<a href="https://kyzylorda-news.kz/">Kyzylorda-news.kz.</a> Жаңақорған ауданында 19 жастағы қойшы екі күннен кейін табылды.
Оқиға Жаңақорған ауданына қарасты Сүттіқұдық ауылынан шығысқа қарай 50-55 шақырым қашықта орналасқан Диірмен деген жерде болған.
<blockquote>
 «Ол 4 мамыр шамамен сағат 14.30-да сол аумақтан белгісіз бағытқа шығып кеткен. Содан бері хабарсыз болған. Жедел құтқару жасағынан УАЗ көлігімен 4 құтқарушы оқиға орнына барды. Жас жігітті әкесі тауға қарай 50 шақырым жерден аман-есен тауып алды», – деп мәлімдеді өрт сөндіру және авариялық-құтқару қызметі.
</blockquote>

Жаңақорғанда жоғалған қойшы табылды

<a href="https://kyzylorda-news.kz/">Kyzylorda-news.kz.</a> Референдумға қатысты мессенджерлерде тарайтын хабарламалар мен әлеуметтік желіде жарияланған посттар үгіт-насихатқа жатады. Яғни, ресми БАҚ-та жарияланған мақалалармен деңгейі бірдей. Бұл туралы бүгін референдум орталық комиссияссының алғашқы отырысында АҚДМ ақпарат комитетінің төрағасы Қанат Ысқақов мәлімдеді.
Қазақстандықтар ұсыныстарды қолдай да, қарсы да шыға алады. Алайда Қанат Ысқақовтың сөзінше, кей жарияланымдар заңға қайшы келуі мүмкін.&nbsp;
Мысалы, фейк парақшалар мен анонимді каналдардан үгіт-насихат жасауға болмайды. Мәтін мемлекеттің&nbsp;қауіпсіздігіне қауіп төндірмеуі, зорлық-зомбылыққа шақырмауы керек. Сондай-ақ, әлеуметтік және нәсілдік араздық тудыруға болмайды.&nbsp;
5 маусым күні сайлау учаскелерінде маскалы режим мен Ashyq жүйесі жұмыс істеуі мүмкін. Еліміздің бас санитар дәрігері Айжан Есмағамбетова референдум күніне арнап бөлек қаулы шығаратынын хабарлады.&nbsp;Ондағы ереже дауыс беру күнгі эпидахуалға байланысты болмақ.

Референдум-2022: Әлеуметтік желіде жарияланған посттар үгіт-насихат болып есептеледі

<a href="https://kyzylorda-news.kz/">Kyzylorda-news.kz.</a>&nbsp;Қазгидромет алдағы күндерге арналған ауа райы болжамын жариялады.
Мамыр мерекелері жылумен және табиғатқа саяхаттарымен танымал. Бірақ мұндай ауа райын тек оңтүстік аймақтардың тұрғындары ғана тамашалай алады. Иран аудандарынан келетін жылы циклон, елдің оңтүстік жартысына ауыса бастайды, күн сайын ауа температурасы жоғарылайды. Бірақ солтүстік облыстар суық антициклонның ықпалында болады. Өте жоғары жылдамдықпен ол ауа температурасының қысқа мерзімге, бірақ айтарлықтай төмендеуіне әкеледі – түнде термометрлер қайтадан нөлден төмен түседі.

Мереке күндері ауа райы қандай болады?

<a href="https://kyzylorda-news.kz/">Kyzylorda-news.kz.</a> Бүгін «Қамқор» акциясы аясында Қызылорда облыстық ішкі саясат басқармасының «Қоғамдық келісім» КММ директорының орынбасары Фархат Әбдібағдатұлы, Славяне этномәдени бірлестігінің жетекшісі Галина Щербакова және Ассамблея жастар ұйымының белсенділері Ұлы Отан соғысының ардагері Любовь Колесникті мерейлі мерекемен құттықтады.
Арнайылап үйіне барып, тәттіге толы себет пен «Қоғамдық келісім» мекемесінің директоры Бақытжан Жарылқасынұлының құттықтауын табыстады.
Жеңіс күнін жақындатуға үлес қосқан Любовь Сергеевна ғасырға жуық ғұмырында талай асудан мұқалмай өтіп, еңбек майданында қызмет еткен. Мерейлі мереке қарсаңында ақ тілекпен келген жандарға өз пікірін білдіре отырып, көрсетілген құрмет үшін шынайы алғысын жеткізді.
Айта кетейік, Любовь Сергеевна 1925 жылғы 4 тамызда Оңтүстік Қазақстан облысы, Арыс қаласында әскери қызметшілер отбасында дүниеге келген. Жұбайы Николай Севастьянович Колесник те соғыс ардагері. Жергілікті медициналық техникумда оқып, кәмелет жасқа толысымен 1944 жылы әскер қатарына шақырылған. Соғыс кезінде Белорусь фронтының дала госпиталінде медбике қызметін атқарып, ержүрек батылдығымен көзге түскен. Соғыс аяқталған соң госпитальда жұмыс жасады. 1945 жылдың қыркүйегінде елге оралып, сол жылы Қызылорда қаласындағы Локомотив депо медпунктіне фельдшер болып жұмысқа орналасты. Осы қызметтен зейнетке шыққан.
Любовь Сергеевна 2 ұл, 1 қыз тәрбиелеп өсірді.
<img src="https://kyzylorda-news.kz/wp-content/uploads/2022/05/veteran1.jpg" alt="" />

Ұлы Отан соғысы ардагеріне құрмет көрсетілді

<a href="https://kyzylorda-news.kz/">Kyzylorda-news.kz.</a>&nbsp;Бүгін облыс әкімінің орынбасары Б.Шаменованың төрағалығымен «Халықты жұмыспен қамту және әлеуметтік көмек мәселелері» жөніндегі мәжіліс отырысы өткізілді.
Мәжіліске бірқатар облыстық басқарма басшылары, орталық мемлекеттік органдар және қала, аудан әкімдерінің орынбасарлары мен аудандық жұмыспен қамту, әлеуметтік бағдарламалар және азаматтық хал-актілерін тіркеу бөлімдерінің басшылары бейнебайланыс арқылы қатысты.
Мәжілісте міндетті әлеуметтік медициналық сақтандыру жүйесі, 2022-2025 жылдарға арналған Өңірлік жұмыспен қамту жол картасының және Кәсіпкерлікті дамыту жөніндегі ұлттық жобаның және атаулы әлеуметтік көмектің жүзеге асырылуы мен мүгедектігі бар адамдарды әлеуметтік қорғау туралы мәселелер қаралды.
Мәжіліс қорытындысында, Қызылорда қаласы мен аудан әкімдіктеріне жұмыс берушілермен тиісті жұмыстар жүргізіп, жаңа жұмыс орындарының құрылуын, олардың ақпараттық жүйеге енгізілуін, жұмыспен қамту саласындағы барлық белгіленген индикаторлардың орындалуын және мүгедектігі бар адамдарды әлеуметтік қорғалуын қамтамасыз ету тапсырылды.

Халықты жұмыспен қамту және әлеуметтік көмек мәселелері жөніндегі өңірлік комиссия отырысы өтті

<a href="https://kyzylorda-news.kz/">Kyzylorda-news.kz</a>. Елордада «3.2.1. Старт» әлеуметтік жобасының жеңімпаздары анықталды.
Қорқыт ата атындағы Қызылорда университетіндегі «Business Start» инновациялық жобаларды іске асыру орталығының басшысы Жанарыс Түбекбаев пен студент Айдос Елшібек байқауда жеңімпаз атанып, 1 миллион теңге иеленді. Әріптестеріміз «Қаржылық сауаттылықты дамыту платформасы» жобасын ұсынған болатын.
Байқауда 18-35 жас аралығындағы жастар БҰҰ-ның тұрақты мақсаттары бойынша өз жобаларын таныстырды. Жас кәсіпкерлердің бизнес идеялары білім беру, таза энергия, су, қоқысты қайта өңдеу мәселелерін шешуге бағытталған.
Сайысқа 300-ден аса өтініш келіп түсіп, нәтижесінде 40 жоба жартылай финалға өтті. Комиссия оның ішінде ақтық сайысқа 10 жобаны іріктеп алды.
Айта кетейік, «3.2.1.Старт!» жобасы 2016 жылдан бері ұйымдастырылып келеді. Осы уақытқа дейін 15 жеңімпаз анықталып, жобаларын дамыту үшін қаржылай қолдау көрсетілді.

Қызылордалық жас кәсіпкерлердің жобасы қаржылай қолдау тапты

<a href="https://kyzylorda-news.kz/">Kyzylorda-news.kz.</a>&nbsp;Президент Қасым-Жомарт Тоқаев салтанатты рәсімге қатысушыларды&nbsp; Отан қорғаушы күнімен және Жеңіс мейрамымен құттықтап, еліміздің қауіпсіздігін қамтамасыз ету ісіндегі әскери қызметшілер мен арнаулы мемлекеттік органдар қызметкерлерінің үлесін ерекше атап өтті.
<blockquote>
 «Биыл Қазақстан Қарулы Күштерінің құрылғанына 30 жыл толып отыр. Осы кезеңде әскеріміз айбынды армияға айналды. Қырағы жауынгерлеріміз ел шебін қас қақпай күзетіп тұр. Олар мемлекеттігімізді нығайтуға зор еңбек сіңіруде. Қарулы Күштеріміз – Тәуелсіздіктің мызғымас тұғыры, елдіктің берік қалқаны», – деді Мемлекет басшысы.
</blockquote>
<img src="https://www.akorda.kz/public/assets/media/uploadMedia/1651820565_KZ3_6146.jpg" alt="" />
Президент жақсы жабдықталған заманауи армия мемлекеттілігіміздің берік қорғаны екенін айтты.
<blockquote>
 – Геосаяси тұрақсыздық, жаңа сын-тегеуріндер мен қауіп-қатерлер жағдайында біз ұлттық мүддемізді қорғауға, мемлекетіміздің егемендігі мен аумақтық тұтастығын сақтауға дайын болуымыз керек. Сондықтан қорғаныс әлеуетін нығайту әрдайым біздің маңызды басымдығымыз болады, – деді Қасым-Жомарт Тоқаев.
</blockquote>
<img src="https://www.akorda.kz/public/assets/media/uploadMedia/1651820700_DSC_8055_2.jpg" alt="" />
Мемлекет басшысы күштік органдарда қызмет етудің абыройлы миссия және үлкен жауапкершілік екенін атап өтті. Оның айтуынша,&nbsp; Қазақстан Қарулы Күштерінің сарбаздары мен сардарлары өздерінің ептіліктері мен қабілеттерін тұрақты түрде шыңдай отырып, озық жауынгерлік шеберліктерін көрсетіп келеді.
Президент Екінші Дүниежүзілік соғыста 500-ге жуық жерлесіміз Кеңес Одағының батыры атанғанын, бірақ көптеген майдангеріміздің ерліктері түрлі себептерге байланысты елеусіз қалғанын еске салды.&nbsp;
<img src="https://www.akorda.kz/public/assets/media/uploadMedia/1651820565_KZ1_4637_2.jpg" alt="" />
Қасым-Жомарт Тоқаев жиынға қатысушы офицерлерге аты аңызға айналған үш ержүрек жауынгердің ерен ерлігі туралы айтты. Бұл майдангерлерге қаза болғаннан кейін бүгін «Халық қаһарманы» атағы берілді.
<blockquote>
 – Біріншісі – атақты мерген Төлеуғали Әбдібеков. Ол бір өзі майдан даласында 397 жаудың көзін жойған. Бұл ерлік тиісті құжаттармен дәлелденген. Қазақтың қаһарман ұлы қаза тапқаннан кейін Кеңес Одағының Батыры атағына ұсынылған. Бірақ, ерлігі ескерусіз қалды. Капитан Александр Несмиянов та ерекше ерлік пен қаһармандық көрсетті. Ол бораған оққа қарамастан, орда бекінген бүкіл батальонды өзімен бірге шабуылға көтерді. Жау қорғанысын бірінші болып бұзған Несмиянов жаудың 20 жауынгерімен жалғыз алысып, 13-інің көзін жойған. Қалғанын бас сауғалауға мәжбүр етті. Кезекті ұрыста ол жау шебінің тылына өтіп, басты қауіпті өзіне бұрды, сөйтіп жаудың қорғаныс шебін серіктерінің бұзып өтуіне мүмкіндік жасады. Ал ротаның екі командирі жараланған соң, басшылықты өз &nbsp;қолына алды. Александр Несмиянов үш рет Кеңес Одағының Батыры атағына ұсынылды, бірақ, әр кез оған әділетсіздік жасалып, елеусіз қалды. Жерлесіміз Ыбырайым Сүлейменов те құралайды көзге атқан нағыз мерген болған. Ол бір жылдың ішінде 289 жау әскерін жойды. Бұл ерлік те тарихи деректерде көрсетілген. Қазақтың қаһарман қызы Мәншүк Мәметова екеуі соңғы демі қалғанша жаумен арпалысып, қаза тапты. Батыр атағына екеуі қатар ұсынылғанымен, Ыбырайым Сүлейменовтің ерлігі жоғары деңгейде бағаланбады, – деді Президент.
</blockquote>
<img src="https://www.akorda.kz/public/assets/media/uploadMedia/1651820565_KZ1_4652_2.jpg" alt="" />
Қасым-Жомарт Тоқаев салтанатты іс-шараға қатысқан Төлеуғали Әбдібеков пен Ыбырайым Сүлейменовтің туыстарына Халық қаһарманының ерекшелік белгісі «Алтын жұлдыз» бен «Отан» орденін табыстады. Ал Александр Несмияновтың наградасы музей төрінен орын алады.
Төлеуғали Әбдібековтің туысы Айгүл Кемелбаева Қасым-Жомарт Тоқаевқа және даңқты атасының атын мәңгі есте сақтауға атсалысқан жауапты тұлғалардың бәріне алғысын айтты. Ыбырайым Сүлейменовтің қарындасы Айткүл Сүлейменова Мемлекет басшысына шын жүректен алғыс білдірді. Сондай-ақ Президентке зор денсаулық тілеп, Жаңа Қазақстанды құру ісінде табысқа жетуіне ниеттестік білдірді және сөзін «Біз Сізге сенеміз», – деп аяқтады.&nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp;
<blockquote>
 – Бұл – шын мәнінде, тарихи әділдіктің салтанат құруы. Біз ерлеріміздің есімін жаңғыртып, оларды ұлықтай беретін боламыз. Өйткені, ерлік ешқашан ескірмейді. Майдангер аға буын кейінгі ұрпаққа әрдайым үлгі-өнеге, – деді Мемлекет басшысы.
</blockquote>
<img src="https://www.akorda.kz/public/assets/media/uploadMedia/1651821030_KZ4_4347.jpg" alt="" />
<img src="https://www.akorda.kz/public/assets/media/uploadMedia/1651820682_DSC_7051_2.jpg" alt="" />
<img src="https://www.akorda.kz/public/assets/media/uploadMedia/1651820690_DSC_6985_2.jpg" alt="" />
Сөзінің соңында Қасым-Жомарт Тоқаев мемлекетіміздің тұтастығы мен қауіпсіздігін қорғап жүрген еліміздің барша азаматына алғыс айтты.
Бұдан кейін Президент мемлекеттік наградаларды табыстап, офицерлерге әскери және арнаулы атақтар, сыныптық шендер берді.
<img src="https://kyzylorda-news.kz/wp-content/uploads/2022/05/shen-scaled.jpg" alt="" />
<img src="https://kyzylorda-news.kz/wp-content/uploads/2022/05/dank-orden-scaled.jpg" alt="" />

Қасым-Жомарт Тоқаев мемлекеттік наградалар, жоғары әскери және арнаулы атақтар, сыныптық шендер беру рәсіміне қатысты

<a href="https://kyzylorda-news.kz/">Kyzylorda-news.kz</a>. Қазақстан халқы Ассамблеясының Аналар кеңесі құрылған сәттен бастап тәрбиелік маңызы зор, болашағымыз саналған жастарға қажетті түрлі жобалар бойынша жұмыс істеп келеді. Осы жылдан бастап кеңес «Мәдениетті ана – мәдениетті ұлт» жобасын қолға алып, бұл бағыттағы атқарылған істер ауқымы арта түсуде.
Осы орайда Қазақстан халқы Ассамблеясының жанындағы республикалық Аналар кеңесінің төрайымы Назипа Шанаи, ҚР Мәжілісінің депутаты Наталья Жұмаділдаева Сыр өңіріне жұмыс сапарымен келді. Аталмыш жобаны жүзеге асыру мақсатында Достық үйінде этномәдени бірлестіктің жетекшілері, өңірлік Аналар кеңесінің белсенділері, облыстық, қалалық мәслихат депутаттары, іскер әйелдермен жүздесті. Алдағы жоспарларды талқылады.
Сыр өңіріндегі Аналар кеңесінің жүргізілген жемісті жұмысы туралы облыстық Аналар кеңесінің төрайымы Рахима Ахметова айтып өтті.
<blockquote>
 «Біз бірлесе атқарғанда алдымызға қойған ең ұлы мақсат- ұлтымызды мәдениетті етіп тәрбиелеу. Себебі бүгінгі ғалымдар XX ғасырдағы тұлғаларды зерттеп жатыр. Ал бізден кейінгі ұрпақ біздің кезеңіміздегі кімді зерттейді? Осы тұрғыда біз Аналар кеңесі еңбегі жанған арулар, яғни өз күшімен, білімімен жетістікке жеткен жандарды елге танытуымыз қажет. Шалғай ауылдардан шығып, өз қарым-қабілетінің, ана тәрбиесінің нәтижесінде билікке жеткен азаматтардың аналарын жұртқа көрсетуіміз керек. Үйдің модераторы да медиаторы да ана. Сондықтан өскелең ұрпақты дұрыс тәрбиелеу біздің басты миссиямыз. Мәдениетті аналардан ғана мәдениетті ұлт шығады», – деді Аналар кеңесінің төрайымы Назипа Шанаи.
</blockquote>
Кездесу барысында отбасылық құндылықтар кеңінен талқыланып, өзекті мәселелер сөз болды. «Мәдениетті ана – мәдениетті ұлт» жобасының негізгі бағыттары бойынша жұмысты қарқынды түрде жүргізу тапсырылды.
Айта кетейік, Аналар кеңесі 2014 жылдан бері жұмыс істейді. Ал Сыр өңірінде 113 аналар кеңесі бар. Оның құрамында 1103 белсенді ана отбасында өзекті мәселелерді шешуге белсене атсалысып жүр.

Назипа Шанаи: Мәдениетті аналардан ғана мәдениетті ұлт шығады

<a href="https://kyzylorda-news.kz/">Kyzylorda-news.kz</a>. ҚР Білім және ғылым І вице-министрі Шолпан Каринова Сыр еліне жұмыс сапары барысында Қорқыт ата атындағы Қызылорда университетінің профессор-оқытушылары және белсенді студенттермен кездесті.
Кездесу «Баланың кешенді дамуы: шығармашылық әлеуетін ашу» атты музыка, көркем еңбек пәндері мұғалімдерінің және қосымша білім беру ұйымдары педагогтерінің республикалық съезі аясында өтті. Жиында Басқарма Төрағасы-Ректор Бейбіткүл Кәрімова білім, ғылым саласында атқарылған жұмыстар мен алдағы жоспарларды баяндады.
<blockquote>
 «Австралия мемлекетінің Кәсіби білім беру Стандарты негізінде Қорқыт ата университетінің педагогикалық бағыттағы білім сапасын арттыру бағытында «Болашақ педагогтарды қалыптастыру моделі» әзірленді. Модельді жүзеге асыру үшін облыстық білім басқармасымен бірігіп сапалы педагогты қалыптастыру бойынша 2022-2025 жылдарға арналған екі жақты Меморандум жасалды. Биыл аймақта 7514 оқушы мектеп бітіреді. Оның 61% (4733 оқушы) педагогикалық бағытты таңдады. Осыған орай, өңірдің білім ұйымдарын сапалы педагог кадрларымен қамтамасыз ету үшін ғылыми зерттеу жұмыстарына жетекшілік жасау, «Жас педагог» курсын ұйымдастыру, пәндік олимпиада женімпаздарына университет грантын тағайындау, оқу ақысына жеңілдіктер беру т.б. жұмыстар жүргізіледі», – деді Бейбіткүл Сәрсемханқызы.
</blockquote>
Сонымен қатар, басқосуда еңбек нарығына қажетті мамандар даярлау, педагог статусы, жоо-да білім сапасын жақсарту, білім алушылардың ғылыми мақала жазуы және ҰБТ сұрақтары бойынша ұсыныстар айтылды.
Шара барысында ғылыми-инновациялық, академиялық саясат және тәрбие беру жұмыстары бойынша университеттің жетістіктері мен жастар ұйымдарының жобалары таныстырылды. Сондай-ақ, қолөнер шеберлері мен университет ғалымдарының ғылыми еңбектерінің кітап көрмесі қойылды.
Айта кетейік, биыл Қорқыт ата атындағы Қызылорда университеті тәуелсіз аккредиттеу және рейтинг агенттігі (НААР) арқылы халықаралық мамандандырылған аккредиттеу рәсімінен сәтті өтті. Нәтижесінде 108 білім беру бағдарламасына халықаралық мамандандырылған аккредиттеу туралы куәлігі берілді.
Қазіргі таңда оқу орнында 8055 білім алушы бар. Ал университеттің білім беру және ғылыми қызметін 488 оқытушы-профессор жүргізуде. Олардың арасында 22 ғылым докторы, 175 ғылым кандидаты, 34 PhD қызмет етеді.
<img src="https://kyzylorda-news.kz/wp-content/uploads/2022/05/p1888826-scaled.jpg" alt="" />
<img src="https://kyzylorda-news.kz/wp-content/uploads/2022/05/p1888862-scaled.jpg" alt="" />
<img src="https://kyzylorda-news.kz/wp-content/uploads/2022/05/p1888912-scaled.jpg" alt="" />
<img src="https://kyzylorda-news.kz/wp-content/uploads/2022/05/p1899013-scaled.jpg" alt="" />
<img src="https://kyzylorda-news.kz/wp-content/uploads/2022/05/p1899361-scaled.jpg" alt="" />
<img src="https://kyzylorda-news.kz/wp-content/uploads/2022/05/p1899455-scaled.jpg" alt="" />

ҚР Білім және ғылым бірінші вице-министрі университеттің профессор-оқытушылары, белсенді студенттерімен кездесті

<a href="https://kyzylorda-news.kz/">Kyzylorda-news.kz.</a> Бүгін бұрынғы Т.Шевченко атындағы көшеге Кеңес Одағының батыры Үрмәш Түктібаевтың есімі берілді.
Кеңес Одағы батырының атына көше беру және ескерткіш тақтаның ашылу шарасына ҚР Сенатының депутаты М.Бақтиярұлы, қала әкімінің орынбасары Жанмұрат Сейілов, облыстық ардагерлер кеңесі төрағасының орынбасары Өмірбек Мөрәліұлы, Ү.Түктібаевтың бауырлары, ағайын-туыстары мен қала тұрғындары қатысты.
<blockquote>
 «Бұл шара еліміздің ең қасиетті де, қастерлі мерекелері 7 мамыр – Отан қорғаушылар күні және 9 мамыр – Ұлы Жеңіс күні, Қазақстан Республикасы Қарулы Күштерінің құрылғанына 30 жыл мерейтойы қарсаңында ұйымдастырылуымен ерекшеленіп отыр. Бүгін міне, киелі Сыр өңірінің даңқты перзенттерін құрмет етудің тағы бір шарасын өткізудеміз. Қаламыздың көрікті ауданындағы көшелерінің бірін Кеңес Одағының батыры Үрмәш Түктібаев атамыздың атымен атағалы тұрмыз. Мереке күнi бiз азаматтық арды ту етіп, өз өмiрлерiн құрбан еткен батыр бабаларымыздың алдында бас иемiз. Салтанатты түрде ашылғалы тұрған жаңа көше, ынтымақты халқымыздың мерейін асқақтатар көрікті орындардың біріне айналсын», – деген қала әкімінің орынбасары Жанмұрат Жақсымұратұлы барлық қатысушыларды мерекелерімен құттықтады.
</blockquote>
Сондай-ақ, шара барысында ҚР Сенатының депутаты Мұрат Бақтиярұлы мен облыстық ардагерлер кеңесі төрағасының орынбасары Өмірбек Мөрәліұлы атамыздың өмір жолы туралы сөз етті.
<img src="https://kyzylorda-news.kz/wp-content/uploads/2022/05/koshe.jpg" alt="" />
<img src="https://kyzylorda-news.kz/wp-content/uploads/2022/05/koshe1.jpg" alt="" />
<img src="https://kyzylorda-news.kz/wp-content/uploads/2022/05/koshe3.jpg" alt="" />

Қызылорда қаласы көшелерінің біріне Кеңес Одағының батыры Ү.Түктібаевтың есімі берілді

<a href="https://kyzylorda-news.kz/">Kyzylorda-news.kz.</a> Президент мемлекеттік наградалар, жоғары әскери және арнаулы атақтар, сыныптық шендер беру рәсіміне қатысты.
Қасым-Жомарт Тоқаев еліміздің қауіпсіздігін қамтамасыз ету ісіндегі әскери қызметшілер мен арнаулы мемлекеттік органдар қызметкерлерінің үлесін ерекше атап өтті.
Мемлекет басшысы Екінші Дүниежүзілік соғыста 500-ге жуық жерлесіміз Кеңес Одағының батыры атанғанын, бірақ көптеген майдангеріміздің ерліктері түрлі себептерге байланысты елеусіз қалғанын еске салды.
Қасым-Жомарт Тоқаев жиынға қатысушы офицерлерге аты аңызға айналған үш ержүрек жауынгердің ерен ерлігі туралы айтты. Бұл майдангерлерге қаза болғаннан кейін бүгін «Халық қаһарманы» атағы берілді.
<blockquote>
 «Біз ерлеріміздің есімін жаңғыртып, оларды ұлықтай беретін боламыз. Өйткені, ерлік ешқашан ескірмейді. Майдангер аға буын кейінгі ұрпаққа әрдайым үлгі-өнеге», – деді Мемлекет басшысы.
</blockquote>
Президент мемлекеттік наградаларды табыстап, офицерлерге әскери және арнаулы атақтар, сыныптық шендер берді.

Қазақстан және Қызылорда облысының жаңалықтары