<a href="https://kyzylorda-news.kz/">Kyzylorda-news.kz.</a> Президент Қасым-Жомарт Тоқаевтың Қазақстан халқына үндеуінің толық мәтіні жарияланды.
Құрметті отандастар!
Қазақстан өте маңызды әрі бетбұрысты кезеңге қадам басқалы тұр. 5 маусым күні азаматтарымыз жалпыұлттық референдумда дауыс береді. Конституцияға түзетулер енгізу мәселесі бойынша шешім қабылдайды. Бұл – мемлекеттің және бүкіл қоғамның болашағын айқындайтын жауапты сәт. Ел тағдыры ешкімді бей-жай қалдырмайтыны анық.
Біз қазір барлық саланы жаңғыртуға кірістік. Осы жолда мемлекетті басқару үлгісін түбегейлі өзгерту қажеттігі туындады. Сол себепті мен наурыз айындағы Жолдауымда саяси жаңғырудың ауқымды бағдарламасын ұсындым. Оның басты мақсаты – елімізді одан әрі демократияландыру, халықтың мемлекетті басқару ісіне қатысу мүмкіндігін кеңейту. Сондай-ақ Үкіметтің тиімділігін арттыру. Бұл өзгерісті толық жүзеге асырсақ, ықпалды парламенті бар президенттік республика үлгісіне біржола көшеміз.
Конституциялық реформа адам құқықтары мен бостандықтарын қорғау жүйесін барынша күшейтеді. Сонымен бірге еліміздегі саяси бәсекенің әділ және ашық болуын қамтамасыз етеді.
Біз Ата заңымыздың отыздан астам бабына өзгеріс енгізгелі отырмыз. Оның бәрі азаматтарымыздың мүддесіне толық сай келеді. Осылайша мемлекетімізді түбегейлі жаңғыртамыз. Сол арқылы Екінші Республиканың негізін қалаймыз
Құрметті отандастар!
Еліміздің тарихында Конституцияға енгізілетін өзгерістер алғаш рет жалпыхалықтық референдум арқылы жүзеге асырылады.
Референдум өткізу – Қазақстанда дамыған демократиялық қоғам құру жолындағы маңызды қадам.
Ата заңға енгізілетін түзетулер жобасы елімізде бір ай бойы қызу талқыланды. Түсіндіру жұмыстары жүргізілді. Қоғамда конституциялық реформаға қатысты пікірлер көп айтылып жатыр. Оның ережелері Президенттің артықшылықтары мен өкілеттігін күшейтуге емес, билік тармақтары арасындағы үйлесімді және тепе-теңдік жүйені нығайтуға, барлық азаматтың мүддесін, құқығы мен еркіндігін қорғауға бағытталған.
Бүкіл халықтың Конституцияға енгізілетін өзгерістерге қатысты ерікті таңдауы Жаңа, Әділетті Қазақстанның берік іргетасын қалайды. Біз бірлесе отырып, шын мәнінде, Жаңа Қазақстан құрамыз. Онда әлеуметтік әділдік жаңа қоғамдық келісімнің басты құндылығы және негізгі өзегі болады.
Референдум қоғамымыздың азаматтық кемелдігі мен саяси саналылығын бағалауға мүмкіндік береді. Референдумның орталық комиссиясы мен басқа да уәкілетті мемлекеттік органдар сайлау заңнамасындағы барлық норманың мүлтіксіз сақталуын қамтамасыз етеді. Дауыс беру барысын халықаралық бақылаушылар мен еліміздегі қоғамдық бірлестіктердің өкілдері қадағалайды.
Сайлау учаскесіндегі сіздің дауысыңыз қоғамдық өмірдің әділ әрі түсінікті жаңа ережелерін айқындауда маңызды және шешуші рөл атқаруы мүмкін. Сіз сайлау учаскесіне келу арқылы халқымыздың бірлігі мен ынтымағы мығым екенін көрсетесіз.
Бұрын-соңды болмаған құбылмалы геостратегиялық жағдайда және еліміздің алдында тұрған күрделі міндеттерді орындау үшін біздің бірлігіміз бекем, ынтымағымыз берік болуға тиіс. Шынайы демократия әрбір азаматтың ортақ іске белсенді әрі саналы түрде қатысуын білдіреді. Сіз жаңа түзетулерге дауыс бере отырып, жемқорлыққа, тамыр-таныстыққа, саясат пен экономикадағы монополияға батыл қарсы шығасыз.
Құрметті отандастар, сіздерді тарихи таңдау жасауға шақырамын. Өйткені, бұл Қазақстанның даму бағдарын айқындайды. Әрқайсыңыз біртұтас Қазақстан халқының ажырамас бөлшегісіз және тұтас ұлттың болашағына ықпал ете аласыз. Демек, бұл – өз тағдырыңыз деген сөз. Отанымыздың тағдыры сіздерге байланысты.
Алдағы референдум мемлекетімізді нығайтуға және қоғамды тың серпінмен дамытуға жол ашады. Мен әрбір азаматымызды ел тағдырын айқындайтын тарихи таңдау жасауға шақырамын. Бұл референдумда әр азаматтың дауысы – маңызды. Әрбір азамат тұтас ұлттың тағдырына, яғни тікелей өз тағдырына оң ықпал ете алады.
Ендеше, 5 маусым күні өз таңдауымызды жасайық!
Жаңа Қазақстанды бәріміз бірге құрайық!

Мемлекет басшысы Қасым-Жомарт Тоқаевтың Қазақстан халқына үндеуі

<a href="https://kyzylorda-news.kz/">Kyzylorda-news.kz.</a> Мемлекет басшысы қазақстандықтарды 5 маусым күні өз таңдауын жасауға шақырды.
<blockquote>
 «Алдағы референдум мемлекетімізді нығайтуға және қоғамды тың серпінмен дамытуға жол ашады. Мен әрбір азаматымызды ел тағдырын айқындайтын тарихи таңдау жасауға шақырамын. Бұл референдумда әр азаматтың дауысы – маңызды. Әрбір азамат тұтас ұлттың тағдырына, яғни тікелей өз тағдырына оң ықпал ете алады. Ендеше, 5 маусым күні өз таңдауымызды жасайық! Жаңа Қазақстанды бәріміз бірге құрайық», – деді Президент.
</blockquote>

Мемлекет басшысы қазақстандықтарды өз таңдауын жасауға шақырды

<a href="https://kyzylorda-news.kz/">Kyzylorda-news.kz.</a>&nbsp;Қасым-Жомарт Тоқаев алдағы референдумға қатысты бейнеүндеу жолдауда.
«Қазақстан өте маңызды әрі бетбұрысты кезеңге қадам басқалы тұр. 5 маусым күні азаматтарымыз жалпыұлттық референдумда дауыс береді. Конституцияға түзетулер енгізу мәселесі бойынша шешім қабылдайды.
Бұл – мемлекеттің және бүкіл қоғамның болашағын айқындайтын жауапты сәт. Ел тағдыры ешкімді бей-жай қалдырмайтыны анық. Біз қазір барлық саланы жаңғыртуға кірістік. Осы жолда мемлекетті басқару үлгісін түбегейлі өзгерту қажеттігі туындады. Сол себепті, мен наурыз айындағы Жолдауымда саяси жаңғырудың ауқымды бағдарламасын ұсындым. Оның басты мақсаты – елімізді одан әрі демократияландыру, халықтың мемлекетті басқару ісіне қатысу мүмкіндігін кеңейту.
Сондай-ақ, Үкіметтің тиімділігін арттыру. Бұл өзгерісті толық жүзеге асырсақ, ықпалды парламенті бар президенттік республика үлгісіне біржола көшеміз. Конституциялық реформа адам құқықтары мен бостандықтарын қорғау жүйесін барынша күшейтеді. Сонымен бірге еліміздегі саяси бәсекенің әділ және ашық болуын қамтамасыз етеді.
Біз Ата заңымыздың отыздан астам бабына өзгеріс енгізгелі отырмыз. Оның бәрі азаматтарымыздың мүддесіне толық сай келеді. Осылайша, мемлекетімізді түбегейлі жаңғыртамыз. Сол арқылы Екінші Республиканың негізін қалаймыз», – деді Мемлекет басшысы.

Қасым-Жомарт Тоқаев: Мемлекеттің және бүкіл қоғамның болашағын айқындайтын жауапты сәт

<a href="https://kyzylorda-news.kz/">Kyzylorda-news.kz.</a> ҚР Президент Қасым-Жомарт Тоқаевтың референдумға байланысты Қазақстан халқына бейнеүндеуі басталды.

Президент Қасым-Жомарт Тоқаевтың референдумға қатысты бейнеүндеуі басталды

<a href="https://kyzylorda-news.kz/">Kyzylorda-news.kz.</a> Бүгін сағат Нұр-Сұлтан қаласының уақытымен 16.00-де Президент Қасым-Жомарт Тоқаев 5 маусым күні өтетін референдумға байланысты республикалық телеарналар арқылы Қазақстан халқына бейнеүндеу жасайды.

Бүгін Қасым-Жомарт Тоқаев Қазақстан халқына үндеу жолдайды

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> ҚР Бас прокурорының орынбасары Болат Дембаев референдум алдындағы күні және дауыс беру күнінде үгіт-насихат жүргізуге тыйым салынатынын ескертті.
<blockquote>
 «Биылғы 5 маусымда Конституцияға өзгерістер мен толықтыруларды қабылдау мәселесі бойынша республикалық референдум өткізіледі. Ертең, 4 маусымда сағат 00:00-де референдум алдындағы үгіт-насихат жүргізу аяқталады («Республикалық референдум туралы» Конституциялық заңның 7-бабының 4-тармағы). Бұл үгіт-насихатқа, соның ішінде қоғамдық пікірге сауалнама жүргізу нәтижелерін немесе референдум нәтижелерінің болжамдарын жариялауға қатысты мәліметтерге референдум өткізілетін күннің алдындағы күні және ол өткізілетін күні, яғни 4 және 5 маусымда тыйым салынады», – делінген Б. Дембаевтың үндеуінде.
</blockquote>
Оның айтуынша, яғни үгіт-насихатқа тыйым салынған кезеңде бұл іс-шаралар жүргізілген жағдайда ҚР Әкімшілік құқық бұзушылық туралы кодексінің (ӘҚБтК) 102-бабы бойынша жауапкершілік ескерілген.
<blockquote>
 «Екі немесе одан да көп рет немесе басқа біреу үшін дауыс беру, сондай-ақ учаскелік референдум комиссиясы мүшесінің азаматтарға өзге адамдар үшін дауыс беруге мүмкіндік жасау мақсатында бюллетеньдерді беру әрекеті ӘҚБтК-нің 108 және 110-баптары бойынша жауаптылыққа әкеп соғатынына да назар аударамыз», – дейді Бас прокурордың орынбасары.
</blockquote>
Оның сөзіне қарағанда, Конституцияға (83-бап) сәйкес, прокуратура органдары референдумға дайындық пен оны өткізудің барлық сатыларында заңдылықтың сақталуына жоғары қадағалауды қамтамасыз етіп отыр. Аталған мәселелерді ескере отырып, Бас прокуратура заңдылықты қамтамасыз ету және құқық бұзушылықтардың алдын алу мақсатында азаматтарды, қоғамдық бірлестіктер мен бұқаралық ақпарат құралдарын қолданыстағы заңнаманы қатаң сақтауға шақырды.

Бас прокуратура сайлау алдындағы «тыныштық» күні туралы ескертті

<a href="https://kyzylorda-news.kz/">Kyzylorda-news.kz.</a> Қызылорда қалалық Полиция басқармасының Ақсай полиция бөліміне қала тұрғыны арызданған болатын.
Мамыр айының 7-13 күндері аралығында белгісіз біреулер электр тарату тораптары мекемесіне тиесілі оқшаулағышын және трансформаторын ұрлап кеткен. Келтірілген шығының соммасы 5 миллион теңгені құрады.
Басқарманың криминалдық полиция бөлімі қызметкерлерінің жеделдігінің арқасында кезекші тәулікте үш күдікті азамат анықталып, ұсталды. Олар өз ісін толықтай мойындады. Күдіктілерге қатыстыешқайда кетпеу және тиісті мінез құлық туралы бұлтартпау шарасы таңдалды.
Аталған дерек бойынша, Қазақстан Республикасы Қылмыстық кодексінің 188-бабының 3-бөлігі (Ұрлық) бойынша сотқа дейінгі тергеп-тексеру әрекеттері жүргізілуде.

Электр тарату мекемесіне 5 миллион шығын келтірген үш күдікті ұсталды

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Қызылорда гарнизонында жергілікті әскери басқару органдарының әскери қызметшілері мен азаматтық персоналына 5 маусымда өтетін референдумның тарихи маңызы түсіндірілді.
Аталған шараға «Қарулы күштердің ардагерлері» республикалық қоғамдық бірлестігі Қызылорда облыстық филиалының төрағасы, Қарулы күштердің Құрметті ардагері запастағы подполковник Мыңділда Ршауовтыңқатысып, жалпыұлттық референдумның мақсаты мен міндеті жеткізді.
Мемлекет басшысының жалпыұлттық референдум өткізу бастамасын қолдай отырып, реформалар нәтижесінде еліміздің саяси, құқықтық, әлеуметтік-экономикалық барысына қатысты өзгерістерге қатысты басымдықтарғатоқталды.
<blockquote>
 «Өткелі тұрған республикалық референдум соңғы 27 жыл ішіндегі тарихи мәнге ие маңызды оқиға. Жоғарғы Бас қолбасшымыз айтқан естуші жаңа Қазақстанды қалыптастыру ісі сіз бен біздің қолымызда. Оны құруға әрқайсымыз өз үлесімізді қосуымыз керек», – деді Мыңділда Ршауов.
</blockquote>
Жиын соңындашараға қатысушылар жалпыұлттық референдум өткізу бастамасын қолдайтынын және Жаңа Қазақстанды құру жолында мемлекетке үлкен сенім артатындықтарын жеткізді.
<img src="https://kyzylorda-news.kz/wp-content/uploads/2022/06/c52a5c19-5f7a-4ccc-9249-607cc4aae60e.jpg" alt="" />

Референдум – үлкен өзгерістің бастауы

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Мемлекеттік хатшы Ерлан Қарин Ата Заңымызға қандай өзгерістер енгізілетінін айтып, оның ел дамуындағы маңызын түсіндірді, деп хабарлайды &nbsp;<a href="https://t.me/referendum2022_kz">referendum2022.kz</a>.
<blockquote>
 «Конституциялық реформалардың ең басты маңызы – саяси институттар арасындағы қарым-қатынасқа оптималды баланс орнату. Мысалы, Парламенттің статусын арттыру, Есеп комитетінің Жоғарғы аудиторлық палата болып өзгертілуі. Палата төрағасы жылына 2 рет Парламент алдында есеп береді. Бұл бюджеттің игерілуін қадағалау функциясын күшейтуге бағытталған», – дейді Ерлан Қарин.
</blockquote>
Сондай-ақ, Мемлекеттік хатшы Конституциялық соттың атқаратын қызметін ерекше атап өтті. Оған кез келген азамат шағымдана алатынын айтты. Адам құқықтарына ие уәкілдің конституциялық статусы барына, ол қандай да бір мемлекеттік органға тәуелді болмайтынына назар аударды.
Сөз соңында Мемлекеттік хатшы қазақстандықтарды референдумға белсене қатысуға шақырды.

Ерлан Қарин: Реформалардың ең маңыздысы – саяси институттар арасында тепе-теңдік орнату

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Жаңақорған ауданы, Өзгент ауылындағы «Өзгент» балаларды сауықтыру және демалыс аймағының салтанатты ашылуы өтті.
Салтанатты шараға бірінші ауысымға қабылданған әлеуметтік қолдауды қажет ететін және көп балалы отбасынан шыққан 20 балаға тосынсый жасап, сый-сияпат тарту етілді.
«Өзгент» лагерінде әр маусымда 20 баладан қабылданып, жалпы 160 баланы тынықтыру жоспарланып отыр. Мұнан бөлек, биылғы жазғы маусымда аудандағы «Тау самалы», «Талдысу» тынығу лагерьлеріне 470 бала тегін демалса, мектеп жанындағы күндізгі лагерьлер 5000 баланы жазғы демалыспен қамтитын болады.
Айта кету керек, мерекелік кеште балаларға арнап жезтаңдай әншілер мен халық оркестрі ән шырқап, мың бұралған бишілер өнерлерін көрсетті.

Жаңақорғанда балалар демалысы қалай ұйымдастырылды?

<a href="https://kyzylorda-news.kz/">Kyzylorda-news.kz.</a> Референдум өз уақытында қабылданды. Халық қуана қолдауда. Мемлекеттік тілге басты басымдылық беріліп, ұлттық қауіпсіздіктің қорғалуына назар аударылып, ел сенімінен шығатын Заң болады деп сенім артамыз. Мен Президент ұсынған референдумға өзгерістер енгізу туралы шешімін қолдаймын.
Естеріңізде болса, 1995 жылы қараша айында Қазақстанда “Республикалық референдум туралы” конституциялық заң қабылданған болатын. Содан бері елде конституциялық түзетулерге қатысты халықтық референдум ұйымдастырылған жоқ. Ал референдум демократияның маңызды институты болып табылатыны әу бастан-ақ белгілі. Себебі ондай шара кезінде, мемлекеттік маңызы бар мәселелерге қатысты тікелей бұқара халықтың пікірі міндетті түрде ескеріледі. Бұл дегеніміз, Президенттің Қазақстан халқына жолдауында айтылған “Халық үніне құлақ асатын Мемлекет” тұжырымдамасы аясының тынысын кеңейтпек. Яғни Халық пен билік ортасында тығыз қарым-қатынас қанатын кеңге жаяды деген сөз. Міне, осыған орай Мемлекет басшысы Қасым-Жомарт Кемелұлы Тоқаев алдағы конституциялық өзгерістер бойынша референдум өткізуді ұсынды.Бұл уақыт күттірмес мәселе.
ЖАҢА ҚАЗАҚСТАН Заңдарына да өзгерістер жаңаша толықтырылуы керек. 
Мен референдумды қолдаймын. Бәріңізді оған қатысуға шақырамын!
Гүлнар Жұмашева,
Облыстық ҚХА жанындағы Аналар кеңесінің мүшесі

Гүлнар Жұмашева: Ел сенімінен шығатын заң болады деп сенім артамыз

<a href="https://kyzylorda-news.kz/">Kyzylorda-news.kz.</a> **Қызылордада 1 маусым күні 16 және 14 жастағы жасөспірімдер *Раушан* Меңлібай мен Наргиз Жубандық екеуі үйлерінен қалалық демалыс паркіне кетіп, қайта оралмаған.**
<blockquote>
 «Аталған хабарлама бойынша қандай да бір ақпарат немесе жүрген жері туралы мәлімет білген жағдайда төменде көрсетілген телефон нөмірлеріне хабар берулеріңізді сұраймыз. Тел: 8(7242)-29-75-20 немесе 102 арнасына қоңырау соғуларыңызды болатынын хабарлаймыз», – делінген Қызылорда қалалық Полиция басқармасының таратқан хабарламасында.
</blockquote>

Қазақстан және Қызылорда облысының жаңалықтары