, жергілікті жердегі құрылыс саласындағы өзекті мәселелерге орай құрылысшылармен кездесу болады.

Сенат депутаттарының жұмыс сапары Жалағаш және Сырдария ауданында жалғасты

Kyzylorda-news.kz. «Сенімен Болашақ» Республикалық ата-аналар қоғамдық бірлестігі мен Қызылорда облысы әкімдігінің ұйымдастыруымен еліміздегі ата-аналар қоғамдастығы арқылы саналы ата-ана мәдениетін қалыптастыру мақсатында Қызылорда қаласында «Ата-ана-ұстаз-оқушы: болашаққа бағытталған ынтымақтастық» атты аймақтық ата-аналар форумын өткізді.
Форумның мақсаты – Баланың кемел адам болып қалыптасуында ата-ананың рөлін айқындау. Сонымен қатар елімізде көп талқыланатын тақырыптың бірі – педагог статусы мен мұғалімнің әлеуметтік жағдайының жақсаруына үн қосу. 
Ауқымды іс-шараға тіркелу оффлайн-онлайн түрде жүзеге асырылды. 
Форум үш бөлімнен тұрды: Пленарлық отырыс, Бала тәрбиесіне қатысты семинар-тренингтер, 
Ата-аналармен сұхбат.
Форум жұмысына ҚР Парламенті Мәжілісінің депутаты Саясат Нұрбек, ҚР Ақпарат және қоғамдық даму министрлігі жастар және отбасы істері комитеті төрағасының орынбасары Дамир Жүнісов, Қызылорда облысы әкімінің орынбасары Балжан Шаменова, Қызылорда облыстық мәслихатының хатшысы Наурызбай Байқадамов, Нұркен Асанов – «Сенімен Болашақ» Республикалық ата-аналар қоғамдық бірлестігінің құрылтайшысы, қоғам қайраткері Нұркен Асанов, ата-аналар, үкіметтік емес ұйымдар және т.б. қатысты.
Шараның пленарлық отырысын «Сенімен Болашақ» Республикалық ата-аналар қоғамдық бірлестігінің төрағасы Рақымбек Жолаев жүргізіп отырды.
Сонымен қатар, қатысушы ата-аналар мен қонақтарға тақырыптық спикерлердің қатысуымен төмендегідей семинар-тренингтер өткізді: 
1) Бала тәрбиесіндегі эксперт-маман, педагог Елжас Ертайұлы «Бақытты бала химиясы» тақырыбында; 
2) «Сенімен Болашақ» Республикалық ата-аналар қоғамдық бірлестігі Түркістан облыстық филиалының директоры Ақбаян Жакипова «Буллинг жəне кибербуллингті болдырмауда ата-ананың рөлі» тақырыбында; 
3) Қорқыт ата атындағы Қызылорда университетінің профессоры Рабиға Игенбаева «Еркін тəрбие: проблемалар мен шешу жолдары» тақырыбында өз ойларымен бөлісті.
Шара соңында сарапшы мамандар ата-аналардың сұрақтарына жауап беріп, кері байланыс жұмыстарын жүргізеді. Шараға еліміздің барлық облыстарынан зум платформасы арқылы ата-аналар қатысты.
<img src="https://kyzylorda-news.kz/wp-content/uploads/2022/03/img-20220312-wa0015.jpg" alt="" />
<img src="https://kyzylorda-news.kz/wp-content/uploads/2022/03/img-20220312-wa0014.jpg" alt="" />

Қызылордада ата-аналар форумы өтті

<a href="https://kyzylorda-news.kz/">Kyzylorda-news.kz.</a> Дүниежүзілік денсаулық сақтау ұйымының (ДДСҰ) мәліметі бойынша әлем халқының шамамен 30%-і аллергиядан зардап шегіп отыр, ал отыз жылдан кейін олардың қатары айтарлықтай артып, әрбір екінші адам аллергик атануы мүмкін. Маусымдық аллергия қай кезде пайда болады және бұл ауруды түбегейлі емдеуге бола ма?
Бүгінгі күні аллергия ХХІ ғасырдың ең жылдам өршіп келе жатқан дерті деп аталады. Бұл ауру жас талғамайды. Мамандар мұндайжаппай аурудың негізгі себебі ретінде иммундық жүйенің теңгерімсіздігін атады.
<blockquote>
 “Аллергия – бұл бізді қоршап тұрған заттарға қатысты иммундық жүйенің жағымсыз реакциясы. Бұл немен байланысты? Бұл иммундық жүйенің дисфункциясы. Неліктен аллергия көп кездесіп жатыр? Ал бұл өркениеттің дамуына, табиғат тіршілігіне белсенді араласуға, ауаның ластануына, өмірімізге химияның кеңінен енуіне байланысты туындап отыр”, – дейді аллерголог-иммунолог Ғалия Түсіпбекова.
</blockquote>
Маманның айтуынша, дәрі-дәрмекті оңды-солды қолдану да иммундық жүйенің теңгерімсіздігін тудырып, аллергияға бейімділікке алып келуі мүмкін.
Ғалия Түсіпбекова ауру асқынған кезде азық-түлікке өте мұқият болу керек екенін ескертті. Себебі олардың арасында аллергиялық реакцияларды күшейтетін өнімдер болады.
<blockquote>
 “Аллергиялық реакцияны күшейтетін немесе дербес тудыра алатын тағамдар бар. Оған цитрус жемістері, тәттілер, газдалған сусындар, консерві өнімдері, ащы, тұзды, қуырылған және ысталған тағамдар жатады”, – деді дәрігер.
</blockquote>
Маусымдық аллергияның үш кезеңі
Мамандар өсімдіктердің гүлдеуінен болатын маусымдық аллергия немесе поллиноз үш кезеңде өтетінін айтады. Олардың біріншісі көктемде, сәуір айының аяғында, қандыағаш, қайың және басқа да ағаштар гүлдеген кезде басталады. Екіншісі мамырдан маусымға дейін созылады. Бұл кезде ауада терек, шалғындық және көгалды шөптер тозаңы таралады. Үшінші кезең шілде айының ортасында басталып, қыркүйекке дейін созылады. Яғни бұл жусан, көкпек, жолжелкен және басқа да арамшөптердің гүлдену кезімен тұспа-тұс келеді.
<blockquote>
 “Полиноз өсімдіктің бір түрінен немесе бірнеше өсімдіктен туындауы мүмкін. Адам көктем-жаз-күзгі кезеңнің барлық уақытында аллергиядан зардап шегуі оның өмір сүру сапасын төмендететіні анық”, – дейді маман.
</blockquote>
Маусымдық аллергияны ертерек емдеу керек
Дәрігерлер маусымдық аллергияға алдын ала дайындалып, осылайша аллергиялық реакциялардың ағымын жеңілдетуге болатынын айтады. Ол үшін өсімдіктердің гүлдену кезеңіне дейін мамандардың көмегіне жүгініп, арнайы емдеу курсынан өту керек.
<blockquote>
 “Гүл ашпайтын кезеңде емделу қажет. Бұл аллерген түріне байланысты болады. Емдеуді жыл бойы жүргізуге болатын еуропалық аллергендер бар. Біздің республикада ресейлік-қазақстандық аллергендер тіркелген. Оларды қабылдауды ауру асқынғанға бір-бір жарым ай қалғанда аяқтау керек”, – дейді Ғалия Түсіпбекова.
</blockquote>
Маман атап өткендей, бұл ауруды емдеу курсында науқастың ағзасына қоздырғыш аллергендер дозасы біртіндеп енгізіледі. Емдеуші аллергендер инъекция, дәрі, тамшы, спрей түрінде болады.
Маусымдық алларгияның симптомдарын қалай жеңілдетуге болады
Гүлдену кезеңінде тек симптоматикалық емдеу жүргізіледі. Маман аурудың күрделілігіне байланысты жергілікті және/немесе жалпы әсер ететін аллергияға қарсы препарат тағайындайды. Бұл антигистаминдер, гормонды, қан тамырларын тарылтатын, сіңіргіш құралдар болуы мүмкін. Дәрі-дәрмек бүкіл гүлдену кезеңін қамтитын мерзімге тағайындалады.
<blockquote>
 “Адам аллергиялық ауру асқынған кезде келсе, біз аурудың ауырлығына қарай ем тағайындаймыз. Аллергия қатты өршіген кезде гормонды препараттар тиімді деп саналады. Егер адам маусымдық аллергияға шағымданып келсе, онда аллерген өсімдіктердің гүлдену кезеңін толық қамтитын емдеу курсын белгілейміз”, – деп түсіндірді дәрігер.
</blockquote>
Аллергияны түбегейлі емдеу мүмкін бе?
<blockquote>
 “Адамды осы дертпен өмір сүруге, оны бақылауда ұстауға бейімдеу керек. Дұрыс әдісті қолданса, аллергияның ауыр өтуін бәсеңдетуге болады”, – дейді аллерголог.
</blockquote>
Елордалық дәрігер Ғалия Түсіпбекованың айтуынша, егер аллергия созылмалы болса, онда оны толығымен емдеу мүмкін емес. Дегенмен ұзақ мерзімді ремиссияға қол жеткізуге мүмкіндік бар.
<a href="https://sputnik.kz/20220311/allergiya-dariger-kenes-23439906.html">Sputnik Қазақстан</a>

Қазақстан және Қызылорда облысының жаңалықтары

Қызылордада жасы жүзден асқан 29 қария тұрады

Әлішер Өмірзақ: Қант тапшылығы жоқ

Ертеңнен бастап eGov.kz порталына кіру тәртібі өзгереді

Ақшаны қателесіп бөтен адамға аударып қойсаңыз, не істеу керек?

Қызылордада 2 адам жол-көлік апатынан көз жұмды

13 наурызға арналған ауа райы болжамы

Гүлшара Әбдіқалықова Қармақшы ауданына жұмыс сапарымен барды

Қызылордалық оқушы жас ақындар айтысында бас жүлде алды

Иманғали Тасмағамбетовке қатысты тексеру жүргізіліп жатқан жоқ – Бас прокуратура

Сенат депутаттарының жұмыс сапары Жалағаш және Сырдария ауданында жалғасты

Қызылордада ата-аналар форумы өтті

Аллергияны қалай жеңуге болады?

Қазақстан және Қызылорда облысының жаңалықтары

Қызылордада жасы жүзден асқан 29 қария тұрады

Әлішер Өмірзақ: Қант тапшылығы жоқ

Ертеңнен бастап eGov.kz порталына кіру тәртібі өзгереді

Ақшаны қателесіп бөтен адамға аударып қойсаңыз, не істеу керек?

Қызылордада 2 адам жол-көлік апатынан көз жұмды

13 наурызға арналған ауа райы болжамы

Гүлшара Әбдіқалықова Қармақшы ауданына жұмыс сапарымен барды

Қызылордалық оқушы жас ақындар айтысында бас жүлде алды

Иманғали Тасмағамбетовке қатысты тексеру жүргізіліп жатқан жоқ &#8211; Бас прокуратура

Сенат депутаттарының жұмыс сапары Жалағаш және Сырдария ауданында жалғасты

Қызылордада ата-аналар форумы өтті

Аллергияны қалай жеңуге болады?

Иманғали Тасмағамбетовке қатысты тексеру жүргізіліп жатқан жоқ – Бас прокуратура