<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда қаласы Абай даңғылының бойындағы көпқабатты үйден өрт шықты.
Өрт облыс орталығындағы Абай даңғылы 33 үйдің 2-қабатындағы пәтерлердің бірінен шыққан. Оқыс оқиға орын алған жерге жеткен құтқарушылар 27 литрлік 2 газ баллонын қауіпсіз жерге шығарып үлгерген. Пәтердегі ас бөлмесі мен жатын бөлмедегі жиһаздар түгел жанып кеткен.
<blockquote>
 «Өрт болған кезде үйдің иелері болмаған. Қожайыны осы үйдің бесінші қабатында тұрады. Өрт кеш хабарланған. Сондықтан оқиға орнына өрт сөндірушілер жылдам жеткенімен, үйдегі жиһаздарды сыртқа шығара алмады», деп мәлім етті Өрт сөндіру және авариялық құтқару жұмыстары қызметінің мамандары.
</blockquote>
Өртенген үйді көпбалалы отбасы паналаған. Бұл пәтерді көпбалалы ана Әлия Рахметоваға туысы уақытша тұруға берген. Бұл туралы Қызылорда қалалық тұрғын үй инспекциясы бөлімінің мамандары мәлімдеді.
Мамандардың айтуынша, көпбалалы ана тұрғын үй кезегінде бар. Қазіргі таңда ол кезек бойынша 89 болып тұр. Алдағы уақытта пәтер беру жоспарланған.

Қызылордада көпқабатты тұрғын үйден өрт шықты

<a href="https://kyzylorda-news.kz/ru/obshestvo/">Kyzylorda-news.kz</a>. Қазақстанда жануарларға қатысты жаңа заң жобасы әзірленді. Соның аясында қылмыстық жазаны барынша күшейту жоспарланған, деп хабарлайды&nbsp;<a href="https://sputnik.kz/">Sputnik Қазақстан</a>.
Қазіргі кезде Қылмыстық кодексте 316-бап бар. Оған сәйкес, жануарды қатыгездікпен өлтіргені үшін 120 айылық есептік көрсеткіш (350 040 теңге) көлеміндегі айыппұл не 120 сағатқа дейiнгi мерзiмге қоғамдық жұмыстарға тарту немесе 30 тәулікке дейін қамауға алу жазасы қарастырылған.
Енді бұл жазаны тек жануардың мертігуіне әкеліп соққан әрекеттер кезінде ғана қолдану ұсынылып отыр. Ал жануар өліп қалса, айыппұл 200 айлық есептік көрсеткішке (583 400 теңге) дейін көтеріледі. Қамау мерзімі 50 тәулік болады.
Орман шаруашылығы және жануарлар дүниесі комитеті төрағасының орынбасары Данияр Тұрғамбаевтың айтуынша, қылмысты адамдар тобы немесе алдын ала сөз байласу арқылы жасаған жағдайда бір жылға дейін бас бостандығынан айыру жазасын енгізу ұсынылды.
<blockquote>
 «Егер бірнеше адам алдын ала сөз байласу арқылы бұқаралық ақпарат құралдарын немесе телекоммуникациялық желілерді қолданып, көпшіліктің алдында жануарларға бірнеше рет жауыздық жасаса 1 000 айлық есептік көрсеткіш (2 917 000 теңге) көлемінде айыппұл салу қарастырылған. Сондай-ақ бір жылға бас бостандығынан айыру жазасы бар», – деді Тұрғамбаев брифингте.
</blockquote>
Қазіргі кезде мәжіліс депутаттары жаңа заң жобасын қарауға кірісті. Құжат жаңа жылға дейін қабылданады деген жоспар бар.

Қазақстанда үй жануарын азаптап өлтірген адам бір жылға қамалады

<a href="https://kyzylorda-news.kz/ru/obshestvo/">Kyzylorda-news.kz</a>. «Туған елге тағзым» өлкетану-зерттеу экспедициясы аясында Зияткерлік мектеп оқушыларының ғылыми жобалар сайысы өз мәресіне жетті. 400-ден астам оқушылардың басын қосқан желілік додаға сыр бойылық өрендер 22 зерттеу жұмысын ұсынды.
<blockquote>
 «Мектепішілік кезеңде барлығы 47 жұмыс қаралды. Ең үздіктері желілік байқауға жолданды. Оқушылардың ғылыми еңбектері мен өнертабыстары өңірдің дамуына, әртүрлі салалардың жандануына арналған», – дейді мектеп директорының орынбасары Ләззат Абдраимова.
</blockquote>
12-сынып оқушысы Баянсұлу Төлебай медицина қызметкерлеріне көмекші бола алатын робот құрастырса, 11-сынып оқушысы Даяна Хегай ауылшаруашылық саласына қажетті тыңайтқыштарды, тұқымдарды шашатын көпфунционалды ұшу аппаратының прототипін жасады.
<blockquote>
 «Бұл қондырғы өсімдіктер ауруын және өрттердің алдын-алуда диханшыларға үлкен көмекші бола алады. Көп энергияны қажет етпейді және үлкен аумақтарды бүркуде өте тиімді», – дейді жас өнертапқыш.
</blockquote>
Судың сапасын жақсартуда және өндірістік суларды тазартуда 12-сынып оқушысы Зарина Айсауытова өзінің оңтайлы шешімін ұсынды. Яғни кальций силикатының золін вакуммда өңдеу және оның мыс катиондарын сорбциялау қасиетін зерттей отырып, экономикалық және экологиялық тұрғыдан тиімді әдісін ойлап тапты. 
Ал Аділет Сәду мен Жібек Айдарбекова биометриялық параметрлер арқылы науқастарды сәйкестендіру әмбебап құрылғысын бағдарламалады. Оны алдағы уақытта жедел жәрдем көліктерінде орнатып, алғашқы көмек көрсетуде пайдалануға болады.
<blockquote>
 «Бұл экспедиция әрбір қатысушының зерттеушілік дағдыларын арттырып, қоғам үшін маңызды проблемаларға бей-жай қарамай, оларды шешуге үлесін қосуға тәрбиелейді. Жас зияткерлер бірі-бірімен тәжірибе алмасып, ғалымдардың сұхбаттасып, білімдерін кеңейтті», – дейді Жібек Айдарбекова.
</blockquote>
Байқауда «Селт еткізер, ерен ой» бағыты бойынша сайысқа түскен Жангерей Зинелов «Туған өлкем» шығармашылық туындысын таныстырды. Бұл композицияда жас зияткер Қазақ АКСР-ның алғашқы астанасы болған Қызылорданың тарихы мен даму бағыттарын түрлі-түсті бояулар арқылы жеткізе білді.
<blockquote>
 «Картинадағы «Сыр ана» монументі көпұлтты өңірдің бірлігін сипаттаса, тарихи ескерткіш – темір жол вокзалы қаланың сәулетін бейнелейді. Ал «Қорқыт Ата» мемориалдық кешені, зымыран, Сырдария өзені және күріш алқаптарын үйлестіру арқылы мен Сыр өлкесінің мәдени, рухани және экономикалық байлығын көрсеттім. Бұл туынды арқылы мен өзімнің туған өлкеме деген ыстық ықыласымды жеткізгім келді», – дейді жас суретші.
</blockquote>
Сондай-ақ қызылордалық зияткерлер Сығанақ, Жанкент қалашықтарындағы тың зерттеулерімен, Аралды қайта қалпына келтіру, еліміздің экономикасын әртараптандыру және Қызылорда өңірінің экологиялық мәселелерін шешу бағытында идеяларымен бөлісті.
Айта кетейік, қатысушылар «Ұлы дала өркениеті», «Туған өлкем – жұмақ мекен!», «Ұлт руханияты – бабалар аманаты», «Инновациялық даму», «Жасыл планета», «Әлеуметтік кәсіпкерлік және жаңа идеялардың күші», «Біздің күшіміз – бірлікте» бағыттары бойынша өнертабыстарын таныстырды. Сонымен қатар «Туған жер – тұғырым» тақырыбында ЭССЕ жазып, өз өлкесі жайлы құнды деректермен бөлісті.
<img src="https://kyzylorda-news.kz/wp-content/uploads/2021/10/3d5666a8-63ee-459e-b85a-a12248d1e361.jpg" alt="" />
<img src="https://kyzylorda-news.kz/wp-content/uploads/2021/10/61a469bd-77dc-4758-a860-4f8e902a25a1.jpg" alt="" />
<img src="https://kyzylorda-news.kz/wp-content/uploads/2021/10/b26f1305-a726-4ddb-b61c-2c9b358c3ca2.jpg" alt="" />
<img src="https://kyzylorda-news.kz/wp-content/uploads/2021/10/3d04aa11-d945-49fd-bece-b6258100a514.jpg" alt="" />

Қызылордалық өнертапқыштар жобаларын желілік байқауда таныстырды

**<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Тәжікстан Республикасы Президентінің Жарлығымен Республика Тәуелсіздігінің 30 жылдығына және қызметтік борышын орындау кезінде танытқан ерлігі мен жанқиярлығы үшін кіші сержант Батырқанов Раджан Армияұлы *қайтыс болғаннан кейін*** *1-ші дәрежелі «Спитамен» орденімен наградталды.*
Тәжікстанның бауырлас халқы 1993-2001 жылдар аралығында тәжік-ауған шекарасында әскери борышын өтеген Жеке құрама атқыштар батальонының әскери қызметшілері көрсеткен ерлігін еске алып, құрмет тұтады.
Батырқанов Раджан Армияұлы (1975-1994) жауынгер-интернационалист, батыр-шекарашы. Жеке қазақстандық құрама батальоны Күршім взводының құрамында қызмет атқарды.
1994 жылы 28 қыркүйекте Хорог шекара жасағының учаскесінде тәжік оппозициясының екі жүзден астам Хаким бастаған содырлары Висхоров шатқалындағы 5-ші және 6-шы шекара заставаларының түйіскен жерінен бұзып өтуге тырысты.
Бұл ұрысқа қазақстандық құрама батальонның жеке құрамы белсене қатысты.
Хаким содырлары 9 жүк көлігі және екі «УАЗикпен» Калай-Хумб ауданының орталығы арқылы Ауғанстан Ислам мемлекетіне өту ниетімен мемлекеттік шекара сызығының бойындағы Хорог бағытына бет алды. Лектің қозғалысын «Қара қол» лақап атымен белгілі болған содыр басқарды (кейіннен «Хаттаб» деп танылған халықаралық террорист, 1995 жылдан 2002 жылға дейін Шешенстандағы Ресей федералды күштеріне қарсы соғысқа қатысқан шешен сепаратистерінің жетекшісі).
Бұл ұрыста Р. Батырқанов қарулы содырлармен болған қиян-кескі шайқасқа бірінші болып кірді. Өз өмірінің құнымен қаруластарын құтқарып қана қоймай, ұрыста жеңіске жетулеріне жол ашты.

Тәжікстан Президенті қазақстандық шекарашыны наградтады

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Сексен бес жылдық тарихы бар, сұранысқа сай сапалы кадр даярлау ісінде өзіндік орны қалыптасқан білім ордасы өткен жылды маңызды жетістіктермен қорытындылады. Университет Қазақстан Республикасының үздік жоғары оқу орындарының ондығына кіреді. Қазақстанның үздік көпбейінді жоғары оқу орындарының ұлттық рейтингісінде 8-орында. Ал сұранысқа ие жоғары оқу орындары Ұлттық рейтингісінде 7-орында. Бұл туралы университеттің басқарма төрағасы-ректор Бейбіткүл Кәрімова 2020-2021 оқу жылында атқарған жұмыстары туралы есепті кездесуінде баяндады.
Бүгінде оқу орнында бакалавриат бойынша 7300 студент, магистратура бойынша 719 магистрант, докторантура бойынша 34 докторант білім алады. Студенттер контингентін қалыптастыру мақсатында жүйелі жұмыс жасау үшін 2020 жылы арнайы Рекрутинг орталығы ашылды. Нәтижесінде білім алушылардың жалпы контингенті 8053 адамға дейін ұлғайып, өсу 52%-ды құрады.&nbsp;
Бәсекеге қабілетті, қазіргі уақыт талабына сай маман даярлау үшін оқу орнында жаңа бастамалар жүзеге асуда. Өңірге қажетті мамандарды даярлау және жаңа мамандықтар Атласы бойынша 2023-2025 жылдарда пайда болатын жаңа мамандықтарға оқу үдерісінде шетелдік тәжірибеге талдау жасай отырып 6 инновациялық, 1 бірлескен және 49 жаңаланған білім бағдарласы&nbsp; әзірленіп, Реестрге енгізілуде.
<blockquote>
 «Университеттің ғылыми зерттеу жұмысын жалпы қаржыландыру көлемі өткен жылмен салыстырғанда 20 пайызға өсті. Биыл университетте жас оқытушыларды ғылыми-зерттеу қызметіне тарту мақсатында алғаш рет жас ғалымдардың ғылыми-зерттеу жұмыстарының конкурсы өткізілді. Байқау нәтижесінде 4 жоба жалпы көлемі 10 млн көлеміндегі университет грантын иеленді», – деді Б.Кәрімова.
</blockquote>
Білім ордасының ғалымдары облыс экономикасына үлес қосатын жаңа жобалар әзірлеуде.&nbsp; «Бизнестің жол картасы-2020» бағдарламасы бойынша қауын чипсын дайындау технологиясын жасап шығарылды. Сонымен қатар, инженерлік бейіндегі зертхана ғылыми қызметкерлері Португалия, Нидерланды, Дания, Ресей, Беларусь және Украина ғалымдарымен бірлесіп Horizon-2020 бағдарламасы аясында Түйе тікенегінен Альцгеймер және Паркинсон ауруларына қарсы дәрі жасауға арналған Еуропалық Одақ грантын жеңіп алды.
<blockquote>
 «Сыр өңірінің археологиясын зерттеуге «Археология және этнография» ғылыми орталығы елеулі үлес қосып келеді. Университет археологтары облыс әкімдігінің қолдауымен 2020-2021 оқу жылында Жанкент, Сортөбе, Асанас ортағасырлық қалашықтарындағы қазба жұмыстарын жалғастырды», – деді білім ордасының басшысы.
</blockquote>
Студенттік өзін-өзі басқару – болашақ мамандардың университет қабырғасында әлеуметтік белсенділігін көтерудің ең маңызды жолы болып табылады. Университетте 21 жастар ұйымы жұмыс істейді. Спорттың 11 түрінен 21 спорт секциясы жұмыс жасайды. Қазіргі таңда университетіміздің спортшы студенттері арасында 5 Халықаралық дәрежедегі спорт шебері, 32 Қазақстан Республикасының спорт шебері, 53 Қазақстан Республикасының спорт шеберлігіне үміткер, 33 Қазақстан Республикасының Ұлттық құрама командасының мүшелері білім алады.
Есепті кездесуге облыс әкімінің орынбасары Б.Шәменова, облыстық мәслихат хатшысы Н.Байқадамов, қала әкімі Ғ.Қазантаев, облыстық мәслихат депутаты Қ.Бисенов, облыстық білім басқармасының басшысы А.Қасымова, халық қалаулылары, қоғам белсенділері, серіктестер мен түлектер қатысты. қатысты. Сондай-ақ, сала өкілдері, білім беру ұйымдарының басшылары, университеттің профессорлық-оқытушылық құрамы мен білім алушылар, БАҚ өкілдері болды. &nbsp;
Шараға оқытушы-профессорлар құрамы мен барлық университет студенттері онлайн қатысып, сұрақ-жауап берілді.
Университет басшысы «Бұл жетістіктерге ұжымның ауызбіршілігі мен ұйымшылдығының арқасында, оқытудың жоғары сапасын қамтамасыз ету нәтижесінде қол жеткізілді» деп қорытындылады. &nbsp;
<img src="https://kyzylorda-news.kz/wp-content/uploads/2021/10/1-1.jpg" alt="" />
<img src="https://kyzylorda-news.kz/wp-content/uploads/2021/10/3.jpg" alt="" />
<img src="https://kyzylorda-news.kz/wp-content/uploads/2021/10/4.jpg" alt="" />

Қорқыт ата атындағы Қызылорда университеті үздік ЖОО-ның ондығына кіреді

<a href="https://kyzylorda-news.kz/ru/obshestvo/">Kyzylorda-news.kz</a>. Денсаулық сақтау министрі міндетті вакцинацияны алмағандар жұмысқа жіберілмейтіні туралы бұйрыққа қол қойды, деп хабарлайды&nbsp;<a href="https://stan.kz/">Stan.kz</a>.
Денсаулық сақтау министрі Алексей Цой «Жіті респираторлық вирустық инфекциялар, тұмау және олардың асқынуы (пневмония), менингококк инфекциясы, COVID-19 коронавирустық инфекциясы, желшешек және скарлатина кезінде санитариялық-эпидемияға қарсы, санитариялық-профилактикалық іс-шараларды ұйымдастыруға және жүргізуге қойылатын санитариялық-эпидемиологиялық талаптарға» толықтырулар енгізу туралы бұйрыққа қол қойды.
Құжат 17 қазаннан бастап күшіне енеді.
Бұйрықта коронавирус инфекциясының таралуына жол бермеу үшін күндізгі режимдегі жұмысқа тек COVID-19-ға қарсы вакцина алған қызметкерлер жіберілетіні айтылған. Ал вакцина алмағандар ПТР тестілеудің теріс қорытындысы немесе тұрақты медициналық қарсы көрсетілім туралы, коронавиурспен ауырып жазылғанына 3 ай толмағаны туралы медициналық анықтама болған жағдайда ғана жұмысқа жіберілмек.

17 қазаннан бастап вакцина алмағандар жұмысқа жіберілмейді: Министр бұйрыққа қол қойды

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Ғалымдар үшін «Болашақ» бағдарламасы бойынша шетелдік тағылымдамадан өтуге арналған мамандықтар тізіміне тағы 18 мамандық енгізілді.
Бағдарламаның операторы – ҚР БҒМ Халықаралық бағдарламалар орталығы.
ҚР БҒМ мәліметінше, енді олар «Биология, молекулалық биология», «Ветеринария», «Компьютерлік лингвистика», «Ауыл шаруашылығы», «Құрылыс», «Жобалау», «Шахта құрылысы», «Физика», «Байланыс және ақпарат тарату жүйесі», «Радиотехнология», «Механика», «Статистика», «Есептеу технологиясы», «Антропология», «Орман ресурстарын қорғау», «Вакцинология», «Математика» бағыттары бойынша мемлекет есебінен әлемнің жетекші университеттері мен ғылыми орталықтарында тағылымдамадан өте алады.​
Айта кетейік, 8 мамандық қолданыстағы аралас мамандықтарға енгізіліп, тағы 10-ы жаңа мамандық ретінде қосылды.
Қазақстандық ғалымдар Гарвард университеті, Сорбонна университеті, Колумбия университеті, Йель университеті, Гонконг ғылым және технология университеті мен басқа да шетелдік жоғары оқу орындарында тағылымдамадан өте алады.​
Осылайша, 2021 жылы қазақстандықтардың 147 мамандық бойынша тағылымдамадан өту мүмкіндігі бар, оның ішінде инновация және жаңа технологиялар бағыты бойынша 14, индустриялық инженерия бағыты – 28, жаратылыстану ғылымдары – 9, әлеуметтік ғылымдар – 40, «Білім беру» бағыты – 9, «Медицина» бағыты – 37 және «Креативті индустрия» бағыты бойынша 13 мамандық бар.
Естеріңізге сала кетейік, биыл «Ғалымдар» жаңа санаты бойынша 500 стипендия бөлінді. Стипендиялардың жалпы саны 1055-ке дейін өсті. Оның ішінде денсаулық сақтау, мәдениет, спорт саласының қызметкерлері, педагогтер, мемлекеттік қызметкерлер, инженер-техниктер үшін 5 санат бойынша тағылымдамадан өтуге 110 грант бөлінді.
Конкурсқа қатысу үшін құжаттарды қабылдау 2021 жылғы 28 қазанға дейін жалғасады.
<a href="https://24.kz/kz/zha-aly-tar/bilim-zh-ne-ylym/item/503106-bolasha-sheteldik-ta-ylymdamadan-tuge-arnal-an-mamandy-tar-tizimi-ke-ejtildi">Хабар 24</a>

«Болашақ»: шетелдік тағылымдамадан өтуге арналған мамандықтар тізімі кеңейтілді

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Қызылорда облысы кәсіпкерлер палатасының алаңында келешек мамандықтарына қатысты мәселе талқыланды. Бұл кездесу «Бастаманы қолдау» қоғамдық бірлестігінің бастамасы негізінде ұйымдастырылды.
Шараға Кәсіпкерлер палатасы директорының орынбасары Пирмұхаммед Сыздықов, облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Жанар Дәулетбаева, кәсіпкерлер мен қоғамдық ұйым өкілдері, жастар қатысты.
«Бастаманы қолдау »қоғамдық бірлестігі биыл облыста «Келешек мамандықтары: Жұмыссыздық проблемаларының шешімі» жобасын жүзеге асырып жатыр. Жоба АҚШ-тың Халықаралық даму агенттігі (USAID) қаржыландыратын Орталық Азиядағы әлеуметтік инновациялар бағдарламасы аясында, Еуразия қорының қолдауымен іске асырылуда.
Ұйым жетекшісі Мадина Төлепова жоба аясында Қызылорда қаласы бойынша 31 жұмыссыз жас SMM, мобилография және графикалық дизайн курстарын қысқа мерзімде оқып, біліктіліктерін жетілдіріп, нарықта сұранысқа ие жаңа мамандық иесі атанғанын жеткізді. Қатысушыларға қосымша құралдарсыз, ұялы телефон арқылы жарнамалық материалдар дайындау жолдары үйретілген. Нәтижесінде 16 азамат жұмыспен қамтылған.
Мадина Төлепова кездесуде жобаның тиімділігін айта отырып, бұл тәжірибені жұмыспен қамтуға арналған мемлекеттік бағдарлама аясында өткізілетін қысқа мерзімді курстарға цифрлық саладағы келешегі бар мамандықтарды қосу қажеттігіне тоқталды.
Облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Жанар Дәулетбаева жұмыссыздықпен күресуге арналған «Еңбек» мемлекеттік бағдарламасы шеңберінде аймақта атқарылып жатқан жұмыстар туралы айта келе, бағдарламаның биыл аяқталатынын, жаңа құжат әзірленіп жатқанын жеткізді.
Шара қатысушылары мемлекеттік бағдарламалар негізінде жұмыссыздарды оқыту бойынша бюджет қаражатын жұмсау тиімділігін арттыру, қысқа мерзімді кәсіптік оқуға әлеуетті қатысушыларды іріктеу критерийлерін әзірлеу және біліктілік алған жұмыссыздар үшін материалдық жауапкершілік шараларын қарастыруды ұсынды. Себебі қатысушылар арасында материалдық төлемдер (стипендиялар мен жол жүру билеттері) үшін оқып, болашақта ұсынылған бос орындардан бас тартып, алған мамандықтары бойынша жұмыс жасамайтын жағдайлар кездеседі екен.
Сондай-ақ кездесуде қысқа мерзімді кәсіптік даярлық бойынша біліктілік пен дағдылар тізбесіне аудит жүргізіп, жыл сайын еңбек нарығына талдау жасалу қажеттігі айтылды.
Сонымен бірге «Бастау Бизнес» жобасының оқыту бағдарламасына өзгерістер мен толықтырулар енгізу ұсынылды. Атап айтқанда, болашақ кәсіпкерлер әлеуметтік медиа платформалар арқылы өз тауарлары мен қызметтерін жарнамалау дағдыларына меңгеру үшін оқыту модульдеріне цифрлық маркетинг (SMM, Mobilography, Graphic дизайн жәнет.б.) бойынша тренингтер енгізу қажеттігі айтылды.
Кездесу қорытындысымен айтылған ұсыныстардың барлығы Еңбек және халықты әлеуметтік қолдау министрлігіне, «Атамекенге» және облыс әкімдігіне жолданатын болды.

Қызылорда: «Бастау Бизнес» жобасына цифрлық маркетинг модулін енгізу ұсынылды

<a href="https://kyzylorda-news.kz/ru/obshestvo/">Kyzylorda-news.kz</a>. Жеке тұлғаларға арналған жылжымайтын мүлік кепіл шартын тіркеу бойынша Мемлекеттік қызметке Blockchain технологиясын енгізді.
Енді ипотеканы ресімдейтін қазақстандықтар кепіл шартымен @baspana.otbasybank.kz порталындағы жеке кабинетінде таныса отырып, оған ЭЦҚ көмегімен қол қоя алады. Жылжымайтын мүлікке құқық ауыртпалығын мемлекеттік тіркеу туралы нәтиже хабарлама түрінде банк сайтындағы және eGov порталындағы жеке кабинеттерге келіп түседі. Бұл туралы Өңірлік коммуникациялар қызметінің ақпарат алаңында «Азаматтарға арналған үкімет» мемлекеттік корпорациясының Қызылорда облысы бойынша филиалы директорының орынбасары Рахат Жайсаңбаев мәлімдеді.
<blockquote>
 «Бұрын азаматтар кепіл шартын тіркеу үшін банктен құжат алып, оны ХҚО-ға апаруы тиіс болатын. Халыққа қызмет көрсету орталығында ол шарт тіркелген соң, клиент ауыртпалық туралы анықтаманы алып, тіркелген шартпен бірге оны банкке ұсынатын. Енді Blockchain технологиясының арқасында бұл процесс автоматтандырылды. Банк пен ХҚО арасында жүрудің қажеті болмайды, қажетті құжаттарды банк ХҚО-ға өзі жібереді. Жылжымайтын мүлік кепіл шартын онлайн тіркеу қызметін автоматтандыру – банк клиенттеріне бұл процесті 3 күннен 1 күнге дейін қысқартуға мүмкіндік береді. Отбасы банк тарапынан жылжымайтын мүлік кепілінің шарттарына қол қоюға және тексеруге жұмсалатын операциялық шығындар да қысқарады. Blockchain жүйесі – бұл деректерді үшінші тұлғаларға беру мүмкіндігін толығымен жоққа шығаратын жеке-жеке блоктардан тұратын тізбек жүйесі. Бұл жолданатын деректердің қауіпсіздігін қамтамасыз етуге мүмкіндік береді. Азаматтарға арналған үкімет аталған инфрақұрылымды барлық банкке ұсынуға әзір. Қазір бірнеше банк тарапынан осы жобаға қосылу бойынша жұмыстар жүргізіліп жатыр», – деді Рахат Бахытұлы.
</blockquote>

Мемлекеттік қызметке Blockchain технологиясын енгізді

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Қызылорда облысы бойынша ҚАЖ департаментіне қарасты ЗК-169/4 мекемесінің әкімшілігі сотталғандарды жұмыспен қамтуда көптеген игі шараларды жүзеге асыруда. Мекемеде жазасын өтеп жүрген азаматтарды жұмыспен қамту, жаңа жұмыс көздерін ашу мақсатында жеке кәсіпкерлермен әріптестік қарым-қатынас орнатылуда. Соның нәтижесінде мекемедегіжазасын өтеушілердің 77,7 пайызы жұмыспен қамтылған.&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;
Жуырда мекеменің сотталғандарды жұмыспен қамту қызметкерлері 3 сотталғанды&nbsp;Қызылорда қаласындағы «Сыр жиһазы» кәсіпорнына жұмысқа орналастырды.
Цехта жұмысшылармен қатар бас бостандығынан айырылғандар да ағаштан түрлі бұйымдар, есік, терезе, жиһаздар жасайды.&nbsp;
Жазасын өтеуші Бақытбектің айтуынша, мамандығы ағаш ұстасы болған соң, онымен жұмыс жасау қиындық тудырмаған.
<blockquote>
 «Бала күнімде әкемнің жанында жүріп, үйренгенім көп болды. Жалпы ағаштан түйін түйіп, ерекше бұйым дайындау шыдамдылықты, төзімділікті талап етеді. Айлық жалақымыз да уақытылы», – дейді сотталған азамат.
</blockquote>
Мекеме бастығының міндетін атқарушы әділет подполковнигі Айбол Махашевтің айтуынша, қазіргі таңда 30 кәсіпкерлік нысанда келісім-шарт негізінде сотталғандар жұмыспен қамтылған. Олардың айлық табысының 50 пайызы мемелекетке, жеке тұлғаға келтірген шығындарын төлейді. Ал қалған бөлігін өздеріне, отбасыларына жаратады. Алдағы уақытта жазасын өтеушілерді көбірек еңбекке тартып, 100 пайыз жұмыспен қамту&nbsp;жоспарланған.

Қызылордада 30 кәсіпкерлік нысанда сотталғандар жұмыс жасайды

<a href="https://kyzylorda-news.kz/ru/obshestvo/">Kyzylorda-news.kz</a>. Тұрғын үй иелеріне тіркелген азаматтар мен тіркеуден шығарылған тұрғындар туралы SMS-хабарламалар жолдайтын жаңа сервисті енгізілді. Бұл туралы Өңірлік коммуникациялар қызметінің ақпарат алаңында «Азаматтарға арналған үкімет» мемлекеттік корпорациясының Қызылорда облысы бойынша филиалы директорының орынбасары Рахат Жайсаңбаев мәлімдеді.
<blockquote>
 «Енді азаматтар ХҚО арқылы тіркелген кезде тұрғын үй иесі өз телефонына тіркелген адамның деректері көрсетілген хабарлама алады. Егер баспана иесі үйінде тұратын адамды тіркеуден шығарғысы келсе, екінші тарапқа да тіркеуден шығарылғаны туралы хабарлама барады. Аталған жаңа сервис ақылы түрде тіркеуді ұсынатын делдалдарға қарсы күресте көмектеседі. Азаматтарды тұрғылықты жері бойынша eGov порталы арқылы да онлайн тіркеуге немесе тіркеуден шығаруға болады. Ол үшін тұрғын үй иесі мен тіркелген адамның электрондық цифрлық қолтаңбасы болуы керек»,- Рахат Бахытұлы.
</blockquote>

Тұрғын үйге тіркеудегі жаңа қызмет делдалдарға қарсы күресте көмектеседі

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда облысының әкімі Гүлшара Әбдіқалықова әкімдік жанындағы құқық бұзушылық профилактикасы жөніндегі ведомствоаралық комиссия отырысын өткізді.
Жиынға облыс әкімінің орынбасарлары, құқық қорғау органдарының басшылары және жауапты салалық басқарма басшылары қатысты. Сонымен бірге онлайн селекторлық режимде қала, аудан әкімдері қосылды.
Күн тәртібінде 2 мәселе қаралды. Алғашқысы кәмелетке толмағандар мен жастар арасындағы құқық бұзушылық профилактикасы бағытына арналды. Облыстық білім басқармасының басшысы Ақзира Қасымова өткен жылдың қорытындысы бойынша кәмелетке толмағандар арасында жасалған қылмыс саны 2019-шы жылмен салыстырғанда 33 пайызға, мектеп оқушыларының қылмысқа қатысу көрсеткіші 64,5 пайызға, колледж студенттерімен жасалған қылмыс көлемі 48,1 пайызға төмендегенін жеткізді. Ал, жыл басынан бері аталған контингент бойынша қылмыс саны 18,2 пайызға азайған.
Жиында аймақ басшысы жасалған қылмыстардың ішінде қасақана ауыр дене жарақатын салу қылмысының өсуі, кәмелетке толмағандармен өз-өзіне қол жұмсау фактілерінің азаймай тұрғанын алға тартып, бұл мәселеге тиянақты түрде мән беру керектігін қаперге салды. Әсіресе, қылмыстың жасалу себебіне талдау жасап, суицидке баратын және олардың құрбаны болатын тұлғалардың әлеуметтік портретін жасау мен оқушылар арасында психологиялық қолдау шараларын үйлестіру керектігін қадап айтты. Сондай-ақ, тәуекел топтағы балалармен жұмысты үйлестіріп, интернеттегі қылмысты жасырын қолдаушыларға қарсы кешенді жоспар құруды жүктеді. 
Отырыста облыстық ішкі саясат басқармасының басшысы Мира Қазбекова жастар арасындағы криминогендік ахуал туралы есеп берді. Жастар арасында құқықбұзушылықтың алдын алуға арналған арнайы облыстық іс-шаралар жоспары бекітілген. Жоспар аясында жергілікті құқық қорғау органдарымен бірлесіп, қала және аудандарда «Жасөспірім» жедел профилактикалық іс-шарасы, «Түнгі қаладағы балалар», «Stop Қылмыс!» түнгі рейтік шаралары ұйымдастырылып, құқықтық, психологиялық кеңестер, түсіндірме жұмыстары жүргізілген. 
Облыс әкімі «NEET» санатындағы жастармен адресті түрде жұмысты үйлестіріп, әрбір мәселеге кешенді түрде қарау қажеттігін еске салды.
<blockquote>
 «Биыл қылмыстық жауапкершілікке тартылған 339 жас азаматтың 92 %-ын (312-сі) «NEET» санатындағы жастар құрайды. Бұл, осы санаттағы азаматтарға қатысты қабылданып жатқан профилактикалық шаралардың әлі де болса жеткіліксіз екендігін көрсетеді», – деді өңір басшысы.
</blockquote>
Күн тәртібіндегі бірінші мәселені қорытындылған облыс әкімі жауапты салалық басқарма басшыларына нақты тапсырма берді. Білім беру мекемелерін жеке күзет қызметімен қорғау мәселесін пысықтап, бюджетке ұсыныс енгізуді, «педагог-психолог» мамандарының қызметін күшейтуді және 1 қарашаға дейін кәмелетке толмағандар арасында өзін-өзіне қол жұмсаудың алдын алу бойынша арнайы жоспар бекітуді міндеттеді.
Отырысқа қаралған екінші мәселе құқық қорғау саласын цифрландыруға арналды. Облыстық полиция департаменті бастығының міндетін атқарушы Шамшадин Амитов саладағы атқарылған шаруаларды тізбеледі. 
Комиссия отырысында аймақ басшысы бейнебақылау тетіктерінің жұмысын жандандыру және жастар арасындағы қылмысты ұйымдастыруға мүдделі топтарды анықтау мәселелеріне ерекше назар аударуды міндетті. 
Жиынды қорытындылаған өңір басшысы аталған саладағы олқылықтарды жоюды және жоспардағы міндеттерді уақытында аяқтауды тапсырды. Оның ішінде, автоматтандырылған бейнетіркегіш құрылғылары мен жаңа технологиялар енгізу есебінен құқық бұзушылық профилактикасының тиімділігі көтеруді, цифрландыру бағытында облыстық бюджеттен бөлінген қаржылардың мақсатты, әрі мерзімінде игерілуі қамтамасыз етіп, Цифрлық технологиялар басқармасымен бірлесе, заманауи талаптарға сай жаңа технологиялардың жобаларын ұсыну алдында, олардың іске қосудан кейінгі болжамы мен тиімділігі зерттеуді міндеттеді.
Аймақ басшысы аталған мәселелер келесі жылдың бірінші тоқсанында комиссия отырысында қаралатынын ескертті.
<img src="https://kyzylorda-news.kz/wp-content/uploads/2021/10/zhass.jpg" alt="" />
<img src="https://kyzylorda-news.kz/wp-content/uploads/2021/10/akimat2.jpg" alt="" />
<img src="https://kyzylorda-news.kz/wp-content/uploads/2021/10/akimat3.jpg" alt="" />
<img src="https://kyzylorda-news.kz/wp-content/uploads/2021/10/akimat4.jpg" alt="" />

Қазақстан және Қызылорда облысының жаңалықтары