<a href="https://kyzylorda-news.kz/">Kyzylorda-news.kz.</a>&nbsp; Елдегі эпидемиологиялық ахуалдың тұрақтануына байланысты мерекелік шаралар санитарлық нормаларды сақтай отырып офлайн режимінде аталып өтілмек. Сыр өңіріндегі мейрам кеше Амал мерекесімен басталды. Негізгі шаралар облыс орталығында 21-22 наурыз күндері аралығында өткізіледі.
Өңірлік коммуникациялар қызметінде өткен баспасөз конференциясында облыстық ішкі саясат басқармасының басшысы Мира Қазбекова.
<blockquote>
 «9 күн бойы Ұлыстың ұлы күні аталып өтіледі. Әрбір күн бір атаулы іс-шараға арналады. Шараны ұйымдастырудың идеялық мазмұны алдымен салт-дәстүрді, әдет-ғұрыптарды жаңғыртып, насихаттау боп табылмақ. 
 15 наурызға – Дәстүрлі құндылықтар күні деген атау бердік. Бүгіннен бастап барлық білім беру ұйымдарында «Наурыз мейрамы» ұғымының пайда болу тарихы туралы тәрбие сағаттары, дәрістер, көрмелер, экскурсиялар ұйымдастырылуда. 
 Сонымен қатар, қайырымдылық шаралары Наурыз мейрамының маңызды құрамдас бөлігі. 16 наурыздан бастап меценаттарды, кәсіпкерлер мен еріктілерді тарта отырып, қала, аудандарда, кент және ауылдық округтерде «Наурыз мейірімі» қайырымдылық акциялары өткізіледі. 
 Наурыз мерекесінде ұлттық спорт түрлерін кеңінен насихаттауға жол ашуымыз керек. Осы ретте, 17 наурызда мерекені бұқаралық тойлау мақсатында халық көп шоғырланған орындарда, орталық стадионда ұлттық спорт түрлерінен сайыстар, тұрғындарға арналған «Спорт алаңдары» атты шаралар ұйымдастырылады», – деді Мира Жомартқызы.
</blockquote>
Балалар жылына орай, 18-не «Наурыз қоржыны» акциясы, «Наурыз шапағаты», «Балаларға базарлық», «Ертегілер елінде»секілді жеткіншектерге арналған шаралар өткізілмек.
Қоршаған ортаны қорғауға бағытталған шараларды ұйымдастыруға байланысты 19 наурызда жалпыхалықтық сенбілік болады. Ал, 20 наурыз қолөнер туындыларын әзірлейтін шеберлер күніне арналады. 
Айта кетейік, облыстық ішкі саясат басқармасы 14-22 наурыз аралығында түрлі форматта барлығы 80-ге жуық шараны өткізуді жоспарлауда.
<img src="https://kyzylorda-news.kz/wp-content/uploads/2022/03/275894662_1491332501262257_6818195953357927839_n.jpg" alt="" />
Облыстық ішкі саясат басқармасының басшысы Мира Қазбекова

Қызылордада Наурыз мейрамы орталық алаңда тойланады

<a href="https://kyzylorda-news.kz/">Kyzylorda-news.kz.</a>&nbsp; Болат Назарбаев пен Қайрат Шәріпбаевқа қарасты майнинг фермалары қызметін тоқтатты.
<blockquote>
 «Жүргізілген алдын алу шараларының нәтижесінде 55 майнинг фермалары қызметін өз еркімен тоқтатты. Олардың қатарында Павлодар облысында танымал кәсіпкерлер Болат Назарбаев және Александр Клебановпен үлестес фирмалар бар. Сондай-ақ, «QazaqGaz»ұлттық компаниясы» АҚ-ның Ақтөбе облысындағы бұрынғы басқарма төрағасы Қайрат Шәріпбаев және Қарағанды облысындағы танымал бизнесмендердің бірі Ерлан Нығматуллин болды», – делінген Қаржылық мониторинг агенттігінің хабарламасында.
</blockquote>

Болат Назарбаевқа қарасты майнинг фермасы қызметін тоқтатты

<a href="https://kyzylorda-news.kz/">Kyzylorda-news.kz.</a>&nbsp; 16 наурызда Мемлекет басшысы Қасым-Жомарт Тоқаев тікелей эфирде Қазақстан халқына Жолдау жариялайды.
Президент Жолдауында жуық арада жүзеге асырылатын саяси реформалардың жаңа бағдарламасы мен әлеуметтік-экономикалық бағытта атқарылатын іс-шаралар туралы айтылады.
Мемлекет басшысының Жолдауы сағат 11:00-де (жергілікті уақытпен 10.00-де) республикалық телеарналардан тікелей эфирде көрсетіледі. Сондай-ақ «БОРТ N1» тelegram-каналы жиыннан жедел хабар таратады.

Қасым-Жомарт Тоқаев Қазақстан халқына Жолдау жариялайды

<a href="https://kyzylorda-news.kz/">Kyzylorda-news.kz.</a> ҚР Қазақстан Республикасының бас мемлекеттік санитарлық дәрігері Айжан Есмағамбетова еліміздің білім беру ұйымдарының қызметіне қатысты жаңа қаулы шығарды, деп хабарлайды ҚазАқпарат.
<blockquote>
 «Жасыл» және «сары» аймақтарда әлеуметтік қашықтықты міндетті түрде сақтауға қойылатын талаптар алынып тасталсын. Күн сайынғы «кіру» сүзгісіне де (жанаспайтын термометрмен термометрия) талап қойылмайды. Сонымен қатар «Ashyq» мобильді қосымшасын пайдалану, әлеуметтік қашықтықты сақтау және термометрия жүргізу білім беру ұйымдары әкімшілігінің шешімі бойынша ерікті түрде жүзеге асырылуы мүмкін», – делінген қаулыда.
</blockquote>
Дегенмен бас санитар дәрігердің қаулысында көрсетілгендей «Ashyq» жүйесі қолданыстан мүлдем алынбайды.
<blockquote>
 «Эпидемиологиялық жағдайды бағалау матрицасына сәйкес өңір «қызыл» аймаққа ауысқан кезде меншік нысанындағы және ведомстволық тиісті білім беру ұйымдарында «Ashyq» мобильді қосымшасын міндетті түрде пайдалану, әлеуметтік қашықтықты сақтау және күн сайынғы «кіру» сүзгісін (жанаспайтын термометрмен термометрия) жүргізу қамтамасыз етіледі», – деп хабарланды.
</blockquote>
Одан бөлек, құжатта білім беру ұйымдарында санитариялық-эпидемияға қарсы шаралардың толықтай сақталу керектігі айтылған.

Білім беру ұйымдарының қызметіне қатысты бас санитар дәрігердің жаңа қаулысы шықты

<a href="https://kyzylorda-news.kz/">Kyzylorda-news.kz.</a> Қызылорда облысы кәсіпкерлер палатасының алаңында өткен кездесуде жеке мектеп ашуға қойылатын талаптар, қаралатын қаржы және жүзеге асырылу механизмі қаралды.
Шараға Білім және ғылым министрлігіне қарасты Қаржы орталығының өкілдері Алпамыс Сатыбалдин мен Айнұр Сағындықова, аймақ кәсіпкерлері мен жергілікті білім саласының мамандары қатысты.
Кездесуде Кәсіпкерлер палатасы директорының орынбасары Пірмұхаммед Сыздықов жеке мектеп ашуға қызылордалық кәсіпкерлердің қызығушылығы жоғары екенін атап өтті.
<blockquote>
 «Білім беру жүйесінің инфрақұрылымын дамыту мақсатында Үкімет жеке мектептер мен студенттік жатақханаларды салу жобаларын жүзеге асырып жатыр. Бүгінде Қызылорда облысының өзінде кәсіпкерлер 15 жеке білім ошағын ашып, 5 жатақхана салды», – деді отырыста Пірмұхаммед Сыздықов.
</blockquote>
Қаржы орталығының департамент директоры Алпамыс Сатыбалдин жекеменшік мектептер салу және реконструкциялау жан басына шаққандағы нормативтік қаржыландыру аясында жүргізілетінін жеткізді.
Ол үшін екі түрлі төлем қолданылады: амортизациялық және операциялық. Амортизациялық шығындар реконструкция үшін 1 оқушыға 47 АЕК (144 мың теңге), құрылыс үшін 1 оқушыға 96 АЕК (294 мың теңге), ал операциялық шығындар орта есеппен 1 оқушыға 532 мың теңге көлемінде төленеді.
Мемлекеттік тапсырыс негізінде қаражат алу алгоритмі:
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – «Қаржы орталығы» АҚ-мен алдын ала шарт жасау (механизм операторы);
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – мектеп салу немесе реконструкциялау (санитарлық нормаларға, ҚНжЕ және өрт қауіпсіздігіне сәйкес жүргізіледі);
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – 20 жыл мерзімге нысаналы мақсатын өзгертпеуге құқық ауыртпалығын тіркеу (ХҚКО-да тіркеу);
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – білім беру қызметімен айналысу құқығына лицензия алу кадрларды іріктеу;
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Ұлттық білім беру деректер базасында (ҰБДҚ) тіркелу;
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – оқушыларды қабылдау;
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – мемлекеттік сатып алу веб-порталында тіркелу;
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – мемлекеттік білім беру тапсырысын орналастыруға операторға өтініш жолдау;
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – мемлекеттік білім беру тапсырысын орналастыруға шарт жасау.
Мемлекеттік тапсырыс нысан пайдалануға берілгеннен кейін 8 жыл ішінде жылына 1 оқушыға жобалық қуаттан аспайтын мөлшерде беріледі. Норматив оқушылардың нақты саны бойынша төленеді.
Шара барасында қызылордалық кәсіпкерлер Қаржы орталығының мамандарына салаға қатысты сұрақтарын қойып, жетілдіруге қатысты ұсыныстарын білдірді.
Аймақта жеке мектеп немесе студенттік жатақхана салуға/ашуға ниетті азаматтар қосымша сұрақтары бойынша Қызылорда облысының кәсіпкерлер палатасы мамандарына жүгіне алады. Жауапты маман Жобаларды сүйемелдеу бөлімінің бастығы Мұрат Балабай. Байланыс телефоны 8 /7242/ 40-09-81.
<img src="https://kyzylorda-news.kz/wp-content/uploads/2022/03/img_4343-scaled.jpg" alt="" />

Қаржы орталығы қызметкерлері жеке мектеп ашуға ниетті қызылордалық кәсіпкерлермен кездесті

<a href="https://kyzylorda-news.kz/">Kyzylorda-news.kz.</a> Алдағы аптада оқушыларымыздың көктемгі каникулы басталады, деп жазды ҚР Білім және ғылым министрлігінің баспасөз қызметі.
<blockquote>
 «Демалыс 2022 жылғы 19 наурыздан басталып, 30 наурызды қоса алғанда 12 күнге созылады. Оқушыларымызға осы аптада жақсы оқып, тоқсандық бағаларын жақсартуларына тілектеспін»,-делінген хабарламада.
</blockquote>

Оқушылардың көктемгі каникулы қашан басталады?

<a href="https://kyzylorda-news.kz/">Kyzylorda-news.kz.</a>&nbsp;Өткен тәулікте COVID-19 жұқтырудың бірде-бір дерегі тіркелген жоқ. Бұл көрсеткіш наурыз айының 4-і нен бастап орын алуда. Індетке шалдыққандардың 95%-дан астамы жазылып шықты. Бұл жайында Өңірлік коммуникациялар қызметінде өткен брифингте облыстық денсаулық сақтау басқармасы басшысының орынбасары Жангелді Шайымбетов мәлімдеді.
Оның айтуынша, облыста вакцинаның 1 компонентімен 426 423, екінші компонентімен 418 453 адам қамтылды. Pfizer вакцинасы 74 736 адамға салынып, 164 245 тұрғын ревакцинациядан өтті.
Брифингте облыстық санитариялық-эпидемиологиялық бақылау департаментінің басшысы Динара Жаңабергенова эпидемиологиялық жағдайға байланысты тәуекелдің «сары» және «жасыл» аймақтарында орналасқан өңірлердегі барлық объектілерде «Ashyq» мобильді қосымшасын қолдану міндеті, әлеуметтік арақашықтықты сақтауға қойылатын талаптар мен міндетті термометрия алынып тасталғанын айтты.
<blockquote>
 «Эпидемиологиялық қауіп-қатердің барлық аймақтарында ашық ауада маскаларды міндетті түрде кию талабы жойылады. Бұдан бөлек, коронавирусқа қарсы вакцина алмаған қызметкерлер үшін күндізгі режимдегі жұмысқа рұқсат беріліп, вахталық әдіспен жұмыс жасайтын ұйымдардың қызметкерлері үшін вахтаға кіру және шығу кезнде ПТР әдісімен міндетті зертханалық тестілеуден өткендігі тексерілмейді», – деді Динара Жаңабергенова.
</blockquote>

Қызылордада 164 мыңнан астам тұрғын ревакцинациядан өтті

<a href="https://kyzylorda-news.kz/">Kyzylorda-news.kz.</a> Қызылорда облысының аумағындағы Сырдария өзенінің жалпы ұзындығы – 1 274 шақырымды құрайды. Қорғаныс бөгеттерінде қауіпті деп танылған 56 су басу аймақтарына 197 жауапты мекеме бекітілді. Бұл туралы Өңірлік коммуникациялар қызметінде өткен брифингте облыстық төтенше жағдайлар департаменті бастығының орынбасары Саид Молдақараев хабарлады.
<blockquote>
 «Шардара су қоймасынан Сырдария өзенінің төменгі ағасына жіберілген су көлемі секундына – 100 текше метрді құрады. Облыс аумағынан секундына -160 текше метр су келіп түсуде. Сәйкесінше, Қызылорда су торабынан – 105 текше метр, Әйтек су торабынан – 53 текше метр, Қараөзек су қоймасынан – 48 текше метр су төменгі ағысқа жіберілуде. Қазіргі таңда, Сырдария өзені бойымен мұз Арал және Қазалы аудандарынан өтуде. Қала тұсындағы өзен беті мұздан таза. Су тасқынының алдын алу бойынша 13 рейд жүргізіліп, 597 үй араланды», – деді Саид Молдақараев.
</blockquote>

Саид Молдақараев: Сырдария өзеніндегі мұздан қауіп жоқ

<a href="https://kyzylorda-news.kz/">Kyzylorda-news.kz.</a> Қолма-қол шетел валютасын сыртқа шығаруға шектеу енгізілді. Ұлттық банк мемлекет басшысының тыйымына қатысты түсініктеме берді.
<blockquote>
 «Бүгінгі таңда сыртқы күйзелістер салдарынан қолма-қол шетел валютасына сұраныс артқаны байқалады. Екінші деңгейлі банктерде шоттардағы, депозиттердегі және бағалы қағаздардағы қалдық түріндегі өтімді валюталық активтердің жеткілікті көлемі бар. Соған қарамастан, қолма-қол шетел валютасына деген сұранысты қанағаттандырып отыр», – делінген банк жариялаған ақпаратта.
</blockquote>
Қолма-қол шетел валютасын басқа елдерден Қазақстанға жеткізуде логистикалық қиындықтар туындап отырғаны айтылған.
<blockquote>
 «Қаржылық тұрақтылыққа төнетін қатер мен алыпсатарлықты азайту үшін үкімет пен Ұлттық банк ұсынысы негізінде президент жарлығымен Қазақстаннан валютаны алып шығуға шектеу енгізілді», – деп жазылған Ұлттық банк сайтында.
</blockquote>
<ol>
<li>10 000 АҚШ долларынан асатын қолма-қол шетел валютасына және (немесе) шетел валютасындағы ақша құралдарын;</li>
</ol>
2. Тазартылған алтынның 5, 10, 20, 50 және 100 грамм алтын құймалары және Ұлттық банк шығарған алтыннан, күмістен жасалған инвестициялық монеталарына, сондай-ақ салмағы 100 грамнан асатын тазартылған алтынды сыртқа шығаруға тыйым салынды.
Қабылданған шаралар қолма-қол шетел валюталарының шектен тыс сыртқа шығып кетпеуін бақылауды, Ұлттық банктегі резервтердің сақталуын, сондай-ақ жинақ құралдарын әртараптандыруды қамтамасыз ететіні жазылған.

Шетел валютасын сыртқа шығаруға шектеу енгізілді

<a href="https://kyzylorda-news.kz/">Kyzylorda-news.kz.</a> Өңірде су тапшылығының алдын алу мақсатында 65 жоба іске асырылады. Биыл облыстық бюджеттен 157,1 шақырым болатын 20 каналды тазалау жұмыстары жүргізіледі. Ал, елді мекендерге 23 дана насос қондырғысы сатып алынады. Бұл жөнінде Өңірлік коммуникациялар қызметінде өткен брифингте облыстық табиғи ресурстар және табиғат пайдалануды реттеу басқармасының бөлім басшысы Жұлдызай Айтжанова хабарлады.
<blockquote>
 «Соңғы жылдары Сырдария өзеніндегі су ағынының азаюы өңірдің экологиялық және әлеуметтік-экономикалық жағдайын едәуір қиындатуда. Су тапшылығына байланысты «Қызылорда облысының су тапшылығы жағдайында, бірінші кезектегі жобаларды іске асыру жөніндегі Жол картасы» жобасы әзірленуде. Аталған жоба аясында 2022-2025 жылдар аралығындағы 20 жобаны іске асыру көзделген. Бүгінде облыстық коммуналдық меншікке 224 су шаруашылығы нысандарына тазалау және жөндеу жұмыстары жүргізілуде», – деді Жұлдызай Айтжанова.
</blockquote>
Брифинг барысында су қоймаларына түсіп жатқан су көлемі айтылды. Алдағы уақытта суды көп қажет ететін өнімдердің көлемі бірнеше есеге азайтылмақ.
<blockquote>
 «Қазіргі таңда Тоқтағұл су қоймасына – 7,9 млрд. текше метр су жиналды. Бұл былтырғы жылмен салыстырғанда – 1,2 млрд.текше метрге кем. Шардара су қоймасында жиналған су көлемі – 4,8 млрд. текше метр. Түсіп жатқан су секундына – 495 текше метрді құрайды. Өткен жылы Көксарай су қоймасына – 1,3 млрд. текше метр су жиналды. Қазіргі таңда бұл су қоймасына су жинақтау жұмыстары жүргізілмеді. Себебі, Сырдария өзеніндегі су көлемі аз», – деді Арал-Сырдария бассейндік инспекциясының бөлім басшысы Сейітхан Абуов.
 «Биылғы су тапшылығы мәселесі аса күрделі болатыны белгілі. Осыған сәйкес, суды көп қажет ететін дақылдардың көлемі азайтылады. Басты дақыл күріштің көлемі – 64 мың гектарға дейін қысқарады. Сондай-ақ, қаңтар айынан бастап, Жаңадария, Жаңарық, Айнакөл, Қаракөл, Қараөзек көлдер жүйесіне су толтыру жұмыстары басталды», – деді «Қазсушар» РМК Қызылорда облыстық филиалы директорының орынбасары Жорабек Ерназаров.
</blockquote>

Су тапшылығы: Қызылордада 65 жоба жүзеге асырылады

<a href="https://kyzylorda-news.kz/">Kyzylorda-news.kz.</a> Көпқабатты пәтерді басқарудың жаңа формасы енгізілді. Оның артықшылығы енді әр тұрғынның қаражаты тек өзінің үйін күтіп ұстауға ғана жұмсалады. Әр тұрғын бос тұрған жертөлелерді жалға беруден, жарнамадан және басқалардан табыс алуға мүмкіндігі бар. Қаражаттың 30 пайызы басқаруға, 70 пайызы үйді күтіп ұстауға бөлінеді. Және тағы бірнеше артықшылықтар қарастырылған. Бұл туралы Өңірлік коммуникациялар қызметінде өткен брифингте облыстық энергетика және тұрғын үй коммуналдық шаруашылық басқармасы басшысының орынбасары Берік Сарменбаев мәлімдеді.
Облыс бойынша 1222 көп қабатты тұрғын үй бар. Солардың ішінде жаңа басқару жүйесімен құрылуы қажет 914 көпқабатты тұрғын үйдің қазіргі уақытта 909 құрылды. Ал қалған 308 көп пәтерлі тұрғын үйдің коммуналдық меншікте болуына байланысты олардан басқару ұйымдары талап етілмейді.
Бүгінде кондоминиум объектісінің ортақ мүлкін күтіп-ұстау үшін ағымдағы және жинақ шоттарын ашу, көп қабатты тұрғын үй шығыстарының ең төменгі мөлшерін, коммуналдық қызмет көрсету ережесін бекіту жұмыстары жүргізілуде.
<blockquote>
 «Сондай-ақ, тұрғындар қажетті жұмыстардың тізімін өз бетінше таңдап, жылдық шығындар сметасын жасайды және оны жиналыста бекітеді, соның негізінде ай сайынғы шығындар есептеледі. Әрбір үйдің тұрғындары кондоминиум объектісін басқаруға және күтіп ұстауға арналған шығыстар сомасын дербес белгілейтін болады. Егер тұрғындар тарифтің мөлшеріне риза болмаса, онда меншік иелері бірлестігінің төрағасы оны қайта қарауы керек», – деді Берік Әбдіғаппарұлы.
</blockquote>

Көпқабатты тұрғын үйді басқарудың тиіміділігі қандай?

<a href="https://kyzylorda-news.kz/">Kyzylorda-news.kz.</a> Өткен аптада Арал, Қазалы, Қармақшы ауданындағы шаруа қожалықтарының иелерімен кездескен Қызылорда облысының әкімі Гүлшара Әбдіқалықова Жалағаш ауданында ауыл шаруашылығы мәселелеріне арналған жиын өткізді.
Аймақ басшысы аудан шаруаларының тыныс-тіршілігі сумен тығыз байланысты екенін ескере келе, вегетациялық кезеңде тіршілік көзін үнемді пайдаланудың маңыздылығына тоқталды.
<blockquote>
 «Бүгін сіздермен кездесіп, ұсыныстарыңызды тыңдау үшін жиналып отырмыз. Биыл да судың тапшылығы айтарлықтай байқалады. Көксарайға су жиналмай қалу қаупі бар. Сондықтан қуаңшылықтың алдын алу шараларын кешенді жүргізу үшін сіздердің қолдауларыңыз қажет. Тығырықтан шығудың балама жолдары мен тиімді тетіктерін қарастыру үшін әрбір ауданда космотүсірілім жасалып, су деңгейі аз баратын жерлерге насос қондырғыларын орнатып, ұңғыма тарту, каналдарды тазалау жұмыстарын кестеге сәйкес орындау қажет. Биыл бюджет есебінен Жалағаш ауданына 6 насос қондырғысы алынады. Егіс кезінде тапшылықты ескере отырып, басқа да дақылдарды егудің амалын іздестіргеніміз дұрыс», – деді Гүлшара Әбдіқалықова.
</blockquote>
Отырыста аудан әкімі Асылбек Шәменов егін шаруашылығын дамытуға байланысты бірнеше ұсынысын жеткізді. Яғни, минералдық тыңайтқыштар мен гербицидтердің құнын арзандату үшін мемлекеттен төленетін субсидияның көлемін 50 пайызға дейін көтеруге, көктемгі егінді сапалы және мерзімінде орналастыру үшін жеңілдетілген дизель жанармайын жеткізіп беруші операторлардың шаруашылықтарға төмендетілген бағада жеткізіп беру мәселесін қозғады. Сондай-ақ, бірқатар шаруа қожалық иелері мал басын көбейту, өңірде тыңайтқыш өндірісін қолға алу, субсидия беру тәртібіне қатысты ұсыныстарын жеткізді.
Жиынды қорытындылаған Гүлшара Әбдіқалықова аудан әкімі мен салалық басқарма басшыларына су лимитінің мөлшеріне қарай су жеткізу кестесін әзірлеу, егінге қажетті аяқ суды дұрыс пайдалану үшін арықтар мен каналдарды қазу, насос орнату жұмыстарын жеделдетуді тапсырды. Сонымен қатар, ұңғымаларды тарту бойынша жобалық-сметалық құжатты әзірлеуді, тұрақты эпизоотиялық ахуал қалыптастыру үшін төрт түлікті вакцинациялау жұмыстарын кешенді жүргізу тапсырылды.
Облыс әкімі Жалағаш ауданына жасаған жұмыс сапары аясында Қаракеткен ауылдық округінің тұрғындарымен кездесіп, пікірлесті. Ауыл ақсақалдары аяқ су, ескірген электр желісін ауыстыру мен жаңа ауылдық клуб ғимаратын салуға көңіл бөлуді сұрады.
Тұрғындардың талап-тілегін тыңдаған аймақ басшысы ауылдық клубты жөндеу үшін қажетті құжаматталарды рәсімдеп, қаржы қарауға ықпал жасайтынын жеткізді. Ал, аяқ су мәселесін реттеуге септігін тигізетін ұңғыма қазу жұмыстары шешілетінін қаперге салды.
<img src="https://kyzylorda-news.kz/wp-content/uploads/2022/03/275551261_262062142781704_9214207231542009865_n.jpg" alt="" />

Қазақстан және Қызылорда облысының жаңалықтары